Ginzā Rabbā Vol.1 گنزا ربا رویۀ ا
Ginzā Rabbā Vol.1
Transliterated by: Majid Fandi Al-Mubaraki, Brian Mubaraki
Source: Julius Heinrich Petermann (1867) Thesaurus sive liber magnus liber vulgo Adami appellatus, 2 parts, Leipzig : Vol.1 [lines & pages are accoring to the original book]
Unicode, Revise & Editing according to Petermann's version by: Ibrāhīm Šafiʿī (University of Tehrān)
001
ࡌࡔࡀࡁࡀ ࡌࡀࡓࡀࡉ ࡁࡋࡉࡁࡀ ࡃࡀࡊࡉࡀ
ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡍࡅࡊࡓࡀࡉࡉࡀ ࡌࡍ ࡀࡋࡌࡉࡀ ࡖ ࡍࡄࡅࡓࡀ
ࡉࡀࡕࡉࡓࡉࡀ ࡖ ࡏࡋࡀࡅࡉࡀ ࡊࡅࡋࡄࡅࡍ ࡏࡅࡁࡀࡃࡉࡀ ࡀࡎࡅࡕࡀ ࡅࡆࡀࡊࡅࡕࡀ
ࡅࡔࡀࡁࡉࡒ ࡄࡀࡈࡀࡉࡉࡀ ࡍࡉࡄࡅࡉࡋࡉࡀ ࡋࡃࡉࡋࡉࡀ ࡓࡀࡌ ࡁࡀࡊࡕࡉࡀࡓ
ࡁࡓ ࡄࡀࡅࡀ ࡌࡅࡃࡀࡋࡀࡋ ࡞ ࡅࡋࡀࡁ ࡁࡉࡄࡓࡀࡌ ࡔࡀࡃࡀࡍ ࡁࡓ
ࡔࡀࡃࡉࡀ ࡊࡉࡎࡍࡀ ࡞ ࡅࡋࡏࡌ ࡄࡀࡅࡀ ࡌࡅࡃࡀࡋࡀࡋ ࡐࡕ ࡀࡍࡄࡀࡓ ࡞ ࡅࡋࡆࡀࡅࡀࡉ
ࡔࡀࡃࡉࡀ ࡌࡀࡌࡀࡍࡉࡀ ࡐࡕ ࡄࡀࡅࡀ ࡞ ࡅࡋࡔࡉࡕࡋࡀࡉ ࡄࡀࡅࡀ ࡁࡀࡍࡇ ࡅࡁࡉࡄࡓࡀࡌ
ࡔࡉࡕࡉࡋ ࡅࡆࡉࡄࡓࡅࡍ ࡁࡀࡊࡕࡉࡀࡓ ࡅࡆࡀࡊࡉࡀ ࡔࡉࡕࡉࡋ ࡅࡀࡃࡀࡌ
ࡁࡍࡉࡀ ࡔࡀࡃࡉࡀ ࡌࡀࡌࡀࡍࡉࡀ ࡞ ࡋࡀࡄࡀࡉ ࡆࡉࡄࡓࡅࡍ ࡅࡔࡀࡃࡉࡀ ࡅࡀࡍࡄࡀࡓ
ࡁࡍࡉࡀ ࡄࡀࡅࡀ ࡌࡅࡃࡀࡋࡀࡋ ࡞ ࡅࡋࡔࡉࡕࡋࡀ ࡖ ࡀࡄࡀࡉ ࡀࡃࡀࡌ ࡁࡀࡉࡀࡍ ࡅࡎࡀࡌ
ࡅࡁࡉࡄࡓࡀࡌ ࡔࡉࡕࡋࡀࡍ ࡁࡍࡉࡀ ࡀࡍࡄࡀࡓ ࡞ ࡅࡀࡄࡀࡅࡀࡕࡀ ࡀࡍࡄࡀࡓ ࡌࡅࡃࡀࡋࡀࡋ
ࡐࡕ ࡀࡍࡄࡀࡓ ࡉࡀࡎࡌࡉࡍ ࡞ ࡅࡁࡀࡊࡕࡉࡀࡓ ࡁࡓ ࡌࡀࡄࡍࡅࡔ ࡞ ࡅࡔࡉࡕࡋࡇ ࡀࡃࡀࡌ
ࡉࡅࡄࡀࡍࡀ ࡁࡓ ࡀࡍࡄࡀࡓ ࡌࡅࡃࡀࡋࡀࡋ ࡞ ࡀࡃࡀࡌ ࡁࡓ ࡄࡀࡅࡀ ࡞ ࡅࡆࡀࡅࡇ ࡔࡀࡃࡉࡀ
ࡅࡌࡀࡍࡃࡀ ࡖ ࡄࡉࡉࡀ ࡍࡉࡕࡉࡓࡑࡀ ࡋࡔࡅࡌࡀࡉࡄࡅࡍ ࡁࡉࡕ ࡂࡉࡍࡆࡉࡀ ࡅࡍࡉࡋࡉࡐࡉࡍࡅࡍ
ࡁࡋࡀࡅࡐࡀ ࡔࡀࡍࡉࡀ ࡅࡍࡉࡄࡅࡉࡋࡅࡍ ࡎࡉࡌࡀࡊࡀ ࡖ ࡏࡋ ࡔࡅࡌ ࡄࡉࡉࡀ
ࡄࡅࡀࡋࡉࡀ ࡓࡅࡄࡑࡀࡍࡀ ࡅࡊࡃࡀࡁ ࡄࡀࡋࡉࡍ ࡎࡉࡃࡓࡉࡀ ࡖ ࡍࡉࡄࡅࡉࡋࡅࡍ ࡃࡅࡊࡓࡀࡍࡀ
ࡁࡕࡉࡁࡉࡋ ࡅࡍࡉࡕࡓࡉࡑ ࡔࡅࡌࡀࡉ ࡁࡉࡕ ࡕࡅࡔࡋࡉࡌࡀ ࡞ ࡕࡅࡌ ࡔࡀࡁࡉࡒ
ࡄࡀࡈࡀࡉࡉࡀ ࡍࡉࡄࡅࡉࡋࡅࡍ ࡋࡊࡅࡋࡄࡅࡍ ࡕࡀࡓࡌࡉࡃࡉࡀ ࡅࡌࡀࡍࡃࡀࡉࡉࡀ ࡖ ࡁࡄࡀࡋࡉࡍ
ࡎࡉࡃࡓࡉࡀ ࡌࡉࡕࡀࡐࡓࡉࡔࡉࡀ ࡅࡒࡀࡋࡀ ࡖ ࡄࡉࡉࡀ ࡑࡀࡉࡕࡉࡍ ࡅࡋࡄࡉࡉࡀ
ࡒࡀࡃࡌࡀࡉࡉࡀ ࡌࡔࡀࡁࡉࡋࡅࡍ ࡞ ࡌࡔࡀࡁࡉࡕ ࡌࡀࡓࡀࡉ ࡁࡋࡉࡁࡀ
ࡃࡀࡊࡉࡀ ࡌࡀࡓࡀࡉࡄࡅࡍ ࡖ ࡊࡅࡋࡄࡅࡍ ࡀࡋࡌࡉࡀ ࡞ ࡌࡔࡀࡁࡉࡕ ࡅࡁࡓࡉࡊ
ࡅࡌࡔࡀࡁࡀ ࡅࡌࡓࡀࡅࡓࡀࡁ ࡅࡌࡉࡀࡒࡀࡓ ࡅࡌࡒࡀࡉࡀࡌ ࡀࡋࡀࡄࡀ
ࡖ ࡔࡓࡀࡓࡀ ࡖ ࡍࡐࡉࡔ ࡄࡀࡉࡋࡀ ࡅࡎࡀࡊࡀ ࡋࡉࡕࡋࡇ ࡆࡉࡅࡀ ࡃࡀࡊࡉࡀ
ࡅࡍࡄࡅࡓࡀ ࡓࡁࡀ ࡖ ࡋࡀࡁࡀࡈࡉࡋ ࡄࡀࡉࡀࡎࡀ ࡅࡕࡀࡉࡀࡁࡀ ࡅࡓࡉࡅࡀࡍࡀ
002
ࡅࡌࡓࡀࡄࡌࡀࡍࡀ ࡅࡐࡀࡓࡅࡒࡀ ࡖ ࡊࡅࡋࡄࡅࡍ ࡌࡄࡀࡉࡌࡍࡉࡀ ࡅࡌࡒࡀࡉࡌࡀࡍࡀ ࡖ ࡊࡅࡋࡄࡅࡍ
ࡈࡀࡁࡉࡀ ࡀࡆࡉࡆࡀ ࡄࡀࡊࡉࡌࡀ ࡅࡉࡀࡃࡅࡉࡀ ࡅࡄࡀࡆࡅࡉࡀ ࡅࡐࡀࡓࡅࡔࡀ ࡅࡔࡀࡋࡉࡈࡀ
ࡖ ࡏࡋ ࡊࡅࡋ ࡑࡁࡅ ࡌࡀࡓࡀࡉࡄࡅࡍ ࡖ ࡊࡅࡋࡄࡅࡍ ࡀࡋࡌࡉࡀ ࡖ ࡍࡄࡅࡓࡀ ࡏࡋࡀࡉࡉࡀ
ࡅࡌࡉࡑࡀࡉࡉࡀ ࡅࡕࡉࡕࡀࡉࡉࡀ ࡐࡀࡓࡑࡅࡐࡀ ࡓࡁࡀ ࡖ ࡏࡒࡀࡓࡀ ࡖ ࡋࡀࡌࡉࡕࡀࡄࡆࡉࡀ
ࡅࡋࡀࡌࡉࡎࡕࡀࡉࡀࡊ ࡖ ࡋࡉࡕࡋࡇ ࡄࡀࡁࡓࡀ ࡁࡕࡀࡂࡇ ࡅࡋࡀࡔࡅࡕࡀࡐࡀ ࡁࡔࡅࡋࡈࡀࡍࡇ
ࡌࡀࡍ ࡖ ࡕࡀࡊࡉࡋࡁࡇ ࡋࡀࡁࡀࡄࡉࡕ ࡅࡃࡌࡔࡀࡁࡀ ࡔࡅࡌࡇ ࡁࡊࡅࡔࡈࡀ
ࡋࡀࡍࡀࡐࡉࡋ ࡅࡃࡒࡀࡉࡉࡌ ࡏࡋ ࡕࡅࡊࡋࡀࡍࡇ ࡋࡀࡌࡉࡔࡕࡐࡉࡋ ࡌࡀࡓࡀ
ࡓࡁࡀ ࡖ ࡊࡅࡋࡄࡅࡍ ࡌࡀࡋࡊࡉࡀ ࡖ ࡋࡀࡄࡅࡀ ࡗ ࡖ ࡋࡀࡄࡅࡀ ࡅࡋࡀࡄࡀࡅࡉࡀ
ࡗ ࡖ ࡋࡀࡄࡀࡅࡉࡀ ࡖ ࡌࡅࡕࡀ ࡋࡀࡎࡀࡌࡋࡇ ࡅࡁࡅࡈࡋࡀࡍࡀ ࡋࡉࡕࡋࡇ ࡍࡀࡄࡅࡓ
ࡍࡄࡅࡓࡀ ࡅࡕࡀࡒࡅࡍ ࡆࡉࡅࡀ ࡏࡋ ࡊࡅࡋࡄࡅࡍ ࡀࡋࡌࡉࡀ ࡅࡌࡀࡋࡊࡉࡀ ࡖ ࡒࡀࡉࡌࡉࡀ
ࡒࡅࡃࡀࡌࡇ ࡅࡌࡉࡍࡉࡄࡓࡉࡀ ࡁࡆࡉࡅࡀࡉࡄࡅࡍ ࡅࡁࡍࡄࡅࡓࡀ ࡓࡁࡀ ࡖ ࡏࡋࡀࡅࡀࡉࡄࡅࡍ
ࡔࡓࡉࡀ ࡏࡄࡀࡁࡋࡅࡍ ࡁࡅࡕࡀ ࡅࡕࡅࡔࡁࡉࡄࡕࡀ ࡖ ࡔࡓࡀࡋࡅࡍ ࡁࡋࡉࡁࡀࡉࡄࡅࡍ
ࡖ ࡒࡀࡉࡌࡉࡀ ࡁࡀࡍࡀࡍࡉࡀ ࡖ ࡍࡄࡅࡓࡀ ࡎࡀࡂࡃࡉࡍ ࡅࡌࡔࡀࡁࡉࡍ ࡅࡌࡀࡅࡃࡉࡍ
ࡅࡌࡉࡃࡍࡉࡍ ࡋࡌࡀࡓࡀ ࡖ ࡓࡀࡁࡅࡕࡀ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ
ࡖ ࡋࡉࡕࡋࡇ ࡊࡏࡋࡀ ࡅࡌࡉࡍࡉࡀࡍࡀ ࡅࡎࡀࡉࡀࡊࡕࡀ ࡋࡆࡉࡅࡇ ࡅࡋࡍࡄࡅࡓࡇ ࡅࡋࡏࡒࡀࡓࡇ
ࡖ ࡊࡅࡋࡇ ࡆࡉࡅࡀ ࡖ ࡊࡅࡋࡇ ࡍࡄࡅࡓࡀ ࡖ ࡊࡅࡋࡇ ࡕࡅࡒࡍࡀ ࡖ ࡊࡅࡋࡇ ࡄࡉࡉࡀ
ࡖ ࡊࡅࡋࡇ ࡊࡅࡔࡈࡀ ࡖ ࡊࡅࡋࡇ ࡓࡄࡀࡌࡕࡀ ࡖ ࡊࡅࡋࡇ ࡄࡀࡉࡀࡎࡅࡕࡀ ࡅࡊࡅࡋࡇ
ࡕࡉࡀࡁࡅࡕࡀ ࡅࡊࡅࡋࡇ ࡀࡉࡍࡉࡀ ࡅࡊࡅࡋࡇ ࡄࡉࡆࡅࡉࡀ ࡅࡊࡅࡋࡇ ࡐࡀࡓࡑࡅࡐࡉࡀ ࡔࡁࡉࡄࡉࡀ
ࡖ ࡔࡅࡐࡓࡀ ࡖ ࡊࡅࡋࡇ ࡐࡓࡉࡔࡅࡕࡀ ࡅࡉࡀࡃࡉࡕࡀ ࡅࡂࡀࡋࡉࡅࡕࡀ ࡅࡊࡅࡋࡇ ࡏࡔࡅࡌࡉࡀ
ࡖ ࡏࡒࡀࡓࡀ ࡀࡋࡀࡄࡀ ࡓࡁࡀ ࡓࡀࡌࡀ ࡄࡀࡉࡋࡀ ࡖ ࡏࡍࡉࡔ ࡅࡋࡀࡌࡉࡄࡔࡉࡀ
ࡅࡋࡀࡎࡀࡉࡊࡇ ࡅࡋࡀ ࡒࡀࡉࡉࡌ ࡏࡋ ࡄࡀࡉࡋࡀ ࡃࡉࡋࡇ ࡅࡃࡊࡅࡋࡄࡅࡍ ࡀࡋࡌࡉࡀ
ࡄࡅ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡁࡓࡉࡊ ࡁࡊࡅࡋࡄࡉࡍ ࡁࡉࡓࡊࡀࡕࡀ
ࡌࡍ ࡒࡃࡉࡌ ࡅࡋࡀࡋࡀࡌ ࡀࡋࡌࡉࡀ ࡒࡀࡃࡌࡀࡉࡉࡀ ࡖ ࡌࡍ ࡓࡉࡔ ࡁࡓࡉࡔ
ࡁࡀࡓࡅࡉࡀ ࡖ ࡊࡅࡋࡄࡉࡍ ࡃࡌࡀࡅࡀࡕࡀ ࡌࡔࡀࡅࡉࡀࡍࡀ ࡖ ࡔࡀࡐࡉࡓࡀࡕࡀ ࡖ ࡄࡅ
003
ࡍࡈࡉࡓ ࡁࡄࡅࡊࡅࡌࡕࡇ ࡅࡊࡎࡉࡀ ࡅࡋࡀࡌࡂࡀࡋࡀࡋ ࡄࡅ ࡌࡀࡋࡊࡀ
ࡓࡀࡌࡀ ࡖ ࡍࡄࡅࡓࡀ ࡌࡀࡓࡀࡉࡄࡅࡍ ࡖ ࡊࡅࡋࡄࡅࡍ ࡀࡋࡌࡉࡀ ࡖ ࡍࡄࡅࡓࡀ
ࡓࡀࡌࡀ ࡏࡋ ࡊࡅࡋࡄࡅࡍ ࡏࡅࡕࡓࡉࡀ ࡀࡋࡀࡄࡀ ࡖ ࡏࡋ ࡊࡅࡋࡄࡅࡍ
ࡌࡀࡋࡊࡀ ࡖ ࡌࡀࡋࡊࡉࡀ ࡅࡌࡀࡓࡉࡀ ࡓࡁࡀ ࡖ ࡊࡅࡋࡄࡅࡍ ࡌࡀࡋࡊࡉࡀ ࡆࡉࡅࡇ
ࡋࡀࡌࡉࡔࡕࡀࡍࡉࡀ ࡅࡍࡄࡅࡓࡀ ࡖ ࡋࡀࡓࡅࡁ ࡔࡅࡐࡓࡀ ࡔࡀࡉࡀ ࡅࡏࡒࡀࡓࡀ
ࡖ ࡋࡀࡌࡉࡕࡀࡎࡋࡉࡀ ࡄࡉࡉࡀ ࡖ ࡏࡋࡀࡅࡉࡀ ࡄࡉࡉࡀ ࡆࡉࡅࡀ ࡖ ࡏࡋࡀࡅࡉࡀ ࡆࡉࡅࡉࡀ
ࡅࡍࡄࡅࡓࡀ ࡖ ࡏࡋࡀࡅࡉࡀ ࡍࡄࡅࡓࡉࡀ ࡖ ࡋࡀࡄࡀࡅࡉࡀ ࡌࡉࡍࡇ ࡄࡀࡎࡉࡓ
ࡅࡁࡑࡉࡓ ࡍࡄࡅࡓࡀ ࡖ ࡋࡉࡕࡁࡇ ࡄࡔࡅࡊࡀ ࡄࡀࡉࡀ ࡄࡅ ࡖ ࡌࡅࡕࡀ
ࡋࡉࡕࡁࡇ ࡈࡀࡁࡀ ࡄࡅ ࡖ ࡁࡉࡔࡅࡕࡀ ࡋࡉࡕࡁࡇ ࡍࡉࡄࡀ
ࡖ ࡌࡉࡓࡃࡀ ࡅࡓࡅࡂࡆࡀ ࡋࡉࡕࡁࡇ ࡁࡀࡎࡉࡌࡀ ࡄࡅ ࡖ ࡆࡉࡄࡉࡓࡀ
ࡅࡌࡓࡀࡓࡀ ࡋࡉࡕࡁࡇ ࡉࡀࡕࡉࡁ ࡁࡂࡉࡓࡁࡉࡀ ࡏࡋࡀࡉࡉࡀ ࡔࡀࡋࡉࡈ ࡉࡀࡉࡏ
ࡅࡌࡉࡕࡂࡀࡉࡉࡀ ࡊࡀࡍࡀ ࡖ ࡊࡅࡋࡄࡅࡍ ࡍࡀࡄࡉࡓࡉࡀ ࡅࡀࡁࡀ ࡖ ࡊࡅࡋࡄࡅࡍ ࡏࡅࡕࡓࡉࡀ
ࡁࡀࡓࡉࡊࡋࡅࡍ ࡋࡊࡅࡋࡄࡅࡍ ࡀࡋࡌࡉࡀ ࡅࡔࡀࡓࡉࡀ ࡏࡋ ࡊࡅࡋࡄࡅࡍ ࡔࡀࡋࡌࡀࡍࡉࡀ
ࡊࡔࡉࡈࡉࡀ ࡅࡌࡄࡀࡉࡌࡍࡉࡀ ࡖ ࡔࡅࡌࡇ ࡁࡔࡅࡌࡀࡉࡄࡅࡍ ࡕࡓࡉࡑ ࡌࡀࡋࡊࡀ
ࡖ ࡌࡃࡉࡍࡀࡕ ࡄࡉࡉࡀ ࡖ ࡀࡌࡀࡓ ࡁࡃࡀࡓࡉࡀ ࡌࡀࡋࡊࡅࡕࡀ ࡅࡌࡉࡕࡒࡀࡉࡀࡌ
ࡅࡆࡉࡅࡇ ࡃࡍࡉࡄ ࡅࡌࡀࡍࡄࡀࡓ ࡖ ࡎࡀࡊࡀ ࡅࡊࡉࡋࡀ ࡅࡌࡉࡍࡉࡀࡍࡀ ࡋࡉࡕࡋࡇ
ࡄࡀࡃࡉࡀ ࡁࡄࡀࡃࡅࡕࡀ ࡖ ࡋࡀࡍࡎࡉࡎࡅࡕࡀ ࡄࡀࡃࡉࡀࡁࡇ ࡊࡅࡋࡇ ࡌࡀࡋࡊࡅࡕࡀ
ࡑࡅࡓࡕࡀ ࡄࡀࡃࡓࡀ ࡅࡂࡀࡉࡅࡕࡀ ࡖ ࡋࡀࡉࡉࡕ ࡔࡅࡐࡓࡀ ࡖ ࡃࡀࡌࡉࡋࡇ
ࡊࡅࡔࡈࡀ ࡖ ࡔࡓࡉࡀ ࡁࡌࡓࡅࡌࡉࡀ ࡏࡋࡀࡉࡉࡀ ࡌࡀࡓࡀ ࡖ ࡓࡀࡁࡅࡕࡀ
ࡌࡀࡓࡀࡉࡄࡅࡍ ࡖ ࡊࡅࡋࡄࡅࡍ ࡓࡅࡓࡁࡀࡕࡀ ࡖ [ࡋࡀࡉࡉࡕ] ࡖ ࡍࡉࡎࡀࡉࡉࡊ ࡅࡍࡉࡌࡀࡓ ࡏࡋ
ࡄࡀࡉࡋࡇ ࡃࡉࡋࡇ ࡅࡁࡊࡅࡋࡄࡅࡍ ࡀࡋࡌࡉࡀ ࡅࡏࡋ ࡔࡊࡉࡍࡀࡕࡀ ࡖ ࡔࡊࡉࡍࡁࡉࡍ
ࡅࡏࡋ ࡏࡅࡕࡓࡉࡀ ࡅࡌࡀࡋࡊࡉࡀ ࡖ ࡔࡓࡉࡁࡉࡍ ࡄࡀࡄࡅ ࡌࡀࡋࡊࡀ
ࡓࡀࡌࡀ ࡖ ࡍࡄࡅࡓࡀ ࡌࡕࡀࡒࡀࡍ ࡁࡃࡀࡅࡓࡇ ࡅࡓࡀࡌ ࡄࡅ ࡌࡍ
ࡊࡅࡋࡄࡅࡍ ࡀࡋࡌࡉࡀ ࡀࡉࡀࡊ ࡀࡓࡒࡀ ࡌࡍ ࡃࡀࡉࡀࡓࡀ ࡅࡌࡀࡓࡉࡌ ࡏࡋ
004
ࡊࡅࡋࡄࡅࡍ ࡀࡉࡀࡊ ࡔࡅࡌࡉࡀ ࡌࡍ ࡈࡅࡓࡉࡀ ࡅࡍࡀࡄࡅࡓ ࡌࡍ ࡊࡅࡋࡄࡅࡍ
ࡀࡉࡀࡊ ࡔࡀࡌࡉࡔ ࡌࡍ ࡔࡓࡀࡂࡉࡀ ࡅࡌࡕࡀࡒࡀࡍ ࡌࡍ ࡊࡅࡋࡄࡅࡍ ࡅࡗ
ࡎࡉࡓࡀ ࡌࡍ ࡊࡅࡊࡁࡉࡀ ࡅࡀࡉࡕࡀ ࡁࡎࡀࡊࡉࡀ ࡖ ࡋࡉࡕࡁࡀࡉࡄࡅࡍ ࡄࡅࡎࡓࡀࡍࡀ
ࡅࡎࡉࡌࡋࡇ ࡕࡀࡂࡉࡀ ࡓࡅࡓࡁࡉࡀ ࡖ ࡋࡉࡕࡁࡇ ࡎࡀࡊࡀ ࡋࡄࡀࡉࡋࡇ ࡅࡋࡓࡀࡁࡅࡕࡇ
ࡅࡀࡐ ࡋࡀࡁࡀࡌࡉࡍࡉࡀࡍࡀ ࡅࡋࡀࡁࡄࡅࡔࡁࡀࡍࡀ ࡌࡉࡎࡕࡀࡉࡀࡊ ࡅࡀࡆࡋࡀࡍ ࡐࡀࡓࡀࡄࡉࡀࡕࡀ
ࡖ ࡕࡀࡂࡇ ࡋࡊࡅࡋ ࡀࡕࡀࡓ ࡅࡍࡀࡐࡒࡀࡍ ࡑࡀࡋࡉࡀࡕࡀ [ࡑࡀࡋࡀࡄࡉࡀࡕࡀ] ࡖ ࡆࡉࡅࡀ ࡅࡍࡄࡅࡓࡀ
ࡅࡏࡒࡀࡓࡀ ࡌࡍ ࡒࡅࡃࡀࡌ ࡀࡍࡐࡇ ࡅࡌࡍ ࡀࡁࡉࡍࡉࡀ ࡀࡈࡉࡓࡐࡉࡀ ࡖ ࡊࡋࡉࡋࡇ
ࡅࡊࡅࡋࡄࡅࡍ ࡏࡅࡕࡓࡉࡀ ࡅࡌࡀࡋࡊࡉࡀ ࡀࡋࡌࡉࡀ ࡊࡅࡋࡄࡅࡍ ࡁࡁࡅࡕࡀ ࡅࡕࡅࡔࡁࡉࡄࡕࡀ
ࡒࡀࡉࡌࡉࡀ ࡅࡌࡔࡀࡁࡉࡋࡇ ࡋࡄࡀࡄࡅ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ
ࡅࡍࡀࡐࡒࡉࡍ ࡌࡉࡍࡇ ࡄࡀࡌࡔࡀ ࡎࡀࡊࡉࡀ ࡓࡅࡓࡁࡉࡀ ࡒࡀࡃࡌࡀࡉࡉࡀ
ࡅࡊࡀࡁࡉࡓࡉࡀ ࡍࡄࡅࡓࡇ ࡃࡍࡉࡄ ࡏࡋࡀࡅࡀࡉࡄࡅࡍ ࡅࡕࡉࡍࡉࡀࡍࡀ ࡓࡉࡄࡀ ࡁࡀࡎࡉࡌࡀ
ࡖ ࡍࡀࡔࡉࡌ ࡏࡋࡀࡅࡀࡉࡄࡅࡍ ࡕࡋࡉࡕࡀࡉࡀ ࡄࡀࡋࡉࡅࡕ ࡒࡀࡋࡇ ࡖ ࡁࡂࡀࡅࡇ
ࡓࡀࡅࡆࡉࡀ ࡀࡓࡁࡀࡉࡀ ࡌࡉࡌࡓࡀ ࡖ ࡐࡅࡌࡇ ࡖ ࡁࡂࡀࡅࡇ ࡍࡀࡑࡉࡁࡋࡅࡍ
ࡅࡌࡀࡅࡃࡉࡋࡅࡍ ࡄࡀࡌࡔࡉࡀࡉࡀ ࡔࡅࡐࡓࡀ ࡖ ࡃࡌࡅࡕࡇ ࡖ ࡁࡂࡀࡅࡇ ࡌࡉࡕࡓࡀࡅࡓࡀࡁࡉࡍ
ࡀࡉࡀࡊ ࡐࡉࡓࡉࡀ ࡁࡔࡀࡌࡔࡀ ࡐࡕࡀ ࡐࡅࡌࡀࡉࡄࡅࡍ ࡊࡅࡋࡄࡅࡍ
ࡏࡅࡕࡓࡉࡀ ࡌࡔࡀࡁࡉࡋࡇ ࡋࡄࡀࡄࡅ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡅࡀࡌࡓࡉࡋࡇ
ࡌࡀࡍ ࡍࡉࡔࡀࡁࡀࡊ ࡅࡌࡀࡍ ࡍࡉࡓࡀࡅࡓࡁࡀࡊ ࡅࡌࡀࡍ ࡍࡉࡁࡉࡓࡊࡀࡊ ࡅࡌࡀࡍ
ࡍࡏࡉࡀࡒࡓࡀࡊ [ࡅࡌࡀࡍ ࡍࡉࡒࡀࡉࡌࡀࡊ] ࡏࡅ ࡍࡏࡔࡀࡁࡀࡊ ࡁࡕࡅࡔࡁࡉࡄࡕࡀࡊ
ࡕࡅࡔࡁࡉࡄࡕࡀࡊ ࡎࡀࡉࡀࡊࡕࡀ ࡋࡉࡕࡋࡇ ࡏࡅ ࡍࡉࡁࡉࡓࡊࡀࡊ ࡁࡀࡁࡉࡓࡊࡕࡀࡊ ࡁࡉࡓࡊࡕࡀࡊ
ࡍࡀࡐࡔࡀ ࡅࡎࡀࡊࡀ ࡋࡉࡕࡋࡇ ࡏࡅ ࡍࡉࡓࡀࡅࡓࡁࡀࡊ ࡁࡓࡀࡅࡌࡀࡊ ࡋࡓࡀࡅࡌࡀࡊ
ࡌࡀࡔࡉࡄࡕࡀ ࡋࡉࡕࡋࡇ ࡏࡅ ࡍࡉࡒࡀࡉࡌࡀࡊ ࡁࡏࡅࡌࡒࡀࡊ ࡋࡏࡅࡌࡒࡀࡊ
ࡊࡔࡀࡔࡀ ࡋࡉࡕࡋࡇ ࡏࡅ ࡍࡉࡌࡀࡓ ࡏࡋ ࡄࡀࡉࡋࡀࡊ ࡅࡆࡉࡅࡀࡊ ࡅࡍࡄࡅࡓࡀࡊ
ࡍࡐࡉࡔ ࡆࡉࡅࡀࡊ ࡌࡍ ࡌࡉࡌࡀࡓ ࡁࡌࡉࡌࡓࡉࡀ ࡅࡉࡀࡕࡉࡓ ࡅࡊࡀࡁࡉࡓ
ࡍࡄࡅࡓࡀ ࡌࡍ ࡀࡌࡋࡅࡋࡉࡀ ࡅࡏࡔࡕࡀࡉࡅࡉࡀ ࡁࡌࡀࡋࡀࡋࡉࡀ ࡅࡁࡉࡓࡊࡕࡇ
005
ࡅࡈࡀࡁࡅࡕࡇ ࡅࡓࡀࡁࡅࡕࡇ [ࡅࡓࡀࡅࡓࡀࡁࡕࡇ] ࡖ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡐࡀࡓࡉࡀࡍ
ࡅࡍࡀࡐࡒࡀࡍ ࡅࡋࡀࡌࡉࡎࡕࡀࡉࡊࡀࡍ ࡅࡋࡀࡉࡉࡕ ࡖ ࡉࡀࡃࡀࡋࡅࡍ ࡅࡐࡀࡓࡉࡔࡋࡅࡍ ࡋࡁࡀࡓ
ࡌࡍ ࡄࡉࡉࡀ ࡖ ࡀࡋࡅࡀࡕࡀࡊ ࡅࡏࡅࡕࡓࡉࡀ ࡅࡔࡋࡉࡄࡉࡀ ࡖ ࡋࡒࡅࡃࡀࡌࡀࡊ ࡒࡀࡉࡌࡉࡀ
ࡀࡋࡌࡉࡀ ࡊࡅࡋࡄࡅࡍ ࡔࡅࡌࡀࡊ ࡋࡀࡉࡀࡃࡉࡀ ࡅࡀࡌࡓࡉࡀ ࡌࡀࡋࡊࡀ ࡖ ࡍࡄࡅࡓࡀ
ࡅࡀࡌࡓࡉࡀ ࡋࡄࡃࡀࡃࡉࡀ ࡌࡀࡍ ࡔࡅࡌࡀ ࡋࡍࡄࡅࡓࡀ ࡓࡁࡀ ࡅࡀࡌࡓࡉࡀ ࡋࡀࡉࡉࡕ [ࡔࡅࡌࡀ]
ࡀࡉࡀࡊ ࡔࡅࡌࡇ ࡅࡋࡀࡉࡉࡕ ࡖ ࡍࡉࡒࡓࡉࡀ ࡁࡔࡅࡌࡇ ࡅࡋࡀࡉࡉࡕ ࡖ ࡍࡉࡒࡅࡌ
ࡏࡋ ࡊࡉࡍࡉࡀࡍࡇ ࡈࡅࡁࡀࡉࡄࡅࡍ ࡋࡔࡀࡋࡌࡀࡍࡉࡀ ࡖ ࡏࡃࡅࡊ ࡁࡋࡉࡁࡀ ࡃࡀࡊࡉࡀ
ࡅࡏࡃࡉࡊࡓࡅࡊ ࡁࡓࡅࡉࡀࡍࡀ ࡊࡔࡉࡈࡀ ࡄࡀࡉࡌࡀࡍࡅࡁࡀࡊ ࡁࡕࡉࡓࡀࡕࡀ ࡌࡔࡀࡋࡀࡌࡀࡕࡀ
ࡅࡁࡉࡓࡊࡅࡊ ࡁࡐࡅࡌࡀ ࡖ ࡊࡅࡋࡀ ࡕࡅࡔࡁࡉࡄࡕࡀ ࡅࡔࡀࡁࡅࡊ ࡁࡋࡉࡔࡀࡍࡀ
ࡕࡓࡉࡑࡀ ࡅࡄࡀࡉࡌࡀࡍࡅࡁࡀࡊ ࡁࡏࡎࡐࡉࡀ ࡌࡄࡀࡉࡍࡀࡕࡀ ࡅࡀࡌࡓࡉࡀ ࡄࡀࡃ
ࡄࡅ ࡌࡀࡋࡊࡀ ࡖ ࡍࡄࡅࡓࡀ ࡁࡌࡀࡋࡊࡅࡕࡇ ࡅࡋࡀࡉࡉࡕ ࡖ ࡓࡀࡁ ࡌࡉࡍࡇ
[ࡅࡋࡀࡉࡉࡕ ࡖ ࡌࡉࡍࡇ] ࡍࡉࡓࡌࡉࡀ ࡒࡓࡀࡁࡀ ࡋࡀࡉࡉࡕ ࡌࡀࡍ ࡖ ࡁࡃࡌࡅࡕࡇ ࡍࡉࡃࡀࡌࡉࡀ ࡅࡋࡀࡉࡉࡕ
ࡌࡀࡍ ࡖ ࡍࡀࡓࡉࡌ ࡀࡉࡍࡇ ࡅࡍࡉࡄࡉࡆࡉࡀ ࡋࡕࡀࡂࡇ ࡖ ࡁࡓࡉࡔࡉࡇ ࡖ ࡄࡀࡄࡅ
ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡖ ࡋࡀࡍࡀࡐࡉࡋ ࡕࡀࡂࡇ ࡌࡍ ࡓࡉࡔࡀ ࡈࡅࡓࡀ
ࡄࡅ ࡓࡀࡌࡀ ࡖ ࡋࡀࡌࡀࡍࡃࡉࡋࡇ ࡆࡉࡒࡉࡀ ࡖ ࡀࡉࡀࡓ ࡋࡁࡉࡔ ࡋࡁࡅࡔࡉࡀ
ࡄࡀࡃࡕࡉࡀ ࡖ ࡔࡅࡐࡓࡀ ࡖ ࡋࡀࡄࡅࡍ ࡌࡍ ࡋࡁࡅࡔࡉࡀ ࡖ ࡄࡀࡆࡉࡍ ࡀࡋࡌࡀ
ࡅࡋࡀࡌࡓࡀࡕ ࡀࡕࡅࡀࡕ ࡖ ࡍࡉࡔࡀࡅࡉࡀ ࡋࡁࡅࡔࡀ ࡋࡌࡀࡓࡉࡀ ࡕࡀࡂࡉࡀ
ࡅࡋࡀࡀࡌࡓࡉࡍ ࡅࡋࡀࡌࡑࡏࡉࡍ ࡁࡍࡉࡀ ࡀࡌࡀࡌࡉࡀ ࡖ ࡍࡉࡍࡑࡀࡁࡅࡋࡇ ࡊࡎࡅࡉࡀ ࡖ ࡏࡋ
ࡊࡀࡃࡐࡀ ࡅࡋࡀࡁࡀࡋࡉࡀ ࡋࡁࡅࡔࡀ ࡖ ࡋࡁࡉࡔ ࡅࡋࡀࡍࡀࡐࡉࡋ ࡎࡀࡎࡀ ࡄࡁࡀࡋࡀ
ࡁࡊࡎࡅࡉࡀ ࡅࡋࡀࡓࡁࡀ ࡔࡀࡌࡔࡀ ࡒࡅࡃࡀࡌࡇ ࡅࡋࡀࡃࡀࡉࡊࡉࡀ ࡐࡀࡎࡉࡌࡊࡉࡀ
ࡖ ࡌࡃࡉࡍࡕࡇ ࡋࡀࡄࡀࡉࡌࡉࡀ ࡕࡀࡂࡉࡀ ࡖ ࡁࡓࡉࡔࡉࡀ ࡅࡋࡀࡍࡀࡕࡓࡉࡀ ࡀࡈࡉࡓࡐࡉࡀ
ࡖ ࡊࡋࡉࡋࡇ ࡖ ࡌࡍ ࡒࡅࡃࡀࡌ ࡀࡍࡐࡇ ࡍࡀࡐࡒࡉࡀ ࡍࡀࡐࡉࡒ ࡓࡉࡄࡀ ࡁࡀࡎࡉࡌࡀ
ࡌࡍ ࡀࡁࡉࡍࡉࡀ ࡀࡈࡉࡓࡐࡉࡀ ࡖ ࡊࡋࡉࡋࡇ ࡖ ࡌࡍ ࡀࡍࡐࡇ ࡅࡌࡉࡕࡊࡀࡓࡊࡉࡁࡇ ࡊࡅࡋࡄࡅࡍ ࡏࡅࡕࡓࡉࡀ
ࡅࡓࡀࡅࡆࡉࡀ ࡔࡁࡉࡄ ࡒࡀࡌ ࡅࡂࡀࡁࡉࡓ ࡏࡋ ࡊࡅࡋࡄࡅࡍ ࡀࡋࡀࡄࡉࡀ ࡖ ࡁࡓࡉࡔ
006
ࡊࡅࡋࡄࡅࡍ ࡃࡀࡓࡉࡀ ࡄࡅࡀ ࡌࡀࡋࡊࡀ ࡖ ࡌࡍ ࡒࡃࡉࡌ [ࡒࡅࡃࡀࡌ] ࡅࡋࡀࡒࡉࡎࡕࡀࡉࡀࡊ ࡔࡅࡌࡇ
ࡁࡐࡅࡌࡀࡍ ࡅࡋࡀࡊࡉࡍࡉࡀࡍࡇ ࡁࡉࡕ ࡎࡐࡉࡄࡀࡕࡀࡍ ࡃࡀࡉࡀࡍࡀ ࡄࡅ ࡖ ࡀࡕࡓࡇ
ࡖ ࡋࡉࡕࡁࡇ ࡊࡀࡃࡁࡀ ࡁࡐࡅࡌࡇ ࡌࡕࡀࡒࡉࡍ ࡊࡅࡓࡎࡉࡀ ࡖ ࡓࡁࡀ ࡅࡏࡋࡀࡉࡀ
ࡖ ࡋࡀࡌࡉࡔࡕࡀࡍࡉࡀ ࡋࡀࡋࡀࡌ ࡀࡋࡌࡉࡀ ࡋࡀࡅ ࡍࡀࡍࡂࡀࡓࡉࡀ ࡖ ࡐࡀࡂࡓࡉࡀ
ࡕࡀࡒࡉࡍࡉࡅࡍ ࡊࡅࡓࡎࡉࡀ ࡖ ࡀࡕࡅࡕࡇ ࡋࡀࡅ ࡀࡓࡃࡉࡊࡋࡉࡀ ࡖ ࡈࡉࡍࡀ ࡖ ࡁࡍࡅࡍ ࡁࡀࡕࡉࡀ
ࡌࡅࡕࡁࡇ ࡌࡀࡋࡊࡀ ࡄࡅ ࡖ ࡌࡍ ࡋࡀࡒࡀࡃࡌࡉࡀ ࡖ ࡒࡀࡉࡌࡀ ࡌࡀࡋࡊࡅࡕࡇ
ࡋࡀࡋࡀࡌ ࡅࡋࡀࡁࡀࡈࡋࡀ ࡖ ࡋࡀࡓࡉࡕࡋࡇ ࡄࡀࡋࡑࡇ ࡁࡃࡀࡄࡀࡋࡕࡀ ࡅࡋࡀࡌࡉࡈࡉࡋࡇ
ࡄࡀࡅࡒࡀ ࡅࡆࡉࡄࡅࡀ ࡖ ࡁࡍࡉࡀ ࡄࡔࡅࡊࡀ ࡅࡋࡀࡒࡀࡌࡋࡇ ࡁࡉࡅࡌࡀ ࡖ ࡆࡉࡄࡅࡀ
ࡅࡋࡀࡌࡀࡈࡉࡀࡋࡇ ࡔࡉࡕࡀ ࡖ ࡓࡅࡂࡆࡀ ࡅࡆࡉࡅࡉࡄࡕࡀ ࡌࡀࡋࡊࡀ ࡖ ࡍࡄࡅࡓࡀ ࡌࡀࡌࡋࡀࡊ
ࡁࡕࡀࡂࡀ ࡋࡀࡋࡀࡌ ࡅࡋࡉࡕࡋࡇ ࡁࡅࡈࡋࡀࡍࡀ ࡋࡌࡀࡋࡊࡅࡕࡇ ࡌࡋࡉࡊ ࡔࡋࡉࡄ
ࡅࡉࡀࡒࡉࡓ ࡁࡌࡃࡉࡍࡕࡇ ࡄࡃࡀࡓࡉࡋࡇ ࡔࡅࡓࡉࡀ ࡓࡅࡓࡁࡉࡀ ࡖ ࡃࡌࡀࡎࡀ
ࡌࡀࡋࡊࡀ ࡖ ࡓࡅࡓࡁࡀࡍࡉࡀ ࡍࡐࡉࡔ ࡏࡅࡕࡓࡉࡀ ࡅࡉࡀࡕࡉࡓ ࡔࡋࡉࡄࡉࡀ ࡅࡓࡀࡁ
ࡌࡍ ࡌࡀࡋࡊࡉࡀ ࡖ ࡀࡕࡀࡓ ࡀࡕࡀࡓ ࡄࡀࡃࡉࡀ ࡄࡅ ࡄࡀࡃࡉࡀ ࡌࡃࡉࡍࡕࡇ
ࡅࡄࡀࡃࡉࡀࡁࡇ ࡊࡅࡋࡀ ࡌࡀࡋࡊࡅࡕࡇ ࡋࡉࡕࡋࡇ ࡀࡁࡀ ࡖ ࡒࡀࡔࡉࡔ ࡌࡉࡍࡇ
ࡅࡋࡀࡁࡅࡊࡓࡀ ࡖ ࡌࡍ ࡒࡅࡃࡀࡌࡇ ࡄࡅࡀ ࡋࡉࡕࡋࡇ ࡀࡄࡀ ࡖ ࡐࡀࡋࡉࡂࡋࡇ ࡌࡍࡀࡕࡀ
ࡅࡋࡀࡕࡀࡅࡌࡀ ࡖ ࡁࡊࡉࡑࡀࡕ ࡄࡃࡀࡃࡉࡀ ࡋࡀࡒࡉࡁࡋࡇ ࡅࡋࡀࡐࡋࡉࡂࡋࡇ ࡅࡋࡀࡄࡀࡅࡉࡀ
ࡐࡋࡅࡂࡕࡇ ࡁࡌࡃࡉࡍࡕࡇ ࡅࡋࡀࡍࡀࡊࡎࡉࡀ ࡏࡍࡊࡅࡎࡕࡀ ࡒࡅࡃࡀࡌࡇ ࡅࡋࡀࡊࡋࡉࡀ
ࡁࡉࡎࡓࡀ ࡋࡄࡃࡇ [ࡋࡎࡉࡁࡀ] ࡅࡋࡀࡔࡀࡕࡉࡍ ࡄࡀࡌࡓࡀ ࡖ ࡔࡉࡄࡀ ࡅࡋࡀࡆࡀࡌࡓࡉࡀ
ࡒࡅࡃࡀࡌࡇ ࡆࡌࡀࡓࡀ ࡖ ࡀࡅࡋࡇ ࡅࡋࡀࡊࡅࡌ ࡋࡁࡅࡔࡀ ࡖ ࡋࡁࡉࡔ ࡅࡋࡀࡄࡀࡉࡌࡉࡀ
ࡕࡀࡂࡉࡀ ࡖ ࡁࡓࡉࡔࡀ ࡅࡋࡀࡍࡀࡕࡓࡉࡀ ࡀࡈࡉࡓࡐࡉࡀ ࡖ ࡊࡋࡉࡋࡇ ࡋࡀࡒࡀࡋ ࡍࡅࡌࡁࡉࡀ
ࡄࡀࡅࡉࡀ ࡁࡀࡕࡓࡇ ࡅࡋࡀࡕࡊࡀࡋࡇ ࡖ ࡁࡍࡀࡕ ࡀࡍࡀࡔࡀ ࡋࡀࡄࡀࡋࡐࡀ ࡔࡋࡀࡍࡃࡀ
ࡒࡅࡃࡀࡌࡇ ࡅࡋࡀࡌࡈࡀࡍࡀࡐ ࡃࡀࡅࡓࡀ ࡁࡌࡉࡕࡀ ࡋࡀࡏࡁࡉࡃࡋࡇ ࡒࡓࡀࡁࡀ ࡖ ࡕࡀࡒࡉࡐ
ࡅࡋࡀࡒࡀࡌࡋࡇ ࡁࡉࡅࡌࡀ ࡖ ࡆࡉࡄࡅࡀ ࡄࡀࡃࡉࡁࡅࡍ ࡌࡀࡋࡊࡀ ࡁࡁࡍࡉࡀ ࡍࡄࡅࡓࡀ
ࡅࡒࡀࡓࡉࡀ ࡋࡄࡀࡃ ࡅࡀࡋࡐࡀ ࡀࡍࡉࡋࡇ ࡁࡌࡉࡍࡉࡋࡕࡇ ࡍࡀࡑࡉࡁ ࡏࡅࡕࡓࡉࡀ
007
ࡁࡌࡉࡌࡓࡀ ࡖ ࡐࡅࡌࡇ ࡌࡀࡓࡉࡌ ࡕࡅࡔࡋࡉࡌࡉࡀ ࡌࡀࡋࡊࡀ ࡖ ࡊࡅࡋࡄࡅࡍ ࡏࡅࡕࡓࡉࡀ
ࡅࡔࡊࡉࡍࡀࡕࡀ ࡕࡀࡂࡀ ࡓࡁࡀ ࡖ ࡁࡓࡉࡔ ࡌࡓࡅࡌࡀ ࡍࡉࡄࡀ ࡌࡊࡀࡁࡉࡔ ࡕࡀࡒࡉࡐࡉࡀ
ࡄࡀࡉࡋࡀ ࡖ ࡏࡋ ࡊࡅࡋࡄࡅࡍ ࡌࡀࡓࡃࡉࡀ ࡁࡓࡉࡊࡉࡕ ࡅࡌࡔࡀࡁࡉࡕ ࡌࡍ ࡆࡁࡀࡍ ࡅࡏࡃࡀࡍ
ࡋࡀࡋࡀࡌ ࡓࡀࡁ ࡄࡅ ࡔࡅࡋࡈࡀࡍ ࡍࡀࡐࡔࡀࡊ ࡌࡍ ࡌࡀࡋࡊࡉࡀ ࡊࡅࡋࡄࡅࡍ ࡖ ࡀࡕࡀࡓ
ࡄࡔࡅࡊ ࡔࡓࡏࡉࡉࡕ ࡁࡀࡕࡓࡀ ࡖ ࡍࡀࡄࡅࡓ ࡅࡕࡀࡒࡅࡍ ࡅࡔࡀࡐࡉࡓࡀ ࡅࡌࡓࡀࡅࡓࡁࡀ
ࡄࡀࡄࡏ ࡀࡓࡒࡀ ࡖ ࡔࡓࡏࡉࡀࡕࡁࡇ ࡁࡓࡉࡊࡉࡕ ࡁࡃࡅࡓ ࡈࡀࡁࡉࡀ ࡅࡌࡒࡀࡉࡌࡉࡕ
ࡁࡀࡕࡓࡀ ࡖ ࡊࡅࡋࡇ ࡁࡉࡓࡊࡕࡀ ࡖ ࡀࡍࡀࡕ ࡁࡂࡀࡅࡇ ࡄࡀࡃࡉࡕ ࡅࡓࡀࡅࡆ ࡋࡉࡁࡀࡊ
ࡁࡊࡅࡋࡄࡅࡍ ࡃࡀࡉࡀࡓࡀࡊ ࡀࡉࡕࡀࡊ ࡌࡍ ࡉࡅࡌࡀ ࡒࡀࡃࡌࡀࡉࡀ ࡅࡌࡒࡀࡉࡌࡉࡕ
ࡋࡀࡋࡀࡌ ࡀࡋࡌࡉࡀ ࡁࡄࡀࡉࡋࡀ ࡓࡁࡀ ࡅࡁࡌࡉࡌࡓࡀ ࡊࡀࡁࡉࡓࡀ ࡀࡌࡀࡓ ࡄࡅࡍ
ࡌࡀࡋࡊࡉࡀ ࡖ ࡍࡄࡅࡓࡀ ࡌࡍ ࡆࡉࡅࡀ ࡃࡀࡊࡉࡀ ࡅࡌࡍ ࡍࡄࡅࡓࡀ ࡓࡁࡀ ࡖ ࡋࡀࡁࡀࡈࡉࡋ
ࡐࡓࡅࡍ ࡄࡅࡍ ࡅࡏࡕࡒࡀࡉࡀࡌ ࡌࡀࡋࡊࡉࡀ ࡖ ࡕࡅࡔࡁࡉࡄࡕࡀ ࡖ ࡎࡀࡊࡀ ࡅࡌࡉࡍࡉࡀࡍࡀ
ࡅࡁࡅࡈࡋࡀࡍࡀ ࡋࡉࡕࡋࡅࡍ ࡖ ࡊࡅࡋࡄࡅࡍ ࡁࡕࡅࡔࡁࡉࡄࡕࡀ ࡌࡋࡉࡍ ࡅࡒࡀࡉࡌࡉࡍ ࡅࡌࡔࡀࡁࡉࡋࡇ
ࡋࡄࡀࡄࡅ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡖ ࡆࡉࡅࡇ ࡍࡐࡉࡔ ࡌࡍ ࡌࡉࡌࡀࡓ
ࡁࡐࡅࡌࡇ ࡖ ࡁࡉࡎࡓࡇ ࡅࡆࡌࡇ ࡅࡍࡄࡅࡓࡇ ࡊࡀࡁࡉࡓ ࡌࡍ ࡀࡌࡋࡅࡋࡉࡀ ࡁࡎࡐࡉࡄࡀࡕࡀ
ࡕࡀࡒࡅࡍ ࡆࡉࡅࡇ ࡅࡍࡀࡄࡅࡓ ࡍࡄࡅࡓࡇ ࡏࡋ ࡊࡅࡋࡄࡅࡍ ࡀࡋࡌࡉࡀ ࡕࡀࡒࡍࡀ ࡅࡌࡉࡍࡉࡄࡓࡀ
ࡓࡒࡉࡄࡀ ࡖ ࡁࡂࡀࡅࡇ ࡔࡓࡉࡍ ࡀࡋࡌࡀ ࡖ ࡒࡀࡉࡉࡌࡁࡇ ࡁࡅࡈࡋࡀࡍࡀ ࡋࡉࡕࡋࡇ
ࡀࡋࡌࡀ ࡖ ࡆࡉࡅࡀ ࡅࡍࡄࡅࡓࡀ ࡖ ࡄࡀࡁࡀࡓࡀ ࡋࡉࡕࡁࡇ ࡀࡋࡌࡀ ࡖ ࡍࡉࡄࡅࡕࡀ
ࡖ ࡌࡓࡉࡃࡅࡕࡀ ࡋࡉࡕࡁࡇ ࡀࡋࡌࡀ ࡖ ࡊࡉࡍࡅࡕࡀ ࡖ ࡔࡉࡂࡔࡀ ࡅࡈࡉࡓࡒࡀ ࡋࡉࡕࡁࡇ
ࡀࡋࡌࡀ ࡖ ࡁࡅࡎࡌࡀࡍࡉࡀ ࡖ ࡓࡉࡄࡀ ࡖ ࡎࡀࡉࡍࡀ ࡋࡉࡕࡁࡇ ࡀࡋࡌࡀ ࡖ ࡄࡉࡉࡀ ࡖ ࡋࡀࡋࡀࡌ
ࡖ ࡁࡅࡈࡋࡀࡍࡀ ࡅࡌࡅࡕࡀ ࡋࡉࡕࡁࡇ ࡀࡋࡌࡀ ࡖ ࡌࡉࡀ ࡄࡉࡉࡀ ࡖ ࡁࡓࡉࡄࡀࡉࡅࡍ
ࡌࡀࡋࡊࡉࡀ ࡓࡀࡅࡆࡉࡀ ࡀࡋࡌࡀ ࡖ ࡈࡀࡁࡅࡕࡀ ࡖ ࡁࡉࡔࡅࡕࡇ ࡋࡉࡕࡁࡇ ࡀࡋࡌࡀ
ࡖ ࡊࡅࡔࡈࡀ ࡅࡄࡀࡉࡌࡀࡍࡅࡕࡀ ࡖ ࡊࡀࡃࡁࡀ ࡅࡍࡉࡊࡋࡀ ࡋࡉࡕࡁࡇ ࡀࡋࡌࡀ ࡄࡅ ࡃࡀࡊࡉࡀ
ࡖ ࡏࡅࡓࡁࡀࡍࡀ ࡁࡉࡔࡀ ࡋࡉࡕࡁࡇ ࡌࡔࡀࡁࡉࡋࡇ ࡌࡀࡋࡀࡊࡉࡀ ࡖ ࡆࡉࡅࡀ ࡋࡄࡀࡄࡅ
ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡁࡆࡉࡅࡀ ࡅࡍࡄࡅࡓࡀ ࡖ ࡏࡄࡀࡁࡋࡅࡍ ࡌࡔࡀࡁࡉࡋࡇ
008
ࡌࡀࡋࡀࡊࡉࡀ ࡖ ࡆࡉࡅࡀ ࡁࡋࡁࡅࡔࡉࡀ ࡖ ࡆࡉࡅࡀ ࡖ ࡏࡄࡀࡁࡋࡅࡍ ࡌࡔࡀࡁࡉࡋࡇ
ࡌࡀࡋࡀࡊࡉࡀ ࡖ ࡆࡉࡅࡀ ࡁࡊࡎࡅࡉࡉࡀ ࡖ ࡍࡄࡅࡓࡀ ࡖ ࡏࡄࡀࡁࡋࡅࡍ ࡌࡔࡀࡁࡉࡋࡇ
ࡌࡀࡋࡀࡊࡉࡀ ࡖ ࡆࡉࡅࡀ ࡁࡄࡉࡌࡉࡀࡍࡉࡀ ࡖ ࡆࡉࡅࡀ ࡖ ࡏࡄࡀࡁࡋࡅࡍ ࡌࡔࡀࡁࡉࡋࡇ
ࡌࡀࡋࡀࡊࡉࡀ ࡖ ࡆࡉࡅࡀ ࡁࡊࡋࡉࡋࡉࡀ ࡖ ࡆࡉࡅࡀ ࡖ ࡏࡄࡀࡁࡋࡅࡍ ࡖ ࡕࡓࡀࡑࡋࡅࡍ ࡌࡔࡀࡁࡉࡋࡇ
ࡌࡀࡋࡀࡊࡉࡀ ࡖ ࡆࡉࡅࡀ ࡁࡄࡀࡉࡋࡀ ࡅࡔࡓࡀࡓࡀ ࡖ ࡏࡄࡀࡁࡋࡅࡍ ࡌࡔࡀࡁࡉࡋࡇ
ࡌࡀࡋࡀࡊࡉࡀ ࡖ ࡆࡉࡅࡀ ࡁࡊࡅࡔࡈࡀ ࡅࡋࡀࡅࡐࡀ ࡅࡄࡀࡉࡌࡀࡍࡅࡕࡀ ࡖ ࡏࡄࡀࡁࡋࡅࡍ
ࡊࡅࡋࡄࡅࡍ ࡍࡉࡄࡉࡀ ࡅࡄࡀࡊࡉࡌࡉࡀ ࡅࡁࡀࡎࡉࡌࡉࡀ ࡖ ࡁࡉࡔࡅࡕࡀ ࡅࡊࡀࡃࡁࡀ ࡅࡍࡉࡊࡋࡀ
ࡋࡉࡕࡁࡅࡍ ࡋࡁࡉࡔࡉࡀ ࡋࡁࡅࡔࡉࡀ ࡖ ࡆࡉࡅࡀ ࡅࡌࡊࡀࡎࡉࡍ ࡊࡎࡅࡉࡉࡀ ࡖ ࡍࡄࡅࡓࡀ ࡅࡔࡓࡉࡍ
ࡅࡔࡊࡉࡍࡉࡀ ࡋࡅࡀࡕ ࡄࡃࡀࡃࡉࡀ ࡅࡋࡀࡌࡀࡎࡊࡉࡋࡉࡀ ࡄࡀࡃ ࡁࡄࡀࡁࡓࡀ ࡅࡋࡀࡄࡀࡈࡉࡍ
ࡁࡉࡄࡃࡀࡃࡉࡀ ࡅࡉࡀࡒࡀࡓࡉࡍ ࡏࡋ ࡀࡓࡒࡀࡄࡀࡉࡄࡅࡍ ࡅࡃࡀࡌࡉࡍ ࡀࡉࡀࡊ ࡆࡀࡐࡀ
ࡋࡀࡉࡍࡇ ࡅࡕࡉࡓࡀࡕࡅࡍ ࡂࡀࡋࡉࡀࡍ ࡋࡄࡃࡀࡃࡉࡀ ࡅࡒࡀࡃࡌࡉࡀࡕࡀ ࡅࡁࡀࡕࡓࡀࡉࡀࡕࡀ
ࡉࡀࡃࡉࡍ ࡀࡋࡉࡐ ࡀࡋࡉࡐ ࡐࡀࡓࡎࡉࡀ ࡓࡀࡄࡉࡒࡉࡀ ࡌࡍ ࡄࡃࡀࡃࡉࡀ ࡅࡁࡆࡉࡅࡀ
ࡖ ࡄࡃࡀࡃࡉࡀ ࡍࡀࡄࡓࡉࡀ ࡅࡁࡓࡉࡄࡀ ࡖ ࡄࡃࡀࡃࡉࡀ ࡁࡀࡎࡌࡉࡀ ࡅࡊࡅࡔࡈࡀ
ࡋࡄࡃࡀࡃࡉࡀ ࡐࡀࡔࡈࡉࡀ ࡅࡏࡅࡑࡓࡀࡉࡄࡅࡍ ࡋࡄࡃࡀࡃࡉࡀ ࡐࡀࡓࡔࡉࡀ ࡄࡉࡍࡅࡍ
ࡌࡓࡀࡄࡒࡉࡀ ࡌࡍ ࡊࡅࡋ ࡌࡅࡕࡀ ࡅࡄࡁࡉࡋࡀ ࡖ ࡌࡅࡕࡀ ࡋࡀࡎࡀࡌࡋࡇ ࡁࡅࡈࡋࡀࡍࡀ
ࡋࡉࡕࡋࡅࡍ ࡅࡋࡀࡎࡀࡉࡁࡉࡍ ࡅࡄࡀࡉࡋࡀࡉࡄࡅࡍ ࡋࡀࡁࡀࡑࡀࡓ ࡅࡁࡊࡉࡁࡉࡀ ࡅࡌࡅࡌࡉࡀ
ࡋࡀࡌࡉࡕࡋࡀࡁࡔࡉࡍ ࡋࡁࡅࡔࡀࡉࡄࡅࡍ ࡋࡀࡊࡅࡌ ࡅࡊࡎࡅࡉࡀࡉࡄࡅࡍ ࡋࡀࡄࡀࡔࡅࡊ
ࡅࡊࡋࡉࡋࡀࡉࡄࡅࡍ ࡋࡀࡔࡀࡄࡉࡍ ࡅࡋࡀࡐࡀࡉࡉࡍ ࡅࡀࡈࡉࡓࡐࡀ ࡌࡉࡍࡀࡉࡄࡅࡍ ࡋࡀࡍࡀࡕࡓࡉࡀ
ࡅࡊࡅࡋ ࡌࡉࡓࡁࡀ ࡓࡀࡁࡉࡍ ࡅࡄࡀࡉࡉࡍ ࡅࡌࡉࡕࡒࡀࡉࡌࡉࡍ ࡏࡋ ࡃࡅࡊࡕࡀࡉࡄࡅࡍ ࡋࡀࡍࡀࡉࡃࡉࡀ
ࡅࡋࡀࡌࡉࡆࡃࡓࡀࡍࡁࡉࡍ ࡋࡉࡕࡁࡀࡉࡄࡅࡍ ࡎࡀࡁࡀ ࡖ ࡎࡀࡉࡉࡁ ࡅࡋࡀࡉࡀࡄࡈࡀ ࡖ ࡌࡍ
ࡊࡓࡀࡎ ࡏࡌࡇ ࡍࡐࡀࡒ ࡋࡀࡉࡉࡕ ࡃࡉࡍࡀ ࡁࡌࡃࡉࡍࡕࡅࡍ ࡅࡀࡐ ࡄࡉࡍࡅࡍ
ࡄࡃࡀࡃࡉࡀ ࡋࡀࡃࡀࡉࡍࡉࡀ ࡋࡀࡊࡀࡐࡍࡉࡀ ࡅࡋࡀࡑࡀࡄࡅࡍ ࡅࡄࡀࡅࡌࡀ ࡅࡁࡀࡓࡃࡀ
ࡅࡁࡉࡔࡅࡕࡀ ࡅࡓࡅࡂࡆࡀ ࡋࡉࡕࡁࡅࡍ ࡋࡀࡒࡀࡓࡁࡉࡀ ࡒࡓࡀࡁࡀ ࡌࡍ ࡄࡃࡀࡃࡉࡀ
ࡅࡀࡐ ࡋࡀࡁࡔࡉࡁࡉࡀ ࡌࡉࡔࡕࡁࡉࡍ ࡀࡓࡒࡀࡉࡄࡅࡍ ࡄࡉࡅࡀ ࡁࡀࡋࡀ ࡏࡋࡇ
009
ࡋࡀࡃࡀࡌࡉࡍ ࡅࡓࡉࡄࡔࡀ ࡁࡉࡔࡀ ࡌࡍ ࡂࡀࡅࡇ ࡋࡀࡍࡐࡀࡒ ࡏࡅࡑࡀ ࡁࡉࡔࡀ
ࡋࡀࡉࡉࡕ ࡁࡉࡋࡀࡍࡅࡍ ࡅࡋࡀࡌࡓࡀࡓࡀ ࡁࡐࡉࡓࡉࡀ ࡖ ࡃࡀࡅࡓࡀࡉࡄࡅࡍ ࡏࡁࡉࡁࡀࡉࡄࡅࡍ
ࡋࡀࡑࡀࡅࡉࡍ ࡅࡋࡀࡉࡀࡁࡔࡉࡀ ࡅࡀࡈࡉࡓࡐࡉࡀ ࡖ ࡏࡋࡀࡍࡉࡀ ࡋࡀࡍࡀࡕࡓࡉࡀ ࡁࡀࡕࡓࡀࡉࡄࡅࡍ
ࡎࡀࡎࡀ ࡅࡄࡁࡉࡋࡀ ࡋࡀࡍࡀࡐࡉࡋ ࡔࡊࡉࡍࡀࡕࡅࡍ ࡁࡅࡈࡋࡀࡍࡀ ࡋࡉࡕࡋࡅࡍ ࡔࡀࡋࡉࡈࡀࡍࡉࡀ ࡌࡓࡉࡃࡉࡀ
ࡖ ࡋࡀࡄࡀࡉࡎࡅࡕࡀ ࡏࡋࡀࡅࡀࡉࡄࡅࡍ ࡋࡀࡌࡔࡀࡋࡈࡉࡀ ࡌࡓࡉࡃࡉࡀ ࡓࡂࡉࡆࡉࡀ ࡖ ࡋࡀࡓࡀࡄࡌࡅࡕࡀ
ࡁࡃࡀࡅࡓࡀࡉࡄࡅࡍ ࡋࡀࡉࡉࡕ ࡀࡓࡒࡀࡉࡄࡅࡍ ࡌࡃࡀࡋࡉࡀࡍ ࡅࡓࡀࡌࡀࡍ ࡁࡉࡍࡕࡀࡉࡄࡅࡍ
ࡁࡀࡕࡉࡀ ࡁࡉࡕ ࡕࡅࡔࡋࡉࡌࡀ ࡔࡀࡋࡉࡀ ࡅࡍࡉࡄࡉࡀ ࡉࡀࡌࡀࡌࡀࡉࡄࡅࡍ ࡅࡋࡀࡉࡉࡕ
ࡏࡓࡉࡀ ࡁࡂࡀࡅࡀࡉࡄࡅࡍ ࡉࡀࡓࡃࡍࡉࡀ ࡖ ࡀࡋࡌࡉࡀ ࡖ ࡍࡄࡅࡓࡀ ࡌࡉࡀ ࡄࡉࡅࡀࡓࡉࡀ
ࡌࡋࡉࡍ ࡄࡉࡅࡀࡓࡉࡀ ࡌࡍ ࡄࡀࡋࡁࡀ ࡅࡒࡀࡓࡉࡓࡉࡀ ࡅࡁࡀࡎࡉࡌࡉࡀ ࡅࡌࡀࡆࡉࡆ
ࡓࡉࡄࡀࡉࡅࡍ ࡌࡍ ࡂࡅࡐࡍࡇ ࡓࡅࡓࡁࡉࡀ ࡖ ࡁࡅࡎࡌࡀࡍࡉࡀ ࡅࡏࡅࡕࡓࡉࡀ ࡅࡌࡀࡋࡊࡉࡀ
ࡖ ࡔࡀࡕࡉࡍ ࡌࡉࡍࡀࡉࡄࡅࡍ ࡈࡀࡌࡀ ࡖ ࡌࡅࡕࡀ ࡋࡀࡈࡀࡉࡌࡉࡍ ࡅࡋࡉࡕࡋࡀࡉࡄࡅࡍ ࡉࡅࡌ
ࡖ ࡁࡉࡔ ࡅࡍࡎࡉࡎ ࡅࡕࡀࡒࡉࡐࡉࡀ ࡅࡀࡐ ࡋࡀࡊࡀࡓࡉࡅࡕࡀ ࡁࡍࡉࡔࡌࡀࡕࡅࡍ ࡅࡋࡉࡕࡋࡀࡉࡄࡅࡍ
ࡌࡉࡍࡉࡀࡍࡀ ࡋࡔࡍࡀࡉࡄࡅࡍ ࡅࡋࡀࡊࡉࡋࡀ ࡋࡊࡅࡋ ࡄࡀࡉࡅࡕࡅࡍ ࡅࡊࡅࡋࡄࡅࡍ ࡄࡀࡃࡉࡍ
ࡅࡓࡀࡅࡆࡉࡍ ࡁࡄࡀࡃࡅࡕࡀ ࡖ ࡋࡀࡍࡎࡉࡎࡅࡕࡀ ࡅࡌࡀࡎࡂࡉࡍ ࡁࡒࡀࡋࡉࡋ ࡎࡉࡂࡉࡀ
ࡅࡌࡉࡈࡀࡎࡀࡎࡉࡍ ࡁࡄࡀࡄࡏ ࡀࡓࡒࡀ ࡖ ࡀࡉࡀࡓ ࡄࡉࡅࡀࡓࡕࡉࡀ ࡅࡆࡉࡅࡇ ࡖ ࡃࡍࡉࡄ
ࡏࡋࡀࡅࡀࡉࡄࡅࡍ ࡅࡋࡀࡏࡓࡉࡁࡁࡇ ࡄࡔࡅࡊࡀ ࡅࡄࡉࡍࡅࡍ ࡀࡋࡌࡉࡀ ࡖ ࡍࡄࡅࡓࡀ
ࡁࡎࡀࡊࡉࡀ ࡖ ࡍࡀࡐࡔࡉࡀ ࡀࡉࡕࡉࡍࡄࡅࡍ ࡅࡌࡐࡀࡋࡂࡉࡀ ࡁࡀࡓࡒࡀࡄࡀࡕࡀ
ࡅࡔࡊࡉࡍࡀࡕࡀ ࡅࡉࡀࡓࡃࡍࡉࡀ ࡅࡏࡋࡀࡍࡉࡀ ࡅࡏࡅࡕࡓࡉࡀ ࡅࡌࡀࡋࡊࡉࡀ ࡅࡆࡉࡅࡀ ࡅࡍࡄࡅࡓࡀ
ࡅࡕࡅࡒࡍࡀ ࡖ ࡏࡋࡀࡅࡀࡉࡄࡅࡍ ࡔࡓࡉࡀ ࡅࡌࡉࡑࡓࡀ ࡁࡉࡍࡉࡀ ࡄࡃࡀ ࡋࡄࡃࡀ
ࡋࡀࡉࡉࡕ ࡅࡍࡀࡄࡓࡀ ࡅࡕࡀࡒࡍࡀ ࡃࡌࡀࡅࡀࡕࡅࡍ ࡅࡄࡉࡆࡅࡀ ࡖ ࡐࡀࡓࡑࡅࡐࡀࡉࡄࡅࡍ
ࡆࡂࡉࡂ ࡅࡕࡀࡒࡅࡍ ࡁࡃࡌࡅ ࡁࡉࡋࡅࡓ ࡃࡀࡊࡉࡀ ࡅࡊࡅࡋ ࡉࡅࡌࡀ ࡌࡉࡕࡉࡍࡑࡉࡁࡋࡅࡍ
ࡅࡌࡉࡔࡕࡀࡃࡀࡓࡋࡅࡍ ࡄࡀࡉࡋࡀ ࡅࡒࡀࡋࡀ ࡅࡌࡉࡌࡓࡀ ࡅࡆࡀࡊࡅࡕࡀ ࡌࡍ ࡒࡅࡃࡀࡌ
ࡌࡀࡋࡊࡀࡉࡄࡅࡍ ࡖ ࡊࡅࡋࡄࡅࡍ ࡀࡋࡌࡉࡀ ࡖ ࡍࡄࡅࡓࡀ ࡅࡄࡉࡍࡅࡍ ࡊࡅࡋࡄࡅࡍ ࡒࡀࡉࡌࡉࡀ
ࡁࡁࡅࡕࡀ ࡅࡕࡅࡔࡁࡉࡄࡕࡀ ࡅࡎࡉࡃࡓࡉࡀ ࡅࡃࡓࡀࡔࡉࡀ ࡔࡀࡍࡉࡀ ࡅࡉࡀࡄࡁࡉࡋࡇ
010
ࡃࡍࡅࡕࡀ ࡅࡏࡓࡅࡕࡀ ࡅࡕࡅࡔࡁࡉࡄࡕࡀ ࡋࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡅࡌࡀࡋࡀࡊࡉࡀ
ࡄࡉࡍࡅࡍ ࡖ ࡌࡍ ࡌࡀࡋࡊࡀ ࡓࡁࡀࡉࡄࡅࡍ ࡅࡍࡀࡐࡉࡒ ࡓࡉࡄࡀ ࡁࡀࡎࡉࡌࡀ ࡌࡍ
ࡁࡉࡍࡀࡕࡀࡉࡄࡅࡍ ࡅࡊࡅࡋ ࡁࡅࡎࡌࡀࡍࡉࡀ ࡖ ࡄࡀࡃࡅࡕࡀ ࡋࡀࡅ ࡁࡅࡎࡌࡀ ࡖ ࡏࡊࡅࡓࡉࡀ
ࡅࡋࡀࡅ ࡓࡉࡄࡀ ࡅࡁࡀࡓࡀࡕࡀ ࡖ ࡊࡅࡋ ࡏࡎࡕࡉࡓࡀࡕࡀ ࡅࡊࡅࡋࡄࡅࡍ ࡓࡀࡅࡆࡉࡀ ࡌࡍ
ࡄࡃࡀࡃࡉࡀ ࡀࡊࡅࡀࡕ ࡀࡍࡀࡍࡉࡀ ࡌࡉࡈࡓࡀ ࡋࡏࡋࡀࡍࡉࡀ ࡅࡁࡀࡆࡓࡅࡍࡉࡀ
ࡖ ࡀࡓࡒࡀ ࡅࡀࡉࡕࡉࡍࡄࡅࡍ ࡁࡀࡕࡅࡀࡕࡀ ࡖ ࡔࡅࡐࡓࡀ ࡅࡄࡉࡆࡅࡀ ࡅࡃࡌࡅࡕࡀ ࡅࡑࡀࡅࡕࡀ
ࡅࡄࡃࡀ ࡌࡍ ࡄࡃࡀ ࡔࡀࡍࡀࡉ ࡅࡄࡃࡀ ࡌࡍ ࡄࡃࡀ ࡍࡀࡄࡅࡓ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ
ࡁࡓࡉࡊ ࡅࡌࡔࡀࡁࡀ ࡔࡅࡌࡇ ࡋࡀࡋࡀࡌ ࡀࡋࡌࡉࡀ ࡅࡏࡅࡕࡓࡉࡀ ࡅࡌࡀࡋࡊࡉࡀ
ࡅࡔࡋࡉࡄࡉࡀ ࡅࡐࡀࡓࡑࡅࡐࡉࡀ ࡅࡃࡌࡀࡅࡀࡕࡀ ࡀࡓࡒࡀࡄࡀࡕࡀ ࡅࡔࡊࡉࡍࡀࡕࡀ ࡀࡓࡒࡉࡀ
ࡅࡁࡉࡍࡉࡀࡍࡉࡀ ࡅࡉࡀࡓࡃࡍࡉࡀ ࡅࡏࡋࡀࡍࡉࡀ ࡅࡆࡉࡅࡀ ࡖ ࡏࡋࡀࡅࡀࡉࡄࡅࡍ ࡔࡓࡉࡀ ࡌࡍ
ࡌࡀࡋࡊࡀ ࡖ ࡍࡄࡅࡓࡀ ࡄࡅࡍ ࡏࡅࡕࡓࡉࡀ ࡅࡌࡀࡋࡊࡉࡀ ࡌࡉࡕࡉࡒࡓࡉࡍ ࡅࡌࡍ ࡀࡓࡒࡀ
ࡉࡀࡓࡃࡍࡉࡀ ࡅࡏࡋࡀࡍࡉࡀ ࡌࡉࡕࡍࡉࡑࡁࡉࡍ ࡅࡌࡍ ࡆࡉࡅࡀ ࡅࡍࡄࡅࡓࡀ ࡋࡁࡉࡔࡉࡀ ࡅࡊࡎࡅࡉࡉࡀ
ࡅࡊࡋࡉࡋࡉࡀ ࡌࡉࡑࡈࡀࡓࡀࡓࡉࡍ ࡅࡋࡀࡉࡉࡕ ࡌࡉࡍࡀࡉࡄࡅࡍ ࡖ ࡄࡀࡅࡉࡀ ࡌࡉࡍࡇ
ࡄࡀࡎࡉࡓ ࡅࡁࡑࡉࡓ ࡄࡀࡄࡅ ࡀࡕࡓࡀ ࡀࡕࡓࡀ ࡖ ࡄࡉࡉࡀ ࡖ ࡊࡅࡔࡈࡀ ࡍࡉࡀࡄࡀ
ࡔࡓࡀࡓࡀ ࡔࡀࡋࡌࡀ ࡅࡄࡀࡉࡌࡀࡍࡅࡕࡀ ࡖ ࡊࡅࡋ ࡏࡍࡉࡔ ࡋࡀࡌࡎࡀࡊࡉࡋࡇ ࡅࡏࡋࡀࡅࡇ
ࡄࡀࡅࡉࡋࡇ ࡓࡅࡄࡑࡀࡍࡀ ࡄࡀࡃࡉࡁࡅࡍ ࡌࡀࡋࡊࡀ ࡁࡁࡍࡉࡀ ࡍࡄࡅࡓࡀ ࡅࡄࡉࡍࡅࡍ
ࡁࡂࡀࡅࡇ ࡔࡀࡄࡁࡉࡀ ࡁࡉࡍࡀࡕࡅࡍ ࡅࡔࡊࡉࡍࡀࡕࡅࡍ ࡁࡆࡉࡅࡀ ࡅࡍࡄࡅࡓࡀ ࡁࡍࡏࡉࡀ
ࡅࡀࡔࡉࡀࡕࡅࡍ ࡔࡓࡀࡓࡀ ࡅࡕࡅࡒࡍࡀ ࡆࡉࡅࡀࡉࡄࡅࡍ ࡔࡀࡍࡀࡉ ࡌࡍ ࡆࡉࡅࡇ ࡖ ࡔࡀࡌࡉࡔ
ࡅࡎࡉࡓࡀ ࡅࡕࡅࡒࡍࡀࡉࡄࡅࡍ ࡕࡀࡒࡅࡍ ࡌࡍ ࡕࡅࡒࡍࡇ ࡖ ࡄࡀࡆࡉࡍ ࡀࡋࡌࡀ ࡆࡉࡅࡀ
ࡖ ࡀࡋࡌࡀ ࡄࡀࡆࡉࡍ ࡏࡕࡁࡀ ࡌࡆࡉࡂࡅࡕࡀ ࡅࡆࡉࡅࡀ ࡖ ࡄࡀࡍࡀࡕࡇ ࡕࡅࡒࡍࡀ
ࡖ ࡋࡉࡕࡁࡇ ࡃࡅࡓࡃࡉࡀ ࡄࡉࡍࡉࡋࡀ ࡆࡉࡅࡀ ࡖ ࡀࡋࡌࡀ ࡄࡀࡆࡉࡍ ࡏࡕࡉࡍࡑࡉࡁ ࡁࡃࡌࡅࡕࡀ
ࡖ ࡄࡀࡍࡀࡕࡇ ࡆࡉࡅࡀ ࡀࡊࡅࡀࡕ ࡄࡅࡌࡓࡉࡀ ࡅࡀࡑࡀࡑࡏ [ࡅࡀࡑࡀࡑࡉࡀ] ࡖ ࡁࡃࡌࡅ ࡌࡀࡓࡂࡀࡍࡉࡀࡕࡀ
ࡀࡉࡕࡉࡍࡉࡍ ࡀࡓࡒࡀࡉࡄࡅࡍ ࡏࡋ ࡎࡀࡃࡀࡍࡀ ࡋࡀࡉࡀࡕࡁࡉࡀ ࡅࡀࡓࡒࡀࡉࡄࡅࡍ
ࡁࡂࡉࡓࡂࡋࡉࡀ ࡋࡀࡄࡀࡃࡓࡀ ࡅࡊࡅࡊࡁࡉࡀ ࡔࡅࡁࡀ ࡏࡋࡀࡅࡀࡉࡄࡅࡍ ࡋࡀࡌࡀࡎࡂࡉࡍ
011
ࡄࡀࡌࡔࡀ ࡅࡕࡓࡉࡎࡀࡓ ࡁࡄࡉࡋࡒࡀࡉࡄࡅࡍ ࡋࡀࡌࡃࡀࡁࡓࡉࡀ ࡀࡒࡀࡐࡓࡀ
ࡁࡔࡁࡉࡋࡅࡍ ࡋࡀࡉࡉࡕ ࡅࡈࡉࡍࡀ ࡁࡉࡀࡓࡃࡍࡀࡉࡄࡅࡍ ࡋࡀࡌࡉࡕࡀࡔࡊࡀ ࡅࡒࡀࡋࡉࡋࡉࡀ ࡄࡉࡍࡅࡍ
ࡁࡎࡀࡂࡉࡀࡉࡄࡅࡍ ࡀࡊࡅࡀࡕ ࡋࡉࡁࡀ ࡖ ࡁࡓ ࡀࡍࡀࡔࡀ ࡖ ࡁࡋࡉࡂࡓࡉࡀ ࡋࡀࡎࡀࡂࡉࡀ
ࡅࡁࡔࡉࡕࡀ ࡄࡃࡀ ࡌࡀࡈࡉࡀ ࡋࡊࡅࡋ ࡀࡕࡀࡓ ࡒࡀࡋࡉࡋ ࡅࡍࡉࡄ ࡎࡉࡂࡉࡀࡉࡄࡅࡍ
ࡀࡊࡅࡀࡕ ࡆࡀࡋࡉࡒࡉࡀ ࡖ ࡔࡀࡌࡉࡔ ࡌࡉࡕࡀࡄࡆࡉࡍ ࡁࡀࡉࡍࡀࡉࡄࡅࡍ ࡖ ࡁࡍࡉࡀ
ࡖ ࡀࡃࡀࡌ ࡖ ࡆࡀࡋࡉࡒࡉࡀ ࡌࡀࡈࡉࡍ ࡌࡍ ࡔࡅࡌࡉࡀ ࡅࡀࡋࡌࡀ ࡀࡓࡒࡀ ࡊࡅࡉ
ࡁࡀࡂࡉࡍ ࡁࡉࡄࡃࡀࡃࡉࡀ ࡔࡀࡄࡋࡉࡀ ࡅࡋࡀࡁࡔࡉࡀ ࡁࡏࡅࡑࡓࡉࡀ ࡖ ࡄࡃࡀࡃࡉࡀ
ࡋࡀࡄࡀࡈࡉࡍ ࡅࡋࡀࡌࡀࡎࡊࡋࡉࡍ ࡅࡁࡉࡄࡃࡀࡃࡉࡀ ࡀࡊࡅࡀࡕ ࡆࡉࡅࡀ ࡖ ࡔࡀࡌࡉࡔ
ࡅࡆࡉࡒࡀ ࡍࡅࡓࡀ ࡅࡌࡉࡀ ࡖ ࡀࡋࡌࡀ ࡄࡀࡆࡉࡍ ࡏࡊࡉࡋࡕࡀࡉࡄࡅࡍ ࡌࡍ ࡁࡉࡓࡊࡕࡇ
ࡖ ࡉࡀࡓࡃࡍࡉࡀ ࡐࡉࡓࡉࡀ [ࡅࡏࡌࡁࡉࡀ] ࡅࡏࡋࡀࡍࡉࡀ ࡅࡋࡉࡕࡋࡀࡉࡄࡅࡍ ࡎࡀࡊࡀ [ࡅࡌࡉࡍࡉࡀࡍࡀ] ࡅࡌࡉࡑࡓࡀ ࡋࡆࡀࡊࡅࡀࡕࡅࡍ
ࡅࡋࡀࡍࡀࡔࡊࡀ ࡖ ࡍࡉࡌࡀࡓ ࡏࡋ ࡄࡀࡉࡋࡀࡉࡄࡅࡍ ࡀࡊࡅࡀࡕ ࡖ ࡀࡌࡀࡓ ࡏࡅ
ࡐࡀࡂࡓࡀ ࡎࡀࡓࡉࡀ ࡍࡉࡔࡀࡁࡀࡊ ࡏࡅ ࡋࡉࡔࡀࡍࡀ ࡁࡀࡈࡋࡀ ࡄࡉࡍ ࡐࡅࡌࡀࡍ
ࡗ ࡉࡀࡌࡀ ࡍࡉࡄࡅࡉࡀ ࡅࡋࡉࡔࡀࡍࡀࡍ ࡗ ࡈࡅࡓࡉࡀ ࡂࡆࡉࡓࡉࡀ ࡖ ࡁࡂࡀࡅࡇ
ࡅࡎࡐࡉࡄࡀࡕࡀࡍ ࡗ ࡕࡓࡉࡍ ࡊࡉࡐࡉࡀ ࡋࡀࡌࡀࡈࡉࡀࡋࡀࡍ ࡖ ࡍࡉࡎࡀࡉࡉࡊ ࡅࡍࡉࡌࡀࡓ
ࡏࡋ ࡄࡀࡉࡋࡀࡊ ࡃࡉࡋࡀࡊ ࡌࡀࡓࡀࡉ ࡏࡋ ࡊࡅࡋࡄࡅࡍ ࡀࡋࡌࡀࡊ ࡅࡄࡉࡍࡏࡋࡀࡍࡇ
ࡋࡏࡔࡊࡇ [ࡅࡄࡉࡍࡉࡋࡀ ࡋࡉࡔࡊࡀ] ࡖ ࡌࡑࡉࡀ ࡖ ࡍࡉࡎࡀࡉࡉࡊ ࡅࡍࡉࡌࡀࡓ ࡏࡋ ࡄࡀࡉࡋࡀࡊ ࡃࡉࡋࡀࡊ
ࡈࡅࡁࡇ ࡋࡌࡀࡍ ࡖ ࡏࡃࡀࡊ ࡅࡈࡅࡁࡇ ࡋࡌࡀࡍ ࡖ ࡀࡌࡀࡓ ࡁࡉࡀࡃࡉࡕࡀࡊ
ࡅࡈࡅࡁࡇ ࡋࡌࡀࡍ ࡖ ࡐࡉࡓࡔࡀࡊ ࡈࡅࡁࡇ ࡋࡉࡅࡀࡍ [ࡋࡌࡀࡍ] ࡖ ࡀࡐࡓࡉࡔ ࡏࡋࡀࡊ
ࡈࡅࡁࡇ ࡋࡌࡀࡍ ࡖ ࡍࡉࡎࡉࡁࡓࡀࡊ ࡁࡔࡓࡀࡓࡀ ࡅࡈࡅࡁࡇ ࡋࡌࡀࡍ ࡖ ࡀࡎࡁࡀࡓ
ࡏࡋࡀࡊ ࡈࡅࡁࡇ ࡋࡌࡀࡍ ࡖ ࡀࡎࡁࡀࡓ
ࡌࡍ ࡄࡅࡊࡅࡌࡕࡀࡊ ࡅࡏࡕࡐࡀࡓࡀࡒ ࡌࡍ ࡈࡏࡉࡀ ࡅࡔࡉࡂࡔࡀ ࡖ
ࡄࡀࡆࡉࡍ ࡀࡋࡌࡀ ࡈࡅࡁࡀࡉࡄࡅࡍ ࡋࡔࡀࡋࡌࡀࡍࡉࡀ ࡊࡔࡉࡈࡉࡀ ࡅࡌࡄࡀࡉࡌࡍࡉࡀ
ࡖ ࡏࡃࡅࡊ ࡅࡐࡉࡓࡔࡅࡊ ࡖ ࡎࡀࡋࡒࡉࡀ ࡁࡆࡀࡊࡅࡕࡀ ࡄࡀࡆࡉࡋࡀ ࡋࡀࡕࡀࡓ
012
ࡍࡄࡅࡓ ࡁࡓࡉࡊࡉࡕ ࡅࡌࡔࡀࡁࡉࡕ ࡌࡀࡓࡀࡉ ࡌࡀࡋࡊࡀ ࡓࡀࡌࡀ
ࡖ ࡍࡄࡅࡓࡀ ࡌࡍ ࡉࡅࡌࡀ ࡅࡋࡀࡋࡀࡌ ࡀࡋࡌࡉࡀ ࡁࡌࡉࡌࡓࡀࡊ ࡄࡅࡀ ࡊࡅࡋ
ࡌࡉࡍࡃࡀࡌ ࡅࡏࡕࡉࡒࡓࡉࡀ ࡅࡏࡔࡕࡀࡃࡀࡓ ࡏࡅࡕࡓࡀ ࡌࡍ ࡒࡅࡃࡀࡌࡇ ࡖ ࡄࡀࡄࡅ
ࡌࡀࡓࡀ ࡖ ࡓࡀࡁࡅࡕࡀ ࡖ ࡄࡅ ࡄࡉࡁࡉࡋ ࡆࡉࡅࡀ ࡔࡅࡌࡇ ࡅࡂࡀࡁࡓࡏࡉࡋ
ࡔࡋࡉࡄࡀ ࡌࡉࡕࡉࡒࡓࡉࡀ ࡗ ࡑࡁࡀ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ
ࡌࡍ ࡆࡉࡅࡀ ࡅࡍࡄࡅࡓࡀ ࡖ ࡒࡀࡉࡉࡌࡁࡇ ࡒࡓࡀࡍ ࡌࡍ ࡔࡊࡉࡍࡕࡀ
ࡄࡀࡍࡀࡕࡇ ࡖ ࡄࡅ ࡓࡁࡀ ࡋࡉࡀࡌࡉࡍࡇ ࡔࡊࡉࡍ ࡅࡀࡌࡀࡓࡋࡇ ࡀࡎࡂࡉࡀ
ࡏࡆࡉࡋ ࡋࡀࡋࡌࡀ ࡖ ࡄࡔࡅࡊࡀ ࡖ ࡊࡅࡋࡇ ࡁࡉࡔࡅࡕࡀ ࡌࡋࡉࡀ ࡊࡅࡋࡇ
ࡌࡋࡉࡀ ࡁࡉࡔࡅࡕࡀ ࡅࡌࡋࡉࡀ ࡍࡅࡓࡀ ࡀࡊࡋࡀ ࡀࡋࡌࡀ ࡖ ࡌࡋࡉࡀ ࡊࡀࡃࡁࡀ
ࡅࡍࡉࡊࡋࡀ ࡅࡆࡓࡉࡀ [ࡅࡆࡓࡏࡉࡀ] ࡁࡊࡅࡁࡀ ࡅࡀࡈࡀࡈࡀ ࡀࡋࡌࡀ ࡖ ࡔࡉࡂࡔࡀ ࡅࡈࡉࡓࡒࡀ
ࡖ ࡕࡅࡒࡍࡀ ࡁࡂࡀࡅࡇ ࡋࡉࡕࡁࡇ ࡀࡋࡌࡀ ࡖ ࡄࡔࡅࡊࡀ ࡖ ࡍࡄࡅࡓࡀ ࡋࡉࡕࡁࡇ
ࡀࡋࡌࡀ ࡖ ࡏࡎࡓࡅࡕࡀ ࡖ ࡓࡉࡄࡀ ࡁࡀࡎࡉࡌࡀ ࡋࡉࡕࡁࡇ ࡀࡋࡌࡀ
ࡖ ࡓࡉࡃࡐࡀ ࡅࡌࡅࡕࡀ ࡖ ࡄࡉࡉࡀ ࡖ ࡋࡀࡋࡀࡌ ࡋࡉࡕࡁࡇ ࡀࡋࡌࡀ ࡖ ࡁࡀࡈࡋࡀࡍ
ࡈࡀࡁࡀࡅࡀࡕࡀ ࡅࡌࡄࡀࡔࡀࡁࡀࡕࡀ ࡋࡀࡔࡀࡋࡌࡀࡍ ࡅࡀࡌࡀࡓࡋࡇ ࡖ ࡏࡆࡉࡋ
ࡊࡁࡅࡔ ࡄࡔࡅࡊࡀ ࡅࡓࡀࡆࡉࡀ ࡖ ࡌࡉࡍࡇ ࡂࡁࡉࡋ ࡌࡎࡉࡀ ࡀࡓࡒࡀ ࡅࡍࡂࡅࡃ
ࡓࡒࡉࡄࡀ ࡅࡑࡀࡓࡀࡓ ࡁࡂࡀࡅࡇ ࡊࡅࡊࡁࡉࡀ ࡄࡀࡁ ࡆࡉࡅࡀ ࡋࡔࡀࡌࡉࡔ
ࡅࡕࡅࡒࡍࡀ ࡋࡎࡉࡓࡀ ࡅࡑࡀࡌࡀࡄࡕࡀ [ࡅࡑࡀࡄࡀࡌࡕࡀ] ࡋࡊࡅࡋࡄࡅࡍ ࡊࡅࡊࡁࡉࡀ ࡄࡀࡁ ࡁࡅࡎࡌࡀ
ࡋࡌࡉࡀ ࡅࡑࡀࡅࡕࡀ ࡋࡍࡅࡓࡀ ࡒࡓࡉࡀ ࡐࡉࡓࡉࡀ ࡏࡌࡁࡉࡀ ࡅࡏࡋࡀࡍࡉࡀ ࡖ ࡌࡓࡀࡅࡆࡉࡁࡇ
ࡁࡀࡋࡌࡀ ࡍࡏࡄࡅࡉࡀࡍ ࡄࡀࡅࡀࡍࡉࡀࡕࡀ ࡁࡉࡓࡉࡀࡕࡀ ࡅࡍࡅࡍࡉࡀ ࡅࡑࡉࡐࡀࡓ ࡂࡀࡃࡐࡀ
ࡊࡅࡋ ࡔࡅࡓࡁࡀ ࡆࡀࡊࡓࡀ ࡅࡍࡅࡒࡅࡁࡕࡀ ࡖ ࡍࡉࡄࡅࡉࡋࡇ ࡐࡅࡄࡋࡀࡍࡀ ࡋࡀࡃࡀࡌ
ࡅࡊࡅࡋࡀ ࡔࡅࡓࡅࡁࡕࡇ ࡍࡉࡄࡅࡍ ࡂࡀࡁࡓࡀ ࡅࡏࡍࡕࡀ ࡅࡍࡉࡄࡅࡉࡀ ࡔࡅࡌࡀࡉࡄࡅࡍ
ࡀࡃࡀࡌ ࡅࡄࡀࡅࡀ ࡅࡌࡍ ࡌࡀࡋࡀࡊࡉࡀ ࡖ ࡍࡅࡓࡀ ࡋࡒࡅࡃࡀࡌ ࡀࡃࡀࡌ
ࡍࡉࡔࡕࡀࡁࡃࡅࡍ ࡊࡅࡋ ࡌࡀࡍ ࡖ ࡌࡍ ࡌࡉࡍࡉࡋࡕࡀࡊ ࡀࡁࡀࡓ ࡍࡉࡎࡕࡀࡓ
013
ࡁࡍࡅࡓࡀ ࡖ ࡉࡀࡒࡃࡀ ࡍࡉࡄࡅࡍ ࡕࡋࡀࡕࡀ ࡌࡀࡋࡀࡊࡉࡀ ࡖ ࡆࡉࡅࡀ ࡅࡍࡄࡅࡓࡀ ࡅࡑࡀࡅࡕࡀ
ࡋࡀࡃࡀࡌ ࡍࡉࡄࡅࡉࡋࡇ ࡍࡉࡕࡅࡍ ࡌࡉࡀ ࡄࡉࡉࡀ ࡅࡍࡉࡓࡁࡅࡍ ࡁࡌࡉࡀ ࡕࡀࡄࡌࡉࡀ
ࡁࡓࡉࡄࡀ ࡖ ࡌࡉࡀ ࡄࡉࡉࡀ ࡍࡉࡓࡅࡀࡆ ࡊࡅࡋࡇ ࡀࡋࡌࡀ ࡏࡕࡉࡁࡓࡅࡍ [ࡍࡉࡕࡅࡍ] ࡀࡓࡁࡀ
ࡆࡉࡒࡉࡀ [ࡖ ࡁࡀࡉࡕࡀ] ࡅࡀࡉࡀࡓ ࡖ ࡌࡍࡀࡔࡉࡌ ࡏࡋࡀࡅࡀࡉࡄࡉࡍ ࡕࡉࡄࡅࡉࡀ ࡍࡅࡓࡀ
ࡕࡉࡎࡄࡉࡈ ࡁࡊࡅࡋ ࡀࡋࡌࡀ ࡅࡀࡋࡌࡀ ࡄࡀࡍࡀࡕࡀ ࡍࡉࡍࡄࡀࡓ ࡁࡏࡃࡀࡊ ࡃࡉࡋࡀࡊ
ࡀࡌࡀࡓ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡖ ࡁࡌࡉࡌࡓࡇ ࡄࡅࡀ ࡊࡅࡋ ࡌࡉࡍࡃࡀࡌ
ࡁࡌࡉࡌࡓࡇ ࡅࡀࡕࡀ ࡂࡀࡁࡓࡏࡉࡋ ࡔࡋࡉࡄࡀ ࡀࡃࡉࡌ ࡔࡅࡌࡉࡀ ࡅࡍࡉࡂࡃࡇ
ࡅࡌࡀࡎࡉࡀ ࡋࡀࡓࡒࡀ ࡕࡉࡁࡉࡋ ࡕࡀࡒࡍࡀ ࡅࡀࡋࡌࡀ ࡊࡅࡋࡇ ࡁࡄࡀࡉࡋࡀ ࡖ ࡌࡀࡋࡊࡀ
ࡓࡀࡌࡀ ࡖ ࡍࡄࡅࡓࡀ ࡅࡏࡕࡉࡂࡁࡉࡋ ࡀࡃࡀࡌ ࡂࡀࡁࡓࡀ ࡅࡄࡀࡅࡀ ࡆࡀࡅࡇ
ࡅࡍࡉࡔࡉࡌࡕࡀ ࡁࡂࡅ ࡐࡀࡂࡓࡀ ࡍࡉࡐࡋࡀࡕ ࡅࡗ ࡍࡉࡐࡋࡀࡕ ࡍࡉࡔࡉࡌࡕࡀ
ࡁࡂࡅ ࡐࡀࡂࡓࡀ ࡊࡅࡋ ࡌࡍࡃࡀࡕ ࡄࡊࡅࡌ ࡅࡐࡓࡀࡔ ࡀࡕࡅࡍ ࡌࡀࡋࡀࡊࡉࡀ
ࡖ ࡍࡅࡓࡀ ࡋࡒࡅࡃࡀࡌ ࡀࡃࡀࡌ ࡏࡔࡕࡀࡁࡀࡃ ࡏࡕࡅࡍ ࡅࡎࡂࡉࡃ ࡒࡅࡃࡀࡌࡇ
ࡅࡋࡀࡔࡀࡍࡉࡍ ࡌࡍ ࡌࡉࡌࡓࡇ ࡄࡀࡃ ࡄࡅ ࡁࡉࡔࡀ ࡖ ࡁࡉࡔࡅࡕࡇ
ࡌࡉࡍࡇ ࡏࡕࡂࡉࡁࡋࡀࡕ ࡖ ࡎࡈࡀ ࡌࡍ ࡌࡉࡍࡋࡀࡕ ࡌࡀࡓࡇ ࡅࡌࡀࡓࡇ
ࡁࡏࡎࡅࡓࡇ ࡀࡎࡓࡇ ࡀࡍࡀ ࡔࡋࡉࡄࡀ ࡃࡀࡊࡉࡀ ࡅࡒࡓࡀࡍ ࡅࡐࡀࡒࡃࡀࡍ
ࡌࡀࡓࡀࡉ ࡅࡀࡌࡀࡓ ࡖ ࡏࡆࡉࡋ ࡒࡓࡉࡋࡇ ࡒࡀࡋࡀ ࡋࡀࡃࡀࡌ ࡅࡋࡄࡀࡅࡀ
ࡆࡀࡅࡇ ࡅࡋࡔࡅࡓࡁࡀࡕࡇ ࡊࡅࡋࡄࡉࡍ ࡒࡀࡋࡀ ࡔࡀࡍࡉࡀ ࡒࡓࡉࡋࡅࡍ ࡅࡀࡐࡓࡉࡔࡉࡍࡅࡍ
ࡏࡋ ࡊࡅࡋ ࡌࡉࡍࡃࡀࡌ ࡀࡐࡓࡉࡔࡉࡍࡅࡍ ࡏࡋ ࡌࡀࡋࡊࡀ ࡓࡀࡌࡀ
ࡖ ࡍࡄࡅࡓࡀ ࡖ ࡄࡀࡉࡋࡀ ࡍࡐࡉࡔ ࡅࡊࡀࡁࡉࡓ ࡖ ࡎࡀࡊࡀ ࡅࡌࡉࡍࡉࡀࡍࡀ ࡋࡉࡕࡋࡇ
ࡀࡐࡓࡉࡔࡉࡍࡅࡍ ࡏࡋ ࡀࡋࡌࡀ ࡖ ࡍࡄࡅࡓࡀ ࡖ ࡁࡅࡈࡋࡀࡍࡀ ࡋࡉࡕࡋࡅࡍ ࡀࡌࡀࡓࡋࡇ
ࡖ ࡍࡉࡍࡄࡀࡓ ࡋࡉࡁࡇ ࡅࡀࡐࡓࡉࡔࡇ ࡖ ࡍࡉࡍࡄࡀࡓ ࡏࡅࡑࡓࡇ ࡄࡀࡍࡍࡇ
ࡅࡄࡅࡀࡋࡇ ࡑࡀࡅࡕࡀ ࡀࡍࡀࡕ ࡅࡕࡓࡉࡍ ࡌࡀࡋࡀࡊࡉࡀ ࡖ ࡌࡉࡍࡀࡊ ࡀࡐࡓࡉࡔࡀ
ࡌࡀࡃࡀ ࡋࡀࡃࡀࡌ ࡅࡋࡄࡀࡅࡀ ࡆࡀࡅࡇ ࡅࡋࡔࡅࡓࡁࡀࡕࡇ ࡊࡅࡋࡄࡉࡍ ࡀࡌࡀࡓࡋࡅࡍ
ࡖ ࡋࡀࡍࡉࡎࡈࡅࡍࡅࡍ ࡁࡉࡔࡉࡀ ࡅࡎࡀࡈࡀࡍࡀ ࡖ ࡋࡀࡌࡉࡕࡀࡊࡔࡀࡓ ࡀࡋࡐࡅࡍࡅࡍ
[ࡐࡀࡂࡓࡉࡀ ࡅࡐࡉࡓࡉࡀ ࡅࡏࡌࡁࡉࡀ ࡅࡏࡋࡀࡍࡉࡀ ࡅࡕࡉࡊࡅࡋ ࡏࡊࡉࡋࡕࡀ ࡁࡀࡋࡌࡀ ࡗ ࡀࡊࡋࡉࡀ ࡏࡊࡉࡋࡕࡀ ࡁࡀࡋࡌࡀ ࡍࡉࡔࡂࡀ ࡅࡕࡅࡒࡍࡀ ࡖ ࡏࡉࡕ ࡁࡌࡉࡀ ࡋࡍࡉࡔࡌࡀࡕࡀ ࡍࡉࡕࡌࡍࡉࡀ ࡏࡔࡐࡉࡕࡀ ࡖ ࡏࡊࡉࡋࡕࡀ ࡋࡐࡀࡂࡓࡉࡀ ࡍࡉࡕࡉࡌࡍࡉࡀ ࡅࡊࡅࡋ ࡁࡀࡆࡓࡅࡍࡉࡀ ࡅࡐࡉࡒࡅࡍࡉࡀ ࡅࡓࡉࡄࡀࡍࡉࡀ ࡅࡁࡅࡎࡌࡀࡍࡉࡀ ࡅࡏࡅࡑࡀࡍࡉࡀ ࡅࡎࡀࡌࡀࡍࡉࡀ ࡄࡉࡅࡀ ࡁࡉࡓࡀ ࡅࡑࡉࡐࡀࡓ ࡂࡀࡃࡐࡀ ࡅࡈࡀࡁࡅࡕࡀ ࡅࡊࡅࡋ ࡌࡉࡍࡃࡀࡌ ࡖ ࡈࡀࡁ ࡅࡔࡀࡐࡉࡓ ࡍࡉࡄࡅࡉࡋࡇ ࡐࡅࡄࡋࡀࡍࡀ ࡋࡀࡃࡀࡌ ࡅࡊࡅࡋࡀ ࡔࡅࡓࡁࡕࡇ ࡀࡋࡌࡀ ࡄࡀࡍࡀࡕࡇ ࡍࡉࡍࡄࡀࡓ ࡁࡉࡀࡃ ࡐࡕࡀࡄࡉࡋ ࡅࡀࡌࡀࡓ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡁࡌࡉࡌࡓࡀ ࡄࡅࡀ ࡊࡅࡋ ࡌࡉࡍࡃࡀࡌ ࡁࡌࡉࡌࡓࡇ ࡅࡀࡕࡀ ࡐࡕࡀࡄࡉࡋ ࡅࡀࡓࡉࡌ ࡏࡔࡅࡌࡉࡀ ࡅࡍࡉࡂࡃࡇ ࡏࡋ ࡓࡒࡉࡄࡀ ࡅࡌࡉࡎࡉࡀ ࡋࡀࡓࡒࡀ ࡖ ࡕࡉࡁࡉࡋ ࡅࡒࡓࡅࡍࡅࡍ ࡏࡋ ࡌࡀࡋࡀࡊࡉࡀ ࡖ ࡍࡅࡓࡀ ࡅࡏࡄࡀࡁࡋࡇ ࡆࡉࡅࡀ ࡋࡔࡀࡌࡉࡔ ࡅࡕࡅࡒࡍࡀ ࡋࡎࡉࡓࡀ ࡅࡑࡉࡄࡌࡀ ࡋࡊࡅࡊࡁࡉࡀ ࡅࡀࡎࡒࡉࡍࡅࡍ ࡏࡋ ࡏࡎࡐࡉࡓࡉࡀ ࡖ ࡏࡔࡅࡌࡉࡀ ࡅࡏࡕࡉࡍࡑࡉࡁ ࡆࡉࡒࡀ ࡅࡍࡅࡓࡀ ࡅࡌࡉࡀ ࡅࡏࡕࡉࡍࡑࡉࡁ ࡐࡉࡓࡉࡀ ࡅࡏࡌࡁࡉࡀ ࡅࡏࡋࡀࡍࡉࡀ ࡅࡎࡀࡌࡀࡍࡉࡀ ࡅࡁࡀࡆࡓࡅࡍࡉࡀ ࡅࡓࡉࡄࡀࡍࡉࡀ ࡅࡀࡁࡀࡃ ࡄࡉࡅࡀ ࡁࡉࡓࡀ ࡄࡉࡅࡀ ࡁࡀࡋࡀ ࡖ ࡊࡅࡋ ࡂࡅࡀࡍ ࡅࡌࡍ ࡀࡒࡀࡐࡓࡀ ࡅࡎࡅࡌࡒࡀ ࡅࡔࡐࡉࡕࡀ ࡅࡃࡅࡓࡃࡉࡀ ࡖ ࡀࡍࡀࡍࡉࡀ ࡖ ࡆࡉࡒࡀ ࡅࡍࡅࡓࡀ ࡅࡌࡉࡀ ࡅࡈࡅࡄࡌࡀ ࡅࡆࡌࡀ ࡅࡌࡉࡓࡕࡀ ࡅࡓࡀࡆࡉࡀ ࡖ ࡀࡋࡌࡀ ࡄࡀࡆࡉࡍ ࡖ ࡀࡃࡀࡌ ࡅࡄࡀࡅࡀ ࡅࡏࡕࡉࡂࡁࡉࡋ ࡁࡄࡀࡉࡋࡇ ࡖ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡅࡍࡉࡔࡉࡌࡕࡀ ࡁࡀࡃࡀࡌ ࡅࡄࡀࡅࡀ ࡍࡉࡐࡋࡀࡕ ࡗ ࡍࡐࡀࡋࡁࡅࡍ ࡍࡉࡔࡉࡌࡕࡀ ࡁࡂࡉࡍࡀࡕ ࡏࡋࡀࡍࡉࡀ ࡄࡅࡍ ࡗ ࡄࡅࡍ ࡁࡂࡉࡍࡀࡕ ࡏࡋࡀࡍࡉࡀ ࡌࡉࡍࡃࡀࡌ ࡋࡀࡄࡊࡅࡌ ࡅࡋࡀࡐࡓࡉࡔ ࡀࡌࡀࡓ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡌࡍ ࡌࡀࡋࡀࡊࡉࡀ ࡖ ࡍࡅࡓࡀ ࡋࡒࡅࡃࡀࡌ ࡀࡃࡀࡌ ࡍࡉࡔࡕࡀࡁࡃࡅࡍ ࡍࡉࡕࡅࡍ ࡅࡍࡉࡎࡉࡂࡃࡅࡍ ࡋࡒࡅࡃࡀࡌࡇ ࡅࡋࡀࡍࡉࡔࡀࡍࡅࡍ ࡌࡍ ࡌࡉࡌࡓࡀ ࡄࡀࡃ ࡄࡅ ࡁࡉࡔࡀ ࡖ ࡁࡉࡔࡅࡕࡀ ࡌࡉࡍࡇ ࡏࡕࡂࡉࡁࡋࡀࡕ ࡅࡎࡈࡀ ࡌࡍ ࡌࡉࡍࡀࡋࡀࡕ ࡌࡀࡓࡇ ࡅࡏࡋ ࡌࡉࡍࡉࡋࡀࡕ ࡌࡀࡓࡇ ࡋࡀࡒࡀࡌ ࡗ ࡋࡀࡒࡀࡌ ࡋࡌࡉࡍࡉࡋࡀࡕ ࡌࡀࡓࡇ ࡁࡌࡀࡓࡊࡀࡁࡕࡇ ࡁࡏࡎࡅࡓࡀ ࡖ ࡀࡋࡀࡄࡀ ࡏࡎࡕࡀࡓ ࡀࡍࡀ ࡔࡋࡉࡄࡀ ࡃࡀࡊࡉࡀ ࡒࡓࡀࡍ ࡅࡐࡀࡒࡃࡀࡍ ࡌࡀࡓࡀࡉ ࡅࡀࡌࡀࡓ ࡏࡆࡉࡋ ࡒࡓࡉࡋࡇ ࡒࡀࡋࡀ ࡔࡀࡍࡉࡀ ࡏࡋ ࡀࡃࡀࡌ ࡅࡋࡄࡀࡅࡀ]
014 ࡁࡅࡕࡀ ࡅࡕࡅࡔࡁࡉࡄࡕࡀ ࡖ ࡍࡉࡓࡌࡅࡍ ࡅࡍࡉࡔࡀࡁࡅࡍ ࡌࡀࡓࡀࡉࡄࡅࡍ ࡖ ࡊࡅࡋࡄࡅࡍ
ࡀࡋࡌࡉࡀ ࡕࡋࡀࡕࡀ ࡆࡉࡁࡍࡉࡀ ࡁࡉࡅࡌࡀ ࡅࡕࡓࡉࡍ ࡆࡉࡁࡍࡉࡀ ࡁࡋࡉࡋࡉࡀ ࡀࡌࡀࡓࡋࡅࡍ
ࡋࡂࡅࡈ ࡆࡀࡅࡀ ࡅࡏࡕࡊࡀࡍࡀࡍ ࡌࡉࡍࡀࡉࡊࡅࡍ ࡍࡉࡕࡍࡀࡐࡀࡔ ࡀࡋࡌࡀ ࡗ ࡋࡅࡀࡕ
ࡆࡀࡅࡀࡉࡊࡅࡍ ࡒࡀࡓࡁࡉࡕࡅࡍ ࡎࡅࡍ ࡌࡉࡀ ࡅࡃࡀࡊࡅࡍ ࡍࡀࡐࡔࡀࡉࡊࡅࡍ ࡋࡀࡕࡉࡂࡉࡓࡅࡍ
ࡅࡋࡀࡕࡉࡂࡉࡍࡁࡅࡍ ࡅࡋࡀࡕࡉࡂࡉࡈࡋࡅࡍ ࡁࡍࡀࡕ ࡀࡍࡀࡔࡀ ࡉࡀ ࡔࡀࡋࡌࡀࡍࡉࡀ ࡅࡌࡄࡀࡉࡌࡍࡉࡀ
ࡋࡀࡕࡉࡐࡊࡅࡍ ࡌࡍ ࡌࡀࡌࡋࡀࡋࡊࡅࡍ ࡅࡊࡀࡃࡁࡀ ࡅࡆࡉࡐࡀ ࡋࡀࡕࡉࡓࡉࡄࡌࡅࡍ ࡋࡀࡕࡉࡓࡉࡄࡌࡅࡍ
ࡆࡀࡄࡁࡀ ࡅࡊࡀࡎࡐࡀ ࡅࡒࡉࡍࡉࡀࡍࡀ ࡖ ࡀࡋࡌࡀ ࡄࡀࡆࡉࡍ ࡀࡌࡉࡍࡈࡅࡋ ࡖ ࡀࡋࡌࡀ
ࡄࡀࡆࡉࡍ ࡁࡀࡈࡉࡋ ࡅࡀࡅࡉࡃ ࡅࡒࡉࡍࡉࡀࡍࡇ ࡅࡏࡁࡉࡃࡀࡕࡇ ࡌࡉࡔࡕࡀࡌࡓࡀ ࡋࡀࡕࡉࡎࡉࡂࡃࡅࡍ
ࡋࡎࡀࡈࡀࡍࡀ ࡅࡋࡐࡀࡕࡉࡊࡓࡉࡀ ࡅࡋࡑࡀࡋࡀࡌࡀࡕࡀ ࡅࡋࡈࡏࡉࡀ ࡅࡔࡉࡂࡔࡀ ࡖ ࡄࡀࡆࡉࡍ
ࡀࡋࡌࡀ ࡖ ࡌࡀࡍ ࡎࡀࡂࡉࡃ ࡋࡎࡀࡈࡀࡍࡀ ࡍࡀࡐࡉࡋ ࡁࡍࡅࡓࡀ ࡖ ࡉࡀࡒࡃࡀ
ࡀࡋࡌࡀ ࡋࡉࡅࡌࡀ ࡖ ࡃࡉࡍࡀ ࡅࡀࡋࡌࡀ ࡋࡔࡉࡕࡀ ࡔࡀࡉࡉࡀ ࡐࡅࡓࡒࡀࡍࡀ ࡀࡋࡌࡀ
ࡖ ࡑࡀࡁࡉࡀ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡖ ࡃࡀࡉࡉࡍࡋࡅࡍ ࡋࡊࡅࡋࡄࡅࡍ ࡀࡋࡌࡉࡀ
ࡃࡀࡉࡉࡍࡋࡉࡍ ࡋࡍࡉࡔࡌࡀࡕࡀ ࡊࡅࡋ ࡏࡍࡉࡔ ࡗ ࡏࡅࡁࡀࡃࡉࡀ ࡏࡃࡇ
ࡋࡀࡕࡉࡋࡐࡅࡍ ࡄࡀࡓࡔࡉࡀ ࡖ ࡎࡀࡈࡀࡍࡀ ࡅࡎࡀࡄࡃࡅࡕࡀ ࡖ ࡊࡀࡃࡁࡀ ࡋࡀࡕࡉࡎࡉࡄࡃࡅࡍ
ࡗ ࡃࡉࡍࡀ ࡃࡀࡉࡍࡉࡕࡅࡍ ࡕࡅࡓࡑࡉࡀ ࡋࡃࡉࡍࡉࡀ ࡋࡀࡕࡉࡐࡊࡅࡍ ࡗ ࡌࡎࡀࡄࡃࡉࡀ
ࡀࡍࡀࡔࡉࡀ ࡖ ࡊࡅࡔࡈࡀ ࡍࡉࡎࡉࡄࡃࡅࡍ ࡊࡅࡋ ࡌࡀࡍ ࡖ ࡀࡐࡉࡊ ࡃࡉࡍࡀ ࡀࡊࡋࡀࡋࡇ
ࡍࡅࡓࡀ ࡖ ࡉࡀࡒࡃࡀ ࡋࡀࡕࡉࡌࡉࡎࡓࡅࡍ ࡀࡁࡃࡉࡀ ࡊࡔࡉࡓࡉࡀ ࡁࡉࡀࡃ ࡌࡀࡓࡀࡅࡀࡕࡅࡍ
ࡁࡉࡔࡉࡀ ࡅࡌࡀࡊࡀ ࡋࡕࡀࡒࡉࡐࡀ ࡋࡀࡕࡀࡕࡍࡅࡍ ࡀࡅࡒࡀࡓ ࡀࡁࡀ ࡅࡏࡌࡀ
ࡅࡀࡄࡉࡀ ࡒࡀࡔࡉࡔࡉࡀ ࡀࡊࡅࡀࡕ ࡀࡁࡀ ࡁࡓࡀ ࡖ ࡌࡀࡔࡉࡈ ࡀࡁࡀ
ࡅࡏࡌࡀ ࡁࡉࡅࡌࡀ ࡖ ࡃࡉࡍࡀ ࡌࡉࡕࡄࡀࡉࡀࡁ ࡋࡀࡕࡉࡄࡆࡅࡍ ࡅࡋࡀࡕࡉࡓࡉࡂࡅࡍ ࡅࡋࡀࡕࡉࡁࡅࡍ
ࡌࡉࡍࡃࡀࡌ ࡖ ࡋࡀࡅ ࡃࡉࡋࡊࡅࡍ ࡄࡅ ࡄࡉࡍ ࡉࡀࡄࡉࡁࡋࡊࡅࡍ ࡌࡀࡓࡀࡉࡊࡅࡍ ࡄࡉࡍࡏࡋࡀ
ࡏࡋࡀࡅࡇ ࡁࡄࡀࡈࡀࡉࡉࡀ ࡋࡀࡕࡉࡊࡀࡃࡔࡅࡍ ࡀࡌࡉࡍࡈࡅࡋ ࡖ ࡁࡑࡅࡁࡉࡀࡍࡇ ࡖ ࡌࡀࡓࡀࡉࡊࡅࡍ
ࡊࡅࡋ ࡌࡉࡍࡃࡀࡌ ࡁࡈࡀࡁࡅࡕࡀ ࡊࡕࡀࡁ ࡅࡏࡄࡀࡁࡋࡊࡅࡍ ࡗ ࡁࡉࡔࡅࡕࡀ ࡌࡀࡈࡉࡀࡋࡊࡅࡍ
ࡎࡁࡅࡋ ࡅࡀࡔࡀࡓ ࡁࡄࡀࡉࡌࡀࡍࡅࡕࡊࡅࡍ ࡅࡋࡀࡕࡉࡔࡀࡍࡅࡍ ࡅࡋࡀࡕࡉࡐࡊࡅࡍ ࡌࡍ
015 ࡌࡀࡌࡋࡀࡋࡊࡅࡍ ࡅࡋࡀࡕࡉࡔࡉࡐࡋࡅࡍ ࡁࡅࡓࡊࡀࡉࡊࡅࡍ ࡅࡋࡀࡕࡉࡊࡉࡁࡔࡅࡍ ࡓࡉࡔࡀࡉࡊࡅࡍ
ࡅࡋࡀࡕࡉࡎࡉࡂࡃࡅࡍ ࡋࡎࡀࡈࡀࡍࡀ ࡓࡂࡉࡌࡀ ࡍࡀࡐࡋࡀ ࡊࡅࡋ ࡌࡀࡍ ࡖ ࡋࡁࡉࡔࡉࡀ ࡅࡐࡀࡕࡉࡊࡓࡉࡀ
ࡅࡋࡑࡀࡋࡌࡉࡀ ࡎࡀࡂࡉࡃ ࡓࡄࡅࡒ ࡌࡉࡍࡇ ࡋࡀࡕࡉࡄࡅࡉࡋࡇ ࡓࡀࡄࡌࡀ ࡏࡅ ࡁࡀࡉࡉࡕࡅࡋࡇ
ࡅࡓࡀࡄࡌࡉࡕࡅࡋࡇ ࡀࡔࡌࡅࡉࡀ ࡊࡕࡀࡁࡉࡀ ࡅࡌࡉࡌࡓࡉࡀ ࡅࡕࡅࡔࡁࡉࡄࡕࡀ ࡖ ࡏࡄࡀࡁࡋࡊࡅࡍ
ࡌࡀࡓࡀࡉࡊࡅࡍ ࡄࡉࡍ ࡔࡀࡌࡀ ࡅࡌࡄࡀࡉࡌࡀࡍ ࡅࡎࡀࡄࡉࡃ ࡁࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ
ࡀࡋࡀࡄࡀ ࡖ ࡌࡍ ࡍࡀࡐࡔࡀ ࡄࡅࡀ ࡓࡅࡄࡌࡅࡉࡀ ࡅࡋࡅࡀࡕࡀࡉࡊࡅࡍ ࡒࡀࡓࡁࡅࡉࡀ
ࡅࡊࡅࡋ ࡌࡉࡍࡃࡀࡌ ࡖ ࡏࡕࡋࡀࡉࡊࡅࡍ ࡀࡈࡐࡅࡉࡀ ࡄࡉࡍ ࡋࡀࡔࡀࡌࡀ ࡅࡋࡀ ࡎࡀࡄࡉࡃ
ࡅࡋࡀࡌࡄࡀࡉࡌࡀࡍ ࡁࡄࡀࡈࡀࡉࡉࡀ ࡖ ࡍࡀࡐࡔࡀ ࡍࡉࡔࡕࡀࡉࡀࡋ ࡄࡀࡆࡉࡕࡅࡍ
ࡁࡓ ࡔࡉࡁࡉࡀ ࡖ ࡌࡄࡀࡉࡌࡀࡍ ࡅࡊࡔࡉࡈ ࡄࡀࡁ ࡐࡓࡅࡒࡀ ࡅࡐࡀࡓࡒࡅࡉࡀ
ࡅࡋࡀࡅ ࡁࡀࡋࡄࡅࡃ ࡆࡀࡄࡁࡀ ࡅࡊࡀࡎࡐࡀ ࡍࡉࡔࡉࡌࡕࡇ ࡕࡉࡐࡀࡓࡒࡅࡍ ࡄࡉࡍࡉࡋࡀ
ࡁࡊࡅࡔࡈࡀ ࡅࡄࡀࡉࡌࡀࡍࡅࡕࡀ ࡅࡁࡌࡉࡌࡓࡀ ࡃࡀࡊࡉࡀ ࡖ ࡐࡅࡌࡀ ࡍࡉࡔࡉࡌࡕࡇ
ࡕࡉࡐࡀࡓࡒࡅࡍ ࡌࡍ ࡄࡔࡅࡊࡀ ࡋࡍࡄࡅࡓࡀ ࡅࡌࡍ ࡈࡏࡉࡀ ࡋࡔࡓࡀࡓࡀ ࡅࡌࡍ
ࡎࡉࡈࡉࡀ ࡅࡌࡓࡉࡓࡅࡕࡀ ࡋࡁࡅࡕࡀ ࡅࡕࡅࡔࡁࡉࡄࡕࡀ ࡅࡌࡍ ࡊࡀࡐࡓࡅࡕࡀ ࡋࡅࡀࡕ
ࡄࡀࡉࡌࡀࡍࡅࡕࡀ ࡖ ࡌࡀࡓࡀࡉࡊࡅࡍ ࡌࡀࡍ ࡖ ࡍࡉࡐࡀࡓࡀࡒ ࡍࡉࡔࡉࡌࡕࡇ
ࡍࡉࡔࡀࡅࡉࡋࡇ ࡃࡀࡓࡉࡀ ࡅࡀࡋࡌࡉࡀ ࡋࡊࡅࡍ ࡀࡌࡀࡓࡍࡀ ࡁࡄࡉࡓࡀࡉ ࡋࡊࡅࡍ ࡌࡀࡐࡓࡉࡔࡍࡀ ࡌࡄࡀࡉࡌࡀࡍࡀࡉ
ࡄࡀࡁ ࡆࡉࡃࡒࡀ ࡋࡀࡍࡉࡉࡀ ࡅࡋࡏࡔࡉࡒࡀ ࡄࡅࡋࡇ ࡐࡀࡓࡅࡀࡍࡒࡀ ࡅࡊࡅࡉ ࡉࡀࡄࡉࡁࡉࡕࡅࡍ
ࡆࡉࡃࡒࡀ ࡁࡄࡉࡓࡀࡉ ࡋࡀࡕࡉࡎࡉࡄࡃࡅࡍ ࡏࡅ ࡌࡎࡀࡄࡃࡉࡕࡅࡍ ࡋࡀࡕࡀࡕࡍࡅࡍ ࡏࡅ
ࡉࡀࡄࡁࡉࡕࡅࡍ ࡁࡉࡀࡌࡉࡍࡀࡉࡊࡅࡍ ࡋࡉࡎࡌࡀࡋࡀࡉࡊࡅࡍ ࡋࡀࡕࡉࡌࡓࡅࡍ ࡏࡅ ࡉࡀࡄࡁࡉࡕࡅࡍ
ࡁࡎࡌࡀࡋࡀࡉࡊࡅࡍ ࡋࡉࡀࡌࡉࡍࡀࡉࡊࡅࡍ ࡋࡀࡕࡉࡌࡓࡅࡍ ࡊࡅࡋ ࡌࡀࡍ ࡖ ࡉࡀࡄࡉࡁ ࡆࡉࡃࡒࡀ
ࡅࡌࡎࡀࡄࡉࡃ ࡌࡉࡊࡐࡀࡓ ࡌࡉࡍࡇ ࡅࡋࡀࡌࡉࡄࡔࡉࡁࡋࡇ ࡊࡅࡋ ࡌࡀࡍ ࡖ ࡉࡀࡄࡉࡁ
ࡆࡉࡃࡒࡀ ࡅࡈࡀࡁࡅࡕࡀ ࡁࡍࡐࡉࡔ ࡀࡁࡉࡃ ࡅࡄࡀࡉࡆࡀࡊ ࡊࡀࡐࡉࡓ ࡌࡍ ࡆࡉࡃࡒࡀ
ࡋࡀࡉࡀࡄࡉࡁ ࡍࡀࡐࡉࡋ ࡁࡍࡅࡓࡀ ࡖ ࡉࡀࡒࡃࡀ ࡀࡋࡌࡀ ࡖ ࡄࡀࡈࡀࡉࡉࡀ ࡔࡀࡋࡌࡉࡀ
ࡅࡄࡀࡅࡁࡉࡀ ࡊࡅࡋࡄࡅࡍ ࡌࡉࡕࡂࡀࡌࡓࡉࡀ ࡁࡄࡉࡓࡀࡉ ࡏࡅ ࡄࡀࡆࡉࡕࡅࡍ ࡌࡀࡍ
ࡖ ࡊࡐࡉࡍ ࡎࡉࡁࡅࡉࡀ ࡏࡅ ࡄࡀࡆࡉࡕࡅࡍ ࡌࡀࡍ ࡖ ࡑࡄࡉࡀ ࡀࡔࡒࡅࡉࡅࡉࡀ ࡄࡀࡆࡉࡕࡅࡍ
016 ࡀࡓࡈࡉࡋࡀࡉࡀ ࡎࡅࡌࡋࡇ ࡁࡑࡀࡅࡓࡇ ࡋࡁࡅࡔࡉࡀ ࡅࡊࡎࡅࡉࡉࡀ ࡀࡌࡉࡍࡈࡅࡋ ࡖ ࡊࡅࡋ
ࡌࡀࡍ ࡖ ࡉࡀࡄࡉࡁ ࡍࡀࡎࡉࡁ ࡅࡊࡅࡋ ࡌࡀࡍ ࡖ ࡌࡀࡓࡔࡉࡀ ࡌࡉࡕࡐࡓࡀ ࡊࡅࡋ ࡖ ࡆࡉࡃࡒࡀ
ࡉࡀࡄࡉࡁ ࡆࡉࡃࡒࡀ ࡓࡁࡀ ࡄࡀࡅࡉࡋࡇ ࡁࡀࡄࡉࡃ ࡉࡀࡄࡉࡁ ࡏࡃࡀ ࡖ ࡋࡁࡅࡔࡉࡀ ࡋࡀࡓࡈࡉࡋࡀࡉࡀ
ࡌࡀࡋࡁࡉࡔ ࡎࡀࡉࡌࡉࡋࡇ ࡁࡑࡀࡅࡓࡇ ࡋࡁࡅࡔࡉࡀ ࡅࡊࡎࡅࡉࡉࡀ ࡖ ࡌࡐࡀࡓࡉࡒ ࡁࡓ
ࡔࡉࡁࡉࡀ ࡍࡀࡐࡉࡒ ࡀࡋࡀࡍࡐࡇ ࡔࡋࡉࡄࡀ ࡖ ࡄࡉࡉࡀ ࡖ ࡁࡀࡉࡉࡍ ࡅࡌࡉࡕࡀࡐࡓࡀࡔ
ࡍࡀࡑࡁࡉࡋࡇ ࡀࡃࡉࡀࡅࡓࡉࡀ ࡖ ࡒࡀࡓࡉࡀ ࡒࡀࡋࡀ ࡖ ࡄࡉࡉࡀ ࡁࡍࡉࡍࡀ ࡅࡌࡒࡀࡉࡌࡀ
ࡁࡉࡍࡕࡇ ࡖ ࡌࡉࡕࡀࡐࡓࡉࡔࡁࡇ ࡁࡕࡅࡔࡁࡉࡄࡕࡀࡉ ࡊࡅࡋ ࡉࡅࡌ ࡔࡅࡌࡇ ࡃࡀࡊࡓࡉࡀ
ࡁࡀࡕࡀࡓ ࡍࡄࡅࡓ ࡖ ࡌࡀࡍࡄࡀࡓࡁࡅࡍ ࡁࡌࡀࡌࡋࡀࡋࡀࡉ ࡄࡀࡕࡀࡌ ࡁࡏࡅࡕࡓࡉࡀ
ࡌࡉࡄࡔࡉࡁ ࡖ ࡌࡉࡕࡐࡀࡓࡀࡒ ࡌࡍ ࡎࡉࡈࡉࡀ ࡖ ࡁࡉࡔࡉࡀ ࡀࡃࡉࡍࡒࡉࡀ ࡄࡀࡈࡀࡉࡉࡀ
ࡅࡄࡀࡅࡁࡉࡀ ࡍࡉࡎࡀࡒ ࡍࡉࡄࡉࡆࡉࡀ ࡋࡀࡕࡀࡓ ࡍࡄࡅࡓ ࡊࡅࡋ ࡌࡀࡍ ࡖ ࡁࡓࡀࡄࡌࡅࡕ
ࡌࡀࡓࡇ ࡐࡀࡂࡓࡇ ࡋࡂࡀࡈࡋࡇ ࡍࡀࡔࡋࡉࡌ ࡆࡀࡊࡀࡉࡀ ࡖ ࡌࡅࡌࡀ ࡋࡉࡕࡁࡇ ࡋࡊࡅࡍ
ࡀࡌࡀࡓࡍࡀ ࡁࡄࡉࡓࡀࡉ ࡋࡊࡅࡍ ࡌࡀࡐࡓࡉࡔࡍࡀ ࡌࡄࡀࡉࡌࡍࡀࡉ ࡑࡅࡌ ࡑࡀࡅࡌࡀ
ࡓࡁࡀ ࡖ ࡋࡀࡅ ࡌࡍ ࡌࡉࡊࡋࡀ ࡅࡌࡀࡔࡒࡉࡀ ࡖ ࡀࡋࡌࡀ ࡄࡅࡀ ࡑࡅࡌ
ࡀࡉࡍࡀࡉࡊࡅࡍ ࡌࡍ ࡌࡉࡓࡌࡀࡆ ࡓࡉࡌࡆࡀ ࡅࡋࡀࡕࡉࡄࡆࡅࡍ ࡁࡉࡔࡅࡕࡀ ࡅࡕࡉࡁࡃࡅࡍ
ࡑࡅࡌ ࡏࡅࡃࡍࡀࡉࡊࡅࡍ ࡌࡍ ࡌࡀࡑࡅࡕࡉࡀ ࡏࡋ ࡁࡀࡁࡉࡀ ࡖ ࡋࡀࡅ ࡃࡉࡋࡊࡅࡍ
ࡑࡅࡌ ࡐࡅࡌࡀࡉࡊࡅࡍ ࡌࡍ ࡌࡉࡌࡀࡓ ࡊࡀࡃࡁࡀ ࡖ ࡀࡅࡋࡀ ࡅࡆࡉࡐࡀ ࡅࡔࡉࡒࡓࡀ
ࡋࡀࡕࡉࡓࡉࡄࡌࡅࡍ ࡑࡅࡌ ࡋࡉࡁࡀࡉࡊࡅࡍ ࡌࡍ ࡄࡀࡔࡅࡁࡉࡀ ࡁࡉࡔࡅࡕࡀ ࡅࡎࡉࡍࡀ
ࡒࡉࡍࡀ ࡅࡐࡋࡅࡂࡉࡀ ࡁࡋࡉࡁࡀࡉࡊࡅࡍ ࡋࡀࡍࡉࡄࡅࡉࡀ ࡖ ࡌࡀࡍ ࡖ ࡋࡀࡂࡉࡈ ࡒࡉࡍࡀ
ࡔࡀࡋࡌࡀࡍࡀ ࡋࡀࡌࡉࡕࡉࡒࡓࡉࡀ ࡑࡅࡌ ࡏࡃࡀࡉࡊࡅࡍ ࡌࡍ ࡌࡉࡂࡈࡀࡋ ࡂࡀࡈࡋࡀ
ࡅࡂࡍࡅࡁࡕࡀ ࡋࡀࡕࡉࡂࡉࡍࡁࡅࡍ ࡑࡅࡌ ࡐࡀࡂࡓࡀࡉࡊࡅࡍ ࡌࡍ ࡆࡀࡅࡀ ࡖ ࡋࡀࡅ ࡃࡉࡋࡊࡅࡍ
ࡄࡏ ࡑࡅࡌ ࡁࡅࡓࡊࡀࡉࡊࡅࡍ ࡌࡍ ࡌࡉࡎࡂࡀࡃ ࡋࡎࡀࡈࡀࡍࡀ ࡅࡋࡑࡀࡋࡀࡌࡀࡕࡀ
ࡖ ࡆࡉࡐࡀ ࡋࡀࡕࡀࡓࡁࡊࡅࡍ ࡑࡅࡌ ࡋࡉࡂࡓࡀࡉࡊࡅࡍ ࡌࡍ ࡌࡀࡎࡂࡅࡉࡉࡀ ࡁࡍࡉࡊࡋࡀ
ࡏࡋ ࡌࡉࡍࡃࡀࡌ ࡖ ࡋࡀࡅ ࡃࡉࡋࡊࡅࡍ ࡄࡅ ࡑࡅࡌࡅࡉࡀ ࡋࡄࡀࡆࡉࡍ ࡑࡀࡅࡌࡀ
ࡓࡁࡀ ࡅࡋࡀࡕࡉࡔࡓࡅࡍࡇ ࡀࡋࡌࡀ ࡖ ࡍࡀࡐࡒࡉࡕࡅࡍ ࡌࡍ ࡐࡀࡂࡓࡀࡉࡊࡅࡍ ࡌࡀࡍ
017 ࡖ ࡁࡉࡀࡍࡒࡅࡕࡇ ࡄࡀࡈࡉࡀ ࡕࡅࡌ ࡋࡀࡄࡀࡈࡉࡀ ࡅࡕࡀࡉࡉࡁ ࡏࡋ ࡍࡀࡐࡔࡀ
ࡅࡋࡀࡌࡀࡎࡊࡉࡋ ࡕࡀࡉࡀࡁࡅࡕࡀ ࡖ ࡌࡀࡓࡇ ࡄࡀࡅࡉࡀ ࡏࡋࡇ ࡄࡅ ࡌࡉࡋࡊࡀ
ࡓࡀࡌࡀ ࡖ ࡍࡄࡅࡓࡀ ࡄࡀࡉࡀࡎࡀ ࡅࡕࡀࡉࡀࡁࡀ ࡅࡌࡓࡀࡄࡌࡀࡍࡀ ࡄࡅ
ࡔࡀࡁࡉࡒ ࡄࡀࡈࡀࡉࡉࡀ ࡅࡄࡀࡅࡁࡉࡀ ࡄࡅ ࡊࡅࡋ ࡖ ࡆࡀࡄࡁࡀ ࡅࡊࡀࡎࡐࡀ
ࡅࡒࡉࡍࡉࡀࡍࡀ ࡖ ࡀࡋࡌࡀ ࡄࡀࡆࡉࡍ ࡍࡉࡓࡄࡅࡌ ࡅࡏࡋࡀࡅࡇ ࡂࡀࡈࡋࡀ ࡍࡉࡂࡈࡅࡋ ࡍࡀࡐࡉࡋ
ࡁࡍࡅࡓࡀ ࡖ ࡉࡀࡒࡃࡀ ࡅࡌࡄࡀࡁࡀࡁࡀ ࡁࡄࡉࡓࡀࡉ ࡋࡀࡍࡉࡄࡅࡉࡋࡊࡅࡍ ࡓࡅࡄࡑࡀࡍࡀ
ࡏࡋ ࡌࡀࡋࡊࡉࡀ ࡅࡔࡀࡋࡉࡈࡀࡍࡉࡀ ࡅࡌࡀࡓࡁࡉࡀ ࡖ ࡄࡀࡆࡉࡍ ࡀࡋࡌࡀ ࡅࡋࡀ ࡏࡋ ࡄࡀࡉࡋࡀ
ࡅࡆࡀࡉࡍࡀ ࡅࡕࡀࡊࡕࡅࡔࡀ ࡅࡊࡉࡍࡐࡀ ࡖ ࡊࡀࡍࡐࡉࡀ ࡅࡔࡉࡁࡉࡀ ࡖ ࡔࡀࡁࡉࡍ ࡁࡀࡋࡌࡀ
ࡄࡀࡆࡉࡍ ࡅࡋࡀ ࡏࡋ ࡃࡀࡄࡁࡀ ࡅࡋࡀ ࡏࡋ ࡊࡀࡎࡐࡀ ࡔࡀࡂࡉࡔ ࡕࡉࡂࡓࡀ
ࡓࡌࡉࡋࡅࡍ ࡒࡀࡍࡉࡍ ࡅࡔࡀࡁࡒࡉࡍ ࡁࡀࡋࡌࡀ ࡅࡀࡆࡋࡉࡀ ࡁࡍࡅࡓࡀ ࡁࡀࡔࡋࡉࡀ
ࡁࡏࡃࡀࡉࡄࡅࡍ ࡁࡀࡃࡉࡍ ࡂࡅࡌࡓࡉࡀ ࡅࡁࡉࡎࡐࡉࡄࡀࡕࡅࡍ ࡌࡎࡀࡓࡎࡉࡐࡉࡍ ࡉࡀࡒࡃࡀࡍࡀ
ࡁࡀࡈࡉࡋ ࡔࡀࡅࡈࡅࡍ ࡅࡔࡅࡋࡈࡀࡍࡅࡍ ࡅࡌࡉࡎࡕࡀࡊࡓࡀࡋࡅࡍ ࡂࡉࡅࡕࡀࡉࡄࡅࡍ ࡋࡀࡃࡀࡄࡁࡀࡉࡅࡍ
ࡅࡋࡀࡊࡀࡎࡐࡀࡉࡅࡍ ࡋࡀࡒࡀࡉࡉࡌࡋࡅࡍ ࡅࡋࡀࡄࡀࡅࡉࡋࡅࡍ ࡁࡀࡄࡉࡃ ࡏࡃࡀ ࡋࡀࡀࡓࡂࡁࡀࡉࡅࡍ
ࡅࡋࡀࡌࡉࡍࡍࡅࡍ ࡋࡀࡄࡀࡅࡉࡋࡅࡍ ࡐࡉࡓࡒࡀ ࡀࡅࡃࡀ ࡅࡎࡀࡉࡐࡀ ࡌࡀࡋࡊࡅࡕࡅࡍ
ࡅࡃࡉࡍࡀ ࡌࡉࡍࡀࡉࡄࡅࡍ ࡌࡉࡕࡌࡀࡓ ࡋࡊࡅࡍ ࡀࡌࡀࡓࡍࡀ ࡊࡅࡋࡄࡅࡍ ࡖ ࡔࡀࡌࡉࡍ
ࡔࡅࡌࡇ ࡖ ࡀࡋࡀࡄࡀ ࡏࡋ ࡌࡉࡒࡌࡀࡉࡊࡅࡍ ࡅࡏࡋ ࡌࡉࡕࡁࡀࡉࡊࡅࡍ ࡅࡏࡋ
ࡌࡉࡆࡋࡀࡉࡊࡅࡍ ࡅࡏࡋ ࡌࡉࡕࡉࡀࡉࡊࡅࡍ ࡅࡏࡋ ࡌࡉࡊࡋࡀࡉࡊࡅࡍ ࡅࡏࡋ ࡌࡉࡔࡕࡉࡀࡉࡊࡅࡍ
ࡅࡏࡋ ࡌࡉࡔࡋࡀࡉࡊࡅࡍ ࡅࡏࡋ ࡌࡉࡔࡉࡊࡁࡀࡉࡊࡅࡍ ࡅࡏࡋ ࡊࡅࡋࡄࡉࡍ
ࡏࡁࡉࡃࡀࡕࡊࡅࡍ ࡀࡃࡊࡀࡓ ࡅࡔࡀࡁࡀ ࡔࡅࡌࡇ ࡖ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ
ࡐࡀࡓࡅࡍ ࡉࡀࡓࡃࡍࡀ ࡅࡏࡑࡈࡁࡅࡍ ࡑࡁࡅࡍ ࡍࡉࡔࡌࡀࡕࡊࡅࡍ ࡁࡌࡀࡑࡁࡅࡕࡀ
ࡄࡀࡉࡕࡀ ࡀࡉࡕࡉࡕࡉࡋࡊࡅࡍ ࡌࡍ ࡀࡋࡌࡉࡀ ࡖ ࡍࡄࡅࡓࡀ ࡖ ࡊࡄࡅࡋࡍ ࡔࡀࡋࡌࡀࡍࡉࡀ
ࡅࡌࡄࡀࡉࡌࡍࡉࡀ ࡁࡂࡀࡅࡇ ࡏࡑࡈࡁࡀ ࡅࡁࡓࡅࡊ ࡏࡋ ࡐࡉࡄࡕࡀ ࡅࡀࡊࡅࡋ
ࡅࡔࡀࡁࡀ ࡏࡋ ࡌࡀࡌࡁࡅࡄࡀ ࡅࡔࡕࡅࡍ ࡖ ࡔࡀࡁࡉࡒ ࡄࡀࡈࡀࡉࡉࡀ ࡅࡄࡀࡅࡁࡉࡀ
ࡄࡀࡅࡉࡋࡊࡅࡍ ࡊࡅࡋ ࡌࡀࡍ ࡖ ࡁࡓࡅࡔࡌࡀ ࡖ ࡄࡉࡉࡀ ࡓࡔࡉࡌ ࡅࡔࡅࡌࡀ ࡖ ࡌࡀࡋࡊࡀ
018ࡖ ࡍࡄࡅࡓࡀ ࡌࡀࡃࡊࡀࡓ ࡏࡋࡇ ࡅࡀࡔࡀࡓ ࡅࡏࡕࡒࡀࡉࡀࡌ ࡁࡌࡀࡑࡁࡅࡕࡀ
ࡅࡀࡁࡉࡃ ࡏࡅࡁࡀࡃࡉࡀ ࡈࡀࡁࡉࡀ ࡅࡔࡀࡐࡉࡓࡉࡀ ࡏࡍࡉࡔ ࡁࡏࡅࡄࡓࡀ ࡋࡀࡍࡉࡊࡀࡕࡓࡇ
ࡋࡀࡕࡉࡊࡋࡅࡍ ࡆࡌࡀ ࡖ ࡄࡉࡅࡀࡍࡉࡀࡕࡀ ࡅࡋࡀࡃࡌࡀࡉࡕࡀ ࡅࡋࡀࡃࡁࡀࡈࡍࡀ ࡅࡋࡀ
ࡃࡍࡀࡐࡑࡀ ࡅࡋࡀࡃࡒࡀࡉࡌࡀ ࡅࡋࡀ ࡖ ࡍࡀࡐࡉࡋ ࡄࡉࡅࡀ ࡁࡀࡋࡀ ࡏࡋࡇ ࡄࡉࡍࡏࡋࡀ
ࡖ ࡁࡐࡀࡓࡆࡋࡀ ࡍࡊࡅࡎ ࡅࡄࡀࡋࡉࡋ ࡅࡀࡔࡉࡂ ࡅࡍࡀࡒࡉࡃ ࡅࡁࡀࡔࡉࡋ ࡅࡀࡊࡅࡋ
ࡅࡋࡀࡕࡉࡊࡋࡅࡍ ࡅࡋࡀࡕࡉࡔࡕࡅࡍ ࡌࡍ ࡁࡉࡕ ࡁࡀࡁࡉࡀ ࡕࡓࡉࡎࡀࡓ ࡊࡅࡋࡄࡅࡍ ࡈࡍࡅࡐࡉࡀ
ࡅࡌࡊࡀࡉࡓࡅࡕࡀ ࡌࡋࡉࡍ ࡉࡀ ࡂࡅࡁࡓࡉࡀ ࡖ ࡍࡀࡑࡁࡉࡀ ࡆࡉࡅࡀ ࡀࡋࡌࡀ ࡆࡀࡅࡀ ࡌࡉࡍࡀࡉࡄࡅࡍ
ࡕࡉࡋࡉࡂࡈࡅࡍ ࡓࡄࡅࡌ ࡅࡀࡆࡁࡀࡓ ࡄࡃࡀࡃࡉࡀ ࡀࡊࡅࡀࡕ ࡀࡉࡍࡉࡀ ࡖ ࡁࡋࡉࡂࡓࡉࡀ
ࡌࡉࡆࡃࡀࡄࡓࡀ ࡓࡄࡅࡌ ࡅࡀࡆࡁࡀࡓ ࡄࡃࡀࡃࡉࡀ ࡅࡏࡅࡁࡓࡅࡉࡀ ࡋࡉࡀࡌࡀ
ࡓࡁࡀ ࡖ ࡎࡅࡐ ࡀࡌࡉࡍࡈࡅࡋ ࡖ ࡀࡄࡉࡀ ࡖ ࡁࡉࡎࡓࡀ ࡁࡀࡈࡋࡉࡀ ࡅࡀࡄࡉࡀ
ࡖ ࡊࡅࡔࡈࡀ ࡌࡉࡕࡒࡀࡉࡌࡉࡀ ࡄࡅࡍ ࡀࡍࡀࡕࡅࡍ ࡀࡄࡉࡀ ࡖ ࡊࡅࡔࡈࡀ ࡌࡀࡎࡒࡉࡕࡅࡍ
ࡓࡀࡄࡌࡅࡕࡊࡅࡍ ࡋࡓࡉࡔ ࡖ ࡔࡅࡌࡇ ࡖ ࡒࡀࡃࡌࡀࡉࡀ ࡕࡓࡀࡑࡋࡊࡅࡍ ࡁࡓࡉࡔࡀࡉࡊࡅࡍ
ࡓࡅࡔࡅࡌࡀࡉࡊࡅࡍ ࡓࡅࡔࡅࡌࡀ ࡖ ࡌࡉࡀ ࡄࡉࡉࡀ ࡖ ࡎࡀࡋࡒࡉࡕࡅࡁࡇ ࡋࡀࡕࡀࡓ
ࡍࡄࡅࡓ ࡏࡅ ࡖ ࡏࡌࡀࡓࡋࡊࡅࡍ ࡁࡄࡉࡓࡀࡉ ࡕࡉࡔࡌࡅࡍ ࡏࡅ ࡖ ࡏࡐࡀࡒࡉࡃࡉࡍࡊࡅࡍ
ࡕࡉࡁࡃࡅࡍ ࡏࡕࡉࡋࡊࡅࡍ ࡌࡍ ࡆࡉࡅࡀࡉ ࡖ ࡍࡐࡉࡔ ࡅࡌࡍ ࡍࡄࡅࡓࡀࡉ ࡖ ࡎࡀࡊࡀ
ࡋࡉࡕࡋࡇ ࡕࡉࡓࡉࡅࡆࡅࡍ ࡁࡉࡕ ࡄࡉࡉࡀ ࡀࡊࡅࡀࡕ ࡏࡅࡕࡓࡉࡀ ࡖ ࡍࡄࡅࡓࡀ ࡖ ࡓࡀࡅࡆࡉࡀ
ࡁࡀࡕࡀࡓ ࡍࡄࡅࡓ ࡏࡅ ࡖ ࡏࡌࡀࡓࡋࡊࡅࡍ ࡋࡀࡕࡉࡔࡌࡅࡍ ࡏࡅ
ࡖ ࡏࡐࡀࡒࡃࡉࡍࡊࡅࡍ ࡋࡀࡕࡉࡁࡓࡅࡍ ࡕࡉࡐࡋࡅࡍ ࡁࡄࡔࡅࡊࡀ ࡖ ࡍࡀࡐࡋࡉࡁࡇ ࡁࡉࡔࡉࡀ
ࡅࡋࡀࡎࡀࡋࡒࡉࡀ ࡈࡅࡁࡇ ࡋࡌࡀࡍ ࡖ ࡔࡅࡌࡀ ࡅࡄࡀࡉࡌࡉࡍ ࡅࡀࡉࡋࡀ ࡋࡊࡅࡋ ࡌࡀࡍ
ࡖ ࡏࡕࡊࡀࡋࡀࡋ ࡅࡔࡊࡉࡁ ࡈࡀࡁࡉࡀ ࡖ ࡔࡅࡌࡀ ࡅࡄࡀࡉࡌࡉࡍ ࡎࡀࡋࡒࡉࡀ
ࡁࡆࡀࡊࡅࡕࡀ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡁࡉࡔࡉࡀ ࡖ ࡔࡅࡌࡅࡍ ࡅࡋࡀࡄࡀࡉࡌࡀࡍ
ࡀࡍࡐࡀࡉࡅࡍ ࡀࡆࡁࡀࡓ ࡋࡉࡀࡌࡀ ࡓࡁࡀ ࡖ ࡎࡅࡐ ࡁࡄࡉࡓࡀࡉ ࡏࡕࡍࡀࡊࡓࡅࡍ ࡌࡍ
ࡌࡀࡓࡃࡉࡀ ࡖ ࡃࡀࡅࡓࡀ ࡁࡀࡈࡋࡀ ࡖ ࡁࡊࡅࡋ ࡉࡅࡌ ࡊࡅࡋ ࡉࡅࡌࡀ ࡏࡋ
ࡊࡀࡓࡎࡀࡅࡀࡕࡀ ࡖ ࡌࡉࡓࡃࡀ ࡉࡀࡕࡁࡉࡀ ࡉࡀࡕࡁࡉࡀ ࡏࡋ ࡊࡀࡓࡎࡀࡅࡀࡕࡀ
019 ࡖ ࡌࡉࡓࡃࡀ ࡅࡏࡁࡉࡃࡀࡕࡀ ࡁࡔࡀࡅࡈࡀ ࡀࡁࡃࡉࡀ ࡏࡁࡉࡃࡀࡕࡀ ࡀࡁࡃࡉࡀ
ࡁࡔࡀࡅࡈࡀ ࡅࡊࡅࡔࡈࡀ ࡅࡍࡉࡀࡄࡀ ࡅࡔࡀࡋࡌࡀ ࡋࡉࡕࡁࡅࡍ ࡋࡀࡕࡉࡎࡁࡅࡍ ࡓࡁࡅࡕࡀ
ࡖ ࡌࡅࡌࡀ ࡅࡁࡃࡀࡄࡁࡀ ࡅࡊࡀࡎࡐࡀ ࡅࡋࡀࡕࡉࡔࡈࡅࡍ ࡖ ࡓࡁࡅࡕࡀ ࡖ ࡌࡅࡌࡀ
ࡍࡀࡎࡉࡁ ࡌࡉࡐࡎࡉࡒ ࡔࡅࡌࡇ ࡌࡍ ࡀࡕࡀࡓ ࡍࡄࡅࡓ ࡊࡅࡋ ࡌࡀࡍ ࡖ ࡌࡍ
ࡐࡀࡂࡓࡇ ࡍࡀࡐࡉࡒ ࡏࡋࡇ ࡋࡀࡕࡉࡁࡊࡅࡍ ࡅࡏࡁࡋࡉࡀ ࡅࡌࡀࡋࡉࡀ ࡏࡋࡇ ࡋࡀࡕࡉࡋࡉࡂࡈࡅࡍ
ࡋࡄࡀࡌࡀ ࡖ ࡂࡉࡁࡉࡀ ࡏࡋࡇ ࡋࡀࡕࡉࡊࡋࡅࡍ ࡊࡅࡋ ࡌࡀࡍ ࡖ ࡏࡋ ࡌࡉࡕࡀ ࡁࡀࡊࡉࡀ
ࡍࡀࡒࡌࡅࡍࡇ ࡁࡀࡍࡆࡀࡁࡉࡀ ࡌࡉࡀ ࡗ ࡖ ࡌࡋࡉࡍ ࡖ ࡋࡁࡅࡔࡉࡀ ࡁࡑࡀࡅࡓࡇ
ࡍࡉࡑࡓࡉࡀ ࡍࡉࡄࡅࡉࡋࡇ ࡌࡅࡌࡀ ࡁࡏࡅࡑࡈࡋࡉࡀ ࡖ ࡌࡀࡍࡆࡉࡀ ࡍࡉࡔࡌࡅࡈ ࡏࡋࡇ
ࡍࡉࡎࡀࡓࡅࡍࡇ ࡁࡈࡅࡓࡀ ࡈࡅࡓ ࡄࡀࡔࡊࡀ ࡏࡆࡉࡋ ࡀࡍࡉࡉࡀ ࡅࡃࡀࡊࡉࡉࡀ ࡅࡌࡓࡀࡃࡐࡉࡀ
ࡏࡋ ࡍࡀࡐࡔࡀࡉࡊࡅࡍ ࡁࡊࡅࡍ ࡖ ࡊࡌࡀ ࡖ ࡀࡉࡕࡉࡍࡊࡅࡍ ࡁࡀࡋࡌࡀ ࡄࡀࡈࡀࡉࡀࡊࡅࡍ
ࡍࡀࡐࡔࡉࡀ ࡏࡋ ࡊࡀࡓࡉࡀࡋࡊࡅࡍ ࡏࡋ ࡍࡉࡔࡌࡀࡕࡀ ࡖ ࡍࡀࡐࡒࡀ ࡌࡍ ࡁࡉࡍࡀࡕࡀࡉࡊࡅࡍ
ࡀࡉࡈࡀ ࡅࡊࡀࡓࡉࡅࡕࡀ ࡊࡐࡀࡓ ࡌࡍ ࡋࡉࡁࡀࡉࡊࡅࡍ ࡅࡏࡁࡋࡉࡀ ࡅࡌࡀࡋࡉࡀ ࡃࡄࡅࡍ
ࡌࡍ ࡁࡀࡁࡀࡉࡊࡅࡍ ࡀࡌࡉࡍࡈࡅࡋ ࡖ ࡌࡍ ࡏࡁࡋࡉࡀ ࡅࡌࡀࡋࡉࡀ ࡎࡀࡄࡓࡉࡀ
ࡅࡃࡀࡉࡅࡉࡀ ࡌࡉࡕࡂࡉࡁࡋࡉࡀ ࡅࡒࡀࡃࡌࡉࡋࡉࡍ ࡋࡍࡉࡔࡌࡀࡕࡀ ࡁࡏࡅࡄࡓࡀ ࡌࡀࡄࡉࡒࡉࡋࡉࡍ
ࡁࡉࡕ ࡌࡀࡊࡎࡉࡀ ࡏࡅ ࡁࡀࡉࡉࡕࡅࡋࡉࡍ ࡅࡓࡀࡄࡌࡉࡕࡅࡋࡉࡍ ࡁࡅࡍ ࡏࡋࡀࡅࡀࡉࡄࡅࡍ
ࡓࡀࡄࡌࡉࡀ ࡅࡁࡅࡕࡀ ࡅࡕࡅࡔࡁࡉࡄࡕࡀ ࡅࡃࡓࡅࡔ ࡃࡓࡀࡔࡉࡀ ࡅࡒࡓࡅࡍ ࡎࡉࡃࡓࡉࡀ
ࡅࡀࡁࡉࡃ ࡌࡀࡎࡒࡀࡕࡀ ࡖ ࡓࡁࡀ ࡁࡓࡀࡄࡌࡉࡀ ࡌࡉࡕࡉࡌࡋࡉࡀ ࡏࡋࡀࡅࡀࡉࡄࡅࡍ
ࡅࡍࡏࡆࡀࡋ ࡆࡉࡅࡀ ࡌࡍ ࡒࡅࡃࡀࡌࡀࡉࡄࡉࡍ ࡅࡍࡉࡕࡉࡀ ࡍࡄࡅࡓࡀ ࡌࡍ ࡀࡁࡀࡕࡓࡀࡉࡄࡅࡍ
ࡅࡔࡋࡉࡄࡉࡀ ࡖ ࡄࡉࡉࡀ ࡌࡍ ࡉࡀࡌࡉࡍࡅࡍ ࡅࡁࡀࡋࡀࡊࡉࡀ ࡖ ࡍࡄࡅࡓࡀ ࡌࡍ
ࡎࡌࡀࡋࡅࡍ ࡅࡍࡉࡕࡐࡀࡓࡒࡀ ࡌࡍ ࡌࡀࡈࡀࡓࡀࡕࡀ ࡅࡌࡍ ࡃࡅࡃࡉࡀ ࡖ ࡓࡀࡄࡕࡀ
ࡀࡐࡓࡉࡔࡅࡍࡉࡍ ࡋࡍࡉࡔࡌࡀࡕࡀ ࡖ ࡋࡀࡍࡉࡕࡀࡊࡔࡀࡋ ࡋࡉࡁࡀࡉࡄࡅࡍ ࡀࡔࡌࡅࡍࡉࡍ
ࡌࡀࡋࡀࡋࡉࡀ ࡍࡉࡄࡉࡀ ࡅࡕࡅࡔࡁࡉࡄࡕࡀ ࡖ ࡀࡉࡕࡉࡕࡉࡋࡊࡅࡍ ࡍࡉࡔࡌࡅࡍ ࡅࡍࡉࡎࡉࡄࡃࡅࡍ
ࡅࡍࡉࡍࡄࡀ ࡋࡉࡁࡀࡉࡄࡅࡍ ࡏࡋ ࡎࡀࡌࡊࡇ ࡄࡀࡁ ࡋࡄࡀࡌࡀ ࡅࡌࡉࡀ
ࡅࡔࡐࡉࡍࡆࡀ ࡋࡁࡍࡀࡕ ࡀࡍࡀࡔࡀ ࡀࡍࡉࡉࡀ ࡅࡌࡓࡀࡃࡐࡉࡀ ࡖ ࡓࡉࡃࡐࡀ ࡌࡀࡈࡉࡋࡅࡍ
ࡃࡓࡉࡊ ࡃࡉࡓࡊࡉࡀ ࡖ ࡊࡅࡔࡈࡀ ࡅࡀࡂࡓࡀ ࡖ ࡏࡂࡉࡓࡀ ࡋࡅࡀࡕࡀࡉࡊࡅࡍ
020 ࡋࡀࡍࡉࡁࡅࡕ ࡋࡀࡕࡉࡂࡉࡆࡋࡅࡍ ࡌࡍ ࡔࡅࡕࡀࡐࡀ ࡅࡌࡍ ࡓࡀࡄࡌࡀࡉࡊࡅࡍ ࡁࡍࡉࡊࡋࡀ
ࡋࡀࡕࡉࡒࡌࡅࡍ ࡌࡀࡍ ࡖ ࡂࡀࡆࡉࡋ ࡌࡍ ࡄࡀࡁࡓࡇ ࡅࡔࡅࡕࡀࡐࡇ ࡀࡉࡍࡇ ࡍࡄࡅࡓࡀ
ࡋࡀࡄࡀࡆࡉࡀ ࡐࡔࡅࡈ ࡉࡀࡌࡉࡍࡀࡉࡊࡅࡍ ࡌࡍ ࡄࡃࡀࡃࡉࡀ ࡅࡊࡅࡔࡈࡀࡉࡊࡅࡍ
ࡋࡀࡕࡉࡊࡀࡃࡁࡅࡍ ࡀࡌࡉࡍࡈࡅࡋ ࡖ ࡏࡅࡕࡓࡉࡀ ࡅࡌࡀࡋࡊࡉࡀ ࡖ ࡍࡄࡅࡓࡀ ࡋࡀࡅࡐࡀ
ࡅࡊࡅࡔࡈࡀ ࡋࡄࡃࡀࡃࡉࡀ ࡉࡀࡄࡁࡉࡀ ࡉࡀ ࡁࡄࡉࡓࡉࡀ ࡅࡔࡀࡋࡌࡀࡍࡉࡀ ࡄࡅࡍ
ࡌࡉࡊࡉࡀ ࡅࡌࡊࡉࡊࡉࡀ ࡅࡏࡕࡒࡓࡅࡍ ࡁࡄࡉࡓࡉࡀ ࡅࡊࡔࡉࡈࡉࡀ ࡅࡌࡄࡀࡉࡌࡍࡉࡀ
ࡓࡄࡅࡌ ࡄࡃࡀࡃࡉࡀ ࡁࡊࡅࡔࡈࡀ ࡅࡀࡎࡉࡒ ࡓࡀࡄࡌࡅࡕࡊࡅࡍ ࡋࡓࡉࡔ ࡄࡅࡍ
ࡍࡉࡄࡅࡉࡀ ࡅࡌࡊࡉࡊࡉࡀ ࡋࡅࡀࡕ ࡌࡀࡋࡐࡀࡍࡉࡀ ࡊࡉࡍࡉࡀ ࡖ ࡄࡅࡊࡅࡌࡀࡕ ࡔࡓࡀࡓࡀ
ࡌࡀࡋࡐࡉࡋࡊࡅࡍ ࡋࡀࡕࡉࡍࡉࡎࡁࡅࡍ ࡓࡁࡅࡕࡀ ࡏࡋࡀࡅࡀࡉࡄࡅࡍ ࡅࡌࡅࡌࡀ
ࡋࡍࡉࡔࡌࡀࡕࡊࡅࡍ ࡋࡀࡕࡉࡎࡁࡅࡍ ࡋࡀࡕࡉࡆࡋࡅࡍ ࡋࡅࡀࡕ ࡊࡀࡑࡅࡌࡉࡀ ࡅࡊࡀࡋࡃࡀࡉࡉࡀ
ࡖ ࡊࡀࡃࡁࡀ ࡖ ࡄࡉࡍࡅࡍ ࡁࡄࡔࡅࡊࡀ ࡌࡉࡔࡕࡉࡊࡍࡉࡀ ࡋࡀࡕࡉࡌࡅࡍ ࡏࡅࡌࡅࡌࡀࡕࡀ
ࡖ ࡊࡀࡃࡁࡀ ࡅࡏࡅࡌࡅࡌࡀࡕࡊࡅࡍ ࡋࡀࡕࡉࡐࡊࡅࡍ ࡋࡀࡕࡉࡊࡅࡋࡍ ࡄࡁࡅࡋࡉࡀ ࡅࡄࡁࡅࡋ
ࡄࡁࡉࡋࡉࡀ ࡅࡋࡀࡕࡉࡃࡀࡉࡍࡅࡍ ࡁࡄࡔࡅࡊࡀ ࡄࡀࡔࡊࡀ ࡋࡀࡕࡉࡓࡅࡍ ࡅࡋࡀࡕࡉࡆࡍࡅࡍ
ࡅࡋࡀࡕࡉࡆࡉࡌࡓࡅࡍ ࡅࡋࡀࡕࡉࡓࡉࡒࡃࡅࡍ ࡅࡋࡀࡍࡉࡔࡁࡉࡀ ࡋࡉࡁࡀࡉࡊࡅࡍ ࡏࡋ ࡆࡌࡀࡓࡀ
ࡖ ࡎࡀࡈࡀࡍࡀ ࡖ ࡊࡅࡋࡇ ࡄࡀࡓࡔࡉࡀ ࡅࡆࡉࡐࡀ ࡅࡌࡀࡎࡈࡉࡀࡍࡅࡕࡀ ࡌࡋࡉࡀ ࡅࡀࡐࡉࡊ
ࡏࡅࡑࡓࡀࡉࡄࡅࡍ ࡖ ࡔࡀࡋࡌࡀࡍࡉࡀ ࡅࡌࡀࡊࡔࡉࡋ ࡋࡉࡁࡀࡉࡄࡅࡍ ࡖ ࡌࡄࡀࡉࡌࡍࡉࡀ
ࡁࡄࡉࡓࡀࡉ ࡏࡆࡃࡀࡄࡀࡓ ࡅࡏࡆࡃࡀࡓࡀࡆ ࡅࡏࡕࡉࡒࡓࡅࡍ ࡌࡆࡀࡓࡆࡉࡀ ࡁࡀࡋࡌࡀ ࡀࡔࡀࡓ
ࡁࡀࡋࡌࡀ ࡅࡎࡅࡁࡋࡅࡉࡀ ࡋࡓࡉࡃࡐࡀ ࡖ ࡀࡋࡌࡀ ࡀࡋࡌࡀ ࡖ ࡊࡉࡋࡀࡉࡊࡅࡍ ࡔࡀࡋࡉࡌࡋࡊࡅࡍ
ࡄࡅࡍ ࡎࡉࡌࡀࡊࡀ ࡅࡀࡃࡉࡀࡅࡓࡀ ࡋࡄࡃࡀࡃࡉࡀ ࡅࡋࡔࡀࡋࡌࡀࡍࡉࡀ ࡖ ࡓࡉࡃࡐࡀ ࡌࡀࡈࡉࡋࡅࡍ
ࡗ ࡁࡆࡀࡃࡀࡍࡅࡕࡀ ࡓࡀࡄࡕࡀ ࡏࡅࡑࡓࡀࡉࡊࡅࡍ ࡀࡍࡄࡀ ࡅࡌࡀࡊࡉࡊ ࡋࡉࡁࡀࡉࡊࡅࡍ
ࡒࡀࡁࡉࡋ ࡌࡍ ࡌࡉࡍࡉࡋࡀࡕ ࡌࡀࡓࡀࡉࡊࡅࡍ ࡀࡌࡉࡍࡈࡅࡋ ࡖ ࡓࡅࡉࡀࡍࡀ ࡖ ࡆࡉࡃࡀࡍࡀ
ࡖ ࡌࡍ ࡆࡉࡃࡀ ࡖ ࡎࡀࡈࡀࡍࡀ ࡌࡉࡕࡌࡋࡉࡀ ࡖ ࡁࡄࡀࡉࡌࡀࡍࡅࡕࡀ ࡋࡀࡌࡉࡕࡌࡀࡊࡀࡊ
ࡁࡄࡉࡓࡁࡀ ࡅࡎࡉࡐࡀ ࡌࡉࡂࡈࡉࡋ ࡌࡉࡂࡈࡉࡋ ࡁࡄࡉࡓࡁࡀ ࡅࡎࡉࡐࡀ ࡅࡍࡀࡐࡉࡋ
ࡁࡍࡅࡓࡀ ࡖ ࡉࡀࡒࡃࡀ ࡅࡄࡀࡆࡉࡕࡅࡍ ࡈࡀࡁࡀ ࡖ ࡎࡁࡉࡓ ࡄࡅࡊࡅࡌࡕࡀ ࡒࡓࡅࡁ
ࡋࡅࡀࡕࡇ ࡅࡒࡀࡁࡉࡋ ࡌࡉࡍࡇ ࡌࡍ ࡄࡅࡊࡅࡌࡕࡇ ࡏࡅ ࡄࡀࡆࡉࡕࡅࡍ ࡁࡉࡔࡀ
021 ࡖ ࡄࡀࡊࡉࡌ ࡋࡁࡉࡔ ࡓࡄࡅࡒ ࡌࡉࡍࡇ ࡅࡋࡀࡕࡉࡄࡊࡌࡅࡍ ࡌࡍ ࡄࡅࡊࡅࡌࡕࡇ
ࡅࡋࡀࡕࡉࡁࡃࡅࡍ ࡌࡍ ࡏࡅࡁࡀࡃࡇ ࡅࡋࡀࡕࡉࡎࡂࡅࡍ ࡁࡃࡉࡓࡊࡇ ࡉࡀ ࡌࡄࡀࡉࡌࡍࡉࡀ
ࡅࡔࡀࡋࡌࡀࡍࡉࡀ ࡊࡅࡋ ࡖ ࡏࡋࡀࡅࡀࡉࡊࡅࡍ ࡎࡍࡉࡀ ࡁࡄࡀࡁࡓࡀࡉࡊࡅࡍ ࡋࡀࡕࡉࡁࡃࡅࡍ
ࡁࡄࡉࡓࡀࡉ ࡏࡁࡉࡃ ࡏࡅࡁࡀࡃࡉࡀ ࡈࡀࡁࡉࡀ ࡅࡆࡀࡅࡉࡃ ࡆࡅࡀࡃࡉࡀ ࡋࡏࡅࡄࡓࡀࡉࡊࡅࡍ
ࡄࡆࡅࡍ ࡅࡔࡅࡌࡀ ࡅࡏࡕࡄࡀࡉࡌࡀࡍ ࡅࡒࡀࡁࡋࡅࡉࡀ ࡋࡌࡉࡍࡉࡋࡀࡕ
ࡌࡀࡓࡀࡉࡊࡅࡍ ࡄࡆࡅࡍ ࡁࡀࡉࡍࡀࡊࡅࡍ ࡅࡀࡌࡀࡓ ࡁࡐࡅࡌࡀࡉࡊࡅࡍ ࡅࡔࡅࡌࡅࡍ
ࡁࡏࡅࡃࡍࡀࡉࡊࡅࡍ ࡅࡄࡀࡉࡌࡉࡍ ࡁࡋࡉࡁࡀࡉࡊࡅࡍ ࡅࡀࡁࡉࡃ ࡁࡏࡃࡀࡉࡊࡅࡍ ࡆࡉࡃࡒࡀ
ࡅࡈࡀࡁࡅࡕࡀ ࡅࡀࡁࡉࡃ ࡑࡅࡁࡉࡀࡍ ࡌࡀࡓࡀࡉࡊࡅࡍ ࡅࡑࡅࡁࡉࡀࡍࡇ ࡖ ࡎࡀࡈࡀࡍࡀ
ࡋࡀࡕࡉࡁࡃࡅࡍ ࡅࡋࡀࡕࡉࡓࡉࡄࡑࡅࡍ ࡏࡋ ࡔࡐࡅࡓ ࡐࡀࡂࡓࡉࡀ ࡖ ࡌࡍ ࡔࡉࡋࡉࡀ
ࡌࡉࡕࡄࡀࡌࡁࡋࡉࡀ ࡀࡎࡂࡅࡍ ࡁࡌࡉࡍࡉࡋࡀࡕ ࡌࡀࡓࡀࡉࡊࡅࡍ ࡖ ࡕࡉࡎࡒࡅࡍ
ࡁࡆࡀࡊࡅࡕࡀ ࡋࡀࡕࡀࡓ ࡍࡄࡅࡓ ࡊࡁࡅࡔ ࡅࡎࡂࡅࡃ ࡅࡔࡀࡁࡀ ࡋࡌࡀࡋࡊࡀ
ࡓࡀࡌࡀ ࡖ ࡍࡄࡅࡓࡀ ࡖ ࡄࡀࡈࡀࡉࡀࡊࡅࡍ ࡅࡄࡀࡅࡁࡀࡉࡊࡅࡍ ࡍࡉࡔࡕࡁࡉࡒࡋࡊࡅࡍ
ࡋࡀࡕࡉࡎࡉࡂࡃࡅࡍ ࡋࡎࡀࡈࡀࡍࡀ ࡅࡋࡑࡉࡋࡌࡉࡀ ࡖ ࡆࡉࡐࡀ ࡖ ࡄࡀࡆࡉࡍ ࡀࡋࡌࡀ
ࡀࡌࡉࡍࡈࡅࡋ ࡖ ࡊࡅࡋ ࡖ ࡌࡉࡕࡋࡉࡃ ࡌࡀࡉࡉࡕ ࡅࡊࡅࡋ ࡖ ࡁࡏࡃࡉࡀ ࡌࡉࡕࡁࡉࡃ
ࡌࡉࡕࡄࡀࡌࡁࡀࡋ ࡅࡀࡋࡌࡀ ࡊࡅࡋࡇ ࡎࡀࡉࡉࡐ ࡅࡁࡀࡈࡋࡇ ࡀࡋࡀࡄࡅࡕࡀ ࡖ ࡁࡇ
ࡁࡄࡉࡓࡀࡉ ࡋࡀࡍࡉࡄࡅࡉࡋࡊࡅࡍ ࡓࡅࡄࡑࡀࡍࡀ ࡏࡋ ࡀࡋࡌࡀ ࡖ ࡒࡀࡉࡌࡉࡕࡅࡁࡇ ࡀࡌࡉࡍࡈࡅࡋ
ࡖ ࡋࡀࡅ ࡃࡉࡋࡊࡅࡍ ࡄࡅ ࡍࡉࡄࡅࡉࡋࡊࡅࡍ ࡓࡅࡄࡑࡀࡍࡀ ࡏࡋ ࡏࡅࡁࡀࡃࡉࡀ ࡔࡀࡐࡉࡓࡉࡀ
ࡖ ࡀࡁࡃࡉࡕࡅࡍ ࡗ ࡍࡀࡐࡒࡉࡕࡅࡍ ࡌࡍ ࡐࡀࡂࡓࡀࡉࡊࡅࡍ ࡕࡉࡎࡉࡌࡊࡅࡍ
ࡏࡋ ࡏࡅࡁࡀࡃࡉࡀ ࡏࡃࡀࡉࡊࡅࡍ ࡁࡄࡉࡓࡀࡉ ࡋࡀࡍࡉࡄࡅࡉࡋࡊࡅࡍ ࡁࡅࡎࡉࡀࡍࡀ ࡏࡋ
ࡐࡅࡒࡃࡀࡍࡉࡀ ࡖ ࡌࡀࡓࡀࡉࡊࡅࡍ ࡐࡀࡒࡉࡃ ࡕࡉࡄࡅࡉࡋࡊࡅࡍ ࡊࡉࡍࡅࡕࡀ ࡅࡍࡉࡄࡅࡕࡀ
ࡅࡌࡊࡉࡊࡅࡕࡀ ࡖ ࡌࡍ ࡊࡉࡀࡍࡀ ࡖ ࡍࡄࡅࡓࡀ ࡄࡅࡀ ࡕࡉࡄࡅࡉࡋࡊࡅࡍ ࡕࡉࡀࡁࡅࡕࡀ
ࡅࡄࡀࡉࡎࡅࡕࡀ ࡅࡓࡉࡅࡀࡍࡅࡕࡀ ࡅࡌࡓࡀࡄࡌࡀࡍࡅࡕࡀ ࡖ ࡌࡍ ࡊࡉࡀࡍࡀ ࡖ ࡍࡄࡅࡓࡀ
ࡄࡅ ࡉࡀ ࡂࡅࡁࡓࡉࡀ ࡖ ࡋࡀࡂࡈࡉࡀ ࡏࡍࡔࡉࡀ ࡅࡉࡀ ࡏࡍࡔࡉࡀ ࡖ ࡋࡂࡅࡁࡓࡉࡀ
ࡄࡀࡅࡉࡀ ࡉࡀ ࡂࡅࡁࡓࡉࡀ ࡖ ࡋࡀࡂࡈࡉࡀ ࡏࡍࡔࡉࡀ ࡁࡍࡉࡍ ࡁࡀࡍࡅࡍ ࡅࡋࡂࡅࡈ
022 ࡏࡅ ࡋࡀࡌࡁࡀࡍࡉࡍࡉࡕࡅࡍ ࡅࡋࡀࡂࡈࡉࡕࡅࡍ ࡌࡀࡄࡓࡀ ࡁࡀࡓࡎࡀ ࡎࡁࡅࡋ
ࡄࡉࡍࡏࡋࡀ ࡏࡋ ࡏࡅࡁࡀࡃࡉࡀ ࡎࡀࡉࡍࡉࡀ ࡖ ࡀࡁࡃࡀ ࡌࡀࡐࡓࡉࡔࡍࡀࡋࡊࡅࡍ
ࡏࡋ ࡊࡅࡋ ࡀࡕࡅࡀࡕ ࡖ ࡂࡀࡉࡓࡀ ࡂࡀࡅࡓࡀ ࡅࡏࡋ ࡊࡅࡋ ࡀࡕࡅࡀࡕ
ࡖ ࡂࡍࡅࡁࡕࡀ ࡂࡀࡍࡁࡀ ࡅࡏࡋ ࡀࡕࡅࡀࡕ ࡖ ࡀࡁࡃࡀ ࡄࡀࡓࡔࡉࡀ ࡅࡌࡑࡀࡉࡓࡀ
ࡁࡐࡀࡂࡓࡀ ࡍࡉࡔࡉࡌࡕࡀ ࡖ ࡏࡋ ࡀࡋࡀࡄࡀ ࡋࡀࡁࡀࡎࡉࡌ ࡅࡏࡋ
ࡀࡍࡀࡔࡉࡀ ࡋࡀࡔࡀࡐࡉࡓ ࡀࡌࡉࡍࡈࡅࡋ ࡖ ࡃࡀࡌࡉࡀ ࡋࡊࡉࡁࡉࡀ ࡁࡉࡔࡉࡀ
ࡖ ࡀࡎࡅࡕࡀ ࡋࡉࡕࡋࡇ ࡋࡀࡕࡉࡋࡉࡂࡈࡅࡍ ࡀࡌࡕࡀ ࡖ ࡋࡀࡐࡓࡉࡒࡀ ࡅࡋࡀࡕࡉࡔࡃࡅࡍ
ࡁࡍࡀࡉࡊࡅࡍ ࡁࡉࡕ ࡌࡀࡓࡉࡀ ࡉࡅࡌࡀ ࡖ ࡀࡁࡃࡀ ࡌࡀࡎࡊࡉࡋ ࡅࡋࡉࡁࡇ
ࡖ ࡌࡀࡓࡇ ࡓࡀࡂࡉࡆ ࡏࡋࡇ ࡄࡀࡈࡀࡉࡉࡀ ࡖ ࡄࡀࡈࡉࡀ ࡀࡁࡃࡉࡀ ࡁࡓࡉࡔࡀ
ࡖ ࡀࡁࡅࡉࡀ ࡎࡀࡋࡒࡉࡀ ࡄࡉࡍ ࡋࡀࡂࡈࡉࡕࡅࡍ ࡖ ࡐࡓࡒࡀ ࡋࡂࡅࡈ ࡈࡀࡁࡅࡕࡀ
ࡁࡉࡍࡐࡉࡔ ࡉࡀࡕࡉࡓࡀ ࡅࡍࡀࡐࡔࡀ ࡋࡂࡅࡈ ࡓࡀࡄࡌࡅࡕ ࡊࡅࡔࡈࡀ ࡌࡍ
ࡆࡀࡅࡀ ࡖ ࡊࡅࡔࡈࡀ ࡏࡕࡁࡇ ࡋࡀࡕࡉࡐࡊࡅࡍ ࡌࡍ ࡄࡃࡀࡃࡉࡀ ࡀࡋࡌࡀ
ࡖ ࡊࡉࡋࡀࡉࡊࡅࡍ ࡔࡀࡋࡉࡌ ࡀࡌࡉࡍࡈࡅࡋ ࡖ ࡌࡀࡍ ࡖ ࡍࡀࡊࡉࡋ ࡁࡆࡀࡅࡇ
ࡖ ࡄࡅࡎࡓࡀࡍࡀ ࡅࡊࡀࡃࡁࡀ ࡅࡍࡉࡊࡋࡀ ࡋࡉࡕࡁࡇ ࡅࡓࡀࡄࡉࡌ ࡅࡓࡀࡉࡉࡂ
ࡓࡂࡉࡕࡀ ࡖ ࡕࡉࡁࡉࡋ ࡃࡉࡍࡇ ࡌࡉࡍࡇ ࡌࡉࡕࡌࡀࡓ ࡗ ࡄࡀࡅࡉࡋࡊࡅࡍ ࡔࡉࡕࡋࡉࡀ
ࡅࡌࡉࡕࡒࡀࡉࡌࡉࡀ ࡅࡗ ࡌࡀࡓࡀࡉࡄࡅࡍ ࡐࡀࡓࡔࡉࡀ ࡀࡋࡐࡅࡍࡅࡍ ࡄࡅࡊࡅࡌࡕࡀ
ࡖ ࡔࡓࡀࡓࡀ ࡅࡃࡉࡓࡊࡀ ࡖ ࡊࡅࡔࡈࡀ ࡀࡃࡓࡀࡊࡅࡍࡅࡍ ࡄࡉࡍ
ࡋࡀࡌࡀࡄࡅࡉࡕࡅࡋࡅࡍ ࡅࡋࡀࡌࡀࡋࡐࡉࡕࡅࡋࡅࡍ ࡁࡉࡕ ࡃࡉࡍࡀ ࡌࡉࡕࡄࡀࡉࡁࡉࡕࡅࡍ ࡏࡅ
ࡌࡀࡋࡐࡉࡕࡅࡋࡅࡍ ࡅࡋࡀࡉࡀࡋࡐࡉࡀ ࡁࡄࡀࡈࡀࡉࡉࡀ ࡖ ࡍࡀࡐࡔࡀࡉࡅࡍ ࡍࡉࡔࡕࡀࡉࡋࡅࡍ
ࡆࡉࡁࡍࡀ ࡑࡀࡋࡉࡀ ࡏࡍࡉࡔ ࡀࡄࡃࡀࡓ ࡀࡒࡌࡅࡉࡀ ࡅࡎࡅࡌࡊࡅࡉࡀ ࡕࡓࡉࡍ
ࡆࡉࡁࡍࡉࡀ ࡑࡀࡋࡉࡀ ࡍࡉࡔࡌࡀ ࡀࡄࡃࡀࡓ ࡀࡒࡌࡅࡉࡀ ࡅࡎࡅࡌࡊࡅࡉࡀ ࡕࡋࡀࡕࡀ
ࡆࡉࡁࡍࡉࡀ ࡑࡀࡋࡉࡀ ࡍࡉࡔࡌࡀ ࡀࡄࡃࡀࡓ ࡀࡒࡌࡅࡉࡀ ࡅࡎࡅࡌࡊࡅࡉࡀ ࡅࡀࡔࡌࡅࡉࡀ
ࡊࡕࡀࡁࡉࡀ ࡅࡌࡉࡌࡓࡉࡀ ࡅࡁࡅࡕࡀ ࡅࡕࡅࡔࡁࡉࡄࡕࡀ ࡖ ࡌࡀࡓࡀࡉࡊࡅࡍ ࡄࡉࡍ
ࡎࡀࡌࡊࡉࡕࡅࡋࡇ ࡅࡋࡀࡌࡉࡎࡕࡌࡉࡊ ࡏࡅࡒࡓࡅࡉࡀ ࡋࡂࡅࡐࡍࡀ ࡁࡉࡔࡀ ࡅࡀࡉࡕࡅࡍ
023 ࡈࡀࡁࡀ ࡁࡀࡕࡓࡇ ࡔࡕࡅࡋ ࡀࡌࡉࡍࡈࡅࡋ ࡖ ࡒࡓࡅࡋࡇ ࡁࡏࡅࡃࡍࡇ ࡅࡋࡀࡔࡅࡌࡀ
ࡄࡀࡅࡉࡅࡉࡀ ࡁࡀࡉࡍࡇ ࡅࡋࡀࡄࡆࡀ ࡄࡀࡅࡉࡅࡉࡀ ࡅࡋࡀࡄࡆࡀ ࡁࡀࡉࡍࡇ ࡌࡉࡎࡀࡐ ࡎࡀࡉࡉࡐ
ࡋࡉࡅࡌࡀ ࡖ ࡎࡅࡐ ࡍࡀࡐࡉࡋ ࡁࡕࡀࡎࡍࡉࡒࡀ ࡖ ࡍࡀࡐࡋࡉࡁࡇ ࡁࡉࡔࡉࡀ ࡅࡋࡀࡎࡀࡋࡒࡉࡀ
ࡄࡉࡍ ࡄࡀࡆࡉࡕࡅࡍ ࡀࡍࡀࡔࡉࡀ ࡖ ࡌࡅࡌࡀ ࡖ ࡐࡀࡂࡓࡉࡀ ࡏࡕࡁࡀࡉࡅࡍ
ࡏࡋࡀࡅࡀࡉࡅࡍ ࡋࡀࡕࡉࡎࡁࡅࡍ ࡅࡋࡀࡕࡉࡂࡉࡄࡊࡅࡍ ࡀࡌࡉࡍࡈࡅࡋ ࡖ ࡐࡀࡂࡓࡉࡀ ࡂࡁࡉࡋࡉࡀ
ࡁࡉࡎࡓࡀ ࡅࡆࡌࡀ ࡁࡊࡉࡁࡉࡀ ࡅࡌࡅࡌࡉࡀ ࡌࡉࡕࡀࡎࡋࡉࡍ ࡍࡉࡔࡉࡌࡕࡀ ࡁࡊࡉࡁࡉࡀ
ࡅࡌࡅࡌࡉࡀ ࡋࡀࡌࡉࡕࡀࡎࡋࡉࡀ ࡄࡉࡍࡏࡋࡀ ࡌࡉࡕࡀࡎࡋࡉࡀ ࡍࡉࡔࡉࡌࡕࡀ ࡁࡏࡅࡁࡀࡃࡉࡀ
ࡎࡀࡉࡍࡉࡀ ࡖ ࡀࡁࡃࡀ ࡋࡊࡅࡍ ࡀࡌࡀࡓࡍࡀ ࡁࡄࡉࡓࡀࡉ ࡋࡊࡅࡍ ࡌࡀࡐࡓࡉࡔࡍࡀ
ࡌࡄࡀࡉࡌࡍࡀࡉ ࡋࡀࡕࡉࡔࡀࡁࡄࡅࡍ ࡋࡔࡅࡁࡀ ࡅࡕࡓࡉࡎࡀࡓ ࡌࡃࡀࡁࡓࡀࡍࡉࡀ ࡖ ࡀࡋࡌࡀ
ࡖ ࡓࡀࡃࡉࡍ ࡁࡏࡅࡌࡀࡌࡀ ࡅࡋࡉࡋࡉࡀ ࡖ ࡄࡉࡍࡅࡍ ࡌࡀࡔࡉࡈࡉࡋࡇ ࡋࡊࡀࡍࡀ ࡖ ࡍࡉࡔࡌࡀࡕࡀ
ࡖ ࡌࡍ ࡁࡉࡕ ࡄࡉࡉࡀ ࡋࡄࡀࡊࡀ ࡏࡕࡄࡀࡁ ࡋࡀࡕࡉࡔࡀࡁࡄࡅࡉࡀ ࡋࡔࡀࡌࡉࡔ
ࡅࡎࡉࡓࡀ ࡌࡀࡍࡄࡀࡓࡀࡍࡉࡀ ࡖ ࡄࡀࡆࡉࡍ ࡀࡋࡌࡀ ࡀࡌࡉࡍࡈࡅࡋ ࡖ ࡄࡀࡆࡉࡍ
ࡆࡉࡅࡀ ࡋࡀࡅ ࡃࡉࡋࡅࡍ ࡄࡅ ࡄࡉࡍࡏࡋࡀ ࡏࡕࡄࡉࡁࡋࡅࡍ ࡋࡀࡍࡄࡅࡓࡇ ࡋࡃࡀࡅࡓࡀ
ࡄࡀࡔࡊࡀ ࡄࡉࡍࡅࡍ ࡌࡀࡋࡀࡊࡉࡀ ࡖ ࡁࡀࡉࡕࡀ ࡒࡓࡅࡍ ࡒࡀࡋࡀ ࡍࡀࡐࡋࡀ
ࡋࡀࡕࡉࡔࡀࡁࡄࡅࡉࡀ ࡋࡔࡀࡌࡉࡔ ࡖ ࡄࡅ ࡀࡃࡅࡍࡀࡉ ࡔࡅࡌࡇ ࡒࡅࡃࡔࡀ
ࡔࡅࡌࡇ ࡏࡉࡋ ࡏࡉࡋ ࡔࡅࡌࡇ ࡕࡅࡌ ࡏࡕࡋࡇ ࡔࡅࡌࡉࡀ ࡊࡀࡎࡉࡉࡀ ࡖ
ࡅࡋࡀࡌࡉࡕࡂࡀࡋࡋࡉࡀ ࡁࡀࡋࡌࡀ ࡖ ࡄࡅ ࡀࡃࡅࡍࡀࡉ ࡀࡌࡀ ࡋࡍࡀࡐࡔࡀ ࡂࡀࡁࡉࡀ
ࡅࡊࡀࡍࡉࡔ ࡋࡍࡀࡐࡔࡀ ࡊࡍࡉࡔࡕࡀ ࡌࡉࡕࡁࡉࡍࡉࡀ ࡏࡅࡓࡀࡔࡋࡀࡌ ࡌࡀࡄࡅࡆࡀ
ࡌࡃࡉࡍࡕࡀ ࡖ ࡉࡀࡄࡅࡈࡀࡉࡉࡀ ࡖ ࡍࡀࡐࡔࡀࡉࡄࡅࡍ ࡁࡄࡉࡓࡁࡇ ࡂࡀࡆࡓࡉࡀ ࡅࡌࡍ
ࡆࡌࡀࡉࡄࡅࡍ ࡁࡀࡍࡐࡀࡉࡅࡍ ࡈࡀࡓࡉࡍ ࡅࡋࡀࡃࡅࡍࡀࡉ ࡎࡀࡂࡃࡉࡀ ࡂࡅࡁࡓࡉࡀ ࡔࡀࡁࡒࡉࡀ
ࡆࡀࡅࡀࡉࡄࡅࡍ ࡅࡀࡆࡋࡉࡍ ࡋࡅࡀࡕ ࡄࡃࡀࡃࡉࡀ ࡔࡀࡊࡁࡉࡀ ࡏࡍࡔࡉࡀ ࡖ ࡁࡃࡀࡔࡕࡀࡍࡉࡍ
ࡄࡉࡍࡉࡍ ࡁࡄࡀࡍࡀ ࡂࡅࡁࡓࡉࡀ ࡔࡀࡊࡁࡉࡀ ࡀࡐࡊࡉࡀ ࡌࡍ ࡔࡅࡕࡀ ࡒࡀࡃࡌࡀࡉࡕࡀ
ࡅࡊࡕࡀࡁࡀ ࡋࡍࡀࡐࡔࡀࡉࡄࡅࡍ ࡀࡁࡃࡉࡀ ࡋࡊࡅࡍ ࡀࡌࡀࡓࡍࡀ ࡁࡄࡉࡓࡀࡉ ࡋࡀࡕࡉࡄࡅࡍ
ࡌࡉࡍࡀࡉࡄࡅࡍ ࡌࡍ ࡀࡁࡃࡉࡀ ࡖ ࡌࡍ ࡌࡀࡓࡀࡉࡄࡅࡍ ࡆࡍࡅࡍ ࡋࡀࡕࡉࡓࡁࡅࡍ ࡌࡍ
024 ࡉࡀࡄࡅࡈࡀࡉࡉࡀ ࡖ ࡁࡄࡀࡃ ࡌࡀࡌࡋࡀ ࡋࡀࡒࡀࡉࡌࡉࡀ ࡌࡍ ࡀࡌࡀ ࡖ ࡉࡀࡄࡅࡈࡀࡉࡉࡀ
ࡊࡅࡋࡄࡅࡍ ࡀࡌࡀࡌࡉࡀ ࡅࡁࡀࡁࡉࡀ ࡌࡉࡍࡀࡉࡄࡅࡍ ࡍࡐࡀࡒ ࡄࡅࡍ ࡍࡁࡉࡄࡉࡀ
ࡖ ࡊࡀࡃࡁࡀ ࡖ ࡁࡊࡀࡃࡁࡀ ࡅࡆࡉࡐࡀ ࡖ ࡌࡀࡎࡂࡉࡍ ࡖ ࡀࡉࡋࡉࡀ ࡌࡍ ࡌࡀࡋࡀࡊࡉࡀ ࡖ
ࡄࡅࡎࡓࡀࡍࡀ ࡁࡌࡀࡓࡁࡀࡉࡉࡍ ࡖ ࡏࡍࡔࡉࡀ ࡅࡏࡍࡔࡉࡀ ࡁࡀࡈࡍࡉࡁࡅࡍ ࡅࡁࡆࡌࡀ ࡅࡃࡀࡔࡕࡀࡍࡀ
ࡉࡀࡃࡋࡉࡋࡅࡍ ࡄࡅࡊࡅࡌࡕࡀ ࡌࡍ ࡋࡉࡁࡀࡉࡅࡍ ࡌࡀࡐࡒࡉࡀ ࡅࡓࡀࡌࡉࡁࡇ ࡔࡉࡁࡉࡀ
ࡁࡀࡋࡌࡀ ࡅࡒࡀࡓࡉࡍ ࡋࡍࡀࡐࡔࡀࡉࡄࡅࡍ ࡀࡋࡀࡄࡉࡀ ࡅࡔࡋࡉࡄࡉࡀ ࡌࡀࡎࡒࡉࡍ
ࡋࡍࡀࡐࡔࡀࡉࡄࡅࡍ ࡅࡐࡀࡂࡓࡉࡀ ࡋࡀࡁࡔࡉࡀ ࡅࡌࡉࡃࡀࡌࡉࡍ ࡁࡃࡌࡅ ࡂࡅࡁࡓࡉࡀ
ࡅࡊࡕࡀࡁࡀ ࡖ ࡆࡉࡐࡀ ࡊࡀࡃࡁࡉࡀ ࡅࡁࡆࡄࡀࡓࡉࡀ ࡌࡆࡀࡄࡓࡉࡋࡅࡍ ࡅࡑࡀࡋࡅࡕࡀ ࡖ ࡊࡀࡃࡁࡀ
ࡌࡑࡀࡋࡉࡋࡅࡍ ࡅࡔࡉࡄࡀ ࡅࡓࡄࡀࡌࡕࡀ ࡅࡔࡉࡂࡓࡀ ࡓࡀࡌࡉࡍ ࡏࡋ ࡀࡍࡐࡀ ࡖ
ࡀࡓࡒࡀ ࡅࡍࡁࡉࡄࡉࡀ ࡒࡀࡓࡉࡀ ࡋࡍࡀࡐࡔࡀࡉࡄࡅࡍ ࡅࡀࡍࡀ ࡔࡋࡉࡄࡀ ࡒࡀࡃࡌࡀࡉࡀ
ࡌࡀࡐࡓࡉࡔࡍࡀ ࡅࡀࡌࡀࡓࡍࡀ ࡋࡊࡅࡋࡄࡅࡍ ࡍࡀࡑࡅࡓࡀࡉࡉࡀ ࡖ ࡄࡀࡅࡉࡍ ࡅࡌࡉࡕࡉࡀࡃࡋࡉࡍ
ࡋࡀࡕࡉࡔࡌࡅࡍࡇ ࡋࡔࡅࡕࡀࡉࡄࡅࡍ ࡅࡌࡍ ࡏࡅࡄࡓࡀ ࡖ ࡄࡉࡉࡀ ࡋࡀࡕࡉࡔࡈࡅࡍ
ࡁࡄࡉࡓࡀࡉ ࡋࡀࡕࡉࡄࡅࡍ ࡌࡉࡍࡀࡉࡄࡅࡍ ࡌࡍ ࡄࡀࡋࡉࡍ ࡖ ࡁࡄࡃࡀ ࡌࡀࡌࡋࡀ
ࡋࡀࡒࡀࡉࡌࡉࡀ ࡐࡓࡅࡔࡅࡍࡅࡍ ࡋࡌࡀࡌࡋࡀࡋࡅࡍ ࡖ ࡄࡉࡍࡅࡍ ࡁࡄࡃࡀࡃࡉࡀ ࡌࡊࡀࡃࡁࡉࡀ
ࡅࡌࡀࡋࡊࡀ ࡋࡌࡀࡋࡊࡀ ࡄࡀࡁࡓࡇ ࡌࡂࡀࡍࡉࡋࡇ ࡅࡍࡁࡉࡄࡀ ࡁࡍࡁࡉࡄࡀ
ࡌࡊࡀࡃࡉࡁ ࡅࡒࡀࡓࡉࡋࡅࡍ ࡋࡁࡍࡀࡕ ࡀࡍࡀࡔࡀ ࡅࡌࡓࡀࡄࡌࡉࡋࡅࡍ ࡁࡃࡀࡄࡁࡀ
ࡅࡊࡀࡎࡐࡀ ࡅࡁࡀࡓࡂࡁࡀ ࡅࡌࡉࡍࡅࡍࡀ ࡅࡁࡓࡀࡂࡀࡂࡕࡀ ࡌࡓࡀࡂࡉࡂࡉࡋࡅࡍ
ࡅࡌࡀࡎࡈࡉࡋࡅࡍ ࡅࡏࡉࡕ ࡌࡉࡍࡀࡉࡄࡅࡍ ࡁࡆࡌࡀࡓࡀ ࡅࡓࡒࡀࡃࡀ ࡅࡔࡉࡄࡀ
ࡔࡀࡁࡉࡋࡅࡍ ࡅࡏࡉࡕ ࡌࡉࡍࡀࡉࡄࡅࡍ ࡁࡑࡉࡋࡌࡉࡀ ࡖ ࡃࡀࡄࡁࡀ ࡅࡊࡀࡎࡐࡀ
ࡅࡁࡑࡀࡋࡌࡀࡕࡀ ࡖ ࡒࡅࡓࡒࡎࡀ ࡅࡐࡓࡉࡊࡉࡀ ࡖ ࡈࡉࡍࡀ ࡅࡁࡏࡅࡁࡀࡃࡉࡀ ࡁࡀࡈࡋࡉࡀ
ࡌࡀࡎࡈࡉࡋࡄࡅࡍ ࡅࡏࡉࡕ ࡌࡉࡍࡀࡉࡄࡅࡍ ࡖ ࡁࡄࡉࡓࡁࡀ ࡅࡎࡉࡐࡀ ࡅࡌࡄࡉࡕࡀ
ࡅࡒࡓࡀࡁࡀ ࡅࡕࡀࡊࡕࡅࡔࡀ ࡅࡁࡄࡀࡅࡒࡀ ࡅࡆࡉࡅࡉࡄࡕࡀ ࡊࡀࡁࡓࡉࡀ ࡏࡋࡀࡅࡀࡉࡄࡅࡍ
ࡅࡌࡀࡄࡉࡒࡉࡋࡅࡍ ࡅࡀࡌࡓࡉࡋࡅࡍ ࡅࡁࡋࡀ ࡑࡅࡁࡉࡀࡍࡅࡍ ࡀࡁࡃࡉࡀ ࡖ ࡔࡉࡁࡉࡀࡄࡉࡀ
ࡌࡔࡀࡅࡉࡋࡅࡍ ࡅࡏࡉࡕ ࡌࡉࡍࡀࡉࡄࡅࡍ ࡖ ࡁࡌࡊࡉࡊࡅࡕࡀ ࡅࡔࡀࡁࡔࡅࡕࡀ
025 ࡁࡄࡀࡋࡉࡅࡕࡀ ࡅࡁࡄࡅࡊࡅࡌࡕࡀ ࡁࡍࡉࡊࡋࡀ ࡅࡆࡉࡐࡀ ࡌࡀࡎࡈࡉࡋࡄࡅࡍ ࡋࡁࡍࡉࡀ ࡖ ࡀࡃࡀࡌ
ࡅࡔࡅࡌࡇ ࡖ ࡀࡋࡀࡄࡀ ࡓࡀࡌࡉࡋࡅࡍ ࡁࡐࡅࡌࡀࡉࡄࡅࡍ ࡅࡀࡌࡓࡉࡋࡅࡍ ࡖ ࡄࡀࡋࡉࡍ
ࡊࡕࡀࡁࡉࡀ ࡅࡌࡉࡌࡓࡉࡀ ࡖ ࡉࡀࡄࡀࡁࡋࡀࡍ ࡓࡁࡀ ࡅࡏࡋࡀࡉࡀ ࡅࡀࡓࡁࡉࡁࡄࡅࡍ
ࡌࡀࡋࡀࡋࡉࡀ ࡖ ࡁࡄࡅࡍ ࡌࡉࡎࡕࡀࡊࡓࡀ ࡅࡀࡅࡃࡀ ࡍࡉࡔࡌࡀࡕࡅࡍ ࡅࡀࡐࡊࡉࡋࡇ
ࡋࡋࡉࡁࡀࡉࡄࡅࡍ ࡅࡔࡉࡈࡉࡀ ࡓࡀࡌࡉࡁࡇ ࡁࡀࡋࡌࡀ ࡅࡀࡍࡀ ࡔࡋࡉࡄࡀ ࡃࡀࡊࡉࡀ
ࡀࡌࡀࡓࡍࡀࡋࡊࡅࡍ ࡋࡀࡕࡉࡔࡌࡅࡍࡇ ࡋࡔࡅࡕࡀࡉࡄࡅࡍ ࡖ ࡍࡁࡉࡄࡉࡀ ࡖ ࡊࡀࡃࡁࡀ
ࡖ ࡃࡀࡌࡉࡍ ࡍࡀࡐࡔࡀࡉࡄࡅࡍ ࡁࡍࡁࡉࡄࡉࡀ ࡖ ࡊࡅࡔࡈࡀ ࡅࡌࡉࡃࡀࡌࡉࡍ
ࡁࡃࡌࡅ ࡕࡋࡀࡕࡀ ࡏࡅࡕࡓࡉࡀ ࡖ ࡀࡎࡂࡅࡍ ࡋࡀࡋࡌࡀ ࡖ ࡆࡉࡅࡀࡉࡄࡅࡍ ࡋࡀࡅ
ࡆࡉࡅࡀ ࡄࡅ ࡅࡋࡁࡅࡔࡀࡉࡄࡅࡍ ࡋࡁࡅࡔࡀ ࡖ ࡍࡅࡓࡀ ࡄࡅ ࡏࡉࡕ ࡌࡉࡍࡀࡉࡄࡅࡍ
ࡖ ࡋࡁࡅࡔࡉࡀ ࡖ ࡄࡔࡅࡊࡀ ࡋࡁࡉࡔࡉࡀ ࡅࡊࡎࡅࡉࡉࡀ ࡖ ࡄࡀࡁࡀࡓࡀ ࡌࡊࡀࡎࡉࡍ
ࡅࡓࡉࡄࡀࡉࡅࡍ ࡎࡍࡉࡀ ࡅࡆࡀࡐࡅࡓ ࡋࡊࡅࡍ ࡀࡌࡀࡓࡍࡀ ࡁࡄࡉࡓࡀࡉ ࡋࡊࡅࡍ
ࡒࡀࡓࡉࡍࡀ ࡅࡌࡀࡐࡓࡉࡔࡍࡀ ࡌࡄࡀࡉࡌࡍࡀࡉ ࡋࡁࡅࡔ ࡄࡉࡅࡀࡓࡀ ࡅࡏࡕࡊࡀࡎࡅࡍ
ࡄࡉࡅࡀࡓࡀ ࡁࡃࡌࡅ ࡋࡁࡅࡔࡉࡀ ࡖ ࡆࡉࡅࡀ ࡅࡊࡎࡅࡉࡉࡀ ࡖ ࡍࡄࡅࡓࡀ ࡅࡕࡓࡅࡑ
ࡁࡅࡓࡆࡉࡍࡒࡉࡀ ࡄࡉࡅࡀࡓࡉࡀ ࡁࡃࡌࡅ ࡊࡋࡉࡋࡉࡀ ࡓࡀࡅࡆࡉࡀ ࡅࡀࡎࡀࡓ ࡄࡉࡌࡉࡀࡍࡉࡀ ࡌࡉࡀ
ࡄࡉࡉࡀ ࡖ ࡏࡅࡕࡓࡉࡀ ࡀࡎࡓࡉࡀ ࡁࡄࡀࡋࡑࡀࡉࡅࡍ ࡅࡎࡅࡌ ࡌࡎࡀࡍࡉࡀ ࡎࡃࡉࡒࡉࡀ
ࡅࡋࡂࡅࡈ ࡌࡀࡓࡂࡍࡉࡀ ࡁࡏࡃࡀࡉࡊࡅࡍ ࡀࡊࡅࡀࡕ ࡌࡀࡓࡂࡍࡉࡀ ࡖ ࡌࡉࡀ ࡄࡉࡉࡀ
ࡖ ࡏࡅࡕࡓࡉࡀ ࡋࡀࡂࡈࡉࡀ ࡁࡀࡕࡀࡓ ࡍࡄࡅࡓ ࡉࡀ ࡌࡄࡀࡉࡌࡍࡉࡀ ࡅࡔࡀࡋࡌࡀࡍࡉࡀ
ࡋࡀࡕࡉࡌࡓࡅࡍ ࡌࡉࡍࡃࡀࡌ ࡖ ࡋࡀࡉࡀࡃࡉࡕࡅࡍ ࡅࡋࡀࡂࡋࡉࡋࡊࡅࡍ ࡅࡋࡀࡉࡉࡕ ࡏࡍࡉࡔ
ࡖ ࡂࡋࡉࡋࡇ ࡊࡀࡎࡉࡀࡕࡀ ࡋࡁࡀࡓ ࡌࡍ ࡓࡁࡀ ࡅࡏࡋࡀࡉࡀ ࡖ ࡉࡀࡃࡀ ࡅࡐࡀࡓࡉࡔ
ࡏࡋ ࡊࡅࡋࡄࡅࡍ ࡁࡄࡉࡓࡀࡉ ࡆࡀࡓࡉࡆ ࡍࡀࡐࡔࡀࡉࡊࡅࡍ ࡁࡆࡀࡉࡍࡀ ࡖ ࡋࡀࡄࡅࡀ
ࡌࡍ ࡐࡀࡓࡆࡋࡀ ࡆࡀࡉࡍࡀࡉࡊࡅࡍ ࡍࡀࡑࡀࡓࡅࡕࡀ ࡅࡌࡀࡋࡀࡋࡉࡀ ࡊࡔࡉࡈࡉࡀ ࡖ ࡀࡕࡀࡓ
ࡍࡄࡅࡓ ࡌࡋࡅࡊ ࡌࡅࡋࡊࡀࡍࡉࡀ ࡔࡀࡐࡉࡓࡉࡀ ࡋࡄࡃࡀࡃࡉࡀ ࡀࡊࡅࡀࡕ ࡖ ࡌࡆࡀࡄࡓࡉࡕࡅࡍ
ࡅࡌࡐࡀࡒࡃࡉࡕࡅࡍ ࡀࡊࡅࡀࡕ ࡖ ࡄࡆࡉࡕࡅࡍ ࡁࡀࡉࡍࡀࡉࡊࡅࡍ ࡅࡒࡀࡓࡉࡕࡅࡍ ࡁࡐࡅࡌࡀࡉࡊࡅࡍ
ࡅࡔࡀࡌࡉࡕࡅࡍ ࡁࡏࡅࡃࡍࡀࡉࡊࡅࡍ ࡏࡁࡀࡃ ࡁࡉࡃࡀࡉࡊࡅࡍ ࡏࡅࡁࡀࡃࡉࡀ ࡈࡀࡁࡉࡀ
026 ࡅࡔࡀࡐࡉࡓࡉࡀ ࡋࡀࡕࡉࡃࡀࡌࡅࡍ ࡋࡔࡉࡕࡋࡉࡀ ࡁࡉࡔࡉࡀ ࡖ ࡌࡉࡀ
ࡔࡀࡕࡉࡍ ࡅࡐࡉࡓࡉࡀ ࡋࡌࡀࡓࡀࡉࡄࡅࡍ ࡋࡀࡉࡀࡄࡁࡉࡀ ࡁࡄࡉࡓࡀࡉ ࡄࡆࡅࡍ
ࡖ ࡀࡌࡀࡓࡉࡋࡊࡅࡍ ࡏࡋ ࡍࡄࡅࡓࡀ ࡖ ࡎࡀࡊࡀ ࡅࡌࡉࡍࡉࡀࡍࡀ ࡋࡉࡕࡋࡇ ࡀࡌࡀࡓࡉࡋࡊࡅࡍ
ࡏࡋ ࡄࡔࡅࡊࡀ ࡅࡏࡋ ࡅࡍࡓࡀ ࡖ ࡉࡀࡒࡃࡀ ࡀࡌࡀࡓࡉࡋࡊࡅࡍ ࡏࡋ ࡎࡀࡈࡀࡍࡀ
ࡖ ࡄࡀࡉࡋࡀ ࡅࡔࡓࡀࡓࡀ ࡋࡉࡕࡋࡇ ࡅࡋࡀࡌࡑࡉࡀ ࡍࡀࡐࡔࡉࡀ ࡋࡐࡀࡓࡅࡒࡉࡀ ࡌࡍ ࡍࡅࡓࡀ
ࡀࡊࡋࡀ ࡅࡉࡀࡒࡃࡀࡍࡀ ࡖ ࡄࡀࡆࡉࡍ ࡄࡏ ࡔࡅࡕࡀ ࡒࡀࡃࡌࡀࡉࡕࡀ ࡖ ࡏࡕࡄࡉࡁࡋࡇ
ࡋࡀࡃࡀࡌ ࡓࡉࡔࡀ ࡖ ࡔࡅࡓࡁࡕࡀ ࡄࡀࡉࡕࡀ ࡄࡃࡀ ࡌࡀࡋࡀࡋࡀ ࡄࡅࡀ
ࡅࡄࡃࡀ ࡎࡀࡄࡃࡅࡕࡀ ࡄࡅࡀࡕ ࡄࡀࡉࡆࡀࡊ ࡀࡋࡌࡀ ࡁࡄࡉࡓࡁࡀ ࡅࡌࡅࡕࡀࡍࡀ ࡌࡉࡕࡉࡍࡎࡉࡁ
ࡅࡏࡕࡉࡕࡋࡉࡍ ࡋࡍࡉࡔࡌࡀࡕࡀ ࡖ ࡁࡄࡀࡍࡀࡕࡇ ࡌࡀࡐࡉࡒࡕࡀ ࡌࡍ ࡐࡀࡂࡓࡀࡉࡉࡍ ࡍࡀࡐࡒࡀࡍ
ࡅࡍࡉࡔࡌࡀࡕࡀ ࡀࡃࡉࡍࡒࡉࡀ ࡄࡀࡈࡀࡉࡉࡀ ࡅࡄࡀࡅࡁࡉࡀ ࡋࡍࡄࡅࡓࡀ ࡎࡀࡋࡒࡀ ࡅࡄࡀࡉࡆࡀࡊ
ࡐࡀࡉࡉࡔ ࡓࡀࡌ ࡂࡀࡁࡓࡀ ࡅࡓࡅࡃ ࡏࡍࡕࡀ ࡓࡉࡔࡀ ࡖ ࡃࡀࡓࡀ ࡌࡉࡕࡉࡒࡓࡉࡍ
ࡅࡄࡀࡉࡆࡀࡊ ࡀࡋࡌࡀ ࡌࡉࡕࡉࡀࡉࡀࡓ ࡌࡉࡍࡀࡉࡄࡅࡍ ࡅࡀࡋࡌࡀ ࡌࡉࡕࡍࡀࡐࡀࡔ ࡅࡏࡕࡉࡕࡋࡇ
ࡋࡀࡃࡀࡌ ࡂࡀࡁࡓࡀ ࡌࡉࡊࡀࡋ ࡀࡋࡐࡀ ࡖ ࡔࡍࡉࡀ ࡅࡌࡍ ࡀࡃࡀࡌ ࡂࡀࡁࡓࡀ
ࡅࡀࡋࡌࡀ ࡋࡓࡀࡌ ࡅࡓࡅࡃ ࡕࡋࡀࡕࡉࡍ ࡃࡀࡓࡉࡀ ࡄࡀࡅࡉࡍ ࡅࡊࡅࡋࡄࡅࡍ ࡁࡉࡄࡃࡀ
ࡌࡀࡎࡉࡒࡕࡀ ࡋࡍࡄࡅࡓࡀ ࡎࡀࡋࡒࡉࡀ ࡀࡌࡉࡍࡈࡅࡋ ࡖ ࡁࡉࡄࡃࡀ ࡔࡅࡕࡀ ࡒࡀࡉࡌࡉࡀ
ࡅࡁࡄࡃࡀ ࡌࡀࡋࡀࡋࡀ ࡌࡀࡎࡂࡉࡍ ࡅࡁࡉࡄࡃࡀ ࡕࡅࡔࡁࡉࡄࡕࡀ ࡎࡀࡄࡃࡉࡀ
ࡕࡅࡌ ࡌࡉࡕࡉࡍࡎࡉࡁ ࡀࡋࡌࡀ ࡁࡉࡀࡒࡃࡀࡍࡀ ࡖ ࡍࡅࡓࡀ ࡅࡐࡀࡉࡉࡔ ࡔࡅࡓࡁࡀࡉ
ࡂࡀࡁࡓࡀ ࡅࡔࡀࡓࡄࡀࡁࡏࡉࡋ ࡏࡍࡕࡀ ࡅࡍࡉࡔࡌࡀࡕࡀ ࡊࡅࡋࡄࡉࡍ ࡌࡍ ࡐࡀࡂࡓࡀࡉࡉࡍ
ࡁࡄࡀࡍࡀࡕࡇ ࡌࡀࡐࡉࡒࡕࡀ ࡍࡀࡐࡒࡀ ࡅࡋࡍࡄࡅࡓࡀ ࡎࡀࡋࡒࡀ ࡀࡌࡉࡍࡈࡅࡋ ࡖ ࡋࡀࡌࡊࡀࡃࡁࡉࡀ
ࡁࡔࡅࡕࡀ ࡒࡀࡃࡌࡀࡉࡕࡀ ࡅࡋࡀࡐࡊࡉࡀ ࡁࡌࡀࡋࡀࡋࡀ ࡒࡀࡃࡌࡀࡉࡀ ࡕࡅࡌ ࡀࡋࡌࡀ
ࡌࡉࡕࡉࡀࡉࡀࡓ ࡅࡌࡉࡕࡍࡀࡐࡀࡔ ࡅࡌࡍ ࡓࡀࡌ ࡅࡓࡅࡃ ࡅࡀࡋࡌࡀ ࡋࡔࡅࡓࡁࡀࡉ
ࡅࡔࡀࡓࡄࡀࡁࡏࡉࡋ ࡎࡓࡉࡍ ࡅࡄࡀࡌࡔࡀ ࡃࡀࡓࡉࡀ ࡄࡀࡅࡉࡍ ࡕࡅࡌ ࡌࡍ ࡀࡁࡀࡕࡀࡓ
ࡔࡅࡓࡁࡀࡉ ࡅࡔࡀࡓࡄࡀࡁࡏࡉࡋ ࡀࡋࡌࡀ ࡁࡈࡅࡐࡀࡍࡉࡀ ࡌࡉࡀ ࡌࡉࡕࡉࡍࡎࡉࡁ ࡅࡐࡀࡉࡉࡔ
ࡍࡅ ࡖ ࡊࡀࡅࡉࡋࡀ ࡅࡔࡅࡌ ࡁࡓ ࡍࡅ ࡅࡀࡋࡌࡀ ࡊࡅࡋࡇ ࡁࡌࡉࡀ ࡌࡉࡕࡉࡍࡎࡉࡁ
027 ࡀࡌࡉࡍࡈࡅࡋ ࡖ ࡊࡕࡉࡁࡋࡅࡍ ࡖ ࡁࡄࡀࡍࡀࡕࡇ ࡌࡀࡐࡉࡒࡕࡀ ࡌࡍ ࡐࡀࡂࡓࡀࡉࡉࡍ
ࡍࡀࡐࡒࡀࡍ ࡅࡍࡉࡔࡌࡀࡕࡀ ࡋࡍࡄࡅࡓࡀ ࡎࡀࡋࡒࡀ ࡅࡌࡍ ࡃࡀࡓࡀ ࡖ ࡔࡅࡓࡁࡀࡉ
ࡅࡔࡀࡓࡄࡀࡁࡏࡉࡋ ࡅࡀࡋࡌࡀ ࡋࡃࡀࡓࡀ ࡖ ࡍࡅ ࡄࡀࡌࡉࡎࡀࡓ ࡃࡀࡓࡉࡀ
ࡄࡀࡅࡉࡍ ࡅࡌࡍ ࡍࡅ ࡂࡀࡁࡓࡀ ࡀࡋࡌࡀ ࡍࡉࡕࡍࡀࡐࡀࡔ ࡅࡁࡉࡄࡃࡀ
ࡒࡀࡋࡀ ࡅࡕࡅࡔࡁࡉࡄࡕࡀ ࡍࡉࡎࡉࡄࡃࡅࡍ ࡅࡄࡃࡀ ࡌࡀࡋࡀࡋࡀ ࡏࡒࡓࡉࡀ ࡀࡍࡀ
ࡔࡋࡉࡄࡀ ࡖ ࡄࡉࡉࡀ ࡅࡕࡓࡉࡍ ࡌࡀࡋࡀࡊࡉࡀ ࡖ ࡌࡉࡍࡀࡉ ࡅࡌࡍ ࡍࡅ ࡂࡀࡁࡓࡀ
ࡅࡀࡋࡌࡀ ࡖ ࡌࡉࡕࡁࡉࡍࡉࡀ ࡏࡅࡓࡀࡔࡋࡀࡌ ࡌࡀࡄࡅࡆࡀ ࡔࡉࡕࡀ ࡃࡀࡓࡉࡀ
ࡄࡀࡅࡉࡍ ࡅࡀࡊࡋࡀ ࡀࡋࡐࡀ ࡖ ࡔࡍࡉࡀ ࡁࡃࡅࡄࡍࡀ ࡅࡌࡉࡕࡋࡉࡃ ࡅࡄࡀࡅࡉࡀ
ࡔࡋࡉࡌࡅࡍ ࡌࡀࡋࡊࡀ ࡁࡓ ࡃࡀࡅࡉࡃ ࡅࡄࡀࡅࡉࡀ ࡌࡀࡋࡊࡀ ࡖ ࡉࡀࡄࡅࡃ ࡅࡔࡀࡋࡉࡈࡀ
ࡓࡁࡀ ࡖ ࡏࡅࡓࡀࡔࡋࡀࡌ ࡅࡎࡀࡄࡓࡉࡀ ࡅࡃࡀࡉࡅࡉࡀ ࡒࡅࡃࡀࡌࡇ ࡍࡉࡔࡕࡀࡁࡃࡅࡍ
ࡅࡁࡑࡅࡁࡉࡀࡍࡇ ࡃࡉࡋࡇ ࡌࡀࡎࡂࡉࡍ ࡀࡋࡌࡀ ࡖ ࡁࡍࡀࡐࡔࡀ ࡍࡉࡔࡕࡀࡁࡀ
ࡅࡈࡀࡁࡅࡕࡀ ࡖ ࡌࡀࡓࡇ ࡋࡀࡌࡒࡀࡁࡉࡋ ࡅࡄࡀࡉࡆࡀࡊ ࡎࡀࡄࡓࡉࡀ ࡅࡃࡀࡉࡅࡉࡀ
ࡌࡍ ࡌࡀࡋࡀࡋࡇ ࡀࡐࡊࡉࡀ ࡅࡌࡀࡋࡊࡅࡕࡇ ࡌࡉࡍࡇ ࡌࡉࡕࡍࡀࡎࡁࡀ ࡅࡄࡀࡅࡉࡀ
ࡌࡔࡉࡄࡀ ࡍࡁࡉࡄࡀ ࡖ ࡉࡀࡄࡅࡈࡀࡉࡉࡀ ࡒࡀࡋࡀ ࡋࡔࡉࡁࡉࡀࡄࡉࡀ ࡒࡀࡓࡉࡋࡅࡍ
ࡁࡋࡉࡂࡈࡕࡀ ࡋࡀࡂࡉࡈࡋࡅࡍ ࡏࡍࡉࡔ ࡏࡍࡉࡔ ࡏࡋ ࡃࡉࡋࡇ ࡌࡉࡊࡀࡃࡀࡔ ࡌࡀࡎࡈࡉࡋࡅࡍ ࡔࡅࡁࡀ
ࡃࡀࡉࡅࡉࡀ ࡌࡀࡎࡈࡉࡀࡍࡉࡀ ࡋࡊࡅࡋࡄࡅࡍ ࡁࡍࡉࡀ ࡖ ࡀࡃࡀࡌ ࡅࡄࡀࡃ ࡔࡀࡌࡉࡔ
ࡔࡅࡌࡇ ࡅࡕࡉࡍࡉࡀࡍࡀ ࡓࡅࡄࡀ ࡖ ࡒࡅࡃࡔࡀ ࡏࡎࡕࡓࡀ ࡖ ࡋࡉࡁࡀࡕ
ࡀࡌࡀࡌࡉࡕ ࡔࡅࡌࡀ ࡕࡋࡉࡕࡀࡉࡀ ࡍࡁࡅ ࡌࡔࡉࡄࡀ ࡖ ࡊࡀࡃࡀࡁࡀ
ࡖ ࡌࡊࡀࡃࡉࡁ ࡁࡕࡅࡔࡁࡉࡄࡕࡀ ࡒࡀࡃࡌࡀࡉࡕࡀ ࡀࡓࡁࡀࡉࡀ ࡎࡉࡍ
ࡖ ࡄࡅ ࡑࡀࡅࡓࡏࡉࡋ ࡔࡅࡌࡇ ࡄࡀࡌࡔࡀࡉࡀ ࡊࡉࡅࡀࡍ ࡔࡉࡕࡀࡉࡀ
ࡁࡉࡋ ࡅࡔࡅࡁࡀࡉࡀ ࡍࡉࡓࡉࡂ ࡃࡀࡉࡅࡉࡀ ࡖ ࡁࡉࡕ ࡔࡀࡌࡉࡔ ࡃࡀࡄࡁࡀ
ࡅࡊࡀࡎࡐࡀ ࡅࡓࡀࡁࡅࡕ ࡊࡀࡓࡎࡀ ࡉࡀࡄࡉࡁࡋࡅࡍ ࡋࡎࡀࡂࡀࡃࡅࡍ ࡅࡔࡋࡉࡄࡉࡀ
ࡌࡔࡀࡃࡀࡓ ࡋࡀࡋࡌࡀ ࡅࡋࡔࡀࡌࡉࡔ ࡅࡋࡎࡉࡓࡀ ࡌࡎࡀࡂࡃࡉࡋࡄࡅࡍ ࡋࡁࡍࡉࡀ
ࡀࡍࡀࡔࡀ ࡃࡀࡉࡅࡉࡀ ࡖ ࡁࡀࡕ ࡖ ࡋࡉࡁࡀࡕ ࡔࡉࡈࡉࡀ ࡂࡀࡅࡓࡀ ࡅࡐࡉࡓࡑࡀ
028 ࡅࡆࡀࡍࡉࡅࡕࡀ ࡅࡔࡉࡄࡀ ࡅࡔࡉࡂࡓࡀ ࡅࡆࡌࡀࡓࡀ ࡅࡄࡀࡓࡔࡉࡀ ࡔࡀࡓࡉࡍ
ࡏࡋ ࡁࡍࡉࡀ ࡀࡍࡀࡔࡀ ࡅࡃࡀࡉࡅࡉࡀ ࡖ ࡍࡁࡅ ࡌࡔࡉࡄࡀ ࡁࡍࡉࡊࡋࡀ ࡍࡀࡐࡋࡉࡀ
ࡏࡋ ࡁࡍࡉࡀ ࡀࡍࡀࡔࡀ ࡅࡐࡀࡔࡈࡉࡁࡅࡍ ࡌࡍ ࡁࡀࡕࡀࡉࡅࡍ ࡅࡌࡍ ࡁࡉࡕ
ࡀࡍࡀࡔࡀࡉࡅࡍ ࡔࡀࡁࡉࡋࡅࡍ ࡁࡈࡅࡓࡉࡀ ࡅࡁࡃࡉࡔࡕࡀࡕࡀ ࡌࡀࡈࡉࡋࡄࡅࡍ ࡅࡋࡄࡅࡃࡀࡉࡅࡍ
ࡌࡀࡅࡕࡉࡁࡉࡋࡅࡍ ࡅࡈࡅࡄࡌࡀࡉࡅࡍ ࡅࡆࡉࡃࡀࡉࡄࡅࡍ ࡏࡋ ࡀࡈࡌࡀࡉࡄࡅࡍ ࡓࡀࡃࡉࡋࡅࡍ
ࡅࡎࡀࡄࡓࡉࡀ ࡅࡃࡀࡉࡅࡉࡀ ࡁࡍࡉࡀ ࡀࡍࡀࡔࡀ ࡖ ࡋࡀࡂࡈࡉࡀ ࡐࡀࡂࡓࡉࡀ
ࡅࡌࡑࡀࡉࡓࡉࡀ ࡓࡅࡄࡉࡀ ࡅࡍࡉࡔࡌࡀࡕࡀ ࡖ ࡌࡉࡍࡉࡀࡍࡀ ࡋࡀࡌࡒࡀࡁࡋࡉࡀ ࡅࡎࡀࡌࡀ
ࡅࡀࡎࡅࡕࡀ ࡋࡉࡕࡋࡅࡍ ࡄࡅ ࡁࡍࡅࡓࡀ ࡌࡉࡕࡀࡄࡆࡉࡋࡅࡍ ࡋࡃࡀࡄࡀࡋࡉࡀ ࡅࡋࡃࡀࡄࡀࡋࡀࡕࡀ
ࡅࡀࡌࡀࡓࡋࡅࡍ ࡖ ࡄࡆࡅࡍ ࡆࡉࡅࡀࡉ ࡖ ࡃࡍࡀ ࡁࡀࡋࡌࡀ ࡅࡋࡀࡉࡀࡃࡉࡍ ࡖ ࡋࡀࡅ ࡆࡉࡅࡀ
ࡄࡅ ࡅࡔࡉࡈࡉࡀ ࡌࡀࡔࡈࡉࡀ ࡁࡀࡋࡌࡀ ࡃࡀࡉࡅࡉࡀ ࡖ ࡁࡉࡕ ࡊࡉࡅࡀࡍ
ࡍࡅࡌࡁࡉࡀ ࡅࡁࡊࡉࡕࡀ ࡅࡄࡅࡊࡅࡌࡕࡀ ࡓࡀࡌࡉࡋࡅࡍ ࡁࡋࡉࡁࡀࡉࡅࡍ ࡋࡁࡍࡀࡕ
ࡀࡍࡀࡔࡀ ࡅࡌࡍ ࡈࡀࡁࡅࡕࡀ ࡂࡀࡆࡋࡉࡋࡅࡍ ࡃࡀࡉࡅࡉࡀ ࡖ ࡁࡉࡕ ࡍࡉࡓࡉࡂ
ࡏࡋ ࡁࡍࡉࡀ ࡀࡍࡀࡔࡀ ࡍࡀࡐࡋࡉࡀ ࡅࡌࡔࡀࡋࡐࡉࡋࡅࡍ ࡅࡁࡉࡎࡓࡀࡉࡅࡍ ࡑࡀࡓࡉࡍ
ࡅࡆࡌࡀࡉࡅࡍ ࡀࡔࡃࡉࡀ ࡁࡀࡓࡒࡀ ࡌࡉࡕࡉࡒࡓࡉࡍ ࡔࡀࡋࡅࡐࡉࡀ ࡊࡅࡌࡓࡉࡀ
ࡆࡀࡁࡉࡀ ࡅࡀࡃࡉࡃࡉࡀ ࡕࡅࡌ ࡌࡔࡉࡄࡀ ࡌࡉࡕࡂࡋࡉࡀ ࡁࡃࡌࡅࡕࡀ
ࡄࡅࡓࡉࡍࡕࡉࡍ ࡖ ࡋࡁࡉࡔ ࡍࡅࡓࡀ ࡅࡌࡊࡀࡎࡉࡀ ࡍࡅࡓࡀ ࡅࡂࡀࡁࡀࡓࡅࡀࡕࡀ
ࡁࡍࡅࡓࡀ ࡌࡄࡀࡅࡉࡀ ࡀࡌࡅࡍࡏࡉࡋ ࡔࡅࡌࡇ ࡅࡏࡔࡅ ࡌࡀࡄࡉࡀࡍࡀ
ࡓࡁࡀ ࡋࡍࡀࡐࡔࡀ ࡅࡏࡋ ࡍࡅࡓࡀ ࡄࡀࡅࡉࡀ ࡔࡊࡉࡍࡕࡇ ࡅࡌࡀࡓࡊࡀࡁࡕࡇ
ࡌࡄࡀࡅࡉࡀ ࡅࡒࡀࡉࡉࡌ ࡒࡅࡃࡀࡌࡀࡉࡊࡅࡍ ࡅࡀࡌࡀࡓࡋࡊࡅࡍ ࡀࡕࡅࡍ ࡅࡒࡅࡌ
ࡋࡅࡀࡕࡀࡉ ࡅࡋࡀࡕࡉࡁࡉࡔࡋࡅࡍ ࡅࡋࡀࡕࡉࡄࡀࡉࡌࡉࡍࡁࡇ ࡀࡌࡉࡍࡈࡅࡋ ࡖ ࡁࡄࡀࡓࡔࡉࡀ
ࡅࡆࡉࡐࡉࡀ ࡌࡀࡎࡂࡉࡍ ࡄࡉࡍ ࡀࡋࡉࡑ ࡏࡋࡀࡅࡀࡉࡊࡅࡍ ࡀࡌࡅࡓࡅࡋࡇ ࡖ ࡃࡉࡋࡀࡊ
ࡀࡍࡉࡍࡏࡍ ࡁࡋࡉࡁࡀࡉࡊࡅࡍ ࡋࡀࡕࡀࡅࡃࡅࡁࡇ ࡅࡌࡍ ࡌࡉࡍࡉࡋࡀࡕ ࡌࡀࡓࡀࡉࡊࡅࡍ
ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡋࡀࡕࡉࡊࡉࡐࡓࡅࡍ ࡀࡌࡉࡍࡈࡅࡋ ࡖ ࡌࡔࡉࡄࡀ
ࡊࡀࡃࡀࡁࡀ ࡋࡀࡂࡋࡉࡋࡇ ࡊࡀࡎࡉࡀࡕࡀ ࡅࡀࡌࡀࡓ ࡀࡍࡀ ࡄࡅ ࡀࡋࡀࡄࡀ
029 ࡁࡓࡇ ࡖ ࡀࡋࡀࡄࡀ ࡖ ࡀࡁ ࡋࡄࡀࡊࡀ ࡔࡀࡃࡓࡀࡍ ࡅࡀࡌࡀࡓࡋࡊࡅࡍ ࡀࡍࡀ ࡄࡅ ࡔࡋࡉࡄࡀ
ࡒࡀࡃࡌࡀࡉࡀ ࡀࡍࡀ ࡄࡅ ࡄࡉࡁࡉࡋ ࡆࡉࡅࡀ ࡖ ࡌࡍ ࡌࡓࡅࡌࡀ ࡏࡕࡉࡕ
ࡅࡋࡀࡕࡀࡅࡃࡅࡁࡇ ࡀࡌࡉࡍࡈࡅࡋ ࡖ ࡋࡀࡅ ࡄࡉࡁࡉࡋ ࡆࡉࡅࡀ ࡄࡅ ࡄࡉࡁࡉࡋ ࡆࡉࡅࡀ
ࡋࡀࡅ ࡍࡅࡓࡀ ࡋࡁࡉࡔ ࡅࡄࡉࡁࡉࡋ ࡆࡉࡅࡀ ࡁࡃࡀࡓࡀ ࡄࡀࡍࡀࡕࡇ ࡋࡀࡌࡉࡕࡉࡂࡋࡉࡀ
ࡄࡉࡍࡏࡋࡀ ࡏࡍࡅࡔ ࡏࡅࡕࡓࡀ ࡀࡕࡉࡀ ࡅࡌࡀࡎࡂࡉࡀ ࡁࡏࡅࡓࡀࡔࡋࡀࡌ ࡗ
ࡋࡁࡅࡔࡀ ࡖ ࡀࡍࡀࡍࡉࡀ ࡌࡉࡀ ࡋࡁࡉࡔ ࡅࡁࡃࡌࡅ ࡐࡀࡂࡓࡉࡀ ࡌࡀࡎࡂࡉࡀ ࡅࡋࡀࡅ
ࡋࡁࡅࡔࡀ ࡖ ࡐࡀࡂࡓࡉࡀ ࡋࡁࡉࡔ ࡅࡄࡀࡅࡌࡀ ࡅࡓࡅࡂࡆࡀ ࡋࡉࡕࡁࡇ ࡅࡌࡀࡎࡂࡉࡀ
ࡅࡀࡕࡉࡀ ࡁࡔࡍࡉࡀ ࡖ ࡐࡀࡋࡈࡅࡎ ࡌࡀࡋࡊࡀ ࡖ ࡀࡋࡌࡀ ࡏࡍࡅࡔ ࡏࡅࡕࡓࡀ
ࡋࡀࡋࡌࡀ ࡀࡕࡉࡀ ࡁࡄࡀࡉࡋࡀ ࡖ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡌࡀࡎࡉࡀ ࡒࡓࡎࡀࡍࡉࡀ
ࡅࡌࡐࡀࡕࡀ ࡏࡅࡉࡓࡉࡀ ࡅࡌࡃࡀࡊࡉࡀ ࡂࡉࡓࡁࡀࡍࡉࡀ ࡅࡌࡀࡒࡉࡌ ࡌࡕࡀࡁࡓࡉࡀ
ࡅࡔࡀࡐࡅࡐࡉࡀ ࡋࡌࡀࡎࡂࡅࡉࡉࡀ ࡅࡌࡀࡋࡉࡋ ࡄࡀࡓࡔࡉࡀ ࡅࡃࡅࡂࡉࡀ ࡅࡌࡄࡀࡉࡉࡀ
ࡌࡉࡕࡉࡀ ࡅࡌࡄࡀࡉࡌࡉࡍ ࡌࡍ ࡉࡀࡄࡅࡈࡀࡉࡉࡀ ࡅࡌࡄࡀࡅࡉࡋࡅࡍ ࡖ ࡏࡉࡕ
ࡌࡅࡕࡀ ࡅࡏࡉࡕ ࡄࡉࡉࡀ ࡅࡏࡉࡕ ࡄࡔࡅࡊࡀ ࡅࡏࡉࡕ ࡍࡄࡅࡓࡀ
ࡅࡏࡉࡕ ࡈࡏࡉࡀ ࡅࡏࡉࡕ ࡔࡓࡀࡓࡀ ࡅࡌࡀࡐࡉࡒ ࡉࡀࡄࡅࡈࡀࡉࡉࡀ ࡏࡋ
ࡔࡅࡌࡇ ࡖ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡕࡋࡀࡕࡌࡀ ࡅࡔࡉࡕࡉࡍ
ࡍࡁࡉࡄࡉࡀ ࡌࡍ ࡏࡅࡓࡀࡔࡋࡀࡌ ࡌࡀࡕࡀ ࡍࡀࡐࡒࡉࡀ ࡁࡔࡅࡌࡇ
ࡖ ࡌࡀࡓࡀ ࡖ ࡓࡀࡁࡅࡕࡀ ࡖ ࡎࡀࡄࡃࡉࡀ ࡅࡎࡀࡋࡉࡒ ࡀࡍࡅࡔ ࡏࡅࡕࡓࡀ
ࡅࡉࡀࡕࡉࡁࡉࡀ ࡏࡋ ࡌࡔࡅࡍࡉࡀ ࡊࡅࡔࡈࡀ ࡊࡅࡋࡄࡅࡍ ࡏࡅࡕࡓࡉࡀ ࡌࡉࡕࡉࡊࡎࡉࡍ
ࡌࡍ ࡀࡉࡍࡀࡉࡄࡅࡍ ࡖ ࡁࡍࡉࡀ ࡀࡍࡀࡔࡀ ࡅࡄࡀࡉࡆࡀࡊ ࡄࡀࡓࡅࡁ ࡌࡀࡄࡅࡆࡀ
ࡏࡅࡓࡀࡔࡋࡀࡌ ࡖ ࡉࡀࡄࡅࡈࡀࡉࡉࡀ ࡁࡂࡋࡅࡕࡀ ࡍࡀࡐࡒࡉࡍ ࡅࡌࡉࡕࡁࡀࡃࡓࡉࡍ
ࡁࡌࡃࡉࡍ ࡌࡃࡉࡍ ࡅࡄࡀࡉࡆࡀࡊ ࡀࡕࡉࡀ ࡀࡄࡌࡀࡈ ࡁࡓ ࡁࡉࡆࡁࡀࡈ
ࡎࡀࡄࡓࡀ ࡅࡒࡀࡋࡀ ࡖ ࡋࡀࡒࡀࡋࡀ ࡒࡀࡓࡉࡀ ࡅࡁࡉࡔࡅࡕࡀ ࡍࡀࡐࡔࡀ
ࡁࡀࡋࡌࡀ ࡌࡔࡀࡅࡉࡀ ࡅࡌࡀࡔࡉࡈࡋࡇ ࡋࡊࡅࡋࡇ ࡊࡀࡍࡀ ࡖ ࡍࡉࡔࡌࡀࡕࡀ
ࡊࡅࡋ ࡌࡀࡍ ࡖ ࡁࡄࡀࡍࡀࡕࡇ ࡃࡀࡓࡀ ࡁࡀࡕࡓࡀࡉࡀ ࡐࡀࡉࡉࡔ ࡁࡒࡀࡋࡀ
030 ࡅࡄࡀࡉࡋࡀ ࡅࡊࡀࡋࡅࡆࡀ ࡋࡉࡀࡓࡃࡍࡀ ࡍࡉࡐࡅࡒ ࡁࡃࡓࡀࡔࡉࡀ [ࡁࡃࡓࡀࡁࡔࡉࡀ] ࡃࡓࡀࡔࡉࡀ ࡖ ࡆࡉࡅࡀ
ࡍࡉࡐࡒࡅࡍ ࡀࡋࡀࡍࡐࡇ ࡌࡍ ࡀࡕࡀࡓ ࡍࡄࡅࡓ ࡍࡀࡑࡅࡓࡀࡉࡉࡀ ࡖ ࡁࡅࡓࡆࡉࡍࡒࡀ
ࡁࡓࡉࡔࡀࡉࡄࡅࡍ ࡍࡉࡕࡉࡓࡑࡅࡍ ࡍࡉࡔࡅࡉࡋࡉࡀ ࡃࡀࡓࡉࡀ ࡅࡀࡋࡌࡉࡀ ࡊࡅࡋ
ࡌࡀࡍࡃࡀࡉࡀ ࡖ ࡁࡊࡅࡔࡈࡀ ࡍࡉࡒࡅࡌ ࡀࡍࡀ ࡌࡀࡍࡃࡀ ࡖ ࡄࡉࡉࡀ ࡏࡉࡀࡎࡉࡌ
ࡉࡀࡌࡉࡍࡀࡉ ࡏࡋࡇ ࡑࡅࡕ ࡅࡔࡅࡌࡀ ࡅࡏࡕࡀࡐࡓࡀࡔ ࡁࡄࡉࡓࡀࡉ ࡅࡎࡀࡒ
ࡁࡆࡀࡊࡅࡕࡀ ࡅࡄࡆࡅࡉࡀ ࡋࡀࡕࡀࡓ ࡍࡄࡅࡓ ࡅࡄࡉࡉࡀ ࡆࡀࡊࡉࡍ ࡏࡋ ࡊࡅࡋࡄࡅࡍ ࡏࡅࡁࡀࡃࡉࡀ
ࡎ___________________________ࡀ
ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡍࡅࡊࡓࡀࡉࡉࡀ ࡌࡍ ࡀࡋࡌࡉࡀ ࡖ ࡍࡄࡅࡓࡀ
ࡉࡀࡕࡉࡓࡉࡀ ࡖ ࡏࡋࡀࡅࡉࡀ ࡊࡅࡋࡄࡅࡍ ࡏࡅࡁࡀࡃࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡅࡄࡀࡉࡋࡀ
ࡅࡔࡓࡀࡓࡀ ࡅࡏࡌࡓࡀ ࡅࡔࡉࡌࡀ ࡍࡉࡄࡅࡉࡋࡉࡀ ࡋࡃࡉࡋࡉࡀ ࡓࡀࡌ ࡁࡀࡊࡕࡉࡀࡓ
ࡁࡓ ࡄࡀࡅࡀ ࡌࡅࡃࡀࡋࡀࡋ ࡞ ࡅࡋࡆࡀࡅࡀࡉ ࡔࡀࡃࡉࡀ ࡌࡀࡌࡀࡍࡉࡀ ࡐࡕ ࡄࡀࡅࡀ ࡞ ࡁࡄࡀࡆࡉࡍ
ࡎࡉࡃࡓࡀ ࡅࡍࡉࡍࡄࡀࡓࡋࡀࡍ ࡏࡅࡑࡓࡀࡉࡀࡍ ࡅࡌࡀࡃࡀࡍ ࡅࡌࡀࡃࡉࡄࡕࡀࡍ
ࡅࡕࡉࡕࡒࡅࡍ ࡃࡌࡅࡕࡀࡉࡀࡍ ࡅࡍࡉࡓࡅࡀࡆ ࡐࡀࡓࡑࡅࡐࡀࡉࡀࡍ ࡄࡀࡊࡀ ࡁࡕࡉࡁࡉࡋ
ࡅࡋࡄࡉࡋ ࡁࡀࡋࡌࡉࡀ ࡖ ࡍࡄࡅࡓࡀ ࡅࡍࡉࡕࡓࡉࡑ ࡔࡅࡌࡀࡉࡀࡍ ࡋࡅࡀࡕ
ࡉࡀࡅࡀࡓ ࡆࡉࡅࡀ ࡅࡋࡅࡀࡕ ࡎࡉࡌࡀࡕ ࡄࡉࡉࡀ ࡎ_______ࡀ
™ ࡞ ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡌࡔࡀࡁࡉࡕ ࡌࡀࡓࡀࡉ
ࡁࡋࡉࡁࡀ ࡃࡀࡊࡉࡀ ࡌࡀࡓࡀࡉࡄࡅࡍ ࡖ ࡊࡅࡋࡄࡅࡍ ࡀࡋࡌࡉࡀ ࡌࡔࡀࡁࡀ
ࡔࡅࡌࡀࡊ ࡌࡀࡓࡀ ࡖ ࡓࡀࡁࡅࡕࡀ ࡁࡔࡅࡌࡀ ࡅࡁࡄࡀࡉࡋࡀ ࡖ ࡌࡀࡓࡀ
ࡖ ࡓࡀࡁࡅࡕࡀ ࡌࡀࡋࡊࡀ ࡖ ࡍࡄࡅࡓࡀ ࡌࡀࡓࡀࡉࡄࡅࡍ ࡖ ࡊࡅࡋࡄࡅࡍ ࡀࡋࡌࡉࡀ
ࡆࡉࡅࡀ ࡃࡀࡊࡉࡀ ࡅࡍࡄࡅࡓࡀ ࡓࡁࡀ ࡖ ࡋࡀࡁࡀࡈࡉࡋ ࡄࡀࡉࡀࡎࡀ ࡅࡕࡀࡉࡀࡁࡀ
ࡅࡌࡓࡀࡄࡌࡀࡍࡀ ࡐࡀࡓࡅࡒࡀ ࡖ ࡊࡅࡋࡄࡅࡍ ࡌࡄࡀࡉࡌࡍࡉࡀ ࡌࡒࡀࡉࡌࡀࡍࡅࡍ
ࡖ ࡊࡅࡋࡄࡅࡍ ࡈࡀࡁࡉࡀ ࡓࡁࡀ ࡓࡀࡌࡀ ࡅࡔࡁࡉࡄࡀ ࡀࡆࡉࡆࡀ ࡅࡄࡀࡊࡉࡌࡀ
ࡅࡉࡀࡃࡅࡉࡀ ࡅࡐࡀࡓࡅࡔࡀ ࡅࡔࡀࡋࡉࡈࡀ ࡖ ࡏࡋ ࡊࡅࡋ ࡑࡁࡅ ࡌࡀࡓࡀ
ࡖ ࡏࡋࡀࡉࡉࡀ ࡅࡌࡉࡑࡀࡉࡉࡀ ࡅࡕࡉࡕࡀࡉࡉࡀ ࡅࡐࡀࡓࡑࡅࡐࡀ ࡓࡁࡀ ࡖ ࡏࡒࡀࡓࡀ
031 ࡖ ࡋࡀࡌࡉࡕࡀࡄࡆࡉࡀ ࡅࡋࡀࡌࡉࡎࡕࡀࡉࡀࡊ ࡄࡀࡉࡋࡀ ࡖ ࡋࡉࡕࡋࡇ ࡄࡀࡁࡓࡀ
ࡁࡕࡀࡂࡇ ࡅࡋࡀࡔࡅࡕࡀࡐࡀ ࡁࡔࡅࡋࡈࡀࡍࡇ ࡖ ࡕࡀࡊࡉࡋࡁࡇ ࡋࡀࡁࡀࡄࡉࡕ
ࡅࡃࡌࡔࡀࡁࡀ ࡔࡅࡌࡇ ࡁࡊࡅࡔࡈࡀ ࡋࡀࡍࡀࡐࡉࡋ ࡅࡃࡒࡀࡉࡉࡌ
ࡏࡋ ࡕࡅࡊࡋࡀࡍࡇ ࡋࡀࡌࡉࡕࡉࡔࡐࡀࡋ ࡌࡀࡓࡀ ࡖ ࡊࡅࡋࡄࡅࡍ ࡌࡀࡋࡊࡉࡀ
ࡁࡄࡀࡉࡋࡇ ࡓࡀࡌࡀ ࡅࡁࡌࡉࡌࡓࡇ ࡊࡀࡁࡉࡓࡀ ࡀࡌࡀࡓ ࡄࡅࡍ
ࡌࡀࡋࡊࡉࡀ ࡖ ࡍࡄࡅࡓࡀ ࡌࡍ ࡆࡉࡅࡇ ࡃࡀࡊࡉࡀ ࡅࡌࡍ ࡍࡄࡅࡓࡇ ࡓࡁࡀ
ࡖ ࡋࡀࡁࡀࡈࡉࡋ ࡐࡓࡅࡍ ࡅࡏࡕࡒࡀࡉࡀࡌ ࡌࡀࡋࡀࡊࡉࡀ ࡖ ࡕࡅࡔࡁࡉࡄࡕࡀ
ࡖ ࡎࡀࡊࡀ ࡅࡌࡉࡍࡉࡀࡍࡀ ࡅࡁࡅࡈࡋࡀࡍࡀ ࡋࡉࡕࡋࡅࡍ ࡊࡅࡋࡄࡅࡍ ࡁࡕࡅࡔࡁࡉࡄࡕࡀ
ࡌࡋࡉࡍ ࡅࡒࡀࡉࡌࡉࡍ ࡅࡌࡔࡀࡁࡉࡍ ࡋࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡖ ࡆࡉࡅࡇ
ࡍࡐࡉࡔ ࡌࡍ ࡌࡉࡌࡓࡀ ࡖ ࡐࡅࡌࡀ ࡅࡍࡄࡅࡓࡇ ࡊࡀࡁࡉࡓ ࡌࡍ
ࡌࡀࡌࡋࡅࡋࡉࡀ ࡁࡎࡐࡉࡄࡀࡕࡀ ࡍࡀࡄࡅࡓ ࡍࡄࡅࡓࡇ ࡅࡕࡀࡒࡅࡍ ࡆࡉࡅࡇ
ࡏࡋ ࡊࡅࡋࡄࡅࡍ ࡀࡋࡌࡉࡀ ࡋࡀࡄࡅࡀ ࡗ ࡖ ࡋࡀࡄࡅࡀ ࡅࡋࡀࡄࡀࡅࡉࡀ
ࡗ ࡖ ࡋࡀࡉࡉࡕࡀ ࡌࡀࡋࡊࡉࡀ ࡁࡆࡉࡅࡀࡉࡄࡅࡍ ࡅࡁࡍࡄࡅࡓࡀ ࡓࡁࡀ
ࡔࡓࡉࡀ ࡁࡓࡉࡄࡀ ࡁࡀࡎࡉࡌࡀ ࡖ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ
ࡖ ࡏࡄࡀࡁࡋࡅࡍ ࡁࡅࡕࡀ ࡅࡕࡅࡔࡁࡉࡄࡕࡀ ࡖ ࡔࡓࡀࡋࡅࡍ ࡁࡋࡉࡁࡀࡉࡄࡅࡍ
ࡖ ࡒࡀࡉࡌࡉࡀ ࡁࡀࡍࡀࡍࡀ ࡖ ࡍࡄࡅࡓࡀ ࡎࡀࡂࡃࡉࡀ ࡅࡌࡔࡀࡁࡉࡀ ࡋࡀࡊࡀࡐࡍࡉࡀ
ࡅࡋࡀࡑࡀࡄࡉࡀ ࡅࡄࡀࡅࡌࡀ ࡅࡁࡀࡓࡃࡀ ࡋࡉࡕࡁࡅࡍ ࡏࡋࡀࡍࡉࡀ ࡖ ࡀࡓࡒࡀ
ࡖ ࡍࡄࡅࡓࡀ ࡊࡅࡋࡄࡅࡍ ࡁࡕࡅࡔࡁࡉࡄࡕࡀ ࡌࡋࡉࡍ ࡅࡒࡀࡉࡌࡉࡀ ࡅࡌࡔࡀࡁࡉࡀ
ࡋࡌࡀࡋࡊࡀ ࡖ ࡍࡄࡅࡓࡀ ࡄࡀࡉࡀ ࡖ ࡋࡀࡅ ࡌࡀࡉࡕࡅࡉࡉࡀ ࡖ ࡄࡅࡎࡓࡀࡍࡀ
ࡋࡉࡕࡁࡅࡍ ࡕࡀࡒࡍࡀ ࡅࡌࡉࡍࡉࡄࡓࡀ ࡓࡒࡉࡄࡀ ࡖ ࡁࡂࡀࡅࡀ ࡔࡓࡉࡍ ࡀࡋࡌࡀ
ࡖ ࡒࡀࡉࡉࡌࡁࡇ ࡁࡅࡈࡋࡀࡍࡀ ࡋࡏࡕࡋࡇ ࡀࡋࡌࡀ ࡖ ࡆࡉࡅࡀ ࡅࡍࡄࡅࡓࡀ
ࡖ ࡄࡀࡁࡀࡓࡀ ࡋࡉࡕࡁࡇ ࡀࡋࡌࡀ ࡖ ࡍࡉࡄࡅࡕࡀ ࡖ ࡌࡓࡉࡃࡅࡕࡀ ࡋࡉࡕࡁࡇ
ࡀࡋࡌࡀ ࡖ ࡊࡉࡍࡅࡕࡀ ࡖ ࡔࡉࡂࡔࡀ ࡅࡈࡉࡓࡒࡀ ࡋࡉࡕࡁࡇ ࡀࡋࡌࡀ ࡖ ࡁࡅࡎࡌࡀࡍࡉࡀ
ࡖ ࡓࡉࡄࡀ ࡖ ࡎࡀࡉࡍࡀ ࡋࡉࡕࡁࡇ ࡀࡋࡌࡀ ࡖ ࡄࡉࡉࡀ ࡖ ࡋࡀࡋࡀࡌ ࡖ ࡁࡅࡈࡋࡀࡍࡀ
032 ࡋࡉࡕࡁࡇ ࡀࡋࡌࡀ ࡖ ࡌࡉࡀ ࡄࡉࡉࡀ ࡖ ࡌࡀࡋࡀࡊࡉࡀ ࡁࡓࡉࡄࡀࡉࡅࡍ ࡓࡀࡅࡆࡉࡀ
ࡀࡋࡌࡀ ࡖ ࡊࡅࡔࡈࡀ ࡅࡄࡀࡉࡌࡀࡍࡅࡕࡀ ࡖ ࡊࡀࡓࡁࡀ ࡅࡍࡉࡊࡋࡀ ࡋࡉࡕࡁࡇ ࡀࡋࡌࡀ
ࡄࡅ ࡃࡀࡊࡉࡀ ࡖ ࡏࡅࡓࡁࡀࡍࡀ ࡁࡉࡔࡀ ࡋࡉࡕࡁࡇ ࡌࡔࡀࡁࡉࡋࡇ ࡌࡀࡋࡀࡊࡉࡀ
ࡖ ࡆࡉࡅࡀ ࡋࡌࡀࡋࡊࡀ ࡖ ࡍࡄࡅࡓࡀ ࡁࡆࡉࡅࡀ ࡅࡍࡄࡅࡓࡀ ࡖ ࡏࡄࡀࡁࡋࡅࡍ ࡌࡔࡀࡁࡉࡋࡇ
ࡌࡀࡋࡀࡊࡉࡀ ࡖ ࡆࡉࡅࡀ ࡋࡌࡀࡋࡊࡀ ࡖ ࡍࡄࡅࡓࡀ ࡁࡋࡁࡅࡔࡉࡀ ࡖ ࡆࡉࡅࡀ ࡖ ࡏࡄࡀࡁࡋࡅࡍ
ࡌࡔࡀࡁࡉࡋࡇ ࡌࡀࡋࡀࡊࡉࡀ ࡖ ࡆࡉࡅࡀ ࡋࡌࡀࡋࡊࡀ ࡖ ࡍࡄࡅࡓࡀ ࡁࡈࡀࡓࡈࡀࡁࡅࡍࡉࡀ
ࡖ ࡆࡉࡅࡀ ࡖ ࡏࡄࡀࡁࡋࡅࡍ ࡌࡔࡀࡁࡉࡋࡇ ࡌࡀࡋࡀࡊࡉࡀ ࡖ ࡆࡉࡅࡀ ࡋࡌࡀࡋࡊࡀ ࡖ ࡍࡄࡅࡓࡀ
ࡁࡊࡋࡉࡋࡉࡀ ࡖ ࡆࡉࡅࡀ ࡖ ࡏࡄࡀࡁࡋࡅࡍ ࡌࡔࡀࡁࡉࡋࡇ ࡌࡀࡋࡀࡊࡉࡀ ࡖ ࡆࡉࡅࡀ ࡋࡌࡀࡋࡊࡀ
ࡖ ࡍࡄࡅࡓࡀ ࡁࡄࡀࡉࡋࡀ ࡅࡔࡓࡀࡓࡀ ࡖ ࡏࡄࡀࡁࡋࡅࡍ ࡌࡔࡀࡁࡉࡋࡇ ࡌࡀࡋࡀࡊࡉࡀ
ࡖ ࡆࡉࡅࡀ ࡋࡌࡀࡋࡊࡀ ࡖ ࡍࡄࡅࡓࡀ ࡁࡊࡅࡔࡈࡀ ࡅࡋࡀࡅࡐࡀ ࡅࡄࡀࡉࡌࡀࡍࡅࡕࡀ
ࡖ ࡏࡄࡀࡁࡋࡅࡍ ࡊࡅࡋࡄࡅࡍ ࡍࡉࡄࡉࡀ ࡅࡄࡀࡊࡉࡌࡉࡀ ࡅࡁࡀࡎࡉࡌࡉࡀ ࡅࡊࡀࡃࡁࡀ
ࡅࡍࡉࡊࡋࡀ ࡋࡉࡕࡁࡅࡍ ࡏࡋࡀࡍࡉࡀ ࡖ ࡀࡓࡒࡀ ࡖ ࡍࡄࡅࡓࡀ ࡊࡅࡋࡄࡅࡍ ࡆࡉࡅࡀ
ࡅࡕࡅࡒࡍࡀ ࡌࡋࡉࡍ ࡉࡀࡓࡃࡍࡉࡀ ࡖ ࡀࡋࡌࡉࡀ ࡖ ࡍࡄࡅࡓࡀ ࡌࡉࡀ ࡄࡉࡅࡀࡓࡉࡀ
ࡌࡋࡉࡍ ࡀࡍࡀࡍࡉࡀ ࡖ ࡍࡄࡅࡓࡀ ࡔࡊࡉࡍࡀࡕࡀ ࡖ ࡆࡉࡅࡀ ࡔࡊࡉࡍࡁࡉࡍ ࡁࡔࡊࡉࡍࡀࡕࡀ
ࡖ ࡆࡉࡅࡀ ࡌࡀࡋࡊࡉࡀ ࡎࡀࡂࡃࡉࡀ ࡅࡌࡔࡀࡁࡉࡀ ࡄࡉࡍࡅࡍ ࡅࡀࡋࡌࡉࡀ ࡊࡅࡋࡄࡅࡍ ࡌࡔࡀࡁࡉࡋࡇ
ࡋࡓࡁࡀ ࡅࡏࡋࡀࡉࡀ ࡋࡌࡀࡓࡀ ࡖ ࡓࡀࡁࡅࡕࡀ ࡖ ࡏࡋ ࡊࡅࡋࡄࡅࡍ ࡀࡋࡌࡉࡀ ࡔࡓࡉࡀ
ࡀࡍࡀ ࡄࡅ ࡔࡋࡉࡄࡀ ࡃࡀࡊࡉࡀ ࡖ ࡌࡀࡋࡊࡀ ࡖ ࡍࡄࡅࡓࡀ ࡁࡔࡅࡌࡀࡉ ࡄࡉࡁࡉࡋ
ࡆࡉࡅࡀ ࡒࡓࡀࡍ ࡗ ࡑࡁࡀ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡌࡍ ࡔࡊࡉࡍࡕࡀ
ࡖ ࡆࡉࡅࡀ ࡒࡓࡀࡍ ࡌࡍ ࡔࡊࡉࡍࡕࡀ ࡄࡀࡍࡀࡕࡇ ࡖ ࡄࡅ ࡓࡁࡀ ࡔࡊࡀࡍ
ࡋࡉࡀࡌࡉࡍࡇ ࡔࡊࡀࡍ ࡅࡀࡌࡀࡓ ࡏࡆࡉࡋ ࡋࡀࡋࡌࡀ ࡖ ࡄࡔࡅࡊࡀ ࡖ ࡊࡅࡋࡇ
ࡁࡉࡔࡅࡕࡀ ࡌࡋࡉࡀ ࡊࡅࡋࡇ ࡌࡋࡉࡀ ࡁࡉࡔࡅࡕࡀ ࡅࡌࡋࡉࡀ ࡍࡅࡓࡀ ࡀࡊࡋࡀ ࡀࡋࡌࡀ
ࡖ ࡔࡉࡂࡔࡀ ࡅࡈࡉࡓࡒࡀ ࡖ ࡕࡅࡒࡍࡀ ࡁࡂࡀࡅࡇ ࡋࡏࡊࡀ ࡀࡋࡌࡀ ࡖ ࡄࡔࡅࡊࡀ
ࡖ ࡏࡆࡁࡀ ࡖ ࡍࡄࡅࡓࡀ ࡋࡉࡕࡁࡇ ࡀࡋࡌࡀ ࡖ ࡓࡉࡃࡐࡀ ࡅࡌࡅࡕࡀ ࡖ ࡄࡉࡉࡀ
ࡋࡀࡋࡀࡌ ࡋࡉࡕࡁࡇ ࡅࡀࡌࡀࡓ ࡏࡆࡉࡋ ࡊࡁࡅࡔ ࡄࡔࡅࡊࡀ ࡅࡃࡀࡉࡀࡓࡉࡀ
033 ࡖ ࡌࡉࡍࡇ ࡏࡕࡉࡂࡁࡉࡋ ࡍࡂࡅࡃ ࡓࡒࡉࡄࡀ ࡅࡑࡀࡓࡀࡓ ࡁࡂࡀࡅࡇ ࡊࡅࡊࡁࡉࡀ
ࡅࡒࡓࡉࡀ ࡌࡀࡋࡀࡊࡉࡀ ࡖ ࡍࡅࡓࡀ ࡅࡄࡀࡁ ࡆࡉࡅࡀ ࡋࡔࡀࡌࡉࡔ ࡖ ࡄࡀࡃ
ࡌࡉࡍࡀࡉࡄࡅࡍ ࡄࡅ ࡅࡕࡅࡒࡍࡀ ࡋࡎࡉࡓࡀ ࡅࡑࡉࡄࡌࡀ ࡋࡊࡅࡊࡁࡉࡀ ࡅࡀࡎࡒࡉࡍࡅࡍ
ࡋࡏࡅࡎࡐࡓࡀ ࡖ ࡔࡅࡌࡉࡀ ࡅࡕࡉࡄࡅࡉࡀ ࡀࡓࡒࡀ ࡕࡉࡁࡉࡋ ࡅࡐࡉࡓࡉࡀ ࡏࡌࡁࡉࡀ
ࡅࡏࡋࡀࡍࡉࡀ ࡖ ࡌࡓࡀࡅࡆࡉࡁࡇ ࡁࡀࡋࡌࡀ ࡅࡍࡉࡄࡅࡍ ࡄࡀࡅࡀ ࡅࡁࡉࡓࡀ ࡅࡍࡅࡍࡉࡀ
ࡁࡉࡀࡌࡀ ࡅࡑࡉࡐࡀࡓ ࡂࡀࡃࡐࡀ ࡌࡍ ࡊࡅࡋ ࡔࡅࡓࡁࡀ ࡆࡉࡊࡓࡀ ࡅࡍࡅࡒࡁࡀࡕࡀ
ࡅࡍࡉࡄࡅࡍ ࡂࡀࡁࡓࡀ ࡅࡏࡍࡕࡀ ࡅࡍࡉࡄࡅࡉࡀ ࡔࡅࡌࡀࡉࡄࡅࡍ ࡀࡃࡀࡌ ࡅࡄࡀࡅࡀ
ࡅࡌࡍ ࡌࡀࡋࡀࡊࡉࡀ ࡖ ࡍࡅࡓࡀ ࡋࡒࡅࡃࡀࡌ ࡀࡃࡀࡌ ࡍࡉࡔࡕࡀࡁࡃࡅࡍ ࡌࡀࡍ
ࡖ ࡌࡍ ࡌࡉࡍࡉࡋࡕࡀࡊ ࡀࡁࡀࡓ ࡍࡀࡎࡕࡀࡓ ࡁࡍࡅࡓࡀ ࡖ ࡉࡀࡒࡃࡀ ࡍࡉࡕࡅࡍ
ࡕࡋࡀࡕࡀ ࡌࡀࡋࡀࡊࡉࡀ ࡅࡑࡀࡅࡕࡀ ࡋࡀࡃࡀࡌ ࡍࡉࡄࡅࡉࡋࡇ ࡍࡉࡕࡅࡍ ࡌࡉࡀ ࡄࡉࡉࡀ
ࡅࡍࡉࡓࡁࡅࡍ ࡁࡌࡉࡀ ࡕࡀࡄࡌࡉࡀ ࡁࡓࡉࡄࡀ ࡖ ࡌࡉࡀ ࡄࡉࡉࡀ ࡍࡉࡓࡅࡀࡆ ࡊࡅࡋࡇ
ࡀࡋࡌࡀ ࡍࡉࡄࡅࡍ ࡀࡓࡁࡀ ࡆࡉࡒࡉࡀ ࡖ ࡌࡍࡀࡔࡌࡉࡀ ࡏࡋ ࡀࡋࡌࡀ ࡕࡉࡄࡅࡉࡀ
ࡍࡅࡓࡀ ࡅࡕࡉࡎࡕࡀࡄࡉࡈ ࡁࡊࡅࡋࡄࡅࡍ ࡐࡀࡂࡓࡉࡀ ࡅࡐࡉࡓࡉࡀ ࡅࡏࡌࡁࡉࡀ ࡅࡏࡋࡀࡍࡉࡀ
ࡅࡕࡉࡊࡅࡋ ࡏࡊࡉࡋࡕࡀ ࡁࡀࡋࡌࡀ ࡗ ࡀࡊࡋࡀ ࡏࡊࡉࡋࡕࡀ ࡁࡀࡋࡌࡀ ࡍࡉࡔࡂࡀ
ࡅࡕࡅࡒࡍࡀ ࡖ ࡏࡉࡕ ࡁࡌࡉࡀ ࡏࡋ ࡍࡉࡔࡌࡀࡕࡀ ࡍࡉࡕࡌࡍࡉࡀ ࡔࡐࡉࡕࡀ
ࡖ ࡏࡊࡉࡋࡕࡀ ࡏࡋ ࡐࡀࡂࡓࡉࡀ ࡍࡉࡕࡌࡍࡉࡀ ࡊࡅࡋ ࡁࡀࡆࡓࡅࡍࡉࡀ ࡅࡐࡉࡒࡅࡍࡉࡀ
ࡅࡓࡉࡄࡀࡍࡉࡀ ࡅࡁࡅࡎࡌࡀࡍࡉࡀ ࡅࡏࡅࡑࡀࡍࡉࡀ ࡅࡎࡀࡌࡀࡍࡉࡀ ࡅࡄࡉࡅࡀ ࡁࡉࡓࡀ
ࡅࡑࡉࡐࡀࡓ ࡂࡀࡃࡐࡀ ࡅࡈࡀࡁࡅࡕࡀ ࡅࡊࡅࡋ ࡌࡉࡍࡃࡀࡌ ࡖ ࡈࡀࡁ ࡅࡔࡀࡐࡉࡓ
ࡍࡉࡄࡅࡉࡋࡇ ࡐࡅࡄࡋࡀࡍࡀ ࡋࡀࡃࡀࡌ ࡅࡋࡊࡅࡋࡇ ࡔࡅࡓࡁࡕࡇ ࡀࡋࡌࡀ ࡄࡀࡍࡀࡕࡇ
ࡍࡉࡍࡄࡀࡓ ࡁࡉࡀࡃ ࡐࡕࡀࡄࡉࡋ ࡀࡌࡀࡓ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡁࡌࡉࡌࡓࡇ
ࡄࡅࡀ ࡊࡅࡋ ࡌࡉࡍࡃࡀࡌ ࡁࡌࡉࡌࡓࡇ ࡅࡀࡕࡀ ࡐࡕࡀࡄࡉࡋ ࡅࡀࡓࡉࡌ ࡔࡅࡌࡉࡀ
ࡖ ࡌࡉࡀ ࡅࡍࡂࡀࡃ ࡓࡒࡉࡄࡀ ࡅࡏࡕࡌࡉࡎࡉࡀࡕ ࡀࡓࡒࡀ ࡕࡉࡁࡉࡋ ࡅࡒࡓࡉࡍࡅࡍ
ࡋࡌࡀࡋࡀࡊࡉࡀ ࡖ ࡍࡅࡓࡀ ࡅࡏࡄࡀࡁࡋࡅࡍ ࡆࡉࡅࡀ ࡋࡔࡀࡌࡉࡔ ࡅࡕࡅࡒࡍࡀ ࡋࡎࡉࡓࡀ
ࡅࡑࡉࡄࡌࡀ ࡋࡊࡅࡊࡁࡉࡀ ࡅࡀࡎࡒࡉࡍࡅࡍ ࡋࡏࡎࡐࡉࡓࡀ ࡖ ࡏࡔࡅࡌࡉࡀ ࡏࡕࡉࡍࡑࡉࡁ
034 ࡆࡉࡒࡀ ࡍࡅࡓࡀ ࡅࡌࡉࡀ ࡅࡏࡕࡉࡍࡑࡉࡁ ࡐࡉࡓࡉࡀ ࡅࡏࡌࡁࡉࡀ ࡅࡏࡋࡀࡍࡉࡀ ࡅࡎࡉࡌࡀࡍࡉࡀ
ࡅࡁࡀࡆࡓࡅࡍࡉࡀ ࡅࡓࡉࡄࡀࡍࡉࡀ ࡅࡀࡁࡀࡃ ࡄࡉࡅࡀ ࡁࡉࡓࡀ ࡅࡄࡉࡅࡀ ࡁࡀࡋࡀ ࡖ ࡊࡅࡋ
ࡂࡅࡀࡍ ࡅࡌࡍ ࡀࡒࡀࡐࡓࡀ ࡅࡎࡅࡌࡒࡀ ࡅࡔࡐࡉࡕࡀ ࡅࡃࡅࡓࡃࡉࡀ ࡖ ࡀࡍࡀࡍࡉࡀ ࡖ ࡀࡉࡁࡀ
ࡆࡉࡒࡀ ࡍࡅࡓࡀ ࡅࡌࡉࡀ ࡅࡈࡅࡄࡌࡀ ࡅࡆࡌࡀ ࡅࡌࡉࡓࡕࡀ ࡅࡓࡀࡆࡉࡀ ࡖ ࡀࡋࡌࡀ
ࡄࡀࡆࡉࡍ ࡀࡃࡀࡌ ࡅࡄࡀࡅࡀ ࡏࡕࡉࡂࡁࡉࡋ ࡁࡄࡀࡉࡋࡇ ࡖ ࡌࡀࡋࡊࡀ ࡓࡀࡌࡀ
ࡖ ࡍࡄࡅࡓࡀ ࡍࡉࡔࡉࡌࡕࡀ ࡁࡀࡃࡀࡌ ࡅࡄࡀࡅࡀ ࡍࡉࡐࡋࡀࡕ ࡗ ࡍࡐࡀࡋࡁࡅࡍ
ࡍࡉࡔࡉࡌࡕࡀ ࡁࡂࡉࡍࡀࡕ ࡏࡋࡀࡍࡉࡀ ࡄࡅࡍ ࡗ ࡄࡅࡍ ࡁࡂࡉࡍࡀࡕ
ࡏࡋࡀࡍࡉࡀ ࡌࡉࡍࡃࡀࡌ ࡋࡀࡄࡊࡅࡌ ࡅࡋࡀࡐࡓࡀࡔ ࡀࡌࡀࡓ ࡌࡀࡋࡊࡀ ࡓࡀࡌࡀ
ࡖ ࡍࡄࡅࡓࡀ ࡌࡍ ࡌࡀࡋࡀࡊࡉࡀ ࡍࡅࡓࡀ ࡋࡒࡅࡃࡀࡌ ࡀࡃࡀࡌ ࡍࡉࡔࡕࡀࡁࡃࡅࡍ
ࡍࡉࡕࡅࡍ ࡅࡍࡉࡎࡉࡂࡃࡅࡍ ࡋࡒࡅࡃࡀࡌࡇ ࡅࡋࡀࡍࡉࡔࡀࡍࡅࡍ ࡌࡍ ࡌࡉࡌࡓࡇ ࡄࡃࡀ
ࡄࡅ ࡁࡉࡔࡀ ࡖ ࡁࡉࡔࡅࡕࡀ ࡌࡉࡍࡇ ࡂࡉࡁࡋࡀࡕ ࡎࡈࡀ ࡌࡍ ࡌࡉࡍࡉࡋࡀࡕ
ࡌࡀࡓࡇ ࡅࡏࡋ ࡌࡉࡍࡉࡋࡀࡕ ࡌࡀࡓࡇ ࡋࡀࡒࡀࡌ ࡗ ࡋࡀࡒࡀࡌ ࡏࡋ ࡌࡉࡍࡉࡋࡀࡕ ࡌࡀࡓࡇ ࡁࡌࡀࡓࡊࡀࡁࡕࡇ
ࡁࡏࡅࡎࡅࡓࡀ ࡖ ࡀࡋࡀࡄࡀ ࡏࡎࡕࡀࡓ ࡀࡍࡀ ࡒࡓࡀࡍ ࡅࡐࡀࡒࡃࡀࡍ ࡌࡀࡓࡀࡉ
ࡅࡀࡌࡀࡓ ࡏࡆࡉࡋ ࡒࡓࡉࡋࡇ ࡒࡀࡋࡀ ࡔࡀࡍࡉࡀ ࡋࡀࡃࡀࡌ ࡅࡋࡄࡀࡅࡀ ࡆࡀࡅࡇ
ࡒࡀࡋࡀ ࡔࡀࡍࡉࡀ ࡋࡀࡃࡀࡌ ࡅࡄࡀࡅࡀ ࡆࡀࡅࡇ ࡒࡓࡉࡋࡅࡍ ࡅࡀࡐࡓࡉࡔࡉࡍࡅࡍ
ࡏࡋ ࡊࡅࡋ ࡑࡁࡅ ࡏࡋ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡌࡀࡓࡀࡉࡄࡅࡍ
ࡖ ࡊࡅࡋࡄࡅࡍ ࡀࡋࡌࡉࡀ ࡖ ࡄࡀࡉࡋࡇ ࡍࡐࡉࡔ ࡅࡊࡀࡁࡉࡓ ࡖ ࡎࡀࡊࡀ ࡅࡁࡅࡈࡋࡀࡍࡀ
ࡋࡉࡕࡋࡇ ࡏࡋ ࡌࡀࡋࡀࡊࡉࡀ ࡖ ࡕࡅࡔࡁࡉࡄࡕࡀ ࡖ ࡒࡀࡉࡌࡉࡀ ࡅࡌࡔࡀࡁࡉࡀ
ࡅࡋࡀࡁࡀࡈࡋࡉࡀ ࡏࡋ ࡀࡋࡌࡉࡀ ࡖ ࡍࡄࡅࡓࡀ ࡖ ࡁࡅࡈࡋࡀࡍࡀ ࡋࡉࡕࡋࡅࡍ ࡀࡐࡓࡉࡔࡀ
ࡋࡀࡃࡀࡌ ࡖ ࡍࡉࡍࡄࡀࡓ ࡋࡉࡁࡇ ࡅࡒࡀࡉࡌࡇ ࡖ ࡍࡉࡍࡄࡀࡓ ࡏࡅࡑࡓࡇ ࡄࡅࡍࡇ
ࡅࡄࡀࡍࡀࡍࡇ ࡄࡅࡉࡋࡇ ࡑࡀࡅࡕࡀ ࡀࡍࡀࡕ ࡅࡕࡓࡉࡍ ࡌࡀࡋࡀࡊࡉࡀ ࡖ ࡌࡉࡍࡀࡊ ࡍࡀࡎࡂࡅࡍ
ࡋࡀࡋࡌࡀ ࡀࡐࡓࡉࡔࡋࡇ ࡌࡀࡃࡇ ࡋࡀࡃࡀࡌ ࡅࡋࡄࡀࡅࡀ ࡆࡀࡅࡇ ࡅࡋࡔࡅࡓࡁࡀࡕࡇ
ࡅࡀࡌࡀࡓࡋࡅࡍ ࡖ ࡋࡀࡍࡉࡔࡕࡉࡐࡋࡅࡍ ࡅࡋࡀࡍࡀࡎࡈࡅࡍࡅࡍ ࡁࡉࡔࡉࡀ ࡅࡎࡀࡈࡀࡍࡀ ࡖ ࡋࡀࡌࡉࡕࡀࡊࡔࡀࡓ
ࡀࡋࡐࡉࡍࡅࡍ ࡁࡅࡕࡀ ࡅࡕࡅࡔࡁࡉࡄࡕࡀ ࡖ ࡍࡉࡒࡌࡅࡍ ࡅࡍࡉࡔࡀࡁࡅࡍ
035 ࡋࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡌࡀࡓࡀࡉࡄࡅࡍ ࡖ ࡊࡅࡋࡄࡅࡍ ࡀࡋࡌࡉࡀ ࡕࡋࡀࡕࡀ ࡆࡉࡁࡍࡉࡀ
ࡁࡉࡅࡌࡀ ࡅࡕࡓࡉࡍ ࡆࡉࡁࡍࡉࡀ ࡁࡋࡉࡋࡉࡀ ࡅࡀࡌࡀࡓࡋࡅࡍ ࡋࡂࡅࡈ ࡆࡀࡅࡀ ࡅࡏࡕࡊࡀࡍࡀࡍ
ࡌࡉࡍࡀࡉࡊࡅࡍ ࡍࡉࡕࡍࡀࡐࡀࡔ ࡀࡋࡌࡀ ࡗ ࡋࡅࡀࡕ ࡆࡀࡅࡀࡉࡊࡅࡍ ࡒࡀࡓࡁࡉࡕࡅࡍ ࡎࡅࡍ
ࡌࡉࡀ ࡅࡃࡀࡊࡅࡍ ࡍࡀࡐࡔࡀࡉࡊࡅࡍ ࡋࡀࡕࡉࡂࡉࡓࡅࡍ ࡅࡋࡀࡕࡉࡂࡉࡍࡁࡅࡍ ࡅࡋࡀࡕࡉࡂࡈࡋࡅࡍ
ࡁࡍࡀࡕ ࡀࡍࡀࡔࡀ ࡔࡀࡋࡌࡀࡍࡉࡀ ࡅࡌࡄࡀࡉࡌࡍࡉࡀ ࡉࡀ ࡔࡀࡋࡌࡀࡍࡉࡀ ࡅࡌࡄࡀࡉࡌࡍࡉࡀ
ࡋࡀࡕࡉࡐࡊࡅࡍ ࡌࡍ ࡌࡀࡌࡋࡀࡋࡊࡅࡍ ࡅࡀࡅࡋࡀ ࡅࡊࡀࡃࡁࡀ ࡋࡀࡕࡉࡓࡉࡄࡌࡅࡍ
ࡋࡀࡕࡉࡓࡉࡄࡌࡅࡍ ࡃࡀࡄࡁࡀ ࡅࡊࡀࡎࡐࡀ ࡅࡒࡉࡍࡉࡀࡍࡀ ࡖ ࡀࡋࡌࡀ ࡄࡀࡆࡉࡍ ࡀࡌࡉࡍࡈࡅࡋ ࡖ ࡀࡋࡌࡀ
ࡄࡀࡆࡉࡍ ࡁࡀࡈࡉࡋ ࡅࡒࡉࡍࡉࡀࡍࡇ ࡀࡅࡉࡃ ࡋࡀࡕࡉࡎࡉࡂࡃࡅࡍ ࡋࡎࡀࡈࡀࡍࡀ ࡅࡋࡐࡀࡕࡉࡊࡓࡉࡀ
ࡖ ࡄࡉࡍࡅࡍ ࡀࡁࡃࡀࡉࡊࡅࡍ ࡍࡉࡄࡅࡍ ࡅࡍࡉࡔࡕࡌࡅࡁࡇ ࡁࡀࡋࡌࡀ ࡖ ࡌࡀࡍ
ࡖ ࡎࡀࡂࡉࡃ ࡋࡎࡀࡈࡀࡍࡀ ࡍࡉࡌࡑࡀࡓ ࡁࡍࡅࡓࡀ ࡖ ࡉࡀࡒࡃࡀ ࡀࡋࡌࡀ ࡋࡉࡅࡌࡀ
ࡉࡅࡌ ࡃࡉࡍࡀ ࡅࡀࡋࡌࡀ ࡋࡔࡉࡕࡀ ࡔࡀࡉࡉࡀ ࡖ ࡐࡅࡓࡒࡀࡍࡀ ࡀࡋࡌࡀ ࡖ ࡑࡀࡁࡉࡀ
ࡌࡀࡋࡊࡀ ࡖ ࡍࡄࡅࡓࡀ ࡃࡀࡉࡀࡍࡀ ࡖ ࡃࡀࡉࡉࡍࡋࡇ ࡋࡊࡅࡋࡇ ࡀࡋࡌࡀ ࡃࡀࡉࡉࡍࡋࡉࡍ
ࡋࡍࡉࡔࡌࡀࡕࡀ ࡊࡅࡋ ࡏࡍࡉࡔ ࡗ ࡏࡅࡁࡀࡃࡉࡀ ࡖ ࡀࡁࡀࡃ ࡋࡀࡕࡉࡋࡐࡅࡍ ࡄࡀࡓࡔࡉࡀ
ࡖ ࡎࡀࡈࡀࡍࡀ ࡅࡎࡀࡄࡃࡅࡕࡀ ࡖ ࡊࡀࡃࡁࡀ ࡋࡀࡕࡉࡎࡉࡄࡃࡅࡍ ࡗ ࡃࡉࡍࡀ ࡃࡀࡉࡍࡉࡕࡅࡍ
ࡍࡉࡕࡅࡍ ࡎࡀࡄࡃࡉࡀ ࡖ ࡊࡅࡔࡈࡀ ࡅࡍࡉࡎࡉࡄࡃࡅࡍ ࡗ ࡌࡎࡀࡄࡃࡉࡀ ࡀࡍࡀࡔࡉࡀ
ࡌࡄࡀࡉࡌࡍࡉࡀ ࡍࡉࡎࡉࡄࡃࡅࡍ ࡕࡅࡓࡑࡅࡉࡀ ࡋࡃࡉࡍࡀ ࡅࡋࡀࡕࡉࡐࡊࡅࡍ ࡋࡀࡕࡉࡄࡅࡍ ࡍࡀࡎࡁࡉࡀ
ࡔࡅࡃࡀ ࡅࡃࡉࡍࡀ ࡋࡀࡕࡉࡐࡊࡅࡍ ࡊࡅࡋ ࡌࡀࡍ ࡖ ࡀࡐࡉࡊ ࡃࡉࡍࡀ ࡍࡀࡐࡉࡋ ࡁࡍࡅࡓࡀ
ࡖ ࡉࡀࡒࡃࡀ ࡋࡀࡕࡉࡌࡉࡎࡓࡅࡍ ࡀࡁࡃࡉࡀ ࡊࡔࡉࡓࡉࡀ ࡁࡉࡀࡃ ࡌࡀࡓࡀࡉࡄࡅࡍ ࡄࡀࡁ
ࡆࡉࡃࡒࡀ ࡋࡀࡍࡉࡉࡀ ࡅࡗ ࡉࡀࡄࡁࡉࡕࡅࡍ ࡋࡀࡕࡉࡎࡉࡄࡃࡅࡍ ࡏࡅ ࡉࡀࡄࡁࡉࡕࡅࡍ
ࡁࡉࡀࡌࡉࡍࡀࡉࡊࡅࡍ ࡋࡎࡌࡀࡋࡀࡉࡊࡅࡍ ࡋࡀࡕࡉࡌࡓࡅࡍ ࡏࡅ ࡉࡀࡄࡁࡉࡕࡅࡍ ࡁࡉࡎࡌࡀࡋࡀࡉࡊࡅࡍ
ࡋࡉࡀࡌࡉࡍࡀࡉࡊࡅࡍ ࡋࡀࡕࡉࡌࡓࡅࡍ ࡌࡀࡍ ࡖ ࡉࡀࡄࡉࡁ ࡆࡉࡃࡒࡀ ࡅࡌࡎࡀࡄࡉࡃ
ࡌࡉࡊࡐࡀࡓ ࡌࡉࡍࡇ ࡅࡋࡀࡌࡉࡕࡄࡔࡉࡁࡋࡇ ࡀࡅࡒࡀࡓ ࡀࡁࡀ ࡅࡏࡌࡀ ࡅࡀࡄࡉࡀ
ࡒࡀࡔࡉࡔࡉࡀ ࡀࡊࡅࡀࡕ ࡀࡁࡀ ࡁࡓࡀ ࡖ ࡌࡀࡔࡉࡈ ࡀࡁࡀ ࡅࡏࡌࡀ ࡁࡉࡕ
ࡃࡉࡍࡀ ࡌࡉࡕࡄࡀࡉࡀࡁ ࡓࡉࡔࡀࡉࡊࡅࡍ ࡋࡀࡕࡉࡊࡉࡁࡔࡅࡍ ࡋࡎࡀࡈࡀࡍࡀ ࡅࡀࡉࡍࡀࡉࡊࡅࡍ
036 ࡓࡉࡌࡆࡀ ࡋࡀࡍࡉࡓࡉࡌࡆࡀ ࡅࡏࡅࡃࡍࡀࡉࡊࡅࡍ ࡋࡀࡍࡉࡑࡅࡕࡀ ࡁࡉࡔࡅࡕࡀ ࡅࡋࡉࡁࡀࡉࡊࡅࡍ
ࡋࡀࡍࡉࡋࡂࡅࡈ ࡒࡉࡍࡀ ࡌࡀࡍ ࡖ ࡋࡀࡂࡉࡈ ࡒࡉࡍࡀ ࡔࡀࡋࡌࡀࡍࡀ ࡋࡀࡌࡉࡕࡉࡒࡓࡉࡀ
ࡋࡀࡕࡉࡄࡆࡅࡍ ࡅࡋࡀࡕࡉࡂࡉࡓࡅࡍ ࡅࡋࡀࡕࡉࡁࡅࡍ ࡌࡉࡍࡃࡀࡌ ࡖ ࡋࡀࡅ ࡃࡉࡋࡊࡅࡍ ࡄࡅ ࡄࡉࡍ
ࡉࡀࡄࡉࡁࡋࡊࡅࡍ ࡌࡀࡓࡀࡉࡊࡅࡍ ࡄࡉࡍࡏࡋࡀ ࡏࡋࡇ ࡋࡀࡕࡉࡊࡀࡃࡔࡅࡍ ࡀࡌࡉࡍࡈࡅࡋ
ࡖ ࡁࡑࡅࡁࡉࡀࡍࡇ ࡖ ࡌࡀࡓࡀࡉࡊࡅࡍ ࡊࡅࡋ ࡌࡉࡍࡃࡀࡌ ࡖ ࡈࡀࡁࡅࡕࡀ ࡊࡕࡀࡁ ࡅࡏࡄࡀࡁࡋࡊࡅࡍ
ࡗ ࡁࡉࡔࡅࡕࡀ ࡌࡀࡈࡉࡀࡋࡊࡅࡍ ࡀࡔࡀࡓ ࡁࡄࡀࡉࡌࡀࡍࡅࡕࡀ ࡒࡅࡌ ࡋࡀࡕࡉࡐࡊࡅࡍ
ࡅࡋࡀࡕࡉࡔࡀࡍࡅࡍ ࡅࡋࡀࡕࡉࡔࡉࡐࡋࡅࡍ ࡁࡅࡓࡊࡀࡉࡊࡅࡍ ࡋࡎࡀࡈࡀࡍࡀ ࡍࡀࡐࡋࡀ ࡊࡅࡋ ࡌࡀࡍ
ࡖ ࡋࡎࡀࡈࡀࡍࡀ ࡎࡀࡂࡉࡃ ࡓࡄࡅࡒ ࡌࡉࡍࡇ ࡅࡋࡀࡕࡉࡄࡅࡉࡋࡇ ࡓࡀࡄࡌࡀ ࡄࡉࡍ
ࡔࡀࡌࡀ ࡅࡌࡉࡕࡄࡀࡉࡌࡀࡍ ࡅࡎࡀࡄࡉࡃ ࡁࡄࡀࡃ ࡌࡀࡓࡀࡉࡄࡅࡍ ࡖ ࡊࡅࡋࡄࡅࡍ
ࡀࡋࡌࡉࡀ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡖ ࡌࡍ ࡍࡀࡐࡔࡀ ࡄࡅࡀ ࡓࡅࡄࡌࡅࡉࡀ
ࡅࡋࡅࡀࡕࡀࡉࡊࡅࡍ ࡒࡀࡓࡁࡅࡉࡀ ࡅࡌࡍ ࡖ ࡏࡕࡋࡀࡉࡊࡅࡍ ࡀࡅࡈࡉࡐ ࡏࡋࡇ ࡄࡉࡍ
ࡋࡀࡔࡀࡌࡀ ࡅࡋࡀࡎࡀࡄࡉࡃ ࡅࡋࡀࡌࡉࡕࡄࡀࡉࡌࡀࡍ ࡁࡄࡀࡈࡀࡉࡉࡀ ࡍࡉࡔࡕࡀࡉࡀࡋ
ࡀࡌࡉࡍࡈࡅࡋ ࡖ ࡊࡅࡋ ࡌࡀࡍ ࡖ ࡁࡉࡀࡍࡒࡅࡕࡇ ࡄࡀࡈࡉࡀ ࡅࡌࡀࡎࡊࡉࡋ ࡅࡄࡀࡉࡆࡀࡊ
ࡕࡀࡉࡉࡁ ࡏࡋ ࡍࡀࡐࡔࡀ ࡕࡅࡌ ࡋࡀࡄࡀࡈࡉࡀ ࡅࡋࡀࡌࡀࡎࡊࡉࡋ ࡕࡉࡀࡁࡅࡕࡀ
ࡖ ࡌࡀࡓࡇ ࡄࡀࡅࡉࡀ ࡏࡋࡇ ࡄࡅ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡕࡀࡉࡀࡁࡀ
ࡅࡌࡓࡀࡄࡌࡀࡍࡀ ࡄࡅ ࡔࡀࡁࡉࡒ ࡄࡀࡈࡀࡉࡉࡀ ࡅࡄࡀࡅࡁࡉࡀ ࡄࡅ ࡊࡅࡋ
ࡌࡀࡍ ࡖ ࡉࡀࡄࡉࡁ ࡆࡉࡃࡒࡀ ࡅࡈࡀࡁࡅࡕࡀ ࡍࡀࡐࡔࡀ ࡅࡄࡀࡉࡆࡀࡊ ࡊࡀࡐࡀࡓ
ࡌࡍ ࡆࡉࡃࡒࡇ ࡍࡀࡐࡉࡋ ࡁࡉࡀࡒࡃࡍࡀ ࡀࡋࡌࡀ ࡖ ࡄࡀࡈࡀࡉࡉࡀ ࡔࡀࡋࡌࡉࡀ
ࡄࡀࡆࡉࡕࡅࡍ ࡌࡀࡍ ࡖ ࡊࡐࡉࡍ ࡎࡀࡁࡅࡉࡀ ࡅࡌࡀࡍ ࡖ ࡑࡄࡉࡀ ࡀࡔࡒࡅࡉࡀ
ࡅࡄࡀࡆࡉࡕࡅࡍ ࡀࡓࡈࡉࡋࡀࡍࡀ ࡎࡅࡌࡅࡋࡇ ࡁࡑࡀࡅࡓࡇ ࡏࡅࡑࡈࡋࡀ ࡅࡊࡀࡎࡉࡅࡉࡀ
ࡅࡄࡀࡆࡉࡕࡅࡍ ࡁࡓ ࡔࡉࡁࡉࡀ ࡖ ࡌࡄࡀࡉࡌࡀࡍ ࡅࡌࡆࡀࡃࡀࡒ ࡄࡀࡁ ࡐࡓࡅࡒࡀ
ࡅࡐࡀࡓࡒࡅࡉࡀ ࡋࡀࡅ ࡁࡃࡀࡄࡁࡀ ࡅࡋࡀࡅ ࡁࡊࡀࡎࡐࡀ ࡔࡉࡁࡉࡀ ࡕࡉࡐࡀࡓࡒࡅࡍ
ࡅࡕࡉࡔࡀࡅࡆࡁࡅࡍ ࡄࡉࡍࡏࡋࡀ ࡁࡌࡉࡌࡓࡀ ࡃࡀࡊࡉࡀ ࡅࡄࡀࡉࡌࡀࡍࡅࡕࡀ ࡔࡉࡁࡉࡀ
ࡕࡉࡐࡀࡓࡒࡅࡍ ࡅࡕࡉࡔࡀࡅࡆࡁࡅࡍ ࡌࡍ ࡄࡔࡅࡊࡀ ࡋࡍࡄࡅࡓࡀ ࡅࡌࡍ ࡁࡉࡔࡀ
037 ࡋࡈࡀࡁࡀ ࡅࡌࡍ ࡊࡀࡐࡅࡓࡉࡀ ࡋࡅࡀࡕ ࡌࡄࡀࡉࡌࡍࡉࡀ ࡅࡌࡍ ࡈࡏࡉࡀ ࡋࡔࡓࡀࡓࡀ
ࡅࡌࡍ ࡎࡉࡈࡉࡀ ࡅࡌࡓࡉࡃࡅࡕࡀ ࡋࡕࡅࡔࡁࡉࡄࡕࡀ ࡖ ࡌࡀࡓࡀࡉࡊࡅࡍ ࡖ ࡎࡀࡊࡀ
ࡅࡌࡉࡍࡉࡀࡍࡀ ࡅࡁࡅࡈࡋࡀࡍࡀ ࡋࡉࡕࡋࡇ ࡌࡀࡍ ࡍࡉࡐࡀࡓࡉࡒ ࡍࡉࡔࡌࡀࡕࡀ ࡅࡌࡍ
ࡖ ࡌࡀࡃࡓࡉࡊ ࡃࡉࡓࡊࡉࡀ ࡖ ࡊࡅࡔࡈࡀ ࡅࡄࡀࡉࡌࡀࡍࡅࡕࡀ ࡍࡀࡃࡓࡉࡊࡅࡋࡀ ࡃࡉࡓࡊࡀ ࡖ ࡊࡅࡔࡈࡀ
ࡅࡄࡀࡉࡌࡀࡍࡅࡕࡀ ࡅࡍࡏࡎࡀࡒ ࡁࡔࡁࡉࡋࡀ ࡖ ࡌࡄࡀࡉࡌࡍࡉࡀ ࡊࡅࡋ ࡌࡀࡍ
ࡖ ࡁࡓࡀࡄࡌࡅࡕ ࡌࡀࡓࡇ ࡐࡀࡂࡓࡇ ࡋࡂࡉࡈࡋࡇ ࡍࡀࡔࡋࡉࡌ ࡀࡃࡉࡍࡒࡉࡀ
ࡄࡀࡈࡀࡉࡉࡀ ࡅࡄࡀࡅࡁࡉࡀ ࡍࡏࡎࡀࡒ ࡍࡉࡄࡉࡆࡉࡀ ࡋࡀࡕࡓࡀ ࡓࡁࡀ ࡖ ࡍࡄࡅࡓࡀ
ࡊࡅࡋ ࡌࡀࡍ ࡖ ࡃࡀࡄࡁࡀ ࡅࡊࡀࡎࡐࡀ ࡅࡒࡉࡍࡉࡀࡍࡀ ࡖ ࡀࡋࡌࡀ ࡄࡀࡆࡉࡍ ࡍࡉࡓࡄࡅࡌ
ࡅࡍࡉࡋࡂࡅࡈ ࡍࡉࡂࡈࡉࡋ ࡅࡍࡀࡐࡉࡋ ࡁࡍࡅࡓࡀ ࡖ ࡉࡀࡒࡃࡀ ࡏࡋ ࡌࡉࡒࡌࡀࡉࡊࡅࡍ
ࡅࡏࡋ ࡌࡉࡕࡁࡀࡉࡊࡅࡍ ࡅࡏࡋ ࡌࡉࡊࡋࡀࡉࡊࡅࡍ ࡅࡏࡋ ࡌࡉࡔࡕࡉࡀࡉࡊࡅࡍ ࡅࡏࡋ
ࡌࡉࡆࡋࡀࡉࡊࡅࡍ ࡅࡏࡋ ࡌࡉࡕࡉࡀࡉࡊࡅࡍ ࡅࡏࡋ ࡌࡉࡔࡋࡀࡉࡊࡅࡍ ࡅࡏࡋ ࡌࡉࡔࡉࡊࡁࡀࡉࡊࡅࡍ
ࡅࡏࡋ ࡊࡅࡋࡄࡉࡍ ࡏࡁࡉࡃࡀࡕࡀ ࡖ ࡀࡁࡃࡉࡕࡅࡍ ࡀࡃࡊࡀࡓ ࡅࡔࡀࡁࡀ ࡔࡅࡌࡇ
ࡖ ࡌࡀࡓࡀࡉࡊࡅࡍ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡌࡀࡓࡀࡉࡄࡅࡍ ࡖ ࡊࡅࡋࡄࡅࡍ ࡀࡋࡌࡉࡀ
ࡐࡀࡓࡅࡍ ࡉࡀࡓࡃࡍࡀ ࡅࡏࡑࡈࡁࡀ ࡑࡁࡀ ࡍࡉࡔࡌࡀࡕࡊࡅࡍ ࡅࡔࡀࡁࡀ ࡏࡋ
ࡐࡉࡄࡕࡀ ࡅࡀࡊࡅࡋ ࡅࡔࡀࡁࡀ ࡏࡋ ࡌࡀࡌࡁࡅࡄࡀ ࡅࡔࡕࡅࡍ ࡅࡁࡓࡅࡊ ࡏࡋ
ࡌࡉࡔࡀ ࡅࡀࡃࡅࡍ ࡗ ࡌࡉࡔࡕࡓࡉࡀ ࡍࡉࡔࡌࡀ ࡌࡍ ࡐࡀࡂࡓࡀ ࡅࡍࡀࡐࡉࡒ
ࡏࡋࡇ ࡋࡀࡕࡉࡁࡊࡅࡍ ࡅࡏࡁࡋࡉࡀ ࡅࡌࡀࡋࡉࡀ ࡏࡋࡇ ࡋࡀࡕࡉࡋࡉࡂࡈࡅࡍ ࡅࡋࡄࡀࡌࡀ ࡖ ࡂࡉࡁࡉࡀ
ࡏࡋࡇ ࡋࡀࡕࡉࡊࡋࡅࡍ ࡊࡅࡋ ࡌࡀࡍ ࡖ ࡏࡋ ࡍࡉࡔࡌࡀ ࡁࡀࡊࡉࡀ ࡉࡀࡌࡀࡌࡉࡀ
ࡅࡆࡀࡁࡉࡀ ࡐࡀࡎࡒࡉࡋࡇ ࡖ ࡋࡁࡅࡔࡉࡀ ࡏࡋࡇ ࡑࡀࡓࡉࡀ ࡄࡀࡅࡉࡋࡇ ࡌࡅࡌࡀ
ࡁࡏࡑࡈࡋࡇ ࡖ ࡌࡀࡍࡆࡉࡀ ࡏࡋࡇ ࡍࡉࡔࡌࡅࡈ ࡍࡉࡒࡌࡅࡍࡀ ࡁࡈࡅࡓࡀ ࡄࡀࡔࡊࡀ
ࡗ ࡍࡀࡐࡉࡒ ࡍࡉࡔࡌࡀ ࡌࡍ ࡁࡉࡍࡀࡕࡀࡉࡊࡅࡍ ࡀࡔࡌࡅࡍࡅࡍ ࡋࡀࡍࡀࡔࡉࡀ
ࡃࡓࡀࡔࡉࡀ ࡅࡎࡉࡃࡓࡉࡀ ࡅࡀࡐࡓࡉࡔࡅࡍࡅࡍ ࡖ ࡋࡀࡍࡉࡊࡔࡉࡋ ࡋࡉࡁࡀࡉࡄࡅࡍ ࡄࡀࡁ
ࡏࡋࡇ ࡆࡉࡃࡒࡀ ࡅࡓࡌࡅࡍ ࡏࡋࡇ ࡋࡄࡀࡌࡀ ࡅࡒࡓࡅࡍ ࡏࡋࡇ ࡌࡀࡎࡒࡀࡕࡀ ࡅࡁࡅࡍ
ࡏࡋࡇ ࡁࡅࡕࡀ ࡅࡕࡅࡔࡁࡉࡄࡕࡀ ࡅࡃࡓࡀࡔࡉࡀ ࡅࡎࡉࡃࡓࡉࡀ ࡏࡋࡇ ࡀࡋࡁࡉࡔ ࡋࡁࡅࡔࡉࡀ
038 ࡅࡊࡀࡎࡅࡍ ࡊࡎࡅࡉࡉࡀ ࡅࡐࡓࡅࡒ ࡐࡓࡅࡒࡉࡀ ࡅࡁࡅࡍ ࡓࡀࡄࡌࡉࡀ ࡖ ࡄࡅ ࡓࡁࡀ
ࡁࡓࡀࡄࡌࡉࡀ ࡌࡉࡕࡌࡋࡉࡀ ࡏࡋࡇ ࡉࡀ ࡔࡀࡋࡌࡀࡍࡉࡀ ࡅࡌࡄࡀࡉࡌࡍࡉࡀ ࡄࡀࡁ
ࡀࡂࡓࡀ ࡖ ࡏࡂࡉࡓࡀ ࡅࡗ ࡁࡀࡉࡉࡀ ࡌࡉࡍࡀࡉࡊࡅࡍ ࡀࡂࡓࡀ ࡋࡅࡀࡕࡀࡉࡊࡅࡍ ࡋࡀࡍࡉࡐࡅࡔ
ࡉࡀ ࡔࡀࡋࡌࡀࡍࡉࡀ ࡁࡌࡉࡍࡉࡋࡀࡕ ࡌࡀࡓࡀࡉࡊࡅࡍ ࡌࡍ ࡔࡅࡕࡀࡐࡀ ࡋࡀࡕࡉࡂࡉࡆࡋࡅࡍ
ࡊࡅࡋ ࡌࡀࡍ ࡖ ࡂࡀࡆࡉࡋ ࡌࡍ ࡄࡀࡁࡓࡇ ࡌࡉࡂࡆࡉࡋ ࡌࡍ ࡈࡀࡁࡀࡅࡀࡕࡀ
ࡖ ࡀࡋࡌࡉࡀ ࡖ ࡍࡄࡅࡓࡀ ࡅࡗ ࡀࡌࡓࡉࡕࡅࡍ ࡌࡀࡌࡋࡀ ࡌࡉࡍࡇ ࡋࡀࡕࡉࡐࡊࡅࡍ ࡐࡔࡅࡈ
ࡉࡀࡌࡉࡍࡀ ࡁࡊࡅࡔࡈࡀ ࡌࡍ ࡄࡃࡀࡃࡉࡀ ࡅࡌࡍ ࡉࡀࡌࡉࡍࡀࡉࡊࡅࡍ ࡋࡀࡕࡉࡐࡊࡅࡍ
ࡀࡌࡉࡍࡈࡅࡋ ࡌࡍ ࡆࡉࡅࡀ ࡍࡀࡐࡔࡀ ࡅࡌࡍ ࡍࡄࡅࡓࡀ ࡊࡀࡁࡉࡓࡀ ࡐࡀࡒࡀࡃࡕࡀ
ࡅࡆࡀࡄࡀࡓࡕࡀ ࡅࡊࡅࡔࡈࡀ ࡖ ࡌࡍ ࡓࡁࡉࡀ ࡀࡕࡀ ࡀࡕࡀࡋࡉࡍ ࡋࡀࡅࡐࡀ ࡋࡔࡊࡉࡍࡀࡕࡀ
ࡅࡌࡀࡋࡀࡊࡉࡀ ࡖ ࡍࡄࡅࡓࡀ ࡊࡅࡋࡄࡅࡍ ࡄࡉࡍࡅࡍ ࡊࡅࡔࡈࡀ ࡋࡄࡃࡀࡃࡉࡀ ࡉࡀࡄࡁࡉࡀ
ࡅࡉࡀࡌࡉࡍࡅࡍ ࡍࡀࡔࡒࡉࡀ ࡗ ࡌࡀࡌࡋࡀ ࡈࡀࡁࡉࡀ ࡀࡌࡓࡉࡕࡅࡍ ࡅࡉࡀࡌࡉࡍࡀ
ࡌࡍ ࡄࡃࡀࡃࡉࡀ ࡐࡀࡔࡈࡉࡕࡅࡍ ࡌࡉࡍࡇ ࡋࡀࡕࡉࡐࡊࡅࡍ ࡄࡅࡍ ࡌࡉࡊࡉࡀ
ࡍࡉࡄࡉࡀ ࡅࡌࡊࡉࡊࡉࡀ ࡋࡅࡀࡕ ࡌࡀࡋࡐࡀࡍࡉࡀ ࡊࡉࡍࡉࡀ ࡖ ࡄࡅࡊࡅࡌࡕࡀ ࡅࡔࡓࡀࡓࡀ
ࡌࡀࡋࡐࡉࡋࡊࡅࡍ ࡋࡀࡕࡉࡍࡉࡎࡁࡅࡍ ࡓࡁࡅࡕࡀ ࡏࡋࡀࡅࡀࡉࡄࡅࡍ ࡏࡋ ࡔࡀࡋࡉࡈࡉࡀ
ࡖ ࡌࡀࡓࡀࡉࡊࡅࡍ ࡐࡀࡒࡉࡃ ࡏࡋࡀࡅࡀࡉࡊࡅࡍ ࡄࡉࡍ ࡍࡀࡎࡁࡉࡕࡅࡍ ࡓࡁࡅࡕࡀ ࡌࡍ ࡌࡉࡍࡉࡋࡀࡕ
ࡌࡀࡓࡀࡉࡊࡅࡍ ࡊࡀࡐࡓࡉࡕࡅࡍ ࡅࡁࡀࡔࡋࡉࡕࡅࡍ ࡁࡍࡅࡓࡀ ࡖ ࡉࡀࡒࡃࡀ ࡋࡀࡕࡉࡆࡋࡅࡍ
ࡋࡅࡀࡕ ࡊࡀࡑࡅࡌࡉࡀ ࡅࡊࡀࡋࡃࡀࡉࡉࡀ ࡖ ࡊࡀࡃࡁࡀ ࡀࡌࡉࡍࡈࡅࡋ ࡖ ࡊࡀࡑࡅࡌࡉࡀ ࡅࡊࡀࡋࡃࡀࡉࡉࡀ
ࡁࡄࡔࡅࡊࡀ ࡌࡉࡔࡕࡉࡊࡍࡉࡀ ࡋࡀࡕࡉࡌࡅࡍ ࡏࡅࡌࡀࡌࡀࡕࡀ ࡖ ࡊࡀࡃࡁࡀ ࡀࡌࡉࡍࡈࡅࡋ
ࡊࡅࡋ ࡌࡀࡍ ࡖ ࡉࡀࡌࡉࡀ ࡁࡊࡀࡃࡁࡀ ࡁࡄࡔࡅࡊࡀ ࡌࡉࡔࡕࡊࡉࡍ ࡋࡀࡕࡉࡊࡋࡅࡍ
ࡅࡄࡉࡅࡀࡍࡉࡀࡕࡀ ࡋࡀࡃࡌࡀࡉࡕࡀ ࡅࡋࡀࡃࡒࡀࡉࡌࡀ ࡅࡋࡀࡃࡍࡀࡐࡋࡀ ࡅࡋࡀࡃࡁࡀࡈࡍࡀ ࡅࡋࡀࡃࡍࡀࡐࡉࡋ
ࡄࡉࡅࡀ ࡁࡀࡋࡀ ࡏࡋࡇ ࡋࡀࡕࡉࡊࡋࡅࡍ ࡀࡊࡅࡋ ࡌࡍ ࡁࡎࡀࡓ ࡖ ࡄࡉࡅࡀࡍࡉࡀࡕࡀ ࡖ ࡌࡍ ࡐࡉࡓࡉࡀ
ࡖ ࡌࡉࡀ ࡏࡕࡒࡓࡅࡍ ࡌࡍࡀ ࡍࡄࡅࡓࡀ ࡏࡋ ࡍࡄࡅࡓࡀ ࡅࡌࡍࡀ ࡄࡔࡅࡊࡀ ࡏࡋ
ࡄࡔࡅࡊࡀ ࡍࡉࡕࡉࡌࡍࡉࡀ ࡅࡃࡋࡀࡃࡉࡀ ࡐࡀࡓࡆࡋࡀ ࡏࡋࡀ ࡋࡀࡕࡉࡊࡋࡅࡍ ࡋࡀࡕࡉࡊࡋࡅࡍ ࡄࡁࡅࡋࡉࡀ ࡄࡁࡅࡋ
ࡄࡁࡅࡋࡉࡀ ࡖ ࡃࡀࡄࡁࡀ ࡅࡊࡀࡎࡐࡀ ࡅࡋࡅࡉࡕࡉࡐࡋࡅࡍ ࡁࡉࡀࡌࡀ ࡀࡊࡋࡀ ࡋࡀࡕࡉࡆࡍࡅࡍ
039 ࡅࡋࡀࡕࡉࡆࡉࡌࡓࡅࡍ ࡅࡋࡀࡕࡉࡓࡉࡒࡃࡅࡍ ࡅࡋࡀࡍࡉࡔࡕࡁࡉࡀ ࡋࡉࡁࡀࡉࡊࡅࡍ ࡏࡋ ࡆࡌࡀࡓࡀ
ࡖ ࡎࡀࡈࡀࡍࡀ ࡆࡌࡀࡓ ࡖ ࡊࡅࡋࡇ ࡄࡀࡓࡔࡉࡀ ࡅࡆࡉࡐࡀ ࡌࡋࡉࡀ ࡀࡐࡉࡊ ࡋࡋࡉࡁࡉࡀ
ࡖ ࡌࡄࡀࡉࡌࡍࡉࡀ ࡓࡄࡅࡌ ࡅࡆࡁࡀࡓ ࡄࡃࡀࡃࡉࡀ ࡅࡏࡆࡃࡀࡓࡀࡆ ࡁࡄࡅࡊࡅࡌࡀࡕ
ࡔࡓࡀࡓࡀ ࡖ ࡌࡀࡓࡀࡉࡊࡅࡍ ࡅࡀࡔࡀࡓ ࡅࡒࡅࡌࡁࡇ ࡁࡀࡋࡌࡀ ࡅࡎࡁࡅࡋࡁࡇ
ࡀࡋࡌࡀ ࡖ ࡊࡉࡋࡀࡉࡊࡅࡍ ࡔࡀࡋࡉࡌ ࡄࡅࡍ ࡀࡃࡉࡀࡅࡓࡀ ࡅࡎࡉࡌࡀࡊࡀ ࡋࡔࡀࡋࡌࡀࡍࡉࡀ
ࡖ ࡓࡉࡃࡐࡀ ࡌࡀࡈࡉࡋࡄࡅࡍ ࡋࡀࡍࡉࡄࡅࡉࡀ ࡁࡉࡍࡀࡕࡀࡉࡊࡅࡍ ࡎࡉࡍࡀ ࡒࡉࡍࡀ ࡅࡐࡋࡅࡂࡉࡀ
ࡗ ࡁࡆࡉࡃࡀࡍࡅࡕࡀ ࡅࡌࡓࡀࡓࡀ ࡓࡀࡄࡕࡀ ࡋࡉࡁࡀࡉࡊࡅࡍ ࡀࡍࡄࡅࡉࡀ ࡅࡌࡀࡊࡉࡊ
ࡋࡉࡁࡀࡉࡊࡅࡍ ࡁࡌࡉࡍࡉࡋࡀࡕ ࡔࡓࡀࡓࡀ ࡖ ࡌࡀࡓࡀࡉࡊࡅࡍ ࡀࡌࡉࡍࡈࡅࡋ ࡖ ࡓࡅࡉࡀࡍࡉࡀ
ࡖ ࡌࡉࡆࡃࡀࡉࡍࡉࡀ ࡌࡍ ࡆࡉࡃࡀ ࡅࡆࡉࡄࡉࡓࡇ ࡖ ࡎࡀࡈࡀࡍࡀ ࡁࡄࡅࡊࡅࡌࡀࡕ
ࡔࡓࡀࡓࡀ ࡅࡄࡀࡉࡌࡀࡍࡅࡕࡀ ࡌࡉࡕࡌࡀࡊࡀࡊ ࡖ ࡁࡄࡀࡉࡌࡀࡍࡅࡕࡀ ࡋࡀࡌࡉࡕࡌࡀࡊࡀࡊ
ࡁࡄࡉࡓࡁࡀ ࡅࡎࡉࡐࡀ ࡌࡉࡂࡈࡉࡋ ࡍࡏࡂࡈࡉࡋ ࡁࡄࡉࡓࡁࡀ ࡅࡎࡉࡐࡀ
ࡅࡍࡀࡐࡉࡋ ࡁࡂࡅࡄࡍࡀࡌ ࡖ ࡌࡄࡀࡁࡀࡁࡀ ࡌࡀࡍ ࡖ ࡈࡀࡁࡅࡕࡀ
ࡀࡁࡉࡃࡁࡊࡅࡍ ࡒࡀࡁࡉࡋ ࡈࡀࡁࡅࡕࡇ ࡅࡋࡀࡕࡉࡔࡉࡈࡅࡍࡇ ࡅࡀࡅࡒࡓࡅࡉࡀ
ࡅࡄࡀࡍࡍࡅࡉࡀ ࡅࡋࡀࡕࡉࡊࡉࡐࡓࡅࡍ ࡌࡍ ࡈࡀࡁࡅࡕࡇ ࡏࡅ ࡌࡍ ࡈࡀࡁࡅࡕࡇ
ࡊࡀࡐࡓࡉࡕࡅࡍ ࡕࡅࡌ ࡋࡀࡔࡀࡅࡉࡕࡅࡍ ࡋࡈࡀࡁࡅࡕࡇ ࡅࡈࡀࡁࡅࡕࡇ ࡌࡉࡍࡀࡉࡊࡅࡍ
ࡁࡀࡑࡓࡀ ࡄࡀࡆࡉࡕࡅࡍ ࡈࡀࡁࡀ ࡒࡓࡅࡁ ࡋࡅࡀࡕࡇ ࡅࡒࡀࡁࡉࡋ ࡌࡉࡍࡇ
ࡄࡅࡊࡅࡌࡕࡇ ࡅࡏࡁࡉࡃ ࡏࡅ ࡄࡀࡆࡉࡕࡅࡍ ࡁࡉࡔࡀ ࡖ ࡄࡀࡊࡉࡌ
ࡓࡄࡅࡒ ࡌࡉࡍࡇ ࡅࡋࡀࡕࡉࡄࡉࡊࡌࡅࡍ ࡌࡉࡍࡇ ࡌࡍ ࡄࡅࡊࡅࡌࡕࡇ ࡅࡋࡀࡕࡉࡁࡃࡅࡍ
ࡌࡍ ࡏࡅࡁࡀࡃࡇ ࡅࡋࡀࡕࡀࡎࡂࡅࡍ ࡁࡃࡉࡓࡊࡇ ࡏࡋ ࡊࡅࡋࡄࡉࡍ ࡏࡁࡉࡃࡀࡕࡊࡅࡍ
ࡌࡉࡑࡓࡀ ࡅࡊࡏࡋࡀ ࡅࡋࡂࡅࡈ ࡋࡁࡀࡓ ࡌࡍ ࡁࡅࡕࡀ ࡅࡕࡅࡔࡁࡉࡄࡕࡀ
ࡅࡎࡉࡂࡅࡃࡕࡀ ࡖ ࡌࡀࡓࡀࡉࡊࡅࡍ ࡅࡀࡂࡓࡀ ࡅࡆࡉࡃࡒࡀ ࡅࡈࡀࡁࡅࡕࡀ ࡅࡓࡀࡄࡌࡉࡀ
ࡖ ࡊࡅࡔࡈࡀ ࡖ ࡌࡋࡉࡀ ࡖ ࡌࡋࡉࡀ ࡄࡀࡉࡋࡀࡉࡊࡅࡍ ࡏࡁࡉࡃ ࡄࡀࡋࡉࡍ
ࡈࡀࡁࡀࡅࡀࡕࡀ ࡌࡉࡑࡓࡀ ࡅࡊࡉࡋࡀ ࡋࡉࡕࡋࡀࡉࡄࡅࡍ ࡉࡀ ࡔࡀࡋࡌࡀࡍࡉࡀ ࡅࡌࡄࡀࡉࡌࡍࡉࡀ
ࡊࡅࡋ ࡖ ࡏࡋࡀࡅࡀࡉࡊࡅࡍ ࡁࡉࡔ ࡅࡎࡍࡉࡀ ࡁࡄࡀࡁࡓࡀࡉࡊࡅࡍ ࡋࡀࡕࡉࡁࡃࡅࡍ
040 ࡊࡅࡋ ࡖ ࡏࡋࡀࡅࡀࡉࡊࡅࡍ ࡔࡀࡐࡉࡓ ࡄࡉࡍ ࡌࡀࡋࡉࡀ ࡄࡀࡉࡋࡀࡉࡊࡅࡍ ࡏࡁࡉࡃ ࡅࡄࡃࡀࡃࡉࡀ
ࡎࡌࡅࡊ ࡁࡄࡉࡓࡀࡉ ࡔࡅࡌࡀ ࡅࡏࡕࡄࡀࡉࡌࡀࡍ ࡅࡒࡀࡁࡉࡋ ࡌࡉࡍࡉࡋࡀࡕ
ࡌࡀࡓࡀࡉࡊࡅࡍ ࡄࡀࡉࡌࡀࡍ ࡁࡋࡉࡁࡀࡉࡊࡅࡍ ࡄࡆࡅࡍ ࡁࡀࡉࡍࡀࡉࡊࡅࡍ ࡅࡔࡅࡌࡀ
ࡁࡏࡅࡃࡍࡀࡉࡊࡅࡍ ࡅࡀࡌࡀࡓ ࡁࡐࡅࡌࡀࡉࡊࡅࡍ ࡅࡏࡁࡉࡃ ࡁࡏࡃࡀࡉࡊࡅࡍ ࡆࡉࡃࡒࡀ
ࡅࡈࡀࡁࡅࡕࡀ ࡅࡏࡁࡉࡃ ࡑࡅࡁࡉࡀࡍ ࡌࡀࡓࡀࡉࡊࡅࡍ ࡅࡋࡀࡕࡉࡁࡃࡅࡍ ࡑࡅࡁࡉࡀࡍ
ࡐࡀࡂࡓࡉࡀ ࡅࡋࡀࡁࡑࡅࡁࡉࡀࡍࡇ ࡖ ࡎࡀࡈࡀࡍࡀ ࡍࡀࡐࡋࡀ ࡋࡀࡕࡉࡓࡉࡄࡑࡅࡍ ࡏࡋ
ࡔࡐࡅࡓ ࡐࡀࡂࡓࡉࡀ ࡖ ࡌࡍ ࡔࡉࡋࡉࡀ ࡌࡉࡕࡄࡀࡌࡁࡋࡉࡀ ࡋࡀࡕࡉࡓࡉࡄࡑࡅࡍ
ࡏࡋ ࡎࡀࡈࡀࡍࡀ ࡍࡀࡐࡋࡀ ࡖ ࡋࡀࡌࡉࡕࡊࡔࡀࡓ ࡅࡋࡀࡌࡑࡉࡀ ࡋࡐࡀࡓࡅࡒࡀ
ࡍࡀࡐࡔࡀ ࡌࡍ ࡉࡀࡒࡃࡀࡍࡀ ࡀࡊࡋࡀ ࡖ ࡀࡊࡉࡋ ࡅࡌࡄࡀࡌࡁࡉࡋࡅࡍ ࡋࡃࡀࡉࡅࡉࡀ
ࡋࡔࡅࡓࡁࡀࡕࡅࡍ ࡖ ࡎࡀࡈࡀࡍࡀ ࡊࡅࡋࡄࡅࡍ ࡖ ࡏࡎࡉࡓࡉࡀ ࡏࡋ ࡏࡁࡉࡃࡀࡕࡀ
ࡖ ࡀࡋࡌࡀ ࡄࡀࡆࡉࡍ ࡏࡔࡕࡁࡉࡒ ࡖ ࡋࡒࡅࡃࡀࡌ ࡁࡍࡀ ࡖ ࡀࡃࡀࡌ
ࡍࡉࡔࡕࡀࡁࡃࡅࡍ ࡅࡍࡉࡓࡃࡅࡍ ࡌࡀࡓࡃࡉࡕࡀ ࡁࡀࡋࡌࡀ ࡊࡅࡋ ࡌࡀࡍ ࡖ ࡊࡀࡐࡀࡓ
ࡌࡍ ࡌࡉࡍࡋࡀࡕ ࡌࡀࡓࡇ ࡅࡏࡅࡄࡓࡀ ࡋࡁࡉࡔࡀ ࡉࡀࡄࡉࡁࡋࡇ ࡏࡃࡇ
ࡖ ࡎࡀࡈࡀࡍࡀ ࡕࡉࡔࡕࡀࡋࡀࡈ ࡏࡋࡇ ࡖ ࡑࡅࡁࡉࡀࡍࡇ ࡖ ࡎࡀࡈࡀࡍࡀ ࡋࡀࡁࡉࡃ
ࡏࡋ ࡁࡀࡁ ࡍࡅࡓࡀ ࡋࡀࡍࡉࡄࡋࡅࡐ ࡀࡁࡅࡃ ࡑࡅࡁࡉࡀࡍࡀ ࡖ ࡌࡀࡓࡀࡉࡊࡅࡍ
ࡖ ࡕࡉࡎࡒࡅࡍ ࡁࡆࡀࡊࡅࡕࡀ ࡋࡀࡋࡌࡉࡀ ࡖ ࡍࡄࡅࡓࡀ ࡋࡀࡕࡉࡈࡀࡋࡌࡅࡍ ࡌࡉࡊࡉࡀ
ࡖ ࡋࡀࡌࡑࡏࡉࡍ ࡌࡉࡊࡀࡃࡅࡔࡉࡀ ࡌࡉࡍࡀࡉࡊࡅࡍ ࡋࡀࡕࡉࡐࡊࡅࡍ ࡌࡉࡑࡓࡉࡀ
ࡁࡈࡅࡋࡌࡀ ࡅࡋࡀࡕࡉࡔࡀࡍࡅࡍ ࡊࡅࡃࡊࡉࡀ ࡌࡀࡍ ࡖ ࡀࡐࡉࡊ ࡌࡉࡑࡓࡉࡀ ࡃࡉࡍࡀ
ࡂࡆࡉࡓࡀ ࡄࡀࡅࡉࡀ ࡏࡋࡇ ࡀࡊࡉࡎ ࡓࡀࡄࡌࡀࡉࡊࡅࡍ ࡁࡕࡅࡓࡑࡀ
ࡅࡓࡀࡄࡌࡅࡕࡊࡅࡍ ࡃࡀࡁࡀࡓ ࡋࡀࡕࡉࡔࡉࡐࡓࡅࡍ ࡁࡀࡍࡐࡉࡀ ࡄࡃࡀࡃࡉࡀ
ࡅࡔࡅࡕࡀ ࡖ ࡊࡀࡃࡁࡀ ࡅࡍࡀࡊࡋࡀ ࡋࡀࡕࡉࡌࡓࡅࡍ ࡊࡅࡋ ࡖ ࡔࡀࡐࡀࡓ ࡁࡀࡍࡐࡉࡀ
ࡏࡋ ࡀࡍࡐࡉࡀ ࡂࡀࡉࡓࡉࡋࡇ ࡋࡍࡅࡓࡀ ࡖ ࡉࡀࡒࡃࡀ ࡋࡂࡅࡈ ࡄࡀࡕࡌࡀ ࡓࡁࡀ
ࡏࡋ ࡊࡅࡋࡇ ࡐࡀࡂࡓࡀࡉࡊࡅࡍ ࡅࡋࡀࡕࡉࡔࡓࡅࡍࡇ ࡌࡍ ࡐࡀࡂࡓࡀࡉࡊࡅࡍ ࡀࡋࡌࡀ
ࡋࡉࡅࡌࡀ ࡖ ࡍࡀࡐࡒࡉࡕࡅࡍ ࡌࡍ ࡐࡀࡂࡓࡀࡉࡊࡅࡍ ࡄࡀࡄࡅ ࡉࡅࡌࡀ ࡖ ࡐࡅࡓࡒࡀࡍࡀ
041 ࡖ ࡐࡅࡓࡒࡀࡍࡀ ࡑࡅࡌ ࡑࡀࡅࡌࡀ ࡓࡁࡀ ࡑࡅࡌ ࡓࡉࡔࡀࡉࡊࡅࡍ
ࡁࡄࡀࡉࡌࡀࡍࡅࡕࡀ ࡅࡎࡂࡅࡃ ࡅࡔࡀࡁࡀ ࡋࡌࡀࡓࡀࡉࡊࡅࡍ ࡌࡀࡓࡀࡉࡄࡅࡍ
ࡖ ࡊࡅࡋࡄࡅࡍ ࡀࡋࡌࡉࡀ ࡋࡀࡕࡉࡎࡉࡂࡃࡅࡍ ࡋࡎࡀࡈࡀࡍࡉࡀ ࡅࡋࡐࡀࡕࡉࡊࡓࡉࡀ
ࡖ ࡏࡉࡕ ࡁࡀࡋࡌࡀ ࡖ ࡍࡉࡄࡅࡍ ࡅࡍࡉࡔࡕࡀࡁࡃࡅࡍ ࡋࡒࡅࡃࡀࡌࡀࡉࡊࡅࡍ
ࡗ ࡄࡀࡉࡌࡀࡍࡅࡕࡀ ࡏࡕࡁࡀࡉࡊࡅࡍ ࡄࡉࡍࡅࡍ ࡀࡁࡃࡀࡉࡊࡅࡍ ࡍࡉࡄࡅࡍ ࡏࡅ
ࡌࡍ ࡌࡉࡍࡉࡋࡀࡕ ࡌࡀࡓࡀࡉࡊࡅࡍ ࡁࡀࡑࡓࡉࡕࡅࡍ ࡓࡀࡉࡅࡉࡀ ࡌࡍ
ࡀࡉࡍࡀࡉࡊࡅࡍ ࡍࡉࡕࡉࡊࡎࡅࡍ ࡑࡅࡌ ࡀࡉࡍࡀࡉࡊࡅࡍ ࡌࡍ ࡌࡉࡓࡌࡀࡆ
ࡓࡉࡌࡆࡀ ࡁࡁࡉࡔࡅࡕࡀ ࡏࡋ ࡄࡃࡀࡃࡉࡀ ࡋࡀࡕࡉࡄࡆࡅࡍ ࡁࡉࡔࡅࡕࡀ
ࡅࡕࡉࡁࡃࡅࡍ ࡑࡅࡌ ࡐࡅࡌࡀࡉࡊࡅࡍ ࡌࡍ ࡌࡉࡌࡀࡓ ࡊࡀࡃࡁࡀ ࡅࡁࡉࡔࡅࡕࡀ
ࡅࡆࡉࡐࡀ ࡅࡊࡀࡃࡁࡀ ࡋࡀࡕࡉࡌࡓࡅࡍ ࡑࡅࡌ ࡏࡅࡃࡍࡀࡉࡊࡅࡍ ࡌࡍ ࡌࡀࡑࡅࡕࡉࡀ
ࡁࡉࡔࡅࡕࡀ ࡅࡋࡀࡕࡉࡔࡌࡅࡍ ࡁࡉࡔࡅࡕࡀ ࡅࡕࡉࡁࡃࡅࡍ ࡑࡅࡌ ࡅࡃࡀࡊࡅࡍ
ࡋࡉࡁࡀࡉࡊࡅࡍ ࡁࡄࡀࡉࡌࡀࡍࡅࡕࡀ ࡄࡉࡔࡁࡉࡀ ࡁࡉࡔࡉࡀ ࡋࡀࡕࡉࡄࡀࡔࡁࡅࡍ
ࡋࡀࡕࡉࡄࡀࡔࡁࡅࡍ ࡁࡉࡔࡅࡕࡀ ࡅࡌࡍ ࡄࡀࡁࡓࡀࡉࡊࡅࡍ ࡁࡍࡉࡊࡋࡀ ࡋࡀࡕࡀࡎࡂࡅࡍ
ࡌࡀࡍ ࡖ ࡄࡀࡅࡉࡁࡇ ࡍࡏࡊࡋࡀ ࡅࡓࡉࡅࡉࡀࡍࡇ ࡁࡊࡅࡔࡈࡀ ࡋࡀࡌࡃࡀࡊࡀࡉ
ࡁࡅࡕࡀ ࡅࡕࡅࡔࡁࡉࡄࡕࡀ ࡅࡎࡉࡂࡅࡃࡕࡇ ࡅࡀࡂࡓࡇ ࡅࡆࡉࡃࡒࡇ ࡋࡀࡌࡉࡄࡔࡉࡁࡉࡋࡇ
ࡅࡍࡀࡐࡉࡋ ࡁࡍࡅࡓࡀ ࡖ ࡉࡀࡒࡃࡀ ࡑࡅࡌ ࡐࡀࡂࡓࡀࡉࡊࡅࡍ ࡌࡍ ࡆࡀࡅࡀ ࡖ ࡋࡀࡅ
ࡃࡉࡋࡊࡅࡍ ࡑࡅࡌ ࡏࡃࡀࡉࡊࡅࡍ ࡌࡍ ࡌࡉࡂࡈࡀࡋ ࡂࡉࡈࡋࡀ ࡖ ࡁࡍࡀ ࡖ ࡀࡃࡀࡌ
ࡉࡀ ࡔࡀࡋࡌࡀࡍࡉࡀ ࡅࡌࡄࡀࡉࡌࡍࡉࡀ ࡔࡀࡋࡌࡀࡍࡉࡀ ࡅࡌࡄࡀࡉࡌࡍࡉࡀ
ࡏࡃࡀࡉࡊࡅࡍ ࡄࡀࡓࡔࡉࡀ ࡁࡉࡔࡉࡀ ࡋࡀࡍࡉࡁࡀࡃ ࡑࡅࡌ ࡁࡅࡓࡊࡀࡉࡊࡅࡍ ࡌࡍ
ࡀࡓࡁࡅࡊࡉࡀ ࡋࡎࡀࡈࡀࡍࡀ ࡍࡀࡐࡋࡀ ࡅࡋࡑࡉࡋࡌࡉࡀ ࡖ ࡆࡉࡐࡀ ࡅࡋࡃࡌࡀࡅࡀࡕࡀ
ࡅࡋࡏࡅࡁࡀࡃࡉࡀ ࡁࡀࡈࡋࡉࡀ ࡀࡌࡉࡍࡈࡅࡋ ࡊࡅࡋ ࡖ ࡌࡉࡕࡋࡉࡃ ࡌࡀࡉࡉࡕ ࡅࡊࡅࡋ
ࡖ ࡌࡉࡕࡁࡉࡃ ࡁࡏࡃࡉࡀ ࡌࡉࡕࡄࡀࡌࡁࡀࡋ ࡓࡅࡄࡑࡀࡍࡀ ࡏࡋࡇ ࡋࡀࡍࡉࡄࡅࡉࡋࡊࡅࡍ
ࡁࡄࡉࡓࡀࡉ ࡍࡉࡄࡅࡉࡋࡊࡅࡍ ࡓࡅࡄࡑࡀࡍࡀ ࡏࡋ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡌࡀࡓࡀࡉࡄࡅࡍ ࡖ ࡊࡅࡋࡄࡅࡍ
ࡀࡋࡌࡉࡀ ࡖ ࡄࡅࡊࡅࡌࡀࡕ ࡔࡓࡀࡓࡀ ࡅࡊࡅࡔࡈࡀ ࡅࡄࡀࡉࡌࡀࡍࡅࡕࡀ
042 ࡅࡌࡀࡋࡀࡋࡉࡀ ࡊࡀࡁࡉࡓࡉࡀ ࡅࡐࡅࡒࡃࡀࡍࡉࡀ ࡔࡀࡍࡉࡉࡀ ࡖ ࡐࡀࡒࡉࡃ ࡌࡀࡓࡀࡉࡊࡅࡍ
ࡖ ࡁࡅࡍ ࡀࡕࡉࡀࡋࡊࡅࡍ ࡆࡀࡊࡅࡕࡀ ࡖ ࡁࡅࡍ ࡌࡉࡕࡐࡀࡓࡒࡀ ࡍࡉࡔࡌࡀࡕࡊࡅࡍ
ࡄࡀࡆࡉࡍ ࡄࡅ ࡑࡀࡅࡌࡀ ࡖ ࡏࡕࡄࡉࡁࡋࡊࡅࡍ ࡋࡀࡕࡉࡔࡃࡅࡍࡇ ࡀࡋࡌࡀ
ࡖ ࡌࡀࡉࡉࡕ ࡐࡀࡂࡓࡀࡉࡊࡅࡍ ࡏࡕࡉࡓࡄࡉࡑ ࡏࡋ ࡏࡅࡁࡀࡃࡉࡀ ࡔࡀࡐࡉࡓࡉࡀ
ࡖ ࡀࡍࡀࡕࡅࡍ ࡀࡁࡃࡉࡕࡅࡍ ࡗ ࡍࡀࡐࡒࡉࡕࡅࡍ ࡌࡍ ࡐࡀࡂࡓࡀࡉࡊࡅࡍ ࡌࡉࡎࡌࡉࡊࡉࡕࡅࡍ
ࡏࡋ ࡏࡅࡁࡀࡃࡉࡀ ࡔࡀࡐࡉࡓࡉࡀ ࡖ ࡀࡍࡀࡕࡅࡍ ࡀࡁࡃࡉࡕࡅࡍ ࡁࡀࡋࡌࡀ ࡁࡄࡉࡓࡀࡉ
ࡋࡀࡍࡉࡄࡅࡉࡋࡊࡅࡍ ࡓࡅࡄࡑࡀࡍࡀ ࡏࡋ ࡌࡀࡋࡀࡊࡉࡀ ࡄࡀࡓࡉࡀ ࡅࡔࡅࡋࡈࡀࡍࡉࡀ ࡅࡌࡀࡄࡉࡒࡀࡍࡉࡀ
ࡖ ࡄࡀࡅࡉࡍ ࡁࡀࡋࡌࡀ ࡅࡋࡀ ࡏࡋ ࡄࡀࡉࡋࡀ ࡅࡆࡀࡉࡍࡀ ࡅࡒࡓࡀࡁࡀ ࡅࡕࡀࡊࡕࡅࡔࡀ
ࡅࡊࡀࡍࡐࡀ ࡅࡂࡅࡍࡃࡀ ࡖ ࡊࡀࡍࡐࡉࡀ ࡅࡔࡀࡁࡉࡍ ࡔࡉࡁࡉࡀ ࡁࡀࡋࡌࡀ ࡏࡋ
ࡃࡀࡄࡁࡀ ࡅࡏࡋ ࡊࡀࡎࡐࡀ ࡅࡀࡓࡂࡁࡀ ࡅࡌࡉࡍࡅࡍࡀ ࡖ ࡀࡋࡌࡀ ࡄࡀࡆࡉࡍ
ࡄࡀࡉࡆࡀࡊ ࡌࡀࡋࡊࡅࡕࡅࡍ ࡁࡀࡈࡋࡀ ࡅࡔࡀࡅࡈࡅࡍ ࡅࡔࡅࡋࡈࡀࡍࡅࡍ ࡋࡀࡄࡀࡅࡉࡋࡅࡍ
ࡁࡀࡄࡉࡃ ࡏࡃࡀ ࡀࡁࡃࡉࡀ ࡅࡔࡀࡁࡒࡉࡋࡇ ࡅࡀࡆࡋࡉࡀ ࡁࡍࡅࡓࡀ ࡁࡀࡔࡋࡉࡀ
ࡀࡋࡌࡀ ࡋࡉࡅࡌࡀ ࡉࡅࡌ ࡃࡉࡍࡀ ࡅࡀࡋࡌࡀ ࡋࡔࡉࡕࡀ ࡔࡀࡉࡉࡀ ࡖ ࡐࡅࡓࡒࡀࡍࡀ
ࡁࡄࡉࡓࡀࡉ ࡋࡀࡍࡉࡄࡅࡉࡋࡊࡅࡍ ࡁࡅࡎࡉࡀࡍࡀ ࡖ ࡄࡀࡅࡉࡀ ࡋࡌࡉࡁࡀࡃ
ࡁࡀࡋࡌࡀ ࡕࡉࡄࡅࡉࡁࡊࡅࡍ ࡊࡉࡍࡅࡕࡀ ࡅࡍࡉࡄࡅࡕࡀ ࡅࡌࡊࡉࡊࡅࡕࡀ ࡅࡁࡅࡎࡌࡀ
ࡖ ࡌࡍ ࡊࡉࡀࡍࡀ ࡖ ࡍࡄࡅࡓࡀ ࡄࡅࡍ ࡕࡉࡄࡅࡉࡁࡊࡅࡍ ࡕࡉࡀࡁࡅࡕࡀ ࡅࡓࡀࡄࡌࡅࡕࡀ
ࡖ ࡊࡅࡔࡈࡀ ࡖ ࡌࡍ ࡊࡉࡀࡍࡀ ࡖ ࡍࡄࡅࡓࡀ ࡄࡅࡍ ࡌࡀࡍ ࡖ ࡁࡀࡉࡉࡀ
ࡁࡅࡕࡀ ࡌࡉࡍࡀࡉࡊࡅࡍ ࡄࡉࡍ ࡏࡕࡋࡀࡉࡊࡅࡍ ࡌࡉࡍࡇ ࡋࡀࡕࡉࡋࡉࡂࡈࡅࡍ ࡀࡌࡉࡍࡈࡅࡋ
ࡖ ࡎࡍࡉࡒ ࡅࡔࡀࡅࡉࡀ ࡅࡁࡀࡉࡉࡀ ࡁࡅࡕࡀ ࡌࡉࡍࡀࡉࡊࡅࡍ ࡄࡀࡃ ࡌࡍ
ࡄࡀࡁࡓࡇ ࡅࡌࡑࡉࡀ ࡅࡄࡀࡉࡋࡀ ࡏࡕࡋࡇ ࡅࡋࡀࡉࡀࡄࡉࡁࡋࡇ ࡈࡀࡁࡅࡕࡀ
ࡌࡉࡍࡇ ࡁࡀࡑࡓࡀ ࡄࡀࡁ ࡌࡀࡊࡍࡀ ࡅࡃࡀࡅࡓࡀ ࡋࡄࡀࡌࡀ ࡅࡌࡉࡀ
ࡋࡌࡀࡍ ࡖ ࡁࡊࡀࡋࡉࡅࡕࡀ ࡌࡀࡎࡂࡉࡀ ࡅࡆࡀࡅࡃࡅࡉࡀ ࡆࡅࡀࡃࡉࡀ ࡋࡏࡅࡄࡓࡀ
ࡌࡀࡍ ࡖ ࡋࡉࡕࡋࡇ ࡉࡀࡃࡉࡕࡀ ࡅࡋࡀࡄࡀࡊࡉࡌ ࡌࡍ ࡄࡀࡆࡉࡍ ࡄࡅࡊࡅࡌࡕࡀ
ࡒࡀࡓࡁࡅࡉࡀ ࡋࡅࡀࡕࡀࡉࡊࡅࡍ ࡅࡀࡋࡐࡅࡉࡀ ࡖ ࡌࡀࡎࡈࡉࡀࡍࡉࡀ ࡏࡋࡇ ࡋࡀࡍࡉࡐࡋࡅࡍ
043 ࡉࡀ ࡂࡅࡁࡓࡉࡀ ࡖ ࡋࡀࡂࡈࡉࡀ ࡏࡍࡔࡉࡀ ࡅࡉࡀ ࡏࡍࡔࡉࡀ ࡖ ࡋࡂࡅࡁࡓࡉࡀ ࡄࡀࡅࡉࡀ
ࡓࡄࡅࡌ ࡁࡄࡀࡓ ࡅࡋࡂࡅࡈ ࡅࡄࡀࡉࡆࡀࡊ ࡖ ࡊࡕࡉࡁࡋࡊࡅࡍ ࡅࡌࡉࡕࡓࡀࡄࡌࡀ
ࡁࡋࡉࡁࡀࡉࡊࡅࡍ ࡋࡂࡅࡈ ࡄࡉࡍ ࡏࡋࡀ ࡋࡀࡁࡀࡄࡓࡉࡕࡅࡍ ࡅࡋࡀࡋࡀࡂࡈࡉࡕࡅࡍ ࡅࡗ
ࡌࡀࡄࡓࡀ ࡁࡀࡓࡎࡀ ࡎࡁࡅࡋ ࡄࡉࡍ ࡀࡁࡃࡀ ࡏࡅࡁࡀࡃࡉࡀ ࡎࡀࡉࡍࡉࡀ
ࡋࡀࡌࡉࡕࡓࡀࡄࡌࡀ ࡏࡋ ࡍࡀࡐࡔࡀ ࡓࡄࡅࡒ ࡌࡉࡍࡇ ࡅࡋࡀࡕࡉࡄࡅࡉࡋࡀ
ࡓࡀࡄࡌࡀ ࡅࡏࡕࡁࡀࡓࡅࡍ ࡌࡉࡍࡇ ࡀࡌࡉࡍࡈࡅࡋ ࡖ ࡃࡀࡌࡉࡀ ࡋࡊࡉࡁࡉࡀ
ࡖ ࡀࡎࡅࡕࡀ ࡋࡉࡕࡋࡇ ࡋࡀࡕࡉࡋࡉࡂࡈࡅࡍ ࡀࡌࡕࡀ ࡖ ࡋࡀࡐࡓࡉࡒࡀ ࡌࡍ
ࡌࡀࡓࡀ ࡅࡋࡀࡕࡉࡔࡃࡅࡍ ࡁࡍࡀࡉࡊࡅࡍ ࡁࡉࡕ ࡌࡀࡓࡉࡀ ࡄࡉࡍ ࡋࡀࡂࡈࡉࡕࡅࡍ
ࡐࡀࡓࡅࡒࡉࡀ ࡐࡓࡅࡒ ࡅࡈࡀࡁࡅࡕࡊࡅࡍ ࡌࡉࡕࡒࡀࡁࡋࡀ ࡋࡀࡕࡉࡋࡉࡂࡈࡅࡍ ࡀࡌࡕࡀ
ࡖ ࡋࡀࡐࡓࡉࡒࡀ ࡅࡋࡀࡕࡉࡔࡃࡅࡍ ࡁࡍࡀࡉࡊࡅࡍ ࡁࡉࡕ ࡌࡀࡓࡉࡀ ࡖ ࡊࡕࡉࡁࡋࡇ
ࡁࡍࡉࡀ ࡅࡁࡍࡀࡕࡀ ࡅࡔࡀࡃࡉࡋࡅࡍ ࡁࡉࡕ ࡌࡀࡓࡉࡀ ࡉࡅࡌࡀ ࡖ ࡄࡀࡈࡉࡀ
ࡀࡁࡃࡀ ࡅࡌࡀࡓࡇ ࡓࡀࡂࡉࡆ ࡏࡋࡇ ࡄࡀࡈࡀࡉࡉࡀ ࡖ ࡄࡀࡈࡉࡀ ࡀࡁࡃࡀ
ࡁࡓࡉࡔࡀ ࡖ ࡀࡁࡅࡉࡀ ࡎࡀࡋࡒࡉࡀ ࡋࡂࡅࡈ ࡓࡄࡀࡌࡕࡀ ࡖ ࡊࡅࡔࡈࡀ
ࡌࡍ ࡆࡀࡅࡀ ࡖ ࡊࡅࡔࡈࡀ ࡖ ࡁࡑࡅࡁࡉࡀࡍࡇ ࡖ ࡌࡀࡓࡀࡉࡊࡅࡍ ࡃࡉࡋࡊࡅࡍ
ࡄࡀࡅࡉࡀ ࡋࡀࡕࡉࡁࡎࡅࡍ ࡁࡉࡄࡃࡀࡃࡉࡀ ࡀࡋࡌࡀ ࡖ ࡊࡉࡋࡀࡉࡊࡅࡍ
ࡔࡀࡋࡉࡌ ࡌࡀࡍ ࡖ ࡍࡀࡊࡉࡋ ࡁࡆࡀࡅࡇ ࡗ ࡍࡉࡊࡋࡀ ࡅࡄࡅࡎࡓࡀࡍࡀ ࡋࡉࡕࡁࡇ
ࡅࡓࡀࡄࡉࡌ ࡅࡓࡀࡉࡉࡂ ࡓࡀࡂࡀࡂࡕࡀ ࡖ ࡀࡋࡌࡀ ࡄࡀࡆࡉࡍ
ࡄࡀࡅࡉࡁࡇ ࡍࡉࡊࡋࡀ ࡅࡄࡅࡎࡓࡀࡍࡀ ࡁࡉࡕ ࡃࡉࡍࡀ ࡌࡉࡄࡀࡉࡀࡁ ࡁࡄࡔࡅࡊࡀ
ࡌࡉࡔࡕࡊࡉࡍ ࡅࡗ ࡄࡀࡅࡉࡋࡊࡅࡍ ࡁࡍࡉࡀ ࡅࡗ ࡌࡀࡓࡀࡉࡄࡅࡍ ࡐࡀࡓࡉࡔࡋࡅࡍ
ࡀࡋࡐࡅࡍࡅࡍ ࡁࡅࡕࡀ ࡅࡕࡅࡔࡁࡉࡄࡕࡀ ࡖ ࡏࡅࡓࡁࡀࡍࡀ ࡅࡊࡀࡃࡁࡀ ࡋࡉࡕࡁࡇ
ࡄࡉࡍ ࡌࡄࡀࡅࡉࡕࡅࡋࡅࡍ ࡃࡉࡓࡊࡉࡀ ࡖ ࡊࡅࡔࡈࡀ ࡅࡄࡀࡉࡌࡀࡍࡅࡕࡀ
ࡅࡋࡀࡋࡀࡂࡈࡉࡀ ࡐࡀࡓࡉࡒࡉࡕࡅࡍ ࡌࡍ ࡄࡀࡈࡀࡉࡅࡍ ࡆࡉࡁࡍࡀ ࡑࡀࡋࡉࡀ ࡏࡍࡉࡔ
ࡁࡉࡔࡀ ࡌࡍ ࡁࡉࡍࡀࡕࡀࡉࡊࡅࡍ ࡅࡌࡍ ࡌࡉࡍࡉࡋࡀࡕ ࡌࡀࡓࡇ ࡄࡀࡃࡀࡓ
ࡀࡒࡌࡅࡉࡀ ࡅࡎࡅࡌࡊࡅࡉࡀ ࡕࡓࡉࡍ ࡆࡉࡁࡍࡉࡀ ࡑࡀࡋࡉࡀ ࡂࡅࡐࡍࡀ ࡄࡃࡀࡓ
044 ࡀࡒࡌࡅࡉࡀ ࡅࡎࡅࡌࡊࡅࡉࡀ ࡕࡋࡀࡕࡀ ࡆࡉࡁࡍࡉࡀ ࡑࡀࡋࡉࡀ ࡂࡅࡐࡍࡀ ࡄࡃࡀࡓ
ࡀࡒࡌࡅࡉࡀ ࡅࡎࡅࡌࡊࡅࡉࡀ ࡄࡉࡍ ࡎࡀࡌࡊࡉࡕࡅࡋࡇ ࡅࡋࡀࡌࡉࡎࡕࡌࡉࡊ ࡏࡅࡒࡓࡅࡉࡀ
ࡋࡂࡅࡐࡍࡀ ࡁࡉࡔࡀ ࡅࡀࡌࡈࡅࡉࡀ ࡋࡁࡀࡁࡀ ࡖ ࡌࡀࡔࡊࡍࡀ ࡀࡔࡌࡅࡉࡀ
ࡃࡓࡀࡔࡉࡀ ࡅࡎࡉࡃࡓࡉࡀ ࡄࡀࡅࡉࡅࡉࡀ ࡊࡕࡀࡁࡉࡀ ࡅࡌࡉࡌࡓࡉࡀ ࡁࡂࡀࡅࡀࡉࡄࡅࡍ
ࡍࡀࡄࡀࡓ ࡋࡉࡁࡇ ࡋࡓࡅࡉࡀࡍࡇ ࡄࡉࡍ ࡔࡀࡌࡀ ࡅࡎࡀࡄࡉࡃ ࡅ*ࡋࡀ*ࡌࡉࡕࡉࡀࡉࡀࡓ
ࡓࡅࡄࡌࡅࡉࡀ ࡅࡀࡕࡉࡅࡉࡀ ࡋࡃࡅࡊࡕࡇ ࡅࡋࡀࡕࡀࡂࡆࡓࡅࡍ ࡏࡋࡇ ࡄࡉࡍ ࡋࡀࡔࡀࡌࡀ
ࡅࡋࡀࡎࡀࡄࡉࡃ ࡅࡋࡀࡌࡉࡕࡉࡀࡉࡀࡓ ࡏࡅࡒࡓࡅࡉࡀ ࡋࡂࡅࡐࡍࡀ ࡁࡉࡔࡀ ࡅࡀࡉࡕࡅࡍ
ࡈࡀࡁࡀ ࡁࡀࡕࡓࡇ ࡔࡕࡅࡋ ࡄࡉࡍ ࡋࡀࡔࡀࡌࡀ ࡅࡋࡀࡎࡀࡄࡉࡃ
ࡅࡋࡀࡌࡉࡕࡉࡀࡉࡀࡓ ࡁࡉࡀࡃ ࡔࡀࡋࡉࡈࡀ ࡌࡉࡂࡈࡉࡋ ࡌࡉࡂࡈࡉࡋ ࡁࡉࡀࡃ
ࡔࡀࡋࡉࡈࡀ ࡅࡍࡀࡐࡉࡋ ࡁࡍࡅࡓࡀ ࡖ ࡉࡀࡒࡃࡀ ࡖ ࡄࡀࡅࡉࡅࡉࡀ ࡁࡀࡉࡍࡇ ࡅࡋࡀࡄࡆࡀ
ࡅࡒࡓࡅࡋࡇ ࡁࡏࡅࡃࡍࡇ ࡅࡋࡀࡔࡅࡌࡀ ࡍࡉࡄࡅࡉࡀ ࡌࡍࡀࡕࡀ ࡖ ࡍࡅࡓࡀ ࡖ ࡀࡊࡋࡀ ࡄࡀࡆࡉࡕࡅࡍ
ࡀࡍࡉࡉࡀ ࡅࡌࡓࡀࡃࡐࡉࡀ ࡅࡔࡀࡋࡌࡀࡍࡉࡀ ࡖ ࡁࡉࡔࡅࡕࡀ ࡅࡌࡅࡌࡀ ࡖ ࡐࡀࡂࡓࡉࡀ
ࡌࡀࡈࡉࡋࡅࡍ ࡁࡋࡉࡁࡀࡉࡊࡅࡍ ࡋࡀࡕࡉࡂࡉࡄࡊࡅࡍ ࡏࡋࡀࡅࡀࡉࡄࡅࡍ ࡀࡌࡉࡍࡈࡅࡋ ࡖ ࡐࡀࡂࡓࡉࡀ
ࡂࡁࡉࡋࡉࡀ ࡁࡉࡎࡓࡀ ࡅࡆࡌࡀ ࡁࡊࡉࡁࡉࡀ ࡅࡌࡅࡌࡉࡀ ࡌࡉࡍࡀࡉࡄࡅࡍ ࡂࡀࡁࡋࡉࡀ
ࡌࡉࡕࡀࡎࡋࡉࡀ ࡐࡀࡂࡓࡉࡀ ࡁࡊࡉࡁࡉࡀ ࡅࡌࡅࡌࡉࡀ ࡍࡉࡔࡉࡌࡕࡀ ࡁࡊࡉࡁࡉࡀ
ࡅࡌࡅࡌࡉࡀ ࡋࡀࡌࡉࡕࡀࡎࡋࡉࡀ ࡄࡉࡍࡏࡋࡀ ࡌࡉࡕࡀࡎࡋࡉࡀ ࡍࡉࡔࡉࡌࡕࡀ ࡁࡏࡅࡁࡀࡃࡉࡀ
ࡎࡀࡉࡍࡉࡀ ࡖ ࡀࡁࡃࡀ ࡗ ࡃࡀࡉࡓࡀ ࡁࡏࡅࡎࡅࡓࡀ ࡖ ࡄࡅࡊࡅࡌࡕࡀ ࡋࡀࡋࡀࡂࡈࡉࡀ
ࡀࡊࡅࡀࡕ ࡖ ࡀࡁࡃࡉࡀ ࡑࡅࡁࡉࡀࡍࡀ ࡖ ࡐࡀࡂࡓࡉࡀ ࡌࡍ ࡐࡀࡂࡓࡀࡉࡄࡅࡍ ࡋࡄࡔࡅࡊࡀ
ࡔࡀࡐࡋࡉࡀ ࡖ ࡀࡁࡃࡉࡀ ࡑࡅࡁࡉࡀࡍࡀ ࡖ ࡎࡀࡈࡀࡍࡀ ࡌࡍ ࡎࡀࡈࡀࡍࡀ ࡋࡍࡅࡓࡀ
ࡀࡆࡋࡉࡀ ࡌࡀࡍ ࡖ ࡀࡁࡉࡃ ࡑࡅࡁࡉࡀࡍࡇ ࡖ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ
ࡁࡄࡀࡆࡉࡍ ࡀࡋࡌࡀ ࡋࡀࡌࡉࡔࡕࡐࡉࡋ ࡗ ࡔࡀࡋࡉࡌ ࡊࡉࡋࡇ ࡌࡀࡋࡊࡉࡀ
ࡖ ࡍࡄࡅࡓࡀ ࡍࡀࡐࡒࡉࡀ ࡀࡋࡀࡍࡐࡀ ࡌࡍ ࡌࡀࡋࡀࡊࡉࡀ ࡖ ࡍࡄࡅࡓࡀ ࡎࡀࡋࡉࡒ
ࡅࡐࡀࡓࡑࡅࡐࡇ ࡍࡀࡄࡅࡓ ࡅࡕࡀࡒࡅࡍ ࡏࡍࡉࡔ ࡏࡍࡉࡔ ࡌࡍ ࡆࡉࡅࡇ ࡉࡀࡄࡉࡁࡋࡇ
ࡅࡌࡍ ࡍࡄࡅࡓࡇ ࡌࡊࡀࡎࡉࡋࡇ ࡅࡌࡍ ࡊࡋࡉࡋࡉࡀ ࡖ ࡆࡀࡊࡅࡀࡕࡀ ࡕࡀࡓࡑࡋࡇ
045 ࡁࡓࡉࡔࡀ ࡅࡌࡉࡃࡀࡌࡉࡀ ࡁࡃࡌࡅ ࡌࡀࡋࡀࡊࡉࡀ ࡖ ࡆࡉࡅࡀ ࡌࡀࡋࡐࡉࡋࡇ
ࡌࡍ ࡕࡅࡔࡁࡉࡄࡕࡇ ࡖ ࡎࡀࡂࡉࡀ ࡅࡋࡀࡁࡀࡈࡋࡀ ࡅࡒࡀࡉࡉࡌ ࡁࡀࡍࡀࡍࡀ
ࡖ ࡍࡄࡅࡓࡀ ࡅࡎࡀࡂࡉࡃ ࡅࡌࡔࡀࡁࡀ ࡋࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡖ ࡀࡋࡇ
ࡁࡓࡀࡄࡌࡉࡀ ࡌࡉࡕࡉࡌࡋࡉࡀ ࡅࡉࡀࡄࡉࡁࡋࡇ ࡌࡍ ࡈࡀࡁࡅࡕࡇ ࡖ ࡍࡀࡐࡔࡀ
ࡅࡎࡀࡂࡉࡀ ࡁࡀࡕࡀࡓ ࡍࡄࡅࡓ ࡅࡌࡉࡕࡒࡀࡉࡀࡌ ࡁࡒࡀࡉࡀࡌࡕࡀ ࡖ ࡔࡓࡀࡓࡀ
ࡖ ࡋࡀࡅ ࡌࡍ ࡋࡁࡅࡔࡀ ࡖ ࡐࡀࡂࡓࡉࡀ ࡄࡅࡀ ࡃࡌࡅࡕࡇ ࡆࡉࡅࡀ ࡃࡀࡊࡉࡀ
ࡖ ࡁࡅࡈࡋࡀࡍࡀ ࡋࡉࡕࡋࡇ ࡊࡅࡋ ࡌࡀࡍ ࡖ ࡊࡔࡉࡈ ࡅࡌࡄࡀࡉࡌࡀࡍ ࡁࡄࡀࡉࡌࡀࡍࡅࡕࡀ
ࡒࡀࡃࡌࡀࡉࡕࡀ ࡌࡉࡕࡒࡀࡉࡀࡌ ࡋࡀࡋࡀࡌ ࡀࡋࡌࡉࡀ ࡁࡄࡉࡓࡀࡉ ࡋࡀࡕࡉࡔࡀࡁࡅࡍ
ࡋࡌࡀࡋࡀࡊࡉࡀ ࡄࡀࡋࡉࡍ ࡖ ࡌࡀࡓࡃࡉࡕࡀ ࡓࡀࡃࡉࡍ ࡁࡏࡅࡌࡀࡌࡀ ࡅࡋࡉࡋࡉࡀ
ࡁࡉࡅࡌࡀ ࡖ ࡆࡉࡅࡀ ࡅࡕࡅࡒࡍࡀ ࡏࡄࡀࡁࡋࡅࡍ ࡋࡍࡀࡄࡅࡓࡉࡀ ࡀࡋࡌࡉࡀ ࡋࡀࡕࡉࡔࡀࡁࡅࡍࡇ
ࡋࡔࡀࡌࡉࡔ ࡆࡉࡃࡀࡍࡀ ࡖ ࡄࡅ ࡒࡀࡃࡅࡔ ࡔࡅࡌࡇ ࡖ ࡄࡅ ࡀࡃࡅࡍࡀࡉ
ࡔࡅࡌࡇ ࡏࡉࡋ ࡏࡉࡋ ࡔࡅࡌࡇ ࡕࡅࡌ ࡏࡕࡋࡇ ࡔࡅࡌࡄࡀࡕࡀ
ࡖ ࡋࡀࡌࡉࡕࡂࡀࡋࡀࡋࡀࡍ ࡁࡀࡋࡌࡀ ࡗ ࡌࡉࡕࡁࡉࡍࡉࡀ ࡏࡅࡓࡀࡔࡋࡀࡌ
ࡌࡃࡉࡍࡕࡀ ࡖ ࡉࡀࡄࡅࡈࡀࡉࡉࡀ ࡖ ࡀࡁࡓࡀࡄࡉࡌ ࡍࡁࡉࡄࡀ ࡌࡉࡕࡉࡒࡓࡉࡀ
ࡁࡏࡅࡓࡀࡔࡋࡀࡌ ࡅࡄࡅ ࡀࡃࡅࡍࡀࡉ ࡒࡀࡓࡉࡀ ࡋࡌࡉࡔࡀ ࡌࡍ ࡈࡅࡓࡀ
ࡖ ࡎࡉࡍࡀࡉ ࡅࡁࡌࡉࡔࡀ ࡀࡅࡃࡉࡀ ࡅࡏࡄࡀࡁࡋࡇ ࡀࡌࡀ ࡋࡍࡀࡐࡔࡀ
ࡒࡀࡓࡉࡀ ࡅࡌࡔࡀࡅࡉࡀ ࡋࡍࡀࡐࡔࡀ ࡁࡉࡕ ࡌࡀࡎࡂࡃࡀ ࡄࡅࡀ ࡀࡌࡀ
ࡖ ࡉࡀࡄࡅࡈࡀࡉࡉࡀ ࡅࡒࡅࡓࡁࡀࡍࡀ ࡖ ࡕࡉࡓࡁࡀ ࡖ ࡄࡉࡅࡀࡍࡉࡀࡕࡀ ࡌࡒࡀࡓࡁࡉࡋࡇ
ࡅࡃࡌࡀ ࡖ ࡄࡉࡅࡀࡍࡉࡀࡕࡀ ࡁࡉࡕ ࡌࡒࡀࡃࡔࡀ ࡆࡀࡄࡋࡉࡀ ࡋࡒࡅࡃࡀࡌࡀࡉࡅࡍ
ࡑࡁࡅ ࡖ ࡋࡀࡄࡀࡉࡉࡁ ࡀࡁࡃࡉࡀ ࡅࡀࡌࡀ ࡖ ࡁࡉࡕ ࡏࡎࡓࡀࡉࡉࡋ
ࡌࡉࡕࡒࡓࡉࡍ ࡅࡍࡀࡐࡔࡀࡉࡅࡍ ࡁࡄࡉࡓࡁࡀ ࡂࡀࡆࡓࡉࡀ ࡅࡆࡌࡀࡉࡅࡍ ࡁࡀࡍࡐࡀࡉࡅࡍ
ࡈࡀࡓࡉࡍ ࡅࡁࡐࡅࡌࡀࡉࡅࡍ ࡔࡀࡉࡐࡉࡀ ࡂࡅࡁࡓࡉࡀ ࡔࡀࡁࡒࡉࡀ ࡏࡍࡔࡉࡀ
ࡅࡋࡅࡀࡕ ࡄࡃࡀࡃࡉࡀ ࡀࡆࡋࡉࡀ ࡅࡌࡍ ࡌࡉࡍࡉࡋࡀࡕ ࡌࡀࡓࡀࡉࡅࡍ ࡊࡀࡐࡓࡉࡀ ࡅࡌࡍ
ࡄࡀࡉࡌࡀࡍࡅࡕࡀ ࡄࡀࡆࡉࡍ ࡀࡐࡊࡉࡀ ࡅࡌࡉࡕࡉࡒࡓࡉࡍ ࡉࡀࡄࡅࡈࡀࡉࡉࡀ
046 ࡖ ࡄࡈࡅࡍ ࡌࡀࡐࡓࡉࡔࡍࡀࡋࡊࡅࡍ ࡕࡀࡓࡌࡉࡃࡀࡉ ࡁࡄࡉࡓࡉࡀ ࡅࡔࡀࡋࡌࡀࡍࡉࡀ
ࡅࡌࡄࡀࡉࡌࡍࡉࡀ ࡖ ࡄࡀࡅࡉࡍ ࡁࡃࡀࡓࡀ ࡄࡀࡍࡀࡕࡇ ࡋࡀࡕࡉࡁࡃࡅࡍ ࡌࡍ
ࡏࡁࡉࡃࡀࡕࡅࡍ ࡅࡌࡍ ࡏࡊࡉࡋࡕࡀࡉࡅࡍ ࡋࡀࡕࡉࡊࡋࡅࡍ ࡅࡋࡀࡕࡉࡔࡕࡅࡍ ࡌࡍ ࡌࡀࡔࡒࡉࡕࡅࡍ
ࡅࡋࡀࡕࡉࡓࡁࡅࡍ ࡌࡉࡍࡀࡉࡅࡍ ࡅࡆࡀࡅࡀ ࡌࡉࡍࡀࡉࡅࡍ ࡋࡀࡕࡉࡋࡉࡂࡈࡅࡍ ࡌࡍ ࡀࡁࡃࡉࡀ
ࡆࡀࡍࡀࡉࡉࡀ ࡖ ࡋࡀࡎࡀࡂࡃࡉࡀ ࡋࡌࡀࡓࡀࡉࡄࡅࡍ ࡅࡀࡐࡊࡉࡀ ࡌࡍ ࡌࡉࡍࡉࡋࡀࡕ ࡌࡀࡓࡀࡉࡅࡍ
ࡅࡊࡀࡐࡓࡉࡀ ࡁࡌࡉࡔࡀ ࡍࡁࡉࡄࡀ ࡖ ࡓࡅࡄࡀ ࡖ ࡀࡉࡕࡉࡋࡅࡍ ࡍࡉࡌࡅࡎࡀ
ࡅࡁࡀ ࡌࡊࡀࡃࡁࡉࡀ ࡅࡌࡊࡀࡃࡁࡉࡀ ࡁࡉࡁࡉࡃࡀࡕࡀ ࡖ ࡀࡁࡓࡀࡄࡉࡌ ࡍࡁࡉࡄࡀ
ࡖ ࡓࡅࡄࡀ ࡁࡈࡅࡓࡀ ࡖ ࡎࡉࡍࡀࡉ ࡗ ࡀࡃࡅࡍࡀࡉ ࡌࡀࡓࡇ ࡓࡀࡄࡉࡌࡋࡇ
ࡍࡀࡐࡔࡀ ࡂࡀࡆࡀࡓ ࡅࡐࡀࡓࡉࡔ ࡌࡍ ࡀࡁࡅࡉࡀ ࡅࡌࡔࡀࡅࡉࡀ ࡋࡍࡀࡐࡔࡀ ࡁࡉࡕ
ࡌࡀࡎࡂࡃࡀ ࡋࡀࡕࡉࡓࡁࡅࡍ ࡌࡍ ࡉࡀࡄࡅࡈࡀࡉࡉࡀ ࡄࡀࡍࡉࡊ ࡖ ࡁࡄࡃࡀ
ࡌࡀࡌࡋࡀ ࡋࡀࡒࡀࡉࡌࡉࡀ ࡌࡍ ࡀࡌࡀ ࡖ ࡉࡀࡄࡅࡈࡀࡉࡉࡀ ࡀࡌࡀࡌࡉࡀ
ࡅࡋࡉࡔࡀࡍࡉࡀ ࡌࡉࡍࡇ ࡍࡀࡐࡒࡉࡀ ࡀࡍࡀ ࡒࡓࡀࡍ ࡅࡐࡀࡒࡃࡀࡍ ࡌࡀࡓࡀࡉ
ࡋࡀࡐࡓࡉࡔࡍࡀࡋࡊࡅࡍ ࡏࡋ ࡀࡌࡀࡌࡉࡀ ࡖ ࡊࡀࡃࡁࡀ ࡅࡏࡋ ࡏࡍࡁࡉࡄࡉࡀ
ࡖ ࡊࡀࡃࡁࡀ ࡅࡏࡋ ࡔࡋࡉࡄࡉࡀ ࡖ ࡄࡅࡎࡓࡀࡍࡀ ࡖ ࡄࡀࡅࡉࡍ ࡁࡌࡀࡓࡁࡀ
ࡖ ࡏࡍࡔࡉࡀ ࡅࡏࡍࡔࡉࡀ ࡁࡀࡈࡍࡉࡁࡄࡅࡍ ࡅࡉࡀࡃࡋࡉࡋࡅࡍ ࡅࡌࡍ ࡊࡀࡓࡎࡀࡕࡅࡍ
ࡖ ࡏࡍࡔࡉࡀ ࡍࡀࡐࡒࡉࡀ ࡁࡐࡀࡂࡓࡉࡀ ࡌࡉࡃࡀࡌࡉࡍ ࡁࡃࡌࡅ ࡐࡀࡂࡓࡉࡀ
ࡅࡔࡅࡕࡀ ࡒࡀࡃࡌࡀࡉࡕࡀ ࡀࡐࡊࡉࡋࡇ ࡅࡊࡀࡃࡁࡀ ࡅࡆࡉࡐࡀ ࡅࡕࡉࡄࡌࡀ ࡓࡀࡌࡉࡍ
ࡁࡀࡋࡌࡀ ࡅࡍࡁࡉࡄࡉࡀ ࡒࡀࡓࡉࡍ ࡋࡍࡀࡐࡔࡀࡉࡄࡅࡍ ࡅࡀࡌࡓࡉࡍ ࡀࡍࡉࡍ
ࡔࡋࡉࡄࡉࡀ ࡀࡍࡉࡍ ࡅࡀࡍࡀ ࡔࡋࡉࡄࡀ ࡒࡀࡃࡌࡀࡉࡀ ࡀࡌࡀࡓࡍࡀ ࡅࡌࡀࡐࡓࡉࡔࡍࡀ
ࡋࡊࡅࡋࡄࡅࡍ ࡁࡍࡀ ࡖ ࡀࡃࡀࡌ ࡖ ࡄࡅࡍ ࡅࡃࡄࡀࡅࡉࡍ ࡅࡌࡉࡕࡉࡀࡃࡋࡉࡀ ࡁࡃࡀࡓࡀ
ࡄࡀࡍࡀࡕࡇ ࡅࡋࡀࡕࡉࡔࡕࡅࡍ ࡋࡔࡅࡕࡇ ࡖ ࡌࡀࡋࡀࡊࡉࡀ ࡖ ࡄࡅࡎࡓࡀࡍࡀ ࡖ ࡎࡀࡈࡉࡍ
ࡅࡌࡀࡎࡈࡉࡍ ࡌࡍ ࡁࡍࡀࡕ ࡀࡍࡀࡔࡀ ࡅࡌࡃࡀࡄࡁࡉࡋࡅࡍ ࡁࡃࡀࡄࡁࡀ ࡅࡊࡀࡎࡐࡀ
ࡅࡀࡓࡂࡁࡀ ࡅࡌࡉࡍࡅࡍࡀ ࡅࡒࡉࡍࡉࡀࡍࡀ ࡅࡑࡉࡋࡌࡉࡀ ࡖ ࡆࡉࡐࡀ ࡅࡃࡌࡀࡅࡀࡕࡀ
047 ࡅࡏࡅࡁࡀࡃࡉࡀ ࡁࡀࡈࡋࡉࡀ ࡅࡆࡌࡀࡓࡇ ࡅࡓࡀࡂࡀࡂࡕࡀ ࡖ ࡀࡋࡌࡀ ࡄࡀࡆࡉࡍ
ࡕࡅࡌ ࡁࡄࡉࡓࡁࡀ ࡅࡎࡉࡐࡀ ࡅࡌࡄࡉࡕࡀ ࡅࡕࡀࡊࡕࡅࡔࡀ ࡅࡒࡓࡀࡁࡀ
ࡅࡄࡀࡅࡒࡀ ࡅࡆࡉࡅࡉࡄࡕࡀ ࡔࡀࡁࡒࡉࡀ ࡏࡋ ࡁࡍࡀࡕ ࡀࡍࡀࡔࡀ ࡅࡌࡀࡄࡉࡒࡉࡋࡅࡍ
ࡅࡌࡉࡃࡀࡄࡋࡉࡋࡅࡍ ࡅࡀࡌࡓࡉࡀ ࡖ ࡍࡉࡃࡉࡄࡋࡅࡍ ࡌࡉࡍࡀࡍ ࡅࡍࡉࡎࡂࡉࡃࡋࡀࡍ ࡅࡍࡀࡅࡃࡅࡁࡀࡍ
ࡕࡅࡌ ࡁࡄࡅࡊࡅࡌࡕࡀ ࡅࡌࡊࡉࡊࡅࡕࡀ ࡅࡔࡀࡁࡀࡔࡕࡀ ࡅࡄࡀࡋࡉࡅࡕࡀ ࡅࡍࡉࡊࡋࡀ
ࡅࡆࡉࡐࡀ ࡀࡆࡋࡉࡍ ࡏࡋ ࡁࡍࡀ ࡖ ࡀࡃࡀࡌ ࡅࡔࡁࡉࡋࡇ ࡋࡋࡉࡁࡀࡉࡄࡅࡍ
ࡅࡔࡅࡌࡀ ࡖ ࡀࡋࡀࡄࡀ ࡓࡉࡌࡉࡋࡅࡍ ࡏࡋ ࡐࡅࡌࡀࡉࡄࡅࡍ ࡅࡆࡉࡐࡀ
ࡅࡊࡀࡃࡁࡀ ࡌࡀࡎࡂࡉࡍ ࡅࡁࡊࡀࡃࡁࡀ ࡑࡀࡉࡌࡉࡍ ࡅࡌࡑࡀࡋࡉࡍ ࡅࡆࡉࡃࡒࡀ
ࡉࡀࡄࡁࡉࡀ ࡊࡕࡀࡁࡉࡀ ࡊࡀࡕࡁࡉࡀ ࡅࡁࡆࡀࡄࡓࡅࡕࡀ ࡌࡆࡀࡄࡓࡉࡋࡅࡍ ࡅࡌࡍ
ࡄࡅࡊࡅࡌࡕࡀ ࡖ ࡏࡄࡀࡁࡋࡉࡀ ࡓࡁࡀ ࡅࡏࡋࡀࡉࡀ ࡅࡀࡉࡕࡉࡕࡉࡋࡊࡅࡍ ࡀࡐ ࡄࡉࡍࡅࡍ
ࡌࡉࡃࡀࡌࡉࡍ ࡅࡀࡌࡓࡉࡍ ࡅࡀࡓࡁࡉࡁࡅࡍ ࡌࡀࡋࡀࡋࡉࡀ ࡖ ࡁࡅࡍ ࡌࡉࡎࡕࡀࡊࡓࡀ
ࡍࡉࡔࡌࡀࡕࡅࡍ ࡅࡀࡐࡊࡉࡋࡇ ࡋࡋࡉࡁࡀࡉࡄࡅࡍ ࡅࡎࡉࡈࡉࡀ ࡓࡀࡌࡉࡁࡇ
ࡁࡀࡋࡌࡀ ࡀࡌࡀࡓࡍࡀࡋࡊࡅࡍ ࡕࡀࡓࡌࡉࡃࡀࡉ ࡋࡀࡕࡉࡔࡌࡅࡍࡀ ࡋࡔࡅࡕࡀ
ࡖ ࡍࡁࡉࡄࡉࡀ ࡖ ࡊࡀࡃࡁࡀ ࡅࡌࡍ ࡏࡅࡄࡓࡀ ࡖ ࡌࡀࡓࡀࡉࡊࡅࡍ ࡋࡀࡕࡉࡑࡋࡅࡍ
ࡀࡌࡉࡍࡈࡅࡋ ࡖ ࡌࡀࡋࡀࡊࡉࡀ ࡖ ࡄࡅࡎࡓࡀࡍࡀ ࡌࡉࡃࡀࡌࡉࡍ ࡁࡃࡌࡅࡕࡀ
ࡃࡉࡋࡀࡍ ࡔࡋࡉࡄࡉࡀ ࡕࡋࡀࡕࡀ ࡖ ࡀࡎࡂࡅࡍ ࡋࡕࡉࡁࡉࡋ ࡀࡐࡓࡉࡔࡉࡍࡊࡅࡍ
ࡀࡐ ࡄࡉࡍࡅࡍ ࡁࡀࡋࡌࡀ ࡌࡀࡎࡂࡉࡍ ࡅࡋࡃࡉࡋࡀࡍ ࡋࡀࡃࡀࡌࡉࡍ ࡆࡉࡅࡀࡉࡄࡅࡍ
ࡋࡀࡅ ࡆࡉࡅࡀ ࡄࡅ ࡅࡋࡁࡅࡔࡀࡉࡄࡅࡍ ࡋࡁࡅࡔࡀ ࡖ ࡍࡅࡓࡀ ࡋࡁࡅࡔࡀࡉࡅࡍ ࡋࡍࡅࡓࡀ
ࡃࡀࡌࡉࡀ ࡅࡋࡁࡅࡔࡀࡉࡄࡅࡍ ࡅࡊࡎࡅࡉࡀࡉࡅࡍ ࡋࡄࡀࡁࡀࡓࡀ ࡄࡀࡔࡊࡀ ࡀࡐ
ࡍࡁࡉࡄࡉࡀ ࡄࡉࡍࡅࡍ ࡅࡁࡃࡌࡅ ࡋࡁࡅࡔࡀࡍ ࡃࡉࡋࡀࡍ ࡌࡉࡃࡀࡌࡉࡍ ࡀࡌࡀࡓࡍࡀࡋࡊࡅࡍ
ࡔࡀࡋࡌࡀࡍࡉࡀ ࡅࡌࡄࡀࡉࡌࡍࡉࡀ ࡋࡀࡕࡉࡔࡉࡐࡋࡅࡍ ࡌࡍ ࡌࡉࡍࡉࡋࡀࡕ ࡌࡀࡓࡀࡉࡊࡅࡍ
ࡀࡍࡀࡕࡅࡍ ࡋࡁࡅࡔ ࡄࡉࡅࡀࡓࡀ ࡅࡏࡕࡊࡀࡎࡅࡍ ࡄࡉࡅࡀࡓࡀ ࡁࡃࡌࡅ
ࡓࡀࡆࡀ ࡖ ࡌࡉࡀ ࡄࡉࡉࡀ ࡅࡄࡀࡋࡅࡋࡉࡀ ࡅࡏࡅࡐࡀࡍࡉࡀ ࡅࡕࡓࡅࡑ ࡁࡓࡉࡔࡀࡉࡊࡅࡍ
ࡁࡅࡓࡆࡉࡍࡒࡉࡀ ࡄࡉࡅࡀࡓࡉࡀ ࡁࡃࡌࡅ ࡊࡋࡉࡋࡉࡀ ࡖ ࡆࡉࡅࡀ ࡖ ࡌࡀࡋࡀࡊࡉࡀ
ࡖ ࡆࡉࡅࡀ ࡁࡓࡉࡔࡀࡉࡄࡅࡍ ࡕࡀࡓࡑࡉࡋࡅࡍ ࡀࡎࡀࡓ ࡁࡄࡀࡋࡑࡀࡉࡊࡅࡍ ࡄࡉࡌࡉࡀࡍࡉࡀ
048 ࡁࡃࡌࡅ ࡒࡅࡌࡁࡉࡀ ࡖ ࡆࡉࡅࡀ ࡖ ࡏࡅࡕࡓࡉࡀ ࡖ ࡍࡄࡅࡓࡀ ࡁࡄࡀࡋࡑࡀࡉࡄࡅࡍ
ࡀࡎࡓࡉࡀ ࡊࡀࡎࡅࡍ ࡐࡀࡂࡓࡀࡉࡊࡅࡍ ࡁࡏࡅࡐࡀࡍࡉࡀ ࡌࡉࡀ ࡖ ࡏࡒࡀࡓࡀ
ࡏࡋࡀࡅࡀࡉࡊࡅࡍ ࡍࡉࡔࡓࡉࡀ ࡋࡂࡅࡈ ࡁࡏࡃࡀࡉࡊࡅࡍ ࡌࡀࡓࡂࡍࡉࡀ ࡀࡊࡅࡀࡕ
ࡌࡀࡓࡂࡍࡉࡀ ࡖ ࡌࡉࡀ ࡄࡉࡉࡀ ࡖ ࡌࡀࡋࡀࡊࡉࡀ ࡖ ࡍࡄࡅࡓࡀ ࡋࡀࡂࡈࡉࡀ
ࡉࡀ ࡌࡄࡀࡉࡌࡍࡉࡀ ࡅࡔࡀࡋࡌࡀࡍࡉࡀ ࡋࡀࡕࡉࡌࡓࡅࡍ ࡌࡉࡍࡃࡀࡌ ࡖ ࡋࡀࡉࡀࡃࡉࡕࡅࡋࡇ
ࡅࡋࡀࡂࡋࡉࡋࡊࡅࡍ ࡅࡋࡀࡉࡉࡕ ࡖ ࡂࡋࡉࡋࡇ ࡊࡀࡎࡉࡀࡕࡀ ࡋࡁࡀࡓ ࡌࡍ ࡓࡁࡀ
ࡏࡋࡀࡉࡀ ࡌࡀࡓࡀ ࡖ ࡓࡀࡁࡅࡕࡀ ࡌࡀࡓࡀࡉࡄࡅࡍ ࡖ ࡊࡅࡋࡄࡅࡍ ࡀࡋࡌࡉࡀ
ࡉࡀ ࡌࡄࡀࡉࡌࡍࡉࡀ ࡅࡔࡀࡋࡌࡀࡍࡉࡀ ࡆࡀࡓࡉࡆ ࡍࡀࡐࡔࡀࡉࡊࡅࡍ ࡁࡆࡀࡉࡍࡉࡀ
ࡖ ࡋࡀࡅ ࡌࡍ ࡐࡀࡓࡆࡋࡀ ࡄࡅࡀ ࡆࡀࡉࡍࡀࡉࡊࡅࡍ ࡍࡀࡑࡉࡓࡅࡕࡀ ࡅࡄࡀࡉࡌࡀࡍࡅࡕ
ࡊࡅࡔࡈࡀ ࡀࡊࡅࡀࡕ ࡖ ࡄࡀࡆࡉࡕࡅࡍ ࡁࡀࡉࡍࡀࡉࡊࡅࡍ ࡅࡒࡀࡓࡉࡕࡅࡍ ࡁࡐࡅࡌࡀࡉࡊࡅࡍ
ࡅࡔࡀࡌࡉࡕࡅࡍ ࡁࡏࡅࡃࡍࡀࡉࡊࡅࡍ ࡌࡍ ࡄࡅࡊࡅࡌࡕࡀ ࡏࡁࡉࡃ ࡀࡌࡉࡍࡈࡅࡋ
ࡖ ࡄࡀࡆࡉࡍ ࡁࡀࡉࡍࡀࡉࡅࡍ ࡅࡒࡀࡓࡉࡍ ࡁࡐࡅࡌࡀࡉࡅࡍ ࡅࡔࡀࡌࡉࡍ
ࡁࡏࡅࡃࡍࡀࡉࡅࡍ ࡅࡌࡉࡍࡃࡀࡌ ࡖ ࡔࡀࡐࡉࡓ ࡁࡏࡃࡀࡉࡄࡅࡍ ࡋࡀࡀࡁࡃࡉࡀ
ࡅࡀࡒࡓࡉࡋࡇ ࡋࡂࡅࡐࡍࡀ ࡁࡉࡔࡀ ࡖ ࡌࡉࡀ ࡔࡀࡕࡉࡍ ࡅࡐࡉࡓࡉࡀ
ࡏࡌࡁࡉࡀ ࡅࡏࡋࡀࡍࡉࡀ ࡑࡀࡅࡉࡍ ࡅࡊࡀࡃࡁࡀ ࡁࡃࡉࡍࡀ ࡖ ࡌࡅࡕࡀ ࡌࡉࡕࡉࡐࡊࡀ
ࡌࡉࡍࡀࡉࡄࡅࡍ ࡋࡀࡏࡃࡀ ࡅࡋࡀࡐࡓࡀࡔ ࡀࡊࡅࡀࡕ ࡏࡁࡉࡃࡀࡕࡅࡍ ࡌࡉࡔࡕࡀࡉࡋࡉࡀ
ࡅࡌࡎࡀࡄࡃࡉࡋࡅࡍ ࡎࡀࡄࡃࡉࡀ ࡖ ࡀࡆࡋࡉࡀ ࡋࡉࡀࡌࡉࡍࡅࡍ ࡅࡋࡎࡌࡀࡋࡅࡍ
ࡖ ࡊࡅࡋࡄࡅࡍ ࡁࡍࡇ ࡖ ࡀࡃࡀࡌ ࡀࡍࡀ ࡌࡀࡐࡓࡉࡔࡍࡀࡋࡊࡅࡍ ࡀࡊࡅࡀࡕ ࡓࡁࡀ
ࡐࡀࡓࡃࡀࡍ ࡀࡌࡀࡓࡍࡀࡋࡊࡅࡍ ࡏࡋ ࡍࡄࡅࡓࡀ ࡖ ࡍࡐࡉࡔ ࡅࡎࡀࡊࡀ ࡋࡉࡕࡋࡇ
ࡀࡌࡀࡓࡍࡀࡋࡊࡅࡍ ࡏࡋ ࡄࡔࡅࡊࡀ ࡅࡏࡋ ࡍࡅࡓࡀ ࡖ ࡉࡀࡒࡃࡀ
ࡖ ࡍࡉࡀࡄࡅࡀ ࡅࡈࡀࡁࡅࡕࡀ ࡋࡉࡕࡋࡇ ࡀࡌࡀࡓࡍࡀࡋࡊࡅࡍ ࡏࡋ ࡎࡀࡈࡀࡍࡀ ࡖ ࡄࡀࡉࡋࡀ
ࡅࡔࡓࡀࡓࡀ ࡋࡉࡕࡋࡇ ࡅࡁࡀࡈࡉࡋ ࡁࡍࡅࡓࡀ ࡖ ࡉࡀࡒࡃࡀ ࡅࡁࡊࡉࡀࡍࡀ ࡖ ࡌࡉࡍࡇ
ࡄࡅࡀ ࡕࡅࡌ ࡏࡌࡀࡓࡋࡊࡅࡍ ࡍࡀࡑࡅࡓࡀࡉࡉࡀ ࡖ ࡏࡊࡀ ࡅࡃࡄࡀࡅࡉࡍ ࡅࡌࡉࡕࡉࡀࡃࡋࡉࡀ
ࡁࡀࡋࡌࡀ ࡄࡀࡆࡉࡍ ࡃࡀࡓࡀ ࡒࡀࡃࡌࡀࡉࡀ ࡀࡋࡌࡀ ࡁࡄࡉࡓࡁࡀ ࡅࡌࡅࡕࡀࡍࡀ
ࡏࡔࡕࡒࡉࡋ ࡍࡉࡔࡌࡀࡕࡀ ࡌࡍ ࡐࡀࡂࡓࡀࡉࡄࡅࡍ ࡍࡀࡐࡒࡉࡀ ࡅࡋࡍࡄࡅࡓࡀ
049 ࡎࡀࡋࡒࡉࡀ ࡀࡌࡉࡍࡈࡅࡋ ࡖ ࡏࡕࡉࡕࡋࡅࡍ ࡋࡔࡀࡋࡌࡀࡍࡉࡀ ࡅࡌࡄࡀࡉࡌࡍࡉࡀ
ࡁࡄࡀࡍࡀࡕࡇ ࡌࡀࡐࡉࡒࡕࡀ ࡌࡍ ࡐࡀࡂࡓࡀࡉࡄࡅࡍ ࡍࡀࡐࡒࡉࡍ
ࡅࡏࡕࡉࡕࡋࡀࡊ ࡋࡀࡊ ࡀࡃࡀࡌ ࡔࡍࡉࡀ ࡀࡋࡐࡀ ࡌࡉࡃࡀࡓࡁࡇ
ࡁࡀࡋࡌࡀ ࡅࡌࡍ ࡒࡅࡃࡀࡌ ࡄࡉࡃࡁࡀ ࡕࡉࡎࡀࡒ ࡅࡄࡀࡉࡆࡀࡊ
ࡕࡉࡐࡅࡒ ࡄࡀࡅࡀ ࡆࡀࡅࡀࡊ ࡅࡄࡀࡉࡆࡀࡊ ࡔࡅࡓࡁࡀࡕࡀࡊ
ࡊࡅࡋࡄࡉࡍ ࡋࡁࡀࡓ ࡌࡍ ࡓࡀࡌ ࡂࡀࡁࡓࡀ ࡅࡓࡅࡃ ࡏࡍࡕࡀ
ࡌࡉࡍࡀࡉࡄࡅࡍ ࡍࡉࡕࡍࡀࡐࡀࡔ ࡀࡋࡌࡀ ࡅࡀࡋࡌࡀ ࡌࡉࡍࡀࡉࡄࡅࡍ ࡍࡏࡕࡉࡀࡉࡀࡓ
ࡊࡅࡋࡄࡅࡍ ࡁࡉࡄࡃࡀ ࡌࡀࡌࡋࡀ ࡅࡄࡃࡀ ࡕࡅࡔࡁࡉࡄࡕࡀ ࡍࡉࡒࡓࡅࡍ
ࡖ ࡀࡍࡀ ࡀࡉࡕࡉࡕ ࡋࡀࡋࡌࡀ ࡄࡀࡆࡉࡍ ࡖ ࡄࡉࡍࡅࡍ ࡁࡂࡀࡅࡇ ࡍࡉࡔࡀࡁࡅࡍ
ࡅࡄࡀࡉࡆࡀࡊ ࡀࡋࡌࡀ ࡁࡉࡀࡒࡃࡀࡍࡀ ࡍࡉࡕࡉࡍࡎࡉࡁ ࡀࡌࡉࡍࡈࡅࡋ
ࡖ ࡏࡕࡉࡕࡋࡅࡍ ࡋࡁࡍࡉࡀ ࡔࡅࡓࡁࡀ ࡓࡁࡀ ࡖ ࡄࡉࡉࡀ ࡁࡄࡀࡍࡀࡕࡇ
ࡌࡀࡐࡉࡒࡕࡀ ࡌࡍ ࡐࡀࡂࡓࡀࡉࡄࡅࡍ ࡍࡀࡐࡒࡉࡍ ࡋࡁࡀࡓ ࡌࡍ
ࡕࡓࡉࡍ ࡔࡅࡓࡁࡀࡉ ࡂࡀࡁࡓࡀ ࡅࡔࡀࡓࡄࡀࡁࡏࡉࡋ ࡏࡍࡕࡀ ࡖ ࡌࡉࡍࡀࡉࡄࡅࡍ
ࡍࡉࡕࡍࡀࡐࡀࡔ ࡀࡋࡌࡀ ࡅࡔࡅࡓࡁࡀࡉ ࡂࡀࡁࡓࡀ ࡓࡉࡔࡀ ࡖ ࡃࡀࡓࡀ
ࡍࡏࡕࡒࡓࡉࡀ ࡍࡉࡔࡌࡀࡕࡀ ࡖ ࡍࡀࡐࡒࡀ ࡁࡉࡀࡒࡃࡀࡍࡀ ࡊࡅࡋࡄࡉࡍ
ࡋࡍࡄࡅࡓࡀ ࡎࡀࡋࡒࡀ ࡀࡌࡉࡍࡈࡅࡋ ࡖ ࡋࡀࡌࡊࡀࡃࡁࡉࡀ ࡁࡔࡅࡕࡀ
ࡖ ࡌࡀࡓࡀࡉࡄࡅࡍ ࡔࡀࡃࡀࡓࡋࡅࡍ ࡌࡍ ࡃࡀࡓࡀ ࡖ ࡓࡀࡌ ࡅࡓࡅࡃ
ࡅࡀࡋࡌࡀ ࡋࡃࡀࡓࡀ ࡖ ࡔࡅࡓࡁࡀࡉ ࡅࡔࡀࡓࡄࡀࡁࡏࡉࡋ ࡀࡍࡀࡔࡉࡀ
ࡍࡉࡕࡍࡀࡐࡔࡅࡍ ࡁࡌࡀࡋࡀࡋࡉࡀ ࡄࡀࡋࡉࡍ ࡍࡉࡔࡀࡁࡅࡍ ࡅࡌࡍ ࡌࡉࡍࡉࡋࡀࡕ
ࡏࡒࡀࡓࡀ ࡋࡀࡍࡉࡐࡊࡅࡍ ࡅࡗ ࡍࡀࡐࡒࡉࡍ ࡏࡎࡓࡉࡍ ࡅࡄࡀࡌࡔࡀ ࡃࡀࡓࡉࡀ
ࡀࡋࡌࡀ ࡁࡌࡉࡀ ࡍࡉࡕࡉࡍࡎࡉࡁ ࡅࡁࡍࡉࡀ ࡀࡍࡀࡔࡀ ࡁࡌࡀࡐࡉࡒࡕࡀ
ࡖ ࡌࡉࡀ ࡌࡍ ࡐࡀࡂࡓࡀࡉࡄࡅࡍ ࡍࡉࡐࡒࡅࡍ ࡀࡌࡉࡍࡈࡅࡋ ࡖ ࡊࡕࡉࡁࡋࡇ
ࡋࡃࡀࡓࡀ ࡄࡀࡍࡀࡕࡇ ࡖ ࡐࡀࡂࡓࡉࡀ ࡓࡀࡌࡉࡀ ࡍࡉࡌࡉࡕࡅࡍ ࡅࡍࡉࡔࡌࡀࡕࡀ
ࡋࡍࡄࡅࡓࡀ ࡍࡀࡎࡒࡀ ࡋࡁࡀࡓ ࡌࡍ ࡍࡅ ࡂࡀࡁࡓࡀ ࡅࡍࡅࡓࡀࡉࡕࡀ ࡆࡀࡅࡇ
