Haran Gauaita حران گویثا

Haran Gauaita

Author: Bogdan Burtea

Source: (Mandäistische Forschungen 7) Bogdan Burtea (2020) Haran Gauaita: Ein Text zur Geschichte der Mandäer . Edition, Übersetzung, Kommentar

Published by: Harrassowitz Verlag

Stable URL: https://www.harrassowitz-verlag.de/Geschichte/Haran_Gauaita._Ein_Text_zur_Geschichte_der_Mand%C3%A4er/titel_6488.ahtml

Unicode by: Ibrāhīm Šafiʿī (University of Tehrān)

 

 

ࡄࡀࡓࡀࡍ ࡂࡀࡅࡀࡉࡕࡀ

 

ࡌࡀࡓࡀࡉ ࡌࡔࡀࡁࡀ

(2496) ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡅࡄࡀࡉࡋࡀ ࡅࡔࡓࡀࡓࡀ ࡅࡏࡌࡓࡀ ࡅࡔࡉࡌࡀ ࡅࡄࡀࡃࡅࡀࡕ ࡋࡉࡁࡀ ࡅࡔࡀࡁࡉࡒ ࡄࡀࡈࡀࡉࡉࡀ ࡍࡉࡄࡅࡉࡋࡉࡀ ࡋࡃࡉࡋࡉࡀ ࡆࡀࡊࡉࡀ 

(2497) ࡆࡉࡄࡓࡅࡍ ࡁࡓ ࡔࡀࡃࡉࡀ ࡅࡋࡔࡉࡕࡋࡀࡉ ࡅࡋࡀࡄࡀࡉ ࡅࡋࡀࡁࡀࡄࡀࡕࡀࡉ ࡅࡁࡄࡀࡉࡋࡀ ࡖ ࡉࡀࡅࡀࡓ ࡆࡉࡅࡀ ࡅࡎࡉࡌࡀࡕࡄࡉࡉࡀ ࡎࡀ 

(2498) ○ ࡄࡀࡓࡀࡍ ࡂࡀࡅࡀࡉࡕࡀ ࡌࡒࡀࡁࡋࡀ ࡏࡋࡇ ࡄࡀࡍࡀࡕࡇ ࡌࡃࡉࡍࡕࡀ ࡖ ࡍࡀࡑࡅࡓࡀࡉࡉࡀ ࡁࡂࡀࡅࡇ ࡀࡌࡉࡍࡈࡅࡋ ࡖ ࡋࡀࡄࡅࡀࡋࡅࡍ ࡏࡅࡄࡓࡀ ࡏࡋ ࡌࡀࡋࡊࡉࡀ ࡖ 

(2499) ࡉࡀࡄࡅࡈࡀࡉࡉࡀ ࡏࡋࡀࡅࡀࡉࡄࡅࡍ ࡀࡓࡃࡁࡀࡍ ࡌࡀࡋࡊࡀ ࡅࡔࡉࡕࡉࡍ ࡀࡋࡐࡉࡀ ࡍࡀࡑࡅࡓࡀࡉࡉࡀ ࡏࡕࡐࡀࡓࡀࡒ ࡌࡍ ࡓࡅࡔࡅࡌࡀࡉࡄࡅࡍ ࡖ ࡔࡅࡁࡀ ࡅࡀࡋࡁࡉࡅࡍ ࡋࡈࡅࡓࡀ ࡖ ࡌࡉࡃࡀࡉ 

(2500) ࡃࡅࡊࡕࡀ ࡖ ࡋࡀࡔࡕࡀࡋࡀࡈ ࡏࡋࡀࡅࡀࡉࡀࡍ ࡖ ࡔࡅࡓࡁࡀࡕࡀ ࡊࡅࡋࡄࡅࡍ ࡅࡁࡍࡅࡍ ࡁࡉࡌࡀࡍࡃࡉࡀ ࡅࡃࡀࡓࡉࡅࡍ ࡁࡒࡀࡋࡀ ࡖ ࡄࡉࡉࡀ ࡅࡁࡄࡀࡉࡋࡇ ࡖ ࡌࡀࡋࡊࡀ ࡓࡀࡌࡀ ࡖ 

(2501) ࡍࡄࡅࡓࡀ ࡀࡋࡌࡀ ࡖ ࡀࡊࡀࡋࡉࡅࡍ ࡅࡓࡉࡄࡌࡀ ࡌࡀࡓࡀ ࡖ ࡀࡃࡅࡍࡀࡉ ࡀࡋࡌࡀ ࡖ ࡁࡉࡕ ࡏࡎࡓࡀࡉࡉࡋ ࡏࡕࡉࡒࡓࡉࡀ ࡑࡁࡅ ࡖ ࡋࡀࡉࡀࡄࡉࡁ ࡏࡁࡌࡀࡓࡁࡀ ࡖ 

(2502) ࡌࡉࡓࡉࡀࡉ ࡁࡓࡀࡕࡇ ࡖ ࡌࡉࡔࡀ ࡏࡕࡉࡊࡎࡉࡀ ࡁࡌࡀࡓࡁࡀ ࡏࡕࡔࡀ ࡉࡀࡄࡓࡉࡀ ࡄࡀࡆࡉࡋࡇ ࡀࡋࡌࡀ ࡖ ࡌࡀࡈࡉࡀ ࡕࡔࡀ ࡉࡀࡄࡓࡉࡀ ࡄࡀࡌࡁࡋࡀࡕ ࡅࡉࡀࡃࡀࡋࡕࡇ 

(2503) ࡋࡌࡔࡉࡄࡀ ࡅࡍࡐࡀࡒ ࡅࡒࡓࡀ ࡀࡌࡀ ࡋࡍࡀࡐࡔࡉࡇ ࡅࡌࡀࡋࡉࡋ ࡌࡍ ࡌࡉࡕࡀ ࡅࡍࡀࡎࡉࡁࡋࡇ ࡋࡓࡀࡆࡉࡀ ࡖ ࡏࡊࡉࡋࡕࡀ ࡌࡉࡍࡇ ࡅࡋࡂࡀࡈ ࡐࡅࡌࡀ ࡌࡍ ࡏࡊࡉࡋࡕࡀ ࡅࡋࡂࡀࡈ 

(2504) ࡀࡌࡀ ࡋࡍࡀࡐࡔࡉࡇ ࡅࡏࡕࡉࡒࡓࡉࡀ ࡏࡔࡅࡌ ࡌࡔࡉࡄࡀ ࡁࡀࡈࡋࡀ ࡅࡀࡐࡉࡊࡋࡅࡍ ࡋࡊࡅࡋࡄࡅࡍ ࡅࡔࡀࡅࡉࡍࡅࡍ ࡀࡊࡅࡀࡕ ࡍࡀࡐࡔࡉࡇ ࡖ ࡀࡐࡀࡊࡏࡍࡉࡍ ࡏࡋ ࡌࡀࡋࡀࡋࡉࡀ 

(2505) ࡖ ࡍࡄࡅࡓࡀ ࡅࡔࡀࡍࡉࡍࡅࡍ ࡖ ࡄࡔࡅࡊࡀ ࡅࡀࡐࡀࡊࡉࡍࡅࡍ ࡀࡋࡌࡀ ࡋࡏࡋࡀࡉ ࡅࡌࡍࡉࡉࡉࡀ ࡅࡀࡐࡀࡊࡉࡍࡅࡍ ࡏࡋ ࡏࡁࡉࡃࡀࡕࡀ ࡊࡅࡋࡄࡅࡍ ࡄࡅ ࡅࡀࡄࡇ ࡋࡈࡅࡓࡀ ࡖ ࡎࡉࡍࡀࡉ 

(2506) ࡉࡀࡕࡁࡉࡀ ࡅࡌࡔࡀࡅࡉࡋࡇ ࡋࡊࡅࡋࡄࡅࡍ ࡔࡅࡓࡁࡀࡕࡀ ࡅࡀࡐࡉࡊ ࡅࡌࡔࡀࡅࡉࡀ ࡀࡌࡀ ࡋࡍࡀࡐࡔࡉࡇ ࡅࡌࡉࡕࡉࡒࡓࡉࡀ ࡊࡓࡀࡎࡈࡉࡍࡀࡉࡉࡀ ○ ࡅࡌࡍ ࡍࡉࡑࡓࡀࡕ 

(2507) ࡌࡃࡉࡍࡕࡀ ࡖ ࡉࡀࡄࡅࡈࡀࡉࡉࡀ ࡖ ࡄࡏ ࡒࡅࡌ ࡌࡃࡉࡍࡕࡇ ࡌࡉࡕࡒࡉࡓࡉࡀ ○ ࡖ ࡄࡏ ࡔࡊࡉࡍࡕࡇ ࡖ ࡍࡁࡅ ࡁࡂࡀࡅࡇ ࡖ ࡒࡅࡌ ࡊࡀࡍ ࡊࡉࡍࡕࡀ ࡅࡊࡉࡅࡀࡍ 

(2508) ࡁࡈࡅࡓࡀ ࡖ ࡎࡉࡍࡀࡉ ࡊࡀࡍ ࡊࡉࡍࡕࡀ ○ ࡁࡉࡕ ࡀࡓࡁࡀࡉࡉࡀ ࡖ ࡄࡏ ࡌࡉࡕࡒࡉࡓࡉࡀ ࡁࡀࡑࡓࡀ ࡖ ࡄࡏ ࡎࡅࡐࡀࡕ ࡆࡀࡁࡀ ࡌࡉࡕࡒࡉࡓࡉࡀ ○ ࡄࡃࡀ 

(2509) ࡏࡕࡄࡀࡔࡀࡁ ࡄࡉࡉࡀ ࡒࡀࡃࡌࡀࡉࡉࡀ ࡋࡌࡉࡋࡂࡀࡈ ࡋࡉࡂࡈࡕࡇ ࡖ ࡏࡄࡀࡌࡁࡋࡅࡍ ࡋࡓࡀࡆࡉࡀ ࡖ ࡀࡃࡅࡍࡀࡉ ࡌࡍ ࡉࡀࡌࡀࡌࡉࡀ ࡅࡋࡄࡀࡌࡁࡅࡋࡉࡀ ࡄࡀࡔࡀࡁࡕࡀ 

(2510) ࡖ ࡓࡅࡄࡀ ࡅࡀࡃࡅࡍࡀࡉ ࡀࡕࡀ ࡌࡍ ࡁࡀࡉࡕࡀ ࡖ ࡓࡅࡄࡀ ࡅࡄࡀࡌࡁࡅࡋࡉࡀ ࡄࡀࡔࡀࡁࡕࡀ ࡖ ࡓࡅࡄࡀ ࡌࡍ ࡒࡅࡃࡀࡌ ࡖ ࡀࡁࡀ ࡓࡁࡀ ࡖ ࡏࡒࡀࡓࡀ ࡋࡔࡀࡓࡄࡀࡁࡏࡉࡋ 

(2511) ࡓࡀࡆࡉࡀ ○ ࡅࡁࡕࡌࡀࡓ ࡉࡀࡓࡃࡍࡀ ࡃࡀࡊࡉࡀ ࡅࡏࡎࡕࡀࡄࡃࡀࡕ ࡎࡀࡄࡃࡅࡕࡀ ࡖ ࡊࡅࡔࡈࡀ ࡅࡏࡑࡈࡀࡓࡀࡓ ࡁࡀࡆࡉࡓࡀ ࡃࡀࡊࡉࡀ ࡁ ࡉࡀࡓࡃࡍࡀ ࡓࡁࡀ ○ ࡅࡀࡕࡀ 

(2512) ࡅࡆࡃࡓࡀ ࡏࡌࡁࡀࡓࡁࡀ ࡖ ࡏࡍࡉࡔࡁࡀࡉ ࡖ ࡌࡉࡍࡇ ࡄࡀࡅࡉࡀ ࡉࡀࡋࡃࡀ ࡍࡁࡉࡄࡀ ࡖ ࡀࡁࡀ ࡓࡁࡀ ࡖ ࡏࡒࡀࡓࡀ ࡌࡔࡀࡁࡀ ࡔࡅࡌࡇ ࡋࡄࡀࡌࡁࡅࡋࡉࡀ 

(2513) ࡁࡉࡍࡉࡀࡍࡀ ࡖ ࡓࡅࡄࡀ ࡅࡀࡃࡅࡍࡀࡉ ○ ࡁࡁࡀࡉࡕࡀ ࡖ ࡁࡍࡀࡕ ࡓࡅࡄࡀ ࡅࡔࡅࡁࡀ ࡁࡍࡇ ࡅࡄࡃࡀࡓࡕࡇ ࡋࡃࡀࡅࡓࡀ ࡊࡅࡋࡇ ○ ࡌࡀࡃࡀࡉ ࡖ ࡓࡅࡄࡀ ࡅࡔࡅࡁࡀ 

(2514) ࡁࡍࡇ ࡏࡋࡇ ࡋࡀࡌࡑࡅࡍ ࡀࡌࡉࡍࡈࡅࡋ ࡖ ࡏࡕࡋࡇ ࡋࡄࡉࡁࡉࡋ ࡆࡉࡅࡀ ○ ࡖ ࡄࡉࡉࡀ ࡅࡔࡀࡓࡅࡁࡀ ࡔࡅࡓࡁࡀ ࡁࡀࡉࡕࡀ ࡖ ࡁࡍࡀࡕ ࡓࡅࡄࡀ ࡅࡔࡅࡁࡀ ࡁࡍࡇ ࡖ 

(2515) ࡋࡀࡕࡉࡔࡀࡋࡀࡈ ○ ࡁࡌࡉࡑࡀࡕ ࡀࡋࡌࡉࡀ ࡅࡍࡉࡕࡉࡒࡓࡉࡀ ࡉࡀࡄࡉࡀ ࡉࡅࡄࡀࡍࡀ ࡍࡁࡉࡄࡀ ࡖ ࡊࡅࡔࡈࡀ ࡔࡋࡉࡄࡀ ○ ࡖ ࡃࡀࡓ ࡋࡏࡅࡓࡀࡔࡋࡀࡌ ࡌࡃࡉࡍࡕࡀ 

(2516) ࡀࡎࡉࡀ ࡖ ࡎࡉࡌࡀࡍࡀ ࡌࡉࡀ ࡅࡄࡉࡉࡀ ࡀࡎࡉࡀ ࡖ ࡌࡀࡎࡉࡀ ○ ࡖ ࡌࡍ ࡓࡅࡄࡀ ࡅࡀࡃࡅࡍࡀࡉ ࡍࡀࡐࡒࡉࡀ ࡋࡄࡀࡌࡁࡅࡋࡉࡀ ࡁࡏࡑࡈࡅࡍࡀ ࡖ ࡐࡀࡂࡓࡇ ࡅࡄࡀࡉࡆࡀࡊ ○ ࡗ 

(2517) ࡌࡉࡕࡀࡅࡃࡀࡋ ࡉࡀࡋࡃࡇ ࡀࡕࡀ ࡏࡍࡅࡔ ࡏࡅࡕࡓࡀ ࡁࡐࡀࡒࡀࡃࡕࡀ ࡖ ࡀࡁࡀ ࡓࡁࡀ ࡖ ࡏࡒࡀࡓࡀ ࡅࡀࡕࡅࡍ ࡒࡅࡃࡀࡌ ࡄࡉࡁࡉࡋ ࡆࡉࡅࡀ ࡁࡐࡀࡒࡀࡃࡕࡀ ࡖ 

(2518) ࡀࡁࡀ ࡓࡁࡀ ࡖ ࡏࡒࡀࡓࡀ ࡖ ࡀࡆࡉࡋࡉࡅࡍ ࡖ ࡔࡉࡓࡁࡉࡀ ࡋࡅࡀࡕ ࡈࡅࡓࡀ ࡖ ࡎࡉࡍࡀࡉ ࡅࡀࡆࡉࡋࡉࡅࡍ ○ ࡋࡅࡀࡕ ࡊࡉࡍࡕࡀ ࡖ ࡓࡅࡄࡀ ࡖ ࡌࡉࡕࡒࡉࡓࡉࡀ ࡖ ࡏࡔࡓࡏࡉࡀ 

(2519) ࡋࡅࡀࡕ ࡃࡅࡊࡕࡀ ࡖ ࡏࡕࡁࡉࡍࡉࡀࡕ ࡊࡀࡅࡉࡋࡀ ࡕࡉࡄࡅࡉࡋࡇ ࡐࡀࡓࡒࡀ ࡋࡉࡀࡋࡃࡀ ○ ࡁࡐࡀࡓࡅࡀࡍ ࡈࡅࡓࡀ ࡄࡉࡅࡀࡓࡀ ࡃࡅࡊࡕࡀ ࡖ ࡀࡓࡒࡀ ࡅࡐࡉࡓࡀ ࡅࡓࡒࡉࡄࡀ 

(2520) ࡓࡁࡀ ࡄࡀࡕࡀࡌ ○ ࡏࡋࡀࡍࡀ ࡖ ࡌࡓࡀࡁࡉࡀ ࡉࡀࡍࡒࡉࡀ ࡅࡊࡀࡌࡓࡅࡉࡀ ࡋࡑࡅࡐࡍࡀࡉ ࡋࡉࡋࡉࡕࡀ ࡃࡅࡊࡕࡀ ࡖ ࡗ ࡄࡀࡅࡉࡍ ࡁࡌࡀࡑࡁࡅࡕࡀ ࡄࡀࡉࡕࡀ ࡅࡃࡀࡊࡉࡅࡉࡀ 

(2521) ࡋࡉࡀࡋࡃࡀ ࡉࡀࡄࡉࡀ ࡉࡅࡄࡀࡍࡀ ࡔࡋࡉࡄࡀ ࡖ ࡊࡅࡔࡈࡀ ○ ࡅࡋࡀࡔࡀࡍࡉࡀ ࡌࡉࡌࡓࡀ ࡅࡌࡀࡌࡋࡀ ࡖ ࡀࡕࡀ ࡌࡍ ࡒࡅࡃࡀࡌ ࡀࡁࡀ ࡓࡁࡀ ࡖ ࡏࡒࡀࡓࡀ ○ ࡍࡎࡀࡁࡕࡇ 

(2522) ࡑࡅࡐࡍࡀࡉ ࡋࡉࡋࡉࡕࡀ ࡌࡍ ࡒࡅࡃࡀࡌ ࡖ ࡀࡉࡍࡀ ࡖ ࡏࡌࡇ ࡍࡀࡐࡋࡀ ࡏࡋࡇ ○ ࡁࡌࡉࡌࡓࡀ ࡖ ࡀࡍࡅࡔ ࡏࡅࡕࡓࡀ ࡅࡋࡅࡀࡕ ࡐࡀࡓࡅࡀࡍ ࡈࡅࡓࡀ ࡄࡉࡅࡀࡓࡀ 

(2523) ࡎࡋࡉࡒ ○ ࡓࡒࡉࡄࡀ ࡓࡁࡀ ࡄࡀࡕࡀࡌ ࡔࡉࡓࡉࡅࡉࡇ ࡏࡋ ࡉࡀࡄࡉࡀ ࡉࡅࡄࡀࡍࡀ ࡋࡅࡀࡕ ࡏࡋࡀࡍࡀ ࡖ ࡌࡓࡀࡁࡉࡀ ࡉࡀࡍࡒࡉࡀ ○ ࡄࡀࡉࡆࡀࡊ ࡑࡅࡐࡍࡀࡉ ࡋࡉࡋࡉࡕࡀ 

(2524) ࡏࡕࡊࡀࡌࡓࡀࡕ ࡋࡃࡅࡊࡕࡀ ࡊࡃ ࡄࡅࡍ ࡕࡋࡀࡕࡉࡍ ࡉࡅࡌࡉࡀ ࡀࡕࡀ ࡄࡉࡁࡉࡋ ࡆࡉࡅࡀ ࡁࡐࡀࡒࡀࡃࡕࡀ ࡖ ࡀࡁࡀ ࡓࡁࡀ ࡒࡀࡃࡌࡀࡉࡀ ࡖ ࡏࡒࡀࡓࡀ ࡅࡀࡕࡀ ࡋࡈࡅࡓࡀ 

(2525) ࡖ ࡌࡀࡃࡀࡉ ࡅࡔࡀࡃࡓࡀ ࡋࡀࡍࡅࡔ ࡏࡅࡕࡓࡀ ࡋࡁࡉࡄࡓࡀࡌ ࡁࡓ ࡏࡅࡕࡓࡉࡀ ࡅࡋ ࡈࡅࡓࡀ ࡖ ࡌࡀࡃࡀࡉ ࡅࡍࡉࡎࡁࡀ ࡋࡁࡉࡄࡓࡀࡌ ࡌࡍ ࡈࡅࡓࡀ ࡖ ࡌࡀࡃࡀࡉ 

(2526) ࡅࡀࡆࡀࡋ ○ ࡅࡀࡒࡀࡌࡋࡇ ࡌࡀࡑࡁࡅࡕࡀ ࡑࡉࡁࡅࡉࡇ ࡅࡔࡉࡃࡉࡇ ࡋࡉࡀࡍࡒࡀ ࡋࡅࡀࡕ ࡏࡋࡀࡍࡀ ࡖ ࡌࡓࡀࡁࡉࡀ ࡉࡀࡍࡒࡉࡀ ࡄࡅࡀ ࡁࡓ ࡔࡀࡁࡀ ࡔࡍࡉࡀ ࡀࡕࡀ 

(2527) ࡏࡍࡅࡔ ࡏࡅࡕࡓࡀ ࡅࡊࡃࡀࡁࡋࡇ ࡀ ࡁࡀ ࡂࡀ ࡃࡀ ○ ࡅࡀࡋࡌࡀ ࡖ ࡄࡅࡀ ࡁࡓ ࡎࡓࡉࡍ ࡅࡕࡀࡓࡕࡉࡍ ࡏࡔࡍࡉࡀ ࡉࡀࡋࡐࡇ ࡖ ࡊࡅࡋࡇ ࡍࡀࡑࡉࡓࡅࡕࡀ ○ ࡄࡀࡉࡆࡀࡊ 

(2528) ࡁࡐࡀࡒࡀࡃࡕࡀ ࡖ ࡀࡁࡀ ࡓࡁࡀ ࡖ ࡏࡒࡀࡓࡀ ࡅࡕࡓࡀࡑࡋࡇ ࡕࡀࡂࡀ ࡅࡀࡅࡕࡁࡇ ࡏࡍࡅࡔ ࡏࡅࡕࡓࡀ ࡋࡅࡀࡕࡇ ࡀࡋࡌࡀ ࡖ ࡀࡕࡀ ࡋࡏࡅࡓࡀࡔࡋࡀࡌ ࡌࡃࡉࡍࡕࡀ 

(2529) ࡁࡊࡉࡍࡕࡀ ࡖ ࡊࡀࡍࡀࡕ ࡓࡅࡄࡀ ○ ࡊࡅࡋࡇ ࡋࡃࡉࡋࡇ ࡅࡏࡋ ࡔࡅࡁࡀ ࡁࡍࡇ ࡋࡁࡀࡓ ࡌࡍ ࡈࡅࡓࡀ ࡖ ࡌࡀࡃࡀࡉ ࡖ ࡀࡄࡀࡓࡀࡍ ○ ࡄࡉࡁࡉࡋ ࡆࡉࡅࡀ ࡖ ࡈࡅࡓࡀ 

(2530) ࡖ ࡌࡀࡃࡀࡉ ࡖ ࡄࡃࡀࡓࡉࡅࡍ ࡏࡋࡇ ࡌࡍ ࡈࡅࡓࡀ ࡋࡈࡅࡓࡀ ○ ࡅࡀࡋࡌࡀ ࡋࡌࡃࡉࡍࡕࡀ ࡖ ࡍࡀࡑࡅࡓࡀࡉࡉࡀ ࡔࡉࡕࡀ ࡀࡋࡐࡉࡀ ࡐࡀࡓࡎࡉࡀ ࡄࡀࡅࡉࡀ ࡅࡄࡃࡀࡓࡀ ࡖ ࡄࡉࡁࡉࡋ 

(2531) ࡆࡉࡅࡀ ࡌࡉࡕࡉࡒࡓࡉࡀ ○ ࡅࡄࡀࡉࡆࡀࡊ ࡉࡀࡄࡉࡀ ࡉࡅࡄࡀࡍࡀ ࡋࡂࡀࡈ ࡉࡀࡓࡃࡍࡀ ࡅࡎࡀࡌࡀࡍࡀ ࡌࡉࡀ ○ ࡅࡃࡀࡊࡉࡀ ࡂࡉࡓࡁࡀࡍࡉࡀ ࡅࡀࡐࡕࡀ ࡏࡅࡉࡓࡉࡀ ࡅࡀࡒࡉࡌ ࡌࡕࡀࡁࡓࡉࡀ 

(2532) ࡋࡌࡀࡎࡂࡅࡉࡉࡀ ࡏࡋ ࡋࡉࡂࡓࡀࡉࡄࡅࡍ ○ ࡁࡄࡀࡉࡋࡀ ࡖ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡌࡔࡀࡁࡀ ࡔࡅࡌࡇ ࡅࡏࡄࡀࡁࡋࡇ ࡏࡌࡓࡀ ࡅࡔࡉࡌࡀ ࡖ ࡊࡅࡋ 

(2533) ࡖ ࡁࡇ ࡅࡏࡕࡉࡒࡓࡉࡀ ࡁࡀࡋࡌࡀ ࡅࡔࡋࡉࡄࡀ ࡖ ࡌࡀࡋࡊࡀ ࡓࡀࡌࡀ ࡓࡁࡀ ࡖ ࡍࡄࡅࡓࡀ ࡌࡔࡀࡁࡀ ࡔࡅࡌࡇ ࡋࡃࡀࡅࡓࡀ ࡅࡁࡉࡍࡉࡀࡍࡀ ࡖ ࡓࡅࡄࡀ ࡅࡀࡃࡅࡍࡀࡉ ࡅࡔࡅࡁࡀ 

(2534) ࡁࡍࡇ ࡅࡕࡀࡓࡌࡉࡃ ࡕࡀࡓࡌࡉࡃࡉࡀ ○ ࡅࡒࡓࡀ ࡒࡀࡋࡀ ࡖ ࡄࡉࡉࡀ ࡁࡂࡀࡅࡇ ࡖ ࡁࡀࡉࡕࡀ ࡍࡀࡐࡋࡀ ࡀࡓࡁࡉࡍ ࡅࡕࡀࡓࡕࡉࡍ ࡔࡍࡉࡀ ࡁࡂࡀࡅࡇ ࡅࡄࡀࡉࡆࡀࡊ ࡏࡕࡀࡄࡆࡉࡋࡇ 

(2535) ࡍࡀࡑࡁࡇ ࡅࡎࡋࡉࡒ ࡋࡅࡀࡕࡇ ࡍࡀࡑࡁࡇ ࡁࡐࡀࡒࡀࡃࡕࡇ ࡖ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡌࡔࡀࡁࡀ ࡔࡅࡌࡇ ○ ࡅࡏࡃࡀࡍࡀ ࡌࡈࡀ ࡅࡄࡀࡉࡆࡀࡊ ࡌࡍ 

(2536) ࡀࡁࡀࡕࡀࡓ ࡖ ࡍࡐࡀࡒ ࡌࡍ ࡐࡀࡂࡓࡇ ࡉࡀࡄࡉࡀ ࡉࡅࡄࡀࡍࡀ ࡔࡉࡕࡉࡍ ࡔࡍࡉࡀ ○ ࡋࡉࡀࡄࡅࡈࡀࡉࡉࡀ ࡀࡊࡅࡀࡕ ࡄࡀࡉࡋࡀ ࡒࡀࡃࡌࡀࡉࡀ ࡋࡓࡅࡄࡀ ࡅࡀࡃࡅࡍࡀࡉ ࡖ 

(2537) ࡍࡀࡎࡁࡉࡀ ࡓࡁࡅࡕࡀ ○ ࡄࡀࡉࡆࡀࡊ ࡀࡁࡀࡕࡀࡓ ࡔࡉࡕࡉࡍ ࡔࡍࡉࡀ ࡏࡕࡄࡀࡔࡁࡀࡕ ࡓࡅࡄࡀ ࡅࡀࡃࡅࡍࡀࡉ ࡋࡌࡉࡎࡒࡀ ○ ࡋࡁࡀࡉࡕࡀ ࡍࡀࡐࡋࡀ ࡅࡀࡌࡀࡓࡅࡋࡇ ࡋࡌࡉࡔࡀ ࡍࡁࡉࡄࡀ 

(2538) ࡖ ࡓࡅࡄࡀ ࡅࡁࡍࡉࡀ ࡎࡓࡀࡉࡉࡋ ࡖ ࡀࡎࡒࡀ ࡋࡁࡀࡉࡕࡀ ○ ࡅࡄࡀࡉࡆࡀࡊ ࡓࡌࡅࡍ ࡒࡀࡋࡀ ࡁࡀࡈࡋࡀ ࡁࡔࡅࡓࡁࡀࡕࡀ ࡖ ࡀࡍࡅࡔ ࡏࡅࡕࡓࡀ ࡓࡉࡔࡀ ࡖ 

(2539) ࡃࡀࡓࡀ ࡅࡀࡔࡉࡃ ࡆࡌࡀࡉࡅࡍ ࡖ ࡋࡀࡔࡁࡀࡒࡉࡍࡅࡍ ࡌࡍ ࡕࡀࡓࡌࡉࡃࡉࡀ ࡅࡍࡀࡑࡅࡓࡀࡉࡉࡀ ࡏࡍࡉࡔ ○ ࡄࡀࡉࡆࡀࡊ ࡓࡕࡀ ࡉࡀࡓࡃࡍࡀ ࡅࡐࡓࡀࡔࡅࡕࡇ ࡅࡎࡋࡉࡒ 

(2540) ࡋࡓࡉࡒࡀࡕࡀ ࡅࡆࡉࡅࡀ ࡖ ࡃࡓࡀࡁࡔࡉࡇ ࡖ ࡀࡁࡀࡕࡅࡓ ࡅࡀࡍࡅࡔ ࡏࡅࡕࡓࡀ ○ ࡅࡄࡀࡉࡆࡀࡊ ࡃࡓࡀࡕࡉࡍࡅࡍ ࡓࡅࡄࡀ ࡋࡉࡀࡄࡅࡈࡀࡉࡉࡀ ○ ࡖ ࡁࡀࡉࡕࡀ ࡖ 

(2541) ࡔࡅࡁࡀ ࡌࡉࡕࡒࡉࡓࡉࡀ ࡅࡄࡀࡉࡆࡀࡊ ࡔࡀࡃࡀࡓࡋࡇ ࡀࡃࡅࡍࡀࡉ ࡄࡅࡈࡓࡀ ○ ࡅࡀࡌࡀࡓ ࡏࡋࡇ ࡅࡌࡀࡄࡉࡋࡇ ࡋࡎࡅࡐ ࡆࡀࡁࡀ ࡅࡌࡉࡐࡀࡋࡂࡉࡀ ࡌࡉࡀ ࡖ 

(2542) ࡔࡓࡉࡍ ࡁࡎࡅࡐ ࡆࡀࡁࡀ ࡀࡊࡅࡀࡕ ࡕࡓࡉࡍ ࡈࡅࡓࡉࡀ ࡖ ࡂࡆࡉࡓࡀ ࡄࡅࡀࡕ ࡏࡅࡄࡓࡀ ࡅࡀࡁࡀࡓࡕࡉࡍࡅࡍ ࡓࡅࡄࡀ ࡄࡀࡍࡀࡕࡇ ࡖ ࡎࡅࡐ ࡆࡀࡁࡀ ࡅࡁࡍࡀࡋࡅࡍ 

(2543) ࡅࡊࡁࡀࡔࡋࡅࡍ ࡋࡉࡁࡕࡀ ࡖ ࡒࡅࡃࡔࡀ ࡅࡁࡍࡀࡕ ࡁࡉࡍࡉࡀࡍࡀ ○ ࡅࡀࡒࡌࡅ ࡋࡇ ࡏࡅࡑࡈࡅࡍࡉࡀ ࡏࡅࡑࡈࡅࡍࡉࡀ ࡖ ࡊࡀࡃࡁࡀ ࡅࡀࡎࡉࡒࡋࡇ ࡋࡊࡅࡋ ࡏࡅࡑࡈࡅࡍࡀ ○ ࡂࡁࡉࡋ 

(2544) ࡄࡔࡅࡊࡀ ࡌࡉࡍࡇ ࡅࡀࡅࡕࡁࡉࡍࡅࡍ ࡋࡉࡀࡄࡅࡈࡀࡉࡉࡀ ࡖ ࡄࡈࡅࡍ ࡅࡀࡎࡊࡉࡋࡉࡅࡍ ○ ࡕࡋࡀࡕࡀ ࡔࡅࡓࡉࡀ ࡖ ࡄࡃࡀ ࡔࡀࡍࡀࡉ ࡌࡍ ࡄࡀࡁࡓࡀ ࡌࡀࡐࡓࡉࡔ 

(2545) ࡏࡋࡀࡅࡀࡉࡄࡅࡍ ○ ࡄࡉࡃࡓࡀࡕ ࡓࡅࡄࡀ ࡋࡏࡅࡓࡀࡔࡋࡀࡌ ࡁࡀࡕࡓࡀࡉࡕࡀ ࡖ ࡉࡀࡄࡅࡈࡀࡉࡉࡀ ࡅࡄࡀࡉࡆࡀࡊ ○ ࡓࡅࡄࡀ ࡋࡉࡀࡄࡅࡈࡀࡉࡉࡀ ࡅࡋࡀࡌࡑࡀ 

(2546) ࡖ ࡍࡉࡔࡀࡍࡉࡍࡅࡍ ࡋࡔࡅࡓࡉࡀ ࡌࡉࡍࡀࡉࡄࡅࡍ ○ ࡄࡀࡉࡆࡀࡊ ࡎࡋࡉࡒ ࡀࡍࡅࡔ ࡏࡅࡕࡓࡀ ࡋࡅࡀࡕ ࡀࡁࡀࡄࡀࡕࡀ ࡅࡀࡌࡀࡓࡋࡅࡍ ࡋࡀࡁࡀࡄࡀࡕࡀ ࡉࡀࡄࡅࡈࡀࡉࡉࡀ 

(2547) ࡅ ࡓࡅࡄࡀ ○ ࡀࡁࡀࡓࡕࡉࡍࡅࡍ ࡋࡎࡅࡐ ࡆࡀࡁࡀ ࡅࡁࡍࡀࡕ ࡁࡉࡍࡕࡀ ࡅࡄࡉࡃࡓࡀࡕ ࡔࡅࡁࡀ ࡔࡅࡓࡉࡀ ࡖ ࡋࡀࡌࡑࡉࡕ ࡀࡍࡀ ࡁࡄࡀࡉࡋࡀࡉࡄࡅࡍ ࡌࡀࡄࡅ 

(2548) ࡀࡌࡓࡉࡕࡅࡍ ࡏࡋࡀࡅࡀࡉࡀࡍ ○ ࡀࡍࡅࡔ ࡏࡅࡕࡓࡀ ࡌࡀࡋࡉࡋ ࡋࡅࡀࡕ ࡀࡁࡀࡄࡀࡕࡀ ࡅࡀࡌࡀࡓࡋࡅࡍ ࡗ ࡄࡅࡀ ࡄࡀࡉࡆࡀࡊ ࡀࡕࡀ ࡅࡒࡀࡌ ࡀࡁࡀ ࡓࡁࡀ ࡖ 

(2549) ࡏࡒࡀࡓࡀ ࡋࡅࡀࡕ ࡄࡉࡁࡉࡋ ࡁࡓࡇ ࡍࡉࡄࡀ ○ ࡅࡀࡁࡀࡃ ࡄࡀࡉࡆࡀࡊ ࡀࡕࡀ ࡄࡉࡁࡉࡋ ○ ࡋࡅࡀࡕ ࡀࡍࡅࡔ ࡏࡅࡕࡓࡀ ࡅࡀࡌࡀࡓࡋࡇ ࡍࡄࡅࡕ ࡁࡌࡀࡃࡀࡉ 

(2550) ࡅࡍࡎࡅࡁ ࡔࡅࡁࡀ ࡎࡉࡋࡅࡀࡍࡉࡀ ࡖ ࡄࡉࡍࡅࡍ ࡔࡅࡁࡀ ࡂࡉࡓࡉࡀ ࡅࡏࡆࡉࡋ ࡅࡀࡌࡅࡓ ࡏࡋࡀࡅࡀࡉࡄࡅࡍ ࡌࡉࡌࡓࡉࡀ ࡅࡍࡎࡅࡁ ࡋࡅࡀࡕࡀࡊ ࡔࡅࡁࡀ ࡍࡀࡈࡓࡉࡀ ࡌࡍ 

(2551) ࡐࡀࡓࡅࡀࡍ ࡈࡅࡓࡀ ࡅࡍࡎࡅࡁࡋࡅࡍ ࡁࡒࡀࡔࡕࡀࡕࡀ ࡅࡍࡉࡌࡓࡅࡍ ࡏࡋࡀࡅࡀࡉࡄࡅࡍ ࡔࡅࡁࡀ ࡌࡉࡌࡓࡉࡀ ࡅࡍࡉࡐࡉࡓࡃࡅࡍ ࡁࡁࡀࡉࡕࡀ ࡖ ࡓࡅࡄࡀ ࡏࡋ ࡋࡉࡐࡕࡀ ࡖ ࡒࡅࡃࡔࡀ 

(2552) ࡖ ࡊࡅࡋ ࡃࡅࡊࡕࡀ ࡖ ࡍࡀࡐࡉࡋ ࡄࡀࡍࡀࡕࡇ ࡂࡉࡓࡀ ࡕࡉࡕࡋࡉࡀ ࡍࡅࡓࡀ ࡅࡕࡉࡊࡀࡋ ࡁࡓࡒࡉࡄࡀ ࡅࡀࡋࡌࡀ ࡋࡕࡓࡉࡎࡀࡓ ࡍࡉࡎࡊࡉࡀ ࡁࡀࡓࡒࡀ ࡕࡉࡊࡀࡋ ࡁࡄࡀࡉࡋࡀࡉࡅࡍ 

(2553) ࡖ ࡄࡀࡋࡉࡍ ࡌࡉࡌࡓࡉࡀ ࡃࡀࡊࡉࡉࡀ ࡅࡉࡀࡒࡉࡓࡉࡀ ࡅࡍࡉࡁࡈࡅࡋ ࡔࡅࡋࡈࡀࡍࡀ ࡖ ࡓࡅࡄࡀ ࡅࡔࡅࡁࡀ ࡁࡍࡀ ࡅࡖ ࡉࡀࡄࡅࡈࡀࡉࡉࡀ ࡅࡔࡅࡓࡁࡀࡕࡅࡍ ࡌࡍ ࡄࡀࡔࡕࡀ 

(2554) ࡅࡀࡋࡌࡀ ࡋࡊࡉࡌࡑࡀࡕ ࡀࡋࡌࡉࡀ ࡅࡄࡀࡉࡆࡀࡊ ࡀࡍࡅࡔ ࡏࡅࡕࡓࡀ ࡋࡀࡔࡀࡍࡉࡀ ࡌࡉࡍࡃࡀࡌ ࡖ ࡐࡀࡒࡃࡀ ࡄࡉࡁࡉࡋ ࡆࡉࡅࡀ ࡀࡕࡀ ࡅࡎࡀࡐࡀ ࡄࡀࡌࡁࡋࡇ ࡋ ࡏࡅࡓࡀࡔࡋࡀࡌ 

(2555) ࡌࡃࡉࡍࡕࡀ ࡅࡂࡈࡀࡋࡉࡍࡅࡍ ࡋࡁࡍࡉࡀ ࡎࡓࡀࡉࡉࡋ ࡅࡋࡊࡀࡄࡍࡉࡀ ࡖ ࡏࡅࡓࡀࡔࡋࡀࡌ ࡅࡔࡀࡅࡉࡀ ࡀࡊࡅࡀࡕ ࡕࡉࡋࡉࡀ ࡖ ࡄࡀࡁࡀࡓࡀ ࡅࡀࡕࡀ ࡋࡁࡀࡂࡃࡀࡃ ࡅࡂࡀࡈࡋࡉࡍࡅࡍ 

(2556) ࡋࡊࡅࡋࡄࡅࡍ ࡊࡀࡄࡍࡉࡀ ࡅࡍࡉࡎࡁࡀ ࡋࡌࡀࡋࡊࡅࡕࡀ ࡌࡉࡍࡀࡉࡅࡍ ࡅࡃࡀࡒࡀ ࡄࡀࡓࡒࡀ ࡋࡊࡅࡋ ࡌࡃࡉࡍࡕࡀ ࡖ ࡄࡅࡀࡁࡇ ࡉࡀࡄࡅࡈࡈࡀࡉࡉࡀ ࡅࡄࡀࡉࡆࡀࡊ ࡕࡌࡀࡍࡉࡌࡀ ࡔࡍࡉࡀ 

(2557) ࡅࡌࡀࡋࡊࡅࡕࡅࡍ ࡁࡁࡀࡂࡃࡀࡃ ࡄࡅࡀࡕ ࡃࡀࡁࡀࡓࡁࡅࡍ ࡌࡀࡋࡊࡅࡕࡀ ࡀࡓࡁࡉࡌࡀ ࡌࡀࡋࡊࡉࡀ ࡌࡍ ࡉࡀࡄࡈࡅࡀࡉࡉࡀ ࡀࡊࡀࡋࡉࡅࡍ ࡉࡀࡄࡅࡈࡀࡉࡉࡀ ࡕࡌࡀࡍࡉࡌࡀ ࡔࡍࡉࡀ 

(2558) ࡌࡀࡋࡊࡅࡕࡅࡍ ࡁࡁࡀࡂࡃࡀࡃ ࡄࡅࡀࡕ ࡃࡀࡁࡉࡓࡉࡅࡍ ࡌࡀࡋࡊࡅࡕࡀ ࡀࡓࡁࡉࡌࡀ ࡌࡀࡋࡊࡉࡀ ࡌࡍ ࡉࡀࡄࡈࡅࡀࡉࡉࡀ ࡅࡄࡀࡉࡆࡀࡊ ࡁࡀࡉࡕࡀ ࡖ ࡉࡀࡄࡅࡈࡀࡉࡉࡀ ࡁࡈࡉࡋ 

(2559) ࡅࡏࡕࡁࡀࡈࡀࡋ ࡅࡁࡈࡉࡋ ࡄࡀࡉࡋࡇ ࡖ ࡄࡔࡅࡊࡀ ࡄࡀࡍࡀࡕࡅࡍ ࡔࡅࡁࡀ ࡍࡀࡈࡓࡉࡀ ࡖ ࡄࡅࡍ ࡁࡄࡉࡓࡉࡀ ࡆࡉࡃࡒࡀ ࡌࡉࡕࡒࡉࡓࡉࡅࡍ ࡌࡍ ࡀࡍࡅࡔ ࡏࡅࡕࡓࡀ 

(2560) ࡁࡌࡉࡌࡓࡀ ࡅࡐࡀࡒࡀࡃࡕࡀ ࡖ ࡄࡉࡁࡉࡋ ࡆࡉࡅࡀ ࡀࡕࡅࡍ ࡖ ࡐࡀࡒࡃࡀ ࡀࡁࡀ ࡓࡁࡀ ࡖ ࡏࡒࡀࡓࡀ ࡄࡃࡀ ࡌࡉࡍࡀࡉࡅࡍ ࡆࡀࡆࡀࡉ ࡁࡓ ࡄࡉࡁࡉࡋ ࡆࡉࡅࡀ 

(2561) ࡏࡅࡕࡓࡀ ࡀࡅࡕࡁࡇ ࡀࡍࡅࡔ ࡏࡅࡕࡓࡀ ࡁࡁࡀࡂࡃࡀࡃ ࡌࡃࡉࡍࡕࡀ ࡄࡃࡀ ࡔࡅࡌࡇ ࡐࡀࡐࡀ ࡁࡓ ࡂࡅࡃࡀ ࡀࡅࡕࡁࡇ ࡀࡍࡅࡔ ࡏࡅࡕࡓࡀ ࡋࡃࡉࡂࡋࡀࡕ 

(2562) ࡓࡁࡀ ࡅࡋࡃࡍࡀࡁ ࡏࡅࡋࡀࡉ ࡄࡃࡀ ࡖ ࡔࡅࡌࡇ ࡀࡍࡅࡔ ࡁࡓ ࡍࡀࡈࡀࡓ ࡄࡉࡉࡀ ࡀࡅࡕࡁࡇ ࡀࡍࡅࡔ ࡏࡅࡕࡓࡀ ࡋࡓࡉࡔ ࡀࡍࡅࡔ ࡔࡀࡉࡀࡓ ࡁࡓ ࡍࡅࡍࡀࡁ ࡋࡐࡓࡀࡕ 

(2563) ࡄࡃࡀ ࡔࡅࡌࡇ ࡁࡓࡉࡊ ࡉࡀࡅࡀࡓ ࡁࡓ ࡁࡉࡄࡃࡀࡃ ࡉࡀࡕࡉࡁ ࡋࡐࡅࡌ ࡁࡉࡕ ࡀࡔࡊࡀࡓࡕࡀ ࡖ ࡀࡉࡕࡀ ࡁࡓࡉࡔ ࡎࡅࡓࡀ ࡄࡃࡀ 

(2564) ࡖ ࡔࡅࡌࡇ ࡍࡅࡍࡀࡁ ࡁࡓ ࡁࡉࡄࡓࡀࡌ ࡉࡀࡕࡉࡁ ࡋࡈࡅࡓࡀ ࡖ ࡂࡋࡀࡆࡍࡀࡊ ࡄࡃࡀ ࡔࡅࡌࡇ ࡎࡊࡀ ࡌࡀࡍࡃࡀ ࡉࡀࡕࡉࡁ ࡋࡃࡍࡀࡁ ࡈࡅࡓࡀ ࡖ 

(2565) ࡀࡉࡍࡀ ࡖ ࡌࡉࡀ ࡖ ࡀࡉࡕࡀ ࡋࡃࡍࡀࡁ ࡐࡀࡓࡅࡀࡍ ࡈࡅࡓࡀ ࡃࡅࡊࡕࡀ ࡖ ࡍࡀࡐࡉࡒ ࡅࡃࡓࡀ ࡄࡀࡋࡉࡍ ࡄࡉࡍࡅࡍ ࡔࡅࡁࡀ ࡌࡀࡋࡊࡉࡀ ࡖ ࡀࡕࡅࡍ ࡌࡍ ࡀࡍࡅࡔ ࡏࡅࡕࡓࡀ 

(2566) ࡅࡊࡉࡁࡔࡅࡉࡀ ࡋࡄࡔࡅࡊࡀ ࡅࡁࡀࡈࡋࡅࡉࡀ ࡋࡄࡀࡔࡀࡁࡕࡀ ࡖ ࡓࡅࡄࡀ ࡅࡁࡀࡈࡋࡉࡍࡅࡍ ࡋࡌࡀࡋࡊࡉࡀ ࡖ ࡉࡀࡄࡅࡈࡀࡉࡉࡀ ࡅࡔࡀࡅࡉࡍࡅࡍ ࡗ ࡆࡀࡍ ࡖ ࡋࡀࡄࡅࡍ ࡅࡀࡅࡕࡁࡉࡍࡅࡍ ࡀࡍࡅࡔ 

(2567) ࡏࡅࡕࡓࡀ ࡁࡀࡓࡁࡉࡀ ࡆࡀࡅࡀࡉࡀࡕࡀ ࡖ ࡁࡀࡉࡕࡀ ࡋࡔࡅࡁࡀ ࡒࡅࡓࡍࡀࡕࡀ ࡖ ࡀࡋࡌࡀ ࡏࡋ ࡌࡉࡊࡉࡁࡔࡀ ࡄࡀࡉࡋࡇ ࡖ ࡄࡔࡅࡊࡀ ࡅࡋࡌࡉࡕࡉࡓࡑࡉࡀ ࡋࡒࡀࡋࡀ ࡖ ࡄࡉࡉࡀ 

(2568) ࡅࡋࡌࡉࡁࡀࡈࡋࡇ ࡋࡒࡀࡋࡀ ࡌࡀࡓࡃࡀ ○ ࡅࡄࡀࡉࡆࡀࡊ ࡗ ࡄࡀࡆࡉࡍ ࡀࡁࡀࡃ ࡀࡍࡅࡔ ࡏࡅࡕࡓࡀ ࡁࡐࡀࡒࡀࡃࡕࡀ ࡖ ࡄࡉࡁࡉࡋ ࡆࡉࡅࡀ ࡖ ࡐࡀࡒࡃࡇ ࡀࡁࡀ ࡓࡁࡀ 

(2569) ࡖ ࡏࡒࡀࡓࡀ ࡀࡆࡀࡋ ࡀࡍࡅࡔ ࡏࡅࡕࡓࡀ ࡋࡈࡅࡓࡀ ࡖ ࡌࡀࡃࡓࡀࡉ ࡖ ࡌࡉࡕࡒࡉࡓࡉࡀ ࡄࡀࡓࡀࡍ ࡂࡀࡅࡀࡉࡕࡀ ࡅࡀࡕࡉࡇ ࡋࡁࡄࡉࡓࡀ ࡁࡓ ࡔࡉࡕࡉࡋ ࡁࡍࡉࡀ 

(2570) ࡖ ࡁࡍࡇ ࡖ ࡀࡓࡃࡁࡀࡍ ࡌࡀࡋࡊࡀ ࡖ ࡍࡀࡑࡅࡓࡀࡉࡉࡀ ࡄࡅࡀ ࡅࡀࡉࡕࡉࡀ ࡋࡅࡀࡕࡇ ࡔࡉࡕࡉࡍ ࡍࡀࡑࡅࡓࡀࡉࡉࡀ ࡅࡕࡉࡓࡑࡀ ࡁࡁࡀࡂࡃࡀࡃ ࡅࡀࡅࡕࡁࡇ ࡁࡌࡀࡋࡊࡅࡕࡀ 

(2571) ࡅࡔࡉࡕࡉࡍ ࡍࡀࡑࡅࡓࡀࡉࡉࡀ ࡋࡅࡀࡕࡇ ࡅࡍࡐࡀࡔࡉࡅࡍ ࡅࡏࡕࡍࡀࡐࡀࡔࡉࡅࡍ ࡍࡀࡑࡅࡓࡀࡉࡉࡀ ࡁࡁࡀࡂࡃࡀࡃ ࡌࡍ ࡔࡅࡓࡁࡕࡀ ࡖ ࡁࡄࡉࡓࡀ ࡁࡓ ࡔࡉࡕࡉࡋ ࡅࡍࡀࡑࡅࡓࡀࡉࡉࡀ 

(2572) ࡀࡕࡅࡍ ࡀࡋࡅࡀࡕࡇ ࡀࡋࡌࡀ ࡖ ࡄࡅࡍ ࡀࡓࡁࡉࡌࡀ ࡌࡀࡔࡊࡍࡉࡀ ࡁࡁࡀࡂࡃࡀࡃ ࡅࡄࡀࡅࡀࡋࡀࡉ ࡃࡉࡋࡇ ࡅࡊࡅࡋࡄࡅࡍ ࡁࡄࡀࡆࡉࡍ ࡊࡃࡀࡁࡀ ࡅࡀࡁࡀࡃࡉࡅࡍ ࡁࡄࡀࡆࡉࡍ ࡔࡉࡓࡔࡀ 

(2573) ࡕࡀࡒࡍࡀ ࡀࡁࡀࡃࡉࡅࡍ ࡅࡋࡀࡔࡀࡍࡅࡍ ࡌࡍ ࡄࡀࡆࡉࡍ ࡆࡄࡀࡓࡀ ࡄࡀࡆࡉࡍ ࡊࡃࡀࡁࡀ ࡖ ࡂࡀࡋࡀࡋࡕࡀ ࡓࡀࡁࡕࡉࡀ ࡖ ࡏࡕࡉࡀࡄࡁࡀࡕ ࡋࡀࡃࡀࡌ ࡂࡀࡁࡓࡀ ࡒࡀࡃࡌࡀࡉࡀ 

(2574) ࡅࡔࡅࡓࡁࡀࡕࡀ ࡊࡅࡋࡄࡅࡍ ࡖ ࡎࡀࡄࡃࡉࡍ ࡀࡋࡌࡀ ࡋࡊࡉࡌࡑࡀࡕ ࡀࡋࡌࡀ ࡁࡄࡀࡆࡉࡍ ࡆࡄࡀࡓࡀ ࡄࡀࡆࡉࡍ ࡕࡅࡒࡍࡀ ࡋࡀࡍࡉࡁࡈࡅࡋ ࡌࡍ ࡌࡉࡌࡓࡀ ࡖ ࡀࡁࡀ ࡓࡁࡀ 

(2575) ࡖ ࡏࡒࡀࡓࡀ ࡌࡔࡀࡁࡀ ࡔࡅࡌࡇ ࡄࡀࡉࡆࡀࡊ ࡄࡀࡍࡀࡕࡀ ࡄࡀࡉࡆࡀࡊ ࡄࡀࡍࡀࡕࡇ ࡆࡀࡆࡀࡉ ࡁࡄࡉࡓ ࡆࡉࡃࡒࡀ ࡎࡋࡉࡒ ࡋࡓࡒࡉࡄࡀ ࡅࡃࡀࡓ ࡋࡅࡀࡕࡇ 

(2576) ࡖ ࡉࡅࡓࡁࡀ ࡔࡉࡕࡉࡍ ࡅࡕࡓࡉࡍ ࡉࡅࡌࡉࡀ ࡅࡎࡋࡉࡒ ࡋࡅࡀࡕ ࡀࡁࡀࡄࡀࡕࡀ ࡅࡄࡀࡍࡀࡕࡅࡍ ࡔࡉࡕࡀ ࡁࡄࡉࡓࡉࡀ ࡆࡉࡃࡒࡀ ࡔࡀࡃࡀࡓ ࡔࡅࡓࡁࡀࡕࡅࡍ ࡁࡀࡋࡌࡀ 

(2577) ࡅࡌࡍ ࡁࡍࡀࡉࡅࡍ ࡖ ࡄࡀࡍࡀࡕࡅࡍ ࡕࡀࡓࡌࡉࡃࡉࡀ ࡖ ࡕࡀࡓࡌࡉࡃ ࡉࡀࡄࡉࡀ ࡉࡄࡀࡍࡀ ࡏࡊࡀ ࡁࡀࡋࡌࡀ ࡖ ࡕࡉࡁࡉࡋ ࡅࡌࡍ ࡍࡉࡑࡅࡁࡕࡀ ࡒࡀࡃࡌࡀࡉࡕࡀ ࡖ 

(2578) ࡕࡉࡁࡉࡋ ࡌࡀࡋࡊࡉࡀ ࡏࡊࡀ ࡁࡍࡀࡑࡅࡓࡀࡉࡉࡀ . ࡌࡍ ࡓࡉࡔࡀ ࡄࡀࡋࡑࡀ ࡅࡃࡉࡍࡁࡀ ࡏࡊࡀ ࡁࡍࡀࡑࡅࡓࡀࡉࡉࡀ ࡃࡉࡍࡁࡀ ࡖ ࡃࡀࡓࡀ ࡁࡀࡕࡓࡀࡉࡀ ࡀࡌࡉࡍࡈࡅࡋ ࡖ ࡍࡀࡐࡒࡉࡍ 

(2579) ࡖ ࡕࡉࡌࡋࡅࡍ ࡅࡍࡀࡑࡅࡓࡀࡉࡉࡀ ࡖ ࡃࡉࡍࡁࡀ ࡖ ࡃࡀࡓࡀ ࡌࡍ ࡁࡍࡀࡉࡅࡍ ࡅࡌࡍ ࡔࡉࡓࡔࡀࡉࡅࡍ ࡖ ࡄࡀࡍࡀࡕࡅࡍ ࡕࡀࡓࡌࡉࡃࡉࡀ ࡖ ࡉࡀࡄࡉࡀ ࡉࡄࡀࡍࡀ ࡍࡀࡐࡒࡉࡍ ࡀࡍࡀࡔࡉࡀ 

(2580) ࡖ ࡋࡀࡈࡀࡒࡎࡀ ࡀࡌࡉࡍࡈࡅࡋ ࡗ ࡌࡀࡌࡋࡉࡍ ࡁࡍࡀࡉࡅࡍ ࡖ ࡌࡀࡋࡊࡉࡀ ࡖ ࡁࡀࡂࡃࡀࡃ ࡖ ࡌࡀࡋࡊࡅࡕࡀ ࡁࡁࡀࡂࡃࡀࡃ ࡀࡊࡋࡉࡍ ࡅࡌࡀࡕࡉࡍ ࡅࡕࡌࡀࡍࡀࡍ ࡔࡍࡉࡀ ࡍࡀࡐࡒࡉࡍ ࡌࡍ ࡁࡍࡀࡉࡅࡍ ࡖ 

(2581) ࡄࡀࡍࡀࡕࡅࡍ ࡕࡀࡓࡌࡉࡃࡉࡀ ࡖ ࡉࡀࡄࡉࡀ ࡉࡄࡀࡍࡀ ࡖ ࡀࡕࡉࡀ ࡓࡅࡄࡀ ࡅࡔࡀࡂࡔࡀࡋࡅࡍ ࡅࡀࡐࡊࡀࡋࡅࡍ ࡋ ࡌࡀࡋࡀࡋࡉࡀ ࡅࡀࡐࡏࡊࡉࡋࡅࡍ ࡋࡄࡀࡕࡌࡉࡀ ࡅࡀࡐࡊࡉࡋࡅࡍ 

(2582) ࡋ ࡌࡉࡌࡓࡉࡀ ࡅࡒࡀࡃࡀࡄࡉࡀ ࡏࡋ ࡏࡃࡀࡉࡄࡅࡍ ࡖ ࡄࡀࡍࡀࡕࡅࡍ ࡁࡍࡀࡉࡅࡍ ࡖ ࡄࡀࡍࡀࡕࡅࡍ ࡕࡀࡓࡌࡉࡃࡉࡀ ࡌࡍ ࡆࡉࡓࡀ ࡖ ࡉࡀࡄࡅࡈࡀࡉࡉࡀ ࡖ ࡏࡔࡕࡀࡓࡄࡀࡁ 

(2583) ࡀࡌࡉࡍࡈࡅࡋ ࡖ ࡁࡓ ࡍࡉࡈࡅࡐࡕࡀ ࡃࡀࡊࡉࡕࡀ ࡓࡀࡆࡀ ࡖ ࡉࡀࡄࡅࡈࡀࡉࡉࡀ ࡏࡅࡓࡀࡔࡋࡀࡌ ࡓࡅࡄࡀ ࡑࡀࡉࡕࡀࡋࡅࡍ ࡓࡀࡆࡉࡀ ࡖ ࡐࡀࡂࡓࡉࡀ ࡅࡔࡐࡉࡋ ࡌࡍ ࡔࡐࡉࡕࡀ 

(2584) ࡌࡀࡐࡓࡉࡔࡍࡀࡋࡊࡅࡍ ࡕࡀࡓࡌࡉࡃࡉࡀ ࡖ ࡄࡀࡅࡉࡍ ࡁࡃࡉࡍࡁࡀ ࡖ ࡃࡀࡓࡀ ࡀࡓࡀࡁࡀࡉࡀ ࡌࡍ ࡒࡅࡃࡀࡌ ࡖ ࡍࡀࡐࡉࡒ ࡁࡓࡇ ࡖ ࡔࡄࡀࡈ ࡀࡓࡀࡁࡀࡉࡀ 

(2585) ࡅࡌࡉࡕࡍࡀࡍࡁࡉࡀ ࡍࡁࡉࡄࡀ ࡁࡀࡋࡌࡀ ࡖ ࡂࡀࡆࡀࡓ ࡂࡆࡅࡓࡕࡀ ࡀࡊࡅࡀࡕ ࡉࡀࡄࡅࡈࡀࡉࡉࡀ ࡅࡀࡐࡉࡊ ࡌࡉࡌࡓࡉࡀ ࡀࡌࡉࡍࡈࡅࡋ ࡖ ࡄࡅ ࡔࡉࡐࡅࡋࡕࡀ ࡖ ࡍࡁࡉࡄࡉࡍ 

(2586) ࡖ ࡊࡀࡃࡁࡀ ࡄࡅ ࡅࡀࡕࡉࡀ ࡍࡉࡓࡉࡂ ࡋࡅࡀࡕࡇ ࡀࡌࡉࡍࡈࡅࡋ ࡖ ࡄࡅ ࡄࡀࡕࡌࡅࡍ ࡖ ࡍࡁࡉࡄࡉࡀ ࡖ ࡊࡀࡃࡁࡀ ࡄࡅ ࡀࡁࡀࡕࡀࡓ ࡃࡉࡋࡇ ࡍࡀࡐࡉࡒ ࡌࡔࡉࡄࡀ 

(2587) ࡁࡃࡉࡍࡁࡀ ࡖ ࡃࡀࡓࡀ ࡌࡀࡐࡓࡉࡔࡍࡀࡋࡊࡅࡍ ࡍࡀࡑࡅࡓࡀࡉࡉࡀ ࡌࡍ ࡒࡅࡃࡀࡌ ࡖ ࡍࡀࡐࡉࡒ ࡁࡓࡇ ࡖ ࡁࡓࡇ ࡖ ࡔࡄࡀࡈ ࡀࡓࡀࡁࡀࡉࡀ ࡅࡍࡁࡉࡄࡀ ࡌࡉࡕࡉࡒࡓࡉࡀ 

(2588) ࡁࡀࡋࡌࡀ ࡅࡍࡀࡄࡉࡕ ࡍࡉࡓࡉࡂ ࡋࡅࡀࡕࡇ ࡗ ࡔࡀࡐࡉࡋ ࡎࡉࡐࡀ ࡅࡌࡀࡄࡃࡀࡓ ࡀࡌࡀ ࡋࡍࡀࡐࡔࡉࡀ ࡁࡎࡉࡐࡀ ࡁࡕࡌࡀࡍࡀࡍ ࡅࡔࡉࡕ ࡔࡍࡉࡀ ࡌࡍ ࡒࡅࡃࡀࡌ ࡖ 

(2589) ࡍࡀࡐࡉࡒ ࡁࡓࡇ ࡖ ࡔࡄࡀࡈ ࡀࡓࡀࡁࡀࡉࡀ ࡌࡔࡀࡃࡀࡓࡋࡇ ࡀࡃࡅࡍࡀࡉ ࡋࡔࡅࡓࡁࡉࡔ ࡓࡅࡄࡀ ࡖ ࡄࡏ ࡆࡀࡅࡇ ࡋࡈࡉࡁ ࡌࡃࡉࡍࡕࡀ ࡌࡉࡕࡒࡉࡓࡉࡀ ࡖ 

(2590) ࡄࡏ ࡌࡃࡉࡍࡕࡀ ࡖ ࡀࡔࡂࡀࡍࡃࡀ ࡁࡈࡉࡁ ࡌࡉࡕࡒࡉࡓࡉࡀ ࡀࡌࡉࡍࡈࡅࡋ ࡖ ࡊࡅࡋ ࡖ ࡀࡁࡀࡃ ࡌࡀࡋࡊࡅࡕࡀ ࡁࡁࡀࡂࡃࡀࡃ ࡀࡔࡂࡀࡍࡃࡀ ࡁࡈࡉࡁ ࡌࡀࡕࡀ 

(2591) ࡄࡅࡀ ࡌࡃࡉࡍࡕࡀ ࡖ ࡀࡔࡂࡀࡍࡃࡀ ࡌࡉࡕࡒࡉࡓࡉࡀ ࡀࡌࡉࡍࡈࡅࡋ ࡖ ࡄࡅࡍ ࡁࡂࡀࡅࡇ ࡍࡀࡑࡅࡓࡀࡉࡉࡀ ࡓࡉࡔ ࡀࡌࡉࡀ ࡄࡅࡀ ࡄࡃࡀ ࡓࡉࡔ ࡀࡌࡀ ࡖ ࡌࡉࡕࡉࡒࡓࡉࡀ 

(2592) ࡒࡉࡒࡉࡋ ࡅࡌࡔࡀࡃࡀࡓࡋࡇ ࡁࡄࡀࡆࡉࡍ ࡀࡋࡌࡀ ࡀࡃࡅࡍࡀࡉ ࡋࡔࡅࡓࡁࡉࡔ ࡓࡅࡄࡀ ࡅࡀࡌࡀࡓࡋࡇ ࡏࡆࡉࡋ ࡅࡏࡃࡀࡌࡉࡋࡇ ࡋ ࡒࡉࡒࡉࡋ ࡖ ࡍࡀࡑࡅࡓࡀࡉࡉࡀ ࡁࡄࡉࡁࡉࡋ 

(2593) ࡆࡉࡅࡀ ࡅࡍࡉࡎࡁࡅࡉࡇ ࡌࡉࡍࡇ ࡋࡌࡀࡃࡉࡄࡕࡇ ࡅࡀࡐࡉࡊࡕࡍࡅࡍ ࡏࡋ ࡌࡀࡋࡀࡋࡉࡀ ࡅࡋࡌࡉࡑࡓࡉࡀ ࡖ ࡁࡉࡍࡉࡀࡍࡀ ࡏࡋࡀࡅࡀࡉࡅࡍ ࡒࡀࡉࡉࡌ ࡗ ࡄࡀࡆࡀ ࡀࡁࡀࡃࡕ ࡀࡌࡀ 

(2594) ࡊࡅࡋࡇ ࡍࡀࡑࡅࡓࡀࡉࡉࡀ ࡋࡃࡉࡋࡀࡍ ࡅࡄࡀࡃࡓࡉࡍ ࡅࡀࡆࡋࡀࡕ ࡓࡅࡄࡀ ࡔࡅࡓࡁࡉࡔ ࡆࡀࡅࡇ ࡖ ࡀࡃࡅࡍࡀࡉ ࡅࡔࡓࡀࡕ ࡏࡋ ࡒࡉࡒࡉࡋ ࡖ ࡍࡀࡑࡅࡓࡀࡉࡉࡀ ࡅࡏࡃࡀࡌࡉࡀࡕ 

(2595) ࡁࡀࡃࡌࡅࡕ ࡖ ࡄࡉࡁࡉࡋ ࡆࡉࡅࡀ ࡖ ࡋࡀࡉࡉࡕ ࡔࡀࡐࡉࡓ ࡀࡊࡅࡀࡕ ࡄࡉࡁࡉࡋ ࡆࡉࡅࡀ ࡌࡀࡅࡃࡉࡀࡁࡇ ࡍࡉࡔࡌࡀࡕࡀ ࡅࡍࡀࡎࡁࡀࡋࡇ ࡋࡌࡀࡃࡉࡄࡕࡀ ࡖ ࡒࡉࡒࡉࡋ 

(2596) ࡅࡌࡀࡐࡓࡉࡔࡀ ࡏࡋࡇ ࡅࡀࡌࡓࡀࡋࡇ ࡀࡍࡀ ࡄࡉࡁࡉࡋ ࡆࡉࡅࡀ ࡀࡉࡕࡉࡕ ࡌࡀࡂࡀࡋࡕࡀ ࡑࡉࡋࡐࡀ ࡅࡊࡃࡅࡁ ࡔࡉࡓࡔࡀ ࡖ ࡄࡉࡉࡀ ࡅࡌࡉࡌࡓࡀ ࡅࡓࡀࡆࡀ ࡅࡃࡓࡀ 

(2597) ࡅࡔࡀࡃࡀࡓ ࡅࡀࡁࡅࡃ ࡁࡂࡀࡅࡀࡉࡅࡍ ࡀࡌࡉࡍࡈࡅࡋ ࡖ ࡀࡍࡀ ࡄࡉࡉࡀ ࡓࡁࡉࡀ ࡔࡀࡃࡓࡅࡍ ࡅࡀࡕࡉࡕ ࡋࡅࡀࡕࡀࡊ ࡄࡀࡉࡆࡀࡊ ࡀࡉࡕࡉࡀ ࡒࡉࡒࡉࡋ ࡌࡀࡂࡀࡋࡕࡀ ࡅࡑࡉࡋࡐࡀ 

(2598) ࡅࡊࡃࡀࡁ ࡅࡃࡓࡀ ࡌࡍ ࡓࡅࡄࡀ ࡗ ࡌࡀࡃࡉࡄࡕࡀ ࡄࡅࡀ ࡔࡒࡉࡋࡀ ࡌࡉࡍࡇ ࡄࡀࡉࡆࡀࡊ ࡐࡀࡋࡉࡂ ࡁࡍࡀࡑࡅࡓࡀࡉࡉࡀ ࡅࡀࡔࡅࡀࡋࡀࡍࡇ ࡌࡍ ࡄࡀࡍࡀࡕࡀ ࡊࡃࡀࡁࡀ 

(2599) ࡖ ࡊࡃࡀࡁ ࡄࡀࡉࡆࡀࡊ ࡏࡕࡁࡀࡓࡉࡀࡕ ࡌࡍ ࡒࡅࡃࡀࡌࡇ ࡄࡃࡀࡓ ࡏࡅࡑࡓࡇ ࡅࡌࡀࡃࡉࡄࡕࡇ ࡖ ࡒࡉࡒࡉࡋ ࡅࡄࡀࡉࡆࡀࡊ ࡀࡐࡀࡊ ࡌࡀࡋࡀࡋࡉࡀ ࡅࡀࡐࡀࡊ ࡒࡌࡀࡄࡉࡀ 

(2600) ࡖ ࡁࡉࡍࡉࡀࡍࡀ ࡅࡏࡕࡀࡐࡓࡀࡔ ࡖ ࡓࡅࡄࡀ ࡄࡏ ࡊࡅࡋ ࡊࡃࡀࡁࡀ ࡖ ࡄࡅࡀ ࡋࡅࡀࡕࡇ ࡌࡍ ࡄࡀࡍࡀࡕࡇ ࡊࡃࡀࡁࡀ ࡖ ࡓࡅࡄࡀ ࡒࡋࡀ ࡁࡍࡅࡓࡀ ࡅࡔࡀࡃࡀࡓ 

(2601) ࡋࡍࡀࡑࡅࡓࡀࡉࡉࡀ ࡅࡀࡔࡅࡀࡋࡀࡍࡇ ࡖ ࡀࡉࡕࡅࡍ ࡊࡃࡀࡁࡉࡀ ࡖ ࡉࡀࡄࡁࡉࡍࡀࡋࡊࡅࡍ ࡒࡋࡅࡍࡅࡍ ࡁࡍࡅࡓࡀ ࡀࡌࡉࡍࡈࡅࡋ ࡖ ࡀࡔࡓࡀࡒࡕࡀࡍ ࡗ ࡋࡀࡉࡀࡃࡉࡕ ࡌࡍ ࡌࡀࡍࡀ ࡅࡌࡍ 

(2602) ࡄࡀࡍࡀࡕࡅࡍ ࡍࡀࡑࡅࡓࡀࡉࡉࡀ ࡖ ࡀࡁࡀࡃ ࡔࡉࡓࡔࡀ ࡕࡀࡒࡍࡀ ࡄࡅࡀ ࡀࡉࡕࡉࡀ ࡊࡃࡀࡁࡉࡀ ࡅࡉࡀࡄࡁࡉࡋࡇ ࡅࡒࡋࡀ ࡁࡍࡅࡓࡀ ࡅࡊࡅࡋࡌࡀࡍ ࡖ ࡔࡉࡓࡔࡀ ࡖ 

(2603) ࡉࡀࡄࡅࡈࡀࡉࡉࡀ ࡄࡅࡀ ࡄࡀࡍࡀࡕࡅࡍ ࡊࡃࡀࡁࡉࡀ ࡋࡀࡀࡉࡕࡉࡀ ࡅࡋࡀࡉࡀࡄࡀࡁࡋࡇ ࡋࡒࡉࡒࡉࡋ ࡅࡐࡀࡔࡉࡅࡍ ࡌࡍ ࡄࡀࡍࡀࡕࡅࡍ ࡊࡃࡀࡁࡉࡀ ࡋࡅࡀࡕࡅࡍ ࡀࡐࡓࡉࡔ ࡄࡉࡁࡉࡋ ࡆࡉࡅࡀ 

(2604) ࡋࡄࡀࡆࡉࡍ ࡌࡉࡌࡓࡀ ࡅࡆࡄࡀࡓࡀ ࡏࡋ ࡍࡀࡑࡅࡓࡀࡉࡉࡀ ࡖ ࡄࡀࡅࡉࡍ ࡁࡃࡉࡍࡁࡀ ࡖ ࡃࡀࡓࡀ ࡁࡀࡕࡓࡀࡉࡀ ࡏࡆࡃࡀࡄࡀࡓ ࡅࡏࡆࡃࡀࡄࡀࡓ ࡋࡁࡀࡓ ࡌࡍ ࡄࡀࡆࡉࡍ ࡊࡃࡀࡁࡀ 

(2605) ࡖ ࡂࡀࡋࡀࡋࡕࡀ ࡓࡀࡁࡕࡉࡀ ࡋࡀࡍࡉࡁࡀࡃ ࡔࡉࡓࡔࡀ ࡕࡀࡒࡅࡍ ࡄࡀࡉࡅࡀ ࡅࡍࡉࡎࡄࡀࡃ ࡅࡍࡉࡁࡀࡃ ࡅࡋࡀࡍࡉࡁࡈࡅࡋ ࡌࡍ ࡄࡀࡆࡉࡍ ࡆࡄࡀࡓࡀ ࡃࡀࡊࡉࡀ ࡎࡀࡋࡉࡒ ࡒࡅࡃࡀࡌ 

(2606) ࡀࡁࡀࡄࡀࡕࡀ ࡊࡅࡋ ࡖ ࡄࡀࡆࡉࡍ ࡃࡉࡓࡊࡀ ࡁࡂࡀࡅࡇ ࡋࡀࡎࡀࡄࡉࡃ ࡅࡋࡀࡋࡀࡂࡉࡈ ࡋࡄࡔࡅࡊࡀ ࡁࡀࡉࡉࡀ ࡔࡀࡐࡉࡋ ࡌࡀࡐࡓࡉࡔࡍࡀࡋࡊࡅࡍ ࡍࡀࡑࡅࡓࡀࡉࡉࡀ ࡖ ࡄࡀࡅࡉࡍ 

(2607) ࡁࡃࡉࡍࡁࡀ ࡖ ࡃࡀࡓࡀ ࡁࡀࡕࡓࡀࡉࡉࡀ ࡀࡔࡀࡓ ࡅࡀࡁࡅࡃࡉࡅࡍ ࡁࡄࡀࡆࡉࡍ ࡊࡃࡀࡁࡀ ࡅࡂࡀࡋࡀࡋࡕࡀ ࡓࡀࡁࡕࡉࡀ ࡔࡅࡌࡇ ࡀࡌࡉࡍࡈࡅࡋ ࡖ ࡄࡀࡍࡀࡕࡇ ࡆࡉࡁࡍࡀ 

(2608) ࡍࡀࡐࡔࡉࡀ ࡀࡌࡀࡌࡉࡀ ࡅࡕࡀࡅࡌࡉࡀ ࡅࡋࡉࡔࡀࡍࡉࡀ ࡅࡊࡅࡋ ࡏࡍࡉࡔ ࡉࡅࡕࡓࡀࡍࡀ ࡋࡍࡀࡐࡔࡉࡇ ࡁࡀࡉࡉࡀ ࡅࡍࡀࡐࡔࡉࡀ ࡊࡃࡀࡁࡉࡀ ࡅࡎࡉࡂࡉࡉࡇ ࡖ ࡓࡅࡄࡀ ࡅࡀࡃࡅࡍࡀࡉ ࡅࡁࡂࡀࡅࡀࡉࡅࡍ 

(2609) ࡔࡀࡐࡋࡉࡍ ࡍࡉࡔࡌࡀࡕࡅࡍ ࡋࡄࡔࡅࡊࡀ ࡅࡄࡀࡉࡆࡀࡊ ࡌࡍ ࡒࡅࡃࡀࡌ ࡖ ࡍࡀࡐࡉࡒ ࡁࡓࡇ ࡖ ࡔࡄࡀࡈ ࡀࡓࡀࡁࡀࡉࡀ ࡍࡀࡐࡔࡉࡀ ࡀࡌࡀࡌࡉࡀ ࡊࡓࡅࡎࡈࡌࡉࡀ 

(2610) ࡅࡃࡅࡌࡀࡉࡉࡀ ࡖ ࡉࡀࡄࡅࡈࡀࡉࡉࡀ ࡄࡅࡓࡃࡁࡀࡉࡉࡀ ࡅࡃࡉࡋࡁࡉࡋࡀࡉࡉࡀ ࡅࡌࡉࡕࡐࡀࡋࡂࡉࡀ ࡀࡌࡀࡌࡉࡀ ࡅࡍࡀࡐࡔࡉࡀ ࡋࡉࡔࡀࡍࡉࡀ ࡅࡋࡉࡔࡀࡍࡉࡀ ࡍࡀࡐࡔࡉࡍ ࡖ ࡍࡀࡑࡅࡓࡀࡉࡉࡀ 

(2611) ࡄࡀࡆࡉࡍ ࡅࡄࡀࡉࡆࡀࡊ ࡌࡉࡕࡍࡉࡎࡁࡀ ࡌࡍ ࡁࡍࡀࡉࡅࡍ ࡖ ࡁࡍࡉࡀ ࡀࡓࡃࡁࡀࡍ ࡌࡀࡋࡊࡀ ࡌࡀࡋࡊࡅࡕࡀ ࡌࡍ ࡁࡀࡂࡃࡀࡃ ࡄࡀࡓࡃࡁࡀࡉࡉࡀ ࡍࡀࡎࡁࡉࡋࡇ ࡏࡋ 

(2612) ࡌࡀࡋࡊࡅࡕࡀ ࡐࡀࡔࡉࡅࡍ ࡁࡂࡀࡅࡇ ࡖ ࡁࡀࡂࡃࡀࡃ ࡏࡌࡀ ࡅࡔࡅࡁࡉࡍ ࡃࡓࡀࡁࡔࡉࡀ ࡅࡁࡉࡌࡀࡍࡃࡉࡀ ࡅࡄࡀࡉࡆࡀࡊ ࡀࡊࡉࡋ ࡌࡀࡋࡊࡀ ࡖ ࡄࡀࡓࡃࡅࡁࡀࡉࡉࡀ ࡕࡋࡀࡕࡌࡀ 

(2613) ࡅࡔࡉࡕࡉࡍ ࡔࡍࡉࡀ ࡅࡄࡀࡉࡆࡀࡊ ࡌࡉࡌࡋࡉࡊ ࡁࡓࡇ ࡖ ࡔࡄࡀࡈ ࡀࡓࡀࡁࡀࡉࡉࡀ ࡀࡁࡃࡀࡋࡀࡇ ࡍࡀࡐࡉࡒ ࡅࡀࡌࡀ ࡋࡀࡂࡉࡈ ࡋࡍࡀࡐࡔࡉࡇ ࡅࡂࡆࡅࡓࡕࡀ ࡂࡀࡆࡀࡓ ࡗ 

(2614) ࡄࡀࡆࡉࡍ ࡄࡀࡅࡉࡀ ࡐࡀࡉࡉࡔ ࡁࡁࡀࡂࡃࡀࡃ ࡗ ࡄࡀࡆࡉࡍ ࡄࡀࡅࡉࡀ ࡄࡀࡅࡀࡋࡀࡉ ࡃࡉࡋࡇ ࡔࡉࡕࡉࡍ ࡃࡓࡀࡁࡔࡉࡀ ࡅࡄࡀࡉࡆࡀࡊ ࡍࡀࡎࡉࡁ ࡎࡉࡐࡀ ࡅࡌࡀࡎࡉࡐࡋࡇ ࡌࡍ 

(2615) ࡌࡃࡉࡍࡕࡀ ࡖ ࡔࡀࡌ ࡅࡀࡋࡌࡀ ࡋࡁࡉࡕ ࡃࡅࡁࡀࡓ ࡖ ࡄࡏ ࡁࡃࡉࡍ ࡌࡉࡕࡒࡉࡓࡉࡀ ࡊࡅࡋࡇ ࡌࡀࡌࡋࡉࡊࡋࡇ ࡅࡁࡉࡋ ࡈࡅࡓࡀ ࡖ ࡐࡀࡓࡎࡀࡉࡉࡀ ࡌࡀࡌࡋࡉࡊࡋࡇ 

(2616) ࡖ ࡄࡉࡍࡅࡍ ࡄࡀࡓࡃࡀࡁࡀࡉࡉࡀ ࡌࡉࡕࡒࡉࡓࡉࡀ ࡅࡍࡀࡎࡁࡉࡋࡇ ࡋࡌࡀࡋࡊࡅࡕࡀ ࡌࡉࡍࡀࡉࡅࡍ ࡄࡀࡉࡆࡀࡊ ࡗ ࡄࡀࡅࡉࡀ ࡄࡀࡆࡉࡍ ࡁࡏࡃࡀࡍࡀ ࡀࡕࡉࡀ ࡀࡍࡅࡔ ࡁࡓ ࡃࡀࡍࡒࡀ 

(2617) ࡌࡉࡕࡉࡒࡓࡉࡀ ࡌࡍ ࡈࡅࡓࡀ ࡖ ࡀࡓࡎࡀࡉࡉࡀ ࡌࡍ ࡁࡀࡂࡃࡀࡃ ࡌࡃࡉࡍࡕࡀ ࡖ ࡁࡉࡄࡍࡅࡔ ࡌࡀࡋࡊࡉࡀ ࡌࡍ ࡍࡉࡑࡅࡁࡕࡇ ࡖ ࡀࡓࡃࡁࡀࡍ ࡅࡀࡉࡉࡋ ࡃࡉࡋࡇ ࡖ 

(2618) ࡌࡅࡄࡀࡌࡀࡃ ࡁࡓ ࡀࡁࡃࡀࡋࡀࡇ ࡁࡓࡇ ࡖ ࡔࡄࡀࡈ ࡀࡓࡀࡁࡀࡉࡀ ࡗ ࡄࡀࡅࡉࡀ ࡁࡓ ࡔࡀࡁࡉࡌࡀ ࡔࡍࡉࡀ ࡅࡍࡀࡎࡁࡉ ࡋࡇ ࡌࡍ ࡌࡃࡉࡍࡕࡀ ࡋࡅࡀࡕ ࡎࡅࡐ 

(2619) ࡆࡀࡁࡀ ࡖ ࡄࡏ ࡁࡀࡑࡓࡀ ࡌࡉࡕࡒࡉࡓࡉࡀ ࡅࡌࡀࡄࡅࡉࡋࡇ ࡋ ࡈࡅࡓࡀ ࡖ ࡐࡀࡓࡎࡀࡉࡉࡀ ࡋࡁࡀࡂࡃࡀࡃ ࡌࡃࡉࡍࡕࡀ ࡅࡌࡀࡐࡓࡉࡔࡋࡇ ࡀࡍࡅࡔ ࡋࡁࡓࡇ ࡖ ࡔࡄࡀࡈ 

(2620) ࡀࡓࡀࡁࡀࡉࡀ ࡀࡊࡅࡀࡕ ࡖ ࡌࡀࡐࡓࡉࡔࡋࡇ ࡋࡀࡍࡅࡔ ࡁࡓ ࡃࡀࡍࡒࡀ ࡁࡄࡀࡆࡉࡍ ࡊࡃࡀࡁࡀ ࡖ ࡀࡁࡀࡄࡀࡕࡀ ࡖ ࡊࡅࡋࡄࡅࡍ ࡌࡀࡋࡊࡉࡀ ࡖ ࡍࡀࡑࡅࡓࡀࡉࡉࡀ ࡀࡔࡀࡓ 

(2621) ࡏࡋࡄ ࡅࡎࡀࡊࡅࡍ ࡖ ࡌࡀࡋࡊࡉࡀ ࡁࡂࡀࡅࡇ ࡖ ࡄࡀࡆࡉࡍ ࡊࡃࡀࡁࡀ ࡖ ࡌࡀࡐࡓࡀࡔ ࡌࡍ ࡀࡃࡀࡌ ࡌࡀࡋࡊࡀ ࡖ ࡀࡋࡌࡀ ࡋࡀࡋࡌࡀ ࡋࡀࡓࡃࡀࡁࡀࡍ ࡌࡀࡋࡊࡀ ࡅࡀࡋࡌࡀ ࡋࡁࡄࡉࡓࡀ ࡌࡍ 

(2622) ࡀࡍࡅࡔ ࡖ ࡌࡍ ࡔࡉࡓࡔࡀ ࡖ ࡀࡓࡃࡁࡀࡍ ࡌࡀࡋࡊࡀ ࡅࡀࡋࡌࡀ ࡋࡀࡍࡅࡔ ࡁࡓ ࡃࡀࡍࡒࡀ ࡖ ࡌࡍ ࡔࡀࡓࡔࡀ ࡖ ࡁࡄࡉࡓࡀ ࡄࡅࡍ ࡅࡄࡀࡉࡆࡀࡊ ࡀࡐࡓࡉࡔ ࡏࡋࡇ ࡖ 

(2623) ࡌࡀࡋࡊࡀ ࡖ ࡀࡓࡃࡁࡀࡉࡉࡀ ࡋࡊࡅࡋ ࡌࡀࡄࡅ ࡖ ࡁࡇ ࡋࡌࡉࡁࡀࡃ ࡅࡊࡉࡁࡔࡉࡀ ࡌࡍ ࡁࡍࡉࡀ ࡔࡅࡓࡁࡀ ࡓࡁࡀ ࡖ ࡄࡉࡉࡀ ࡖ ࡋࡀࡍࡉࡄࡈࡅࡍ ࡁࡍࡀࡑࡅࡓࡀࡉࡉࡀ ࡖ ࡄࡅࡍ 

(2624) ࡁࡃࡀࡓࡀ ࡅࡌࡀࡋࡊࡅࡕࡀ ࡅࡄࡀࡉࡆࡀࡊ ࡀࡐࡓࡉࡔ ࡅࡀࡌࡀࡓ ࡀࡍࡅࡔ ࡁࡓ ࡃࡀࡍࡒࡀ ࡖ ࡋࡀࡔࡁࡀࡒࡕࡇ ࡋࡁࡓࡇ ࡖ ࡔࡄࡀࡈ ࡀࡓࡀࡁࡀࡉࡀ ࡖ ࡄࡀࡈࡉࡀ ࡁࡊࡀࡍࡀ 

(2625) ࡖ ࡍࡉࡔࡌࡀࡕࡀ ࡁࡄࡀࡉࡋࡇ ࡖ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡌࡔࡀࡁࡀ ࡔࡅࡌࡇ ࡁࡄࡀࡉࡋࡀ ࡖ ࡍࡀࡈࡓࡀ ࡖ ࡄࡀࡆࡉࡍ ࡊࡃࡀࡁࡀ ࡖ ࡌࡀࡋࡊࡅࡕࡀ ࡖ ࡂࡀࡋࡀࡋࡕࡀ 

(2626) ࡓࡀࡁࡕࡉࡀ ࡌࡔࡀࡁࡀ ࡔࡅࡌࡇ ࡅࡋࡌࡀࡄࡅ ࡖ ࡀࡔࡊࡉࡕ ࡁࡄࡀࡆࡉࡍ ࡀࡐࡓࡀࡔࡀࡕࡀ ࡖ ࡂࡀࡋࡀࡋࡕࡀ ࡓࡀࡁࡕࡉࡀ ࡋࡀࡀࡔࡊࡉࡕ ࡁࡊࡅࡋࡄࡅࡍ ࡎࡉࡂࡉࡉࡀ ࡅࡌࡉࡑࡓࡉࡀ 

(2627) ࡅࡃࡉࡅࡀࡍࡀࡍ ࡖ ࡄࡉࡉࡀ ࡒࡀࡃࡌࡀࡉࡉࡀ ࡖ ࡄࡅࡍ ࡁࡂࡉࡍࡆࡉࡇ ࡅࡀࡋࡅࡀࡕࡀࡉ ࡄࡉࡃࡓࡉࡕ ࡋࡊࡅࡋࡄࡅࡍ ࡓࡉࡔ ࡀࡌࡉࡀ ࡍࡀࡑࡅࡓࡀࡉࡉࡀ ࡖ ࡄࡅࡍ ࡅࡄࡆࡉࡕ ࡊࡃࡀࡁࡉࡀ ࡍࡀࡐࡔࡉࡀ 

(2628) ࡊࡃࡀࡁࡀ ࡖ ࡌࡄࡀࡒࡀࡓ ࡅࡊࡃࡀࡁࡉࡀ ࡖ ࡂࡀࡋࡀࡋࡕࡀ ࡓࡀࡁࡕࡉࡀ ࡅࡋࡀࡄࡆࡉࡕ ࡀࡊࡅࡀࡕ ࡄࡀࡆࡉࡍ ࡔࡉࡓࡔࡀ ࡖ ࡌࡕࡀࡒࡍࡀ ࡖ ࡌࡍ ࡒࡃࡉࡌࡀ ࡅࡋࡀࡋࡀࡌ ࡌࡍ 

(2629) ࡓࡉࡔ ࡀࡋࡌࡀ ࡖ ࡍࡄࡅࡓࡀ ࡅࡀࡋࡌࡀ ࡋࡀࡋࡌࡀ ࡕࡌࡉࡍࡀࡉࡀ ࡌࡍ ࡓࡉࡔ ࡀࡋࡌࡀ ࡕࡌࡉࡍࡀࡉࡀ ࡅࡀࡋࡌࡀ ࡋࡊࡉࡌࡑࡀࡕ ࡀࡋࡌࡉࡀ ࡊࡃࡀࡁࡉࡀ ࡖ ࡌࡀࡐࡓࡀࡔ ࡋࡕࡅࡒࡍࡀ ࡖ 

(2630) ࡊࡅࡋ ࡔࡐࡉࡕࡀ ࡅࡋࡓࡉࡔࡉࡇ ࡖ ࡊࡅࡋࡇ ࡍࡄࡅࡓࡀ ࡅࡋ ࡃࡉࡍࡁࡀ ࡖ ࡊࡅࡋࡇ ࡄࡔࡅࡊࡀ ࡁࡄࡀࡆࡉࡍ ࡊࡃࡀࡁࡉࡀ ࡖ ࡂࡀࡋࡀࡋࡕࡀ ࡓࡀࡁࡕࡉࡀ ࡏࡕࡀࡔࡊࡀ ࡅࡁࡊࡃࡀࡁࡉࡀ ࡄࡅࡓࡉࡍࡉࡀ 

(2631) ࡋࡀࡏࡕࡀࡔࡊࡀ ࡌࡀࡄࡅ ࡖ ࡌࡀࡐࡓࡀࡔ ࡁࡄࡀࡆࡉࡍ ࡊࡃࡀࡁࡀ ࡅࡃࡉࡓࡊࡀ ࡖ ࡔࡀࡋࡌࡀࡍࡉࡀ ࡅ ࡀࡋࡌࡀ ࡋࡊࡉࡌࡑࡀࡕ ࡀࡋࡌࡉࡀ ࡄࡀࡆࡉࡍ ࡃࡉࡓࡊࡀ ࡖ ࡔࡀࡋࡌࡀࡍࡉࡀ 

(2632) ࡏࡕࡉࡁࡄࡉࡓ ࡏࡕࡄࡉࡁ ࡋࡁࡀࡓ ࡔࡉࡓࡔࡀ ࡕࡀࡒࡍࡀ ࡅࡋࡁࡀࡓ ࡍࡉࡈࡅࡐࡕࡀ ࡃࡀࡊࡉࡕࡀ ࡖ ࡗ ࡔࡌࡉࡋࡅࡍ ࡋࡌࡀࡋࡀࡋࡉࡀ ࡅࡀࡐࡓࡀࡔࡀࡕࡀ ࡖ ࡄࡀࡆࡉࡍ ࡊࡃࡀࡁࡀ 

(2633) ࡖ ࡔࡀࡋࡌࡀࡍࡉࡀ ࡎࡄࡉࡃ ࡀࡋࡀࡍࡐࡇ ࡅࡎࡀࡄࡉࡃ ࡏࡅࡑࡓࡇ ࡅࡍࡀࡄࡅࡓ ࡅࡊࡅࡋ ࡁࡓ ࡁࡋࡉࡋࡀ ࡄࡅ ࡗ ࡔࡀࡌࡀࡋࡅࡍ ࡋࡄࡀࡆࡉࡍ ࡌࡀࡋࡀࡋࡉࡀ ࡕࡀࡒࡍࡉࡀ ࡄࡀࡔࡅࡊ ࡏࡅࡑࡓࡀ 

(2634) ࡅࡋࡀࡈࡀࡉࡉࡌࡋࡅࡍ ࡅࡋࡀࡈࡀࡌࡅࡍ ࡖ ࡌࡀࡋࡀࡋࡉࡀ ࡃࡀࡊࡉࡉࡀ ࡅࡌࡀࡉࡕࡉࡀ ࡂࡀࡅࡍࡉࡀ ࡌࡍ ࡏࡅࡑࡓࡀ ࡀࡊࡅࡀࡕ ࡒࡀࡃࡀࡄࡀ ࡅࡔࡉࡓࡔࡀ ࡖ ࡌࡉࡍࡇ ࡐࡓࡀࡔ ࡀࡐࡓࡉࡔ ࡄࡉࡁࡉࡋ 

(2635) ࡆࡉࡅࡀ ࡋࡄࡀࡆࡉࡍ ࡀࡐࡓࡀࡔࡀࡕࡀ ࡅࡂࡀࡋࡉࡋ ࡅࡀࡌࡀࡓ ࡊࡅࡋ ࡂࡀࡁࡓࡀ ࡍࡀࡑࡅࡓࡀࡉࡉࡀ ࡖ ࡌࡉࡕࡀࡔࡊࡀ ࡄࡀࡆࡉࡍ ࡀࡐࡓࡀࡔࡀࡕࡀ ࡁࡂࡉࡍࡆࡉࡇ ࡍࡉࡆࡃࡀࡄࡀࡓ ࡒࡅࡃࡀࡌ 

(2636) ࡁࡋࡉࡋࡉࡀ ࡋࡀࡍࡉࡂࡀࡋࡉࡋ ࡒࡃࡉࡄࡀ ࡅࡂࡀࡋࡀࡋࡕࡀ ࡖ ࡒࡀࡃࡀࡄࡉࡀ ࡖ ࡓࡀࡆࡉࡀ ࡖ ࡊࡅࡋ ࡖ ࡉࡀࡒࡉࡓ ࡁࡄࡀࡆࡉࡍ ࡊࡃࡀࡁࡀ ࡏࡋ ࡖ ࡌࡂࡀࡋࡉࡋ ࡒࡅࡃࡀࡌ ࡏࡅࡕࡓࡉࡀ 

(2637) ࡁࡋࡉࡋࡉࡀ ࡖ ࡋࡀࡈࡀࡊࡎࡀ ࡅࡌࡀࡔࡉࡈࡉࡋࡅࡍ ࡋࡌࡀࡋࡀࡋࡉࡀ ࡃࡀࡊࡉࡉࡀ ࡎࡀࡉࡉࡌ ࡋࡒࡅࡃࡀࡌࡇ ࡔࡉࡕࡉࡍ ࡕࡉࡒࡋࡀࡕࡀ ࡅࡔࡉࡕࡉࡍ ࡄࡀࡈࡀࡉࡉࡀ ࡍࡉࡔࡁࡅࡒࡋࡇ ࡅࡀࡁࡀࡕࡅࡓ 

(2638) ࡊࡅࡔࡈࡀ ࡉࡀࡒࡓࡀ ࡌࡉࡍࡇ ࡍࡉࡐࡔࡅࡈ ࡄࡀࡉࡆࡀࡊ ࡀࡐࡓࡉࡔ ࡄࡉࡁࡉࡋ ࡆࡉࡅࡀ ࡌࡔࡀࡁࡀ ࡔࡅࡌࡀ ࡋࡊࡅࡋ ࡌࡀࡍ ࡖ ࡍࡉࡊࡎࡉࡉࡇ ࡅࡍࡉࡍࡉࡈࡓࡇ ࡗ ࡔࡀࡋࡉࡌࡋࡇ 

(2639) ࡊࡉࡋࡇ ࡀࡃࡉࡍࡒࡉࡀ ࡄࡀࡈࡀࡉࡉࡇ ࡍࡉࡎࡀࡒ ࡍࡉࡔࡓࡉࡀ ࡅࡍࡉࡃࡁࡀࡓ ࡀࡋࡅࡀࡕࡇ ࡔࡉࡕࡉࡍ ࡏࡎࡉࡓࡉࡀ ࡍࡉࡎࡀࡒ ࡋࡅࡀࡕ ࡀࡁࡀࡄࡀࡕࡀ ࡅࡀࡁࡀࡄࡀࡕࡀ 

(2640) ࡍࡉࡐࡔࡅࡈ ࡊࡅࡔࡈࡀ ࡉࡀࡒࡓࡀ ࡌࡉࡍࡇ ࡅࡍࡉࡕࡉࡒࡓࡉࡀ ࡄࡃࡀ ࡌࡍ ࡀࡋࡐࡀ ࡀࡊࡅࡀࡕ ࡀࡁࡀࡕࡅࡓ ࡓࡀࡌࡀ ࡅࡍࡉࡄࡉࡆࡉࡇ ࡋࡐࡀࡓࡑࡅࡐࡀ ࡓࡁࡀ ࡖ ࡏࡒࡀࡓࡀ 

(2641) ࡅࡍࡉࡐࡔࡅࡈ ࡊࡅࡔࡈࡀ ࡉࡀࡒࡓࡀ ࡌࡉࡍࡇ ࡅࡋ ࡉࡀࡌࡉࡍࡀ ࡖ ࡌࡀࡋࡊࡀ ࡕࡉࡔࡕࡊࡉࡍ ࡔࡊࡉࡍࡕࡀ ࡊࡅࡋ ࡌࡀࡍ ࡖ ࡍࡉࡎࡄࡀࡃ ࡏࡅࡑࡓࡀ ࡁࡄࡀࡋࡉࡍ ࡀࡐࡓࡀࡔࡀࡕࡀ 

(2642) ࡖ ࡕࡅࡒࡍࡀ ࡌࡍ ࡌࡍࡀࡕࡀ ࡖ ࡌࡀࡋࡊࡀ ࡓࡀࡌࡀ ࡓࡁࡀ ࡖ ࡍࡄࡅࡓࡀ ࡍࡉࡄࡅࡉࡀ ࡅࡆࡀࡍࡂࡀࡉࡉࡀ ࡅࡌࡀࡈࡀࡓࡀࡉࡉࡀ ࡏࡋࡇ ࡋࡀࡍࡉࡔࡕࡀࡋࡈࡅࡍ ࡄࡀࡉࡆࡀࡊ ࡀࡐࡓࡉࡔ ࡄࡉࡁࡉࡋ ࡆࡉࡅࡀ 

(2643) ࡌࡔࡀࡁࡀ ࡔࡅࡌࡀ ࡋࡍࡀࡑࡅࡓࡀࡉࡉࡀ ࡋࡃࡉࡍࡁࡀ ࡖ ࡃࡀࡓࡀ ࡁࡀࡕࡓࡀࡉࡀ ࡀࡌࡉࡍࡈࡅࡋ ࡖ ࡊࡀࡁࡓࡀ ࡁࡉࡔࡅࡕࡀ ࡅࡈࡍࡅࡐࡉࡀ ࡁࡍࡐࡉࡔ ࡅࡍࡀࡐࡔࡀ ࡁࡀࡋࡌࡀ ࡀࡌࡉࡍࡈࡅࡋ 

(2644) ࡖ ࡏࡕࡉࡕࡋࡇ ࡖ ࡊࡀࡁࡓࡀ ࡁࡉࡔࡅࡕࡀ ࡅࡈࡅࡍࡐࡉࡀ ࡁࡍࡐࡉࡔ ࡍࡀࡐࡔࡀ ࡁࡀࡋࡌࡀ ࡀࡌࡉࡍࡈࡅࡋ ࡖ ࡏࡕࡉࡕࡋࡇ ࡁࡄࡀࡍࡀࡕࡇ ࡃࡀࡓࡀ ࡖ ࡌࡍ ࡌࡀࡕࡒࡀࡋࡀ 

(2645) ࡖ ࡃࡀࡄࡁࡀ ࡓࡁࡀ ࡖ ࡎࡉࡀࡍࡒࡀ ࡋࡍࡄࡅࡓࡀ ࡎࡀࡋࡉࡒ ࡅࡊࡅࡋࡇ ࡋࡄࡔࡅࡊࡀ ࡔࡀࡐࡉࡋ ࡁࡄࡀࡍࡀࡕࡇ ࡆࡉࡁࡍࡀ ࡅࡏࡃࡀࡍࡀ ࡖ ࡌࡀࡍ ࡌࡀࡋࡊࡅࡕࡀ ࡖ ࡁࡓࡇ 

(2646) ࡖ ࡔࡄࡀࡈ ࡀࡓࡁࡀࡉࡀ ࡅࡀࡋࡌࡀ ࡋࡊࡉࡌࡑࡀࡕ ࡀࡋࡌࡉࡀ ࡓࡉࡃࡐࡀ ࡅࡊࡀࡓࡉࡅࡕࡀ ࡍࡀࡐࡅࡔ ࡏࡋ ࡍࡀࡑࡅࡓࡀࡉࡉࡀ ࡅࡒࡀࡋࡉࡋ ࡃࡅࡊࡉࡀ ࡅࡍࡀࡐࡅࡔ ࡈࡍࡅࡐࡉࡀ ࡅࡂࡀࡅࡓࡀ 

(2647) ࡅࡂࡅࡍࡁࡀ ࡅࡆࡉࡐࡀ ࡅࡌࡉࡕࡊࡀࡕࡓࡉࡀ ࡀࡍࡀࡔࡉࡀ ࡄࡃࡀ ࡔࡀࡕࡉࡀ ࡌࡍ ࡆࡌࡀ ࡖ ࡄࡀࡁࡓࡀ ࡁࡄࡀࡍࡀࡕࡇ ࡆࡉࡁࡍࡀ ࡊࡅࡋ ࡖ ࡔࡀࡐࡉࡓ ࡖ ࡍࡉࡔࡀࡓ ࡅࡍࡉࡒࡅࡌ 

(2648) ࡌࡍ ࡍࡀࡑࡅࡓࡀࡉࡉࡀ ࡋࡄࡀࡆࡉࡍ ࡀࡐࡓࡀࡔࡀࡕࡀ ࡅࡂࡀࡋࡀࡋࡕࡀ ࡓࡀࡁࡕࡉࡀ ࡍࡉࡎࡀࡒ ࡁࡔࡁࡉࡋࡇ ࡖ ࡌࡄࡀࡉࡌࡍࡉࡀ ࡅࡍࡉࡄࡆࡉࡇ ࡋࡐࡀࡓࡑࡅࡐࡀ ࡓࡁࡀ ࡖ ࡏࡒࡀࡓࡀ 

(2649) ࡀࡐࡓࡉࡔ ࡄࡉࡁࡉࡋ ࡆࡉࡅࡀ ࡋࡄࡀࡆࡉࡍ ࡃࡀࡓࡀ ࡖ ࡄࡅ ࡃࡀࡓࡀ ࡖ ࡍࡉࡌࡅࡎࡀ ࡀࡓࡁࡀࡉࡀ ࡌࡍࡀࡅࡀࡕࡀ ࡁࡀࡉࡉࡀ ࡌࡉࡊࡀࡋ ࡀࡌࡉࡍࡈࡅࡋ ࡖ ࡍࡉࡌࡅࡎࡀ ࡌࡍ ࡀࡓࡁࡀ 

(2650) ࡓࡀࡆࡉࡀ ࡏࡑࡈࡀࡓࡀࡓ ࡌࡍࡀ ࡍࡄࡅࡓࡀ ࡁࡂࡀࡅࡇ ࡌࡍࡀ ࡊࡅࡋࡇ ࡔࡉࡓࡔࡀ ࡖ ࡄࡔࡅࡊࡀ ࡁࡂࡀࡅࡇ ࡅࡀࡊࡉࡋ ࡕࡓࡉࡍ ࡌࡀࡋࡊࡉࡀ ࡏࡄࡀࡁࡋࡇ ࡀࡊࡅࡀࡕ ࡎࡀࡃࡀࡓࡕࡀ 

(2651) ࡌࡍ ࡀࡓࡁࡀ ࡈࡀࡁࡀࡉࡉࡘ ࡏࡑࡈࡀࡓࡀࡓ ࡔࡉࡓࡔࡀ ࡖ ࡄࡔࡅࡊࡀ ࡌࡍ ࡆࡌࡀ ࡅࡌࡉࡓࡕࡀ ࡅࡁࡀࡋࡂࡅࡌࡀ ࡏࡑࡈࡀࡓࡀࡓ ࡄࡅࡀࡕ ࡍࡉࡔࡉࡌࡕࡀ ࡋࡁࡅࡔࡉࡀ ࡌࡍ 

(2652) ࡓࡀࡆࡀ ࡅࡐࡀࡎࡉࡌࡊࡀ ࡅࡉࡀࡓࡃࡍࡀ ࡏࡑࡈࡀࡓࡀࡓ ࡅࡄࡅࡀࡕ ࡍࡉࡔࡉࡌࡕࡀ ࡌࡍ ࡕࡅࡒࡍࡀ ࡖ ࡕࡋࡀࡕࡀ ࡓࡀࡆࡉࡀ ࡏࡑࡈࡀࡓࡀࡓࡀࡕ ࡍࡉࡔࡉࡌࡕࡀ ࡌࡍ ࡔࡐࡉࡕࡀ ࡖ 

(2653) ࡀࡓࡁࡀ ࡈࡀࡁࡀࡉࡉࡘ ࡏࡑࡈࡀࡓࡀࡓࡋࡇ ࡋࡁࡅࡔࡀ ࡀࡌࡉࡍࡈࡅࡋ ࡖ ࡄࡀࡆࡉࡍ ࡀࡋࡌࡀ ࡕࡌࡉࡍࡀࡉࡀ ࡄࡀࡆࡉࡍ ࡋࡁࡅࡔࡀ ࡖ ࡃࡀࡓࡀ ࡁࡂࡀࡅࡇ ࡆࡁࡀࡓ ࡌࡍ ࡄࡀࡆࡉࡍ ࡋࡁࡅࡔࡀ 

(2654) ࡁࡂࡀࡅࡇ ࡋࡀࡃࡀࡓࡀ ࡄࡀࡆࡉࡍ ࡃࡀࡓࡀ ࡀࡓࡁࡀࡉࡀ ࡍࡀࡐࡅࡔ ࡊࡅࡋ ࡄࡉࡅࡀ ࡁࡉࡔࡀ ࡀࡊࡅࡀࡕ ࡒࡀࡃࡀࡄࡀ ࡖ ࡍࡐࡅࡔ ࡅࡏࡕࡐࡀࡋࡀࡂ ࡀࡌࡀࡌࡉࡀ ࡅࡕࡀࡅࡌࡉࡀ 

(2655) ࡅࡋࡉࡔࡀࡍࡉࡀ ࡖ ࡋࡀࡊࡉࡋࡀ ࡅࡌࡉࡍࡉࡀࡍࡀ ࡀࡊࡅࡀࡕ ࡀࡍࡐࡅࡔ ࡄࡔࡅࡊࡀ ࡖ ࡌࡍ ࡔࡐࡉࡕࡀ ࡄࡅࡀ ࡀࡐࡓࡉࡔ ࡄࡉࡁࡉࡋ ࡆࡉࡅࡀ ࡋࡃࡍࡀࡁ ࡀࡋࡌࡉࡀ ࡗ ࡀࡊࡉࡋ ࡁࡓࡇ 

(2656) ࡖ ࡔࡄࡀࡈ ࡀࡓࡀࡁࡀࡉࡀ ࡀࡓࡁࡀ ࡀࡋࡐࡉࡀ ࡏࡔࡍࡉࡀ ࡍࡀࡐࡉࡒ ࡀࡁࡀࡕࡓࡇ ࡌࡔࡉࡄࡀ ࡊࡀࡃࡀࡁࡀ ࡁࡓ ࡌࡉࡓࡉࡀࡌ ࡅࡀࡕࡉࡀ ࡅࡌࡄࡀࡅࡉࡀ ࡁࡀࡋࡌࡀ ࡍࡉࡔࡀࡍࡒࡉࡀ 

(2657) ࡀࡋࡌࡀ ࡖ ࡑࡉࡐࡓࡉࡀ ࡅࡍࡅࡍࡉࡀ ࡌࡍ ࡉࡀࡌࡀ ࡅࡍࡀࡄࡓࡀࡅࡀࡕࡀ ࡐࡀࡄࡕࡉࡀ ࡐࡅࡌࡀࡉࡄࡅࡍ ࡅࡌࡁࡀࡓࡊࡉࡋࡇ ࡅࡎࡀࡄࡃࡉࡀ ࡀࡋࡌࡀ ࡖ ࡈࡉࡍࡀ ࡅࡋࡉࡁࡍࡀ ࡁࡁࡉࡍࡉࡀࡍࡀ ࡖ ࡁࡂࡀࡅࡇ 

(2658) ࡎࡀࡄࡃࡉࡀ ࡀࡋࡌࡀ ࡖ ࡄࡉࡅࡀࡍࡉࡀࡕࡀ ࡖ ࡀࡓࡁࡀ ࡋࡉࡂࡓࡉࡀ ࡖ ࡐࡀࡄࡕࡉࡀ ࡐࡅࡌࡀࡉࡄࡅࡍ ࡅࡌࡁࡀࡓࡊࡉࡋࡇ ࡅࡎࡀࡄࡃࡉࡀ ࡁࡂࡀࡅࡄ ࡀࡐࡓࡉࡔ ࡄࡉࡁࡉࡋ ࡆࡉࡅࡀ ࡖ 

(2659) ࡀࡍࡀࡕࡅࡍ ࡉࡀ ࡍࡀࡑࡅࡓࡀࡉࡉࡀ ࡅࡁࡄࡉࡓࡉࡀ ࡆࡉࡃࡒࡀ ࡁࡂࡀࡅࡇ ࡋࡀࡕࡉࡎࡉࡄࡃࡅࡍ ࡀࡌࡉࡍࡈࡅࡋ ࡖ ࡌࡔࡉࡄࡀ ࡖ ࡊࡀࡃࡁࡀ ࡄࡅ ࡖ ࡁࡆࡉࡐࡀ ࡅࡄࡀࡓࡔࡉࡀ ࡌࡀࡎࡂࡉࡀ 

(2660) ࡍࡁࡅ ࡄࡅ ࡖ ࡌࡋࡀࡂࡀࡈ ࡀࡉࡍࡉࡀ ࡅࡀࡁࡉࡃ ࡌࡀࡄࡅ ࡖ ࡁࡀࡉࡉࡀ ࡅࡌࡍ ࡄࡀࡓࡔࡉࡀ ࡅࡆࡉࡐࡉࡀ ࡌࡋࡉࡀ ࡏࡅࡑࡓࡀ ࡌࡀࡅࡃࡉࡍࡀࡋࡊࡅࡍ ࡁࡄࡉࡓࡉࡀ ࡆࡉࡃࡒࡀ 

(2661) ࡅࡔࡀࡋࡌࡀࡍࡉࡀ ࡖ ࡀࡔࡀࡓ ࡅࡒࡅࡌࡉࡅࡍ ࡋࡄࡀࡆࡉࡍ ࡌࡉࡑࡓࡀ ࡃࡀࡊࡉࡀ ࡅࡋࡀࡕࡉࡔࡀࡍࡅࡍ ࡌࡉࡌࡓࡀ ࡅࡐࡀࡒࡀࡃࡕࡀ ࡖ ࡀࡁࡀ ࡓࡁࡀ ࡖ ࡏࡒࡀࡓࡀ 

(2662) ࡖ ࡄࡅ ࡄࡀࡅࡉࡋࡊࡅࡍ ࡁࡀࡄࡉࡃ ࡏࡃࡀ ࡅࡌࡍࡀࡈࡀࡓࡋࡊࡅࡍ ࡅࡌࡐࡀࡓࡉࡒࡋࡊࡅࡍ ࡌࡍ ࡏࡃࡀࡉࡅࡍ ࡖ ࡁࡍࡇ ࡖ ࡁࡍࡇ ࡖ ࡊࡓࡅࡍ ࡀࡐࡓࡉࡔ ࡄࡉࡁࡉࡋ ࡆࡉࡅࡀ ࡖ 

(2663) ࡗ ࡌࡉࡕࡊࡀࡌࡀࡓ ࡌࡔࡉࡄࡀ ࡋࡓࡒࡉࡄࡀ ࡎࡀࡋࡉࡒ ࡔࡉࡕࡀ ࡀࡋࡐࡉࡀ ࡔࡍࡉࡀ ࡅࡌࡃࡀࡁࡀࡓ ࡌࡀࡋࡊࡅࡕࡀ ࡁࡀࡋࡌࡀ ࡅࡎࡀࡋࡉࡒ ࡀࡆࡉࡋ ࡋࡓࡒࡉࡄࡀ 

(2664) ࡅࡌࡉࡕࡋࡀࡁࡀࡔ ࡁࡏࡅࡑࡈࡅࡍࡀ ࡒࡀࡃࡌࡀࡉࡀ ࡌࡍ ࡄࡀࡍࡀࡕࡇ ࡃࡀࡓࡀ ࡅࡀࡋࡌࡀ ࡋࡊࡉࡌࡑࡀࡕ ࡀࡋࡌࡉࡀ ࡎࡀࡋࡒࡀ ࡁࡉࡔࡅࡕࡀ ࡌࡍ ࡀࡋࡌࡀ ࡖ ࡍࡉࡐࡒࡀࡕ 

(2665) ࡌࡍ ࡀࡓࡒࡀ ࡋࡀࡓࡒࡀ ࡀࡉࡋࡀ ࡅࡖ ࡍࡉࡄࡕࡀࡕ ࡌࡍ ࡓࡒࡉࡄࡀ ࡌࡉࡕࡊࡀࡌࡓࡀ ࡀࡉࡋࡀ ࡁࡓࡒࡉࡄࡀ ࡅࡄࡀࡅࡉࡍ ࡀࡍࡀࡔࡉࡀ ࡔࡀࡋࡌࡀࡍࡉࡀ ࡁࡀࡋࡌࡀ ࡄࡃࡀ 

(2666) ࡋࡌࡉࡍࡃࡀ ࡖ ࡄࡀࡁࡓࡇ ࡋࡀࡁࡀࡉࡉࡋࡇ ࡅࡌࡉࡕࡊࡀࡌࡓࡀ ࡌࡀࡃࡉࡄࡕࡅࡍ ࡖ ࡀࡍࡀࡔࡉࡀ ࡏࡋࡀࡅࡀࡉࡅࡍ ࡅࡂࡆࡅࡓࡕࡀ ࡋࡀࡂࡀࡆࡓࡉࡀ ࡅࡌࡉࡕࡊࡀࡌࡓࡉࡍ ࡅࡍࡀࡐࡔࡉࡍ ࡍࡀࡑࡅࡓࡀࡉࡉࡀ 

(2667) ࡁࡀࡋࡌࡀ ࡅࡀࡆࡋࡀࡕ ࡀࡒࡅࡕ ࡀࡉࡍࡀ ࡌࡉࡍࡀࡉࡄࡅࡍ ࡅࡎࡀࡋࡒࡀ ࡎࡉࡐࡀ ࡌࡍ ࡀࡋࡌࡀ ࡀࡊࡅࡀࡕ ࡖ ࡋࡀࡄࡅࡀ ࡎࡉࡐࡀ ࡀࡋࡌࡀ ࡖ ࡀࡕࡉࡀ ࡁࡓࡇ ࡖ ࡀࡉࡅࡌ ࡖ ࡎࡉࡐࡀ ࡌࡍ 

(2668) ࡀࡋࡌࡀ ࡖ ࡎࡀࡈࡀࡍࡀ ࡅࡄࡅࡀ ࡋࡅࡀࡕࡇ ࡅࡄࡀࡉࡋࡀ ࡋࡀࡄࡅࡀࡋࡇ ࡁࡀࡋࡌࡀ ࡀࡋࡌࡀ ࡖ ࡀࡕࡉࡀ ࡍࡉࡓࡉࡂ ࡅࡀࡒࡉࡌ ࡓࡅࡔࡅࡌࡀ ࡅࡀࡅࡌࡉࡀ ࡁࡂࡀࡅࡇ ࡄࡀࡅࡉࡍ ࡀࡍࡀࡔࡉࡀ 

(2669) ࡔࡀࡋࡌࡀࡍࡉࡀ ࡅࡌࡉࡕࡊࡀࡌࡓࡀ ࡌࡀࡋࡊࡅࡕࡀ ࡋࡁࡍࡉࡀ ࡔࡅࡓࡁࡀ ࡓࡁࡀ ࡖ ࡄࡉࡉࡀ ࡅࡆࡀࡓࡆࡉࡍ ࡅࡌࡀࡎࡒࡉࡍ ࡅࡌࡀࡋࡊࡉࡀ ࡏࡔࡀࡒ ࡃࡀࡓࡀ ࡀࡊࡅࡀࡕ ࡔࡉࡓࡔࡀ ࡖ ࡍࡀࡑࡅࡓࡀࡉࡉࡀ 

(2670) ࡌࡀࡋࡊࡉࡀ ࡖ ࡄࡅࡍ ࡌࡍ ࡒࡅࡃࡀࡌ ࡖ ࡊࡅࡋ ࡀࡎࡀࡓ ࡋࡏࡊࡀࡓࡀ ࡄࡃࡀ ࡋࡌࡀࡋࡊࡀ ࡅࡌࡉࡕࡊࡀࡌࡓࡉࡍ ࡀࡍࡀࡔࡉࡀ ࡄࡀࡅࡉࡍ ࡔࡀࡋࡌࡀࡍࡉࡀ ࡅࡍࡀࡐࡔࡀ ࡔࡀࡋࡌࡀࡍࡅࡕࡀ ࡅࡀࡊࡋࡉࡍ 

(2671) ࡄࡀࡌࡔࡉࡍ ࡀࡋࡐࡉࡀ ࡔࡍࡉࡀ ࡁࡍࡉࡄࡅࡕࡀ ࡖ ࡋࡀࡌࡉࡓࡃࡅࡕࡀ ࡅࡊࡅࡋࡄࡅࡍ ࡁࡄࡃࡀ ࡌࡀࡌࡋࡀ ࡒࡀࡉࡌࡉࡍ ࡅࡋࡀࡄࡀࡅࡉࡀ ࡁࡉࡍࡀࡕࡀࡉࡄࡅࡍ ࡎࡉࡍࡀ ࡒࡉࡍࡀ ࡅࡐࡋࡅࡂࡉࡀ ࡅࡊࡅࡋࡄࡅࡍ 

(2672) ࡀࡌࡀࡌࡉࡀ ࡕࡀࡅࡌࡉࡀ ࡅࡋࡉࡔࡀࡍࡉࡀ ࡌࡉࡍࡎࡉࡁ ࡆࡉࡓࡀ ࡌࡍ ࡏࡅࡑࡓࡀࡉࡄࡅࡍ ࡀࡐࡓࡉࡔ ࡄࡉࡁࡉࡋ ࡆࡉࡅࡀ ࡊࡖ ࡄࡀࡅࡉࡀ ࡍࡉࡔࡀࡍࡒࡉࡀ ࡅࡌࡀࡈࡉࡀ ࡄࡀࡆࡉࡍ ࡆࡉࡁࡍࡀ 

(2673) ࡄࡀࡍࡀࡕࡅࡍ ࡄࡀࡌࡔࡉࡍ ࡀࡋࡐࡉࡀ ࡆࡉࡁࡍࡉࡀ ࡌࡍࡀࡕࡀࡉ ࡃࡉࡋࡉࡀ ࡉࡀࡅࡀࡓ ࡆࡉࡅࡀ ࡄࡏ ࡀࡌࡉࡍࡈࡅࡋ ࡀࡅࡀࡋ ࡃࡀࡓࡀ ࡀࡍࡅࡔ ࡏࡅࡕࡓࡀ ࡄࡅ ࡅࡎࡀࡒࡀࡌࡕࡀ 

(2674) ࡋࡃࡉࡋࡇ ࡄࡉࡁࡉࡋ ࡉࡀࡅࡀࡓ ࡆࡉࡅࡀ ࡏࡕࡄࡉࡁࡋࡉࡀ ࡅࡄࡀࡉࡆࡀࡊ ࡃࡉࡍࡁࡀ ࡋࡃࡀࡓࡀ ࡏࡕࡄࡉࡁ ࡋࡌࡀࡌࡉࡕ ࡑࡈࡀࡓࡕࡉࡀ ࡖ ࡀࡄࡇ ࡖ ࡀࡁࡀࡕࡀࡓ ࡌࡍࡀࡕࡀࡉ ࡃࡉࡋࡉࡀ 

(2675) ࡄࡉࡁࡉࡋ ࡉࡀࡅࡀࡓ ࡆࡉࡅࡀ ࡃࡍࡀࡁࡕࡀ ࡖ ࡃࡀࡓࡀ ࡅࡔࡉࡐࡅࡋࡕࡀ ࡅࡃࡍࡀࡁࡕࡀ ࡖ ࡀࡋࡌࡀ ࡋࡌࡀࡌࡉࡕ ࡁࡓࡀࡕࡇ ࡖ ࡒࡉࡍ ࡀࡄࡁࡀࡋࡇ ࡏࡌࡀ ࡖ ࡔࡅࡁࡀ ࡀࡊࡀࡋࡉࡅࡍ ࡔࡅࡁࡀ 

(2676) ࡌࡍࡀࡅࡀࡕࡀ ࡕࡌࡉࡍࡀࡉࡕࡀ ࡏࡋ ࡀࡌࡀࡌࡉࡕ ࡏࡕࡄࡉࡁࡋࡇ ࡀࡊࡅࡀࡕ ࡃࡉࡋࡇ ࡀࡌࡉࡍࡈࡅࡋ ࡖ ࡃࡉࡍࡁࡀ ࡖ ࡃࡀࡓࡀ ࡖ ࡊࡅࡋࡇ ࡍࡄࡅࡓࡀ ࡏࡕࡁࡉࡕ ࡓࡉࡔࡉࡇ 

(2677) ࡖ ࡊࡅࡋࡇ ࡄࡔࡅࡊࡀ ࡏࡔࡕࡀࡅࡉࡀࡕ ࡌࡍࡀࡕࡀ ࡖ ࡒࡉࡍ ࡅࡔࡉࡐࡅࡋࡕࡀ ࡖ ࡃࡉࡍࡁࡀ ࡖ ࡃࡀࡓࡀ ࡀࡓࡁࡀࡉࡀ ࡃࡉࡍࡁࡀ ࡖ ࡀࡋࡌࡀ ࡕࡌࡉࡍࡀࡉࡀ ࡀࡐࡓࡉࡔ 

(2678) ࡄࡉࡁࡉࡋ ࡆࡉࡅࡀ ࡌࡍ ࡌࡀࡋࡀࡋࡇ ࡖ ࡓࡀࡆࡀ ࡓࡁࡀ ࡌࡔࡀࡁࡀ ࡔࡅࡌࡇ ࡄࡀࡆࡉࡍ ࡊࡃࡀࡁࡀ ࡖ ࡃࡉࡅࡀࡍ ࡖ ࡂࡀࡋࡀࡋࡕࡀ ࡓࡀࡁࡕࡉࡀ ࡖ ࡌࡍ ࡓࡉࡔ ࡀࡋࡌࡉࡀ 

(2679) ࡖ ࡍࡄࡅࡓࡀ ࡅࡀࡋࡌࡀ ࡋࡃࡉࡍࡁࡀ ࡖ ࡀࡋࡌࡀ ࡕࡌࡉࡍࡀࡉࡀ ࡄࡀࡆࡉࡍ ࡃࡉࡓࡊࡀ ࡖ ࡔࡀࡋࡌࡀࡍࡉࡀ ࡋࡀࡁࡀࡈࡉࡋ ࡀࡌࡉࡍࡈࡅࡋ ࡌࡍࡀࡕࡀ ࡖ ࡀࡁࡀ ࡄࡉࡉࡀ ࡒࡃࡉࡌࡀ 

(2680) ࡒࡀࡃࡌࡀࡉࡀ ࡄࡅ ࡌࡔࡀࡁࡀ ࡔࡅࡌࡇ ࡊࡅࡋ ࡌࡀࡍ ࡌࡍ ࡍࡀࡑࡅࡓࡀࡉࡉࡀ ࡅࡌࡀࡍࡃࡀࡉࡉࡀ ࡖ ࡄࡀࡅࡉࡍ ࡁࡀࡋࡌࡀ ࡕࡌࡉࡍࡀࡉࡀ ࡍࡉࡔࡀࡓ ࡅࡍࡉࡎࡄࡀࡃ 

(2681) ࡅࡍࡉࡁࡀࡃ ࡁࡄࡀࡆࡉࡍ ࡔࡉࡓࡔࡀ ࡕࡀࡒࡍࡀ ࡅࡁࡋࡉࡁࡀ ࡊࡔࡉࡈࡀ ࡅࡁࡏࡎࡐࡉࡀ ࡌࡄࡀࡉࡌࡀࡍࡀࡕࡀ ࡁࡌࡍࡀࡕࡀࡉ ࡃࡉࡋࡉࡀ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡖ 

(2682) ࡌࡍ ࡄࡅࡀ ࡍࡉࡄࡅࡉࡀ ࡄࡀࡁࡔࡀࡁࡀ ࡍࡉࡄࡅࡉࡋࡇ ࡐࡀࡓࡅࡀࡍࡒࡀ ࡅࡍࡉࡐࡀࡓࡒࡇ ࡌࡍ ࡏࡃࡀࡉࡄࡅࡍ ࡖ ࡁࡍࡇ ࡖ ࡁࡍࡇ ࡖ ࡊࡓࡅࡍ ࡅࡀࡍࡀ ࡔࡊࡉࡍࡋࡇ ࡔࡊࡉࡍࡕࡀ 

(2683) ࡋࡉࡀࡌࡉࡍࡀࡉ ࡅࡊࡅࡋ ࡍࡀࡑࡅࡓࡀࡉࡀ ࡅࡌࡀࡍࡃࡀࡉࡀ ࡖ ࡌࡍ ࡔࡉࡓࡔࡀ ࡕࡀࡒࡍࡀ ࡄࡅ ࡅࡋࡀࡍࡉࡎࡄࡀࡃ ࡁࡄࡀࡆࡉࡍ ࡃࡉࡓࡊࡀ ࡖ ࡔࡀࡋࡌࡀࡍࡉࡀ ࡅࡍࡉࡎࡄࡀࡃ ࡁࡎࡉࡂࡉࡀ 

(2684) ࡖ ࡓࡅࡄࡀ ࡀࡐࡀࡊࡕࡉࡍࡅࡍ ࡋࡌࡀࡋࡀࡋࡅࡍ ࡅࡌࡍࡀࡕࡀࡉ ࡃࡉࡋࡉࡀ ࡋࡀࡍࡉࡄࡅࡉࡀ ࡅࡌࡍ ࡓࡅࡄࡀ ࡅࡌࡔࡉࡄࡀ ࡍࡉࡄࡅࡉࡀ ࡅࡄࡀࡁࡔࡀࡁࡀ ࡋࡀࡍࡉࡄࡅࡉ ࡋࡇ ࡀࡃࡉࡀࡅࡓࡀ 

(2685) ࡅࡋࡀࡍࡉࡕࡐࡀࡓࡀࡒ ࡌࡍ ࡏࡃࡀࡉࡄࡅࡍ ࡖ ࡁࡍࡇ ࡖ ࡊࡓࡅࡍ ࡄࡀࡋࡉࡍ ࡌࡀࡌࡋࡀࡋࡉࡀ ࡀࡐࡓࡉࡔ ࡄࡉࡁࡉࡋ ࡆࡉࡅࡀ ࡏࡋࡀࡅࡀࡉࡅࡍ ࡋࡁࡍࡉࡀ ࡔࡅࡓࡁࡀ ࡓࡁࡀ ࡖ 

(2686) ࡅࡍࡉࡍࡄࡀࡓ ࡏࡅࡑࡓࡀࡉࡄࡅࡍ ࡅࡏࡕࡀࡐࡓࡀࡔ ࡌࡀࡃࡉࡄࡕࡅࡍ ࡏࡋ ࡌࡀࡋࡊࡀ ࡖ ࡍࡄࡅࡓࡀ ࡌࡔࡀࡁࡀ ࡔࡅࡌࡇ ࡄࡀࡆࡉࡍ ࡀࡎࡀࡕࡀ ࡖ ࡃࡉࡅࡀࡍ ࡖ ࡂࡀࡃࡀࡍࡀ 

(2687) ࡓࡀࡁࡕࡉࡀ ࡎࡀ 

(2688) ○ ࡄࡀࡆࡉࡍ ࡃࡉࡅࡀࡍ ࡖ ࡂࡀࡋࡀࡋࡕࡀ ࡓࡀࡁࡕࡉࡀ ࡖ ࡄࡀࡓࡀࡍ ࡂࡀࡅࡀࡉࡕࡀ ࡌࡉࡕࡒࡉࡓࡉࡀ ࡖ ࡀࡍࡎࡉࡕ ࡋࡍࡀࡐࡔࡀࡉ ࡆࡉࡁࡍࡀ ࡕࡋࡉࡕࡀࡉࡀ ࡀࡍࡀ ࡀࡍࡉࡀ ࡅࡃࡀࡍࡉࡀ ࡅࡌࡓࡀࡃࡐࡀ 

(2689) ࡅࡌࡉࡀࡍࡒࡀ ࡀࡁࡃࡀ ࡖ ࡊࡅࡋࡇ ࡄࡀࡈࡀࡉࡉࡀ ࡅࡌࡍࡀࡔࡉࡒ ࡋࡉࡂࡓࡀࡉࡄࡅࡍ ࡌࡎࡀࡍࡉࡀ ࡖ ࡍࡀࡑࡅࡓࡀࡉࡉࡀ ࡀࡒࡀࡐࡓࡀ ࡖ ࡀࡕࡅࡕࡉࡀ ࡋࡉࡂࡓࡀࡉࡄࡅࡍ ࡖ ࡍࡀࡎࡀࡊࡉࡀ ࡆࡅࡈࡀ ࡖ 

(2690) ࡖ ࡀࡄࡀࡉ ࡂࡀࡍࡆࡉࡁࡓࡉࡀ ࡀࡍࡀ ࡆࡀࡊࡉࡀ ࡆࡉࡄࡓࡅࡍ ࡁࡓ ࡓࡁࡀࡉ ࡓࡀࡌ ࡁࡓ ࡓࡁࡀࡉ ࡉࡀࡄࡉࡀ ࡉࡄࡀࡍࡀ ࡁࡓ ࡓࡁࡀࡉ ࡓࡀࡌ ࡁࡓ ࡉࡀࡄࡉࡀ ࡁࡀࡊࡕࡉࡀࡓ 

(2691) ࡁࡓ ࡓࡁࡀࡉ ࡀࡃࡀࡌ ࡌࡄࡀࡕࡀࡌ ࡁࡓ ࡓࡁࡀࡉ ࡁࡉࡄࡓࡀࡌ ࡁࡓࡄࡉࡉࡀ ࡁࡓ ࡓࡁࡀࡉ ࡀࡃࡀࡌ ࡆࡀࡊࡉࡀ ࡁࡓ ࡓࡁࡀࡉ ࡁࡓࡄࡉࡉࡀ ࡊࡉࡍࡉࡀࡍࡀ ࡊࡅࡄࡀࡉࡋࡉࡀ 

(2692) ࡖ ࡀࡍࡎࡉࡕ ࡌࡍ ࡀࡍࡎࡀࡕࡀࡉ ࡃࡉࡋࡉࡀ ࡆࡉࡁࡍࡀ ࡕࡋࡉࡕࡀࡉࡀ ࡀࡍࡀ ࡆࡀࡊࡉࡀ ࡆࡉࡄࡓࡅࡍ ࡁࡓ ࡓࡁࡀࡉ ࡓࡁࡀࡉ ࡓࡀࡌ ࡁࡓ ࡓࡁࡀࡉ ࡉࡀࡄࡉࡀ ࡉࡄࡀࡍࡀ ࡁࡓ ࡓࡁࡀࡉ [ ] 

(2693) ࡊࡉࡍࡉࡀࡍࡀ ࡊࡅࡄࡀࡉࡋࡉࡀ ࡌࡍ ࡀࡍࡎࡀࡕࡀ ࡅࡃࡉࡅࡀࡍ ࡖ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡕࡀࡓࡌࡉࡃࡀ ࡕࡀࡒࡍࡀ ࡄࡅࡀ ࡓࡁࡀࡉ ࡌࡄࡀࡕࡀࡌ ࡁࡓ ࡉࡀࡄࡉࡀ ࡁࡀࡉࡀࡍ ࡁࡓ 

(2694) ࡉࡅࡄࡀࡍࡀ ࡔࡀࡃࡀࡍ ࡁࡓ ࡆࡀࡊࡓࡉࡀ ࡁࡓࡄࡉࡁࡉࡋ ࡁࡓ ࡆࡀࡊࡓࡉࡀ ࡋࡀࡒࡀࡁ ࡃࡉࡄࡃࡀࡓࡉࡀ ࡊࡉࡍࡉࡀࡍࡀ ࡎࡀࡁࡅࡓ ࡅࡀࡎࡀࡕࡀ ࡋࡀࡄࡅࡀࡕࡀࡋࡇ ࡀࡋࡌࡀ ࡋࡄࡀࡊࡀ ࡅࡄࡉࡉࡀ 

(2695) ࡆࡀࡊࡉࡍ ࡎࡀ 

(2696) ○ ࡕࡅࡌ ࡏࡎࡕࡀࡃࡀࡓ ࡅࡎࡋࡉࡒ ࡋࡓࡉࡔ ࡄࡀࡆࡉࡍ ࡃࡉࡅࡀࡍ ࡉࡀࡒࡉࡓࡀ ࡅࡀࡐࡓࡀࡔࡀࡕࡀ ࡅࡂࡀࡋࡀࡋࡕࡀ ࡓࡀࡁࡕࡉࡀ ࡖ ࡄࡅ ࡄࡀࡓࡀࡍ ࡂࡀࡅࡀࡉࡕࡀ ࡌࡉࡕࡒࡉࡓࡉࡀ 

(2697) ࡉࡅࡌࡀ ࡖ ࡓࡀࡄࡀࡈࡉࡀ ࡅࡎࡓࡉࡍ ࡅࡔࡉࡕࡀ ࡁࡉࡀࡄࡓࡀ ࡖ ࡁࡀࡆࡓࡀ ࡕࡉࡍࡉࡀࡍࡀ ࡖ ࡄࡅ ࡍࡉࡎࡀࡍ ࡏࡌࡁࡓࡀ ࡅࡔࡉࡕࡀ ࡖ ࡏࡓࡅࡁࡕࡀ ࡋࡔࡍࡀࡕ ࡀࡋࡐࡀ ࡅࡕࡌࡀࡍࡀࡍ 

(2698) ࡅࡕࡌࡀࡍࡉࡀ ࡄࡅࡀ ࡁࡃࡀࡓࡀ ࡖ ࡒࡀࡁࡉࡋࡉࡅࡍ ࡀࡓࡀࡁ ࡏࡋࡀࡅࡀࡉࡄࡅࡍ ࡅࡁࡀࡈࡋࡀ ࡌࡀࡍࡃࡀ ࡖ ࡄࡉࡉࡀ ࡋࡓࡅࡂࡆࡀࡉࡄࡅࡍ ࡌࡍ ࡊࡀࡍࡀ ࡓࡁࡀ ࡖ ࡍࡉࡔࡌࡀࡕࡀ 

(2699) ࡁࡌࡃࡉࡍࡕࡀ ࡖ ࡔࡅࡔࡕࡀࡓ ࡅࡁࡌࡉࡀ ࡖ ࡃࡅࡃࡀࡍࡂࡀ ࡅࡁࡕࡀࡓࡁࡀࡑࡀ ࡖ ࡏࡅࡎࡕࡀࡃ ࡉࡀࡒࡉࡓࡀ ࡍࡀࡉࡓࡅࡆ ࡁࡓ ࡄࡀࡃࡀࡕ ࡔࡅࡌࡇ ࡉࡀࡄࡉࡀ ࡁࡓ ࡁࡉࡄࡓࡀࡌ 

(2700) ࡁࡓ ࡉࡀࡄࡉࡀ ࡉࡄࡀࡍࡀ ࡁࡓ ࡄࡀࡉࡀࡕ ࡁࡓ ࡀࡃࡀࡌ ࡁࡓ ࡉࡅࡄࡀࡍࡀ ࡔࡀࡃࡀࡍ ࡁࡓ ࡆࡀࡊࡓࡉࡀ ࡁࡓ ࡄࡉࡁࡉࡋ ࡁࡓ ࡆࡀࡊࡓࡉࡀ ࡁࡓ ࡆࡉࡄࡓࡅࡍ ࡋࡀࡒࡀࡁ 

(2701) ࡃࡉࡄࡃࡀࡓࡉࡀ ࡅࡊࡉࡍࡉࡀࡍࡀ ࡎࡀࡁࡅࡓ ࡔࡁࡀࡒࡋࡇ ࡌࡀࡍࡃࡀ ࡖ ࡄࡉࡉࡀ ࡄࡀࡈࡀࡉࡉࡇ ○ ࡕࡅࡌ ࡌࡀࡍࡃࡉࡆࡉࡀ ࡄࡀࡋࡉࡍ ࡃࡉࡅࡀࡍࡀࡍ ࡉࡀࡒࡉࡓࡉࡀ ࡌࡍ ࡓࡉࡔࡀ ࡅࡀࡋࡌࡀ 

(2702) ࡋࡃࡉࡍࡁࡀ ࡁࡆࡀࡄࡓࡅࡕࡀ ࡅࡉࡀࡃࡉࡕࡀ ࡅࡄࡀࡒࡀࡓࡕࡀ ࡖ ࡄࡀࡒࡀࡓ ࡅࡀࡍࡃࡀࡆ ࡀࡋࡅࡀࡕࡀࡉ ࡀࡄࡀࡉ ࡒࡀࡔࡉࡔࡀ ࡕࡀࡓࡌࡉࡃࡀ ࡕࡀࡒࡍࡀ ࡅࡎࡃࡉࡓࡀ ࡓࡁࡀࡉ ࡉࡀࡄࡉࡀ 

(2703) ࡉࡅࡄࡀࡍࡀ ࡁࡓ ࡓࡁࡀࡉ ࡓࡀࡌ ࡁࡓ ࡓࡁࡀࡉ ࡉࡀࡄࡉࡀ ࡉࡅࡄࡀࡍࡀ ࡁࡓ ࡓࡁࡀࡉ ࡓࡀࡌ ࡊࡉࡍࡉࡀࡍࡀ ࡊࡅࡄࡀࡉࡋࡉࡀ ࡔࡁࡀࡒࡋࡇ ࡌࡀࡍࡃࡀ ࡖ ࡄࡉࡉࡀ ࡄࡀࡈࡀࡉࡉࡇ

 

Kolophon DC 9 = Handschrift B

(222) ࡄࡀࡆࡉࡍ ࡃࡉࡅࡀࡍ ࡖ ࡂࡀࡋࡀࡋࡕࡀ ࡓࡀࡁࡕࡉࡀ ࡖ ࡄࡀࡓࡀࡍ ࡂࡀࡅࡀࡉࡕࡀ ࡌࡉࡕࡒࡉࡓࡉࡀ ࡖ ࡀࡍࡎࡉࡕ ࡀࡍࡀ ࡀࡍࡉࡀ ࡅࡃࡀࡍࡉࡀ ࡅࡌࡓࡀࡃࡐࡀ ࡖ ࡀࡄࡀࡉ ࡂࡀࡍࡆࡉࡁࡓࡉࡀ ࡀࡒࡀࡐࡓࡀ 

(223) ࡖ ࡀࡕࡅࡕࡉࡀ ࡋࡉࡂࡓࡀࡉࡄࡅࡍ ࡖ ࡍࡀࡎࡀࡊࡉࡀ ࡅࡀࡁࡃࡀ ࡖ ࡊࡅࡋࡇ ࡄࡀࡈࡀࡉࡉࡀ ࡀࡍࡀ ࡓࡀࡌ ࡆࡉࡄࡓࡅࡍ ࡁࡓ ࡓࡁࡀࡉ ࡎࡀࡌ ࡁࡉࡄࡓࡀࡌ ࡁࡓ ࡓࡁࡀࡉ ࡉࡀࡄࡉࡀ ࡆࡉࡄࡓࡅࡍ ࡁࡓ ࡓࡁࡀࡉ 

(224) ࡁࡉࡄࡓࡀࡌ ࡔࡉࡕࡉࡋ ࡁࡓ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡅࡂࡀࡍࡆࡉࡓࡁࡀ ࡕࡀࡒࡍࡀ ࡁࡄࡉࡓࡀ ࡓࡁࡀࡉ ࡉࡀࡄࡉࡀ ࡁࡓ ࡓࡁࡀࡉ ࡆࡉࡄࡓࡅࡍ ࡁࡓ ࡁࡓࡀࡉ ࡉࡀࡄࡉࡀ ࡌࡄࡀ

(225) ࡕࡀࡌ ࡁࡓ ࡀࡃࡀࡌ ࡁࡓ ࡀࡃࡀࡌ ࡉࡄࡀࡍࡀ ࡁࡓ ࡁࡉࡄࡓࡀࡌ ࡁࡓ ࡔࡀࡌࡎ ࡁࡓ ࡂࡀࡍࡉࡌ ࡁࡓ ࡓࡁࡀࡉ ࡀࡃࡀࡌ ࡁࡓ ࡀࡓࡅࡄࡅࡍ ࡖ ࡂࡀࡍࡆࡉࡁࡓࡉࡀ ࡓࡁࡀࡉ ࡉࡀࡄࡉࡀ 

(226) ࡊࡉࡍࡉࡀࡍࡀ ࡘࡀࡆࡉࡆ ࡅࡋࡀࡒࡀࡁ ࡊࡅࡐࡀࡔ࡙ࡉࡀ ࡅࡃࡅࡓࡀࡔ࡙ࡉࡀ ࡖ ࡀࡍࡎࡉࡕ ࡋࡍࡀࡐࡔࡀࡉ ࡌࡍ ࡕࡓࡉࡍ ࡃࡉࡅࡀࡍࡀࡍ ࡄࡀࡃ ࡌࡉࡍࡀࡉࡄࡅࡍ ࡌࡍ ࡊࡃࡀࡁࡀ ࡖ ࡏࡃࡀ ࡖ ࡓࡁࡀࡉ ࡆࡉࡄࡓࡅࡍ 

(227) ࡁࡓ ࡓࡁࡀࡉ ࡆࡉࡄࡓࡅࡍ ࡁࡓ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡅࡂࡀࡍࡆࡉࡁࡓࡀ ࡕࡀࡒࡍࡀ ࡁࡄࡉࡓࡀ ࡓࡁࡀࡉ ࡉࡀࡄࡉࡀ ࡁࡓ ࡉࡄࡀࡍࡀ ࡁࡓ ࡓࡁࡀࡉ ࡀࡃࡀࡌ ࡆࡉࡄࡓࡅࡍ ࡁࡓ ࡆࡉࡄࡓࡅࡍ 

(228) ࡁࡓ ࡃࡉࡆࡐࡅࡋࡉࡀ ࡁࡓ ࡔࡅࡂࡓࡉࡀ ࡁࡓ ࡍࡀࡑࡉࡓ ࡁࡓ ࡆࡀࡊࡓࡉࡀ ࡌࡍ ࡁࡍࡉࡀ ࡃࡉࡄࡃࡀࡓࡉࡀ ࡎࡀࡁࡅࡓ ࡖ ࡀࡍࡎࡀ ࡋࡄࡀࡃ ࡔࡀࡋࡌࡀࡍࡀ ࡅࡌࡄࡀࡉࡌࡀࡍ ࡏࡕࡄࡀࡉࡌࡀࡍ ࡁࡌࡀࡋࡊࡀ 

(229) ࡓࡀࡌࡀ ࡖ ࡍࡄࡅࡓࡀ ࡏࡄࡀࡁ ࡆࡉࡃࡒࡀ ࡍࡀࡐࡔࡀ ࡅࡓࡉࡄࡌࡉࡀ ࡋࡄࡀࡆࡉࡍ ࡖ ࡄࡀࡅࡉࡋࡇ ࡃࡀࡊࡀࡓ ࡔࡅࡌࡀ ࡅࡓࡅࡔࡅࡌࡀ ࡅࡄࡀࡕࡀࡌ ࡁࡀࡋࡌࡉࡀ ࡓࡅࡓࡁࡉࡀ ࡏࡋࡀࡉࡉࡀ ࡖ 

(230) ࡍࡄࡅࡓࡀ ࡖ ࡄࡅ ࡔࡅࡌࡀ ࡖ ࡌࡀࡑࡁࡅࡕࡀ ࡁࡀࡉࡀࡍ ࡁࡓ ࡄࡀࡅࡀ ࡅࡔࡅࡌࡀ ࡖ ࡒࡀࡓࡀࡉࡕࡀ ࡀࡎࡕࡀࡓ ࡘࡀࡆࡉࡆ ࡁࡓ ࡃࡉࡆࡐࡅࡋࡉࡀ ࡁࡓ ࡐࡉࡆࡉࡀ ࡁࡓ ࡒࡀࡎࡅࡌ ࡁࡓ ࡍࡀࡔࡌࡃࡉࡍ 

(231) ࡁࡓ ࡓࡀࡔࡀࡁ ࡁࡓ ࡘࡀࡁࡃࡉࡋࡄࡀࡎࡀࡍ ࡊࡉࡍࡉࡀࡍࡀ ࡎࡀࡁࡅࡓ ࡖ ࡀࡍࡎࡀ ࡌࡍ ࡊࡃࡀࡁࡀ ࡖ ࡏࡃࡀ ࡖ ࡓࡁࡀࡉ ࡉࡀࡄࡉࡀ ࡉࡄࡀࡍࡀ ࡖ ࡄࡅ ࡔ࡙ࡉࡃࡅࡉࡉࡀ ࡅࡄࡅࡀ ࡖ ࡀࡍࡎࡀ ࡋࡍࡀࡐࡔࡉࡀ 

(232) ࡌࡍ ࡊࡃࡀࡁࡀ ࡖ ࡏࡃࡀ ࡖ ࡓࡁࡀࡉ ࡆࡀࡊࡉࡀ ࡆࡉࡄࡓࡅࡍ ࡁࡓ ࡓࡁࡀࡉ ࡓࡀࡌ ࡁࡓ ࡓࡁࡀࡉ ࡉࡀࡄࡉࡀ ࡉࡄࡀࡍࡀ ࡁࡓ ࡓࡁࡀࡉ ࡓࡀࡌ ࡁࡓ ࡉࡀࡄࡉࡀ ࡁࡀࡊࡕࡉࡀࡓ ࡁࡓ ࡓࡁࡀࡉ ࡀࡃࡀࡌ 

(233) ࡌࡄࡀࡕࡀࡌ ࡁࡓ ࡓࡁࡀࡉ ࡁࡉࡄࡓࡀࡌ ࡁࡓ ࡄࡉࡉࡀ ࡁࡓ ࡓࡁࡀࡉ ࡀࡃࡀࡌ ࡆࡀࡊࡉࡀ ࡁࡓ ࡓࡁࡀࡉ ࡁࡓ ࡄࡉࡉࡀ ࡊࡉࡍࡉࡀࡍࡀ ࡊࡅࡄࡀࡉࡋࡉࡀ ࡖ ࡀࡍࡎࡀ ࡌࡍ ࡀࡍࡎࡀࡕࡀ ࡖ ࡍࡀࡐࡔࡉࡇ 

(234) ࡆࡉࡁࡍࡀ ࡕࡋࡉࡕࡀࡉࡀ ࡖ ࡄࡅ ࡀࡍࡎࡀ ࡌࡍ ࡃࡉࡅࡀࡍ ࡖ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡕࡀࡓࡌࡉࡃࡀ ࡕࡀࡒࡍࡀ ࡄࡅࡀ ࡓࡁࡀࡉ ࡌࡄࡀࡕࡀࡌ ࡁࡓ ࡉࡀࡄࡉࡀ ࡌࡄࡀࡕࡀࡌ ࡁࡓ ࡉࡀࡄࡉࡀ ࡁࡀࡉࡀࡍ 

(235) ࡁࡓ ࡉࡅࡄࡀࡍࡀ ࡔࡀࡃࡀࡍ ࡁࡓ ࡆࡀࡊࡓࡉࡀ ࡁࡓ ࡄࡉࡁࡉࡋ ࡁࡓ ࡆࡀࡊࡓࡉࡀ ࡋࡀࡒࡀࡁ ࡃࡉࡄࡃࡀࡓࡉࡀ ࡊࡉࡍࡉࡀࡍࡀ ࡎࡀࡁࡅࡓ ࡖ ࡀࡍࡎࡉࡕ ࡌࡍ ࡃࡉࡅࡀࡍ ࡄࡅࡓࡉࡍࡀ ࡊࡃࡀࡁࡀ ࡖ ࡏࡃࡀ ࡖ ࡓࡁࡀࡉ 

(236) ࡆࡉࡄࡓࡅࡍ ࡁࡓ ࡀࡃࡀࡌ ࡉࡄࡀࡍࡀ ࡁࡓ ࡉࡀࡄࡉࡀ ࡁࡓ ࡆࡉࡄࡓࡅࡍ ࡁࡓ ࡉࡀࡄࡉࡀ ࡀࡍࡅࡔ ࡁࡓ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡓࡁࡀࡉ ࡌࡄࡀࡕࡀࡌ ࡁࡓ ࡉࡀࡄࡉࡀ ࡁࡀࡉࡀࡍ ࡍࡓ ࡉࡄࡀࡍࡀ 

(237) ࡔࡀࡃࡀࡍ ࡁࡓ ࡆࡀࡊࡓࡉࡀ ࡁࡓ ࡄࡉࡁࡉࡋ ࡁࡓ ࡉࡀࡄࡉࡀ ࡁࡓ ࡆࡀࡊࡓࡉࡀ ࡁࡓ ࡆࡉࡄࡓࡅࡍ ࡌࡍ ࡁࡍࡀ ࡃࡉࡄࡃࡀࡓࡉࡀ ࡊࡉࡍࡉࡀࡍࡀ ࡎࡀࡁࡅࡓ ࡅࡋࡀࡒࡀࡁ ࡁࡀࡈࡀࡄࡀࡉࡉࡀ ࡀࡍࡎࡀ ࡌࡍ 

(238) ࡃࡉࡅࡀࡍ ࡖ ࡓࡁࡀࡉ ࡆࡀࡊࡉࡀ ࡁࡓ ࡓࡁࡀࡉ ࡓࡀࡌ ࡁࡓ ࡉࡀࡄࡉࡀ ࡉࡄࡀࡍࡀ ࡊࡉࡍࡉࡀࡍࡀ ࡊࡅࡄࡀࡉࡋࡉࡀ ࡄࡅ ࡀࡍࡎࡀ ࡌࡍ ࡃࡉࡅࡀࡍ ࡖ ࡓࡁࡀࡉ ࡌࡄࡀࡕࡀࡌ ࡁࡓ ࡉࡀࡄࡉࡀ ࡁࡀࡉࡀࡍ ࡌࡍ ࡁࡍࡉࡀ 

(239) ࡃࡉࡄࡃࡀࡓࡉࡀ ࡊࡉࡍࡉࡀࡍࡀ ࡎࡀࡁࡅࡓ ࡎࡀ ࡅࡀࡎࡀࡕࡀ ࡉࡀࡕࡉࡓ ࡖ ࡋࡀࡄࡅࡀࡕࡀࡋࡇ ࡀࡋࡌࡀ ࡋࡄࡀࡊࡀ ࡅࡄࡉࡉࡀ ࡆࡀࡊࡉࡍ ࡅࡋࡀࡋࡀࡌ ࡀࡋࡌࡉࡀ ࡎࡀ 

(240) ࡕࡅࡌ ࡏࡎࡕࡀࡃࡀࡓ ࡅࡎࡋࡉࡒ ࡋࡓࡉࡔ ࡄࡀࡆࡉࡍ ࡃࡉࡅࡀࡍ ࡉࡀࡒࡉࡓࡀ ࡅࡔࡓࡀࡂࡀ ࡖ ࡍࡀࡄࡉࡓࡀ ࡅࡀࡐࡓࡀࡔࡀࡕࡀ ࡅࡂࡀࡋࡀࡋࡕࡀ ࡓࡀࡁࡕࡉࡀ ࡖ ࡄࡏ ࡄࡀࡓࡀࡍ ࡂࡀࡅࡀࡉࡕࡀ ࡌࡉࡕࡒࡉࡓࡉࡀ 

(241) ࡉࡅࡌࡀ ࡖ ࡔࡀࡐࡕࡀ ࡅࡕࡔࡀࡎࡀࡓ ࡁࡉࡀࡄࡓࡀ ࡖ ࡌࡉࡑࡉ ࡐࡀࡉࡉࡆ ࡖ ࡄࡅ ࡊࡀࡍࡅࡍ ࡄࡉࡈࡉࡀ ࡁࡔࡉࡃࡕࡀ ࡖ ࡓࡄࡀࡈࡉࡀ ࡖ ࡄࡅ ࡏࡌࡁࡓࡀ ࡋࡔࡍࡀࡕ ࡏࡌࡀࡕࡉࡍ ࡅࡔࡅࡁࡉࡍ ࡅࡔࡉࡕ 

(242) ࡔࡍࡉࡀ ࡀࡁࡀࡕࡀࡓ ࡀࡋࡐࡀ ࡄࡅࡀ ࡁࡃࡀࡓࡀ ࡖ ࡒࡀࡁࡉࡋࡉࡅࡍ ࡀࡓࡀࡁࡀࡉࡉࡀ ࡀࡓࡀࡁ ࡀࡋࡌࡀ ࡏࡋࡀࡅࡀࡉࡄࡅࡍ ࡅࡁࡀࡈࡋࡀ ࡌࡀࡍࡃࡀ ࡖ ࡄࡉࡉࡀ ࡋࡓࡅࡂࡆࡀࡉࡄࡅࡍ ࡌࡍ ࡊࡀࡍࡀ ࡓࡁࡀ 

(243) ࡖ ࡍࡉࡔࡌࡀࡕࡀ ࡁࡑࡀࡄࡀ ࡖ ࡁࡅࡌࡀࡍࡃࡀ ࡁࡔࡉࡌࡀ ࡘࡀ ࡖ ࡌࡀࡓࡂࡀࡁ ࡁࡌࡉࡋࡊ ࡖ ࡌࡅࡈࡉࡓࡀࡕ ࡁࡌࡉࡀ ࡖ ࡐࡓࡀࡔ ࡆࡉࡅࡀ ࡁࡄࡅࡊࡅࡌ ࡔࡉࡊࡀ ࡖ ࡌࡅࡍࡕࡉࡐࡉࡔ࡙ ࡌࡀࡍࡑࡅࡓ 

(244) ࡁࡓ ࡓࡀࡔࡉࡃ ࡁࡓ ࡕࡀࡌࡉࡓ ࡁࡓ ࡎࡀࡘࡃࡅࡍ ࡅࡁࡀࡔࡀ ࡁࡀࡂࡃࡀࡃ ࡌࡅࡑࡈࡀࡐࡀ ࡁࡀࡔࡀ ࡊࡅࡋ ࡌࡉࡍࡃࡀࡌ ࡒࡀࡋࡉࡋ ࡅࡁࡀࡑࡉࡓ ࡌࡍ ࡋࡁࡓ ࡌࡍ ࡁࡅࡕࡀ ࡅࡕࡅࡔࡁࡉࡄࡕࡀ ࡅࡄࡉࡉࡀ 

(245) ࡄࡃࡅࡍ ࡋࡀࡋࡀࡌ ࡀࡋࡌࡉࡀ ࡅࡄࡉࡉࡀ ࡆࡀࡊࡉࡍ ࡋࡊࡅࡋࡄࡅࡍ ࡏࡅࡁࡀࡃࡉࡀ ࡅࡀࡌࡀ ࡖ ࡍࡀࡑࡅࡓࡀࡉࡉࡀ ࡖ ࡑࡀࡉࡕࡉࡍ ࡁࡒࡀࡋࡀ ࡖ ࡄࡉࡉࡀ ࡅࡄࡉࡉࡀ ࡆࡀࡊࡉࡍ ࡋࡊࡅࡋࡄࡅࡍ ࡏࡅࡁࡀࡃࡉࡀ ࡎࡀ 

(246) ࡕࡅࡌ ࡕࡉࡃࡅࡍ ࡖ ࡌࡀࡍࡃࡉࡋࡉࡍ ࡄࡀࡆࡉࡍ ࡃࡉࡅࡀࡍࡀࡍ ࡔࡅࡁࡀ ࡖ ࡄࡅࡍ ࡁࡄࡀࡃ ࡃࡉࡅࡀࡍ ࡀࡍࡃࡉࡆ ࡀࡁࡉࡄࡃࡀࡉ ࡄࡀࡃ ࡕࡀࡓࡌࡉࡃࡀ ࡀࡄࡀ ࡖ ࡊࡅࡔࡈࡀ ࡖ ࡄࡅ ࡓࡁࡀࡉ ࡌࡄࡀࡕࡀࡌ ࡉࡄࡀࡍࡀ 

(247) ࡁࡓ ࡓࡁࡀࡉ ࡀࡃࡀࡌࡉࡄࡀࡍࡀ ࡔࡅࡌࡇ ࡔࡉࡊ ࡔࡅࡄࡀࡓ ࡁࡓ ࡔࡉࡊ ࡐࡅࡋࡀࡓ ࡁࡓ ࡏࡑࡈࡀ ࡃࡉࡆࡐࡅࡋࡉࡀ ࡁࡓ ࡐࡀࡉࡆࡉࡀ ࡁࡓ ࡒࡀࡎࡅࡌ ࡊࡉࡍࡉࡀࡍࡀ ࡎࡀࡁࡅࡓ ࡔࡁࡉࡒࡋࡇ 

(248) ࡌࡀࡍࡃࡀ ࡖ ࡄࡉࡉࡀ ࡅࡄࡀࡈࡀࡉࡉࡀ ࡅࡕࡀࡘࡀࡁ ࡀࡁࡉࡄࡃࡀࡉ ࡏࡋࡇ ࡀࡍࡃࡀࡆࡕࡀ ࡕࡅࡌ ࡄࡉࡉࡀ ࡄࡃࡅࡍ ࡋࡀࡋࡀࡌ ࡀࡋࡌࡉࡀ ࡅࡄࡉࡉࡀ ࡆࡀࡊࡉࡍ ࡋࡊࡅࡋࡄࡅࡍ ࡏࡅࡁࡀࡃࡉࡀ

 

Kolophon der Handschrift C

(206) ° ࡄࡀࡆࡉࡍ ࡃࡉࡅࡀࡍ ࡖ ࡂࡀࡋࡀࡋࡕࡀ ࡓࡀࡁࡕࡉࡀ ࡖ ࡄࡀࡓࡀࡍ ࡂࡀࡅࡀࡉࡕࡀ ࡌࡉࡕࡒࡉࡓࡉࡀ ࡖ ࡀࡍࡎࡉࡕ ࡋࡄࡀࡃ ࡔࡀࡋࡌࡀࡍࡀ ࡅࡌࡄࡀࡉࡌࡀࡍ 

(207) [ࡅࡎࡉࡃ ࡁ]ࡄࡉࡉࡀ ࡒࡀࡃࡌࡀࡉࡉࡀ ࡅࡏࡄࡀࡉࡌࡀࡍ ࡁࡔࡀࡓࡔࡀ ࡖ ࡍࡄࡅࡓࡀ ࡖ ࡏࡄࡀࡁ ࡆࡉࡃࡒࡀ ࡅࡈࡀࡁࡅࡕࡀ ࡍࡀࡐࡔࡀ ࡖ ࡀࡍࡎࡀ ࡄࡀࡆࡉࡍ 

(208) ࡃࡉࡅࡀࡍ [ࡖ ]ࡄࡀࡓࡀࡍ ࡂࡀࡅࡀࡉࡕࡀ ࡖ ࡄࡀࡅࡉࡋࡇ ࡃࡅࡊࡓࡀࡍࡀ ࡁࡕࡉࡁࡉࡋ ࡄࡀࡕࡀࡌ ࡁࡀࡋࡌࡉࡀ ࡓࡅࡓࡁࡉࡀ ࡏࡋࡀࡉࡉࡀ ࡖ ࡍࡄࡅࡓࡀ 

(209) ࡖ [ࡄࡅ] ࡔࡅࡌࡀ ࡖ ࡌࡀࡑࡁࡅࡕࡇ ࡌࡄࡀࡕࡀࡌ ࡉࡅࡄࡀࡍࡀ ࡁࡓ ࡄࡀࡅࡀ ࡔࡅࡌࡉࡀ ࡉࡓࡉࡀ ࡁࡄࡀࡓ 

(210) ࡊࡉࡍࡉࡀࡍࡇ ࡍࡀࡅࡓࡅࡆࡉࡀ ࡕࡅࡌ ࡀࡍࡎࡉࡕ ࡀࡍࡀ ࡀࡍࡉࡀ ࡅࡃࡀࡍࡉࡀ ࡅࡌࡓࡀࡐࡀ ࡖ ࡀࡄࡀࡉ ࡕࡀࡓࡌࡉࡃࡉࡀ ࡅࡌࡍࡀࡔࡉࡒ ࡋࡉࡂࡓࡀࡉࡄࡅࡍ ࡖ 

(211) ࡂࡀࡍࡆࡉࡁࡓࡉࡀ ࡀࡍࡀ ࡆࡉࡄࡓࡅࡍ ࡁࡓ ࡓࡁࡀࡉ ࡉࡀࡄࡉࡀ ࡉࡅࡄࡀࡍࡀ ࡁࡓ ࡓࡁࡀࡉ ࡀࡃࡀࡌ [ ] ࡆࡉࡄࡓࡅࡍ ࡁࡓ ࡃࡉࡆࡐࡅࡋࡉࡀ ࡁࡓ 

(212) ࡔࡅࡂࡓࡉࡀ ࡁࡓ ࡍࡀࡑࡉࡓ ࡁࡓ ࡆࡀࡊࡓࡉࡀ ࡌࡍ ࡁࡍࡉࡀ ࡖ ࡃࡉࡄࡃࡀࡓࡉࡀ ࡊࡉࡍࡉࡀࡍࡇ ࡑࡀࡁࡅࡓ ࡖ ࡀࡍࡎࡉࡕ ࡌࡍ ࡊࡃࡀࡁࡀ ࡖ ࡏࡃࡀ ࡖ ࡀࡁ 

(213) ࡓࡁࡀࡉ ࡉࡀࡄࡉࡀ ࡉࡅࡄࡀࡍࡀ ࡓࡁࡀࡉ ࡉࡀࡄࡉࡀ ࡉࡅࡄࡀࡍࡀ ࡀࡍࡎࡀ ࡌࡍ ࡊࡃࡀࡁࡀ ࡖ ࡓࡁࡀࡉ ࡆࡀࡊࡉࡀ ࡆࡉࡄࡓࡅࡍ ࡁࡓ ࡓࡁࡀࡉ ࡓࡀࡌ ࡁࡓ ࡓࡁࡀࡉ ࡉࡀࡄࡉࡀ 

(214) ࡉࡅࡄࡀࡍࡀ ࡁࡓ ࡓࡁࡀࡉ ࡓࡀࡌ ࡁࡓ ࡉࡀࡄࡉࡀ ࡁࡀࡊࡕࡉࡀࡓ ࡁࡓ ࡓࡁࡀࡉ ࡀࡃࡀࡌ ࡌࡄࡀࡕࡀࡌ ࡁࡓ ࡓࡁࡀࡉ ࡁࡉࡄࡓࡀࡌ 

(215) ࡁࡓ ࡄࡉࡉࡀ ࡁࡓ ࡓࡁࡀࡉ ࡀࡃࡀࡌ ࡆࡀࡊࡉࡀ ࡁࡓ ࡓࡁࡀࡉ ࡁࡓ ࡄࡉࡉࡀ ࡊࡉࡍࡉࡀࡍࡇ ࡊࡅࡄࡀࡉࡋࡉࡀ ࡖ ࡀࡍࡎࡀ ࡌࡍ ࡀࡍࡎࡀࡕࡀ ࡖ ࡍࡀࡐࡔࡉࡀ 

(216) ࡆࡉࡁࡍࡀ ࡕࡋࡉࡕࡀࡉࡀ ࡖ ࡄࡅࡀ ࡀࡍࡎࡉࡕ ࡌࡍ ࡃࡉࡅࡀࡍ ࡖ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡕࡀࡓࡌࡉࡃࡀ ࡕࡀࡒࡍࡀ ࡄࡅࡀ ࡓࡁࡀࡉ ࡌࡄࡀࡕࡀࡌ 

(217) ࡁࡓ ࡉࡀࡄࡉࡀ ࡁࡀࡉࡀࡍ ࡁࡓ ࡉࡅࡄࡀࡍࡀ ࡔࡀࡃࡀࡍ ࡁࡓ ࡆࡀࡊࡓࡉࡀ ࡁࡓ ࡄࡉࡁࡉࡋ ࡁࡓ ࡆࡀࡊࡓࡉࡀ ࡋࡀࡒࡀࡁ ࡃࡉࡄࡃࡀࡓࡉࡀ ࡊࡉࡍࡉࡀࡍࡇ 

(218) ࡎࡀࡁࡅࡓ ࡅࡀࡎࡀࡕࡀ ࡋࡀࡄࡅࡀࡕࡀࡋࡇ ࡀࡋࡌࡀ ࡋࡄࡀࡊࡀ ࡄࡉࡉࡀ ࡆࡀࡊࡉࡍ ࡎࡀ

(219) ࡕࡅࡌ ࡏࡎࡕࡀࡃࡀࡓ ࡅࡎࡋࡉࡒ ࡋࡓࡉࡔ ࡄࡀࡆࡉࡍ ࡃࡉࡁࡀࡍ ࡉࡀࡒࡉࡓࡀ ࡅࡔࡓࡀࡂࡀ ࡍࡀࡄࡉࡓࡀ ࡅࡀࡐࡓࡀࡔࡀࡕࡀ ࡅࡂࡀࡋࡀࡋࡕࡀ ࡓࡀࡁࡕࡉࡀ 

(220) ࡖ ࡄࡅ ࡄࡀࡓࡀࡍ ࡂࡀࡅࡀࡉࡕࡀ ࡌࡉࡕࡒࡉࡓࡉࡀ ࡉࡅࡌࡀ ࡖ ࡓࡉࡄࡀࡈࡀ ࡅࡀࡓࡁࡀࡎࡀࡓ ࡁࡉࡀࡄࡓࡀ ࡖ ࡀࡊࡉࡓ ࡁࡄࡀࡓ ࡕࡀࡉࡌࡅࡆ ࡎࡀࡓࡈࡀࡍࡀ 

(221) ࡅࡔࡉࡃࡕࡀ ࡖ ࡀࡓ[ࡁ]ࡀ ࡄࡀࡁࡔࡀࡁࡀ ࡋࡔࡍࡀࡕ ࡀࡋࡐࡀ ࡅࡏࡌࡀ ࡅࡔࡅࡁࡉࡍ ࡅࡀࡓࡁࡀ ࡄࡅࡀ ࡁࡃࡀࡓࡀ ࡖ ࡒࡀࡁࡉࡋࡉࡅࡍ ࡀࡓࡀࡁࡀࡉࡉࡀ ࡀࡓࡀࡁ 

(222) ࡀࡋࡌࡀ ࡏࡋࡀࡅࡀࡉࡄࡅࡍ ࡅࡁࡀࡈࡋࡀ ࡌࡀࡍࡃࡀ ࡖ ࡄࡉࡉࡀ ࡋࡓࡅࡂࡆࡀࡉࡄࡅࡍ ࡌࡍ ࡊࡀࡍࡀ ࡓࡁࡀ ࡖ ࡍࡉࡔࡌࡀࡕࡀ ࡀࡍࡎࡉࡕ ࡁࡁࡀࡉࡕࡀ ࡖ ࡍࡀࡐࡔࡀࡉ ࡁࡌ[ ] 

(223) ࡍࡕࡀ ࡖ ࡃࡉࡆࡐࡅࡋ ࡁࡌࡉࡀ ࡖ ࡃࡉࡆ ࡅࡋࡀ ࡄࡋࡀ ࡄࡊࡅࡌ ࡋࡀࡁࡃࡉࡆࡐࡅࡋ ࡅࡋࡀࡁࡊࡅࡋ ࡀࡕࡓࡀࡕࡀ ࡖ ࡀࡉࡓࡀࡍ ࡊࡅࡋࡇ ࡄࡉࡉࡀ ࡄࡃࡅࡍ ࡋࡀࡋࡀࡌ ࡀࡋࡌࡉࡀ 

(224) ࡊࡅࡋ ࡌࡉࡍࡃࡀࡌ ࡒࡀࡋࡉࡋ ࡅࡁࡀࡎࡉࡌ ࡋࡁࡀࡓ ࡌࡍ ࡁࡅࡕࡀ ࡅࡕࡅࡔࡁࡉࡄࡕࡀ ࡄࡉࡉࡀ ࡆࡀࡊࡉࡍ ࡋࡊࡅࡋࡄࡅࡍ ࡏࡅࡁࡀࡃࡉࡀ

Kolophon der Handschrift D

(400) ࡄࡀࡆࡉࡍ ࡃࡉࡅࡀࡍ ࡖ ࡂࡀࡋࡀࡋࡕࡀ ࡓࡀࡁࡕࡉࡀ ࡖ ࡄࡀࡓࡀࡍ ࡂࡀࡅࡀࡉࡕࡀ ࡌࡉࡕࡒࡉࡓࡉࡀ ࡖ ࡀࡍࡎࡀࡕ 

(401) ࡀࡍࡀ ࡀࡍࡉࡀ ࡅࡃࡀࡍࡉࡀ ࡅࡌࡓࡀࡃࡐࡀ ࡖ ࡀࡄࡀࡉ ࡂࡀࡍࡆࡉࡁࡓࡉࡀ ࡀࡒࡀࡐࡓࡀ ࡖ ࡀࡕࡅࡕࡉࡀ ࡋࡉࡂࡓࡀࡉࡄࡅࡍ 

(402) ࡖ ࡍࡀࡎࡀࡊࡉࡀ ࡅࡀࡁࡃࡀ ࡖ ࡊࡅࡋࡇ ࡄࡀࡈࡀࡉࡉࡀ ࡀࡍࡀ ࡉࡀࡄࡉࡀ ࡓࡀࡌ ࡆࡉࡄࡓࡅࡍ ࡁࡓ ࡓࡁࡀࡉ 

(403) ࡆࡀࡊࡉࡀ ࡆࡉࡄࡓࡅࡍ ࡁࡓ ࡓࡁࡀࡉ ࡓࡀࡌ ࡆࡉࡄࡓࡅࡍ ࡁࡓ ࡓࡁࡀࡉ ࡎࡀࡌ ࡁࡉࡄࡓࡀࡌ 

(404) ࡁࡓ ࡓࡁࡀࡉ ࡉࡀࡄࡉࡀ ࡆࡉࡄࡓࡅࡍ ࡁࡓ ࡓࡁࡀࡉ ࡁࡉࡄࡓࡀࡌ ࡔࡉࡕࡉࡋ ࡁࡓ ࡓࡁࡀࡉ 

(405) ࡅࡓࡀࡌࡀ ࡅࡉࡀࡒࡉࡓࡀ ࡅࡂࡀࡍࡆࡉࡁࡓࡀ ࡕࡀࡒࡍࡀ ࡁࡄࡉࡓࡀ ࡓࡁࡀࡉ ࡉࡀࡄࡉࡀ ࡁࡓ ࡓࡁࡀࡉ 

(406) ࡆࡉࡄࡓࡅࡍ ࡁࡓ ࡓࡁࡀࡉ ࡉࡀࡄࡉࡀ ࡌࡄࡀࡕࡀࡌ ࡁࡓ ࡀࡃࡀࡌ ࡁࡓ ࡀࡃࡀࡌ ࡉࡄࡀࡍࡀ 

(407) ࡁࡓ ࡁࡉࡄࡓࡀࡌ ࡁࡓ ࡔࡀࡌࡎ ࡁࡓ ࡂࡀࡍࡉࡌ ࡁࡓ ࡓࡁࡀࡉ ࡀࡃࡀࡌ ࡁࡓ 

(408) ࡀࡁࡅࡄࡍ ࡖ ࡂࡀࡍࡆࡉࡁࡓࡉࡀ ࡓࡁࡀࡉ ࡉࡀࡄࡉࡀ ࡊࡉࡍࡉࡀࡍࡇ ࡘࡀࡆࡉࡆ ࡅࡋࡀࡒࡀࡁ ࡊࡅࡐࡀࡔࡉࡀ 

(409) ࡅࡃࡅࡓࡀࡔࡉࡀ ࡖ ࡀࡍࡎࡉࡕ ࡋࡍࡀࡐࡎ ࡋࡄࡀࡉࡀࡆࡈࡀ ࡌࡍࡇ ࡌࡍ ࡊࡃࡀࡁࡀ ࡖ ࡏࡃࡀ ࡖ ࡀࡁ ࡀࡁ ࡃࡉࡋࡇ ࡖ ࡓࡁࡀࡉ 

(410) ࡆࡉࡄࡓࡅࡍ ࡓࡀࡌ ࡆࡉࡄࡓࡅࡍ ࡅࡓࡁࡀࡉ ࡓࡀࡌ ࡆࡉࡄࡓࡅࡍ ࡖ ࡀࡍࡎࡉࡋࡇ ࡌࡍ ࡊࡃࡀࡁࡀ ࡖ ࡏࡃࡀ 

(411) ࡖ ࡓࡁࡀࡉ ࡆࡉࡄࡓࡅࡍ ࡁࡓ ࡓࡁࡀࡉ ࡆࡉࡄࡓࡅࡍ ࡁࡓ ࡓࡁࡀࡉ ࡅࡓࡀࡌࡀ ࡅࡉࡀࡒࡉࡓࡀ ࡅࡂࡀࡍࡆࡉ 

(412) ࡁࡓࡀ ࡕࡀࡒࡍࡀ ࡁࡄࡉࡓࡀ ࡓࡁࡀࡉ ࡉࡀࡄࡉࡀ ࡉࡄࡀࡍࡀ ࡁࡓ ࡓࡁࡀࡉ ࡀࡃࡀࡌ ࡆࡉࡄࡓࡅࡍ 

(413) ࡁࡓ ࡆࡉࡄࡅࡓࡅࡍ ࡁࡓ ࡃࡉࡆࡐࡅࡋࡉࡀ ࡁࡓ ࡔࡅࡂࡓࡉࡀ ࡁࡓ ࡍࡀࡑࡉࡓ ࡁࡓ ࡆࡀࡊࡓࡉࡀ ࡌࡍ 

(414) ࡁࡍࡉࡀ ࡃࡉࡄࡃࡀࡓࡉࡀ ࡎࡀࡁࡅࡓ ࡖ ࡀࡍࡎࡀ ࡋࡄࡀࡃ ࡔࡀࡋࡌࡀࡍࡀ ࡅࡌࡄࡀࡉࡌࡀࡍ ࡏࡕࡄࡀࡉࡌࡀࡍ 

(415) ࡁࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡏࡄࡀࡁ ࡆࡉࡃࡒࡀ ࡍࡀࡐࡔࡀ ࡅࡓࡉࡄࡌࡉࡀ ࡋࡄࡀࡆࡉࡍ ࡃࡀࡊࡀࡓ 

(416) ࡔࡅࡌࡀ ࡅࡓࡅࡔࡅࡌࡀ ࡄࡀࡕࡀࡌ ࡁࡀࡋࡌࡉࡀ ࡓࡅࡓࡁࡉࡀ ࡏࡋࡀࡉࡉࡀ ࡖ ࡍࡄࡅࡓࡀ ࡖ ࡄࡅ ࡔࡅࡌࡇ 

(417) ࡖ ࡌࡀࡑࡅࡁࡅࡕࡀ ࡁࡀࡉࡀࡍ ࡁࡓ ࡄࡀࡅࡀ ࡅࡔࡅࡌࡀ ࡖ ࡒࡀࡓࡀࡉࡕࡀ ࡀࡎࡕࡀࡓ ࡘࡀࡆࡉࡆ ࡁࡓ 

(418) ࡃࡉࡆࡐࡅࡋࡉࡀ ࡁࡓ ࡐࡀࡉࡆࡉࡀ ࡁࡓ ࡒࡀࡎࡅࡌ ࡁࡓ ࡍࡀࡔࡌࡃࡉࡍ ࡁࡓ ࡓࡀࡔࡀࡁ 

(419) ࡁࡓ ࡘࡀࡁࡃ ࡋࡄࡀࡎࡀࡍ ࡊࡉࡍࡉࡀࡍࡇ ࡎࡀࡁࡅࡓ ࡖ ࡀࡍࡎࡀ ࡌࡍ ࡊࡃࡀࡁࡀ ࡖ ࡏࡃࡀ 

(420) ࡖ ࡓࡁࡀࡉ ࡉࡀࡄࡉࡀ ࡉࡄࡀࡍࡀ ࡖ ࡄࡅ ࡔࡉࡃࡅࡉࡉࡀ ࡄࡅࡀ ࡖ ࡀࡍࡎࡀ ࡋࡍࡀࡐࡔࡉࡀ ࡌࡍ ࡊࡃࡀࡁࡀ 

(421) ࡖ ࡏࡃࡀ ࡖ ࡓࡁࡀࡉ ࡆࡀࡊࡉࡀ ࡆࡉࡄࡓࡅࡍ ࡁࡓ ࡓࡁࡀࡉ ࡓࡀࡌ ࡁࡓ ࡓࡁࡀࡉ ࡉࡀࡄࡉࡀ 

(422) ࡉࡄࡀࡍࡀ ࡁࡓ ࡓࡁࡀࡉ ࡓࡀࡌ ࡁࡓ ࡉࡀࡄࡉࡀ ࡁࡀࡊࡕࡉࡀࡓ ࡁࡓ ࡓࡁࡀࡉ ࡀࡃࡀࡌ 

(423) ࡌࡄࡀࡕࡀࡌ ࡁࡓ ࡓࡁࡀࡉ ࡁࡉࡄࡓࡀࡌ ࡁࡓ ࡄࡉࡉࡀ ࡁࡓ ࡓࡁࡀࡉ ࡀࡃࡀࡌ 

(424) ࡆࡀࡊࡉࡀ ࡁࡓ ࡓࡁࡀࡉ ࡁࡓ ࡄࡉࡉࡀ ࡊࡉࡍࡉࡀࡍࡀ ࡊࡅࡄࡀࡉࡋࡀ ࡖ ࡀࡍࡎࡀ ࡌࡍ ࡀࡍࡎࡀࡕࡀ ࡖ ࡍࡀࡐࡔࡉࡀ 

(425) ࡆࡉࡁࡍࡀ ࡕࡋࡀࡕࡀࡉࡀ ࡖ ࡄࡅࡀ ࡀࡍࡎࡀ ࡌࡍ ࡃࡉࡅࡀࡍࡀ ࡖ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡕࡀࡓࡌࡉࡃࡀ 

(426) ࡕࡀࡒࡍࡀ ࡄࡅࡀ ࡓࡁࡀࡉ ࡌࡄࡀࡕࡀࡌ ࡁࡓ ࡉࡀࡄࡉࡀ ࡌࡄࡀࡕࡀࡌ ࡁࡓ ࡉࡀࡄࡉࡀ ࡁࡀࡉࡀࡍ 

(427) ࡁࡓ ࡉࡄࡀࡍࡀ ࡔࡀࡃࡀࡍ ࡁࡓ ࡆࡀࡊࡓࡉࡀ ࡁࡓ ࡄࡉࡁࡉࡋ ࡁࡓ ࡆࡀࡊࡓࡉࡀ ࡋࡀࡒࡀࡁ ࡃࡉࡄࡃࡀࡓࡉࡀ 

(428) ࡊࡉࡍࡉࡀࡍࡇ ࡎࡀࡁࡅࡓ ࡖ ࡀࡍࡎࡉࡕ ࡌࡍ ࡃࡉࡅࡀࡍ ࡄࡅࡓࡉࡍࡀ ࡊࡃࡀࡁࡀ ࡖ ࡏࡃࡀ ࡖ ࡓࡁࡀࡉ ࡆࡉࡄࡓࡅࡍ 

(429) ࡁࡓ ࡀࡃࡀࡌ ࡉࡄࡀࡍࡀ ࡁࡓ ࡉࡀࡄࡉࡀ ࡁࡓ ࡆࡉࡄࡓࡅࡍ ࡁࡓ ࡉࡀࡄࡉࡀ ࡀࡍࡅࡔ ࡁࡓ ࡓࡁࡀࡉ 

(430) ࡅࡓࡀࡌࡀ ࡅࡉࡀࡒࡉࡓࡀ ࡓࡁࡀࡉ ࡌࡄࡀࡕࡀࡌ ࡁࡓ ࡉࡀࡄࡉࡀ ࡁࡀࡉࡀࡍ ࡁࡓ ࡉࡄࡀࡍࡀ ࡔࡀࡃࡀࡍ 

(431) ࡁࡓ ࡆࡀࡊࡓࡉࡀ ࡁࡓ ࡄࡉࡁࡉࡋ ࡁࡓ ࡉࡀࡄࡉࡀ ࡁࡓ ࡆࡀࡊࡓࡉࡀ ࡁࡓ ࡆࡉࡄࡓࡅࡍ ࡌࡍ ࡁࡍࡇ 

(432) ࡃࡉࡄࡃࡀࡓࡉࡀ ࡊࡉࡍࡉࡀࡍࡇ ࡎࡀࡁࡅࡓ ࡅࡋࡀࡒࡀࡁ ࡁࡀࡈࡀࡄࡀࡉࡉࡀ ࡀࡍࡎࡀ ࡌࡍ ࡃࡉࡅࡀࡍ 

(433) ࡖ ࡓࡁࡀࡉ ࡆࡀࡊࡉࡀ ࡁࡓ ࡓࡁࡀࡉ ࡓࡀࡌ ࡁࡓ ࡉࡀࡄࡉࡀ ࡉࡄࡀࡍࡀ ࡊࡉࡍࡉࡀࡍࡀ ࡊࡅࡄࡀࡉࡋࡀ 

(434) ࡄࡅ ࡀࡍࡎࡀ ࡌࡍ ࡃࡉࡅࡀࡍ ࡖ ࡓࡁࡀࡉ ࡌࡄࡀࡕࡀࡌ ࡁࡓ ࡉࡀࡄࡉࡀ ࡁࡀࡉࡀࡍ ࡌࡍ ࡁࡍࡉࡀ 

(435) ࡃࡉࡄࡃࡀࡓࡉࡀ ࡊࡉࡍࡉࡀࡍࡀ ࡎࡀࡁࡅࡓ ࡅࡀࡎࡀࡕࡀ ࡉࡀࡕࡉࡓ ࡖ ࡋࡀࡄࡅࡀࡕࡀࡋࡇ ࡀࡋࡌࡀ 

(436) ࡋࡄࡀࡊࡀ ࡄࡉࡉࡀ ࡆࡀࡊࡉࡍ ࡅࡋࡀࡋࡀࡌ ࡀࡋࡌࡉࡀ ࡎࡀ 

(437) ࡕࡅࡌ ࡏࡎࡕࡀࡃࡀࡓ ࡅࡎࡋࡉࡒ ࡋࡓࡉࡔ ࡄࡀࡆࡉࡍ ࡃࡉࡅࡀࡍ ࡉࡀࡒࡉࡓࡀ ࡅࡔࡓࡀࡂࡀ ࡖ ࡍࡀࡄࡉࡓࡀ 

(438) ࡅࡀࡐࡓࡀࡔࡀࡕࡀ ࡅࡂࡀࡋࡀࡋࡕࡀ ࡓࡀࡁࡕࡉࡀ ࡖ ࡄࡏ ࡄࡀࡓࡀࡍ ࡂࡀࡅࡀࡉࡕࡀ ࡌࡉࡕࡒࡉࡓࡉࡀ 

(439) ࡉࡅࡌࡀ ࡖ ࡔࡀࡐࡕࡀ ࡅࡕࡔࡀࡎ ࡖ ࡄࡌࡀࡔࡇ ࡖ ࡄࡀࡁࡔࡀࡁࡀ ࡖ ࡕࡓࡉࡍ ࡁࡉࡀࡄࡓࡀ 

(440) ࡖ ࡌࡉࡑࡀࡉ ࡂࡀࡈࡀࡇ ࡖ ࡄࡅ ࡖ ࡀࡋࡅࡋࡉࡀ ࡔࡀࡍࡀࡁࡀࡕࡇ ࡖ ࡁࡔࡉࡃࡕࡀ ࡄࡀࡁࡔࡀࡁࡀ ࡋࡀࡓࡀࡁࡇ 

(441) ࡋࡔࡍࡀࡕ ࡕࡋࡀࡕࡌࡀ ࡖ ࡄࡀࡌࡀࡍ ࡖ ࡄࡀࡌࡔ ࡔࡍࡉࡀ ࡀࡁࡀࡕࡀࡓ ࡀࡋࡐࡀ ࡄࡅࡀ 

(442) ࡁࡁࡀࡓࡀ ࡖ ࡒࡀࡁࡉࡋࡉࡅࡍ ࡀࡓࡀࡁࡀࡉࡉࡀ ࡀࡓࡀࡁ ࡀࡋࡌࡀ ࡏࡋࡀࡅࡀࡉࡄࡅࡍ ࡅࡁࡀࡈࡋࡀ 

(443) ࡌࡀࡍࡃࡀ ࡖ ࡄࡉࡉࡀ ࡋࡓࡅࡂࡆࡀࡉࡄࡅࡍ ࡌࡍ ࡊࡀࡍࡀ ࡓࡁࡀ ࡖ ࡍࡉࡔࡌࡀࡕࡀ ࡁࡑࡀࡄࡀ ࡖ ࡁ

(444) ࡉࡌࡀࡍࡃࡀ ࡁࡔࡉࡌࡀࡘ ࡔࡀࡋࡀࡘࡇ ࡁࡌࡉࡀ ࡖ ࡃࡀࡀࡒࡀࡋࡕࡀ ࡅࡄࡉࡉࡀ ࡄࡃࡅࡍ ࡋࡀࡋࡀࡌ 

(445) ࡀࡋࡌࡉࡀ ࡄࡉࡉࡀ ࡆࡀࡊࡉࡍ ࡋࡊࡅࡋࡄࡅࡍ ࡏࡅࡁࡀࡃࡉࡀ ࡅࡀࡌࡀ ࡖ ࡍࡀࡑࡅࡓࡀࡉࡉࡀ ࡖ ࡑࡀࡉࡕࡉࡍ ࡁ 

(446) ࡒࡀࡋࡀ ࡖ ࡄࡉࡉࡀ ࡀ ࡆࡀࡊࡉࡍ ࡋࡊࡅࡋࡄࡅࡍ ࡏࡅࡁࡀࡃࡉࡀ ࡄࡉࡉࡀ ࡌࡔࡀࡁࡉࡍ ࡄࡉࡉࡀ ࡎࡀ