Šafta ḏ pišra ḏ ainia شفتا د پیشرا د اینا
S̲h̲afta d̲ Pis̲h̲ra d̲ Ainia
Author: E. S. Drower
Source: The Journal of the Royal Asiatic Society of Great Britain and Ireland, No. 4 (Oct.,1937), pp. 589-611
Published by: Cambridge University Press
Stable URL: http://www.jstor.org/stable/25201592
Unicode by: Ibrāhīm Šafiʿī (University of Tehrān)
ࡔࡀࡐࡕࡀ ࡖ ࡐࡉࡔࡓࡀ ࡖ ࡀࡉࡍࡉࡀ
ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡒࡀࡃࡌࡀࡉࡉࡀ ࡍࡅࡊࡓࡀࡉࡀ ࡌࡍ ࡀࡋࡌࡉࡀ ࡖ ࡍࡄࡅࡓࡀ ࡉࡀࡕࡉࡓࡉࡀ ࡖ ࡏࡋࡀࡅࡉࡀ ࡊࡅࡋࡄࡅࡍ ࡏࡅࡁࡀࡃࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡄࡀࡕࡀࡌࡕࡀ ࡅࡆࡀࡓࡀࡆࡕࡀ ࡅࡍࡀࡈࡀࡓࡕࡀ ࡓࡀࡁࡕࡉࡀ ࡖ ࡔࡀࡓࡀࡓࡀ ࡍࡄࡅࡉࡋࡉࡀ ࡋࡃࡉࡋࡉࡀ ࡐࡋࡀࡍ ࡁࡓ ࡐࡋࡀࡍࡀ ࡅࡆࡀࡅࡀࡉ ࡅࡁࡍࡀࡉ ࡅࡁࡍࡀࡕࡀࡉ ࡅࡃࡀࡅࡓࡀࡉ ࡄࡉࡊࡋࡀࡉ ࡅࡊࡅࡋࡇ ࡁࡉࡍࡉࡀࡍࡀࡉ ࡌࡍ ࡄࡉࡉࡀ ࡅࡌࡍ ࡌࡀࡍࡃࡀ ࡖ ࡄࡉࡉࡀ ࡀࡎࡉࡀ ࡌࡀࡓࡀࡉࡄࡅࡍ ࡖ ࡊࡅࡋࡄࡅࡍ ࡀࡎࡀࡅࡀࡕࡀ ࡏࡆࡄࡀ ࡅࡏࡕࡀࡆࡄࡀ ࡀࡉࡍࡀ ࡁࡉࡔࡕࡀ ࡅࡊࡀࡁࡉࡄࡕࡀ ࡅࡀࡉࡍࡀ ࡆࡓࡅࡒࡕࡉࡀ ࡅࡀࡉࡍࡀ ࡁࡓࡅࡒࡕࡉࡀ ࡅࡀࡉࡍࡀ ࡊࡁࡉࡔࡕࡉࡀ ࡅࡀࡉࡍࡀ ࡒࡋࡉࡒࡕࡉࡀ ࡅࡀࡉࡍࡀ ࡏࡊࡉࡋࡕࡉࡀ ࡗ ࡀࡁࡅࡍ ࡁࡉࡋ ࡍࡎࡉࡁ ࡌࡉࡀ ࡅࡓࡌࡇ ࡋࡓࡉࡔࡉࡀ ࡒࡉࡓࡉࡁ ࡓࡌࡀ ࡏࡋ ࡊࡅࡀࡊࡉࡀࡕࡀ ࡅࡍࡎࡀࡁ ࡕࡀࡂࡀ *ࡅࡀࡕࡍࡇ ࡁࡓࡉࡔࡉࡀ ࡅࡆࡀࡉࡍࡀ ࡕࡋࡀ ࡏࡋ ࡊࡀࡃࡐࡇ ࡄࡅࡈࡓࡀ ࡖ ࡌࡅࡓࡀ ࡁࡏࡃࡇ (ࡁࡏࡀࡃࡉࡀ) ࡀࡌ ࡒࡀࡓࡁࡀࡋࡀ (?) ࡋࡀࡅࡌࡀ ࡊࡅࡋࡇ ࡁࡂࡅࡌࡓࡀ ࡕࡀࡂࡀ ࡍࡀࡃ ࡅࡍࡐࡀࡋ ࡌࡍ ࡓࡉࡔࡉࡀ ࡅࡆࡀࡉࡍࡀ ࡍࡐࡀࡋ ࡌࡍ ࡊࡀࡃࡐࡇ ࡄࡅࡈࡓࡀ ࡖ ࡌࡅࡓࡀ ࡍࡐࡀࡋ ࡌࡍ ࡏࡃࡇ ࡅࡓࡉࡔࡉࡀ ࡑࡌࡀࡓ ࡅࡁࡀࡓࡎࡀ ࡍࡐࡀࡋ ࡂࡉࡁࡕࡀ ࡖ ࡂࡀࡅࡁࡀࡕ ࡏࡋࡇ ࡅࡎࡉࡋࡒࡉࡕ [sic] ࡔࡂࡉࡁࡅࡍ [sic] ࡁࡔࡅࡁࡀ ࡔࡉࡁࡉࡀࡄࡉࡀ ࡗ ࡕࡀࡂࡀࡉࡅࡍ ࡕࡓࡀࡑࡋࡅࡍ ࡁࡓࡉࡔࡀࡉࡄࡅࡍ ࡅࡆࡀࡉࡍࡀ ࡕࡋࡉࡋࡉࡀ ࡋࡊࡀࡃࡐࡀࡉࡅࡍ ࡄࡅࡈࡓࡀ ࡖ ࡌࡅࡓࡀ ࡍࡐࡀࡋ ࡌࡍ ࡏࡃࡀࡉࡄࡅࡍ ࡅࡌࡃࡀࡁࡓࡀࡍࡉࡀ ࡋࡀࡋࡌࡀ ࡊࡅࡋࡇ ࡁࡂࡅࡌࡅࡓࡀ ࡄࡅࡈࡓࡀ ࡖ ࡌࡅࡓࡀ ࡍࡐࡀࡋ ࡌࡍ ࡏࡃࡀࡉࡄࡅࡍ ࡅࡓࡉࡔࡀࡉࡄࡅࡍ ࡑࡌࡀࡓ ࡅࡁࡀࡓࡎࡀ ࡍࡐࡀࡋ ࡂࡉࡁࡕࡀ ࡖ ࡂࡀࡁࡀࡕ ࡏࡋࡇ ࡅࡎࡉࡋࡒࡉࡕ [sic] ࡅࡐࡀࡂࡉࡁࡅࡍ [sic] ࡁࡉࡀࡌࡀ ࡗ ࡌࡋࡉࡀ ࡌࡉࡀ ࡅࡀࡆࡋࡉࡀ ࡌࡉࡀ ࡁࡂࡀࡅࡇ ࡅࡀࡓࡁࡉࡕࡀ ࡐࡉࡓࡉࡀ ࡅࡏࡍࡁࡉࡀ ࡅࡏࡋࡀࡍࡉࡀ ࡖ ࡏࡋࡀࡅࡉࡀ ࡓࡀࡅࡆࡉࡀ ࡅࡀࡌࡀࡓࡀࡕ ࡊࡌࡀ ࡔࡀࡐࡉࡓࡉࡀ ࡉࡀࡌࡀ ࡅࡔࡀࡐࡉࡓࡉࡀ ࡖ ࡌࡀࡎࡂࡉࡍ ࡁࡂࡀࡅࡇ ࡖ ࡏࡁࡃࡉࡕ ࡐࡉࡓࡉࡀ ࡅࡏࡍࡁࡉࡀ ࡅࡏࡋࡀࡍࡉࡀ ࡖ ࡏࡋࡀࡅࡉࡇ ࡓࡀࡅࡆࡉࡀ ࡅࡀࡌࡀࡓࡀࡕ ࡊࡌࡀ ࡔࡀࡐࡉࡓࡉࡀ ࡉࡀࡌࡀ ࡅࡔࡀࡐࡉࡓࡉࡀ ࡖ ࡌࡀࡎࡂࡉࡍ ࡁࡂࡀࡅࡇ ࡖ ࡓࡁࡉࡕࡀ ࡐࡉࡓࡉࡀ ࡅࡏࡍࡁࡉࡀ ࡅࡏࡋࡀࡍࡉࡀ ࡖ ࡏࡋࡀࡅࡉࡇ ࡑࡁࡀ ࡂࡉࡁࡕࡀ ࡖ ࡂࡀࡁࡀࡕ ࡏࡋࡀࡅࡀࡉࡄࡅࡍ ࡅࡎࡉࡋࡒࡀࡕ ࡐࡀࡂࡉࡁࡅࡍ ࡁࡀࡒࡍࡉࡀ ࡖ ࡄࡅࡔ ࡓࡀࡉࡉࡀ ࡅࡔࡀࡐࡉࡓ ࡁࡍࡀࡉࡅࡍ ࡅࡁࡍࡀࡕࡅࡍ ࡅࡔࡀࡐࡉࡓࡉࡀ ࡁࡀࡒࡀࡓࡉࡀ ࡖ ࡌࡀࡎࡂࡉࡍ ࡀࡁࡀࡕࡓࡀࡉࡅࡍ ࡀࡒࡍࡉࡀ ࡋࡂࡀࡈ ࡐࡅࡌࡀࡉࡅࡍ ࡌࡍ ࡌࡉࡓࡉࡀ ࡅࡁࡍࡀࡉࡅࡍ ࡋࡂࡀࡕ ࡐࡅࡌࡀࡉࡅࡍ ࡌࡍ ࡌࡉࡌࡀࡎ ࡅࡀࡓࡀࡌࡀࡕࡀ ࡋࡀ ࡌࡀࡎࡂࡉࡍ ࡀࡁࡀࡕࡓࡀࡉࡅࡍ ࡂࡅࡁࡕࡀ ࡖ ࡂࡀࡅࡁࡀࡕ ࡏࡋࡀࡅࡀࡉࡄࡅࡍ ࡅࡎࡉࡋࡒࡀࡕ ࡐࡀࡂࡉࡁࡅࡍ ࡁࡕࡀࡅࡓࡉࡀ ࡖ ࡐࡉࡓࡅࡍ ࡌࡀࡋࡊࡀ ࡖ ࡌࡉࡎࡓࡀࡉࡉࡀ ࡅࡀࡌࡓࡀࡕ ࡊࡌࡀ ࡔࡀࡐࡉࡓࡉࡀ ࡕࡀࡅࡓࡉࡀ ࡖ ࡐࡉࡓࡅࡍ ࡌࡀࡋࡊࡀ ࡖ ࡌࡉࡎࡓࡀࡉࡉࡀ ࡔࡀࡐࡉࡓࡉࡀ ࡅࡁࡍࡀࡉࡅࡍ ࡅࡁࡍࡀࡕࡅࡍ ࡅࡔࡀࡐࡉࡓࡉࡀ ࡁࡀࡒࡀࡓࡉࡀ ࡖ ࡌࡀࡎࡂࡉࡍ ࡀࡁࡀࡕࡓࡀࡉࡅࡍ ࡕࡀࡅࡓࡉࡀ ࡋࡂࡀࡕ ࡐࡅࡌࡀࡉࡅࡍ ࡌࡍ ࡌࡉࡓࡉࡀࡉ ࡅࡁࡍࡀࡉࡅࡍ ࡋࡂࡀࡕ ࡐࡅࡌࡀࡉࡅࡍ ࡌࡍ ࡌࡉࡌࡀࡎ ࡅࡁࡀࡒࡀࡓࡉࡀ ࡕࡊࡀࡋࡀࡋ ࡅࡍࡐࡉࡋ ࡋࡊࡍࡀࡐ ࡕࡀࡅࡓࡀࡉࡅࡍ ࡅࡎࡉࡋࡒࡀࡕ ࡔࡊࡉࡕࡅࡍ ࡅࡁࡊࡉࡕࡅࡍ ࡅࡃࡍࡉࡕࡅࡍ ࡏࡋ ࡒࡅࡃࡀࡌ ࡄࡉࡉࡀ ࡓࡁࡉࡀ ࡒࡀࡃࡌࡀࡉࡉࡀ ࡄࡀࡔ ࡄࡉࡉࡀ ࡅࡐࡓࡀࡔ ࡄࡉࡉࡀ ࡅࡏࡕࡀࡐࡓࡀࡔ ࡄࡉࡉࡀ ࡗ ࡉࡀࡕࡁࡉࡀ ࡁࡀࡕࡓࡀ ࡊࡀࡎࡉࡀ ࡁࡔࡊࡉࡍࡀࡕࡅࡍ ࡅࡁࡆࡉࡅࡀ ࡓࡁࡀ ࡃࡉࡋࡅࡍ ࡖ ࡍࡀࡐࡔࡀࡉࡅࡍ ࡅࡁࡀࡍࡄࡅࡓࡀ ࡓࡁࡀ ࡊࡀࡁࡉࡓࡀ ࡅࡀࡌࡀࡓ ࡄࡀࡆࡉࡍ ࡒࡀࡋࡀ ࡖ ࡌࡀࡍ ࡌࡍ ࡕࡉࡁࡉࡋ ࡒࡀࡋࡀ ࡓࡀࡌࡀ ࡖ ࡌࡍ ࡏࡅࡁࡃࡅࡍࡉࡀ ࡕࡉࡕࡀࡉࡉࡀ ࡖ ࡄࡔࡅࡊࡀ ࡅࡌࡍ ࡌࡉࡀ ࡎࡉࡀࡅࡉࡀ ࡏࡎࡉࡓࡉࡀ ࡂࡌࡉࡈࡉࡀ ࡅࡍࡎࡉࡎࡉࡀ ࡌࡀࡋࡉࡋ ࡖ ࡍࡉࡌࡀࡓࡋࡅࡍ ࡌࡀࡓࡀࡉࡄࡅࡍ ࡖ ࡍࡀࡐࡔࡀࡉࡄࡅࡍ ࡉࡀ ࡉࡀࡃࡅࡉࡉࡀ ࡖ ࡉࡀࡃࡉࡕࡅࡍ ࡏࡋ ࡌࡀࡄࡅ ࡌࡔࡀࡉࡋࡉࡕࡅࡍ ࡄࡀࡆࡉࡍ ࡒࡀࡋࡀ ࡖ ࡀࡉࡍࡀ ࡁࡉࡔࡕࡀ ࡅࡊࡀࡅࡉࡄࡕࡀ ࡅࡌࡀࡓࡉࡓࡕࡉࡀ ࡖ ࡁࡀࡒࡀࡕ ࡅࡎࡉࡋࡒࡀࡕ ࡌࡍ ࡏࡅࡌࡒࡉࡀ ࡖ ࡉࡀࡌࡀ ࡅࡌࡍ ࡕࡀࡅࡌ ࡕࡀࡅࡌࡉࡀ ࡕࡉࡕࡀࡉࡉࡀ ࡖ ࡄࡔࡅࡊࡀ ࡅࡌࡍ ࡌࡉࡀ ࡎࡉࡀࡅࡉࡀ ࡄࡈࡉࡌࡀ ࡄࡀࡈࡀࡌ ࡌࡊࡀࡉࡓࡉࡀ ࡁࡓࡅࡄࡉࡀ ࡅࡍࡉࡔࡌࡀࡕࡀ ࡖ ࡁࡍࡀࡕ ࡀࡍࡀࡔࡀ ࡅࡀࡔࡊࡀࡕࡇ ࡏࡋ ࡐ. ࡁࡓ ࡐ. ࡅࡌࡄࡀࡕࡇ ࡅࡓࡌࡀࡕࡇ ࡁࡄࡀࡍࡀ ࡖ ࡏࡌࡇ ࡋࡂࡀࡈ ࡀࡉࡍࡇ ࡌࡍ ࡌࡉࡄࡆࡉࡀ ࡅࡐࡅࡌࡇ ࡌࡍ ࡌࡉࡊࡀࡋ ࡅࡏࡃࡇ ࡌࡍ ࡌࡉࡁࡀࡃ ࡅࡋࡉࡂࡓࡇ ࡌࡍ ࡌࡀࡎࡂࡅࡉࡉࡀ ࡄࡀࡔ ࡄࡉࡉࡀ ࡅࡐࡓࡀࡔ ࡄࡉࡉࡀ ࡅࡏࡕࡀࡐࡓࡀࡔ ࡄࡉࡉࡀ ࡗ ࡉࡀࡕࡁࡉࡀ ࡁࡔࡊࡉࡍࡀࡕࡅࡍ ࡁࡆࡉࡅࡀ ࡓࡁࡀ ࡃࡉࡋࡅࡍ ࡖ ࡍࡀࡐࡔࡀࡉࡄࡅࡍ ࡁࡀࡍࡄࡅࡓࡀ ࡓࡁࡀ ࡅࡊࡀࡁࡉࡓࡀ ࡅࡒࡉࡓࡉࡅࡉࡀ ࡋࡌࡀࡍ ࡖ ࡀࡎࡉࡀ ࡅࡀࡌࡀࡓࡅࡋࡇ ࡒࡅࡌ ࡍࡎࡅࡁ ࡔࡀࡁࡀ ࡌࡊࡀࡃࡐࡉࡀ ࡖ ࡐࡀࡓࡆࡋࡀ ࡅࡔࡀࡁࡀ ࡎࡉࡋࡅࡀࡍࡉࡀ ࡌࡍ ࡔࡀࡁࡀ ࡕࡀࡋࡉࡀ ࡖ ࡆࡉࡒࡋࡀ ࡆࡉࡁࡅࡓࡉࡀ ࡅࡔࡅࡁࡀ ࡔࡉࡁࡉࡀ ࡌࡍ ࡔࡅࡁࡀ ࡓࡉࡔࡉࡀ ࡍࡄࡅࡕ ࡏࡋ ࡏࡅࡌࡒࡉࡀ ࡖ ࡉࡀࡌࡉࡀ ࡅࡋࡉࡀࡌࡀ ࡖ ࡏࡉࡎࡉࡓࡉࡀ ࡄࡈࡉࡌࡉࡀ ࡂࡌࡉࡈࡉࡀ ࡍࡎࡉࡎࡉࡀ ࡋࡅࡂࡈࡅࡉࡀ ࡏࡋ ࡀࡉࡍࡀ ࡁࡉࡔࡕࡀ ࡅࡊࡀࡅࡉࡄࡕࡀ ࡅࡌࡀࡓࡉࡓࡕࡉࡀ ࡖ ࡌࡄࡀࡕࡀ ࡏࡋ ࡐ. ࡁࡓ ࡐ. ࡅࡌࡉࡄࡅࡉࡀ ࡁࡀࡊࡋࡀ ࡓࡁࡀ ࡖ ࡆࡉࡅࡀ ࡅࡁࡍࡀࡓࡂࡀ ࡓࡁࡀ ࡖ ࡔࡉࡓࡋࡀࡕࡀ ࡅࡁࡂࡅࡓࡌࡀࡉࡆࡀ ࡖ ࡍࡅࡓࡀ ࡁࡔࡀࡁࡀ ࡌࡊࡀࡃࡐࡀࡉ ࡖ ࡐࡀࡓࡆࡋࡀ ࡅࡔࡅࡁࡀ ࡎࡀࡋࡀࡅࡀࡕࡀ ࡌࡍ ࡔࡅࡁࡀ ࡕࡀࡋࡉࡀ ࡖ ࡆࡉࡒࡋࡀ ࡆࡉࡁࡅࡓࡉࡀ ࡅࡔࡅࡁࡀ ࡔࡉࡁࡉࡀ ࡌࡍ ࡔࡅࡁࡀ ࡓࡉࡔࡉࡀ ࡅࡍࡄࡅࡕ ࡅࡋࡂࡅࡈࡉࡀ ࡏࡋ ࡀࡉࡍࡀ ࡁࡉࡔࡕࡀ ࡅࡊࡀࡅࡉࡄࡕࡀ ࡁࡀࡅࡐࡉࡀ ࡓࡉࡔࡉࡀ ࡁࡎࡁࡀࡎࡉࡀ ࡖ ࡄࡉࡌࡉࡀࡍࡉࡀ ࡁࡔࡀࡄࡐࡉࡀ ࡖ ࡔࡉࡐࡅࡋࡀ ࡕࡉࡕࡀࡉࡉࡀ ࡖ ࡋࡉࡂࡓࡇ ࡅࡓࡅࡌࡅࡉࡇ ࡁࡉࡕ ࡆࡁࡀࡍ ࡅࡋࡀࡃࡀࡍ ࡃࡅࡊࡕࡀ ࡖ ࡃࡅࡃࡉࡀ ࡅࡈࡀࡐࡀࡍ ࡋࡂࡋࡀࡋࡀ ࡅࡓࡀࡄࡕࡀ ࡀࡉࡍࡀ ࡁࡉࡔࡕࡀ ࡅࡏࡊࡉࡋࡕࡀ ࡅࡕࡉࡍࡉࡄࡕࡀ ࡅࡕࡉࡌࡀࡋࡉࡋ ࡅࡕࡉࡌࡀࡓࡋࡇ ࡊࡀࡁࡓࡀ ࡖ ࡊࡀࡁࡓࡀࡋࡇ ࡌࡍ ࡏࡍࡉࡔࡀ ࡀࡎࡉࡀ ࡖ ࡍࡉࡕࡉࡀ ࡂࡀࡁࡓࡀ ࡖ ࡋࡀ ࡄࡀࡔ ࡅࡋࡀࡄࡔࡅࡊ ࡅࡋࡀࡐࡓࡀࡔ ࡅࡀࡌࡀࡓ ࡁࡌࡉࡍࡉࡋࡕࡀࡊ ࡌࡉࡔࡕࡀࡉࡉࡍࡀ ࡁࡐࡓࡀ ࡌࡀࡍࡀࡊ ࡖ ࡍࡉࡎࡀࡁ ࡌࡉࡀ ࡌࡍ ࡐࡅࡌ ࡐࡓࡀࡔ ࡆࡉࡅࡀ ࡅࡌࡉࡔࡀ ࡁࡓ ࡔࡅࡔࡌࡀ ࡄࡉࡅࡀࡓࡀ ࡅࡌࡉࡄࡋࡀ ࡐࡕ ࡐࡔࡀࡓ ࡂࡅࡐࡍࡀ ࡅࡌࡉࡄࡋࡀ ࡑࡀࡕࡓࡀ ࡑࡉࡕࡀ ࡅࡔࡌࡀࡉࡉࡀ ࡅࡌࡉࡀ ࡌࡍ ࡉࡀࡓࡃࡍࡀ ࡓࡁࡀ ࡖ ࡌࡉࡀ ࡄࡉࡉࡀ ࡅࡀࡃࡊࡀࡓ ࡄࡀࡆࡉࡍ ࡐࡅࡂࡃࡀࡌࡀ ࡏࡋࡇ ࡅࡔࡅࡐࡇ ࡁࡐࡀࡂࡓࡀ ࡖ ࡐ. ࡁࡓ ࡐ. ࡅࡕࡉࡐࡔࡀࡓ ࡅࡕࡉࡐࡅࡒ ࡌࡉࡍࡇ ࡀࡉࡍࡀ ࡁࡉࡔࡕࡀ ࡅࡊࡀࡅࡉࡄࡕࡀ ࡅࡌࡀࡓࡉࡓࡕࡉࡀ ࡅࡀࡉࡍࡀ ࡆࡓࡅࡒࡕࡉࡀ ࡅࡀࡉࡍࡀ ࡁࡓࡅࡒࡕࡉࡀ ࡅࡀࡉࡍࡀ ࡊࡁࡉࡔࡕࡉࡀ ࡅࡀࡉࡍࡀ ࡒࡋࡉࡒࡕࡉࡀ ࡗ ࡔࡀࡌࡉࡔ ࡁࡏࡔࡅࡌࡉࡀ ࡅࡗ ࡆࡉࡒࡀ ࡁࡀࡍࡀࡍࡉࡀ ࡅࡗ ࡑࡉࡐࡓࡀ ࡂࡀࡃࡐࡀ ࡖ ࡐࡀࡔࡀࡓ ࡅࡍࡀࡐࡉࡒ ࡌࡍ ࡒࡉࡍࡇ ࡅࡗ ࡕࡀࡕࡀ ࡖ ࡐࡀࡔࡓࡀ ࡅࡍࡀࡐࡒࡀ ࡌࡍ ࡃࡉࡁࡍࡇ ࡅࡗ ࡌࡉࡄࡋࡀ ࡖ ࡐࡀࡔࡓࡀ ࡅࡍࡀࡐࡒࡀ ࡁࡌࡉࡀ ࡅࡗ ࡄࡉࡅࡕࡀ ࡖ ࡐࡀࡔࡓࡀ ࡅࡍࡀࡐࡒࡀ ࡖ ࡁࡀࡓࡒࡀ ࡁࡌࡉࡍࡉࡋࡕࡀ ࡖ ࡒࡀࡓࡇ ࡅࡀࡌࡀࡓࡋࡉࡀ ࡏࡆࡉࡋ ࡄࡀࡆࡉࡍ ࡔࡅࡕࡀ ࡀࡃࡊࡀࡓࡋࡇ ࡏࡋ ࡁࡉࡋ ࡀࡁ ࡖ ࡍࡉࡎࡀࡁ ࡕࡀࡂࡇ ࡅࡍࡉࡕࡓࡉࡑ ࡁࡓࡉࡔࡉࡀ ࡅࡍࡉࡎࡀࡁ ࡆࡀࡉࡍࡇ ࡅࡍࡉࡕࡋࡉࡀ ࡁࡊࡀࡃࡐࡇ ࡄࡅࡈࡓࡀ ࡖ ࡌࡅࡓࡀ ࡍࡉࡋࡂࡅࡉࡈ ࡁࡏࡃࡇ ࡅࡍࡉࡃࡀࡁࡓࡇ ࡋࡀࡋࡌࡀ ࡊࡅࡋࡇ ࡁࡂࡅࡌࡓࡀ ࡅࡀࡌࡀࡓࡋࡇ ࡏࡆࡉࡋ ࡄࡀࡆࡉࡍ ࡔࡅࡕࡀ ࡀࡃࡊࡀࡓࡋࡅࡍ ࡏࡋ ࡔࡅࡁࡀ ࡔࡉࡁࡉࡀࡄࡉࡀ ࡅࡍࡉࡍࡉࡎࡁࡅࡍ ࡕࡀࡂࡀࡉࡅࡍ ࡅࡍࡉࡕࡉࡓࡎࡍࡅࡍ ࡁࡓࡉࡔࡀࡉࡅࡍ ࡅࡍࡉࡍࡉࡎࡁࡅࡍ ࡆࡀࡉࡍࡀࡉࡅࡍ ࡅࡍࡉࡕࡋࡅࡍ ࡁࡊࡀࡃࡐࡀࡉࡅࡍ ࡄࡅࡈࡓࡀ ࡖ ࡌࡅࡓࡀ ࡍࡉࡋࡉࡂࡈࡅࡍ ࡁࡏࡃࡀࡉࡄࡅࡍ ࡅࡍࡉࡃࡀࡁࡓࡅࡍࡇ ࡋࡀࡋࡌࡀ ࡊࡅࡋࡇ ࡁࡂࡅࡌࡓࡀ ࡏࡆࡉࡋ ࡄࡀࡆࡉࡍ ࡔࡅࡕࡀ ࡀࡃࡊࡀࡓࡋࡇ ࡋࡉࡀࡌࡀ ࡗ ࡌࡋࡉࡀ ࡌࡉࡀ ࡅࡍࡅࡍࡉࡀ ࡅࡃࡉࡋࡐࡅࡍࡉࡀ ࡍࡀࡎࡂࡅࡍ ࡁࡂࡀࡅࡇ ࡖ ࡏࡓࡁࡉࡕࡀ ࡐࡉࡓࡉࡀ ࡅࡏࡌࡁࡉࡀ ࡅࡏࡋࡀࡍࡉࡀ ࡏࡋࡀࡅࡇ ࡍࡉࡓࡉࡅࡆࡅࡍ ࡏࡆࡉࡋ ࡄࡀࡆࡉࡍ ࡔࡅࡕࡀ ࡀࡃࡊࡀࡓࡋࡇ ࡋࡀࡒࡍࡀ ࡖ ࡄࡅࡔ ࡓࡀࡉࡉࡀ ࡀࡒࡍࡀ ࡍࡉࡔࡕࡓࡉࡀ ࡐࡅࡌࡀࡉࡅࡍ ࡋࡌࡉࡓࡉࡀ ࡅࡁࡍࡀࡉࡅࡍ ࡍࡉࡔࡕࡓࡉࡀ ࡋࡌࡉࡌࡀࡑ ࡅࡀࡓࡀࡌࡀࡕࡀ ࡍࡀࡎࡂࡅࡍ ࡀࡁࡀࡕࡓࡀࡉࡅࡍ ࡏࡆࡉࡋ ࡄࡀࡆࡉࡍ ࡔࡅࡕࡀ ࡀࡃࡊࡀࡓ ࡋࡕࡀࡅࡓࡀ ࡖ ࡐࡉࡓࡅࡍ ࡌࡀࡋࡊࡀ ࡖ ࡌࡉࡑࡓࡀࡉࡉࡀ ࡕࡀࡅࡓࡉࡀ ࡍࡉࡔࡕࡓࡉࡀ ࡐࡅࡌࡀࡉࡄࡅࡍ ࡋࡌࡀࡓࡉࡀ [sic] ࡅࡁࡍࡀࡉࡅࡍ ࡍࡉࡔࡕࡓࡉࡀ ࡐࡅࡌࡀࡉࡅࡍ ࡋࡌࡉࡌࡀࡑ ࡅࡁࡀࡒࡀࡓࡉࡀ ࡍࡀࡎࡂࡅࡍ ࡀࡁࡀࡕࡓࡀࡉࡅࡍ ࡏࡆࡉࡋ ࡄࡀࡆࡉࡍ ࡔࡅࡕࡀ ࡀࡃࡊࡀࡓࡋࡇ ࡏࡋ ࡐ. ࡁࡓ ࡐ. ࡖ ࡕࡉࡐࡔࡀࡓ ࡅࡕࡉࡐࡅࡒ ࡌࡉࡍࡇ ࡀࡉࡍࡀ ࡁࡉࡔࡕࡀ ࡅࡊࡀࡅࡉࡄࡕࡀ ࡅࡀࡉࡍࡀ ࡆࡓࡅࡒࡕࡉࡀ ࡅࡀࡉࡍࡀ ࡁࡓࡅࡒࡕࡉࡀ ࡅࡀࡉࡍࡀ ࡏࡊࡅࡌࡕࡉࡀ ࡗ ࡔࡀࡌࡉࡔ ࡁࡔࡅࡌࡉࡀ ࡅࡗ ࡆࡉࡒࡀ ࡁࡀࡍࡀࡍࡉࡀ ࡅࡗ ࡎࡉࡐࡀࡓ ࡂࡀࡃࡐࡀ ࡖ ࡐࡀࡔࡀࡓ ࡅࡍࡀࡐࡉࡒ ࡌࡍ ࡒࡉࡍࡇ ࡅࡗ ࡕࡀࡕࡀ ࡖ ࡐࡀࡔࡓࡀ ࡅࡍࡀࡐࡒࡀ ࡌࡍ ࡃࡉࡁࡍࡇ ࡅࡗ ࡌࡉࡄࡋࡀ ࡖ ࡐࡀࡔࡓࡀ ࡅࡍࡀࡐࡒࡀ ࡁࡌࡉࡀ ࡅࡀࡎࡅࡕࡀ ࡕࡉࡄࡅࡉࡋࡉࡀ ࡏࡋ ࡐ. ࡁࡓ ࡐ. ࡅࡆࡀࡅࡇ ࡅࡁࡍࡇ ࡅࡁࡍࡀࡕࡇ ࡅࡃࡀࡅࡓࡇ ࡄࡉࡊࡋࡇ ࡅࡁࡉࡍࡉࡀࡍࡇ ࡁࡀࡎࡅࡕࡀ ࡖ ࡌࡀࡍࡃࡀ ࡖ ࡄࡉࡉࡀ ࡀࡎࡉࡀ ࡅࡀࡌࡀࡓ ࡀࡉࡍࡀ ࡖ ࡀࡁࡅࡊ ࡁࡎࡀࡍࡀ ࡅࡀࡉࡍࡀ ࡖ ࡔࡉࡁࡀࡁࡉࡀ ࡁࡉࡔࡉࡀ ࡁࡉࡁࡍࡀࡉࡅࡍ ࡅࡀࡉࡍࡀ ࡖ ࡀࡆࡋࡀ ࡅࡀࡉࡍࡀ ࡖ ࡀࡕࡉࡀ ࡅࡀࡉࡍࡀ ࡖ ࡓࡀࡄࡉࡒࡉࡀ ࡅࡀࡉࡍࡀ ࡖ ࡒࡀࡓࡉࡁࡉࡀ ࡅࡀࡉࡍࡀ ࡖ ࡃࡀࡓࡃࡉࡒࡅࡍࡉࡀ ࡅࡀࡉࡍࡀ ࡖ ࡃࡉࡓࡃࡉࡒࡅࡍࡉࡀࡕࡀ ࡅࡀࡉࡍࡀ ࡖ ࡆࡀࡍࡀࡉ ࡅࡀࡉࡍࡀ ࡖ ࡆࡀࡌࡀࡓ ࡅࡀࡉࡍࡀ ࡖ ࡊࡅࡋࡇ ࡕࡉࡁࡉࡋ ࡅࡀࡉࡍࡀ ࡖ ࡌࡄࡀࡕࡀ ࡏࡋ ࡐ. ࡁࡓ ࡐ. ࡍࡉࡍࡉࡎࡁࡇ ࡏࡅࡓࡁࡀ ࡅࡍࡉࡎࡀࡒ ࡋࡃࡉࡒࡋࡀ ࡋࡉࡄࡃࡀࡉࡀ ࡍࡉࡕࡉࡁ ࡋࡂࡉࡃࡌࡀ ࡅࡍࡉࡐࡀࡓࡕࡀ ࡁࡉ ࡐࡓࡀࡕࡀ ࡖ ࡐࡀࡓࡉࡕ ࡌࡉࡍࡇ ࡍࡀࡍࡃࡉࡀ ࡁࡍࡀࡍࡃࡉࡀ ࡌࡉࡍࡇ ࡍࡀࡐࡉࡋ ࡁࡀࡒࡍࡉࡀ ࡖ ࡕࡀࡅࡓࡉࡀ ࡍࡉࡃࡓࡉࡊࡅࡁࡇ ࡅࡕࡀࡕࡀ ࡍࡉࡃࡓࡉࡊࡅࡁࡇ ࡅࡕࡉࡕࡉࡍ ࡅࡕࡉࡕࡁࡀࡄࡀࡕ ࡅࡕࡉࡁࡈࡅࡋ ࡀࡉࡍࡀ ࡁࡉࡔࡕࡀ ࡅࡊࡀࡅࡉࡄࡕࡀ ࡌࡍ ࡐࡀࡂࡓࡀ ࡖ ࡐ. ࡁࡓ ࡐ. ࡗ ࡏࡍࡕࡀ ࡖ ࡉࡀࡕࡁࡀ ࡀࡒࡀࡌࡀ ࡄࡀࡌ ࡅࡄࡀࡌࡀࡕ ࡅࡀࡓࡈࡀࡕ ࡅࡁࡉࡄࡕࡀࡕ ࡀࡊࡅࡀࡕ ࡀࡒࡀࡓ ࡅࡍࡄࡅࡕ ࡀࡍࡀࡕ ࡀࡉࡍࡀ ࡁࡉࡔࡕࡀ ࡖ ࡌࡀࡄࡉࡀࡋࡇ ࡏࡋ ࡐ. ࡁࡓ ࡐ. ࡅࡌࡔࡀࡁࡉࡍ ࡄࡉࡉࡀ
࡞࡞࡞࡞࡞࡞
ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡀࡎࡅࡕࡀ ࡕࡉࡄࡅࡉࡋࡉࡀ ࡏࡋ ࡐ. ࡁࡓ ࡐ. ࡄࡃࡀ ࡖ ࡀࡉࡍࡀ ࡅࡕࡀࡓࡕࡉࡍ ࡖ ࡀࡉࡍࡉࡀ ࡅࡕࡀࡋࡕ ࡖ ࡀࡉࡍࡀࡉ ࡅࡀࡓࡁࡉࡀ ࡖ ࡀࡉࡍࡉࡀ ࡄࡀࡌࡉࡔ ࡖ ࡀࡉࡍࡉࡀ ࡅࡔࡉࡕ ࡖ ࡀࡉࡍࡉࡀ ࡅࡔࡅࡁࡀ ࡖ ࡀࡉࡍࡉࡀ ࡅࡀࡉࡍࡀ ࡆࡓࡅࡒࡕࡉࡀ ࡅࡀࡉࡍࡀ ࡌࡑࡅࡑࡕࡉࡀ ࡅࡀࡉࡍࡀ ࡒࡋࡉࡒࡕࡉࡀ ࡅࡀࡉࡍࡀ ࡄࡀࡌࡓࡀࡍࡉࡕࡀ ࡅࡀࡉࡍࡀ ࡏࡊࡉࡋࡕࡉࡀ ࡅࡀࡉࡍࡀ ࡖ ࡀࡆࡋࡀ ࡅࡀࡉࡍࡀ ࡖ ࡀࡕࡉࡀ ࡅࡀࡉࡍࡀ ࡖ ࡒࡀࡉࡌࡀ ࡅࡀࡉࡍࡀ ࡖ ࡉࡀࡕࡁࡀ ࡅࡀࡉࡍࡀ ࡖ ࡓࡀࡄࡉࡒࡉࡀ ࡅࡀࡉࡍࡀ ࡖ ࡒࡀࡓࡉࡁࡉࡀ ࡅࡀࡉࡍࡀ ࡖ ࡆࡀࡍࡀࡉ ࡅࡀࡉࡍࡀ ࡖ ࡆࡀࡌࡀࡓ ࡅࡀࡉࡍࡀ ࡖ ࡏࡋ ࡀࡓࡀࡌࡀࡕࡀ ࡉࡀࡕࡁࡀ ࡅࡀࡉࡍࡀ ࡖ ࡏࡋ ࡓࡒࡉࡄࡀ ࡓࡌࡉࡉࡀ ࡏࡋࡉࡀ ࡖ ࡏࡋ ࡀࡆࡋࡉࡕ ࡀࡍࡀࡕ ࡀࡉࡍࡀ ࡖ ࡏࡅࡎࡐࡀࡓ ࡅࡍࡉࡅࡀࡋ ࡄࡀࡅࡉࡕ ࡏࡋ ࡀࡄࡉࡀ ࡀࡆࡋࡉࡕ ࡀࡄࡉࡀ ࡌࡍ ࡄࡃࡀࡃࡉࡀ ࡂࡀࡈࡋࡉࡕ ࡏࡅ ࡏࡋ ࡏࡅࡌࡀࡌࡀࡕࡀ ࡀࡆࡋࡉࡕ ࡏࡅࡌࡀࡌࡀࡕࡀ ࡌࡍ ࡄࡃࡀࡃࡉࡀ ࡐࡀࡓࡔࡉࡕ ࡀࡒࡓࡅࡒ ࡌࡍ ࡁࡀࡉࡕࡀ ࡅࡐࡀࡂࡓࡀ ࡖ ࡐ. ࡁࡓ ࡐ. ࡌࡉࡒࡀࡓ ࡆࡉࡒࡋࡀ ࡌࡍ ࡁࡀࡂࡀ ࡅࡓࡉࡂࡋࡅࡊ ࡌࡉࡓࡂࡀࡋ ࡒࡀࡉࡍࡀ ࡋࡁࡅࡓࡉࡀ ࡅࡈࡉࡓࡉࡅࡊ ࡌࡉࡈࡓࡉࡀ ࡁࡀࡉࡕࡀ ࡌࡍ ࡂࡋࡀࡋࡀ ࡊࡉࡁࡔࡅࡊ ࡌࡉࡊࡁࡀࡔ ࡋࡉࡁࡍࡀ ࡁࡁࡉࡍࡉࡀࡍࡀ ࡅࡈࡉࡁࡅࡊ ࡀࡁࡀࡓࡀ ࡁࡉࡓࡁࡉࡕࡀ ࡀࡓࡁࡉࡊࡅࡊ ࡅࡔࡉࡓࡉࡅࡊ ࡏࡋ ࡊࡉࡐࡉࡀ ࡖ ࡐࡓࡀࡕ ࡅࡃࡉࡂࡋࡀࡕ ࡀࡓࡁࡉࡊࡉࡊ ࡀࡋࡌࡀࡍࡀ ࡁࡆࡀࡉࡍࡀ ࡅࡐࡀࡓࡀࡔࡀ ࡁࡒࡀࡔࡕࡇ ࡅࡓࡀࡔࡉࡊ ࡓࡀࡉࡉࡀ ࡁࡀࡒࡍࡉࡇ ࡅࡁࡀࡒࡀࡓࡀ ࡁࡕࡀࡅࡓࡉࡇ ࡅࡎࡀࡁ ࡎࡉࡃࡀ ࡁࡉࡌࡎࡀࡍࡀ ࡅࡍࡉࡎࡁࡉࡊ ࡀࡓࡉࡀ ࡏࡋ ࡁࡍࡇ ࡅࡃࡉࡁࡀ ࡏࡋ ࡔࡉࡕࡋࡇ ࡑࡉࡐࡓࡀ ࡋࡒࡉࡍࡇ ࡅࡑࡀࡓࡈࡀࡍࡀ ࡏࡋࡍࡉࡒࡅࡁࡇ ࡅࡍࡉࡎࡁࡅࡉࡀ ࡉ ࡀࡉࡍࡀ ࡁࡉࡔࡕࡀ ࡅࡊࡀࡅࡉࡄࡕࡀ ࡖ ࡌࡄࡀࡕࡀ ࡏࡋ ࡐ. ࡁࡓ ࡐ. ࡅࡕࡉࡐࡔࡀࡓ ࡅࡕࡉࡐࡅࡒ ࡌࡉࡍࡇ ࡗ ࡌࡉࡄࡋࡀ ࡖ ࡐࡀࡔࡓࡀ ࡅࡍࡀࡐࡒࡀ ࡁࡌࡉࡀ ࡅࡗ ࡄࡅࡐࡉࡀ ࡌࡍ ࡐࡅࡌࡀ ࡖ ࡊࡀࡎࡀ ࡅࡗ ࡄࡀࡌࡓࡀ ࡌࡍ ࡐࡅࡌࡀ ࡖ ࡔࡀࡕࡀࡉࡀ ࡅࡗ ࡔࡉࡍࡕࡀ ࡌࡍ ࡀࡉࡍࡀ ࡖ ࡔࡀࡊࡉࡁࡀ ࡍࡉࡍࡉࡎࡁࡇ ࡏࡅࡓࡁࡀ ࡅࡍࡉࡎࡀࡒ ࡏࡋ ࡆࡉࡒࡋࡀ ࡅࡍࡉࡔࡉࡐࡕࡇ ࡁࡎࡉࡋࡅࡀ ࡔࡀࡓࡉࡓࡀ ࡏࡊࡉࡎࡉࡕ ࡅࡌࡀࡊࡉࡎࡉࡕ ࡀࡍࡀࡕ ࡀࡉࡍࡀ ࡁࡉࡔࡕࡀ ࡅࡊࡀࡅࡉࡄࡕࡀ ࡖ ࡌࡄࡀࡕࡀ ࡖ (ࡏࡋ؟) ࡐ. ࡁࡓ ࡐ. ࡅࡕࡉࡐࡔࡀࡓ ࡅࡕࡉࡐࡅࡒ ࡌࡉࡍࡇ ࡗ ࡌࡉࡄࡋࡀ ࡖ ࡐࡀࡔࡓࡀ ࡅࡍࡀࡐࡒࡀ ࡁࡌࡉࡉࡀ ࡏࡊࡉࡎࡉࡕ ࡅࡌࡀࡊࡉࡎࡉࡕ ࡀࡍࡀࡕ ࡀࡉࡍࡀ ࡁࡉࡔࡕࡀ ࡅࡊࡀࡅࡉࡄࡕࡀ ࡖ ࡌࡄࡀࡕࡀ ࡏࡋ ࡐ. ࡁࡓ ࡐ. ࡀࡒࡀࡓ ࡑࡅࡄࡅࡑ ࡅࡁࡄࡅࡕ ࡅࡏࡕࡁࡀࡋ ࡅࡍࡉࡓࡀࡌࡉࡀ ࡏࡊࡅࡓࡉࡊ ࡅࡌࡉࡉࡀ ࡒࡀࡓࡉࡓࡉࡀ ࡅࡌࡔࡀࡁࡉࡍ ࡄࡉࡉࡀ
࡞࡞࡞࡞࡞࡞
ࡀࡁࡂࡀࡍ ࡔࡅࡌࡀ ࡓࡁࡀ ࡅࡀࡁࡂࡀࡍ ࡌࡉࡌࡓࡀ ࡓࡁࡀ ࡒࡀࡃࡌࡀࡉࡉࡀ ࡏࡋ ࡀࡉࡍࡀ ࡔࡂࡉࡔࡕࡉࡀ ࡅࡏࡋ ࡀࡉࡍࡀ ࡌࡓࡉࡎࡕࡉࡀ ࡅࡏࡋ ࡀࡉࡍࡀ ࡒࡋࡉࡒࡕࡉࡀ ࡏࡋ ࡀࡉࡍࡀ ࡆࡓࡅࡒࡕࡉࡀ ࡅࡏࡋ ࡀࡉࡍࡀ ࡄࡀࡌࡓࡀࡍࡉࡕࡀ ࡅࡏࡋ ࡀࡉࡍࡀ ࡖ ࡉࡀࡕࡁࡀ ࡏࡋ ࡒࡉࡒࡉࡋࡕࡀ ࡅࡏࡋࡀࡉࡍࡀ ࡖ ࡀࡉࡋࡀ ࡁࡀࡉࡕࡀ ࡅࡍࡀࡐࡒࡀ ࡁࡀࡉࡕࡀ ࡅࡏࡋ ࡀࡉࡍࡀ ࡖ ࡑࡀࡉࡃࡀ ࡖ ࡎࡋࡉࡒ ࡌࡍ ࡀࡂࡌࡀ ࡅࡏࡋ ࡀࡉࡍࡀ ࡖ ࡓࡀࡉࡉࡀ ࡖ ࡎࡋࡉࡒ ࡌࡍ ࡀࡒࡍࡀ ࡀࡉࡍࡀ ࡖ ࡄࡉࡎࡌࡀࡕ ࡅࡀࡉࡍࡀ ࡖ ࡓࡀࡁࡀࡕ ࡏࡕࡁࡀࡓࡀࡕ ࡗ ࡐࡉࡋࡒࡀ ࡅࡀࡅࡀࡃࡕ ࡅࡏࡕࡀࡌࡁࡀࡋࡕ ࡗ ࡏࡅࡓࡍࡀࡎࡀ ࡅࡀࡌࡓࡀࡋࡇ ࡗ ࡋࡀࡅ ࡀࡉࡍࡀ ࡄࡀࡎࡅࡌࡕࡉࡀ ࡅࡋࡀࡅ ࡓࡀࡉࡅࡁࡕࡉࡀ ࡀࡍࡀ ࡏࡃࡉࡋࡌࡀ ࡀࡉࡍࡀ ࡄࡀࡎࡅࡌࡕࡉࡀ ࡓࡀࡉࡅࡁࡕࡉࡀ ࡒࡉࡓࡉࡕࡅࡋࡉࡀ ࡅࡀࡌࡀࡓࡋࡇ ࡄࡀࡆࡉࡍ ࡖ ࡋࡀ ࡄࡀࡉࡎࡉࡕ ࡄࡀࡆࡉࡍ ࡖ ࡋࡀ ࡓࡀࡉࡁࡉࡕ ࡖ ࡀࡕࡉࡕ ࡅࡐࡀࡂࡀࡕࡁࡇ ࡁࡄࡉࡊࡋࡀ ࡖ ࡁࡉࡕ ࡌࡀࡋࡊࡀ ࡅࡔࡅࡓࡁࡀ ࡓࡁࡀ ࡖ ࡂࡅࡁࡓࡉࡀ ࡓࡅࡓࡁࡀࡍࡉࡀ ࡁࡀࡉࡍࡀ ࡌࡄࡉࡕࡀࡉࡍࡅࡍ ࡅࡏࡋ ࡏࡅࡄࡓࡉࡊ ࡏࡕࡊࡀࡌࡀࡓࡕ ࡄࡉࡊࡋࡀ ࡖ ࡁࡉࡕ ࡌࡀࡋࡊࡀ ࡍࡐࡀࡋ ࡅࡔࡅࡓࡁࡀ ࡓࡁࡀ ࡖ ࡂࡅࡁࡓࡉࡀ ࡓࡅࡓࡁࡀࡍࡉࡀ ࡏࡕࡁࡀࡓࡀࡕ ࡔࡀࡄࡁࡉࡀ ࡑࡀࡓࡃࡉࡀ ࡖ ࡁࡂࡀࡅࡀࡉࡄࡅࡍ ࡀࡉࡍࡀ ࡄࡀࡎࡅࡌࡕࡉࡀ ࡅࡀࡉࡍࡀ ࡓࡀࡉࡅࡁࡕࡉࡀ ࡏࡕࡁࡀࡓࡀࡕ ࡗ ࡐࡉࡋࡒࡀ ࡅࡀࡅࡀࡃࡕ ࡅࡏࡕࡀࡌࡁࡀࡋࡕ ࡗ ࡏࡅࡓࡍࡀࡎࡀ ࡅࡀࡌࡓࡀࡋࡇ ࡗ ࡋࡀࡅ ࡀࡉࡍࡀ ࡄࡀࡎࡅࡌࡕࡉࡀ ࡅࡋࡀࡅ ࡀࡉࡍࡀ ࡓࡀࡉࡅࡁࡕࡉࡀ ࡀࡍࡀ ࡏࡃࡉࡋࡌࡀ ࡀࡉࡍࡀ ࡄࡀࡎࡅࡌࡕࡉࡀ ࡅࡀࡉࡍࡀ ࡓࡀࡉࡅࡁࡕࡉࡀ ࡒࡀࡓࡉࡕࡅࡋࡉࡀ ࡅࡀࡌࡀࡓࡋࡇ ࡄࡀࡆࡉࡍ ࡖ ࡋࡀࡄࡀࡉࡎࡉࡕ ࡄࡀࡆࡉࡍ ࡖ ࡋࡀ ࡓࡀࡉࡁࡉࡕ ࡖ ࡀࡕࡉࡕ ࡅࡐࡀࡂࡀࡕࡁࡇ ࡁࡉࡐࡃࡀࡍࡀ ࡖ ࡔࡉࡕࡀ ࡕࡀࡅࡓࡉࡀ ࡅࡔࡉࡕࡀ ࡏࡊࡀࡓࡉࡀ ࡖ ࡆࡉࡓࡀ ࡅࡁࡀࡆࡉࡓࡀ ࡁࡀࡓࡒࡀ ࡓࡀࡌࡉࡍ ࡃࡀࡋࡉࡕ ࡀࡉࡍࡉࡊ ࡅࡓࡌࡉࡕࡉࡁࡅࡍ ࡅࡀࡌࡀࡓࡕ ࡊࡌࡀ ࡔࡀࡐࡉࡓࡉࡀ ࡏࡐࡃࡀࡍࡉࡀ ࡅࡔࡀࡐࡉࡓࡉࡀ ࡏࡊࡀࡓࡉࡀ ࡖ ࡁࡂࡀࡅࡀࡉࡄࡅࡍ ࡁࡀࡉࡍࡀ ࡌࡄࡉࡕࡀࡉࡍࡅࡍ ࡅࡏࡋ ࡏࡅࡄࡓࡉࡊ ࡏࡕࡊࡀࡌࡀࡓࡕ ࡏࡐࡃࡀࡍࡀ [sic], ࡐࡎࡉࡒ ࡅࡔࡀࡍࡆࡉࡓࡉࡀ ࡐࡎࡉࡒ ࡕࡀࡅࡓࡉࡀ ࡓࡄࡉࡈ ࡏࡋࡀࡂࡌࡀ ࡅࡏࡊࡀࡓࡉࡀ ࡓࡄࡉࡈ ࡏࡋ ࡌࡀࡕࡇ ࡆࡉࡓࡀ ࡅࡁࡀࡆࡉࡓࡀ ࡌࡍ ࡀࡓࡒࡀ ࡐࡎࡀࡒࡕ ࡀࡉࡍࡀ ࡄࡀࡎࡅࡌࡕࡉࡀ ࡅࡀࡉࡍࡀ ࡓࡀࡉࡅࡁࡕࡉࡀ ࡏࡕࡁࡀࡓࡀࡕ ࡗ ࡏࡅࡓࡍࡀࡎࡀ ࡅࡀࡌࡓࡀࡋࡇ ࡗ ࡋࡀࡅ ࡀࡉࡍࡀ ࡄࡀࡎࡅࡌࡕࡉࡀ ࡅࡋࡀࡅ ࡀࡉࡍࡀ ࡓࡀࡉࡅࡁࡕࡉࡀ ࡀࡍࡀ ࡏࡃࡉࡋࡌࡀ ࡀࡉࡍࡀ ࡄࡀࡎࡅࡌࡕࡉࡀ ࡅࡀࡉࡍࡀ ࡓࡀࡉࡅࡁࡕࡉࡀ ࡒࡀࡓࡉࡕࡅࡋࡉࡀ ࡅࡀࡌࡀࡓࡋࡇ ࡄࡀࡆࡉࡍ ࡖ ࡋࡀ ࡄࡀࡉࡎࡉࡕ ࡄࡀࡆࡉࡍ ࡖ ࡋࡀ ࡓࡀࡉࡅࡁࡉࡕ ࡖ ࡀࡕࡉࡕ ࡅࡐࡀࡂࡀࡕࡁࡇ ࡁࡁࡀࡉࡕࡀ ࡖ ࡔࡉࡕࡀ ࡀࡄࡉࡀ ࡅࡔࡉࡕࡀ ࡏࡅࡌࡀࡌࡀࡕࡀ ࡖ ࡁࡉࡄࡃࡀ ࡁࡀࡉࡕࡀ ࡉࡀࡕࡁࡉࡀ ࡅࡁࡉࡄࡃࡀ ࡎࡀࡋࡀ ࡀࡊࡋࡉࡍ ࡅࡏࡋ ࡄࡃࡀ ࡕࡀࡍࡅࡓࡀ ࡒࡀࡉࡌࡉࡍ ࡅࡏࡋ ࡄࡃࡀ ࡀࡎࡉࡕࡀ ࡌࡄࡀࡁࡔࡉࡍ ࡃࡀࡋࡉࡕ ࡀࡉࡍࡉࡊ ࡅࡓࡌࡕࡀࡉࡁࡅࡍ ࡅࡀࡌࡀࡓࡕ ࡊࡌࡀ ࡔࡀࡐࡉࡓࡉࡀ ࡀࡄࡉࡀ ࡁࡍࡉࡀ ࡄࡃࡀࡃࡉࡀ ࡅࡏࡅࡌࡀࡌࡀࡕࡀ ࡀࡋࡅࡀࡕ ࡄࡃࡀࡃࡉࡀ ࡋࡀࡍࡀࡑࡉࡍ ࡁࡀࡉࡍࡀ ࡌࡄࡉࡕࡀࡉࡍࡅࡍ ࡅࡏࡋ ࡏࡅࡄࡓࡉࡊ ࡏࡕࡊࡀࡌࡀࡓࡕ ࡀࡄࡉࡀ ࡏࡋ ࡄࡃࡀࡃࡉࡀ ࡍࡐࡀࡋ ࡅࡏࡅࡌࡀࡌࡀࡕࡀ ࡏࡋ ࡄࡃࡀࡃࡉࡀ ࡍࡐࡀࡋ ࡔࡉࡂࡔࡀ ࡅࡈࡉࡓࡒࡀ ࡓࡌࡉࡕ ࡁࡍࡀࡕࡀࡉࡄࡅࡍ ࡀࡉࡍࡀ ࡄࡀࡎࡅࡌࡕࡉࡀ ࡅࡀࡉࡍࡀ ࡓࡀࡉࡅࡁࡕࡉࡀ ࡏࡕࡁࡀࡓࡀࡕ ࡗ ࡐࡉࡋࡒࡀ ࡅࡀࡅࡀࡃࡕ *ࡏࡕࡄࡀࡌࡁࡀࡋࡕ ࡗ ࡏࡅࡓࡍࡀࡎࡀ ࡅࡀࡌࡓࡀࡋࡇ ࡗ ࡋࡀࡅ ࡀࡉࡍࡀ ࡄࡀࡎࡅࡌࡕࡉࡀ ࡅࡋࡀࡅ ࡀࡉࡍࡀ ࡓࡀࡉࡅࡁࡕࡉࡀ ࡀࡍࡀ ࡏࡃࡉࡋࡌࡀ ࡀࡉࡍࡀ ࡄࡀࡎࡅࡌࡕࡉࡀ ࡅࡀࡉࡍࡀ ࡓࡀࡉࡅࡁࡕࡉࡀ ࡒࡀࡓࡉࡕࡅࡋࡉࡀ ࡅࡀࡌࡀࡓࡋࡇ ࡄࡀࡆࡉࡍ ࡖ ࡋࡀ ࡄࡀࡉࡎࡉࡕ ࡄࡀࡆࡉࡍ ࡖ ࡋࡀࡓࡀࡉࡁࡉࡕ ࡖ ࡀࡕࡉࡕ ࡅࡐࡀࡂࡉࡕࡁࡇ ࡁࡍࡉࡅࡋࡀ ࡖ ࡀࡓࡁࡀ ࡔࡀࡐࡉࡓࡀࡕࡀ ࡃࡀࡋࡉࡕ ࡀࡉࡍࡉࡊ ࡅࡓࡌࡉࡕࡉࡁࡅࡍ ࡅࡀࡌࡀࡓࡕ ࡊࡌࡀ ࡔࡀࡐࡉࡓࡉࡀ ࡔࡀࡐࡉࡓࡀࡕࡀ ࡅࡔࡀࡐࡉࡓࡉࡀ ࡊࡀࡓࡊࡅࡓࡉࡀ ࡖ ࡏࡃࡀࡉࡄࡅࡍ ࡁࡀࡉࡍࡀ ࡌࡄࡉࡕࡀࡉࡍࡅࡍ ࡅࡏࡋ ࡏࡅࡄࡓࡉࡊ ࡏࡕࡊࡀࡌࡀࡓࡕ ࡏࡋࡀࡉࡉࡀ ࡏࡕࡁࡀࡓ ࡅࡏࡋࡀࡉࡉࡀ ࡅࡕࡉࡕࡀࡉࡉࡀ ࡏࡕࡁࡀࡓ ࡔࡀࡐࡉࡓࡀࡕࡀ ࡁࡀࡊࡉࡀࡍ ࡅࡁࡍࡀࡉࡅࡍ ࡀࡋࡉࡍ ࡔࡉࡂࡔࡀ ࡅࡈࡉࡓࡒࡀ ࡓࡌࡉࡕ ࡁࡉࡍࡀࡉࡄࡅࡍ ࡀࡉࡍࡀ ࡄࡀࡎࡅࡌࡕࡉࡀ ࡅࡀࡉࡍࡀ ࡓࡀࡉࡅࡁࡕࡉࡀ ࡏࡕࡁࡀࡓࡕ ࡗ ࡐࡉࡋࡒࡀ ࡅࡀࡅࡀࡃࡕ *ࡏࡕࡄࡀࡌࡁࡀࡋࡕ ࡗ ࡏࡅࡓࡍࡀࡎࡀ ࡁࡄࡅࡕ ࡅࡐࡅࡒ ࡌࡍ ࡄࡀࡆࡉࡍ ࡐࡀࡂࡓࡀ ࡖ ࡐ. ࡁࡓ ࡐ. ࡗ ࡏࡍࡕࡀ ࡏࡎࡉࡓࡀ ࡖ ࡁࡅࡊࡕࡀ ࡍࡉࡎࡁࡀࡕ ࡏࡋ ࡊࡀࡃࡐࡇ ࡓࡌࡀࡕ ࡅࡀࡆࡋࡀࡕ ࡋࡌࡉࡌࡋࡉࡀ ࡌࡉࡀ ࡅࡀࡕࡅࡍ ࡅࡐࡀࡂࡅࡁࡇ ࡄࡀࡌ ࡅࡄࡀࡌࡀࡕࡇ ࡖ ࡏࡓࡅࡎࡀ ࡏࡕࡉࡂࡉࡃ ࡊࡀࡍࡐࡇ ࡅࡏࡕࡀࡓࡀࡌ ࡋࡓࡉࡔࡇ ࡅࡏࡕࡂࡉࡄࡍࡀࡕ ࡅࡍࡉࡐࡋࡀࡕ ࡁࡅࡊࡕࡀ ࡌࡉࡍࡇ ࡅࡏࡕࡉࡁࡓࡀࡕ ࡅࡏࡕࡁࡉࡄࡕࡀࡕ ࡀࡊࡅࡀࡕ ࡁࡄࡅࡕ ࡅࡍࡐࡅࡒ ࡀࡍࡀࡕ ࡀࡉࡍࡀ ࡁࡉࡔࡕࡀ ࡌࡍ ࡐࡀࡂࡓࡀ ࡖ ࡐ. ࡁࡓ ࡐ. ࡀࡉࡍࡀ ࡖ ࡓࡀࡁࡀࡕ ࡏࡕࡁࡀࡓࡀࡕ ࡗ ࡐࡉࡋࡒࡀ ࡅࡀࡅࡀࡃࡀࡕ ࡅࡏࡕࡀࡌࡁࡀࡋࡕ ࡗ ࡏࡅࡓࡍࡀࡎࡀ ࡁࡄࡅࡕ ࡅࡐࡅࡒ ࡌࡍ ࡄࡀࡆࡉࡍ ࡐࡀࡂࡓࡀ ࡖ ࡐ. ࡁࡓ ࡐ. ࡅࡌࡍ ࡁࡀࡉࡕࡇ ࡄࡉࡊࡋࡇ ࡅࡕࡀࡅࡓࡇ ࡅࡕࡀࡅࡓࡀࡕࡇ ࡅࡌࡍ ࡊࡉࡎࡇ ࡅࡒࡉࡍࡉࡀࡍࡇ ࡅࡌࡔࡀࡁࡉࡍ ࡄࡉࡉࡀ ࡆࡀࡊࡉࡍ
࡞࡞࡞࡞࡞࡞
ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡀࡎࡅࡕࡀ ࡕࡉࡄࡅࡉࡋࡉࡀ ࡋࡐ. ࡁࡓ ࡐ. ࡏࡊࡉࡎࡀ ࡌࡀࡊࡉࡎࡀ ࡀࡉࡍࡀࡉࡄࡅࡍ ࡖ ࡔࡀࡁࡀ ࡄࡀࡓࡀࡔࡀࡕࡀ ࡌࡍ ࡁࡀࡉࡕࡀ ࡅࡐࡀࡂࡓࡀ ࡖ ࡐ. ࡁࡓ ࡐ. ࡌࡍ ࡆࡀࡅࡇ ࡅࡁࡍࡇ ࡅࡁࡍࡀࡕࡇ ࡅࡌࡍ ࡄࡉࡅࡀࡍࡉࡀࡕࡇ ࡅࡒࡉࡍࡉࡀࡍࡇ ࡅࡀࡍࡀ ࡐ. ࡁࡓ ࡐ. ࡀࡉࡍࡀࡉ ࡁࡉࡀࡍࡄࡅࡓࡀ ࡅࡋࡉࡂࡓࡀࡉ ࡁࡉࡔࡓࡀࡓࡀ ࡅࡀࡍࡀ ࡐ. ࡁࡓ ࡐ. ࡅࡀࡍࡀࡕࡅࡍ ࡄࡀࡓࡔࡉࡀ ࡋࡀࡕࡅࡕࡀࡉ ࡅࡀࡍࡀ ࡐ. ࡁࡓ ࡐ. ࡏࡋࡀࡅࡀࡉࡊࡅࡍ ࡐࡔࡀࡓ ࡅࡔࡓࡉࡀ ࡌࡍ ࡐ. ࡁࡓ ࡐ. ࡁࡔࡅࡌࡀ ࡖ ࡄࡀࡓࡃࡁࡉࡏࡉࡋ ࡌࡀࡋࡀࡊࡀ ࡅࡔࡓࡉࡀ ࡁࡔࡅࡌࡀ ࡖ ࡂࡀࡃࡐࡉࡏࡉࡋ ࡌࡀࡋࡀࡊࡀ ࡅࡔࡓࡉࡀ ࡁࡔࡅࡌࡀ ࡖ ࡄࡀࡌࡂࡉࡏࡉࡋ ࡌࡀࡋࡀࡊࡀ ࡐࡔࡀࡓ ࡄࡀࡓࡔࡉࡀ ࡁࡉࡔࡉࡀ ࡅࡎࡀࡃࡀࡍࡉࡀ ࡏࡐࡉࡊࡉࡀ ࡅࡀࡉࡍࡀ ࡁࡉࡔࡕࡀ ࡅࡊࡀࡅࡉࡄࡕࡀ ࡌࡍ ࡐࡀࡂࡓࡀ ࡖ ࡐ. ࡁࡓ ࡐ. ࡁࡔࡅࡌ ࡀࡁࡅࡊࡅࡍ ࡅࡂࡀࡃࡐࡀࡉࡊࡅࡍ ࡏࡋࡀࡅࡀࡉࡊࡅࡍ ࡐࡔࡀࡓ ࡅࡔࡓࡉࡀ ࡌࡉࡍࡉࡋࡕࡀࡉࡊࡅࡍ ࡁࡃࡀࡓࡃࡀࡓࡉࡀ ࡏࡅࡌࡀࡌࡀࡕࡊࡅࡍ ࡌࡍ ࡐࡀࡂࡓࡀ ࡖ ࡐ. ࡁࡓ ࡐ. ࡅࡆࡀࡅࡇ ࡅࡁࡍࡇ ࡅࡁࡍࡀࡕࡇ ࡐࡔࡀࡓ ࡅࡔࡓࡉࡀ ࡌࡍ ࡌࡀࡂࡀࡋࡕࡀ ࡅࡃࡉࡅࡕࡀ ࡅࡌࡉࡕࡓࡀࡑ ࡕࡓࡉࡑࡀ ࡏࡔࡅࡌࡉࡀ ࡋࡒࡅࡃࡀࡌࡇ ࡖ ࡐ. ࡁࡓ ࡐ. ࡅࡌࡉࡕࡓࡀࡑ ࡕࡓࡉࡑࡀ ࡀࡓࡒࡀ ࡋࡒࡅࡃࡀࡌࡇ ࡖ ࡐ. ࡁࡓ ࡐ. ࡅࡀࡎࡅࡕࡀ ࡕࡉࡄࡅࡉࡋࡉࡀ ࡏࡋ ࡐ. ࡁࡓ ࡐ. ࡁࡄࡀࡋࡉࡍ ࡌࡉࡍࡉࡋࡕࡀ ࡖ ࡍࡄࡅࡓࡀ ࡄࡉࡉࡀ ࡆࡀࡊࡉࡍ ࡋࡊࡅࡋࡄࡅࡍ ࡏࡅࡁࡀࡃࡉࡀ
࡞࡞࡞࡞࡞࡞
ࡓࡀࡆࡀ ࡖ ࡄࡀࡆࡉࡍ ࡐࡅࡂࡃࡀࡌࡀ ࡔࡓࡉࡕࡀ ࡋࡌࡀࡍ ࡖ ࡏࡎࡉࡓ ࡅࡌࡈࡀࡍࡀࡐ ࡁࡄࡀࡓࡔࡉࡀ ࡖ ࡊࡃࡅࡁࡀࡋࡇ ࡏࡋࡈࡀࡎࡀ ࡖ ࡀࡍࡊࡀ ࡅࡀࡁࡀࡓࡀ ࡔࡓࡉࡕࡀ ࡕࡉࡄࡅࡉࡋࡉࡀ ࡅࡋࡆࡉࡁࡍࡇ ࡅࡋࡆࡉࡁࡅࡍࡇ ࡒࡓࡉࡇ ࡋࡊࡅࡆࡀ ࡖ ࡌࡉࡀ ࡅࡀࡆࡋࡀ ࡋࡍࡀࡐࡔࡉࡀࡊ ࡅࡋࡁࡀࡉࡕࡀ ࡅࡏࡋ ࡆࡉࡁࡍࡀࡊ ࡅࡏࡋࡆࡁࡅࡍࡀࡊ ࡕࡅࡌ ࡕࡉࡕࡉࡊࡎࡉࡀ ࡀࡉࡍࡀࡉࡄࡅࡍ ࡖ ࡔࡀࡁࡀ ࡁࡉࡔࡉࡀ ࡖ ࡄࡀࡓࡀࡔࡀࡕࡀ ࡅࡔࡀࡓࡉࡓ ࡅࡌࡍࡀࡎࡀࡉ
࡞࡞࡞࡞࡞࡞
ࡏࡎࡉࡓࡀ ࡅࡎࡃࡉࡌࡀ ࡏࡎࡐࡀࡓ ࡅࡍࡉࡅࡀࡋ ࡀࡉࡍࡀ ࡆࡓࡅࡒࡕࡉࡀ ࡏࡎࡉࡓࡀ ࡅࡎࡃࡉࡌࡀ ࡀࡉࡍࡀ ࡌࡑࡅࡑࡕࡉࡀ ࡏࡎࡉࡓࡀ ࡅࡎࡃࡉࡌࡀ ࡀࡉࡍࡀ ࡒࡋࡉࡒࡕࡉࡀ ࡏࡎࡉࡓࡀ ࡅࡎࡃࡉࡌࡀ ࡀࡉࡍࡀ ࡏࡊࡅࡌࡕࡉࡀ ࡏࡎࡉࡓࡀ ࡅࡎࡃࡉࡌࡀ ࡀࡉࡍࡀ ࡒࡃࡅࡓࡕࡉࡀ ࡏࡎࡉࡓࡀ ࡅࡎࡃࡉࡌࡀ ࡀࡉࡍࡀ ࡒࡁࡅࡓࡕࡉࡀ ࡏࡎࡉࡓࡀ ࡅࡎࡃࡉࡌࡀ ࡀࡉࡍࡀ ࡄࡋࡅࡋࡕࡉࡀ ࡏࡎࡉࡓࡀ ࡅࡎࡃࡉࡌࡀ ࡀࡉࡍࡀ ࡖ ࡏࡋ ࡈࡅࡓࡉࡀ ࡒࡀࡉࡌࡀ ࡏࡎࡉࡓࡀ ࡅࡎࡃࡉࡌࡀ ࡀࡉࡍࡀ ࡖ ࡏࡋ ࡀࡓࡀࡌࡀࡕࡀ ࡉࡀࡕࡁࡀ ࡏࡎࡉࡓࡀ ࡅࡎࡃࡉࡌࡀ ࡀࡉࡍࡀ ࡖ ࡏࡋ ࡓࡒࡉࡄࡀ ࡓࡌࡉࡉࡀ ࡏࡎࡉࡓࡀ ࡅࡎࡃࡉࡌࡀ ࡀࡉࡍࡀ ࡖ ࡏࡋ ࡓࡉࡔࡇ ࡏࡉࡁࡀࡃ ࡅࡌࡀࡁࡀࡃ ࡒࡀࡉࡉࡌࡍࡀ ࡀࡍࡀ ࡐ. ࡁࡓ ࡐ. ࡋࡉࡋࡀࡉ ࡅࡀࡍࡀࡕࡅࡍ ࡄࡀࡓࡔࡉࡀ ࡋࡀࡕࡅࡕࡉࡀ ࡅࡀࡍࡀ ࡏࡋࡀࡅࡀࡉࡊࡅࡍ ࡐࡔࡉࡓࡉࡀ ࡄࡀࡓࡔࡉࡀ ࡁࡉࡔࡉࡀ ࡅࡎࡀࡃࡀࡍࡉࡀ ࡏࡐࡉࡊࡉࡀ ࡐࡔࡉࡓࡉࡀ ࡄࡀࡓࡔࡉࡀ ࡅࡎࡃࡉࡌࡉࡀ ࡄࡓࡉࡌࡉࡀ ࡅࡊࡎࡉࡎࡉࡀ ࡏࡊࡉࡎࡉࡀ ࡅࡌࡀࡊࡉࡎࡉࡀ ࡅࡌࡔࡀࡌࡈࡉࡀ ࡅࡌࡁࡀࡈࡋࡉࡀ ࡆࡉࡄࡉࡀ ࡅࡌࡀࡆࡉࡄࡉࡀ ࡆࡉࡌࡉࡀ ࡅࡌࡀࡆࡉࡌࡉࡀ ࡁࡔࡅࡌࡀ ࡖ ࡐࡀࡔࡓࡅࡍ ࡆࡉࡅࡀ ࡂࡀࡁࡓࡀ ࡐࡀࡔࡅࡓࡀ ࡖ ࡐࡀࡔࡀࡓ ࡁࡕࡀࡍࡉࡍࡉࡀ ࡖ ࡉࡀࡓࡃࡍࡀ ࡍࡄࡅࡓࡀ ࡄࡅࡀ ࡋࡉࡄࡔࡅࡊࡀ ࡐࡉࡔࡓࡀ ࡄࡅࡀ ࡋࡄࡀࡓࡔࡉࡀ ࡎࡉࡃࡀࡌࡀ ࡄࡅࡀ ࡋࡓࡅࡈࡍࡀ ࡔࡀࡉࡍࡀ ࡄࡅࡀ ࡅࡔࡀࡉࡍࡀ ࡄࡀࡅࡉࡀ ࡓࡅࡀࡄࡀ ࡄࡅࡀ ࡅࡓࡅࡀࡄࡀ ࡄࡀࡅࡉࡀ ࡈࡀࡁࡅࡕࡀ ࡄࡅࡀࡕ ࡅࡈࡀࡁࡅࡕࡀ ࡄࡀࡅࡉࡀ ࡅࡍࡄࡅࡓࡀ ࡄࡅࡀ ࡅࡍࡄࡅࡓࡀ ࡄࡀࡅࡉࡀ ࡎࡃࡉࡌࡀ ࡔࡒࡀࡄࡉࡕ ࡀࡉࡍࡀ ࡆࡓࡅࡒࡕࡉࡀ ࡎࡃࡉࡌࡉࡀ ࡕࡉࡄࡅࡀࡕ ࡀࡉࡍࡀ ࡌࡑࡅࡑࡕࡉࡀ ࡎࡃࡉࡌࡀ ࡄࡅࡀࡕ ࡀࡉࡍࡀ ࡒࡋࡉࡒࡕࡉࡀ ࡎࡃࡉࡌࡀ ࡑࡀࡓࡑࡉࡕ ࡀࡉࡍࡀ ࡏࡊࡀࡋࡕࡉࡀ ࡎࡃࡉࡌࡀ ࡔࡀࡐࡀࡐࡉࡕ ࡀࡉࡍࡀ ࡒࡁࡅࡓࡕࡉࡀ ࡎࡃࡉࡌࡀ ࡎࡊࡀࡊࡉࡕ ࡅࡍࡉࡕࡀࡓ ࡀࡉࡍࡀ ࡒࡃࡅࡓࡕࡉࡀ ࡖ ࡏࡋࡄࡉࡍࡅࡍ ࡅࡊࡀࡓࡊࡅࡌࡀ ࡀࡃࡅࡍࡀࡉ ࡑࡁࡀࡁࡅࡕ ࡅࡊࡓࡅࡊ ࡅࡕࡀࡁࡀࡓࡉࡀ ࡅࡔࡀࡍࡉࡀ ࡅࡀࡒࡅࡓ ࡅࡂࡀࡌࡀࡓ ࡌࡉࡔࡒࡀࡋ ࡔࡒࡉࡋࡕࡀ ࡅࡔࡒࡉࡋࡕࡀ ࡍࡉࡔࡒࡅࡋ ࡂࡉࡓࡁࡀ ࡅࡏࡔࡀࡕࡀ ࡌࡍ ࡐࡀࡂࡓࡀ ࡖ ࡐ. ࡁࡓ ࡐ. ࡌࡉࡁࡓࡀࡊ ࡁࡓࡉࡊࡉࡀ ࡅࡌࡁࡀࡓࡅࡊࡉࡀ ࡋࡀࡋࡀࡌ ࡀࡋࡌࡉࡀ ࡄࡉࡉࡀ ࡆࡀࡊࡉࡍ
࡞࡞࡞࡞࡞࡞
ࡏࡎࡉࡓࡀ ࡅࡎࡃࡉࡌࡀ ࡅࡐࡔࡉࡓࡀ ࡅࡌࡀࡆࡉࡄࡀ ࡀࡉࡍࡀ ࡆࡓࡅࡒࡕࡉࡀ ࡖ ࡔࡀࡌࡉࡔ ࡅࡌࡑࡅࡑࡕࡉࡀ ࡖ ࡋࡉࡁࡀࡕ ࡅࡒࡋࡉࡒࡕࡉࡀ ࡖ ࡍࡁࡅ ࡅࡏࡊࡉࡋࡕࡉࡀ ࡖ ࡎࡉࡍ ࡄࡋࡅࡋࡕࡉࡀ ࡖ ࡊࡉࡅࡀࡍ ࡅࡒࡁࡅࡓࡕࡉࡀ ࡖ ࡁࡉࡋ ࡅࡒࡃࡅࡓࡕࡉࡀ ࡖ ࡍࡉࡓࡉࡂ ࡅࡀࡉࡍࡀ ࡖ ࡏࡋ ࡀࡓࡀࡌࡀࡕࡀ ࡉࡀࡕࡁࡀ ࡅࡀࡉࡍࡀ ࡖ ࡏࡋ ࡓࡒࡉࡄࡀ ࡓࡌࡏࡉࡀ ࡅࡀࡉࡍࡀ ࡖ ࡀࡍࡀࡍࡀࡉ ࡅࡀࡎࡅࡕࡀ ࡕࡉࡄࡅࡉࡋࡉࡀ ࡏࡋ ࡐ. ࡁࡓ ࡐ. ࡄࡉࡉࡀ ࡆࡀࡊࡉࡍ
࡞࡞࡞࡞࡞࡞
ࡓࡀࡆࡀ ࡓࡁࡀ ࡐࡀࡓࡀ ࡅࡐࡀࡓࡕࡀ ࡒࡓࡉࡇ ࡏࡋࡀࡅࡀࡉࡄࡅࡍ ࡊࡃࡅࡁ ࡋࡌࡀࡂࡀࡋࡕࡀ ࡖ ࡈࡀࡁࡉࡀ ࡅࡕࡋࡉࡋࡇ ࡁࡑࡀࡅࡓࡀ
࡞࡞࡞࡞࡞࡞
ࡏࡎࡉࡓࡀ ࡄࡕࡉࡌࡀ ࡅࡌࡀࡆࡉࡄࡀ ࡔࡒࡀࡄࡉࡕ ࡀࡉࡍࡀ ࡆࡓࡅࡒࡕࡉࡀ ࡖ ࡔࡀࡌࡉࡔ ࡏࡎࡉࡓࡀ ࡅࡌࡀࡆࡉࡄࡀ ࡀࡌࡀࡌࡉࡕ ࡀࡉࡍࡀ ࡌࡑࡅࡑࡕࡉࡀ ࡖ ࡋࡉࡁࡀࡕ ࡏࡎࡉࡓࡀ ࡅࡌࡀࡆࡉࡄࡀ ࡑࡀࡓࡄࡉࡕ ࡀࡉࡍࡀ ࡒࡋࡉࡒࡕࡉࡀ ࡖ ࡍࡁࡅ ࡏࡎࡉࡓࡀ ࡅࡌࡀࡆࡉࡄࡀ ࡑࡀࡓࡑࡉࡕ ࡀࡉࡍࡀ ࡏࡊࡉࡋࡕࡉࡀ ࡖ ࡎࡉࡍ ࡏࡎࡉࡓࡀ ࡅࡌࡀࡆࡉࡄࡀ ࡀࡉࡍࡀ ࡄࡋࡅࡋࡕࡉࡀ ࡖ ࡊࡉࡅࡀࡍ ࡏࡎࡉࡓࡀ ࡅࡌࡀࡆࡉࡄࡀ ࡔࡀࡐࡀࡐࡉࡕ ࡀࡉࡍࡀ ࡒࡁࡅࡓࡕࡉࡀ ࡖ ࡁࡉࡋ ࡏࡎࡉࡓࡀ ࡅࡌࡀࡆࡉࡄࡀ ࡎࡊࡀࡊࡉࡕ ࡅࡍࡉࡕࡀࡓ ࡀࡉࡍࡀ ࡒࡃࡅࡓࡕࡉࡀ ࡖ ࡍࡉࡓࡉࡂࡇ ࡎࡃࡉࡌࡀ ࡅࡌࡀࡆࡉࡄࡀ ࡎࡀࡌ ࡅࡎࡀࡐ ࡓࡀࡆࡀ ࡖ ࡀࡍࡀࡍࡀࡉ ࡎࡃࡉࡌ ࡄࡀࡒ ࡅࡌࡀࡒ ࡓࡀࡆࡀ ࡖ ࡎࡃࡉࡌ ࡊࡅࡐ ࡓࡀࡆࡀ ࡅࡓࡉࡌࡆࡀ ࡅࡓࡀࡆࡀ ࡎࡃࡉࡌ ࡔࡉࡓࡔࡀ ࡊࡅࡋࡇ ࡖ ࡄࡔࡅࡊࡀ ࡅࡌࡉࡀ ࡎࡉࡀࡅࡉࡀ ࡎࡃࡉࡌࡉࡀ ࡄࡓࡉࡌࡉࡀ ࡌࡀࡋࡊࡀࡉࡅࡍ ࡌࡁࡀࡈࡋࡀࡍ ࡌࡄࡀࡔࡀࡁࡀࡕࡅࡍ ࡏࡎࡉࡓࡉࡕࡅࡍ ࡅࡎࡃࡉࡌࡉࡕࡅࡍ ࡄࡕࡉࡌࡉࡕࡅࡍ ࡅࡌࡔࡀࡌࡉࡕࡅࡍ ࡅࡌࡁࡀࡈࡋࡉࡕࡅࡍ ࡆࡉࡌࡉࡕࡅࡍ ࡅࡌࡀࡆࡉࡌࡉࡕࡅࡍ ࡋࡁࡀࡓ ࡌࡍ ࡐࡀࡂࡓࡀ ࡖ ࡐ. ࡁࡓ ࡐ. ࡁࡔࡅࡌࡀ ࡖ ࡄࡀࡄࡅ ࡓࡉࡔࡀࡂࡀ ࡒࡀࡔࡉࡔࡀ ࡍࡉࡁࡈࡅࡋ ࡄࡔࡅࡊࡀ ࡅࡍࡉࡆࡊࡉࡀ ࡍࡄࡅࡓࡀ ࡖ ࡒࡉࡍࡀࡍ ࡖ ࡕࡀࡓࡕࡉࡍ ࡅࡎࡓࡉࡍ ࡔࡅࡓࡁࡀࡕࡀ ࡖ ࡁࡉࡕ ࡎࡉࡌࡉࡀࡉࡉࡋ ࡎࡀࡈࡀࡍࡀ ࡍࡉࡁࡈࡅࡋ ࡄࡔࡅࡊࡀ ࡅࡍࡉࡆࡊࡉࡀ ࡍࡄࡅࡓࡀ ࡅࡀࡎࡅࡕࡀ ࡕࡉࡄࡅࡉࡋࡉࡀ ࡏࡋ ࡐ. ࡁࡓ ࡐ. ࡌࡍ ࡄࡉࡉࡀ ࡓࡁࡉࡀ ࡒࡀࡃࡌࡀࡉࡉࡀ ࡅࡌࡍ ࡌࡀࡍࡃࡀ ࡖ ࡄࡉࡉࡀ ࡄࡉࡉࡀ ࡆࡀࡊࡉࡍ
࡞࡞࡞࡞࡞࡞
ࡁࡀࡍࡀࡍࡀ ࡓࡀࡁࡕࡉࡀ ࡖ ࡍࡄࡅࡓࡀ ࡉࡀࡕࡉࡁࡍࡀ ࡀࡍࡀ ࡄࡅ ࡄࡉࡁࡉࡋ ࡆࡉࡅࡀ ࡆࡀࡃࡉࡒ ࡁࡓ ࡀࡕࡓࡀ ࡖ ࡍࡄࡅࡓࡀ ࡁࡓ ࡃࡀࡅࡓࡀ ࡕࡀࡒࡍࡀ ࡁࡓ ࡌࡃࡉࡍࡀࡕ ࡏࡅࡕࡓࡉࡀ ࡀࡍࡀ ࡅࡏࡅࡕࡓࡉࡀ ࡀࡄࡀࡉ ࡁࡍࡉࡀ ࡍࡄࡅࡓࡀ ࡖ ࡒࡀࡉࡌࡉࡀ ࡒࡅࡃࡀࡌࡀࡉ ࡀࡍࡅࡔ ࡆࡅࡈࡀ ࡒࡀࡉࡉࡌ ࡏࡋ ࡎࡌࡀࡋࡀࡉ ࡅࡔࡉࡕࡉࡋ ࡒࡀࡉࡉࡌ ࡋࡉࡀࡌࡉࡍࡀࡉ ࡄࡉࡍࡅࡍ ࡅࡋࡁࡅࡔࡀࡉࡇ ࡖ ࡌࡉࡍࡀࡉ ࡒࡀࡉࡌࡉࡍࡉࡍ ࡅࡌࡔࡀࡁࡉࡍࡀࡋࡇ ࡋࡀࡍࡀࡍࡀ ࡓࡀࡁࡕࡉࡀ ࡖ ࡍࡄࡅࡓࡀ ࡖ ࡌࡉࡍࡇ ࡏࡕࡉࡍࡑࡉࡁࡍࡉࡍ ࡄࡀࡉࡆࡀࡊ ࡔࡀࡌࡉࡍࡉࡍ ࡒࡀࡋࡀ ࡖ ࡐ. ࡁࡓ ࡐ. ࡀࡍࡀࡔࡀ ࡖ ࡀࡉࡍࡀ ࡌࡄࡀࡕࡇ ࡅࡊࡉࡅࡉࡄࡕࡀ ࡍࡎࡀࡁࡕࡇ ࡅࡋࡉࡁࡇ ࡀࡈࡀ ࡅࡓࡅࡉࡀࡍࡀ ࡏࡔࡕࡀࡂࡀࡔ ࡅࡀࡍࡀ ࡄࡉࡁࡉࡋ ࡆࡉࡅࡀ ࡆࡀࡃࡉࡒࡀ ࡅࡀࡌࡀࡓࡍࡀࡋࡅࡍ ࡏࡋ ࡏࡅࡕࡓࡉࡀ ࡀࡄࡀࡉ ࡁࡍࡉࡀ ࡍࡄࡅࡓࡀ ࡖ ࡉࡀࡕࡁࡉࡀ ࡁࡊࡉࡎࡉࡀ ࡅࡀࡌࡀࡓࡍࡀࡋࡅࡍ ࡍࡄࡅࡕ ࡏࡋ ࡕࡉࡁࡉࡋ ࡀࡓࡒࡀ ࡅࡀࡎࡅࡕࡀ ࡌࡉࡍࡃࡀࡌ ࡕࡉࡁࡉࡃࡅࡋࡇ ࡏࡋ ࡐ. ࡁࡓ ࡐ. ࡂࡀࡁࡓࡀ ࡅࡏࡍࡕࡀ ࡅࡀࡌࡀࡓࡍࡀࡋࡅࡍ ࡏࡋ ࡁࡄࡉࡓࡉࡀ ࡆࡉࡃࡒࡀ ࡂࡁࡉࡋࡉࡀ ࡁࡉࡎࡓࡀ ࡅࡆࡌࡀ ࡎࡀࡁ ࡄࡀࡆࡉࡍ ࡐࡅࡂࡃࡀࡌࡀ ࡊࡃࡅࡁࡋࡇ ࡏࡋ ࡐ. ࡁࡓ ࡐ. ࡀࡍࡀࡔࡀ ࡖ ࡀࡉࡍࡀ ࡌࡄࡀࡕࡇ ࡅࡊࡀࡅࡉࡄࡕࡀ ࡍࡎࡀࡁࡕࡇ ࡅࡋࡉࡁࡇ ࡀࡈࡀ ࡅࡓࡅࡉࡀࡍࡀ ࡏࡔࡕࡀࡂࡀࡔ ࡅࡀࡎࡅࡕࡀ ࡕࡉࡄࡅࡉࡋࡇ ࡏࡋ ࡐ. ࡁࡓ ࡐ. ࡁࡔࡅࡌࡀ ࡖ ࡌࡀࡍࡃࡀ ࡖ ࡄࡉࡉࡀ ࡀࡎࡉࡀ ࡌࡀࡓࡀࡉࡄࡅࡍ ࡖ ࡀࡎࡀࡅࡀࡕࡀ ࡄࡉࡉࡀ ࡆࡀࡊࡉࡍ
࡞࡞࡞࡞࡞࡞
