Draša ḏ-Iahia دراشا د-یهیا

Draša ḏ-Iahia

Transliterated by: C.G. Häberl 2012

Source: https://www.rci.rutgers.edu/~haberl/doctrine/ (The Doctrine of John Based upon the 1915 edition created by Mark Lidzbarski)

Unicode by: Ibrāhīm Šafiʿī (University of Tehrān)

 

ࡃࡓࡀࡔࡀ ࡖ ࡉࡀࡄࡉࡀ

 

ࡌࡔࡀࡁࡀ ࡌࡀࡓࡀࡉ

ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡍࡅࡊࡓࡀࡉࡉࡀ ࡌࡍ ࡀࡋࡌࡉࡀ ࡖ ࡍࡄࡅࡓࡀ ࡉࡀࡕࡉࡓࡉࡀ ࡖࡏࡋࡀࡅࡉࡀ ࡊࡅࡋࡄࡅࡍ ࡏࡅࡁࡀࡃࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡄࡀࡉࡋࡀ ࡅࡔࡓࡀࡓࡀ ࡅࡏࡌࡓࡀ ࡅࡔࡉࡌࡀ ࡄࡀࡃࡅࡀࡕ ࡋࡉࡁࡀ ࡅࡔࡀࡁࡉࡒ ࡄࡀࡈࡀࡉࡉࡀ ࡍࡉࡄࡅࡉࡋࡉࡀ ࡀࡋࡃࡉࡋࡉࡀ ࡌࡄࡀࡕࡀࡌ ࡁࡓ ࡔࡀࡓࡀࡕ ࡅࡆࡀࡅࡀࡉ ࡔࡀࡓࡀࡕ ࡐࡕ ࡀࡍࡄࡀࡓ ࡅࡋࡀࡁ ࡉࡀࡄࡉࡀ ࡁࡀࡊࡕࡉࡀࡓ ࡁࡓ ࡀࡍࡄࡀࡓ ࡉࡀࡎࡌࡉࡍ ࡅࡏࡋ ࡏࡌ ࡔࡀࡓࡀࡕ ࡐࡕ ࡀࡍࡄࡀࡓ ࡁࡄࡀࡋࡉࡍ ࡀࡃࡓࡀࡔࡉࡀ ࡖࡌࡀࡋࡊࡉࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡋࡁࡀࡁ ࡀࡋࡌࡉࡀ ࡒࡀࡉࡉࡌ ࡊࡅࡔࡈࡀ ࡌࡔࡀࡉࡉࡋ ࡅࡀࡌࡀࡓ ࡁࡀࡋࡌࡀ ࡅࡀࡌࡀࡓ ࡀࡌࡀࡓࡅࡋࡉࡀ ࡀࡓࡒࡀ ࡊࡌࡀ ࡄࡀࡅࡉࡀ ࡎࡅࡌࡊࡇ ࡅࡌࡍ ࡀࡓࡒࡀ ࡋࡒࡅࡌࡁࡀ ࡖࡓࡒࡉࡄࡀ ࡓࡀࡅࡌࡀ ࡊࡌࡀ ࡄࡀࡅࡉࡀ ࡅࡀࡃࡀࡌ ࡌࡍ ࡌࡀࡄࡅ ࡄࡅࡀ ࡄࡀࡅࡀ ࡆࡀࡅࡇ ࡌࡍ ࡌࡀࡄࡅ ࡄࡅࡀࡕ ࡄࡀࡌࡀࡓ ࡊࡀࡍࡀ ࡅࡌࡀࡌࡁࡅࡂࡀ ࡖࡔࡀࡍࡀࡉ ࡌࡍ ࡀࡋࡌࡉࡀ ࡌࡍࡀ ࡄࡅࡀ ࡄࡀࡆࡉࡍ ࡌࡉࡔࡀ ࡁࡓ ࡔࡅࡔࡌࡀ ࡄࡉࡅࡀࡓࡀ ࡌࡍ ࡀࡔࡊࡉࡍࡕࡀ ࡖࡌࡀࡍࡅ ࡀࡌࡀࡋࡉࡀ ࡄࡀࡋࡉࡍ ࡉࡀࡓࡃࡍࡉࡀ ࡖ ࡌࡉࡀ ࡄࡉࡉࡀ ࡌࡍ ࡉࡀࡓࡃࡍࡀ ࡖࡌࡀࡍࡅ ࡀࡕࡉࡍ ࡅࡏࡋ ࡀࡕࡅࡕࡉࡀ ࡖ ࡉࡅࡎࡌࡉࡓ ࡂࡅࡐࡍࡀ ࡀࡌࡀࡓࡅࡋࡉࡀ ࡊࡌࡀ ࡀࡋࡐࡉࡀ ࡏࡅࡕࡓࡉࡀ ࡉࡀࡕࡁࡉࡍ ࡅࡏࡋ ࡀࡕࡅࡕࡉࡀ ࡖࡔࡀࡓ ࡂࡅࡐࡍࡀ ࡀࡌࡀࡓࡅࡋࡉࡀ ࡊࡌࡀ ࡀࡋࡐࡉࡀ ࡏࡅࡕࡓࡉࡀ ࡉࡀࡕࡁࡉࡍ ࡅࡏࡋ ࡀࡕࡅࡕࡉࡀ ࡖࡐࡉࡓࡅࡍ ࡂࡅࡐࡍࡀ ࡀࡌࡀࡓࡅࡋࡉࡀ ࡊࡌࡀ ࡀࡋࡐࡉࡀ ࡏࡅࡕࡓࡉࡀ ࡉࡀࡕࡁࡉࡍ ࡌࡀࡍ ࡒࡀࡓࡉࡀ ࡒࡀࡋࡀ ࡓࡁࡀ ࡅࡌࡀࡍ ࡓࡀࡍࡃࡉࡃࡇ ࡀࡋࡌࡀࡍࡀ ࡌࡍ ࡃࡅࡊࡕࡇ ࡌࡀࡍ ࡓࡉࡌࡉࡅࡇ ࡏࡋ ࡕࡉࡂࡓࡀ ࡓࡁࡀ ࡖࡏࡋ ࡃࡀࡓࡃࡀࡓࡉࡀ ࡋࡀ ࡌࡉࡔࡕࡓࡉࡀ ࡌࡀࡍ ࡔࡉࡒࡋࡇ ࡋࡁࡉࡃࡒࡀ ࡓࡀࡌࡀ ࡖࡏࡋ ࡃࡀࡓࡃࡀࡓࡉࡀ ࡋࡀࡌࡉࡎࡕࡊࡀࡓ ࡌࡀࡍ ࡄࡅࡀ ࡍࡀࡈࡀࡓ ࡁࡀࡉࡕࡀ ࡀࡋࡌࡀ ࡋࡊࡉࡌࡑࡀࡕ ࡀࡋࡌࡉࡀ ࡀࡌࡀࡓࡅࡋࡉࡀ ࡀࡓࡎࡀ ࡖࡌࡀࡍࡀ ࡓࡁࡀ ࡊࡀࡁࡉࡓࡀ ࡀࡋࡌࡀࡄࡅ ࡀࡎࡌࡉࡊࡀ ࡀࡌࡀࡓࡅࡋࡉࡀ ࡏࡋ ࡉࡀࡌࡉࡍࡇ ࡖࡌࡀࡍࡀ ࡓࡁࡀ ࡊࡀࡁࡉࡓࡀ ࡊࡌࡀ ࡀࡋࡐࡉࡀ ࡏࡅࡕࡓࡉࡀ ࡉࡀࡕࡁࡉࡀ ࡅࡏࡋ ࡏࡎࡌࡀࡋࡇ ࡖࡌࡀࡍࡀ ࡓࡁࡀ ࡊࡀࡁࡉࡓࡀ ࡀࡌࡀࡓࡅࡋࡉࡀ ࡊࡌࡀ ࡀࡋࡐࡉࡀ ࡏࡅࡕࡓࡉࡀ ࡉࡀࡕࡁࡉࡀ ࡅࡏࡋ ࡒࡅࡃࡀࡌࡇ ࡖࡌࡀࡍࡀ ࡓࡁࡀ ࡊࡀࡁࡉࡓࡀ ࡀࡌࡀࡓࡅࡋࡉࡀ ࡊࡌࡀ ࡀࡋࡐࡉࡀ ࡏࡅࡕࡓࡉࡀ ࡒࡀࡉࡌࡉࡀ ࡀࡌࡀࡓࡅࡋࡉࡀ ࡀࡔࡅࡌࡀࡉࡄࡅࡍ ࡖࡀࡕࡋࡀࡕࡀ ࡀࡋࡁࡅࡔࡉࡀ ࡖࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡌࡀࡄࡅ ࡔࡅࡌࡀࡉࡄࡅࡍ ࡀࡌࡀࡓࡅࡋࡉࡀ ࡌࡀࡍ ࡏࡌࡓࡀ ࡋࡔࡉࡌࡀ ࡅࡏࡌࡓࡀ ࡅࡔࡉࡌࡀ ࡋࡏࡅࡕࡓࡉࡀ ࡂࡀࡋࡉࡋࡅࡍ ࡁࡔࡊࡉࡍࡀࡕࡅࡍ ࡀࡌࡀࡓࡅࡋࡉࡀ ࡌࡀࡍ ࡌࡍ ࡏࡅࡕࡓࡉࡀ ࡍࡀࡎࡉࡁ ࡒࡀࡅࡒࡀ ࡖࡓࡉࡄࡀ ࡅࡏࡋ ࡒࡅࡃࡀࡌ ࡌࡀࡍࡀ ࡌࡀࡉࡉࡋ ࡀࡌࡀࡓࡅࡋࡉࡀ ࡌࡀࡍ ࡌࡍ ࡏࡅࡕࡓࡉࡀ ࡌࡒࡀࡁࡉࡋ ࡁࡅࡕࡀ ࡅࡕࡅࡔࡁࡉࡄࡕࡀ ࡅࡌࡀࡉࡉࡋ ࡊࡀࡎࡉࡋࡇ ࡁࡉࡕ ࡂࡉࡍࡆࡉࡇ ࡀࡌࡀࡓࡅࡋࡉࡀ ࡗ ࡌࡉࡑࡈࡀࡓࡀࡓ ࡏࡅࡋࡀ ࡀࡁࡊࡀࡍࡐࡇ ࡖࡌࡀࡍࡅ ࡌࡉࡑࡈࡀࡓࡀࡓ ࡗ ࡄࡀࡅࡉࡀ ࡏࡋ ࡏࡌࡇ ࡀࡁࡓࡉࡄࡀ ࡖࡌࡀࡍࡅ ࡌࡀࡓࡄࡀ ࡏࡋ ࡀࡓࡎࡀࡉࡅࡍ ࡖࡁࡀࡈࡉࡍࡀࡕࡀ ࡌࡀࡍࡅ ࡌࡍ ࡋࡉࡋࡉࡀࡕࡀ ࡔࡓࡏࡉࡀ ࡀࡌࡀࡓࡅࡋࡉࡀ ࡌࡀࡍ ࡄࡅࡀ ࡍࡀࡈࡀࡓ ࡁࡀࡉࡕࡀ ࡀࡋࡌࡀ ࡋࡊࡉࡌࡑࡀࡕ ࡀࡋࡌࡉࡀ ࡌࡀࡋࡉࡋ ࡐࡕࡀࡄࡉࡋ ࡖࡍࡉࡌࡀࡓࡋࡇ ࡀࡍࡀ ࡏࡌࡀࡓࡋࡀࡊ ࡊࡅࡔࡈࡀ ࡅࡀࡍࡀ ࡏࡉࡀࡐࡓࡉࡔࡀࡊ ࡗ ࡖࡄࡅࡀࡕ ࡀࡓࡒࡀ ࡀࡕࡓࡉࡎࡀࡓ ࡀࡋࡐࡉࡀ ࡐࡀࡓࡎࡉࡀ ࡄࡀࡅࡉࡀ ࡎࡅࡌࡊࡇ ࡅࡌࡍ ࡀࡓࡒࡀ ࡀࡋࡒࡅࡌࡁࡀ ࡖ ࡓࡒࡉࡄࡀ ࡕࡓࡉࡎࡀࡓ ࡀࡋࡐࡉࡀ ࡐࡀࡓࡎࡉࡀ ࡄࡀࡅࡉࡀ ࡓࡀࡅࡌࡀ ࡅࡀࡃࡀࡌ ࡌࡍ ࡈࡉࡍࡀ ࡄࡅࡀ ࡄࡀࡅࡀ ࡆࡀࡅࡇ ࡌࡍ ࡊࡀࡍࡀ ࡖࡍࡀࡐࡔࡉࡇ ࡀࡄࡅࡀࡕ ࡄࡀࡆࡉࡍ ࡌࡉࡔࡀ ࡁࡓ ࡔࡅࡔࡌࡀ ࡄࡉࡅࡀࡓࡀ ࡌࡍ ࡀࡔࡊࡉࡍࡕࡇ ࡖࡉࡅࡎࡌࡉࡓ ࡆࡉࡅࡀ ࡀࡕࡀ ࡄࡀࡋࡉࡍ ࡄࡉࡍࡅࡍ ࡌࡉࡀ ࡄࡉࡉࡀ ࡌࡍ ࡄࡅࡎ ࡉࡀࡓࡃࡍࡀ ࡀࡕࡉࡍ ࡅࡏࡋ ࡀࡕࡅࡕࡇ ࡖࡉࡅࡎࡌࡉࡓ ࡂࡅࡐࡍࡀ ࡕࡓࡉࡎࡀࡓ ࡀࡋࡐࡉࡀ ࡏࡅࡕࡓࡉࡀ ࡉࡀࡕࡁࡉࡀ ࡅࡏࡋ ࡀࡕࡅࡕࡇ ࡖࡔࡀࡓ ࡂࡅࡐࡍࡀ ࡀࡕࡓࡉࡎࡀࡓ ࡀࡋࡐࡉࡀ ࡏࡅࡕࡓࡉࡀ ࡉࡀࡕࡁࡉࡍ ࡅࡏࡋ ࡀࡕࡅࡕࡇ ࡖࡐࡉࡓࡅࡍ ࡂࡅࡐࡍࡀ ࡎࡓࡉࡍ ࡅࡀࡓࡁࡀ ࡀࡋࡐࡉࡀ ࡏࡅࡕࡓࡉࡀ ࡉࡀࡕࡁࡉࡍ ࡉࡅࡔࡀࡌࡉࡓ ࡓࡉࡌࡉࡅࡇ ࡋࡕࡉࡂࡓࡀ ࡓࡁࡀ ࡖࡏࡋ ࡃࡀࡓࡃࡀࡓࡉࡀ ࡋࡀࡌࡉࡔࡕࡓࡉࡀ ࡀࡁࡀࡕࡅࡓ ࡔࡉࡒࡋࡇ ࡀࡋࡁࡉࡃࡒࡀ ࡓࡀࡌࡀ ࡖࡋࡃࡀࡓࡃࡀࡓࡉࡀ ࡋࡀ ࡌࡉࡎࡕࡊࡀࡓ ࡀࡍࡀ ࡀࡐࡕࡀࡄࡉࡋ ࡀࡄࡅࡉࡕ ࡍࡀࡈࡀࡓ ࡁࡀࡉࡕࡀ ࡀࡋࡌࡀ ࡋࡊࡉࡌࡑࡀࡕ ࡀࡋࡌࡉࡀ ࡀࡓࡎࡀ ࡖࡌࡀࡍࡀ ࡓࡁࡀ ࡊࡀࡁࡉࡓࡀ ࡏࡋ ࡌࡉࡍࡉࡋࡀࡕ ࡄࡉࡉࡀ ࡎࡌࡉࡊࡀ ࡋࡉࡀࡌࡉࡍࡇ ࡖࡌࡀࡍࡀ ࡓࡁࡀ ࡊࡀࡁࡉࡓࡀ ࡕࡓࡉࡎࡀࡓ ࡀࡋࡐࡉࡀ ࡏࡅࡕࡓࡉࡀ ࡉࡀࡕࡁࡉࡀ ࡅࡏࡋ ࡀࡎࡌࡀࡋࡇ ࡖࡌࡀࡍࡀ ࡓࡁࡀ ࡊࡀࡁࡉࡓࡀ ࡕࡓࡉࡎࡀࡓ ࡀࡋࡐࡉࡀ ࡏࡅࡕࡓࡉࡀ ࡉࡀࡕࡁࡉࡀ ࡅࡏࡋ ࡒࡅࡃࡀࡌࡇ ࡖࡌࡀࡍࡀ ࡓࡁࡀ ࡊࡀࡁࡉࡓࡀ ࡀࡎࡓࡉࡍ ࡅࡀࡓࡁࡀ ࡀࡋࡐࡉࡀ ࡏࡅࡕࡓࡉࡀ ࡒࡀࡉࡌࡉࡀ ࡔࡅࡌࡀࡉࡄࡅࡍ ࡖࡀࡕࡋࡀࡕࡀ ࡀࡋࡁࡉࡔࡉࡀ ࡖࡆࡉࡅࡀ ࡍࡄࡅࡓࡀ ࡅࡏࡒࡀࡓࡀ ࡄࡀࡃ ࡄࡀࡃ ࡌࡀࡐࡓࡀࡔ ࡏࡋ ࡃࡅࡊࡕࡇ ࡔࡉࡍࡂࡉࡋࡀࡍ ࡏࡅࡕࡓࡀ ࡍࡀࡎࡉࡁ ࡒࡀࡅࡒࡀ ࡖࡓࡉࡄࡀ ࡅࡏࡋ ࡒࡅࡃࡀࡌ ࡌࡀࡍࡀ ࡌࡀࡉࡉࡋ ࡎࡀࡌࡀࡍࡃࡉࡓࡏࡉࡋ ࡏࡅࡕࡓࡀ ࡀࡌࡒࡀࡁࡉࡋ ࡁࡅࡕࡀ ࡅࡌࡅࡔࡁࡉࡄࡕࡀ ࡌࡀࡉࡉࡋ ࡀࡌࡀࡓࡅࡋࡉࡀ ࡌࡀࡍ ࡌࡍ ࡏࡅࡕࡓࡉࡀ ࡌࡒࡀࡁࡉࡋ ࡁࡅࡕࡀ ࡅࡕࡅࡔࡁࡉࡄࡕࡀ ࡅࡌࡀࡉࡉࡋ ࡊࡀࡎࡉࡋࡇ ࡁࡉࡕ ࡂࡉࡍࡆࡉࡇ ࡀࡌࡀࡓࡅࡋࡉࡀ ࡗ ࡌࡉࡑࡈࡀࡓࡀࡓ ࡏࡅࡋࡀ ࡀࡁࡊࡀࡍࡐࡇ ࡖࡌࡀࡍࡅ ࡌࡉࡑࡈࡀࡓࡀࡓ ࡗ ࡄࡀࡅࡉࡀ ࡏࡋ ࡏࡌࡇ ࡀࡁࡓࡉࡄࡀ ࡖࡌࡀࡍࡅ ࡌࡀࡓࡄࡀ ࡏࡋ ࡀࡓࡎࡀࡉࡅࡍ ࡖࡁࡀࡈࡉࡍࡀࡕࡀ ࡌࡀࡍࡅ ࡌࡍ ࡋࡉࡋࡉࡀࡕࡀ ࡔࡓࡏࡉࡀ ࡀࡌࡀࡓࡅࡋࡉࡀ ࡌࡀࡍ ࡄࡅࡀ ࡍࡀࡈࡀࡓ ࡁࡀࡉࡕࡀ ࡀࡋࡌࡀ ࡋࡊࡉࡌࡑࡀࡕ ࡀࡋࡌࡉࡀ ࡌࡀࡋࡉࡋ ࡐࡕࡀࡄࡉࡋ ࡖࡍࡉࡌࡀࡓࡋࡇ ࡀࡍࡀ ࡏࡌࡀࡓࡋࡀࡊ ࡊࡅࡔࡈࡀ ࡅࡀࡍࡀ ࡏࡉࡀࡐࡓࡉࡔࡀࡊ ࡗ ࡖࡄࡅࡀࡕ ࡀࡓࡒࡀ ࡀࡕࡓࡉࡎࡀࡓ ࡀࡋࡐࡉࡀ ࡐࡀࡓࡎࡉࡀ ࡄࡀࡅࡉࡀ ࡎࡅࡌࡊࡇ ࡅࡌࡍ ࡀࡓࡒࡀ ࡀࡋࡒࡅࡌࡁࡀ ࡖ ࡓࡒࡉࡄࡀ ࡕࡓࡉࡎࡀࡓ ࡀࡋࡐࡉࡀ ࡐࡀࡓࡎࡉࡀ ࡄࡀࡅࡉࡀ ࡓࡀࡅࡌࡀ ࡅࡀࡃࡀࡌ ࡌࡍ ࡈࡉࡍࡀ ࡄࡅࡀ ࡄࡀࡅࡀ ࡆࡀࡅࡇ ࡌࡍ ࡊࡀࡍࡀ ࡖࡍࡀࡐࡔࡉࡇ ࡀࡄࡅࡀࡕ ࡄࡀࡆࡉࡍ ࡌࡉࡔࡀ ࡁࡓ ࡔࡅࡔࡌࡀ ࡄࡉࡅࡀࡓࡀ ࡌࡍ ࡀࡔࡊࡉࡍࡕࡇ ࡖࡉࡅࡎࡌࡉࡓ ࡆࡉࡅࡀ ࡀࡕࡀ ࡄࡀࡋࡉࡍ ࡄࡉࡍࡅࡍ ࡌࡉࡀ ࡄࡉࡉࡀ ࡌࡍ ࡄࡅࡎ ࡉࡀࡓࡃࡍࡀ ࡀࡕࡉࡍ ࡅࡏࡋ ࡀࡕࡅࡕࡇ ࡖࡉࡅࡎࡌࡉࡓ ࡂࡅࡐࡍࡀ ࡕࡓࡉࡎࡀࡓ ࡀࡋࡐࡉࡀ ࡏࡅࡕࡓࡉࡀ ࡏࡌࡓࡀ ࡅࡊࡅࡔࡈࡀ ࡌࡀࡍ ࡂࡀࡋࡉࡋࡇ ࡁࡀࡋࡌࡀ ࡀࡋࡍࡉࡄࡅࡕࡀ ࡌࡀࡍ ࡀࡕࡉࡀ ࡅࡌࡀࡓࡂࡅࡔ ࡁࡏࡌࡓࡅࡌࡀ ࡌࡀࡍ ࡀࡁࡀࡃ ࡌࡀࡍ ࡏࡐࡊࡇ ࡏࡋ ࡃࡉࡍࡀ ࡓࡁࡀ ࡅࡒࡓࡀࡁࡀ ࡌࡀࡍ ࡓࡌࡀࡁࡇ ࡁࡀࡋࡌࡀ ࡌࡀࡍ ࡀࡄࡓࡉࡁ ࡏࡁࡉࡃࡀࡕࡀ ࡅࡓࡀࡆࡀ ࡖࡍࡄࡅࡓࡀ ࡌࡀࡍ ࡂࡋࡀ ࡌࡀࡍ ࡔࡀࡂࡉࡔ ࡀࡔࡊࡉࡍࡀࡕࡀ ࡅࡌࡀࡍ ࡏࡌࡓࡇ ࡏࡋ ࡌࡉࡍࡉࡋࡕࡀ ࡗ ࡖࡋࡀࡄࡅࡀࡕ ࡌࡀࡍ ࡀࡕࡉࡇ ࡋࡆࡀࡉࡍࡀ ࡓࡁࡀ ࡅࡒࡓࡀࡁࡀ ࡀࡓࡌࡀࡁࡇ ࡁࡀࡋࡌࡀ ࡌࡀࡍ ࡋࡉࡂࡈࡇ ࡋࡕࡅࡔࡁࡉࡄࡕࡀ ࡅࡐࡀࡋࡂࡇ ࡅࡓࡉࡌࡉࡇ ࡁࡀࡕࡀࡓ ࡀࡕࡀࡓ ࡌࡀࡍ ࡒࡓࡀࡁࡇ ࡁࡕࡅࡔࡁࡉࡄࡕࡀ ࡅࡒࡉࡓࡉࡇ ࡋࡒࡀࡋࡀ ࡖࡄࡉࡉࡀ ࡌࡍ ࡓࡉࡔ ࡁࡓࡉࡔ ࡗ ࡄࡀࡆࡀ ࡀࡌࡀࡓ ࡊࡅࡔࡈࡀ ࡉࡅࡊࡀࡔࡀࡓ ࡁࡓ ࡏࡕࡀࡐࡓࡀࡔ ࡌࡍ ࡏࡅࡑࡓࡇ ࡅࡀࡌࡀࡓ ࡀࡍࡀ ࡏࡌࡀࡓࡋࡀࡊ ࡊࡅࡔࡈࡀ ࡅࡀࡍࡀ ࡏࡉࡀࡐࡓࡉࡔࡀࡊ ࡗ ࡖࡀࡄࡅࡀࡕ ࡉࡅࡔࡀࡌࡉࡍ ࡂࡋࡀ ࡓࡀࡆࡀ ࡖࡓࡁࡉࡀ ࡅࡕࡉࡂࡓࡀ ࡁࡍࡄࡅࡓࡀ ࡓࡌࡀ ࡄࡉࡁࡉࡋ ࡀࡍࡃࡉࡍࡉࡍ ࡋࡔࡊࡉࡍࡀࡕࡀ ࡅࡂࡅࡄࡀ ࡁࡎࡉࡍࡉࡀࡅࡉࡎ ࡂࡍࡀ ࡂࡅࡄࡀ ࡂࡍࡀ ࡁࡎࡉࡍࡉࡀࡅࡉࡎ ࡅࡓࡀࡆࡀ ࡖࡄࡔࡅࡊࡀ ࡂࡋࡀ ࡏࡅࡓ ࡁࡌࡉࡍࡉࡋࡀࡕ ࡄࡉࡉࡀ ࡏࡎࡕࡀࡓ ࡁࡏࡎࡅࡓࡀ ࡖࡎࡀࡊࡀ ࡋࡉࡕࡋࡇ ࡉࡅࡔࡀࡌࡉࡍ ࡏࡕࡀࡔࡐࡀࡋ ࡀࡌࡉࡍࡈࡅࡋ ࡖࡁࡀ ࡌࡉࡁࡀࡃ ࡒࡓࡀࡁࡀ ࡅࡌࡉࡓࡌࡉࡀ ࡕࡉࡂࡓࡀ ࡁࡉࡕ ࡓࡅࡓࡁࡉࡀ ࡄࡀࡔࡉࡁ ࡁࡉࡔࡅࡕࡀ ࡅࡏࡎࡕࡀࡓ ࡁࡏࡎࡅࡓࡀ ࡖࡋࡀࡋࡀࡌ ࡏࡕࡉࡁ ࡉࡅࡔࡀࡌࡉࡍ ࡀࡔࡐࡋࡇ ࡐࡅࡌࡇ ࡀࡌࡉࡍࡈࡅࡋ ࡖࡋࡀࡅ ࡏࡎࡃࡉࡓࡀ ࡄࡅࡀ ࡋࡀࡓࡍࡀ ࡅࡋࡀࡏࡕࡌࡀࡊࡀࡊ ࡀࡊࡅࡀࡕ ࡏࡅࡕࡓࡉࡀ ࡋࡀࡏࡕࡉࡒࡓࡉࡀ ࡀࡁࡀࡕࡅࡓ ࡔࡀࡅࡉࡅࡉࡀ ࡃࡀࡉࡀࡍࡀ ࡀࡌࡉࡍࡈࡅࡋ ࡖࡄࡉࡁࡉࡋ ࡆࡉࡅࡀ ࡀࡔࡐࡋࡇ ࡄࡆࡀ ࡁࡓࡇ ࡁࡌࡉࡀ ࡎࡉࡀࡅࡉࡀ ࡄࡅ ࡁࡔࡊࡉࡍࡕࡇ ࡒࡉࡓࡉࡉࡇ ࡅࡀࡌࡀࡓ ࡀࡍࡀ ࡁࡓ ࡌࡀࡋࡊࡉࡀ ࡕࡅࡌ ࡁࡓ ࡌࡀࡋࡊࡉࡀ ࡏࡕࡉࡒࡓࡉࡀ ࡅࡀࡌࡀࡓ ࡏࡎࡒࡕࡀ ࡕࡀࡓࡉࡑࡍࡀ ࡁࡔࡊࡉࡍࡕࡀࡉ ࡄࡀࡉࡋࡀࡉ ࡄࡀࡅࡉࡀ ࡋࡄࡀࡃ ࡕࡓࡉࡍ ࡒࡉࡓࡉࡉࡇ ࡋࡐࡕࡀࡄࡉࡋ ࡀࡁࡓࡇ ࡅࡀࡎࡒࡇ ࡁࡔࡊࡉࡍࡕࡇ ࡀࡅࡕࡁࡇ ࡀࡁࡀࡕࡅࡓ ࡀࡎࡊࡉࡋ ࡁࡀࡁࡀࡄࡀࡕࡇ ࡅࡁࡀࡁࡉࡕ ࡔࡀࡐࡋࡀ ࡅࡌࡀࡔࡐࡀࡋ ࡌࡍ ࡊࡅࡓࡎࡉࡉࡇ ࡅࡀࡆࡀࡋ ࡌࡅࡆࡀࡍࡉࡀ ࡄࡅࡀ ࡁࡀࡊࡉࡀ ࡅࡀࡋࡉࡀ ࡀࡁࡀࡕࡅࡓ ࡅࡎࡀࡋࡉࡒ ࡅࡌࡀࡈࡉࡀ ࡌࡓࡅࡌࡀ ࡖࡀࡁࡀࡃ ࡈࡀࡁ ࡌࡀࡔࡊࡀ ࡖࡎࡍࡉࡀ ࡈࡀࡁࡉࡃ ࡁࡉࡔ ࡌࡀࡔࡊࡀ ࡈࡀࡁ ࡏࡌࡓࡉࡕ ࡖࡏࡄࡅࡉࡀ ࡓࡁࡀ ࡆࡅࡈࡀ ࡁࡕࡉࡁࡉࡋ ࡌࡀࡍ ࡔࡀࡅࡉࡀࡍ ࡏࡌࡓࡉࡕ ࡖࡏࡄࡅࡉࡀ ࡌࡀࡋࡊࡀ ࡁࡃࡍࡀࡁ ࡀࡋࡌࡉࡀ ࡌࡀࡍ ࡏࡅࡕࡁࡀࡍ ࡏࡌࡓࡉࡕ ࡖࡏࡄࡅࡉࡀ ࡏࡐࡓࡉࡔࡀࡉࡀ ࡅࡌࡅࡆࡀࡍࡉࡀ ࡏࡋ ࡏࡃࡀࡉ ࡌࡀࡍ ࡓࡌࡀ ࡗ ࡍࡉࡄࡀ ࡀࡄࡅࡉࡕ ࡅࡌࡊࡉࡊࡀ ࡀࡋࡌࡀ ࡖࡌࡓࡉࡃࡀ ࡒࡓࡅࡍ ࡋࡓࡅࡄࡀ ࡏࡌࡓࡀ ࡌࡀࡍࡃࡀ ࡖࡄࡉࡉࡀ ࡅࡕࡉࡂࡓࡀ ࡁࡉࡕ ࡄࡉࡉࡀ ࡓࡌࡀ ࡋࡊࡅࡔࡈࡀ ࡂࡀࡋࡉࡋࡇ ࡂࡅࡁࡓࡀࡍ ࡅࡀࡍࡃࡉࡍࡅࡍ ࡏࡋ ࡉࡀࡓࡃࡍࡉࡀ ࡊࡅࡋࡄࡅࡍ ࡍࡉࡄࡅࡕࡀ ࡀࡕࡉࡀ ࡉࡅࡊࡀࡁࡀࡓ ࡅࡌࡀࡓࡂࡅࡔ ࡉࡅࡔࡀࡌࡉࡍ ࡕࡉࡂࡓࡀ ࡓࡌࡀࡁࡇ ࡁࡀࡋࡌࡀ ࡐࡕࡀࡄࡉࡋ ࡀࡄࡓࡉࡁ ࡏࡁࡉࡃࡀࡕࡀ ࡅࡀࡍࡀࡍ ࡓࡀࡆࡀ ࡖࡍࡄࡅࡓࡀ ࡂࡋࡀ ࡏࡕࡉࡍࡑࡉࡁ ࡔࡀࡂࡉࡔ ࡔࡊࡉࡍࡀࡕࡀ ࡁࡉࡄࡓࡀࡌ ࡏࡌࡓࡇ ࡋࡌࡉࡍࡉࡋࡕࡀ ࡗ ࡖࡋࡀࡄࡅࡀࡕ ࡐࡕࡀࡄࡉࡋ ࡀࡕࡉࡉࡇ ࡏࡋ ࡆࡀࡉࡍࡀ ࡓࡁࡀ ࡅࡍࡉࡁࡈࡀ ࡓࡌࡀࡁࡇ ࡒࡓࡀࡁࡀ ࡁࡀࡋࡌࡀ ࡄࡉࡁࡉࡋ ࡏࡅࡕࡓࡀ ࡋࡉࡂࡈࡇ ࡋࡕࡅࡔࡁࡉࡄࡕࡀ ࡅࡐࡀࡋࡂࡇ ࡅࡓࡉࡌࡉࡇ ࡁࡀࡕࡀࡓ ࡀࡕࡀࡓ ࡄࡀࡆࡉࡍ ࡏࡕࡉࡍࡑࡉࡁ ࡋࡒࡀࡋࡀ ࡁࡏࡌࡓࡅࡌࡀ ࡒࡓࡀ ࡅࡒࡀࡋࡀ ࡎࡋࡉࡒ ࡅࡄࡉࡉࡀ ࡆࡀࡊࡉࡍ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡆࡉࡅࡀ ࡁࡍࡐࡉࡔ ࡀࡕࡀࡋࡉࡀ ࡅࡍࡄࡅࡓࡀ ࡖࡉࡀࡕࡉࡓ ࡁࡀࡋࡌࡉࡀ ࡄࡀࡔࡀࡁࡕࡀ ࡀࡄࡅࡀࡕ ࡒࡀࡃࡌࡀࡉࡕࡀ ࡖࡏࡅࡕࡓࡉࡀ ࡒࡀࡉࡌࡉࡀ ࡅࡌࡉࡔࡕࡀࡉࡉࡍ ࡏࡋࡀࡉ ࡂࡀࡁࡓࡀ ࡖࡀࡔࡐࡋࡀࡍ ࡌࡍ ࡃࡅࡊࡕࡀࡉ ࡄࡀࡆࡉࡍ ࡋࡀࡓࡒࡀ ࡐࡀࡉࡎࡀࡕࡋࡅࡍ ࡋࡀࡕࡉࡁࡀࡈࡋࡇ ࡋࡁࡉࡍࡕࡀ ࡖ ࡏࡅࡕࡓࡉࡀ ࡅࡋࡀࡕࡉࡔࡀࡌࡀࡓ ࡀࡍࡀࡍࡉࡀ ࡌࡍ ࡃࡅࡊࡕࡀࡉࡄࡅࡍ ࡋࡀ ࡕࡉࡒࡓࡇ ࡋࡁࡅࡍࡊࡀ ࡓࡁࡀ ࡀࡌࡉࡍࡈࡅࡋ ࡖࡌࡍ ࡉࡀࡌࡉࡍࡀࡊ ࡄࡅࡀ ࡋࡀࡕࡉࡓࡌࡉࡀ ࡌࡔࡀࡂࡔࡉࡀ ࡁࡉࡀࡓࡃࡍࡀ ࡖࡏࡍࡉࡔ ࡁࡄࡀࡉࡋࡇ ࡋࡀࡌࡑࡉࡀ ࡋࡀࡕࡉࡒࡓࡇ ࡋࡃࡀࡅࡓࡀ ࡖࡁࡍࡀࡉࡕࡇ ࡉࡅࡌࡀ ࡖࡓࡀࡌࡉࡋࡀࡊ ࡕࡉࡂࡓࡀ ࡁࡍࡀࡊ ࡏࡕࡉࡍࡑࡉࡁ ࡁࡂࡉࡅࡀࡕ ࡏࡒࡀࡓࡀ ࡀࡕࡅࡍ ࡄࡀࡃࡓࡉࡀ ࡁࡔࡊࡉࡍࡀࡕࡀ ࡊࡅࡋࡄࡅࡍ ࡄࡀࡃࡓࡉࡀ ࡅࡁࡀࡉࡉࡍ ࡀࡁࡅࡄࡅࡍ ࡅࡋࡀࡌࡀࡔࡊࡉࡍ ࡒࡀࡉࡌࡉࡀ ࡀࡄࡉࡀ ࡁࡉࡄࡃࡀࡃࡉࡀ ࡅࡌࡍ ࡀࡄࡃࡀࡃࡉࡀ ࡌࡉࡕࡀࡐࡓࡉࡔࡉࡀ ࡁࡉࡔࡉࡀ ࡅࡀࡌࡓࡉࡀ ࡀࡁࡅࡉࡀࡍ ࡍࡐࡀࡒ ࡌࡍ ࡀࡓࡒࡀ ࡖࡀࡉࡀࡓ ࡁࡌࡀࡄࡅ ࡍࡉࡓࡌࡉࡀ ࡏࡋࡇ ࡕࡉࡂࡓࡀ ࡅࡀࡕࡀ ࡎࡀࡌ ࡀࡄࡅࡉࡅࡍ ࡒࡀࡔࡉࡔࡀ ࡅࡌࡉࡕࡀࡐࡓࡀࡔ ࡁࡍࡀࡐࡔࡉࡇ ࡅࡀࡌࡀࡓ ࡏࡅ ࡀࡍࡀ ࡓࡀࡌࡉࡍࡀ ࡋࡕࡉࡂࡓࡀ ࡓࡁࡀ ࡀࡌࡓࡉࡀ ࡖ ࡒࡀࡔࡉࡔࡀ ࡋࡀࡌࡉࡕࡀࡐࡓࡀࡔ ࡄࡅ ࡄࡉࡍࡏࡋࡀ ࡀࡍࡀࡕࡅࡍ ࡓࡅࡌࡉࡋࡉࡀ ࡏࡋ ࡕࡉࡂࡓࡀ ࡓࡁࡀ ࡀࡊࡀࡍࡃࡉࡕ ࡏࡅࡕࡓࡉࡀ ࡌࡉࡀࡍࡒࡉࡀ ࡀࡍࡀࡕࡅࡍ ࡏࡅ ࡀࡁࡃࡉࡕࡅࡍ ࡆࡀࡊࡉࡕࡅࡍ ࡀࡌࡓࡉࡀ ࡏࡅࡕࡓࡉࡀ ࡌࡉࡀࡍࡒࡉࡀ ࡄࡅࡍ ࡅࡎࡊࡅࡋࡕࡀࡉࡊࡅࡍ ࡁࡏࡌࡓࡅࡌ ࡋࡀࡋࡀࡂࡈࡉࡀ ࡀࡕࡅࡍ ࡓࡅࡌࡉࡅࡉࡀ ࡋࡕࡉࡂࡓࡀ ࡓࡁࡀ ࡅࡀࡄࡓࡉࡁࡉࡅࡍ ࡏࡁࡉࡃࡀࡕࡀ ࡖࡌࡕࡀࡒࡍࡀ ࡒࡅࡌ ࡀࡁࡅࡃ ࡆࡀࡉࡍࡀ ࡓࡁࡀ ࡅࡒࡓࡀࡁࡀ ࡖࡎࡀࡊࡀ ࡋࡉࡕࡋࡇ ࡓࡌࡅ ࡄࡉࡓࡁࡀ ࡅࡃࡓࡅ ࡓࡅࡂࡆࡀ ࡅࡂࡉࡓࡉࡀ ࡔࡌࡉࡌࡉࡀ ࡖࡋࡀࡁࡀࡈࡋࡉࡀ ࡃࡓࡅ ࡅࡍࡄࡅࡕ ࡋࡀࡓࡒࡀ ࡖࡀࡉࡀࡓ ࡋࡔࡊࡉࡍࡀࡕࡀ ࡖࡀࡁࡅࡊࡅࡍ ࡄࡀࡆࡉࡍ ࡖࡐࡀࡎ ࡀࡓࡒࡇ ࡅࡊࡅࡓࡎࡉࡀ ࡋࡉࡊࡀ ࡖࡉࡀࡕࡉࡁ ࡏࡋࡇ ࡀࡌࡀࡓࡋࡇ ࡋࡍࡁࡀࡈ ࡓࡁࡀ ࡀࡁࡓࡇ ࡖࡉࡅࡔࡀࡌࡉࡍ ࡀࡕࡀ ࡌࡀࡋࡊࡀ ࡖࡀࡉࡀࡓ ࡍࡉࡋࡉࡂࡈࡇ ࡎࡉࡐࡉࡀ ࡖࡌࡔࡀࡋࡐࡉࡀ ࡏࡋ ࡍࡁࡀࡈ ࡌࡀࡋࡊࡀ ࡖࡀࡉࡀࡓ ࡅࡍࡉࡌࡀࡓࡋࡇ ࡌࡀࡍ ࡏࡎࡓࡇ ࡀࡒࡀࡌࡀࡊ ࡋࡉࡅࡔࡀࡌࡉࡍ ࡋࡌࡉࡓࡌࡉࡀ ࡌࡉࡍࡇ ࡕࡉࡂࡓࡀ ࡌࡀࡋࡉࡋ ࡌࡀࡋࡊࡀ ࡖ-ࡀࡉࡀࡓ ࡋࡏࡕࡉࡍࡑࡉࡁ ࡆࡉࡅࡀ ࡖࡍࡉࡌࡀࡓࡋࡇ ࡌࡀࡋࡊࡀ ࡐࡀࡒࡉࡃ ࡅࡌࡀࡋࡊࡀ ࡏࡎࡓࡇ ࡋࡉࡅࡔࡀࡌࡉࡍ ࡌࡀࡍ ࡌࡍ ࡌࡀࡋࡊࡉࡀ ࡓࡀࡌࡉࡀ ࡕࡉࡂࡓࡀ ࡏࡕࡉࡍࡑࡉࡁ ࡆࡉࡅࡀ ࡐࡕࡀ ࡐࡅࡌࡇ ࡅࡓࡂࡀࡆ ࡋࡍࡁࡀࡈ ࡓࡁࡀ ࡒࡓࡀ ࡅࡀࡌࡀࡓࡋࡇ ࡋࡍࡁࡀࡈ ࡓࡁࡀ ࡋࡀࡔࡉࡄࡉࡕ ࡅࡋࡀࡔࡉࡄࡀ ࡒࡉࡍࡀ ࡖࡌࡉࡍࡇ ࡀࡄࡅࡉࡕ ࡀࡁࡅࡊ ࡋࡀࡅ ࡏࡅࡕࡓࡀ ࡀࡆࡓࡉࡆࡀ ࡄࡅ ࡌࡀࡋࡉࡋ ࡍࡁࡀࡈ ࡓࡁࡀ ࡋࡏࡕࡉࡍࡑࡉࡁ ࡆࡉࡅࡀ ࡖ ࡍࡉࡌࡀࡓࡋࡇ ࡋࡉࡈࡉࡕ ࡅࡋࡉࡈࡀ ࡒࡉࡍࡀ ࡖࡀࡁࡅࡊ ࡔࡀࡓࡉࡀ ࡕࡉࡂࡓࡀ ࡄࡅࡀ ࡋࡀࡔࡉࡄࡉࡕ ࡋࡁࡉࡕ ࡄࡉࡉࡀ ࡓࡁࡉࡀ ࡖࡌࡍ ࡌࡀࡋࡊࡀ ࡓࡀࡌࡉࡕ ࡕࡉࡂࡓࡀ ࡏࡕࡉࡍࡑࡉࡁ ࡆࡉࡅࡀ ࡎࡉࡐࡀ ࡔࡋࡀࡐ ࡅࡏࡋ ࡍࡁࡀࡈ ࡓࡁࡀ ࡌࡀࡋࡊࡀ ࡖࡀࡉࡀࡓ ࡍࡐࡀࡋ ࡄࡀࡃ ࡆࡉࡁࡍࡀ ࡌࡄࡀ ࡏࡕࡉࡍࡑࡉࡁ ࡆࡉࡅࡀ ࡅࡎࡉࡐࡀ ࡁࡆࡉࡅࡇ ࡋࡀࡐࡎࡀࡒ ࡀࡕࡓࡉࡍ ࡆࡉࡁࡍࡉࡀ ࡌࡄࡀ ࡏࡕࡉࡍࡑࡉࡁ ࡆࡉࡅࡀ ࡅࡎࡉࡐࡀ ࡁࡆࡉࡅࡇ ࡋࡀࡐࡎࡀࡒ ࡕࡋࡀࡕࡀ ࡆࡉࡁࡍࡉࡀ ࡌࡄࡀ ࡏࡕࡉࡍࡑࡉࡁ ࡆࡉࡅࡀ ࡅࡎࡉࡐࡀ ࡁࡆࡉࡅࡇ ࡋࡀࡐࡎࡀࡒ ࡌࡀࡋࡉࡋ ࡍࡁࡀࡈ ࡓࡁࡀ ࡅࡋࡏࡕࡉࡍࡑࡉࡁ ࡆࡉࡅࡀ ࡖࡍࡉࡌࡀࡓࡋࡇ ࡉࡀ ࡁࡓ ࡂࡀࡁࡓࡀ ࡁࡄࡉࡕࡀ ࡋࡀࡌࡍ ࡃࡉࡋࡀࡊ ࡄࡀࡉࡒࡀ ࡃࡌࡅࡕࡀࡉ ࡗ ࡄࡀࡆࡉࡍ ࡀࡌࡀࡓ ࡍࡁࡀࡈࡓࡁࡀ ࡎࡓࡉࡍ ࡅࡄࡃࡀ ࡁࡍࡇ ࡖ ࡉࡅࡔࡀࡌࡉࡍ ࡎࡉࡐࡀ ࡔࡋࡀࡐ ࡒࡀࡔࡉࡔࡀ ࡋࡁࡀࡔ ࡆࡀࡉࡍࡀ ࡅࡆࡅࡈࡀ ࡒࡓࡀࡁࡀ ࡏࡕࡋࡀࡁࡀࡔ ࡅࡀࡁࡂࡀࡍ ࡄࡉࡉࡀ ࡒࡀࡓࡉࡍ ࡅࡆࡀࡉࡍࡀ ࡏࡋ ࡀࡄࡃࡀࡃࡉࡀ ࡁࡀࡃࡒࡉࡍ ࡒࡀࡋ ࡆࡀࡉࡍࡀࡉࡅࡍ ࡅࡒࡀࡋ ࡒࡓࡀࡁࡀࡉࡅࡍ ࡒࡀࡋࡀࡉࡄࡅࡍ ࡋࡅࡀࡕ ࡌࡀࡋࡊࡀ ࡓࡁࡀ ࡖࡍࡄࡅࡓࡀ ࡌࡈࡀ ࡅࡀࡌࡀࡓ ࡊࡌࡀ ࡉࡅࡔࡀࡌࡉࡍ ࡐࡎࡀࡒ ࡅࡌࡁࡀࡈࡉࡋ ࡁࡉࡕ ࡆࡀࡉࡍࡀ ࡌࡀࡍ ࡓࡀࡌࡉࡋࡅࡍ ࡕࡉࡂࡓࡀ ࡋࡏࡅࡕࡓࡉࡀ ࡅࡏࡕࡉࡊࡎࡉࡀ ࡄࡆࡀ ࡂࡅࡁࡓࡀࡍ ࡏࡅࡕࡓࡀ ࡅࡀࡌࡀࡓࡋࡇ ࡏࡋ ࡌࡀࡋࡊࡀ ࡖࡍࡄࡅࡓࡀ ࡎࡓࡉࡍ ࡅࡄࡃࡀ ࡁࡍࡇ ࡖࡉࡅࡔࡀࡌࡉࡍ ࡄࡉࡍࡅࡍ ࡓࡀࡌࡉࡋࡇ ࡋࡉࡒࡓࡀࡁࡀ ࡓࡁࡀ ࡖࡋࡀࡌࡉࡔࡕࡓࡉࡀ ࡅࡄࡀࡉࡆࡀࡊ ࡌࡀࡋࡊࡀ ࡖࡍࡄࡅࡓࡀ ࡏࡋ ࡂࡅࡁࡓࡀࡍ ࡖࡍࡉࡌࡀࡓࡋࡇ ࡀࡍࡀࡕ ࡀࡋࡁࡅࡔ ࡆࡀࡉࡍࡀ ࡅࡏࡋ ࡐࡀࡓࡀࡄࡉࡏࡉࡋ ࡒࡓࡀࡁࡀ ࡓࡁࡀ ࡏࡕࡉࡁ ࡃࡓࡀ ࡅࡏࡆࡉࡋ ࡋࡀࡓࡒࡀ ࡖࡀࡉࡀࡓ ࡄࡆࡉࡍࡅࡍ ࡋࡁࡍࡇ ࡖࡉࡅࡔࡀࡌࡉࡍ ࡄࡉࡍࡅࡍ ࡅࡄࡀࡉࡆࡀࡊ ࡂࡅࡁࡓࡀࡍ ࡍࡎࡉࡁ ࡆࡀࡉࡍࡀ ࡓࡁࡀ ࡅࡏࡋ ࡐࡀࡓࡀࡄࡉࡏࡉࡋ ࡒࡓࡀࡁࡀ (>ABD) ࡏࡕࡉࡁ ࡅࡋࡀࡓࡒࡀ ࡖࡀࡉࡀࡓ ࡌࡀࡎࡂࡉࡀ ࡅࡄࡀࡉࡆࡀࡊ ࡂࡅࡁࡓࡀࡍ ࡐࡉࡄࡕࡇ ࡋࡐࡅࡌࡇ ࡅࡏࡋ ࡏࡕࡉࡍࡑࡉࡁ ࡆࡉࡅࡀ ࡖ ࡍࡉࡌࡀࡓࡋࡇ ࡁࡓࡇ ࡖࡉࡅࡔࡀࡌࡉࡍ ࡋࡀࡕࡉࡓࡌࡉࡀ ࡒࡓࡀࡁࡀ ࡁࡉࡕ ࡓࡅࡓࡁࡉࡀ ࡅࡏࡆࡉࡋ ࡕࡉࡀࡁࡅࡕࡀ ࡏࡋ ࡀࡁࡅࡊ ࡁࡓ ࡏࡅ ࡌࡉࡁࡉࡋࡀࡊ ࡊࡌࡀ ࡔࡀࡐࡉࡓ ࡏࡅ ࡋࡀࡌࡉࡁࡉࡋࡀࡊ ࡀࡁࡃࡀ ࡀࡒࡀࡌࡇ ࡖࡌࡀࡋࡊࡀ ࡄࡅࡉࡀ ࡏࡕࡉࡍࡑࡉࡁ ࡆࡉࡅࡀ ࡌࡍ ࡁࡓࡇ ࡒࡀࡔࡉࡔࡀ ࡀࡁࡅࡊ ࡀࡌࡀࡓࡋࡇ ࡅࡋࡀࡏࡔࡕࡌࡀ ࡄࡆࡉࡀ ࡊࡌࡀ ࡔࡀࡍࡀࡉ ࡊࡀࡍࡆࡀࡋࡀ ࡖࡏࡄࡀࡁࡋࡉࡀ ࡀࡓࡒࡀ ࡁࡌࡉࡍࡉࡋࡀࡕ ࡌࡀࡋࡊࡀ ࡐࡀࡉࡎࡉࡕ ࡄࡀࡔࡕࡀ ࡏࡅ ࡀࡍࡀࡕ ࡕࡉࡂࡓࡀ ࡓࡀࡌࡉࡀࡕࡋࡅࡍ ࡋࡀࡋࡌࡉࡀ ࡖࡍࡄࡅࡓࡀ ࡅࡌࡔࡀࡓࡄࡉࡆࡀࡕࡋࡅࡍ ࡅࡄࡀࡉࡆࡀࡊ ࡂࡉࡓࡀ ࡔࡓࡀ ࡏࡕࡉࡍࡑࡉࡁ ࡆࡉࡅࡀ ࡂࡅࡁࡓࡀࡍ ࡁࡉࡀࡌࡉࡍࡇ ࡒࡀࡁࡋࡇ ࡕࡓࡉࡍ ࡂࡉࡓࡉࡀ ࡔࡓࡀ ࡏࡕࡉࡍࡑࡉࡁ ࡆࡉࡅࡀ ࡂࡅࡁࡓࡀࡍ ࡁࡉࡀࡌࡉࡍࡇ ࡒࡀࡁࡋࡇ ࡕࡋࡀࡕࡀ ࡂࡉࡓࡉࡀ ࡔࡓࡀ ࡏࡕࡉࡍࡑࡉࡁ ࡆࡉࡅࡀ ࡂࡅࡁࡓࡀࡍ ࡁࡉࡀࡌࡉࡍࡇ ࡒࡀࡁࡋࡇ ࡂࡉࡓࡀ ࡀࡓࡁࡉࡀࡉࡀ ࡁࡏࡃࡇ ࡖࡐࡀࡓࡄࡏࡉࡋ ࡏࡕࡉࡁ ࡒࡃࡀ ࡁࡒࡉࡃࡉࡄࡕࡇ ࡅࡒࡉࡃࡉࡄࡕࡇ ࡀࡋࡅࡀࡕ ࡌࡀࡋࡊࡀ ࡖࡍࡄࡅࡓࡀ ࡌࡈࡀࡕ ࡅࡄࡀࡉࡆࡀࡊ ࡌࡀࡋࡊࡀ ࡖࡍࡄࡅࡓࡀ ࡐࡕࡀ ࡐࡅࡌࡇ ࡁࡆࡉࡅࡀ ࡅࡍࡄࡅࡓࡀ ࡖࡎࡀࡊࡀ ࡋࡉࡕࡋࡇ ࡓࡌࡀ ࡒࡀࡋࡀ ࡁࡀࡓࡁࡉࡌࡀ ࡅࡀࡓࡁࡉࡍ ࡅࡀࡓࡁࡀ ࡀࡋࡐࡉࡀ ࡏࡅࡕࡓࡉࡀ ࡖࡋࡄࡉࡋ ࡒࡀࡉࡌࡉࡀ ࡅࡒࡀࡓࡉࡋࡅࡍ ࡅࡀࡌࡀࡓࡋࡅࡍ ࡀࡋࡁࡅࡔ ࡆࡀࡉࡍࡀࡉࡊࡅࡍ ࡅࡃࡓࡅࡍ ࡒࡓࡀࡁࡀࡉࡊࡅࡍ ࡅࡏࡋ ࡏࡅࡔࡍࡀࡉࡊࡅࡍ ࡏࡕࡉࡁ ࡅࡎࡉࡐࡀ ࡃࡓࡅࡍ ࡅࡂࡉࡓࡉࡀ ࡔࡌࡉࡌࡉࡀ ࡁࡕࡅࡒࡐࡀ ࡅࡄࡉࡓࡁࡀ ࡁࡓࡅࡂࡆࡀ ࡃࡓࡅࡍ ࡅࡏࡋ ࡏࡅࡔࡍࡀࡉࡊࡅࡍ ࡏࡕࡉࡁ ࡒࡀࡓࡉࡋࡅࡍ ࡅࡌࡐࡀࡒࡉࡃࡋࡅࡍ ࡌࡀࡋࡊࡀ ࡖࡍࡄࡅࡓࡀ ࡁࡆࡉࡅࡀ ࡅࡍࡄࡅࡓࡀ ࡖࡁࡅࡈࡋࡀࡍࡀ ࡋࡉࡕࡋࡇ ࡅࡀࡌࡀࡓࡋࡅࡍ ࡗ ࡌࡀࡈࡉࡕࡅࡍ ࡀࡓࡒࡀ ࡖࡀࡉࡀࡓ ࡓࡉࡔࡀ ࡖ ࡏࡕࡉࡍࡑࡉࡁ ࡆࡉࡅࡀ ࡖࡁࡊࡀࡍࡐࡇ ࡖࡁࡉࡄࡓࡀࡕ ࡀࡍࡀࡍࡀ ࡏࡌࡇ ࡀࡌࡈࡅࡉࡀ ࡀࡁࡅࡃ ࡒࡓࡀࡁࡀ ࡁࡂࡀࡅࡀࡉࡄࡅࡍ ࡅࡍࡉࡌࡓࡅࡍ ࡏࡅࡕࡓࡉࡀ ࡌࡔࡀࡃࡓࡉࡀ ࡄࡅࡍ ࡅࡄࡀࡉࡆࡀࡊ ࡀࡓࡁࡉࡌࡀ ࡅࡀࡓࡁࡉࡍ ࡅࡀࡓࡁࡀ ࡀࡋࡐࡉࡀ ࡏࡅࡕࡓࡉࡀ ࡋࡀࡓࡒࡀ ࡖࡀࡉࡀࡓ ࡔࡀࡐࡋࡉࡀ ࡌࡍ ࡓࡉࡔ ࡀࡓࡒࡀ ࡖࡀࡉࡀࡓ ࡊࡉࡌࡑࡀ ࡌࡀࡍࡀ ࡔࡊࡉࡍࡕࡀ ࡖࡉࡅࡔࡀࡌࡉࡍ ࡌࡈࡅࡍ ࡏࡅࡕࡓࡉࡀ ࡁࡆࡀࡉࡍࡀ ࡓࡀࡌࡀ ࡋࡀࡓࡒࡀ ࡖࡀࡉࡀࡓ ࡔࡀࡐࡋࡉࡀ ࡗ ࡄࡉࡓࡁࡀ ࡁࡓࡅࡂࡆࡀ ࡃࡓࡉࡀ ࡅࡂࡉࡓࡉࡀ ࡔࡌࡉࡌࡉࡀ ࡁࡕࡅࡒࡐࡀ ࡅࡄࡀࡉࡆࡀࡊ ࡉࡀࡅࡀࡓ ࡆࡉࡅࡀ ࡕࡓࡉࡎࡀࡓ ࡁࡍࡇ ࡖࡉࡅࡔࡀࡌࡉࡍ ࡁࡄࡉࡓࡁࡀ ࡍࡊࡀࡎࡉࡍࡅࡍ ࡁࡉࡄࡓࡀࡌ ࡄࡀࡊࡉࡌࡀ ࡏࡕࡁࡅࡍ ࡕࡔࡀ ࡁࡍࡇ ࡖࡉࡅࡔࡀࡌࡉࡍ ࡁࡎࡉࡐࡀ ࡍࡎࡀࡁ ࡉࡅࡊࡀࡁࡀࡓ ࡀࡄࡅࡉࡀ ࡁࡓࡇ ࡉࡀࡒࡉࡓࡀ ࡖࡉࡅࡔࡀࡌࡉࡍ ࡁࡒࡉࡃࡉࡄࡕࡇ ࡒࡃࡀ ࡀࡋࡅࡀࡕ ࡉࡅࡔࡀࡌࡉࡍ ࡀࡁࡅࡉࡀ ࡒࡃࡀ ࡅࡀࡆࡋࡀࡕ ࡒࡉࡃࡉࡄࡕࡇ ࡋࡅࡀࡕ ࡉࡅࡔࡀࡌࡉࡍ ࡀࡁࡅࡉࡀ ࡌࡈࡀࡕ ࡅࡀࡌࡀࡓ ࡉࡅࡔࡀࡌࡉࡍ ࡋࡁࡓࡀࡉ ࡌࡀࡍ ࡂࡉࡈࡋࡇ ࡅࡋࡄࡀࡁࡉࡁࡀࡉ ࡌࡀࡍ ࡎࡀࡊࡓࡇ ࡁࡒࡃࡉࡄࡕࡀ ࡖࡒࡃࡀ ࡉࡅࡔࡀࡌࡉࡍ ࡀࡎࡀࡓࡉࡀ ࡌࡍ ࡏࡃࡇ ࡅࡋࡉࡂࡓࡇ ࡔࡒࡀࡋ ࡏࡕࡐࡀࡎࡀࡒ ࡀࡎࡀࡓࡉࡀ ࡅࡔࡅࡔࡋࡀࡕࡀ ࡖࡌࡀࡋࡊࡀ ࡖࡍࡄࡅࡓࡀ ࡐࡀࡒࡉࡃ ࡏࡋࡇ ࡅࡒࡀࡌࡁࡇ ࡁࡕࡉࡂࡓࡀ ࡓࡁࡀ ࡅࡃࡉࡊࡓࡇ ࡋࡒࡉࡍࡀ ࡓࡁࡀ ࡖࡁࡋࡉࡁࡇ ࡄࡅࡀ ࡌࡍ ࡁࡀࡁࡀ ࡖࡎࡅࡐࡀࡕ ࡅࡀࡋࡌࡀ ࡋࡀࡓࡒࡀ ࡖࡀࡉࡀࡓ ࡊࡅࡋࡄࡅࡍ ࡔࡊࡉࡍࡀࡕࡀ ࡖࡌࡈࡀ ࡏࡋࡀࡅࡀࡉࡄࡅࡍ ࡐࡀࡎࡉࡍࡅࡍ ࡗ ࡌࡈࡀ ࡀࡓࡒࡀ ࡖࡀࡉࡀࡓ ࡒࡉࡃࡉࡄࡕࡀ ࡋࡅࡀࡕ ࡀࡍࡀࡍࡀ ࡒࡃࡀ ࡏࡅࡕࡓࡉࡀ ࡀࡍࡐࡀࡋ ࡏࡋ ࡀࡍࡐࡀࡉࡄࡅࡍ ࡅࡌࡍ ࡏࡅࡔࡍࡀࡉࡄࡅࡍ ࡁࡏࡌࡓࡅࡌࡀ ࡋࡀࡋࡀࡂࡈࡉࡀ ࡄࡉࡓࡁࡀࡉࡅࡍ ࡀࡍࡐࡀࡋ ࡌࡍ ࡏࡃࡀࡉࡄࡅࡍ ࡅࡂࡉࡓࡀࡉࡅࡍ ࡅࡎࡈࡌࡅࡌࡅࡍ ࡋࡀࡌࡀࡔࡓࡉࡀ ࡏࡕࡐࡀࡎࡀࡒ ࡎࡉࡐࡀࡉࡅࡍ ࡖࡏࡅࡕࡓࡉࡀ ࡅࡏࡕࡐࡀࡎࡀࡒ ࡉࡀࡕࡓࡉࡀ ࡖࡒࡀࡔࡕࡀࡕࡅࡍ ࡅࡎࡕࡀࡄࡀࡐ ࡏࡋ ࡀࡍࡐࡀࡉࡄࡅࡍ ࡍࡐࡀࡋ ࡉࡅࡔࡀࡌࡉࡍ ࡀࡍࡄࡉࡕ ࡌࡍ ࡏࡅࡔࡀࡍࡇ ࡅࡎࡓࡉࡍ ࡅࡀࡓࡁࡀ ࡀࡋࡐࡉࡀ ࡏࡅࡕࡓࡉࡀ ࡍࡎࡉࡁ ࡅࡔࡃࡀ ࡏࡋ ࡖࡒࡀࡉࡌࡉࡀ ࡏࡋ ࡋࡉࡂࡓࡀࡉࡄࡅࡍ ࡅࡄࡀࡉࡆࡀࡊ ࡀࡕࡋࡀࡕࡌࡀ ࡅࡔࡉࡕࡉࡍ ࡀࡓࡒࡀࡄࡀࡕࡀ ࡋࡒࡅࡃࡀࡌ ࡌࡀࡋࡊࡀ ࡓࡁࡀ ࡌࡈࡅࡍ ࡅࡀࡌࡓࡉࡀ ࡐࡎࡉࡒ ࡓࡉࡔࡉࡇ ࡖࡂࡅࡁࡓࡀࡍ ࡖࡏࡋ ࡏࡃࡇ ࡖࡉࡀࡌࡉࡍࡀ ࡖࡌࡀࡋࡊࡀ ࡖࡍࡄࡅࡓࡀ ࡄࡅࡀ ࡍࡀࡉࡃࡉࡀ ࡀࡓࡒࡀࡄࡀࡕࡀ ࡅࡍࡀࡒࡔࡉࡍ ࡈࡅࡓࡉࡀ ࡅࡌࡀࡋࡊࡀ ࡌࡍ ࡊࡅࡓࡎࡉࡇ ࡒࡀࡌ ࡅࡁࡂࡀࡍ ࡄࡉࡉࡀ ࡋࡉࡅࡔࡀࡌࡉࡍ ࡒࡓࡀ ࡔࡉࡒࡋࡇ ࡌࡉࡍࡇ ࡏࡋ ࡆࡉࡅࡀ ࡅࡏࡋ ࡄࡀࡉࡋࡀ ࡓࡁࡀ ࡅࡒࡓࡀࡁࡀ ࡅࡆࡉࡃࡀ ࡖࡄࡅࡀࡁࡇ ࡁࡏࡅࡑࡓࡇ ࡖࡌࡉࡒࡀࡓ ࡓࡉࡔࡀࡉࡄࡅࡍ ࡖࡁࡍࡇ ࡖࡋࡅࡀࡕ ࡀࡍࡀࡍࡀ ࡏࡌࡇ ࡖࡏࡕࡉࡍࡑࡉࡁ ࡆࡉࡅࡀ ࡌࡉࡍࡀࡉࡅࡍ ࡅࡔࡀࡃࡓࡉࡍࡅࡍ ࡋࡕࡔࡉࡌࡀ ࡅࡀࡓࡁࡀ ࡏࡎࡒࡉࡀ ࡖ ࡆࡀࡉࡍࡀ ࡖࡊࡀࡃࡉࡓ ࡌࡍ ࡐࡀࡓࡆࡋࡀ ࡅࡋࡁࡀࡁࡀ ࡖࡎࡅࡐࡀࡕ ࡀࡅࡕࡁࡅࡉࡀ ࡀࡋࡌࡀ ࡖࡕࡌࡀࡍࡀࡉࡀ ࡖࡄࡔࡅࡊࡀ ࡌࡉࡕࡉࡒࡓࡉࡀ ࡀࡋࡌࡀ ࡋࡔࡀࡁࡉࡌࡀ ࡅࡄࡀࡌࡔࡉࡍ ࡔࡍࡉࡀ ࡍࡉࡍࡈࡅࡓࡁࡇ ࡁࡎࡀࡃࡀ ࡓࡁࡀ ࡀࡋࡌࡀ ࡖࡓࡁࡉࡀ ࡑࡀࡁࡉࡍ ࡏࡋࡇ ࡅࡄࡉࡉࡀ ࡆࡀࡊࡏࡉࡍ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡁࡔࡅࡋࡈࡀࡍࡀ ࡖࡍࡀࡐࡔࡀࡉ ࡁࡁࡅࡕࡀ ࡅࡕࡅࡔࡁࡉࡄࡕࡀ ࡖࡍࡀࡐࡔࡀࡉ ࡊࡉࡋࡀ ࡖࡌࡀࡋࡊࡉࡀ ࡀࡁࡃࡉࡕ ࡅࡊࡉࡋࡀ ࡌࡐࡀࡒࡃࡀࡍࡀ ࡊࡉࡋࡀ ࡒࡓࡉࡕ ࡅࡊࡉࡋࡀ ࡀࡌࡀࡓࡋࡉࡀ ࡅࡊࡉࡋࡀ ࡌࡋࡀࡋࡊࡅࡍ ࡄࡉࡓࡁࡀ ࡅࡎࡉࡐࡀ ࡍࡉࡎࡁࡉࡕ ࡀࡋࡌࡀ ࡖࡋࡀࡒࡓࡉࡕ ࡖࡌࡀࡄࡓࡉࡁࡍࡀ ࡅࡔࡊࡉࡍࡀࡕࡀ ࡅࡋࡀࡕࡓࡀࡑ ࡏࡃࡇ ࡔࡂࡀࡔࡕࡉࡍࡅࡍ ࡔࡂࡀࡔࡕࡀ ࡖࡋࡀࡕࡓࡀࡑ ࡋࡒࡀࡋࡀ ࡓࡁࡀ ࡅࡓࡌࡉࡁࡇ ࡁࡏࡌࡓࡅࡌ ࡕࡉࡂࡓࡀ ࡄࡀࡎࡓࡉࡍࡅࡍ ࡏࡋ ࡏࡁࡉࡃࡀࡕࡀ ࡖࡄࡅࡀ ࡌࡕࡀࡒࡍࡀ ࡌࡍ ࡃࡅࡊࡕࡀࡉࡉࡍ ࡒࡓࡀࡁࡀ ࡌࡍ ࡍࡀࡐࡔࡀࡉ ࡌࡀࡋࡉࡋ ࡍࡑࡀࡁ ࡆࡉࡅࡀ ࡋࡉࡅࡔࡀࡌࡉࡍ ࡖࡍࡉࡌࡀࡓࡋࡇ ࡋࡀࡅ ࡀࡌࡀࡓࡉࡋࡀࡊ ࡖࡋࡀࡕࡉࡁࡀࡃ ࡓࡅࡂࡆࡀ ࡅࡋࡀࡕࡉࡓࡌࡉࡀ ࡕࡉࡂࡓࡀ ࡁࡉࡀࡓࡃࡍࡀ ࡋࡀࡊࡕࡉࡁࡋࡀࡊ ࡋࡌࡉࡁࡀࡃ ࡒࡓࡀࡁࡀ ࡄࡅࡉࡕ ࡆࡅࡈࡀ ࡄࡅࡀ ࡄࡀࡊࡉࡌࡉࡕ ࡄࡀࡔࡕࡀ ࡎࡀࡊࡋࡀ ࡒࡓࡅࡊ ࡄࡅࡀࡋࡀࡊ ࡊࡅࡓࡎࡉࡀ ࡁࡓࡉࡔࡀ ࡄࡀࡔࡕࡀ ࡋࡁࡀࡁࡀ ࡖࡎࡅࡐࡀࡕ ࡀࡅࡕࡁࡀࡊ ࡀࡄࡓࡉࡁࡕ ࡏࡁࡉࡃࡀࡕࡀ ࡖࡌࡍ ࡉࡀࡍࡒࡅࡕࡀࡊ ࡀࡁࡀࡃࡕ ࡖࡌࡍ ࡁࡍࡀࡊ ࡒࡀࡃࡌࡀࡉࡉࡀ ࡑࡀࡅࡕࡀ ࡋࡀࡃࡀࡅࡀࡓࡕ ࡌࡉࡍࡀࡉࡄࡅࡍ ࡄࡀࡃ ࡐࡀࡎࡕ ࡀࡓࡒࡀࡊ ࡅࡁࡉࡍࡉࡀࡍࡀࡊ ࡔࡀࡍࡉࡕ ࡀࡓࡎࡀࡊ ࡌࡍ ࡃࡅࡊࡕࡀࡉࡅࡍ ࡀࡍࡀࡕ ࡏࡕࡉࡍࡑࡉࡁ ࡌࡉࡍࡀࡊ ࡀࡍࡀࡍࡉࡀ ࡅࡀࡍࡀࡍࡉࡀ ࡌࡉࡍࡀࡊ ࡏࡕࡉࡍࡎࡉࡁ ࡏࡕࡉࡍࡎࡉࡁ ࡌࡉࡍࡀࡊ ࡕࡅࡒࡍࡀ ࡒࡀࡃࡌࡀࡉࡀ ࡖ ࡒࡀࡃࡌࡀࡉࡉࡀ ࡏࡄࡀࡁࡋࡀࡊ ࡋࡏࡅࡑࡓࡀࡊ ࡔࡂࡀࡔࡕࡇ ࡋࡒࡉࡍࡀࡊ ࡓࡀࡁࡕࡉࡀ ࡅࡀࡄࡓࡉࡁࡕ ࡏࡁࡉࡃࡀࡕࡀ ࡖࡄࡅࡀ ࡌࡕࡀࡒࡍࡀࡍ ࡊࡁࡀࡔࡕࡇ ࡋࡒࡉࡍࡀ ࡓࡁࡀ ࡁࡉࡍࡉࡀ ࡌࡀࡋࡊࡉࡀ ࡕࡓࡉࡍ ࡀࡍࡀࡕ ࡃࡌࡅࡕࡀࡊ ࡌࡉࡔࡕࡉࡓࡉࡀࡕ ࡅࡃࡉࡍࡀࡊ ࡌࡀࡋࡊࡉࡀ ࡍࡉࡃࡉࡍࡅࡍ ࡋࡀ ࡌࡉࡔࡕࡓࡉࡀ ࡋࡀࡓࡒࡀ ࡎࡃࡉࡓࡀ ࡓࡁࡀ ࡅࡋࡀࡌࡕࡀࡒࡉࡍ ࡏࡁࡉࡃࡀࡕࡀ ࡖࡌࡎࡀࡃࡓࡀࡍ ࡀࡁࡋࡀ ࡃࡉࡍࡀ ࡒࡀࡉࡌࡉࡕ ࡉࡅࡔࡀࡌࡉࡍ ࡅࡋࡀࡕࡉࡕ ࡌࡊࡉࡊࡅࡕࡀ ࡋࡏࡅࡑࡓࡀࡊ ࡅࡋࡀࡍࡃࡉࡔࡕ ࡅࡋࡀࡏࡕࡐࡀࡒࡀࡃࡕ ࡅࡋࡀ ࡏࡕࡀࡐࡓࡀࡔࡕ ࡅࡄࡅࡊࡌࡕࡀ ࡌࡍ ࡒࡀࡃࡌࡀࡉࡉࡀ ࡋࡀࡁࡉࡕ ࡅࡋࡀࡍࡃࡉࡔࡕ ࡏࡋ ࡕࡅࡒࡍࡀ ࡖࡉࡀࡓࡃࡍࡀ ࡅࡀࡐࡓࡀࡔࡀࡕࡀ ࡌࡍ ࡀࡍࡀࡍࡉࡀ ࡋࡀࡁࡉࡕ ࡌࡉࡃࡀ ࡉࡀࡃࡉࡕ ࡉࡅࡔࡀࡌࡉࡍ ࡌࡉࡍࡉࡋࡕࡀ ࡖࡌࡀࡋࡊࡀ ࡔࡅࡌࡀ ࡗ ࡍࡀࡐࡒࡀ ࡌࡍ ࡐࡅࡌࡇ ࡖࡀࡋࡌࡀ ࡔࡀࡍࡉࡀ ࡖࡋࡀࡎࡀࡊࡀ ࡌࡀࡃࡊࡀࡓ ࡄࡀࡎࡉࡐ ࡋࡀࡅ ࡉࡀࡃࡉࡕ ࡉࡅࡔࡀࡌࡉࡍ ࡖࡄࡅࡓࡁࡀ ࡖ ࡀࡋࡐࡀ ࡖࡔࡍࡉࡀ ࡁࡎࡓࡉࡍ ࡅࡀࡓࡁࡀ ࡀࡋࡐࡉࡀ ࡔࡍࡉࡀ ࡋࡀࡌࡉࡕࡒࡀࡉࡀࡌ ࡗ ࡖࡄࡅࡀ ࡀࡍࡀࡕ ࡔࡉࡕࡋࡀࡊ ࡁࡒࡉࡓࡉࡀ ࡏࡕࡉࡍࡎࡉࡁ ࡅࡀࡍࡀࡕ ࡎࡀࡃࡀ ࡓࡁࡀ ࡁࡋࡉࡂࡓࡀࡊ ࡓࡌࡉࡕ ࡀࡍࡐࡉࡔࡉࡕࡉࡍࡅࡍ ࡅࡊࡀࡓࡉࡅࡕࡀ ࡌࡉࡍࡀࡊ ࡋࡀࡁࡀࡈࡋࡀ ࡕࡓࡀࡑࡕࡇ ࡏࡋ ࡃࡉࡌࡉࡄࡕࡀ ࡁࡀࡉࡍࡀࡊ ࡗ ࡌࡉࡀ ࡖࡁࡉࡀࡓࡃࡍࡀ ࡔࡀࡐࡋࡉࡀ ࡌࡀࡋࡉࡋ ࡉࡅࡔࡀࡌࡉࡍ ࡋࡍࡑࡀࡁ ࡆࡉࡅࡀ ࡖࡍࡉࡌࡀࡓࡋࡇ ࡁࡀࡉࡕࡇ ࡀࡍࡀ ࡋࡊࡀࡓࡉࡅࡕࡀ ࡁࡉࡃࡀࡉ ࡄࡀࡔࡕࡀ ࡀࡍࡀ ࡏࡎࡉࡁࡋࡇ ࡅࡋࡀࡏࡔࡉࡁࡒࡇ ࡋࡊࡅࡔࡈࡀ ࡖࡔࡀࡍࡉࡀ ࡅࡏࡍࡀࡈࡓࡇ ࡀࡋࡌࡀ ࡖࡊࡅࡋ ࡖࡑࡀࡁࡉࡀ ࡓࡁࡉࡀ ࡀࡁࡃࡉࡀ ࡅࡄࡉࡉࡀ ࡆࡀࡊࡏࡉࡍ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡗ ࡄࡀࡔࡉࡁ ࡀࡁ ࡉࡅࡔࡀࡌࡉࡍ ࡁࡎࡀࡃࡀ ࡅࡓࡅࡂࡆࡀ ࡅࡕࡅࡒࡐࡀ ࡄࡀࡔࡉࡁ ࡁࡎࡀࡃࡀ ࡓࡁࡀ ࡋࡌࡉࡓࡌࡉࡀ ࡁࡉࡌࡓࡅࡌ ࡕࡉࡂࡓࡀ ࡋࡌࡉࡄࡆࡉࡍࡅࡍ ࡋࡄࡉࡉࡀ ࡓࡁࡉࡀ ࡒࡓࡀࡁࡀ ࡌࡉࡍࡀࡉ ࡄࡀࡆࡉࡍ ࡀࡁࡃࡉࡍ ࡀࡍࡀ ࡄࡀࡔࡕࡀ ࡏࡓࡉࡌࡉࡉࡇ ࡏࡋ ࡕࡉࡂࡓࡀ ࡓࡁࡀ ࡅࡏࡊࡀ ࡓࡌࡀࡋࡇ ࡋࡍࡀࡐࡔࡉࡇ ࡏࡅ ࡍࡉࡕࡉࡀ ࡅࡍࡉࡐࡀࡓࡀࡒ ࡌࡉࡍࡀࡉ ࡏࡄࡉࡆࡉࡀ ࡖࡌࡉࡍࡀࡉ ࡋࡉࡊࡀ ࡖࡓࡀࡁ ࡌࡉࡍࡀࡉ ࡁࡌࡓࡅࡌ ࡌࡉࡀࡊࡀ ࡖࡁࡉࡔ ࡌࡉࡍࡀࡉ ࡁࡀࡕࡀࡓ ࡍࡄࡅࡓ ࡀࡍࡀ ࡓࡀࡁࡍࡀ ࡅࡓࡀࡁ ࡆࡉࡅࡀࡉ ࡅࡋࡉࡕࡋࡇ ࡎࡀࡊࡀ ࡋࡕࡅࡔࡁࡉࡄࡕࡀࡉ ࡗ ࡄࡀࡆࡉࡍ ࡀࡌࡀࡓ ࡉࡅࡔࡀࡌࡉࡍ ࡄࡉࡉࡀ ࡓࡁࡉࡀ ࡏࡃࡀ ࡅࡀࡌࡀࡓࡀ ࡏࡊࡎࡉࡀ ࡏࡋ ࡏࡁࡉࡃࡀࡕࡀ ࡖࡉࡅࡔࡀࡌࡉࡍ ࡄࡅࡎࡓࡀࡍࡀ ࡒࡓࡀࡋࡇ ࡀࡋࡌࡀࡍࡃࡀ ࡖࡄࡉࡉࡀ ࡅࡊࡕࡀࡁ ࡏࡍࡂࡉࡓࡕࡀ ࡅࡔࡀࡃࡀࡓࡋࡇ ࡅࡆࡀࡄࡓࡅࡉࡀ ࡁࡆࡀࡄࡀࡓࡕࡀ ࡓࡀࡁࡕࡉࡀ ࡅࡀࡌࡀࡓࡋࡇ ࡄࡆࡉࡀ ࡁࡆࡉࡅࡇ ࡌࡏ ࡊࡀࡁࡉࡓ ࡏࡋࡇ ࡅࡋࡀࡍࡉࡌࡀࡓ ࡖࡎࡉࡍࡉࡀࡍ ࡍࡁࡀࡈ ࡓࡁࡀ ࡅࡌࡀࡋࡊࡀ ࡖࡍࡄࡅࡓࡀ ࡓࡂࡀࡆ ࡏࡋࡀࡉ ࡌࡀࡎࡂࡉࡀ ࡅࡀࡕࡉࡀ ࡌࡀࡍࡃࡀ ࡖࡄࡉࡉࡀ ࡀࡋࡌࡀ ࡋࡁࡉࡕ ࡉࡅࡔࡀࡌࡉࡍ ࡌࡈࡀ ࡌࡀࡈࡅࡉࡀ ࡁࡉࡕ ࡉࡅࡔࡀࡌࡉࡍ ࡌࡈࡀ ࡌࡀࡋࡉࡋ ࡌࡀࡍࡃࡀ ࡖࡄࡉࡉࡀ ࡋࡉࡅࡔࡀࡌࡉࡍ ࡖࡍࡉࡌࡀࡓࡋࡇ ࡗ ࡀࡍࡀࡕ ࡋࡀࡄࡅࡉࡕ ࡓࡁࡀ ࡀࡋࡌࡀ ࡖ ࡌࡉࡕࡀࡍࡀࡐࡔࡀ ࡄࡅࡉࡕ ࡋࡀࡄࡅࡉࡕ ࡓࡁࡀ ࡀࡍࡀࡕ ࡒࡓࡀࡁࡀ ࡋࡌࡀࡄࡅ ࡍࡀࡒࡔࡉࡕ ࡏࡋࡇ ࡀࡉࡒࡀࡋࡉࡀ ࡅࡊࡀࡓࡉࡀࡋࡉࡀ ࡏࡋࡀࡊ ࡉࡅࡔࡀࡌࡉࡍ ࡖࡁࡆࡀࡉࡍࡀ ࡖࡓࡁࡉࡀ ࡌࡉࡕࡎࡓࡉࡕ ࡔࡀࡋࡌࡀࡍ ࡁࡀࡅࡀࡕࡀࡊ ࡅࡀࡍࡃࡀࡔࡀࡕࡀࡊ ࡊࡀࡁࡓࡀࡍ ࡏࡋࡀࡊ ࡅࡌࡀࡍࡔࡉࡀࡕࡋࡇ ࡀࡋࡐࡅࡂࡃࡀࡌࡀࡊ ࡅࡃࡉࡌࡉࡄࡕࡀࡊ ࡌࡉࡍࡀࡊ ࡋࡀࡓࡒࡀ ࡍࡀࡄࡕࡀ ࡀࡍࡀ ࡀࡌࡀࡓࡋࡍࡀࡋࡇ ࡁࡌࡓࡅࡌࡀ ࡖࡀࡌࡀࡓࡋࡉࡀ ࡁࡀࡓࡒࡀ ࡔࡓࡉࡁࡇ ࡁࡉࡅࡔࡀࡌࡉࡍ ࡀࡊࡅࡀࡕ ࡖࡀࡌࡀࡓࡉࡅࡍ ࡏࡋࡇ ࡀࡍࡀ ࡀࡌࡀࡓࡍࡀ ࡉࡅࡔࡀࡌࡉࡍ ࡒࡓࡉࡕ ࡋࡉࡊࡀ ࡊࡅࡔࡈࡀ ࡁࡁࡉࡍࡕࡀࡊ ࡅࡋࡀࡔࡓࡀࡓࡀ ࡁࡌࡉࡌࡓࡀࡊ ࡗ ࡄࡀࡆࡉࡍ ࡀࡌࡀࡓ ࡌࡀࡍࡃࡀ ࡖࡄࡉࡉࡀ ࡌࡀࡋࡉࡋ ࡉࡅࡔࡀࡌࡉࡍ ࡖࡍࡉࡌࡀࡓࡋࡇ ࡋࡀࡅ ࡔࡂࡀࡍࡃࡀ ࡄࡅࡉࡕ ࡔࡀࡃࡓࡅࡊ ࡅࡀࡕࡉࡕ ࡌࡄࡀࡉࡕࡀࡊ ࡁࡌࡄࡉࡕࡀ ࡓࡀࡁࡕࡉࡀ ࡅࡁࡀࡈࡉࡋࡕࡉࡍࡅࡍ ࡋࡌࡉࡌࡓࡀࡊ ࡅࡋࡀࡃࡍࡀ ࡆࡉࡅࡀࡊ ࡅࡁࡈࡉࡋ ࡍࡄࡅࡓࡀࡊ ࡖࡒࡀࡉࡌࡀࡕࡁࡇ ࡗ ࡄࡀࡆࡉࡍ ࡉࡅࡔࡀࡌࡉࡍ ࡄࡀࡆࡉࡍ ࡄࡀࡆࡉࡋࡇ ࡌࡀࡍࡃࡀ ࡖࡄࡉࡉࡀ ࡋࡉࡅࡔࡀࡌࡉࡍ ࡋࡄࡀࡉࡋࡇ ࡖࡍࡐࡉࡔ ࡖࡀࡁࡀࡄࡀࡕࡇ ࡁࡉࡓࡊࡅࡉࡀ ࡅࡄࡀࡉࡆࡀࡊ ࡉࡅࡔࡀࡌࡉࡍ ࡁࡔࡊࡉࡍࡕࡇ ࡍࡒࡀࡔ ࡊࡎࡉࡕ ࡆࡉࡅࡇ ࡅࡂࡀࡁࡓࡀ ࡂࡀࡁࡓࡀ ࡐࡀࡓࡒࡎࡀ ࡁࡂࡀࡅࡇ ࡓࡌࡀࡍ ࡅࡄࡀࡉࡆࡀࡊ ࡀࡍࡀ ࡅࡏࡅࡕࡓࡉࡀ ࡀࡄࡀࡉ ࡋࡀࡔࡀࡍࡉࡍࡉࡍ ࡋࡌࡉࡌࡓࡀ ࡖࡌࡀࡋࡊࡉࡀ ࡀࡌࡀࡓ ࡅࡄࡉࡉࡀ ࡆࡀࡊࡏࡉࡍ ࡎࡀ ࡁࡓࡉࡊ ࡔࡅࡌࡇ ࡖࡌࡀࡍࡃࡀ ࡖࡄࡉࡉࡀ ࡅࡄࡉࡉࡀ ࡆࡀࡊࡉࡍ ࡎࡀ ࡁࡉࡅࡌࡀ ࡖࡀࡐࡓࡉࡔࡋࡇ ࡌࡀࡍࡀ ࡋࡉࡅࡔࡀࡌࡉࡍ ࡉࡅࡔࡀࡌࡉࡍ ࡌࡍ ࡊࡅࡓࡎࡉࡇ ࡒࡀࡌ ࡉࡅࡔࡀࡌࡉࡍ ࡒࡀࡌ ࡌࡍ ࡊࡅࡓࡎࡉࡇ ࡅࡋࡀࡍࡐࡉࡀ ࡌࡀࡍࡃࡀ ࡖࡄࡉࡉࡀ ࡍࡐࡀࡒ ࡅࡀࡌࡀࡓࡋࡇ ࡁࡓࡉࡊ ࡆࡉࡅࡀࡊ ࡌࡀࡋࡊࡀ ࡖࡏࡅࡕࡓࡉࡀ ࡖࡏࡋࡀࡅࡀࡉࡀࡊ ࡃࡍࡉࡀ ࡅࡄࡉࡉࡀ ࡆࡀࡊࡉࡍ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡗ ࡏࡕࡄࡀࡔࡁࡉࡕ ࡀࡍࡀ ࡉࡅࡔࡀࡌࡉࡍ ࡆࡉࡅࡀ ࡅࡍࡄࡅࡓࡀ ࡅࡂࡀࡋࡀࡋࡕࡀ ࡅࡀࡐࡓࡀࡔࡀࡕࡀ ࡖࡎࡀࡊࡀ ࡋࡉࡕࡋࡇ ࡌࡉࡕࡀࡐࡓࡀࡔࡍࡀ ࡁࡂࡉࡍࡆࡀ ࡒࡀࡃࡌࡀࡉࡀ ࡅࡁࡌࡀࡋࡀࡋࡕࡀ ࡖࡏࡄࡀࡁࡋࡉࡀ ࡀࡁ ࡌࡉࡕࡀࡐࡓࡀࡔࡍࡀ ࡌࡉࡁࡀࡃ ࡒࡓࡀࡁࡀ ࡁࡓࡅࡓࡁࡉࡀ ࡓࡅࡉࡀࡍࡀ ࡍࡎࡀࡁࡕࡇ ࡋࡓࡅࡂࡆࡀ ࡅࡆࡉࡄࡉࡓࡀ ࡍࡉࡎࡁࡉࡕ ࡋࡏࡅࡑࡓࡀࡉ ࡏࡌࡓࡉࡕ ࡖࡏࡁࡀࡃ ࡒࡓࡀࡁࡀ ࡌࡍ ࡄࡉࡉࡀ ࡒࡀࡃࡌࡀࡉࡉࡀ ࡅࡌࡍ ࡄࡉࡉࡀ ࡕࡉࡍࡉࡀࡍࡉࡀ ࡅࡌࡍ ࡄࡉࡉࡀ ࡖࡌࡍ ࡋࡀࡒࡀࡃࡌࡉࡀ ࡄࡅࡍ ࡕࡉࡂࡓࡀ ࡏࡁࡀࡃ ࡁࡍࡄࡅࡓࡀ ࡅࡌࡀࡓࡂࡅࡔ ࡒࡓࡀࡁࡀ ࡏࡁࡀࡃ ࡁࡂࡀࡅࡀࡉࡄࡅࡍ ࡖࡉࡀࡓࡃࡍࡉࡀ ࡏࡁࡀࡃ ࡒࡓࡀࡁࡀ ࡓࡁࡀ ࡖࡍࡐࡉࡔ ࡅࡎࡀࡊࡀ ࡋࡉࡕࡋࡇ ࡆࡉࡁࡍࡀ ࡒࡀࡃࡌࡀࡉࡀ ࡗ ࡏࡕࡄࡀࡔࡀࡁ ࡉࡅࡔࡀࡌࡉࡍ ࡌࡉࡍࡃࡀࡌ ࡖࡎࡍࡉࡀ ࡋࡀࡊࡀࡔࡀࡓ ࡀࡁࡀࡃ ࡅࡄࡀࡉࡆࡀࡊ ࡏࡅࡕࡓࡉࡀ ࡁࡀࡍࡃࡀࡔࡀࡕࡀ ࡖࡍࡀࡐࡔࡀ ࡖ ࡏࡄࡀࡁࡋࡉࡀ ࡀࡔࡂࡀࡍࡃࡀ ࡔࡀࡃࡀࡓࡉࡉࡅࡍ ࡏࡋࡇ ࡖࡓࡅࡂࡆࡀ ࡋࡁࡉࡔ ࡄࡉࡓࡁࡀ ࡌࡊࡀࡎࡀࡉ ࡔࡂࡀࡍࡃࡀ ࡀࡕࡉࡀ ࡏࡋࡇ ࡏࡍࡂࡉࡓࡕࡀ ࡖࡌࡀࡋࡊࡀ ࡓࡁࡉࡀ ࡀࡅࡕࡁࡅࡉࡀ ࡏࡋ ࡉࡅࡔࡀࡌࡉࡍ ࡁࡎࡀࡃࡀ ࡓࡁࡀ ࡀࡋࡌࡀ ࡖࡓࡁࡉࡀ ࡑࡀࡁࡉࡍ ࡏࡋࡇ ࡀࡔࡂࡀࡍࡃࡀ ࡖࡀࡕࡉࡇ ࡋࡏࡍࡂࡉࡓࡕࡀ ࡔࡋࡀࡌࡀ ࡏࡋࡇ ࡋࡀࡔࡀࡋࡉࡌ ࡀࡌࡀࡓࡋࡇ ࡒࡅࡌ ࡌࡍ ࡊࡅࡓࡎࡉࡀࡊ ࡄࡀࡅࡒࡀ ࡄࡅࡀࡋࡇ ࡌࡍ ࡏࡅࡑࡓࡇ ࡅࡌࡉࡓࡕࡀ ࡔࡃࡀ ࡒࡅࡃࡀࡌࡇ ࡒࡀࡌ ࡌࡍ ࡊࡅࡓࡎࡉࡉࡇ ࡅࡏࡋ ࡀࡓࡒࡀ ࡏࡕࡉࡁ ࡅࡀࡌࡀࡓ ࡌࡀࡍ ࡓࡀࡌࡉࡀ ࡏࡎࡒࡉࡀ ࡁࡉࡅࡔࡀࡌࡉࡍ ࡀࡌࡉࡍࡈࡅࡋ ࡖ ࡌࡀࡋࡊࡀ ࡁࡓࡅࡂࡆࡀ ࡔࡀࡃࡀࡓ ࡏࡋࡇ ࡉࡅࡊࡀࡔࡀࡓ ࡒࡀࡌ ࡌࡍ ࡊࡅࡓࡎࡉࡉࡇ ࡅࡏࡎࡒࡉࡀ ࡁࡉࡀࡌࡉࡍࡇ ࡓࡌࡀ ࡉࡅࡔࡀࡌࡉࡍ ࡐࡉࡄࡕࡇ ࡋࡐࡅࡌࡇ ࡅࡋࡔࡂࡀࡍࡃࡀ ࡖࡍࡉࡌࡀࡓࡋࡇ ࡄࡀࡊࡉࡌࡀ ࡖࡋࡀࡄࡆࡉࡋࡀࡊ ࡃࡌࡅࡕࡀࡉ ࡅࡁࡉࡍࡕࡀࡉ ࡅࡋࡀࡔࡕࡉࡋࡀࡊ ࡁࡊࡀࡎࡀ ࡌࡉࡍࡀࡉ ࡄࡀࡊࡉࡌࡀ ࡖࡋࡀࡏࡊࡉࡋࡀࡊ ࡐࡉࡄࡕࡀ ࡌࡍ ࡐࡀࡕࡅࡓࡀࡉ ࡅࡋࡀࡂࡃࡉࡋࡀࡊ ࡊࡋࡉࡋࡀ ࡅࡋࡀࡕࡓࡉࡑࡋࡀࡊ ࡁࡓࡉࡔࡀࡊ ࡄࡀࡊࡉࡌࡀ ࡖࡋࡀࡄࡆࡉࡋࡀࡊ ࡃࡌࡅࡕࡀࡉ ࡅࡑࡀࡅࡕࡀࡉ ࡋࡀࡔࡓࡏࡉࡀ ࡏࡋࡀࡊ ࡀࡔࡂࡀࡍࡃࡀ ࡏࡋ ࡐࡅࡌࡇ ࡐࡉࡄࡕࡇ ࡅࡋࡉࡅࡔࡀࡌࡉࡍ ࡖࡍࡉࡌࡀࡓࡋࡇ ࡋࡀࡕࡉࡌࡀࡓ ࡖࡀࡍࡀ ࡁࡍࡀࡐࡔࡀࡉ ࡀࡕࡉࡕ ࡏࡋࡀࡊ ࡌࡀࡋࡊࡀ ࡁࡓࡅࡂࡆࡀ ࡔࡀࡃࡀࡓ ࡏࡋࡀࡊ ࡅࡋࡀࡌࡑࡉࡍࡀ ࡖࡏࡌࡀࡓࡋࡇ ࡏࡋ ࡉࡅࡔࡀࡌࡉࡍ ࡈࡅࡁࡀ ࡍࡉࡄࡅࡕࡀ ࡌࡍ ࡂࡅࡁࡓࡉࡀ ࡓࡁࡅࡕࡀ ࡍࡎࡀࡁ ࡈࡀࡁࡉࡀ ࡓࡁࡉࡀ ࡗ ࡁࡑࡅࡁࡉࡀࡍࡀ ࡖࡁࡉࡔࡉࡀ ࡋࡀࡁࡃࡉࡀ ࡉࡅࡔࡀࡌࡉࡍ ࡍࡎࡀࡁ ࡓࡁࡅࡕࡀ ࡀࡒࡓࡇ ࡅࡁࡉࡍࡉࡀࡍࡇ ࡌࡉࡕࡐࡀࡎࡀࡎࡉࡀ ࡁࡍࡇ ࡁࡒࡉࡓࡉࡀ ࡀࡆࡋࡉࡀ ࡅࡀࡍࡀࡍࡇ ࡋࡆࡅࡁࡉࡀ ࡍࡀࡐࡒࡀࡍ ࡆࡉࡅࡇ ࡅࡕࡅࡒࡍࡇ ࡄࡀࡔࡅࡊ ࡅࡏࡁࡉࡃࡀࡕࡇ ࡌࡉࡔࡕࡀࡌࡓࡀࡍ ࡓࡅࡂࡆࡀ ࡖࡔࡁࡀࡒ ࡌࡀࡋࡊࡀ ࡋࡃࡀࡓࡃࡀࡓࡉࡀ ࡋࡀࡌࡉࡔࡕࡓࡉࡀ ࡀࡍࡀࡕ ࡉࡅࡔࡀࡌࡉࡍ ࡉࡀࡕࡁࡉࡕ ࡋࡁࡀࡁࡀ ࡖࡎࡅࡐࡀࡕ ࡀࡆࡋࡉࡕ ࡌࡉࡔࡒࡀࡋ ࡌࡉࡔࡕࡒࡉࡋ ࡏࡒࡀࡓࡀ ࡌࡉࡍࡀࡊ ࡕࡀࡂࡀ ࡖࡓࡁࡉࡀ ࡏࡄࡀࡁࡋࡀࡊ ࡌࡉࡔࡒࡀࡋ ࡌࡉࡔࡕࡒࡉࡋ ࡕࡅࡒࡍࡀ ࡌࡉࡍࡀࡊ ࡅࡕࡓࡉࡑ ࡄࡔࡅࡊࡀ ࡁࡁࡉࡍࡕࡀࡊ ࡀࡒࡓࡉࡀ ࡖࡁࡍࡀࡊ ࡌࡉࡕࡐࡀࡎࡀࡎࡉࡀ ࡅࡊࡀࡓࡎࡀࡅࡀࡕࡀࡊ ࡎࡓࡉࡒࡉࡀ ࡄࡀࡅࡉࡍ ࡀࡋࡌࡀ ࡖࡓࡁࡉࡀ ࡑࡀࡁࡉࡍ ࡏࡋࡀࡊ ࡏࡍࡕࡀࡊ ࡖࡌࡀࡎࡒࡀ ࡒࡉࡍࡀࡊ ࡀࡋࡃࡀࡓࡃࡀࡓࡉࡀ ࡋࡀࡄࡀࡅࡉࡀ ࡆࡀࡅࡀ ࡖࡍࡀࡐࡔࡀࡊ ࡌࡀࡔࡐࡉࡋࡉࡋࡇ ࡋࡒࡉࡍࡀ ࡖࡊࡅࡋࡄࡅࡍ ࡏࡅࡔࡍࡄ ࡅࡄࡉࡉࡀ ࡆࡀࡊࡉࡍ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡒࡀࡋࡀ ࡁࡉࡀࡓࡃࡍࡀ ࡀࡕࡀࡋࡉࡀ ࡅࡍࡄࡅࡓࡀ ࡖࡉࡀࡕࡉࡁ ࡁࡀࡋࡌࡀ ࡍࡑࡀࡁ ࡆࡉࡅࡀ ࡀࡕࡀ ࡌࡍ ࡀࡓࡒࡀ ࡖࡀࡉࡀࡓ ࡋࡂࡉࡅࡀࡕ ࡏࡒࡀࡓࡀ ࡌࡉࡆࡋࡇ ࡅࡌࡀࡈࡉࡀ ࡋࡂࡉࡅࡀࡕ ࡏࡒࡀࡓࡀ ࡋࡀࡔࡂࡀࡍࡃࡀ ࡖࡍࡀࡈࡀࡓ ࡁࡀࡁࡀ ࡖࡍࡉࡌࡀࡓࡋࡇ ࡏࡆࡉࡋ ࡀࡔࡂࡀࡍࡃࡀ ࡅࡀࡌࡀࡓࡋࡇ ࡋࡌࡀࡋࡊࡀ ࡓࡁࡀ ࡖࡍࡄࡅࡓࡀ ࡆࡉࡅࡀ ࡁࡁࡀࡁࡀ ࡒࡀࡉࡉࡌ ࡄࡀࡆࡉࡍ ࡔࡅࡕࡀ ࡖࡍࡀࡐࡒࡀ ࡌࡍ ࡐࡅࡌࡇ ࡀࡄࡁࡀࡋࡇ ࡁࡊࡅࡔࡈࡀ ࡖࡉࡀࡕࡉࡓ ࡅࡓࡅࡀࡄࡀ ࡏࡕࡉࡒࡓࡉࡀ ࡋࡄࡉࡋ ࡀࡔࡂࡀࡍࡃࡀ ࡀࡆࡀࡋ ࡒࡀࡌ ࡒࡅࡃࡀࡌࡇ ࡖࡌࡀࡋࡊࡀ ࡖࡍࡄࡅࡓࡀ ࡅࡌࡀࡋࡊࡀ ࡖࡍࡄࡅࡓࡀ ࡋࡀࡔࡂࡀࡍࡃࡀ ࡋࡀࡄࡆࡉࡇ ࡄࡃࡀ ࡆࡉࡁࡍࡀ ࡎࡂࡉࡃ ࡀࡔࡂࡀࡍࡃࡀ ࡀࡒࡀࡌࡇ ࡖࡌࡀࡋࡊࡀ ࡖࡍࡄࡅࡓࡀ ࡅࡌࡀࡋࡊࡀ ࡋࡀࡔࡂࡀࡍࡃࡀ ࡋࡀࡄࡉࡆࡉࡇ ࡕࡓࡉࡍ ࡆࡉࡁࡍࡉࡀ ࡎࡂࡉࡃ ࡔࡂࡀࡍࡃࡀ ࡀࡒࡀࡌࡇ ࡖࡌࡀࡋࡊࡀ ࡅࡌࡀࡋࡊࡀ ࡖࡍࡄࡅࡓࡀ ࡋࡀࡔࡂࡀࡍࡃࡀ ࡋࡀࡄࡉࡆࡉࡇ ࡌࡀࡋࡉࡋ ࡀࡎࡂࡀࡍࡃࡀ ࡅࡋࡌࡀࡋࡊࡀ ࡓࡁࡀ ࡖࡍࡉࡌࡀࡓࡋࡇ ࡍࡑࡀࡁ ࡆࡉࡅࡀ ࡁࡓࡇ ࡖࡉࡅࡔࡀࡌࡉࡍ ࡁࡁࡀࡁࡀ ࡒࡀࡉࡉࡌ ࡅࡁࡀࡉࡉࡀ ࡓࡅࡀࡄࡀ ࡌࡍ ࡁࡉࡍࡕࡀࡊ ࡌࡀࡋࡉࡋ ࡌࡀࡋࡊࡀ ࡖࡍࡄࡅࡓࡀ ࡅࡋࡔࡂࡀࡍࡃࡀ ࡖࡍࡉࡌࡀࡓࡋࡇ ࡐࡕࡀ ࡁࡀࡁࡀ ࡁࡆࡉࡅࡀ ࡐࡕࡀࡋࡇ ࡅࡍࡉࡕࡉࡓࡑࡅࡍ ࡋࡉࡂࡓࡇ ࡁࡔࡓࡀࡓࡀ ࡌࡍ ࡓࡉࡔ ࡁࡓࡉࡔ ࡀࡔࡂࡀࡍࡃࡀ ࡐࡕࡀ ࡁࡀࡁࡀ ࡁࡆࡉࡅࡀ ࡍࡑࡀࡁ ࡆࡉࡅࡀ ࡕࡓࡉࡑ ࡌࡀࡋࡉࡋ ࡍࡑࡀࡁ ࡆࡉࡅࡀ ࡅࡋࡌࡀࡋࡊࡀ ࡖࡍࡉࡌࡀࡓࡋࡇ ࡍࡉࡄࡉࡕ ࡅࡁࡀࡎࡉࡌࡉࡕ ࡅࡔࡅࡕࡀࡊ ࡍࡀࡐࡔࡀ ࡅࡋࡀࡁࡀࡈࡋࡀ ࡆࡉࡅࡀࡊ ࡍࡀࡈࡀࡓ ࡁࡔࡉࡃࡒࡀ ࡅࡍࡄࡅࡓࡀࡊ ࡅࡏࡓࡅࡕࡀࡊ ࡍࡀࡐࡔࡀ ࡅࡋࡀ ࡁࡀࡈࡋࡀ ࡋࡉࡕࡋࡀࡊ ࡄࡀࡁࡓࡀ ࡁࡕࡀࡂࡀࡊ ࡅࡋࡀࡔࡅࡕࡀࡐࡀ ࡁࡔࡅࡋࡈࡀࡍࡀࡊ ࡉࡀࡃࡅࡉࡀ ࡀࡍࡀࡕ ࡖࡏࡒࡀࡓࡀ ࡖࡌࡂࡀࡋࡉࡋࡀࡊ ࡏࡋ ࡀࡐࡓࡀࡔࡀࡕࡀ ࡖࡎࡀࡊࡀ ࡋࡉࡕࡋࡀࡉࡉࡍ ࡌࡀࡑࡁࡅࡕࡀࡊ ࡁࡉࡀࡓࡃࡍࡀ ࡕࡓࡉࡑࡀ ࡅࡊࡅࡋࡄࡅࡍ ࡏࡁࡉࡃࡀࡕࡀࡊ ࡃࡉࡋࡀࡊ ࡀࡍࡉࡍ ࡏࡅ ࡏࡌࡀࡓࡋࡀࡊ ࡋࡀࡕࡉࡓࡂࡀࡆ ࡅࡍࡉࡄࡅࡕࡀ ࡖࡈࡀࡁࡉࡀ ࡕࡉࡔࡓࡉࡀ ࡏࡋ ࡏࡅࡑࡓࡀࡊ ࡔࡀࡍࡉࡀ ࡑࡀࡅࡕࡀࡊ ࡖࡌࡄࡀࡔࡁࡉࡕ ࡅࡁࡅࡈࡋࡀࡍࡀ ࡋࡉࡕࡋࡇ ࡂࡀࡁࡓࡀ ࡖࡌࡍ ࡀࡒࡓࡇ ࡌࡀࡐࡀࡒ ࡅࡌࡔࡀࡌࡀࡓ ࡁࡆࡀࡉࡍࡀ ࡌࡍ ࡃࡀࡓࡉࡀ ࡁࡍࡄ ࡁࡒࡉࡓࡉࡀ ࡂࡈࡉࡋࡉࡀ ࡅࡀࡍࡀࡍࡇ ࡁࡈࡉࡍࡁࡀ ࡒࡀࡄࡀࡃࡓࡀࡍ ࡉࡀࡓࡃࡍࡇ ࡔࡂࡉࡔࡉࡀ ࡅࡔࡊࡉࡍࡀࡕࡇ ࡌࡔࡀࡌࡓࡀࡍ ࡌࡍ ࡃࡅࡊࡕࡀࡉࡄࡉࡍ ࡐࡀࡎ ࡃࡀࡅࡓࡇ ࡅࡁࡉࡍࡉࡀࡍࡇ ࡅࡊࡅࡓࡎࡉࡉࡇ ࡁࡁࡀࡁࡀ ࡖࡎࡅࡐࡀࡕ ࡕࡓࡉࡑ ࡌࡔࡀࡂࡔࡉࡀ ࡀࡋࡌࡇ ࡁࡔࡉࡁࡉࡀ ࡔࡁࡉࡉࡀ ࡅࡌࡉࡍࡉࡄࡕࡀ ࡓࡌࡉࡋࡇ ࡏࡋ ࡏࡅࡑࡓࡇ ࡏࡅ ࡁࡀࡉࡉࡕ ࡁࡄࡀࡔࡀࡁࡕࡀ ࡃࡉࡋࡀࡊ ࡏࡉࡀࡍࡄࡇ ࡅࡏࡊࡉࡍࡇ ࡋࡏࡅࡑࡓࡇ ࡏࡋ ࡃࡅࡊࡕࡇ ࡕࡓࡅࡑࡋࡇ ࡉࡀࡃࡀࡕࡀ ࡁࡌࡀࡑࡁࡅࡕࡀࡊ ࡅࡔࡅࡌࡀࡊ ࡃࡉࡋࡀࡊ ࡏࡉࡃࡊࡀࡓ ࡏࡋࡇ ࡍࡉࡄࡅࡉࡀ ࡅࡍࡉࡃࡀ ࡉࡅࡔࡀࡌࡉࡍ ࡖࡌࡍ ࡔࡅࡌࡀࡊ ࡃࡉࡋࡀࡊ ࡋࡀࡏࡔࡕࡁࡉࡒ ࡌࡀࡋࡊࡀ ࡖࡍࡄࡅࡓࡀ ࡖࡓࡂࡉࡆ ࡍࡄࡀ ࡅࡏࡕࡉࡀࡁࡅࡕࡀ ࡄࡅࡀࡕ ࡏࡋ ࡏࡅࡑࡓࡇ ࡗ ࡄࡀࡆࡉࡍ ࡔࡅࡌࡀ ࡌࡀࡋࡊࡀ ࡖࡍࡄࡅࡓࡀ ࡄࡃࡀࡁࡇ ࡁࡍࡑࡀࡁ ࡆࡉࡅࡀ ࡌࡍ ࡓࡉࡔ ࡁࡓࡉࡔ ࡌࡀࡍࡃࡀ ࡖࡄࡉࡉࡀ ࡒࡀࡌ ࡌࡍ ࡊࡅࡓࡎࡉࡉࡇ ࡅࡋࡌࡀࡋࡊࡀ ࡖࡍࡄࡅࡓࡀ ࡖࡍࡉࡌࡀࡓࡋࡇ ࡂࡁࡓࡀ ࡖ ࡌࡀࡐࡀࡒ ࡌࡍ ࡀࡓࡒࡇ ࡅࡔࡊࡉࡍࡕࡇ ࡋࡀࡌࡔࡀࡋࡀࡈࡋࡀࡊ ࡖ ࡌࡉࡕࡀࡁ ࡏࡋࡇ ࡗ ࡄࡀࡆࡉࡍ ࡔࡅࡌࡀ ࡌࡀࡋࡊࡀ ࡖࡍࡄࡅࡓࡀ ࡋࡌࡀࡍࡃࡀ ࡖࡄࡉࡉࡀ ࡖࡍࡉࡌࡀࡓࡋࡇ ࡀࡍࡀࡕ ࡌࡍ ࡉࡅࡌࡀࡊ ࡒࡀࡃࡌࡀࡉࡀ ࡋࡀࡔࡉࡄࡉࡕ ࡋࡅࡀࡕ ࡉࡅࡔࡀࡌࡉࡍ ࡌࡍ ࡉࡅࡌࡀࡊ ࡒࡀࡃࡌࡀࡉࡀ ࡎࡀࡍࡉࡀࡕࡋࡇ ࡀࡌࡉࡍࡈࡅࡋ ࡖࡀࡍࡀࡍࡀ ࡌࡍ ࡒࡉࡍࡇ ࡁࡉࡕ ࡅࡋࡀࡏࡄࡀࡁࡋࡀࡊ ࡋࡂࡉࡈࡀࡕࡋࡇ ࡋࡒࡉࡍࡀ ࡓࡁࡀ ࡋࡏࡅࡑࡓࡀࡊ ࡋࡃࡀࡓࡃࡀࡓࡉࡀ ࡋࡀࡌࡉࡔࡕࡓࡉࡀ ࡐࡀࡉࡎࡉࡕ ࡅࡌࡀࡄࡓࡉࡁࡉࡕ ࡃࡀࡅࡓࡇ ࡅࡀࡊࡀࡍࡃࡉࡕ ࡋࡒࡉࡍࡀ ࡋࡂࡉࡈࡀࡕࡋࡇ ࡌࡍ ࡃࡀࡓࡉࡀ ࡌࡀࡍ ࡏࡕࡁࡉࡃࡁࡇ ࡌࡍ ࡒࡀࡃࡌࡀࡉࡉࡀ ࡗ ࡖࡁࡉࡅࡔࡀࡌࡉࡍ ࡏࡕࡁࡉࡃࡁࡇ ࡂࡀࡁࡓࡀ ࡖࡌࡀࡐࡀࡒ ࡌࡍ ࡀࡓࡒࡇ ࡅࡌࡍ ࡊࡀࡍࡆࡀࡋࡀ ࡖࡓࡁࡉࡀ ࡏࡄࡀࡁࡋࡇ ࡌࡍ ࡁࡍࡇ ࡒࡀࡃࡌࡀࡉࡉࡀ ࡋࡀࡃࡀࡅࡓࡇ ࡌࡉࡍࡀࡉࡄࡅࡍ ࡄࡃࡀ ࡅࡀࡍࡀࡍࡇ ࡁࡈࡉࡍࡁࡀ ࡒࡀࡎࡀࡂࡉࡀࡍ ࡅࡄࡀࡉࡆࡀࡊ ࡌࡀࡋࡊࡀ ࡖࡍࡄࡅࡓࡀ ࡀࡌࡀࡓࡋࡇ ࡋࡍࡑࡀࡁ ࡆࡉࡅࡀ ࡖࡏࡂࡀࡋࡉࡋࡀࡊ ࡓࡀࡆࡉࡀ ࡖࡁࡕࡅࡒࡍࡀ ࡋࡂࡉࡈࡀࡕࡋࡇ ࡋࡉࡐࡓࡉࡔࡅࡕࡀࡊ ࡖࡌࡍ ࡀࡁࡀࡄࡀࡕࡀࡊ ࡅࡄࡅࡊࡅࡌࡕࡀ ࡖࡐࡋࡉࡂࡀࡋࡀࡊ ࡏࡋ ࡏࡅࡑࡓࡀࡊ ࡉࡀࡒࡉࡓࡉࡕ ࡅࡉࡀࡒࡉࡓࡀ ࡉࡀࡓࡃࡍࡀࡊ ࡅࡉࡒࡉࡓࡀ ࡒࡉࡍࡀ ࡖࡌࡉࡍࡇ ࡀࡄࡅࡉࡕ ࡍࡀࡐࡔࡀ ࡏࡕࡋࡀࡊ ࡍࡉࡄࡅࡕࡀ ࡋࡊࡀࡍࡀ ࡖࡌࡉࡍࡇ ࡄࡅࡉࡕ ࡀࡌࡈࡉࡋࡇ ࡐࡅࡂࡃࡀࡌࡉࡀ ࡍࡉࡄࡉࡀ ࡋࡀࡁࡅࡊ ࡅࡀࡍࡄࡇ ࡏࡋ ࡋࡉࡁࡇ ࡏࡋ ࡎࡀࡌࡊࡇ ࡅࡀࡌࡀࡓࡋࡇ ࡖࡄࡉࡉࡀ ࡓࡁࡉࡀ ࡁࡈࡀࡁࡅࡕࡀ ࡏࡕࡉࡌࡋࡅࡍ ࡏࡋࡀࡊ ࡅࡌࡔࡀࡁࡉࡍ ࡄࡉࡉࡀ ࡅࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡋࡌࡀࡍ ࡏࡒࡓࡉࡀ ࡖࡍࡉࡍࡉࡀࡍ ࡅࡋࡌࡀࡍ ࡏࡌࡀࡓࡋࡇ ࡌࡀࡌࡋࡀ ࡄࡃࡀ ࡋࡌࡀࡍ ࡏࡌࡀࡓ ࡌࡀࡌࡋࡀ ࡖࡋࡀࡔࡀࡍࡉࡀ ࡖࡀࡌࡀࡓࡍࡀ ࡀࡍࡀ ࡋࡀࡃࡉࡒࡓࡉࡋࡇ ࡏࡍࡉࡀࡍ ࡅࡋࡀࡃࡀࡌࡀࡓࡉࡋࡇ ࡌࡀࡌࡋࡀࡉ ࡔࡅࡌࡀ ࡀࡊࡑࡀࡕ ࡅࡊࡀࡁࡓࡀࡋࡉࡀ ࡅࡊࡉࡁࡓࡀࡕ ࡅࡊࡀࡁࡓࡀ ࡏࡋࡀࡉ ࡍࡐࡉࡔ ࡊࡌࡀ ࡏࡕࡉࡁ ࡋࡁࡀࡁࡀ ࡖࡎࡅࡐࡀࡕ ࡅࡊࡌࡀ ࡀࡁࡕࡉࡍࡉࡄࡕࡀ ࡏࡕࡉࡁࡍࡀ ࡋࡏࡌࡀࡕ ࡍࡉࡔࡕࡓࡉࡀ ࡕࡉࡂࡓࡀࡉ ࡅࡄࡀࡋࡉࡍ ࡌࡀࡑࡐࡅࡈࡉࡀࡕࡀࡉ ࡌࡉࡕࡐࡀࡎࡒࡀࡍ ࡌࡀࡄࡅ ࡄࡈࡉࡕ ࡁࡏࡌࡓࡅࡌࡀ ࡅࡌࡀࡄࡅ ࡏࡁࡃࡉࡕ ࡁࡀࡕࡀࡓ ࡍࡄࡅࡓ ࡌࡀࡄࡅ ࡏࡁࡃࡉࡕ ࡌࡍ ࡏࡅࡁࡀࡃࡉࡀ ࡖࡋࡉࡊࡀ ࡏࡍࡉࡔ ࡖࡀࡁࡀࡃ ࡄࡀࡔࡕࡀ ࡀࡊࡑࡀࡋࡉࡀ ࡅࡀࡊࡑࡀࡋࡇ ࡏࡋ ࡊࡌࡀ ࡏࡕࡀࡍࡀ ࡅࡀࡊࡑࡀࡋࡅࡍ ࡏࡋ ࡕࡀࡓࡁࡀࡑࡉࡀ ࡀࡍࡐࡀࡉ ࡊࡌࡀ ࡍࡉࡔࡃࡅࡍ ࡃࡉࡌࡉࡄࡕࡀ ࡖࡋࡀࡍࡉࡓࡅࡍ ࡌࡀࡍ ࡗ ࡃࡉࡋࡉࡀ ࡃࡀࡌࡉࡀ ࡖࡁࡍࡇ ࡊࡅࡋࡄࡅࡍ ࡏࡔࡕࡀࡌࡀࡓ ࡅࡋࡉࡕࡋࡇ ࡏࡋ ࡒࡀࡋࡀࡉ ࡀࡍࡉࡀ ࡃࡀࡌࡉࡍࡀ ࡏࡋ ࡀࡓࡆࡀ ࡃࡀࡌࡀ ࡖࡍࡀࡍࡂࡀࡓࡉࡀ ࡄࡉࡃࡓࡅࡉࡀ ࡅࡔࡀࡃࡉࡅࡉࡀ ࡗ ࡀࡓࡆࡀ ࡖࡄࡃࡉࡓࡋࡇ ࡐࡀࡓࡆࡋࡀ ࡌࡉࡍࡉࡋࡉࡀ ࡖࡁࡉࡋࡃࡁࡀࡁࡀࡉ ࡄࡉࡃࡓࡅࡍ ࡏࡋࡀࡉ ࡋࡀࡀࡄࡀࡉ ࡖࡊࡀࡓࡉࡅࡕࡀ ࡅࡋࡀࡓࡀࡄࡌࡀࡉ ࡖࡓࡀࡄࡌࡅࡕࡀࡉ ࡀࡃࡊࡀࡓ ࡖࡐࡔࡀࡈࡉࡋࡇ ࡊࡅࡔࡈࡀ ࡀࡐࡉࡊࡁࡅࡍ ࡅࡌࡉࡄࡋࡀࡉ ࡅࡊࡀࡎࡀࡉ ࡀࡔࡀࡃ ࡏࡍࡉࡔࡉࡅࡉࡀ ࡋࡉࡅࡌࡀ ࡖࡄࡀࡌࡓࡀࡉ ࡅࡋࡀࡃࡀࡊࡓࡉࡀ ࡌࡍ ࡉࡅࡌࡀࡉ ࡄࡀࡃ ࡊࡌࡀ ࡎࡉࡋࡒࡉࡕ ࡈࡅࡓࡉࡀ ࡓࡀࡌࡀࡉࡀ ࡅࡊࡌࡀ ࡍࡉࡄࡕࡉࡕ ࡃࡉࡓࡊࡉࡀ ࡍࡀࡄࡋࡉࡀ ࡀࡋࡐࡀ ࡄࡅࡋࡉࡀ ࡓࡀࡄࡌࡉࡀ ࡅࡕࡓࡉࡍ ࡀࡋࡐࡉࡀ ࡐࡀࡕࡅࡓࡀࡉ ࡀࡐࡓࡀࡕ ࡄࡀࡔࡕࡀ ࡖࡏࡄࡉࡒࡋࡉࡕ ࡁࡋࡉࡂࡓࡀࡉ ࡅࡋࡀࡄࡅࡀࡋࡉࡀ ࡖࡁࡏࡃࡀࡉ ࡋࡂࡀࡈ ࡌࡀࡄࡅ ࡉࡅࡌࡀ ࡖࡏࡌࡓࡉࡕ ࡖࡀࡍࡀ ࡄࡀࡊࡀ ࡉࡀࡕࡉࡁࡍࡀ ࡀࡍࡀ ࡋࡉࡁࡀࡉ ࡋࡀࡂࡀࡋࡉࡋࡉࡀ ࡅࡏࡍࡉࡔ ࡌࡍ ࡏࡅࡕࡓࡉࡀ ࡋࡀࡎࡁࡓࡀࡍ ࡄࡀࡋࡉࡍ ࡀࡒࡓࡀࡉ ࡌࡉࡕࡐࡀࡎࡀࡎࡉࡀ ࡅࡁࡍࡀࡉ ࡁࡒࡉࡓࡉࡀ ࡌࡉࡕࡍࡀࡎࡁࡉࡀ ࡄࡀࡓࡁࡀ ࡔࡊࡉࡍࡕࡀࡉ ࡅࡔࡂࡀࡍࡃࡀࡉ ࡀࡁࡉࡄࡃࡉࡀ ࡋࡀࡂࡀࡉࡎࡉࡀ ࡄࡀࡋࡉࡍ ࡀࡍࡀࡍࡀࡉ ࡓࡂࡉࡂࡀࡕࡀ ࡌࡀࡎࡂࡉࡀࡍ ࡁࡄࡉࡐࡉࡀ ࡗ ࡌࡔࡀࡋࡌࡀࡍ ࡄࡀࡆࡉࡍ ࡊࡁࡀࡎࡕࡀࡉ ࡌࡊࡀࡓࡀࡎࡕࡀࡉ ࡋࡉࡁࡀࡉ ࡁࡉࡁࡋࡉࡀ ࡅࡌࡀࡋࡉࡀ ࡍࡀࡕࡓࡀ ࡗ ࡄࡀࡆࡉࡍ ࡀࡌࡀࡓ ࡉࡅࡔࡀࡌࡉࡍ ࡌࡀࡋࡉࡋ ࡌࡀࡍࡃࡀ ࡖࡄࡉࡉࡀ ࡖ ࡍࡉࡌࡀࡓࡋࡇ ࡈࡀࡁࡉࡃ ࡈࡀࡁ ࡈࡀࡁ ࡌࡀࡔࡊࡀ ࡅࡈࡀࡁࡉࡃ ࡖ ࡎࡍࡉࡀ ࡌࡀࡔࡊࡀ ࡖࡁࡉࡔ ࡏࡅ ࡀࡍࡀࡕ ࡄࡀࡅࡉࡕ ࡌࡊࡉࡊࡀ ࡆࡉࡅࡀࡊ ࡋࡀࡔࡍࡀ ࡌࡍ ࡃࡅࡊࡕࡇ ࡄࡀࡔࡕࡀ ࡖࡀࡍࡀࡕ ࡄࡀࡔࡉࡁࡕ ࡁࡉࡔࡅࡕࡀ ࡔࡀࡐࡉࡓ ࡀࡕࡓࡀ ࡖࡉࡀࡕࡁࡀࡕࡁࡇ ࡗ ࡄࡀࡆࡉࡍ ࡀࡌࡀࡓ ࡌࡀࡍࡃࡀ ࡖࡄࡉࡉࡀ ࡌࡀࡋࡉࡋ ࡉࡅࡔࡀࡌࡉࡍ ࡖࡍࡉࡌࡀࡓࡋࡇ ࡁࡓ ࡀࡍࡀ ࡉࡀࡃࡀࡍࡀ ࡌࡀࡍ ࡖࡏࡎࡓࡀࡍ ࡁࡄࡀࡆࡉࡍ ࡀࡎࡀࡓࡀ ࡖࡏࡋࡀࡉ ࡖࡊࡀࡃࡉࡓ ࡏࡋࡀࡉ ࡆࡀࡉࡍࡀ ࡅࡃࡒࡀࡋࡉࡋ ࡌࡉࡍࡇ ࡕࡉࡄࡃࡀࡓ ࡏࡋࡀࡉ ࡌࡉࡄࡃࡀࡓ ࡂࡉࡄࡓࡉࡕ ࡁࡂࡄࡀࡓࡕࡀࡉ ࡓࡀࡁࡕࡉࡀ ࡅࡐࡀࡎࡉࡕ ࡈࡅࡓࡉࡀ ࡊࡅࡋࡄࡅࡍ ࡀࡁࡀࡃࡉࡋࡅࡍ ࡏࡋ ࡁࡉࡋࡃࡁࡀࡁࡀࡉ ࡖࡄࡀࡃ ࡋࡄࡀࡁࡓࡇ ࡋࡀࡌࡈࡀ ࡏࡋࡀࡉ ࡖࡄࡀࡅࡉࡀ ࡉࡅࡌࡀ ࡖࡁࡅࡕࡀ ࡄࡀࡅࡉࡀ ࡏࡋࡀࡉ ࡏࡅ ࡄࡀࡅࡉࡀ ࡄࡀࡆࡉࡍ ࡖࡊࡅࡓࡎࡀࡉ ࡌࡉࡕࡓࡉࡑ ࡐࡅࡓࡀࡍࡀ ࡋࡓࡀࡔࡉࡅࡕࡀ ࡖ ࡈࡀࡁࡉࡀ ࡄࡀࡅࡉࡀ ࡋࡁࡉࡔࡉࡀ ࡄࡉࡍࡏࡋࡀ ࡎࡌࡉࡊࡋࡉࡀ ࡎࡉࡌࡀࡊࡀ ࡖࡉࡀࡃࡀࡍࡀ ࡖࡋࡀࡉࡉࡕ ࡁࡀࡋࡄࡅࡃࡀࡉ ࡀࡍࡀ ࡔࡌࡉࡋࡉࡀ ࡌࡍ ࡀࡁ ࡖࡓࡅࡓࡁࡉࡀ ࡖࡌࡉࡕࡀࡅࡆࡉࡐࡉࡀ ࡏࡋ ࡃࡉࡓࡃࡒࡉࡀ ࡌࡉࡔࡕࡀࡉࡉࡋࡉࡀ ࡁࡄࡀࡈࡀࡉࡅࡍ ࡅࡀࡁࡀࡄࡀࡕࡀ ࡋࡀࡎࡀࡍࡉࡀ ࡁࡍࡉࡀ ࡗ ࡄࡀࡆࡉࡍ ࡀࡌࡀࡓ ࡉࡅࡔࡀࡌࡉࡍ ࡄࡉࡉࡀ ࡓࡁࡉࡀ ࡀࡄࡃࡅࡍ ࡏࡋ ࡌࡀࡋࡀࡋࡇ ࡔࡀࡃࡓࡅࡉࡀ ࡋࡍࡑࡀࡁ ࡆࡉࡅࡀ ࡍࡀࡈࡓࡀ ࡖࡉࡀࡕࡉࡁ ࡁࡊࡅࡋ ࡀࡕࡀࡓ ࡀࡌࡀࡓ ࡀࡌࡀࡓࡋࡇ ࡏࡆࡉࡋ ࡋࡅࡀࡕ ࡉࡅࡔࡀࡌࡉࡍ ࡅࡀࡎࡌࡉࡊࡋࡇ ࡋࡉࡁࡇ ࡏࡋ ࡎࡀࡌࡊࡇ ࡅࡀࡌࡀࡓࡋࡇ ࡖࡀࡍࡀࡕ ࡌࡍ ࡍࡉࡑࡅࡁࡕࡀࡍ ࡋࡀࡍࡉࡔࡉࡁࡒࡀࡊ ࡁࡀࡋࡄࡅࡃࡀࡊ ࡋࡀࡕࡉࡌࡀࡓ ࡖࡁࡀࡋࡄࡅࡃࡀࡉ ࡀࡍࡀ ࡔࡊࡉࡍࡕࡀࡊ ࡌࡕࡀࡒࡍࡀ ࡁࡆࡉࡅࡀ ࡅࡏࡒࡀࡓࡀ ࡅࡀࡒࡓࡀࡊ ࡅࡁࡉࡍࡉࡀࡍࡀࡊ ࡌࡉࡕࡀࡓࡌࡉࡀ ࡗ ࡖࡄࡅࡍ ࡁࡍࡀࡊ ࡌࡉࡕࡒࡀࡉࡌࡉࡋࡀࡊ ࡅࡔࡂࡀࡍࡃࡀࡊ ࡁࡔࡊࡉࡍࡕࡀࡊ ࡍࡀࡈࡓࡉࡀ ࡊࡅࡓࡎࡉࡀࡊ ࡌࡕࡀࡒࡀࡍ ࡅࡌࡉࡕࡓࡉࡑ ࡗ ࡖࡄࡅࡀ ࡅࡌࡉࡕࡒࡉࡓࡉࡉࡕ ࡌࡀࡋࡊࡀ ࡁࡔࡊࡉࡍࡕࡀࡊ ࡗ ࡄࡀࡆࡉࡍ ࡔࡅࡌࡀ ࡍࡑࡀࡁ ࡆࡉࡅࡀ ࡀࡎࡂࡉࡀ ࡀࡋࡅࡀࡕ ࡉࡅࡔࡀࡌࡉࡍ ࡀࡕࡀ ࡀࡌࡀࡓࡋࡇ ࡉࡀ ࡉࡅࡔࡀࡌࡉࡍ ࡔࡅࡌࡀ ࡌࡀࡋࡀࡋࡀࡉ ࡖࡀࡌࡀࡓࡍࡀ ࡀࡍࡀ ࡋࡀࡕࡉࡓࡍࡉࡀ ࡅࡋࡀࡕࡉࡊࡅࡀ ࡅࡋࡀࡕࡀࡉࡉࡋ ࡄࡀࡎࡉࡓࡅࡕࡀ ࡏࡋ ࡏࡅࡑࡓࡀࡊ ࡀࡋࡌࡀ ࡖࡏࡕࡉࡕࡋࡇ ࡏࡋ ࡌࡉࡄࡅࡉࡀ ࡄࡀࡉࡆࡉࡍ ࡌࡁࡀࡈࡋࡀࡕࡋࡇ ࡓࡅࡓࡁࡉࡀ ࡀࡍࡀ ࡔࡀࡃࡓࡅࡍ ࡓࡁࡉࡀ ࡅࡀࡌࡀࡓࡅࡋࡉࡀ ࡋࡅࡀࡕ ࡉࡅࡔࡀࡌࡉࡍ ࡏࡆࡉࡋ ࡀࡍࡄࡀ ࡋࡉࡅࡔࡀࡌࡉࡍ ࡅࡀࡌࡀࡓࡋࡇ ࡖࡍࡀࡍࡄࡉࡓࡉࡍࡅࡍ ࡋࡏࡅࡕࡓࡇ ࡊࡅࡋࡄࡅࡍ ࡍࡏࡎࡕࡌࡉࡊ ࡅࡍࡉࡌࡀࡓ ࡅࡍࡉࡕࡌࡀࡊࡀࡊ ࡅࡍࡉࡃࡀ ࡖ ࡀࡋࡅࡀࡕࡀࡍ ࡌࡉࡕࡓࡉࡑ ࡄࡀࡔࡕࡀ ࡀࡍࡀࡕ ࡉࡅࡔࡀࡌࡉࡍ ࡌࡉࡍࡉࡋࡕࡀ ࡖࡔࡓࡀࡓࡀ ࡔࡅࡌࡀ ࡏࡋ ࡍࡉࡄࡅࡕࡀ ࡅࡎࡉࡈࡀࡓ ࡌࡍ ࡀࡌࡓࡉࡃࡅࡕࡀ ࡄࡅࡉࡀ ࡄࡀࡔࡕࡀ ࡀࡓࡒࡀ ࡎࡓࡅࡕࡀ ࡌࡍ ࡔࡊࡉࡍࡕࡀࡊ ࡅࡆࡉࡒࡀ ࡁࡀࡎࡉࡌࡀ ࡍࡀࡔࡉࡌ ࡏࡋࡀࡊ ࡀࡕࡉࡀ ࡀࡉࡀࡓ ࡃࡀࡊࡉࡀ ࡅࡋࡓࡉࡃࡐࡀ ࡄࡀࡉࡆࡀࡊ ࡌࡀࡍࡔࡉࡀࡕࡋࡇ ࡕࡀࡒࡍࡉࡕ ࡅࡍࡀࡄࡓࡉࡕ ࡅࡌࡉࡕࡒࡀࡉࡌࡉࡕ ࡅࡄࡀࡅࡉࡕ ࡌࡀࡋࡊࡀ ࡁࡀࡋࡌࡀࡊ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡏࡌࡓࡉࡕ ࡖࡏࡄࡅࡉࡀ ࡓࡁࡀ ࡆࡅࡈࡀ ࡁࡕࡉࡁࡉࡋ ࡌࡀࡍ ࡒࡓࡀࡍ ࡏࡌࡓࡉࡕ ࡖࡏࡄࡅࡉࡀ ࡌࡀࡋࡊࡀ ࡀࡋࡌࡀ ࡖࡀࡔࡐࡋࡅࡍ ࡌࡍ ࡊࡅࡓࡎࡉࡀࡉ ࡎࡉࡍࡉࡀࡍ ࡍࡁࡀࡈ ࡓࡁࡀ ࡅࡔࡀࡓࡀࡕ ࡏࡌ ࡎࡍࡀࡕࡀࡍ ࡀࡄࡓࡉࡁࡕࡉࡍࡅࡍ ࡋࡀࡋࡌࡀࡉ ࡄࡅࡓࡁࡀ ࡌࡉࡈࡉࡇ ࡋࡔࡊࡉࡍࡕࡀࡉ ࡗ ࡍࡉࡄࡀ ࡀࡄࡅࡀࡕ ࡅࡌࡊࡉࡊࡀ ࡀࡋࡌࡀ ࡌࡓࡉࡃࡀ ࡒࡓࡅࡍ ࡗ ࡔࡉࡋࡌࡅࡍ ࡀࡍࡀ ࡔࡀࡋࡌࡀࡍࡀ ࡀࡋࡌࡀ ࡖࡌࡀࡓࡉࡀ ࡄࡅࡎࡓࡀࡍࡀ ࡒࡓࡅࡍ ࡗ ࡊࡔࡉࡓࡀ ࡄࡅࡉࡕ ࡅࡌࡊࡀࡔࡓࡀ ࡀࡋࡌࡀ ࡍࡎࡉࡎࡀ ࡁࡀࡋࡌࡀ ࡒࡓࡅࡍ ࡗ ࡌࡀࡋࡊࡀ ࡄࡅࡉࡕ ࡁࡓࡉࡔ ࡀࡋࡌࡉࡀ ࡖࡍࡄࡅࡓࡀ ࡀࡋࡌࡀ ࡖ ࡁࡃࡍࡀࡁ ࡀࡋࡌࡉࡀ ࡀࡅࡕࡁࡅࡍ ࡀࡅࡕࡁࡅࡍ ࡁࡃࡍࡀࡁ ࡀࡋࡌࡉࡀ ࡅࡀࡍࡀ ࡁࡎࡀࡃࡀ ࡍࡀࡈࡀࡓࡍࡀ ࡀࡋࡌࡀ ࡖࡒࡓࡅࡍ ࡌࡓࡉࡃࡀ ࡅࡍࡉࡄࡀ ࡌࡉࡍࡀࡉ ࡏࡒࡓࡉࡀ ࡗ ࡌࡀࡋࡊࡀ ࡀࡄࡅࡉࡕ ࡁࡀࡋࡌࡉࡀ ࡀࡋࡌࡀ ࡌࡀࡓࡉࡀ ࡒࡀࡓࡉࡀ ࡒࡓࡅࡍ ࡄࡀࡉࡃࡉࡍ ࡅࡄࡀࡉࡃࡉࡍ ࡕࡉࡌࡉࡈࡉࡇ ࡋࡊࡅࡋ ࡂࡀࡁࡓࡀ ࡖࡓࡉࡈࡍࡀ ࡖࡀࡍࡀࡍࡉࡀ ࡔࡀࡌࡀ ࡏࡅࡕࡓࡀ ࡖࡔࡀࡌࡀ ࡓࡉࡈࡍࡀࡉࡅࡍ ࡖࡀࡍࡀࡍࡉࡀ ࡌࡉࡔࡕࡐࡉࡋ ࡌࡉࡍࡇ ࡌࡍ ࡀࡋࡌࡀ ࡐࡀࡎ ࡗ ࡐࡓࡉࡔࡀࡉࡀ ࡄࡅࡉࡕ ࡌࡍ ࡏࡅࡕࡓࡉࡀ ࡀࡋࡌࡀ ࡖࡕࡌࡀࡍࡀࡉࡀ ࡒࡓࡅࡍ ࡀࡋࡌࡀ ࡖࡔࡉࡓࡉࡅࡉࡀ ࡋࡍࡄࡅࡓࡀ ࡌࡉࡍࡀࡉ ࡅࡆࡉࡅࡀࡉ ࡃࡓࡅࡉࡀ ࡔࡒࡀࡋࡅࡍࡅࡍ ࡋࡏࡅࡑࡈࡋࡀࡉ ࡌࡉࡍࡀࡉ ࡅࡀࡎࡓࡅࡍ ࡁࡀࡎࡀࡓࡀ ࡃࡅࡊࡕࡀ ࡖࡁࡀࡉࡉࡍࡅࡍ ࡋࡀࡁࡀࡄࡀࡕࡀࡉ ࡅࡀࡉࡍࡀࡉ ࡁࡀࡉࡍࡀࡉࡅࡍ ࡋࡀࡍࡀࡐࡋࡀ ࡁࡀࡉࡉࡍࡀ ࡋࡆࡀࡉࡍࡀࡉ ࡅࡆࡀࡉࡍࡀࡉ ࡁࡀࡉࡍࡀࡉ ࡋࡀࡍࡀࡐࡋࡀ ࡁࡀࡉࡉࡍࡀ ࡋࡏࡅࡕࡓࡉࡀ ࡁࡍࡀࡉ ࡄࡉࡍࡅࡍ ࡁࡀࡉࡍࡀࡉ ࡋࡀࡍࡀࡐࡋࡉࡀ ࡗ ࡀࡊࡑࡀࡋࡉࡀ ࡅࡊࡀࡁࡓࡀࡋࡉࡀ ࡀࡍࡀ ࡁࡀࡊࡉࡍࡀ ࡌࡍ ࡍࡀࡐࡔࡀࡉ ࡌࡍ ࡊࡅࡋࡄࡅࡍ ࡏࡅࡕࡓࡉࡀ ࡖࡀࡁࡀࡃࡉࡅࡍ ࡄࡅࡎࡓࡀࡍࡀ ࡀࡍࡀ ࡔࡉࡋࡌࡅࡍ ࡄࡅࡎࡓࡀࡍࡀ ࡋࡀࡁࡃࡉࡕ ࡗ ࡍࡉࡄࡀ ࡀࡒࡀࡌࡄ ࡖࡌࡀࡋࡊࡀ ࡀࡄࡅࡉࡕ ࡀࡋࡌࡀ ࡖࡀࡔࡐࡋࡅࡍ ࡌࡍ ࡊࡅࡓࡎࡉࡀࡉ ࡅࡀࡉ ࡃࡉࡋࡉࡀ ࡖࡐࡅࡌࡀࡉ ࡀࡔࡐࡋࡀࡍ ࡅࡋࡉࡔࡀࡍࡀࡉ ࡄࡅࡀࡋࡉࡀ ࡓࡉࡃࡐࡀ ࡁࡏࡎࡅࡓࡀ ࡀࡅࡕࡁࡅࡍ ࡓࡀࡃࡀࡉࡀ ࡒࡓࡅࡍ ࡅࡁࡀࡒࡀࡓࡀ ࡖࡐࡅࡌࡀࡉ ࡀࡔࡐࡋࡅࡍ ࡌࡍ ࡊࡅࡓࡎࡀࡉ ࡗ ࡌࡀࡋࡊࡀ ࡄࡅࡉࡕ ࡔࡀࡅࡉࡅࡍ ࡏࡅࡕࡓࡀ ࡖࡀࡒࡀࡌࡀࡉ ࡌࡀࡋࡊࡀ ࡗ ࡍࡉࡄࡀ ࡄࡅࡉࡕ ࡅࡌࡊࡉࡊࡀ ࡎࡉࡍࡉࡅࡍ ࡏࡅࡕࡓࡉࡀ ࡖࡋࡃࡉࡋࡉࡀ ࡀࡋࡀ ࡊࡅࡋࡄࡅࡍ ࡍࡉࡈࡅࡁࡉࡀࡕࡀ ࡖࡄࡅࡀࡋࡉࡀ ࡋࡃࡉࡋࡉࡀ ࡊࡅࡋࡄࡉࡍ ࡄࡏ ࡊࡅࡋࡄࡉࡍ ࡓࡂࡀࡆࡉࡀࡍ ࡏࡋࡀࡉ ࡁࡓࡅࡂࡆࡀ ࡓࡁࡀ ࡅࡀࡎࡓࡅࡍ ࡁࡄࡃࡀ ࡃࡅࡊࡕࡀ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡓࡀࡉࡀ ࡀࡍࡀ ࡖࡀࡒࡍࡇ ࡓࡀࡄࡉࡌ ࡀࡒࡍࡀ ࡅࡏࡌࡁࡓࡉࡀ ࡓࡀࡉࡉࡍࡀ ࡁࡑࡀࡅࡓࡀࡉ ࡃࡉࡁࡍࡀ ࡅࡌࡍ ࡌࡀࡕࡀ ࡃࡉࡁࡍࡀ ࡋࡀࡌࡉࡕࡓࡀࡄࡒࡉࡀ ࡅࡋࡀࡈࡀࡉࡁࡉࡍࡅࡍ ࡋࡊࡉࡍࡐࡀ ࡖࡉࡀࡌࡀ ࡏࡃࡉࡋࡌࡀ ࡊࡓࡉࡊࡕࡀ ࡖࡌࡉࡀ ࡄࡀࡆࡉࡍ ࡏࡃࡉࡋࡌࡀ ࡃࡀࡄࡋࡀࡍ ࡌࡍ ࡌࡉࡀ ࡅࡊࡖ ࡑࡀࡄࡉࡀࡍ ࡌࡉࡀ ࡋࡀࡔࡀࡕࡉࡀࡍ ࡃࡀࡓࡀࡍࡀ ࡅࡌࡀࡔࡒࡉࡍࡅࡍ ࡌࡉࡀ ࡁࡄࡅࡐࡍࡀࡉ ࡀࡋࡌࡀ ࡖࡔࡀࡕࡉࡀ ࡅࡓࡀࡅࡉࡀࡍ ࡌࡀࡉࡕࡉࡍࡉࡍ ࡋࡃࡉࡁࡍࡀ ࡈࡅࡁࡀ ࡅࡀࡁࡉࡄࡃࡀࡉ ࡓࡀࡉࡀ ࡌࡍ ࡐࡅࡌ ࡐࡓࡀࡔ ࡌࡍ ࡐࡅࡌࡀ ࡖࡐࡓࡀࡔ ࡆࡉࡅࡀ ࡀࡉࡕࡉࡋࡉࡍ ࡖࡔࡀࡍࡀࡉ ࡈࡀࡁࡅࡕࡀ ࡀࡉࡕࡉࡋࡉࡍ ࡀࡎࡀ ࡅࡔࡅࡔࡌࡀ ࡄࡉࡅࡀࡓࡀ ࡅࡀࡉࡕࡉࡋࡉࡍ ࡃࡓࡀࡁࡔࡉࡀ ࡕࡀࡒࡍࡉࡀ ࡊࡀࡍࡔࡉࡍࡉࡍ ࡅࡆࡀࡄࡋࡉࡍࡉࡍ ࡅࡓࡉࡄࡀ ࡖࡄࡉࡉࡀ ࡌࡀࡓࡄࡉࡍࡉࡍ ࡀࡎࡀࡓࡉࡍࡉࡍ ࡄࡉࡌࡉࡀࡍࡀ ࡖࡄࡀࡆࡉࡋࡇ ࡓࡁࡉࡀ ࡅࡌࡉࡔࡕࡀࡓࡄࡆࡉࡀ ࡋࡀࡃࡉࡁࡀ ࡔࡀࡅࡀࡓ ࡃࡉࡁࡍࡀࡍ ࡅࡋࡀࡌࡍ ࡀࡓࡉࡀ ࡌࡓࡉࡃࡀ ࡄࡀࡉࡒࡀࡍ ࡅࡋࡀࡃࡀࡄࡋࡀࡍ ࡌࡍ ࡆࡉࡒࡀ ࡅࡂࡀࡍࡀࡁࡀ ࡋࡀ ࡌࡑࡉࡀ ࡖࡍࡉࡅࡋ ࡏࡋࡀࡍ ࡋࡀࡉࡉࡋ ࡂࡀࡍࡀࡁࡀ ࡋࡃࡉࡁࡍࡀࡉࡉࡍ ࡅࡌࡍ ࡎࡉࡊࡉࡍࡀ ࡖࡐࡀࡓࡆࡋࡀ ࡋࡀࡌࡀࡍࡃࡉࡔࡀࡍ ࡏࡋࡇ ࡖࡀࡉࡍࡀࡉ ࡖࡂࡀࡍࡉࡀࡍ ࡁࡉࡔࡋࡅࡌ ࡅࡓࡉࡔࡀࡉ ࡃࡉࡋࡉࡀ ࡏࡋ ࡏࡎࡒࡅࡐࡕࡀ ࡐࡒࡀ ࡐࡉࡒࡀ ࡁࡌࡓࡅࡌ ࡅࡂࡀࡓࡂࡅࡋ ࡂࡉࡄࡓࡀࡕ ࡌࡍ ࡀࡁࡀࡕࡓࡀࡉ ࡀࡉࡁࡀ ࡋࡂࡀࡈ ࡄࡃࡀࡃࡉࡀ ࡅࡀࡒࡀࡓࡉࡅࡍ ࡆࡉࡒࡉࡀ ࡌࡀࡓࡃࡉࡀ ࡌࡉࡈࡓࡀ ࡍࡐࡀࡋ ࡁࡃࡂࡅࡓࡉࡀ ࡅࡂࡋࡀࡋࡀ ࡖࡐࡉࡋࡉࡀ ࡂࡀࡈࡋࡀ ࡂࡋࡀࡋࡀ ࡖࡐࡀࡉࡎࡀ ࡈࡅࡓࡉࡀ ࡅࡆࡉࡒࡉࡀ ࡀࡒࡓࡉࡀ ࡁࡄࡃࡀ ࡔࡉࡕࡀ ࡀࡕࡅࡍ ࡉࡀࡌࡀࡌࡉࡀ ࡅࡈࡅࡁࡅࡍࡅࡍ ࡏࡋ ࡊࡅࡋࡄࡅࡍ ࡀࡋࡌࡉࡀ ࡄࡀࡕࡀࡌ ࡀࡕࡅࡕࡉࡀ ࡌࡉࡀ ࡋࡀࡔࡀࡍࡉࡀ ࡔࡀࡐࡀࡋࡀ ࡌࡍ ࡌࡅࡋࡉࡀ ࡗ ࡐࡅࡌࡀ ࡀࡄࡋࡉࡐࡉࡅࡍ ࡌࡉࡀ ࡖࡀࡂࡀࡍࡐࡉࡀ ࡅࡋࡉࡂࡓࡉࡀ ࡋࡉࡕࡋࡇ ࡀࡆࡉࡋ ࡅࡋࡀࡉࡀࡃࡀ ࡖࡍࡉࡆࡀࡋ ࡗ ࡀࡕࡉࡀ ࡅࡋࡀࡉࡀࡃࡀ ࡖࡀࡕࡀ ࡔࡅࡓࡉࡕ ࡀࡋࡉࡕ ࡋࡃࡉࡁࡍࡀ ࡋࡌࡉࡈࡉࡁ ࡀࡉࡍࡀࡉ ࡌࡍ ࡃࡅࡊࡕࡉࡍ ࡌࡋࡉࡕ ࡀࡉࡍࡀࡉ ࡄࡆࡀࡉࡕࡇ ࡋࡉࡀࡌࡀ ࡄࡆࡀࡉࡕࡇ ࡋࡆࡉࡒࡀ ࡌࡀࡓࡃࡀ ࡄࡆࡀࡉࡕࡉࡍࡅࡍ ࡋࡀࡍࡀࡍࡉࡀ ࡖࡌࡉࡈࡓࡀ ࡖࡔࡋࡀࡌࡀ ࡋࡄࡃࡀࡃࡉࡀ ࡋࡀࡉࡀࡄࡁࡀࡍ ࡓࡅࡁࡀࡍ ࡓࡅࡁࡀࡍ ࡕࡀࡍࡉࡍࡉࡀ ࡁࡊࡅࡋ ࡄࡀࡃ ࡀࡍࡀࡍࡀ ࡏࡊࡀ ࡀࡍࡀ ࡁࡀࡊࡉࡍࡀ ࡏࡋ ࡀࡒࡍࡀࡉ ࡅࡀࡒࡍࡀࡉ ࡏࡋ ࡍࡀࡐࡔࡀࡉࡄࡅࡍ ࡁࡀࡊࡉࡀࡍ ࡁࡀࡊࡉࡍ ࡏࡌࡁࡓࡉࡀ ࡆࡅࡈࡉࡀ ࡖࡌࡍ ࡁࡀࡁࡀ ࡖࡃࡉࡁࡍࡀ ࡋࡀࡍࡀࡐࡒࡀࡍ ࡗ ࡄࡀࡉࡆࡉࡍ ࡀࡉࡋࡉࡋࡇ ࡋࡁࡀࡉࡕࡀ ࡎࡉࡋࡒࡉࡕ ࡒࡀࡌࡉࡕ ࡏࡋ ࡓࡀࡌࡕࡀ ࡒࡀࡓࡉࡍࡀ ࡋࡀࡒࡍࡀ ࡃࡉࡋࡉࡀ ࡋࡀࡒࡍࡀࡉ ࡖࡋࡅࡀࡕࡀࡉ ࡄࡉࡍࡅࡍ ࡒࡀࡓࡉࡍࡉࡍ ࡅࡔࡀࡓࡒࡍࡉࡍ ࡅࡌࡀࡔࡌࡀࡍࡉࡍ ࡖࡋࡅࡀࡕࡀࡉ ࡃࡉࡋࡉࡀ ࡀࡕࡉࡀࡍ ࡔࡀࡓࡉࡒࡍࡉࡍ ࡁࡌࡀࡔࡓࡅࡒࡕࡀࡉ ࡄࡀࡁࡉࡈࡍࡀ ࡁࡆࡀࡊࡀࡉࡕࡀࡉ ࡋࡌࡉࡀ ࡀࡌࡀࡓࡍࡀࡋࡉࡍ ࡀࡒࡍࡀࡉ ࡀࡒࡍࡀࡉ ࡀࡕࡉࡀࡍ ࡋࡒࡀࡋࡀࡉ ࡕࡓࡉࡑ ࡀࡍࡀࡕࡅࡍ ࡕࡓࡉࡑ ࡋࡒࡀࡋࡀࡉ ࡖࡌࡍ ࡕࡀࡍࡉࡍࡉࡀ ࡕࡉࡕࡐࡀࡓࡒࡅࡍ ࡀࡕࡅࡍ ࡀࡕࡅࡍ ࡀࡋࡅࡀࡕࡀࡉ ࡓࡀࡉࡀ ࡀࡍࡀ ࡖࡋࡉࡂࡀࡋ ࡎࡐࡉࡍࡕࡀࡉ ࡀࡕࡉࡀ ࡀࡕࡉࡀ ࡎࡐࡉࡍࡕࡀࡉ ࡖࡆࡉࡅࡀ ࡅࡀࡕࡉࡍࡀ ࡅࡌࡀࡎࡒࡍࡀ ࡀࡒࡍࡀࡉ ࡅࡏࡌࡁࡓࡀࡉ ࡊࡅࡋ ࡖࡔࡉࡌࡀࡕ ࡒࡀࡋࡀࡉ ࡅࡑࡀࡅࡕࡀࡉ ࡅࡀࡍࡐࡇ ࡋࡅࡀࡕࡀࡉ ࡀࡄࡃࡓࡀࡕ ࡂࡀࡌࡉࡈࡍࡀ ࡁࡏࡃࡀࡉ ࡕࡀࡓࡕࡉࡍࡉࡍ ࡅࡌࡀࡎࡉࡒࡍࡇ ࡀࡋࡅࡀࡕࡀࡉ ࡋࡅࡀࡕࡇ ࡋࡎࡐࡉࡍࡕࡀࡉ ࡊࡅࡋ ࡐࡀࡓࡀ ࡅࡐࡀࡓࡕࡀ ࡖࡏࡔࡕࡁࡉࡀ ࡊࡓࡉࡊࡕࡀ ࡖࡌࡉࡀ ࡀࡔࡐࡉࡋࡕࡄ ࡀࡊࡋࡉࡀ ࡌࡉࡀ ࡊࡀࡐࡍࡉࡀ ࡅࡌࡀࡍ ࡖࡋࡀࡔࡉࡌࡇ ࡋࡒࡀࡋࡀࡉ ࡔࡉࡐࡋࡀࡕ ࡒࡀࡌࡉࡕ ࡏࡋ ࡓࡀࡌࡕࡀ ࡖࡀࡓࡁࡀ ࡌࡄࡀࡓࡀ ࡒࡀࡉࡉࡌ ࡀࡋࡉࡄࡃࡉࡀ ࡊࡅࡃࡊࡀ ࡀࡌࡀࡓࡍࡀ ࡀࡊࡌࡀ ࡊࡀࡓࡉࡀࡋࡉࡀ ࡏࡋ ࡀࡍࡀࡉ ࡖࡔࡀࡐࡋࡀࡍ ࡌࡉࡍࡇ ࡌࡍ ࡒࡉࡐࡉࡀ ࡈࡀࡁࡀࡕࡉࡍࡅࡍ ࡌࡉࡍࡀࡉ ࡊࡓࡉࡊࡕࡀ ࡖࡌࡉࡀ ࡊࡓࡉࡊࡕࡀ ࡖࡌࡉࡀ ࡊࡀࡓࡊࡀ ࡊࡌࡀ ࡊࡀࡓࡉࡀࡋࡉࡀ ࡏࡋ ࡂࡀࡁࡋࡉࡀ ࡏࡔࡍࡉࡀ ࡖࡀࡒࡀࡌࡓࡀ ࡖ ࡂࡀࡍࡁࡀࡉࡄࡅࡍ ࡈࡀࡁࡀࡕࡉࡍࡅࡍ ࡊࡌࡀ ࡊࡀࡓࡉࡀࡋࡉࡀ ࡏࡋ ࡏࡌࡁࡓࡅࡎࡉࡀ ࡖࡊࡀࡓࡎࡀࡉࡅࡍ ࡄࡀࡋࡁࡀ ࡋࡀࡌࡋࡀࡕ ࡌࡍ ࡀࡋࡐࡀ ࡄࡃࡀ ࡀࡔࡊࡉࡕ ࡅࡌࡍ ࡃࡀࡓࡀ ࡊࡅࡋࡇ ࡀࡔࡊࡉࡕ ࡀࡕࡓࡉࡍ ࡈࡅࡁࡇ ࡋࡌࡀࡍ ࡖࡀࡒࡓࡉࡀ ࡁࡌࡉࡀ ࡅࡌࡉࡀ ࡁࡏࡅࡃࡍࡇ ࡋࡀࡉࡉࡕ ࡈࡅࡁࡀࡉࡅࡍ ࡋࡂࡀࡁࡋࡉࡀ ࡓࡁࡉࡀ ࡖࡁࡈࡀࡔ ࡁࡋࡉࡂࡓࡀࡉࡅࡍ ࡈࡅࡁࡇ ࡋࡌࡀࡍ ࡖࡕࡐࡀࡓࡀࡒ ࡌࡍ ࡔࡅࡁࡀ ࡅࡕࡓࡉࡎࡀࡓ ࡖࡀࡒࡍࡀ ࡂࡀࡍࡁࡉࡀ ࡈࡅࡁࡇ ࡋࡌࡀࡍ ࡋࡀࡂࡍࡀ ࡅࡋࡀࡔࡊࡅࡁ ࡅࡔࡉࡍࡕࡀ ࡊࡀࡃࡉࡓࡕࡉࡀ ࡋࡀࡓࡄࡉࡌ ࡈࡅࡁࡇ ࡋࡌࡀࡍ ࡖࡁࡄࡀࡆࡉࡍ ࡃࡀࡓࡀ ࡁࡑࡉࡓࡀ ࡖࡁࡉࡔࡋࡅࡌ ࡔࡋࡉࡌ ࡈࡅࡁࡇ ࡋࡌࡀࡍ ࡖࡕࡓࡀࡑ ࡊࡋࡉࡋࡀ ࡅࡂࡀࡌࡁࡇ ࡀࡕࡍࡀ ࡁࡅࡓࡆࡉࡍࡒࡀ ࡈࡅࡁࡀࡉࡄࡅࡍ ࡏࡋ ࡕࡀࡓࡌࡉࡃࡉࡀࡕࡀ ࡖࡌࡍ ࡒࡋࡀࡋࡉࡀ ࡖࡓࡅࡄࡀ ࡌࡉࡕࡐࡀࡓࡒࡀࡍ ࡌࡉࡕࡐࡀࡓࡒࡀࡍ ࡌࡍ ࡈࡀࡍࡐࡅࡕࡀ ࡅࡒࡋࡀࡋࡀ ࡅࡔࡉࡔࡉࡋࡕࡀ ࡖࡋࡀࡔࡀࡋࡌࡀ ࡁࡄࡉࡓࡀࡉ ࡊࡅࡋ ࡌࡀࡍ ࡖࡁࡃࡉࡍࡁࡀ ࡖࡃࡀࡓࡀ ࡖࡍࡉࡓࡉࡂ ࡄࡀࡅࡉࡀ ࡏࡅࡑࡓࡇ ࡍࡉࡄࡅࡉࡋࡇ ࡎࡉࡌࡀࡊࡀ ࡄࡅ ࡍࡉࡕࡉࡀ ࡅࡍࡉࡎࡀࡒ ࡋࡃࡀࡅࡓࡀ ࡕࡀࡒࡍࡀ ࡀࡕࡓࡀ ࡖࡋࡀࡓࡁࡀ ࡔࡀࡌࡔࡉࡇ ࡅࡔࡓࡀࡂࡉࡀ ࡖࡍࡄࡅࡓࡀ ࡋࡀ ࡄࡀࡔࡊࡉࡀ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡏࡅࡕࡓࡀ ࡌࡍ ࡋࡁࡀࡓ ࡒࡀࡓࡉࡀ ࡅࡀࡌࡀࡓ ࡀࡕࡀ ࡓࡀࡄࡉࡌ ࡓࡀࡉࡀ ࡄࡅࡉࡋࡉࡀ ࡅࡓࡉࡋࡉࡀ ࡀࡋࡐࡀ ࡌࡍ ࡓࡅࡁࡀࡍ ࡀࡍࡀ ࡄࡀࡆࡉࡍ ࡄࡅࡉࡋࡀࡊ ࡓࡀࡄࡉࡌ ࡓࡀࡉࡀ ࡅࡏࡓࡉࡉࡋࡀࡊ ࡀࡋࡐࡀ ࡌࡍ ࡓࡅࡁࡀࡍ ࡊࡌࡀ ࡀࡋࡌࡀ ࡌࡋࡉࡀ ࡁࡉࡔࡅࡕࡀ ࡅࡆࡓࡉࡀ ࡁࡊࡅࡁࡀ ࡅࡀࡈࡀࡈࡀ ࡀࡕࡀ ࡓࡀࡄࡉࡌ ࡓࡀࡉࡀ ࡄࡅࡉࡋࡉࡀ ࡅࡏࡓࡉࡋࡉࡀ ࡀࡋࡐࡀ ࡌࡍ ࡓࡅࡁࡀࡍ ࡖࡀࡍࡀ ࡏࡕࡉࡋࡀࡊ ࡎࡀࡍࡃࡋࡉࡀ ࡖࡆࡉࡅࡀ ࡖࡃࡀࡓࡊࡀࡕࡁࡅࡍ ࡊࡅࡁࡀ ࡅࡀࡈࡀࡈࡀ ࡀࡓࡒࡀ ࡅࡏࡔࡅࡌࡉࡀ ࡁࡀࡈࡋࡀࡍ ࡅࡎࡀࡍࡃࡋࡉࡀ ࡖࡆࡉࡅࡀ ࡋࡀࡁࡀࡈࡋࡉࡀ ࡔࡀࡌࡉࡔ ࡅࡎࡉࡓࡀ ࡁࡀࡈࡋࡉࡍ ࡅࡎࡀࡍࡃࡋࡉࡀ ࡖࡆࡉࡅࡀ ࡋࡀࡁࡀࡈࡋࡉࡍ ࡊࡅࡊࡁࡉࡀ ࡅࡌࡀࡍࡆࡀࡋࡀࡕࡀ ࡖࡏࡔࡅࡌࡉࡀ ࡁࡀࡈࡋࡉࡀ ࡅࡎࡀࡍࡃࡋࡉࡀ ࡖࡆࡉࡅࡀ ࡋࡀࡁࡀࡈࡋࡉࡀ ࡆࡉࡒࡀ ࡅࡍࡅࡓࡀ ࡅࡌࡉࡀ ࡁࡀࡈࡋࡉࡀ ࡅࡎࡀࡍࡃࡋࡉࡀ ࡖࡆࡉࡅࡀ ࡋࡀࡁࡀࡈࡋࡉࡀ ࡀࡓࡁࡀ ࡆࡉࡒࡉࡀ ࡖࡁࡀࡉࡕࡀ ࡁࡀࡈࡋࡉࡀ ࡅࡎࡀࡍࡃࡋࡉࡀ ࡖࡆࡉࡅࡀ ࡋࡀࡁࡀࡈࡋࡉࡀ ࡐࡉࡓࡉࡀ ࡅࡏࡍࡁࡉࡀ ࡅࡏࡋࡀࡍࡉࡀ ࡁࡀࡈࡋࡉࡀ ࡅࡎࡍࡃࡋࡉࡀ ࡖࡆࡉࡅࡀ ࡋࡀࡁࡀࡈࡋࡉࡀ ࡊࡅࡋ ࡖࡏࡁࡉࡃ ࡅࡌࡀࡁࡀࡃ ࡁࡀࡈࡉࡋ ࡅࡎࡍࡃࡋࡉࡀ ࡖࡆࡉࡅࡀ ࡋࡀࡁࡀࡈࡋࡉࡀ ࡀࡕࡀ ࡓࡀࡄࡉࡌ ࡓࡀࡉࡀ ࡄࡅࡉࡋࡉࡀ ࡅࡏࡓࡉࡋࡉࡀ ࡀࡋࡐࡀ ࡌࡍ ࡓࡅࡁࡀࡍ ࡀࡍࡀ ࡄࡀࡉࡆࡉࡍ ࡄࡅࡉࡋࡀࡊ ࡓࡀࡄࡉࡌ ࡓࡀࡉࡀ ࡅࡏࡓࡉࡋࡀࡊ ࡀࡋࡐࡀ ࡌࡍ ࡓࡅࡁࡀࡍ ࡖࡀࡕࡉࡀ ࡀࡓࡉࡀ ࡅࡃࡀࡓࡀࡋࡇ ࡀࡍࡀ ࡌࡉࡋࡉࡀ ࡏࡉࡀࡉࡕࡇ ࡅࡏࡌࡉࡍࡉࡇ ࡖࡀࡕࡉࡀ ࡃࡉࡁࡀ ࡅࡃࡀࡓࡀࡋࡇ ࡀࡍࡀ ࡌࡉࡋࡉࡀ ࡏࡉࡀࡉࡕࡇ ࡅࡏࡌࡉࡍࡉࡉࡇ ࡖࡀࡕࡉࡀ ࡂࡀࡍࡀࡁࡀ ࡅࡂࡀࡍࡉࡁࡋࡇ ࡌࡉࡋࡉࡀ ࡏࡉࡀࡉࡕࡇ ࡅࡏࡌࡉࡍࡉࡉࡇ ࡖࡍࡀࡐࡋࡀ ࡁࡍࡅࡓࡀ ࡅࡁࡀࡔࡋࡀ ࡌࡉࡋࡉࡀ ࡏࡉࡀࡉࡕࡇ ࡅࡏࡌࡉࡍࡉࡉࡇ ࡖࡍࡀࡐࡋࡀ ࡁࡔࡉࡊࡍࡀ ࡅࡌࡉࡔࡕࡉࡊࡍࡀ ࡌࡉࡋࡉࡀ ࡏࡉࡀࡉࡕࡇ ࡅࡏࡌࡉࡍࡉࡇ ࡖࡍࡀࡐࡋࡀ ࡁࡌࡉࡀ ࡅࡈࡀࡁࡀ ࡌࡉࡋࡉࡀ ࡏࡉࡀࡉࡕࡇ ࡅࡏࡌࡉࡍࡉࡉࡇ ࡖࡐࡀࡉࡉࡔࡀ ࡁࡂࡅ ࡃࡉࡁࡍࡀ ࡌࡉࡋࡉࡀ ࡏࡉࡀࡉࡕࡇ ࡅࡏࡌࡉࡍࡉࡇ ࡀࡕࡀ ࡓࡀࡄࡉࡌ ࡓࡀࡉࡀ ࡄࡅࡉࡋࡉࡀ ࡅࡓࡏࡉࡋࡉࡀ ࡀࡐࡋࡀ ࡌࡍ ࡓࡅࡁࡀࡍ ࡖࡀࡕࡉࡀ ࡀࡓࡉࡀ ࡅࡃࡀࡓࡀࡋࡇ ࡕࡉࡆࡀࡋ ࡌࡍࡀࡕࡀ ࡖࡀࡓࡉࡀ ࡕࡉࡄࡅࡉࡀ ࡕࡉࡆࡀࡋ ࡕࡉࡄࡅࡉࡀ ࡌࡍࡀࡕࡀ ࡖࡀࡓࡉࡀ ࡀࡌࡉࡍࡈࡅࡋ ࡖࡏࡋ ࡔࡀࡌࡉࡔ ࡎࡀࡂࡃࡀ ࡖࡀࡕࡉࡀ ࡃࡉࡁࡀ ࡅࡃࡀࡓࡀࡋࡇ ࡕࡉࡆࡀࡋ ࡀࡌࡍࡀࡕࡀ ࡖࡃࡉࡁࡀ ࡕࡉࡄࡅࡉࡀ ࡕࡉࡆࡀࡋ ࡕࡉࡄࡅࡉࡀ ࡌࡍࡀࡕࡀ ࡖࡃࡉࡁࡀ ࡀࡌࡉࡍࡈࡅࡋ ࡖࡏࡋ ࡎࡉࡓࡀ ࡎࡀࡂࡃࡀ ࡖࡀࡕࡉࡀ ࡂࡀࡍࡀࡁࡀ ࡅࡂࡀࡍࡉࡁࡋࡇ ࡕࡉࡆࡀࡋ ࡀࡌࡍࡀࡕࡀ ࡖࡂࡀࡍࡀࡁࡀ ࡕࡉࡄࡅࡉࡀ ࡕࡉࡆࡀࡋ ࡕࡄࡅࡉࡀ ࡀࡌࡍࡀࡕࡀ ࡖࡂࡀࡍࡀࡁࡀ ࡀࡌࡉࡍࡈࡅࡋ ࡖࡏࡋ ࡍࡉࡓࡉࡂ ࡎࡀࡂࡃࡀ ࡖࡍࡀࡐࡋࡀ ࡀࡁࡍࡅࡓࡀ ࡅࡁࡀࡔࡋࡀ ࡕࡉࡆࡀࡋ ࡌࡍࡀࡕࡀ ࡖࡍࡅࡓࡀ ࡕࡉࡄࡅࡉࡀ ࡕࡉࡆࡀࡋ ࡕࡉࡄࡅࡉࡀ ࡀࡌࡍࡀࡕࡀ ࡖࡍࡅࡓࡀ ࡀࡌࡉࡍࡈࡅࡋ ࡖࡏࡋ ࡍࡅࡓࡀ ࡎࡀࡂࡃࡀ ࡖࡍࡀࡐࡋࡀ ࡁࡔࡉࡊࡍࡀ ࡅࡌࡉࡔࡕࡉࡊࡍࡀ ࡕࡉࡆࡀࡋ ࡀࡌࡍࡀࡕࡀ ࡖࡔࡉࡊࡍࡀ ࡕࡉࡄࡅࡉࡀ ࡕࡉࡆࡀࡋ ࡕࡉࡄࡅࡉࡀ ࡀࡌࡍࡀࡕࡀ ࡖࡔࡉࡊࡍࡀ ࡀࡌࡉࡍࡈࡅࡋ ࡖࡋࡌࡔࡉࡄࡀ ࡎࡀࡂࡃࡀ ࡖࡍࡀࡐࡉࡋ ࡁࡌࡉࡀ ࡅࡈࡀࡁࡀ ࡕࡉࡆࡀࡋ ࡀࡌࡍࡀࡕࡀ ࡖࡉࡀࡌࡀ ࡕࡉࡄࡅࡉࡀ ࡕࡉࡆࡀࡋ ࡕࡉࡄࡅࡉࡀ ࡀࡌࡍࡀࡕࡀ ࡖࡉࡀࡌࡀ ࡀࡌࡉࡍࡈࡅࡋ ࡖࡏࡋ ࡉࡀࡌࡀࡌࡉࡀ ࡎࡀࡂࡃࡀ ࡖࡐࡀࡉࡉࡔࡀ ࡁࡂࡅ ࡃࡉࡁࡍࡀ ࡕࡉࡆࡀࡋ ࡀࡌࡍࡀࡕࡀ ࡖࡂࡅࡃࡉࡁࡍࡀ ࡕࡉࡄࡅࡉࡀ ࡕࡉࡆࡀࡋ ࡕࡉࡄࡅࡉࡀ ࡌࡍࡀࡕ ࡂࡅࡃࡉࡁࡍࡀ ࡀࡌࡉࡍࡈࡅࡋ ࡖࡋࡏࡊࡅࡓࡉࡀ ࡎࡀࡃࡀ ࡅࡋࡀࡎࡀࡂࡃࡀ ࡖࡁࡀࡉࡕࡀ ࡎࡀࡂࡃࡀ ࡖࡐࡀࡉࡉࡔ ࡅ ࡀࡂࡀࡌࡁࡉࡀ ࡂࡅ ࡃࡉࡁࡍࡀ ࡕࡉࡄࡅࡉࡀ ࡕࡉࡆࡀࡋ ࡕࡉࡄࡅࡉࡀ ࡌࡍࡀࡕ ࡀࡂࡀࡌࡁࡉࡀ ࡂࡅ ࡃࡉࡁࡍࡀ ࡀࡌࡉࡍࡈࡅࡋ ࡖࡏࡋ ࡓࡅࡄࡀ ࡖࡒࡅࡃࡔࡀ ࡎࡀࡂࡃࡀ ࡀࡕࡀ ࡓࡀࡄࡉࡌ ࡓࡀࡉࡀ ࡀࡄࡅࡉࡋࡉࡀ ࡅࡏࡓࡉࡉࡋࡉࡀ ࡀࡋࡐࡀ ࡌࡍ ࡓࡅࡁࡀࡍ ࡀࡍࡀ ࡄࡀࡉࡆࡉࡍ ࡄࡅࡉࡋࡀࡊ ࡓࡀࡄࡉࡌ ࡓࡀࡉࡀ ࡅࡏࡓࡉࡉࡋࡀࡊ ࡀࡋࡐࡀ ࡌࡍ ࡓࡅࡁࡀࡍ ࡀࡍࡀ ࡀࡋࡐࡀ ࡖࡀࡋࡐࡉࡀ ࡓࡀࡉࡀࡍࡀ ࡅࡌࡍ ࡓࡅࡁࡀࡍ ࡖࡒࡅࡃࡀࡌࡇ ࡎࡀࡂࡃࡉࡀ ࡔࡂࡅࡋࡉࡀ ࡌࡉࡍࡀࡉࡄࡅࡍ ࡎࡉࡋࡒࡉࡕ ࡏࡋ ࡈࡅࡓࡉࡀ ࡓࡀࡌࡉࡀ ࡅࡍࡉࡄࡕࡉࡕ ࡏࡋ ࡍࡀࡄࡋࡉࡀ ࡀࡌࡅࡒࡉࡀ ࡏࡆࡋࡉࡕ ࡅࡀࡔࡊࡀࡕࡇ ࡏࡊࡀ ࡂࡉࡑࡐࡀ ࡋࡀࡂࡀࡑࡐࡀ ࡄࡃࡀ ࡄࡃࡀ ࡋࡂࡀࡈࡕࡇ ࡁࡉࡀࡌࡉࡍࡀࡉ ࡅࡀࡕࡍࡀࡕࡇ ࡀࡁࡌࡅࡆࡀࡍࡉࡀ ࡕࡀࡒࡋࡉࡀ ࡕࡀࡒࡋࡉࡀ ࡀࡋࡐࡀ ࡌࡍ ࡓࡅࡁࡀࡍ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡏࡋࡊࡅࡍ ࡀࡌࡉࡓࡍࡀ ࡅࡌࡀࡐࡓࡉࡔࡍࡀ ࡀࡁࡄࡉࡓࡉࡀ ࡅࡔࡀࡋࡌࡀࡍࡉࡀ ࡖ ࡃࡀࡉࡓࡉࡀ ࡁࡂࡀࡅࡇ ࡖࡀࡋࡌࡀ ࡋࡀࡕࡉࡄࡅࡍ ࡀࡌࡍࡀ ࡄࡔࡅࡊࡀ ࡅࡀࡉࡍࡀࡉࡊࡅࡍ ࡀࡕࡓࡅࡑ ࡋࡀࡕࡀࡓ ࡍࡄࡅࡓ ࡏࡕࡀࡐࡓࡀࡔ ࡌࡍ ࡁࡉࡔࡀ ࡅࡈࡀࡁࡀ ࡏࡕࡀࡐࡓࡀࡔ ࡌࡍ ࡁࡉࡔࡀ ࡄࡀࡈࡉࡀ ࡖ ࡀࡕࡀࡓ ࡄࡔࡅࡊ ࡓࡄࡅࡌ ࡅࡀࡎࡁࡀࡓ ࡀࡄࡃࡀࡃࡉࡀ ࡖ ࡄࡀࡈࡀࡉࡊࡅࡍ ࡅࡄࡀࡅࡁࡊࡅࡍ ࡌࡉࡔࡕࡁࡉࡒࡋࡊࡅࡍ ࡄࡆࡉࡍ ࡅࡔࡅࡌࡀ ࡅࡏࡕࡀࡐࡓࡀࡔ ࡅࡎࡀࡒ ࡁࡆࡀࡊࡅࡕࡀ ࡋࡀࡕࡀࡓ ࡍࡄࡅࡓ ࡉࡀࡕࡁࡉࡀ ࡅࡁࡀࡉࡉࡍ ࡈࡀࡁࡉࡀ ࡅࡊࡌࡀ ࡖࡁࡀࡉࡍࡉࡀ [ࡅ]ࡌࡉࡕࡀࡐࡓࡉࡔࡉࡀ ࡀࡌࡓࡉࡀ ࡈࡀࡁࡉࡀ ࡅࡌࡉࡕࡌࡀࡋࡊࡉࡀ ࡅࡀࡌࡓࡉࡀ ࡌࡀࡍ ࡖࡍࡉࡕࡉࡀ ࡅࡌࡀࡍ ࡖ ࡍࡉࡌࡀࡓࡋࡉࡀ ࡌࡀࡍ ࡍࡀࡅࡃࡀࡍ ࡅࡌࡀࡍ ࡍࡀࡐࡓࡉࡔࡀࡍ ࡌࡀࡍ ࡖࡍࡉࡕࡉࡀ ࡅࡌࡀࡍ ࡖࡍࡉࡌࡀࡓࡋࡉࡀ ࡖࡄࡀࡃ ࡄࡅࡀ ࡌࡀࡋࡊࡀ ࡏࡅ ࡀࡕࡓࡉࡍ ࡌࡉࡌࡀࡓ ࡀࡌࡓࡉࡀ ࡈࡀࡁࡉࡀ ࡅࡌࡉࡕࡀࡐࡓࡉࡔࡉࡀ ࡕࡓࡉࡍ ࡌࡀࡋࡊࡉࡀ ࡄࡅࡍ ࡕࡓࡉࡍ ࡊࡉࡀࡍࡉࡀ ࡏࡕࡉࡒࡓࡅࡍ ࡌࡀࡋࡊࡀ ࡖࡄࡀࡆࡉࡍ ࡀࡋࡌࡀ ࡅࡌࡀࡋࡊࡀ ࡖࡁࡀࡓࡉࡅࡕ ࡀࡋࡌࡉࡀ ࡌࡀࡋࡊࡀ ࡖࡄࡀࡆࡉࡍ ࡃࡀࡓࡉࡀ ࡄࡉࡓࡁࡀ ࡅࡕࡀࡂࡀ ࡖࡄࡔࡅࡊࡀ ࡎࡀࡌࡋࡇ ࡕࡀࡂࡀ ࡎࡀࡌࡋࡇ ࡖ ࡄࡔࡅࡊࡀ ࡅࡄࡉࡓࡁࡀ ࡀࡁࡉࡀࡌࡉࡍࡇ ࡋࡂࡀࡈ ࡄࡉࡓࡁࡀ ࡋࡂࡀࡈ ࡁࡉࡀࡌࡉࡍࡇ ࡅࡒࡀࡉࡉࡌ ࡋࡁࡍࡇ ࡌࡂࡀࡈࡉࡋࡅࡍ ࡅࡁࡍࡇ ࡀࡄࡃࡀࡃࡉࡀ ࡂࡀࡈࡋࡉࡀ ࡌࡀࡋࡊࡀ ࡖࡁࡀࡓࡉࡅࡕ ࡀࡋࡌࡉࡀ ࡕࡀࡂࡀ ࡖࡍࡄࡅࡓࡀ ࡎࡀࡌࡋࡇ ࡕࡀࡂࡀ ࡎࡀࡌࡋࡇ ࡖࡍࡄࡅࡓࡀ ࡅࡊࡅࡔࡈࡀ ࡁࡉࡀࡌࡉࡍࡇ ࡀࡋࡂࡀࡈ ࡊࡅࡔࡈࡀ ࡋࡂࡀࡈ ࡁࡉࡀࡌࡉࡍࡇ ࡒࡀࡉࡉࡌ ࡅࡁࡍࡇ ࡌࡀࡐࡓࡉࡔ ࡒࡀࡉࡉࡌ ࡅࡌࡀࡐࡓࡉࡔࡋࡅࡍ ࡋࡁࡍࡇ ࡅࡁࡍࡇ ࡄࡃࡀࡃࡉࡀ ࡌࡉࡕࡀࡐࡓࡉࡔࡉࡀ ࡌࡀࡍ ࡖ ࡍࡉࡕࡉࡀ ࡅࡌࡀࡍ ࡖࡍࡉࡌࡀࡓࡋࡉࡀ ࡖࡌࡍ ࡎࡀࡊࡀ ࡌࡀࡄࡅ ࡄࡅࡀ ࡅࡃࡋࡀ ࡍࡂࡀࡃ ࡓࡒࡉࡄࡀ ࡅࡃࡋࡀ ࡏࡑࡈࡀࡓࡀࡓ ࡁࡂࡀࡅࡇ ࡊࡅࡊࡁࡉࡀ ࡅࡃࡋࡀ ࡕࡉࡌࡎࡉࡀ ࡀࡓࡒࡀ ࡅࡃࡋࡀ ࡌࡎࡅࡕࡀ ࡕࡉࡐࡉࡋ ࡁࡌࡉࡀ ࡅࡃࡋࡀ ࡔࡀࡌࡉࡔ ࡅࡎࡉࡓࡀ ࡍࡀࡎࡂࡅࡍ ࡋࡂࡀࡅࡇ ࡖࡄࡀࡆࡉࡍ ࡀࡋࡌࡀ ࡄࡀࡉࡆࡉࡍ ࡄࡅࡀࡕ ࡍࡉࡔࡉࡌࡕࡀ ࡗ ࡁࡊࡀࡍࡀ ࡄࡅࡀࡕ ࡉࡀࡕࡁࡀ ࡋࡀࡊࡀࡐࡍࡀ ࡅࡋࡀ ࡑࡀࡄࡉࡀ ࡍࡉࡔࡉࡌࡕࡀ ࡗ ࡁࡊࡀࡍࡀ ࡄࡅࡀࡕ ࡉࡀࡕࡁࡀ ࡋࡀࡊࡉࡁࡉࡀ ࡅࡋࡀࡌࡅࡌࡉࡀ ࡋࡍࡉࡔࡉࡌࡕࡀ ࡗ ࡁࡊࡀࡍࡀ ࡄࡅࡀࡕ ࡉࡀࡕࡁࡀ ࡋࡀ ࡄࡀࡌࡉࡌࡀ ࡅࡋࡀࡒࡀࡓࡉࡓࡀ ࡋࡍࡉࡔࡉࡌࡕࡀ ࡗ ࡁࡊࡀࡍࡀ ࡄࡅࡀ[ࡕ] ࡉࡀࡕࡁࡀ ࡌࡉࡂࡃࡀࡋ ࡂࡃࡉࡋࡉࡀ ࡒࡀࡓࡍࡇ ࡅࡊࡋࡉࡋࡀ ࡖࡀࡉࡀࡓ ࡕࡓࡉࡑࡋࡇ ࡁࡓࡉࡔࡇ ࡀࡉࡍࡇ ࡐࡀࡎࡉࡌࡊࡉࡀ ࡖࡍࡄࡅࡓࡀ ࡅࡎࡀࡊࡉࡀ ࡋࡀࡕࡓࡀ ࡖࡁࡉࡕ ࡓࡅࡓࡁࡀࡍࡉࡀ ࡐࡅࡌࡀࡉ ࡖࡕࡅࡔࡋࡉࡌࡀ ࡃࡀࡊࡉࡀ ࡖࡌࡔࡀࡁࡀ ࡋࡌࡀࡋࡊࡀ ࡖ ࡀࡕࡀࡓ ࡀࡍࡄࡅࡓ ࡌࡍ ࡉࡅࡌࡀ ࡖࡄࡀࡔࡉࡁ ࡁࡉࡔ ࡀࡁࡉࡔࡅࡕࡀ ࡁࡂࡀࡅࡇ ࡂࡉࡁࡋࡀࡕ ࡓࡂࡀࡆ ࡁࡓࡅࡂࡆࡀ ࡓࡁࡀ ࡅࡒࡓࡀࡁࡀ ࡌࡍ ࡍࡅࡓࡀ ࡀࡁࡀࡃ ࡏࡔࡕࡀࡃࡀࡓ ࡀࡔࡂࡀࡍࡃࡀ ࡋࡌࡉࡊࡁࡀࡔ ࡋࡄࡀࡉࡋࡀ ࡖࡌࡀࡓࡃࡉࡀ ࡀࡕࡉࡍࡅࡍ ࡋࡌࡉࡀ ࡄࡉࡉࡀ ࡅࡓࡌࡅࡍࡅࡍ ࡁࡌࡉࡀ ࡕࡀࡄࡌࡉࡀ ࡀࡕࡉࡅࡉࡀ ࡋࡆࡉࡒࡀ ࡁࡀࡎࡉࡌࡀ ࡅࡓࡀࡌࡉࡅࡉࡀ ࡁࡆࡉࡒࡀ ࡌࡀࡓࡃࡀ ࡀࡕࡉࡅࡉࡀ ࡏࡋ ࡍࡅࡓࡀ ࡄࡀࡉࡕࡀ ࡅࡓࡉࡌࡉࡅࡉࡀ ࡁࡍࡅࡓࡀ ࡀࡊࡋࡀ ࡀࡕࡉࡅࡉࡀ ࡅ ࡋࡍࡉࡔࡉࡌࡕࡀ ࡌࡀࡍࡀ ࡃࡀࡊࡉࡀ ࡅࡓࡉࡌࡉࡅࡉࡀ ࡀࡁࡐࡀࡂࡓࡀ ࡁࡀࡈࡋࡀ ࡌࡍ ࡍࡅࡓࡀ ࡅࡌࡍ ࡌࡉࡀ ࡄࡃࡀ ࡓࡒࡉࡄࡀ ࡏࡕࡉࡍࡂࡉࡃ ࡌࡍ ࡍࡅࡓࡀ ࡅࡌࡍ ࡌࡉࡀ ࡀࡓࡒࡀ ࡁࡎࡀࡃࡀࡍࡀ ࡌࡎࡅࡍ ࡌࡍ ࡍࡅࡓࡀ ࡅࡌࡍ ࡌࡉࡀ ࡐࡉࡓࡉࡀ ࡅࡏࡌࡁࡉࡀ ࡅࡏࡋࡀࡍࡉࡀ ࡄࡅࡍ ࡌࡍ ࡍࡅࡓࡀ ࡅࡌࡍ ࡌࡉࡀ ࡀࡃࡀࡌ ࡖ ࡐࡀࡂࡓࡉࡀ ࡏࡕࡉࡂࡁࡉࡋ ࡍࡉࡑࡁࡅࡉࡀ ࡋࡀࡔࡂࡀࡍࡃࡀ ࡅࡏࡋ ࡓࡁࡀ ࡖ ࡃࡀࡓࡉࡀ ࡔࡀࡃࡓࡅࡉࡀ ࡒࡓࡀࡁࡇ ࡁࡊࡀࡋࡅࡆࡀ ࡁࡂࡀࡅࡇ ࡖࡌࡀࡓࡂࡅࡔ ࡀࡋࡌࡀ ࡏࡋ ࡒࡀࡋࡇ ࡖࡔࡂࡀࡍࡃࡀ ࡀࡃࡀࡌ ࡖࡔࡀࡊࡉࡁ ࡏࡕࡀࡓ ࡀࡃࡀࡌ ࡏࡕࡀࡓ ࡖࡔࡀࡊࡉࡁ ࡀࡋࡀࡍࡐࡇ ࡖࡔࡂࡀࡍࡃࡀ ࡍࡐࡀࡒ ࡀࡕࡀ ࡁࡔࡋࡀࡌ ࡀࡔࡂࡀࡍࡃࡀ ࡔࡋࡉࡄࡀ ࡖࡄࡉࡉࡀ ࡖࡌࡍ ࡁࡉࡕ ࡀࡁ ࡀࡕࡀ ࡄࡀࡉࡆࡉࡍ ࡍࡑࡉࡁࡉࡀ ࡄࡉࡉࡀ ࡉࡀࡒࡉࡓࡉࡀ ࡅࡔࡀࡐࡉࡓࡉࡀ ࡁࡀࡕࡓࡀࡉࡅࡍ ࡄࡀࡉࡆࡉࡍ ࡕࡓࡉࡑࡋࡉࡀ ࡊࡅࡓࡎࡉࡀ ࡅࡃࡌࡅࡕࡀࡉ ࡖࡄࡀࡔࡊࡀ ࡁࡌࡀࡋࡉࡀ ࡉࡀࡕࡁࡀ ࡌࡀࡋࡉࡋ ࡀࡔࡂࡀࡍࡃࡀ ࡅࡋࡀࡃࡀࡌ ࡖࡐࡀࡂࡓࡉࡀ ࡖࡍࡉࡌࡀࡓࡋࡇ ࡔࡀࡐࡉࡓࡉࡀ ࡕࡓࡀࡑ ࡊࡅࡓࡎࡉࡀࡊ ࡀࡃࡀࡌ ࡅࡃࡌࡅࡕࡀࡊ ࡄࡀࡊࡀ ࡁࡌࡀࡋࡉࡀ ࡉࡀࡕࡁࡀ ࡊࡅࡋࡄࡅࡍ ࡋࡈࡀࡁ ࡏࡃࡉࡊࡓࡅࡊ ࡅࡋࡃࡉࡋࡉࡀ ࡍࡉࡑࡁࡅࡍ ࡅࡔࡀࡃࡓࡅࡍ ࡏࡋࡀࡊ ࡏࡕࡉࡕ ࡏࡉࡀࡐࡓࡉࡔࡀࡊ ࡀࡃࡀࡌ ࡖࡏࡐࡀࡓࡒࡀࡊ ࡌࡉࡍࡇ ࡖࡄࡀࡆࡉࡍ ࡀࡋࡌࡀ ࡑࡅࡕ ࡅࡔࡅࡌࡀ ࡅࡏࡕࡀࡐࡓࡀࡔ ࡅࡎࡀࡒ ࡁࡆࡀࡊࡅࡕࡀ ࡋࡀࡕࡀࡓ ࡍࡄࡅࡓ ࡀࡃࡀࡌ ࡔࡅࡌࡀ ࡅࡏࡕࡄࡀࡉࡌࡀࡍ ࡈࡅࡁࡇ ࡋࡌࡀࡍ ࡖࡔࡅࡌࡀ ࡅࡄࡀࡉࡌࡀࡍ ࡌࡍ ࡀࡁࡀࡕࡓࡀࡊ ࡀࡃࡀࡌ ࡍࡎࡉࡁ ࡊࡅࡔࡈࡀ ࡈࡅࡁࡇ ࡋࡌࡀࡍ ࡖ ࡍࡎࡉࡁ ࡊࡅࡔࡈࡀ ࡌࡍ ࡀࡁࡀࡕࡓࡀࡊ ࡀࡃࡀࡌ ࡎࡊࡀ ࡅࡎࡋࡉࡒ ࡈࡅࡁࡇ ࡋࡌࡀࡍ ࡖࡍࡉࡎࡀࡒ ࡌࡍ ࡀࡁࡀࡕࡓࡀࡊ ࡑࡅࡕ ࡅࡔࡅࡌࡀ ࡅࡏࡕࡀࡐࡓࡀࡔ ࡔࡀࡋࡌࡀࡍࡉࡀ ࡅࡎࡀࡒ ࡁࡆࡀࡊࡅࡕࡀ ࡋࡀࡕࡀࡓ ࡍࡄࡅࡓ ࡅࡌࡔࡀࡁࡉࡍ ࡄࡉࡉࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡔࡅࡌ ࡊࡅࡔࡈࡀ ࡒࡀࡉࡉࡌ ࡃࡀࡓࡉࡔ ࡅࡌࡀࡐࡓࡉࡔ ࡔࡅࡌ ࡁࡓ ࡍࡅ ࡔࡅࡌ ࡊࡅࡔࡈࡀ ࡒࡀࡉࡉࡌ ࡅࡋࡌࡀࡓࡉࡀ ࡌࡀࡃࡍࡉࡀ ࡅࡀࡌࡀࡓ ࡔࡋࡉࡌ ࡊࡏࡋࡀࡉ ࡅࡁࡀࡉࡉࡍࡀ ࡋࡌࡉࡆࡀࡋ ࡅࡋࡀࡉࡀࡃࡀࡍࡀ ࡌࡀࡍࡅ ࡃࡀࡁࡓࡀࡉ ࡖ ࡏࡅࡄࡓࡀࡉ ࡊࡌࡀ ࡄࡀࡅࡉࡀ ࡋࡀࡌࡍ ࡈࡅࡁࡉࡀ ࡅࡋࡀࡌࡍ ࡁࡉࡔࡉࡀ ࡋࡉࡊࡀ ࡖࡀࡆࡀࡋ ࡅࡄࡃࡀࡓ ࡖࡏࡔࡀࡉࡉࡋࡇ ࡖࡏࡅࡄࡓࡀࡉ ࡊࡌࡀ ࡄࡀࡅࡉࡀ ࡋࡀࡌࡍ ࡍࡉࡄࡉࡀ ࡅࡋࡀࡌࡍ ࡌࡓࡉࡃࡉࡀ ࡋࡉࡊࡀ ࡖࡀࡆࡀࡋ ࡅࡏࡕࡊࡀࡌࡀࡓ ࡀࡕࡀ ࡏࡔࡀࡉࡋࡇ ࡖࡏࡅࡄࡓࡀࡉ ࡊࡌࡀ ࡄࡀࡅࡉࡀ ࡀࡍࡀ ࡌࡀࡄࡅ ࡖࡉࡀࡄࡁࡉࡕ ࡉࡀࡄࡁࡉࡋࡉࡀ ࡅࡌࡀࡄࡅ ࡖࡀࡓࡔࡉࡕ ࡌࡀࡓࡔࡉࡍ ࡏࡋࡀࡉ ࡎࡋࡉࡒ ࡕࡅࡒࡍࡀ ࡅࡍࡐࡉࡔ ࡃࡅࡓࡃࡉࡀ ࡋࡉࡊࡀ ࡖࡀࡕࡉࡀ ࡅࡌࡔࡀࡉࡉࡋ ࡏࡋࡀࡉ ࡎࡋࡉࡒ ࡃࡅࡊࡉࡀ ࡅࡍࡐࡉࡔ ࡈࡍࡉࡐࡉࡀ ࡋࡉࡊࡀ ࡖࡀࡕࡉࡀ ࡅࡌࡔࡀࡉࡉࡋ ࡏࡋࡀࡉ ࡅࡀࡌࡀࡓ ࡒࡅࡌ ࡍࡀࡎࡂࡉࡀ ࡀࡍࡀ ࡌࡀࡄࡅ ࡀࡁࡃࡉࡕ ࡅࡌࡀࡄࡅ ࡀࡓࡔࡉࡕ ࡗ ࡀࡆࡉࡋࡍࡀ ࡖࡃࡀࡓࡀࡍࡀ ࡆࡀࡅࡀࡃࡉࡀ ࡏࡋࡀࡉ ࡀࡍࡀ ࡄࡀࡆࡀ ࡖࡔࡉࡌࡉࡕ ࡄࡀࡆࡀ ࡖࡀࡕࡀ ࡁࡏࡅࡃࡍࡀࡉ ࡍࡐࡀࡋ ࡊࡅࡋ ࡌࡀࡍ ࡖ ࡃࡓࡉࡀ ࡆࡀࡅࡀࡃࡉࡀ ࡀࡁࡉࡄࡃࡇ ࡗ ࡌࡀࡈࡉࡀ ࡋࡌࡀࡁࡓࡀ ࡀࡁࡓࡅࡉࡀ ࡊࡅࡋࡌࡀࡍ ࡖࡋࡀࡃࡓࡉࡀ ࡆࡀࡅࡀࡃࡉࡀ ࡀࡁࡉࡄࡃࡇ ࡉࡀࡕࡉࡁ ࡅࡍࡀࡈࡀࡓ ࡋࡌࡀࡁࡓࡀ ࡀࡄࡅࡀࡓ ࡓࡉࡔࡀࡉ ࡅࡁࡀࡉࡉࡍࡀ ࡋࡌࡉࡆࡀࡋ ࡗ ࡆࡉࡓࡀ ࡖࡄࡑࡀࡃࡇ ࡌࡈࡀ ࡒࡀࡌ ࡀࡉࡍࡀࡉ ࡌࡍ ࡌࡉࡄࡆࡉࡀ ࡗ ࡀࡒࡓࡀ ࡖࡈࡋࡀࡋࡇ ࡍࡐࡀࡋ ࡒࡀࡌ ࡏࡅࡃࡍࡀࡉ ࡌࡍ ࡌࡉࡔࡕࡀ ࡗ ࡀࡒࡀࡓࡕࡀ ࡖࡋࡀࡄࡅࡀࡋࡇ ࡁࡓࡀ ࡒࡀࡌ ࡐࡅࡌࡀࡉ ࡌࡍ ࡌࡉࡔࡕࡀࡉࡅࡉࡉࡀ ࡗ ࡍࡀࡄࡓࡀ ࡖࡌࡍ ࡐࡅࡌࡇ ࡉࡀࡁࡔࡀ ࡒࡀࡌ ࡏࡃࡀࡉ ࡌࡍ ࡌࡉࡁࡀࡃ ࡗ ࡀࡕࡅࡀࡕ ࡖࡉࡀࡋࡃࡀ ࡋࡀࡌࡓࡀࡁࡉࡀ ࡒࡀࡌ ࡋࡉࡂࡓࡀࡉ ࡌࡍ ࡌࡀࡎࡂࡅࡉࡉࡀ ࡗ ࡀࡋࡂࡀ ࡖࡎࡉࡐࡓࡀ ࡋࡀࡉࡀࡋࡉࡐ ࡓࡉࡄࡈࡉࡕ ࡏࡅࡌࡀࡌࡀ ࡅࡋࡉࡋࡉࡀ ࡋࡉࡂࡈࡉࡕ ࡆࡀࡅࡀ ࡅࡓࡀࡁࡉࡕ ࡁࡍࡉࡀ ࡋࡉࡂࡈࡉࡕ ࡆࡀࡅࡀ ࡓࡀࡂࡀࡂࡕࡀ ࡖࡄࡀࡆࡉࡍ ࡀࡋࡌࡀ ࡓࡀࡁࡉࡕ ࡏࡁࡍࡉࡀ ࡄࡀࡊࡀ ࡗ ࡓࡀࡁࡉࡀࡍ ࡀࡁ ࡋࡃࡉࡋࡉࡀ ࡀࡓࡔࡉࡕࡇ ࡐࡅࡃࡀࡍࡀ ࡁࡂࡀࡅࡇ ࡖࡄࡀࡆࡉࡍ ࡀࡋࡌࡀ ࡋࡉࡌࡀࡋࡉࡀ ࡖࡋࡉࡂࡈࡉࡕ ࡆࡀࡅࡀ ࡅࡋࡉࡌࡀࡋࡉࡀ ࡖࡄࡅࡀࡋࡉࡀ ࡁࡍࡉࡀ ࡗ ࡁࡍࡀࡉ ࡏࡅࡄࡓࡀࡉ ࡋࡀࡆࡀࡁࡍࡉࡀ ࡅࡁࡍࡀࡕࡀࡉ ࡋࡀࡌࡀࡁࡓࡀࡋࡉࡀ ࡉࡀࡌࡀ ࡓࡁࡀ ࡖࡎࡅࡐ ࡀࡄࡀࡉ ࡋࡀࡕࡉࡍ ࡀࡁࡉࡄࡃࡀࡉ ࡅࡀࡄࡅࡀࡕࡀࡉ ࡆࡅࡀࡃࡀࡉ ࡋࡀࡄࡀࡅࡉࡀࡍ ࡆࡀࡅࡀࡉ ࡖࡓࡀࡄࡌࡀࡋࡉࡀ ࡏࡅ ࡊࡀࡓࡉࡀࡋࡉࡀ ࡅࡌࡀࡃࡊࡉࡓࡋࡉࡀ ࡅࡁࡀࡊࡉࡀ ࡏࡋࡀࡉ ࡁࡉࡅࡌࡀ ࡔࡅࡕࡀ ࡄࡃࡀ ࡀࡍࡀ ࡏࡋ ࡏࡅࡁࡀࡃࡀࡉ ࡌࡉࡋࡂࡉࡈࡍࡀ ࡅࡌࡉࡎࡕࡌࡉࡊࡍࡀ ࡏࡋ ࡏࡅࡁࡀࡃࡉࡀ ࡏࡃࡀࡉ ࡗ ࡄࡀࡆࡉࡍ ࡀࡌࡀࡓ ࡔࡅࡌ ࡁࡓ ࡍࡅ ࡀࡎࡂࡉࡀ ࡀࡕࡀࡋࡇ ࡔࡋࡉࡄࡀ ࡍࡀࡑࡁࡀ ࡀࡌࡀࡓࡋࡇ ࡋࡀࡕࡉࡄࡅࡒࡋࡀࡊ ࡖࡋࡂࡀࡈࡕ ࡆࡀࡅࡀ ࡅࡋࡀ ࡕࡉࡊࡓࡉࡋࡀࡊ ࡖࡄࡅࡀࡋࡀࡊ ࡀࡁࡍࡉࡀ ࡏࡅ ࡆࡀࡅࡀ ࡁࡀࡋࡌࡀ ࡋࡀࡄࡅࡀࡕ ࡏࡔࡅࡌࡉࡀ ࡅࡀࡓࡒࡀ ࡋࡀࡄࡅࡀࡕ ࡁࡄࡀࡆࡉࡍ ࡀࡋࡌࡀ ࡋࡀࡄࡅࡀ ࡏࡔࡅࡌࡀ ࡅࡋࡀࡄࡅࡀࡕ ࡀࡓࡒࡀ ࡅࡋࡀࡏࡕࡌࡉࡎࡉࡀࡕ ࡌࡎࡅࡕࡀ ࡅࡍࡉࡐࡋࡀࡕ ࡁࡌࡉࡀ ࡏࡅ ࡆࡀࡅࡀ ࡁࡀࡋࡌࡀ ࡋࡀࡄࡅࡀࡕ ࡔࡀࡌࡉࡔ ࡅࡎࡉࡓࡀ ࡋࡄࡀࡊࡀ ࡋࡀࡎࡂࡅࡍ ࡔࡀࡌࡉࡔ ࡅࡎࡉࡓࡀ ࡋࡄࡀࡊࡀ ࡅࡋࡀࡍࡄࡅࡓ ࡍࡄࡅࡓࡀࡉࡄࡅࡍ ࡁࡄࡀࡆࡉࡍ ࡀࡋࡌࡀ ࡏࡅ ࡆࡀࡅࡀ ࡁࡀࡋࡌࡀ ࡋࡀࡄࡅࡀࡕ ࡌࡉࡀ ࡄࡉࡉࡀ ࡋࡄࡀࡊࡀ ࡋࡀࡕࡅࡍ ࡋࡀࡕࡅࡍ ࡌࡉࡀ ࡄࡉࡉࡀ ࡋࡄࡀࡊࡀ ࡅࡋࡀ ࡄࡅࡀࡕ ࡌࡀࡆࡓࡅࡕࡀ ࡁࡄࡀࡆࡉࡍ ࡀࡋࡌࡀ ࡏࡅ ࡆࡀࡅࡀ ࡁࡀࡋࡌࡀ ࡋࡀࡄࡅࡀࡕ ࡀࡉࡀࡓ ࡆࡉࡒࡀ ࡋࡄࡀࡊࡀ ࡋࡀࡕࡀࡋࡇ ࡅࡋࡀࡏࡕࡉࡍࡑࡉࡁ ࡀࡉࡀࡓ ࡅࡋࡀ ࡄࡅࡀࡕ ࡍࡅࡓࡀ ࡅࡋࡀࡏࡎࡕࡉࡄࡈࡀࡕ ࡁࡊࡅࡋ ࡌࡉࡍࡃࡀࡌ ࡄࡅࡀࡕ ࡆࡀࡅࡀ ࡄࡀࡊࡀ ࡀࡊࡅࡀࡕ ࡏࡔࡅࡌࡀ ࡅࡀࡓࡒࡀ ࡁࡄࡀࡆࡉࡍ ࡀࡋࡌࡀ ࡓࡀࡁࡉࡕ ࡁࡍࡉࡀ ࡖࡄࡀࡅࡉࡋࡀࡊ ࡁࡀࡋࡌࡀ ࡃࡀࡊࡀࡓ ࡔࡅࡌࡀ ࡆࡀࡉࡃࡉࡋࡇ ࡏࡋ ࡐࡀࡂࡓࡀࡊ ࡏࡋ ࡔࡉࡅࡋ ࡀࡕࡉࡍ ࡀࡁࡀࡕࡓࡀࡊ ࡋࡁࡉࡕ ࡒࡅࡁࡓࡉࡀ ࡒࡀࡓࡉࡋࡉࡍ ࡏࡋ ࡌࡀࡎࡒࡀࡕࡀࡊ ࡉࡅࡌࡀ ࡖࡍࡀࡐࡒࡉࡕ ࡌࡍ ࡀࡋࡌࡀ ࡉࡀࡄࡁࡉࡋࡇ ࡋࡆࡉࡃࡒࡀ ࡌࡍ ࡀࡁࡀࡕࡓࡀࡊ ࡖࡃࡉࡍࡀ ࡌࡉࡍࡀࡊ ࡋࡀ ࡌࡉࡕࡌࡀࡓ ࡌࡀࡋࡉࡋ ࡖࡍࡉࡌࡀࡓࡋࡇ ࡔࡅࡌ ࡁࡓ ࡍࡅ ࡋࡔࡋࡉࡄࡀ ࡖࡌࡍ ࡏࡌࡓࡅࡌࡀ ࡀࡕࡀ ࡏࡃࡉࡋࡌࡀ ࡂࡀࡉࡓࡉࡀ ࡂࡀࡉࡓࡀ ࡊࡀࡓࡉࡀࡋࡉࡀ ࡍࡀࡍࡂࡓࡉࡀ ࡏࡃࡉࡋࡌࡀ ࡂࡀࡍࡁࡉࡀ ࡅࡌࡉࡕࡀࡂࡆࡀࡓ ࡏࡋࡀࡉ ࡏࡃࡉࡋࡌࡀ ࡆࡀࡌࡓࡉࡀ ࡆࡌࡀࡓࡀ ࡖࡎࡀࡈࡀࡍࡀ ࡅࡀࡊࡋࡀࡋࡉࡀ ࡍࡅࡓࡀ ࡖࡉࡀࡒࡃࡀ ࡏࡃࡉࡋࡌࡀ ࡊࡀࡐࡓࡉࡍ ࡁࡔࡅࡌࡀ ࡖࡄࡉࡉࡀ ࡅࡌࡀࡉࡕࡍࡀ ࡀࡕࡓࡉࡍ ࡌࡉࡕࡉࡀ ࡁࡄࡀࡃ ࡌࡀࡋࡉࡋ ࡔࡋࡉࡄࡀ ࡖࡄࡉࡉࡀ ࡅࡏࡋ ࡔࡅࡌ ࡁࡓ ࡍࡅ ࡖ ࡍࡉࡌࡀࡓࡋࡇ ࡔࡋࡉࡄࡀ ࡖࡌࡍ ࡏࡌࡓࡅࡌࡀ ࡀࡕࡀ ࡖࡂࡀࡉࡓࡉࡀ ࡏࡋ ࡍࡅࡓࡀ ࡀࡆࡋࡉࡀ ࡅࡃࡂࡀࡍࡁࡉࡀ ࡓࡅࡂࡆࡀ ࡓࡁࡀ ࡍࡉࡄࡅࡉࡀ ࡏࡋࡀࡅࡀࡉࡄࡅࡍ ࡅࡃࡆࡀࡌࡀࡓ ࡆࡌࡀࡓࡀ ࡖࡎࡀࡈࡀࡍࡀ ࡕࡉࡊࡋࡅࡍ ࡍࡅࡓࡀ ࡖࡉࡀࡒࡃࡀ ࡅࡃࡊࡀࡐࡓࡉࡀ ࡁࡔࡅࡌࡀ ࡖࡄࡉࡉࡀ ࡍࡉࡌࡉࡕࡅࡍ ࡀࡕࡓࡉࡍ ࡌࡅࡕࡉࡀ ࡁࡄࡀࡃ ࡀࡍࡀࡕ ࡋࡀࡅ ࡃࡀࡅࡀࡓ ࡁࡕࡉࡁࡉࡋ ࡔࡀࡅࡉࡅࡊ ࡅࡋࡀࡅ ࡃࡀࡉࡀࡍࡀ ࡁࡀࡋࡌࡀ ࡒࡓࡅࡊ ࡏࡅ ࡏࡋ ࡃࡉࡋࡀࡊ ࡔࡀࡅࡉࡅࡊ ࡃࡀࡅࡀࡓ ࡀࡁࡀࡕࡅࡓ ࡋࡄࡀࡊࡀ ࡋࡀࡕࡉࡅࡉࡀ ࡀࡊࡀࡓ ࡋࡀࡋࡌࡀ ࡔࡅࡁࡒࡇ ࡕࡉࡎࡓࡅࡊࡁࡇ ࡍࡅࡓࡀ ࡅࡕࡉࡊࡋࡇ ࡅࡄࡅࡓࡁࡀ ࡍࡉࡃࡓࡇ ࡋࡕࡉࡁࡉࡋ ࡗ ࡔࡀࡋࡌࡀࡍࡉࡀ ࡌࡉࡍࡇ ࡍࡀࡐࡒࡉࡀ ࡒࡅࡌ ࡎࡀࡒ ࡋࡁࡉࡕ ࡄࡉࡉࡀ ࡓࡁࡉࡀ ࡋࡀࡕࡓࡀ ࡖࡈࡀࡁࡉࡀ ࡄࡀࡕࡀࡌ ࡔࡓࡉࡍ ࡀࡕࡓࡀ ࡖࡋࡀࡓࡁࡀ ࡔࡀࡌࡔࡉࡇ ࡅࡔࡓࡀࡂࡉࡀ ࡖࡍࡄࡅࡓࡀ ࡋࡀࡄࡀࡔࡊࡉࡀ ࡀࡕࡓࡀ ࡖࡋࡉࡕࡁࡇ ࡊࡀࡃࡁࡀ ࡅࡋࡀࡉࡉࡕ ࡁࡂࡀࡅࡇ ࡄࡀࡎࡀࡓ ࡅࡁࡑࡉࡓ ࡅࡄࡉࡉࡀ ࡆࡀࡊࡉࡍ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡔࡅࡌ ࡊࡅࡔࡈࡀ ࡒࡀࡉࡉࡌ ࡃࡀࡓࡉࡔ ࡅࡌࡀࡐࡓࡉࡔ ࡔࡅࡌ ࡁࡓ ࡍࡅ ࡔࡅࡌ ࡊࡅࡔࡈࡀ ࡒࡀࡉࡉࡌ ࡅࡀࡌࡀࡓ ࡌࡀࡄࡅ ࡄࡈࡉࡕ ࡁࡉࡕ ࡄࡉࡉࡀ ࡓࡁࡉࡀ ࡖࡃࡀࡓࡀ ࡁࡑࡉࡓࡀ ࡌࡉࡈࡉࡀࡍ ࡏࡋࡀࡉ ࡊࡁࡀࡓࡅࡍ ࡔࡅࡁࡀ ࡅࡕࡓࡉࡎࡀࡓ ࡄࡅࡋࡉࡀ ࡓࡉࡃࡐࡀ ࡏࡍࡉࡔࡉࡅࡍ ࡒࡀࡃࡌࡀࡉࡉࡀ ࡅࡕࡉࡍࡉࡀࡍࡉࡀ ࡋࡀࡌࡔࡀࡉࡋࡉࡍ ࡏࡋࡀࡉ ࡍࡉࡐࡋࡉࡕ ࡁࡏࡉࡃࡐࡀ ࡓࡁࡀ ࡅࡀࡍࡃࡀࡔࡀࡕࡀ ࡖࡋࡀࡔࡀࡋࡌࡀࡍ ࡌࡉࡈࡉࡀࡍ ࡊࡀࡓࡉࡅࡕࡀ ࡅࡀࡕࡉࡀࡍ ࡃࡉࡌࡀࡉ ࡅࡋࡀࡔࡀࡋࡌࡀࡍ ࡒࡀࡉࡌࡀ ࡅࡌࡄࡀࡔࡁࡀ ࡍࡉࡌࡓࡅࡎ ࡅࡀࡌࡓࡀࡋࡅࡍ ࡋࡌࡀࡔࡕࡅࡑࡉࡀ ࡁࡍࡇ ࡁࡄࡉࡓࡀ ࡍࡐࡀࡋ ࡁࡏࡃࡀࡉࡀࡍ ࡀࡕࡅࡍ ࡖࡍࡉࡎࡀࡊࡓࡇ ࡁࡒࡅࡋࡀࡋࡀࡍ ࡅࡍࡀࡔࡌࡇ ࡂࡅࡄࡀ ࡓࡁࡀ ࡖ ࡍࡉࡍࡉࡔࡉࡀ ࡋࡃࡓࡀࡁࡔࡉࡀ ࡔࡀࡍࡉࡀ ࡍࡉࡔࡉࡁࡉࡇ ࡁࡀࡁࡉࡋࡅࡓࡀࡍ ࡅࡆࡌࡀࡓࡀࡍ ࡖࡌࡀࡍࡔࡉࡋࡇ ࡋࡎࡉࡂࡅࡃࡕࡀ ࡖࡊࡅࡋ ࡆࡁࡀࡍ ࡍࡉࡋࡉࡂࡈࡇ ࡁࡋࡉࡂࡉࡈࡕࡀࡍ ࡅࡓࡉࡔࡀ ࡖࡊࡅࡋࡀࡉࡀࡍ ࡍࡉࡔࡀࡅࡉࡇ ࡍࡉࡔࡉࡁࡉࡇ ࡁࡔࡉࡁࡉࡀ ࡓࡁࡀ ࡅࡍࡉࡓࡉࡌࡉࡇ ࡁࡄࡔࡅࡊࡀ ࡂࡅࡄࡉࡀ ࡍࡉࡊࡀࡕࡓࡇ ࡁࡌࡀࡈࡀࡓࡀࡕࡀࡍ ࡖࡌࡀࡍࡔࡉࡋࡇ ࡋࡀࡕࡓࡀ ࡖࡌࡉࡍࡇ ࡀࡕࡀ ࡍࡉࡔࡁࡅࡒ ࡏࡋࡇ ࡄࡀࡅࡒࡀ ࡓࡁࡀ ࡖࡑࡀࡋࡉࡀ ࡌࡉࡍࡇ ࡌࡍ ࡊࡅࡃࡊࡀ ࡗ ࡀࡌࡀࡓ ࡔࡉࡁࡉࡀࡄࡉࡀ ࡌࡀࡑࡈࡉࡀࡍࡉࡀ ࡖࡄࡀࡆࡉࡍ ࡀࡋࡌࡀ ࡌࡀࡋࡉࡋࡉ ࡖࡍࡉࡌࡀࡓࡋࡅࡍ ࡓࡉࡔࡀ ࡖࡃࡀࡓࡀ ࡔࡅࡌ ࡁࡓ ࡍࡅ ࡏࡆࡉࡋ ࡏࡆࡉࡋ ࡁࡉࡔࡉࡀ ࡖࡍࡅࡓࡀ ࡄࡀࡅࡉࡀ ࡃࡀࡉࡀࡍࡊࡅࡍ ࡗ ࡀࡌࡀࡓࡕࡅࡍ ࡋࡀࡔࡊࡀࡕࡅࡍ ࡖ ࡄࡀࡔࡉࡁࡕࡅࡍ ࡏࡋࡀࡉ ࡋࡀࡄࡀࡅࡉࡀ ࡀࡉࡍࡀࡉ ࡖࡎࡀࡊࡉࡀ ࡋࡄࡉࡉࡀ ࡄࡀࡆࡉࡍ ࡓࡉࡌࡆࡀ ࡋࡀࡍࡉࡓࡉࡌࡆࡀ ࡏࡅࡃࡍࡀࡉ ࡖࡑࡀࡉࡕࡀ ࡁࡅࡕࡀ ࡅࡕࡅࡔࡁࡉࡄࡕࡀ ࡋࡀࡑࡀࡉࡕࡀ ࡆࡌࡀࡓࡀ ࡁࡀࡈࡋࡀ ࡐࡅࡌࡀࡉ ࡖࡌࡋࡉࡀ ࡁࡅࡕࡀ ࡅࡕࡅࡔࡁࡉࡄࡕࡀ ࡋࡀࡌࡀࡕࡉࡋࡉࡀ ࡆࡌࡀࡓࡀ ࡖࡏࡅࡋࡀ ࡏࡃࡀࡉ ࡖࡉࡀࡄࡁࡀ ࡆࡉࡃࡒࡀ ࡂࡉࡈࡋࡀ ࡁࡕࡉࡁࡉࡋ ࡋࡀࡂࡀࡈࡋࡀ ࡋࡉࡁࡀࡉ ࡖ ࡔࡓࡉࡁࡇ ࡄࡉࡉࡀ ࡓࡁࡉࡀ ࡁࡉࡁࡋࡅࡓࡉࡀ ࡅࡆࡌࡀࡓࡀ ࡋࡀࡌࡉࡕࡀࡓࡔࡉࡀ ࡍࡉࡔࡉࡌࡕࡀࡉ ࡅࡏࡑࡈࡅࡍࡀࡉ ࡖࡌࡔࡀࡋࡀࡌ ࡁࡊࡅࡔࡈࡀ ࡋࡀࡍࡀࡐࡉࡋ ࡁࡍࡅࡓࡀ ࡖࡉࡀࡒࡃࡀ ࡐࡀࡂࡓࡀࡉ ࡋࡀࡂࡀࡓ ࡂࡀࡅࡓࡀ ࡁࡏࡆࡋࡀ ࡖ ࡔࡅࡁࡀ ࡋࡀࡍࡀࡐࡉࡋ ࡁࡅࡓࡊࡀࡉ ࡖࡌࡀࡓࡁࡉࡊࡀ ࡅࡎࡀࡂࡃࡀ ࡋࡄࡉࡉࡀ ࡋࡄࡀࡍࡉࡐࡉࡀ ࡅࡏࡋ ࡐࡓࡅࡊࡉࡀ ࡅࡏࡋ ࡐࡀࡕࡉࡊࡓࡉࡀ ࡋࡀࡎࡀࡂࡃࡀ ࡋࡉࡂࡓࡀࡉ ࡖࡌࡀࡃࡓࡉࡊࡀ ࡃࡉࡓࡊࡉࡀ ࡖࡊࡅࡔࡈࡀ ࡁࡍࡉࡊࡋࡀ ࡅࡊࡀࡃࡁࡀ ࡋࡀࡌࡀࡎࡂࡉࡀ ࡏࡔࡕࡀࡋࡌࡉࡕ ࡅࡋࡀࡃࡀࡄࡉࡋࡍࡀ ࡄࡉࡉࡀ ࡋࡈࡀࡁ ࡏࡃࡉࡊࡓࡅࡊ ࡅ ࡅࡏࡔࡕࡀࡋࡌࡉࡕ ࡅࡋࡀࡃࡀࡄࡉࡋࡍࡀ ࡌࡍ ࡕࡉࡁࡉࡋ ࡁࡀࡔࡒࡀࡓࡕࡇ ࡋࡃࡀࡅࡓࡀ ࡕࡀࡒࡍࡀ ࡀࡉࡍࡀࡉ ࡋࡏࡌࡓࡅࡌ ࡔࡉࡒࡋࡉࡕ ࡅࡍࡉࡔࡌࡀࡕ ࡋࡁࡉࡕ ࡄࡉࡉࡀ ࡎࡊࡉࡕ ࡅࡌࡔࡀࡁࡉࡍ ࡄࡉࡉࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡔࡅࡌ ࡊࡅࡔࡈࡀ ࡒࡀࡉࡉࡌ ࡅࡌࡀࡐࡓࡉࡔ ࡔࡅࡌ ࡁࡓ ࡍࡅ ࡔࡅࡌ ࡁࡊࡅࡔࡈࡀ ࡒࡀࡉࡉࡌ ࡅࡀࡌࡀࡓ ࡔࡅࡁࡀ ࡄࡅࡋࡉࡀ ࡄࡀࡌࡁࡀࡂࡀ ࡅࡕࡓࡉࡎࡀࡓ ࡄࡅࡋࡉࡀ ࡓࡉࡃࡐࡀ ࡅࡀࡌࡓࡉࡀ ࡖࡍࡉࡀࡁࡈࡇ ࡁࡂࡅ ࡀࡓࡒࡀࡍ ࡖࡋࡀࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡍࡉࡊࡀࡕࡓࡇ ࡁࡂࡅ ࡕࡉࡁࡉࡋ ࡅࡋࡄࡉࡋ ࡋࡍࡄࡅࡓࡀ ࡋࡀࡍࡉࡎࡀࡒ ࡍࡉࡔࡁࡅࡒ ࡏࡋࡇ ࡀࡉࡈࡀ ࡅࡊࡀࡓࡉࡅࡕࡀ ࡖࡍࡉࡍࡉࡔࡉࡇ ࡀࡋࡂࡀࡁࡓࡀ ࡍࡀࡎࡁࡇ ࡍࡉࡋࡉࡂࡈࡇ ࡁࡓࡀࡆࡀࡉࡀࡍ ࡓࡁࡀ ࡖࡋࡀࡌࡁࡀࡔࡒࡀࡓࡋࡅࡍ ࡋࡀࡃࡉࡀࡅࡓࡇ ࡍࡉࡔࡉࡁࡉࡇ ࡁࡔࡉࡁࡉࡀ ࡓࡁࡀ ࡖࡌࡉࡍࡔࡉࡋࡇ ࡋࡃࡓࡀࡁࡔࡉࡀ ࡔࡀࡍࡉࡀ ࡍࡉࡔࡁࡅࡒ ࡏࡋࡇ ࡌࡀࡄࡓࡀ ࡓࡁࡀ ࡖࡌࡀࡍࡔࡉࡋࡇ ࡋࡌࡀࡓࡇ ࡌࡍ ࡏࡅࡑࡓࡇ ࡍࡀࡋࡐࡇ ࡌࡍ ࡆࡌࡀࡓࡀࡍ ࡅࡋࡉࡂࡉࡀࡍ ࡖࡌࡀࡍࡔࡉࡋࡇ ࡋࡁࡅࡕࡇ ࡖ ࡊࡅࡋ ࡆࡁࡀࡍ ࡍࡉࡔࡉࡓࡉࡇ ࡁࡓࡉࡃࡐࡀ ࡓࡁࡀ ࡅࡀࡍࡃࡀࡔࡀࡕࡀ ࡖࡄࡀࡆࡉࡍ ࡀࡋࡌࡀ ࡍࡉࡔࡁࡅࡒ ࡏࡋࡇ ࡀࡄࡈࡀ ࡖࡌࡀࡍࡔࡉࡋࡅࡍ ࡋࡓࡀࡄࡌࡇ ࡖ ࡋࡉࡋࡉࡀ ࡍࡉࡊࡀࡕࡓࡇ ࡁࡒࡅࡋࡀࡋࡀࡍ ࡁࡉࡔࡀࡕࡀ ࡖࡋࡀࡍࡉࡎࡀࡒ ࡋࡁࡉࡕ ࡓࡅࡓࡁࡉࡀ ࡗ ࡄࡀࡆࡉࡍ ࡀࡌࡀࡓ ࡔࡉࡁࡉࡀࡄࡉࡀ ࡖࡀࡉࡍࡀࡉࡄࡅࡍ ࡍࡄࡅࡓࡀ ࡋࡀࡄࡀࡆࡉࡀࡍ ࡀࡍࡀ ࡋࡀࡍࡀࡐࡉࡋࡍࡀ ࡁࡓࡀࡆࡀࡉࡊࡅࡍ ࡅࡁࡕࡀࡒࡋࡀࡕࡊࡅࡍ ࡋࡀࡌࡉࡕࡒࡉࡋࡍࡀ ࡋࡀࡔࡀࡌࡀࡍࡀ ࡋࡔࡅࡌࡀࡉࡊࡅࡍ ࡅࡋࡀࡊࡋࡀࡋࡉࡍ ࡍࡅࡓࡀࡉࡊࡅࡍ ࡖࡉࡀࡒࡃࡀ ࡋࡀࡌࡉࡕࡊࡀࡕࡀࡓࡍࡀ ࡁࡃࡀࡅࡓࡀࡉࡊࡅࡍ ࡅࡋࡀࡌࡉࡍࡔࡉࡍࡅࡍ ࡋࡀࡃࡉࡀࡅࡓࡀࡉ ࡋࡀࡔࡀࡌࡀࡍࡀ ࡋࡌࡉࡍࡉࡋࡕࡀࡉࡊࡅࡍ ࡖࡏࡅࡋࡀ ࡅࡋࡀࡌࡀࡍࡔࡉࡍࡇ ࡋࡌࡀࡓࡀࡉ ࡌࡍ ࡏࡅࡑࡓࡀࡉ ࡋࡀࡊࡀࡁࡀࡓ ࡏࡋࡀࡉ ࡀࡉࡈࡀࡉࡊࡅࡍ ࡅࡓࡉࡃࡐࡀࡉࡊࡅࡍ ࡅࡋࡀࡌࡁࡀࡈࡉࡋࡍࡀ ࡏࡋ ࡃࡓࡀࡁࡔࡉࡀ ࡔࡀࡍࡉࡀ ࡋࡀ ࡊࡀࡁࡓࡀ ࡏࡋࡀࡉ ࡀࡍࡃࡀࡔࡀࡕࡊࡅࡍ ࡅࡋࡀࡌࡁࡀࡈࡉࡋࡍࡀ ࡋࡓࡀࡄࡌࡀࡉ ࡖ ࡋࡉࡋࡉࡀ ࡅࡋࡀࡌࡉࡎࡕࡀࡊࡀࡓࡍࡀ ࡁࡃࡀࡅࡓࡀࡉࡊࡅࡍ ࡅࡁࡄࡀࡔࡀࡁࡀࡕࡊࡅࡍ ࡅࡋࡀࡌࡁࡀࡈࡉࡋࡍࡀ ࡁࡀࡅࡀࡕࡀ ࡖࡊࡅࡋ ࡆࡁࡀࡍ ࡋࡀࡌࡀࡍࡔࡉࡍࡀ ࡋࡄࡉࡉࡀ ࡓࡁࡉࡀ ࡅࡋࡀࡌࡉࡕࡓࡀࡂࡀࡂࡍࡀ ࡏࡋ ࡀࡅࡃࡉࡀ ࡋࡀࡌࡉࡍࡔࡉࡍࡅࡍ ࡋࡏࡅࡕࡓࡉࡀ ࡊࡀࡎࡉࡉࡀ ࡀࡄࡀࡉ ࡅࡋࡀࡌࡉࡎࡕࡀࡊࡀࡓࡍࡀ ࡁࡃࡀࡅࡓࡀ ࡖࡎࡉࡈࡉࡀ ࡅࡋࡀ ࡌࡉࡍࡔࡉࡍࡇ ࡋࡕࡅࡔࡁࡉࡄࡕࡀ ࡖࡀࡁࡀࡄࡀࡕࡀࡉ ࡅࡋࡀࡊࡀࡁࡀࡓ ࡀࡉࡈࡀࡉࡊࡅࡍ ࡏࡋࡀࡉ ࡅࡋࡀࡌࡉࡍࡔࡉࡍࡅࡍ ࡋࡎࡉࡃࡓࡀࡉ ࡊࡀࡎࡉࡉࡀ ࡅࡋࡀࡌࡉࡕࡓࡀࡂࡀࡂࡍࡀ ࡋࡆࡌࡀࡓࡅࡍ ࡁࡀࡈࡋࡀ ࡅࡋࡀࡌࡉࡍࡔࡉࡍࡀ ࡋࡄࡀࡍࡉࡀ ࡁࡀࡅࡀࡕࡀࡉ ࡅࡀࡊࡀࡓࡕࡉࡍࡅࡍ ࡋࡀࡍࡃࡀࡔࡀࡕࡊࡅࡍ ࡏࡋࡀࡉ ࡖࡌࡉࡍࡔࡉࡍࡇ ࡋࡌࡀࡓࡀࡉ ࡅࡋࡀࡄࡀࡅࡉࡀ ࡔࡅࡌࡀࡉ ࡌࡍ ࡀࡅࡃࡉࡀ ࡌࡀࡍ ࡖࡌࡉࡍࡉࡔࡉࡇ ࡁࡉࡕ ࡀࡍࡀࡔࡀࡕࡀ ࡅࡌࡉࡕࡓࡀࡂࡀࡂ ࡁࡃࡀࡅࡓࡀ ࡖࡀࡅࡃࡉࡀ ࡌࡀࡍ ࡖࡌࡉࡍࡉࡔࡉࡇ ࡔࡅࡌࡀ ࡖࡄࡉࡉࡀ ࡅࡕࡅࡔࡁࡉࡄࡕࡀ ࡖࡄࡉࡉࡀ ࡓࡁࡉࡀ ࡅࡓࡀࡄࡌࡀ ࡖ ࡀࡌࡀࡓ ࡅࡔࡅࡌࡀ ࡁࡆࡉࡐࡀ ࡖࡄࡀࡆࡉࡍ ࡀࡋࡌࡀ ࡌࡀࡍ ࡖࡌࡉࡍࡉࡔࡉࡇ ࡁࡅࡕࡀ ࡅࡕࡅࡔࡁࡉࡄࡕࡀ ࡖࡀࡁࡀࡄࡀࡕࡇ ࡅࡃࡀࡉࡀࡓ ࡁࡏࡑࡈࡅࡍ ࡐࡀࡂࡓࡉࡀ ࡖࡊࡅࡋࡇ ࡊࡉࡁࡉࡀ ࡅࡌࡅࡌࡉࡀ ࡌࡋࡀ ࡗ ࡁࡀࡉࡉࡋࡉࡀ ࡄࡉࡉࡀ ࡓࡁࡉࡀ ࡎࡀࡋࡒࡀ ࡃࡌࡅࡕࡀࡉ ࡋࡔࡊࡉࡍࡀࡕࡅࡍ ࡐࡀࡂࡓࡀ ࡍࡉࡊࡋࡇ ࡋࡌࡀࡓࡇ ࡅࡁࡀࡉࡕࡇ ࡊࡅࡋࡇ ࡄࡀࡁࡀࡓࡀ ࡍࡉࡄࡁࡀࡈ ࡁࡓࡉࡔࡀࡉࡄࡅࡍ ࡖࡀࡁࡃࡇ ࡀࡍࡀ ࡎࡀࡋࡉࡒࡍࡀ ࡋࡁࡉࡕ ࡄࡉࡉࡀ ࡓࡁࡉࡀ ࡅࡃࡀࡉࡀࡓࡍࡀ ࡁࡓࡉࡔ ࡊࡉࡌࡑࡇ ࡅࡋࡀࡌࡉࡍࡔࡉࡍࡅࡍ ࡋࡀࡃࡉࡀࡓࡀࡉ ࡅࡄࡉࡉࡀ ࡆࡀࡊࡉࡍ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡔࡅࡌ ࡊࡅࡔࡈࡀ ࡒࡀࡉࡉࡌ ࡃࡀࡓࡉࡔ ࡅࡌࡀࡐࡓࡉࡔ ࡔࡅࡌ ࡁࡓ ࡍࡅ ࡔࡅࡌ ࡁࡊࡅࡔࡈࡀ ࡒࡀࡉࡉࡌ ࡅࡀࡌࡀࡓ ࡀࡍࡀ ࡋࡀࡄࡅࡉࡕ ࡁࡓ ࡁࡀࡉࡕࡀ ࡅࡃࡌࡅࡕࡀࡉ ࡋࡀࡄࡅࡀࡕ ࡌࡍ ࡀࡅࡃࡉࡀ ࡔࡀࡓࡔࡀࡉ ࡋࡀࡅ ࡌࡍ ࡀࡋࡌࡀ ࡅࡁࡉࡔࡉࡀ ࡁࡂࡀࡅࡀࡉ ࡋࡀࡌࡀࡎࡊࡉࡋࡉࡀ ࡄࡃࡀࡓ ࡒࡀࡉࡌࡅࡍ ࡔࡉࡁࡉࡀࡄࡉࡀ ࡅࡌࡉࡍࡀࡉ ࡃࡉࡋࡉࡀ ࡀࡌࡓࡉࡀ ࡉࡀ ࡂࡀࡁࡓࡀ ࡍࡅࡊࡓࡀࡉࡀ ࡖࡋࡀࡌࡀࡓࡀ ࡏࡕࡋࡇ ࡅࡋࡀࡌࡀࡓࡕࡀ ࡃࡅࡊࡕࡀ ࡖ ࡍࡀࡐࡔࡉࡀ ࡁࡉࡔࡉࡀ ࡀࡍࡀࡕ ࡁࡀࡋࡄࡅࡃࡀࡊ ࡌࡀࡄࡅ ࡖࡀࡁࡃࡉࡕ ࡏࡅ ࡔࡀࡁࡒࡉࡍ ࡏࡋࡀࡊ ࡌࡀࡄࡓࡀ ࡓࡁࡀ ࡌࡀࡍ ࡄࡀࡅࡉࡋࡀࡊ ࡀࡎࡉࡀ ࡏࡅ ࡀࡎࡓࡉࡋࡀࡊ ࡁࡉࡔࡉࡀ ࡁࡂࡅ ࡀࡒࡓࡅࡍ ࡌࡀࡍ ࡄࡀࡅࡉࡋࡀࡊ ࡔࡀࡓࡉࡀ ࡏࡅ ࡓࡀࡌࡉࡋࡀࡊ ࡒࡅࡋࡀࡋࡉࡀ ࡁࡏࡅࡄࡓࡀࡊ ࡌࡀࡍ ࡄࡀࡅࡉࡋࡀࡊ ࡐࡉࡓࡒࡀ ࡌࡀࡍ ࡐࡉࡓࡒࡀ ࡄࡀࡅࡉࡋࡀࡊ ࡅࡌࡀࡍ ࡄࡀࡅࡉࡋࡀࡊ ࡀࡃࡉࡀࡅࡓࡀ ࡁࡀࡉࡕࡀ ࡔࡉࡁࡒࡇ ࡌࡀࡓࡇ ࡅࡀࡓࡃࡉࡊࡋࡇ ࡌࡉࡍࡇ ࡎࡋࡉࡒ ࡄࡉࡉࡀ ࡄࡉࡔࡁࡅࡉࡀ ࡋࡄࡅࡔࡁࡀࡍࡅࡍ ࡅࡊࡅࡋࡄࡍ ࡎࡋࡉࡒࡉࡅࡍ ࡋࡀࡕࡀࡓ ࡍࡄࡅࡓ ࡄࡀࡔࡕࡀ ࡍࡐࡀࡋࡕ ࡁࡏࡃࡀࡉࡀࡍ ࡖ ࡋࡀࡍࡀࡐࡋࡉࡕ ࡏࡄࡀࡓࡆࡀࡒࡕ ࡁࡀࡒࡓࡀࡍ ࡖࡋࡀࡌࡉࡔࡕࡉࡓࡉࡉࡕ ࡋࡂࡉࡈࡉࡕ ࡁࡋࡉࡂࡉࡈࡕࡀࡍ ࡃࡉࡋࡀࡍ ࡅࡁࡏࡅࡁࡀࡃࡀࡍ ࡏࡎࡕࡀࡊࡀࡓࡕ ࡁࡀࡒࡃࡀࡍ ࡖࡋࡀࡌࡀࡈࡉࡋࡀࡊ ࡀࡃࡉࡀࡅࡓࡀࡊ ࡅࡋࡀࡌࡔࡀࡉࡉࡋࡁࡀࡊ ࡂࡀࡁࡓࡀ ࡍࡀࡑࡁࡀࡊ ࡗ ࡄࡀࡆࡉࡍ ࡔࡅࡌࡀ ࡔࡅࡌ ࡁࡓ ࡍࡅ ࡀࡕࡉࡀࡍ ࡃࡉࡌࡇ ࡅࡋࡀࡔࡀࡋࡌࡀࡍ ࡅࡀࡌࡀࡓ ࡖࡋࡉࡊࡀ ࡄࡉࡉࡀ ࡅࡋࡀࡉࡉࡕࡇ ࡋࡌࡀࡍࡃࡀ ࡖࡄࡉࡉࡀ ࡁࡀࡕࡀࡓ ࡍࡄࡅࡓ ࡎࡋࡉࡒࡉࡅࡍ ࡔࡉࡋࡌࡀࡉ ࡅࡍࡉࡃࡁࡀࡉ ࡅࡄࡀࡁࡔࡀࡁࡀ ࡋࡏࡌࡓࡅࡌ ࡎࡋࡉࡒ ࡔࡀࡌࡓࡅࡍ ࡀࡍࡐࡉࡀ ࡉࡅࡌࡀ ࡅࡏࡍࡉࡔࡉࡅࡍ ࡏࡅࡕࡓࡉࡀ ࡖࡀࡕࡉࡅࡍ ࡋࡉࡊࡀ ࡀࡅࡃࡉࡀࡍ ࡌࡀࡑࡁࡅࡕࡉࡀࡕࡀࡉ ࡅࡓࡅࡔࡅࡌࡀࡉ ࡋࡀࡌࡀࡃࡊࡉࡓࡉࡋࡉࡀ ࡁࡉࡕ ࡀࡁ ࡏࡍࡉࡔࡉࡅࡍ ࡀࡃࡓࡀࡔࡉࡀ ࡅࡎࡉࡃࡓࡀࡉ ࡅࡁࡈࡉࡋࡉࡅࡍ ࡓࡀࡄࡌࡀࡉ ࡖࡋࡉࡋࡉࡀ ࡔࡉࡁࡒࡅࡍ ࡍࡀࡈࡓࡉࡀ ࡊࡀࡎࡉࡀ ࡅࡔࡀࡌࡓࡅࡍ ࡂࡅࡁࡓࡉࡀ ࡖࡀࡕࡉࡅࡍ ࡗ ࡄࡀࡆࡉࡍ ࡀࡌࡀࡓ ࡔࡅࡌ ࡁࡓ ࡍࡅ ࡐࡓࡀ ࡅࡌࡀࡈࡉࡀ ࡔࡋࡉࡄࡀ ࡍࡀࡎࡁࡀ ࡀࡎࡂࡉࡀ ࡍࡀࡎࡁࡀ ࡓࡁࡀ ࡐࡀࡓࡅࡀࡍࡒࡀ ࡖࡄࡉࡉࡀ ࡔࡀࡃࡓࡅࡉࡀ ࡕࡀࡁࡓࡇ ࡋࡌࡀࡈࡀࡓࡀࡕࡅࡍ ࡅࡐࡓࡀࡈ ࡁࡀࡒࡓࡅࡍ ࡐࡅࡓࡅࡈࡕࡀ ࡀࡌࡀࡓࡋࡇ ࡌࡀࡄࡅ ࡁࡀࡊࡉࡕ ࡔࡅࡌ ࡁࡓ ࡍࡅ ࡗ ࡌࡉࡓࡐࡀࡎ ࡆࡀࡐࡇ ࡖࡀࡉࡍࡀ ࡋࡄࡀࡊࡀ ࡀࡍࡀ ࡀࡕࡉࡕ ࡌࡀࡄࡅ ࡀࡁࡀࡃࡅࡁࡀࡊ ࡁࡉࡔࡉࡀ ࡅࡌࡀࡄࡅ ࡀࡎࡊࡉࡋࡅࡁࡀࡊ ࡄࡀࡈࡉࡀ ࡖ ࡓࡉࡄࡌࡅࡊ ࡊࡅࡋࡄࡅࡍ ࡃࡅࡕࡓࡉࡀ ࡖࡀࡓࡒࡀ ࡖࡍࡄࡅࡓࡀ ࡄࡀࡅࡉࡋࡀࡊ ࡀࡃࡉࡀࡅࡓࡀ ࡒࡓࡉࡀ ࡅࡌࡀࡐࡓࡉࡔ ࡁࡄࡉࡓࡉࡀ ࡋࡎࡅࡌ ࡂࡀࡁࡓࡀ ࡖ ࡍࡉࡌࡀࡓࡋࡇ ࡌࡀࡄࡅ ࡀࡁࡀࡃࡅࡁࡀࡊ ࡁࡉࡔࡉࡀ ࡖࡋࡉࡁࡀࡊ ࡁࡐࡋࡅࡂࡕࡀ ࡒࡀࡌ ࡖࡀࡌࡓࡉࡕ ࡖࡋࡉࡊࡀ ࡄࡉࡉࡀ ࡅࡋࡀࡉࡕࡇ ࡋࡌࡀࡍࡃࡀ ࡖࡄࡉࡉࡀ ࡁࡀࡕࡀࡓ ࡍࡄࡅࡓ ࡁࡀࡉࡕࡀ ࡔࡉࡁࡒࡇ ࡌࡀࡓࡇ ࡅࡀࡓࡃࡉࡊࡋࡇ ࡌࡉࡍࡇ ࡎࡋࡉࡒ ࡀࡆࡀࡋࡉࡅࡍ ࡔࡉࡋࡌࡀࡉ ࡅࡍࡉࡃࡁࡀࡉ ࡅࡄࡀࡁࡔࡀࡁࡀ ࡋࡏࡌࡓࡅࡌ ࡎࡋࡉࡒ ࡏࡍࡉࡔࡉࡅࡍ ࡌࡀࡑࡁࡅࡕࡀࡉ ࡅࡓࡅࡔࡅࡌࡀࡉ ࡋࡀ ࡌࡀࡃࡊࡀࡓࡋࡉࡀ ࡁࡉࡕ ࡀࡁ ࡏࡍࡉࡔࡉࡅࡍ ࡃࡓࡀࡔࡀࡉ ࡅࡎࡉࡃࡓࡀࡉ ࡅࡏࡎࡕࡀࡊࡀࡓࡉࡀࡍ ࡁࡀࡅࡀࡕࡀࡉ ࡖࡊࡅࡋ ࡆࡁࡀࡍ ࡁࡉࡈࡋࡀࡕ ࡎࡉࡂࡅࡃࡕࡀࡉ ࡅࡁࡈࡉࡋࡉࡅࡍ ࡓࡀࡄࡌࡀࡉ ࡖࡋࡉࡋࡉࡀ ࡄࡉࡉࡀ ࡄࡉࡔࡁࡅࡉࡀ ࡋࡄࡅࡔࡁࡀࡍࡅࡍ ࡅࡊࡉࡋࡀࡉࡅࡍ ࡖࡊࡅࡋ ࡆࡁࡀࡍ ࡔࡅࡌ ࡌࡀࡍ ࡀࡌࡀࡓ ࡖࡀࡍࡀࡕ ࡄࡀࡊࡀ ࡌࡉࡕࡉࡀࡁࡈࡉࡕ ࡅࡀࡎࡓࡉࡋࡀࡊ ࡁࡉࡔࡉࡀ ࡀࡁࡂࡅ ࡀࡒࡓࡅࡍ ࡂࡀࡁࡓࡀ ࡖࡊࡃࡉࡁ ࡔࡅࡌࡇ ࡁࡉࡕ ࡄࡉࡉࡀ ࡓࡁࡉࡀ ࡋࡀࡌࡉࡕࡄࡀࡓࡆࡀࡒ ࡁࡃࡅࡓ ࡄࡀࡈࡉࡀ ࡖࡌࡁࡀࡔࡒࡉࡓࡉࡋࡇ ࡀࡃࡉࡀࡅࡓࡇ ࡖࡋࡀࡌࡉࡕࡋࡂࡉࡈ ࡁࡋࡉࡒࡉࡈࡕࡅࡍ ࡖࡁࡉࡔࡉࡀ ࡋࡀࡊࡋࡀࡋࡇ ࡍࡅࡓࡀ ࡖࡉࡀࡒࡃࡀ ࡃࡀࡊࡓࡀࡕࡋࡀࡍ ࡅࡒࡀࡓࡉࡀࡕࡋࡀࡍ ࡖࡁࡀࡉࡍࡀࡋࡀࡊ ࡅࡀࡕࡉࡕ ࡋࡅࡀࡕࡀࡍ ࡅࡌࡉࡎࡕࡉࡌࡊࡉࡕ ࡁࡔࡊࡉࡍࡕࡀࡊ ࡔࡅࡁࡀ ࡖࡓࡉࡃࡐࡅࡊ ࡁࡀࡈࡋࡉࡀ ࡅࡀࡍࡀࡕ ࡋࡍࡄࡅࡓࡀ ࡎࡀࡋࡒࡉࡕ ࡅࡄࡉࡉࡀ ࡆࡀࡊࡉࡍ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡉࡀࡋࡃࡀ ࡏࡕࡉࡍࡑࡉࡁ ࡌࡍ ࡏࡌࡓࡅࡌࡀ ࡓࡀࡆࡀ ࡏࡕࡉࡂࡋࡉࡀ ࡁࡏࡅࡓࡀࡔࡋࡀࡌ ࡄࡉࡋࡌࡉࡀ ࡄࡆࡅࡍ ࡊࡀࡄࡍࡉࡀ ࡃࡀࡍࡃࡀࡌࡕࡀ ࡁࡏࡅࡋࡇ ࡍࡉࡐࡋࡀࡕ ࡃࡀࡍࡃࡀࡌࡕࡀ ࡍࡉࡐࡋࡀࡕ ࡁࡏࡅࡓࡀࡔࡋࡀࡌ ࡁࡏࡎࡐࡀࡓ ࡉࡅࡌࡉࡀ ࡀࡃࡉࡌ ࡀࡆࡀࡋ ࡋࡁࡉࡕ ࡌࡒࡀࡃࡔࡉࡀ ࡐࡉࡄࡕࡇ ࡋࡐࡅࡌࡇ ࡁࡏࡅࡋࡀ ࡅࡋࡎࡐࡉࡄࡀࡕࡇ ࡖࡔࡉࡒࡓࡀ ࡐࡉࡄࡕࡇ ࡋࡐࡅࡌࡇ ࡁࡏࡅࡋࡀ ࡅࡏࡋ ࡊࡅࡋࡄࡅࡍ ࡊࡀࡄࡍࡉࡀ ࡖࡍࡉࡌࡀࡓࡋࡅࡍ ࡁࡄࡉࡆࡅࡀࡍࡀࡉ ࡖࡋࡉࡋࡉࡀ ࡄࡆࡉࡕ ࡁࡄࡉࡆࡅࡀࡍࡀࡉ ࡗ ࡔࡀࡊࡉࡁࡍࡀ ࡋࡀࡍࡉࡌࡉࡕ ࡅࡋࡀࡔࡉࡊࡁࡉࡕ ࡅࡋࡀࡃࡓࡀࡕࡀࡍ ࡁࡋࡉࡋࡅࡉࡀ ࡔࡉࡍࡕࡀ ࡋࡀࡍࡀࡌࡉࡕ ࡅࡋࡀࡔࡉࡊࡁࡉࡕ ࡖࡀࡕࡀ ࡊࡅࡊࡁࡀ ࡏࡋ ࡏࡍࡉࡔࡁࡀࡉ ࡒࡀࡌ ࡍࡅࡓࡀ ࡁࡀࡁࡀ ࡎࡀࡁࡀ ࡆࡀࡊࡓࡉࡀ ࡉࡀࡒࡃࡀ ࡏࡕࡀࡄࡆࡅࡍ ࡀࡕࡋࡀࡕࡀ ࡔࡓࡀࡂࡉࡀ ࡔࡀࡌࡉࡔ ࡀࡓࡀࡁ ࡅࡔࡓࡀࡂࡉࡀ ࡃࡍࡀ ࡍࡅࡓࡀ ࡕࡋࡀࡕ ࡁࡉࡕ ࡀࡌࡀ ࡅࡂࡅࡈࡓࡀ ࡂࡈࡀࡓ ࡁࡉࡕ ࡌࡒࡀࡃࡔࡉࡀ ࡂࡅࡄࡀ ࡂࡍࡀ ࡁࡌࡀࡓࡊࡀࡁࡕࡀ ࡖࡀࡓࡒࡀ ࡍࡀࡃࡀࡕ ࡌࡍ ࡃࡅࡊࡕࡇ ࡊࡅࡊࡁࡀ ࡑࡓࡀࡁࡇ ࡁࡉࡀࡄࡅࡃ ࡊࡅࡊࡁࡀ ࡑࡓࡀࡁࡇ ࡁࡏࡅࡓࡀࡔࡋࡀࡌ ࡔࡀࡌࡉࡔ ࡏࡕࡀࡄࡆࡉࡀ ࡁࡋࡉࡋࡉࡀ ࡅࡎࡉࡓࡀ ࡁࡏࡅࡌࡀࡌࡀ ࡃࡍࡀ ࡌࡉࡔࡌࡀ ࡖࡔࡉࡌࡅࡉࡀ ࡊࡀࡄࡍࡉࡀ ࡀࡒࡀࡐࡓࡀ ࡁࡓࡉࡔࡀࡉࡄࡅࡍ ࡓࡌࡅࡍ ࡉࡀࡒࡉࡐ ࡊࡀࡄࡍࡀ ࡁࡀࡊࡉࡀ ࡅࡃࡉࡌࡉࡀ ࡖࡁࡍࡉࡀ ࡀࡌࡉࡍ ࡍࡀࡕࡓࡅࡍ ࡔࡉࡋࡀࡉ ࡅࡔࡀࡋࡁࡀࡉ ࡀࡒࡀࡐࡓࡀ ࡁࡓࡉࡔࡀࡉࡄࡅࡍ ࡓࡌࡅࡍ ࡏࡋࡉࡆࡀࡓ ࡐࡉࡄࡕࡇ ࡋࡐࡅࡌࡇ ࡅࡏࡋ ࡊࡅࡋࡄࡅࡍ ࡊࡀࡄࡍࡉࡀ ࡖࡍࡉࡌࡀࡓࡋࡅࡍ ࡌࡀࡍ ࡖࡋࡀࡂࡉࡈ ࡀࡎࡐࡀࡓ ࡄࡉࡋࡌࡉࡀ ࡅࡀࡎࡐࡀࡓ ࡄࡉࡆࡅࡀࡍࡉࡀ ࡔࡓࡉࡀ ࡏࡋࡇ ࡌࡀࡍ ࡖࡋࡀࡂࡉࡈ ࡀࡎࡐࡀࡓ ࡄࡉࡋࡌࡉࡀ ࡖࡀࡌࡐࡀࡔࡉࡒࡋࡊࡅࡍ ࡄࡉࡋࡌࡉࡀ ࡖࡄࡆࡀࡉࡕࡅࡍ ࡏࡋࡉࡆࡀࡓ ࡐࡉࡄࡕࡇ ࡋࡐࡅࡌࡇ ࡅࡋࡊࡅࡋࡄࡅࡍ ࡊࡀࡄࡍࡉࡀ ࡖࡍࡉࡌࡀࡓࡋࡅࡍ ࡉࡀࡒࡉࡐ ࡌࡐࡀࡔࡉࡒ ࡄࡉࡋࡌࡉࡀ ࡀࡊࡀࡍࡃࡉࡕ ࡋࡀࡒࡀࡉࡉࡌ ࡏࡋࡅࡍ ࡀࡁࡍࡉࡀ ࡀࡌࡉࡍ ࡀࡌࡐࡀࡔࡉࡒ ࡄࡉࡋࡌࡉࡀ ࡋࡀࡅ ࡂࡀࡁࡓࡀ ࡖࡊࡀࡎࡉࡀ ࡓࡀࡆࡀࡉࡊࡅࡍ ࡄࡅ ࡋࡀࡌࡂࡀࡋࡉࡋࡀࡍ ࡈࡀࡁ ࡉࡅࡌࡉࡍ ࡖࡀࡌࡓࡉࡕࡅࡍ ࡏࡋࡇ ࡖࡏࡊࡀ ࡅࡃࡋࡉࡊࡀ ࡖࡀࡌࡀࡓ ࡀࡓࡒࡀ ࡓࡀࡈࡍࡀ ࡁࡋࡀ ࡆࡉࡁࡍࡄ ࡅࡌࡂࡀࡋࡀࡋࡀ ࡁࡏࡎࡐࡉࡓࡉࡀ ࡖࡏࡔࡅࡌࡉࡀ ࡀࡓࡒࡀ ࡐࡀࡄࡕࡀ ࡐࡅࡌࡇ ࡅࡏࡋࡉࡆࡀࡓ ࡖࡕࡉࡌࡀࡓࡋࡇ ࡀࡆࡉࡋࡉࡅࡍ ࡋࡅࡀࡕ ࡋࡉࡋࡉࡅࡊ ࡖࡌࡐࡀࡔࡉࡒࡋࡊࡅࡍ ࡄࡉࡋࡌࡉࡀ ࡖࡀࡄࡆࡀࡉࡕࡅࡍ ࡏࡋࡉࡆࡀࡓ ࡐࡉࡄࡕࡇ ࡋࡐࡅࡌࡇ ࡅࡏࡋ ࡊࡅࡋࡄࡅࡍ ࡊࡀࡄࡍࡉࡀ ࡖࡍࡉࡌࡀࡓࡋࡅࡍ ࡌࡀࡍ ࡀࡆࡉࡋ ࡋࡅࡀࡕ ࡋࡉࡋࡉࡅࡊ ࡖࡌࡐࡀࡔࡉࡒࡋࡊࡅࡍ ࡄࡉࡋࡌࡉࡀ ࡖࡄࡆࡀࡉࡕࡅࡍ ࡊࡉࡃࡁࡅࡉࡀ ࡋࡏࡍࡂࡉࡓࡕࡀ ࡅࡏࡋ ࡏࡃࡇ ࡖࡈࡀࡁ ࡉࡅࡌࡉࡍ ࡉࡀࡄࡁࡅࡉࡀ ࡍࡉࡎࡁࡇ ࡈࡀࡁ ࡉࡅࡌࡉࡍ ࡏࡋ ࡏࡍࡂࡉࡓࡕࡀ ࡅࡋࡅࡀࡕ ࡋࡉࡋࡉࡅࡊ ࡌࡉࡆࡋࡇ ࡋࡉࡋࡅࡊ ࡂࡍࡉࡀ ࡏࡋ ࡀࡓࡎࡇ ࡀࡊࡀࡍࡃࡉࡕ ࡔࡉࡍࡕࡇ ࡋࡀࡐࡓࡀࡕ ࡂࡅࡄࡀ ࡂࡍࡀࡋࡇ ࡁࡋࡉࡁࡇ ࡅࡕࡁࡀࡓ ࡋࡉࡁࡇ ࡌࡍ ࡎࡀࡌࡊࡇ ࡀࡁࡓࡇ ࡈࡀࡁ ࡉࡅࡌࡉࡍ ࡋࡅࡀࡕ ࡋࡉࡋࡉࡅࡊ ࡒࡓࡉࡁ ࡈࡀࡁ ࡉࡅࡌࡉࡍ ࡀࡆࡀࡋ ࡋࡅࡀࡕ ࡋࡉࡋࡉࡅࡊ ࡅࡌࡍ ࡔࡉࡍࡕࡀ ࡍࡉࡓࡀࡍࡃࡉࡃࡇ ࡅࡀࡌࡀࡓࡋࡇ ࡈࡀࡁ ࡉࡅࡌࡉࡍ ࡄࡉࡋࡌࡉࡀ ࡄࡆࡉࡍ ࡊࡀࡄࡍࡉࡀ ࡃࡀࡍࡃࡀࡌࡕࡀ ࡍࡉࡐࡋࡀࡕ ࡁࡏࡅࡓࡀࡔࡋࡀࡌ ࡁࡏࡎࡐࡀࡓ ࡉࡅࡌࡉࡀ ࡒࡀࡃࡉࡌ ࡀࡆࡀࡋ ࡋࡁࡉࡕ ࡌࡒࡀࡃࡔࡉࡀ ࡐࡉࡄࡕࡇ ࡋࡐࡅࡌࡇ ࡖࡏࡅࡋࡀ ࡅࡋࡎࡐࡉࡄࡕࡇ ࡖࡔࡉࡒࡓࡀ ࡐࡉࡄࡕࡇ ࡋࡐࡅࡌࡇ ࡅࡏࡋ ࡄࡉࡍࡅࡍ ࡊࡀࡄࡍࡉࡀ ࡖࡍࡉࡌࡀࡓࡋࡅࡍ ࡀࡍࡀ ࡁࡄࡉࡆࡅࡀࡍࡀࡉ ࡗ ࡔࡊࡉࡁࡍࡀ ࡁࡄࡉࡆࡅࡀࡍࡀࡉ ࡖࡋࡉࡋࡉࡀ ࡄࡆࡉࡕ ࡁࡄࡉࡆࡅࡀࡍ ࡗ ࡔࡉࡊࡉࡁࡍࡀ ࡋࡀࡍࡉࡌࡉࡕ ࡅࡋࡀࡔࡉࡊࡁࡉࡕ ࡅࡋࡀࡃࡓࡀࡕࡀࡍ ࡁࡋࡉࡋࡉࡀ ࡔࡉࡍࡕࡀ ࡋࡀ ࡍࡉࡌࡉࡕ ࡅࡋࡀࡔࡉࡊࡁࡉࡕ ࡄࡆࡉࡕ ࡖࡀࡕࡀ ࡊࡅࡊࡁࡀ ࡏࡋ ࡏࡍࡉࡔࡁࡀࡉ ࡒࡀࡌ ࡍࡅࡓࡀ ࡁࡀࡁࡀ ࡎࡀࡁࡀ ࡆࡀࡊࡓࡉࡀ ࡉࡀࡒࡃࡀ ࡏࡕࡀࡄࡆࡉࡍ ࡕࡋࡀࡕࡀ ࡔࡓࡀࡂࡉࡀ ࡔࡀࡌࡉࡔ ࡀࡓࡀࡁ ࡅࡔࡓࡀࡂࡉࡀ ࡃࡍࡀ ࡍࡅࡓࡀ ࡕࡋࡀࡕ ࡁࡉࡕ ࡀࡌࡀ ࡅࡂࡅࡈࡓࡀ ࡂࡈࡀࡓ ࡁࡉࡕ ࡌࡒࡀࡃࡔࡉࡀ ࡂࡅࡄࡀ ࡂࡍࡀ ࡁࡌࡀࡓࡊࡀࡁࡕࡀ ࡀࡓࡒࡀ ࡍࡀࡃࡀࡕ ࡌࡍ ࡃࡅࡊࡕࡇ ࡊࡅࡊࡁࡀ ࡑࡓࡀࡁࡇ ࡁࡉࡀࡄࡅࡃ ࡊࡅࡊࡁࡀ ࡑࡓࡀࡁࡇ ࡁࡏࡅࡓࡀࡔࡋࡀࡌ ࡔࡀࡌࡉࡔ ࡏࡕࡀࡄࡆࡉࡀ ࡁࡋࡉࡋࡉࡀ ࡅࡎࡉࡓࡀ ࡁࡏࡅࡌࡀࡌࡀ ࡃࡍࡀ ࡗ ࡄࡀࡆࡉࡍ ࡔࡅࡌࡀ ࡋࡉࡋࡉࡅࡊ ࡀࡒࡀࡐࡓࡀ ࡁࡓࡉࡔࡉࡇ ࡓࡌࡀ ࡀࡓࡈࡉࡋ ࡒࡀࡌ ࡋࡉࡋࡉࡅࡊ ࡌࡍ ࡀࡓࡎࡇ ࡅࡋࡎࡐࡀࡓ ࡄࡉࡋࡌࡉࡀ ࡀࡕࡉࡉࡇ ࡐࡀࡄࡕࡀࡋࡇ ࡅࡒࡀࡓࡉࡋࡇ ࡄࡀࡆࡉࡀ ࡀࡁࡂࡀࡅࡇ ࡌࡀࡄࡅ ࡖࡊࡃࡉࡁ ࡐࡀࡄࡕࡀࡋࡇ ࡅࡒࡀࡓࡉࡋࡇ ࡅࡌࡐࡀࡔࡉࡒࡋࡅࡍ ࡁࡋࡉࡁࡇ ࡅࡋࡀࡒࡀࡓࡉࡋࡅࡍ ࡊࡀࡃࡉࡁࡋࡅࡍ ࡁࡏࡍࡂࡉࡓࡕࡀ ࡅࡌࡀࡐࡓࡉࡔࡋࡅࡍ ࡏࡋ ࡔࡀࡐࡕࡀ ࡅࡀࡌࡀࡓࡋࡅࡍ ࡅࡀࡉࡋࡀࡉࡊࡅࡍ ࡊࡅࡋࡀࡉࡊࡅࡍ ࡊࡀࡄࡍࡉࡀ ࡖࡏࡍࡉࡔࡁࡀࡉ ࡉࡀࡋࡃࡀ ࡉࡀࡃࡋࡀ ࡅࡀࡉࡋࡀࡉࡊࡅࡍ ࡓࡀࡁࡅࡍࡉࡀ ࡖࡉࡀࡋࡃࡀ ࡌࡉࡕࡋࡉࡃ ࡁࡏࡅࡓࡀࡔࡋࡀࡌ ࡅࡀࡉࡋࡀࡉࡊࡅࡍ ࡌࡀࡒࡓࡉࡀ ࡅࡃࡉࡓࡃࡒࡉࡀ ࡖ ࡏࡍࡉࡔࡁࡀࡉ ࡉࡀࡋࡃࡀ ࡉࡀࡃࡋࡀ ࡅࡀࡉࡋࡉࡊ ࡓࡀࡁࡕࡉࡀ ࡏࡅࡓࡀࡉࡕࡀ ࡖࡉࡅࡄࡀࡍࡀ ࡌࡉࡕࡋࡉࡃ ࡁࡏࡅࡓࡀࡔࡋࡀࡌ ࡉࡅࡄࡀࡍࡀ ࡋࡀࡂࡉࡈ ࡉࡀࡓࡃࡍࡀ ࡅࡌࡉࡕࡉࡒࡓࡉࡀ ࡏࡍࡁࡉࡄࡀ ࡁࡏࡅࡓࡀࡔࡋࡀࡌ ࡊࡀࡃࡉࡁࡋࡅࡍ ࡋࡉࡋࡉࡅࡊ ࡁࡏࡍࡂࡉࡓࡕࡀ ࡅࡀࡌࡀࡓࡋࡅࡍ ࡊࡅࡊࡁࡀ ࡖࡀࡕࡀ ࡅࡒࡀࡌ ࡏࡋ ࡏࡍࡉࡔࡁࡀࡉ ࡉࡀࡋࡃࡀ ࡌࡍ ࡏࡌࡓࡅࡌࡀ ࡏࡋࡀࡉࡀ ࡏࡕࡉࡍࡑࡉࡁ ࡅࡀࡕࡀ ࡅࡏࡄࡀࡁࡋࡇ ࡏࡋ ࡏࡍࡉࡔࡁࡀࡉ ࡍࡅࡓࡀ ࡖࡉࡀࡒࡃࡀ ࡁࡀࡁࡀ ࡎࡀࡁࡀ ࡆࡀࡊࡓࡉࡀ ࡉࡅࡄࡀࡍࡀ ࡌࡉࡕࡋࡉࡃ ࡁࡏࡅࡓࡀࡔࡋࡀࡌ ࡍࡉࡎࡁࡇ ࡋࡏࡍࡂࡉࡓࡕࡀ ࡈࡀࡁ ࡉࡅࡌࡉࡍ ࡅࡔࡀࡌࡀࡓ ࡁࡏࡅࡓࡀࡔࡋࡀࡌ ࡌࡉࡆࡋࡇ ࡀࡆࡀࡋ ࡅࡀࡔࡊࡉࡍࡅࡍ ࡏࡋ ࡊࡅࡋࡄࡅࡍ ࡊࡀࡄࡍࡉࡀ ࡁࡌࡀࡋࡉࡀ ࡉࡀࡕࡁࡉࡍ ࡍࡉࡎࡁࡇ ࡋࡏࡍࡂࡉࡓࡕࡀ ࡅࡏࡋ ࡏࡃࡇ ࡖࡏࡋࡉࡆࡀࡓ ࡓࡌࡀ ࡐࡀࡄࡕࡀࡋࡇ ࡅࡒࡀࡓࡉࡋࡇ ࡄࡀࡆࡉࡀ ࡁࡂࡀࡅࡇ ࡌࡀࡋࡀࡋࡉࡀ ࡔࡀࡍࡉࡀ ࡐࡀࡄࡕࡀࡋࡇ ࡅࡒࡀࡓࡉࡋࡇ ࡄࡀࡆࡉࡀ ࡁࡂࡀࡅࡇ ࡌࡀࡄࡅ ࡊࡃࡉࡁ ࡒࡀࡓࡉࡋࡇ ࡁࡋࡉࡁࡇ ࡅࡋࡀࡌࡀࡐࡓࡉࡔࡋࡅࡍ ࡏࡋࡇ ࡔࡉࡒࡋࡇ ࡏࡋࡉࡆࡀࡓ ࡅࡏࡋ ࡏࡃࡇ ࡖࡀࡁࡀ ࡎࡀࡁࡀ ࡆࡀࡊࡓࡉࡀ ࡀࡕࡍࡇ ࡐࡀࡄࡕࡀࡋࡇ ࡅࡒࡀࡓࡉࡋࡇ ࡄࡀࡆࡉࡀ ࡁࡂࡀࡅࡇ ࡌࡀࡄࡅ ࡊࡃࡉࡁ ࡒࡀࡓࡉࡋࡇ ࡀࡁࡋࡉࡁࡇ ࡅࡋࡀࡌࡐࡀࡔࡉࡒࡋࡇ ࡏࡋࡀ ࡔࡀࡒࡉࡋࡇ ࡋࡏࡍࡂࡉࡓࡕࡀ ࡅࡏࡋ ࡏࡃࡇ ࡖࡏࡋࡉࡆࡀࡓ ࡓࡌࡀ ࡏࡋࡉࡆࡀࡓ ࡐࡉࡄࡕࡇ ࡋࡐࡅࡌࡇ ࡅࡋࡀࡁࡀ ࡎࡀࡁࡀ ࡆࡀࡊࡓࡉࡀ ࡖࡍࡉࡌࡀࡓࡋࡇ ࡉࡀ ࡀࡁࡀ ࡎࡀࡁࡀ ࡐࡅࡒ ࡌࡍ ࡉࡀࡄࡅࡃ ࡖࡋࡀࡕࡉࡓࡌࡉࡀ ࡁࡏࡅࡓࡀࡔࡋࡀࡌ ࡕࡉࡂࡓࡀ ࡉࡀࡌࡉࡍࡀ ࡃࡀࡋࡉࡀ ࡀࡁࡀ ࡎࡀࡁࡀ ࡅࡏࡋ ࡓࡉࡔࡇ ࡖࡏࡋࡉࡆࡀࡓ ࡌࡄࡀ ࡅࡀࡌࡀࡓࡋࡇ ࡉࡀ ࡏࡋࡉࡆࡀࡓ ࡁࡀࡉࡕࡀ ࡓࡁࡀ ࡓࡉࡔࡀࡉࡄࡅࡍ ࡖࡊࡅࡋࡄࡅࡍ ࡊࡀࡄࡍࡉࡀ ࡏࡅ ࡁࡍࡀࡐࡔࡀࡊ ࡏࡌࡀࡊ ࡉࡀࡃࡉࡕ ࡋࡀࡌࡑࡉࡉࡕ ࡋࡌࡉࡆࡀࡋ ࡋࡁࡉࡕ ࡊࡍࡉࡔࡕࡀࡍ ࡏࡅ ࡁࡍࡀࡐࡔࡀࡊ ࡉࡀࡃࡉࡕ ࡋࡀ ࡒࡀࡓࡉࡀࡕࡁࡇ ࡌࡉࡀࡃࡉࡕ ࡁࡏࡅࡓࡀࡉࡕࡀ ࡀࡌࡉࡍࡈࡅࡋ ࡖࡏࡌࡀࡊ ࡏࡍࡕࡀ ࡂࡀࡉࡀࡓࡕࡉࡀ ࡄࡅࡀࡕ ࡏࡍࡕࡀ ࡄࡅࡀࡕ ࡂࡀࡉࡀࡓࡕࡉࡀ ࡖࡋࡀ ࡔࡀࡋࡌࡀࡕ ࡋࡁࡉࡕ ࡄࡀࡌࡅ ࡀࡌࡉࡍࡈࡅࡋ ࡖࡋࡀࡄࡅࡀࡋࡇ ࡏࡋ ࡀࡁࡅࡊ ࡌࡀࡎࡕࡉࡓࡉࡀ ࡆࡉࡆࡉࡀ ࡖࡊࡀࡃࡉࡁࡋࡇ ࡏࡍࡂࡉࡓࡕࡀ ࡖࡔࡁࡅࡒࡅࡉࡀ ࡀࡊࡀࡓ ࡔࡉࡁࡒࡇ ࡅࡋࡀࡔࡀࡉࡉࡋ ࡏࡋࡇ ࡌࡉࡀࡊࡀ ࡉࡅࡌࡀ ࡖࡀࡕࡉࡍࡀ ࡅࡌࡉࡎࡕࡀࡊࡉࡍࡀ ࡅࡋࡀࡄࡀࡆࡉࡍࡀ ࡋࡌࡉࡔࡀ ࡁࡓ ࡀࡌࡓࡀ ࡄࡉࡍ ࡌࡉࡀࡊࡀ ࡉࡅࡌࡀ ࡖࡀࡕࡉࡍࡀ ࡅࡋࡀࡌࡑࡀࡋࡉࡍࡀ ࡁࡊࡍࡉࡔࡕࡀࡉࡊࡅࡍ ࡖࡋࡀࡏࡕࡓࡉࡑࡕࡅࡍ ࡅࡋࡀࡏࡕࡒࡀࡉࡀࡌࡕࡅࡍ ࡅࡌࡉࡍࡉࡋࡕࡀ ࡖࡋࡀࡔࡌࡀࡉࡕࡅࡍ ࡏࡋࡀࡉ ࡀࡌࡓࡉࡕࡅࡍ ࡌࡀࡍ ࡌࡉࡕࡀ ࡖࡌࡉࡕࡀࡄࡉࡉࡀ ࡖࡏࡍࡉࡔࡁࡀࡉ ࡉࡀࡋࡃࡀ ࡉࡀࡃࡋࡀ ࡌࡀࡍ ࡏࡔࡉࡒࡀ ࡖࡏࡕࡐࡀࡕࡀ ࡅࡌࡀࡍ ࡔࡀࡐࡅࡐࡀ ࡖࡒࡃࡀࡋࡇ ࡋࡉࡂࡓࡉࡀ ࡅࡌࡀࡍ ࡂࡅࡍࡂࡀ ࡖࡉࡀࡋࡉࡐ ࡎࡉࡐࡓࡀ ࡖࡏࡍࡉࡔࡁࡀࡉ ࡉࡀࡋࡃࡀ ࡉࡀࡃࡋࡀ ࡉࡅࡌࡀࡉ ࡎࡓࡉࡍ ࡅࡕࡀࡓࡕࡉࡍ ࡔࡍࡉࡀ ࡖࡋࡀࡄࡆࡉࡋࡉࡀ ࡆࡀࡅࡀ ࡄࡉࡍࡏࡋࡀ ࡋࡀࡁࡃࡉࡋࡉࡀ ࡅࡋࡀࡁࡃࡉࡋࡊࡅࡍ ࡖࡏࡍࡉࡔࡁࡀࡉ ࡉࡀࡋࡃࡀ ࡉࡀࡃࡋࡀ ࡒࡀࡌ ࡊࡅࡋࡄࡅࡍ ࡊࡀࡄࡍࡉࡀ ࡅࡌࡉࡍࡇ ࡖࡀࡁࡀ ࡎࡀࡁࡀ ࡆࡀࡊࡓࡉࡀ ࡓࡀࡈࡍࡉࡀ ࡀࡌࡓࡉࡋࡇ ࡏࡍࡄࡀ ࡅࡏࡕࡉࡁ ࡀࡁࡀ ࡎࡀࡁࡀ ࡅࡍࡉࡄࡅࡕࡀ ࡖࡈࡀࡁࡉࡀ ࡌࡉࡔࡓࡉࡀ ࡏࡋࡀࡊ ࡉࡀ ࡀࡁࡀ ࡎࡀࡁࡀ ࡏࡅ ࡄࡉࡋࡌࡉࡀ ࡋࡉࡊࡀ ࡁࡉࡀࡄࡅࡃ ࡏࡅ ࡄࡉࡆࡅࡀࡍࡉࡀ ࡋࡉࡊࡀ ࡁࡏࡅࡓࡀࡔࡋࡀࡌ ࡊࡅࡋ ࡌࡀࡄࡅ ࡖࡀࡌࡀࡓ ࡌࡉࡔࡀ ࡊࡀࡃࡁࡀ ࡄࡅ ࡄࡉࡍࡏࡋࡀ ࡌࡉࡍࡉࡋࡕࡀࡊ ࡅࡌࡉࡍࡉࡋࡕࡀࡍ ࡌࡍࡀࡈࡓࡀࡍ ࡄࡉࡋࡌࡉࡀ ࡖࡄࡆࡀࡉࡍࡅࡍ ࡀࡍࡉࡍ ࡉࡅࡄࡀࡍࡀ ࡋࡀࡂࡉࡈ ࡉࡀࡓࡃࡍࡀ ࡅࡌࡉࡕࡉࡒࡓࡉࡀ ࡍࡁࡉࡄࡀ ࡁࡏࡅࡓࡀࡔࡋࡀࡌ ࡀࡁࡀ ࡎࡀࡁࡀ ࡍࡐࡀࡒ ࡌࡍ ࡁࡉࡍࡀࡕࡀࡉࡄࡅࡍ ࡏࡋࡉࡆࡀࡓ ࡌࡍ ࡀࡁࡀࡕࡓࡇ ࡍࡐࡀࡒ ࡏࡕࡀࡄࡆࡅࡍ ࡀࡕࡋࡀࡕࡀ ࡔࡓࡀࡂࡉࡀ ࡖࡀࡆࡋࡉࡍ ࡌࡉࡍࡇ ࡁࡉࡋࡅࡀࡕࡇ ࡓࡄࡉࡈ ࡅࡋࡉࡂࡈࡅࡉࡀ ࡁࡔࡉࡐࡅࡋࡇ ࡅࡋࡀࡁࡀ ࡎࡀࡁࡀ ࡖ ࡍࡉࡌࡀࡓࡋࡇ ࡉࡀ ࡀࡁࡀ ࡎࡀࡁࡀ ࡌࡀࡄࡅ ࡖࡀࡆࡉࡋ ࡀࡒࡀࡌࡀࡊ ࡅࡌࡀࡄࡅ ࡖࡀࡕࡉࡀ ࡌࡍ ࡀࡁࡀࡕࡓࡀࡊ ࡀࡌࡀࡓࡋࡅࡍ ࡉࡀ ࡏࡋࡉࡆࡀࡓ ࡁࡀࡉࡕࡀ ࡓࡁࡀ ࡓࡉࡔࡀࡉࡄࡅࡍ ࡖࡊࡅࡋࡄࡅࡍ ࡊࡀࡄࡍࡉࡀ ࡔࡓࡀࡂࡉࡀ ࡖࡀࡆࡋࡉࡍ ࡀࡒࡀࡌࡀࡉ ࡋࡀࡉࡀࡃࡀࡍࡀ ࡀࡋࡌࡀࡍ ࡒࡀࡍࡀࡈࡓࡉࡀ ࡍࡅࡓࡀ ࡖࡀࡕࡀ ࡌࡍ ࡀࡁࡀࡕࡓࡀࡉ ࡋࡀࡉࡀࡃࡀࡍࡀ ࡀࡁࡉࡄࡃࡉࡀ ࡌࡀࡍࡅ ࡄࡏ ࡋࡀࡁࡓࡉࡋࡉࡀ ࡅࡋࡀࡁࡃࡉࡋࡊࡅࡍ ࡖࡏࡍࡉࡔࡁࡀࡉ ࡉࡀࡋࡃࡀ ࡉࡀࡃࡋࡀ ࡒࡀࡌ ࡊࡅࡋࡄࡅࡍ ࡊࡀࡄࡍࡉࡀ ࡅࡌࡉࡍࡇ ࡖࡀࡁࡀ ࡎࡀࡁࡀ ࡆࡀࡊࡓࡉࡀ ࡓࡀࡈࡍࡉࡀ ࡅࡀࡌࡓࡉࡋࡇ ࡉࡀ ࡀࡁࡀ ࡎࡀࡁࡀ ࡆࡀࡊࡓࡉࡀ ࡍࡄࡀ ࡅࡊࡅࡍ ࡅࡏࡕࡊࡀࡍࡀࡍ ࡖࡉࡀࡋࡃࡀ ࡌࡍ ࡏࡌࡓࡅࡌࡀ ࡏࡋࡀࡉࡀ ࡏࡕࡉࡍࡑࡉࡁ ࡅࡏࡕࡄࡉࡁࡋࡀࡊ ࡋࡃࡉࡋࡀࡊ ࡁࡎࡉࡁࡅࡕࡀࡊ ࡉࡅࡄࡀࡍࡀ ࡌࡉࡕࡋࡉࡃ ࡉࡅࡄࡀࡍࡀ ࡋࡀࡂࡉࡈ ࡉࡀࡓࡃࡍࡀ ࡅࡌࡉࡕࡒࡓࡉࡀ ࡍࡁࡉࡄࡀ ࡁࡏࡅࡓࡀࡔࡋࡀࡌ ࡀࡍࡉࡍ ࡌࡉࡑࡈࡉࡁࡉࡍࡉࡍ ࡁࡌࡀࡑࡁࡅࡕࡇ ࡅࡌࡉࡓࡔࡉࡌࡉࡍࡉࡍ ࡁࡃࡀࡊࡉࡀ ࡓࡅࡔࡅࡌࡄ ࡍࡀࡎࡁࡉࡍࡀࡋࡇ ࡋࡐࡉࡄࡕࡇ ࡅࡔࡀࡕࡉࡍࡀࡋࡇ ࡋࡌࡀࡌࡁࡅࡄࡇ ࡅࡎࡀࡋࡒࡉࡍࡉࡍ ࡌࡉࡍࡇ ࡋࡀࡕࡀࡓ ࡍࡄࡅࡓ ࡒࡀࡌ ࡊࡅࡋࡄࡅࡍ ࡊࡀࡄࡍࡉࡀ ࡅࡌࡉࡍࡇ ࡖࡀࡁࡀ ࡎࡀࡁࡀ ࡆࡀࡊࡓࡉࡀ ࡓࡀࡈࡍࡉࡀ ࡉࡀ ࡀࡁࡀ ࡎࡀࡁࡀ ࡍࡉࡌࡀࡓࡋࡀࡊ ࡏࡋ ࡁࡅࡍࡊࡀࡊ ࡅࡋࡀࡁࡀࡄࡀࡕࡀࡊ ࡖࡌࡉࡍࡀࡉࡄࡅࡍ ࡄࡅࡉࡕ ࡌࡉࡔࡀ ࡁࡓ ࡀࡌࡓࡀ ࡌࡍ ࡒࡉࡍࡀࡊ ࡃࡉࡋࡀࡊ ࡄࡅࡀ ࡔࡉࡋࡀࡉ ࡅࡔࡉࡋࡁࡀࡉ ࡌࡍ ࡒࡉࡍࡀࡊ ࡃࡉࡋࡀࡊ ࡄࡅࡍ ࡁࡓࡀࡄࡉࡌ ࡅࡎࡓࡀࡏࡉࡋ ࡌࡍ ࡒࡉࡍࡀࡊ ࡃࡉࡋࡀࡊ ࡄࡅࡍ ࡁࡍࡀࡉ ࡅࡁࡍࡉࡀ ࡀࡌࡉࡍ ࡌࡍ ࡒࡉࡍࡀࡊ ࡃࡉࡋࡀࡊ ࡄࡅࡍ ࡓࡉࡔࡀࡉ ࡅࡓࡀࡕ ࡌࡍ ࡒࡉࡍࡀࡊ ࡃࡉࡋࡀࡊ ࡄࡅࡍ ࡓࡉࡔࡀࡉ ࡅࡁࡀࡆࡓࡀࡉ ࡌࡍ ࡒࡉࡍࡀࡊ ࡃࡉࡋࡀࡊ ࡄࡅࡍ ࡆࡀࡊࡀࡉ ࡅࡆࡀࡊࡍࡀࡉ ࡌࡍ ࡒࡉࡍࡀࡊ ࡃࡉࡋࡀࡊ ࡄࡅࡍ ࡓࡀࡌࡉࡔ ࡅࡌࡀࡄࡓࡀࡌࡉࡓ ࡌࡍ ࡒࡉࡍࡀࡊ ࡃࡉࡋࡀࡊ ࡄࡅࡍ ࡓࡀࡁࡉࡍ ࡅࡉࡀࡄࡅࡃࡀ ࡌࡍ ࡒࡉࡍࡀࡊ ࡃࡉࡋࡀࡊ ࡄࡅࡍ ࡏࡆࡀࡉࡓࡀࡁ ࡅࡓࡀࡆࡀࡉ ࡌࡍ ࡒࡉࡍࡀࡊ ࡃࡉࡋࡀࡊ ࡄࡅࡍ ࡄࡉࡍࡅࡍ ࡖࡁࡉࡍࡉࡅ ࡋࡒࡅࡌࡁࡀ ࡖࡊࡀࡄࡍࡉࡀ ࡅࡑࡉࡋࡌࡉࡀ ࡅࡑࡅࡓࡀࡕࡀ ࡁࡂࡀࡅࡇ ࡑࡀࡓ ࡌࡍ ࡒࡉࡍࡀࡊ ࡃࡉࡋࡀࡊ ࡄࡅࡍ ࡄࡀࡍࡀࡉ ࡅࡄࡀࡍࡀࡍࡀࡉ ࡌࡍ ࡒࡉࡍࡀࡊ ࡃࡉࡋࡀࡊ ࡄࡅࡍ ࡂࡀࡁࡓࡀ ࡖࡊࡉࡃࡁࡇ ࡋࡏࡅࡓࡀࡉࡕࡀ ࡈࡅࡎ ࡓࡁࡀ ࡔࡅࡌࡇ ࡌࡍ ࡒࡉࡍࡀࡊ ࡃࡉࡋࡀࡊ ࡄࡅࡀ ࡓࡀࡌࡀ ࡅࡔࡉࡌࡏࡉࡋ ࡌࡍ ࡒࡉࡍࡀࡊ ࡃࡉࡋࡀࡊ ࡄࡅࡍࡓࡀࡁࡀࡉ ࡄࡀࡍࡀࡉ ࡅࡓࡀࡁ ࡄࡀࡍࡀࡍࡀࡉ ࡌࡍ ࡒࡉࡍࡀࡊ ࡃࡉࡋࡀࡊ ࡄࡅࡍ ࡁࡍࡉࡀ ࡓࡉࡎࡀ ࡅࡔࡅࡌࡏࡉࡋ ࡌࡍ ࡒࡉࡍࡀࡊ ࡃࡉࡋࡀࡊ ࡄࡅࡍ ࡈࡀࡁ ࡉࡅࡌࡉࡍ ࡅࡌࡀࡒࡓࡉࡀ ࡖࡒࡀࡓࡉࡀ ࡌࡍ ࡒࡉࡍࡀࡊ ࡃࡉࡋࡀࡊ ࡄࡅࡍ ࡁࡓࡉࡊࡉࡀ ࡔࡀࡄࡓࡉࡓࡉࡀ ࡖࡀࡁࡀࡄࡀࡕࡀࡊ ࡃࡉࡋࡀࡊ ࡀࡁࡀ ࡎࡀࡁࡀ ࡄࡉࡍࡅࡍ ࡄࡀࡋࡉࡍ ࡊࡅࡋࡄࡅࡍ ࡋࡀࡋࡂࡀࡈࡉࡅࡍ ࡆࡀࡅࡀ ࡅࡋࡀࡄࡅࡀࡋࡅࡍ ࡁࡍࡉࡀ ࡄࡉࡍࡏࡋࡀ ࡁࡎࡉࡁࡅࡕࡅࡍ ࡊࡅࡋ ࡄࡀࡃ ࡁࡓࡀ ࡄࡅࡀࡋࡅࡍ ࡁࡍࡉࡀ ࡄࡅࡀࡋࡅࡍ ࡍࡁࡉࡄࡉࡀ ࡁࡏࡅࡓࡀࡔࡋࡀࡌ ࡄࡅࡍ ࡏࡅ ࡌࡉࡍࡀࡊ ࡃࡉࡋࡀࡊ ࡍࡀࡐࡉࡒ ࡍࡁࡉࡄࡀ ࡄࡀࡆࡉࡍ ࡒࡉࡍࡀ ࡍࡀࡎࡁࡉࡕ ࡏࡋࡀࡊ ࡀࡌࡉࡍࡈࡅࡋ ࡖࡉࡅࡄࡀࡍࡀ ࡏࡕࡉࡕࡋࡇ ࡋࡌࡉࡄࡅࡉࡀ ࡅࡌࡉࡕࡒࡓࡉࡀ ࡀࡍࡁࡉࡄࡀ ࡁࡏࡅࡓࡀࡔࡋࡀࡌ ࡏࡋࡉࡆࡀࡓ ࡐࡉࡄࡕࡇ ࡋࡐࡅࡌࡇ ࡅࡋࡀࡁࡀ ࡎࡀࡁࡀ ࡖࡍࡉࡌࡀࡓࡋࡇ ࡉࡀ ࡀࡁࡀ ࡎࡀࡁࡀ ࡏࡅ ࡉࡅࡄࡀࡍࡀ ࡄࡀࡅࡉࡀ ࡅࡋࡀࡂࡉࡈ ࡉࡀࡓࡃࡍࡀ ࡀࡍࡀ ࡄࡀࡅࡉࡍࡀ ࡀࡓࡒࡀ ࡁࡉࡂࡀࡓ ࡃࡉࡋࡇ ࡅࡌࡉࡑࡈࡉࡁࡍࡀ ࡁࡌࡀࡑࡁࡅࡕࡇ ࡅࡌࡉࡓࡔࡉࡌࡍࡀ ࡁࡃࡀࡊࡉࡀ ࡓࡅࡔࡅࡌࡇ ࡍࡀࡎࡁࡉࡍࡀࡋࡇ ࡋࡐࡉࡄࡕࡇ ࡅࡔࡀࡕࡉࡍࡀࡋࡇ ࡋࡌࡀࡌࡁࡅࡄࡇ ࡅࡎࡀࡋࡒࡉࡍࡉࡍ ࡌࡉࡍࡇ ࡋࡀࡕࡀࡓ ࡍࡄࡅࡓ ࡀࡁࡀ ࡎࡀࡁࡀ ࡐࡉࡄࡕࡇ ࡋࡐࡅࡌࡇ ࡅࡋࡊࡅࡋࡄࡅࡍ ࡊࡀࡄࡍࡉࡀ ࡖࡍࡉࡌࡀࡓࡋࡅࡍ ࡏࡅ ࡌࡍ ࡌࡓࡅࡌࡀ ࡏࡋࡀࡉࡀ ࡄࡀࡅࡉࡀ ࡉࡀࡋࡃࡀ ࡌࡀࡄࡅ ࡖࡀࡁࡃࡉࡕࡅࡍ ࡁࡏࡅࡓࡀࡔࡋࡀࡌ ࡉࡀࡋࡃࡀ ࡌࡍ ࡄࡅࡎ ࡉࡀࡓࡃࡍࡀ ࡀࡕࡉࡅࡉࡀ ࡅࡁࡊࡀࡓࡎࡀ ࡖ ࡏࡍࡉࡔࡁࡀࡉ ࡓࡉࡌࡉࡅࡉࡀ ࡅࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡉࡅࡄࡀࡍࡀ ࡁࡓࡀࡌࡔࡉࡀ ࡖࡋࡉࡋࡉࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡀࡌࡀࡓ ࡁࡔࡅࡌࡇ ࡖࡀࡁ ࡍࡀࡄࡉࡓࡍࡀ ࡅࡁࡕࡅࡔࡁࡉࡄࡕࡇ ࡖࡂࡀࡁࡓࡀ ࡍࡀࡎࡁࡀࡉ ࡀࡍࡀ ࡍࡀࡐࡔࡀࡉ ࡌࡍ ࡀࡋࡌࡀ ࡐࡀࡓࡒࡉࡕ ࡅࡌࡍ ࡏࡁࡉࡃࡀࡕࡀ ࡖࡎࡀࡉࡍࡀ ࡅࡋࡀࡊࡀࡔࡓࡀ ࡔࡅࡁࡀ ࡌࡔࡀࡉࡋࡉࡋࡉࡀ ࡌࡉࡕࡉࡀ ࡖࡄࡉࡉࡀ ࡋࡀࡄࡆࡅࡍ ࡅࡀࡌࡓࡉࡀ ࡁࡄࡀࡉࡋࡇ ࡖࡌࡀࡍࡅ ࡒࡀࡉࡌࡉࡕ ࡅࡁࡕࡅࡔࡁࡉࡄࡕࡇ ࡖࡌࡀࡍࡅ ࡃࡀࡓࡔࡉࡕ ࡀࡌࡀࡓࡍࡀࡋࡅࡍ ࡀࡍࡀ ࡁࡄࡀࡉࡋࡇ ࡖࡀࡁ ࡒࡀࡉࡉࡌࡍࡀ ࡅࡁࡕࡅࡔࡁࡉࡄࡕࡇ ࡖࡂࡀࡁࡓࡀ ࡍࡀࡑࡁࡀࡉ ࡀࡍࡀ ࡋࡀࡅ ࡁࡀࡉࡕࡀ ࡁࡍࡉࡕ ࡁࡉࡀࡄࡅࡃ ࡅࡋࡀࡊࡅࡓࡎࡉࡀ ࡕࡉࡓࡑࡉࡕ ࡁࡏࡅࡓࡀࡔࡋࡀࡌ ࡋࡀࡓࡉࡄࡌࡉࡕ ࡊࡋࡉࡋࡀ ࡅࡀࡓࡃࡀ ࡅࡋࡀࡔࡀࡌࡀࡔࡕࡀ ࡖࡌࡓࡀࡂࡀࡂࡀࡍ ࡋࡀࡓࡉࡄࡌࡉࡕ ࡄࡅࡎࡓࡀࡍࡀ ࡅࡋࡀࡌࡀࡍࡀ ࡖࡔࡕࡀ ࡄࡀࡌࡓࡀ ࡋࡀ ࡓࡉࡄࡌࡉࡕ ࡏࡊࡉࡋࡕࡀ ࡖࡐࡀࡂࡓࡉࡀ ࡅࡀࡒࡅࡕ ࡀࡉࡍࡉࡀ ࡋࡀࡔࡓࡀࡕ ࡏࡋࡀࡉ ࡋࡀࡍࡔࡉࡕ ࡓࡀࡄࡌࡀࡉ ࡖࡋࡉࡋࡉࡀ ࡅࡋࡀࡍࡔࡉࡕ ࡖࡔࡀࡍࡀࡉ ࡉࡀࡓࡃࡍࡀ ࡋࡀࡍࡔࡉࡕࡇ ࡋࡌࡀࡑࡁࡅࡕࡀࡉ ࡅࡋࡀࡍࡔࡉࡕ ࡃࡀࡊࡉࡀ ࡓࡅࡔࡅࡌࡀࡉ ࡋࡀࡍࡔࡉࡕࡇ ࡏࡋ ࡄࡀࡁࡔࡀࡁࡀ ࡅࡀࡍࡐࡉࡀ ࡉࡅࡌࡀ ࡋࡀࡂࡆࡀࡓ ࡏࡋࡀࡉ ࡋࡀࡍࡔࡉࡕࡉࡍࡅࡍ ࡏࡋ ࡔࡉࡋࡌࡀࡉ ࡅࡍࡉࡃࡁࡀࡉ ࡖ ࡏࡕࡋࡅࡍ ࡀࡌࡃࡅࡓࡕࡀ ࡁࡉࡕ ࡓࡅࡓࡁࡉࡀ ࡀࡌࡆࡀࡊࡉࡋࡉࡀ ࡅࡌࡀࡎࡒࡉࡋࡉࡀ ࡅࡉࡀࡃࡉࡀ ࡖࡋࡉࡕࡁࡉࡀ ࡄࡀࡎࡉࡓ ࡅࡁࡑࡉࡓ ࡗ ࡄࡀࡆࡉࡍ ࡀࡌࡀࡓ ࡉࡀࡄࡉࡀ ࡄࡉࡉࡀ ࡀࡄࡃࡅࡁࡇ ࡌࡍ ࡓࡉࡔ ࡁࡓࡉࡔ ࡔࡅࡁࡀ ࡔࡋࡀࡌࡀ ࡔࡀࡋࡌࡅࡋࡇ ࡅࡕࡓࡉࡎࡀࡓ ࡀࡒࡀࡌࡇ ࡎࡀࡂࡃࡉࡀ ࡅࡀࡌࡓࡉࡋࡇ ࡄࡀࡋࡉࡍ ࡔࡀࡅࡉࡕࡀ ࡄࡀࡍࡀࡕࡇ ࡖࡀࡍࡀࡕ ࡀࡌࡀࡓࡕ ࡉࡀࡄࡉࡀ ࡋࡀࡊࡀࡃࡉࡁࡕ ࡌࡉࡍࡀࡉࡄࡅࡍ ࡄࡃࡀ ࡁࡀࡎࡉࡌࡀ ࡅࡍࡀࡉࡀ ࡑࡀࡅࡕࡀࡊ ࡅࡋࡉࡊࡀ ࡖ ࡃࡀࡌࡉࡋࡀࡊ ࡅࡔࡅࡕࡀࡊ ࡀࡁࡐࡅࡌࡀࡊ ࡍࡀࡉࡀ ࡅࡉࡀࡒࡉࡓ ࡌࡉࡌࡓࡀ ࡖࡏࡄࡀࡁࡋࡀࡊ ࡋࡁࡅࡔࡀ ࡖࡄࡉࡉࡀ ࡒࡀࡃࡌࡀࡉࡉࡀ ࡋࡀࡃࡀࡌ ࡂࡀࡁࡓࡀ ࡏࡄࡀࡁࡋࡇ ࡀࡋࡁࡅࡔࡀ ࡖࡄࡉࡉࡀ ࡒࡀࡃࡌࡀࡉࡉࡀ ࡋࡓࡀࡌ ࡂࡀࡁࡓࡀ ࡏࡄࡀࡁࡋࡇ ࡋࡁࡅࡔࡀ ࡖࡄࡉࡉࡀ ࡒࡀࡃࡌࡀࡉࡉࡀ ࡋࡔࡅࡓࡁࡀࡉ ࡂࡀࡁࡓࡀ ࡏࡄࡀࡁࡋࡇ ࡋࡁࡅࡔࡀ ࡖࡄࡉࡉࡀ ࡒࡀࡃࡌࡀࡉࡉࡀ ࡋࡔࡅࡌ ࡂࡀࡁࡓࡀ ࡏࡄࡀࡁࡋࡇ ࡄࡀࡔࡕࡀ ࡏࡄࡀࡁࡋࡀࡊ ࡏࡋ ࡃࡉࡋࡀࡊ ࡏࡄࡀࡁࡋࡀࡊ ࡉࡀࡄࡉࡀ ࡖࡎࡀࡋࡒࡉࡕ ࡅࡎࡀࡋࡉࡒ ࡌࡉࡍࡀࡊ ࡁࡀࡉࡕࡀ ࡁࡑࡀࡃࡉࡀ ࡌࡔࡕࡁࡉࡒ ࡊࡅࡋ ࡌࡀࡍ ࡖࡍࡉࡆࡃࡀࡊࡉࡀ ࡍࡉࡎࡀࡒ ࡋࡅࡀࡕࡀࡊ ࡋࡀࡕࡀࡓ ࡍࡄࡅࡓ ࡊࡅࡋ ࡌࡀࡍ ࡖࡋࡀࡍࡉࡆࡃࡀࡊࡉࡀ ࡁࡌࡀࡈࡀࡓࡀࡕࡀ ࡍࡉࡔࡕࡀࡉࡀࡋ ࡅࡄࡉࡉࡀ ࡆࡀࡊࡉࡍ ࡎࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡉࡅࡄࡀࡍࡀ ࡁࡓࡀࡌࡔࡉࡀ ࡖࡋࡉࡋࡉࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡀࡌࡀࡓ ࡁࡔࡅࡌࡀ ࡖࡔࡀࡍࡀࡉ ࡅࡌࡍࡀࡊࡓࡉࡀ ࡔࡀࡌࡉࡔ ࡏࡕࡉࡁ ࡁࡑࡅࡓࡕࡀ ࡅࡎࡉࡓࡀ ࡏࡕࡉࡁ ࡁࡕࡀࡋࡉࡀ ࡀࡓࡁࡀ ࡆࡉࡒࡉࡀ ࡖࡁࡀࡉࡕࡀ ࡋࡀࡂࡈࡉࡀ ࡂࡀࡍࡐࡀࡉࡄࡅࡍ ࡀࡄࡃࡀࡃࡉࡀ ࡅࡋࡀࡍࡀࡔࡌࡉࡀ ࡔࡀࡌࡉࡔ ࡋࡐࡅࡌࡇ ࡐࡉࡄࡕࡇ ࡅࡋࡇ ࡋࡉࡀࡄࡉࡀ ࡖ ࡍࡉࡌࡀࡓࡋࡇ ࡁࡏࡅࡓࡀࡔࡋࡀࡌ ࡏࡕࡋࡀࡊ ࡀࡕࡋࡀࡕࡀ ࡕࡉࡊࡉࡀ ࡕࡀࡂࡀ ࡖࡔࡀࡅࡉࡋࡇ ࡋࡊࡅࡋࡇ ࡀࡋࡌࡀ ࡏࡕࡋࡀࡊ ࡌࡍ ࡌࡀࡔࡊࡋࡉࡋ ࡎࡐࡉࡍࡕࡀ ࡖࡓࡀࡃࡉࡀ ࡄࡀࡊࡀ ࡁࡉࡀࡓࡃࡍࡀ ࡏࡕࡋࡀࡊ ࡐࡋࡅࡂࡕࡀ ࡓࡀࡁࡕࡉࡀ ࡖ ࡄࡀࡊࡀ ࡓࡀࡃࡉࡀ ࡁࡉࡍࡉࡀ ࡌࡀࡉ ࡋࡌࡀࡉ ࡗ ࡕࡉࡆࡀࡋ ࡋࡁࡉࡕ ࡓࡁࡉࡀ ࡒࡅࡃࡀࡌ ࡓࡁࡉࡀ ࡀࡃࡊࡀࡓ ࡏࡋࡀࡊ ࡉࡀࡄࡉࡀ ࡋࡐࡅࡌࡇ ࡐࡉࡄࡕࡇ ࡅࡋࡇ ࡋࡔࡀࡌࡉࡔ ࡖࡍࡉࡌࡀࡓࡋࡇ ࡁࡏࡅࡓࡀࡔࡋࡀࡌ ࡀࡍࡀ ࡕࡉࡊࡉࡀ ࡌࡉࡔࡀࡋ ࡔࡀࡋࡉࡕ ࡅࡕࡀࡂࡀࡊ ࡍࡀࡈࡓࡉࡀ ࡂࡌࡉࡓࡉࡀ ࡏࡋࡀ ࡄࡀࡆࡉࡍ ࡌࡀࡔࡊࡋࡉࡋ ࡎࡐࡉࡍࡕࡀ ࡂࡉࡅࡀࡕ ࡏࡒࡀࡓࡀ ࡂࡉࡈࡓࡅࡉࡀ ࡐࡋࡅࡂࡕࡀ ࡖࡓࡀࡃࡉࡀ ࡁࡉࡍࡉࡀ ࡌࡀࡉ ࡋࡌࡀࡉ ࡄࡀࡕࡌࡀ ࡖࡌࡀࡋࡊࡀ ࡌࡀࡕࡍࡀ ࡏࡋࡇ ࡖࡂࡀࡉࡓࡀ ࡁࡔࡅࡌࡀࡊ ࡅࡀࡆࡋࡀ ࡋࡁࡉࡕ ࡒࡉࡒࡋࡉࡀ ࡒࡀࡓࡁࡀ ࡌࡍ ࡆࡀࡅࡀ ࡖࡍࡀࡐࡔࡇ ࡁࡀࡉࡉࡀ ࡁࡍࡉࡀ ࡋࡀ ࡌࡀࡔࡊࡀ ࡗ ࡔࡀࡋࡌࡅ ࡍࡉࡃࡓࡇ ࡅࡍࡀࡐࡒࡀ ࡋࡀࡔࡉࡄࡀ ࡋࡁࡉࡕ ࡄࡉࡉࡀ ࡅࡋࡀࡌࡒࡀࡉࡌࡀ ࡋࡃࡀࡅࡓࡀ ࡕࡀࡒࡍࡀ ࡅࡌࡔࡀࡁࡉࡍ ࡄࡉࡉࡀ ࡎࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡉࡅࡄࡀࡍࡀ ࡁࡓࡀࡌࡔࡉࡀ ࡖࡋࡉࡋࡉࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡀࡌࡀࡓ ࡖࡋࡀࡅ ࡁࡀࡋࡄࡅࡃࡀࡉ ࡀࡍࡀ ࡀࡆࡉࡋࡍࡀ ࡅࡀࡕࡉࡍࡀ ࡌࡀࡄࡅ ࡍࡁࡉࡄࡀ ࡖࡃࡀࡌࡉࡋࡉࡀ ࡋࡃࡉࡋࡉࡀ ࡅࡌࡀࡍ ࡃࡀࡓࡉࡔ ࡁࡃࡓࡀࡁࡔࡀࡉ ࡅࡌࡀࡍ ࡌࡀࡌࡋࡉࡋ ࡁࡒࡀࡋࡀࡉ ࡔࡀࡍࡉࡀ ࡗ ࡄࡀࡆࡉࡍ ࡀࡌࡀࡓ ࡉࡀࡄࡉࡀ ࡕࡀࡓࡕࡉࡍ ࡏࡍࡔࡉࡀ ࡁࡀࡊࡉࡀࡍ ࡌࡉࡓࡉࡀࡉ ࡅࡏࡍࡉࡔࡁࡀࡉ ࡁࡀࡊࡉࡀࡍ ࡅࡃࡉࡌࡀࡉࡄࡉࡍ ࡖࡕࡀࡓࡕࡉࡍࡉࡍ ࡍࡀࡕࡓࡀࡍ ࡅࡀࡌࡓࡀࡍ ࡀࡍࡉࡍ ࡍࡉࡆࡀࡋ ࡅࡀࡍࡀࡕ ࡕࡉࡐࡅࡔ ࡄࡆࡉࡀ ࡏࡃࡉࡋࡌࡀ ࡌࡀࡊࡔࡉࡋࡀࡕࡋࡉࡀ ࡀࡍࡀ ࡏࡆࡀࡋ ࡅࡀࡍࡀࡕ ࡕࡉࡐࡅࡔ ࡄࡆࡉࡀ ࡏࡃࡉࡋࡌࡀ ࡌࡀࡊࡔࡉࡋࡀࡕࡋࡉࡀ ࡀࡍࡀ ࡏࡆࡀࡋ ࡅࡀࡍࡀࡕ ࡕࡉࡐࡅࡔ ࡄࡀࡆࡉࡍ ࡏࡃࡉࡋࡌࡀ ࡌࡀࡋࡉࡀ ࡌࡀࡋࡂࡉࡈࡀࡕࡋࡉࡀ ࡉࡀࡄࡉࡀ ࡋࡐࡅࡌࡇ ࡐࡉࡄࡕࡇ ࡅࡏࡋ ࡏࡍࡉࡔࡁࡀࡉ ࡖࡍࡉࡌࡀࡓࡋࡇ ࡁࡏࡅࡓࡀࡔࡋࡀࡌ ࡌࡉࡀࡊࡀ ࡖࡄࡉࡋࡐࡀࡍ ࡁࡏࡌࡓࡅࡌ ࡌࡉࡀࡊࡀ ࡖࡄࡉࡋࡐࡀࡍ ࡁࡉࡕ ࡓࡅࡓࡁࡉࡀ ࡌࡉࡀࡊࡀ ࡖ ࡄࡉࡋࡐࡀࡍ ࡁࡏࡌࡓࡅࡌ ࡖࡀࡍࡀࡕ ࡋࡃࡉࡋࡉࡀ ࡆࡀࡁࡍࡀࡕࡋࡉࡀ ࡏࡅ ࡌࡑࡉࡉࡕ ࡋࡌࡉࡆࡉࡁࡍࡀࡍ ࡀࡉࡕࡀࡉ ࡄࡉࡋࡉࡊ ࡅࡆࡅࡁࡍࡉࡍ ࡏࡅ ࡌࡑࡉࡉࡉࡕ ࡋࡌࡉࡆࡉࡁࡍࡀࡍ ࡀࡉࡕࡀࡉ ࡌࡀࡓࡂࡀࡍࡉࡀࡕࡉࡊ ࡅࡆࡉࡁࡍࡉࡍ ࡏࡅ ࡌࡑࡉࡉࡉࡕ ࡋࡌࡉࡆࡉࡁࡍࡀࡍ ࡀࡉࡕࡀࡉ ࡆࡀࡄࡁࡉࡊ ࡅࡆࡉࡁࡍࡉࡍ ࡏࡍࡉࡔࡁࡀࡉ ࡋࡐࡅࡌࡇ ࡀࡐࡕࡀࡄࡕࡇ ࡅࡋࡇ ࡋࡉࡀࡄࡉࡀ ࡖࡕࡉࡌࡀࡓࡋࡇ ࡁࡏࡅࡓࡀࡔࡋࡀࡌ ࡌࡀࡍ ࡃࡀࡌࡉࡋࡀࡊ ࡋࡃࡉࡋࡀࡊ ࡁࡉࡀࡄࡅࡃ ࡅࡌࡀࡍ ࡃࡀࡌࡉࡋࡀࡊ ࡋࡃࡉࡋࡀࡊ ࡁࡏࡅࡓࡀࡔࡋࡀࡌ ࡖࡀࡍࡀ ࡏࡄࡉࡆࡉࡇ ࡅࡋࡃࡉࡋࡀࡊ ࡏࡍࡉࡔࡉࡀࡊ ࡌࡀࡍࡅ ࡋࡃࡉࡋࡉࡀ ࡃࡀࡌࡉࡀ ࡌࡀࡍ ࡃࡀࡌࡉࡀ ࡏࡋ ࡃࡉࡋࡉࡀ ࡖࡀࡍࡀࡕ ࡄࡀࡆࡉࡀࡕࡋࡉࡀ ࡅࡌࡉࡍࡔࡉࡀࡕࡋࡉࡀ ࡖࡌࡍ ࡒࡀࡋࡀࡉ ࡅࡒࡀࡋ ࡃࡓࡀࡔࡀࡉ ࡏࡅࡓࡀࡉࡕࡀ ࡁࡉࡈࡋࡀࡕ ࡁࡏࡅࡓࡀࡔࡋࡀࡌ ࡌࡍ ࡒࡀࡋࡀࡉࡄࡅࡍ ࡖࡏࡍࡉࡀࡍࡀࡉ ࡒࡀࡓࡅࡉࡉࡀ ࡋࡀࡒࡓࡅࡍ ࡁࡏࡅࡓࡀࡔࡋࡀࡌ ࡂࡀࡉࡀࡓࡉࡀ ࡔࡁࡀࡒ ࡂࡀࡅࡓࡀࡉࡅࡍ ࡅࡏࡍࡔࡉࡀ ࡋࡆࡉࡁࡉࡀ ࡋࡀࡍࡀࡐࡒࡀࡍ ࡄࡉࡃࡅࡕࡀࡕࡀ ࡁࡊࡋࡉࡋࡀࡉࡄࡉࡍ ࡀࡕࡉࡀࡍ ࡅࡃࡉࡌࡀࡉࡄࡅࡍ ࡌࡀࡈࡉࡀࡍ ࡀࡓࡒࡀ ࡉࡀࡋࡃࡀ ࡁࡊࡓࡀࡎ ࡏࡌࡇ ࡔࡉࡌࡇ ࡋࡒࡀࡋࡀࡉ ࡅࡁࡊࡀ ࡕࡀࡍࡂࡀࡓࡉࡀ ࡋࡀࡆࡀࡁࡍࡉࡀ ࡁࡉࡀࡄࡅࡃ ࡅࡑࡀࡉࡀࡃࡉࡀ ࡋࡀࡑࡀࡉࡃࡉࡀ ࡁࡏࡅࡓࡀࡔࡋࡀࡌ ࡏࡍࡔࡉࡀ ࡖࡀࡁࡍࡉࡀ ࡀࡎࡓࡀࡉࡉࡋ ࡌࡀࡍࡉࡀ ࡖࡑࡉࡁࡀ ࡋࡀࡋࡀࡁࡔࡀࡍ ࡄࡉࡃࡅࡕࡀࡕࡀ ࡋࡀࡓࡀࡌࡉࡀࡍ ࡆࡀࡄࡁࡀ ࡅࡄࡀࡓࡀࡕࡀ ࡄࡅࡌࡓࡉࡀ ࡋࡀࡓࡀࡌࡉࡀࡍ ࡄࡀࡋࡉࡍ ࡏࡍࡔࡉࡀ ࡅࡂࡅࡁࡓࡉࡀ ࡋࡀࡄࡀࡆࡉࡍ ࡀࡍࡐࡀࡉࡄࡅࡍ ࡁࡍࡀࡅࡓࡀ ࡌࡍ ࡒࡀࡋࡀࡉ ࡅࡒࡀࡋ ࡃࡓࡀࡔࡀࡉ ࡌࡉࡀ ࡁࡏࡑࡈࡅࡍࡉࡀ ࡏࡑࡈࡅࡍࡉࡀ ࡒࡀࡌ ࡌࡍ ࡒࡀࡋࡀࡉ ࡅࡒࡀࡋ ࡃࡓࡀࡔࡀࡉ ࡍࡅࡍࡉࡀ ࡔࡋࡀࡌࡀ ࡔࡀࡋࡌࡅࡍ ࡌࡍ ࡒࡀࡋࡀࡉ ࡅࡒࡀࡋ ࡃࡓࡀࡔࡀࡉ ࡑࡉࡐࡀࡓ ࡂࡀࡃࡐࡀ ࡎࡉࡂࡅࡃࡕࡀ ࡀࡎࡂࡉࡃ ࡅࡀࡌࡀࡓ ࡈࡅࡁࡀࡊ ࡅࡕࡅࡌ ࡈࡅࡁࡀࡊ ࡉࡀࡄࡉࡀ ࡅࡈࡅࡁࡇ ࡋࡂࡀࡁࡓࡀ ࡖࡎࡀࡂࡃࡀࡕࡋࡇ ࡏࡕࡐࡀࡓࡀࡒࡕ ࡅࡏࡔࡕࡀࡅࡆࡀࡁࡕ ࡉࡀࡄࡉࡀ ࡅࡓࡉࡒࡀࡍ ࡔࡁࡀࡒࡕࡇ ࡋࡀࡋࡌࡀ ࡋࡀࡂࡀࡓࡅࡊ ࡏࡍࡔࡉࡀ ࡁࡂࡀࡅࡓࡀࡉࡄࡅࡍ ࡅࡋࡀࡌࡉࡍࡉࡋࡀࡉࡄࡅࡍ ࡋࡀࡔࡀࡓࡄࡉࡆࡅࡊ ࡅࡁࡓࡉࡄࡀࡍࡉࡀ ࡅࡁࡅࡎࡌࡀࡍࡉࡀ ࡋࡀࡍࡔࡀࡉࡕࡇ ࡋࡌࡀࡓࡀࡊ ࡌࡍ ࡏࡅࡑࡓࡀࡊ ࡋࡀࡓࡅࡉࡕ ࡁࡄࡀࡌࡓࡀ ࡅࡋࡀࡁࡀࡃࡕ ࡏࡅࡁࡀࡃࡉࡀ ࡖࡏࡅࡋࡀ ࡋࡀࡋࡉࡂࡈࡀࡊ ࡎࡉࡈࡉࡀ ࡁࡏࡅࡓࡀࡔࡋࡀࡌ ࡏࡕࡐࡀࡓࡀࡒࡕ ࡅࡏࡔࡕࡀࡅࡆࡀࡁࡕ ࡅࡊࡅࡓࡎࡉࡀࡊ ࡀࡕࡓࡉࡑࡋࡀࡊ ࡁࡉࡕ ࡄࡉࡉࡀ ࡅࡄࡉࡉࡀ ࡆࡀࡊࡏࡉࡍ ࡎࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡉࡅࡄࡀࡍࡀ ࡁࡓࡀࡌࡔࡉࡀ ࡖࡋࡉࡋࡉࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡊࡀࡋࡅࡆࡀ ࡒࡓࡀࡁࡇ ࡁࡀࡋࡌࡀ ࡅࡀࡌࡀࡓ ࡉࡀ ࡖࡒࡀࡉࡌࡉࡀ ࡁࡏࡅࡋࡀ ࡀࡕࡅࡍ ࡏࡅࡄࡓࡀ ࡋࡒࡅࡃࡀࡌࡀࡉࡊࡅࡍ ࡆࡁࡅࡍ ࡉࡀ ࡖࡀࡊࡋࡉࡀ ࡄࡁࡅࡋࡉࡀ ࡅࡄࡁࡅࡋ ࡄࡁࡅࡋࡉࡀ ࡀࡕࡅࡍ ࡏࡅࡄࡓࡀ ࡋࡒࡅࡃࡀࡌࡀࡉࡊࡅࡍ ࡆࡁࡅࡍ ࡉࡀ ࡖࡔࡀࡊࡁࡉࡀ ࡁࡉࡊࡋࡉࡋࡉࡀ ࡁࡅࡎࡌࡀ ࡒࡅࡌ ࡏࡅࡄࡓࡀ ࡋࡒࡅࡃࡀࡌࡀࡉࡊࡅࡍ ࡆࡁࡅࡍ ࡉࡀ ࡖࡋࡀࡁࡔࡉࡀ ࡅࡀࡓࡃࡀ ࡅࡔࡀࡓࡀࡉࡀ ࡒࡅࡌ ࡏࡅࡄࡓࡀ ࡋࡒࡅࡃࡀࡌࡀࡉࡊࡅࡍ ࡆࡁࡅࡍ ࡉࡀ ࡖࡔࡀࡊࡁࡉࡀ ࡁࡉࡔࡐࡅࡓ ࡀࡍࡐࡉࡀ ࡒࡅࡌ ࡏࡅࡄࡓࡀ ࡋࡒࡅࡃࡀࡌࡀࡉࡊࡅࡍ ࡆࡁࡅࡍ ࡀࡌࡉࡍࡈࡅࡋ ࡖࡎࡀࡋࡒࡉࡀ ࡁࡍࡉࡀ ࡁࡄࡉࡓࡉࡀ ࡆࡉࡃࡒࡀ ࡅࡒࡀࡋࡀ ࡖࡄࡉࡉࡀ ࡋࡀࡌࡉࡕࡉࡒࡓࡉࡁࡇ ࡁࡀࡋࡌࡀ ࡎࡀࡋࡒࡀࡍ ࡌࡀࡎࡒࡀࡕࡀ ࡅࡋࡀࡌࡉࡕࡓࡉࡑ ࡃࡀࡊࡉࡀ ࡁࡅࡓࡆࡉࡍࡒࡀ ࡎࡀࡋࡒࡀ ࡌࡀࡑࡁࡅࡕࡀ ࡄࡀࡉࡕࡀ ࡅࡋࡀࡄࡀࡅࡉࡀ ࡖࡔࡀࡍࡀࡉ ࡓࡅࡔࡅࡌࡀ ࡗ ࡄࡀࡆࡉࡍ ࡀࡌࡀࡓ ࡉࡀࡄࡉࡀ ࡌࡀࡋࡉࡋ ࡉࡀࡒࡉࡐ ࡅࡁࡍࡉࡀ ࡀࡌࡉࡍ ࡅࡌࡉࡓࡉࡀࡉ ࡖࡍࡉࡌࡀࡓࡅࡋࡇ ࡋࡉࡀࡄࡉࡀ ࡁࡏࡅࡓࡀࡔࡋࡀࡌ ࡉࡀ ࡉࡀࡄࡉࡀ ࡀࡁࡄࡉࡉࡀ ࡖࡎࡀࡂࡃࡀࡕࡋࡅࡍ ࡕࡅࡌ ࡌࡀࡅࡌࡉࡍࡀࡋࡀࡊ ࡉࡀࡄࡉࡀ ࡁࡀࡍࡐࡉࡀ ࡉࡅࡌࡀ ࡖࡉࡀࡒࡉࡓ ࡔࡅࡌࡇ ࡌࡏ ࡎࡀࡋࡒࡉࡀ ࡀࡁࡍࡉࡀ ࡁࡄࡉࡓࡉࡀ ࡆࡉࡃࡒࡀ ࡅࡒࡀࡋࡀ ࡖࡄࡉࡉࡀ ࡋࡀࡌࡉࡕࡉࡒࡓࡉࡁࡇ ࡁࡀࡋࡌࡀ ࡌࡏ ࡎࡀࡋࡒࡀࡍ ࡌࡀࡎࡒࡀࡕࡀ ࡅࡋࡀࡌࡉࡕࡓࡉࡑ ࡃࡀࡊࡉࡀ ࡁࡅࡓࡆࡉࡍࡒࡀ ࡌࡏ ࡎࡀࡋࡒࡀ ࡌࡀࡑࡁࡅࡕࡀ ࡄࡀࡉࡕࡀ ࡅࡋࡀࡄࡀࡅࡉࡀ ࡖࡔࡀࡍࡀࡉ ࡓࡅࡔࡅࡌࡀ ࡗ ࡄࡀࡆࡉࡍ ࡀࡌࡀࡓ ࡉࡀࡒࡉࡐ ࡅࡁࡍࡉࡀ ࡀࡌࡉࡍ ࡅࡌࡉࡓࡉࡀ ࡌࡀࡋࡉࡋ ࡉࡀࡄࡉࡀ ࡖࡍࡉࡌࡀࡓࡋࡅࡍ ࡁࡏࡅࡓࡀࡔࡋࡀࡌ ࡗ ࡌࡉࡕࡂࡉࡈࡋࡉࡀ ࡊࡅࡋࡄࡅࡍ ࡊࡀࡄࡍࡉࡀ ࡅࡋࡀࡄࡀࡅࡉࡍ ࡀࡁࡍࡉࡀ ࡀࡎࡓࡀࡉࡉࡋ ࡌࡉࡕࡂࡉࡈࡋࡉࡀ ࡅࡌࡉࡕࡋࡉࡃ ࡌࡄࡀࡌࡀࡃ ࡀࡓࡁࡀࡉࡀ ࡁࡓ ࡀࡌࡕࡇ ࡖ ࡏࡀࡁࡃࡀࡋࡄ ࡒࡀࡓࡉࡋࡇ ࡋࡀࡋࡌࡀ ࡌࡀࡎࡉࡒࡋࡅࡍ ࡋࡊࡅࡋࡄࡅࡍ ࡌࡀࡔࡊࡍࡉࡀ ࡅࡌࡀࡎࡂࡃࡉࡀ ࡍࡀࡐࡔࡉࡀ ࡁࡀࡋࡌࡀ ࡌࡀࡎࡒࡉࡋࡇ ࡋࡕࡅࡒࡍࡀ ࡅࡔࡀࡋࡌࡀ ࡅࡊࡀࡃࡁࡀ ࡅࡏࡅࡋࡀ ࡍࡀࡐࡅࡔ ࡁࡀࡋࡌࡀ ࡌࡀࡎࡒࡉࡋࡅࡍ ࡋࡄࡉࡋࡅࡋࡉࡀ ࡅࡆࡀࡌࡀࡍࡀࡕࡀ ࡌࡍ ࡕࡉࡁࡉࡋ ࡌࡀࡎࡒࡉࡋࡇ ࡋࡄࡀࡉࡌࡀࡍࡅࡕࡀ ࡅࡑࡅࡓࡕࡀ ࡋࡄࡀࡉࡕࡀ ࡋࡀࡑࡀࡉࡃࡉࡀ ࡅࡋࡀࡌࡒࡀࡓࡒࡀࡔ ࡆࡀࡍࡂࡀ ࡁࡕࡉࡁࡉࡋ ࡅࡋࡀࡌࡒࡀࡓࡒࡉࡔࡉࡀ ࡊࡅࡋࡄࡅࡍ ࡀࡁࡍࡉࡀ ࡊࡀࡃࡁࡀ ࡖࡄࡉࡊࡅࡌࡕࡀ ࡖࡏࡅࡋࡀ ࡓࡀࡌࡉࡁࡇ ࡁࡀࡋࡌࡀ ࡎࡀࡍࡉࡀ ࡂࡀࡅࡓࡀ ࡅࡂࡀࡉࡓࡉࡀ ࡅࡎࡀࡍࡉࡀ ࡂࡍࡅࡁࡕࡀ ࡅࡂࡀࡍࡁࡉࡀ ࡅࡎࡀࡍࡉࡀ ࡄࡁࡅࡋࡉࡀ ࡄࡁࡅࡋ ࡄࡁࡅࡋࡉࡀ ࡅࡉࡀࡄࡁࡉࡀ ࡄࡃࡀ ࡅࡔࡀࡒࡋࡉࡀ ࡕࡔࡀ ࡑࡀࡋࡉࡋࡉࡍ ࡋࡆࡁࡀࡍࡉࡀࡕࡅࡍ ࡅࡌࡓࡀࡅࡓࡉࡁࡉࡋࡅࡍ ࡋࡌࡉࡕࡒࡀࡋࡅࡍ ࡌࡉࡍࡀࡉࡄࡅࡍ ࡖࡂࡀࡉࡓࡉࡀ ࡓࡉࡔࡀࡉࡄࡅࡍ ࡅࡌࡉࡍࡀࡉࡄࡅࡍ ࡌࡀࡍࡆࡉࡀࡉࡄࡅࡍ ࡔࡀࡁࡒࡉࡀ ࡌࡉࡍࡀࡉࡄࡅࡍ ࡃࡉࡒࡍࡀࡉࡄࡅࡍ ࡁࡄࡉࡍࡀ ࡑࡀࡁࡉࡀ ࡌࡉࡍࡀࡉࡄࡅࡍ ࡑࡀࡁࡉࡀ ࡃࡉࡒࡍࡀࡉࡄࡅࡍ ࡁࡄࡉࡍࡀ ࡅࡒࡀࡉࡌࡉࡀ ࡅࡌࡑࡀࡋࡉࡀ ࡁࡉࡕ ࡌࡀࡆࡂࡃࡀࡉࡄࡅࡍ ࡗ ࡄࡀࡆࡉࡋࡇ ࡋࡂࡀࡁࡓࡀ ࡖࡏࡎࡉࡓࡋࡇ ࡄࡉࡌࡉࡀࡍࡀ ࡒࡉࡓࡎࡀ ࡓࡁࡀ ࡋࡀࡁࡉࡔࡋࡇ ࡋࡊࡅࡋࡇ ࡒࡅࡌࡕࡀࡉࡄࡅࡍ ࡒࡀࡉࡌࡉࡀ ࡅࡌࡔࡀࡉࡋࡉࡋࡅࡍ ࡅࡀࡌࡓࡉࡋࡋࡅࡍ ࡍࡁࡉࡄࡀࡊ ࡌࡀࡍ ࡀࡌࡀࡓࡋࡀࡍ ࡌࡀࡍ ࡀࡍࡁࡉࡄࡀࡊ ࡅࡀࡌࡀࡓࡋࡀࡍ ࡊࡃࡀࡁࡀࡊ ࡌࡀࡍ ࡅࡀࡌࡀࡓࡋࡀࡍ ࡋࡌࡀࡍࡅ ࡎࡀࡂࡃࡀࡕࡋࡇ ࡋࡀࡉࡀࡃࡉࡀ ࡅࡋࡀࡐࡀࡓࡔࡉࡀ ࡋࡉࡈࡉࡀ ࡅࡁࡄࡉࡕࡉࡀ ࡋࡀࡉࡀࡃࡉࡀ ࡅࡋࡀࡐࡀࡓࡔࡉࡀ ࡖࡌࡀࡓࡀࡉࡀࡍ ࡌࡀࡋࡊࡀ ࡖࡍࡄࡅࡓࡀ ࡁࡏࡌࡓࡅࡌࡀ ࡄࡃࡀ ࡄࡅ ࡅࡄࡉࡉࡀ ࡆࡀࡊࡏࡉࡍ ࡎࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡉࡅࡄࡀࡍࡀ ࡁࡓࡀࡌࡔࡉࡀ ࡖࡋࡉࡋࡉࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡀࡌࡀࡓ ࡏࡆࡃࡀࡄࡓࡅࡋࡉࡀ ࡀࡄࡀࡉ ࡅࡏࡆࡃࡀࡄࡓࡅࡋࡉࡀ ࡓࡀࡄࡌࡀࡉ ࡏࡆࡃࡀࡄࡓࡅࡋࡉࡀ ࡀࡄࡀࡉ ࡌࡍ ࡍࡀࡍࡂࡓࡉࡀ ࡖࡊࡀࡓࡉࡀࡍ ࡏࡍࡔࡉࡀ ࡊࡅࡋࡄࡅࡍ ࡍࡀࡍࡂࡓࡉࡀ ࡌࡈࡀࡌࡀࡌࡉࡀ ࡅࡊࡅࡋࡄࡅࡍ ࡊࡀࡌࡀࡑࡉࡀ ࡌࡉࡔࡕࡀࡃࡊࡉࡀ ࡍࡀࡍࡂࡓࡉࡀ ࡖࡊࡀࡓࡉࡀࡍ ࡏࡍࡔࡉࡀ ࡋࡀࡋࡉࡐ ࡀࡋࡉࡐ ࡔࡍࡉࡀ ࡋࡀࡌࡈࡀࡌࡀࡌࡉࡀ ࡖࡌࡈࡀࡍࡐࡀ ࡅࡋࡀࡌࡊࡀࡅࡍࡀ ࡁࡀࡋࡀࡋࡇ ࡈࡅࡓࡀ ࡄࡀࡔࡊࡀ ࡖࡌࡈࡀࡍࡐࡀ ࡅࡋࡀࡌࡊࡀࡅࡍࡀ ࡋࡀࡁࡓࡀࡋࡇ ࡋࡉࡀࡌࡀ ࡓࡁࡀ ࡖࡎࡅࡐ ࡖࡌࡈࡀࡍࡐࡀ ࡅࡋࡀࡌࡊࡀࡅࡍࡀ ࡔࡉࡐࡅࡋࡉࡀ ࡎࡓࡉࡒࡉࡀ ࡄࡀࡅࡉࡋࡇ ࡖࡌࡈࡀࡍࡐࡀ ࡅࡋࡀࡌࡊࡀࡅࡍࡀ ࡀࡁࡍࡉࡀ ࡌࡉࡕࡉࡀ ࡄࡀࡅࡉࡋࡇ ࡕࡉࡋࡉࡈࡇ ࡏࡔࡅࡌࡉࡀ ࡅࡀࡓࡒࡀ ࡀࡌࡉࡍࡈࡅࡋ ࡖࡈࡀࡍࡐࡀࡕ ࡌࡉࡀ ࡕࡀࡒࡍࡉࡀ ࡅࡓࡀࡆࡉࡀ ࡊࡀࡎࡉࡉࡀ ࡂࡀࡋࡀࡋࡀࡕ ࡅࡀࡐࡒࡀࡕ ࡀࡔࡃࡀࡕࡇ ࡋࡒࡉࡒࡉࡋࡕࡀ ࡔࡀࡌࡉࡔ ࡅࡎࡉࡓࡀ ࡋࡅࡈࡕࡀ ࡁࡉࡔࡕࡀ ࡋࡀࡈࡅࡉࡀ ࡗ ࡁࡀࡓࡎࡀࡉࡊࡅࡍ ࡔࡀࡊࡁࡉࡕࡅࡍ ࡌࡉࡀ ࡏࡋࡀࡅࡀࡉࡊࡅࡍ ࡀࡓࡌࡅࡍ ࡌࡍ ࡒࡅࡃࡀࡌ ࡖࡓࡀࡌࡉࡕࡅࡍ ࡏࡋࡀࡅࡀࡉࡊࡅࡍ ࡌࡉࡀ ࡁࡓࡉࡔ ࡓࡉࡔࡀࡉࡊࡅࡍ ࡄࡅࡐ ࡀࡌࡉࡍࡈࡅࡋ ࡏࡅ ࡆࡉࡌࡕࡀ ࡐࡀࡉࡔࡀ ࡁࡓࡉࡔࡀࡉࡊࡅࡍ ࡋࡀࡌࡓࡉࡕࡅࡍ ࡖࡌࡉࡀ ࡎࡉࡀࡉࡍࡉࡍ ࡁࡄࡀࡆࡉࡍ ࡀࡋࡌࡀ ࡅࡄࡉࡉࡀ ࡆࡀࡊࡉࡍ ࡎࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡉࡅࡄࡀࡍࡀ ࡁࡓࡀࡌࡔࡉࡀ ࡖࡋࡉࡋࡉࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡀࡌࡀࡓ ࡁࡉࡕ ࡑࡅࡓࡕࡀࡉ ࡄࡅࡉࡕ ࡅࡀࡌࡀࡓ ࡋࡀࡄࡉࡎࡓࡉࡕ ࡅࡋࡀࡁࡉࡑࡓࡉࡕ ࡅࡋࡀࡍࡎࡀࡁࡕࡇ ࡌࡅࡌࡀ ࡋࡏࡅࡑࡓࡀࡉ ࡁࡏࡅࡁࡀࡃࡀࡉࡄࡅࡍ ࡋࡀࡏࡎࡕࡀࡊࡓࡉࡕ ࡁࡏࡅࡄࡓࡀࡉࡄࡅࡍ ࡋࡀࡆࡉࡋࡍࡀ ࡒࡀࡓࡉࡍࡀ ࡅࡌࡀࡐࡓࡉࡔࡍࡀ ࡅࡌࡀࡐࡓࡉࡔࡍࡀࡋࡅࡍ ࡋࡓࡀࡄࡌࡀࡉ ࡖࡃࡀࡉࡓࡉࡍ ࡁࡀࡋࡌࡀ ࡁࡄࡉࡓࡀࡉ ࡋࡀࡕࡉࡄࡉࡎࡓࡅࡍ ࡅࡋࡀࡕࡉࡁࡉࡑࡓࡅࡍ ࡅࡋࡀࡍࡉࡄࡅࡉࡀ ࡊࡀࡃࡁࡀ ࡁࡌࡀࡌࡋࡀࡋࡊࡅࡍ ࡏࡕࡐࡀࡓࡀࡒ ࡌࡍ ࡕࡉࡁࡉࡋ ࡅࡌࡉࡍࡇ ࡖࡃࡀࡅࡓࡀ ࡁࡀࡈࡋࡀ ࡁࡄࡅࡓ ࡆࡀࡅࡀ ࡅࡋࡂࡅࡈ ࡆࡀࡅࡀ ࡅࡆࡀࡅࡀ ࡐࡕ ࡁࡉࡔࡉࡀ ࡋࡀࡕࡉࡋࡉࡂࡈࡅࡍ ࡋࡀࡕࡉࡋࡉࡂࡈࡅࡍ ࡆࡀࡅࡀ ࡖࡁࡉࡕ ࡁࡉࡔࡉࡀ ࡖࡋࡀࡊࡋࡀࡋࡊࡅࡍ ࡍࡅࡓࡀ ࡖࡉࡀࡒࡃࡀ ࡖࡌࡊࡀࡍࡐࡀ ࡅࡋࡀࡌࡊࡀࡅࡍࡀ ࡀࡊࡋࡀࡋࡇ ࡍࡅࡓࡀ ࡖࡉࡀࡒࡃࡀ ࡖࡌࡊࡀࡍࡐࡀ ࡅࡋࡀࡌࡊࡀࡅࡍࡀ ࡊࡀࡍࡐࡉࡀ ࡎࡓࡉࡒࡉࡀ ࡍࡀࡕࡍࡅࡋࡇ ࡖࡌࡊࡀࡍࡐࡀ ࡅࡋࡀࡌࡊࡀࡅࡍࡀ ࡁࡍࡉࡀ ࡌࡉࡕࡉࡀ ࡄࡀࡅࡉࡋࡇ ࡖࡌࡊࡀࡍࡐࡀ ࡅࡋࡀࡌࡊࡀࡅࡍࡀ ࡕࡉࡋࡉࡈࡇ ࡏࡔࡅࡌࡉࡀ ࡅࡀࡓࡒࡀ ࡀࡌࡉࡍࡈࡅࡋ ࡖࡈࡀࡍࡐࡀࡕ ࡌࡉࡀ ࡕࡀࡒࡍࡉࡀ ࡅࡓࡀࡆࡉࡀ ࡊࡀࡎࡉࡉࡀ ࡂࡀࡋࡀࡋࡀࡕ ࡅࡀࡆࡋࡀࡕ ࡀࡔࡃࡀࡕࡇ ࡁࡒࡉࡒࡋࡉࡀ ࡀࡕࡀ ࡔࡀࡌࡉࡔ ࡅࡎࡉࡓࡀ ࡃࡍࡀ ࡏࡋࡇ ࡅࡋࡅࡈࡕࡀ ࡓࡀࡁࡕࡉࡀ ࡋࡀࡈࡅࡉࡀ ࡁࡄࡉࡓࡀࡉ ࡐࡀࡓࡉࡒ ࡍࡀࡐࡔࡀࡉࡊࡅࡍ ࡌࡉࡍࡇ ࡖࡃࡀࡅࡓࡀ ࡁࡀࡈࡋࡀ ࡗ ࡋࡅࡀࡕ ࡆࡀࡅࡀࡉࡊࡅࡍ ࡒࡀࡓࡁࡉࡕࡅࡍ ࡎࡉࡅࡍ ࡌࡉࡀ ࡅࡃࡀࡊࡅࡍ ࡍࡀࡐࡔࡀࡉࡊࡅࡍ ࡁࡓࡉࡔ ࡓࡉࡔࡀࡉࡊࡅࡍ ࡄࡅࡐ ࡏࡅ ࡆࡉࡌࡕࡀ ࡐࡀࡉࡔࡀ ࡁࡓࡉࡔࡀࡉࡊࡅࡍ ࡀࡊࡀࡍࡃࡉࡕ ࡋࡀࡏࡃࡀࡊࡉࡕࡅࡍ ࡀࡄࡀࡉ ࡐࡀࡓࡉࡒ ࡍࡀࡐࡔࡀࡉࡊࡅࡍ ࡌࡍ ࡍࡀࡍࡂࡓࡉࡀ ࡖࡊࡀࡓࡉࡀࡍ ࡏࡍࡔࡉࡀ ࡊࡅࡋࡄࡅࡍ ࡍࡀࡍࡂࡓࡉࡀ ࡌࡉࡈࡀࡌࡀࡌࡉࡍ ࡅࡊࡅࡋࡄࡅࡍ ࡊࡅࡌࡀࡑࡉࡀ ࡌࡉࡔࡕࡀࡃࡊࡉࡀ ࡍࡀࡍࡂࡓࡉࡀ ࡖࡊࡀࡓࡉࡀࡍ ࡏࡍࡔࡉࡀ ࡋࡀࡋࡉࡐ ࡀࡋࡉࡐ ࡏࡔࡍࡉࡀ ࡋࡀࡌࡉࡈࡀࡌࡀࡌࡉࡍ ࡅࡄࡉࡉࡀ ࡆࡀࡊࡏࡉࡍ ࡎࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡉࡅࡄࡀࡍࡀ ࡁࡓࡀࡌࡔࡉࡀ ࡖࡋࡉࡋࡉࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡀࡌࡀࡓ ࡉࡀ ࡄࡀࡃࡉࡀ ࡖࡔࡀࡊࡁࡉࡍ ࡅࡉࡀ ࡄࡀࡃࡀࡕࡀ ࡖࡋࡀࡌࡉࡕࡉࡓࡀࡍ ࡉࡀ ࡄࡀࡃࡉࡀ ࡖࡔࡀࡊࡁࡉࡀ ࡋࡉࡅࡌࡀ ࡖࡃࡉࡍࡀ ࡌࡀࡄࡅ ࡕࡉࡁࡃࡅࡍ ࡗ ࡔࡀࡄࡋࡀࡋࡇ ࡋࡐࡀࡂࡓࡀ ࡍࡉࡔࡉࡌࡕࡀ ࡋࡉࡅࡌࡀ ࡖࡓࡉࡍࡀ ࡌࡀࡄࡅ ࡕࡉࡁࡓࡅࡍ ࡉࡀ ࡀࡋࡌࡀ ࡁࡋࡉࡋࡀ ࡅࡌࡁࡀࡋࡀࡋࡀ ࡅࡌࡄࡀࡌࡁࡋࡀ ࡖࡂࡅࡁࡓࡀࡊ ࡌࡀࡉࡕࡉࡀ ࡅࡎࡉࡐࡓࡀࡊ ࡖࡆࡉࡐࡀ ࡌࡉࡎࡕࡀࡊࡓࡉࡀ ࡊࡀࡄࡅ ࡀࡃࡀࡌ ࡂࡀࡁࡓࡀ ࡒࡀࡃࡌࡀࡉࡀ ࡖࡄࡀࡊࡀ ࡓࡉࡔࡀ ࡖࡃࡀࡓࡀ ࡄࡅࡀ ࡊࡀࡄࡉࡀ ࡄࡀࡅࡀ ࡆࡀࡅࡀ ࡖࡌࡉࡍࡀࡉࡄࡅࡍ ࡏࡕࡉࡀࡉࡀࡓ ࡀࡋࡌࡀ ࡊࡀࡄࡅ ࡔࡉࡕࡉࡋ ࡁࡓ ࡀࡃࡀࡌ ࡖࡀࡋࡌࡉࡀ ࡅࡃࡀࡓࡉࡀ ࡌࡉࡍࡇ ࡀࡄࡅࡍ ࡊࡀࡄࡅ ࡓࡀࡌ ࡅࡓࡃ ࡖࡌࡍ ࡃࡀࡓࡀ ࡖࡄࡉࡓࡁࡀ ࡄࡅࡍ ࡊࡀࡄࡅ ࡔࡅࡓࡁࡀࡉ ࡅࡔࡀࡓࡄࡀࡁࡏࡉࡋ ࡖࡌࡍ ࡃࡀࡓࡀ ࡖࡍࡅࡓࡀ ࡄࡅࡍ ࡊࡀࡄࡅ ࡔࡅࡌ ࡁࡓ ࡍࡅ ࡖࡌࡍ ࡃࡀࡓࡀ ࡖࡈࡅࡐࡀࡍࡉࡀ ࡖࡌࡉࡀ ࡄࡅࡍ ࡊࡅࡋࡄࡅࡍ ࡀࡍࡐࡀࡒ ࡅࡋࡀࡏࡕࡊࡀࡌࡀࡓ ࡅࡏࡕࡉࡁࡉࡅࡍ ࡍࡀࡈࡓࡉࡀ ࡁࡕࡉࡁࡉࡋ ࡃࡀࡌࡉࡀ ࡋࡉࡅࡌࡀ ࡈࡀࡁࡀ ࡖࡀࡋࡌࡉࡀ ࡅࡃࡀࡓࡉࡀ ࡌࡎࡀࡊࡉࡋࡇ ࡔࡉࡁࡉࡀࡄࡉࡀ ࡕࡀࡅࡓࡉࡀ ࡖࡐࡉࡈࡓࡀ ࡖࡒࡀࡉࡌࡉࡀ ࡋࡉࡅࡌࡀ ࡖࡍࡉࡊࡅࡎࡕࡀ ࡀࡁࡍࡉࡀ ࡕࡉࡁࡉࡋ ࡃࡀࡊࡓࡉࡀ ࡖࡔࡅࡌࡍࡀ ࡖࡒࡀࡉࡌࡉࡀ ࡁࡔࡅࡒࡉࡀ ࡅࡌࡉࡆࡃࡀࡁࡍࡉࡀ ࡓࡀࡄࡌࡀࡉ ࡖࡎࡀࡂࡃࡉࡀ ࡋࡄࡉࡉࡀ ࡄࡀࡈࡀࡉࡅࡍ ࡅࡄࡀࡅࡁࡅࡍ ࡍࡉࡔࡕࡁࡉࡒࡋࡅࡍ ࡅࡄࡉࡉࡀ ࡆࡀࡊࡏࡉࡍ ࡎࡀ ࡋࡀࡑࡁࡅࡁࡉࡀ ࡃࡀࡓࡉࡀ ࡅࡋࡀࡑࡁࡅࡁࡉࡀ ࡊࡅࡋࡄࡅࡍ ࡀࡋࡌࡉࡀ ࡋࡀ ࡑࡁࡅࡁࡉࡀ ࡃࡀࡓࡀ ࡁࡏࡍࡂࡀࡓ ࡊࡅࡔࡈࡀ ࡖࡀࡕࡀࡕ ࡋࡊࡀ ࡍࡉࡎࡁࡅ ࡋࡏࡍࡂࡉࡓࡕࡀ ࡅࡏࡋ ࡉࡀࡃ ࡉࡀࡄࡅࡈࡀࡉࡉࡀ ࡓࡉࡌࡉࡅࡉࡀ ࡐࡀࡄࡕࡉࡀ ࡅࡒࡀࡓࡉࡁࡇ ࡅࡄࡀࡆࡉࡀ ࡖࡁࡇ ࡖࡋࡀࡄࡅࡀ ࡖࡄࡉࡍࡅࡍ ࡁࡀࡉࡉࡍ ࡅࡋࡀࡄࡅࡀ ࡖࡍࡉࡔࡌࡀࡕࡅࡍ ࡑࡀࡁࡉࡀ ࡍࡉࡎࡁࡅ ࡋࡏࡍࡂࡉࡓࡕࡀ ࡅࡏࡋ ࡉࡀࡃ ࡉࡅࡄࡀࡍࡀ ࡓࡉࡌࡉࡅࡉࡀ ࡀࡌࡓࡉࡋࡇ ࡎࡀࡁ ࡓࡀࡁ ࡉࡅࡄࡀࡍࡀ ࡁࡏࡍࡂࡀࡓ ࡊࡅࡔࡈࡀ ࡖࡀࡕࡀࡋࡀࡊ ࡌࡍ ࡀࡁࡀࡄࡀࡕࡀࡊ ࡐࡀࡄࡕࡀ ࡅࡒࡀࡓࡉࡀ ࡉࡅࡄࡀࡍࡀ ࡅࡄࡀࡆࡉࡀ ࡁࡂࡀࡅࡇ ࡎࡉࡐࡓࡀ ࡔࡀࡍࡉࡀ ࡐࡀࡄࡕࡀ ࡅࡒࡀࡓࡉࡁࡇ ࡅࡁࡄࡉࡉࡀ ࡏࡕࡉࡌࡋࡉࡀ ࡅࡀࡌࡀࡓ ࡄࡀࡆࡉࡍ ࡄࡅ ࡖࡁࡀࡉࡉࡍࡀ ࡅࡄࡀࡆࡀ ࡍࡉࡔࡌࡀࡕ ࡑࡀࡁࡉࡀ ࡉࡅࡄࡀࡍࡀ ࡍࡐࡀࡒ ࡌࡍ ࡐࡀࡂࡓࡇ ࡀࡄࡇ ࡃࡀࡓࡔࡉࡀ ࡃࡓࡀࡔࡉࡀ ࡀࡄࡇ ࡃࡀࡓࡔࡉࡋࡇ ࡁࡇ ࡁࡈࡅࡓࡀ ࡈࡅࡓ ࡊࡀࡓࡉࡌࡋࡀ ࡍࡉࡎࡁࡅ ࡋࡏࡍࡂࡉࡓࡕࡀ ࡅࡀࡎࡒࡅ ࡋࡈࡅࡓࡀ ࡈࡅࡓ ࡊࡀࡓࡉࡌࡋࡀ ࡊࡀࡃࡁࡉࡋࡅࡍ ࡁࡏࡍࡂࡉࡓࡕࡀ ࡅࡌࡀࡐࡓࡉࡔࡉࡋࡅࡍ ࡋࡔࡀࡐࡕࡀ ࡋࡉࡀࡒࡉࡐ ࡅࡁࡍࡉࡀ ࡀࡌࡉࡍ ࡅࡔࡅࡌࡏࡉࡋ ࡊࡀࡍࡐࡉࡀ ࡁࡈࡅࡓࡀ ࡈࡅࡓ ࡊࡀࡓࡉࡌࡋࡀ ࡌࡀࡍࡃࡀ ࡖ ࡄࡉࡉࡀ ࡖࡓࡀࡄࡉࡒ ࡌࡍ ࡏࡌࡓࡅࡌࡀ ࡀࡕࡉࡕ ࡏࡋࡉࡊ ࡃࡉࡋࡉࡊ ࡍࡉࡔࡉࡌࡕࡀ ࡖࡄࡉࡉࡀ ࡏࡋࡀࡅࡉࡀ ࡕࡉࡁࡉࡋ ࡔࡉࡄࡋࡅࡊ ࡁࡀࡋࡁࡅࡔࡉࡀ ࡖࡌࡀࡍࡉࡀ ࡀࡎࡂࡉࡕ ࡁࡂࡀࡅࡇ ࡖࡀࡋࡌࡀ ࡀࡍࡀ ࡁࡀࡋࡁࡅࡔࡀ ࡖ ࡄࡉࡉࡀ ࡀࡎࡂࡉࡕ ࡀࡕࡉࡕ ࡋࡂࡀࡅࡇ ࡖࡀࡋࡌࡀ ࡏࡋ ࡋࡁࡅࡔࡀ ࡖ ࡔࡅࡁࡀ ࡀࡕࡉࡕ ࡏࡋ ࡕࡌࡀࡍࡉࡀ ࡀࡎࡂࡉࡕ ࡋࡊࡀ ࡋࡁࡅࡔࡀ ࡖࡔࡅࡁࡀ ࡍࡉࡎࡁࡉࡕ ࡅࡕࡌࡀࡍࡉࡀ ࡁࡄࡀࡓ ࡁࡉࡀࡃ ࡍࡎࡀࡁࡕࡇ ࡅࡍࡀࡎࡁࡉࡍࡀࡋࡇ ࡅࡏࡍࡉࡎࡁࡇ ࡅࡋࡀࡏࡔࡉࡁࡒࡇ ࡀࡍࡎࡀࡁࡕࡇ ࡅࡍࡀࡎࡁࡉࡍࡀࡋࡅࡍ ࡋࡎࡀࡄࡓࡉࡀ ࡁࡈࡀࡁࡉࡀ ࡍࡉࡄࡅࡍ ࡌࡀࡄࡅ ࡁࡀࡊࡉࡕࡅࡍ ࡃࡀࡓࡉࡀ ࡅࡌࡀࡄࡅ ࡁࡀࡊࡉࡕࡅࡍ ࡀࡌࡀࡌࡉࡀ ࡀࡋࡌࡀ ࡀࡅࡃࡀ ࡂࡉࡅࡕࡀࡉࡊࡅࡍ ࡏࡋ ࡃࡉࡋࡊࡅࡍ ࡀࡍࡀ ࡋࡃࡌࡅࡕࡀࡉ ࡀࡕࡉࡕ ࡀࡎࡂࡉࡕ ࡏࡋ ࡂࡀࡅࡇ ࡖࡀࡋࡌࡀ ࡅࡄࡉࡉࡀ ࡆࡀࡊࡏࡉࡍ ࡎࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡉࡅࡄࡀࡍࡀ ࡁࡓࡀࡌࡔࡉࡀ ࡖࡋࡉࡋࡉࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡀࡌࡀࡓ ࡌࡉࡀࡊࡀ ࡖࡓࡀࡁ ࡌࡉࡍࡀࡉ ࡌࡉࡊࡀࡋ ࡊࡀࡋࡉࡀ ࡏࡅࡁࡀࡃࡉࡀ ࡌࡉࡄࡔࡉࡁ ࡀࡂࡓࡀࡉ ࡅࡊࡋࡉࡋࡀࡉ ࡅࡕࡅࡔࡁࡉࡄࡕࡀࡉ ࡌࡀࡎࡒࡀࡋࡉࡀ ࡁࡄࡀࡃࡅࡀ ࡋࡉࡂࡈࡕࡀࡉ ࡉࡀࡒࡉࡐ ࡔࡁࡀࡒ ࡁࡉࡕ ࡀࡌࡀ ࡅࡁࡍࡉࡀ ࡀࡌࡉࡍ ࡔࡉࡁࡒࡅࡉࡀ ࡋࡁࡉࡕ ࡌࡒࡀࡃࡔࡉࡀ ࡏࡋࡉࡆࡀࡓ ࡁࡀࡉࡕࡀ ࡓࡁࡀ ࡔࡉࡁࡒࡇ ࡋࡒࡅࡌࡁࡀ ࡖࡊࡀࡄࡍࡉࡀ ࡌࡀࡋࡉࡋ ࡖࡍࡉࡌࡀࡓࡋࡇ ࡊࡀࡄࡍࡉࡀ ࡋࡉࡀࡄࡉࡀ ࡁࡏࡅࡓࡀࡔࡋࡀࡌ ࡉࡀࡄࡉࡀ ࡐࡅࡒ ࡌࡍ ࡌࡀࡕࡀࡍ ࡉࡅࡄࡀࡍࡀ ࡐࡅࡒ ࡌࡍ ࡌࡃࡉࡍࡕࡀࡍ ࡌࡍ ࡒࡀࡋࡀࡊ ࡍࡀࡃ ࡁࡉࡕ ࡀࡌࡀ ࡅࡌࡍ ࡒࡀࡋ ࡃࡓࡀࡔࡀࡊ ࡍࡀࡃ ࡁࡉࡕ ࡌࡒࡀࡃࡔࡉࡀ ࡌࡍ ࡒࡀࡋࡀࡉࡄࡅࡍ ࡖࡏࡍࡉࡀࡍࡀࡊ ࡍࡀࡃࡀࡕ ࡒࡅࡌࡁࡀ ࡖࡊࡀࡄࡍࡉࡀ ࡌࡀࡋࡉࡋ ࡖࡍࡉࡌࡀࡓࡋࡅࡍ ࡉࡀࡄࡉࡀ ࡋࡊࡀࡄࡍࡉࡀ ࡁࡏࡅࡓࡀࡔࡋࡀࡌ ࡀࡉࡕࡅࡍ ࡍࡅࡓࡀ ࡅࡒࡅࡋࡉࡅࡍ ࡅࡀࡉࡕࡅࡍ ࡎࡉࡐࡀ ࡅࡐࡅࡎࡒࡅࡍ ࡌࡀࡋࡉࡋ ࡖࡍࡉࡌࡀࡓࡋࡇ ࡊࡀࡄࡍࡉࡀ ࡋࡉࡀࡄࡉࡀ ࡁࡏࡅࡓࡀࡔࡋࡀࡌ ࡍࡅࡓࡀ ࡋࡀࡊࡋࡀࡋࡀࡊ ࡉࡀࡄࡉࡀ ࡖࡔࡅࡌࡀ ࡖ ࡄࡉࡉࡀ ࡌࡀࡃࡊࡀࡓ ࡏࡋࡀࡊ ࡎࡉࡐࡀ ࡋࡀࡐࡀࡎࡉࡒࡋࡀࡊ ࡉࡀࡄࡉࡀ ࡖࡁࡓ ࡄࡉࡉࡀ ࡄࡀࡊࡀ ࡔࡓࡉࡀ ࡏࡋࡀࡊ ࡅࡄࡉࡉࡀ ࡆࡀࡊࡏࡉࡍ ࡎࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡉࡅࡄࡀࡍࡀ ࡁࡓࡀࡌࡔࡉࡀ ࡖࡋࡉࡋࡉࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡀࡌࡀࡓ ࡀࡒࡓࡉࡀ ࡖ ࡓࡀࡌࡉࡀ ࡍࡀࡐࡋࡉࡀ ࡅࡁࡀࡕࡉࡀ ࡖࡌࡃࡀࡋࡉࡀ ࡌࡉࡕࡐࡀࡎࡀࡎࡉࡀ ࡋࡉࡊࡀ ࡖࡀࡌࡀࡓࡅࡋࡇ ࡈࡅࡁࡀࡊ ࡖࡋࡀࡅ ࡋࡉࡂࡀࡋ ࡀࡌࡀࡓࡅࡋࡇ ࡅࡀࡉࡋࡀࡊ ࡀࡁࡂࡀࡅࡇ ࡖࡄࡀࡆࡉࡍ ࡀࡋࡌࡀ ࡏࡕࡊࡀࡍࡀࡐࡉࡅࡍ ࡉࡀࡄࡅࡈࡀࡉࡉࡀ ࡅࡋࡅࡀࡕࡇ ࡖࡉࡀࡄࡉࡀ ࡀࡆࡋࡉࡀ ࡀࡌࡓࡉࡋࡇ ࡌࡀࡅࡌࡉࡍࡀࡋࡀࡊ ࡉࡀࡄࡉࡀ ࡁࡌࡀࡋࡊࡀ ࡖࡍࡄࡅࡓࡀ ࡖࡎࡀࡂࡃࡀࡕࡋࡇ ࡕࡅࡌ ࡌࡀࡅࡌࡉࡍࡀࡋࡀࡊ ࡉࡀࡄࡉࡀ ࡁࡄࡀࡁࡔࡀࡁࡀ ࡅࡀࡍࡐࡉࡀ ࡉࡅࡌࡀ ࡖࡉࡀࡒࡉࡓ ࡅࡊࡀࡁࡉࡓ ࡔࡅࡌࡇ ࡖࡁࡂࡀࡅࡓࡀ ࡄࡀࡎࡀࡓ ࡔࡀࡉࡀࡋࡕࡇ ࡁࡌࡀࡄࡅ ࡄࡀࡅࡉࡀ ࡖࡁࡂࡅࡍࡁࡀ ࡄࡀࡅࡉࡀ ࡄࡀࡎࡀࡓ ࡀࡁࡌࡀࡄࡅ ࡃࡉࡍࡀ ࡃࡀࡉࡍࡉࡋࡇ ࡖࡌࡍ ࡏࡍࡕࡀ ࡖࡄࡀࡁࡓࡇ ࡂࡀࡉࡀࡓ ࡀࡁࡌࡀࡄࡅ ࡃࡉࡍࡀ ࡃࡀࡉࡍࡉࡋࡇ ࡊࡅࡋࡌࡀࡍ ࡖࡔࡀࡁࡉࡒ ࡀࡄࡃࡀ ࡅࡋࡀࡂࡉࡈ ࡀࡄࡃࡀ ࡀࡁࡌࡀࡄࡅ ࡃࡉࡍࡀ ࡃࡀࡉࡍࡉࡋࡇ ࡊࡅࡋ ࡀࡕࡅࡀࡕ ࡖࡂࡀࡉࡓࡀ ࡂࡀࡅࡓࡀ ࡀࡁࡌࡀࡄࡅ ࡃࡉࡍࡀ ࡃࡀࡉࡍࡉࡋࡇ ࡌࡀࡍ ࡖࡀࡆࡉࡋ ࡀࡋࡅࡀࡕ ࡊࡀࡑࡅࡌࡉࡀ ࡅࡊࡀࡋࡃࡀࡉࡉࡀ ࡖࡔࡉࡒࡓࡀ ࡀࡁࡌࡀࡄࡅ ࡃࡉࡍࡀ ࡃࡀࡉࡍࡉࡋࡇ ࡊࡅࡋ ࡌࡀࡍ ࡖࡔࡀࡕࡉࡀ ࡄࡀࡌࡓࡀ ࡁࡄࡀࡍࡅࡕࡀ ࡅࡓࡅࡉࡕࡀ ࡅࡄࡅࡎࡓࡀࡍࡀ ࡁࡂࡀࡅࡇ ࡀࡁࡉࡃ ࡀࡁࡌࡀࡄࡅ ࡃࡉࡍࡀ ࡃࡀࡉࡍࡉࡋࡇ ࡖࡀࡆࡉࡋ ࡀࡋࡅࡀࡕ ࡆࡀࡌࡀࡓࡕࡀ ࡅࡆࡉࡓࡀ ࡆࡀࡓࡀ ࡖࡊࡀࡃࡁࡀ ࡅࡌࡉࡍࡇ ࡁࡀࡈࡍࡀ ࡅࡎࡀࡌࡀ ࡔࡀࡒࡋࡀ ࡅࡀࡆࡋࡀ ࡁࡔࡅࡒࡉࡀ ࡔࡀࡃࡉࡀࡋࡇ ࡅࡀࡉࡍࡇ ࡖࡉࡀࡋࡃࡀ ࡄࡀࡆࡉࡀࡋࡇ ࡋࡏࡌࡇ ࡅࡏࡌࡀ ࡋࡉࡀࡋࡃࡀ ࡋࡀࡄࡀࡆࡉࡀࡋࡇ ࡀࡁࡌࡀࡄࡅ ࡃࡉࡍࡀ ࡃࡀࡉࡍࡉࡋࡇ ࡊࡅࡋࡌࡀࡍ ࡖࡔࡀࡊࡉࡁ ࡀࡋࡅࡀࡕ ࡆࡀࡅࡇ ࡅࡌࡉࡀ ࡋࡀࡎࡀࡉࡉࡀ ࡁࡌࡀࡄࡅ ࡃࡉࡍࡀ ࡃࡀࡉࡍࡉࡋࡇ ࡀࡕࡅࡀࡕ ࡖࡋࡀࡎࡀࡉࡀ ࡌࡉࡀ ࡁࡌࡀࡄࡅ ࡃࡉࡍࡀ ࡃࡀࡉࡍࡉࡋࡇ ࡊࡅࡋࡌࡀࡍ ࡖࡄࡀࡍࡀࡕࡇ ࡉࡅࡌࡀ ࡒࡀࡃࡌࡀࡉࡀ ࡖࡎࡀࡉࡀ ࡆࡀࡅࡇ ࡌࡍ ࡀࡈࡍࡅࡐࡉࡀ ࡅࡃࡀࡔࡕࡀࡍࡀ ࡅࡋࡅࡀࡕࡇ ࡔࡀࡊࡉࡁ ࡁࡌࡀࡄࡅ ࡃࡉࡍࡀ ࡃࡀࡉࡍࡉࡋࡇ ࡊࡅࡋ ࡌࡀࡍ ࡖࡀࡊࡉࡋ ࡄࡁࡅࡋࡉࡀ ࡅࡄࡁࡅࡋ ࡄࡁࡅࡋࡉࡀ ࡖࡆࡀࡄࡁࡀ ࡅࡊࡀࡎࡐࡀ ࡁࡌࡀࡄࡅ ࡃࡉࡍࡀ ࡃࡀࡉࡍࡉࡋࡇ ࡊࡅࡋࡌࡀࡍ ࡖ ࡍࡉࡓࡄࡀࡌ ࡆࡀࡄࡁࡀ ࡅࡊࡀࡎࡐࡀ ࡁࡌࡀࡄࡅ ࡃࡉࡍࡀ ࡃࡀࡉࡍࡉࡋࡇ ࡊࡅࡋ ࡌࡀࡍ ࡖࡍࡉࡓࡄࡀࡌ ࡆࡀࡄࡁࡀ ࡅࡊࡀࡎࡐࡀ ࡅࡈࡀࡁࡅࡕࡀ ࡁࡂࡀࡅࡇ ࡋࡀࡍࡉࡁࡀࡃ ࡁࡌࡀࡄࡅ ࡃࡉࡍࡀ ࡃࡀࡉࡍࡉࡋࡇ ࡊࡅࡋࡌࡀࡍ ࡖࡍࡀࡓࡄࡀ ࡁࡓࡉࡄࡀ ࡖࡄࡉࡉࡀ ࡅࡔࡅࡌࡀ ࡖࡄࡉࡉࡀ ࡋࡀࡍࡀࡃࡊࡀࡓ ࡏࡋࡇ ࡁࡌࡀࡄࡅ ࡃࡉࡍࡀ ࡃࡀࡉࡍࡉࡋࡇ ࡊࡅࡋࡌࡀࡍ ࡖࡍࡉࡁࡀࡃ ࡏࡁࡉࡃࡀࡕࡀ ࡎࡀࡉࡍࡀࡕࡀ ࡁࡌࡀࡄࡅ ࡃࡉࡍࡀ ࡃࡀࡉࡍࡉࡋࡇ ࡊࡅࡋࡌࡀࡍ ࡖࡍࡉࡑࡁࡀ ࡏࡃࡇ ࡅࡋࡉࡂࡓࡇ ࡅࡍࡉࡐࡊࡇ ࡋࡃࡌࡅࡕࡀ ࡖࡌࡀࡓࡇ ࡐࡀࡒࡉࡃ ࡏࡋࡇ ࡁࡌࡀࡄࡅ ࡃࡉࡍࡀ ࡃࡀࡉࡍࡉࡋࡇ ࡊࡅࡋ ࡌࡀࡍ ࡖࡍࡉࡓࡄࡅࡌ ࡑࡉࡁࡀ ࡅࡑࡉࡁࡅࡕࡀ ࡁࡌࡀࡄࡅ ࡃࡉࡍࡀ ࡃࡀࡉࡍࡉࡋࡇ ࡗ ࡄࡀࡆࡉࡍ ࡀࡌࡀࡓ ࡉࡀࡄࡅࡈࡀࡉࡉࡀ ࡀࡔࡋࡀ ࡉࡀࡄࡉࡀ ࡁࡒࡉࡃࡉࡄࡕࡇ ࡅࡒࡃࡀ ࡅࡀࡌࡀࡓ ࡄࡀࡎࡋࡇ ࡋࡍࡄࡅࡓࡀ ࡓࡁࡀ ࡊࡀࡁࡉࡓࡀ ࡖࡍࡉࡁࡉࡀ ࡀࡌࡍࡀࡕࡀ ࡌࡍ ࡃࡅࡓࡃࡉࡀ ࡊࡅࡋࡌࡀࡍ ࡖࡁࡂࡀࡅࡓࡀ ࡄࡀࡎࡀࡓ ࡔࡀࡉࡀࡋࡕࡇ ࡁࡍࡅࡓࡀ ࡄࡀࡅࡉࡀ ࡊࡅࡋࡌࡀࡍ ࡖࡁࡂࡅࡍࡁࡀ ࡄࡀࡎࡀࡓ ࡌࡉࡕࡉࡀࡁࡀࡈ ࡀࡁࡈࡅࡓࡀ ࡄࡀࡔࡊࡀ ࡊࡅࡋࡌࡀࡍ ࡖࡌࡍ ࡏࡍࡕࡀ ࡖ ࡄࡀࡁࡓࡇ ࡂࡀࡉࡀࡓ ࡍࡅࡓࡀ ࡄࡀࡅࡉࡀ ࡃࡀࡉࡀࡍࡇ ࡀࡋࡌࡀ ࡖࡓࡅࡄࡇ ࡔࡀࡋࡌࡀ ࡊࡅࡋࡌࡀࡍ ࡖࡌࡍ ࡏࡍࡕࡀ ࡀࡓࡌࡀࡋࡕࡀ ࡂࡀࡉࡀࡓ ࡍࡉࡕࡉࡀࡁࡀࡈ ࡁࡈࡅࡓࡀ ࡄࡀࡔࡊࡀ ࡊࡅࡋࡌࡀࡍ ࡖࡌࡍ ࡄࡉࡃࡅࡕࡀ ࡂࡀࡉࡀࡓ ࡏࡋ ࡌࡀࡄࡅࡍࡉࡀ ࡕࡀࡅࡌࡉࡀ ࡌࡉࡕࡍࡀࡍࡂࡀࡓ ࡅࡀࡉࡍࡇ ࡁࡀࡁࡀࡕࡅࡓ ࡋࡀࡍࡉࡌࡋࡉࡀ ࡊࡅࡋࡌࡀࡍ ࡖࡔࡀࡁࡉࡒ ࡄࡃࡀ ࡅࡋࡀࡂࡉࡈ ࡄࡃࡀ ࡏࡋ ࡌࡀࡍࡉࡀ ࡖࡍࡅࡓࡀ ࡌࡉࡕࡍࡀࡍࡂࡀࡓ ࡀࡕࡅࡀࡕ ࡖ ࡂࡀࡉࡓࡀ ࡂࡀࡅࡓࡀ ࡑࡉࡁࡉࡀ ࡖࡀࡕࡅࡍࡉࡀ ࡄࡀࡅࡉࡀ ࡅࡀࡉࡍࡇ ࡋࡁࡉࡕ ࡄࡉࡉࡀ ࡋࡀࡕࡉࡌࡋࡉࡀ ࡊࡅࡋࡌࡀࡍ ࡖࡀࡆࡉࡋ ࡋࡅࡀࡕ ࡊࡀࡑࡅࡌࡉࡀ ࡅࡊࡀࡋࡃࡀࡉࡉࡀ ࡖࡔࡉࡒࡓࡀ ࡏࡋ ࡌࡀࡍࡉࡀ ࡖࡁࡀࡓࡃࡀ ࡌࡉࡕࡍࡀࡍࡂࡀࡓ ࡊࡅࡋࡌࡀࡍ ࡖࡔࡀࡕࡉࡀ ࡄࡀࡌࡓࡀ ࡁࡄࡀࡍࡅࡕࡀ ࡅࡓࡅࡉࡕࡀ ࡓࡀࡅࡉࡀ ࡁࡈࡀࡁࡋࡉࡀ ࡅࡆࡉࡌࡅࡓࡉࡀ ࡅࡆࡀࡍࡉࡅࡕࡀ ࡁࡂࡀࡅࡇ ࡀࡁࡉࡓ ࡁࡌࡀࡎࡉࡓࡒࡉࡀ ࡒࡅࡁࡋࡉࡀ ࡍࡉࡎࡓࡉࡒࡅࡍࡇ ࡅࡀࡉࡍࡇ ࡁࡀࡁࡀࡕࡅࡓ ࡋࡀࡍࡉࡌࡋࡉࡀ ࡊࡅࡋࡌࡀࡍ ࡖࡀࡆࡉࡋ ࡀࡋࡅࡀࡕ ࡆࡀࡌࡀࡓࡕࡀ ࡅࡆࡉࡓࡀ ࡆࡀࡓࡀ ࡖࡊࡀࡃࡁࡀ ࡅࡌࡉࡍࡇ ࡁࡀࡈࡍࡀ ࡅࡎࡀࡌࡀ ࡔࡀࡒࡋࡀ ࡅࡀࡆࡋࡀ ࡁࡒࡉࡒࡋࡉࡀ ࡔࡀࡃࡉࡀࡋࡇ ࡅࡄࡀࡐࡓࡀ ࡁࡉࡓࡀ ࡅࡒࡀࡁࡓࡀࡋࡇ ࡅࡌࡉࡄࡉࡃࡓࡀ ࡁࡏࡒࡁࡇ ࡃࡀࡉࡔࡀࡋࡇ ࡅࡀࡉࡍࡇ ࡖࡉࡀࡋࡃࡀ ࡄࡀࡆࡉࡋࡇ ࡋࡏࡌࡇ ࡅࡏࡌࡀ ࡋࡉࡀࡋࡃࡀ ࡋࡀ ࡄࡀࡆࡉࡀࡋࡇ ࡉࡀࡋࡃࡀ ࡌࡀࡉࡉࡕ ࡁࡒࡉࡒࡋࡉࡀ ࡅࡏࡌࡇ ࡁࡀࡊࡉࡀࡋࡇ ࡁࡂࡍࡅࡁ ࡂࡍࡅࡁ ࡌࡉࡔࡕࡀࡉࡋࡀ ࡁࡄࡀࡍࡀࡕࡇ ࡌࡀࡈࡀࡓࡕࡀ ࡖࡊࡀࡋࡁࡉࡀ ࡔࡉࡄࡀࡍࡉࡀ ࡌࡔࡀࡓࡂࡉࡆࡀࡍࡉࡀ ࡀࡋࡂࡉࡀ ࡈࡓࡅࡔࡉࡀ ࡕࡉࡔࡕࡀࡉࡀࡋ ࡅࡀࡉࡍࡇ ࡁࡀࡁࡀࡕࡅࡓ ࡋࡀࡕࡉࡌࡋࡉࡀ ࡅࡔࡅࡌࡇ ࡍࡉࡕࡉࡊࡐࡀࡓ ࡌࡍ ࡁࡉࡕ ࡄࡉࡉࡀ ࡊࡅࡋࡌࡀࡍ ࡖࡍࡉࡒࡓࡅࡁ ࡋࡅࡀࡕ ࡆࡀࡅࡇ ࡅࡌࡉࡀ ࡋࡀࡍࡉࡎࡉࡉࡀ ࡁࡂࡉࡅࡕࡇ ࡖࡋࡉࡅࡉࡀࡕࡉࡍ ࡌࡉࡔࡕࡊࡉࡍ ࡀࡕࡅࡀࡕ ࡖࡋࡀࡎࡀࡉࡀ ࡌࡉࡀ ࡌࡄࡉࡕࡀ ࡁࡂࡅ ࡌࡄࡉࡕࡀ ࡕࡉࡕࡉࡌࡄࡉࡀ ࡅࡍࡉࡋࡉࡈࡇ ࡔࡅࡌࡀ ࡃࡀࡊࡉࡀ ࡅࡔࡉࡓࡉࡀࡍࡀ ࡖࡎࡀࡊࡀ ࡋࡉࡕࡋࡇ ࡍࡉࡌࡉࡄࡉࡇ ࡍࡀࡈࡓࡀ ࡖࡍࡄࡅࡓࡀ ࡅࡔࡅࡌࡇ ࡍࡉࡕࡉࡊࡐࡀࡓ ࡌࡍ ࡁࡉࡕ ࡄࡉࡉࡀ ࡂࡀࡁࡓࡀ ࡖࡄࡀࡍࡀࡕࡇ ࡉࡅࡌࡀ ࡒࡀࡃࡌࡀࡉࡀ ࡗ ࡎࡀࡉࡀ ࡆࡀࡅࡇ ࡌࡉࡀ ࡌࡍ ࡈࡍࡅࡐࡉࡀ ࡅࡃࡀࡔࡕࡀࡍࡀ ࡋࡅࡀࡕࡇ ࡔࡀࡊࡉࡁ ࡁࡓࡐࡉࡋࡉࡀ ࡖࡄࡔࡅࡊࡀ ࡍࡀࡒࡌࡅࡍࡇ ࡊࡅࡋࡌࡀࡍ ࡖࡍࡉࡊࡅࡋ ࡄࡁࡅࡋࡉࡀ ࡅࡄࡁࡅࡋ ࡄࡁࡅࡋࡉࡀ ࡖࡆࡀࡄࡁࡀ ࡅࡊࡀࡎࡐࡀ ࡍࡀࡒࡌࡅࡍࡇ ࡁࡈࡅࡓࡀ ࡈࡅࡓ ࡄࡀࡔࡊࡀ ࡊࡅࡋࡌࡀࡍ ࡖࡍࡉࡓࡄࡅࡌ ࡆࡀࡄࡁࡀ ࡅࡊࡀࡎࡐࡀ ࡅࡈࡀࡁࡅࡕࡀ ࡁࡂࡀࡅࡇ ࡋࡀࡍࡉࡁࡀࡓ ࡍࡉࡌࡅࡕ ࡀࡕࡓࡉࡍ ࡌࡅࡕࡉࡀ ࡁࡄࡀࡃ ࡅࡍࡉࡎࡕࡀࡊࡀࡓ ࡊࡅࡋࡌࡀࡍ ࡖࡍࡀࡓࡄࡀ ࡁࡓࡉࡄࡀ ࡖࡄࡉࡉࡀ ࡅࡔࡅࡌࡀ ࡖࡄࡉࡉࡀ ࡋࡀࡍࡀࡃࡊࡀࡓ ࡏࡋࡇ ࡋࡁࡉࡕ ࡀࡁࡀࡕࡅࡓ ࡍࡉࡔࡕࡀࡉࡀࡋ ࡊࡅࡋࡌࡀࡍ ࡖࡍࡉࡁࡀࡃ ࡏࡁࡉࡃࡀࡕࡀ ࡎࡀࡉࡍࡀࡕࡀ ࡁࡄࡉࡓࡁࡀ ࡅࡎࡉࡐࡀ ࡖࡔࡉࡁࡉࡀࡄࡉࡀ ࡌࡉࡕࡍࡎࡉࡁ ࡊࡅࡋࡌࡀࡍ ࡖ ࡍࡉࡑࡁࡀ ࡏࡃࡇ ࡅࡋࡉࡂࡓࡇ ࡅࡍࡉࡐࡊࡇ ࡋࡃࡌࡅࡕࡀ ࡖࡌࡀࡓࡇ ࡐࡀࡒࡉࡃ ࡏࡋࡇ ࡁࡏࡃࡇ ࡋࡀࡂࡉࡈ ࡂࡅࡌࡓࡉࡀ ࡅࡁࡉࡎࡐࡉࡄࡀࡕࡇ ࡌࡎࡀࡓࡎࡉࡐ ࡉࡀࡒࡃࡀࡍࡀ ࡔࡀࡉࡉࡋ ࡌࡅࡕࡀ ࡅࡋࡀࡌࡀࡉࡉࡕ ࡄࡉࡉࡀ ࡀࡋࡅࡀࡕࡇ ࡋࡀ ࡒࡀࡓࡁࡉࡀ ࡅࡋࡀࡔࡀࡁࡒࡉࡋࡇ ࡋࡌࡉࡌࡀࡕ ࡅࡋࡀࡌࡀࡓࡅࡉࡋࡇ ࡌࡍ ࡏࡅࡋࡑࡀࡍࡇ ࡋࡌࡉࡎࡀࡒ ࡌࡉࡄࡉࡆࡉࡇ ࡋࡀࡕࡀࡓ ࡍࡄࡅࡓ ࡀࡌࡉࡍࡈࡅࡋ ࡋࡌࡀࡑࡁࡅࡕࡀ ࡖࡏࡑࡈࡁࡀࡁࡇ ࡁࡉࡀࡓࡃࡍࡀ ࡋࡀࡕࡀࡂࡆࡀࡓ ࡏࡋࡇ ࡁࡃࡅࡓ ࡄࡀࡈࡉࡀ ࡊࡅࡋ ࡌࡀࡍ ࡖࡍࡉࡓࡄࡅࡌ ࡑࡉࡁࡀ ࡅࡑࡉࡁࡅࡕࡀ ࡌࡀࡋࡁࡉࡔࡉࡋࡇ ࡄࡔࡅࡊࡀ ࡅࡀࡈࡐࡉࡀ ࡄࡀࡁࡀࡓࡀ ࡌࡊࡀࡎࡉࡋࡇ ࡅࡎࡀࡍࡃࡋࡉࡀ ࡉࡀࡒࡃࡀࡍࡀ ࡎࡀࡉࡌࡉࡋࡇ ࡁࡋࡉࡂࡓࡇ ࡄࡔࡅࡊࡀ ࡀࡆࡉࡋ ࡀࡒࡀࡌࡇ ࡅࡄࡀࡁࡀࡓࡀ ࡌࡍ ࡀࡁࡀࡕࡓࡇ ࡔࡉࡃࡉࡀ ࡄࡉࡍࡅࡍ ࡃࡀࡉࡅࡉࡀ ࡄࡉࡍࡅࡍ ࡄࡀࡅࡉࡍ ࡁࡉࡋࡅࡀࡕࡇ ࡀࡌࡉࡍࡈࡅࡋ ࡖࡓࡄࡀࡌ ࡑࡉࡁࡀ ࡅࡑࡉࡁࡅࡕࡀ ࡌࡉࡕࡉࡀࡁࡀࡈ ࡁࡌࡀࡈࡀࡓࡀࡕࡀ ࡀࡋࡌࡀ ࡖࡓࡅࡄࡇ ࡔࡀࡋࡌࡀ ࡏࡋࡊࡅࡍ ࡀࡌࡀࡓࡍࡀ ࡅࡌࡀࡐࡓࡉࡔࡍࡀ ࡍࡉࡔࡌࡀࡕࡀ ࡖ ࡁࡄࡉࡓࡉࡀ ࡆࡉࡃࡒࡀ ࡖࡁࡄࡉࡉࡀ ࡎࡀࡄࡃࡉࡍ ࡋࡀࡕࡉࡁࡃࡅࡍ ࡏࡁࡉࡃࡀࡕࡀ ࡎࡀࡉࡍࡀࡕࡀ ࡅࡋࡀࡕࡉࡔࡉࡐࡋࡅࡍ ࡋࡀࡕࡀࡓ ࡄࡔࡅࡊ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡉࡅࡄࡀࡍࡀ ࡁࡓࡀࡌࡔࡉࡀ ࡖࡋࡉࡋࡉࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡀࡌࡀࡓ ࡁࡀࡉࡀࡓࡍࡀ ࡁࡔࡅࡕࡀ ࡖ ࡀࡁ ࡁࡀࡉࡀࡓࡍࡀ ࡅࡍࡀࡄࡉࡓࡍࡀ ࡁࡕࡅࡔࡁࡉࡄࡕࡀ ࡖࡂࡀࡁࡓࡀ ࡍࡀࡑࡁࡀࡉ ࡏࡕࡐࡀࡓࡀࡒ ࡌࡍ ࡕࡉࡁࡉࡋ ࡅࡌࡉࡍࡇ ࡖࡃࡀࡅࡓࡀ ࡁࡀࡈࡋࡀ ࡌࡍ ࡀࡉࡍࡀ ࡖࡓࡀࡌࡆࡀ ࡓࡉࡌࡆࡀ ࡅࡌࡍ ࡎࡐࡉࡄࡀࡕࡀ ࡖࡔࡉࡒࡓࡀ ࡀࡌࡓࡀࡍ ࡌࡀࡓࡀࡍ ࡄࡅࡆࡉࡀࡍ ࡅࡐࡀࡓࡒࡀࡍ ࡅࡔࡀࡅࡆࡁࡀࡍ ࡌࡍ ࡏࡁࡉࡃࡀࡕࡀ ࡖࡎࡀࡉࡍࡀ ࡅࡋࡀࡊࡀࡔࡓࡀ ࡏࡆࡃࡀࡄࡓࡅࡋࡉࡀ ࡀࡄࡀࡉ ࡅࡏࡆࡃࡀࡄࡓࡅࡋࡉࡀ ࡓࡀࡄࡌࡀࡉ ࡏࡆࡃࡀࡄࡓࡅࡋࡉࡀ ࡀࡄࡀࡉ ࡌࡍ ࡏࡁࡉࡃࡀࡕࡀ ࡖࡎࡀࡉࡍࡀ ࡅࡋࡀࡊࡀࡔࡓࡀ ࡏࡆࡃࡀࡄࡓࡅࡋࡉࡀ ࡕࡀࡓࡌࡉࡃࡀࡉ ࡍࡉࡄࡉࡀ ࡅࡌࡊࡉࡊࡉࡀ ࡄࡅࡍ ࡓࡅࡄࡌࡅࡉࡀ ࡋࡄࡀࡁࡔࡀࡁࡀ ࡅࡀࡍࡐࡉࡀ ࡉࡅࡌࡀ ࡀࡅࡒࡓࡅࡉࡀ ࡏࡅࡄࡁࡅࡉࡀ ࡋࡆࡉࡃࡒࡀ ࡖࡉࡀࡒࡉࡓ ࡌࡍ ࡆࡀࡅࡀ ࡅࡁࡍࡉࡀ ࡀࡂࡓࡀ ࡅࡆࡉࡃࡒࡀ ࡁࡏࡅࡄࡓࡀ ࡌࡉࡁࡉࡀ ࡗ ࡏࡃࡀ ࡖࡋࡐࡅࡌࡀ ࡉࡀࡄࡁࡀ ࡀࡂࡓࡀ ࡅࡆࡉࡃࡒࡀ ࡁࡏࡅࡄࡓࡀ ࡌࡉࡁࡉࡀ ࡗ ࡏࡔࡉࡒࡀ ࡖࡁࡀࡉࡉࡀ ࡐࡀࡓࡅࡀࡍࡒࡀ ࡖࡀࡂࡓࡀ ࡅࡆࡉࡃࡒࡀ ࡋࡉࡕࡋࡇ ࡋࡀࡌࡑࡉࡓࡋࡇ ࡁࡆࡀࡁࡉࡀ ࡌࡉࡑࡓࡀ ࡖࡀࡂࡓࡀ ࡅࡆࡉࡃࡒࡀ ࡋࡉࡕࡋࡇ ࡋࡉࡕࡋࡇ ࡁࡉࡀࡌࡀ ࡌࡀࡁࡓࡀ ࡖࡀࡂࡓࡀ ࡅࡆࡉࡃࡒࡀ ࡋࡉࡕࡋࡇ ࡀࡉࡍࡇ ࡁࡀࡁࡀࡕࡅࡓ ࡋࡀࡌࡀࡋࡉࡀ ࡅࡀࡉࡋࡉࡍࡅࡍ ࡋࡁࡉࡔࡉࡀ ࡅࡊࡀࡃࡀࡁࡉࡀ ࡖࡏࡍࡉࡔࡉࡅࡉࡀ ࡋࡆࡉࡃࡒࡀ ࡅࡋࡀࡉࡀࡄࡁࡅࡉࡀ ࡏࡍࡉࡔࡉࡅࡉࡀ ࡅࡋࡀ ࡉࡀࡄࡁࡅࡉࡀ ࡋࡆࡉࡃࡒࡀ ࡅࡏࡍࡉࡔࡉࡅࡉࡀ ࡋࡂࡀࡁࡓࡀ ࡖࡌࡐࡀࡓࡉࡒࡋࡅࡍ ࡁࡄࡉࡓࡀࡉ ࡀࡓࡄࡅࡌ ࡆࡉࡃࡒࡀ ࡅࡓࡄࡅࡌ ࡄࡀࡁࡔࡀࡁࡀ ࡖ ࡁࡉࡀࡌࡀ ࡓࡌࡉࡋࡇ ࡌࡀࡁࡓࡀ ࡌࡀࡁࡓࡀ ࡁࡉࡀࡌࡀ ࡓࡌࡉࡋࡇ ࡅࡀࡋࡉࡐ ࡀࡋࡉࡐ ࡋࡊࡉࡐࡇ ࡒࡀࡉࡌࡉࡀ ࡀࡋࡉࡐ ࡀࡋࡉࡐ ࡒࡀࡉࡌࡉࡀ ࡋࡊࡉࡐࡇ ࡅࡌࡍ ࡀࡋࡐࡀ ࡌࡀࡁࡀࡓ ࡄࡃࡀ ࡌࡍ ࡀࡋࡐࡀ ࡄࡃࡀ ࡌࡀࡁࡀࡓ ࡅࡌࡍ ࡀࡕࡓࡉࡍ ࡀࡋࡐࡉࡀ ࡌࡀࡁࡀࡓ ࡏࡕࡓࡉࡍ ࡌࡀࡁࡀࡓࡋࡉࡍ ࡋࡍࡉࡔࡌࡀࡕࡀ ࡖࡔࡉࡄࡀ ࡅࡔࡀࡅࡉࡀ ࡋࡀࡕࡀࡓ ࡍࡄࡅࡓ ࡌࡔࡀࡁࡀ ࡔࡅࡌࡀࡊ ࡌࡀࡓࡀࡉ ࡍࡄࡅࡓࡀ ࡖࡋࡀࡌࡀࡂࡆࡀࡓ ࡋࡓࡀࡄࡌࡉࡀ ࡔࡅࡌࡇ ࡎࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡉࡅࡄࡀࡍࡀ ࡁࡓࡀࡌࡔࡉࡀ ࡖࡋࡉࡋࡉࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡋࡉࡅࡀ ࡃࡍࡀ ࡏࡋ ࡀࡋࡌࡉࡀ ࡋࡏࡔࡅ ࡌࡀࡍ ࡀࡌࡀࡓࡋࡇ ࡋࡏࡔࡅ ࡌࡔࡉࡄࡀ ࡁࡓ ࡌࡉࡓࡉࡀࡌ ࡋࡏࡔࡅ ࡌࡀࡍ ࡀࡌࡀࡓࡋࡇ ࡖࡀࡎࡂࡉࡀ ࡋࡊࡉࡐࡇ ࡖࡉࡀࡓࡃࡍࡀ ࡅࡀࡌࡀࡓࡋࡇ ࡉࡀࡄࡉࡀ ࡑࡅࡁࡀࡍ ࡁࡌࡀࡑࡁࡅࡕࡀࡊ ࡅࡌࡍ ࡔࡅࡌࡀ ࡖࡌࡀࡃࡊࡉࡓࡉࡕ ࡀࡃࡊࡀࡓ ࡏࡋࡀࡉ ࡏࡅ ࡄࡀࡅࡉࡍࡀ ࡅࡌࡉࡕࡀࡓࡌࡀࡃࡍࡀ ࡁࡐࡓࡅࡃࡒࡀࡉ ࡌࡀࡃࡊࡀࡓࡍࡀ ࡏࡋࡀࡊ ࡏࡅ ࡋࡀࡄࡀࡅࡉࡍࡀ ࡅࡋࡀࡌࡉࡕࡀࡓࡌࡀࡃࡍࡀ ࡊࡅࡐࡓࡇ ࡋࡔࡅࡌࡀࡉ ࡌࡍ ࡔࡀࡐࡕࡀࡊ ࡌࡀࡋࡉࡋ ࡖࡍࡉࡌࡀࡓࡋࡇ ࡉࡀࡄࡉࡀ ࡋࡏࡔࡅ ࡌࡔࡉࡄࡀ ࡁࡏࡅࡓࡀࡔࡋࡀࡌ ࡊࡀࡃࡉࡁࡕ ࡁࡉࡀࡄࡅࡈࡀࡉࡉࡀ ࡅࡔࡀࡒࡉࡓࡕࡁࡅࡍ ࡁࡂࡅࡁࡓࡉࡀ ࡊࡀࡄࡍࡉࡀ ࡆࡉࡓࡀ ࡐࡎࡀࡒࡕ ࡌࡍ ࡂࡅࡁࡓࡉࡀ ࡅࡉࡀࡃࡀࡋࡀ ࡅࡁࡅࡈࡍࡀ ࡌࡍ ࡏࡍࡔࡉࡀ ࡔࡀࡐࡕࡀ ࡖࡀࡎࡓࡇ ࡌࡉࡔࡀ ࡀࡍࡀࡕ ࡔࡓࡀࡉࡕࡇ ࡁࡏࡅࡓࡀࡔࡋࡀࡌ ࡊࡀࡃࡉࡁࡕࡁࡅࡍ ࡁࡒࡀࡓࡍࡉࡀ ࡅࡂࡅࡍࡉࡀ ࡁࡔࡅࡐࡓࡉࡀ ࡓࡌࡉࡕ ࡌࡀࡋࡉࡋ ࡖࡍࡉࡌࡀࡓࡋࡇ ࡏࡔࡅ ࡌࡔࡉࡄࡀ ࡋࡉࡀࡄࡉࡀ ࡁࡏࡅࡓࡀࡔࡋࡀࡌ ࡏࡅ ࡊࡀࡃࡁࡉࡕ ࡁࡉࡀࡄࡅࡈࡀࡉࡉࡀ ࡕࡉࡊࡋࡀࡍ ࡍࡅࡓࡀ ࡖࡉࡀࡄࡒࡃࡀ ࡏࡅ ࡔࡀࡒࡓࡉࡕ ࡁࡂࡅࡁࡓࡉࡀ ࡊࡀࡄࡍࡉࡀ ࡏࡌࡅࡕ ࡀࡕࡓࡉࡍ ࡌࡉࡕࡉࡀ ࡁࡄࡀࡃ ࡏࡅ ࡆࡉࡓࡀ ࡐࡉࡎࡒࡉࡕ ࡌࡍ ࡂࡅࡁࡓࡉࡀ ࡋࡀࡏࡁࡓࡇ ࡀࡋࡉࡀࡌࡀ ࡓࡁࡀ ࡖࡎࡅࡐ ࡏࡅ ࡉࡀࡃࡀࡋࡀ ࡅࡁࡅࡈࡍࡀ ࡐࡉࡎࡒࡉࡕ ࡌࡍ ࡏࡍࡔࡉࡀ ࡃࡀࡉࡀࡍࡀ ࡒࡅࡃࡀࡌࡀࡉ ࡀࡕࡓࡉࡑ ࡏࡅ ࡔࡀࡐࡕࡀ ࡀࡍࡀ ࡔࡀࡓࡀࡉࡕࡇ ࡕࡉࡊࡋࡀࡍ ࡍࡅࡓࡀ ࡖࡉࡀࡒࡃࡀ ࡏࡅ ࡊࡀࡃࡁࡉࡕ ࡁࡉࡀࡄࡅࡈࡀࡉࡉࡀ ࡏࡃࡉࡔࡇ ࡋࡊࡅࡁࡀ ࡅࡀࡈࡀࡈࡀ ࡏࡅ ࡂࡅࡍࡉࡀ ࡓࡌࡉࡕ ࡁࡔࡅࡐࡓࡉࡀ ࡀࡉࡍࡀࡉ ࡁࡀࡁࡀࡕࡅࡓ ࡋࡀࡍࡀࡐࡋࡀࡍ ࡀࡍࡀࡕ ࡑࡅࡁࡀࡍ ࡁࡌࡀࡑࡁࡅࡕࡀࡊ ࡅࡌࡍ ࡔࡅࡌࡀ ࡖࡌࡀࡃࡊࡉࡓࡉࡕ ࡀࡃࡊࡀࡓ ࡏࡋࡀࡉ ࡏࡅ ࡄࡀࡅࡉࡍࡀ ࡅࡌࡉࡕࡀࡓࡌࡀࡃࡍࡀ ࡁࡐࡓࡅࡃࡒࡀࡉ ࡌࡀࡃࡊࡀࡓࡍࡀ ࡏࡋࡀࡊ ࡏࡅ ࡋࡀࡄࡀࡅࡉࡍࡀ ࡅࡋࡀࡌࡉࡕࡀࡓࡌࡀࡃࡍࡀ ࡊࡅࡐࡓࡇ ࡋࡔࡅࡌࡀࡉ ࡌࡍ ࡔࡀࡐࡕࡀࡊ ࡌࡀࡋࡉࡋ ࡖࡍࡉࡌࡀࡓࡋࡇ ࡉࡀࡄࡉࡀ ࡋࡏࡔࡅ ࡌࡔࡉࡄࡀ ࡁࡏࡅࡓࡀࡔࡋࡀࡌ ࡀࡋࡂࡀ ࡋࡀࡄࡀࡅࡉࡀ ࡎࡀࡐࡓࡀ ࡅࡏࡔࡉࡒࡀ ࡏࡍࡂࡉࡓࡕࡀ ࡋࡀࡊࡀࡃࡉࡁ ࡋࡀࡃࡀࡄࡍࡀ ࡁࡀࡉࡕࡀ ࡄࡀࡓࡅࡁࡀ ࡅࡀࡓࡌࡀࡋࡕࡀ ࡄࡉࡃࡅࡕࡀ ࡋࡀࡄࡀࡅࡉࡀ ࡋࡀࡁࡀࡎࡌࡉࡍ ࡌࡉࡀ ࡎࡀࡓࡉࡉࡀ ࡅࡂࡋࡀࡋࡀ ࡁࡌࡉࡔࡀ ࡋࡀࡓࡀࡈࡁࡀ ࡌࡀࡋࡉࡋ ࡖࡍࡉࡌࡀࡓࡋࡇ ࡏࡔࡅ ࡌࡔࡉࡄࡀ ࡋࡉࡀࡄࡉࡀ ࡁࡏࡅࡓࡀࡔࡋࡀࡌ ࡀࡋࡂࡀ ࡄࡀࡅࡉࡀ ࡎࡀࡐࡓࡀ ࡅࡏࡔࡉࡒࡀ ࡏࡍࡂࡉࡓࡕࡀ ࡊࡀࡃࡉࡁ ࡃࡀࡄࡍࡀ ࡁࡀࡉࡕࡀ ࡄࡀࡓࡅࡁࡀ ࡅࡀࡓࡌࡀࡋࡕࡀ ࡄࡉࡃࡅࡕࡀ ࡄࡀࡅࡉࡀ ࡁࡀࡎࡌࡉࡍ ࡌࡉࡀ ࡎࡀࡓࡉࡉࡀ ࡅࡂࡋࡀࡋࡀ ࡁࡌࡉࡔࡀ ࡓࡀࡈࡁࡀ ࡌࡀࡋࡉࡋ ࡖࡍࡉࡌࡀࡓࡋࡇ ࡉࡀࡄࡉࡀ ࡋࡏࡔࡅ ࡌࡔࡉࡄࡀ ࡁࡏࡅࡓࡀࡔࡋࡀࡌ ࡏࡅ ࡄࡀࡆࡉࡍ ࡐࡀࡓࡔࡉࡂࡍࡀ ࡉࡀࡄࡁࡀࡕࡋࡉࡀ ࡌࡔࡉࡄࡀ ࡄࡀࡊࡉࡌࡀ ࡀࡍࡀࡕ ࡌࡀࡋࡉࡋ ࡖࡍࡉࡌࡀࡓࡋࡇ ࡏࡔࡅ ࡌࡔࡉࡄࡀ ࡋࡉࡀࡄࡉࡀ ࡁࡏࡅࡓࡀࡔࡋࡀࡌ ࡀࡋࡂࡀ ࡄࡀࡅࡉࡀ ࡎࡀࡐࡓࡀ ࡉࡀࡋࡃࡀ ࡖࡄࡀࡅࡉࡀ ࡌࡍ ࡄࡀࡉࡕࡀ ࡐࡀࡓࡉࡀ ࡅࡌࡉࡕࡓࡀࡅࡓࡀࡁ ࡁࡀࡂࡓࡀ ࡅࡆࡉࡃࡒࡀ ࡌࡉࡕࡓࡉࡑ ࡌࡉࡕࡓࡉࡑ ࡁࡀࡂࡓࡀ ࡅࡆࡉࡃࡒࡀ ࡅࡎࡀࡋࡉࡒ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡏࡔࡉࡒࡀ ࡖࡊࡀࡃࡉࡁ ࡏࡍࡂࡉࡓࡕࡀ ࡁࡓ ࡁࡉࡔࡉࡀ ࡖࡁࡓ ࡈࡀࡁࡉࡀ ࡄࡅࡀ ࡔࡁࡀࡒ ࡂࡀࡅࡓࡀ ࡅࡔࡁࡀࡒ ࡂࡅࡍࡁࡀ ࡅࡏࡕࡄࡀࡉࡌࡀࡍ ࡁࡄࡉࡉࡀ ࡓࡅࡓࡁࡉࡀ ࡁࡀࡉࡕࡀ ࡄࡀࡓࡅࡁࡀ ࡖࡓࡀࡄࡍࡀ ࡁࡓ ࡓࡅࡓࡁࡀࡍࡉࡀ ࡖࡏࡕࡌࡀࡊࡀࡊ ࡔࡁࡀࡒ ࡀࡒࡓࡉࡀ ࡅࡔࡁࡀࡒ ࡐࡀࡅࡓࡉࡀ ࡅࡁࡀࡉࡕࡀ ࡋࡉࡀࡌࡀ ࡁࡍࡀ ࡁࡀࡉࡕࡀ ࡁࡍࡀ ࡋࡉࡀࡌࡀ ࡅࡐࡕࡀࡋࡇ ࡁࡀࡁࡉࡀ ࡕࡓࡉࡍ ࡖࡌࡀࡍ ࡖࡔࡀࡐࡉࡋ ࡀࡕࡉࡉࡇ ࡅࡐࡕࡀࡋࡇ ࡁࡀࡁࡀ ࡅࡒࡀࡁࡋࡇ ࡏࡅ ࡌࡉࡊࡀࡋ ࡁࡀࡉࡉࡀ ࡐࡀࡕࡅࡓࡀ ࡁࡊࡅࡔࡈࡀ ࡕࡓࡀࡑࡋࡇ ࡏࡅ ࡌࡉࡔࡕࡉࡀ ࡁࡀࡉࡉࡀ ࡀࡂࡀࡍࡉࡀ ࡄࡀࡌࡓࡀ ࡌࡆࡉࡂࡋࡇ ࡏࡅ ࡌࡉࡔࡊࡀࡁ ࡁࡀࡉࡉࡀ ࡀࡓࡎࡀ ࡁࡊࡅࡔࡈࡀ ࡌࡀࡊࡋࡇ ࡏࡅ ࡌࡉࡆࡀࡋ ࡁࡀࡉࡉࡀ ࡃࡉࡓࡊࡉࡀ ࡖ ࡊࡅࡔࡈࡀ ࡀࡃࡓࡉࡊࡋࡇ ࡀࡃࡓࡉࡊࡋࡇ ࡃࡉࡓࡊࡉࡀ ࡖࡊࡅࡔࡈࡀ ࡅࡄࡀࡉࡌࡀࡍࡅࡕࡀ ࡅࡎࡀࡋࡉࡒ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡀࡓࡌࡀࡋࡕࡀ ࡖࡄࡀࡅࡉࡀ ࡄࡉࡃࡅࡕࡀ ࡏࡍࡕࡀ ࡖࡌࡍ ࡉࡀࡍࡒࡅࡕࡇ ࡀࡓࡌࡋࡀࡕ ࡋࡉࡂࡈࡀࡕ ࡔࡉࡐࡅࡋࡇ ࡅࡉࡀࡕࡁࡀࡕ ࡀࡋࡌࡀ ࡖࡌࡉࡕࡓࡀࡁࡉࡍ ࡁࡍࡇ ࡗ ࡀࡆࡋࡀ ࡋࡄࡀࡕࡀࡌ ࡋࡀࡎࡀࡉࡐࡉࡋࡇ ࡀࡍࡐࡇ ࡌࡍ ࡆࡀࡅࡇ ࡌࡉࡀ ࡎࡀࡓࡉࡉࡀ ࡖࡁࡀࡎࡌࡉࡀ ࡐࡕ ࡆࡀࡌࡀࡓࡕࡀ ࡖࡄࡀࡓࡕࡀ ࡄࡅࡀࡕ ࡌࡀࡕࡀ ࡎࡀࡋࡒࡀ ࡅࡌࡀࡕࡀ ࡍࡀࡄࡕࡀ ࡅࡊࡋࡅࡋࡀ ࡌࡍ ࡀࡍࡐࡇ ࡋࡀࡓࡀࡌࡉࡀ ࡂࡋࡀࡋࡀ ࡁࡌࡉࡔࡀ ࡓࡀࡈࡁࡀ ࡆࡀࡍࡃࡉࡒࡀ ࡖࡌࡍ ࡈࡅࡓࡀ ࡍࡄࡉࡕ ࡔࡁࡀࡒ ࡄࡀࡓࡔࡉࡀ ࡅࡔࡁࡀࡒ ࡐࡅࡃࡓࡉࡀ ࡅࡏࡕࡄࡀࡉࡌࡀࡍ ࡁࡄࡉࡉࡀ ࡓࡅࡓࡁࡉࡀ ࡀࡔࡊࡇ ࡋࡉࡀࡕࡉࡌࡀ ࡅࡎࡀࡁࡇ ࡅࡊࡀࡍࡐࡇ ࡖࡀࡓࡌࡀࡋࡕࡀ ࡌࡋࡀ ࡀࡍࡀࡕ ࡉࡀࡄࡉࡀ ࡑࡅࡁࡀࡍ ࡁࡌࡀࡑࡁࡅࡕࡀࡊ ࡅࡌࡍ ࡔࡅࡌࡀ ࡖࡌࡀࡃࡊࡉࡓࡉࡕ ࡀࡃࡊࡀࡓ ࡏࡋࡀࡉ ࡏࡅ ࡄࡀࡅࡉࡍࡀ ࡅࡌࡉࡕࡀࡓࡌࡀࡃࡍࡀ ࡁࡐࡓࡅࡃࡒࡀࡉ ࡌࡀࡃࡊࡀࡓࡍࡀ ࡏࡋࡀࡊ ࡏࡅ ࡋࡀࡄࡀࡅࡉࡍࡀ ࡅࡋࡀࡌࡉࡕࡀࡓࡌࡀࡃࡍࡀ ࡊࡅࡐࡓࡇ ࡋࡔࡅࡌࡀࡉ ࡌࡍ ࡔࡀࡐࡕࡀࡊ ࡀࡍࡀࡕ ࡁࡄࡀࡈࡀࡉࡀࡊ ࡌࡉࡔࡕࡀࡉࡉࡋࡉࡕ ࡅࡀࡍࡀ ࡁࡄࡀࡈࡀࡉࡀࡉ ࡌࡉࡔࡕࡀࡉࡀࡋࡍࡀ ࡗ ࡄࡀࡆࡉࡍ ࡀࡌࡀࡓ ࡏࡔࡅ ࡌࡔࡉࡄࡀ ࡏࡍࡂࡉࡓࡕࡀ ࡌࡍ ࡁࡉࡕ ࡀࡁࡀࡕࡅࡓ ࡀࡕࡀࡕ ࡉࡀࡄࡉࡀ ࡑࡅࡁࡇ ࡋࡊࡀࡃࡀࡁࡀ ࡁࡉࡀࡓࡃࡍࡀ ࡀࡄࡉࡕ ࡁࡉࡀࡓࡃࡍࡀ ࡑࡅࡁࡇ ࡅࡀࡎࡉࡒ ࡋࡊࡉࡐࡇ ࡒࡀࡉࡌࡇ ࡓࡅࡄࡀ ࡁࡉࡀࡅࡍࡀ ࡏࡃࡀࡌࡉࡀࡕ ࡅࡑࡀࡋࡉࡁࡀ ࡁࡉࡀࡓࡃࡍࡀ ࡑࡀࡋࡁࡀ ࡑࡀࡋࡉࡁࡀ ࡑࡀࡋࡁࡀ ࡁࡉࡀࡓࡃࡍࡀ ࡅࡀࡒࡉࡌࡕࡉࡍࡅࡍ ࡋࡌࡉࡀ ࡁࡂࡀࡅࡍࡉࡀ ࡂࡀࡅࡍࡉࡀ ࡅࡀࡌࡓࡀ ࡉࡀࡓࡃࡍࡀ ࡋࡃࡉࡋࡉࡀ ࡌࡒࡀࡃࡔࡀࡕࡋࡉࡀ ࡅࡌࡒࡀࡃࡔࡀࡕࡋࡅࡍ ࡋࡔࡅࡁࡀ ࡁࡍࡀࡉ ࡉࡀࡓࡃࡍࡀ ࡖࡏࡑࡈࡁࡀࡁࡇ ࡌࡔࡉࡄࡀ ࡐࡀࡅࡋࡉࡎ ࡊࡅࡄࡃࡀࡍࡀ ࡔࡀࡅࡉࡕࡇ ࡐࡉࡄࡕࡀ ࡖࡍࡀࡎࡉࡁ ࡌࡔࡉࡄࡀ ࡐࡀࡅࡋࡉࡎ ࡒࡅࡃࡔࡀ ࡔࡀࡅࡉࡕࡇ ࡌࡀࡌࡁࡅࡄࡀ ࡖࡍࡀࡎࡉࡁ ࡌࡔࡉࡄࡀ ࡐࡀࡅࡋࡉࡎ ࡒࡅࡓࡁࡀࡍࡀ ࡔࡀࡅࡉࡕࡇ ࡁࡅࡓࡆࡉࡍࡒࡀ ࡖࡍࡀࡎࡉࡁ ࡌࡔࡉࡄࡀ ࡐࡀࡅࡋࡉࡎ ࡊࡀࡄࡍࡅࡕࡀ ࡔࡀࡅࡉࡕࡇ ࡌࡀࡓࡂࡍࡀ ࡖࡍࡀࡎࡉࡁ ࡌࡔࡉࡄࡀ ࡐࡀࡅࡋࡉࡎ ࡌࡀࡄࡓࡅࡍࡉࡕࡀ ࡔࡀࡅࡉࡕࡇ ࡏࡆࡃࡀࡄࡓࡅࡋࡉࡀ ࡀࡄࡀࡉ ࡅࡏࡆࡃࡀࡄࡓࡅࡋࡉࡀ ࡓࡀࡄࡌࡀࡉ ࡏࡆࡃࡀࡄࡓࡅࡋࡉࡀ ࡀࡄࡀࡉ ࡌࡍ ࡃࡅࡌࡀࡉࡉࡀ ࡖࡃࡀࡌࡉࡍ ࡀࡋࡅࡀࡕ ࡑࡀࡋࡉࡁࡀ ࡖࡍࡀࡒࡔࡉࡀ ࡁࡀࡔࡉࡀࡕࡀ ࡅࡒࡀࡉࡌࡉࡀ ࡋࡒࡅࡓࡅࡒࡎࡀ ࡎࡀࡂࡃࡉࡀ ࡏࡆࡃࡀࡄࡓࡅࡋࡉࡀ ࡀࡄࡀࡉ ࡌࡍ ࡀࡋࡀࡄࡀ ࡖࡍࡀࡂࡀࡓࡀ ࡂࡈࡀࡓ ࡏࡅ ࡀࡋࡀࡄࡀ ࡂࡈࡀࡓ ࡍࡀࡂࡀࡓࡀ ࡐࡀࡎ ࡍࡀࡂࡀࡓࡀ ࡌࡀࡍ ࡂࡉࡈࡓࡇ ࡅࡌࡔࡀࡁࡉࡍ ࡄࡉࡉࡀ ࡅࡄࡉࡉࡀ ࡆࡀࡊࡏࡉࡍ ࡎࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡉࡅࡄࡀࡍࡀ ࡁࡓࡀࡌࡔࡉࡀ ࡖࡋࡉࡋࡉࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡀࡌࡀࡓ ࡂࡀࡓࡂࡋࡉࡀ ࡅࡌࡀࡓࡊࡀࡁࡀࡕࡀ ࡍࡀࡃ ࡔࡀࡌࡉࡔ ࡅࡎࡉࡓࡀ ࡁࡀࡊࡉࡍ ࡅࡀࡉࡍࡇ ࡖࡓࡅࡄࡀ ࡃࡉࡌࡀ ࡍࡀࡕࡓࡀࡍ ࡅࡀࡌࡀࡓ ࡉࡀࡄࡉࡀ ࡃࡀࡌࡉࡕ ࡋࡈࡅࡓࡀ ࡒࡀࡋࡉࡀ ࡖࡋࡀࡌࡀࡐࡉࡒ ࡁࡕࡉࡁࡉࡋ ࡎࡉࡌࡀࡃࡓࡉࡀ ࡃࡀࡌࡉࡕ ࡋࡍࡀࡄࡓࡀ ࡉࡀࡁࡉࡔࡀ ࡖࡔࡉࡕࡋࡉࡀ ࡏࡋࡇ ࡋࡀࡔࡀࡕࡋࡉࡀ ࡃࡀࡌࡉࡕ ࡋࡁࡀࡉࡕࡀ ࡄࡀࡓࡅࡁࡀ ࡖࡊࡅࡋ ࡖࡄࡀࡆࡉࡋࡇ ࡌࡉࡍࡇ ࡃࡀࡄࡉࡋ ࡀࡓࡒࡀ ࡖࡋࡀࡌࡀࡓࡀ ࡁࡀࡉࡕࡀ ࡏࡄࡅࡉࡕ ࡖࡋࡉࡕࡁࡇ ࡄࡉࡆࡅࡀ ࡍࡁࡉࡄࡀ ࡄࡅࡉࡕ ࡖࡏࡅࡋࡀ ࡖࡋࡀࡔࡀࡁࡒࡉࡕ ࡀࡁࡀࡕࡓࡀࡊ ࡃࡀࡊࡀࡓ ࡔࡅࡌࡀ ࡌࡀࡍ ࡍࡉࡆࡉࡃࡀࡊ ࡅࡌࡀࡍ ࡍࡉࡆࡀࡅࡃࡀࡊ ࡉࡀࡄࡉࡀ ࡅࡌࡀࡍ ࡍࡀࡎࡂࡉࡀ ࡀࡁࡀࡕࡓࡀࡊ ࡋࡁࡉࡕ ࡒࡅࡁࡓࡉࡀ ࡗ ࡄࡀࡉࡆࡉࡍ ࡔࡅࡌࡀ ࡉࡀࡄࡉࡀ ࡁࡀࡉࡍࡇ ࡑࡀࡓࡀࡋࡇ ࡃࡉࡌࡉࡄࡕࡀ ࡃࡉࡌࡉࡄࡕࡀ ࡑࡀࡓࡀࡋࡇ ࡁࡀࡉࡍࡇ ࡅࡀࡌࡀࡓ ࡁࡀࡎࡉࡌ ࡖࡌࡉࡋࡂࡀࡈ ࡆࡀࡅࡀ ࡅࡉࡀࡒࡉࡓ ࡖࡌࡉࡄࡅࡉࡋࡀ ࡁࡍࡉࡀ ࡏࡃࡉࡋࡌࡀ ࡋࡀࡂࡉࡈࡍࡀ ࡆࡀࡅࡀ ࡅࡀࡕࡉࡀ ࡔࡉࡍࡕࡀ ࡅࡌࡉࡕࡓࡀࡂࡀࡂࡀ ࡏࡋࡀࡉ ࡅࡌࡁࡀࡈࡉࡋࡍࡀ ࡋࡓࡀࡄࡌࡀࡉ ࡖࡋࡉࡋࡉࡀ ࡏࡃࡉࡋࡌࡀ ࡌࡉࡕࡓࡀࡂࡀࡂࡋࡉࡀ ࡓࡀࡂࡀࡂࡕࡀ ࡅࡌࡉࡍࡔࡉࡍࡇ ࡋࡌࡀࡓࡀࡉ ࡌࡍ ࡏࡅࡑࡓࡀࡉ ࡏࡃࡉࡋࡌࡀ ࡌࡉࡓࡀࡂࡀࡂࡋࡉࡀ ࡓࡀࡂࡀࡂࡕࡀ ࡅࡌࡁࡀࡈࡉࡋࡍࡀ ࡓࡀࡄࡌࡀࡉ ࡖࡊࡅࡋ ࡆࡁࡀࡍ ࡗ ࡄࡀࡉࡆࡉࡍ ࡀࡌࡀࡓ ࡉࡀࡄࡉࡀ ࡏࡍࡂࡉࡓࡕࡀ ࡌࡍ ࡁࡉࡕ ࡀࡁࡀࡕࡅࡓ ࡀࡕࡀࡕ ࡉࡀࡄࡉࡀ ࡀࡋࡂࡅࡈ ࡆࡀࡅࡀ ࡅࡏࡕࡊࡀࡍࡀࡍ ࡅࡄࡆࡉࡀ ࡋࡕࡉࡁࡉࡋ ࡌࡁࡀࡈࡋࡀࡕࡋࡇ ࡀࡍࡐࡉࡀ ࡀࡕࡓࡉࡍ ࡅࡀࡍࡐࡉࡀ ࡀࡕࡋࡀࡕࡀ ࡀࡓࡎࡀࡊ ࡒࡀࡃࡌࡀࡉࡕࡀ ࡄࡆࡉࡀ ࡀࡍࡐࡉࡀ ࡀࡓࡁࡀ ࡅࡀࡍࡐࡉࡀ ࡄࡀࡌࡔࡀ ࡒࡅࡌࡁࡅࡍ ࡁࡓࡀࡄࡌࡀࡊ ࡔࡀࡍࡉࡀ ࡀࡍࡐࡉࡀ ࡓࡀࡄࡀࡈࡉࡀ ࡅࡀࡍࡐࡉࡀ ࡔࡀࡐࡕࡀ ࡀࡓࡎࡀࡊ ࡒࡀࡃࡌࡀࡉࡕࡀ ࡄࡆࡉࡀ ࡀࡍࡐࡉࡀ ࡄࡀࡁࡔࡀࡁࡀ ࡅࡀࡍࡐࡉࡀ ࡉࡅࡌࡀ ࡒࡅࡌࡁࡅࡍ ࡁࡓࡀࡄࡌࡀࡊ ࡔࡀࡍࡉࡀ ࡉࡅࡌࡀ ࡖࡄࡀࡁࡔࡀࡁࡀ ࡀࡕࡋࡀࡕࡀ ࡋࡂࡅࡈ ࡅࡕࡀࡋࡕࡀ ࡔࡁࡅࡒ ࡋࡂࡅࡈ ࡕࡋࡀࡕࡀ ࡅࡔࡁࡅࡒ ࡀࡕࡋࡀࡕࡀ ࡅࡄࡆࡉࡀ ࡋࡕࡉࡁࡉࡋ ࡌࡁࡀࡈࡋࡀࡕࡋࡇ ࡍࡑࡀࡁࡅࡋࡇ ࡆࡀࡅࡀ ࡋࡉࡀࡄࡉࡀ ࡌࡉࡍࡉࡊ ࡌࡀࡕࡀ ࡖࡊࡅࡔࡕࡀࡍࡉࡀ ࡁࡊࡀࡓࡎࡀ ࡒࡀࡃࡌࡀࡉࡕࡀ ࡄࡀࡍࡃࡀࡍ ࡅࡔࡀࡓࡀࡕ ࡄࡅࡍ ࡁࡊࡀࡓࡎࡀ ࡌࡉࡑࡀࡉࡕࡀ ࡁࡉࡄࡓࡀࡌ ࡅࡓࡄࡉࡌࡀࡕ ࡄࡉࡉࡀ ࡄࡅࡍ ࡁࡊࡀࡓࡎࡀ ࡁࡀࡕࡓࡀࡉࡕࡀ ࡍࡑࡀࡁ ࡅࡎࡀࡌ ࡅࡀࡍࡄࡀࡓ ࡆࡉࡅࡀ ࡅࡔࡀࡓࡀࡕ ࡄࡅࡍ ࡄࡀࡋࡉࡍ ࡕࡋࡀࡕ ࡊࡀࡓࡎࡀࡕࡀ ࡁࡂࡀࡅࡉࡊ ࡄࡅࡓࡁࡀ ࡖࡏࡅࡓࡀࡔࡋࡀࡌ ࡉࡀࡄࡉࡀ ࡋࡐࡅࡌࡇ ࡐࡉࡄࡕࡇ ࡅࡋࡀࡍࡄࡀࡓ ࡖࡍࡉࡌࡀࡓࡋࡇ ࡁࡏࡅࡓࡀࡔࡋࡀࡌ ࡀࡍࡀࡕ ࡀࡋࡉࡐ ࡁࡍࡀࡕࡉࡊ ࡖࡋࡀࡍࡉࡅࡃࡀࡍ ࡅࡀࡍࡀ ࡏࡉࡀࡐࡓࡉࡔ ࡅࡏࡉࡀࡎࡁࡀࡓ ࡁࡍࡀࡉ ࡖࡋࡀࡍࡉࡎࡕࡀࡊࡓࡅࡍ ࡀࡍࡄࡀࡓ ࡋࡐࡅࡌࡇ ࡐࡕࡀࡄࡕࡇ ࡅࡋࡇ ࡋࡉࡀࡄࡉࡀ ࡖࡕࡉࡌࡀࡓࡋࡇ ࡁࡏࡅࡓࡀࡔࡋࡀࡌ ࡀࡌࡓࡀࡋࡇ ࡀࡍࡀ ࡁࡍࡉࡀ ࡁࡕࡉࡁࡉࡋ ࡉࡀࡃࡋࡉࡕ ࡋࡉࡁࡀ ࡁࡕࡉࡁࡉࡋ ࡋࡀࡉࡀࡃࡋࡉࡕ ࡏࡅ ࡄࡀࡅࡉࡍ ࡅࡌࡉࡕࡀࡓࡌࡉࡃࡉࡍ ࡍࡉࡎࡒࡅࡍ ࡋࡀࡕࡀࡓ ࡍࡄࡅࡓ ࡏࡅ ࡋࡀࡄࡀࡅࡉࡍ ࡅࡋࡀࡌࡉࡕࡀࡓࡌࡉࡃࡉࡍ ࡕࡉࡊࡋࡉࡍࡅࡍ ࡍࡅࡓࡀ ࡖࡉࡀࡒࡃࡀ ࡉࡀࡄࡉࡀ ࡋࡐࡅࡌࡇ ࡐࡉࡄࡕࡇ ࡅࡋࡀࡍࡄࡀࡓ ࡖࡍࡉࡌࡀࡓࡋࡇ ࡁࡏࡅࡓࡀࡔࡋࡀࡌ ࡗ ࡀࡍࡀ ࡌࡍ ࡕࡉࡁࡉࡋ ࡍࡀࡐࡉࡒࡍࡀ ࡀࡌࡀࡓࡋࡉࡀ ࡀࡁࡀࡕࡓࡀࡉ ࡌࡀࡄࡅ ࡖࡀࡁࡃࡉࡕ ࡀࡌࡓࡀࡋࡇ ࡋࡀࡊࡋࡀࡍࡀ ࡅࡋࡀ ࡔࡀࡕࡉࡀࡍࡀ ࡀࡋࡌࡀ ࡖࡄࡀࡆࡉࡍࡀࡋࡀࡊ ࡋࡃࡉࡋࡀࡊ ࡊࡀࡃࡁࡀ ࡀࡌࡀࡓࡕ ࡀࡍࡄࡀࡓ ࡅࡁࡔࡉࡒࡓࡀ ࡍࡉࡐࡒࡀࡕ ࡌࡉࡍࡉࡋࡕࡉࡊ ࡗ ࡉࡅࡌࡀ ࡀࡉࡉࡋ ࡅࡉࡅࡌࡀ ࡍࡀࡐࡉࡒ ࡀࡍࡀࡕ ࡀࡊࡋࡉࡕ ࡅࡔࡀࡕࡉࡕ ࡅࡋࡃࡉࡋࡉࡀ ࡌࡉࡍࡔࡉࡀࡕࡋࡉࡀ ࡌࡍ ࡏࡅࡑࡓࡉࡊ ࡏࡋࡀ ࡔࡀࡋࡕࡉࡊ ࡁࡄࡉࡉࡀ ࡓࡁࡉࡀ ࡅࡁࡀࡍࡐࡉࡀ ࡉࡅࡌࡀ ࡖࡉࡀࡒࡉࡓ ࡔࡅࡌࡇ ࡗ ࡀࡍࡀ ࡌࡍ ࡕࡉࡁࡉࡋ ࡍࡀࡐࡉࡒࡍࡀ ࡀࡌࡀࡓࡋࡉࡀ ࡀࡁࡀࡕࡓࡀࡉ ࡌࡀࡄࡅ ࡖࡀࡁࡃࡉࡕ ࡀࡌࡓࡀࡋࡇ ࡋࡀࡏࡄࡅࡐ ࡅࡋࡀࡏࡎࡓࡅࡒ ࡀࡋࡌࡀ ࡖ ࡄࡀࡆࡉࡍࡀࡋࡀࡊ ࡋࡃࡉࡋࡀࡊ ࡕࡅࡌ ࡊࡀࡃࡁࡀ ࡀࡌࡀࡓࡕ ࡀࡍࡄࡀࡓ ࡅࡁࡔࡉࡒࡓࡀ ࡍࡉࡐࡒࡀࡕ ࡌࡉࡍࡉࡋࡕࡉࡊ ࡗ ࡉࡀࡄࡓࡀ ࡀࡉࡉࡋ ࡅࡉࡀࡄࡓࡀ ࡍࡀࡐࡉࡒ ࡀࡍࡀࡕ ࡄࡀࡉࡐࡉࡕ ࡅࡎࡀࡓࡒࡉࡕ ࡅࡋࡃࡉࡋࡉࡀ ࡌࡉࡍࡉࡔࡉࡀࡕࡋࡉࡀ ࡌࡍ ࡏࡅࡑࡓࡉࡊ ࡕࡅࡌ ࡔࡀࡋࡕࡉࡊ ࡀࡍࡄࡀࡓ ࡁࡀࡓࡎࡀ ࡒࡀࡃࡌࡀࡉࡕࡀ ࡖࡔࡀࡊࡁࡉࡍࡀࡁࡇ ࡕࡀࡓࡕࡉࡍࡀࡍ ࡗ ࡀࡍࡀ ࡌࡍ ࡐࡀࡂࡓࡀࡉ ࡍࡀࡐࡉࡒࡍࡀ ࡀࡌࡀࡓࡋࡉࡀ ࡀࡁࡀࡕࡓࡀࡉ ࡌࡀࡄࡅ ࡖࡀࡁࡃࡉࡕ ࡀࡌࡓࡀࡋࡇ ࡋࡀࡋࡀࡁࡔࡀࡍࡀ ࡋࡁࡅࡔࡉࡀ ࡄࡀࡃࡕࡉࡀ ࡀࡋࡌࡀ ࡖࡄࡀࡆࡉࡀࡍࡀࡋࡀࡊ ࡋࡃࡉࡋࡀࡊ ࡕࡅࡌ ࡊࡀࡃࡁࡀ ࡀࡌࡀࡓࡕ ࡀࡍࡄࡀࡓ ࡅࡁࡔࡉࡒࡓࡀ ࡍࡉࡐࡒࡀࡕ ࡌࡉࡍࡉࡋࡕࡉࡊ ࡗ ࡀࡉࡋࡀ ࡔࡉࡕࡀ ࡅࡍࡀࡐࡒࡀ ࡔࡉࡕࡀ ࡀࡍࡀࡕ ࡋࡀࡁࡔࡉࡕ ࡋࡁࡅࡔࡉࡀ ࡄࡀࡃࡕࡉࡀ ࡅࡋࡃࡉࡋࡉࡀ ࡌࡉࡍࡔࡉࡀࡕࡋࡉࡀ ࡌࡍ ࡏࡅࡑࡓࡉࡊ ࡀࡌࡓࡀࡋࡇ ࡊࡌࡀ ࡀࡌࡓࡀࡕࡋࡉࡀ ࡉࡀࡄࡉࡀ ࡅࡊࡌࡀ ࡌࡀࡍࡒࡉࡔࡀࡕࡋࡇ ࡋࡊࡅࡋࡇ ࡒࡅࡌࡕࡀࡉ ࡗ ࡀࡆࡋࡉࡕ ࡏࡋ ࡏࡌࡀࡕ ࡖࡀࡕࡉࡕ ࡖ ࡀࡉࡍࡀࡉ ࡁࡀࡉࡍࡀࡊ ࡍࡀࡐࡋࡀࡍ ࡗ ࡄࡀࡉࡕࡀ ࡂࡍࡉࡉࡀ ࡁࡔࡉࡅࡋ ࡅࡆࡀࡍࡂࡀ ࡕࡋࡉࡋࡇ ࡁࡉࡕ ࡒࡅࡁࡓࡉࡀ ࡗ ࡑࡅࡓࡕࡀ ࡑࡀࡉࡓࡀ ࡁࡔࡉࡅࡋ ࡅࡍࡀࡐࡒࡀ ࡅࡌࡀࡔࡒࡉࡍ ࡁࡉࡕ ࡒࡅࡁࡓࡉࡀ ࡗ ࡄࡉࡃࡅࡕࡀ ࡄࡀࡃࡓࡀ ࡁࡔࡉࡅࡋ ࡅࡂࡍࡀࡍࡉࡀ ࡂࡀࡍࡉࡀ ࡁࡉࡕ ࡒࡅࡁࡓࡉࡀ ࡗ ࡔࡅࡔࡁࡀࡍࡉࡀ ࡌࡀࡓࡔࡉࡍ ࡁࡔࡉࡅࡋ ࡅࡐࡅࡓࡀࡍࡀ ࡄࡀࡅࡉࡀ ࡁࡉࡕ ࡒࡅࡁࡓࡉࡀ ࡀࡌࡓࡀࡋࡇ ࡄࡀࡉ ࡌࡀࡓࡀࡉ ࡄࡀࡉࡃࡉࡍ ࡄࡀࡅࡉࡀ ࡖࡄࡀࡉࡕࡀ ࡂࡍࡉࡉࡀ ࡁࡔࡉࡅࡋ ࡅࡆࡀࡍࡂࡀ ࡕࡋࡉࡋࡇ ࡁࡉࡕ ࡒࡅࡁࡓࡉࡀ ࡌࡏ ࡑࡀࡉࡓࡉࡀ ࡑࡅࡓࡕࡀ ࡁࡔࡉࡅࡋ ࡅࡍࡀࡐࡒࡉࡀ ࡅࡌࡀࡔࡒࡉࡀ ࡁࡉࡕ ࡒࡅࡁࡓࡉࡀ ࡌࡏ ࡄࡀࡃࡓࡀ ࡄࡉࡃࡅࡕࡀ ࡁࡔࡉࡅࡋ ࡅࡂࡍࡀࡍࡉࡀ ࡂࡀࡍࡉࡀ ࡁࡉࡕ ࡒࡅࡁࡓࡉࡀ ࡌࡏ ࡌࡀࡓࡔࡉࡍ ࡔࡅࡔࡁࡀࡍࡉࡀ ࡁࡔࡉࡅࡋ ࡐࡅࡓࡀࡍࡀ ࡄࡀࡅࡉࡀ ࡁࡉࡕ ࡒࡅࡁࡓࡉࡀ ࡀࡌࡀࡓࡋࡇ ࡗ ࡉࡀࡃࡉࡕ ࡖࡄࡀࡉࡆࡉࡍ ࡋࡀࡄࡀࡅࡉࡀ ࡋࡌࡀࡄࡅ ࡌࡔࡀࡉࡋࡀࡕࡋࡉࡀ ࡖࡏࡌࡀࡕ ࡀࡕࡉࡕ ࡀࡍࡀ ࡀࡆࡉࡋࡍࡀ ࡅࡋࡀࡕࡉࡍࡀ ࡈࡅࡁࡇ ࡋࡉࡅࡌࡀ ࡖࡄࡀࡆࡉࡀࡕࡋࡉࡀ ࡏࡅ ࡌࡉࡆࡀࡋ ࡅࡌࡉࡕࡉࡀ ࡄࡅࡀ ࡀࡓࡌࡀࡋࡕࡀ ࡁࡕࡉࡁࡉࡋ ࡋࡀࡄࡅࡀࡕ ࡏࡅ ࡌࡉࡆࡀࡋ ࡅࡌࡉࡕࡉࡀ ࡄࡅࡀ ࡉࡀࡕࡉࡌࡉࡀ ࡁࡕࡉࡁࡉࡋ ࡋࡀࡄࡅࡍ ࡏࡅ ࡌࡉࡆࡀࡋ ࡅࡌࡉࡕࡉࡀ ࡄࡅࡀ ࡓࡀࡁࡀࡍࡉࡀ ࡅࡌࡀࡋࡐࡀࡍࡉࡀ ࡁࡕࡉࡁࡉࡋ ࡋࡀࡄࡅࡍ ࡏࡅ ࡌࡉࡆࡀࡋ ࡅࡌࡉࡕࡉࡀ ࡄࡅࡀ ࡍࡀࡑࡅࡓࡀࡉࡉࡀ ࡁࡕࡉࡁࡉࡋ ࡋࡀࡄࡅࡍ ࡀࡍࡄࡀࡓ ࡋࡐࡅࡌࡇ ࡐࡕࡀࡄࡕࡇ ࡅࡋࡇ ࡋࡉࡀࡄࡉࡀ ࡖࡕࡉࡌࡀࡓࡋࡇ ࡁࡏࡅࡓࡀࡔࡋࡀࡌ ࡆࡀࡁࡍࡀࡍࡀࡊ ࡀࡆࡂࡀ ࡁࡍࡐࡉࡔ ࡅࡂࡀࡈࡓࡀࡍࡀࡊ ࡒࡀࡁࡅࡕࡀ ࡋࡁࡉࡕ ࡒࡅࡁࡓࡉࡀ ࡉࡀࡄࡉࡀ ࡋࡐࡅࡌࡇ ࡐࡉࡄࡕࡇ ࡅࡋࡀࡍࡄࡀࡓ ࡖࡍࡉࡌࡀࡓࡋࡇ ࡁࡏࡅࡓࡀࡔࡋࡀࡌ ࡋࡌࡀࡋࡉࡊ ࡀࡆࡂࡀ ࡖࡆࡀࡁࡍࡉࡕ ࡁࡍࡐࡉࡔ ࡅࡒࡀࡁࡅࡕࡀ ࡖࡂࡀࡈࡓࡉࡕ ࡋࡁࡉࡕ ࡒࡅࡁࡓࡉࡀ ࡖࡌࡉࡕࡓࡉࡄࡑࡉࡕ ࡖࡀࡕࡉࡍࡀ ࡖࡀࡌࡓࡉࡕ ࡖ ࡄࡉࡋࡀ ࡋࡀࡍࡀࡐࡉࡋ ࡏࡋࡇ ࡀࡆࡂࡀ ࡖࡆࡀࡁࡍࡉࡕ ࡁࡍࡐࡉࡔ ࡀࡆࡉࡋ ࡋࡄࡀࡌࡀ ࡏࡋࡀࡅࡀࡉ ࡀࡄࡅࡁ ࡒࡀࡁࡅࡕࡀ ࡖࡂࡀࡈࡓࡉࡕ ࡋࡁࡉࡕ ࡒࡅࡁࡓࡉࡀ ࡀࡆࡉࡋ ࡌࡀࡎࡒࡀࡕࡀ ࡏࡋࡀࡅࡀࡉ ࡒࡓࡀࡉ ࡀࡍࡄࡀࡓ ࡋࡐࡅࡌࡇ ࡐࡕࡀࡄࡕࡇ ࡅࡋࡇ ࡋࡉࡀࡄࡉࡀ ࡖࡕࡉࡌࡀࡓࡋࡇ ࡁࡏࡅࡓࡀࡔࡋࡀࡌ ࡀࡍࡀࡕ ࡀࡆࡋࡉࡕ ࡅࡌࡉࡍࡔࡉࡀࡕࡉࡀ ࡋࡃࡉࡋࡉࡀ ࡅࡌࡉࡐࡎࡉࡒࡀࡍࡀ ࡁࡃࡅࡓ ࡄࡀࡈࡉࡀ ࡏࡅ ࡋࡃࡉࡋࡉࡊ ࡌࡉࡍࡔࡉࡍࡉࡊ ࡍࡉࡍࡉࡔࡉࡀࡍ ࡃࡀࡅࡓࡀ ࡕࡀࡒࡍࡀ ࡏࡅ ࡋࡃࡉࡋࡉࡊ ࡌࡉࡍࡔࡉࡍࡉࡊ ࡀࡉࡍࡀࡉ ࡁࡀࡁࡀࡕࡅࡓ ࡋࡀ ࡍࡀࡐࡋࡀࡍ ࡗ ࡀࡍࡀ ࡎࡀࡋࡉࡒࡍࡀ ࡋࡁࡉࡕ ࡄࡉࡉࡀ ࡔࡉࡀࡈࡉࡊ ࡄࡀࡅࡉࡀ ࡁࡉࡕ ࡒࡅࡁࡓࡉࡀ ࡅࡌࡔࡀࡁࡉࡍ ࡄࡉࡉࡀ ࡅࡄࡉࡉࡀ ࡆࡀࡊࡉࡍ ࡎࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡉࡅࡄࡀࡍࡀ ࡁࡓࡀࡌࡔࡉࡀ ࡖࡋࡉࡋࡉࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡀࡌࡀࡓ ࡂࡀࡓࡂࡋࡉࡀ ࡅࡌࡀࡓࡊࡀࡁࡀࡕࡀ ࡍࡀࡃ ࡀࡓࡒࡀ ࡅࡏࡔࡅࡌࡉࡀ ࡁࡀࡊࡉࡀࡍ ࡅࡃࡉࡌࡀ ࡖࡀࡍࡀࡍࡉࡀ ࡍࡀࡕࡓࡀࡍ ࡅࡀࡌࡀࡓ ࡀࡁ ࡄࡅࡀ ࡁࡓ ࡏࡕࡔࡉࡍ ࡅࡕࡔࡀ ࡔࡍࡉࡀ ࡅࡏࡌ ࡐࡕ ࡕࡌࡀࡍࡀࡍ ࡅࡕࡌࡀࡍࡉࡀ ࡏࡔࡍࡉࡀ ࡌࡍ ࡄࡅࡎ ࡉࡀࡓࡃࡍࡀ ࡀࡕࡉࡅࡍ ࡅࡍࡉࡎࡁࡅࡍ ࡅࡀࡎࡒࡅࡍ ࡅࡀࡕࡉࡅࡍ ࡅࡁࡌࡀࡓࡁࡀ ࡖࡏࡍࡉࡔࡁࡀࡉ ࡓࡉࡌࡉࡅࡍ ࡅࡀࡌࡀࡓ ࡏࡕࡔࡀ ࡉࡀࡄࡓࡉࡀ ࡃࡀࡓࡉࡕ ࡁࡊࡀࡓࡎࡇ ࡀࡊࡅࡀࡕ ࡖࡃࡀࡉࡓࡉࡀ ࡉࡀࡍࡒࡉࡀ ࡊࡅࡋࡄࡅࡍ ࡅࡀࡌࡀࡓ ࡋࡀࡄࡀࡊࡉࡌࡕࡀ ࡀࡅࡃࡉࡋࡕࡀࡍ ࡁࡉࡀࡄࡅࡃ ࡅࡋࡀࡔࡅࡓࡀ ࡐࡎࡀࡒࡅࡋࡉࡀ ࡁࡏࡅࡓࡀࡔࡋࡀࡌ ࡋࡀࡑࡅࡓࡕࡀ ࡑࡀࡓࡅࡋࡉࡀ ࡖࡊࡀࡃࡁࡀ ࡅࡋࡀࡆࡀࡍࡂࡀ ࡕࡋࡅࡋࡉࡀ ࡖࡏࡅࡋࡀ ࡀࡍࡀ ࡌࡍ ࡏࡍࡉࡔࡁࡀࡉ ࡄࡅࡉࡕ ࡁࡏࡅࡓࡀࡔࡋࡀࡌ ࡌࡀࡕࡀ ࡍࡀࡉࡃࡀ ࡏࡅࡓࡀࡔࡋࡀࡌ ࡌࡀࡕࡀ ࡖࡔࡅࡓࡀ ࡖࡊࡀࡄࡍࡉࡀ ࡌࡉࡆࡃࡀࡓࡀࡍࡁࡉࡀ ࡏࡋࡉࡆࡀࡓ ࡁࡀࡉࡕࡀ ࡓࡁࡀ ࡒࡀࡉࡉࡌ ࡅࡍࡀࡉࡃࡀ ࡒࡅࡌࡕࡇ ࡏࡕࡊࡀࡍࡀࡐ ࡉࡀࡄࡅࡈࡀࡉࡉࡀ ࡅࡋࡅࡀࡕ ࡀࡁࡀ ࡎࡀࡁࡀ ࡆࡀࡊࡓࡉࡀ ࡌࡉࡕࡉࡀࡉࡅࡍ ࡅࡀࡌࡓࡉࡋࡇ ࡄࡀࡉ ࡀࡁࡀ ࡎࡀࡁࡀ ࡆࡀࡊࡓࡉࡀ ࡎࡍࡉࡒࡋࡀࡊ ࡖࡄࡀࡅࡉࡋࡀࡊ ࡁࡓࡀ ࡀࡌࡀࡓࡋࡀࡍ ࡌࡀࡄࡅ ࡍࡀࡎࡉࡒࡋࡇ ࡔࡅࡌࡀ ࡏࡅ ࡍࡀࡎࡉࡒࡋࡇ ࡉࡀࡒࡉࡐ ࡖࡄࡉࡊࡅࡌࡕࡀ ࡖࡍࡀࡋࡉࡐ ࡎࡉࡐࡓࡀ ࡁࡏࡅࡓࡀࡔࡋࡀࡌ ࡏࡅ ࡍࡀࡎࡉࡒࡋࡇ ࡔࡅࡌࡀ ࡆࡀࡕࡀࡍ ࡏࡑࡈࡅࡍࡀ ࡖࡉࡀࡄࡅࡈࡀࡉࡉࡀ ࡁࡂࡀࡅࡇ ࡉࡀࡌࡉࡍ ࡅࡋࡀ ࡌࡊࡀࡃࡁࡉࡀ ࡏࡍࡉࡔࡁࡀࡉ ࡌࡉࡔࡌࡀ ࡖࡔࡉࡌࡀࡕ ࡌࡀࡋࡀࡋࡀࡕ ࡁࡌࡀࡋࡀࡋࡇ ࡅࡒࡉࡄࡃࡀࡕ ࡅࡀࡌࡓࡀ ࡌࡍ ࡄࡀࡋࡉࡍ ࡊࡅࡋࡄࡅࡍ ࡔࡅࡌࡉࡀ ࡖࡀࡍࡀࡕࡅࡍ ࡀࡌࡓࡉࡕࡅࡍ ࡀࡍࡀ ࡋࡀࡁࡀࡉࡀࡍࡀ ࡌࡀࡎࡉࡒࡋࡇ ࡔࡅࡌࡀ ࡄࡃࡀ ࡄࡉࡍࡏࡋࡀ ࡁࡀࡉࡀࡍࡀ ࡌࡀࡎࡉࡒࡋࡇ ࡔࡅࡌࡀ ࡉࡀࡄࡉࡀ ࡉࡅࡄࡀࡍࡀ ࡖࡄࡉࡍࡅࡍ ࡄࡉࡉࡀ ࡏࡄࡀࡁࡋࡇ ࡉࡀࡄࡅࡈࡀࡉࡉࡀ ࡅ ࡌࡉࡔࡌࡀ ࡖࡔࡉࡌࡅࡍ ࡁࡆࡉࡃࡀ ࡁࡉࡔࡀ ࡏࡕࡉࡌࡋࡅࡍ ࡏࡋࡇ ࡀࡌࡓࡉࡀ ࡌࡀࡄࡅ ࡆࡀࡅࡍࡀ ࡍࡉࡁࡀࡃ ࡋࡄࡀࡃ ࡅࡋࡏࡌࡇ ࡖࡋࡏࡃࡀࡍ ࡃࡉࡋࡀࡍ ࡌࡉࡂࡈࡉࡋ ࡀࡍࡅࡔ ࡏࡅࡕࡓࡀ ࡌࡉࡔࡌࡀ ࡖࡔࡅࡌࡀ ࡍࡉࡎࡁࡇ ࡅࡋࡐࡀࡓࡅࡀࡍ ࡈࡅࡓࡀ ࡄࡉࡅࡀࡓࡀ ࡀࡎࡒࡇ ࡁࡐࡀࡓࡅࡀࡍ ࡈࡅࡓࡀ ࡖࡉࡀࡍࡒࡉࡀ ࡅࡃࡉࡓࡃࡒࡉࡀ ࡁࡌࡀࡌࡁࡅࡄࡇ ࡌࡉࡕࡓࡀࡁࡉࡍ ࡀࡋࡌࡀ ࡖࡄࡅࡉࡕ ࡁࡓ ࡎࡓࡉࡍ ࡅࡕࡀࡓࡕࡉࡍ ࡔࡍࡉࡀ ࡉࡀࡋࡀࡐࡕࡇ ࡋࡊࡅࡋࡇ ࡄࡉࡊࡅࡌࡕࡀࡉ ࡅࡂࡀࡌࡀࡓࡕࡇ ࡋࡊࡅࡋࡇ ࡌࡉࡌࡓࡀࡉ ࡀࡋࡁࡔࡅࡍ ࡏࡅࡑࡈࡋࡉࡀ ࡖࡆࡉࡅࡀ ࡅࡊࡎࡅࡉࡉࡀ ࡖࡀࡍࡀࡍࡉࡀ ࡊࡀࡎࡉࡅࡍ ࡀࡎࡀࡓࡅࡋࡉࡀ ࡄࡉࡌࡉࡀࡍࡀ ࡄࡉࡌࡉࡀࡍ ࡌࡉࡀ ࡖࡍࡀࡄࡅࡓ ࡅࡕࡀࡒࡅࡍ ࡌࡍ ࡓࡉࡔ ࡁࡓࡉࡔ ࡀࡅࡕࡁࡅࡍ ࡁࡀࡍࡀࡍࡀ ࡀࡍࡀࡍ ࡆࡉࡅࡀ ࡅࡁࡔࡀࡁࡀ ࡔࡀࡉࡉࡀ ࡖࡄࡀࡁࡔࡀࡁࡀ ࡀࡎࡒࡅࡍ ࡋࡌࡀࡕࡀ ࡖࡏࡅࡓࡀࡔࡋࡀࡌ ࡒࡀࡋࡀ ࡒࡓࡀࡁࡇ ࡁࡉࡀࡄࡅࡃ ࡊࡀࡋࡅࡆࡀ ࡒࡓࡀࡁࡇ ࡁࡏࡅࡓࡀࡔࡋࡀࡌ ࡅࡀࡌࡓࡉࡀ ࡌࡀࡍ ࡄࡅࡀࡋࡇ ࡁࡓࡀ ࡅࡁࡍࡉࡁ ࡅࡌࡀࡍ ࡍࡉࡃࡓࡀࡕ ࡍࡉࡃࡓࡉࡀ ࡅࡔࡀࡋࡀࡌ ࡏࡋࡇ ࡌࡀࡍ ࡄࡅࡀࡋࡇ ࡁࡓࡀ ࡅࡂࡍࡉࡁ ࡄࡀࡍࡀࡕࡇ ࡕࡉࡕࡉࡀ ࡅࡕࡉࡁࡀࡔࡒࡓࡇ ࡁࡓࡇ ࡋࡁࡀࡕࡀࡉ ࡌࡀࡍ ࡀࡌࡀࡓࡋࡇ ࡋࡁࡀࡕࡀࡉ ࡌࡀࡍ ࡀࡐࡓࡉࡔࡇ ࡋࡁࡀࡕࡀࡉ ࡌࡀࡍ ࡀࡌࡀࡓࡋࡇ ࡖࡕࡉࡆࡀࡋ ࡋࡏࡍࡉࡔࡁࡀࡉ ࡀࡌࡓࡀ ࡀࡌࡓࡀࡋࡇ ࡉࡀࡋࡃࡀ ࡀࡕࡀࡋࡇ ࡋࡉࡀࡄࡅࡃ ࡍࡁࡉࡄࡀ ࡀࡕࡀࡋࡇ ࡋࡏࡅࡓࡀࡔࡋࡀࡌ ࡉࡀࡋࡃࡀ ࡀࡕࡀࡋࡇ ࡋࡉࡀࡄࡅࡃ ࡀࡁࡉࡄࡃࡇ ࡒࡀࡉࡉࡌ ࡐࡀࡓࡅࡀࡍࡒࡀ ࡐࡅࡌࡇ ࡃࡀࡌࡉࡀ ࡋࡃࡉࡋࡉࡊ ࡅࡎࡐࡉࡄࡀࡕࡇ ࡋࡀࡁࡀ ࡎࡀࡁࡀ ࡆࡀࡊࡓࡉࡀ ࡀࡁࡅࡉࡀ ࡀࡉࡍࡇ ࡋࡃࡉࡋࡉࡊ ࡃࡀࡌࡉࡀࡍ ࡅࡂࡁࡉࡍࡇ ࡋࡀࡁࡀ ࡎࡀࡁࡀ ࡆࡀࡊࡓࡉࡀ ࡀࡁࡅࡉࡀ ࡍࡄࡉࡓࡇ ࡋࡃࡉࡋࡉࡊ ࡃࡀࡌࡉࡀ ࡅࡏࡃࡀࡄࡀࡕࡇ ࡋࡀࡁࡀ ࡎࡀࡁࡀ ࡆࡀࡊࡓࡉࡀ ࡀࡁࡅࡉࡀ ࡏࡍࡉࡔࡁࡀࡉ ࡌࡉࡔࡌࡀ ࡖࡔࡉࡌࡀࡕ ࡀࡃࡉࡍࡒࡉࡀ ࡊࡎࡅࡉࡀ ࡍࡉࡐࡒࡀࡕ ࡀࡁࡀ ࡎࡀࡁࡀ ࡆࡀࡊࡓࡉࡀ ࡌࡉࡄࡆࡉࡀ ࡖࡄࡉࡆࡉࡇ ࡊࡃࡀࡁࡋࡇ ࡏࡍࡂࡉࡓࡕࡀ ࡖࡔࡁࡅࡒࡉࡀ ࡔࡀࡌࡉࡔ ࡓࡈࡉࡍ ࡌࡍ ࡏࡔࡅࡌࡉࡀ ࡅࡎࡉࡓࡀ ࡌࡍ ࡀࡁࡉࡍࡉࡀ ࡊࡅࡊࡁࡉࡀ ࡔࡀࡌࡉࡔ ࡋࡐࡅࡌࡇ ࡐࡉࡄࡕࡇ ࡅࡋࡀࡁࡀ ࡎࡀࡁࡀ ࡆࡀࡊࡓࡉࡀ ࡖࡍࡉࡌࡀࡓࡋࡇ ࡁࡏࡅࡓࡀࡔࡋࡀࡌ ࡉࡀ ࡀࡁࡀ ࡎࡀࡁࡀ ࡆࡀࡊࡓࡉࡀ ࡌࡀࡓࡉࡁࡀ ࡓࡁࡀ ࡖࡒࡀࡔ ࡅࡀࡆࡀࡋ ࡈࡀࡌࡇ ࡗ ࡀࡓࡁࡀࡉࡀ ࡖࡔࡉࡁࡒࡇ ࡄࡉࡋࡒࡇ ࡉࡀࡋࡃࡀ ࡀࡕࡀࡋࡇ ࡋࡉࡀࡄࡅࡃ ࡍࡁࡉࡄࡀ ࡀࡕࡀࡋࡇ ࡋࡏࡅࡓࡀࡔࡋࡀࡌ ࡉࡀࡋࡃࡀ ࡀࡕࡀࡋࡇ ࡋࡉࡀࡄࡉࡀ ࡋࡏࡍࡉࡔࡁࡀࡉ ࡀࡋࡌࡀ ࡖࡔࡀࡁࡒࡀࡕࡋࡇ ࡉࡀࡋࡃࡀ ࡖࡄࡉࡆࡉࡇ ࡋࡄࡀࡉࡕࡀ ࡏࡔࡕࡓࡉࡀ ࡌࡍ ࡀࡍࡀࡍࡀ ࡍࡐࡀࡋ ࡏࡔࡕࡓࡉࡀ ࡍࡐࡀࡋ ࡌࡍ ࡀࡍࡀࡍࡀ ࡅࡏࡋ ࡐࡅࡌࡇ ࡖࡏࡍࡉࡔࡁࡀࡉ ࡍࡉࡔࡒࡇ ࡀࡍࡅࡔ ࡏࡅࡕࡓࡀ ࡌࡉࡄࡆࡉࡀ ࡖࡄࡉࡆࡉࡇ ࡌࡀࡋࡉࡋ ࡋࡉࡀࡄࡉࡀ ࡁࡊࡃࡀࡁࡀࡊ ࡅࡌࡀࡐࡓࡀࡔࡋࡀࡊ ࡋࡔࡀࡐࡕࡀࡊ ࡋࡌࡉࡍࡉࡔࡒࡇ ࡋࡄࡅࡃࡀࡉࡕࡀ ࡋࡐࡅࡌࡇ ࡌࡀࡋࡉࡋ ࡉࡀࡄࡉࡀ ࡅࡋࡀࡍࡅࡔ ࡏࡅࡕࡓࡀ ࡖࡍࡉࡌࡀࡓࡋࡇ ࡁࡏࡅࡓࡀࡔࡋࡀࡌ ࡀࡍࡀ ࡏࡕࡔࡀ ࡉࡀࡄࡓࡉࡀ ࡃࡀࡓࡉࡕ ࡁࡊࡀࡓࡎࡇ ࡀࡊࡅࡀࡕ ࡖࡃࡀࡉࡓࡉࡀ ࡉࡀࡍࡒࡉࡀ ࡊࡅࡋࡄࡅࡍ ࡋࡀࡊࡃࡅࡓ ࡏࡋࡇ ࡄࡀࡔࡕࡀ ࡏࡋࡀࡉ ࡋࡀࡊࡀࡃࡅࡓ ࡌࡉࡍࡉࡔࡒࡇ ࡋࡄࡅࡃࡀࡉࡕࡀ ࡋࡐࡅࡌࡇ ࡄࡉࡍࡏࡋࡀ ࡈࡅࡁࡇ ࡅࡕࡅࡌ ࡈࡅࡁࡇ ࡋࡂࡀࡁࡓࡀ ࡖࡀࡁࡅࡉࡀ ࡅࡏࡌࡇ ࡐࡀࡓࡀ ࡂࡀࡁࡓࡀ ࡖ ࡐࡀࡓࡀ ࡀࡁࡅࡉࡀ ࡅࡏࡌࡇ ࡋࡀࡉࡉࡕ ࡀࡊࡅࡀࡕࡇ ࡁࡀࡋࡌࡀ ࡗ ࡄࡀࡆࡉࡍ ࡀࡌࡀࡓ ࡉࡀࡄࡉࡀ ࡏࡃࡀ ࡀࡍࡅࡔ ࡏࡅࡕࡓࡀ ࡖࡉࡀࡄࡉࡀ ࡄࡀࡊࡉࡌ ࡄࡅ ࡌࡀࡋࡉࡋ ࡀࡍࡅࡔ ࡏࡅࡕࡓࡀ ࡅࡋࡔࡀࡌࡉࡔ ࡖࡍࡉࡌࡀࡓࡋࡇ ࡁࡏࡅࡓࡀࡔࡋࡀࡌ ࡏࡆࡃࡀࡄࡓࡅࡋࡉࡀ ࡁࡉࡀࡋࡃࡀ ࡂࡀࡁࡓࡀ ࡖࡌࡀࡋࡊࡀ ࡔࡀࡃࡓࡇ ࡏࡆࡃࡀࡄࡓࡅࡋࡉࡀ ࡁࡉࡀࡋࡃࡀ ࡀࡋࡌࡀ ࡖࡁࡀࡉࡉࡍࡀࡋࡇ ࡀࡍࡉࡍ ࡌࡀࡋࡉࡋ ࡀࡍࡅࡔ ࡏࡅࡕࡓࡀ ࡅࡋࡎࡉࡓࡀ ࡖࡍࡉࡌࡀࡓࡋࡇ ࡁࡏࡅࡓࡀࡔࡋࡀࡌ ࡏࡆࡃࡀࡄࡓࡅࡋࡉࡀ ࡁࡉࡀࡋࡃࡀ ࡂࡀࡁࡓࡀ ࡖࡌࡀࡋࡊࡀ ࡔࡀࡃࡓࡇ ࡏࡆࡃࡀࡄࡓࡅࡋࡉࡀ ࡁࡉࡀࡋࡃࡀ ࡀࡋࡌࡀ ࡖࡁࡀࡉࡉࡍࡀࡋࡇ ࡀࡍࡉࡍ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡉࡅࡄࡀࡍࡀ ࡁࡓࡀࡌࡔࡉࡀ ࡖࡋࡉࡋࡉࡀ ࡉࡀࡄࡉࡀ ࡃࡀࡓࡉࡔ ࡁࡋࡉࡋࡅࡉࡀ ࡅࡀࡌࡀࡓ ࡖࡋࡀࡅ ࡁࡀࡋࡄࡅࡃࡀࡉ ࡀࡍࡀ ࡁࡒࡀࡋࡀࡉ ࡂࡀࡓࡂࡋࡉࡀ ࡍࡀࡉࡃࡉࡀ ࡅࡌࡀࡓࡊࡀࡁࡀࡕࡀ ࡌࡉࡎࡕࡀࡄࡐࡀࡍ ࡆࡉࡒࡀ ࡋࡂࡀࡈ ࡔࡉࡃࡒࡀ ࡅࡏࡕࡉࡁ ࡁࡑࡀࡃࡉࡀ ࡀࡋࡌࡀ ࡔࡀࡌࡉࡔ ࡅࡎࡉࡓࡀ ࡁࡀࡊࡉࡍ ࡀࡓࡒࡀ ࡅࡏࡔࡅࡌࡉࡀ ࡌࡉࡕࡍࡀࡌࡁࡉࡀ ࡌࡔࡉࡄࡀ ࡋࡐࡅࡌࡇ ࡐࡉࡄࡕࡇ ࡅࡋࡇ ࡋࡉࡀࡄࡉࡀ ࡖࡍࡉࡌࡀࡓࡋࡇ ࡁࡏࡅࡓࡀࡔࡋࡀࡌ ࡔࡀࡋࡉࡕࡀࡊ ࡉࡀࡄࡉࡀ ࡁࡄࡉࡉࡀ ࡓࡁࡉࡀ ࡅࡁࡄࡀࡁࡔࡀࡁࡀ ࡖࡉࡀࡒࡉࡓ ࡔࡅࡌࡇ ࡔࡀࡋࡉࡕࡀࡊ ࡉࡀࡄࡉࡀ ࡁࡏࡅࡄࡓࡀ ࡖࡀࡆࡋࡉࡁࡇ ࡁࡄࡉࡓࡉࡀ ࡆࡉࡃࡒࡀ ࡅࡋࡀࡌࡉࡎࡕࡀࡊࡓࡉࡀ ࡀࡌࡀࡓࡋࡉࡀ ࡎࡉࡊࡉࡍࡀ ࡖࡑࡀࡅࡓࡏࡉࡋ ࡃࡌࡅࡕࡇ ࡋࡌࡀࡄࡅ ࡃࡀࡌࡉࡀ ࡗ ࡍࡀࡐࡒࡀ ࡍࡉࡔࡉࡌࡕࡀ ࡌࡍ ࡐࡀࡂࡓࡀ ࡀࡌࡀࡓࡋࡉࡀ ࡁࡌࡀࡄࡅ ࡌࡉࡕࡋࡀࡁࡔࡀ ࡅࡏࡋ ࡌࡀࡄࡅ ࡃࡀࡌࡉࡀ ࡁࡂࡀࡅࡇ ࡖࡐࡀࡂࡓࡀ ࡁࡀࡈࡋࡀ ࡏࡃࡉࡋࡌࡀ ࡋࡃࡌࡀ ࡃࡀࡌࡉࡀ ࡍࡉࡔࡉࡌࡕࡀ ࡖࡄࡀࡉࡌࡀ ࡀࡁࡐࡀࡂࡓࡀ ࡅࡌࡉࡎࡕࡀࡊࡓࡀ ࡏࡃࡉࡋࡌࡀ ࡋࡆࡉࡒࡀ ࡃࡀࡌࡉࡀ ࡍࡉࡔࡉࡌࡕࡀ ࡖࡍࡀࡐࡒࡀ ࡁࡈࡅࡓࡉࡀ ࡅࡀࡅࡃࡀ ࡅࡌࡉࡎࡕࡀࡊࡓࡀ ࡏࡃࡉࡋࡌࡀ ࡋࡈࡀࡋࡀ ࡃࡀࡌࡉࡀ ࡍࡉࡔࡉࡌࡕࡀ ࡖࡍࡀࡐࡋࡀ ࡀࡁࡐࡉࡓࡉࡀ ࡅࡀࡅࡃࡀ ࡗ ࡄࡀࡆࡀ ࡀࡌࡀࡓ ࡌࡔࡉࡄࡀ ࡉࡀࡄࡉࡀ ࡒࡃࡀ ࡁࡒࡉࡃࡉࡄࡕࡇ ࡅࡀࡕࡉࡀࡍ ࡃࡉࡌࡉࡇ ࡅࡋࡀࡔࡀࡋࡌࡀࡍ ࡅࡀࡌࡀࡓ ࡄࡀࡎࡋࡇ ࡋࡌࡀࡋࡊࡀ ࡓࡀࡌࡀ ࡖࡍࡄࡅࡓࡀ ࡖࡍࡉࡁࡉࡀ ࡌࡍࡀࡕࡀ ࡌࡍ ࡃࡅࡓࡃࡉࡀ ࡋࡀࡅ ࡋࡃࡌࡀ ࡃࡀࡌࡉࡀ ࡍࡉࡔࡉࡌࡕࡀ ࡖࡄࡀࡉࡌࡀ ࡀࡁࡐࡀࡂࡓࡀ ࡅࡌࡉࡎࡕࡀࡊࡓࡀ ࡋࡀࡅ ࡋࡈࡀࡋࡀ ࡃࡀࡌࡉࡀ ࡍࡉࡔࡉࡌࡕࡀ ࡖࡍࡀࡐࡋࡀ ࡁࡐࡉࡓࡉࡀ ࡅࡀࡅࡃࡀ ࡋࡀࡅ ࡋࡆࡉࡒࡀ ࡃࡀࡌࡉࡀ ࡍࡉࡔࡉࡌࡕࡀ ࡖࡍࡀࡐࡒࡀ ࡁࡈࡅࡓࡉࡀ ࡅࡌࡉࡔࡕࡀࡊࡓࡀ ࡌࡉࡐࡀ ࡏࡐࡉࡐࡀ ࡍࡉࡔࡉࡌࡕࡀ ࡅࡌࡀࡉࡋࡀ ࡀࡁࡐࡀࡂࡓࡀ ࡁࡀࡈࡋࡀ ࡗ ࡍࡉࡔࡉࡌࡕࡀ ࡌࡔࡀࡋࡌࡀ ࡁࡀࡋࡁࡅࡔࡀ ࡖࡆࡉࡅࡀ ࡎࡀࡋࡒࡀ ࡎࡉࡊࡉࡍࡀ ࡖࡑࡀࡅࡓࡏࡉࡋ ࡕࡋࡀࡕ ࡏࡔࡀࡕࡀ ࡄࡀࡅࡉࡀ ࡗ ࡌࡎࡀࡓࡄࡉࡁ ࡏࡋࡇ ࡋࡌࡉࡃࡉࡁࡓࡇ ࡕࡋࡀࡕ ࡏࡔࡀࡕࡉࡀ ࡔࡀࡁࡉࡒ ࡏࡋࡇ ࡄࡃࡀ ࡔࡀࡁࡉࡒ ࡏࡋࡇ ࡌࡍ ࡐࡀࡉࡍࡀ ࡄࡅࡓࡉࡍࡕࡉࡀ ࡌࡉࡒࡓࡉࡀ ࡕࡀࡓࡍࡀࡅࡋࡀ ࡏࡔࡀࡕࡀ ࡕࡋࡉࡕࡀࡉࡕࡀ ࡌࡉࡐࡀࡒ ࡃࡓࡀࡁࡔࡉࡀ ࡔࡀࡁࡉࡒ ࡏࡋࡇ ࡗ ࡓࡀࡂࡆࡀ ࡏࡔࡀࡕࡀ ࡍࡉࡔࡉࡌࡕࡀ ࡌࡍ ࡋࡉࡂࡓࡉࡀ ࡅࡁࡅࡓࡊࡉࡀ ࡔࡀࡄࡋࡀ ࡔࡀࡄࡋࡀ ࡌࡍ ࡋࡉࡂࡓࡉࡀ ࡅࡁࡅࡓࡊࡉࡀ ࡅࡀࡕࡉࡀ ࡋࡄࡀࡋࡑࡀ ࡒࡀࡓࡁࡀ ࡔࡀࡄࡋࡀ ࡌࡍ ࡄࡀࡋࡑࡀ ࡅࡀࡕࡉࡀ ࡁࡋࡉࡁࡀ ࡋࡀࡂࡈࡀ ࡄࡀࡉࡆࡀࡊ ࡁࡄࡀࡃࡉࡀ ࡍࡀࡐࡋࡀ ࡊࡀࡁࡔࡀ ࡅࡋࡌࡀࡓࡇ ࡌࡉࡕࡂࡀࡌࡀࡋ ࡀࡉࡍࡇ ࡅࡐࡀࡓࡑࡅࡐࡇ ࡅࡎࡐࡉࡄࡀࡕࡇ ࡂࡀࡍࡑࡀ ࡍࡀࡎࡁࡀ ࡅࡌࡉࡊࡀࡓࡊࡀࡎ ࡋࡉࡔࡀࡍࡇ ࡑࡀࡅࡓࡏࡉࡋ ࡏࡋ ࡂࡁࡉࡍࡇ ࡏࡕࡉࡁࡋࡇ ࡀࡌࡀࡓࡋࡇ ࡐࡅࡒ ࡉࡀ ࡍࡉࡔࡉࡌࡕࡀ ࡋࡌࡀࡄࡅ ࡋࡐࡀࡂࡓࡀ ࡍࡀࡈࡓࡀࡕࡋࡇ ࡀࡌࡓࡀࡋࡇ ࡌࡍ ࡐࡀࡂࡓࡀࡉ ࡌࡀࡐࡒࡀࡕࡋࡉࡀ ࡑࡀࡅࡓࡏࡉࡋ ࡀࡄࡅࡉࡀࡍ ࡋࡁࡅࡔࡀࡉ ࡋࡁࡅࡔࡀࡉ ࡅࡀࡐࡒࡀࡍ ࡅࡀࡕࡉࡀࡍ ࡀࡌࡀࡓࡋࡇ ࡀࡉࡕࡀࡉ ࡏࡅࡁࡀࡃࡉࡊ ࡅࡀࡂࡓࡉࡊ ࡖࡏࡄࡀࡅࡉࡉࡊ ࡋࡁࡅࡔࡉࡊ ࡏࡉࡀࡋࡁࡔࡉࡊ ࡀࡌࡓࡀࡋࡇ ࡋࡀࡏࡃࡉࡕ ࡑࡀࡅࡓࡏࡉࡋ ࡖࡌࡀࡈࡉࡀ ࡆࡉࡁࡍࡀࡉ ࡅࡋࡉࡂࡀࡋ ࡌࡔࡀࡃࡓࡉࡀ ࡏࡋࡀࡉ ࡖࡀࡁࡃࡀࡍࡀ ࡏࡅࡁࡀࡃࡉࡀ ࡔࡀࡐࡉࡓࡉࡀ ࡖ ࡌࡀࡕࡉࡀࡕࡋࡉࡀ ࡋࡁࡅࡔࡀࡉ ࡅࡌࡀࡋࡁࡉࡔࡀࡕࡋࡉࡀ ࡀࡌࡀࡓࡋࡇ ࡋࡉࡊࡀ ࡖࡌࡉࡕ ࡀࡒࡀࡌࡉࡊ ࡅࡋࡉࡊࡀ ࡖࡀࡌࡈࡅࡉࡀ ࡋࡁࡉࡕ ࡒࡅࡁࡓࡉࡀ ࡀࡌࡓࡀࡋࡇ ࡁࡄࡀࡉࡋࡀ ࡖࡌࡉࡕ ࡀࡒࡀࡌࡉࡊ ࡅࡁࡄࡀࡉࡋࡀ ࡖࡀࡌࡈࡅࡉࡀ ࡋࡁࡉࡕ ࡒࡅࡁࡓࡉࡀ ࡍࡀࡃ ࡖࡁࡀࡊࡉࡀࡍ ࡅࡍࡀࡃ ࡖࡀࡋࡉࡍ ࡊࡌࡀ ࡖ ࡐࡀࡂࡓࡀ ࡒࡅࡃࡀࡌࡀࡉࡄࡅࡍ ࡔࡃࡉࡀ ࡗ ࡍࡀࡐࡒࡀ ࡍࡉࡔࡉࡌࡕࡀ ࡌࡍ ࡐࡀࡂࡓࡀ ࡀࡓࡁࡀ ࡀࡆࡋࡉࡍ ࡋࡁࡉࡕ ࡒࡅࡁࡓࡉࡀ ࡍࡀࡃ ࡖࡁࡀࡊࡉࡀࡍ ࡅࡍࡀࡃ ࡖࡀࡋࡉࡍ ࡅࡍࡀࡃ ࡖࡒࡀࡄࡃࡉࡍ ࡀࡋࡌࡀ ࡖࡁࡀࡁࡉࡓࡀ ࡀࡕࡍࡅࡉࡀ ࡀࡕࡍࡅࡉࡀ ࡅࡈࡀࡌࡅࡉࡀ ࡋࡐࡀࡂࡓࡀ ࡁࡀࡈࡋࡀ ࡏࡍࡔࡉࡀ ࡌࡍ ࡍࡀࡌࡁࡀࡉࡀࡕࡀ ࡍࡄࡀ ࡈࡀࡌࡅࡉࡀ ࡋࡁࡉࡓࡀ ࡅࡎࡋࡉࡒࡉࡅࡍ ࡂࡅࡁࡓࡉࡀ ࡌࡉࡕࡋࡉࡀ ࡌࡉࡕࡋࡉࡀ ࡔࡀࡌࡀࡓ ࡔࡉࡁࡒࡅࡉࡀ ࡋࡐࡀࡂࡓࡀ ࡅࡋࡒࡀࡁࡓࡀ ࡅࡀࡕࡅࡍ ࡊࡀࡎࡀ ࡋࡂࡀࡈ ࡅࡀࡊࡀࡋ ࡋࡄࡀࡌࡀ ࡅࡏࡍࡉࡔࡉࡅࡉࡀ ࡋࡐࡀࡂࡓࡀ ࡁࡀࡈࡋࡀ ࡄࡀࡔࡕࡀ ࡏࡅ ࡁࡀࡉࡉࡕ ࡑࡀࡅࡓࡏࡉࡋ ࡀࡍࡈࡀࡓࡋࡉࡀ ࡄࡀࡊࡀ ࡉࡅࡌࡉࡀ ࡕࡓࡉࡍ ࡏࡆࡀࡁࡀࡍ ࡊࡅࡋ ࡖࡏࡕࡋࡉࡀ ࡅࡏࡐࡀࡋࡉࡂ ࡏࡐࡋࡅࡂࡕࡀ ࡁࡉࡍࡉࡀ ࡁࡍࡀࡉ ࡅࡏࡃࡓࡀ ࡋࡁࡅࡔࡀࡉ ࡀࡁࡉࡄࡃࡀࡉ ࡏࡑࡈࡋࡀ ࡖࡎࡀࡋࡉࡒ ࡋࡀࡕࡀࡓ ࡍࡄࡅࡓ ࡀࡌࡀࡓࡋࡇ ࡌࡏ ࡏࡊࡀ ࡉࡀࡋࡃࡀ ࡖࡍࡐࡀࡒ ࡌࡍ ࡊࡓࡀࡎ ࡏࡌࡇ ࡅࡏࡕࡊࡀࡌࡀࡓ ࡁࡏࡌࡇ ࡀࡉࡋࡅࡉࡀ ࡖࡀࡍࡀ ࡏࡔࡉࡁࡒࡀࡊ ࡁࡃࡅࡓ ࡁࡉࡔࡉࡀ ࡖࡐࡀࡋࡂࡉࡕ ࡐࡋࡅࡂࡕࡀ ࡁࡉࡍࡉࡀ ࡁࡍࡀࡊ ࡀࡍࡀ ࡏࡉࡀࡐࡒࡀࡊ ࡌࡍ ࡄࡀࡊࡀ ࡅࡋࡁࡅࡔࡀ ࡖ ࡄࡔࡅࡊࡀ ࡋࡁࡅࡔ ࡖ ࡋࡀࡏࡆࡃࡀࡄࡀࡓࡕ ࡁࡂࡅ ࡕࡉࡁࡉࡋ ࡅࡋࡀࡓࡄࡀࡌࡕ ࡋࡏࡅࡄࡓࡀࡊ ࡋࡀࡕࡀࡓ ࡍࡄࡅࡓ ࡕࡉࡕࡍࡀࡈࡀࡓ ࡁࡉࡕ ࡁࡉࡔࡉࡀ ࡀࡋࡌࡀ ࡖ ࡁࡀࡈࡋࡀ ࡏࡔࡅࡌࡉࡀ ࡅࡀࡓࡒࡀ ࡅࡌࡔࡀࡁࡉࡍ ࡄࡉࡉࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡌࡉࡓࡉࡀࡉ ࡀࡍࡀ ࡐࡕ ࡌࡀࡋࡊࡉࡀ ࡖࡁࡀࡁࡉࡋ ࡐࡕ ࡔࡀࡋࡉࡈࡉࡀ ࡓࡅࡓࡁࡉࡀ ࡖࡏࡅࡓࡀࡔࡋࡀࡌ ࡉࡀࡃࡋࡅࡍ ࡉࡀࡄࡅࡈࡀࡉࡉࡀ ࡅࡓࡀࡁࡉࡅࡍ ࡂࡅࡁࡓࡉࡀ ࡊࡀࡄࡍࡉࡀ ࡃࡉࡓࡅࡍ ࡁࡔࡉࡐࡅࡋࡅࡍ ࡅࡀࡎࡒࡅࡍ ࡋࡁࡀࡉࡕࡀ ࡍࡎࡉࡎࡀ ࡋࡁࡉࡕ ࡌࡒࡀࡃࡔࡉࡀ ࡀࡃࡅࡍࡀࡉ ࡏࡄࡀࡁࡋࡉࡀ ࡏࡋ ࡏࡃࡀࡉ ࡅࡏࡋ ࡀࡕࡓࡉࡍ ࡀࡃࡓࡀࡉࡉࡀ ࡎࡉࡁࡋࡀ ࡊࡀࡍࡔࡀࡍࡀ ࡅࡆࡀࡄࡋࡀࡍࡀ ࡁࡀࡉࡕࡀ ࡖࡔࡓࡀࡓࡀ ࡋࡉࡕࡁࡇ ࡋࡉࡕࡁࡇ ࡋࡌࡉࡎࡌࡀࡊ ࡀࡍࡉࡉࡀ ࡅࡋࡉࡕࡁࡇ ࡋࡈࡀࡉࡅࡁࡉࡀ ࡍࡉࡔࡌࡀࡕࡀ ࡖࡌࡎࡀࡍࡒࡀ ࡀࡁ ࡀࡆࡀࡋ ࡋࡁࡉࡕ ࡀࡌࡀ ࡅࡏࡌ ࡀࡆࡋࡀࡕ ࡋࡁࡉࡕ ࡌࡒࡀࡃࡔࡉࡀ ࡀࡁ ࡀࡆࡀࡋ ࡅࡀࡌࡀࡓࡋࡉࡀ ࡅࡏࡌ ࡀࡆࡋࡀࡕ ࡅࡌࡐࡀࡒࡃࡀࡋࡉࡀ ࡌࡉࡓࡉࡀࡉ ࡀࡄࡅࡃ ࡁࡀࡁࡉࡊ ࡂࡀࡅࡀࡉࡉࡀ ࡅࡔࡓࡀࡉࡁࡅࡍ ࡀࡁࡀࡓࡉࡀ ࡄࡅࡆࡀࡉ ࡍࡀࡐࡒࡉࡕ ࡋࡔࡅࡒࡉࡀ ࡌࡀࡋࡊࡀ ࡅࡔࡀࡌࡔࡉࡀ ࡖࡌࡀࡓࡀࡉ ࡕࡉࡐࡉࡋ ࡏࡋࡉࡊ ࡀࡍࡀ ࡕࡉࡓࡉࡀࡉ ࡋࡀࡈࡀࡌࡓࡀࡕࡋࡉࡀ ࡏࡌ ࡔࡉࡌࡉࡕ ࡅࡋࡀࡃࡐࡀࡒࡃࡀࡍ ࡀࡁ ࡋࡏࡅࡃࡍࡀࡉ ࡑࡀࡕࡉࡕ ࡀࡍࡀ ࡁࡀࡁࡉࡀ ࡂࡀࡅࡀࡉࡉࡀ ࡐࡉࡄࡕࡉࡕ ࡅࡁࡀࡓࡀࡉࡉࡀ ࡔࡉࡁࡒࡉࡕ ࡔࡓࡉࡕ ࡍࡉࡐࡒࡉࡕ ࡋࡔࡅࡒࡉࡀ ࡌࡀࡋࡊࡀ ࡅࡔࡀࡌࡔࡉࡀ ࡖࡌࡀࡓࡀࡉ ࡍࡉࡐࡋࡀࡕ ࡏࡋࡀࡉ ࡀࡍࡀ ࡁࡉࡕ ࡌࡉࡆࡀࡋ ࡋࡁࡉࡕ ࡀࡌࡀ ࡃࡓࡀࡕࡀࡍ ࡏࡅࡄࡓࡀࡉ ࡋࡁࡉࡕ ࡌࡀࡔࡊࡍࡀ ࡏࡆࡋࡉࡕ ࡅࡀࡔࡊࡉࡕࡉࡍࡅࡍ ࡋࡀࡄࡀࡉ ࡅࡋࡀࡄࡅࡀࡕࡀࡉ ࡗ ࡌࡉࡒࡀࡌ ࡒࡀࡉࡌࡉࡀ ࡅࡃࡓࡀࡔࡉࡀ ࡃࡀࡓࡔࡉࡀ ࡀࡄࡀࡉ ࡃࡀࡓࡔࡉࡀ ࡃࡓࡀࡔࡉࡀ ࡅࡀࡄࡅࡀࡕࡀࡉ ࡏࡍࡉࡀࡍࡉࡀ ࡓࡀࡌࡉࡀࡍ ࡌࡍ ࡒࡀࡋࡀ ࡖࡃࡓࡀࡔࡀࡉࡅࡍ ࡅࡌࡍ ࡒࡀࡋࡀ ࡖ ࡏࡍࡉࡀࡍࡅࡍ ࡍࡉࡌࡉࡕ ࡅࡔࡉࡊࡁࡉࡕ ࡏࡋ ࡃࡅࡊࡕࡀࡉ ࡀࡄࡀࡉ ࡀࡆࡀࡋ ࡅࡋࡀࡕࡓࡅࡍ ࡅࡀࡄࡅࡀࡕࡀࡉ ࡀࡆࡀࡋࡉࡅࡍ ࡅࡋࡀࡓࡀࡍࡃࡉࡃࡅࡍ ࡀࡍࡀࡕ ࡀࡄࡀࡕ ࡖࡊࡅࡔࡈࡀ ࡌࡍ ࡔࡉࡍࡕࡀࡉ ࡕࡉࡓࡀࡍࡃࡉࡃࡀࡍ ࡅࡀࡌࡓࡀ ࡒࡅࡌࡋࡉࡊ ࡒࡅࡌࡋࡉࡊ ࡌࡉࡓࡉࡀࡉ ࡌࡀࡒࡀࡌࡉࡀ ࡖ ࡍࡀࡄࡂࡀ ࡍࡉࡄࡂࡀ ࡅࡌࡄࡀࡓࡉࡐ ࡒࡀࡓࡉࡀ ࡕࡀࡓࡍࡀࡅࡋࡀ ࡌࡍ ࡒࡅࡃࡀࡌ ࡖࡆࡀࡓࡅࡒ ࡔࡀࡌࡉࡔ ࡅࡆࡉࡅࡇ ࡃࡀࡑࡀ ࡏࡋ ࡀࡋࡌࡉࡀ ࡌࡍ ࡒࡅࡃࡀࡌ ࡖࡍࡀࡐࡒࡉࡀ ࡊࡀࡄࡍࡉࡀ ࡅࡁࡍࡉࡀ ࡊࡀࡄࡍࡉࡀ ࡅࡁࡈࡅࡋࡇ ࡖࡄࡅࡓࡁࡀ ࡖࡏࡅࡓࡀࡔࡋࡀࡌ ࡉࡀࡕࡁࡉࡀ ࡌࡍ ࡒࡅࡃࡀࡌ ࡖࡀࡕࡉࡀ ࡀࡁࡅࡊ ࡖࡐࡀࡂࡓࡉࡀ ࡅࡔࡀࡃࡉࡁࡉࡊ ࡒࡀࡓࡒࡀࡋࡕࡀ ࡖࡋࡉࡕࡁࡉࡊ ࡀࡍࡀ ࡌࡉࡓࡉࡀࡉ ࡈࡀࡁࡌࡓࡀࡍࡉࡍ ࡋࡁࡀࡅࡀࡕࡀࡉ ࡅࡈࡀࡌࡓࡀࡍࡅࡍ ࡋࡏࡍࡉࡀࡍࡉࡀ ࡁࡔࡉࡓࡔࡀ ࡄࡀࡓࡉࡐ ࡍࡄࡀࡂࡋࡇ ࡍࡉࡄࡂࡀ ࡄࡀࡓࡉࡐ ࡒࡓࡀࡋࡇ ࡕࡀࡓࡍࡀࡅࡋࡀ ࡄࡀࡓࡉࡐ ࡆࡓࡅࡒࡋࡇ ࡔࡀࡌࡉࡔ ࡅࡆࡉࡅࡇ ࡃࡍࡀ ࡏࡋ ࡀࡋࡌࡉࡀ ࡍࡐࡀࡒࡉࡅࡍ ࡊࡀࡄࡍࡉࡀ ࡅࡁࡍࡉࡀ ࡊࡀࡄࡍࡉࡀ ࡅࡁࡈࡅࡋࡇ ࡖࡄࡅࡓࡁࡀ ࡖࡏࡅࡓࡀࡔࡋࡀࡌ ࡉࡀࡕࡁࡉࡀ ࡀࡕࡀࡋࡉࡀ ࡀࡁ ࡖࡐࡀࡂࡓࡉࡀ ࡅࡔࡃࡀࡁࡉࡀ ࡒࡀࡓࡒࡀࡋࡕࡀ ࡖࡋࡉࡕࡁࡉࡀ ࡅࡀࡌࡀࡓ ࡀࡌࡍࡀ ࡀࡕࡉࡕ ࡀࡓࡁࡀ ࡌࡆࡀࡍࡀࡉࡕࡀ ࡖࡋࡀࡌࡀࡒࡓࡉࡁࡇ ࡄࡀࡋࡔࡉࡀ ࡅࡀࡁࡀࡓࡉࡀ ࡌࡍࡀ ࡏࡕࡉࡕ ࡏࡋࡀࡉ ࡂࡅࡓࡉࡕࡀ ࡌࡔࡀࡄࡀࡍࡕࡀ ࡖࡋࡀࡌࡀࡒࡓࡉࡁࡇ ࡅࡎࡉࡊࡉࡀ ࡅࡎࡅࡂࡀࡓࡉࡀ ࡌࡍࡀ ࡀࡕࡉࡕ ࡀࡋࡀࡉ ࡀࡋࡀࡉ ࡏࡅࡌࡑࡀ ࡖࡎࡀࡒࡀ ࡖࡏࡒࡉࡀࡋࡉࡀ ࡏࡋ ࡕࡅࡕࡁࡀࡉ ࡏࡅ ࡀࡓࡁࡀ ࡀࡍࡀ ࡌࡆࡀࡍࡀࡉࡕࡀ ࡀࡒࡀࡓ ࡏࡒࡅࡓ ࡄࡀࡋࡔࡀࡊ ࡅࡀࡁࡀࡓࡀࡊ ࡏࡅ ࡂࡅࡓࡉࡊࡕࡀ ࡀࡍࡀ ࡌࡔࡀࡄࡀࡍࡕࡀ ࡎࡉࡊࡉࡀ ࡅࡎࡅࡂࡀࡓࡉࡀ ࡐࡎࡅࡒ ࡏࡅ ࡏࡌࡑࡀ ࡖࡎࡀࡒࡀ ࡀࡍࡀ ࡖࡏࡒࡉࡀࡋࡀࡊ ࡏࡋ ࡕࡅࡕࡁࡀࡊ ࡂࡅࡋࡀࡍ ࡅࡐࡅࡎࡒࡀࡍ ࡌࡍ ࡕࡅࡕࡁࡀࡊ ࡀࡌࡀࡓ ࡀࡕࡅ ࡄࡅࡆࡉࡅ ࡋࡌࡉࡓࡉࡀ ࡖࡔࡀࡌࡓࡀࡕ ࡉࡀࡄࡅࡃࡅࡕࡀ ࡅࡀࡆࡋࡀࡕ ࡌࡀࡓࡇ ࡓࡉࡄࡌࡀࡕ ࡀࡕࡅ ࡄࡅࡆࡉࡅ ࡋࡌࡉࡓࡉࡀࡉ ࡖࡔࡉࡁࡒࡀࡕ ࡑࡉࡁࡀ ࡅࡑࡉࡁࡅࡕࡀ ࡅࡀࡆࡋࡀࡕ ࡌࡀࡓࡇ ࡓࡉࡄࡌࡀࡕ ࡔࡀࡌࡓࡀࡕ ࡃࡀࡄࡁࡀ ࡅࡊࡀࡎࡐࡀ ࡅࡀࡆࡋࡀࡕ ࡌࡀࡓࡇ ࡓࡉࡄࡌࡀࡕ ࡔࡀࡌࡓࡀࡕ ࡋࡈࡅࡈࡉࡐࡕࡀ ࡅࡀࡆࡋࡀࡕ ࡓࡉࡄࡌࡀࡕ ࡂࡀࡁࡓࡀ ࡖࡁࡅࡓࡆࡉࡍࡒࡀ ࡀࡌࡓࡀࡋࡇ ࡌࡉࡓࡉࡀࡉ ࡄࡀࡎࡋࡀࡉ ࡖࡏࡎࡍࡉࡕ ࡅࡏࡓࡄࡅࡌ ࡄࡀࡎࡋࡀࡉ ࡖࡏࡎࡉࡍࡉࡉࡇ ࡏࡓࡉࡄࡌࡄ ࡋࡁࡀࡓ ࡄࡀࡎࡋࡀࡉ ࡖࡏࡑࡉࡍࡉࡉࡇ ࡋࡌࡀࡓࡀࡉ ࡌࡀࡍࡃࡀ ࡖࡄࡉࡉࡀ ࡖࡎࡉࡌࡀࡊࡀ ࡄࡀࡅࡉࡋࡉࡀ ࡁࡀࡋࡌࡀ ࡎࡉࡌࡀࡊࡀ ࡁࡀࡋࡌࡀ ࡄࡀࡅࡉࡋࡉࡀ ࡅࡀࡄࡉࡃ ࡏࡃࡀ ࡁࡀࡕࡀࡓ ࡍࡄࡅࡓ ࡀࡒࡀࡐࡓࡀ ࡋࡐࡅࡌ ࡉࡀࡄࡅࡈࡀࡉࡉࡀ ࡅࡂࡉࡈࡌࡀ ࡋࡐࡅࡌࡀࡉࡄࡅࡍ ࡖࡊࡅࡋࡄࡅࡍ ࡊࡀࡄࡍࡉࡀ ࡎࡀࡓࡒࡉࡍࡀ ࡖࡀࡕࡅࡕࡉࡀ ࡊࡓࡀࡉࡉࡀ ࡖࡓࡀࡊࡎࡉࡀ ࡋࡓࡀࡁ ࡔࡀࡋࡉࡈࡉࡀ ࡓࡅࡓࡁࡉࡀ ࡖࡏࡅࡓࡀࡔࡋࡀࡌ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡌࡉࡓࡉࡀࡉ ࡀࡍࡀ ࡂࡅࡐࡍࡀ ࡏࡋࡀࡍࡀ ࡖࡒࡀࡉࡉࡌ ࡏࡋ ࡐࡅࡌ ࡐࡓࡀࡔ ࡔࡀࡄࡐࡇ ࡖࡏࡋࡀࡍࡀ ࡄࡀࡋࡉࡀ ࡅࡈࡅࡍࡇ ࡖࡏࡋࡀࡍࡀ ࡌࡀࡓࡂࡍࡉࡀ ࡀࡅࡐࡇ ࡖࡂࡅࡐࡍࡀ ࡆࡉࡅࡀ ࡅࡀࡋࡅࡀࡕࡇ ࡍࡄࡅࡓࡀ ࡉࡀࡒࡓࡀ ࡓࡉࡄࡇ ࡃࡓࡀ ࡁࡏࡋࡀࡍࡉࡀ ࡅࡀࡆࡉࡋ ࡁࡊࡅࡋࡄࡅࡍ ࡀࡋࡌࡉࡀ ࡀࡓࡄࡅࡉࡀ ࡑࡉࡐࡓࡉࡀ ࡖࡀࡉࡀࡓ ࡎࡉࡓࡀ ࡁࡏࡋࡀࡍࡀ ࡏࡕࡉࡁ ࡎࡉࡓࡀ ࡏࡕࡉࡁ ࡁࡏࡋࡀࡍࡀ ࡖࡁࡀࡉࡉࡍ ࡍࡉࡒࡍࡅࡍ ࡒࡉࡍࡀࡉࡄࡅࡍ ࡄࡀࡉࡎࡉࡀ ࡁࡂࡀࡅࡇ ࡅࡋࡀࡊࡀࡉࡍࡏࡉࡀ ࡌࡍ ࡀࡅࡐࡇ ࡀࡊࡋࡉࡍ ࡆࡉࡓࡒࡀ ࡅࡌࡍ ࡂࡀࡅࡇ ࡔࡀࡕࡉࡍ ࡄࡀࡌࡓࡀ ࡀࡊࡋࡉࡀ ࡖࡋࡀ ࡄࡅࡀ ࡎࡀࡉࡈࡀ ࡅࡔࡀࡕࡉࡍ ࡖࡋࡀࡄࡅࡀ ࡄࡀࡌࡓࡀ ࡖࡉࡀࡕࡁࡉࡀ ࡑࡉࡐࡓࡉࡀ ࡁࡂࡅࡐࡍࡀ ࡆࡉࡒࡉࡀ ࡅࡕࡁࡉࡁࡉࡀ ࡀࡒࡀࡓ ࡓࡀࡍࡃࡉࡃࡅࡍࡅࡍ ࡏࡋ ࡑࡉࡐࡓࡉࡀ ࡈࡀࡁࡉࡀ ࡄࡁࡀࡈࡉࡅࡍ ࡁࡏࡋࡀࡍࡀ ࡄࡉࡁࡈࡀ ࡀࡍࡕࡉࡓࡅࡍࡅࡍ ࡋࡔࡀࡄࡐࡉࡀ ࡖࡂࡅࡐࡍࡀ ࡅࡀࡐࡓࡅࡍࡅࡍ ࡏࡋ ࡑࡉࡐࡓࡉࡀ ࡌࡍ ࡃࡅࡊࡕࡀࡉࡅࡍ ࡏࡊࡀ ࡑࡉࡐࡓࡀ ࡖࡋࡀࡐࡓࡀ ࡅࡀࡔࡀࡓ ࡁࡈࡅࡐࡓࡀ ࡅࡂࡀࡍࡐࡀ ࡅࡋࡂࡀࡈ ࡀࡋࡌࡀ ࡖࡆࡉࡒࡉࡀ ࡅࡕࡁࡉࡁࡉࡀ ࡄࡋࡉࡐࡉࡅࡍ ࡀࡊࡀ ࡖࡋࡀࡋࡂࡀࡈ ࡅࡋࡀࡔࡀࡓ ࡅࡀࡆࡀࡋ ࡖ ࡔࡀࡌࡔࡀ ࡄࡅࡍ ࡅࡀࡉࡋࡉࡍࡅࡍ ࡖࡋࡀࡋࡂࡀࡈ ࡅࡋࡀࡀࡔࡀࡓ ࡅࡌࡍ ࡏࡋࡀࡍࡀ ࡀࡈࡓࡀ ࡅࡐࡓࡀ ࡊࡌࡀ ࡔࡀࡐࡉࡓ ࡏࡋࡀࡍࡀ ࡄࡉࡉࡀ ࡅࡔࡀࡐࡉࡓࡉࡀ ࡑࡉࡐࡓࡉࡀ ࡖࡏࡕࡁࡇ ࡄࡋࡀࡐࡉࡅࡍ ࡆࡉࡒࡉࡀ ࡅࡕࡁࡉࡁࡉࡀ ࡅࡀࡕࡀࡕ ࡍࡉࡄࡅࡕࡀ ࡋࡀࡋࡌࡀ ࡀࡃࡉࡀࡕࡁࡉࡀ ࡑࡉࡐࡓࡉࡀ ࡅࡌࡓࡀࡈࡍࡉࡀ ࡅࡁࡀࡉࡉࡍ ࡖࡒࡉࡍࡀࡉࡅࡍ ࡍࡉࡒࡍࡅࡍ ࡏࡋ ࡖ ࡉࡀࡕࡁࡉࡀ ࡑࡉࡐࡓࡉࡀ ࡏࡋ ࡂࡅࡐࡍࡀ ࡄࡃࡀࡓ ࡅࡌࡉࡈࡉࡎ ࡍࡉࡔࡓࡀ ࡀࡕࡀ ࡄࡉࡅࡀࡓࡀ ࡅࡀࡃࡉࡒ ࡄࡆࡉࡍࡅࡍ ࡋࡑࡉࡐࡓࡉࡀ ࡄࡃࡀࡓ ࡅࡍࡐࡀࡑࡁࡅࡍ ࡁࡂࡀࡍࡐࡇ ࡅࡀࡕࡀ ࡁࡏࡋࡀࡍࡀ ࡏࡕࡉࡁ ࡑࡉࡐࡓࡉࡀ ࡌࡀࡋࡉࡋ ࡌࡉࡍࡇ ࡅࡀࡌࡓࡉࡋࡇ ࡁࡄࡀࡉࡀࡊ ࡍࡉࡔࡓࡀ ࡁࡄࡀࡆࡉࡍ ࡏࡋࡀࡍࡀ ࡄࡅࡀࡉࡍࡉࡍ ࡑࡉࡐࡓࡉࡀ ࡏࡊࡌࡀ ࡖ ࡎࡀࡊࡀ ࡋࡉࡕࡋࡅࡍ ࡀࡒࡀࡓ ࡏࡋࡀࡅࡀࡉࡄࡅࡍ ࡆࡉࡒࡉࡀ ࡅࡀࡕࡅࡍ ࡏࡋࡀࡍࡀ ࡕࡁࡉࡁࡉࡀ ࡌࡀࡓࡃࡉࡀ ࡓࡀࡍࡃࡉࡃࡅࡍࡅࡍ ࡌࡍ ࡏࡋࡀࡍࡀ ࡀࡋࡌࡀ ࡖࡂࡀࡍࡐࡀࡉࡄࡅࡍ ࡔࡌࡀࡈ ࡏࡊࡀ ࡖࡀࡔࡀࡓ ࡅࡋࡂࡀࡈ ࡆࡉࡒࡉࡀ ࡅࡕࡁࡉࡁࡉࡀ ࡋࡀࡒࡓࡅࡉࡀ ࡏࡊࡀ ࡖࡀࡈࡓࡀ ࡅࡐࡓࡀ ࡀࡍࡉࡍ ࡖࡍࡉࡌࡀࡓࡋࡀࡊ ࡍࡉࡔࡓࡀ ࡀࡍࡉࡍ ࡖࡍࡉࡔࡀࡉࡋࡀࡊ ࡏࡋ ࡑࡉࡐࡓࡉࡀ ࡀࡌࡉࡍࡈࡅࡋ ࡖࡀࡍࡀࡕ ࡎࡀࡉࡀࡓࡀ ࡖࡄࡀࡆࡉࡕ ࡁࡕࡉࡁࡉࡋ ࡁࡊࡅࡋ ࡑࡁࡅ ࡄࡀࡍࡀࡕࡅࡍ ࡑࡉࡐࡓࡉࡀ ࡀࡄࡀࡍ ࡌࡀࡄࡅ ࡖࡁࡀࡃࡅࡁࡅࡍ ࡆࡉࡒࡉࡀ ࡅࡕࡁࡉࡁࡉࡀ ࡌࡀࡄࡅ ࡃࡀࡓࡉࡕ ࡏࡋࡀࡅࡀࡉࡄࡅࡍ ࡀࡌࡀࡓࡋࡅࡍ ࡋࡀࡁࡀࡉࡉࡕࡅࡍ ࡋࡌࡉࡄࡆࡉࡀ ࡀࡄࡀࡉ ࡖࡌࡍ ࡄࡀࡍࡀࡕࡅࡍ ࡑࡉࡐࡓࡉࡀ ࡄࡅࡀ ࡀࡈࡓࡅࡍࡅࡍ ࡌࡉࡍࡀࡉ ࡂࡉࡋࡌࡅࡄࡓࡉࡀ ࡅࡕࡀࡁࡓࡅࡍࡅࡍ ࡋࡂࡀࡍࡐࡉࡀ ࡖࡏࡕࡋࡅࡍ ࡅࡏࡔࡕࡀࡌࡀࡈ ࡅࡏࡔࡕࡀࡁࡀࡓ ࡅࡀࡆࡀࡋ ࡑࡌࡀࡊ ࡏࡋ ࡊࡀࡋࡉࡀ ࡄࡃࡀࡓࡋࡅࡍ ࡃࡉࡕࡉࡀ ࡅࡁࡀࡔࡉࡒ ࡅࡎࡕࡀࡓࡉࡅࡍ ࡌࡍ ࡁࡉࡎࡓࡀࡉࡄࡅࡍ ࡅࡀࡊࡀࡋࡉࡅࡍ ࡌࡉࡍࡀࡉࡄࡅࡍ ࡖࡌࡔࡀࡌࡍࡉࡀ ࡅࡀࡉࡋࡉࡍࡅࡍ ࡖࡄࡅࡍ ࡌࡍࡀࡕ ࡌࡉࡀ ࡄࡉࡋࡀ ࡌࡍࡀࡕࡀ ࡋࡏࡃࡉࡀ ࡈࡅࡁࡀࡉࡊࡅࡍ ࡃࡉࡋࡊࡅࡍ ࡑࡉࡐࡓࡉࡀ ࡖࡀࡔࡀࡓࡕࡅࡍ ࡁࡄࡀࡆࡉࡍ ࡂࡅࡐࡍࡀ ࡑࡀࡅࡕࡀ ࡄࡅࡉࡕࡅࡋࡇ ࡋࡌࡉࡓࡉࡀࡉ ࡂࡅࡐࡍࡀ ࡖࡒࡀࡉࡉࡌ ࡏࡋ ࡐࡅࡌ ࡐࡓࡀࡔ ࡄࡆࡅࡍ ࡅࡁࡀࡔࡒࡀࡓ ࡑࡉࡐࡓࡉࡀ ࡖࡀࡍࡀ ࡀࡋࡅࡀࡕࡀࡉࡊࡅࡍ ࡀࡕࡉࡕ ࡀࡍࡀ ࡀࡕࡉࡕ ࡀࡋࡅࡀࡕ ࡀࡄࡀࡉ ࡖࡄࡀࡅࡉࡋࡉࡀ ࡁࡕࡉࡁࡉࡋ ࡎࡉࡌࡀࡊࡀ ࡀࡕࡉࡕ ࡋࡌࡉࡎࡉࡀ ࡋࡌࡉࡓࡉࡀࡉ ࡅࡌࡀࡔࡒࡅࡉࡀ ࡌࡉࡀ ࡋࡔࡉࡕࡋࡉࡀ ࡈࡀࡁࡉࡀ ࡅࡉࡀࡒࡉࡓࡉࡀ ࡂࡅࡐࡍࡀ ࡖࡒࡀࡉࡌࡉࡀ ࡏࡋ ࡐࡅࡌ ࡐࡓࡀࡔ ࡁࡃࡀࡅࡋࡀ ࡄࡉࡅࡀࡓࡀ ࡃࡀࡋࡉࡍ ࡅࡌࡀࡔࡒࡉࡍ ࡌࡉࡀ ࡋࡔࡉࡕࡋࡀࡉ ࡎࡀࡁࡉࡋࡍࡀ ࡅࡃࡀࡓࡀࡍࡀ ࡏࡋ ࡃࡓࡀࡉࡉࡀ ࡖࡆࡉࡅࡀ ࡖࡏࡕࡋࡉࡀ ࡎࡀࡁࡉࡋࡍࡀ ࡅࡃࡀࡓࡀࡍࡀ ࡅࡌࡀࡔࡒࡉࡍࡀ ࡈࡅࡁࡇ ࡖࡌࡍ ࡌࡉࡀࡉ ࡔࡕࡀ ࡔࡀࡕࡉࡀ ࡅࡌࡉࡕࡀࡎࡉࡀ ࡅࡌࡉࡕࡒࡀࡉࡀࡌ ࡅࡍࡀࡐࡔࡀ ࡋࡄࡀࡃ ࡕࡓࡉࡍ ࡂࡅࡐࡍࡉࡀ ࡖࡔࡕࡅࡍ ࡌࡉࡀ ࡐࡉࡓࡉࡀ ࡈࡀࡁࡉࡀ ࡀࡍࡐࡀࡒ ࡅࡏࡕࡂࡀࡃࡀࡋ ࡀࡅࡐࡀࡉࡄࡅࡍ ࡅࡓࡅࡀࡆ ࡂࡅࡐࡍࡉࡀ ࡖࡋࡀࡔࡕࡅࡍ ࡌࡉࡀ ࡀࡍࡐࡀࡒ ࡌࡓࡀࡓࡉࡀ ࡅࡏࡋࡒࡉࡀ ࡅࡀࡉࡋࡉࡍࡅࡍ ࡖࡋࡀࡎࡂࡅࡍ ࡁࡏࡅࡄࡓࡀ ࡅࡀࡉࡋࡉࡍࡅࡍ ࡖࡋࡀࡄࡋࡉࡐ ࡏࡋ ࡊࡅࡃࡊࡀ ࡎࡉࡍࡉࡅࡉࡀ ࡋࡎࡉࡌࡀࡕ ࡄࡉࡉࡀ ࡋࡌࡉࡓࡉࡀࡉ ࡊࡅࡔࡈࡀ ࡉࡀࡒࡓࡀ ࡀࡄࡀࡉ ࡋࡂࡀࡈ ࡅࡀࡔࡀࡓ ࡄࡅࡋࡇ ࡋࡌࡉࡓࡉࡀࡉ ࡑࡀࡅࡕࡀ ࡀࡍࡀ ࡁࡀࡉࡉࡍࡀ ࡁࡀࡋࡌࡀ ࡌࡉࡎࡀࡓ ࡌࡉࡒࡓࡉࡀ ࡒࡀࡋࡀ ࡖࡄࡉࡉࡀ ࡅࡌࡓࡀࡍࡃࡉࡃ ࡅࡌࡀࡒࡅࡌࡉࡀ ࡔࡀࡊࡁࡉࡀ ࡍࡉࡔࡓࡀ ࡈࡀࡎ ࡌࡍ ࡏࡋࡀࡍࡀ ࡄࡀࡃࡀࡓ ࡅࡌࡀࡐࡓࡉࡔ ࡓࡀࡄࡌࡇ ࡀࡌࡀࡓࡋࡅࡍ ࡔࡅࡌࡀࡉࡅࡍ ࡒࡀࡋࡀࡉ ࡀࡄࡀࡉ ࡅࡀࡔࡀࡓ ࡅࡎࡅࡁࡋࡅࡉࡀ ࡋࡓࡉࡃࡐࡀ ࡄࡅࡋࡇ ࡋࡌࡉࡓࡉࡀࡉ ࡑࡀࡅࡕࡀ ࡑࡀࡅࡕࡀ ࡄࡅࡋࡇ ࡋࡌࡉࡓࡉࡀࡉ ࡅࡀࡉࡋࡉࡍࡅࡍ ࡋࡉࡀࡄࡅࡈࡀࡉࡉࡀ ࡖࡏࡋ ࡌࡉࡓࡉࡀࡉ ࡄࡅࡋࡇ ࡓࡉࡃࡐࡀ ࡅࡀࡉࡋࡇ ࡋࡉࡋࡉࡆࡀࡓ ࡁࡀࡉࡕࡀ ࡓࡁࡀ ࡏࡑࡈࡅࡍࡀ ࡖࡎࡌࡉࡊ ࡋࡁࡉࡕ ࡌࡒࡀࡃࡔࡉࡀ ࡅࡀࡉࡋࡇ ࡋࡆࡀࡕࡀࡍ ࡏࡑࡈࡅࡍࡀ ࡖࡀࡎࡄࡉࡃ ࡊࡀࡃࡁࡀ ࡋࡌࡉࡓࡉࡀࡉ ࡏࡕࡊࡀࡍࡀࡐ ࡉࡀࡄࡅࡈࡀࡉࡉࡀ ࡊࡅࡋࡄࡅࡍ ࡌࡀࡒࡓࡉࡀ ࡓࡅࡓࡁࡉࡀ ࡅࡃࡉࡓࡃࡒࡉࡀ ࡅࡀࡕࡅࡍ ࡋࡌࡉࡓࡉࡀࡉ ࡀࡌࡓࡉࡀ ࡖࡏࡒࡓࡀࡕ ࡌࡍ ࡊࡀࡄࡍࡉࡀ ࡅࡓࡉࡄࡌࡀࡕ ࡂࡀࡁࡓࡀ ࡅࡉࡀࡃ ࡄࡃࡀࡃࡉࡀ ࡋࡂࡀࡈ ࡋࡂࡀࡈࡉࡅࡍ ࡉࡀࡃ ࡄࡃࡀࡃࡉࡀ ࡅࡀࡆࡀࡋ ࡏࡕࡉࡁ ࡋࡐࡅࡌ ࡐࡓࡀࡔ ࡁࡀࡉࡉࡍ ࡖࡍࡉࡂࡀࡈࡋࡉࡍࡅࡍ ࡅࡍࡀࡔࡉࡈࡇ ࡋࡌࡉࡓࡉࡀࡉ ࡁࡏࡅࡓࡀࡔࡋࡀࡌ ࡆࡉࡒࡐࡀ ࡍࡉࡁࡉࡃࡋࡇ ࡋࡂࡀࡁࡓࡀ ࡖࡀࡄࡓࡉࡁࡇ ࡋࡌࡉࡓࡉࡀࡉ ࡅࡀࡐࡒࡇ ࡋࡀࡍࡉࡄࡅࡉࡀ ࡉࡅࡌࡀ ࡁࡕࡉࡁࡉࡋ ࡖࡍࡉࡊࡓࡀࡉࡀ ࡀࡉࡋࡇ ࡋࡏࡅࡓࡀࡔࡋࡀࡌ ࡌࡎࡀࡃࡒࡉࡋࡅࡍ ࡋࡊࡁࡀࡑࡉࡀࡕࡅࡍ ࡅࡔࡀࡁࡉࡋࡅࡍ ࡋࡉࡀࡅࡍࡉࡀ ࡖࡏࡅࡓࡀࡔࡋࡀࡌ ࡏࡕࡊࡀࡍࡀࡐ ࡉࡀࡄࡅࡈࡀࡉࡉࡀ ࡊࡅࡋࡄࡅࡍ ࡅࡀࡁࡀࡕࡀࡓ ࡌࡉࡓࡉࡀࡉ ࡀࡆࡋࡉࡀ ࡀࡆࡀࡋ ࡅࡀࡔࡊࡅ ࡋࡌࡉࡓࡉࡀࡉ ࡊࡅࡓࡎࡉࡀ ࡀࡕࡓࡉࡑࡋࡇ ࡋࡐࡅࡌ ࡐࡓࡀࡔ ࡅࡃࡓࡀࡁࡔࡀ ࡄࡉࡅࡀࡓࡀ ࡍࡂࡉࡃࡋࡇ ࡅࡎࡉࡃࡓࡀ ࡁࡊࡀࡍࡐࡇ ࡕࡓࡉࡑࡋࡇ ࡒࡀࡓࡉࡀ ࡁࡎࡉࡃࡓࡉࡀ ࡊࡅࡔࡈࡀ ࡅࡌࡓࡀࡍࡃࡉࡃࡀࡋࡅࡍ ࡏࡋ ࡊࡅࡋࡄࡅࡍ ࡀࡋࡌࡉࡀ ࡌࡀࡓࡂࡍࡀ ࡖࡌࡉࡀ ࡄࡉࡉࡀ ࡁࡏࡃࡇ ࡋࡂࡉࡈࡋࡇ ࡄࡉࡌࡉࡀࡍࡀ ࡁࡄࡀࡋࡑࡇ ࡏࡎࡉࡓࡋࡇ ࡎࡀࡂࡃࡀ ࡅࡌࡉࡃࡉࡍࡀ ࡌࡉࡓࡉࡀࡉ ࡅࡃࡀࡓࡔࡀ ࡁࡒࡀࡋࡀ ࡔࡀࡍࡉࡀ ࡍࡅࡍࡉࡀ ࡀࡊࡍࡀࡐ ࡌࡍ ࡉࡀࡌࡀ ࡅࡑࡉࡐࡀࡓ ࡂࡀࡃࡐࡀ ࡌࡍ ࡐࡅࡌ ࡐࡓࡀࡔ ࡀࡕࡉࡍ ࡋࡒࡀࡋࡇ ࡖࡌࡉࡓࡉࡀࡉ ࡅࡔࡉࡍࡕࡀ ࡋࡀࡓࡀࡄࡌࡉࡀ ࡖࡍࡉࡔࡉࡊࡁࡅࡍ ࡌࡀࡓࡄࡉࡋࡇ ࡋࡓࡉࡄࡀ ࡖࡋࡒࡅࡃࡀࡌࡇ ࡅࡌࡀࡍࡔࡉࡋࡇ ࡀࡋࡄࡀࡆࡉࡍ ࡀࡋࡌࡀ ࡗ ࡄࡀࡆࡉࡍ ࡄࡆࡅࡍ ࡉࡀࡄࡅࡈࡀࡉࡉࡀ ࡌࡍ ࡒࡅࡃࡀࡌࡇ ࡒࡀࡌ ࡁࡄࡉࡕ ࡕࡋࡅࡍ ࡁࡂࡅࡓࡌࡀࡉࡆࡀࡉࡅࡍ ࡅࡔࡒࡀࡐ ࡏࡋ ࡕࡀࡓࡁࡀࡑࡉࡀ ࡄࡀࡃࡉࡀࡉࡅࡍ ࡅࡁࡊࡅࡍ ࡌࡀࡋࡀࡋࡀࡕ ࡏࡌࡇ ࡖࡌࡉࡓࡉࡀࡉ ࡅࡃࡉࡌࡀ ࡁࡏࡅࡌࡁࡇ ࡍࡀࡕࡓࡀࡍ ࡅࡀࡌࡓࡀࡋࡇ ࡄࡅࡆࡉࡉࡍ ࡀࡁࡓࡀࡕࡀࡉ ࡌࡉࡓࡉࡀࡉ ࡄࡅࡆࡉࡉࡍ ࡖࡏࡌࡉࡊ ࡀࡍࡀ ࡀࡍࡀࡕ ࡀࡁࡓࡀࡕࡀࡉ ࡃࡉࡋࡉࡀ ࡅࡁࡓࡀࡕࡀࡉࡄࡅࡍ ࡖࡊࡅࡋࡄࡅࡍ ࡊࡀࡄࡍࡉࡀ ࡓࡉࡔࡀ ࡓࡉࡔ ࡁࡀࡉࡕࡀ ࡓࡁࡀ ࡖࡁࡉࡕ ࡌࡒࡀࡃࡔࡉࡀ ࡋࡀࡅ ࡌࡉࡃࡊࡀࡓ ࡀࡃࡊࡉࡓࡉࡕ ࡌࡉࡓࡉࡀࡉ ࡖࡏࡅࡓࡀࡉࡕࡀ ࡁࡊࡀࡍࡐࡉࡊ ࡄࡅࡀࡕ ࡐࡀࡄࡕࡀࡕࡁࡇ ࡅࡒࡀࡓࡉࡀࡕࡁࡇ ࡅࡉࡀࡃࡉࡕ ࡁࡂࡀࡅࡇ ࡌࡀࡄࡅ ࡖࡊࡃࡉࡁ ࡒࡋࡉࡃࡉࡀ ࡁࡀࡓࡀࡉࡉࡀ ࡄࡅࡍ ࡁࡏࡃࡉࡊ ࡅࡂࡀࡅࡀࡉࡉࡀ ࡁࡎࡀࡐࡈࡉࡀ ࡌࡀࡕࡍࡉࡕ ࡊࡅࡋࡄࡅࡍ ࡊࡀࡄࡍࡉࡀ ࡅࡁࡍࡉࡀ ࡊࡀࡄࡍࡉࡀ ࡀࡕࡉࡍ ࡅࡏࡃࡉࡊ ࡍࡀࡔࡒࡉࡀ ࡖࡁࡀࡉࡉࡕ ࡐࡕࡀࡋࡇ ࡁࡀࡁࡀ ࡅࡃࡋࡀ ࡁࡀࡉࡀࡕࡋࡇ ࡌࡉࡕࡊࡀࡌࡀࡓ ࡀࡆࡉࡋ ࡋࡃࡅࡊࡕࡇ ࡀࡋࡐࡀ ࡌࡉࡒࡀࡌ ࡒࡀࡉࡌࡉࡀ ࡅࡕࡓࡉࡍ ࡀࡋࡐࡉࡀ ࡌࡉࡕࡀࡁ ࡉࡀࡕࡁࡉࡀ ࡌࡉࡃࡍࡉࡋࡉࡊ ࡗ ࡀࡁࡃࡀ ࡐࡎࡉࡒࡀ ࡅࡌࡉࡍࡉࡋࡕࡉࡊ ࡔࡀࡌࡉࡀ ࡁࡏࡅࡓࡀࡔࡋࡀࡌ ࡀࡋࡌࡀ ࡖࡏࡍࡔࡉࡕ ࡀࡄࡉࡊ ࡅࡋࡉࡁࡉࡊ ࡏࡕࡍࡀࡊࡓࡉࡀ ࡌࡍ ࡊࡀࡄࡍࡉࡀ ࡄࡅࡆࡀࡉ ࡄࡉࡃࡅࡕࡀࡕࡀ ࡁࡀࡊࡉࡀࡍ ࡁࡉࡀࡄࡅࡃ ࡅࡏࡍࡔࡉࡀ ࡅࡂࡅࡁࡓࡉࡀ ࡁࡏࡅࡓࡀࡔࡋࡀࡌ ࡐࡀࡋࡈࡅࡉࡀ ࡋࡆࡀࡄࡁࡀࡉࡅࡍ ࡓࡄࡉࡌࡀ ࡅࡏࡁࡋࡉࡀ ࡅࡌࡀࡋࡀࡉ ࡋࡀࡂࡈࡉࡍ ࡏࡋࡉࡊ ࡅࡀࡌࡓࡉࡀ ࡖࡐࡀࡉࡎࡉࡍࡉࡍ ࡌࡀࡋࡀࡉࡀࡍ ࡀࡋࡌࡀ ࡖࡌࡉࡓࡉࡀࡉ ࡀࡕࡉࡀ ࡄࡀࡔࡋࡉࡍࡉࡍ ࡃࡀࡄࡁࡀ ࡌࡉࡊࡃࡅࡓ ࡅࡒࡀࡆࡉࡆࡀ ࡓࡂࡉࡂࡉࡀ ࡅࡎࡀࡐࡈࡉࡀ ࡓࡌࡉࡍ ࡒࡀࡉࡌࡉࡍ ࡏࡋ ࡏࡍࡂࡀࡓࡉࡀ ࡅࡌࡎࡀࡊࡉࡀ ࡖࡄࡀࡆࡉࡋࡉࡊ ࡁࡏࡅࡓࡀࡔࡋࡀࡌ ࡍࡀࡃࡓࡉࡀ ࡍࡉࡃࡓࡉࡀ ࡏࡋࡉࡊ ࡃࡉࡋࡉࡊ ࡗ ࡀࡕࡉࡕ ࡀࡋࡅࡀࡕࡀࡉ ࡅࡀࡆࡋࡉࡍࡉࡍ ࡁࡓࡀࡕࡀࡉ ࡒࡅࡌ ࡄࡃࡀࡓ ࡋࡌࡀࡕࡉࡊ ࡌࡃࡉࡍࡕࡀ ࡖࡏࡅࡓࡀࡔࡋࡀࡌ ࡀࡕࡀࡉ ࡕࡋࡀࡉ ࡔࡓࡀࡂࡉࡀ ࡖࡌࡍ ࡉࡅࡌࡀ ࡖࡍࡐࡀࡒࡕ ࡏࡃࡀࡊࡅࡍ ࡋࡀ ࡁࡀࡉࡀࡕࡋࡇ ࡏࡋ ࡄࡀࡆࡉࡍ ࡂࡀࡁࡓࡀ ࡖࡔࡉࡁࡉࡉࡊ ࡅࡀࡐࡒࡉࡊ ࡂࡀࡁࡓࡀ ࡖࡋࡀࡅ ࡌࡍ ࡌࡀࡕࡉࡊ ࡔࡀࡌࡀࡓ ࡅࡔࡅࡁࡒࡇ ࡁࡀࡋࡌࡀ ࡖࡋࡀࡍࡉࡌࡀࡓ ࡖࡏࡆࡋࡉࡕ ࡅࡀࡐࡉࡒࡕࡇ ࡋࡌࡉࡓࡉࡀࡉ ࡌࡍ ࡃࡅࡊࡕࡇ ࡀࡕࡀࡉ ࡀࡋࡐࡀࡉࡍࡅࡍ ࡋࡃࡉࡓࡃࡒࡉࡀ ࡑࡉࡋࡐࡀ ࡅࡀࡕࡍࡀࡉ ࡋࡏࡅࡓࡀࡉࡕࡀ ࡌࡍ ࡓࡀࡐࡀ ࡅࡌࡍ ࡉࡅࡌࡀ ࡖࡀࡍࡀࡕ ࡃࡀࡋࡉࡕࡉࡀ ࡄࡀࡋࡀ ࡄࡅࡉࡋࡇ ࡊࡀࡎࡉࡀ ࡍࡀࡐࡑࡉࡀ ࡅࡀࡕࡍࡀࡉ ࡁࡊࡀࡍࡐࡉࡊ ࡅࡀࡔࡌࡀࡉࡍࡀࡍ ࡒࡀࡋࡉࡊ ࡗ ࡖࡄࡅࡀ ࡗ ࡄࡀࡆࡀ ࡔࡉࡌࡀࡕ ࡌࡉࡓࡉࡀࡉ ࡌࡍ ࡏࡌࡄ ࡂࡀࡄࡊࡀ ࡅࡄࡀࡃࡉࡀ ࡌࡍ ࡏࡅࡑࡓࡇ ࡅࡀࡌࡓࡀࡋࡇ ࡋࡀࡄࡅࡍ ࡉࡀࡄࡅࡈࡀࡉࡉࡀ ࡊࡀࡎࡉࡀ ࡁࡄࡉࡕࡉࡀ ࡁࡀࡈࡋࡉࡀ ࡋࡀࡄࡅࡍ ࡉࡀࡄࡅࡈࡀࡉࡉࡀ ࡖࡒࡀࡉࡌࡉࡍ ࡋࡀࡆࡂࡀ ࡎࡀࡂࡃࡉࡀ ࡄࡉࡍࡅࡍ ࡁࡄࡔࡅࡊࡀ ࡌࡉࡕࡒࡀࡁࡓࡉࡀ ࡀࡌࡓࡀࡋࡅࡍ ࡏࡆࡉࡋ ࡏࡆࡉࡋ ࡎࡀࡊࡋࡉࡀ ࡍࡀࡐࡑࡉࡀ ࡖࡋࡀࡄࡅࡍ ࡌࡉࡍࡇ ࡌࡍ ࡀࡋࡌࡀ ࡋࡀࡅ ࡀࡕࡅࡀࡕ ࡀࡍࡀ ࡖࡍࡉࡐࡒࡉࡕ ࡋࡆࡅࡁࡉࡀ ࡅࡋࡀ ࡍࡉࡄࡅࡉࡀ ࡖࡂࡀࡁࡓࡀ ࡓࡉࡄࡌࡉࡕ ࡋࡀࡍࡉࡐࡒࡉࡕ ࡋࡌࡉࡄࡃࡅࡓࡉࡀ ࡋࡅࡀࡕࡀࡉࡊࡅࡍ ࡅࡌࡉࡄࡆࡉࡍࡊࡅࡍ ࡋࡒࡅࡌࡁࡀ ࡖࡏࡅࡋࡀ ࡏࡆࡉࡋ ࡏࡆࡉࡋ ࡌࡍ ࡒࡅࡃࡀࡌࡀࡉ ࡖࡆࡉࡐࡀ ࡅࡔࡉࡒࡓࡀ ࡎࡄࡉࡃࡕࡅࡍ ࡏࡋࡀࡉ ࡎࡄࡉࡃࡕࡅࡍ ࡏࡋࡀࡉ ࡂࡀࡅࡓࡀ ࡅࡂࡅࡍࡁࡀ ࡅࡔࡀࡅࡉࡕࡅࡍ ࡗ ࡃࡉࡋࡊࡅࡍ ࡁࡓࡉࡊ ࡂࡀࡁࡓࡀ ࡖࡔࡉࡓࡉࡀࡍ ࡌࡍ ࡏࡎࡅࡓࡀࡉ ࡅࡋࡉࡂࡓࡀࡉ ࡄࡀࡊࡀ ࡔࡕࡀࡋ ࡋࡀࡂࡀࡅࡓࡀ ࡂࡀࡓࡉࡕ ࡌࡉࡍࡇ ࡅࡋࡀࡂࡅࡍࡁࡀ ࡂࡉࡍࡁࡉࡕ ࡁࡀࡋࡌࡀ ࡎࡀࡄࡃࡅࡕࡀ ࡖࡎࡄࡉࡃࡕࡅࡍ ࡏࡋࡀࡉ ࡁࡅࡕࡀ ࡅࡕࡅࡔࡁࡉࡄࡕࡀ ࡀࡕࡀࡋࡉࡀ ࡏࡋ ࡖࡒࡀࡉࡌࡉࡀ ࡅࡌࡀࡌࡋࡉࡋࡉࡀ ࡊࡀࡄࡍࡉࡀ ࡌࡉࡍࡇ ࡖࡌࡉࡓࡉࡀࡉ ࡋࡐࡅࡌ ࡐࡓࡀࡔ ࡀࡕࡀ ࡍࡉࡔࡓࡀ ࡃࡀࡊࡉࡀ ࡖࡂࡀࡍࡐࡇ ࡀࡌࡋࡀࡉࡉࡀ ࡖࡀࡋࡌࡀ ࡈࡀࡎ ࡏࡋࡀࡅࡀࡉࡄࡅࡍ ࡖࡉࡀࡄࡅࡈࡀࡉࡉࡀ ࡅࡍࡐࡀࡑࡁࡅࡍ ࡁࡂࡀࡍࡐࡇ ࡓࡂࡀࡋࡉࡍࡅࡍ ࡅࡀࡔࡐࡋࡉࡍࡅࡍ ࡋࡃࡍࡀࡁ ࡌࡉࡀ ࡌࡉࡍࡇ ࡖࡒࡉࡐࡉࡀ ࡎࡀࡓࡉࡀ ࡀࡔࡐࡉࡋࡉࡍࡅࡍ ࡌࡍ ࡀࡊࡋࡉࡀ ࡖࡁࡂࡀࡅࡀࡉࡄࡅࡍ ࡖࡌࡉࡀ ࡕࡀࡄࡌࡉࡀ ࡅࡀࡔࡐࡉࡋࡉࡍࡅࡍ ࡋࡎࡐࡉࡍࡀࡕࡅࡍ ࡋࡃࡍࡀࡁ ࡌࡉࡀ ࡀࡊࡋࡉࡀ ࡐࡀࡎࡇ ࡋࡁࡉࡕ ࡌࡒࡀࡃࡔࡉࡀ ࡅࡍࡅࡓࡀ ࡀࡕࡋࡉࡀ ࡁࡏࡅࡓࡀࡔࡋࡀࡌ ࡎࡀࡐ ࡏࡋࡀࡅࡀࡉࡄࡅࡍ ࡎࡉࡄࡅࡐࡕࡀ ࡅࡂࡀࡈࡋࡉࡍࡅࡍ ࡋࡕࡀࡓࡌࡉࡃࡉࡀ ࡁࡏࡅࡓࡀࡔࡋࡀࡌ ࡍࡄࡉࡕ ࡀࡕࡀ ࡀࡋࡅࡀࡕࡇ ࡅࡔࡀࡓࡔࡉࡋࡇ ࡋࡂࡀࡍࡐࡇ ࡅࡏࡕࡉࡁࡋࡇ ࡅࡏࡔࡕࡀࡉࡉࡋࡇ ࡅࡃࡀࡓࡉࡔࡋࡇ ࡅࡊࡅࡔࡈࡀ ࡓࡄࡉࡌࡀ ࡌࡉࡍࡇ ࡐࡔࡀࡈ ࡄࡉࡁࡒࡇ ࡁࡄࡁࡀࡒ ࡄࡀࡉࡋࡀ ࡅࡌࡉࡄࡕࡇ ࡅࡀࡕࡍࡄ ࡋࡊࡅࡓࡎࡉࡀ ࡀࡌࡀࡓࡋࡇ ࡌࡉࡓࡉࡀࡉ ࡄࡅࡆࡉࡀࡍ ࡋࡈࡀࡁ ࡋࡒࡅࡃࡀࡌ ࡄࡉࡉࡀ ࡀࡃࡊࡀࡓ ࡏࡋࡀࡉ ࡀࡔࡂࡀࡍࡃࡉࡊ ࡀࡍࡀ ࡈࡀࡁࡀ ࡂࡀࡁࡓࡀ ࡖࡔࡀࡌࡀࡋࡇ ࡋࡌࡉࡌࡓࡉࡊ ࡁࡀࡉࡉࡍࡀ ࡌࡉࡍࡉࡊ ࡊࡅࡔࡈࡀ ࡓࡀࡌࡀ ࡊࡅࡔࡈࡀ ࡖࡁࡉࡄࡓࡅࡉࡀ ࡉࡀࡓࡃࡍࡉࡀ ࡀࡌࡓࡀࡋࡇ ࡉࡀ ࡏࡅࡕࡓࡀ ࡈࡀࡁࡀ ࡏࡅࡕࡓࡀ ࡖ ࡄࡉࡉࡀ ࡔࡉࡄࡋࡅࡉࡀ ࡏࡋࡀࡅࡀࡉࡀࡍ ࡆࡉࡅࡀࡊ ࡅࡍࡄࡅࡓࡀࡊ ࡃࡍࡀ ࡅࡏࡒࡀࡓࡀࡊ ࡌࡁࡀࡔࡒࡀࡓ ࡁࡀࡕࡀࡓ ࡍࡄࡅࡓ ࡊࡅࡋ ࡌࡀࡍ ࡖࡒࡀࡋࡀࡊ ࡔࡀࡌࡀ ࡁࡀࡕࡓࡀ ࡃࡀࡊࡉࡀ ࡍࡉࡕࡊࡀࡓࡀࡊ ࡍࡉࡕࡊࡀࡓࡀࡊ ࡁࡎࡉࡌࡀࡕ ࡄࡉࡉࡀ ࡅࡍࡉࡃࡍࡀ ࡃࡓࡀࡁࡔࡀࡊ ࡋࡄࡀࡃ ࡕࡓࡉࡍ ࡊࡅࡋ ࡌࡀࡍ ࡖࡒࡀࡋࡀࡊ ࡋࡀ ࡔࡀࡌࡀ ࡏࡓࡅࡕࡀ ࡅࡔࡉࡍࡕࡀ ࡕࡉࡊࡐࡀࡓ ࡏࡋࡇ ࡍࡉࡄࡅࡉࡋࡅࡍ ࡋࡉࡀࡄࡅࡈࡀࡉࡉࡀ ࡀࡁࡃࡉࡀ ࡅࡊࡅࡋࡄࡅࡍ ࡊࡀࡄࡍࡉࡀ ࡁࡍࡉࡀ ࡀࡌࡕࡀ ࡀࡍࡀ ࡅࡃࡉࡋࡀࡊ ࡍࡉࡕࡂࡀࡃࡀࡋ ࡅࡍࡉࡎࡀࡒ ࡁࡆࡀࡊࡅࡕࡀ ࡋࡀࡕࡀࡓ ࡍࡄࡅࡓ ࡅࡌࡔࡀࡁࡉࡍ ࡄࡉࡉࡀ ࡅࡄࡉࡉࡀ ࡆࡀࡊࡉࡍ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡑࡀࡉࡃࡀ ࡀࡍࡀ ࡑࡀࡉࡃࡀ ࡖࡌࡍ ࡑࡀࡉࡃࡉࡀ ࡁࡄࡉࡓ ࡑࡀࡉࡃࡀ ࡀࡍࡀ ࡖࡁࡄࡉࡓ ࡌࡍ ࡑࡀࡉࡃࡉࡀ ࡅࡓࡉࡔࡀ ࡖࡊࡅࡋࡄࡅࡍ ࡊࡀࡋࡉࡀ ࡋࡄࡀࡅࡓࡉࡀ ࡌࡉࡀ ࡉࡀࡃࡀࡍࡅࡍ ࡋࡂࡉࡑࡉࡀ ࡂࡀࡅࡀࡉࡉࡀ ࡅࡕࡀࡋࡉࡋࡉࡀ ࡌࡁࡀࡔࡒࡀࡓࡍࡅࡍ ࡋࡍࡀࡔࡁࡉࡀ ࡅࡋࡄࡀࡅࡓࡉࡀ ࡅࡏࡋ ࡊࡉࡋࡉࡀࡕࡀ ࡊࡅࡋࡄࡅࡍ ࡀࡉࡉࡋࡍࡀ ࡅࡎࡀࡉࡀࡓࡍࡀ ࡀࡂࡌࡀ ࡁࡄࡀࡁࡀࡓࡀ ࡅࡎࡐࡉࡍࡕࡀࡉ ࡋࡀࡂࡀࡆࡉࡀ ࡅࡋࡀࡌࡉࡎࡕࡀࡊࡀࡓࡍࡀ ࡁࡋࡉࡋࡉࡀ ࡄࡀࡆࡉࡍࡀࡋࡇ ࡁࡓࡀࡊࡎࡀ ࡀࡍࡀ ࡒࡀࡃࡌࡉࡕ ࡁࡏࡅࡄࡓࡀ ࡁࡎࡀࡄࡓࡀࡍࡀ ࡖࡋࡀࡄࡅࡀ ࡌࡍ ࡐࡀࡓࡆࡋࡀ ࡀࡍࡀ ࡒࡓࡀࡌࡕࡇ ࡋࡎࡒࡅࡐࡀࡍࡀ ࡖࡏࡋ ࡃࡉࡋࡀࡍ ࡄࡀࡌࡁࡀࡂࡀ ࡄࡅࡀ ࡀࡍࡀ ࡔࡀࡍࡉࡕࡉࡍࡅࡍ ࡋࡒࡀࡐࡀࡉࡉࡀ ࡖࡏࡅࡄࡓࡀ ࡖࡄࡉࡉࡀ ࡎࡀࡊࡓࡉࡀ ࡏࡕࡓࡉࡑࡋࡉࡀ ࡒࡅࡃࡀࡄࡀ ࡁࡓࡉࡔࡀࡉ ࡖࡍࡅࡍࡉࡀ ࡁࡈࡅࡋࡇ ࡉࡀࡕࡁࡉࡀ ࡐࡀࡋࡕࡀ ࡖࡏࡊࡀ ࡁࡏࡃࡀࡉ ࡌࡀࡓࡂࡍࡀ ࡁࡄࡉࡓࡀ ࡌࡍ ࡃࡅࡊࡕࡇ ࡂࡀࡅࡀࡆࡀ ࡖࡌࡉࡀ ࡃࡀࡊࡉࡀ ࡖࡄࡀࡆࡉࡋࡇ ࡑࡀࡉࡃࡉࡀ ࡅࡌࡉࡔࡕࡀࡓࡄࡉࡆࡉࡀ ࡉࡀࡕࡉࡁࡍࡀ ࡁࡀࡓࡁࡀ ࡖࡆࡉࡅࡀ ࡅࡀࡕࡉࡍࡀ ࡁࡕࡉࡁࡉࡋ ࡖࡀࡅࡃࡉࡀ ࡀࡕࡉࡍࡀ ࡁࡓࡉࡔ ࡌࡉࡀ ࡌࡀࡎࡂࡉࡍࡀ ࡁࡓࡉࡔࡀ ࡖࡌࡉࡀ ࡅࡌࡀࡎࡂࡉࡍࡀ ࡁࡓࡉࡔࡀ ࡖࡏࡃࡉࡀ ࡀࡕࡉࡍࡀ ࡁࡔࡀࡁࡀࡉࡕࡀ ࡁࡎࡉࡂࡉࡀ ࡍࡉࡄࡀ ࡅࡌࡒࡀࡉࡌࡀ ࡋࡀࡍࡀࡉࡃࡉࡀ ࡌࡉࡀ ࡁࡀࡓࡁࡀࡉ ࡅࡒࡀࡋࡀ ࡖࡀࡓࡁࡀࡉ ࡋࡀࡌࡉࡔࡕࡌࡀ ࡀࡒࡀࡌࡀࡉ ࡒࡀࡉࡉࡌ ࡄࡉࡁࡉࡋ ࡏࡋ ࡀࡂࡀࡌࡁࡀࡉ ࡄࡆࡀࡉࡉࡀ ࡔࡉࡕࡉࡋ ࡁࡀࡎࡉࡌ ࡔࡅࡌࡇ ࡀࡋࡉࡄࡃࡀࡉ ࡀࡋࡉࡄࡃࡀࡉ ࡀࡍࡐࡀࡉ ࡉࡀࡕࡉࡁ ࡅࡃࡀࡓࡉࡔ ࡀࡍࡅࡔ ࡀࡌࡓࡉࡀ ࡉࡀ ࡀࡁ ࡑࡀࡉࡃࡀ ࡈࡀࡁࡀ ࡉࡀ ࡋࡀࡋࡀ ࡑࡀࡉࡃࡀ ࡖࡁࡀࡎࡉࡌ ࡔࡅࡌࡇ ࡀࡋࡉࡄࡃࡀࡉ ࡀࡋࡉࡄࡃࡉࡀ ࡀࡓࡁࡀࡉ ࡔࡀࡌࡀࡍࡀ ࡄࡉࡂࡌࡀ ࡖࡑࡀࡉࡃࡉࡀ ࡑࡀࡉࡃࡉࡀ ࡖࡀࡊࡋࡉࡀ ࡍࡅࡍࡉࡀ ࡅࡓࡉࡄࡀ ࡖࡎࡓࡅࡕࡅࡍ ࡀࡕࡉࡀ ࡒࡀࡋ ࡑࡀࡉࡃࡉࡀ ࡅࡒࡀࡋ ࡕࡀࡍࡂࡀࡓࡅࡍ ࡖ ࡌࡂࡀࡍࡉࡍ ࡀࡄࡃࡀࡃࡉࡀ ࡅࡋࡀࡉࡈࡉࡀ ࡒࡀࡁࡉࡋ ࡄࡃࡀ ࡌࡍ ࡄࡀࡁࡓࡇ ࡅࡀࡌࡀࡓࡋࡇ ࡏࡋ ࡑࡀࡉࡃࡀ ࡆࡀࡁࡍࡀ ࡏࡋ ࡍࡅࡍࡀࡊ ࡎࡀࡓࡉࡉࡀ ࡄࡅࡍ ࡅࡋࡀࡉࡉࡕ ࡖࡌࡉࡍࡀࡉ ࡆࡀࡁࡍࡉࡍ ࡀࡋࡂࡉࡈࡕࡇ ࡁࡉࡀࡌࡀ ࡓࡁࡀ ࡖࡄࡅࡎࡓࡀࡍࡀ ࡌࡀࡈࡉࡀ ࡋࡆࡀࡁࡍࡇ ࡑࡀࡉࡃࡀ ࡀࡌࡀࡓ ࡅࡌࡀࡔࡌࡀ ࡅࡌࡀࡔࡌࡀࡋࡇ ࡋࡂࡀࡁࡓࡀ ࡆࡀࡁࡍࡇ ࡋࡉࡈࡉࡀ ࡆࡀࡁࡍࡀࡊ ࡅࡋࡉࡈࡀ ࡆࡀࡍࡂࡀࡊ ࡅࡋࡉࡈࡀ ࡀࡓࡁࡀࡊ ࡖࡋࡀࡌࡀࡋࡉࡀ ࡀࡍࡀࡕ ࡋࡀࡉࡕࡉࡕ ࡌࡉࡄࡋࡀ ࡅࡋࡀࡔࡃࡉࡕ ࡁࡍࡅࡍࡀࡊ ࡖࡆࡀࡁࡍࡉࡕ ࡖࡋࡀࡎࡀࡓࡉࡉࡀ ࡍࡅࡍࡉࡀ ࡖࡀࡓࡁࡀࡊ ࡅࡌࡆࡀࡁࡍࡉࡕ ࡁࡉࡃࡌࡉࡀ ࡊࡀࡃࡉࡓࡉࡀ ࡕࡅࡌ ࡒࡀࡄࡌࡀ ࡅࡕࡅࡌࡓࡉࡀ ࡋࡀࡉࡕࡉࡕ ࡅࡋࡀࡉࡕࡉࡕ ࡌࡉࡄࡋࡀ ࡑࡀࡕࡓࡉࡀ ࡗ ࡀࡕࡉࡕ ࡁࡉࡎࡓࡀࡒ ࡏࡃࡀࡊ ࡋࡀࡋࡀࡅࡉࡋࡀࡊ ࡖࡔࡀࡐࡉࡓ ࡈࡀࡁࡕࡀ ࡏࡆࡉࡋ ࡏࡆࡉࡋ ࡏࡅࡋࡀࡍࡀ ࡖࡋࡀࡆࡀࡁࡍࡉࡕ ࡌࡉࡍࡀࡉࡀࡍ ࡅࡌࡉࡕࡀࡍࡂࡓࡉࡕ ࡁࡌࡅࡆࡀࡍࡉࡀࡊ ࡑࡋࡉࡐࡀ ࡖࡋࡀࡆࡅࡀࡍࡀࡊ ࡖࡏࡅࡋࡀ ࡋࡂࡉࡈࡀࡕࡋࡇ ࡅࡎࡀࡌࡊࡀࡕࡋࡇ ࡁࡉࡀࡑࡉࡋࡀࡊ ࡅࡋࡀࡎࡓࡀ ࡁࡄࡀࡌࡔࡀ ࡍࡀࡎࡁࡀࡕࡋࡇ ࡄࡀࡊࡀ ࡐࡀࡄࡓࡀ ࡆࡉࡁࡍࡀࡊ ࡅࡆࡀࡁࡅࡍࡀࡊ ࡅࡄࡀࡅࡉࡀ ࡗ ࡖࡋࡀࡄࡅࡀ ࡒࡀࡁࡋࡉࡕ ࡁࡌࡀࡕ ࡀࡍࡀࡔࡉࡀ ࡅࡀࡂࡀࡉࡉࡀ ࡖࡔࡀࡐࡉࡓ ࡋࡀ ࡃࡀࡊࡓࡉࡕ ࡗ ࡄࡀࡆࡉࡍ ࡔࡅࡌࡀ ࡓࡀࡁ ࡑࡀࡉࡃࡉࡀ ࡓࡉࡔࡀ ࡖࡔࡅࡓࡁࡕࡀ ࡄࡀࡉࡕࡀ ࡓࡉࡔࡀࡉࡀ ࡖࡊࡅࡋࡄࡅࡍ ࡊࡀࡋࡉࡀ ࡀࡌࡀࡓࡋࡇ ࡋࡊࡅࡕࡋࡀࡉ ࡖࡀࡉࡕࡉࡀ ࡀࡄࡁࡀࡋࡉࡀ ࡎࡒࡅࡁࡓࡀ ࡖ ࡏࡒࡓࡉࡀ ࡁࡀࡂࡌࡀ ࡒࡀࡋࡀ ࡅࡏࡉࡀࡕࡓࡀ ࡋࡍࡅࡍࡉࡀ ࡖࡏࡅࡌࡒࡉࡀ ࡏࡉࡀࡐࡓࡀ ࡋࡑࡉࡐࡀࡓ ࡑࡀࡍࡕࡀ ࡖࡋࡍࡅࡍࡀࡉ ࡄࡀࡅࡉࡋࡅࡍ ࡓࡉࡃࡐࡀ ࡏࡋࡉࡂࡈࡇ ࡋࡎࡉࡃࡌࡀ ࡓࡁࡀ ࡅࡏࡕࡉࡁࡓࡇ ࡋࡂࡀࡍࡐࡇ ࡋࡃࡅࡊࡕࡇ ࡏࡍࡉࡎࡁࡇ ࡌࡉࡍࡇ ࡅࡍࡐࡀࡁࡇ ࡁࡂࡀࡅࡇ ࡖࡏࡎࡒࡅࡁࡓࡀࡉ ࡎࡒࡅࡁࡓࡀ ࡄࡅ ࡕࡀࡒࡍࡀ ࡖࡌࡉࡀ ࡁࡒࡉࡓࡀ ࡋࡀࡓࡁࡉࡀ ࡑࡀࡉࡃࡉࡀ ࡖࡔࡉࡌࡅࡉࡀ ࡋࡒࡀࡋࡀ ࡋࡉࡁࡀࡉࡅࡍ ࡍࡐࡀࡋ ࡌࡍ ࡎࡀࡌࡊࡇ ࡄࡀࡃ ࡋࡄࡀࡁࡓࡇ ࡌࡒࡀࡓࡉࡋࡇ ࡅࡀࡌࡀࡓࡋࡇ ࡋࡂࡀࡅࡀࡉࡀࡊ ࡀࡆࡉࡋ ࡀࡌࡉࡍࡈࡅࡋ ࡖࡒࡀࡋࡀ ࡖࡑࡀࡉࡃࡀ ࡑࡀࡉࡃࡀ ࡖࡍࡅࡍࡉࡀ ࡋࡀࡊࡋࡉࡀ ࡋࡀࡒࡀࡋࡇ ࡃࡀࡌࡉࡀ ࡋࡑࡀࡉࡃࡀ ࡅࡋࡀࡎࡒࡅࡁࡓࡇ ࡋࡎࡒࡅࡁࡓࡀࡍ ࡅࡋࡀࡒࡀࡋࡇ ࡃࡀࡌࡉࡀ ࡋࡒࡀࡋࡀࡍ ࡅࡋࡀࡔࡅࡕࡇ ࡃࡀࡌࡉࡀ ࡋࡄࡀࡆࡉࡍ ࡀࡋࡌࡀ ࡀࡊࡀࡍࡃࡉࡕ ࡒࡀࡉࡌࡉࡀ ࡑࡀࡉࡃࡉࡀ ࡁࡂࡀࡅࡀࡉࡉࡀ ࡃࡉࡋࡅࡍ ࡋࡀࡎࡕࡀࡌࡀࡓ ࡖࡒࡀࡉࡌࡉࡀ ࡑࡀࡉࡃࡉࡀ ࡅࡌࡉࡕࡄࡀࡔࡁࡉࡀ ࡂࡀࡉࡃࡉࡍࡅࡍ ࡋࡉࡂࡀࡋ ࡑࡀࡉࡃࡀ ࡅࡐࡀࡋࡂࡇ ࡋࡎࡉࡋࡉࡕࡀ ࡅࡐࡓࡀࡎࡋࡅࡍ ࡅࡊࡀࡓࡊࡉࡋ ࡔࡃࡉࡍࡅࡍ ࡁࡏࡅࡓࡉࡀ ࡐࡊࡀࡓࡉࡍࡅࡍ ࡁࡂࡉࡈࡓࡉࡀ ࡀࡌࡓࡉࡋࡇ ࡔࡓࡉࡍࡀࡍ ࡌࡍ ࡓࡂࡀࡋࡀࡍ ࡖࡍࡅࡍࡀࡊ ࡋࡀࡓࡁࡀࡍ ࡋࡀࡎࡀࡋࡒࡉࡀ ࡋࡀࡑࡀࡉࡃࡉࡍࡉࡍ ࡖࡏࡋ ࡔࡅࡌࡀࡊ ࡃࡉࡋࡀࡊ ࡃࡀࡊࡓࡉࡀ ࡗ ࡄࡀࡆࡉࡍ ࡀࡌࡀࡓࡋࡉࡀ ࡑࡀࡉࡃࡉࡀ ࡌࡂࡀࡔࡕࡉࡍࡅࡍ ࡁࡒࡅࡋࡐࡀ ࡖࡐࡀࡓࡆࡋࡀ ࡓࡂࡀࡋࡕࡇ ࡋࡕࡀࡍࡂࡀࡓࡅࡍ ࡂࡉࡓࡐࡀ ࡖࡋࡀࡓࡀࡔࡉࡀ ࡖࡀࡄࡁࡉࡋࡇ ࡀࡐࡊࡀࡓࡕࡉࡍࡅࡍ ࡁࡀࡈࡅࡍࡉࡀ ࡊࡀࡐࡓࡅࡍ ࡅࡎࡐࡉࡍࡀࡕࡅࡍ ࡕࡉࡁࡓࡉࡕ ࡋࡌࡉࡀ ࡒࡋࡀࡉࡕࡇ ࡏࡋ ࡋࡉࡄࡅࡍ ࡊࡅࡋࡇ ࡅࡋࡂࡅࡐࡕࡀ ࡖࡋࡉࡄࡉࡀ ࡂࡀࡈࡓࡀ ࡔࡃࡉࡁࡅࡍ ࡌࡀࡎࡐࡅࡈࡉࡀࡕࡀ ࡅࡕࡋࡀࡉࡕࡅࡍ ࡀࡁࡀࡕࡀࡓ ࡊࡅࡕࡋࡀࡉ ࡀࡅࡌࡉࡕࡉࡍࡅࡍ ࡅࡍࡉࡎࡁࡉࡕ ࡓࡀࡆࡀࡉࡅࡍ ࡖࡍࡅࡍࡉࡀ ࡈࡀࡁࡉࡀ ࡋࡀࡋࡀࡂࡈࡉࡀ ࡋࡀ ࡂࡀࡍࡁࡉࡋࡅࡍ ࡌࡉࡍࡀࡉ ࡅࡓࡀࡉࡐࡉࡋࡅࡍ ࡁࡒࡀࡉࡍࡀ ࡅࡌࡃࡀࡋࡉࡋࡅࡍ ࡅࡌࡐࡀࡎࡒࡉࡋࡅࡍ ࡅࡌࡀࡄࡉࡋࡅࡍ ࡊࡀࡅࡀࡓࡉࡀ ࡁࡓࡅࡍࡃࡉࡀ ࡅࡀࡋࡅࡀࡉ ࡅࡌࡉࡕࡉࡍࡅࡍ ࡖࡋࡀࡒࡀࡉࡌࡉࡀ ࡅࡋࡉࡄࡉࡀ ࡑࡀࡁࡉࡀ ࡅࡐࡀࡋࡕࡀ ࡁࡉࡀࡓࡃࡍࡀ ࡋࡀࡔࡀࡁࡒࡉࡀ ࡅࡋࡀࡒࡀࡉࡌࡉࡀ ࡁࡓࡉࡐࡉࡀ ࡅࡔࡀࡁࡉࡍ ࡔࡉࡁࡉࡀ ࡁࡄࡉࡅࡓࡉࡀ ࡋࡀࡓࡀࡌࡉࡍ ࡎࡉࡋࡉࡕࡀ ࡅࡊࡀࡅࡀࡓࡉࡀ ࡅࡀࡋࡅࡀࡉ ࡋࡀࡋࡀࡂࡈࡉࡀ ࡀࡌࡓࡉࡋࡅࡍ ࡖࡀࡊࡋࡉࡀ ࡃࡉࡒࡉࡀ ࡍࡅࡍࡀ ࡖࡂࡉࡓࡉࡕࡀ ࡔࡅࡌࡇ ࡀࡊࡋࡉࡋࡇ ࡋࡂࡉࡓࡉࡕࡀ ࡅࡋࡒࡅࡎࡀ ࡖࡆࡀࡒࡉࡐ ࡁࡏࡃࡇ ࡑࡀࡉࡃࡉࡋࡇ ࡄࡁࡍࡉࡍࡀ ࡏࡎࡓࡀ ࡏࡍࡉࡀࡍࡀ ࡀࡂࡈࡀࡓ ࡎࡀࡓࡊࡀࡋࡀ ࡌࡅࡔࡐࡉࡕࡀ ࡀࡎࡀࡓࡕࡉࡍࡅࡍ ࡁࡀࡂࡌࡉࡀ ࡖࡆࡉࡐࡀ ࡅࡔࡀࡁࡒࡉࡀ ࡅࡌࡉࡕࡓࡉࡂࡋࡉࡀ ࡋࡀࡔࡀࡕࡉࡍ ࡌࡉࡀ ࡖࡏࡅࡋࡀࡉ ࡅࡋࡀ ࡉࡀࡃࡉࡀ ࡏࡅࡄࡓࡀ ࡋࡉࡍࡄࡀࡓ ࡊࡔࡀࡔ ࡀࡎࡀࡓࡕࡉࡍࡅࡍ ࡁࡎࡐࡉࡍࡀࡕࡅࡍ ࡅࡔࡃࡉࡋࡅࡍ ࡀࡔࡋࡀࡉ ࡋࡈࡀࡁࡉࡀ ࡀࡌࡀࡓࡍࡀࡋࡅࡍ ࡄࡀࡊࡀ ࡕࡓࡅࡑ ࡌࡀࡊࡅࡕࡀࡉࡊࡅࡍ ࡖࡋࡀࡕࡉࡄࡅࡉࡀ ࡁࡓࡀࡊࡎࡀ ࡗ ࡄࡀࡆࡉࡍ ࡀࡌࡀࡓ ࡓࡉࡔࡀ ࡊࡀࡋࡉࡀ ࡌࡀࡋࡉࡋ ࡑࡀࡉࡃࡉࡀ ࡖࡍࡉࡌࡀࡓࡋࡇ ࡀࡁࡓࡉࡊࡉࡕ ࡑࡀࡉࡃࡀ ࡅࡁࡓࡉࡊࡀ ࡀࡓࡁࡀࡊ ࡅࡌࡀࡓࡊࡀࡁࡕࡀࡊ ࡊࡌࡀ ࡍࡀࡉࡀ ࡎࡉࡋࡉࡕࡀࡊ ࡄࡀࡆࡉࡍ ࡀࡊࡌࡀ ࡔࡀࡐࡉࡓ ࡀࡕࡀࡍࡀ ࡖࡏࡕࡁࡇ ࡔࡀࡐࡉࡓ ࡀࡔࡋࡀࡊ ࡅࡏࡎࡒࡀࡊ ࡖࡋࡀࡃࡀࡌࡉࡕ ࡋࡑࡀࡉࡃࡉࡀ ࡖࡀࡋࡌࡀ ࡋࡀࡕࡀࡍࡀࡊ ࡋࡉࡕࡁࡇ ࡄࡅࡌࡓࡉࡀ ࡅࡐࡀࡋࡕࡀࡊ ࡍࡅࡍࡉࡀ ࡋࡀࡋࡀࡂࡈࡀ ࡀࡌࡍࡀ ࡀࡕࡉࡕ ࡀࡌࡀࡓࡋࡀࡍ ࡖࡍࡉࡄࡅࡉࡀ ࡏࡂࡉࡓࡀࡊ ࡀࡍࡉࡍ ࡀࡐࡉࡍࡉࡍ ࡅࡄࡀࡁࡑࡉࡍࡉࡍ ࡅࡌࡀࡕࡉࡍࡉࡍ ࡋࡒࡅࡃࡀࡌࡀࡊ ࡀࡊࡅࡋ ࡅࡍࡉࡕࡓࡀ ࡖࡍࡀࡕࡀࡓ ࡌࡍ ࡏࡃࡀࡊ ࡍࡉࡊࡅࡋ ࡅࡍࡉࡎࡁࡀ ࡀࡍࡉࡍ ࡀࡌࡀࡓࡍࡀࡋࡅࡍ ࡉࡀ ࡑࡀࡉࡃࡉࡀ ࡖࡆࡅࡄࡌࡀ ࡎࡀࡓࡐࡉࡀ ࡋࡀࡅ ࡎࡀࡉࡃࡀ ࡀࡍࡀ ࡖࡑࡀࡉࡉࡃ ࡍࡅࡍࡉࡀ ࡅࡋࡀࡅ ࡖࡀࡊࡉࡋ ࡆࡅࡄࡌࡀ ࡏࡕࡉࡒࡓࡉࡕ ࡑࡀࡉࡃࡀ ࡀࡍࡀ ࡖ ࡍࡉࡔࡌࡀࡕࡀ ࡖࡁࡄࡉࡉࡀ ࡎࡀࡄࡃࡀࡍ ࡑࡀࡉࡃࡀ ࡀࡍࡀ ࡀࡍࡉࡀ ࡖࡒࡀࡓࡉࡋࡅࡍ ࡅࡌࡊࡀࡍࡉࡐࡋࡅࡍ ࡅࡌࡀࡎࡁࡀࡓࡋࡅࡍ ࡒࡀࡓࡉࡋࡅࡍ ࡅࡀࡌࡀࡓࡋࡅࡍ ࡖࡀࡕࡉࡍ ࡀࡋࡅࡀࡕࡀࡉ ࡊࡀࡍࡐࡉࡀ ࡀࡌࡀࡓࡋࡅࡍ ࡏࡅ ࡀࡕࡉࡕࡅࡍ ࡓࡀࡃࡀࡉࡉࡀ ࡌࡍ ࡑࡉࡐࡀࡓ ࡑࡀࡍࡕࡀ ࡕࡉࡕࡐࡀࡓࡒࡅࡍ ࡀࡍࡀ ࡀࡌࡐࡀࡓࡉࡒࡍࡅࡍ ࡋࡓࡀࡄࡌࡀࡉ ࡅࡌࡀࡎࡉࡒࡍࡅࡍ ࡅࡕࡀࡓࡉࡑࡍࡅࡍ ࡁࡀࡓࡁࡀࡉ ࡅࡌࡀࡋࡁࡉࡔࡍࡅࡍ ࡏࡑࡈࡋࡉࡀ ࡖࡆࡉࡅࡀ ࡅࡌࡊࡀࡎࡉࡍࡅࡍ ࡍࡄࡅࡓࡀ ࡉࡀࡒࡓࡀ ࡕࡀࡓࡑࡉࡍࡅࡍ ࡌࡍ ࡊࡋࡉࡋ ࡀࡉࡀࡓ ࡅࡌࡍ ࡖࡓࡁࡉࡀ ࡁࡓࡉࡔࡀࡉࡄࡅࡍ ࡕࡀࡓࡑࡉࡀ ࡉࡀࡕࡁࡉࡀ ࡏࡋ ࡊࡀࡓࡎࡀࡅࡀࡕࡀ ࡅࡁࡀࡉࡓࡉࡀ ࡁࡍࡄࡅࡓࡀ ࡉࡀࡒࡓࡀ ࡃࡀࡓࡀࡍࡅࡍ ࡅࡆࡀࡒࡉࡐࡍࡀ ࡅࡀࡍࡀࡕࡅࡍ ࡔࡅࡁࡀ ࡄࡀࡊࡀ ࡄࡅࡍ ࡌࡍࡀࡕ ࡆࡅࡄࡌࡀ ࡅࡆࡅࡄࡌࡉࡕࡀ ࡕࡉࡄࡅࡉࡀ ࡁࡌࡍࡀࡕࡊࡅࡍ ࡉࡅࡌࡀ ࡖࡍࡄࡅࡓࡀ ࡍࡉࡎࡀࡒ ࡍࡉࡕࡊࡀࡌࡀࡓ ࡄࡔࡅࡊࡀ ࡋࡃࡅࡊࡕࡇ ࡀࡍࡀ ࡅࡕࡀࡓࡌࡉࡃࡀࡉ ࡍࡉࡎࡀࡒ ࡍࡉࡄࡉࡆࡉࡇ ࡋࡀࡕࡀࡓ ࡍࡄࡅࡓ ࡌࡉࡔࡕࡀࡉࡉࡍ ࡄࡉࡉࡀ ࡅࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡑࡀࡉࡃࡀ ࡀࡍࡀ ࡖࡄࡉࡉࡀ ࡓࡁࡉࡀ ࡑࡀࡉࡃࡀ ࡀࡍࡀ ࡖࡄࡉࡉࡀ ࡓࡅࡓࡁࡉࡀ ࡑࡀࡉࡃࡀ ࡀࡍࡀ ࡖࡄࡉࡉࡀ ࡓࡁࡉࡀ ࡔࡋࡉࡄࡀ ࡖ ࡄࡉࡉࡀ ࡔࡀࡃࡓࡅࡍ ࡀࡌࡀࡓࡋࡉࡀ ࡏࡆࡀࡋ ࡑࡅࡃ ࡍࡅࡍࡉࡀ ࡖࡆࡅࡄࡌࡀ ࡋࡀࡊࡋࡉࡀ ࡍࡅࡍࡉࡀ ࡖࡋࡀࡊࡋࡉࡀ ࡔࡅࡍࡃࡀ ࡅࡑࡉࡍࡃࡀ ࡌࡎࡀࡓࡀࡉࡕࡀ ࡋࡀࡌࡀࡓࡄࡉࡀ ࡋࡀࡒࡀࡓࡁࡉࡀ ࡋࡏࡊࡉࡋࡕࡀ ࡖࡑࡉࡑࡉࡀ ࡅࡋࡀࡍࡒࡉࡀ ࡁࡋࡉࡄࡉࡀ ࡖࡀࡂࡌࡀ ࡄࡉࡉࡀ ࡂࡈࡀࡓࡋࡉࡀ ࡏࡎࡒࡀ ࡅࡁࡍࡀࡋࡉࡀ ࡀࡓࡁࡀ ࡖࡋࡀࡁࡀࡈࡋࡀ ࡀࡓࡁࡀ ࡖࡂࡀࡍࡐࡉࡇ ࡖࡆࡉࡅࡀ ࡅࡈࡀࡉࡎࡀ ࡅࡓࡀࡃࡉࡀ ࡅࡋࡀࡌࡔࡀࡌࡈࡀ ࡀࡓࡁࡀ ࡄࡏ ࡌࡀࡆࡓࡅࡕࡀ ࡅࡓࡀࡃࡉࡀ ࡁࡉࡋࡁࡀࡁ ࡏࡔࡅࡌࡉࡀ ࡀࡔࡋࡇ ࡀࡔࡋࡉࡀ ࡖࡆࡉࡅࡀ ࡅࡎࡅࡊࡀࡍࡀ ࡖࡊࡅࡔࡈࡀ ࡏࡕࡁࡇ ࡄࡀࡁࡔࡀࡁࡀ ࡋࡀࡂࡉࡈ ࡀࡓࡀࡃࡀ ࡅࡁࡓࡄࡉࡉࡀ ࡎࡅࡊࡀࡍࡀ ࡋࡂࡀࡈ ࡓࡀࡃࡉࡁࡅࡍ ࡋࡉࡔࡊࡉࡍࡀࡕࡀ ࡅࡌࡐࡀࡋࡂࡉࡀ ࡍࡄࡅࡓࡀ ࡁࡏࡅࡕࡓࡉࡀ ࡕࡓࡀࡑࡁࡅࡍ ࡊࡀࡓࡎࡀࡅࡀࡕࡀ ࡅࡍࡂࡉࡃࡉࡀ ࡀࡕࡅࡍ ࡉࡀࡓࡃࡍࡉࡀ ࡏࡋ ࡌࡄࡀࡓࡀ ࡌࡀࡕࡍࡀ ࡔࡓࡀࡂࡉࡀ ࡖࡁࡆࡉࡒࡉࡀ ࡌࡀࡓࡃࡉࡀ ࡋࡀࡃࡀࡉࡊࡉࡀ ࡊࡅࡋࡄࡅࡍ ࡀࡓࡁࡉࡀ ࡖࡄࡀࡆࡉࡋࡉࡀ ࡊࡀࡁࡔࡀࡍ ࡅࡋࡃࡉࡋࡉࡀ ࡎࡀࡂࡃࡀࡍ ࡊࡀࡁࡔࡀࡍ ࡅࡎࡀࡂࡃࡋࡉࡀ ࡅࡀࡕࡉࡍ ࡋࡃࡉࡋࡉࡀ ࡌࡉࡃࡉࡍࡀࡍ ࡏࡋ ࡌࡄࡀࡓࡀ ࡒࡀࡉࡉࡌ ࡑࡀࡉࡃࡀ ࡅࡃࡀࡓࡉࡔ ࡃࡓࡀࡔࡉࡀ ࡔࡀࡍࡉࡀ ࡔࡓࡀࡂࡉࡀ ࡖ ࡋࡀࡓࡀࡃࡉࡀ ࡀࡐࡕࡉࡋࡉࡀࡕࡀ ࡁࡀࡓࡂࡀࡐࡀ ࡋࡅࡀࡕࡇ ࡋࡏࡊࡀ ࡏࡎࡓࡅࡕࡀ ࡋࡉࡕࡋࡇ ࡖࡆࡉࡐࡀ ࡅࡌࡀࡍࡉࡀ ࡄࡉࡅࡀࡓࡉࡀ ࡋࡁࡉࡔ ࡒࡀࡓࡉࡋࡅࡍ ࡋࡍࡅࡍࡉࡀ ࡉࡀࡌࡀ ࡅࡀࡌࡀࡓࡋࡅࡍ ࡏࡆࡃࡀࡄࡀࡓ ࡁࡀࡋࡌࡀ ࡏࡆࡃࡀࡄࡓࡅࡋࡉࡀ ࡁࡍࡀࡐࡔࡀࡉࡊࡅࡍ ࡌࡍ ࡑࡉࡐࡀࡓ ࡑࡀࡍࡕࡀ ࡖࡏࡋࡀࡅࡀࡉࡊࡅࡍ ࡏࡅ ࡕࡉࡆࡃࡀࡄࡓࡅࡋࡉࡀ ࡀࡄࡀࡉ ࡏࡒࡅࡌ ࡏࡄࡅࡉࡋࡊࡅࡍ ࡁࡀࡄࡉࡃ ࡏࡃࡀ ࡀࡄࡉࡃ ࡏࡃࡀ ࡅࡎࡉࡌࡀࡊࡀ ࡌࡍ ࡀࡕࡀࡓ ࡄࡔࡅࡊ ࡋࡀࡕࡀࡓ ࡍࡄࡅࡓ ࡌࡉࡔࡕࡀࡉࡉࡍ ࡄࡉࡉࡀ ࡅࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡑࡀࡉࡃࡀ ࡋࡁࡀࡔ ࡏࡑࡈࡋࡉࡀ ࡖࡆࡉࡅࡀ ࡅࡍࡀࡓࡂࡀ ࡕࡋࡉࡋࡇ ࡋࡊࡀࡃࡐࡇ ࡀࡋࡃࡉࡁࡉࡀ ࡅࡌࡀࡓࡂࡅࡔࡀ ࡖࡏࡅࡋࡀ ࡅࡆࡀࡍࡂࡀ ࡋࡏࡊࡀ ࡁࡍࡀࡂࡓࡀ ࡑࡀࡉࡃࡉࡀ ࡖࡄࡉࡆࡉࡅࡉࡀ ࡋࡑࡀࡉࡃࡀ ࡀࡕࡉࡍ ࡀࡋࡅࡀࡕࡇ ࡊࡀࡍࡐࡉࡀ ࡀࡌࡓࡉࡋࡇ ࡑࡀࡉࡃࡀ ࡀࡍࡀࡕ ࡂࡀࡃࡀࡉࡀ ࡖࡍࡅࡍࡉࡀ ࡖ ࡀࡂࡌࡀ ࡋࡀࡑࡉࡃࡋࡀࡊ ࡋࡀࡄࡆࡉࡋࡀࡊ ࡏࡊࡉࡋࡕࡀ ࡖࡍࡅࡍࡉࡀ ࡁࡂࡀࡅࡀࡉࡄࡅࡍ ࡊࡀࡍࡐࡉࡀ ࡏࡊࡉࡋࡕࡀ ࡀࡍࡀࡕ ࡎࡉࡌࡀࡊࡀ ࡀࡍࡉࡍ ࡌࡀࡋࡐࡉࡍࡀࡋࡀࡊ ࡁࡑࡀࡉࡃࡉࡀ ࡄࡀࡅࡉࡕ ࡁࡔࡅࡕࡀࡐࡀࡍ ࡓࡁࡀ ࡅࡌࡍࡀࡕࡀ ࡗ ࡃࡉࡋࡀࡊ ࡍࡀࡎࡁࡉࡕ ࡀࡄࡁࡀࡋࡀࡍ ࡌࡍࡀࡕࡀ ࡁࡀࡓࡁࡀࡊ ࡌࡍࡀࡕࡀ ࡁࡀࡓࡁࡀࡍ ࡍࡀࡎࡁࡉࡕ ࡒࡅࡌ ࡔࡀࡕࡉࡐ ࡍࡀࡎࡁࡉࡕ ࡌࡉࡍࡀࡉࡀࡍ ࡅࡄࡁࡀࡋࡀࡍ ࡌࡍࡀࡕࡀ ࡁࡀࡓࡁࡀࡊ ࡀࡍࡀࡕ ࡀࡄࡁࡀࡋࡀࡍ ࡌࡍࡀࡕࡀ ࡌࡍࡀࡕࡀ ࡀࡍࡉࡍ ࡍࡀࡉࡕࡉࡋࡀࡊ ࡌࡍ ࡖࡏࡕࡋࡀࡍ ࡅࡏࡎࡐࡉࡍࡕࡀࡊ ࡏࡅࡓࡁࡇ ࡁࡎࡐࡉࡍࡕࡀࡍ ࡅࡋࡁࡅࡔ ࡏࡊࡅࡌࡀ ࡗ ࡃࡉࡋࡀࡍ ࡖࡊࡖ ࡃࡀࡋࡉࡕ ࡔࡓࡀࡂࡀࡊ ࡌࡀࡔࡊࡉࡕ ࡖࡋࡀࡄࡀࡆࡉࡋࡇ ࡍࡅࡍࡉࡀ ࡋࡑࡉࡄࡌࡀࡊ ࡅࡀࡓࡁࡀࡊ ࡍࡅࡍࡉࡀ ࡌࡀࡉࡋࡀ ࡏࡅ ࡔࡀࡌࡉࡕ ࡑࡀࡉࡃࡉࡕ ࡍࡅࡍࡉࡀ ࡅࡓࡀࡌࡉࡕ ࡁࡀࡓࡁࡀࡊ ࡅࡌࡉࡕࡀࡍࡂࡉࡓࡉࡕ ࡏࡅ ࡔࡅࡕࡀࡐࡀࡍ ࡋࡀࡔࡀࡌࡉࡕ ࡌࡉࡄࡋࡀ ࡀࡊࡋࡉࡕ ࡏࡅ ࡀࡁࡃࡉࡕ ࡏࡁࡉࡃࡀࡕࡀࡍ ࡃࡉࡋࡀࡍ ࡌࡉࡔࡀ ࡅࡃࡅࡁࡔࡀ ࡀࡊࡋࡉࡕ ࡄࡀࡁࡑࡉࡕ ࡅࡌࡀࡋࡉࡕ ࡊࡀࡎࡉࡀ ࡅࡌࡐࡀࡋࡂࡉࡕ ࡁࡑࡀࡉࡃࡉࡀ ࡊࡅࡋࡄࡅࡍ ࡅࡌࡔࡀࡅࡉࡍࡀࡋࡀࡊ ࡓࡉࡔ ࡊࡅࡋࡀࡉࡀࡍ ࡀࡋࡅࡀࡕࡀࡊ ࡊࡀࡍࡐࡉࡀ ࡓࡉࡔ ࡊࡅࡋࡀࡉࡀࡍ ࡒࡀࡃࡌࡀࡉࡉࡀ ࡀࡕࡉࡍ ࡄࡀࡅࡉࡍ ࡌࡍ ࡀࡁࡀࡕࡓࡀࡊ ࡄࡀࡅࡉࡋࡀࡊ ࡀࡓࡒࡀ ࡁࡉࡂࡀࡓ ࡅࡍࡀࡎࡁࡉࡕ ࡀࡕࡋࡀࡕࡀ ࡌࡍ ࡖࡏࡕࡋࡀࡍ ࡀࡁࡅࡉࡀࡍ ࡄࡀࡅࡉࡀ ࡀࡁࡃࡀࡊ ࡅࡀࡍࡉࡍ ࡄࡀࡅࡉࡍࡉࡍ ࡌࡔࡕࡀࡌࡀࡍࡀࡊ ࡍࡉࡕࡒࡓࡉࡀ ࡏࡌࡀࡉࡀࡍ ࡁࡓࡀࡁࡉࡕࡀࡊ ࡉࡀࡕࡁࡀ ࡅࡋࡉࡄࡉࡀ ࡂࡀࡈࡓࡀ ࡀࡕࡉࡀ ࡅࡄࡀࡅࡉࡀ ࡀࡌࡕࡀࡊ ࡅࡂࡀࡈࡓࡀࡋࡀࡊ ࡏࡆࡋࡉࡀ ࡖࡏࡂࡅࡀࡍ ࡂࡅࡀࡍ ࡌࡐࡀࡋࡂࡀࡋࡅࡍ ࡋࡔࡅࡄࡉࡀ ࡅࡀࡁࡀࡓࡉࡀ ࡁࡀࡕࡀࡍࡀ ࡓࡀࡌࡉࡀ ࡏࡕࡀࡍࡀ ࡏࡕࡀࡍࡀ ࡖࡊࡀࡃࡉࡓ ࡌࡉࡍࡇ ࡌࡍ ࡀࡋࡌࡀ ࡌࡐࡀࡋࡂࡀࡋࡅࡍ ࡋࡌࡉࡀ ࡁࡏࡆࡋࡉࡀ ࡗ ࡀࡉࡋࡉࡀ ࡍࡅࡍࡉࡀ ࡅࡌࡉࡎࡕࡀࡊࡓࡉࡀ ࡋࡀࡉࡀࡃࡉࡍ ࡏࡅࡄࡓࡀ ࡖ ࡎࡀࡉࡓࡉࡀ ࡅࡋࡀࡉࡀࡃࡉࡀ ࡋࡌࡉࡄࡃࡅࡓࡉࡀ ࡋࡏࡅࡄࡓࡀࡉࡄࡅࡍ ࡗ ࡔࡅࡓࡉࡀ ࡖࡍࡉࡐࡉࡓࡒࡅࡍ ࡀࡕࡉࡍ ࡅࡍࡀࡐࡋࡉࡀ ࡋࡈࡀࡁࡉࡀ ࡋࡀࡔࡀࡁࡒࡉࡀ ࡍࡅࡍࡉࡀ ࡖࡆࡀࡒࡐࡉࡀ ࡅࡋࡀࡌࡉࡄࡃࡀࡓ ࡀࡍࡐࡇ ࡋࡓࡀࡊࡎࡀ ࡈࡀࡉࡁࡉࡋࡅࡍ ࡌࡍ ࡒࡉࡐࡉࡀ ࡅࡀࡁࡉࡄࡃࡉࡀ ࡊࡋࡉࡋࡀ ࡊࡀࡋࡉࡀ ࡃࡀࡓࡉࡋࡅࡍ ࡁࡃࡉࡂࡅࡓࡉࡀ ࡅࡈࡀࡓࡉࡋࡅࡍ ࡌࡉࡍࡇ ࡌࡍ ࡀࡈࡀࡓࡉࡀ ࡏࡕࡋࡇ ࡁࡀࡆࡍࡀࡒࡉࡕࡀ ࡖ ࡀࡉࡋࡉࡋࡇ ࡍࡅࡍࡉࡀ ࡅࡌࡉࡎࡕࡀࡊࡓࡉࡀ ࡏࡋ ࡂࡉࡔࡉࡀ ࡖࡁࡀࡆࡍࡀࡒࡉࡕࡀ ࡌࡉࡕࡓࡉࡑ ࡓࡌࡉࡋࡇ ࡆࡀࡓࡂࡀ ࡀࡁࡉࡍࡉࡀ ࡏࡕࡓࡉࡍ ࡌࡀࡄࡅࡍࡉࡀ ࡓࡌࡉࡋࡇ ࡋࡉࡄࡉࡀ ࡅࡕࡉࡁࡉࡀ ࡕࡅࡓࡉࡀ ࡌࡋࡏࡉࡀ ࡑࡉࡑࡉࡀ ࡏࡊࡅࡋࡉࡀ ࡖࡌࡅࡕࡀ ࡌࡀࡅࡊࡋࡉࡀ ࡅࡀࡉࡋࡇ ࡋࡍࡅࡍࡀ ࡖࡁࡋࡉࡒࡋࡅࡍ ࡖࡀࡉࡍࡇ ࡍࡄࡅࡓࡀ ࡋࡀࡄࡀࡆࡉࡀ ࡄࡀࡊࡉࡌࡉࡀ ࡍࡅࡍࡉࡀ ࡖࡉࡀࡃࡉࡋࡅࡍ ࡄࡀࡋࡐࡉࡋࡅࡍ ࡋࡅࡊࡅࡋࡉࡀ ࡊࡅࡋࡄࡅࡍ ࡀࡆࡋࡉࡀ ࡅࡀࡍࡒࡉࡀ ࡅࡋࡉࡄࡉࡀ ࡄࡀࡕࡀࡌ ࡄࡀࡅࡉࡋࡅࡍ ࡌࡀࡓࡁࡉࡄࡕࡀ ࡖࡄࡀࡃ ࡌࡍ ࡀࡋࡐࡀ ࡄࡀࡆࡉࡋࡇ ࡅࡌࡍ ࡀࡕࡓࡉࡍ ࡀࡋࡐࡉࡀ ࡄࡀࡆࡉࡋࡇ ࡀࡕࡓࡉࡍ ࡍࡀࡂࡇ ࡀࡋࡂࡉࡈࡀ ࡅࡆࡀࡍࡂࡀ ࡕࡋࡉࡋࡇ ࡏࡋ ࡁࡀࡁࡕࡀ ࡆࡀࡍࡂࡀ ࡖࡄࡔࡉࡋ ࡁࡏࡅࡋࡀ ࡖࡔࡀࡁࡉࡋࡅࡍ ࡏࡋ ࡊࡅࡋࡄࡅࡍ ࡀࡋࡌࡉࡀ ࡄࡀࡕࡀࡌ ࡌࡉࡀ ࡌࡆࡉࡂࡉࡀ ࡖࡑࡉࡍࡃࡉࡀ ࡊࡁࡀࡔ ࡌࡍࡀࡃࡓࡀ ࡅࡎࡉࡊࡉࡀ ࡖࡌࡅࡕࡀ ࡅࡀࡉࡋࡉࡍࡅࡍ ࡀࡋࡍࡅࡍࡉࡀ ࡖࡀࡉࡋࡉࡍࡅࡍ ࡗ ࡄࡀࡆࡉࡍ ࡔࡅࡌࡀ ࡑࡀࡉࡃࡀ ࡁࡉࡈࡅࡔࡕࡀ ࡋࡌࡄࡀࡓࡀ ࡁࡈࡀࡔ ࡁࡉࡈࡅࡔࡕࡀ ࡁࡈࡀࡔ ࡑࡀࡉࡃࡀ ࡏࡋ ࡎࡐࡉࡍࡀࡕࡀ ࡖࡑࡀࡉࡃࡉࡀ ࡑࡀࡉࡃࡉࡀ ࡒࡐࡅࡍ ࡁࡄࡀࡅࡓࡉࡀ ࡅࡌࡎࡀࡁࡈࡉࡀ ࡗ ࡀࡁࡅࡓࡉࡀ ࡅࡋࡀࡎࡀࡋࡒࡉࡀ ࡒࡀࡉࡍࡀ ࡍࡀࡒࡉࡔ ࡅࡀࡆࡋࡀ ࡅࡍࡅࡍࡉࡀ ࡖࡀࡌࡀࡌࡉࡀ ࡔࡀࡊࡉࡁ ࡏࡋ ࡑࡀࡉࡃࡉࡀ ࡓࡀࡈࡍࡉࡀ ࡁࡀࡂࡌࡀ ࡅࡌࡉࡀ ࡊࡓࡉࡊࡕࡀ ࡏࡕࡉࡊࡓࡉࡊ ࡌࡀࡋࡉࡋ ࡅࡑࡍࡀࡐࡁࡇ ࡁࡒࡀࡋࡇ ࡌࡀࡋࡉࡋ ࡁࡒࡀࡋࡇ ࡔࡀࡍࡉࡀ ࡀࡌࡀࡓࡋࡅࡍ ࡏࡋ ࡑࡀࡉࡃࡉࡀ ࡍࡅࡍࡉࡀ ࡀࡕࡅࡍ ࡌࡍ ࡒࡅࡃࡀࡌࡀࡉ ࡑࡀࡉࡃࡉࡀ ࡑࡄࡀࡍࡉࡀ ࡑࡀࡉࡃࡉࡀ ࡀࡁࡃࡉࡀ ࡎࡀࡌࡀࡍࡉࡀ ࡏࡆࡉࡋ ࡏࡆࡉࡋ ࡑࡅࡃ ࡍࡅࡍࡉࡀ ࡖࡆࡅࡄࡌࡉࡕࡀ ࡖࡍࡀࡐࡔࡀࡉࡊࡅࡍ ࡍࡈࡅࡓ ࡔࡐࡅࡋ ࡏࡆࡉࡋ ࡋࡊࡀࡉࡀࡕࡊࡅࡍ ࡅࡀࡎࡂࡅࡍ ࡋࡃࡉࡍࡁࡀ ࡖࡏࡃࡉࡀ ࡋࡀ ࡑࡀࡉࡃࡀ ࡀࡍࡀ ࡖࡑࡀࡉࡉࡃ ࡍࡅࡍࡉࡀ ࡅࡍࡅࡍࡉࡀ ࡃࡉࡋࡉࡀ ࡌࡁࡀࡔࡒࡓࡉࡀ ࡋࡀࡌࡉࡕࡋࡉࡂࡈࡉࡀ ࡁࡊࡅࡋࡀࡁ ࡑࡉࡑࡉࡀ ࡏࡊࡅࡋࡀ ࡖࡍࡅࡍࡉࡀ ࡋࡀࡊࡋࡉࡀ ࡋࡀࡍࡒࡉࡀ ࡁࡋࡉࡄࡉࡀ ࡖࡑࡁࡉࡀ ࡅࡁࡔࡓࡀࡂࡉࡀ ࡖࡊࡀࡃࡁࡀ ࡋࡀࡑࡀࡌࡓࡉࡀ ࡋࡀࡔࡀࡐࡋࡉࡀ ࡌࡍ ࡒࡉࡐࡉࡀ ࡌࡉࡀ ࡅࡏࡋ ࡁࡀࡆࡍࡀࡒࡉࡕࡀ ࡖࡆࡉࡐࡀ ࡋࡀࡆࡋࡉࡍ ࡅࡋࡀࡐࡀࡋࡂࡉࡀ ࡌࡉࡀ ࡖࡁࡀࡉࡉࡍ ࡖࡍࡉࡐࡋࡅࡍ ࡋࡈࡀࡁࡉࡀ ࡏࡅ ࡑࡀࡉࡃࡉࡀ ࡓࡀࡌࡉࡍ ࡏࡋࡅࡍ ࡎࡉࡋࡉࡕࡀ ࡐࡀࡓࡃࡉࡋࡇ ࡋࡎࡉࡋࡉࡕࡀ ࡅࡍࡀࡐࡒࡉࡀ ࡋࡀࡍࡉࡄࡅࡉࡀ ࡉࡅࡌࡀ ࡁࡕࡉࡁࡉࡋ ࡖࡍࡅࡍࡉࡀ ࡑࡀࡉࡃࡉࡋࡅࡍ ࡑࡀࡉࡃࡉࡀ ࡋࡀࡍࡉࡄࡅࡉࡀ ࡉࡅࡌࡀ ࡁࡕࡉࡁࡉࡋ ࡖࡉࡀࡅࡍࡀ ࡌࡓࡀࡄࡌࡀ ࡏࡅࡓࡁࡀ ࡋࡉࡈࡉࡕࡅࡍ ࡑࡉࡐࡓࡉࡀ ࡑࡀࡍࡕࡀ ࡅࡋࡉࡈࡀ ࡔࡅࡓࡁࡀࡕࡊࡅࡍ ࡖࡋࡀࡌࡀࡋࡉࡀ ࡅࡀࡉࡋࡇ ࡋࡀࡁࡅࡊࡅࡍ ࡎࡉࡓࡌࡀ ࡖࡌࡀࡓࡁࡉࡄࡕࡇ ࡁࡒࡀࡋࡌࡉࡀ ࡄࡀࡅࡉࡀ ࡅࡀࡉࡋࡀࡊ ࡎࡀࡐࡍࡀ ࡊࡀࡐࡍࡀ ࡖࡊࡀࡍࡐࡀࡊ ࡁࡕࡉࡁࡉࡋ ࡋࡀ ࡉࡀࡁࡔࡀ ࡅࡀࡉࡋࡀࡊ ࡎࡀࡂࡉࡀ ࡎࡀࡓࡉࡀ ࡖࡄࡀࡆࡉࡀ ࡍࡅࡍࡉࡀ ࡅࡌࡉࡕࡀࡍࡀ ࡒࡀࡄࡃࡀ ࡅࡁࡀࡊࡉࡀ ࡁࡉࡌࡓࡀࡓ ࡗ ࡌࡀࡄࡉࡀ ࡍࡅࡍࡉࡀ ࡅࡋࡀࡌࡀࡔࡊࡉࡀ ࡅࡀࡉࡋࡉࡊ ࡀࡓࡁࡀࡍࡀ ࡐࡀࡎࡀ ࡖࡌࡍ ࡏࡅࡌࡒࡉࡀ ࡍࡅࡍࡉࡀ ࡍࡀࡎࡁࡀ ࡈࡅࡁࡇ ࡋࡌࡀࡍ ࡖࡍࡉࡕࡐࡀࡓࡀࡒ ࡌࡍ ࡈࡅࡐࡓࡉࡀ ࡖࡍࡅࡍࡉࡀ ࡋࡀࡂࡈࡉࡀ ࡈࡅࡁࡇ ࡋࡌࡀࡍ ࡖ ࡍࡉࡕࡐࡀࡓࡀࡒ ࡌࡍ ࡂࡅࡁࡓࡉࡀ ࡖࡕࡉࡁࡉࡋ ࡍࡀࡈࡓࡉࡀ ࡏࡆࡉࡋ ࡏࡆࡉࡋ ࡔࡉࡁࡉࡀࡄࡉࡀ ࡌࡍࡀ ࡁࡀࡕࡀࡉࡊࡅࡍ ࡄࡅࡍ ࡌࡉࡀ ࡁࡒࡉࡓࡀ ࡋࡀࡓࡁࡉࡀ ࡅࡍࡄࡅࡓࡀ ࡁࡄࡔࡅࡊࡀ ࡋࡀࡌࡉࡕࡉࡌࡍࡉࡀ ࡔࡅࡕࡀࡐࡀ ࡖࡔࡀࡋࡌࡀࡍࡉࡀ ࡔࡅࡕࡀࡐࡊࡅࡍ ࡃࡉࡋࡊࡅࡍ ࡋࡀࡌࡉࡕࡉࡒࡓࡉࡀ ࡈࡀࡁࡀ ࡋࡀࡅ ࡌࡍ ࡈࡀࡁࡉࡀ ࡅࡁࡉࡔࡀ ࡌࡍ ࡁࡉࡔࡉࡀ ࡋࡀࡅࡉࡀ ࡅࡋࡀࡓࡁࡀࡉࡊࡅࡍ ࡀࡓࡁࡀ ࡁࡀࡓࡁࡀࡉ ࡅࡋࡀ ࡏࡎࡒࡕࡀࡉࡊࡅࡍ ࡁࡏࡎࡉࡒࡕࡀࡉ ࡌࡉࡕࡀࡕࡍࡀ ࡄࡀࡆࡉࡍ ࡓࡉࡔ ࡊࡅࡋࡀࡉࡊࡅࡍ ࡀࡍࡀࡕࡅࡍ ࡌࡀࡋࡊࡅࡕࡇ ࡄࡅࡍ ࡄࡀࡆࡉࡍ ࡀࡁࡅࡉࡀࡉࡊࡅࡍ ࡁࡅࡓࡀ ࡁࡌࡉࡀ ࡎࡉࡀࡅࡉࡀ ࡏࡎࡕࡀࡊࡀࡓ ࡏࡌࡀࡉࡊࡅࡍ ࡖࡂࡀࡈࡓࡀ ࡋࡉࡄࡉࡀ ࡅࡌࡀࡄࡅࡍࡉࡀ ࡕࡀࡅࡌࡉࡀ ࡊࡀࡃࡓࡉࡀ ࡁࡌࡀࡓࡂࡍࡀ ࡖࡌࡉࡀ ࡌࡄࡀࡉࡕࡇ ࡅࡐࡋࡀࡂࡉࡋࡇ ࡁࡓࡉࡔࡇ ࡐࡋࡅࡂࡕࡀ ࡀࡍࡀ ࡀࡋࡓࡀࡄࡌࡀࡉ ࡃࡀࡁࡀࡓࡍࡅࡍ ࡅࡕࡀࡓࡉࡑࡍࡅࡍ ࡁࡎࡐࡉࡍࡕࡀࡉ ࡅࡌࡀࡄࡋࡉࡐࡍࡅࡍ ࡊࡅࡋࡄࡅࡍ ࡌࡀࡊࡎࡉࡀ ࡌࡀࡄࡋࡉࡐࡉࡍࡅࡍ ࡌࡀࡓࡁࡀ ࡖࡏࡅࡋࡀ ࡃࡅࡊࡕࡀ ࡖࡍࡅࡍࡉࡀ ࡌࡉࡕࡋࡉࡂࡈࡉࡍ ࡌࡀࡅࡒࡉࡓࡉࡍࡅࡍ ࡌࡍ ࡀࡊࡋࡉࡀ ࡖࡍࡅࡍࡉࡀ ࡅࡀࡍࡀࡕࡅࡍ ࡎࡀࡉࡐࡉࡕࡅࡍ ࡁࡔࡊࡉࡍࡀࡕࡊࡅࡍ ࡀࡍࡀ ࡅࡓࡀࡄࡌࡀࡉ ࡖࡊࡅࡔࡈࡀ ࡁࡀࡔࡊࡉࡍࡕࡀ ࡖࡄࡉࡉࡀ ࡍࡉࡔࡕࡊࡉࡍ ࡃࡀࡋࡉࡍࡅࡍ ࡁࡊࡀࡓࡎࡀࡅࡀࡕࡀ ࡀࡕࡅࡕࡉࡀ ࡀࡃࡓࡀࡁࡔࡉࡀ ࡕࡀࡒࡍࡉࡀ ࡔࡅࡁࡀ ࡄࡅࡍ ࡁࡄࡀࡉࡀࡁࡉࡀ ࡅࡂࡀࡁࡓࡀ ࡍࡅࡊࡓࡀࡉࡀ ࡆࡊࡀ ࡂࡀࡁࡓࡀ ࡁࡄࡉࡓ ࡆࡉࡃࡒࡀ ࡆࡊࡀ ࡅࡆࡀࡊࡉࡀ ࡋࡊࡅࡋࡇ ࡔࡅࡓࡅࡁࡕࡇ ࡌࡉࡔࡕࡀࡉࡉࡍ ࡄࡉࡉࡀ ࡅࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡒࡀࡋࡀ ࡖࡑࡀࡉࡃࡀ ࡃࡀࡊࡉࡀ ࡖࡒࡀࡓࡉࡀ ࡅࡌࡀࡐࡓࡉࡔ ࡁࡄࡀࡅࡓࡉࡀ ࡋࡍࡅࡍࡉࡀ ࡉࡀࡌࡀࡌࡉࡀ ࡅࡀࡌࡀࡓࡋࡅࡍ ࡋࡊࡀࡉࡀࡕࡊࡅࡍ ࡕࡓࡅࡑ ࡆࡒࡅࡐࡉࡅࡍ ࡀࡋࡀࡍࡐࡉࡀ ࡌࡉࡀ ࡖࡄࡀࡉࡋࡀࡉࡊࡅࡍ ࡄࡀࡅࡉࡀ ࡋࡄࡀࡃ ࡕࡓࡉࡍ ࡏࡆࡃࡀࡄࡓࡅࡋࡉࡀ ࡌࡍ ࡑࡀࡉࡃࡉࡀ ࡖࡍࡅࡍࡉࡀ ࡑࡀࡉࡃࡉࡀ ࡖࡔࡀࡒࡐࡉࡀ ࡋࡉࡀࡓࡃࡍࡀ ࡋࡀࡉࡈࡉࡋࡅࡍ ࡔࡉࡋࡌࡀࡉ ࡅࡍࡉࡃࡁࡀࡉ ࡅࡀࡆࡀࡋ ࡅࡔࡊࡅࡍ ࡏࡋ ࡀࡁࡀࡕࡓࡀࡉ ࡏࡋ ࡐࡀࡓࡎࡀ ࡅࡎࡋࡉࡕࡅࡍ ࡍࡅࡍࡉࡀ ࡋࡀࡉࡈࡉࡀ ࡑࡀࡄࡅࡀ ࡏࡋ ࡃࡅࡊࡕࡀࡉࡄࡅࡍ ࡗ ࡄࡀࡆࡉࡍ ࡀࡌࡀࡓ ࡑࡀࡉࡃࡀ ࡆࡀࡄࡓࡉࡍࡅࡍ ࡋࡊࡅࡋࡄࡅࡍ ࡑࡀࡉࡃࡉࡀ ࡖࡔࡉࡌࡅࡉࡀ ࡋࡒࡀࡋࡇ ࡀࡕࡉࡍ ࡀࡋࡅࡀࡕࡇ ࡊࡀࡍࡐࡉࡍ ࡒࡀࡉࡌࡉࡀ ࡅࡌࡔࡀࡉࡋࡉࡋࡇ ࡅࡋࡀࡉࡀࡃࡉࡍ ࡖࡌࡍࡀ ࡀࡕࡀ ࡀࡌࡓࡉࡋࡇ ࡄࡀࡊࡀ ࡄࡅࡉࡕ ࡑࡀࡉࡃࡀ ࡖࡋࡀࡔࡀࡌࡀࡍࡀ ࡋࡒࡀࡋࡀࡊ ࡁࡀࡂࡌࡀ ࡅࡋࡀࡓࡁࡀࡊ ࡃࡀࡌࡉࡀ ࡋࡀࡓࡁࡀࡍ ࡅࡋࡀࡕࡀࡋࡀࡊ ࡀࡁࡉࡍࡉࡀ ࡄࡏ ࡋࡀࡌࡒࡀࡉࡓࡀ ࡀࡓࡁࡀࡊ ࡁࡒࡅࡐࡓࡀ ࡅࡋࡀࡃࡀࡌࡉࡕ ࡏࡋ ࡑࡀࡉࡃࡉࡀ ࡖࡀࡋࡌࡀ ࡄࡀࡆࡉࡋࡇ ࡑࡀࡉࡃࡉࡀ ࡔࡀࡄࡌࡉࡀ ࡅࡁࡀࡄࡕࡉࡀ ࡅࡒࡀࡉࡌࡉࡀ ࡏࡋ ࡃࡅࡊࡕࡀࡉࡄࡅࡍ ࡀࡌࡓࡉࡋࡇ ࡑࡀࡉࡃࡉࡀ ࡋࡌࡀࡋࡀࡊ ࡖࡑࡀࡉࡃࡉࡕ ࡅࡋࡀࡌࡀࡔࡊࡉࡕ ࡎࡐࡉࡍࡕࡀࡊ ࡋࡀࡃࡀࡌࡉࡀ ࡋࡎࡐࡉࡍࡕࡀࡍ ࡑࡀࡄࡌࡀ ࡁࡋࡉࡋࡉࡀ ࡗ ࡔࡀࡌࡉࡔ ࡀࡓࡁࡀࡊ ࡂࡌࡉࡓࡀ ࡁࡀࡉࡀࡓ ࡅࡍࡂࡉࡃࡁࡇ ࡀࡃࡓࡀࡁࡔࡉࡀ ࡔࡀࡍࡉࡀ ࡀࡓࡁࡀࡍ ࡀࡆࡋࡀ ࡁࡌࡉࡀ ࡅࡀࡓࡁࡀࡊ ࡀࡆࡋࡀ ࡁࡉࡍࡉࡀ ࡌࡀࡉ ࡋࡌࡀࡉ ࡒࡀࡉࡍࡉࡀ ࡃࡉࡋࡀࡍ ࡖࡀࡂࡌࡀࡍ ࡖࡓࡀࡈࡍࡉࡀ ࡄࡃࡀࡃࡉࡀ ࡅࡕࡀࡁࡓࡉࡀ ࡏࡕࡁࡅࡍ ࡐࡀࡋࡕࡀ ࡖࡓࡅࡂࡆࡀ ࡄࡀࡅࡎࡉࡀ ࡅࡓࡉࡅࡉࡀ ࡋࡉࡕࡁࡇ ࡆࡀࡊࡀࡉࡕࡀ ࡃࡉࡋࡀࡊ ࡑࡀࡉࡃࡀ ࡖࡄࡀࡆࡉࡋࡇ ࡍࡅࡍࡉࡀ ࡅࡌࡉࡕࡓࡀࡄࡒࡉࡀ ࡋࡀࡄࡀࡆࡉࡋࡀࡍ ࡑࡀࡉࡃࡉࡀ ࡖࡃࡀࡌࡉࡋࡀࡊ ࡖ ࡆࡉࡒࡀ ࡁࡀࡓࡁࡀࡊ ࡃࡀࡓࡀ ࡎࡒࡉࡓࡉࡀ ࡌࡀࡋࡀ ࡋࡑࡀࡉࡃࡀ ࡅࡎࡅࡊࡀࡍࡀ ࡖࡍࡀࡄࡍࡀࡓ ࡁࡄࡀࡅࡓࡉࡀ ࡀࡎࡋࡉࡕࡀࡊ ࡋࡉࡕࡁࡇ ࡀࡔࡋࡀ ࡅࡂࡀࡑࡅࡑࡀ ࡁࡂࡀࡅࡇ ࡋࡀࡄࡃࡀࡓ ࡀࡔࡄࡉࡀ ࡋࡉࡕࡁࡇ ࡖࡍࡉࡊࡋࡀ ࡄࡀࡅࡉࡋࡇ ࡋࡍࡅࡍࡉࡀ ࡖࡏࡅࡓࡉࡀ ࡖࡏࡆࡋࡀࡊ ࡋࡀࡂࡈࡉࡕ ࡁࡂࡅࡐࡕࡀ ࡅࡍࡀࡂࡔࡀ ࡅࡐࡉࡋࡒࡀ ࡋࡉࡕࡋࡀࡊ ࡏࡆࡋࡀࡊ ࡋࡀࡔࡀࡋࡉࡁ ࡌࡉࡀ ࡅࡋࡀ ࡑࡁࡉࡀ ࡖࡍࡅࡍࡉࡀ ࡋࡀࡂࡈࡀ ࡗ ࡄࡀࡆࡉࡍ ࡀࡌࡀࡓ ࡑࡀࡉࡃࡉࡀ ࡌࡀࡋࡉࡋ ࡑࡀࡉࡃࡀ ࡖࡍࡉࡌࡀࡓࡋࡅࡍ ࡀࡄࡀࡉ ࡑࡀࡉࡃࡉࡀ ࡅࡁࡍࡀࡉ ࡑࡀࡉࡃࡉࡀ ࡏࡆࡀࡋ ࡌࡍ ࡒࡅࡃࡀࡌࡀࡉ ࡆࡄࡅࡍ ࡏࡆࡉࡋ ࡎࡋࡅࡒ ࡋࡌࡀࡕࡀࡉࡊࡅࡍ ࡄࡅࡓࡁࡀ ࡖࡏࡅࡓࡀࡔࡋࡀࡌ ࡔࡀࡉࡋࡅࡉࡀ ࡏࡋࡀࡉ ࡋࡀࡁࡅࡊࡅࡍ ࡖࡉࡀࡃࡀࡋࡉࡀ ࡔࡀࡉࡋࡅࡉࡀ ࡏࡋ ࡏࡌࡀࡉࡊࡅࡍ ࡖࡀࡌࡕࡀࡉ ࡄࡏ ࡀࡌࡀࡓࡅࡋࡇ ࡖࡄࡃࡀ ࡑࡀࡉࡃࡀ ࡁࡀࡓࡁࡀ ࡀࡓࡁࡀ ࡃࡉࡒࡉࡀ ࡏࡕࡁࡇ ࡎࡅࡊࡀࡍࡀ ࡅࡒࡀࡉࡉࡌ ࡁࡂࡀࡅࡇ ࡅࡎࡒࡉࡓࡉࡀ ࡍࡀࡉࡂࡀ ࡖࡓࡀࡃࡉࡀ ࡅࡔࡉࡓࡉࡀࡕࡀ ࡐࡀࡉࡎࡉࡋࡇ ࡋࡀࡓࡒࡀ ࡖࡏࡅࡓࡀࡔࡋࡀࡌ ࡗ ࡄࡀࡆࡉࡍ ࡔࡉࡌࡅࡉࡀ ࡅࡁࡀࡔࡒࡓࡅࡉࡀ ࡋࡑࡀࡉࡃࡀ ࡖࡀࡎࡂࡉࡀ ࡋࡊࡀ ࡀࡌࡓࡉࡋࡇ ࡄࡅࡎ ࡏࡋࡀࡍ ࡅࡕࡅࡁ ࡅࡕࡓࡀࡄࡀࡌ ࡄࡀࡈࡀࡉࡀࡍ ࡅࡄࡀࡅࡁࡀࡍ ࡕࡉࡔࡁࡅࡒࡋࡀࡍ ࡀࡍࡉࡍ ࡀࡁࡃࡀࡊ ࡃࡉࡋࡀࡊ ࡕࡉࡄࡅࡉࡀ ࡁࡌࡀࡈࡅࡕ ࡏࡋࡀࡍ ࡀࡍࡉࡍ ࡌࡉࡆࡃࡀࡄࡓࡉࡍࡉࡍ ࡁࡍࡅࡍࡀࡊ ࡖ ࡋࡀࡁࡀࡑࡀࡓ ࡌࡉࡍࡀࡉࡄࡅࡍ ࡄࡃࡀ ࡀࡁࡃࡉࡀ ࡄࡀࡅࡉࡍࡉࡍ ࡖ ࡕࡀࡓࡌࡉࡃࡀࡊ ࡖࡀࡔࡅࡌࡀࡊ ࡁࡊࡅࡔࡈࡀ ࡃࡀࡊࡓࡉࡀ ࡒࡀࡉࡌࡉࡍࡉࡍ ࡅࡌࡉࡆࡃࡀࡄࡓࡉࡍࡉࡍ ࡁࡊࡅࡋࡄࡅࡍ ࡖࡔࡅࡌࡀࡊ ࡃࡉࡋࡀࡊ ࡃࡀࡊࡓࡉࡀ ࡌࡉࡔࡕࡀࡉࡉࡍ ࡄࡉࡉࡀ ࡅࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡅࡁࡔࡅࡌࡇ ࡖࡊࡅࡔࡈࡀ ࡉࡀࡒࡓࡀ ࡏࡅࡕࡓࡀ ࡌࡍ ࡋࡄࡉࡋ ࡃࡀࡓࡉࡔ ࡅࡓࡅࡄࡀ ࡀࡍࡉࡀࡋࡇ ࡌࡍ ࡕࡉࡓࡉࡀ ࡄࡔࡅࡊ ࡀࡌࡓࡀࡋࡇ ࡌࡀࡍ ࡀࡍࡀࡕ ࡌࡍ ࡏࡅࡕࡓࡉࡀ ࡖࡄࡀࡆࡉࡍ ࡒࡀࡋࡀࡊ ࡁࡀࡎࡉࡌ ࡅࡄࡉࡍࡊࡀࡊ ࡄࡋࡉࡀ ࡀࡌࡀࡓࡍࡀࡋࡇ ࡀࡁࡂࡀࡍ ࡄࡉࡉࡀ ࡏࡋࡉࡊ ࡓࡅࡄࡀ ࡁࡉࡔࡕࡀ ࡓࡅࡄࡀ ࡄࡀࡔࡀࡁࡕࡀ ࡋࡁࡉࡔ ࡀࡍࡀ ࡄࡉࡁࡉࡋ ࡆࡉࡅࡀ ࡀࡍࡀ ࡒࡅࡓࡐࡉࡃࡀ ࡖࡐࡀࡓࡆࡋࡀ ࡒࡅࡓࡐࡉࡃࡀ ࡀࡍࡀ ࡖࡐࡀࡓࡆࡋࡀ ࡖࡄࡔࡅࡊࡀ ࡊࡉࡁࡔࡉࡕ ࡌࡀࡎࡂࡉࡀ ࡀࡌࡓࡀࡋࡄ ࡍࡎࡉࡁ ࡌࡉࡍࡀࡉ ࡆࡀࡄࡁࡀ ࡓࡄࡉࡌࡀ ࡅࡊࡀࡎࡐࡀ ࡖࡉࡀࡒࡉࡓ ࡌࡍ ࡆࡀࡅࡀ ࡅࡁࡍࡉࡀ ࡅࡆࡌࡅࡓࡋࡉࡀ ࡌࡍ ࡆࡌࡀࡓࡀࡊ ࡔࡀࡍࡉࡀ ࡀࡌࡀࡓࡍࡀࡋࡇ ࡀࡍࡀ ࡏࡅࡕࡓࡀ ࡆࡓࡉࡆࡀ ࡖ ࡀࡎࡂࡉࡕ ࡋࡎࡀࡄࡓࡉࡀ ࡏࡕࡉࡕ ࡌࡉࡊࡁࡀࡔ ࡄࡔࡅࡊࡀ ࡏࡅࡕࡓࡀ ࡀࡍࡀ ࡆࡓࡉࡆࡀ ࡖࡆࡀࡓࡆࡅࡍ ࡄࡉࡉࡀ ࡅࡔࡀࡃࡓࡅࡍ ࡏࡅࡕࡓࡀ ࡀࡍࡀ ࡆࡓࡉࡆࡀ ࡌࡀࡋࡊࡀ ࡖࡊࡅࡋࡄࡅࡍ ࡀࡋࡌࡉࡀ ࡏࡅࡕࡓࡀ ࡀࡍࡀ ࡆࡓࡉࡆࡀ ࡖࡄࡀࡉࡋࡀࡉ ࡏࡋࡀࡅࡀࡉࡊࡅࡍ ࡒࡔࡉࡀ ࡏࡅࡕࡓࡀ ࡀࡍࡀ ࡆࡓࡉࡆࡀ ࡖࡌࡍ ࡏࡅࡕࡓࡉࡀ ࡊࡅࡋࡄࡅࡍ ࡆࡓࡉࡆࡍࡀ ࡌࡉࡔࡕࡀࡉࡉࡍ ࡄࡉࡉࡀ ࡅࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡅࡁࡔࡅࡌࡇ ࡖࡊࡅࡔࡈࡀ ࡉࡀࡒࡓࡀ ࡂࡀࡁࡓࡀ ࡌࡍ ࡋࡄࡉࡋ ࡃࡀࡓࡉࡔ ࡓࡅࡄࡀ ࡀࡍࡉࡀࡋࡇ ࡌࡍ ࡕࡉࡓࡉࡀ ࡄࡔࡅࡊ ࡆࡀࡄࡁࡀ ࡁࡒࡅࡐࡉࡀ ࡍࡀࡎࡉࡁ ࡅࡁࡓࡉࡔ ࡑࡅࡑࡉࡀࡕࡇ ࡌࡀࡓࡂࡀࡍࡉࡀࡕࡀ ࡌࡀࡎࡂࡉࡀ ࡋࡅࡀࡕࡇ ࡅࡀࡕࡉࡀ ࡅࡀࡌࡓࡀ ࡄࡀࡉ ࡂࡀࡁࡓࡀ ࡍࡅࡊࡓࡀࡉࡀ ࡍࡎࡉࡁ ࡌࡉࡍࡀࡉ ࡆࡀࡄࡁࡀ ࡓࡄࡉࡌࡀ ࡖ ࡉࡀࡒࡓࡀ ࡅࡌࡀࡓࡂࡀࡍࡉࡀࡕࡀ ࡖࡔࡀࡍࡉࡍ ࡅࡆࡌࡅࡓࡋࡉࡀ ࡌࡍ ࡆࡌࡀࡓࡀࡊ ࡔࡀࡍࡉࡀ ࡒࡓࡉࡋࡇ ࡁࡒࡀࡋࡀ ࡖࡄࡉࡉࡀ ࡅࡀࡐࡓࡉࡔࡀࡍ ࡌࡍ ࡓࡉࡔ ࡁࡓࡉࡔ ࡀࡌࡀࡓࡍࡀࡋࡇ ࡏࡕࡉࡊࡐࡀࡓ ࡅࡏࡕࡉࡂࡋࡉࡀ ࡌࡍ ࡒࡅࡃࡀࡌࡀࡉ ࡓࡅࡄࡀ ࡌࡄࡀࡔࡀࡁࡕࡀ ࡋࡁࡉࡔ ࡌࡀࡎࡂࡉࡀ ࡅࡀࡕࡉࡀ ࡍࡀࡌࡓࡅࡎ ࡅࡀࡕࡉࡀ ࡋࡅࡀࡕࡇ ࡒࡀࡓࡁࡀ ࡅࡀࡌࡓࡀࡋࡇ ࡄࡀࡉ ࡂࡀࡁࡓࡀ ࡍࡅࡊࡓࡀࡉࡀ ࡃࡓࡅࡔࡋࡉࡀ ࡌࡍ ࡃࡓࡀࡔࡀࡊ ࡔࡀࡍࡉࡀ ࡀࡌࡀࡓࡍࡀࡋࡇ ࡊࡅࡍ ࡍࡀࡌࡓࡅࡎ ࡅࡓࡅࡂࡆࡉࡊ ࡍࡉࡊࡅࡍ ࡀࡋࡉࡊ ࡀࡍࡀ ࡋࡀࡅ ࡂࡅࡎࡀࡍࡀ ࡖࡆࡀࡌࡀࡓ ࡀࡒࡀࡌࡀࡉ ࡔࡀࡐࡋࡉࡀ ࡀࡍࡀ ࡂࡀࡁࡓࡀ ࡍࡅࡊࡓࡀࡉࡀ ࡒࡅࡓࡐࡉࡃࡀ ࡀࡍࡀ ࡖ ࡐࡀࡓࡆࡋࡀ ࡖࡌࡉࡍࡉࡋࡕࡀࡉ ࡅࡆࡌࡀࡓࡀࡉ ࡒࡅࡐࡋࡉࡀ ࡅࡉࡀࡊࡋࡉࡀ ࡋࡓࡅࡄࡀ ࡁࡉࡔࡕࡀ ࡄࡀࡉ ࡀࡌࡓࡀࡋࡇ ࡊࡅࡔࡈࡀ ࡀࡎࡉࡀࡊ ࡈࡀࡁࡀ ࡅࡀࡎࡉࡀ ࡋࡌࡀࡋࡀࡋࡀ ࡖࡌࡀࡋࡀࡋࡕࡁࡇ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡒࡀࡋࡀ ࡖࡌࡀࡍࡃࡀ ࡖࡄࡉࡉࡀ ࡖࡒࡀࡓࡉࡀ ࡅࡌࡀࡐࡓࡉࡔ ࡓࡀࡄࡌࡇ ࡌࡀࡐࡓࡉࡔࡋࡅࡍ ࡋࡁࡄࡉࡓࡉࡀ ࡆࡉࡃࡒࡀ ࡋࡓࡀࡆࡉࡀ ࡖ ࡄࡀࡆࡉࡍ ࡀࡋࡌࡀ ࡀࡋࡌࡀ ࡖࡓࡀࡆ ࡓࡀࡆࡉࡀ ࡅࡓࡉࡌࡆࡉࡀ ࡀࡋࡌࡀ ࡖࡓࡀࡆ ࡓࡀࡆࡉࡀ ࡖࡏࡍࡉࡔ ࡋࡓࡀࡆࡉࡇ ࡋࡀࡏࡃࡀ ࡓࡀࡆࡀ ࡖ ࡀࡓࡒࡀ ࡍࡉࡀࡄࡀ ࡅࡓࡀࡆࡀ ࡖࡎࡀࡃࡀࡍࡀ ࡏࡔࡅࡌࡉࡀ ࡓࡀࡆࡀ ࡖ ࡍࡄࡅࡓࡀ ࡏࡅࡌࡀࡌࡀ ࡅࡓࡀࡆࡀ ࡖࡄࡔࡅࡊࡀ ࡋࡉࡋࡉࡀ ࡌࡉࡀ ࡄࡉࡉࡀ ࡓࡀࡆࡀ ࡖࡌࡉࡄࡋࡀ ࡍࡉࡔࡉࡌࡕࡀ ࡅࡓࡀࡆࡀ ࡖ ࡄࡉࡓࡁࡀ ࡍࡅࡓࡀ ࡅࡓࡀࡆࡀ ࡖࡌࡅࡕࡀ ࡔࡉࡍࡕࡀ ࡓࡀࡆࡀ ࡖ ࡀࡋࡌࡉࡀ ࡀࡃࡀࡌ ࡅࡓࡀࡆࡀ ࡖ ࡒࡀࡃࡌࡀࡉࡀ ࡁࡓࡇ ࡓࡀࡆࡀ ࡖࡒࡅࡌࡁࡀ ࡖࡁࡄࡉࡓࡉࡀ ࡆࡉࡃࡒࡀ ࡖࡋࡀࡒࡀࡌ ࡏࡋࡀ ࡋࡊࡅࡋࡄࡅࡍ ࡀࡋࡌࡉࡀ ࡓࡀࡆࡀ ࡖࡍࡉࡄࡅࡕࡀ ࡍࡉࡊࡁࡀࡔ ࡄࡃࡀ ࡅࡌࡉࡃࡀ ࡄࡃࡀ ࡅࡌࡀ ࡓࡀࡆࡉࡀ ࡖ ࡌࡀࡑࡁࡅࡕࡀ ࡌࡉࡌࡀࡓ ࡄࡃࡀ ࡅࡌࡉࡔࡌࡀ ࡄࡃࡀ ࡓࡀࡆࡀ ࡖࡌࡀࡓࡂࡀࡍࡉࡕࡀ ࡌࡉࡌࡀࡓ ࡄࡃࡀ ࡅࡌࡉࡔࡕࡌࡀ ࡄࡃࡀ ࡓࡀࡆࡀ ࡖࡓࡀࡄࡌࡅࡕࡀ ࡀࡉࡍࡉࡀ ࡌࡉࡊࡁࡀࡔ ࡁࡔࡅࡒࡉࡀ ࡅࡌࡉࡃࡀ ࡓࡀࡆࡀ ࡖࡌࡉࡎࡊࡉࡍࡅࡕࡀ ࡋࡌࡉࡔࡕࡀࡃࡅࡓࡉࡀ ࡁࡀࡋࡌࡀ ࡓࡀࡆࡀ ࡖࡁࡄࡉࡓࡉࡀ ࡀࡎࡀ ࡅࡀࡓࡃࡀ ࡓࡀࡆࡉࡀ ࡖࡐࡀࡂࡓࡀ ࡖࡊࡌࡀ ࡖࡀࡎࡀ ࡓࡀࡅࡆ ࡁࡄࡉࡓࡉࡀ ࡌࡉࡓࡅࡀࡆ ࡓࡀࡅࡆࡉࡀ ࡖࡊࡌࡀ ࡖࡅࡀࡓࡃࡀ ࡍࡀࡕࡀࡓ ࡐࡀࡂࡓࡉࡀ ࡌࡉࡍࡕࡀࡓ ࡍࡀࡕࡓࡉࡀ ࡌࡉࡍࡕࡀࡓ ࡍࡀࡕࡓࡉࡀ ࡐࡀࡂࡓࡉࡀ ࡅࡔࡀࡋࡉࡌࡋࡇ ࡊࡉࡋࡇ ࡋࡀࡋࡌࡀ ࡌࡍࡀ ࡀࡕࡉࡕ ࡂࡁࡀࡓ ࡊࡔࡉࡈ ࡖࡌࡀࡌࡍࡉࡕ ࡂࡅࡍࡉࡉࡀ ࡖࡄࡀࡆࡉࡍ ࡀࡋࡌࡀ ࡂࡀࡁࡓࡀ ࡀࡍࡀ ࡍࡅࡊࡓࡀࡉࡀ ࡖࡏࡋ ࡓࡉࡔࡀࡉ ࡀࡕࡓࡉࡑࡋࡉࡀ ࡓࡅࡔࡅࡌࡀ ࡋࡓࡉࡔࡀࡉ ࡓࡅࡔࡅࡌࡀ ࡕࡓࡉࡑࡋࡉࡀ ࡅࡎࡀࡋࡒࡉࡍࡀࡁࡇ ࡋࡀࡕࡀࡓ ࡍࡄࡅࡓ ࡌࡉࡔࡕࡀࡉࡉࡍ ࡄࡉࡉࡀ ࡅࡆࡀࡊࡏࡉࡍ ࡅࡆࡀࡊࡉࡀ ࡂࡀࡁࡓࡀ ࡖ ࡀࡎࡂࡉࡀ ࡋࡊࡀ ࡎࡀ ࡒࡀࡋࡀ ࡖࡌࡀࡍࡃࡀ ࡖࡄࡉࡉࡀ ࡖࡃࡀࡉࡉࡍ ࡅࡀࡕࡉࡀ ࡁࡀࡋࡌࡀ ࡃࡀࡉࡉࡍࡋࡅࡍ ࡋࡂࡀࡍࡆࡉࡁࡓࡉࡀ ࡅࡌࡔࡀࡓࡂࡉࡆࡋࡅࡍ ࡋࡓࡉࡔ ࡌࡀࡔࡊࡍࡉࡀ ࡃࡀࡉࡉࡍࡋࡅࡍ ࡋࡎࡀࡁࡓࡉࡀ ࡁࡅࡕࡀ ࡁࡀࡂࡓࡀ ࡅࡆࡉࡃࡒࡀ ࡖࡏࡄࡀࡁࡋࡅࡍ ࡏࡄࡀࡁࡋࡅࡍ ࡀࡂࡓࡀ ࡅࡆࡉࡃࡒࡀ ࡅࡀࡉࡉࡋ ࡋࡁࡉࡕ ࡂࡉࡍࡆࡀࡉࡄࡅࡍ ࡅࡊࡉࡎࡉࡅࡉࡀ ࡀࡉࡉࡋ ࡊࡎࡅࡉࡀ ࡁࡉࡕ ࡂࡉࡍࡆࡀࡉࡄࡅࡍ ࡀࡌࡉࡍࡈࡅࡋ ࡖࡔࡅࡕࡀ ࡖࡄࡉࡉࡀ ࡌࡍ ࡁࡀࡋࡅࡍ ࡀࡃࡀࡕ ࡒࡀࡋࡀ ࡖࡌࡀࡍࡃࡀ ࡖࡄࡉࡉࡀ ࡖࡒࡀࡓࡉࡀ ࡅࡌࡀࡐࡓࡉࡔ ࡊࡅࡋࡄࡅࡍ ࡓࡀࡄࡌࡇ ࡏࡆࡃࡀࡄࡓࡅࡋࡉࡀ ࡀࡄࡀࡉ ࡅࡏࡆࡃࡀࡄࡓࡅࡋࡉࡀ ࡓࡀࡄࡌࡀࡉ ࡏࡆࡃࡀࡄࡓࡅࡋࡉࡀ ࡀࡄࡀࡉ ࡌࡍ ࡌࡅࡕࡀ ࡖࡌࡀࡉࡕࡉࡀ ࡓࡉࡔ ࡌࡀࡔࡊࡍࡉࡀ ࡗ ࡀࡐࡕࡉࡀ ࡐࡅࡌࡀࡉࡄࡅࡍ ࡌࡀࡉࡕࡉࡀ ࡅࡊࡖ ࡏࡌࡉࡑࡀࡍ ࡀࡉࡍࡀࡉࡄࡅࡍ ࡌࡉࡔࡕࡀࡉࡋࡉࡀ ࡏࡋ ࡍࡉࡔࡌࡀࡕࡅࡍ ࡖࡄࡀࡕࡀࡌ ࡔࡀࡉࡀࡋࡕࡀ ࡄࡀࡅࡉࡀࡋࡅࡍ ࡄࡀࡅࡉࡀࡋࡅࡍ ࡄࡀࡕࡀࡌ ࡔࡀࡉࡀࡋࡕࡀ ࡀࡌࡀࡓࡋࡅࡍ ࡕࡀࡋࡉࡀ ࡓࡀࡁࡀࡍࡉࡀ ࡖࡁࡀࡉࡉࡍ ࡌࡉࡍࡀࡉࡄࡅࡍ ࡅࡋࡀࡉࡀࡄࡁࡉࡀ ࡅࡌࡎࡀࡓࡉࡋࡅࡍ ࡕࡀࡋࡉࡀ ࡔࡅࡀࡋࡀࡍࡉࡀ ࡖࡌࡀࡋࡐࡉࡋࡅࡍ ࡅࡋࡀࡉࡀࡋࡐࡉࡀ ࡄࡀࡕࡀࡌ ࡀࡁࡀ ࡅࡁࡓࡀ ࡃࡀࡉࡉࡍ ࡓࡁࡀ ࡅࡔࡅࡀࡋࡉࡀ ࡏࡌࡀ ࡅࡁࡓࡀࡕࡀ ࡃࡀࡉࡍࡀ ࡄࡀࡕࡀࡌ ࡄࡀࡌࡀࡕࡀ ࡅࡊࡀࡋࡕࡀ ࡄࡀࡕࡀࡌ ࡀࡁࡃࡀ ࡅࡌࡀࡓࡇ ࡃࡀࡉࡉࡍ ࡏࡂࡉࡓࡀ ࡅࡀࡂࡓࡇ ࡊࡅࡋࡄࡅࡍ ࡃࡉࡍࡉࡀ ࡃࡀࡉࡍࡉࡋࡅࡍ ࡅࡊࡅࡋࡄࡅࡍ ࡌࡐࡀࡔࡒࡉࡋࡅࡍ ࡏࡋࡀ ࡃࡉࡍࡀ ࡖࡂࡀࡁࡓࡀ ࡅࡏࡍࡕࡇ ࡀࡋࡌࡀ ࡖ ࡓࡁࡀ ࡎࡀࡌࡉࡊ ࡏࡋࡇ ࡃࡉࡍࡀ ࡅࡆࡀࡊࡉࡇ ࡌࡀࡍࡃࡀ ࡖࡄࡉࡉࡀ ࡅࡀࡎࡉࡒ ࡕࡉࡓࡑࡇ ࡁࡉࡕ ࡕࡅࡔࡋࡉࡌࡀ ࡌࡉࡔࡕࡀࡉࡉࡍ ࡄࡉࡉࡀ ࡅࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡄࡀ ࡊࡀࡋࡅࡆࡀ ࡖࡄࡉࡉࡀ ࡒࡀࡓࡉࡀ ࡈࡅࡁࡇ ࡖ ࡏࡋ ࡍࡀࡐࡔࡉࡇ ࡍࡉࡒࡅࡌ ࡂࡀࡁࡓࡀ ࡖࡍࡉࡒࡅࡌ ࡏࡋ ࡍࡀࡐࡔࡉࡇ ࡋࡀࡉࡉࡕ ࡀࡊࡅࡀࡕࡇ ࡁࡀࡋࡌࡀ ࡈࡅࡁࡀࡉࡊࡅࡍ ࡀࡁࡃࡉࡀ ࡊࡔࡉࡓࡉࡀ ࡖࡎࡉࡈࡀࡓ ࡀࡄࡅࡀࡉࡕࡅࡍ ࡌࡍ ࡊࡅࡋ ࡁࡉࡔ ࡅࡀࡉࡋࡀࡊ ࡋࡉࡁࡀ ࡁࡉࡔࡀ ࡖࡁࡉࡔࡅࡕࡀ ࡁࡂࡀࡅࡇ ࡌࡀࡌࡋࡉࡊࡀ ࡅࡋࡀࡔࡀࡁࡒࡉࡋࡇ ࡁࡉࡔࡅࡕࡀ ࡋࡌࡉࡔࡓࡉࡀ ࡁࡈࡀࡁࡅ ࡈࡀࡁࡕࡀ ࡅࡓࡅࡉࡀࡍࡇ ࡖࡆࡉࡃࡀࡍࡀ ࡖࡌࡍ ࡆࡉࡃࡀ ࡖ ࡎࡀࡈࡀࡍࡀ ࡄࡅࡀ ࡕࡉࡓࡀࡕࡀ ࡖࡐࡀࡓࡀ ࡒࡉࡍࡀ ࡁࡏࡅࡌࡒࡉࡀ ࡔࡀࡓࡉࡀ ࡐࡅࡌࡇ ࡖࡐࡀࡄࡕࡀ ࡅࡋࡀࡉࡉࡈ ࡋࡀࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡖࡏࡃࡄ ࡌࡃࡀࡋࡉࡀ ࡅࡌࡀࡄࡉࡀ ࡌࡀࡓࡀࡉࡄࡅࡍ ࡁࡄࡉࡓࡁࡀ ࡂࡀࡈࡋࡀ ࡅࡀࡉࡋࡉࡊ ࡊࡀࡓࡎࡀ ࡓࡀࡁࡕࡉࡀ ࡖࡋࡀࡎࡁࡀࡕ ࡌࡉࡍࡇ ࡖࡄࡀࡆࡉࡍ ࡀࡋࡌࡀ ࡏࡋࡊࡅࡍ ࡒࡀࡓࡉࡍࡀ ࡅࡀࡌࡀࡓࡍࡀ ࡂࡅࡁࡓࡉࡀ ࡖࡆࡉࡃࡒࡀ ࡉࡀࡄࡁࡉࡀ ࡏࡅ ࡉࡀࡄࡁࡉࡕࡅࡍ ࡋࡀࡕࡉࡎࡉࡄࡃࡅࡍ ࡏࡅ ࡕࡉࡎࡉࡄࡃࡅࡍ ࡋࡀࡕࡉࡕࡍࡅࡍ ࡏࡅ ࡉࡀࡄࡁࡉࡕࡅࡍ ࡁࡉࡀࡌࡉࡍࡀࡉࡊࡅࡍ ࡋࡎࡌࡀࡋࡀࡉࡊࡅࡍ ࡋࡀࡕࡉࡌࡓࡅࡍ ࡅࡀࡉࡋࡇ ࡋࡄࡀࡊࡉࡌࡀ ࡖࡋࡀ ࡎࡁࡀࡓ ࡌࡉࡍࡇ ࡌࡍ ࡄࡅࡊࡅࡌࡕࡇ ࡅࡀࡉࡋࡇ ࡋࡁࡀࡍࡀࡉࡀ ࡖ ࡁࡉࡍࡕࡀ ࡋࡒࡅࡃࡀࡌࡇ ࡋࡀࡁࡍࡀ ࡅࡀࡉࡋࡇ ࡋࡌࡀࡃࡓࡉࡊ ࡃࡉࡓࡊࡉࡀ ࡖࡃࡉࡓࡊࡀ ࡋࡍࡀࡐࡔࡉࡇ ࡋࡀࡃࡓࡉࡊ ࡅࡋࡀࡎࡀࡋࡉࡒ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡌࡉࡔࡕࡀࡉࡉࡍ ࡄࡉࡉࡀ ࡅࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡊࡀࡋࡅࡆࡀ ࡖࡄࡉࡉࡀ ࡒࡀࡓࡉࡀ ࡊࡀࡋࡅࡆࡀ ࡖࡄࡉࡉࡀ ࡓࡅࡓࡁࡉࡀ ࡊࡀࡋࡅࡆࡀ ࡖࡄࡉࡉࡀ ࡒࡀࡃࡉࡀ ࡊࡅࡋ ࡏࡍࡉࡔ ࡁࡍࡀࡐࡔࡉࡇ ࡍࡉࡆࡃࡀࡄࡀࡓ ࡈࡅࡁࡇ ࡖࡍࡀࡐࡔࡉࡄ ࡍࡉࡃࡀ ࡅࡋࡉࡁࡇ ࡍࡉࡄࡅࡉࡋࡇ ࡀࡓࡃࡉࡊࡋࡀ ࡈࡅࡁࡀࡉࡄࡅࡍ ࡖࡊࡅࡔࡈࡀࡍࡉࡀ ࡖࡎࡀࡋࡒࡉࡀ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡅࡀࡉࡋࡇ ࡋࡌࡀࡌࡋࡉࡊ ࡌࡉࡋࡊࡉࡀ ࡖࡌࡅࡋࡊࡀࡍࡀ ࡋࡍࡀࡐࡔࡉࡇ ࡋࡀࡌࡋࡉࡊ ࡅࡀࡉࡋࡇ ࡏࡋ ࡌࡀࡃࡓࡉࡊ ࡃࡉࡓࡊࡉࡀ ࡖ ࡃࡉࡓࡊࡀ ࡋࡍࡀࡐࡔࡉࡇ ࡋࡀࡃࡓࡉࡊ ࡗ ࡀࡆࡉࡋ ࡁࡂࡀࡅࡇ ࡋࡀ ࡌࡉࡄࡒࡉࡋ ࡅࡀࡉࡋࡇ ࡋࡁࡀࡍࡀࡉࡀ ࡖࡋࡀࡁࡍࡀ ࡋࡒࡅࡃࡀࡌࡇ ࡁࡉࡍࡕࡀ ࡅࡀࡉࡋࡇ ࡋࡀࡒࡅࡕ ࡀࡉࡍࡉࡀ ࡖࡋࡀࡁࡅࡉࡀ ࡁࡉࡔࡉࡀ ࡋࡄࡀࡆࡉࡍ ࡀࡋࡌࡀ ࡅࡀࡉࡋࡇ ࡋࡊࡀࡓࡎࡀ ࡓࡀࡁࡕࡉࡀ ࡖࡊࡅࡋ ࡖࡀࡊࡋࡀࡕ ࡊࡀࡓࡎࡀ ࡋࡀࡌࡋࡀࡕ ࡅࡀࡉࡋࡉࡍࡅࡍ ࡋࡏࡕࡓࡉࡍ ࡋࡉࡔࡀࡍࡉࡀ ࡖ ࡉࡀࡄࡁࡉࡍ ࡀࡕࡓࡉࡍ ࡃࡉࡍࡉࡀ ࡁࡄࡀࡃ ࡅࡀࡉࡋࡉࡍࡅࡍ ࡋࡉࡀࡋࡅࡐࡉࡀ ࡖࡌࡀࡋࡐࡉࡋࡅࡍ ࡅࡋࡀࡉࡀࡋࡐࡉࡀ ࡅࡀࡉࡋࡉࡍࡅࡍ ࡋࡎࡀࡊࡋࡉࡀ ࡕࡌࡉࡌࡉࡀ ࡖࡁࡎࡀࡊࡋࡅࡕࡅࡍ ࡌࡉࡎࡕࡀࡊࡓࡉࡀ ࡅࡀࡉࡋࡇ ࡋࡄࡀࡊࡉࡌࡀ ࡖ ࡋࡀࡎࡁࡀࡓ ࡌࡉࡍࡇ ࡌࡍ ࡄࡅࡊࡅࡌࡕࡄ ࡅࡀࡉࡋࡉࡍࡅࡍ ࡋࡔࡀࡋࡉࡈࡉࡀ ࡖࡌࡔࡀࡋࡈࡉࡀ ࡔࡁࡉࡒࡉࡀ ࡅࡋࡀࡁࡃࡉࡀ ࡏࡅࡁࡀࡃࡉࡀ ࡔࡀࡐࡉࡓࡉࡀ ࡅࡍࡀࡐࡋࡉࡀ ࡁࡍࡉࡓࡀ ࡖࡉࡀࡒࡃࡀ ࡁࡏࡃࡀࡉࡄࡅࡍ ࡁࡀࡃࡉࡍ ࡂࡅࡌࡓࡉࡀ ࡅࡁࡎࡐࡉࡄࡀࡕࡅࡍ ࡌࡎࡀࡓࡎࡉࡐࡉࡍ ࡉࡀࡒࡃࡀࡍࡀ ࡅࡀࡉࡋࡇ ࡏࡋ ࡋࡉࡁࡀ ࡁࡉࡔࡀ ࡖࡁࡉࡔࡅࡕࡀ ࡁࡂࡀࡅࡇ ࡌࡀࡌࡋࡉࡊࡀ ࡌࡀࡌࡋࡉࡊࡀࡁࡇ ࡁࡉࡔࡅࡕࡀ ࡅࡎࡀࡉࡉࡐ ࡁࡎࡀࡉࡐࡀ ࡖࡀࡋࡌࡀ ࡎࡀࡉࡉࡐ ࡅࡋࡀ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡈࡅࡁࡇ ࡋࡌࡀࡍ ࡖࡀࡁࡀࡃ ࡈࡀࡁ ࡅࡀࡉ ࡅࡀࡉ ࡒࡀࡓࡉࡀ ࡌࡀࡍ ࡖࡀࡁࡀࡃ ࡁࡉࡔ ࡅࡀࡉࡋࡇ ࡋࡌࡀࡍ ࡖࡄࡅࡀࡋࡇ ࡅࡋࡀࡈࡀࡉࡉࡁ ࡌࡉࡍࡇ ࡌࡍ ࡈࡀࡁࡅࡕࡇ ࡄࡀࡈࡀࡉࡉࡀ ࡋࡍࡀࡐࡔࡉࡇ ࡀࡁࡀࡃ ࡅࡔࡀࡅࡉࡀ ࡀࡋࡒࡅࡃࡀࡌࡇ ࡕࡉࡒࡋࡀࡕࡀ ࡈࡅࡁࡇ ࡀࡋࡌࡀࡍ ࡖࡄࡅࡀࡋࡇ ࡅࡈࡀࡉࡉࡁ ࡌࡉࡍࡇ ࡌࡍ ࡈࡀࡁࡅࡕࡇ ࡀࡂࡓࡀ ࡋࡍࡀࡐࡔࡉࡇ ࡀࡁࡀࡃ ࡏࡅࡁࡀࡃࡉࡇ ࡋࡒࡅࡃࡀࡌࡇ ࡀࡆࡋࡉࡀ ࡏࡅࡁࡀࡃࡉࡇ ࡀࡆࡋࡉࡀ ࡋࡀࡒࡀࡌࡇ ࡅࡌࡉࡎࡕࡀࡌࡊࡉࡋࡇ ࡋࡀࡒࡀࡌࡇ ࡁࡏࡅࡄࡓࡀ ࡏࡃࡀࡉࡊࡅࡍ ࡍࡉࡁࡃࡅࡍ ࡊࡅࡔࡈࡀ ࡅࡎࡀࡒ ࡄࡅࡆࡉࡇ ࡋࡀࡕࡀࡓ ࡍࡄࡅࡓ ࡅࡄࡉࡉࡀ ࡆࡀࡊࡏࡉࡍ ࡎࡀ ࡌࡍ ࡀࡕࡓࡀ ࡖࡍࡄࡅࡓࡀ ࡍࡉࡐࡒࡉࡕ ࡌࡉࡍࡀࡊ ࡃࡀࡅࡓࡀ ࡕࡀࡒࡍࡀ ࡀࡕࡓࡀ ࡖࡍࡉࡐࡒࡉࡕ ࡌࡉࡍࡇ ࡏࡅࡕࡓࡀ ࡌࡍ ࡄࡉࡉࡀ ࡋࡅࡀࡍ ࡏࡅࡕࡓࡀ ࡖࡋࡅࡀࡍ ࡌࡍ ࡁࡉࡕ ࡄࡉࡉࡀ ࡂࡀࡅࡀࡆࡀ ࡖࡌࡉࡀ ࡄࡉࡉࡀ ࡁࡏࡃࡇ ࡋࡂࡉࡈ ࡂࡀࡅࡀࡆࡀ ࡖࡋࡂࡉࡈ ࡁࡏࡃࡇ ࡊࡅࡋࡇ ࡀࡋࡅࡀ ࡌࡍ ࡓࡉࡔ ࡁࡓࡉࡔ ࡌࡍ ࡀࡈࡉࡓࡐࡉࡇ ࡏࡄࡀࡁࡋࡉࡀ ࡌࡉࡍࡇ ࡋࡉࡁࡀࡉ ࡖࡊࡀࡉࡅࡁ ࡍࡉࡕࡀࡐࡀࡍ ࡕࡍࡀ ࡏࡄࡀࡁࡋࡉࡀ ࡌࡉࡍࡇ ࡎࡉࡃࡓࡉࡀ ࡌࡋࡉࡍ ࡕࡋࡀࡕ ࡏࡄࡀࡁࡋࡉࡀ ࡌࡉࡍࡇ ࡀࡉࡍࡀࡉ ࡀࡕࡓࡀࡑࡋࡉࡀ ࡁࡓࡉࡔࡀࡉ ࡀࡉࡍࡀࡉ ࡁࡓࡉࡔࡀࡉ ࡕࡓࡀࡑࡋࡉࡀ ࡄࡆࡀࡉࡕࡇ ࡅࡁࡀࡔࡒࡀࡓࡕࡇ ࡋࡀࡁ ࡄࡆࡀࡉࡕࡇ ࡋࡀࡁ ࡅࡁࡀࡔࡒࡀࡓࡕࡇ ࡅࡔࡀࡉࡉࡋࡕࡇ ࡔࡅࡋࡕࡀ ࡕࡋࡀࡕ ࡔࡀࡋࡌࡇ ࡋࡉࡁࡀ ࡓࡁࡀ ࡖࡎࡁࡉࡋࡉࡁࡇ ࡓࡅࡓࡁࡉࡀ ࡅࡃࡉࡓࡃࡒࡉࡀ ࡔࡀࡋࡕࡇ ࡋࡍࡉࡄࡅࡕࡀ ࡖࡌࡓࡉࡃࡅࡕࡀ ࡋࡉࡕࡁࡇ ࡔࡀࡋࡕࡇ ࡃࡉࡓࡊࡉࡀ ࡌࡊࡉࡊࡉࡀ ࡖࡎࡋࡀࡒ ࡁࡔࡋࡀࡌ ࡋࡀࡕࡀࡓ ࡍࡄࡅࡓ ࡌࡉࡔࡕࡀࡉࡉࡍ ࡄࡉࡉࡀ ࡅࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡌࡍ ࡀࡕࡓࡀ ࡖࡍࡄࡅࡓࡀ ࡍࡉࡐࡒࡉࡕ ࡌࡉࡍࡀࡊ ࡃࡀࡅࡓࡀ ࡕࡀࡒࡍࡀ ࡏࡑࡈࡋࡉࡀ ࡖࡆࡉࡅࡀ ࡋࡁࡉࡔࡍࡀ ࡅࡊࡋࡉࡋࡀ ࡖࡆࡀࡊࡀࡅࡀࡕࡀ ࡁࡓࡉࡔࡀࡉ ࡀࡕࡓࡉࡑࡋࡉࡀ ࡀࡕࡉࡕ ࡅࡀࡔࡊࡉࡕࡉࡍࡅࡍ ࡋࡍࡀࡑࡅࡓࡀࡉࡉࡀ ࡗ ࡋࡊࡉࡐࡇ ࡖࡉࡀࡓࡃࡍࡀ ࡒࡀࡉࡌࡉࡀ ࡕࡓࡀࡑࡕࡄ ࡋࡊࡅࡓࡎࡉࡀࡉ ࡅࡉࡀࡕࡁࡉࡕ ࡗ ࡀࡁࡀ ࡖࡉࡀࡕࡉࡁ ࡀࡁࡉࡍࡉࡀ ࡁࡍࡇ ࡉࡀࡕࡉࡁ ࡈࡀࡁࡀ ࡅࡌࡀࡋࡉࡐࡋࡅࡍ ࡋࡁࡍࡇ ࡊࡅࡋ ࡔࡓࡀࡓࡀ ࡖࡈࡏࡉࡀ ࡋࡉࡕࡁࡇ ࡀࡁࡍࡀࡉ ࡄࡆࡅࡍ ࡏࡃࡉࡋࡌࡀ ࡖࡕࡉࡂࡉࡓࡅࡍ ࡂࡀࡅࡓࡀ ࡄࡆࡅࡍ ࡏࡃࡉࡋࡌࡀ ࡖࡂࡅࡍࡁࡀ ࡕࡉࡂࡉࡍࡁࡅࡍ ࡖࡂࡀࡉࡓࡉࡀ ࡅࡂࡀࡍࡁࡉࡀ ࡋࡁࡉࡕ ࡄࡉࡉࡀ ࡋࡀࡎࡀࡋࡒࡉࡀ ࡋࡀࡎࡀࡋࡒࡉࡀ ࡋࡁࡉࡕ ࡄࡉࡉࡀ ࡅࡋࡀ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡁࡍࡀࡉ ࡄࡆࡅࡍ ࡏࡃࡉࡋࡌࡀ ࡕࡉࡁࡃࡅࡍ ࡄࡀࡓࡔࡉࡀ ࡅࡕࡉࡑࡓࡅࡍ ࡀࡁࡐࡀࡂࡓࡀ ࡍࡉࡔࡉࡌࡕࡀ ࡄࡀࡓࡀࡔࡉࡀ ࡅࡆࡉࡐࡀࡍࡉࡀ ࡔࡀࡃࡉࡋࡅࡍ ࡁࡃࡅࡃࡉࡀ ࡖࡓࡀࡄࡕࡀࡍ ࡅࡍࡅࡓࡀ ࡄࡀࡅࡉࡀ ࡃࡀࡉࡀࡍࡅࡍ ࡁࡍࡀࡉ ࡄࡆࡅࡍ ࡏࡃࡉࡋࡌࡀ ࡕࡉࡐࡊࡅࡍ ࡕࡉࡑࡓࡉࡀ ࡉࡅࡌࡀ ࡖࡕࡉࡔࡀࡍࡅࡍ ࡓࡁࡀ ࡊࡅࡃࡊࡀ ࡄࡀࡋࡉࡍ ࡖࡀࡐࡊࡉࡀ ࡕࡉࡑࡓࡉࡀ ࡀࡉࡍࡀࡉࡄࡅࡍ ࡍࡄࡅࡓࡀ ࡋࡀࡄࡀࡆࡉࡀࡍ ࡁࡍࡀࡉ ࡄࡆࡅࡍ ࡏࡃࡉࡋࡌࡀ ࡕࡉࡎࡓࡅࡍ ࡀࡁࡃࡀ ࡁࡉࡀࡃ ࡌࡀࡓࡇ ࡅࡀࡌࡕࡀ ࡁࡉࡀࡃ ࡌࡀࡓࡕࡇ ࡅࡌࡀࡊࡀ ࡋࡕࡀࡒࡉࡐࡀ ࡋࡀࡕࡀࡕࡍࡅࡍ ࡌࡉࡕࡉࡀࡁࡀࡈ ࡁࡀࡕࡓࡀ ࡂࡆࡉࡓࡀ ࡁࡉࡕ ࡌࡀࡊࡎࡉࡀ ࡀࡉࡍࡇ ࡄࡀࡆࡉࡀ ࡄࡔࡅࡊࡀ ࡕࡉࡋࡉࡂࡈࡅࡍ ࡀࡌࡕࡀ ࡖࡋࡀࡐࡓࡉࡒࡀ ࡅࡁࡍࡀࡉࡊࡅࡍ ࡕࡀࡉࡋࡅࡍ ࡋࡁࡉࡕ ࡌࡀࡓࡉࡀ ࡉࡅࡌࡀ ࡖࡄࡀࡈࡉࡀ ࡀࡁࡃࡀ ࡁࡉࡅࡌࡀ ࡖࡌࡀࡓࡇ ࡌࡀࡂࡆࡀࡓ ࡏࡋࡇ ࡄࡀࡈࡀࡉࡉࡀ ࡖࡄࡀࡈࡉࡀ ࡀࡁࡃࡀ ࡁࡓࡉࡔࡀ ࡖࡀࡁࡅࡉࡀ ࡎࡀࡋࡒࡉࡀ ࡁࡍࡀࡉ ࡄࡆࡅࡍ ࡏࡃࡉࡋࡌࡀ ࡕࡉࡄࡅࡍ ࡊࡀࡓࡀࡑࡉࡀ ࡅࡀࡉࡍࡀࡉࡊࡅࡍ ࡓࡉࡌࡆࡀ ࡍࡉࡓࡉࡌࡆࡀࡍ ࡀࡌࡉࡍࡈࡅࡋ ࡖࡊࡀࡓࡀࡑࡉࡀ ࡅࡓࡀࡌࡀࡆࡉࡀ ࡋࡌࡀࡈࡀࡓࡀࡕࡀ ࡌࡉࡕࡀࡍࡃࡉࡆࡉࡀ ࡌࡉࡕࡀࡍࡃࡉࡆࡉࡀ ࡋࡌࡀࡈࡀࡓࡀࡕࡀ ࡅࡃࡉࡍࡀ ࡀࡆࡉࡆࡀ ࡌࡉࡃࡉࡍࡉࡍ ࡁࡍࡀࡉ ࡄࡆࡅࡍ ࡏࡃࡉࡋࡌࡀ ࡖࡕࡉࡊࡋࡅࡍ ࡄࡁࡅࡋࡉࡀ ࡅࡄࡁࡅࡋ ࡄࡁࡅࡋࡉࡀ ࡕࡉࡃࡉࡍࡅࡍ ࡁࡈࡅࡓࡀ ࡄࡀࡔࡊࡀ ࡁࡍࡀࡉ ࡄࡆࡅࡍ ࡏࡃࡉࡋࡌࡀ ࡕࡉࡎࡉࡂࡃࡅࡍ ࡋࡐࡀࡕࡉࡊࡓࡉࡀ ࡅࡏࡋ ࡎࡀࡈࡀࡍࡉࡀ ࡅࡏࡋ ࡏࡊࡅࡓࡉࡀ ࡅࡏࡋ ࡄࡀࡍࡉࡐࡅࡕࡀ ࡅࡏࡋ ࡄࡀࡋࡉࡅࡕࡀ ࡖࡄࡀࡆࡉࡍ ࡀࡋࡌࡀ ࡀࡌࡉࡍࡈࡅࡋ ࡖࡐࡀࡕࡉࡊࡓࡉࡀ ࡅࡎࡀࡈࡀࡍࡉࡀ ࡃࡉࡍࡉࡀ ࡂࡆࡉࡓࡀ ࡄࡀࡅࡉࡀ ࡏࡋࡀࡅࡀࡉࡄࡅࡍ ࡅࡎࡀࡂࡀࡃࡉࡀ ࡖࡎࡀࡂࡃࡉࡋࡅࡍ ࡋࡁࡉࡕ ࡄࡉࡉࡀ ࡋࡀࡎࡀࡋࡒࡉࡀ ࡋࡀ ࡎࡀࡋࡒࡉࡀ ࡋࡁࡉࡕ ࡄࡉࡉࡀ ࡅࡋࡀࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡄࡆࡅࡍ ࡖࡐࡀࡒࡉࡃࡕࡉࡍࡊࡅࡍ ࡅࡎࡀࡄࡃࡅࡕࡀ ࡖࡏࡅࡋࡀ ࡅࡔࡉࡒࡓࡀ ࡋࡀࡕࡉࡎࡉࡄࡃࡅࡍ ࡌࡍ ࡒࡁࡀࡋ ࡖࡎࡀࡄࡃࡅࡕࡀ ࡖ ࡏࡅࡋࡀ ࡅࡔࡉࡒࡓࡀ ࡒࡅࡃࡀࡌ ࡃࡀࡉࡀࡍࡀ ࡌࡉࡔࡕࡀࡉࡉࡋࡉࡀ ࡌࡉࡔࡕࡀࡉࡉࡋࡉࡀ ࡒࡅࡃࡀࡌ ࡃࡀࡉࡀࡍࡀ ࡖࡃࡀࡉࡉࡍࡋࡅࡍ ࡋࡊࡅࡋࡄࡅࡍ ࡀࡋࡌࡉࡀ ࡃࡀࡉࡉࡍࡋࡅࡍ ࡋࡊࡅࡋ ࡏࡍࡉࡔ ࡗ ࡏࡅࡁࡀࡃࡄ ࡅࡀࡂࡓࡇ ࡀࡁࡍࡀࡉ ࡊࡅࡋ ࡌࡉࡍࡃࡀࡌ ࡖࡏࡋࡀࡅࡀࡉࡊࡅࡍ ࡎࡍࡉࡀ ࡁࡄࡀࡁࡓࡀࡉࡊࡅࡍ ࡋࡀࡕࡉࡁࡃࡅࡍ ࡖࡀࡋࡌࡀ ࡖࡀࡆࡋࡉࡕࡅࡋࡇ ࡃࡉࡍࡀ ࡅࡀࡍࡃࡀࡆࡕࡀ ࡓࡁࡀ ࡏࡕࡁࡇ ࡏࡕࡁࡇ ࡃࡉࡍࡀ ࡅࡀࡍࡃࡀࡆࡕࡀ ࡓࡁࡀ ࡖࡊࡅࡋ ࡉࡅࡌ ࡌࡀࡍࡉࡀ ࡎࡌࡉࡓࡉࡀ ࡁࡂࡀࡅࡇ ࡌࡉࡕࡁࡉࡄࡓࡉࡀ ࡀࡌࡉࡍࡈࡅࡋ ࡖࡊࡅࡋ ࡌࡀࡍ ࡖࡈࡉࡍ ࡎࡀࡋࡉࡒ ࡖࡓࡉࡒࡀࡍ ࡄࡀࡊࡀ ࡌࡉࡕࡀࡂࡆࡀࡓ ࡅࡀࡉࡋࡇ ࡋࡓࡉࡒࡀࡍࡀ ࡖࡓࡉࡒࡉࡍ ࡒࡀࡉࡉࡌ ࡁࡉࡕ ࡌࡀࡊࡎࡉࡀ ࡗ ࡄࡅࡀ ࡁࡏࡃࡇ ࡅࡋࡀࡏࡄࡀࡁ ࡄࡀࡕࡀࡌ ࡁࡀࡄࡉࡔ ࡁࡊࡀࡍࡐࡇ ࡅࡋࡋࡀࡌࡀࡔࡊࡀ ࡌࡉࡈࡀࡓࡉࡁࡄ ࡁࡉࡔࡉࡀ ࡅࡊࡀࡃࡀࡁࡉࡀ ࡁࡄࡔࡅࡊࡀ ࡔࡀࡃࡉࡋࡇ ࡁࡍࡅࡓࡀ ࡖࡉࡀࡒࡃࡀ ࡁࡍࡅࡓࡀ ࡖࡉࡀࡒࡃࡀ ࡔࡀࡃࡉࡋࡇ ࡖࡒࡓࡅࡋࡇ ࡁࡏࡅࡃࡍࡇ ࡅࡋࡀ ࡔࡌࡀ ࡄࡀࡅࡉࡕࡇ ࡁࡀࡉࡍࡇ ࡅࡋࡀࡄࡆࡀ ࡄࡀࡅࡉࡕࡇ ࡅࡋࡀࡄࡆࡀ ࡁࡀࡉࡍࡇ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡊࡅࡔࡈࡀ ࡁࡀࡊ ࡎࡀࡄࡉࡃࡍࡀ ࡗ ࡂࡀࡁࡓࡀ ࡖࡁࡀࡉࡉࡀ ࡁࡉࡍࡕࡀ ࡋࡀࡊ ࡌࡎࡀࡊࡉࡍࡀࡋࡀࡊ ࡀࡉࡍࡀࡉ ࡈࡀࡁࡀ ࡁࡄࡉࡓࡀ ࡁࡄࡉࡓࡀ ࡖࡄࡉࡉࡀ ࡖࡀࡎࡂࡉࡀ ࡋࡊࡀ ࡀࡌࡀࡓࡋࡇ ࡋࡁࡀࡁࡀ ࡍࡉࡑࡀࡓ ࡀࡌࡀࡓࡋࡇ ࡏࡋ ࡕࡉࡓࡀࡕ ࡕࡉࡕࡀࡐࡀࡊ ࡀࡌࡀࡓࡋࡅࡍ ࡏࡋ ࡓࡅࡉࡀࡍࡅࡍ ࡖࡍࡉࡊࡅࡍࡅࡍ ࡅࡍࡉࡕࡁࡅࡍ ࡋࡃࡅࡊࡕࡀࡉࡄࡅࡍ ࡀࡌࡀࡓࡋࡇ ࡋࡍࡀࡈࡀࡓ ࡉࡀࡌࡀ ࡖࡍࡉࡍࡈࡅࡓࡋࡉࡀ ࡁࡉࡀࡌࡀ ࡌࡀࡁࡓࡀ ࡀࡌࡀࡓࡋࡇ ࡋࡍࡀࡈࡀࡓ ࡆࡀࡁࡉࡀ ࡖࡍࡉࡌࡑࡅࡓࡋࡉࡀ ࡁࡆࡀࡁࡉࡀ ࡌࡉࡑࡓࡀ ࡀࡌࡀࡓࡋࡇ ࡋࡌࡀࡉࡉࡊ ࡈࡅࡓࡉࡀ ࡖࡍࡉࡌࡅࡊࡋࡉࡀ ࡁࡈࡅࡓࡉࡀ ࡏࡅࡄࡓࡀ ࡀࡌࡀࡓࡋࡇ ࡋࡑࡀࡉࡀࡓࡀ ࡖࡑࡀࡉࡉࡓ ࡑࡉࡋࡌࡉࡀ ࡅࡑࡅࡓࡀࡕࡀ ࡄࡀࡁࡉࡈࡋࡀࡊ ࡁࡓࡉࡔࡀࡊ ࡓࡀࡂࡀࡂࡕࡀ ࡀࡌࡀࡓࡋࡄ ࡋࡀࡓࡃࡉࡊࡋࡀ ࡖࡐࡀࡂࡓࡉࡀ ࡖࡎࡀࡓࡄࡉࡁ ࡁࡉࡍࡉࡀࡍࡀࡊ ࡁࡍࡉࡀ ࡎࡀࡓࡄࡉࡁ ࡁࡍࡉࡀ ࡁࡉࡍࡉࡀࡍࡀࡊ ࡖࡋࡉࡂࡀࡋ ࡌࡉࡍࡇ ࡍࡀࡐࡒࡉࡕ ࡀࡌࡉࡍࡈࡅࡋ ࡖ ࡀࡋࡌࡀ ࡄࡀࡆࡉࡍ ࡁࡀࡈࡉࡋ ࡅࡏࡁࡉࡃࡀࡕࡇ ࡌࡉࡔࡕࡀࡌࡓࡀࡍ ࡀࡅࡉࡃ ࡆࡀࡄࡁࡀ ࡓࡄࡉࡌࡀ ࡅࡌࡉࡁࡉࡀ ࡊࡀࡎࡐࡀ ࡅࡋࡀࡌࡉࡕࡀࡔࡊࡀ ࡌࡉࡕࡉࡒࡓࡉࡀ ࡋࡉࡋࡁࡉࡀ ࡄࡀࡃࡅࡀ ࡅࡀࡆࡉࡋ ࡆࡌࡀࡓࡅࡍ ࡅࡁࡀࡈࡉࡋ ࡌࡀࡋࡊࡀ ࡔࡀࡁࡉࡒ ࡕࡀࡂࡄ ࡅࡁࡍࡉࡀ ࡄࡀࡃࡉࡀ ࡁࡔࡉࡁࡉࡀ ࡀࡆࡋࡉࡀ ࡔࡀࡋࡌࡀࡍࡉࡀ ࡎࡀࡋࡒࡉࡀ ࡋࡍࡄࡅࡓࡀ ࡅࡁࡉࡔࡉࡀ ࡄࡀࡊࡀ ࡌࡉࡕࡊࡀࡕࡓࡉࡀ ࡌࡉࡔࡕࡀࡉࡉࡍ ࡄࡉࡉࡀ ࡅࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡋࡄࡉࡋ ࡀࡂࡀࡍࡁࡉࡀ ࡌࡔࡀࡅࡍࡉࡀ ࡊࡅࡔࡈࡀ ࡒࡀࡉࡉࡌ ࡐࡅࡃࡀࡍࡀ ࡓࡀࡁࡉࡀ ࡐࡅࡃࡀࡍࡀ ࡖࡋࡀࡅ ࡐࡅࡃࡀࡍ ࡕࡀࡅࡓࡉࡀ ࡅࡋࡀࡅ ࡌࡍ ࡔࡅࡓࡅࡁࡕࡀࡉ ࡏࡕࡉࡂࡋࡉࡀ ࡐࡅࡃࡀࡍࡀ ࡐࡅࡃࡀࡍ ࡊࡅࡔࡈࡀ ࡖࡀࡂࡓࡀ ࡅࡆࡉࡃࡒࡀ ࡆࡀࡓࡀ ࡄࡀࡁࡔࡀࡁࡀ ࡋࡀࡂࡉࡈ ࡐࡅࡃࡀࡍࡀ ࡅࡁࡓ ࡄࡉࡉࡀ ࡌࡀࡆࡓࡅࡕࡀ ࡋࡂࡉࡈ ࡂࡅࡁࡓࡉࡀ ࡐࡓࡉࡔࡀࡉࡉࡀ ࡆࡀࡓࡉࡍ ࡅࡔࡀࡓࡉࡍ ࡄࡉࡋࡉࡀ ࡔࡀࡓࡉࡍ ࡅࡓࡀࡌࡉࡍ ࡌࡀࡓࡂࡀࡍࡉࡀࡕࡀ ࡆࡀࡓࡉࡍ ࡅࡔࡀࡓࡉࡍ ࡈࡀࡁࡉࡀ ࡅࡀࡎࡉࡒ ࡁࡃࡀࡓࡉࡀ ࡊࡁࡀࡔ ࡀࡎࡉࡒ ࡊࡁࡀࡔ ࡁࡃࡀࡓࡉࡀ ࡅࡀࡅࡕࡉࡁ ࡏࡋࡀࡅࡀࡉࡄࡅࡍ ࡍࡀࡈࡓࡉࡀ ࡍࡀࡈࡓࡉࡀ ࡀࡅࡕࡉࡁ ࡏࡋࡀࡅࡀࡉࡄࡅࡍ ࡔࡀࡍࡉࡍ ࡅࡁࡓࡉࡊࡉࡀ ࡅࡌࡒࡀࡉࡌࡉࡀ ࡌࡍ ࡓࡉࡔ ࡁࡓࡉࡔ ࡀࡌࡀࡓࡍࡀࡋࡅࡍ ࡉࡀ ࡍࡀࡈࡓࡉࡀ ࡖࡍࡀࡈࡓࡉࡀ ࡃࡀࡓࡀ ࡀࡍࡐࡉࡔ ࡀࡂࡋࡀࡉࡊࡅࡍ ࡍࡈࡀࡓ ࡍࡐࡉࡔ ࡍࡈࡀࡓ ࡀࡂࡋࡀࡉࡊࡅࡍ ࡅࡃࡉࡓࡊࡀࡉࡊࡅࡍ ࡖࡀࡂࡋࡀࡉࡊࡅࡍ ࡁࡉࡔࡋࡀࡌ ࡕࡉࡍࡉࡎࡁࡅࡍ ࡄࡀࡔࡕࡀ ࡌࡀࡎࡂࡉࡀ ࡉࡀࡌࡉࡀ ࡊࡅࡔࡈࡀ ࡗ ࡌࡀࡓࡅࡀࡄࡀ ࡖࡌࡉࡀ ࡄࡉࡉࡀ ࡁࡏࡃࡇ ࡋࡂࡀࡈ ࡌࡀࡓࡅࡀࡄࡀ ࡅࡁࡀࡉࡉࡍࡋࡅࡍ ࡋࡈࡀࡁࡉࡀ ࡁࡍࡉࡀ ࡄࡀࡋࡉࡍ ࡔࡉࡄࡉࡀ ࡖࡔࡉࡄࡉࡀ ࡀࡒࡔࡉࡀ ࡖࡁࡉࡓࡉࡀ ࡍࡀࡐࡋࡉࡀ ࡕࡅࡌ ࡖࡔࡉࡄࡉࡀ ࡀࡃࡅࡐࡉࡀ ࡖࡊࡉࡓࡉࡀ ࡍࡀࡐࡋࡉࡀ ࡄࡀࡋࡉࡍ ࡖࡋࡀࡔࡉࡄࡀࡍ ࡅࡋࡀࡔࡀࡅࡉࡀࡍ ࡌࡍ ࡃࡉࡁࡍࡀࡉࡄࡅࡍ ࡔࡀࡐࡋࡉࡍ ࡔࡀࡐࡋࡉࡍ ࡌࡍ ࡃࡉࡁࡍࡀࡉࡄࡅࡍ ࡅࡋࡐࡅࡌࡀ ࡖ ࡏࡅࡔࡀࡍࡀ ࡒࡀࡓࡁࡉࡍ ࡐࡀࡓࡒࡀࡍ ࡅࡌࡔࡀࡅࡆࡁࡀࡍ ࡍࡉࡔࡌࡀࡕࡀ ࡃࡉࡋࡊࡅࡍ ࡀࡄࡀࡉ ࡈࡀࡁࡉࡀ ࡅࡀࡄࡅࡀࡕࡀࡉ ࡖࡌࡄࡀࡉࡌࡍࡀࡍ ࡂࡅࡁࡓࡉࡀ ࡔࡀࡋࡌࡀࡍࡉࡀ ࡅࡏࡍࡔࡉࡀ ࡔࡀࡋࡌࡀࡍࡉࡀࡕࡀ ࡌࡉࡕࡐࡀࡓࡒࡀࡍ ࡌࡉࡕࡐࡀࡓࡒࡀࡍ ࡌࡍ ࡐࡅࡌࡀ ࡖࡄࡀࡆࡉࡍ ࡏࡅࡔࡀࡍࡀ ࡖࡄࡅ ࡏࡅࡓ ࡌࡀࡓࡇ ࡖࡄࡔࡅࡊࡀ ࡔࡅࡌࡇ ࡌࡉࡔࡕࡀࡉࡉࡍ ࡄࡉࡉࡀ ࡅࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡌࡉࡕࡀࡍࡂࡀࡓ ࡁࡀࡂࡓࡀ ࡅࡆࡉࡃࡒࡀ ࡅࡎࡀࡋࡉࡒ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡅࡀࡉࡋࡉࡍࡅࡍ ࡋࡔࡀࡋࡉࡈࡉࡀ ࡖࡌࡔࡀࡋࡈࡉࡀ ࡔࡁࡉࡒࡉࡀ ࡅࡋࡀࡁࡃࡉࡀ ࡏࡅࡁࡀࡃࡉࡀ ࡔࡀࡐࡉࡓࡉࡀ ࡅࡍࡀࡐࡋࡉࡀ ࡁࡍࡅࡓࡀ ࡖࡉࡀࡒࡃࡀ ࡁࡉࡃࡀࡉࡄࡅࡍ ࡁࡀࡃࡉࡍ ࡂࡅࡌࡓࡉࡀ ࡅࡁࡎࡐࡉࡄࡀࡕࡅࡍ ࡌࡎࡀࡓࡎࡉࡐࡉࡍ ࡉࡀࡒࡃࡀࡍࡀ ࡖࡒࡀࡍࡉࡍ ࡅࡔࡀࡁࡒࡉࡍ ࡋࡁࡍࡀࡉࡄࡅࡍ ࡅࡀࡆࡋࡉࡍ ࡁࡍࡅࡓࡀ ࡁࡀࡔࡋࡉࡀ ࡀࡆࡋࡉࡀ ࡅࡁࡀࡔࡋࡉࡀ ࡁࡍࡅࡓࡀ ࡅࡌࡉࡎࡕࡀࡊࡓࡀࡋࡅࡍ ࡂࡉࡅࡕࡀࡉࡄࡅࡍ ࡅࡀࡉࡋࡉࡍࡅࡍ ࡋࡎࡀࡊࡋࡉࡀ ࡕࡌࡉࡌࡉࡀ ࡖࡁࡎࡀࡊࡋࡅࡕࡅࡍ ࡌࡉࡎࡕࡀࡊࡓࡉࡀ ࡅࡀࡉࡋࡉࡍࡅࡍ ࡋࡉࡀࡋࡅࡐࡉࡀ ࡖࡌࡀࡋࡐࡉࡋࡅࡍ ࡅࡋࡀࡉࡀࡋࡐࡉࡀ ࡄࡅࡊࡅࡌࡕࡀ ࡖࡔࡓࡀࡓࡀ ࡁࡄࡅࡔࡊࡀ ࡌࡉࡔࡕࡀࡊࡍࡉࡀ ࡅࡀࡉࡋࡉࡍࡅࡍ ࡀࡋࡓࡀࡁࡀࡍࡉࡀ ࡖࡁࡀࡉࡉࡍ ࡌࡉࡍࡀࡉࡄࡅࡍ ࡅࡋࡀ ࡉࡀࡄࡁࡉࡀ ࡅࡀࡉࡋࡉࡍࡅࡍ ࡋࡕࡓࡉࡍ ࡋࡉࡔࡀࡍࡉࡀ ࡖࡉࡀࡄࡁࡉࡀ ࡕࡓࡉࡍ ࡃࡉࡍࡉࡀ ࡁࡄࡀࡃ ࡅࡀࡉࡋࡇ ࡏࡋ ࡋࡉࡁࡀ ࡁࡉࡔࡀ ࡖࡁࡉࡔࡅࡕࡀ ࡁࡂࡀࡅࡇ ࡌࡀࡌࡋࡉࡊࡀ ࡌࡀࡌࡋࡉࡊࡀ ࡁࡂࡀࡅࡇ ࡁࡉࡔࡅࡕࡀ ࡌࡉࡎࡀࡐ ࡎࡀࡉࡉࡐ ࡋࡉࡅࡌࡀ ࡓࡁࡀ ࡖࡎࡅࡐ ࡅࡀࡉࡋࡇ ࡏࡋ ࡆࡉࡃࡀࡍࡀ ࡖ ࡌࡍ ࡆࡉࡃࡀ ࡖࡎࡀࡈࡀࡍࡀ ࡌࡋࡉࡀ ࡅࡀࡋࡇ ࡀࡋࡁࡀࡍࡀࡉࡀ ࡖࡋࡀ ࡁࡍࡀ ࡋࡒࡅࡃࡀࡌࡇ ࡁࡉࡍࡕࡀ ࡁࡉࡍࡕࡀ ࡋࡀࡁࡍࡀ ࡋࡒࡃࡀࡌࡇ ࡗ ࡀࡆࡉࡋ ࡁࡂࡀࡅࡇ ࡌࡉࡎࡕࡌࡉࡊ ࡏࡋࡇ ࡅࡀࡉࡋࡇ ࡋࡌࡀࡃࡓࡉࡊ ࡃࡉࡓࡊࡉࡀ ࡖࡃࡉࡓࡊࡀ ࡋࡍࡀࡐࡔࡉࡇ ࡋࡀࡃࡓࡉࡊ ࡖࡊࡖ ࡀࡆࡉࡋ ࡁࡂࡀࡅࡇ ࡋࡀࡌࡉࡄࡒࡉࡋ ࡅࡀࡉࡋࡇ ࡋࡌࡀࡌࡋࡉࡊ ࡌࡉࡋࡊࡉࡀ ࡈࡀࡁࡉࡀ ࡖࡌࡅࡋࡊࡀࡍࡀ ࡋࡍࡀࡐࡔࡉࡇ ࡋࡀࡌࡋࡉࡊ ࡅࡀࡉࡋࡇ ࡖࡄࡅࡀࡋࡇ ࡅࡋࡀ ࡈࡀࡉࡉࡁ ࡌࡉࡍࡇ ࡌࡍ ࡈࡀࡁࡕࡇ ࡁࡀࡄࡉࡔ ࡁࡊࡀࡍࡐࡇ ࡅࡋࡀ ࡌࡀࡔࡊࡀ ࡀࡌࡉࡍࡈࡅࡋ ࡖࡄࡅࡀࡋࡇ ࡁࡏࡃࡇ ࡅࡋࡀࡏࡄࡀࡁ ࡌࡉࡎࡀࡐ ࡎࡀࡉࡉࡐ ࡋࡉࡅࡌࡀ ࡓࡁࡀ ࡖࡎࡅࡐ ࡖࡁࡏࡃࡇ ࡀࡅࡀࡓ ࡀࡉࡍࡇ ࡌࡀࡍ ࡄࡀࡅࡉࡋࡇ ࡀࡓࡃࡉࡊࡋࡀ ࡏࡋࡊࡅࡍ ࡀࡌࡉࡓࡍࡀ ࡅࡌࡀࡐࡓࡉࡔࡍࡀ ࡁࡄࡉࡓࡉࡀ ࡅࡔࡀࡋࡌࡀࡍࡉࡀ ࡖࡃࡀࡉࡓࡉࡀ ࡁࡀࡋࡌࡀ ࡌࡀࡍ ࡀࡆࡉࡋ ࡋࡁࡉࡕ ࡄࡉࡉࡀ ࡅࡌࡉࡕࡊࡀࡌࡀࡓ ࡀࡋࡃࡅࡓ ࡄࡀࡔࡊࡉࡀ ࡁࡄࡉࡓࡀࡉ ࡄࡆࡅࡍ ࡖࡀࡋࡌࡀࡍ ࡄࡀࡆࡉࡍ ࡌࡉࡁࡈࡀࡋ ࡁࡀࡈࡉࡋ ࡅࡏࡁࡉࡃࡀࡕࡇ ࡌࡉࡕࡄࡀࡌࡁࡋࡀࡍ ࡌࡉࡔࡕࡀࡌࡓࡀࡍ ࡏࡁࡉࡃࡀࡕࡇ ࡅࡋࡅࡀࡕ ࡄࡃࡀࡃࡉࡀ ࡋࡀ ࡒࡀࡓࡁࡀࡍ ࡀࡅࡉࡃ ࡆࡀࡄࡁࡀ ࡓࡄࡉࡌࡀ ࡅࡌࡉࡁࡉࡀ ࡊࡀࡎࡐࡀ ࡅࡋࡀࡌࡉࡕࡀࡔࡊࡀ ࡁࡀࡈࡋࡉࡀ ࡈࡅࡋࡀࡋࡉࡀ ࡖࡆࡉࡐࡀ ࡅࡔࡀࡌࡀࡔࡕࡀ ࡖࡄࡀࡆࡉࡍ ࡀࡋࡌࡀ ࡁࡀࡈࡋࡉࡀ ࡁࡅࡎࡌࡀࡍࡉࡀ ࡅࡓࡀࡂࡀࡂࡀࡕࡀ ࡖࡄࡀࡆࡉࡍ ࡀࡋࡌࡀ ࡔࡀࡋࡌࡀࡍࡉࡀ ࡔࡀࡋࡌࡉࡀ ࡉࡅࡌࡉࡀ ࡅࡉࡀࡄࡓࡉࡀ ࡅࡔࡀࡉࡉࡀ ࡅࡔࡅࡔࡉࡀ ࡅࡄࡀࡅࡉࡍ ࡗ ࡖࡋࡀࡄࡅࡍ ࡁࡀࡈࡉࡋ ࡀࡋࡌࡀ ࡊࡅࡋࡇ ࡅࡎࡀࡉࡉࡐ ࡄࡀࡅࡉࡀ ࡗ ࡖࡋࡀࡄࡅࡀ ࡌࡉࡕࡉࡒࡓࡉࡀ ࡂࡅࡐࡍࡉࡀ ࡄࡀࡃࡅࡀ ࡅࡀࡆࡉࡋ ࡆࡌࡀࡓࡅࡍ ࡅࡁࡀࡈࡉࡋ ࡌࡀࡋࡊࡀ ࡌࡔࡀࡌࡀࡓ ࡕࡀࡂࡇ ࡅࡁࡍࡉࡀ ࡄࡀࡓࡉࡀ ࡌࡀࡓࡀࡅࡀࡕࡀ ࡖ ࡀࡋࡌࡀ ࡁࡕࡉࡍࡉࡄࡕࡀ ࡖࡋࡉࡁࡀࡉࡄࡅࡍ ࡍࡀࡐࡒࡉࡀ ࡌࡉࡍࡇ ࡌࡍ ࡀࡋࡌࡀ ࡄࡀࡓࡁࡀ ࡅࡎࡀࡉࡐࡀ ࡕࡉࡁࡉࡋ ࡁࡏࡌࡒࡉࡀ ࡎࡓࡅࡕࡀ ࡖࡄࡔࡅࡊࡀ ࡀࡍࡀࡕࡅࡍ ࡁࡄࡉࡓࡀࡉ ࡋࡀࡍࡉࡄࡅࡉࡋࡊࡅࡍ ࡓࡅࡄࡑࡀࡍࡀ ࡋࡄࡀࡆࡉࡍ ࡀࡋࡌࡀ ࡍࡊࡉࡋࡀ ࡁࡄࡉࡓࡀࡉ ࡈࡅࡁࡇ ࡀࡋࡌࡀࡍ ࡖ ࡔࡅࡌࡀ ࡅࡏࡕࡄࡀࡉࡌࡀࡍ ࡅࡀࡉࡋࡇ ࡋࡌࡀࡍ ࡖࡏࡕࡊࡀࡋࡀࡋ ࡅࡔࡊࡉࡁ ࡈࡅࡁࡇ ࡖࡔࡅࡌࡀ ࡅࡄࡀࡌࡀࡍ ࡎࡀࡋࡉࡒ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡁࡉࡔࡉࡀ ࡖࡔࡅࡌࡀ ࡅࡋࡀࡄࡀࡉࡌࡀࡍ ࡌࡀࡆࡁࡓࡉࡀ ࡀࡍࡐࡀࡉࡄࡅࡍ ࡋࡀࡕࡀࡓ ࡄࡔࡅࡊ ࡁࡀࡋࡀࡋࡅࡍ ࡈࡅࡓࡀ ࡄࡀࡔࡊࡀ ࡈࡅࡁࡇ ࡀࡋࡌࡀࡍ ࡁࡍࡀࡐࡔࡉࡇ ࡍࡉࡃࡀ ࡅࡋࡉࡁࡇ ࡍࡉࡄࡅࡉࡋࡇ ࡀࡓࡃࡉࡊࡋࡀ ࡊࡅࡋࡌࡀࡍ ࡖࡍࡉࡆࡃࡀࡄࡀࡓ ࡁࡍࡀࡐࡔࡉࡇ ࡋࡀࡉࡉࡕ ࡀࡊࡅࡀࡕࡇ ࡁࡀࡋࡌࡀ ࡁࡄࡉࡓࡀࡉ ࡀࡔࡀࡓ ࡅࡎࡅࡁࡋࡅࡉࡀ ࡏࡋ ࡓࡉࡃࡐࡀ ࡖࡀࡋࡌࡀ ࡋࡓࡉࡃࡐࡀ ࡖࡀࡋࡌࡀ ࡎࡅࡁࡋࡅࡉࡀ ࡁࡋࡉࡁࡀ ࡊࡔࡉࡈࡀ ࡅࡌࡄࡀࡉࡌࡍࡀ ࡀࡎࡂࡅࡃࡅࡋࡉࡀ ࡁࡕࡓࡉࡑࡅࡕࡀ ࡖ ࡏࡒࡅࡌ ࡄࡅࡉࡋࡊࡅࡍ ࡁࡀࡄࡉࡃ ࡏࡃࡀ ࡁࡄࡉࡓࡀࡉ ࡏࡅࡄࡓࡀ ࡖࡀࡆࡋࡀࡁࡇ ࡍࡉࡔࡌࡀࡕࡀ ࡍࡀࡐࡔࡀ ࡅࡎࡀࡊࡀ ࡋࡉࡕࡋࡇ ࡋࡀ ࡊࡉࡋࡁࡇ ࡐࡀࡓࡎࡉࡀ ࡅࡋࡀࡌࡀࡍࡃࡀࡆ ࡁࡂࡀࡅࡇ ࡊࡅࡃࡊࡉࡀ ࡊࡅࡋ ࡐࡀࡓࡎࡀ ࡌࡀࡈࡀࡓࡕࡀ ࡅࡊࡅࡋ ࡌࡀࡈࡀࡓࡕࡀ ࡂࡆࡉࡓࡀࡉࡉࡀ ࡅࡌࡀࡊࡎࡉࡀ ࡉࡀࡕࡁࡉࡀ ࡏࡋࡇ ࡄࡔࡉࡋ ࡅࡌࡀࡕࡍࡀ ࡆࡀࡉࡍࡀ ࡅࡌࡎࡀࡎࡒࡀࡋ ࡅࡌࡀࡕࡍࡀ ࡐࡀࡓࡆࡋࡀ ࡓࡁࡌࡉࡀ ࡅࡓࡀࡄࡕࡀ ࡏࡋ ࡃࡅࡃࡉࡀ ࡋࡍࡉࡔࡌࡀࡕࡀ ࡖࡁࡉࡔࡉࡀ ࡍࡀࡈࡓࡀࡍ ࡀࡕࡓࡉࡑ ࡅࡉࡀࡕࡉࡁ ࡌࡅࡔࡀࡍࡉࡀ ࡌࡍ ࡀࡋࡐࡀ ࡁࡀࡄࡀࡓ ࡄࡀࡃ ࡄࡀࡃ ࡁࡀࡄࡀࡓ ࡌࡀࡍ ࡀࡋࡐࡀ ࡅࡕࡓࡉࡍ ࡁࡀࡄࡀࡓ ࡌࡍ ࡓࡅࡁࡀࡍ ࡁࡀࡄࡀࡓ ࡅࡌࡀࡎࡉࡒ ࡍࡉࡔࡌࡀࡕࡀ ࡖࡔࡉࡄࡀ ࡅࡔࡀࡅࡉࡀ ࡋࡀࡕࡀࡓ ࡍࡄࡅࡓ ࡌࡉࡔࡕࡀࡉࡉࡍ ࡄࡉࡉࡀ ࡅࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡁࡉࡍࡉࡀ ࡔࡀࡊࡁࡉࡀ ࡋࡕࡉࡓࡉࡀ ࡀࡔࡋࡉࡀ ࡁࡊࡀࡋࡅࡆࡀ ࡒࡀࡓࡉࡀ ࡀࡔࡋࡉࡀ ࡒࡀࡓࡉࡀ ࡁࡊࡀࡋࡅࡆࡀ ࡌࡍ ࡕࡓࡉࡍ ࡊࡉࡐࡇ ࡖࡍࡀࡄࡓࡀ ࡊࡔࡀࡔ ࡍࡀࡄࡓࡀ ࡖࡌࡉࡇ ࡕࡀࡍࡉࡍࡉࡀ ࡅࡀࡂࡋࡀࡅࡀࡕࡇ ࡀࡓࡒࡁࡉࡀ ࡁࡂࡀࡅࡇ ࡉࡀࡒࡃࡀࡍࡉࡀ ࡍࡅࡓࡀ ࡏࡋ ࡕࡓࡉࡍ ࡊࡉࡐࡇ ࡊࡅࡋ ࡔࡅࡔࡋࡀࡕࡀ ࡏࡋ ࡐࡅࡌࡇ ࡀࡕࡓࡉࡑ ࡌࡀࡍࡀ ࡋࡔࡋࡀࡄࡉࡀࡕࡀ ࡅࡋࡀࡂࡈࡉࡀ ࡅࡌࡀࡔࡓࡉࡀ ࡖࡂࡀࡅࡓࡉࡀ ࡅࡂࡀࡍࡁࡉࡀ ࡋࡀࡁࡓࡉࡋࡇ ࡋࡍࡀࡄࡓࡀ ࡊࡔࡀࡔ ࡄࡀࡓࡀࡔࡉࡀ ࡅࡄࡀࡓࡀࡔࡀࡕࡀ ࡋࡀࡁࡓࡉࡋࡇ ࡋࡍࡀࡄࡓࡀ ࡊࡔࡀࡔ ࡊࡀࡓࡀࡑࡉࡀ ࡅࡓࡀࡌࡀࡆࡉࡀ ࡋࡀࡁࡓࡉࡋࡇ ࡋࡍࡀࡄࡓࡀ ࡊࡔࡀࡔ ࡄࡀࡋࡉࡍ ࡖࡀࡐࡊࡉࡍ ࡌࡉࡑࡓࡉࡀ ࡋࡀࡁࡓࡉࡋࡇ ࡋࡍࡀࡄࡓࡀ ࡊࡔࡀࡔ ࡄࡀࡋࡉࡍ ࡖࡌࡔࡀࡍࡉࡍ ࡊࡅࡃࡊࡉࡀ ࡋࡀࡁࡓࡉࡋࡇ ࡋࡍࡀࡄࡓࡀ ࡊࡔࡀࡔ ࡀࡍࡀ ࡁࡌࡀ ࡖࡌࡆࡀࡓࡀࡆࡍࡀ ࡀࡌࡉࡍࡈࡅࡋ ࡖࡁࡓ ࡄࡉࡉࡀ ࡀࡍࡀ ࡄࡀࡆࡆࡉࡕ ࡁࡍࡀࡄࡓࡀ ࡍࡀࡄࡓࡀ ࡊࡔࡀࡔ ࡋࡀࡌࡉࡄࡉࡅࡍ ࡕࡀࡍࡉࡍࡉࡀ ࡅࡋࡀࡁࡀࡓࡉࡅࡍ ࡊࡅࡋࡄࡅࡍ ࡀࡓࡒࡁࡉࡀ ࡀ ࡋࡀࡊࡀࡋࡌࡀࡍ ࡍࡅࡓࡀ ࡅࡋࡀࡂࡀࡌࡀࡓࡕࡀࡍ ࡊࡅࡋ ࡔࡅࡔࡋࡀࡕࡀ ࡋࡀ ࡓࡌࡅࡍ ࡏࡋ ࡌࡀࡍࡀ ࡔࡀࡋࡀࡄࡉࡀࡕࡀ ࡀࡌࡉࡍࡈࡅࡋ ࡖࡊࡅࡔࡈࡀ ࡀࡍࡀ ࡅࡓࡉࡄࡀ ࡖࡄࡉࡉࡀ ࡏࡋࡀࡅࡀࡉ ࡏࡔࡓࡉࡀ ࡅࡌࡔࡀࡁࡅࡍ ࡄࡉࡉࡀ ࡅࡄࡉࡉࡀ ࡆࡀࡊࡉࡍ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡍࡀࡃ ࡅࡕࡍࡀࡅࡀࡃ ࡉࡅࡓࡁࡀ ࡂࡀࡁࡓࡀ ࡒࡀࡓࡀࡁࡕࡀࡍࡀ ࡒࡅࡌ ࡁࡌࡀࡓࡊࡀࡁࡕࡀࡊ ࡏࡕࡉࡁ ࡒࡅࡌ ࡏࡕࡉࡁ ࡀࡁࡌࡀࡓࡊࡀࡁࡕࡀࡊ ࡅࡃࡀࡓࡁࡇ ࡋࡄࡀࡆࡉࡍ ࡀࡋࡌࡀ ࡀࡋࡌࡀ ࡃࡀࡓࡁࡇ ࡅࡃࡀࡉࡀࡍࡀ ࡄࡅࡉࡀ ࡁࡊࡅࡋࡄࡅࡍ ࡀࡋࡌࡀ ࡗ ࡀࡉࡋࡉࡕ ࡅࡊࡖ ࡍࡀࡐࡒࡉࡕ ࡒࡀࡃࡉࡌ ࡃࡍࡀ ࡄࡀࡔࡉࡊ ࡀࡓࡀࡁ ࡋࡀࡕࡉࡄࡀࡌ ࡅࡋࡀࡕࡉࡓࡂࡀࡆ ࡅࡋࡀࡕࡉࡄࡈࡉࡁࡅࡍ ࡁࡉࡁࡍࡀࡉ ࡋࡀࡕࡉࡄࡈࡉࡁࡅࡍ ࡁࡕࡀࡓࡌࡉࡃࡀࡉ ࡖࡃࡀࡉࡓࡉࡍ ࡀࡋࡅࡀࡕࡀࡊ ࡁࡀࡋࡌࡀ ࡀࡎࡂࡉࡀ ࡅࡀࡕࡀ ࡉࡅࡓࡁࡀ ࡀࡋࡌࡀ ࡋࡁࡉࡕ ࡐࡕࡀࡄࡉࡋ ࡌࡈࡀ ࡄࡅࡍ ࡊࡅࡊࡁࡉࡀ ࡕࡋࡀࡕࡀ ࡌࡉࡌࡓࡉࡀ ࡌࡍ ࡀࡁࡅࡄࡅࡍ ࡍࡎࡉࡁ ࡌࡉࡌࡓࡉࡀ ࡍࡎࡉࡁ ࡌࡍ ࡀࡁࡅࡄࡅࡍ ࡅࡎࡀࡂࡃࡉࡀ ࡅࡌࡔࡀࡁࡉࡋࡇ ࡌࡍ ࡓࡉࡔ ࡁࡓࡉࡔ ࡊࡅࡋ ࡉࡅࡌ ࡕࡋࡀࡕࡀ ࡆࡉࡁࡍࡉࡀ ࡕࡅࡔࡁࡉࡄࡕࡀ ࡒࡅࡃࡀࡌ ࡐࡕࡀࡄࡉࡋ ࡎࡀࡋࡒࡀ ࡔࡀࡌࡉࡔ ࡁࡓࡀࡁࡅࡕࡀ ࡕࡔࡉࡌࡀ ࡁࡀࡅࡀࡕࡀ ࡍࡀࡎࡉࡁ ࡎࡉࡍ ࡂࡉࡓࡁࡀࡍࡀ ࡄࡀࡎࡉࡓࡀ ࡕࡋࡀࡕࡌࡀ ࡁࡀࡅࡀࡕࡀ ࡍࡀࡎࡉࡁ ࡋࡉࡁࡀࡕ ࡒࡀࡃࡉࡔࡕࡀ ࡁࡓࡀࡁࡅࡕࡀ ࡔࡉࡕࡌࡀ ࡁࡀࡅࡀࡕࡀ ࡍࡀࡎࡁࡀ ࡅࡁࡎࡓࡉࡍ ࡅࡀࡓࡁࡉࡀ ࡁࡀࡅࡀࡕࡀ ࡌࡔࡀࡁࡉࡋࡇ ࡋࡀࡁ ࡗ ࡉࡀࡕࡉࡁ ࡉࡅࡓࡁࡀ ࡁࡌࡀࡓࡊࡀࡁࡕࡇ ࡅࡌࡀࡎࡂࡉࡀ ࡁࡂࡀࡅࡇ ࡖࡀࡋࡀࡌ ࡀࡕࡀࡕ ࡏࡅࡀࡕ ࡓࡅࡄࡀ ࡊࡀࡃࡀࡁࡕࡀ ࡅࡌࡀࡋࡊࡀࡋࡇ ࡌࡉࡋࡊࡉࡀ ࡁࡀࡈࡋࡉࡀ ࡕࡀࡓࡕࡉࡍࡅࡍ ࡖࡕࡉࡌࡀࡓࡋࡅࡍ ࡁࡉࡁࡔࡅࡕࡀ ࡏࡋ ࡁࡍࡉࡀ ࡔࡅࡓࡁࡀ ࡓࡁࡀ ࡖࡄࡉࡉࡀ ࡁࡓࡅࡂࡆࡀ ࡄࡅࡍ ࡗ ࡄࡀࡆࡀ ࡄࡆࡅࡍ ࡍࡀࡈࡓࡉࡀ ࡈࡀࡋࡉࡉࡀ ࡋࡁࡉࡕ ࡄࡉࡉࡀ ࡎࡋࡉࡒ ࡀࡆࡀࡋ ࡀࡌࡀࡓࡋࡇ ࡋࡄࡉࡁࡉࡋ ࡆࡉࡅࡀ ࡏࡋ ࡏࡁࡉࡃࡀࡕࡀ ࡖࡀࡁࡀࡃ ࡉࡅࡓࡁࡀ ࡁࡄࡀࡆࡉࡍ ࡀࡋࡌࡀ ࡀࡌࡀࡓࡋࡇ ࡋࡄࡉࡁࡉࡋ ࡆࡉࡅࡀ ࡀࡎࡂࡉࡀ ࡋࡅࡀࡕ ࡀࡄࡉࡇ ࡀࡕࡀ ࡀࡎࡂࡉࡀ ࡀࡕࡀ ࡋࡅࡀࡕ ࡀࡄࡉࡇ ࡒࡅࡃࡀࡌ ࡏࡅࡕࡓࡉࡀ ࡒࡀࡌ ࡏࡋ ࡖࡉࡀࡕࡁࡉࡀ ࡅࡌࡉࡕࡀࡐࡓࡉࡔࡉࡀ ࡏࡅࡕࡓࡉࡀ ࡀࡎࡂࡉࡀ ࡄࡉࡁࡉࡋ ࡆࡉࡅࡀ ࡀࡕࡀ ࡌࡉࡄࡉࡇ ࡁࡒࡅࡋࡐࡀ ࡋࡉࡅࡓࡁࡀ ࡅࡋࡓࡅࡄࡀ ࡌࡍ ࡊࡅࡓࡎࡉࡇ ࡔࡉࡃࡉࡇ ࡀࡌࡀࡓࡋࡇ ࡌࡀࡄࡅ ࡀࡌࡀࡓࡉࡋࡀࡊ ࡗ ࡀࡕࡉࡕ ࡋࡁࡀࡉࡕࡀ ࡍࡀࡐࡋࡀ ࡌࡀࡄࡅ ࡄࡈࡅࡍ ࡕࡀࡓࡌࡉࡃࡀࡉ ࡖࡁࡉࡔࡅࡕࡀ ࡔࡁࡀࡒࡕ ࡏࡋࡅࡍ ࡏࡋࡀࡅࡀࡉࡄࡅࡍ ࡔࡁࡀࡒࡕ ࡁࡉࡔࡅࡕࡀ ࡅࡌࡀࡄࡉࡒࡀࡕࡋࡅࡍ ࡁࡂࡀࡅࡇ ࡖࡄࡀࡆࡉࡍ ࡀࡋࡌࡀ ࡍࡎࡀࡁࡕࡇ ࡏࡋ ࡆࡉࡅࡀ ࡅࡍࡄࡅࡓࡀ ࡌࡉࡍࡇ ࡅࡁࡓࡐࡉࡋࡉࡀ ࡖࡄࡔࡅࡊࡀ ࡀࡒࡉࡌࡕࡇ ࡍࡎࡀࡁࡕࡇ ࡀࡋࡕࡀࡂࡀ ࡓࡁࡀ ࡅࡔࡉࡁࡒࡉࡕ ࡁࡓࡉࡔࡉࡄ ࡀࡊࡋࡀ ࡋࡀࡓࡁࡀ ࡆࡀࡄࡋࡉࡋࡉࡀ ࡖࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡅࡍࡀࡈࡓࡉࡀ ࡌࡍ ࡒࡅࡃࡀࡌࡇ ࡆࡄࡀ ࡕࡉࡁࡉࡋ ࡒࡀࡌࡀࡕ ࡁࡄࡅࡓࡁࡀ ࡀࡋࡌࡀ ࡊࡅࡋࡇ ࡁࡈࡉࡋ ࡉࡅࡓࡁࡀ ࡀࡔࡋࡀ ࡅࡁࡊࡀ ࡉࡅࡓࡁࡀ ࡅࡀࡉࡋࡉࡋ ࡁࡌࡀࡓࡊࡀࡁࡕࡇ ࡌࡍ ࡓࡅࡂࡆࡀ ࡖࡏࡋࡇ ࡄࡅࡀ ࡄࡔࡅࡊ ࡅࡄࡁࡅࡓ ࡐࡀࡓࡑࡅࡐࡇ ࡅࡁࡃࡌࡅࡕࡀ ࡒࡀࡃࡌࡀࡉࡕࡀ ࡒࡀࡌ ࡀࡌࡀࡓࡋࡇ ࡋࡄࡉࡁࡉࡋ ࡆࡉࡅࡀ ࡏࡅ ࡄࡉࡍࡉࡀࡋࡀࡊ ࡏࡕࡉࡀࡁࡅࡕࡀࡊ ࡕࡉࡄࡅࡉࡀ ࡏࡋࡀࡉ ࡅࡏࡉࡀࡌࡉࡋࡀࡊ ࡁࡕࡔࡉࡌࡀ ࡁࡀࡅࡀࡕࡀ ࡖ ࡌࡔࡀࡁࡉࡍࡀࡋࡇ ࡋࡀࡁ ࡐࡕࡀࡄࡉࡋ ࡏࡉࡀࡌࡉࡋࡀࡊ ࡁࡄࡀࡊ ࡔࡉࡕࡀ ࡅࡏࡃࡀࡍࡀ ࡗ ࡖࡁࡀ ࡌࡉࡎࡉࡓࡐࡀࡍ ࡅࡌࡉࡊࡋࡀࡍ ࡅࡁࡀ ࡋࡌࡉࡄࡀࡌࡁࡋࡀࡍ ࡅࡀࡍࡀࡕ ࡄࡅࡉࡕࡋࡀࡍ ࡐࡉࡓࡒࡀ ࡏࡉࡀࡌࡉࡋࡀࡊ ࡁࡀࡋࡁࡅࡔࡀ ࡖࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡖࡀࡍࡀࡕ ࡀࡉࡕࡉࡕࡋࡉࡀ ࡌࡍ ࡀࡕࡀࡓ ࡊࡎࡉࡀ ࡏࡉࡀࡌࡉࡋࡀࡊ ࡁࡀࡓࡁࡀ ࡊࡋࡉࡋࡉࡀ ࡖࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡖࡌࡉࡍࡀࡉ ࡃࡉࡋࡉࡀ ࡏࡕࡉࡍࡎࡉࡁ ࡏࡉࡀࡌࡉࡋࡀࡊ ࡀࡁࡐࡀࡓࡑࡅࡐࡀ ࡓࡁࡀ ࡖࡏࡒࡀࡓࡀ ࡖࡌࡉࡍࡇ ࡀࡐࡋࡅࡂࡕࡀ ࡖࡆࡉࡅࡀ ࡄࡅࡀࡕ ࡏࡉࡀࡌࡉࡋࡀࡊ ࡁࡕࡓࡉࡍ ࡍࡀࡈࡓࡉࡀ ࡖࡏࡋ ࡈࡅࡓࡀ ࡖ ࡕࡀࡓࡅࡀࡍ ࡍࡂࡉࡃࡉࡋࡇ ࡁࡃࡓࡀࡁࡔࡉࡀ ࡖࡆࡉࡅࡀ ࡌࡍ ࡓࡉࡔ ࡁࡓࡉࡔ ࡌࡀࡌࡋࡉࡋࡉࡀ ࡌࡉࡍࡀࡉ ࡁࡈࡀࡁࡅࡕࡀ ࡅࡌࡉࡔࡕࡀࡉࡉࡍ ࡁࡃࡓࡀࡔࡉࡀ ࡕࡀࡒࡍࡉࡀ ࡏࡌࡀ ࡅࡀࡔࡀࡓ ࡉࡅࡓࡁࡀ ࡅࡏࡋ ࡏࡅࡌࡀࡌࡀࡕࡇ ࡄࡕࡀࡌ ࡄࡀࡉࡆࡀࡊ ࡏࡄࡀࡁࡋࡇ ࡋࡁࡅࡔ ࡖ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡖࡀࡉࡕࡉࡋࡇ ࡌࡍ ࡀࡕࡀࡓ ࡊࡎࡉࡀ ࡏࡄࡀࡁࡋࡇ ࡀࡓࡁࡀ ࡊࡋࡉࡋࡉࡀ ࡖࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡖࡌࡀࡍࡄࡀࡓ ࡀࡋࡌࡉࡀ ࡏࡄࡀࡁࡋࡇ ࡕࡀࡂࡀ ࡓࡁࡀ ࡖࡆࡉࡅࡀ ࡌࡍ ࡓࡉࡔ ࡁࡓࡉࡔ ࡕࡀࡒࡍࡇ ࡅࡀࡅࡕࡁࡇ ࡁࡌࡀࡓࡊࡀࡁࡕࡇ ࡅࡂࡀࡌࡀࡓࡋࡇ ࡍࡀࡈࡓࡉࡀ ࡖࡌࡉࡆࡃࡀࡄࡓࡉࡁࡇ ࡌࡍ ࡓࡉࡔ ࡁࡓࡉࡔ ࡖࡌࡉࡍࡇ ࡏࡕࡉࡍࡎࡉࡁ ࡂࡀࡌࡀࡓࡋࡇ ࡍࡀࡈࡓࡉࡀ ࡊࡅࡋࡄࡅࡍ ࡒࡀࡋࡀ ࡓࡁࡀ ࡒࡓࡀ ࡌࡍ ࡊࡉࡎࡉࡀ ࡅࡌࡀࡔࡌࡀࡋࡇ ࡁࡄࡔࡅࡊࡀ ࡄࡀࡔࡊࡀ ࡋࡀࡅ ࡉࡀࡃࡉࡕ ࡉࡅࡓࡁࡀ ࡖࡓࡅࡂࡆࡀ ࡏࡋࡀࡊ ࡄࡅࡀ ࡋࡀࡅ ࡉࡀࡃࡉࡕ ࡉࡅࡓࡁࡀ ࡖࡀࡒࡉࡌࡕࡀࡊ ࡁࡄࡀࡁࡀࡓࡀ ࡄࡀࡔࡊࡀ ࡋࡀࡅ ࡉࡀࡃࡉࡕ ࡉࡅࡓࡁࡀ ࡖࡏࡋࡀࡊ ࡔࡉࡁࡒࡉࡕ ࡌࡄࡉࡕࡀ ࡅࡓࡅࡂࡆࡀ ࡅࡊࡅࡋࡄࡅࡍ ࡍࡀࡈࡓࡉࡀ ࡏࡕࡁࡀࡓࡅࡍ ࡗ ࡋࡀࡈࡕࡀࡊ ࡁࡋࡅࡈࡕࡀ ࡁࡉࡔࡕࡀ ࡅࡀࡒࡉࡌࡕࡀࡊ ࡁࡄࡀࡁࡀࡓࡀ ࡄࡀࡔࡊࡀ ࡁࡄࡀࡁࡀࡓࡀ ࡄࡔࡊࡀ ࡀࡒࡉࡌࡕࡀࡊ ࡗ ࡏࡍࡉࡔ ࡋࡀࡄࡅࡀࡋࡀࡊ ࡐࡉࡓࡒࡀ ࡓࡅࡄࡀ ࡏࡌࡀࡊ ࡅࡌࡔࡉࡄࡀ ࡅࡔࡉࡁࡉࡀࡄࡉࡀ ࡅࡊࡅࡊࡁࡉࡀ ࡕࡓࡉࡎࡀࡓ ࡁࡓࡐࡉࡋࡉࡀ ࡖࡄࡔࡅࡊࡀ ࡏࡕࡉࡊࡎࡅࡍ ࡅࡁࡄࡀࡉࡋࡀࡉ ࡃࡉࡋࡉࡀ ࡋࡀࡌࡑࡅࡍ ࡋࡀࡅ ࡉࡀࡃࡉࡕ ࡉࡅࡓࡁࡀ ࡖࡀࡍࡀ ࡋࡌࡉࡓࡐࡀࡎ ࡆࡀࡐࡀ ࡖࡀࡉࡍࡀ ࡋࡄࡀࡊࡀ ࡀࡕࡉࡕ ࡋࡀࡅ ࡉࡀࡃࡉࡕ ࡉࡅࡓࡁࡀ ࡀࡌࡉࡍࡈࡅࡋ ࡖࡏࡋ ࡃࡉࡋࡉࡀ ࡌࡀࡍࡄࡉࡓࡉࡕ ࡁࡀࡋࡌࡀ ࡋࡀࡅ ࡉࡀࡃࡉࡕ ࡉࡅࡓࡁࡀ ࡋࡁࡍࡀࡉ ࡕࡅࡒࡍࡀ ࡅࡆࡀࡄࡀࡓࡕࡀ ࡋࡀࡊ ࡀࡉࡕࡉࡕ ࡋࡀࡅ ࡉࡀࡃࡉࡕ ࡉࡓࡅࡁࡀ ࡖࡌࡑࡉࡍࡀ ࡋࡄࡔࡅࡊࡀ ࡅࡋࡂࡀࡅࡍࡀ ࡋࡉࡃࡌࡅࡕࡇ ࡂࡅࡄࡀ ࡁࡊࡀ ࡁࡌࡀࡓࡊࡀࡁࡕࡇ ࡅࡏࡋ ࡄࡉࡁࡉࡋ ࡆࡉࡅࡀ ࡖࡍࡉࡌࡀࡓࡋࡇ ࡏࡅ ࡄࡈࡉࡁࡅࡍ ࡁࡕࡀࡓࡌࡉࡃࡀࡊ ࡄࡀࡆࡉࡍ ࡀࡋࡀࡑࡀ ࡅࡍࡂࡀࡃࡀ ࡍࡉࡃࡀࡋࡉࡀ ࡏࡋࡀࡉ ࡁࡄࡀࡉࡀࡊ ࡄࡉࡁࡉࡋ ࡆࡉࡅࡀ ࡅࡋࡀࡕࡓࡀ ࡊࡀࡎࡉࡀ ࡖࡌࡉࡍࡇ ࡏࡕࡉࡕ ࡋࡄࡀࡉࡀࡊ ࡄࡉࡁࡉࡋ ࡆࡉࡅࡀ ࡖࡋࡀࡄࡈࡉࡁࡅࡍ ࡁࡉࡁࡍࡀࡊ ࡋࡀࡄࡈࡉࡁࡅࡍ ࡁࡕࡀࡓࡌࡉࡃࡀࡊ ࡖࡃࡀࡉࡓࡉࡀ ࡋࡅࡀࡕࡀࡍ ࡁࡀࡋࡌࡀ ࡄࡉࡁࡉࡋ ࡆࡉࡅࡀ ࡎࡋࡉࡒ ࡋࡀࡕࡓࡇ ࡉࡅࡓࡁࡀ ࡀࡂࡆࡀࡓ ࡁࡁࡀࡉࡕࡀ ࡍࡀࡐࡋࡀ ࡒࡀࡌ ࡅࡍࡈࡀࡓ ࡁࡁࡀࡉࡕࡀ ࡀࡋࡌࡀ ࡖ ࡕࡉࡁࡉࡋ ࡁࡀࡈࡋࡀ ࡗ ࡍࡐࡀࡒ ࡉࡅࡓࡁࡀ ࡁࡌࡀࡓࡊࡀࡁࡕࡇ ࡀࡌࡀࡓࡋࡇ ࡁࡃࡓࡀࡁࡔࡉࡀ ࡕࡀࡒࡍࡉࡀ ࡄࡀࡒ ࡅࡀࡌࡀࡓ ࡖ ࡏࡁࡀࡃ ࡈࡀࡁࡅࡕࡀ ࡋࡅࡀࡕ ࡁࡍࡉࡀ ࡔࡅࡓࡁࡀ ࡔࡀࡍࡉࡀ ࡀࡕࡀࡕ ࡓࡅࡄࡀ ࡊࡀࡃࡀࡁࡕࡀ ࡅࡀࡌࡓࡀࡋࡇ ࡄࡀࡓࡔࡉࡀ ࡅࡏࡅࡁࡀࡃࡉࡀ ࡁࡀࡈࡋࡉࡀ ࡍࡎࡀࡁࡕࡇ ࡌࡉࡍࡇ ࡄࡀࡉࡆࡀࡊ ࡁࡉࡔࡅࡕࡀ ࡌࡋࡀ ࡄࡀࡉࡆࡀࡊ ࡌࡋࡀ ࡁࡉࡔࡅࡕࡀ ࡅࡄࡀࡅࡒࡀ ࡅࡆࡉࡅࡄࡕࡀ ࡏࡍࡉࡔࡉࡇ ࡀࡋࡌࡀ ࡋࡉࡅࡌࡀ ࡁࡀࡕࡓࡀࡉࡀ ࡃࡉࡍࡀ ࡌࡉࡍࡀࡉࡄࡅࡍ ࡌࡉࡕࡌࡀࡓ ࡊࡅࡋࡄࡅࡍ ࡎࡀࡄࡓࡉࡀ ࡋࡄࡔࡅࡊࡀ ࡔࡀࡐࡋࡉࡀ ࡅࡌࡅࡕࡀ ࡕࡉࡍࡉࡀࡍࡀ ࡌࡀࡉࡕࡉࡀ ࡅࡄࡉࡉࡀ ࡆࡀࡊࡉࡍ ࡎࡀ ࡗ ࡏࡕࡉࡍࡑࡉࡁ ࡕࡅࡒࡍࡀ ࡌࡍ ࡀࡕࡓࡇ ࡍࡐࡉࡔ ࡀࡎࡂࡉࡀ ࡀࡕࡀࡋࡇ ࡋࡀࡋࡌࡀ ࡖࡄࡅࡎࡓࡀࡍࡀ ࡏࡄࡀࡁࡋࡇ ࡋࡎࡉࡍ ࡌࡍ ࡓࡉࡔ ࡁࡓࡉࡔ ࡂࡀࡁࡓࡀ ࡖࡏࡄࡀࡁࡋࡇ ࡕࡅࡒࡍࡀ ࡒࡓࡀࡋࡇ ࡅࡆࡀࡄࡓࡇ ࡅࡐࡀࡒࡃࡇ ࡌࡍ ࡓࡉࡔ ࡁࡓࡉࡔ ࡀࡌࡀࡓࡋࡇ ࡋࡁࡅࡔࡀ ࡖࡕࡅࡒࡍࡀ ࡏࡄࡀࡁࡋࡇ ࡖࡌࡀࡍࡄࡀࡓࡋࡇ ࡄࡀࡁࡀࡓࡀ ࡖࡁࡀࡉࡕࡀ ࡍࡀࡐࡋࡀ ࡗ ࡌࡉࡕࡉࡊࡎࡉࡀ ࡆࡉࡅࡇ ࡖࡔࡀࡌࡉࡔ ࡕࡅࡒࡍࡀࡊ ࡃࡉࡋࡀࡊ ࡍࡉࡃࡍࡀ ࡗ ࡔࡀࡊࡉࡁ ࡂࡀࡁࡓࡀ ࡀࡋࡅࡀࡕ ࡆࡀࡅࡇ ࡀࡁࡌࡀࡋࡅࡀࡔࡀࡊ ࡃࡉࡋࡀࡊ ࡍࡉࡆࡃࡓࡀ ࡅࡎࡀࡄࡃࡅࡕࡀࡊ ࡁࡂࡀࡅࡇ ࡖࡔࡉࡓࡔࡀ ࡕࡀࡒࡍࡀ ࡀࡍࡀࡕ ࡀࡍࡄࡀࡓࡁࡇ ࡁࡐࡀࡓࡑࡅࡐࡇ ࡅࡐࡀࡓࡒࡇ ࡌࡍ ࡊࡉࡁࡉࡀ ࡅࡌࡅࡌࡉࡀ ࡅࡌࡍ ࡄࡀࡋࡉࡍ ࡃࡌࡀࡅࡀࡕࡀ ࡖࡋࡀࡊࡀࡔࡓࡀࡍ ࡅࡌࡍ ࡁࡉࡔࡅࡕࡀ ࡅࡊࡀࡓࡉࡅࡕࡀ ࡖࡁࡀࡉࡕࡀ ࡍࡀࡐࡋࡀ ࡀࡌࡉࡍࡈࡅࡋ ࡖ ࡔࡀࡓࡔࡀ ࡖࡌࡀࡆࡓࡅࡕࡀ ࡖࡁࡀࡉࡕࡀ ࡏࡋ ࡏࡃࡀࡊ ࡃࡉࡋࡀࡊ ࡏࡕࡄࡉࡁ ࡀࡍࡀࡕ ࡀࡍࡄࡀࡓ ࡅࡕࡀࡒࡉࡍ ࡅࡒࡀࡉࡉࡌ ࡔࡅࡓࡅࡁࡕࡇ ࡌࡍ ࡓࡉࡔ ࡁࡓࡉࡔ ࡌࡀࡋࡉࡋ ࡖࡍࡉࡌࡀࡓࡋࡇ ࡋࡂࡀࡁࡓࡀ ࡖࡕࡅࡒࡍࡀ ࡀࡋࡁࡔࡉࡇ ࡉࡅࡌࡀ ࡁࡉࡀࡄࡓࡀ ࡌࡉࡕࡀࡊࡎࡉࡍࡀ ࡅࡃࡓࡀࡁࡔࡀࡉ ࡃࡉࡋࡉࡀ ࡌࡉࡕࡊࡓࡉࡊ ࡕࡅࡒࡍࡀ ࡃࡉࡋࡉࡀ ࡖࡌࡉࡆࡃࡀࡄࡓࡉࡁࡇ ࡍࡀࡈࡓࡉࡀ ࡕࡓࡉࡍ ࡗ ࡋࡀࡉࡕࡀࡊ ࡋࡃࡉࡋࡉࡀ ࡅࡂࡅࡁࡓࡉࡀ ࡀࡋࡅࡀࡕ ࡆࡀࡅࡀࡉࡅࡍ ࡔࡀࡊࡁࡉࡀ ࡗ ࡌࡒࡀࡁࡋࡀ ࡁࡄࡀࡍࡀࡕࡇ ࡉࡅࡌࡀ ࡀࡋࡂࡉࡀ ࡅࡃࡉࡂࡉࡀ ࡅࡃࡌࡀࡅࡀࡕࡀ ࡎࡀࡉࡍࡀࡕࡀ ࡌࡉࡍࡀࡉࡄࡅࡍ ࡍࡀࡐࡒࡉࡀ ࡗ ࡌࡒࡀࡁࡋࡀ ࡁࡄࡀࡍࡀࡕࡇ ࡉࡅࡌࡀ ࡀࡈࡓࡅࡔࡉࡀ ࡅࡂࡉࡓࡁࡀࡍࡉࡀ ࡖࡋࡀࡏࡃࡉࡀ ࡅࡋࡀࡋࡉࡂࡓࡉࡀ ࡌࡉࡍࡀࡉࡄࡅࡍ ࡍࡀࡐࡒࡉࡀ ࡔࡀࡂࡔࡉࡋࡇ ࡔࡉࡁࡉࡀࡄࡉࡀ ࡋࡌࡀࡆࡓࡅࡕࡀ ࡅࡌࡔࡀࡅࡉࡁࡇ ࡊࡅࡋ ࡖࡁࡉࡔ ࡌࡀࡋࡉࡋ ࡖࡍࡉࡌࡀࡓࡋࡇ ࡂࡀࡁࡓࡀ ࡖࡕࡅࡒࡍࡀ ࡀࡋࡁࡔࡉࡇ ࡄࡀࡋࡉࡍ ࡖࡁࡄࡀࡍࡀࡕࡅࡍ ࡉࡅࡌࡉࡀ ࡏࡋ ࡔࡅࡓࡁࡀࡕࡀࡍ ࡃࡉࡋࡉࡀ ࡋࡀࡌࡉࡕࡀࡊࡔࡀࡓ ࡋࡀࡍࡉࡕࡉࡌࡍࡉࡀ ࡀࡁࡌࡉࡍࡉࡀࡍࡀࡍ ࡅࡋࡀࡍࡉࡄࡔࡉࡁ ࡁࡔࡀࡓࡔࡀࡍ ࡃࡉࡋࡀࡍ ࡌࡍ ࡓࡉࡔ ࡁࡓࡉࡔ ࡔࡀࡓࡔࡀ ࡄࡅ ࡖࡄࡔࡅࡊࡀ ࡍࡉࡆࡀࡋ ࡋࡒࡉࡍࡀ ࡖࡌࡉࡍࡇ ࡄࡅࡀ ࡒࡓࡀࡍ ࡅࡐࡀࡒࡃࡀࡍ ࡅࡆࡀࡓࡆࡀࡍ ࡅࡕࡅࡒࡍࡀ ࡅࡆࡀࡄࡓࡅࡕࡀ ࡏࡋࡀࡉ ࡔࡁࡀࡒ ࡀࡌࡀࡓࡋࡇ ࡏࡆࡃࡀࡄࡀࡓ ࡁࡊࡀࡍࡀ ࡖࡍࡉࡔࡌࡀࡕࡀ ࡖࡔࡁࡉࡒࡋࡀࡍ ࡁࡀࡋࡌࡀ ࡎࡂࡉࡃ ࡅࡀࡎࡂࡉࡀ ࡌࡍ ࡒࡅࡃࡀࡌࡀࡉ ࡅࡀࡎࡂࡉࡀ ࡋࡁࡉࡕ ࡀࡁࡀࡕࡅࡓ ࡀࡆࡀࡋ ࡀࡎࡂࡉࡀ ࡋࡌࡀࡈࡀࡓࡀࡕࡀ ࡍࡄࡉࡕ ࡀࡎࡂࡉࡀ ࡍࡄࡉࡕ ࡋࡌࡀࡈࡀࡓࡀࡕࡀ ࡋࡌࡀࡔࡋࡅࡌࡉࡀ ࡄࡅࡔࡁࡀࡍࡀ ࡌࡍ ࡓࡉࡔ ࡁࡓࡉࡔ ࡉࡅࡌࡀ ࡖࡂࡍࡉࡁ ࡌࡍ ࡕࡉࡁࡉࡋ ࡅࡔࡀࡉࡉࡀ ࡖ ࡊࡎࡉࡀ ࡌࡍ ࡀࡋࡌࡀ ࡁࡕࡉࡒࡋࡀࡕࡀ ࡖࡓࡀࡌࡉࡀ ࡏࡋ ࡕࡀࡓࡌࡉࡃࡉࡀ ࡄࡋࡀࡑࡀ ࡅࡊࡁࡀࡔࡀ ࡅࡍࡂࡀࡃࡀ ࡔࡀࡁࡉࡒ ࡏࡋࡇ ࡅࡌࡀࡄࡅࡉࡋࡇ ࡄࡀࡅࡒࡀ ࡅࡃࡀࡄࡀࡋࡕࡀ ࡅࡆࡉࡅࡄࡕࡀ ࡀࡋࡌࡀ ࡖࡌࡀࡉࡉࡕ ࡅࡌࡉࡔࡕࡀࡓࡄࡀࡆ ࡄࡀࡔࡅࡊ ࡅࡄࡀࡅࡉࡀ ࡃࡌࡅࡕࡇ ࡗ ࡖ ࡋࡀࡄࡅࡀࡕ ࡗ ࡍࡀࡐࡉࡒ ࡌࡍ ࡌࡀࡈࡀࡓࡀࡕࡀ ࡂࡀࡅࡍࡇ ࡌࡉࡍࡇ ࡌࡉࡕࡉࡍࡎࡉࡁ ࡂࡀࡅࡍࡇ ࡌࡉࡕࡉࡍࡎࡉࡁ ࡌࡉࡍࡇ ࡅࡄࡀࡅࡉࡀ ࡃࡌࡅࡕࡇ ࡗ ࡖࡋࡀࡄࡅࡀࡕ ࡄࡀࡉࡆࡀࡊ ࡉࡀࡌࡉࡁ ࡁࡌࡀࡓࡊࡀࡁࡕࡄ ࡅࡋࡀࡁࡉࡔ ࡃࡓࡀࡁࡔࡉࡀ ࡕࡀࡒࡍࡉࡀ ࡅࡍࡀࡂࡃࡉࡋࡇ ࡋࡕࡅࡒࡍࡀ ࡓࡁࡀ ࡅࡌࡀࡎࡂࡉࡀ ࡁࡂࡀࡅࡇ ࡖࡀࡋࡌࡀ ࡁࡉࡅࡌࡀ ࡒࡀࡃࡌࡀࡉࡀ ࡌࡉࡕࡀࡄࡆࡉࡀ ࡁࡓࡉࡔࡀ ࡖࡓࡒࡉࡄࡀ ࡌࡉࡕࡐࡉࡄࡕࡀ ࡍࡀࡐࡉࡒ ࡌࡍ ࡓࡒࡉࡄࡀ ࡏࡋࡀࡉࡀ ࡅࡏࡋ ࡓࡒࡉࡄࡀ ࡕࡉࡕࡀࡉࡀ ࡌࡉࡎࡕࡌࡉࡊ ࡀࡋࡌࡀ ࡋࡉࡅࡌࡀ ࡕࡉࡍࡉࡀࡍࡀ ࡕࡀࡒࡅࡍ ࡕࡅࡒࡍࡇ ࡁࡊࡅࡋࡄࡅࡍ ࡀࡋࡌࡉࡀ ࡀࡋࡌࡀ ࡋࡉࡅࡌࡀ ࡔࡅࡁࡀࡉࡀ ࡁࡉࡀࡄࡓࡀ ࡎࡉࡍ ࡁࡒࡀࡋࡀ ࡖࡄࡉࡉࡀ  ࡌࡀࡌࡋࡉࡋ ࡌࡀࡌࡋࡉࡋ ࡁࡒࡀࡋࡀ ࡖࡄࡉࡉࡀ ࡀࡌࡉࡍࡈࡅࡋ ࡖࡄࡀࡅࡒࡀ ࡅࡆࡉࡅࡄࡕࡀ ࡖࡄࡉࡉࡀ ࡏࡃࡊࡀࡓ ࡗ ࡄࡀࡋࡉࡐ ࡌࡍ ࡉࡅࡌࡀ ࡔࡅࡁࡀࡉࡀ ࡄࡀࡅࡒࡀ ࡅࡆࡉࡅࡄࡕࡀ ࡏࡍࡉࡔࡉࡇ ࡏࡍࡉࡔࡉࡇ ࡋࡄࡀࡅࡒࡀ ࡅࡆࡉࡅࡄࡕࡀ ࡅࡓࡀࡌࡉࡀ ࡁࡉࡔࡅࡕࡀ ࡁࡂࡀࡅࡇ ࡖࡀࡋࡌࡀ ࡏࡋࡊࡅࡍ ࡀࡌࡉࡓࡍࡀ ࡅࡌࡀࡐࡓࡉࡔࡍࡀ ࡂࡅࡁࡓࡉࡀ ࡖࡁࡄࡉࡉࡀ ࡎࡀࡄࡃࡉࡀ ࡀࡔࡀࡓ ࡅࡎࡅࡁࡋࡅࡉࡀ ࡋࡓࡉࡃࡐࡀ ࡀࡁࡂࡀࡅࡇ ࡖࡁࡀࡉࡕࡀ ࡍࡀࡐࡋࡀ ࡀࡌࡀࡓࡋࡇ ࡖࡋࡉࡂࡀࡋ ࡁࡀࡈࡋࡀ ࡕࡉࡁࡉࡋ ࡅࡕࡓࡉࡍ ࡈࡅࡓࡉࡀ ࡌࡉࡕࡂࡀࡁࡀࡁࡉࡀ ࡕࡓࡉࡍ ࡈࡅࡓࡉࡀ ࡅࡄࡀࡉࡋࡀ ࡖࡍࡄࡅࡓࡀ ࡌࡉࡍࡀࡉࡄࡅࡍ ࡌࡉࡕࡉࡍࡎࡉࡁ ࡌࡉࡕࡉࡍࡎࡉࡁ ࡔࡓࡀࡓࡀ ࡊࡅࡋࡇ ࡖ ࡄࡅࡀ ࡋࡅࡀࡕࡀࡉࡄࡅࡍ ࡌࡍ ࡓࡉࡔ ࡁࡓࡉࡔ ࡄࡀࡔࡕࡀ ࡌࡉࡕࡀࡎࡋࡉࡀ ࡀࡃࡌࡅࡕࡀࡉࡄࡅࡍ ࡅࡄࡀࡅࡉࡀ ࡃࡌࡅࡕࡅࡍ ࡗ ࡖࡋࡀࡄࡅࡀࡕ ࡌࡍ ࡒࡅࡃࡀࡌ ࡍࡉࡔࡌࡀࡕࡅࡍ ࡂࡅࡄࡉࡀ ࡅࡒࡀࡄࡃࡀ ࡅࡁࡀࡊࡉࡀ ࡏࡋ ࡃࡅࡊࡕࡀࡉࡄࡅࡍ ࡅࡀࡌࡀࡓࡋࡉࡍ ࡗ ࡄࡅࡀࡉࡍࡉࡍ ࡁࡀࡋࡌࡀ ࡄࡀࡆࡉࡍ ࡀࡍࡄࡀࡓ ࡆࡉࡅࡀࡉࡊࡅࡍ ࡁࡊࡅࡋࡄࡅࡍ ࡀࡋࡌࡉࡀ ࡀࡍࡉࡍ ࡎࡄࡉࡃࡍࡉࡍ ࡁࡃࡉࡋࡊࡅࡍ ࡅࡎࡂࡉࡃࡍࡉࡍ ࡅࡔࡀࡁࡀࡍࡊࡅࡍ ࡌࡍ ࡓࡉࡔ ࡁࡓࡉࡔ ࡄࡀࡔࡕࡀ ࡀࡋࡌࡀ ࡖࡏࡕࡀࡎࡋࡉࡀࡕ ࡃࡌࡅࡕࡀࡉࡊࡅࡍ ࡅࡄࡉࡁࡓࡀࡕ ࡅࡄࡉࡔࡊࡀࡕ ࡗ ࡖࡋࡀࡄࡅࡀࡕ ࡋࡀࡄࡅࡀࡋࡅࡍ ࡐࡀࡓࡔࡉࡂࡍࡀ ࡏࡋ ࡔࡉࡁࡉࡀࡄࡉࡀ ࡖࡍࡉࡌࡀࡓࡋࡅࡍ ࡋࡎࡀࡂࡀࡃࡅࡍ ࡗ ࡖ ࡄࡅࡀࡕ ࡔࡉࡁࡉࡀࡄࡉࡀ ࡅࡎࡀࡂࡀࡃࡅࡍ ࡅࡍࡉࡔࡌࡀࡕࡅࡍ ࡖ ࡔࡀࡅࡉࡍ ࡅࡋࡀࡔࡀࡍࡅࡍ ࡅࡊࡅࡋࡄࡅࡍ ࡒࡉࡓࡉࡀࡕࡅࡍ ࡅࡀࡐ ࡍࡉࡔࡌࡀࡕࡀ ࡖࡁࡍࡉࡀ ࡔࡅࡓࡁࡀ ࡓࡁࡀ ࡖࡄࡉࡉࡀ ࡖࡄࡔࡅࡊࡀ ࡋࡔࡉࡅࡋ ࡕࡉࡕࡀࡉࡕࡀ ࡔࡀࡐࡋࡉࡀ ࡍࡀࡐࡋࡉࡀ ࡁࡄࡉࡅࡉࡀ ࡓࡁࡀ ࡖࡄࡅ ࡏࡅࡓ ࡌࡀࡓࡇ ࡖࡄࡔࡅࡊࡀ ࡔࡅࡌࡇ ࡌࡉࡍࡇ ࡌࡍ ࡄࡀࡍࡀࡕࡇ ࡉࡅࡌࡀ ࡌࡉࡕࡐࡀࡓࡒࡀ ࡅࡌࡉࡔࡕࡀࡅࡆࡁࡀ ࡍࡉࡔࡌࡀࡕࡀࡍ ࡅࡍࡉࡔࡌࡀࡕࡀ ࡖ ࡀࡄࡀࡍ ࡈࡀࡁࡉࡀ ࡅࡄࡀࡋࡉࡍ ࡀࡄࡅࡀࡕࡀࡍ ࡖࡌࡄࡀࡉࡌࡍࡉࡀ ࡍࡉࡔࡌࡀࡕࡅࡍ ࡖࡂࡅࡁࡓࡉࡀ ࡊࡔࡉࡈࡉࡀ ࡅࡌࡄࡀࡉࡌࡍࡉࡀ ࡍࡉࡎࡒࡅࡍ ࡍࡉࡄࡆࡉࡍࡇ ࡋࡀࡕࡓࡀ ࡓࡁࡀ ࡖࡍࡄࡅࡓࡀ ࡌࡉࡔࡕࡀࡉࡉࡍ ࡄࡉࡉࡀ ࡅࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡁࡔࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡋࡀࡑࡁࡉࡕ ࡅࡋࡀࡑࡀࡁࡀࡍࡀ ࡖࡌࡉࡎࡀࡒ ࡋࡌࡀࡕࡀ ࡖࡏࡅࡓࡀࡔࡋࡀࡌ ࡌࡀࡕࡀ ࡖࡌࡀࡕ ࡁࡉࡔࡉࡀ ࡅࡌࡀࡄࡅࡆࡉࡀ ࡖࡊࡅࡋࡇ ࡄࡀࡈࡉࡀ ࡌࡀࡕࡀ ࡖࡄࡀࡈࡉࡀ ࡅࡌࡀࡄࡅࡆࡀ ࡖࡀࡃࡅࡍࡀࡉ ࡁࡍࡀ ࡌࡀࡄࡅࡆࡀ ࡖࡁࡍࡀ ࡀࡃࡅࡍࡀࡉ ࡀࡉࡉࡋ ࡊࡀࡃࡁࡀ ࡌࡋࡀ ࡀࡉࡉࡋ ࡌࡋࡀ ࡊࡀࡃࡁࡀ ࡅࡏࡋ ࡕࡀࡓࡌࡉࡃࡀࡉ ࡀࡄࡅࡀࡋࡅࡍ ࡓࡉࡃࡐࡀ ࡊࡌࡀ ࡋࡀ ࡄࡍࡀࡋࡉࡀ ࡅࡋࡀࡁࡎࡅࡌࡋࡉࡀ ࡋࡌࡉࡎࡀࡒ ࡋࡌࡀࡕࡀ ࡖࡏࡅࡓࡀࡔࡋࡀࡌ ࡌࡀࡈࡅࡉࡀࡉ ࡋࡏࡅࡓࡀࡔࡋࡀࡌ ࡌࡃࡉࡍࡕࡀ ࡀࡃࡅࡍࡀࡉ ࡋࡐࡅࡌࡇ ࡐࡉࡄࡕࡇ ࡅࡌࡍ ࡀࡓࡒࡉࡄࡀ ࡀࡍࡉࡀࡍ ࡀࡃࡅࡍࡀࡉ ࡀࡍࡉࡀࡍ ࡌࡍ ࡓࡒࡉࡄࡀ ࡅࡀࡌࡀࡓࡋࡉࡀ ࡀࡆࡋࡉࡕ ࡂࡀࡁࡓࡀ ࡍࡅࡊࡓࡀࡉࡀ ࡖ ࡌࡀࡄࡅࡆࡀ ࡋࡀࡅ ࡁࡑࡅࡁࡉࡀࡍࡀࡊ ࡏࡕࡉࡁࡍࡉࡀ ࡌࡀࡄࡅࡆࡀ ࡋࡀ ࡏࡕࡉࡁࡍࡉࡀ ࡁࡑࡅࡁࡉࡀࡍࡀࡊ ࡖࡋࡉࡂࡉࡈࡕࡀ ࡀࡁࡂࡀࡅࡇ ࡋࡀࡂࡈࡉࡕ ࡀࡍࡀ ࡌࡀࡋࡀࡋࡉࡕ ࡋࡀࡃࡅࡍࡀࡉ ࡖࡂࡀࡁࡀࡓࡅࡀࡕࡀࡉ ࡏࡋࡇ ࡏࡕࡉࡌࡋࡉࡀ ࡉࡀࡒࡉࡐ ࡅࡁࡍࡉࡀ ࡀࡌࡉࡍ ࡀࡄࡀࡉ ࡁࡍࡉࡀ ࡆࡀࡄࡁࡀ ࡏࡕࡓࡉࡍ ࡏࡕࡋࡉࡀ ࡌࡉࡓࡉࡀࡉ ࡔࡀࡋࡌࡀࡍࡉࡕࡀ ࡖࡔࡀࡅࡉࡀࡋࡉࡀ ࡃࡀࡓࡉࡀ ࡅࡀࡋࡌࡉࡀ ࡗ ࡔࡅࡌࡀ ࡀࡃࡅࡍࡀࡉ ࡒࡓࡀࡋࡇ ࡋࡓࡅࡄࡀ ࡅࡀࡌࡀࡓࡋࡇ ࡌࡀࡍ ࡌࡍ ࡔࡅࡓࡁࡀࡕࡀ ࡖࡄࡉࡉࡀ ࡋࡄࡀࡊࡀ ࡏࡕࡅࡍ ࡋࡉࡂࡈࡕࡀ ࡌࡍ ࡃࡉࡋࡀࡍ ࡍࡉࡋࡉࡂࡈࡅࡍ ࡀࡕࡀࡉ ࡖࡍࡉࡊࡃࡀࡁ ࡊࡃࡀࡁࡀ ࡖࡏࡅࡋࡀ ࡅࡆࡉࡐࡀ ࡖࡌࡉࡔࡕࡁࡉࡁࡇ ࡃࡀࡓࡉࡀ ࡅࡀࡋࡌࡉࡀ ࡅࡄࡀࡉࡆࡀࡊ ࡌࡉࡌࡓࡀ ࡀࡌࡓࡀ ࡓࡅࡄࡀ ࡅࡍࡁࡅ ࡅࡔࡅࡁࡀ ࡊࡉࡃࡁࡅ ࡋࡏࡅࡓࡀࡉࡕࡀ ࡅࡎࡀࡃࡓࡅ ࡄࡉࡍࡅࡍ ࡊࡉࡃࡁࡅ ࡋࡏࡅࡓࡀࡉࡕࡀ ࡅࡎࡀࡃࡓࡅ ࡅࡏࡋ ࡏࡃࡇ ࡖࡔࡀࡌࡉࡔ ࡀࡃࡅࡍࡀࡉ ࡓࡌࡅࡍ ࡀࡃࡅࡍࡀࡉ ࡁࡂࡀࡁࡀࡓࡅࡀࡕࡇ ࡒࡓࡀࡋࡇ ࡋࡌࡉࡔࡀ ࡁࡓ ࡀࡌࡓࡀ ࡋࡈࡅࡓࡀ ࡖࡎࡉࡍࡀࡉ ࡀࡅࡕࡁࡅࡉࡀ ࡀࡓࡁࡉࡍ ࡉࡅࡌࡉࡀ ࡐࡅࡌࡇ ࡌࡍ ࡏࡊࡉࡋࡕࡀ ࡅࡌࡀࡔࡒࡉࡕࡀ ࡋࡂࡀࡈ ࡐࡅࡌࡇ ࡋࡂࡀࡈ ࡌࡍ ࡏࡊࡉࡋࡕࡀ ࡅࡌࡀࡔࡒࡉࡕࡀ ࡅࡊࡃࡀࡁࡀ ࡖࡏࡅࡋࡀ ࡏࡄࡀࡁࡋࡇ ࡖࡌࡉࡔࡕࡉࡁࡉࡁࡇ ࡃࡀࡓࡉࡀ ࡅࡀࡋࡌࡉࡀ ࡁࡄࡉࡓࡀࡉ ࡏࡌࡀࡓࡋࡊࡅࡍ ࡏࡋ ࡉࡀࡄࡅࡈࡀࡉࡉࡀ ࡖࡄࡀࡅࡉࡀ ࡖࡊࡃࡀࡁࡅࡍ ࡋࡀࡅ ࡌࡍ ࡍࡄࡅࡓࡀ ࡄࡅࡀ ࡏࡅ ࡀࡊࡃࡀࡁࡅࡍ ࡄࡅࡀ ࡌࡍ ࡍࡄࡅࡓࡀ ࡊࡅࡋࡄࡅࡍ ࡁࡄࡃࡀ ࡊࡉࡀࡍࡀ ࡒࡀࡉࡌࡉࡀ ࡁࡄࡉࡓࡀࡉ ࡏࡌࡀࡓࡋࡊࡅࡍ ࡏࡋ ࡀࡓࡀࡁࡀࡉࡉࡀ ࡖࡊࡃࡀࡁࡅࡍ ࡌࡍ ࡏࡅࡓࡀࡉࡕࡀ ࡏࡕࡉࡍࡎࡉࡁ ࡊࡃࡀࡁࡅࡍ ࡏࡕࡉࡍࡎࡉࡁ ࡌࡍ ࡏࡅࡓࡀࡉࡕࡀ ࡅࡁࡂࡀࡅࡇ ࡖࡏࡅࡓࡀࡉࡕࡀ ࡋࡀࡌࡀࡅࡃࡉࡀ ࡂࡀࡆࡓࡉࡍ ࡂࡆࡅࡓࡕࡀ ࡗ ࡉࡀࡄࡅࡈࡀࡉࡉࡀ ࡄࡉࡍࡅࡍ ࡔࡀࡂࡉࡔࡕࡉࡍࡅࡍ ࡓࡅࡄࡀ ࡅࡓࡌࡀࡕ ࡁࡉࡍࡀࡕࡀࡉࡄࡅࡍ ࡌࡀࡓࡅࡋࡀ ࡄࡃࡀ ࡄࡃࡀ ࡋࡄࡀࡁࡓࡇ ࡌࡂࡀࡍࡉࡋࡇ ࡅࡋࡀࡉࡀࡃࡉࡀ ࡋࡌࡀࡍ ࡎࡀࡂࡃࡉࡀ ࡁࡄࡉࡓࡀࡉ ࡌࡍ ࡉࡅࡌࡀ ࡖࡏࡕࡁࡉࡍࡉࡀࡕ ࡏࡅࡓࡀࡔࡋࡀࡌ ࡅࡀࡋࡌࡀ ࡖࡀࡕࡀ ࡁࡉࡆࡁࡀࡈ ࡎࡀࡄࡓࡀ ࡀࡍࡀ ࡋࡀࡌࡑࡉࡕ ࡋࡌࡉࡃࡀࡓ ࡁࡉࡍࡀࡕࡀࡉࡊࡅࡍ ࡁࡀࡋࡌࡀ ࡀࡋࡁࡅࡔࡀࡉ ࡋࡀࡄࡅࡀ ࡖ ࡐࡀࡂࡓࡉࡀ ࡖࡏࡃࡅࡓ ࡁࡉࡍࡀࡕࡀࡉࡊࡅࡍ ࡁࡀࡋࡌࡀ ࡎࡉࡋࡒࡉࡕ ࡅࡒࡀࡌࡉࡕ ࡏࡋ ࡌࡔࡅࡍࡉࡀ ࡊࡅࡔࡈࡀ ࡉࡀࡕࡁࡉࡕ ࡅࡀࡌࡀࡓࡍࡀ ࡈࡅࡁࡇ ࡅࡕࡅࡌ ࡈࡅࡁࡇ ࡋࡌࡀࡍ ࡖࡁࡍࡀࡐࡔࡉࡇ ࡍࡉࡆࡃࡀࡄࡀࡓ ࡌࡀࡍ ࡖࡍࡉࡆࡃࡀࡄࡀࡓ ࡁࡍࡀࡐࡔࡉࡇ ࡋࡀࡉࡉࡕ ࡀࡊࡅࡀࡕࡇ ࡁࡀࡋࡌࡀ ࡀࡌࡀࡓࡍࡀ ࡊࡌࡀ ࡊࡀࡓࡉࡀࡋࡉࡀ ࡋࡕࡀࡓࡌࡉࡃࡀࡉ ࡖࡁࡄࡀࡍࡀࡕࡇ ࡃࡀࡓࡀ ࡒࡀࡉࡌࡉࡀ ࡅࡌࡀࡔࡉࡈࡉࡋࡅࡍ ࡋࡌࡀࡓࡂࡉࡍࡉࡀࡕࡀ ࡅࡁࡂࡀࡅࡀࡉ ࡌࡔࡀࡅࡉࡀ ࡄࡀࡎࡉࡓ ࡅࡁࡑࡉࡓ ࡊࡌࡀ ࡊࡀࡓࡉࡀࡋࡉࡀ ࡏࡋ ࡕࡀࡓࡌࡉࡃࡀࡉ ࡖࡁࡄࡀࡍࡀࡕࡇ ࡃࡀࡓࡀ ࡒࡀࡉࡌࡉࡀ ࡔࡓࡀࡕ ࡅࡔࡀࡌࡓࡀࡕ ࡏࡋࡀࡅࡀࡉࡄࡅࡍ ࡓࡅࡄࡀ ࡈࡍࡅࡐࡉࡀ ࡅࡃࡀࡔࡕࡀࡍࡀ ࡅࡌࡎࡀࡓࡉࡀࡋࡅࡍ ࡋࡕࡉࡓࡉࡀ ࡄࡔࡅࡊ ࡊࡌࡀ ࡊࡀࡓࡉࡀࡋࡉࡀ ࡏࡋ ࡕࡀࡓࡌࡉࡃࡀࡉ ࡖࡁࡔࡉࡁࡉࡀ ࡖࡓࡅࡄࡀ ࡌࡉࡔࡕࡁࡉࡍ ࡔࡓࡀࡕ ࡅࡔࡉࡁࡒࡀࡕ ࡏࡋࡀࡅࡀࡉࡄࡅࡍ ࡂࡉࡋࡉࡀ ࡖࡂࡀࡅࡓࡀ ࡅࡆࡌࡀࡓࡀ ࡅࡆࡀࡍࡉࡅࡕࡀ ࡅࡌࡎࡀࡓࡀࡋࡅࡍ ࡋࡕࡉࡓࡉࡀ ࡄࡔࡅࡊ ࡊࡌࡀ ࡊࡀࡓࡉࡀࡋࡉࡀ ࡏࡋ ࡁࡍࡉࡀ ࡁࡄࡉࡓࡉࡀ ࡆࡉࡃࡒࡀ ࡖࡊࡅࡋࡌࡀࡍ ࡖࡁࡔࡍࡇ ࡖ ࡁࡉࡆࡁࡀࡈ ࡎࡀࡄࡓࡀ ࡁࡅࡓࡆࡉࡍࡒࡀ ࡁࡓࡉࡔࡉࡇ ࡍࡉࡕࡓࡀࡑ ࡔࡀࡅࡉࡋࡉࡀ ࡃࡀࡓࡉࡀ ࡅࡀࡋࡌࡉࡀ ࡔࡀࡅࡉࡋࡉࡀ ࡌࡍ ࡀࡋࡐࡀ ࡗ ࡍࡀࡐࡉࡒ ࡌࡍ ࡐࡀࡂࡓࡇ ࡁࡉࡍࡉࡀ ࡏࡅࡕࡓࡉࡀ ࡖࡍࡄࡅࡓࡀ ࡍࡉࡕࡓࡉࡑ ࡊࡅࡋࡌࡀࡍ ࡖࡁࡔࡍࡇ ࡖࡁࡉࡆࡁࡀࡈ ࡎࡀࡄࡓࡀ ࡃࡓࡀࡁࡔࡀ ࡄࡉࡅࡀࡓࡀ ࡅࡒࡀࡋࡀ ࡅࡊࡀࡋࡅࡆࡀ ࡄࡀࡅࡉࡋࡇ ࡅࡋࡉࡀࡓࡃࡍࡀ ࡄࡉࡅࡀࡓࡀ ࡍࡉࡐࡅࡒ ࡁࡃࡓࡀࡁࡔࡉࡀ ࡖࡆࡉࡅࡀ ࡍࡉࡐࡒࡅࡍ ࡀࡋࡀࡍࡐࡇ ࡌࡍ ࡀࡕࡀࡓ ࡀࡍࡄࡅࡓ ࡊࡅࡋࡌࡀࡍ ࡖࡒࡓࡀ ࡋࡍࡀࡐࡔࡉࡇ ࡌࡀࡍࡃࡀ ࡖࡄࡉࡉࡀ ࡀࡍࡀ ࡌࡀࡍࡃࡀ ࡖࡄࡉࡉࡀ ࡄࡅࡉࡋࡇ ࡁࡀࡄࡉࡃ ࡏࡃࡀ ࡁࡄࡉࡓࡀࡉ ࡗ ࡄࡀࡆࡉࡕࡅࡍ ࡂࡉࡍࡉࡀ ࡖࡏࡊࡅࡓࡉࡀ ࡏࡅ ࡏࡅࡑࡓࡀࡉࡊࡅࡍ ࡁࡀࡑࡀࡓ ࡏࡅ ࡌࡔࡀࡍࡉࡋࡊࡅࡍ ࡀࡌࡉࡍࡈࡅࡋ ࡖࡃࡀࡓࡀ ࡒࡀࡃࡌࡀࡉࡀ ࡊࡅࡋࡇ ࡔࡅࡓࡁࡀࡕࡀࡍ ࡃࡉࡋࡀࡍ ࡄࡅࡀ ࡃࡀࡓࡀ ࡕࡉࡍࡉࡀࡍࡀ ࡊࡅࡋࡇ ࡔࡅࡓࡁࡀࡕࡀࡍ ࡃࡉࡋࡀࡍ ࡄࡅࡀ ࡃࡀࡓࡀ ࡀࡕࡋࡉࡕࡀࡉࡀ ࡊࡅࡋࡇ ࡔࡅࡓࡁࡀࡕࡀࡍ ࡃࡉࡋࡀࡍ ࡄࡅࡀ ࡃࡀࡓࡀ ࡀࡓࡁࡉࡀࡉࡀ ࡄࡃࡀ ࡊࡅࡋࡇ ࡁࡉࡔࡅࡕࡀ ࡄࡅࡀ ࡌࡉࡍࡇ ࡁࡉࡔࡅࡕࡀ ࡄࡀࡆࡉࡍ ࡃࡓࡀࡔࡀ ࡊࡀࡎࡉࡀ ࡖࡌࡍ ࡐࡅࡌࡀࡉ ࡃࡉࡋࡉࡀ ࡄࡉࡁࡉࡋ ࡆࡉࡅࡀ ࡍࡐࡀࡒ ࡊࡅࡋ ࡌࡀࡍ ࡖࡍࡉࡑࡉࡕࡇ ࡅࡍࡉࡔࡉࡌࡇ ࡊࡌࡀ ࡕࡓࡉࡑࡋࡇ ࡃࡅࡊࡕࡀ ࡊࡅࡋࡌࡀࡍ ࡖࡋࡀࡍࡉࡑࡉࡕࡄ ࡅࡋࡀࡍࡉࡔࡉࡌࡇ ࡊࡌࡀ ࡀࡊࡑࡀࡋࡇ ࡁࡀࡕࡀࡓ ࡄࡔࡅࡊ ࡑࡅࡕ ࡅࡔࡅࡌࡀ ࡁࡄࡉࡓࡀࡉ ࡅࡀࡎࡉࡒ ࡔࡅࡓࡁࡀࡕࡊࡅࡍ ࡋࡀࡕࡀࡓ ࡍࡄࡅࡓ ࡌࡉࡔࡕࡀࡉࡉࡍ ࡄࡉࡉࡀ ࡅࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡌࡉࡄࡃࡉࡀ ࡊࡌࡀ ࡄࡀࡃࡉࡍࡀ ࡀࡊࡑࡀࡕ ࡅࡊࡀࡓࡉࡀࡋࡉࡀ ࡁࡂࡀࡅࡇ ࡖࡃࡅࡓ ࡁࡉࡔࡉࡀ ࡌࡉࡄࡃࡉࡀ ࡊࡌࡀ ࡄࡀࡃࡉࡍࡀ ࡋࡁࡀࡁ ࡏࡁࡉࡃࡀࡕࡀ ࡖࡏࡁࡃࡉࡕ ࡁࡂࡀࡅࡇ ࡖࡄࡀࡆࡉࡍ ࡀࡋࡌࡀ ࡊࡌࡀ ࡏࡆࡀࡋ ࡅࡊࡌࡀ ࡏࡔࡐࡅࡋ ࡁࡂࡀࡅࡀࡉࡄࡅࡍ ࡖࡊࡅࡋࡄࡅࡍ ࡀࡋࡌࡉࡀ ࡊࡌࡀ ࡏࡉࡀࡍࡄࡀࡓ ࡏࡅࡕࡓࡉࡀ ࡅࡊࡌࡀ ࡏࡉࡀࡎࡀࡒ ࡂࡉࡍࡆࡀ ࡋࡁࡉࡕ ࡓࡅࡓࡁࡉࡀ ࡀࡍࡀ ࡊࡌࡀ ࡄࡀࡃࡉࡍࡀ ࡅࡍࡉࡔࡌࡀࡕ ࡌࡎࡀࡊࡉࡍࡀࡋࡇ ࡋࡀࡁ ࡊࡌࡀ ࡄࡀࡃࡉࡍࡀ ࡁࡏࡁࡉࡃࡀࡕࡀ ࡖࡏࡁࡃࡉࡕ ࡏࡋ ࡀࡍࡉࡉࡀ ࡅࡏࡋ ࡃࡉࡓࡃࡒࡉࡀ ࡀࡍࡀ ࡏࡊࡌࡀ ࡏࡉࡀࡍࡄࡀ ࡏࡋ ࡋࡉࡁࡀࡉ ࡅࡊࡌࡀ ࡕࡉࡓࡀࡕࡀ ࡏࡔࡃࡅࡊ ࡊࡌࡀ ࡀࡉࡕࡉࡋࡅࡍ ࡄࡀࡉࡋࡀ ࡏࡋ ࡏࡅࡕࡓࡉࡀ ࡅࡏࡌࡓࡀ ࡋࡓࡅࡓࡁࡀࡍࡉࡀ ࡁࡀࡋࡌࡀ ࡊࡌࡀ ࡊࡁࡅࡔ ࡎࡀࡄࡓࡉࡀ ࡅࡊࡌࡀ ࡏࡂࡈࡀࡋ ࡌࡀࡓࡃࡉࡀ ࡌࡍ ࡀࡁࡀࡕࡅࡓ ࡓࡀࡌࡀ ࡌࡀࡍ ࡌࡉࡍࡀࡉࡊࡅࡍ ࡍࡉࡐࡀࡓࡒࡅࡍ ࡀࡍࡀ ࡊࡌࡀ ࡏࡃࡓࡀ ࡅࡊࡌࡀ ࡏࡎࡁࡅࡋ ࡏࡁࡉࡃࡀࡕࡀ ࡁࡑࡀࡅࡓࡀࡉ ࡊࡌࡀ ࡏࡔࡉࡃࡉࡇ ࡋࡄࡀࡁࡔࡀࡁࡀ ࡊࡌࡀ ࡏࡓࡉࡃࡐࡇ ࡊࡌࡀ ࡏࡔࡉࡃࡉࡇ ࡋࡄࡀࡆࡉࡍ ࡀࡋࡌࡀ ࡊࡌࡀ ࡀࡉࡕࡉࡋࡇ ࡄࡀࡉࡋࡀ ࡅࡔࡓࡀࡓࡀ ࡖࡋࡉࡕࡁࡇ ࡁࡉࡕ ࡌࡀࡊࡎࡉࡀ ࡊࡌࡀ ࡏࡊࡁࡅࡔ ࡏࡅࡔࡀࡍࡉࡀ ࡅࡏࡋ ࡍࡉࡓࡀ ࡍࡀࡉࡋࡉࡍࡅࡍ ࡊࡌࡀ ࡏࡊࡓࡀࡁ ࡊࡌࡀ ࡏࡔࡃࡉࡀ ࡁࡀࡆࡉࡓࡀ ࡁࡀࡋࡌࡀ ࡊࡌࡀ ࡏࡆࡓࡀ ࡅࡊࡌࡀ ࡏࡄࡑࡀࡃ ࡊࡌࡀ ࡏࡐࡀࡋࡀࡂ ࡐࡋࡅࡂࡕࡀ ࡌࡍ ࡀࡅࡃࡉࡀ ࡏࡊࡌࡀ ࡏࡊࡁࡀࡓ ࡋࡁࡉࡔࡉࡀ ࡅࡎࡀࡊࡋࡉࡀ ࡁࡃࡅࡃࡉࡀ ࡏࡔࡃࡉࡀ ࡅࡏࡁࡀࡔࡀࡋ ࡊࡌࡀ ࡍࡉࡒࡀࡋ ࡌࡅࡆࡀࡍࡉࡀ ࡅࡊࡌࡀ ࡀࡁࡀࡕࡅࡓ ࡍࡉࡃࡀࡍ ࡃࡉࡍࡀ ࡁࡀࡋࡌࡀ ࡊࡌࡀ ࡏࡌࡉࡄࡉࡉࡇ ࡋࡔࡀࡌࡉࡔ ࡅࡊࡌࡀ ࡏࡉࡀࡂࡆࡉࡓࡇ ࡁࡄࡀࡆࡉࡍ ࡀࡋࡌࡀ ࡊࡌࡀ ࡏࡐࡀࡒࡃࡇ ࡏࡋ ࡁࡄࡉࡓࡉࡀ ࡆࡉࡃࡒࡀ ࡖࡃࡀࡉࡓࡉࡍ ࡁࡄࡀࡆࡉࡍ ࡀࡋࡌࡀ ࡊࡌࡀ ࡏࡌࡉࡄࡉࡀ ࡌࡀࡈࡀࡓࡀࡕࡀ ࡅࡎࡉࡍ ࡁࡂࡀࡅࡀࡉࡄࡅࡍ ࡊࡌࡀ ࡏࡔࡃࡉࡀ ࡌࡍ ࡀࡕࡋࡀࡕࡉࡍ ࡅࡀࡋࡌࡀ ࡋࡕࡋࡀࡕࡉࡍ ࡉࡅࡌࡉࡀ ࡁࡃࡅࡃࡉࡀ ࡖࡓࡀࡄࡕࡀࡍ ࡏࡔࡉࡃࡉࡇ ࡊࡌࡀ ࡌࡒࡀࡁࡋࡀ ࡏࡋ ࡌࡀࡆࡓࡅࡕࡀ ࡅࡈࡅࡍࡀ ࡔࡓࡉࡀ ࡁࡀࡋࡌࡀ ࡊࡌࡀ ࡍࡉࡔࡉࡐࡋࡅࡍ ࡎࡐࡉࡍࡀࡕࡀ ࡅࡊࡌࡀ ࡍࡉࡆࡉࡒࡐࡅࡍ ࡋࡀࡕࡀࡓ ࡍࡄࡅࡓ ࡊࡌࡀ ࡏࡊࡀࡋ ࡌࡉࡀ ࡄࡉࡉࡀ ࡅࡏࡔࡃࡉࡀ ࡁࡌࡉࡀ ࡕࡀࡄࡌࡉࡀ ࡊࡌࡀ ࡍࡉࡃࡉࡓࡅࡍ ࡏࡅࡕࡓࡉࡀ ࡅࡈࡅࡍࡅࡐࡉࡀ ࡅࡁࡉࡔࡅࡕࡀ ࡊࡌࡀ ࡍࡉࡎࡉࡁࡋࡅࡍ ࡊࡌࡀ ࡕࡉࡄࡔࡅࡊ ࡅࡊࡌࡀ ࡕࡉࡍࡂࡀ ࡅࡊࡌࡀ ࡌࡀࡓࡂࡀࡍࡉࡀࡕࡀ ࡏࡄࡀࡁ ࡋࡀࡅࡃࡉࡀ ࡊࡌࡀ ࡀࡕࡋࡉࡁࡇ ࡁࡎࡋࡉࡕࡀࡉ ࡅࡏࡉࡀࡎࡀࡒ ࡀࡍࡉࡉࡀ ࡅࡌࡓࡀࡃࡐࡉࡀ ࡊࡌࡀ ࡏࡌࡉࡄࡉࡀ ࡈࡅࡓࡉࡀ ࡅࡊࡌࡀ ࡏࡉࡀࡋࡁࡔࡉࡀ ࡄࡀࡁࡀࡓࡀ ࡋࡀࡅࡃࡉࡀ ࡊࡌࡀ ࡏࡔࡃࡉࡀ ࡔࡉࡃࡉࡓࡉࡀࡕࡀ ࡅࡒࡀࡁࡅࡓࡉࡀ ࡁࡂࡀࡉࡀࡓࡉࡀ ࡅࡂࡀࡍࡀࡁࡉࡀ ࡖࡀࡋࡌࡀ ࡊࡌࡀ ࡏࡌࡉࡄࡉࡀ ࡅࡊࡌࡀ ࡏࡂࡈࡀࡋ ࡅࡊࡌࡀ ࡊࡁࡀࡓ ࡋࡁࡉࡔࡉࡀ ࡅࡊࡀࡃࡀࡁࡉࡀ ࡖࡃࡀࡉࡓࡉࡍ ࡁࡀࡋࡌࡀ ࡏࡊࡌࡀ ࡏࡔࡃࡉࡋࡅࡍ ࡌࡀࡓࡅࡋࡀ ࡅࡄࡉࡍࡅࡍ ࡄࡃࡀࡃࡉࡀ ࡊࡌࡀ ࡍࡉࡂࡉࡈࡋࡅࡍ ࡋࡉࡌࡀࡕ ࡍࡉࡔࡕࡓࡉࡀ ࡕࡉࡂࡓࡀ ࡅࡋࡉࡁࡀࡉ ࡖࡊࡀࡉࡅࡁ ࡍࡉࡕࡀࡐࡀ ࡋࡏࡌࡀࡕ ࡕࡉࡁࡈࡅࡋ ࡕࡉࡁࡉࡋ ࡅࡏࡊࡉࡎࡇ ࡏࡋ ࡎࡉࡋࡉࡕࡀࡉ ࡌࡍ ࡀࡋࡌࡉࡀ ࡗ ࡄࡀࡆࡉࡍ ࡀࡌࡀࡓ ࡄࡉࡁࡉࡋ ࡆࡉࡅࡀ ࡌࡀࡋࡉࡋ ࡌࡀࡍࡃࡀ ࡖࡄࡉࡉࡀ ࡖࡍࡉࡌࡀࡓࡋࡇ ࡊࡌࡀ ࡕࡉࡕࡀࡊࡔࡀࡋ ࡄࡉࡁࡉࡋ ࡆࡉࡅࡀ ࡅࡊࡌࡀ ࡕࡉࡓࡀࡃࡀࡐ ࡁࡄࡀࡆࡉࡍ ࡀࡋࡌࡀ ࡌࡍ ࡊࡅࡋࡄࡅࡍ ࡏࡁࡉࡃࡀࡕࡀ ࡖࡀࡁࡃࡉࡀ ࡀࡁࡍࡇ ࡖࡁࡉࡔࡉࡀ ࡀࡁࡑࡀࡅࡓࡀࡊ ࡃࡉࡋࡀࡊ ࡌࡀࡄࡅ ࡖࡏࡊࡀ ࡗ ࡄࡀࡆࡉࡍ ࡔࡅࡌࡀ ࡄࡉࡁࡉࡋ ࡆࡉࡅࡀ ࡏࡍࡐࡀࡑ ࡌࡍ ࡊࡅࡓࡎࡇ ࡒࡀࡌ ࡅࡐࡉࡄࡕࡇ ࡋࡐࡅࡌࡇ ࡁࡊࡅࡔࡈࡀ ࡅࡋࡌࡀࡍࡃࡀ ࡖࡄࡉࡉࡀ ࡖࡍࡉࡌࡀࡓࡋࡇ ࡕࡉࡁࡉࡋ ࡖࡀࡍࡀ ࡒࡓࡀࡉࡕࡇ ࡁࡑࡀࡅࡓࡀ ࡖࡌࡀࡍࡅ ࡍࡀࡐࡋࡀ ࡏࡁࡉࡃࡀࡕࡀ ࡖࡀࡍࡀ ࡒࡓࡉࡕ ࡅࡕࡀࡒࡍࡉࡕ ࡋࡌࡀࡍ ࡌࡍ ࡏࡅࡕࡓࡉࡀ ࡏࡄࡀࡁࡋࡇ ࡀࡍࡀ ࡗ ࡒࡓࡀࡉࡕࡇ ࡋࡀࡃࡀࡌ ࡅࡄࡀࡅࡀ ࡆࡀࡅࡇ ࡏࡑࡈࡀࡓࡀࡓࡀࡕ ࡅࡏࡕࡒࡉࡍࡎࡀࡕ ࡅࡌࡀࡐࡉࡒࡕࡇ ࡀࡄࡅࡀࡕ ࡀࡍࡀ ࡄࡅࡉࡁࡅࡍ ࡓࡉࡃࡐࡀ ࡀࡍࡀ ࡐࡀࡋࡂࡉࡕ ࡌࡀࡈࡀࡓࡀࡕࡀ ࡅࡄࡉࡔࡋࡉࡕ ࡔࡉࡃࡉࡓࡉࡀࡕࡀ ࡋࡉࡀࡄࡅࡈࡀࡉࡉࡀ ࡅࡀࡅࡕࡁࡉࡕ ࡌࡀࡊࡎࡉࡀ ࡖࡊࡅࡋ ࡖࡌࡐࡀࡒࡃࡋࡅࡍ ࡀࡁࡃࡉࡀ ࡀࡍࡀ ࡌࡀࡊࡉࡕ ࡏࡅࡄࡓࡀ ࡌࡍ ࡄࡔࡅࡊࡀ ࡋࡃࡀࡅࡓࡀ ࡕࡀࡒࡍࡀ ࡁࡌࡀࡈࡀࡓࡕࡀ ࡖࡀࡁࡀࡕࡅࡓ ࡀࡒࡌࡉࡁࡇ ࡎࡀࡄࡃࡉࡀ ࡀࡍࡀ ࡀࡕࡉࡕࡇ ࡋࡀࡁࡀࡕࡅࡓ ࡅࡔࡀࡅࡉࡕࡇ ࡃࡀࡉࡀࡍࡀ ࡖࡀࡋࡌࡀ ࡀࡍࡀ ࡀࡅࡕࡉࡁࡕࡇ ࡋࡌࡅࡆࡀࡍࡉࡀ ࡅࡔࡀࡋࡉࡈࡕࡇ ࡏࡋ ࡏࡁࡉࡃࡀࡕࡀ ࡖࡀࡋࡌࡀ ࡀࡍࡀ ࡒࡓࡀࡉࡕࡇ ࡋࡍࡀࡄࡓࡀ ࡊࡔࡀࡔࡀ ࡅࡋࡀࡁࡀࡕࡅࡓ ࡀࡅࡕࡉࡁࡕࡇ ࡏࡋࡇ ࡀࡍࡀ ࡒࡓࡀࡉࡕࡇ ࡋࡀࡃࡀࡕࡀࡍ ࡅࡉࡀࡃࡀࡕࡀࡍ ࡎࡀࡄࡃࡉࡀ ࡕࡓࡉࡍ ࡎࡀࡐࡓࡉࡀ ࡍࡑࡀࡁࡕࡉࡍࡅࡍ ࡋࡅࡀࡕ ࡀࡁࡀࡕࡅࡓ ࡀࡅࡕࡉࡁࡕࡉࡍࡅࡍ ࡀࡍࡀ ࡒࡓࡀࡉࡕࡇ ࡋࡐࡉࡓࡀ ࡄࡉࡅࡀࡓࡀ ࡖࡍࡉࡔࡌࡀࡕࡀ ࡁࡂࡀࡅࡇ ࡌࡉࡕࡊࡀࡓࡊࡀࡍ ࡌࡍ ࡃࡉࡋࡇ ࡐࡀࡓࡉࡀࡍ ࡅࡏࡋ ࡌࡅࡆࡀࡍࡉࡀ ࡉࡀࡕࡁࡀࡍ ࡀࡍࡀ ࡒࡓࡀࡉࡕࡉࡍࡅࡍ ࡋࡄࡀࡐࡉࡒࡉࡀ ࡌࡉࡀ ࡉࡀࡓࡃࡍࡀ ࡖࡍࡉࡔࡌࡀࡕࡀ ࡁࡂࡀࡅࡇ ࡌࡉࡑࡈࡉࡁࡀࡍ ࡀࡍࡀ ࡒࡓࡀࡉࡕࡇ ࡏࡋ ࡃࡉࡓࡊࡀ ࡖࡏࡋ ࡄࡀࡐࡉࡒࡉࡀ ࡌࡉࡀ ࡓࡀࡃࡉࡍ ࡊࡅࡋࡄࡅࡍ ࡍࡉࡔࡌࡀࡕࡀ ࡎࡀࡋࡒࡀ ࡀࡍࡀ ࡔࡀࡅࡉࡕ ࡎࡐࡉࡍࡕࡀ ࡋࡈࡀࡁࡉࡀ ࡌࡀࡁࡀࡓࡕࡀ ࡖࡍࡉࡔࡌࡀࡕࡀ ࡌࡀࡁࡓࡀ ࡀࡋࡁࡉࡕ ࡀࡁࡀࡕࡅࡓ ࡖࡉࡀࡄࡉࡁࡋࡅࡍ ࡄࡀࡉࡋࡀ ࡅࡔࡓࡀࡓࡀ ࡌࡍ ࡓࡉࡔ ࡁࡓࡉࡔ ࡀࡍࡀ ࡀࡉࡕࡉࡕࡇ ࡀࡋࡄࡀࡁࡔࡀࡁࡀ ࡅࡀࡅࡕࡉࡁࡕࡇ ࡏࡋ ࡊࡅࡋࡄࡅࡍ ࡌࡀࡊࡎࡉࡀ ࡅࡀࡌࡀࡓࡍࡀࡋࡇ ࡊࡅࡋࡌࡀࡍ ࡖࡀࡃࡓࡉࡀ ࡏࡍࡂࡉࡓࡕࡀ ࡍࡉࡄࡋࡉࡐ ࡅࡃࡋࡀ ࡃࡓࡉࡀ ࡏࡍࡂࡉࡓࡕࡀ ࡀࡋࡅࡀࡕࡀࡊ ࡃࡉࡋࡀࡊ ࡍࡉࡕࡉࡊࡎࡉࡀ ࡊࡅࡋࡄࡅࡍ ࡁࡉࡔࡉࡀ ࡅࡊࡀࡃࡀࡁࡉࡀ ࡋࡌࡀࡈࡀࡓࡕࡀࡊ ࡃࡉࡋࡀࡊ ࡍࡉࡔࡕࡀࡉࡋࡅࡍ ࡀࡋࡌࡀ ࡖࡏࡍࡂࡉࡓࡕࡀ ࡅࡉࡀࡃࡀࡕࡀ ࡌࡍ ࡕࡉࡁࡉࡋ ࡋࡒࡅࡃࡀࡌ ࡄࡉࡉࡀ ࡎࡀࡋࡒࡀ ࡗ ࡎࡀࡋࡒࡀ ࡏࡍࡂࡉࡓࡕࡀ ࡅࡉࡀࡃࡀࡕࡀ ࡋࡒࡅࡃࡀࡌ ࡄࡉࡉࡀ ࡏࡍࡂࡉࡓࡕࡀ ࡌࡍ ࡄࡉࡉࡀ ࡕࡉࡕࡉࡀ ࡏࡋࡀࡅࡀࡉࡄࡅࡍ ࡗ ࡀࡕࡉࡀ ࡏࡍࡂࡉࡓࡕࡀ ࡋࡁࡉࡕ ࡀࡁࡀࡕࡅࡓ ࡍࡉࡎࡒࡅࡍ ࡀࡍࡀ ࡕࡀࡒࡉࡍࡕࡉࡍࡅࡍ ࡋࡏࡁࡉࡃࡀࡕࡀ ࡅࡌࡅࡕࡀ ࡅࡄࡀࡉࡅࡕࡀ ࡔࡀࡅࡉࡕࡁࡇ ࡁࡀࡋࡌࡀ ࡂࡀࡉࡀࡓࡉࡀ ࡅࡂࡀࡍࡀࡁࡉࡀ ࡌࡉࡍࡀࡉࡄࡅࡍ ࡍࡉࡔࡌࡀࡕࡀ ࡖࡔࡉࡄࡀ ࡋࡍࡄࡅࡓࡀ ࡎࡀࡋࡒࡀ ࡅࡃࡋࡀ ࡔࡉࡄࡀ ࡋࡄࡔࡅࡊࡀ ࡔࡀࡐࡋࡀ ࡀࡌࡉࡍࡈࡅࡋ ࡖࡀࡕࡀࡕ ࡓࡅࡄࡀ ࡌࡀࡑࡈࡀࡍࡉࡕࡀ ࡖ ࡌࡀࡑࡈࡉࡀࡋࡅࡍ ࡏࡋ ࡊࡅࡋࡄࡅࡍ ࡀࡋࡌࡀ ࡗ ࡄࡆࡀࡉࡕࡇ ࡋࡆࡅࡄࡀࡓࡀ ࡃࡀࡊࡉࡀ ࡀࡍࡀ ࡆࡀࡄࡓࡉࡕ ࡏࡋࡇ ࡀࡍࡀ ࡔࡀࡅࡉࡕ ࡌࡉࡑࡓࡀ ࡅࡀࡍࡀ ࡀࡒࡌࡉࡕ ࡀࡌࡀࡓࡍࡀࡋࡅࡍ ࡏࡋ ࡍࡀࡑࡅࡓࡀࡉࡉࡀ ࡂࡅࡁࡓࡉࡀ ࡊࡔࡉࡈࡉࡀ ࡅࡌࡄࡀࡉࡌࡍࡉࡀ ࡖࡏࡋ ࡌࡉࡑࡓࡀ ࡎࡀࡌࡊࡉࡀ ࡏࡋࡇ ࡎࡀࡌࡊࡉࡀ ࡏࡋ ࡌࡉࡑࡓࡀ ࡅࡎࡀࡋࡒࡉࡀ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡖࡌࡍ ࡌࡉࡑࡓࡀ ࡑࡀࡋࡉࡀ ࡎࡀࡌࡉࡊ ࡏࡋࡇ ࡏࡋ ࡊࡅࡃࡊࡀ ࡖࡌࡍ ࡕࡀࡓࡕࡉࡍࡅࡍ ࡑࡀࡋࡉࡀ ࡍࡀࡐࡉࡋ ࡅࡌࡉࡒࡌࡀ ࡋࡉࡕࡋࡇ ࡍࡀࡐࡉࡋ ࡅࡋࡉࡕࡋࡇ ࡌࡉࡒࡌࡀ ࡅࡁࡀࡋࡀࡋࡇ ࡈࡅࡓࡀ ࡖࡈࡅࡓ ࡄࡀࡔࡊࡀ ࡔࡀࡉࡉࡋ ࡌࡅࡕࡀ ࡕࡉࡍࡉࡀࡍࡀ ࡅࡀࡉࡍࡇ ࡍࡄࡅࡓࡀ ࡋࡀࡄࡀࡆࡉࡀ ࡀࡉࡍࡇ ࡋࡀࡄࡀࡆࡉࡀ ࡍࡄࡅࡓࡀ ࡅࡋࡉࡂࡓࡇ ࡀࡔࡓࡀࡓࡀ ࡋࡀࡌࡀࡔࡊࡀ ࡆࡊࡉࡕ ࡌࡀࡍࡃࡀ ࡖࡄࡉࡉࡀ ࡅࡆࡀࡊࡉࡕ ࡊࡅࡋࡄࡅࡍ ࡓࡀࡄࡌࡉࡀ ࡔࡅࡌࡀࡊ ࡅࡄࡉࡉࡀ ࡆࡀࡊࡏࡉࡍ ࡎࡀ ࡖࡌࡉࡔࡕࡀࡋࡀࡌࡁࡇ ࡁࡓࡉࡔ ࡀࡋࡌࡉࡀ ࡖࡍࡄࡅࡓࡀ ࡄࡀࡅࡉࡀ ࡔࡊࡉࡍࡕࡇ ࡏࡅࡕࡓࡉࡀ ࡀࡋࡅࡀࡕࡇ ࡊࡀࡍࡐࡉࡀ ࡅࡊࡅࡔࡈࡀ ࡌࡉࡍࡇ ࡐࡀࡔࡈࡉࡀ ࡊࡅࡔࡈࡀ ࡐࡀࡔࡈࡉࡀ ࡌࡉࡍࡇ ࡅࡍࡀࡎࡁࡉࡀ ࡌࡉࡍࡇ ࡋࡅࡀࡕࡀࡉࡅࡍ ࡅࡁࡓࡉࡔࡀࡉࡅࡍ ࡕࡀࡓࡑࡉࡀ ࡕࡀࡂࡀ ࡓࡁࡀ ࡁࡀࡃࡌࡅ ࡖࡀࡍࡄࡀࡓ ࡀࡋࡌࡉࡀ ࡕࡓࡀࡑࡋࡉࡀ ࡊࡋࡉࡋࡀ ࡊࡋࡉࡋ ࡆࡀࡊࡀࡅࡀࡕࡀ ࡅࡌࡀࡍࡄࡀࡓ ࡔࡊࡉࡍࡀࡕࡀ ࡒࡀࡓࡉࡋࡇ ࡖࡋࡀࡄࡅࡀ ࡌࡉࡍࡇ ࡓࡁࡉࡀ ࡋࡉࡁࡇ ࡍࡐࡀࡋ ࡄࡅ ࡌࡍ ࡎࡀࡁࡓࡉࡀ ࡊࡅࡔࡈࡀ ࡖࡊࡅࡔࡈࡀ ࡋࡅࡀࡕࡇ ࡔࡊࡉࡍ ࡏࡅࡑࡓࡄ ࡌࡀࡍࡄࡀࡓ ࡅࡋࡉࡁࡇ ࡌࡀࡉࡀࡓࡋࡇ ࡖ ࡏࡅࡑࡓࡇ ࡋࡀࡌࡀࡍࡄࡀࡓ ࡅࡋࡉࡁࡇ ࡋࡀࡌࡀࡉࡀࡓࡋࡇ ࡁࡔࡊࡉࡍࡕࡇ ࡖࡓࡅࡄࡀ ࡖࡒࡅࡃࡔࡀ ࡌࡉࡔࡕࡊࡉࡍ ࡍࡀࡐࡉࡋ ࡁࡃࡅࡃࡉࡀ ࡄࡀࡔࡊࡉࡀ ࡅࡃࡌࡅࡕࡇ ࡋࡀࡍࡀࡄࡓࡀ ࡅࡃࡋࡉࡁࡇ ࡌࡀࡉࡀࡓࡋࡇ ࡅࡏࡅࡑࡓࡇ ࡌࡀࡍࡄࡀࡓ ࡌࡍ ࡔࡀࡌࡉࡔ ࡅࡎࡉࡓࡀ ࡍࡄࡀࡓ ࡀࡍࡄࡀࡓ ࡌࡍ ࡔࡀࡌࡉࡔ ࡅࡎࡉࡓࡀ ࡅࡔࡅࡌࡀ ࡅࡓࡉࡄࡀ ࡁࡕࡉࡁࡉࡋ ࡓࡀࡌࡉࡀ ࡊࡅࡋ ࡉࡅࡌ ࡊࡅࡋ ࡉࡅࡌࡀ ࡕࡀࡓࡌࡉࡃࡉࡀ ࡋࡅࡀࡕࡇ ࡊࡀࡍࡐࡉࡀ ࡅࡌࡉࡍࡇ ࡍࡀࡎࡁࡉࡀ ࡓࡅࡔࡅࡌࡀ ࡅࡁࡄࡀࡉࡋࡇ ࡃࡉࡋࡇ ࡎࡀࡋࡒࡉࡀ ࡀࡌࡉࡍࡈࡅࡋ ࡖࡄࡀࡉࡋࡀ ࡖࡀࡁࡀࡄࡀࡕࡇ ࡏࡋࡇ ࡏࡍࡈࡉࡓ ࡅࡌࡉࡌࡓࡀ ࡖࡀࡁࡀࡄࡀࡕࡇ ࡀࡋࡅࡀࡕࡇ ࡔࡊࡉࡍ ࡗ ࡎࡀࡋࡒࡀ ࡁࡌࡀࡈࡀࡓࡀࡕࡀ ࡋࡀࡌࡉࡔࡕࡀࡉࡀࡋ ࡅࡔࡉࡁࡉࡀࡄࡉࡀ ࡃࡉࡍࡀ ࡌࡉࡍࡇ ࡋࡀࡌࡓࡉࡀ ࡋࡀࡆࡉࡋ ࡁࡏࡅࡄࡓࡀ ࡌࡒࡀࡃࡀࡔࡕࡀ ࡅࡀࡉࡍࡇ ࡋࡀ ࡄࡀࡆࡉࡀ ࡄࡔࡅࡊࡀ ࡄࡀࡋࡉࡐ ࡁࡏࡅࡄࡓࡀ ࡖࡁࡄࡉࡓࡉࡀ ࡆࡉࡃࡒࡀ ࡖࡄࡀࡁࡔࡀࡁࡀ ࡌࡀࡓࡃࡉࡕࡀ ࡁࡂࡀࡅࡇ ࡓࡀࡃࡉࡀ ࡎࡋࡀࡒࡅࡁࡅࡍ ࡌࡉࡌࡓࡉࡀ ࡊࡀࡎࡉࡉࡀ ࡖࡄࡔࡅࡊࡀ ࡊࡀࡎࡉࡍࡅࡍ ࡌࡍ ࡀࡅࡃࡉࡀ ࡎࡀࡋࡒࡉࡁࡅࡍ ࡁࡓࡀࡆࡉࡀ ࡊࡀࡎࡉࡉࡀ ࡖࡊࡎࡉࡀ ࡅࡍࡈࡉࡓࡀ ࡃࡌࡅࡕࡅࡍ ࡌࡍ ࡀࡋࡌࡉࡀ ࡈࡅࡁࡇ ࡅࡕࡅࡌ ࡈࡅࡁࡇ ࡖࡍࡉࡕࡀࡐࡓࡀࡔ ࡌࡉࡍࡇ ࡌࡍ ࡀࡋࡌࡀ ࡎࡀࡋࡉࡒ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡖࡋࡀ ࡏࡕࡀࡐࡓࡀࡔ ࡅࡏࡕࡊࡀࡋࡀࡋ ࡅࡔࡊࡉࡁ ࡁࡂࡉࡅࡕࡇ ࡖࡋࡉࡅࡉࡀࡕࡉࡍ ࡕࡀࡍࡉࡍࡀ ࡍࡉࡔࡕࡊࡉࡍ ࡌࡉࡔࡕࡀࡉࡉࡍ ࡄࡉࡉࡀ ࡅࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡎࡉࡌࡀࡕ ࡀࡍࡀ ࡎࡉࡌࡀࡕ ࡄࡉࡉࡀ ࡎࡉࡌࡀࡕ ࡀࡍࡀ ࡎࡉࡌࡀࡕ ࡓࡅࡓࡁࡉࡀ ࡎࡉࡌࡀࡕ ࡀࡍࡀ ࡎࡉࡌࡀࡕ ࡄࡉࡉࡀ ࡕࡀࡂࡀ ࡋࡒࡅࡃࡀࡌ ࡋࡓࡅࡓࡁࡉࡀ ࡄࡅࡉࡕ ࡎࡉࡌࡀࡕ ࡀࡍࡀ ࡎࡉࡌࡀࡕ ࡄࡉࡉࡀ ࡒࡅࡃࡀࡌ ࡀࡍࡄࡉࡓࡉࡕ ࡏࡅࡕࡓࡉࡀ ࡅࡏࡔࡊࡉࡍࡀࡕࡀ ࡅࡋࡉࡀࡓࡃࡍࡀ ࡄࡅࡉࡕࡉࡋࡇ ࡑࡀࡅࡕࡀ ࡑࡀࡅࡕࡀ ࡋࡉࡀࡓࡃࡍࡀ ࡄࡅࡉࡕࡋࡇ ࡖࡌࡍ ࡋࡀࡒࡀࡃࡌࡉࡀ ࡄࡅࡀ ࡖࡏࡅࡕࡓࡉࡀ ࡁࡂࡀࡅࡇ ࡍࡀࡄࡓࡉࡀ ࡁࡀࡍࡅࡍ ࡅࡀࡐࡓࡉࡔࡅࡍ ࡓࡁࡉࡀ ࡅࡋࡁࡅࡔࡀ ࡔࡀࡅࡉࡅࡍ ࡔࡀࡅࡉࡍ ࡀࡋࡁࡅࡔࡀࡉࡄࡅࡍ ࡊࡅࡋ ࡉࡅࡌ ࡊࡅࡋ ࡉࡅࡌࡀ ࡋࡀࡉࡀࡓ ࡌࡔࡀࡁࡉࡋࡇ ࡌࡍ ࡓࡉࡔ ࡁࡓࡉࡔ ࡎࡉࡌࡀࡕ ࡀࡍࡀ ࡎࡉࡌࡀࡕ ࡄࡉࡉࡀ ࡕࡀࡂࡀ ࡋࡌࡀࡋࡊࡀ ࡖ ࡏࡒࡀࡓࡀ ࡄࡅࡉࡕ ࡖࡏࡅࡕࡓࡉࡀ ࡁࡆࡉࡅࡀࡉ ࡍࡀࡄࡓࡉࡀ ࡅࡋࡃࡌࡅࡕࡀࡉ ࡌࡔࡀࡁࡉࡋࡇ ࡌࡍ ࡓࡉࡔ ࡁࡓࡉࡔ ࡎࡉࡌࡀࡕ ࡀࡍࡀ ࡎࡉࡌࡀࡕ ࡄࡉࡉࡀ ࡖࡏࡋ ࡌࡀࡋࡊࡀ ࡖࡏࡒࡀࡓࡀ ࡔࡓࡉࡕ ࡏࡋࡇ ࡑࡀࡅࡕࡀ ࡖࡏࡍࡄࡀࡓࡁࡇ ࡁࡏࡅࡑࡓࡉࡀ ࡖࡁࡀࡉࡉࡍ ࡅࡌࡉࡕࡁࡀࡍࡀࡍ ࡅࡍࡀࡄࡓࡀ ࡃࡌࡅࡕࡇ ࡌࡍ ࡀࡋࡌࡉࡀ ࡗ ࡍࡀࡄࡀࡓ ࡅࡌࡀࡍࡄࡀࡓ ࡏࡅࡕࡓࡉࡀ ࡅࡔࡊࡉࡍࡀࡕࡀ ࡖࡁࡀࡉࡀࡓ ࡌࡀࡋࡊࡀ ࡋࡍࡑࡀࡁ ࡆࡉࡅࡀ ࡀࡋࡁࡔࡀࡍ ࡍࡉࡎࡁࡀࡍ ࡍࡑࡀࡁ ࡆࡉࡅࡀ ࡅࡀࡕࡉࡀࡍ ࡋࡁࡅࡔࡀ ࡋࡉࡀࡓࡃࡍࡀ ࡔࡀࡅࡉࡀࡍ ࡔࡀࡅࡉࡀࡍ ࡋࡁࡅࡔࡀ ࡋࡉࡀࡓࡃࡍࡀ ࡖࡍࡀࡄࡓࡉࡁࡇ ࡏࡅࡕࡓࡉࡀ ࡌࡍ ࡓࡉࡔ ࡁࡓࡉࡔ ࡎࡉࡌࡀࡕ ࡀࡍࡀ ࡎࡉࡌࡀࡕ ࡄࡉࡉࡀ ࡎࡀࡉࡌࡉࡀ ࡁࡉࡔࡉࡀ ࡅࡋࡀࡄࡀࡆࡉࡍ ࡀࡍࡀ ࡋࡍࡄࡅࡓࡀ ࡌࡒࡀࡓࡉࡍࡀࡋࡅࡍ ࡄࡉࡍࡅࡍ ࡁࡄࡔࡅࡊࡀ ࡌࡉࡕࡒࡀࡁࡓࡉࡀ ࡀࡌࡀࡓࡍࡀࡋࡅࡍ ࡉࡀ ࡁࡉࡔࡉࡀ ࡖ ࡔࡀࡐࡋࡉࡀ ࡋࡄࡔࡅࡊࡀ ࡌࡉࡆࡒࡀࡐ ࡆࡒࡅࡐࡉࡅࡍ ࡅࡋࡀࡕࡉࡔࡉࡐࡋࡅࡍ ࡒࡀࡓࡉࡋࡅࡍ ࡅࡋࡀࡔࡀࡌࡉࡍ ࡁࡉࡔࡉࡀ ࡅࡍࡀࡐࡋࡉࡁࡇ ࡁࡉࡀࡌࡀ ࡓࡁࡀ ࡖࡎࡅࡐ ࡄࡀࡉࡆࡀࡊ ࡉࡀࡓࡃࡍࡀ ࡌࡉࡑࡓࡀ ࡋࡏࡅࡕࡓࡉࡀ ࡄࡅࡀ ࡌࡉࡑࡓࡀ ࡄࡅࡀࡋࡅࡍ ࡋࡏࡅࡕࡓࡉࡀ ࡅࡐࡎࡀࡒࡉࡍࡅࡍ ࡅࡓࡌࡉࡍࡅࡍ ࡋࡁࡉࡔࡉࡀ ࡁࡉࡀࡌࡀ ࡓࡁࡀ ࡖࡎࡅࡐ ࡎࡉࡌࡀࡕ ࡀࡍࡀ ࡎࡉࡌࡀࡕࡄࡉࡉࡀ ࡕࡀࡂࡀ ࡋࡌࡀࡍࡃࡀ ࡖࡄࡉࡉࡀ ࡄࡅࡉࡕ ࡔࡀࡋࡈࡀࡍ ࡋࡏࡅࡕࡓࡉࡀ ࡅࡔࡊࡉࡍࡀࡕࡀ ࡖࡄࡀࡕࡀࡌ ࡎࡉࡌࡀࡕ ࡀࡍࡀ ࡎࡉࡌࡀࡕ ࡄࡉࡉࡀ ࡌࡀࡍࡄࡉࡓࡀࡍࡅࡍ ࡖࡀࡋࡌࡉࡀ ࡖࡍࡄࡅࡓࡀ ࡄࡅࡉࡕ ࡊࡅࡋ ࡉࡅࡌ ࡊࡅࡋ ࡉࡅࡌࡀ ࡋࡓࡁࡉࡀ ࡌࡔࡀࡁࡉࡋࡅࡍ ࡅࡁࡂࡀࡅࡀࡉ ࡎࡀࡋࡒࡉࡀ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡎࡉࡌࡀࡕ ࡀࡍࡀ ࡎࡉࡌࡀࡕ ࡄࡉࡉࡀ ࡀࡋࡁࡅࡔࡀ ࡋࡀࡋࡌࡉࡀ ࡖࡍࡄࡅࡓࡀ ࡄࡅࡉࡕ ࡀࡍࡀ ࡎࡉࡌࡀࡕ ࡄࡉࡉࡀ ࡌࡀࡋࡊࡀ ࡋࡍࡀࡑࡅࡓࡀࡉࡉࡀ ࡄࡅࡉࡕ ࡌࡀࡋࡊࡀ ࡄࡅࡉࡕ ࡋࡍࡀࡑࡅࡓࡀࡉࡉࡀ ࡖࡁࡔࡅࡌࡀࡉ ࡌࡔࡀࡁࡉࡀ ࡅࡌࡒࡀࡉࡌࡉࡀ ࡌࡔࡀࡁࡉࡀ ࡅࡌࡒࡀࡉࡌࡉࡀ ࡁࡔࡅࡌࡀࡉ ࡅࡏࡋ ࡔࡅࡌࡀࡉ ࡃࡉࡋࡉࡀ ࡎࡀࡋࡒࡉࡀ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡁࡄࡉࡓࡉࡀ ࡆࡉࡃࡒࡀ ࡖࡋࡉࡁࡔࡅࡍ ࡀࡉࡍࡀࡉࡄࡅࡍ ࡁࡍࡄࡅࡓࡀ ࡏࡕࡉࡌࡋࡉࡀ ࡀࡉࡍࡀࡉࡄࡅࡍ ࡏࡕࡉࡌࡋࡉࡀ ࡁࡍࡄࡅࡓࡀ ࡅࡁࡋࡉࡁࡀࡉࡄࡅࡍ ࡔࡓࡀࡋࡅࡍ ࡌࡀࡍࡃࡀ ࡖࡄࡉࡉࡀ ࡖࡋࡀࡁࡉࡔࡋࡉࡀ ࡋࡃࡉࡋࡉࡀ ࡎࡉࡌࡀࡕ ࡄࡉࡉࡀ ࡆࡀࡅࡀ ࡅࡁࡍࡉࡀ ࡋࡀࡓࡀࡄࡉࡌ ࡆࡀࡄࡁࡀ ࡅࡊࡀࡎࡐࡀ ࡋࡀࡓࡀࡄࡉࡌ ࡅࡀࡓࡂࡁࡀ ࡅࡌࡀࡍࡅࡍࡀ ࡋࡀࡓࡀࡄࡉࡌ ࡏࡊࡉࡋࡕࡀ ࡖ ࡐࡀࡂࡓࡉࡀ ࡅࡀࡒࡅࡌ ࡀࡉࡍࡉࡀ ࡋࡀࡔࡓࡀࡕ ࡏࡋࡇ ࡋࡀࡔࡓࡀࡕ ࡏࡋࡇ ࡀࡒࡅࡕ ࡀࡉࡍࡉࡀ ࡅࡋࡀࡏࡍࡉࡔࡉࡀ ࡓࡀࡄࡌࡉࡀ ࡖࡋࡉࡋࡉࡀ ࡋࡀࡏࡍࡉࡔࡉࡀ ࡃࡓࡀࡁࡔࡉࡀ ࡅࡎࡉࡃࡓࡉࡀ ࡅࡌࡍ ࡌࡉࡍࡉࡋࡀࡕ ࡌࡀࡓࡇ ࡋࡀࡑࡋࡀ ࡋࡀࡑࡋࡀ ࡌࡍ ࡓࡀࡄࡌࡄ ࡖࡀࡁࡅࡉࡀ ࡌࡀࡍࡃࡀ ࡖࡄࡉࡉࡀ ࡅࡋࡀࡍࡀࡐࡉࡋ ࡁࡉࡀࡌࡀ ࡓࡁࡀ ࡖࡎࡅࡐ ࡅࡋࡀࡏࡍࡉࡔࡉࡇ ࡋࡄࡀࡁࡔࡀࡁࡀ ࡅࡀࡍࡐࡉࡀ ࡉࡅࡌࡀ ࡋࡀࡈࡀࡓ ࡋࡀࡏࡍࡉࡔࡉࡀ ࡏࡅࡄࡓࡀ ࡖࡓࡁࡉࡀ ࡖࡀࡂࡓࡀ ࡅࡆࡉࡃࡒࡀ ࡌࡉࡕࡉࡍࡎࡉࡁ ࡁࡓࡅࡄࡌࡉࡀ ࡖࡋࡉࡋࡉࡀ ࡌࡉࡕࡉࡍࡎࡉࡁ ࡁࡀࡋࡁࡅࡔࡉࡀ ࡕࡀࡒࡍࡉࡀ ࡖࡌࡍ ࡓࡁࡉࡀ ࡀࡎࡂࡅࡍ ࡏࡅࡕࡓࡉࡀ ࡖࡄࡀࡎࡀࡓ ࡌࡀࡋࡉࡋࡇ ࡅࡁࡉࡎࡓࡀࡒ ࡈࡀࡉࡍࡉࡋࡇ ࡗ ࡈࡀࡉࡉࡍ ࡈࡅࡍࡀ ࡃࡀࡊࡉࡀ ࡌࡍ ࡁࡄࡉࡓࡉࡀ ࡆࡉࡃࡒࡀ ࡌࡉࡄࡔࡉࡁ ࡌࡍ ࡁࡄࡉࡓࡉࡀ ࡆࡉࡃࡒࡀ ࡖࡏࡋ ࡔࡅࡌࡇ ࡖࡉࡀࡅࡀࡓ ࡌࡉࡕࡀࡐࡓࡉࡔࡉࡍ ࡎࡉࡌࡀࡕ ࡄࡉࡉࡀ ࡏࡋࡀࡅࡀࡉࡄࡅࡍ ࡀࡍࡄࡀࡓࡕࡀ ࡔࡓࡀࡕ ࡋࡃࡌࡅࡕࡀࡉࡄࡅࡍ ࡏࡕࡓࡉࡑࡋࡅࡍ ࡃࡉࡓࡊࡀ ࡋࡁࡉࡕ ࡓࡅࡓࡁࡉࡀ ࡒࡓࡉࡁࡇ ࡁࡊࡀࡋࡅࡆࡀ ࡅࡀࡐࡓࡉࡔࡉࡕ ࡕࡀࡓࡌࡉࡃࡉࡀ ࡋࡊࡀ ࡀࡌࡀࡓࡍࡀࡋࡅࡍ ࡂࡅࡐࡍࡀ ࡖ ࡈࡀࡉࡉࡍ ࡎࡀࡋࡉࡒ ࡅࡃࡋࡀࡈࡀࡉࡉࡍ ࡄࡀࡊࡀ ࡌࡉࡕࡀࡂࡆࡀࡓ ࡖࡁࡀࡉࡉࡍࡁࡉࡀ ࡅࡌࡉࡕࡀࡐࡓࡀࡔࡁࡉࡀ ࡎࡀࡋࡉࡒ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡖࡋࡀࡁࡀࡉࡉࡍࡁࡉࡀ ࡅࡋࡀࡌࡉࡕࡀࡐࡓࡀࡔࡁࡉࡀ ࡌࡉࡐࡎࡉࡒ ࡅࡍࡀࡐࡉࡋ ࡁࡉࡀࡌࡀ ࡓࡁࡀ ࡖࡎࡅࡐ ࡌࡉࡔࡕࡀࡉࡉࡍ ࡄࡉࡉࡀ ࡅࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡎࡉࡌࡀࡕ ࡀࡍࡀ ࡎࡉࡌࡀࡕ ࡄࡉࡉࡀ ࡉࡀࡓࡃࡍࡀ ࡊࡅࡓࡎࡉࡀ ࡕࡓࡉࡑࡋࡉࡀ ࡉࡀࡓࡃࡍࡉࡀ ࡁࡓࡉࡄࡀࡉ ࡓࡀࡃࡉࡍ ࡅࡌࡉࡀ ࡁࡆࡉࡅࡀࡉ ࡓࡀࡅࡆࡉࡀ ࡌࡉࡀ ࡅࡁࡀࡍࡐࡉࡀ ࡆࡉࡅࡀࡉ ࡎࡀࡄࡒࡉࡀ ࡆࡉࡅࡀࡉ ࡅࡆࡉࡅࡀ ࡖࡉࡀࡓࡃࡍࡀ ࡁࡂࡀࡅࡀࡉࡅࡍ ࡌࡉࡕࡓࡀࡅࡓࡁࡉࡀ ࡌࡉࡕࡓࡀࡅࡓࡁࡉࡀ ࡁࡂࡀࡅࡀࡉࡄࡅࡍ ࡅࡍࡀࡄࡓࡀ ࡃࡌࡅࡕࡅࡍ ࡌࡍ ࡓࡉࡔ ࡁࡓࡉࡔ ࡋࡁࡉࡔࡀ ࡀࡍࡀ ࡖ ࡓࡅࡓࡁࡉࡀ ࡖࡊࡅࡋ ࡌࡀࡍ ࡖࡋࡉࡁࡔࡀࡍ ࡄࡃࡀ ࡅࡕࡁࡀࡎࡀࡌ ࡖ ࡋࡉࡁࡔࡀࡍ ࡁࡎࡅࡌ ࡓࡉࡄࡇ ࡅࡕࡓࡀࡅࡓࡀࡁ ࡌࡉࡍࡇ ࡌࡍ ࡀࡋࡌࡀ ࡋࡁࡅࡔࡀ ࡀࡍࡀ ࡄࡅࡉࡕ ࡖࡌࡀࡋࡊࡀ ࡅࡋࡌࡀࡋࡊࡀ ࡓࡀࡅࡓࡉࡁࡕࡇ ࡅࡊࡎࡀࡉࡕࡇ ࡌࡍ ࡏࡅࡕࡓࡉࡀ ࡅࡁࡑࡀࡅࡕࡀࡉ ࡃࡉࡋࡉࡀ ࡍࡀࡈࡀࡓ ࡅࡁࡂࡀࡅࡀࡉ ࡄࡀࡃࡉࡀ ࡅࡍࡀࡄࡀࡓ ࡌࡍ ࡓࡉࡔ ࡁࡓࡉࡔ ࡍࡀࡄࡓࡉࡁࡉࡀ ࡅࡌࡉࡕࡀࡐࡓࡉࡔࡉࡁࡉࡀ ࡀࡌࡀࡓ ࡖࡊࡅࡋ ࡌࡀࡍ ࡖࡄࡀࡆࡉࡍ ࡋࡁࡅࡔࡀ ࡍࡉࡋࡁࡀࡔ ࡍࡉࡁࡀࡓ ࡅࡍࡉࡕࡓࡀࡅࡓࡀࡁ ࡃࡌࡅࡕࡇ ࡀࡊࡅࡀࡕ ࡃࡉࡋࡉࡀ ࡕࡀࡂࡀ ࡀࡍࡀ ࡀࡄࡅࡉࡋࡇ ࡋࡌࡀࡋࡊࡀ ࡅࡁࡓࡉࡔ ࡔࡊࡉࡍࡕࡇ ࡊࡅࡓࡎࡉࡀ ࡀࡕࡓࡉࡑࡋࡉࡀ ࡌࡍ ࡓࡉࡔ ࡁࡓࡉࡔ ࡗ ࡊࡅࡓࡎࡉࡀ ࡀࡕࡓࡉࡑࡋࡉࡀ ࡊࡅࡋࡄࡅࡍ ࡃࡍࡅࡕࡀ ࡋࡃࡉࡋࡉࡀ ࡉࡀࡄࡁࡉࡀ ࡊࡅࡋࡄࡅࡍ ࡉࡀࡄࡁࡉࡀ ࡃࡍࡅࡕࡀ ࡋࡃࡉࡋࡉࡀ ࡋࡀࡃࡌࡅࡕࡀࡉ ࡌࡔࡀࡁࡉࡋࡇ ࡌࡍ ࡓࡉࡔ ࡁࡓࡉࡔ ࡄࡀࡉࡆࡀࡊ ࡀࡌࡀࡓࡋࡇ ࡋࡍࡑࡀࡁ ࡓࡁࡀ ࡅࡊࡅࡔࡈࡀ ࡌࡉࡍࡇ ࡍࡎࡉࡁ ࡌࡍ ࡀࡋࡁࡅࡔࡉࡇ ࡀࡋࡁࡅࡔࡉࡇ ࡅࡋࡃࡉࡋࡉࡀ ࡎࡉࡌࡀࡕࡄࡉࡉࡀ ࡊࡀࡎࡉࡀࡍ ࡏࡋࡇ ࡏࡋࡇ ࡊࡀࡎࡉࡀࡍ ࡖࡀࡍࡀ ࡊࡎࡀࡉࡕࡇ ࡋࡃࡌࡅࡕࡇ ࡅࡀࡌࡀࡓࡍࡀࡋࡇ ࡏࡆࡉࡋ ࡁࡄࡀࡉࡋࡇ ࡖࡎࡉࡌࡀࡕ ࡄࡉࡉࡀ ࡊࡅࡋࡄࡅࡍ ࡏࡁࡉࡃࡀࡕࡀࡊ ࡍࡉࡕࡀࡒࡍࡀࡍ ࡍࡉࡕࡀࡒࡍࡀࡍ ࡊࡅࡋࡄࡅࡍ ࡏࡁࡉࡃࡀࡕࡀࡊ ࡅࡁࡄࡀࡓࡕ ࡖࡀࡊࡅࡀࡕࡀࡊ ࡅࡍࡈࡉࡓ ࡏࡋࡀࡊ ࡀࡌࡉࡍࡈࡅࡋ ࡖࡏࡕࡉࡕࡋࡇ ࡋࡁࡅࡔࡀ ࡖࡏࡕࡉࡕࡋࡇ ࡎࡉࡈࡀࡓ ࡍࡉࡒࡅࡌ ࡌࡉࡍࡀࡊ ࡅࡃࡍࡅࡕࡀ ࡋࡃࡉࡋࡀࡊ ࡍࡉࡃࡍࡀࡋࡀࡊ ࡎࡉࡌࡀࡕ ࡀࡍࡀ ࡎࡉࡌࡀࡕ ࡄࡉࡉࡀ ࡎࡀࡌ ࡄࡉࡉࡀ ࡁࡈࡀࡓࡈࡀࡁࡅࡍࡅࡍ ࡖ ࡆࡉࡅࡀ ࡋࡀࡋࡌࡉࡀ ࡖࡃࡌࡀࡎࡀ ࡔࡀࡃࡓࡀࡍ ࡋࡀࡋࡌࡉࡀ ࡔࡀࡃࡓࡀࡍ ࡖ ࡃࡌࡀࡎࡀ ࡌࡉࡄࡅࡉࡋࡅࡍ ࡏࡒࡀࡓࡀ ࡓࡁࡀ ࡖࡏࡅࡕࡓࡉࡀ ࡁࡃࡌࡅࡕࡇ ࡍࡀࡄࡓࡉࡀ ࡓࡀࡃࡉࡍࡉࡍ ࡅࡌࡀࡎࡂࡉࡍࡉࡍ ࡁࡎࡐࡉࡍࡀࡕࡀ ࡖࡆࡉࡅࡀ ࡀࡃࡍࡉࡍ ࡀࡃࡍࡉࡍ ࡁࡎࡐࡉࡍࡀࡕࡀ ࡖࡆࡉࡅࡀ ࡀࡋࡌࡀ ࡋࡁࡉࡕ ࡌࡉࡑࡓࡉࡀ ࡌࡈࡉࡍ ࡆࡉࡅࡀࡍ ࡃࡍࡀ ࡏࡋ ࡀࡋࡌࡉࡀ ࡖࡃࡌࡀࡎࡀ ࡁࡄࡀࡉࡋࡇ ࡖࡎࡉࡌࡀࡕ ࡄࡉࡉࡀ ࡀࡍࡄࡀࡓ ࡀࡍࡄࡀࡓ ࡁࡄࡀࡉࡋࡇ ࡖࡎࡉࡌࡀࡕࡄࡉࡉࡀ ࡄࡉࡍࡅࡍ ࡀࡋࡀࡍࡐࡇ ࡖࡎࡉࡌࡀࡕࡄࡉࡉࡀ ࡍࡀࡐࡒࡉࡀ ࡅࡀࡌࡓࡉࡋࡇ ࡀࡁࡓࡉࡊ ࡌࡉࡕࡉࡀࡍࡉࡊ ࡎࡉࡌࡀࡕࡄࡉࡉࡀ ࡖࡏࡅࡕࡓࡉࡀ ࡁࡓࡉࡄࡉࡊ ࡁࡀࡎࡌࡉࡀ ࡅࡔࡊࡉࡍࡀࡕࡀ ࡀࡁࡂࡀࡅࡉࡊ ࡌࡉࡍࡉࡄࡓࡀࡍ ࡄࡀࡉࡆࡀࡊ ࡍࡑࡀࡁ ࡓࡁࡀ ࡎࡀࡌࡋࡇ ࡖࡓࡁࡉࡀ ࡊࡅࡔࡈࡀ ࡋࡌࡀࡋࡋࡊࡀ ࡅࡔࡅࡌࡇ ࡊࡀࡎࡉࡀ ࡍࡈࡉࡓ ࡏࡋ ࡉࡅࡊࡀࡁࡀࡓ ࡎࡀ ࡎࡉࡌࡀࡕ ࡀࡍࡀ ࡎࡉࡌࡀࡕ ࡄࡉࡉࡀ ࡎࡀࡌ ࡄࡉࡉࡀ ࡏࡄࡀࡁࡋࡉࡀ ࡋࡁࡅࡔࡀ ࡃࡀࡊࡉࡀ ࡖࡁࡂࡀࡅࡇ ࡍࡀࡄࡓࡉࡀ ࡀࡋࡌࡉࡀ ࡏࡄࡀࡁࡉࡋࡀ ࡄࡉࡌࡉࡀࡍࡀ ࡄࡉࡌࡉࡀࡍ ࡌࡉࡀ ࡖࡊࡉࡁࡉࡀ ࡅࡍࡈࡉࡈࡉࡀ ࡋࡉࡕࡁࡇ ࡏࡄࡀࡁࡋࡉࡀ ࡕࡀࡂࡀ ࡓࡁࡀ ࡖࡁࡆࡉࡅࡇ ࡍࡀࡄࡓࡉࡀ ࡀࡋࡌࡉࡀ ࡏࡄࡀࡁࡋࡉࡀ ࡓࡉࡄࡀ ࡁࡀࡎࡉࡌࡀ ࡖࡌࡉࡀ ࡁࡓࡉࡄࡀࡉ ࡁࡀࡎࡉࡌࡉࡀ ࡏࡄࡀࡁࡋࡉࡀ ࡄࡀࡉࡋࡀ ࡓࡁࡀ ࡖࡁࡀࡉࡀࡓ ࡅࡌࡀࡍࡄࡀࡓ ࡌࡍ ࡓࡉࡔ ࡁࡓࡉࡔ ࡏࡄࡀࡁࡋࡉࡀ ࡀࡃࡉࡀࡅࡓࡉࡀ ࡊࡀࡎࡉࡉࡀ ࡅࡍࡈࡉࡓࡉࡀ ࡔࡀࡋࡉࡈ ࡏࡋࡀࡉ ࡏࡄࡀࡁࡋࡉࡀ ࡆࡀࡊࡅࡕࡀ ࡓࡀࡁࡕࡉࡀ ࡖࡁࡂࡀࡅࡀࡉ ࡉࡀࡓࡃࡍࡉࡀ ࡌࡉࡆࡃࡀࡊࡉࡀ ࡗ ࡔࡅࡌࡀࡉ ࡏࡋ ࡉࡀࡓࡃࡍࡀ ࡌࡀࡃࡊࡉࡓࡉࡋࡇ ࡄࡀࡉࡋࡀࡉ ࡏࡋࡇ ࡔࡀࡓࡉࡀ ࡅࡁࡂࡀࡅࡀࡉ ࡎࡀࡋࡉࡒ ࡉࡀࡓࡃࡍࡀ ࡅࡄࡀࡅࡉࡋࡅࡍ ࡔࡓࡀࡓࡀ ࡋࡏࡅࡕࡓࡉࡀ ࡉࡀࡄࡉࡁࡋࡅࡍ ࡏࡌࡓࡀ ࡅࡔࡉࡌࡀ ࡅࡌࡆࡀࡊࡉࡋࡅࡍ ࡌࡍ ࡀࡅࡃࡉࡀ ࡉࡀࡄࡉࡁࡋࡅࡍ ࡃࡌࡅࡕࡀ ࡍࡀࡄࡉࡓࡕࡀ ࡅࡄࡀࡉࡋࡀࡉ ࡅࡂࡀࡁࡀࡓࡅࡀࡕࡀࡉ ࡏࡋ ࡉࡀࡓࡃࡍࡀ ࡔࡓࡉࡀ ࡏࡕࡉࡍࡑࡉࡁࡋࡇ ࡋࡍࡑࡀࡁ ࡓࡁࡀ ࡖࡁࡂࡀࡅࡀࡉ ࡌࡉࡕࡀࡒࡀࡍ ࡏࡋ ࡀࡋࡌࡉࡀ ࡄࡀࡉࡋࡀࡉ ࡃࡉࡋࡉࡀ ࡌࡀࡍࡄࡀࡓ ࡅࡌࡀࡓࡃࡉࡕࡀ ࡖࡌࡉࡀ ࡌࡀࡓࡃࡉࡀ ࡏࡑࡈࡅࡍࡉࡀ ࡖࡌࡉࡀ ࡄࡉࡉࡀ ࡁࡄࡀࡉࡋࡀࡉ ࡅࡁࡄࡀࡉࡋࡀࡉࡄࡅࡍ ࡖࡌࡉࡀ ࡅࡀࡉࡀࡓ ࡀࡓࡒࡀࡄࡀࡕࡀ ࡖࡆࡉࡅࡀ ࡌࡉࡕࡌࡉࡎࡉࡀ ࡁࡄࡀࡉࡋࡀࡉ ࡅࡁࡄࡀࡉࡋࡀࡉࡄࡅࡍ ࡖࡌࡉࡀ ࡅࡀࡉࡀࡓ ࡔࡊࡉࡍࡀࡕࡀ ࡖࡆࡉࡅࡀ ࡌࡉࡔࡕࡉࡊࡍࡀࡍ ࡅࡁࡄࡀࡉࡋࡀࡉ ࡅࡁࡄࡀࡉࡋࡀࡉࡄࡅࡍ ࡖࡌࡉࡀ ࡅࡀࡉࡀࡓ ࡐࡉࡓࡉࡀ ࡅࡏࡌࡁࡉࡀ ࡅࡏࡋࡀࡍࡉࡀ ࡋࡏࡅࡕࡓࡉࡀ ࡀࡍࡑࡀࡁࡋࡅࡍ ࡀࡍࡀࡍࡉࡀ ࡖࡆࡉࡅࡀ ࡖࡏࡌࡓࡀ ࡅࡔࡉࡌࡀ ࡓࡀࡃࡉࡍ ࡏࡄࡀࡁࡋࡅࡍ ࡓࡅࡔࡅࡌࡀ ࡃࡀࡊࡉࡀ ࡖࡁࡄࡀࡉࡋࡀࡉࡄࡅࡍ ࡃࡉࡋࡅࡍ ࡌࡉࡕࡄࡉࡕࡌࡉࡀ ࡌࡉࡕࡄࡉࡕࡌࡉࡀ ࡁࡄࡀࡉࡋࡀࡉࡄࡅࡍ ࡅࡏࡋ ࡌࡉࡑࡓࡉࡀ ࡃࡀࡊࡉࡀ ࡌࡉࡕࡉࡓࡑࡉࡀ ࡌࡉࡕࡉࡓࡑࡉࡀ ࡏࡋ ࡊࡀࡓࡎࡀࡅࡀࡕࡀ ࡖࡆࡉࡅࡀ ࡅࡓࡉࡔ ࡀࡋࡌࡉࡀ ࡌࡉࡕࡒࡉࡓࡉࡀ ࡌࡉࡕࡓࡀࡅࡓࡁࡉࡀ ࡄࡀࡃ ࡌࡍ ࡄࡃࡀࡃࡉࡀ ࡌࡀࡍ ࡖࡓࡀࡆࡀ ࡖࡀࡁࡀࡄࡀࡕࡇ ࡅࡌࡉࡌࡓࡀ ࡖࡀࡁࡀࡄࡀࡕࡇ ࡋࡅࡀࡕࡇ ࡌࡉࡔࡕࡊࡉࡍ ࡌࡉࡕࡓࡀࡅࡓࡀࡁ ࡌࡍ ࡏࡅࡕࡓࡉࡀ ࡊࡅࡋࡄࡅࡍ ࡌࡉࡕࡓࡀࡅࡓࡉࡁࡀ ࡃࡌࡅࡕࡇ ࡅࡁࡀࡉࡀࡓ ࡅࡌࡀࡍࡄࡀࡓ ࡀࡊࡅࡀࡕ ࡔࡀࡌࡁࡉࡁࡉࡀ ࡖࡆࡉࡅࡀ ࡁࡀࡕࡀࡓ ࡍࡄࡅࡓ ࡁࡄࡀࡉࡋࡀࡉ ࡅࡁࡄࡀࡉࡋࡀࡉࡄࡅࡍ ࡖࡌࡉࡀ ࡅࡀࡉࡀࡓ ࡕࡀࡒࡀࡍࡕࡀ ࡋࡀࡋࡌࡉࡀ ࡖ ࡍࡄࡅࡓࡀ ࡊࡅࡋࡄࡅࡍ ࡏࡕࡉࡀࡄࡁࡀࡕ ࡏࡕࡉࡀࡄࡁࡀࡕ ࡕࡀࡒࡀࡍࡕࡀ ࡋࡀࡋࡌࡉࡀ ࡖࡍࡄࡅࡓࡀ ࡊࡅࡋࡄࡅࡍ ࡅࡀࡍࡉࡍ ࡏࡔࡕࡀࡋࡀࡈࡍࡉࡍ ࡏࡋࡀࡅࡀࡉࡄࡅࡍ ࡕࡀࡒࡉࡍࡉࡍ ࡅࡀࡍࡄࡀࡓࡍࡉࡍ ࡅࡀࡎࡉࡒࡍࡉࡍ ࡋࡏࡁࡉࡃࡀࡕࡀࡍ ࡋࡓࡉࡔ ࡓࡀࡃࡉࡍࡉࡍ ࡌࡀࡓࡃࡉࡕࡀ ࡋࡏࡅࡕࡓࡉࡀ ࡅࡂࡉࡍࡆࡉࡀ ࡋࡀࡋࡌࡉࡀ ࡉࡀࡄࡁࡉࡍࡀࡋࡅࡍ ࡉࡀࡄࡁࡉࡍࡀࡋࡇ ࡍࡉࡑࡅࡁࡕࡀ ࡃࡀࡊࡉࡕࡀ ࡋࡌࡀࡋࡊࡀ ࡀࡌࡉࡍࡈࡅࡋ ࡖࡌࡉࡍࡀࡉࡅࡍ ࡏࡕࡉࡍࡑࡉࡁ ࡓࡀࡃࡉࡍࡉࡍ ࡅࡌࡀࡎࡂࡉࡍࡉࡍ ࡀࡋࡌࡀ ࡋࡎࡀࡌ ࡓࡁࡀ ࡌࡈࡉࡍ ࡀࡍࡉࡍ ࡏࡍࡉࡀࡍࡀ ࡋࡎࡀࡌ ࡓࡁࡀ ࡓࡌࡉࡍࡀࡋࡇ ࡅࡀࡌࡀࡓࡍࡀࡋࡇ ࡆࡉࡅࡀࡊ ࡕࡀࡒࡅࡍ ࡅࡃࡌࡅࡕࡀࡊ ࡌࡉࡍࡉࡄࡓࡀ ࡀࡌࡉࡍࡈࡅࡋ ࡖࡌࡍ ࡑࡀࡅࡕࡀࡊ ࡔࡀࡓࡉࡀ ࡏࡋࡀࡍ ࡔࡀࡋࡉࡈࡍࡇ ࡋࡎࡀࡌ ࡓࡁࡀ ࡏࡋ ࡔࡊࡉࡍࡀࡕࡀ ࡅࡏࡋ ࡉࡀࡓࡃࡍࡉࡀ ࡌࡍ ࡓࡉࡔ ࡁࡓࡉࡔ ࡓࡀࡃࡉࡍࡉࡍ ࡅࡌࡎࡂࡉࡍࡉࡍ ࡀࡋࡌࡀ ࡋࡉࡀࡅࡀࡓ ࡆࡉࡅࡀ ࡌࡈࡉࡍ ࡗ ࡌࡈࡉࡍ ࡉࡀࡅࡀࡓ ࡆࡉࡅࡀ ࡏࡉࡍࡉࡀࡍࡀ ࡋࡉࡀࡅࡀࡓ ࡆࡉࡅࡀ ࡓࡌࡉࡍࡀࡋࡇ ࡀࡁ ࡀࡍࡀࡕ ࡖࡏࡅࡕࡓࡉࡀ ࡅࡌࡀࡓࡀࡉࡀࡍ ࡖ ࡔࡊࡉࡍࡀࡕࡀ ࡊࡅࡋࡄࡅࡍ ࡍࡉࡑࡅࡁࡕࡀ ࡍࡑࡀࡁࡋࡀࡊ ࡅࡔࡀࡋࡉࡈࡍࡀࡊ ࡏࡋ ࡊࡅࡌࡑࡀ ࡅࡏࡋ ࡏࡁࡉࡃࡀࡕࡀ ࡖࡀࡕࡀࡓ ࡍࡄࡅࡓ ࡄࡀࡉࡆࡀࡊ ࡏࡕࡋࡀࡁࡀࡔ ࡌࡀࡍࡃࡀ ࡖࡄࡉࡉࡀ ࡁࡃࡉࡋࡀࡍ ࡌࡍ ࡄࡀࡉࡋࡀࡍ ࡅࡓࡀࡆࡀࡍ ࡔࡀࡓࡉࡍ ࡏࡋࡇ ࡓࡀࡃࡉࡍࡉࡍ ࡅࡌࡀࡎࡂࡉࡍࡉࡍ ࡀࡋࡌࡀ ࡋࡁࡉࡕ ࡉࡅࡔࡀࡌࡉࡍ ࡌࡈࡉࡍ ࡗ ࡌࡈࡉࡍ ࡁࡉࡕ ࡉࡅࡔࡀࡌࡉࡍ ࡆࡉࡅࡀࡉࡀࡍ ࡏࡋ ࡉࡅࡔࡀࡌࡉࡍ ࡃࡍࡀ ࡃࡍࡀ ࡆࡉࡅࡀࡉࡀࡍ ࡋࡁࡉࡕ ࡉࡅࡔࡀࡌࡉࡍ ࡉࡅࡔࡀࡌࡉࡍ ࡁࡄࡀࡔࡀࡁࡕࡀ ࡄࡅࡀ ࡗ ࡄࡅࡀ ࡁࡄࡀࡔࡀࡁࡕࡀ ࡋࡁࡀࡁࡀ ࡖࡄࡉࡋࡁࡅࡍࡇ ࡍࡐࡀࡒ ࡀࡍࡉࡍ ࡌࡉࡄࡆࡀ ࡖࡄࡆࡀࡉࡍࡇ ࡏࡍࡉࡀࡍࡀ ࡓࡀࡌࡉࡍࡀࡋࡇ ࡀࡁࡅࡍ ࡓࡁࡀ ࡄࡅࡉࡕ ࡅࡓࡉࡔࡀࡉࡀࡍ ࡅࡆࡉࡅࡀࡊ ࡃࡍࡀ ࡁࡄࡉࡋࡐࡀ ࡅࡔࡀࡉࡈࡀࡊ ࡄࡅࡀ ࡁࡉࡕ ࡄࡉࡉࡀ ࡅࡏࡁࡉࡃࡀࡕࡀࡊ ࡌࡁࡀࡔࡒࡓࡀ ࡁࡀࡕࡓࡀ ࡖࡍࡄࡅࡓࡀ ࡌࡎࡀࡃࡀࡓ ࡎࡉࡃࡓࡉࡀ ࡒࡓࡅࡊ ࡀࡍࡀࡕ ࡌࡀࡓࡀ ࡖ ࡈࡀࡁࡅࡕࡀ ࡀࡍࡄࡀࡓࡕࡇ ࡅࡕࡀࡒࡉࡍࡕࡇ ࡅࡕࡓࡀࡑࡕࡇ ࡁࡔࡊࡉࡍࡕࡇ ࡌࡍ ࡓࡉࡔ ࡁࡓࡉࡔ ࡓࡀࡃࡉࡍࡉࡍ ࡅࡌࡀࡎࡂࡉࡍࡉࡍ ࡀࡋࡌࡀ ࡋࡁࡉࡕ ࡀࡁࡀࡕࡅࡓ ࡌࡈࡉࡍ ࡌࡀࡈࡅࡉࡀࡍ ࡋࡁࡉࡕ ࡀࡁࡀࡕࡅࡓ ࡆࡉࡅࡀࡉࡀࡍ ࡏࡋ ࡀࡁࡀࡕࡅࡓ ࡃࡍࡀ ࡀࡁࡀࡕࡅࡓ ࡍࡐࡀࡑ ࡒࡀࡌ ࡌࡍ ࡊࡅࡓࡎࡉࡉࡇ ࡅࡁࡅࡕࡀ ࡌࡍ ࡄࡉࡉࡀ ࡁࡀࡉࡉࡀ ࡁࡅࡕࡀ ࡁࡀࡉࡉࡀ ࡌࡍ ࡄࡉࡉࡀ ࡋࡏࡁࡉࡃࡀࡕࡀ ࡄࡀࡎࡉࡓࡀࡕࡀ ࡖࡀࡁࡀࡃ ࡅࡀࡌࡀࡓࡋࡇ ࡏࡅࡕࡓࡉࡀ ࡕࡋࡀࡕࡀ ࡄࡀࡃࡉࡁࡇ ࡀࡍࡀࡍࡉࡀ ࡖࡊࡅࡔࡈࡀ ࡁࡄࡀࡄࡅ ࡂࡀࡁࡓࡀ ࡖࡋࡁࡉࡔࡀ ࡖࡆࡉࡅࡀ ࡋࡁࡉࡔ ࡋࡁࡉࡔ ࡋࡁࡉࡔࡀ ࡖࡆࡉࡅࡀ ࡅࡍࡄࡅࡓࡀ ࡌࡓࡀࡌࡀࡉ ࡋࡊࡀࡃࡐࡇ ࡀࡁࡅࡍ ࡕࡀࡒࡉࡋࡁࡇ ࡁࡌࡅࡆࡀࡍࡉࡀ ࡅࡓࡀࡔࡌࡉࡁࡇ ࡁࡃࡀࡊࡉࡀ ࡓࡅࡔࡅࡌࡀ ࡄࡀࡉࡆࡀࡊ ࡔࡀࡋࡉࡈࡍࡇ ࡋࡀࡁࡀࡕࡅࡓ ࡋࡉࡀࡓࡃࡍࡀ ࡓࡁࡀ ࡖࡌࡉࡀ ࡄࡉࡉࡀ ࡅࡋࡍࡉࡔࡌࡀࡕࡀ ࡖࡎࡀࡋࡒࡀ ࡋࡃࡀࡅࡓࡀ ࡕࡀࡒࡍࡀ ࡅࡏࡋ ࡏࡓࡅࡕࡀ ࡅࡕࡅࡔࡁࡉࡄࡕࡀ ࡖࡎࡀࡋࡒࡀ ࡌࡉࡍࡇ ࡌࡍ ࡀࡋࡌࡀ ࡔࡀࡋࡉࡈࡍࡇ ࡋࡔࡅࡁࡀ ࡅࡕࡓࡉࡎࡀࡓ ࡖࡍࡉࡌࡉࡓࡁࡅࡍ ࡅࡍࡉࡔࡕࡀࡌࡉࡁࡅࡍ ࡌࡍ ࡓࡉࡔ ࡁࡓࡉࡔ ࡀࡌࡀࡓࡍࡀࡋࡇ ࡀࡋࡌࡀ ࡖ ࡄࡀࡎࡓࡉࡕ ࡀࡁࡀࡕࡅࡓ ࡗ ࡌࡍ ࡊࡉࡎࡉࡀ ࡏࡕࡉࡍࡑࡉࡁࡕ ࡀࡋࡌࡀ ࡖࡄࡀࡎࡓࡉࡕ ࡀࡁࡀࡕࡅࡓ ࡗ ࡌࡍ ࡆࡉࡅࡀ ࡃࡀࡊࡉࡀ ࡄࡅࡉࡕ ࡀࡋࡌࡀ ࡖࡄࡀࡎࡓࡉࡕ ࡀࡁࡀࡕࡅࡓ ࡅࡓࡀࡂࡆࡉࡕ ࡏࡋ ࡐࡕࡀࡄࡉࡋ ࡅࡐࡕࡀࡄࡉࡋ ࡏࡋࡀࡊ ࡄࡀࡌ ࡄࡀࡔࡕࡀ ࡄࡀࡓࡂࡕࡀ ࡅࡁࡉࡔࡅࡕࡀ ࡖࡄࡅࡀࡕ ࡌࡉࡍࡀࡉࡊࡅࡍ ࡍࡉࡔࡌࡀࡕࡀ ࡁࡄࡅࡎࡓࡀࡍࡅࡍ ࡄࡀࡎࡓࡉࡀ ࡅࡌࡉࡕࡊࡀࡕࡓࡉࡀ ࡖࡀࡔࡀࡓ ࡅࡒࡀࡌ ࡎࡀࡋࡉࡒ ࡁࡃࡉࡓࡊࡉࡀ ࡖ ࡊࡅࡔࡈࡀ ࡍࡉࡎࡀࡒ ࡋࡀࡕࡀࡓ ࡍࡄࡅࡓ ࡖࡋࡀࡌࡀࡔࡀࡓ ࡅࡋࡀ ࡒࡀࡉࡉࡌ ࡎࡀࡉࡉࡐ ࡁࡎࡀࡅࡐࡇ ࡖࡀࡋࡌࡀ ࡊࡎࡀࡉࡕࡇ ࡋࡀࡁࡀࡕࡅࡓ ࡌࡍ ࡔࡉࡁࡉࡀࡄࡉࡀ ࡅࡍࡈࡀࡓࡕࡇ ࡏࡋ ࡂࡉࡍࡆࡉࡇ ࡌࡍ ࡓࡉࡔ ࡁࡓࡉࡔ ࡀࡍࡄࡀࡓࡕࡇ ࡅࡕࡀࡒࡉࡍࡕࡇ ࡌࡍ ࡁࡅࡎࡌࡀ ࡖࡀࡉࡀࡓ ࡔࡓࡉࡍ ࡏࡋࡇ ࡕࡀࡒࡉࡍࡉࡍ ࡋࡏࡁࡉࡃࡀࡕࡇ ࡅࡕࡀࡒࡉࡍࡇ ࡋࡌࡉࡌࡓࡇ ࡌࡍ ࡓࡉࡔ ࡁࡓࡉࡔ ࡓࡀࡃࡉࡍࡉࡍ ࡅࡌࡀࡎࡂࡉࡍࡉࡍ ࡀࡋࡌࡀ ࡋࡐࡕࡀࡄࡉࡋ ࡏࡅࡕࡓࡀ ࡌࡈࡉࡍ ࡌࡀࡈࡅࡉࡀࡍ ࡋࡐࡕࡀࡄࡉࡋ ࡏࡅࡕࡓࡀ ࡄࡅ ࡁࡓࡀࡄࡌࡉࡀ ࡏࡕࡉࡌࡋࡉࡀ ࡅࡀࡌࡀࡓ ࡏࡅ ࡄࡉࡍࡉࡀࡋࡇ ࡋࡀࡁ ࡌࡀࡍࡃࡀ ࡖࡄࡉࡉࡀ ࡖࡋࡉࡂࡀࡋ ࡈࡀࡁࡀ ࡔࡀࡃࡀࡓ ࡏࡋࡀࡉ ࡖࡍࡉࡔࡕࡀࡒࡋࡅࡋࡉࡀ ࡀࡓࡐࡉࡋࡉࡀ ࡖࡄࡀࡁࡀࡓࡀ ࡖࡊࡅࡋ ࡉࡅࡌ ࡊࡅࡋ ࡉࡅࡌࡀ ࡄࡀࡓࡂࡕࡀ ࡅࡁࡉࡔࡅࡕࡀ ࡌࡀࡉࡉࡋ ࡏࡋ ࡏࡅࡑࡓࡇ ࡄࡅࡎࡓࡀࡍࡀ ࡅࡁࡅࡑࡓࡀࡍࡀ ࡀࡌࡉࡍࡈࡅࡋ ࡖࡀࡁ ࡓࡀࡂࡀࡆ ࡏࡋࡀࡉ ࡅࡀࡍࡉࡍ ࡏࡍࡉࡀࡍࡀ ࡓࡀࡌࡉࡍࡀࡋࡇ ࡅࡀࡌࡀࡓࡍࡀࡋࡇ ࡁࡄࡉࡓࡀ ࡖࡄࡉࡉࡀ ࡔࡉࡄࡋࡅࡉࡀ ࡏࡋࡀࡅࡀࡉࡅࡍ ࡅࡊࡅࡓࡎࡉࡀ ࡀࡕࡓࡀࡑࡋࡇ ࡁࡀࡕࡀࡓ ࡍࡄࡅࡓ ࡕࡀࡓࡑࡉࡍࡀࡋࡇ ࡏࡓࡅࡕࡀ ࡖ ࡌࡀࡉࡓࡀࡋࡇ ࡅࡌࡀࡎࡒࡀࡋࡇ ࡀࡋࡃࡀࡅࡓࡀ ࡕࡀࡒࡍࡀ ࡀࡌࡀࡓࡋࡅࡍ ࡗ ࡄࡀࡎࡓࡉࡀ ࡕࡀࡓࡌࡉࡃࡉࡀ ࡏࡁࡉࡃࡋࡅࡍ ࡗ ࡕࡉࡒࡋࡀࡕࡀ ࡓࡀࡌࡉࡋࡅࡍ ࡔࡉࡁࡉࡀࡄࡉࡀ ࡅࡀࡍࡀ ࡁࡓࡐࡉࡋࡉࡀ ࡖࡄࡔࡅࡊࡀ ࡌࡉࡕࡊࡀࡓࡀࡊࡍࡀ ࡗ ࡓࡀࡂࡆࡉࡀ ࡏࡋࡀࡉ ࡓࡁࡉࡀ ࡒࡅࡃࡀࡌ ࡓࡁࡉࡀ ࡌࡀࡍ ࡌࡀࡃࡊࡀࡓ ࡏࡋࡀࡉ ࡌࡀࡋࡉࡋ ࡌࡀࡍࡃࡀ ࡖࡄࡉࡉࡀ ࡋࡐࡕࡀࡄࡉࡋ ࡏࡅࡕࡓࡀ ࡖࡍࡉࡌࡀࡓࡋࡇ ࡀࡌࡀࡓࡋࡇ ࡀࡍࡀࡕ ࡕࡉࡔࡕࡀࡉࡀࡋ ࡏࡋ ࡕࡉࡒࡉࡋࡀࡕࡀ ࡅࡕࡀࡓࡌࡉࡃࡉࡀ ࡀࡌࡉࡍࡈࡅࡋ ࡖࡌࡍ ࡆࡉࡃࡀ ࡅࡓࡅࡂࡆࡀ ࡅࡄࡉࡌࡕࡀࡊ ࡃࡉࡋࡀࡊ ࡄࡅࡍ ࡔࡉࡁࡉࡀࡄࡉࡀ ࡔࡀࡋࡉࡈࡕࡉࡍࡅࡍ ࡏࡋ ࡕࡀࡓࡌࡉࡃࡉࡀ ࡖࡄࡀࡈࡉࡁࡅࡍ ࡅࡌࡀࡎࡊࡉࡋࡉࡁࡅࡍ ࡁࡂࡅ ࡓࡅࡓࡁࡉࡀ ࡅࡓࡀࡌࡉࡍ ࡏࡋࡀࡅࡀࡉࡄࡅࡍ ࡔࡉࡄࡀ ࡅࡔࡉࡂࡓࡀ ࡅࡓࡀࡌࡉࡋࡅࡍ ࡁࡎࡀࡅࡐࡀ ࡖࡀࡋࡌࡀ ࡌࡀࡓࡅࡉࡋࡅࡍ ࡁࡓࡅࡉࡕࡀ ࡋࡉࡁࡍࡇ ࡖࡀࡋࡌࡀ ࡌࡉࡕࡊࡀࡕࡓࡉࡀ ࡏࡅ ࡄࡀࡈࡉࡁࡅࡍ ࡔࡉࡁࡉࡀࡄࡉࡀ ࡁࡕࡀࡓࡌࡉࡃࡉࡀ ࡁࡎࡀࡊࡋࡅࡕࡀ ࡃࡉࡋࡀࡊ ࡐࡕࡀࡄࡉࡋ ࡕࡉࡄࡅࡉࡀ ࡏࡅ ࡄࡀࡈࡉࡍ ࡕࡀࡓࡌࡉࡃࡉࡀ ࡁࡎࡊࡋࡅࡕࡀࡊ ࡃࡉࡋࡀࡊ ࡐࡕࡀࡄࡉࡋ ࡕࡉࡄࡅࡉࡀ ࡄࡀࡉࡆࡀࡊ ࡌࡀࡋࡉࡋ ࡌࡀࡍࡃࡀ ࡖࡄࡉࡉࡀ ࡅࡏࡍࡉࡀࡍࡀ ࡋࡐࡕࡀࡄࡉࡋ ࡏࡅࡕࡓࡀ ࡓࡀࡌࡉࡀ ࡅࡀࡌࡀࡓࡋࡇ ࡀࡁࡅࡍ ࡁࡄࡉࡓࡀ ࡖࡋࡀࡌࡅࡌࡀ ࡖࡉࡀࡅࡀࡓ ࡄࡅࡀࡋࡀࡊ ࡍࡀࡑࡁࡀ ࡉࡀࡅࡀࡓ ࡍࡀࡑࡁࡀ ࡄࡅࡀࡋࡀࡊ ࡅࡄࡀࡁࡔࡀࡁࡀ ࡄࡅࡀࡋࡀࡊ ࡐࡉࡓࡒࡀ ࡄࡉࡉࡀ ࡓࡁࡉࡀ ࡋࡔࡅࡌࡀࡊ ࡏࡃࡅࡉࡀ ࡊࡌࡀࡑ ࡊࡉࡌࡑࡀ ࡖࡉࡀࡓࡃࡍࡀ ࡖࡔࡀࡃࡀࡓࡋࡀࡊ ࡅࡄࡉࡉࡀ ࡆࡀࡊࡏࡉࡍ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡏࡋࡊࡅࡍ ࡀࡌࡉࡓࡍࡀ ࡅࡌࡀࡐࡓࡉࡔࡍࡀ ࡁࡄࡉࡓࡉࡀ ࡅࡔࡀࡋࡌࡀࡍࡉࡀ ࡖ ࡃࡀࡉࡓࡉࡍ ࡁࡂࡀࡅࡇ ࡖࡀࡋࡌࡀ ࡋࡀࡕࡉࡄࡅࡍ ࡌࡍࡀࡕ ࡄࡔࡅࡊࡀ ࡅࡀࡉࡍࡀࡉࡊࡅࡍ ࡕࡓࡅࡑ ࡋࡀࡕࡀࡓ ࡍࡄࡅࡓ ࡏࡕࡀࡐࡓࡀࡔ ࡌࡍ ࡌࡅࡕࡀ ࡋࡄࡉࡉࡀ ࡅࡁࡌࡀࡋࡀࡋࡊࡅࡍ ࡊࡀࡃࡁࡀ ࡋࡀࡍࡉࡄࡅࡉࡀ ࡏࡕࡀࡐࡓࡀࡔ ࡌࡍ ࡁࡉࡔࡀ ࡋࡈࡀࡁࡀ ࡅࡏࡕࡀࡐࡓࡀࡔ ࡌࡍ ࡁࡉࡔࡀ ࡄࡀࡈࡉࡀ ࡖࡀࡕࡀࡓ ࡄࡔࡅࡊ ࡓࡄࡅࡌ ࡅࡀࡆࡁࡀࡓ ࡄࡃࡀࡃࡉࡀ ࡖࡄࡀࡈࡀࡉࡊࡅࡍ ࡅࡄࡀࡅࡁࡊࡅࡍ ࡍࡉࡔࡕࡉࡁࡒࡋࡊࡅࡍ ࡄࡆࡅࡍ ࡅࡔࡅࡌࡀ ࡅࡏࡕࡀࡐࡓࡀࡔ ࡅࡎࡀࡒ ࡁࡆࡀࡊࡅࡕࡀ ࡋࡀࡕࡀࡓ ࡍࡄࡅࡓ ࡉࡀࡕࡁࡉࡀ ࡅࡁࡀࡉࡍࡉࡀ ࡈࡀࡁࡉࡀ ࡅࡊࡌࡀ ࡖࡁࡀࡉࡍࡉࡀ ࡅࡌࡉࡕࡀࡐࡓࡉࡔࡉࡀ ࡀࡌࡓࡉࡀ ࡈࡀࡁࡉࡀ ࡅࡌࡉࡕࡌࡉࡋࡊࡉࡀ ࡅࡀࡌࡓࡉࡀ ࡌࡀࡍ ࡖࡍࡉࡕࡉࡀ ࡅࡌࡀࡍ ࡖࡍࡉࡌࡀࡓࡋࡉࡀ ࡌࡀࡍ ࡍࡀࡅࡃࡀࡍ ࡅࡌࡀࡍ ࡍࡀࡐࡓࡉࡔࡀࡍ ࡌࡀࡍ ࡍࡉࡕࡉࡀ ࡅࡌࡀࡍ ࡖࡍࡉࡌࡀࡓࡋࡉࡀ ࡄࡀࡃ ࡄࡅࡀ ࡌࡀࡋࡊࡀ ࡏࡅ ࡀࡕࡓࡉࡍ ࡌࡉࡌࡀࡓ ࡀࡌࡓࡉࡀ ࡈࡀࡁࡉࡀ ࡅࡌࡉࡕࡀࡐࡓࡉࡔࡉࡀ ࡕࡓࡉࡍ ࡌࡀࡋࡊࡉࡀ ࡄࡅࡍ ࡅࡕࡓࡉࡍ ࡊࡉࡀࡍࡉࡀ ࡏࡕࡉࡒࡓࡅࡍ ࡌࡀࡋࡊࡀ ࡖࡄࡀࡆࡉࡍ ࡀࡋࡌࡀ ࡅࡌࡀࡋࡊࡀ ࡖࡁࡀࡓࡉࡅࡕ ࡃࡀࡓࡉࡀ ࡄࡉࡓࡁࡀ ࡅࡕࡀࡂࡀ ࡖࡄࡔࡅࡊࡀ ࡎࡀࡌࡋࡇ ࡕࡀࡂࡀ ࡎࡀࡌࡋࡇ ࡖࡄࡔࡅࡊࡀ ࡅࡄࡉࡓࡁࡀ ࡁࡉࡀࡌࡉࡍࡇ ࡋࡂࡀࡈ ࡄࡉࡓࡁࡀ ࡋࡂࡀࡈ ࡁࡉࡀࡌࡉࡍࡇ ࡅࡒࡀࡉࡉࡌ ࡌࡂࡀࡈࡉࡋࡁࡇ ࡁࡍࡇ ࡒࡀࡉࡉࡌ ࡅࡁࡍࡇ ࡌࡂࡀࡈࡉࡋࡁࡅࡍ ࡅࡁࡍࡇ ࡄࡃࡀࡃࡉࡀ ࡂࡀࡈࡋࡉࡀ ࡌࡀࡋࡊࡀ ࡖࡁࡀࡓࡉࡅࡕ ࡀࡋࡌࡉࡀ ࡅࡌࡀࡋࡊࡀ ࡖࡁࡀࡓࡉࡅࡕ ࡃࡀࡓࡉࡀ ࡌࡀࡋࡊࡀ ࡖࡁࡀࡓࡉࡅࡕ ࡀࡋࡌࡉࡀ ࡕࡀࡂࡀ ࡖ ࡍࡄࡅࡓࡀ ࡎࡀࡌࡋࡇ ࡕࡀࡂࡀ ࡎࡀࡌࡋࡇ ࡖࡍࡄࡅࡓࡀ ࡅࡊࡅࡔࡈࡀ ࡁࡉࡀࡌࡉࡍࡇ ࡋࡂࡀࡈ ࡊࡅࡔࡈࡀ ࡋࡂࡀࡈ ࡁࡉࡀࡌࡉࡍࡇ ࡅࡒࡀࡉࡉࡌ ࡅࡌࡀࡐࡓࡉࡔ ࡁࡍࡇ ࡒࡀࡉࡉࡌ ࡅࡁࡍࡇ ࡌࡀࡐࡓࡉࡔࡋࡅࡍ ࡅࡁࡍࡇ ࡄࡃࡀࡃࡉࡀ ࡌࡀࡐࡓࡉࡔࡉࡀ ࡌࡀࡍ ࡖࡍࡉࡕࡉࡀ ࡅࡌࡀࡍ ࡖࡍࡉࡌࡀࡓࡋࡉࡀ ࡖࡄࡀࡊࡀ ࡌࡀࡄࡅ ࡄࡅࡀ ࡅࡃࡋࡀ ࡏࡕࡉࡍࡂࡉࡃ ࡓࡒࡉࡄࡀ ࡅࡏࡑࡈࡀࡓࡀࡓ ࡁࡂࡀࡅࡇ ࡊࡅࡊࡁࡉࡀ ࡅࡃࡋࡀ ࡕࡉࡌࡎࡉࡀ ࡀࡓࡒࡀ ࡅࡃࡋࡀ ࡌࡎࡅࡕࡀ ࡕࡉࡐࡉࡋ ࡁࡌࡉࡀ ࡅࡃࡋࡀ ࡔࡀࡌࡉࡔ ࡅࡃࡉࡓࡀ ࡍࡀࡎࡂࡅࡍ ࡁࡂࡀࡅࡇ ࡖࡄࡀࡆࡉࡍ ࡀࡋࡌࡀ ࡄࡀࡆࡉࡍ ࡄࡅࡀࡕ ࡍࡉࡔࡉࡌࡕࡀ ࡗ ࡁࡊࡀࡍࡀ ࡀࡄࡅࡀࡕ ࡉࡀࡕࡁࡀ ࡋࡀࡊࡀࡐࡍࡀ ࡅࡋࡀࡑࡀࡄࡉࡀ ࡍࡉࡔࡉࡌࡕࡀ ࡗ ࡁࡊࡀࡍࡀ ࡄࡅࡀࡕ ࡉࡀࡕࡁࡀ ࡋࡀࡊࡉࡁࡉࡀ ࡅࡋࡀࡌࡅࡌࡉࡀ ࡋࡍࡉࡔࡉࡌࡕࡀ ࡗ ࡁࡊࡀࡍࡀ ࡄࡅࡀࡕ ࡉࡀࡕࡁࡀ ࡋࡀࡄࡀࡌࡉࡌࡀ ࡅࡋࡀࡒࡀࡓࡉࡓࡀ ࡋࡍࡉࡔࡉࡌࡕࡀ ࡗ ࡁࡊࡀࡍࡀ ࡄࡅࡀࡕ ࡉࡀࡕࡁࡀ ࡌࡉࡂࡃࡀࡋ ࡂࡃࡉࡋࡀࡍ ࡒࡀࡓࡍࡇ ࡅࡊࡋࡉࡋࡀ ࡖࡀࡉࡀࡓ ࡕࡓࡉࡑࡋࡇ ࡁࡓࡉࡔࡇ ࡀࡉࡍࡇ ࡐࡀࡎࡉࡌࡊࡉࡀ ࡖࡍࡄࡅࡓࡀ ࡅࡎࡀࡊࡉࡀ ࡋࡀࡕࡓࡀ ࡖࡁࡉࡕ ࡓࡅࡓࡁࡀࡍࡉࡀ ࡐࡅࡌࡇ ࡖࡕࡅࡔࡋࡉࡌࡀ ࡃࡀࡊࡉࡀ ࡅࡌࡔࡀࡁࡀ ࡋࡌࡀࡋࡊࡀ ࡖࡀࡕࡀࡓ ࡍࡄࡅࡓ ࡌࡍ ࡉࡅࡌࡀ ࡖࡄࡀࡔࡉࡁ ࡁࡉࡔࡀ ࡁࡉࡔࡅࡕࡀ ࡁࡂࡀࡅࡇ ࡂࡉࡁࡋࡀࡕ ࡓࡂࡀࡆ ࡁࡓࡅࡂࡆࡀ ࡓࡁࡀ ࡅࡒࡓࡀࡁࡀ ࡌࡍ ࡍࡄࡅࡓࡀ ࡀࡁࡀࡃ ࡏࡔࡕࡀࡃࡀࡓ ࡀࡔࡂࡀࡍࡃࡀ ࡋࡌࡉࡊࡁࡀࡔ ࡋࡄࡀࡉࡋࡀ ࡖࡌࡀࡓࡃࡉࡀ ࡀࡉࡕࡉࡍࡅࡍ ࡋࡌࡉࡀ ࡄࡉࡉࡀ ࡅࡓࡌࡉࡍࡅࡍ ࡁࡌࡉࡀ ࡕࡀࡄࡌࡉࡀ ࡀࡉࡕࡅࡉࡀ ࡋࡍࡄࡅࡓࡀ ࡖࡍࡀࡄࡅࡓ ࡅࡓࡉࡌࡉࡅࡉࡀ ࡁࡄࡔࡅࡊࡀ ࡄࡀࡔࡊࡀ ࡀࡕࡉࡅࡉࡀ ࡏࡋ ࡆࡉࡒࡀ ࡁࡀࡎࡉࡌࡀ ࡅࡓࡉࡌࡉࡅࡉࡀ ࡁࡆࡉࡒࡀ ࡌࡀࡓࡃࡀ ࡀࡉࡕࡅࡉࡀ ࡋࡍࡅࡓࡀ ࡄࡀࡉࡕࡀ ࡅࡓࡉࡌࡉࡅࡉࡀ ࡁࡍࡅࡓࡀ ࡀࡊࡋࡀ ࡀࡌࡉࡅࡉࡀ ࡋࡍࡉࡔࡉࡌࡕࡀ ࡌࡀࡍࡀ ࡃࡀࡊࡉࡀ ࡅࡓࡉࡌࡉࡅࡉࡀ ࡀࡁࡐࡀࡂࡓࡀ ࡁࡀࡈࡋࡀ ࡌࡍ ࡍࡅࡓࡀ ࡅࡌࡍ ࡌࡉࡀ ࡄࡃࡀ ࡓࡒࡉࡄࡀ ࡏࡕࡉࡍࡂࡉࡃ ࡌࡍ ࡍࡅࡓࡀ ࡅࡌࡍ ࡌࡉࡀ ࡀࡓࡒࡀ ࡁࡎࡀࡃࡀࡍࡀ ࡌࡎࡅࡍ ࡌࡍ ࡍࡅࡓࡀ ࡅࡌࡍ ࡌࡉࡀ ࡐࡉࡓࡉࡀ ࡅࡏࡌࡁࡉࡀ ࡅࡏࡋࡀࡍࡉࡀ ࡄࡅࡍ ࡌࡍ ࡍࡅࡓࡀ ࡅࡌࡍ ࡌࡉࡀ ࡀࡃࡀࡌ ࡖࡐࡀࡂࡓࡉࡀ ࡏࡕࡉࡂࡁࡉࡋ ࡍࡉࡑࡁࡅࡉࡀ ࡋࡔࡂࡀࡍࡃࡀ ࡅࡏࡋ ࡃࡍࡀࡁ ࡃࡀࡓࡉࡀ ࡔࡀࡃࡓࡅࡉࡀ ࡒࡓࡀࡁࡇ ࡁࡊࡀࡋࡅࡆࡀ ࡁࡂࡀࡅࡇ ࡖࡌࡀࡓࡂࡅࡔ ࡀࡋࡌࡀ ࡋࡒࡀࡋࡇ ࡖࡔࡂࡀࡍࡃࡀ ࡀࡃࡀࡌ ࡖࡔࡀࡊࡉࡁ ࡏࡕࡀࡓ ࡀࡃࡀࡌ ࡏࡕࡀࡓ ࡖࡔࡀࡊࡉࡁ ࡀࡋࡀࡍࡐࡇ ࡖࡀࡔࡂࡀࡍࡃࡀ ࡍࡐࡀࡒ ࡀࡕࡀ ࡁࡔࡋࡀࡌ ࡀࡔࡂࡀࡍࡃࡀ ࡔࡋࡉࡄࡀ ࡖࡄࡉࡉࡀ ࡖ ࡌࡍ ࡁࡉࡕ ࡀࡁ ࡀࡕࡀ ࡄࡀࡆࡉࡍ ࡍࡑࡀࡁ ࡄࡉࡉࡀ ࡉࡀࡒࡉࡓࡉࡀ ࡅࡔࡀࡐࡉࡓࡉࡀ ࡁࡀࡕࡓࡀࡉࡄࡅࡍ ࡄࡀࡉࡆࡉࡍ ࡕࡓࡀࡑࡋࡉࡀ ࡊࡅࡓࡎࡉࡀ ࡅࡃࡌࡅࡕࡀࡉ ࡖࡄࡔࡅࡊࡀ ࡁࡌࡀࡋࡉࡀ ࡉࡀࡕࡁࡀ ࡌࡀࡋࡉࡋ ࡔࡂࡀࡍࡃࡀ ࡅࡋࡀࡃࡀࡌ ࡖࡐࡀࡂࡓࡉࡀ ࡖࡍࡉࡌࡀࡓࡋࡇ ࡔࡀࡐࡉࡓ ࡕࡓࡉࡑ ࡊࡅࡓࡎࡉࡀࡊ ࡀࡃࡀࡌ ࡅࡃࡌࡅࡕࡀࡊ ࡄࡀࡊࡀ ࡁࡌࡀࡋࡉࡀ ࡉࡀࡕࡁࡀ ࡊࡅࡋࡄࡅࡍ ࡁࡈࡀࡁ ࡏࡃࡉࡊࡓࡅࡊ ࡅࡋࡃࡉࡋࡉࡀ ࡍࡉࡑࡁࡅࡍ ࡅࡔࡀࡃࡓࡅࡍ ࡏࡋࡀࡊ ࡏࡕࡉࡕ ࡅࡉࡀࡐࡓࡉࡔࡀࡊ ࡀࡃࡀࡌ ࡅࡏࡐࡀࡓࡒࡀࡊ ࡌࡉࡍࡇ ࡖࡄࡀࡆࡉࡍ ࡀࡋࡌࡀ ࡑࡅࡕ ࡅࡔࡅࡌࡀ ࡅࡏࡕࡀࡐࡓࡀࡔ ࡅࡎࡀࡒ ࡁࡆࡀࡊࡅࡕࡀ ࡋࡀࡕࡀࡓ ࡍࡄࡅࡓ ࡀࡃࡀࡌ ࡔࡅࡌࡀ ࡅࡄࡀࡉࡌࡀࡍ ࡈࡅࡁࡇ ࡋࡌࡀࡍ ࡖࡔࡅࡌࡀ ࡅࡄࡀࡉࡌࡀࡍ ࡌࡍ ࡀࡁࡀࡕࡓࡀࡊ ࡀࡃࡀࡌ ࡍࡎࡉࡁ ࡊࡅࡔࡈࡀ ࡈࡅࡁࡇ ࡋࡌࡀࡍ ࡖࡍࡎࡉࡁ ࡊࡅࡔࡈࡀ ࡌࡍ ࡀࡁࡀࡕࡓࡀࡊ ࡀࡃࡀࡌ ࡎࡊࡀ ࡅࡎࡋࡉࡒ ࡈࡅࡁࡇ ࡋࡌࡀࡍ ࡖࡍࡉࡎࡀࡒ ࡌࡍ ࡀࡁࡀࡕࡓࡀࡊ ࡑࡅࡌ ࡅࡏࡕࡀࡐࡓࡀࡔ ࡔࡀࡋࡌࡀࡍࡉࡀ ࡅࡎࡀࡒ ࡁࡆࡀࡊࡅࡕࡀ ࡋࡀࡕࡀࡓ ࡍࡄࡅࡓ ࡅࡌࡔࡀࡁࡉࡍ ࡄࡉࡉࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡌࡀࡍ ࡍࡉࡕࡉࡀ ࡅࡌࡀࡍ ࡖࡍࡉࡌࡀࡓࡋࡉࡀ ࡌࡀࡍ ࡍࡀࡅࡃࡀࡍ ࡅࡌࡀࡍ ࡍࡀࡐࡉࡓࡔࡀࡍ ࡌࡀࡍ ࡍࡉࡕࡉࡀ ࡅࡌࡀࡍ ࡖࡍࡉࡌࡀࡓࡋࡉࡀ ࡌࡀࡍ ࡐࡕࡀࡋࡇ ࡁࡀࡁࡀ ࡋࡐࡓࡀࡔ ࡆࡉࡅࡀ ࡅࡌࡀࡍ ࡊࡓࡀࡋࡇ ࡊࡉࡐࡇ ࡕࡓࡉࡍ ࡌࡀࡍ ࡌࡉࡎࡉࡇ ࡋࡀࡓࡒࡀ ࡅࡍࡂࡀࡃࡁࡇ ࡓࡒࡉࡄࡀ ࡌࡍ ࡓࡉࡔ ࡁࡓࡉࡔ ࡌࡀࡍ ࡍࡂࡀࡃࡁࡇ ࡃࡓࡀࡁࡔࡉࡀ ࡖࡆࡉࡅࡀ ࡅࡀࡍࡄࡀࡓ ࡏࡅࡕࡓࡉࡀ ࡁࡔࡊࡉࡍࡀࡕࡅࡍ ࡌࡀࡍ ࡑࡁࡀ ࡁࡌࡀࡑࡁࡅࡕࡀ ࡄࡀࡉࡕࡀ ࡅࡌࡀࡍ ࡀࡓࡔࡀࡌ ࡁࡃࡀࡊࡉࡀ ࡓࡅࡔࡅࡌࡀ ࡌࡀࡍ ࡆࡓࡀࡁࡇ ࡆࡉࡓࡀ ࡅࡌࡀࡍ ࡄࡅࡀ ࡁࡂࡀࡅࡇ ࡍࡀࡈࡓࡀ ࡌࡀࡍࡅ ࡔࡊࡀࡍࡁࡇ ࡔࡊࡉࡍࡀࡕࡀ ࡅࡁࡀࡍࡉࡍ ࡁࡍࡀࡁࡇ ࡌࡀࡔࡊࡍࡉࡀ ࡌࡀࡍ ࡒࡓࡀࡁࡇ ࡁࡒࡀࡋࡀ ࡖࡄࡉࡉࡀ ࡅࡀࡍࡄࡀࡓ ࡋࡓࡁࡀ ࡄࡉࡊࡋࡀ ࡌࡀࡍ ࡊࡔࡀࡓࡁࡇ ࡊࡉࡔࡓࡀ ࡅࡂࡉࡈࡓࡇ ࡋࡕࡀࡂࡀ ࡌࡍ ࡓࡉࡔ ࡁࡓࡉࡔ ࡌࡀࡍ ࡀࡕࡓࡀࡑࡁࡇ ࡃࡀࡅࡋࡀ ࡅࡏࡕࡉࡒࡓࡉࡀ ࡁࡂࡀࡅࡇ ࡀࡎࡉࡀ ࡌࡀࡍ ࡂࡉࡁࡉࡇ ࡋࡌࡍࡀࡕ ࡓࡁࡉࡀ ࡅࡀࡎࡒࡇ ࡁࡆࡀࡊࡅࡕࡀ ࡋࡀࡕࡀࡓ ࡍࡄࡅࡓ ࡌࡉࡃࡀ ࡉࡀࡃࡉࡀ ࡄࡉࡉࡀ ࡄࡉࡉࡀ ࡉࡀࡃࡉࡀ ࡅࡋࡀࡌࡔࡀࡉࡉࡋࡉࡀ ࡌࡉࡃࡀ ࡉࡀࡃࡉࡀ ࡄࡉࡉࡀ ࡖࡉࡀࡅࡀࡓ ࡐࡕࡀࡋࡇ ࡐࡅࡌࡀ ࡋࡐࡓࡀࡔ ࡆࡉࡅࡀ ࡉࡅࡔࡀࡌࡉࡍ ࡊࡓࡀࡋࡇ ࡊࡉࡐࡇ ࡕࡓࡉࡍ ࡐࡕࡀࡄࡉࡋ ࡌࡉࡎࡉࡇ ࡋࡀࡓࡒࡀ ࡖࡕࡉࡁࡉࡋ ࡅࡍࡂࡀࡃࡁࡇ ࡓࡒࡉࡄࡀ ࡌࡍ ࡓࡉࡔ ࡁࡓࡉࡔ ࡁࡉࡄࡓࡀࡌ ࡀࡍࡂࡀࡃࡁࡇ ࡃࡓࡀࡁࡔࡉࡀ ࡖࡆࡉࡅࡀ ࡅࡀࡍࡄࡀࡓ ࡏࡅࡕࡓࡉࡀ ࡁࡔࡊࡉࡍࡀࡕࡅࡍ ࡔࡉࡋࡌࡀࡉ ࡑࡁࡀ ࡁࡌࡀࡑࡁࡅࡕࡀ ࡄࡀࡉࡕࡀ ࡅࡍࡉࡃࡁࡀࡉ ࡓࡔࡀࡌ ࡁࡃࡀࡊࡉࡀ ࡓࡅࡔࡅࡌࡀ ࡀࡃࡀࡌ ࡆࡓࡀ ࡆࡉࡓࡀ ࡅࡔࡉࡕࡉࡋ ࡄࡅࡀ ࡁࡂࡀࡅࡇ ࡍࡀࡈࡓࡀ ࡀࡍࡅࡔ ࡏࡅࡕࡓࡀ ࡔࡊࡀࡍࡁࡇ ࡔࡊࡉࡍࡀࡕࡀ ࡅࡁࡀࡍࡉࡍ ࡁࡍࡀࡁࡇ ࡌࡀࡔࡊࡍࡉࡀ ࡄࡉࡁࡉࡋ ࡒࡓࡀ ࡁࡒࡀࡋࡀ ࡖࡄࡉࡉࡀ ࡅࡀࡍࡄࡀࡓ ࡋࡓࡁࡀ ࡄࡉࡊࡋࡀ ࡉࡅࡊࡀࡔࡀࡓ ࡊࡔࡀࡓࡁࡇ ࡊࡉࡔࡓࡀ ࡅࡂࡉࡈࡓࡇ ࡋࡕࡀࡂࡀ ࡌࡍ ࡓࡉࡔ ࡁࡓࡉࡔ ࡄࡀࡉࡀࡔࡅࡌ ࡕࡓࡀࡑࡁࡇ ࡃࡀࡅࡋࡀ ࡅࡏࡕࡉࡒࡓࡉࡀ ࡁࡂࡀࡅࡇ ࡀࡎࡉࡀ ࡁࡓ ࡄࡉࡉࡀ ࡂࡉࡁࡉࡇ ࡋࡌࡍࡀࡕ ࡓࡁࡉࡀ ࡅࡀࡎࡒࡇ ࡁࡆࡀࡊࡅ ࡋࡀࡕࡀࡓ ࡍࡄࡅࡓ ࡄࡉࡉࡀ ࡆࡀࡊࡏࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡗ ࡋࡀࡄࡅࡀࡕ ࡕࡉࡁࡉࡋ ࡅࡋࡀࡏࡕࡉࡒࡓࡉࡀ ࡀࡋࡌࡀ ࡗ ࡖࡋࡀ ࡏࡕࡌࡉࡎࡉࡀࡕ ࡅࡋࡀࡏࡕࡒࡉࡓࡉࡀࡕ ࡌࡎࡅࡕࡀ ࡅࡊࡖ ࡌࡉࡀ ࡎࡉࡀࡅࡉࡀ ࡄࡅࡍ ࡀࡎࡂࡉࡀ ࡀࡕࡀ ࡄࡉࡁࡉࡋ ࡆࡉࡅࡀ ࡅࡔࡉࡕࡉࡋ ࡅࡔࡉࡄࡋࡅࡍ ࡅࡀࡉࡀࡓ ࡅࡀࡕࡅࡍ ࡏࡋ ࡕࡉࡁࡉࡋ ࡒࡀࡌࡉࡅࡍ ࡄࡉࡁࡉࡋ ࡓࡌࡀ ࡌࡉࡑࡓࡀ ࡅࡌࡔࡀࡍࡅࡍ ࡋࡌࡉࡀ ࡅࡐࡀࡋࡂࡉࡍࡅࡍ ࡁࡏࡑࡁࡉࡀ ࡏࡑࡁࡉࡀ ࡗ ࡒࡀࡉࡉࡌ ࡔࡉࡄࡋࡅࡍ ࡌࡋࡀ ࡏࡅࡑࡓࡇ ࡆࡉࡄࡉࡓࡀ ࡏࡋ ࡄࡉࡁࡉࡋ ࡆࡉࡅࡀ ࡅࡏࡋ ࡀࡉࡀࡓ ࡆࡉࡅࡀ ࡖࡍࡉࡌࡀࡓࡋࡅࡍ ࡀࡄࡀࡉ ࡏࡅࡕࡓࡉࡀ ࡕࡌࡉࡌࡉࡀ ࡏࡅࡕࡓࡉࡀ ࡖࡔࡀࡉࡉࡀ ࡐࡀࡉࡉࡀ ࡋࡉࡕࡋࡅࡍ ࡄࡀࡆࡉࡍ ࡀࡋࡌࡀ ࡖࡀࡍࡀࡕࡅࡍ ࡀࡉࡕࡀࡉࡕࡅࡍ ࡏࡋࡇ ࡀࡓࡒࡀ ࡌࡉࡍࡇ ࡋࡀ ࡄࡀࡅࡉࡀ ࡅࡓࡒࡉࡄࡀ ࡌࡉࡍࡇ ࡋࡀࡌࡉࡑࡈࡀࡓࡀࡓ ࡋࡀࡉࡀࡁࡔࡉࡀ ࡌࡉࡀ ࡎࡉࡀࡅࡉࡀ ࡅࡋࡀࡌࡉࡕࡒࡉࡓࡉࡀ ࡀࡓࡒࡀ ࡌࡉࡍࡇ ࡌࡍ ࡄࡀࡆࡉࡍ ࡀࡋࡌࡀ ࡖࡒࡓࡀࡉࡕࡅࡍ ࡏࡋ ࡀࡃࡀࡌ ࡄࡀࡉࡆࡉࡍ ࡄࡀࡅࡀ ࡆࡀࡅࡇ ࡄࡀࡉ ࡄࡀࡅࡉࡍ ࡁࡍࡇ ࡖࡀࡃࡀࡌ ࡄࡀࡉ ࡔࡀࡐࡋࡉࡀ ࡅࡄࡀࡉ ࡆࡀࡒࡐࡉࡀ ࡄࡀࡉ ࡄࡀࡅࡉࡍ ࡄࡉࡋࡁࡅࡍࡉࡀ ࡅࡔࡊࡉࡍࡀࡕࡀ ࡄࡀࡉ ࡄࡀࡅࡉࡀ ࡄࡀࡉࡋࡀ ࡄࡀࡉ ࡄࡀࡅࡉࡋࡇ ࡁࡅࡎࡌࡀࡍࡉࡀ ࡋࡀࡃࡀࡌ ࡄࡀࡉ ࡒࡀࡉࡌࡉࡁࡇ ࡓࡉࡄࡀࡍࡉࡀ ࡅࡁࡅࡎࡌࡀࡍࡉࡀ ࡌࡍ ࡄࡀࡋࡉࡍ ࡌࡉࡀ ࡎࡉࡀࡅࡉࡀ ࡋࡀࡃࡀࡌ ࡄࡀࡉ ࡄࡀࡅࡉࡋࡇ ࡆࡀࡅࡀ ࡄࡀࡉࡆࡉࡍ ࡌࡉࡔࡕࡉࡋ ࡀࡎࡀ ࡒࡀࡔࡉࡔࡀ ࡅࡓࡉࡄࡀࡍࡉࡀ ࡖ ࡄࡀࡉࡆࡉࡍ ࡌࡉࡔࡉࡕࡋࡉࡀ ࡌࡀࡓࡅࡀ ࡀࡔࡕࡀࡓࡂࡀࡍ ࡄࡀࡉࡆࡉࡍ ࡄࡀࡅࡉࡀ ࡄࡀࡊࡀ ࡒࡌࡀࡌࡉࡓ ࡆࡉࡅࡀ ࡄࡀࡉࡆࡉࡍ ࡄࡀࡊࡀ ࡍࡉࡔࡕࡀࡋ ࡐࡉࡒࡅࡍࡉࡀ ࡅࡉࡀࡓࡒࡅࡍࡉࡀ ࡅࡎࡀࡌࡀࡍࡉࡀ ࡅࡁࡀࡆࡓࡅࡍࡉࡀ ࡄࡀࡉࡆࡉࡍ ࡄࡀࡅࡉࡀ ࡌࡍ ࡄࡀࡋࡉࡍ ࡌࡉࡀ ࡎࡀࡅࡉࡀ ࡄࡀࡉ ࡄࡀࡅࡉࡀ ࡀࡓࡒࡀ ࡉࡀࡅࡍࡀࡉࡕࡀ ࡅࡄࡀࡅࡉࡍ ࡏࡅࡔࡍࡉࡀ ࡕࡀࡅࡓࡉࡀ ࡅࡐࡅࡃࡀࡍࡀ ࡄࡀࡉࡆࡉࡍ ࡌࡉࡕࡒࡉࡓࡉࡀ ࡄࡀࡉ ࡌࡉࡊࡉࡓࡁࡀ ࡀࡓࡒࡀ ࡅࡁࡀࡆࡉࡓࡀ ࡁࡀࡓࡒࡀ ࡄࡀࡉࡆࡉࡍ ࡍࡀࡐࡉࡋ ࡄࡀࡉ ࡀࡆࡋࡉࡍ ࡁࡍࡇ ࡖࡀࡃࡀࡌ ࡅࡁࡌࡀࡄࡅ ࡍࡉࡄࡅࡍ ࡍࡉࡄࡑࡅࡃࡅࡍࡇ ࡅࡁࡌࡀࡄࡅ ࡍࡉࡐࡉࡓࡊࡅࡍࡇ ࡅࡐࡉࡄࡕࡀ ࡀࡃࡀࡌ ࡍࡉࡔࡀࡅࡉࡀ ࡅࡍࡉࡊࡅࡋ ࡄࡀࡉ ࡄࡀࡅࡉࡀ ࡕࡀࡕࡀ ࡄࡉࡅࡀࡓࡕࡉࡀ ࡄࡀࡉ ࡔࡀࡐࡋࡀ ࡄࡀࡉ ࡆࡀࡒࡐࡀ ࡄࡀࡉ ࡁࡀࡈࡍࡀ ࡄࡀࡉ ࡉࡀࡃࡋࡀ ࡄࡀࡉ ࡌࡉࡕࡒࡉࡓࡉࡀ ࡂࡉࡓࡂࡋࡉࡀ ࡖࡍࡄࡅࡓࡀ ࡅࡋࡀࡃࡀࡌ ࡍࡉࡈࡄࡉࡍࡅࡋࡇ ࡅࡍࡉࡊࡅࡋ ࡄࡀࡉ ࡄࡀࡅࡉࡀ ࡓࡒࡉࡄࡀ ࡅࡑࡉࡐࡀࡓ ࡂࡀࡃࡐࡀ ࡄࡀࡉ ࡌࡉࡕࡒࡉࡓࡉࡀ ࡉࡀࡅࡍࡀ ࡄࡉࡅࡀࡓࡕࡉࡀ ࡅࡑࡀࡅࡕࡀ ࡋࡀࡃࡀࡌ ࡕࡉࡄࡅࡉࡀ ࡃࡄࡀࡆࡉࡍ ࡀࡌࡀࡓ ࡔࡉࡄࡋࡅࡍ ࡀࡎࡂࡉࡀ ࡀࡐࡕࡀࡄࡉࡋ ࡀࡕࡀ ࡀࡌࡀࡓࡋࡇ ࡀࡍࡀ ࡏࡉࡀࡌࡎࡉࡀ ࡋࡉࡌࡎࡅࡕࡀ ࡅࡀࡉࡀࡓ ࡍࡉࡍࡔࡉࡌ ࡏࡋࡇ ࡀࡍࡀ ࡏࡂࡉࡓࡐࡉࡍࡅࡍ ࡋࡌࡉࡀ ࡎࡉࡀࡅࡉࡀ ࡅࡄࡉࡁࡉࡋ ࡍࡉࡔࡀࡅࡉࡋࡅࡍ ࡌࡀࡔࡐࡉࡋࡀࡍࡀ ࡀࡍࡀ ࡏࡔࡀࡅࡉࡀ ࡀࡓࡒࡀ ࡅࡋࡁࡅࡔࡀ ࡌࡍ ࡏࡅࡓ ࡍࡀࡉࡕࡉࡀ ࡄࡉࡁࡉࡋ ࡅࡔࡉࡕࡉࡋ ࡍࡉࡍࡉࡂࡃࡅࡉࡀ ࡏࡋ ࡎࡓࡀࡃࡒࡀ ࡔࡉࡄࡋࡅࡍ ࡌࡋࡀ ࡓࡅࡂࡆࡀ ࡋࡉࡐࡕࡀࡄࡉࡋ ࡄࡁࡀࡈ ࡅࡀࡌࡀࡓࡋࡇ ࡁࡉࡔࡀ ࡁࡓ ࡁࡉࡔࡀ ࡀࡍࡀࡕ ࡖࡄࡉࡉࡀ ࡈࡀࡁࡅࡕࡀࡊ ࡋࡀࡋࡀࡂࡈࡉࡀ ࡌࡀࡍ ࡀࡍࡀࡕ ࡌࡍ ࡏࡅࡕࡓࡉࡀ ࡅࡌࡍ ࡂࡅࡁࡓࡉࡀ ࡖࡒࡀࡓࡉࡕ ࡀࡋࡌࡀ ࡗ ࡄࡀࡆࡉࡍ ࡀࡌࡀࡓ ࡔࡉࡄࡋࡅࡍ ࡐࡕࡀࡄࡉࡋ ࡁࡌࡉࡀ ࡎࡉࡀࡅࡉࡀ ࡍࡐࡀࡋ ࡂࡓࡀࡐ ࡌࡉࡀ ࡎࡉࡀࡅࡉࡀ ࡐࡕࡀࡄࡉࡋ ࡄࡉࡁࡉࡋ ࡅࡔࡉࡕࡉࡋ ࡌࡀࡔࡐࡉࡋࡀࡍࡀ ࡋࡌࡉࡀ ࡔࡀࡅࡉࡋࡅࡍ ࡂࡉࡓࡐࡇ ࡋࡀࡓࡒࡀ ࡖࡕࡉࡁࡉࡋ ࡗ ࡆࡀࡍ ࡌࡉࡀ ࡋࡀ ࡄࡅࡀࡁࡇ ࡀࡉࡀࡓ ࡌࡄࡀ ࡁࡂࡀࡍࡐࡇ ࡅࡀࡃࡒࡀࡉࡉࡌ ࡔࡉࡄࡋࡅࡍ ࡌࡉࡀࡁࡀࡔࡕࡀ ࡄࡅࡀࡕ ࡐࡕࡀࡄࡉࡋ ࡌࡄࡀ ࡏࡑࡈࡅࡍࡉࡀ ࡄࡉࡁࡉࡋ ࡀࡓࡒࡉࡄࡀ ࡍࡂࡀࡃ ࡔࡉࡕࡉࡋ ࡔࡀࡅࡉࡀ ࡂࡀࡓࡂࡋࡉࡀ ࡅࡀࡍࡅࡔ ࡂࡈࡀࡓࡁࡇ ࡌࡄࡀ ࡄࡉࡁࡉࡋ ࡒࡀࡋࡉࡀ ࡀࡎࡂࡉࡀ ࡉࡅࡎࡌࡉࡓ ࡅࡔࡉࡄࡓࡅࡍ ࡅࡁࡉࡄࡓࡅࡍ ࡍࡀࡍࡂࡀࡓࡉࡀ ࡄࡅࡍ ࡂࡉࡈࡓࡅࡉࡀ ࡋࡎࡐࡉࡍࡕࡀ ࡅࡔࡀࡅࡋࡇ ࡌࡄࡀࡓࡀ ࡅࡊࡅࡕࡋࡀ ࡄࡉࡁࡉࡋ ࡔࡀࡅࡉࡀ ࡁࡓ ࡌࡉࡑࡓࡉࡀ ࡅࡀࡕࡉࡀ ࡋࡉࡀࡓࡃࡍࡀ ࡅࡀࡄࡃࡓࡇ ࡀࡕࡅࡕࡉࡀ ࡀࡓࡒࡀ ࡖࡕࡉࡁࡉࡋ ࡅࡀࡅࡕࡉࡁ ࡊࡀࡉࡀࡋࡀ ࡅࡌࡉࡀ ࡊࡀࡋ ࡅࡔࡃࡀ ࡌࡉࡀ ࡄࡉࡉࡀ ࡗ ࡁࡌࡉࡀ ࡕࡀࡄࡌࡉࡀ ࡀࡋࡉࡅࡍ ࡅࡁࡀࡊࡉࡍ ࡌࡉࡀ ࡄࡉࡉࡀ ࡗ ࡁࡌࡉࡀ ࡕࡀࡄࡌࡉࡀ ࡀࡓࡁࡉࡍࡅࡍ ࡗ ࡀࡓࡁࡉࡍࡅࡍ ࡌࡉࡀ ࡄࡉࡉࡀ ࡁࡌࡉࡀ ࡕࡀࡄࡌࡉࡀ ࡄࡔࡅࡊࡀ ࡁࡍࡄࡅࡓࡀ ࡀࡓࡀࡁ ࡀࡕࡉࡅࡉࡀ ࡋࡉࡅࡔࡀࡌࡉࡍ ࡅࡀࡅࡕࡁࡅࡉࡀ ࡏࡋ ࡕࡉࡁࡉࡋ ࡅࡀࡌࡀࡓࡋࡇ ࡀࡄࡁࡀࡋࡀࡍ ࡁࡍࡀࡊ ࡖࡍࡉࡄࡉࡃࡓࡅࡍ ࡁࡕࡉࡁࡉࡋ ࡅࡍࡀࡅࡓࡅࡍࡇ ࡋࡄࡀࡆࡉࡍ ࡀࡋࡌࡀ ࡖࡍࡉࡔࡀࡅࡉࡀ ࡅࡍࡉࡕࡀࡒࡉࡍ ࡔࡅࡓࡁࡀࡕࡀ ࡖࡀࡍࡀࡕ ࡌࡍࡀࡕࡀ ࡕࡉࡎࡀࡁ ࡀࡕࡕࡉࡅࡉࡀ ࡋࡔࡀࡌࡉࡔ ࡅࡆࡉࡄࡓࡅࡍ ࡅࡀࡕࡉࡅࡉࡀ ࡋࡎࡉࡍ ࡓࡁࡀ ࡎࡀࡃࡓࡏࡉࡋ ࡅࡀࡉࡕࡉࡍࡅࡍ ࡅࡀࡒࡌࡅࡍࡅࡍ ࡋࡉࡀࡓࡃࡍࡀ ࡅࡀࡌࡀࡓࡋࡅࡍ ࡀࡍࡀࡕࡅࡍ ࡄࡅࡍ ࡌࡀࡃࡍࡀࡄࡀ ࡁࡕࡉࡁࡉࡋ ࡁࡏࡅࡌࡀࡌࡀ ࡅࡊࡖ ࡊࡀࡎࡉࡍ ࡀࡍࡀࡕ ࡎࡉࡍ ࡍࡀࡃ ࡍࡉࡄࡅࡉࡀ ࡁࡋࡉࡋࡉࡀ ࡖࡋࡀࡎࡀࡋࡉࡒ ࡕࡉࡂࡓࡀ ࡖࡀࡓࡒࡀ ࡅࡕࡉࡂࡓࡀ ࡖ ࡏࡔࡅࡌࡉࡀ ࡅࡌࡉࡔࡕࡀࡋࡈࡉࡀ ࡎࡀࡄࡓࡉࡀ ࡏࡋ ࡀࡃࡀࡌ ࡅࡆࡀࡅࡇ ࡅࡒࡀࡁࡉࡋ ࡔࡀࡌࡉࡔ ࡁࡏࡅࡌࡀࡌࡀ ࡅࡎࡉࡍ ࡒࡀࡁࡋࡅࡉࡀ ࡁࡋࡉࡋࡉࡀ ࡀࡕࡅࡉࡀ ࡏࡋ ࡋࡉࡁࡀࡕ ࡓࡀࡁࡕࡉࡀ ࡅࡏࡋ ࡁࡉࡋ ࡓࡁࡀ ࡅࡏࡋ ࡊࡉࡅࡀࡍ ࡓࡁࡀ ࡅࡏࡋ ࡍࡉࡓࡉࡂ ࡓࡁࡀ ࡅࡔࡀࡅࡋࡇ ࡎࡐࡉࡍࡕࡀ ࡅࡀࡕࡉࡅࡉࡀ ࡋࡄࡀࡅࡀ ࡑࡈࡀࡓࡕࡉࡀ ࡅࡌࡍࡀࡕࡀ ࡉࡀࡄࡁࡅࡋࡇ ࡅࡔࡀࡅࡉࡅࡉࡀ ࡌࡒࡀࡁࡋࡀࡍࡀ ࡖࡕࡉࡁࡉࡋ ࡒࡀࡁࡋࡅࡉࡀ ࡁࡍࡇ ࡖࡉࡅࡔࡀࡌࡉࡍ ࡕࡌࡀࡍࡀࡍ ࡔࡍࡉࡀ ࡄࡀࡉࡆࡀࡊ ࡋࡀࡑࡁࡅ ࡁࡍࡇ ࡖࡉࡅࡔࡀࡌࡉࡍ ࡀࡕࡅࡍࡅࡍ ࡏࡋ ࡔࡉࡁࡉࡀࡄࡉࡀ ࡊࡅࡋ ࡄࡀࡃ ࡄࡀࡃ ࡁࡒࡀࡁࡀࡋࡕࡀ ࡒࡀࡁࡋࡅࡉࡀ ࡅࡌࡔࡀࡁࡉࡍ ࡄࡉࡉࡀ ࡎࡀ ࡒࡀࡋࡀ ࡌࡍ ࡌࡓࡅࡌࡀ ࡒࡓࡀࡋࡀࡍ ࡁࡄࡀࡃ ࡌࡀࡍࡀ ࡔࡀࡃࡀࡓࡋࡀࡍ ࡌࡀࡍࡀ ࡔࡀࡃࡀࡓࡋࡀࡍ ࡌࡉࡍࡇ ࡖࡃࡀࡅࡓࡀ ࡕࡀࡒࡍࡀ ࡌࡀࡎࡂࡉࡀ ࡅࡀࡕࡉࡀ ࡌࡀࡍࡀ ࡋࡉࡀࡃࡇ ࡅࡏࡋ ࡎࡀࡁࡓࡇ ࡅࡏࡋ ࡉࡀࡃࡉࡀ ࡖ ࡉࡀࡃࡅࡉࡀ ࡋࡌࡀࡍࡀ ࡍࡐࡀࡑ ࡄࡉࡅࡀࡓࡀ ࡋࡁࡅࡔ ࡍࡐࡀࡑ ࡋࡁࡅࡔ ࡄࡉࡅࡀࡓࡀ ࡅࡕࡓࡀࡑ ࡊࡋࡉࡋࡉࡀ ࡓࡀࡅࡆࡉࡀ ࡕࡓࡀࡑ ࡁࡓࡉࡔࡀࡉࡄࡅࡍ ࡅࡀࡋࡀࡍࡐࡇ ࡖࡌࡀࡍࡀ ࡍࡀࡐࡒࡉࡀ ࡊࡀࡁࡔࡉࡀ ࡅࡎࡀࡂࡃࡉࡀ ࡒࡅࡃࡀࡌࡇ ࡅࡌࡀࡄࡕࡉࡀ ࡒࡅࡌࡕࡀࡉࡄࡅࡍ ࡀࡌࡓࡉࡋࡇ ࡌࡍࡀ ࡎࡉࡍࡃࡉࡓࡊࡀࡊ ࡌࡍ ࡔࡉࡓࡔࡀࡊ ࡅࡎࡉࡍࡃࡉࡓࡊࡀࡊ ࡌࡍࡀ ࡍࡀࡑࡁࡀࡊ ࡖࡍࡉࡑࡁࡀࡊ ࡌࡀࡋࡉࡋ ࡌࡀࡍࡀ ࡍࡉࡄࡀ ࡅࡏࡋ ࡄࡉࡍࡅࡍ ࡉࡀࡃࡉࡀ ࡖࡍࡉࡌࡀࡓࡋࡅࡍ ࡀࡍࡀ ࡔࡀࡓࡔࡀࡉ ࡌࡍ ࡄࡉࡉࡀ ࡅࡎࡉࡍࡃࡉࡓࡊࡀࡉ ࡌࡍ ࡀࡕࡀࡓ ࡍࡄࡅࡓ ࡂࡅࡁࡓࡉࡀ ࡖࡒࡉࡓࡉࡅࡉࡀ ࡋࡉࡋࡁࡅࡔࡉࡀ ࡌࡀࡍࡀ ࡌࡍ ࡃࡀࡅࡓࡀ ࡕࡀࡒࡍࡀ ࡁࡍࡀࡉ ࡌࡉࡒࡓࡀ ࡒࡓࡅࡍ ࡅࡏࡕࡉࡁ ࡋࡉࡀࡅࡓࡉࡀ ࡋࡄࡀࡆࡉࡍ ࡀࡋࡌࡀ ࡈࡅࡁࡇ ࡖࡍࡉࡔࡌࡀ ࡔࡅࡌࡀࡉ ࡅࡍࡀࡎࡂࡉࡀ ࡁࡃࡉࡓࡊࡀࡉ ࡖࡔࡅࡌࡀ ࡖࡌࡀࡍࡃࡀ ࡖࡄࡉࡉࡀ ࡔࡀࡌࡀ ࡄࡀࡆࡉࡋࡅࡍ ࡋࡄࡉࡉࡀ ࡓࡅࡓࡁࡉࡀ ࡖࡔࡅࡕࡀ ࡖࡌࡀࡍࡃࡀ ࡖࡄࡉࡉࡀ ࡋࡀࡔࡀࡌࡀ ࡍࡀࡐࡉࡋ ࡁࡍࡅࡓࡀ ࡖࡉࡀࡒࡃࡀ ࡅࡄࡀࡅࡉࡀ ࡌࡃࡅࡓࡕࡇ ࡀࡋࡌࡀ ࡋࡉࡅࡌࡀ ࡓࡁࡀ ࡖࡃࡉࡍࡀ ࡖࡀࡍࡀ ࡄࡀࡅࡉࡍࡀ ࡏࡋࡇ ࡎࡀࡄࡃࡀ ࡄࡅࡉࡕ ࡊࡀࡋࡅࡆࡀ ࡖࡒࡓࡉࡋࡇ ࡁࡏࡅࡃࡍࡇ ࡅࡋࡀࡔࡌࡀ ࡒࡓࡉࡋࡇ ࡅࡋࡀࡔࡌࡀ ࡁࡏࡅࡃࡍࡇ ࡄࡀࡅࡉࡕࡇ ࡁࡀࡉࡍࡇ ࡅࡋࡀࡄࡆࡀ ࡄࡀࡅࡉࡕࡇ ࡅࡋࡀࡄࡆࡀ ࡁࡀࡉࡍࡇ ࡅࡄࡉࡉࡀ ࡆࡀࡊࡉࡍ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡋࡄࡀࡆࡉࡍ ࡀࡋࡌࡀ ࡀࡎࡂࡉࡕ ࡋࡌࡉࡍࡑࡀࡁ ࡖࡄࡉࡉࡀ ࡍࡉࡑࡅࡁࡕࡀ ࡍࡉࡑࡅࡁࡕࡀ ࡖࡄࡉࡉࡀ ࡋࡌࡉࡍࡑࡀࡁ ࡅࡋࡌࡉࡍࡂࡀࡃ ࡉࡀࡓࡃࡍࡉࡀ ࡌࡍ ࡓࡉࡔ ࡁࡓࡉࡔ ࡀࡕࡉࡅࡉࡀ ࡌࡍ ࡄࡉࡉࡀ ࡖࡌࡍ ࡄࡉࡉࡀ ࡄࡅࡍ ࡀࡉࡕࡅࡍ ࡌࡉࡀ ࡄࡉࡉࡀ ࡋࡌࡉࡕࡓࡀࡑ ࡁࡂࡀࡅࡀࡉࡄࡅࡍ ࡉࡀࡓࡃࡍࡉࡀ ࡋࡌࡉࡁࡉࡀ ࡁࡅࡕࡀ ࡖࡓࡁࡉࡀ ࡅࡌࡉࡔࡕࡀࡋ ࡔࡉࡕࡋࡉࡀ ࡓࡀࡅࡆࡉࡀ ࡋࡌࡉࡔࡕࡀࡋ ࡅࡌࡀࡔࡒࡉࡍࡅࡍ ࡌࡉࡀ ࡄࡉࡉࡀ ࡅࡌࡀࡔࡌࡉࡍࡅࡍ ࡔࡅࡕࡀ ࡖࡓࡁࡉࡀ ࡅࡌࡀࡋࡀࡋࡀ ࡖࡄࡉࡉࡀ ࡀࡌࡀࡓࡋࡉࡀ ࡌࡀࡋࡐࡉࡍࡀࡋࡅࡍ ࡕࡅࡔࡁࡉࡄࡕࡀ ࡅࡍࡉࡒࡌࡅࡍ ࡅࡍࡉࡔࡀࡁࡅࡍ ࡋࡓࡅࡓࡁࡉࡀ ࡋࡓࡅࡓࡁࡉࡀ ࡅࡁࡅࡓࡉࡀ ࡖࡄࡉࡆࡉࡅࡍ ࡄࡉࡍࡅࡍ ࡀࡋࡀࡍࡐࡀࡉ ࡍࡀࡐࡒࡉࡀ ࡍࡀࡐࡒࡉࡀ ࡓࡅࡓࡁࡉࡀ ࡅࡁࡅࡓࡉࡀ ࡖࡄࡉࡍࡅࡍ ࡄࡉࡍࡂࡉࡀ ࡋࡀࡂࡈࡉࡀ ࡋࡀࡂࡈࡉࡀ ࡄࡉࡍࡂࡉࡀ ࡅࡁࡉࡄࡃࡀࡃࡉࡀ ࡌࡉࡕࡌࡉࡋࡊࡉࡀ ࡌࡉࡕࡌࡉࡋࡊࡉࡀ ࡁࡉࡄࡃࡀࡃࡉࡀ ࡅࡏࡋࡀࡉ ࡋࡁࡉࡔ ࡌࡉࡕࡄࡀࡔࡁࡉࡀ ࡀࡌࡓࡉࡀ ࡒࡅࡌ ࡍࡀࡎࡂࡉࡀ ࡅࡍࡉࡔࡀࡉࡉࡋࡇ ࡋࡃࡀࡅࡓࡇ ࡍࡉࡔࡀࡉࡋࡇ ࡅࡍࡉࡌࡀࡓࡋࡇ ࡏࡋ ࡃࡅࡊࡕࡀ ࡖࡌࡉࡍࡇ ࡄࡅࡀ ࡍࡉࡔࡀࡉࡋࡇ ࡅࡍࡉࡌࡀࡓࡋࡇ ࡄࡀࡆࡉࡍ ࡆࡉࡅࡀ ࡌࡀࡍ ࡀࡋࡁࡔࡀࡊ ࡌࡀࡍ ࡀࡋࡁࡔࡀࡊ ࡄࡀࡆࡉࡍ ࡆࡉࡅࡀ ࡖࡄࡀࡆࡉࡍ ࡃࡌࡅࡕࡀࡊ ࡔࡀࡍࡉࡀ ࡄࡀࡆࡉࡍ ࡔࡀࡍࡉࡀ ࡃࡌࡅࡕࡀࡊ ࡅࡁࡀࡉࡀࡓ ࡆࡉࡅࡀࡊ ࡏࡋ ࡀࡋࡌࡉࡀ ࡄࡀࡆࡉࡍ ࡁࡀࡉࡀࡓ ࡆࡉࡅࡀࡊ ࡅࡄࡋࡉࡀ ࡑࡀࡅࡕࡀࡊ ࡏࡋ ࡀࡋࡌࡉࡀ ࡌࡀࡋࡉࡋ ࡖࡍࡉࡌࡀࡓࡋࡅࡍ ࡀࡋࡓࡅࡓࡁࡉࡀ ࡖࡃࡀࡉࡓࡉࡀ ࡔࡅࡁࡀ ࡌࡀࡋࡀࡋࡉࡕ ࡖࡏࡌࡀࡓࡋࡅࡍ ࡋࡔࡅࡁࡀ ࡁࡍࡇ ࡖࡃࡀࡅࡓࡀ ࡁࡀࡈࡋࡀ ࡓࡁࡀ ࡀࡍࡀ ࡁࡓ ࡓࡁࡉࡀ ࡖࡁࡄࡀࡉࡋࡀࡉࡄࡅࡍ ࡖࡓࡁࡉࡀ ࡀࡎࡂࡉࡕ ࡋࡊࡀ ࡏࡕࡉࡕ ࡖࡏࡒࡓࡉࡀ ࡒࡀࡋࡀ ࡖࡄࡉࡉࡀ ࡅࡀࡉࡅࡓࡉࡀ ࡖࡄࡉࡉࡀ ࡔࡅࡓࡁࡕࡀ ࡌࡉࡔࡕࡀࡋ ࡔࡉࡕࡋࡉࡀ ࡖࡊࡔࡉࡓࡉࡀ ࡅࡌࡉࡍࡑࡀࡁ ࡖࡓࡁࡉࡀ ࡍࡉࡑࡅࡁࡕࡀ ࡌࡉࡍࡑࡀࡁ ࡅࡌࡀࡐࡓࡉࡔࡉࡍࡅࡍ ࡋࡈࡀࡁࡅࡕࡀ ࡌࡀࡋࡐࡉࡍࡅࡍ ࡁࡅࡕࡀ ࡅࡕࡅࡔࡁࡉࡄࡕࡀ ࡖࡍࡉࡒࡌࡅࡍ ࡅࡍࡉࡔࡀࡁࡅࡍ ࡋࡓࡅࡓࡁࡉࡀ ࡍࡉࡔࡀࡁࡅࡍ ࡋࡉࡅࡊࡀࡁࡀࡓ ࡆࡉࡅࡀ ࡂࡀࡁࡓࡀ ࡖࡄࡀࡅࡉࡀ ࡁࡀࡄࡉࡃ ࡏࡃࡀ ࡁࡀࡄࡉࡃ ࡏࡃࡀ ࡄࡀࡅࡉࡀ ࡌࡍ ࡀࡕࡀࡓ ࡄࡔࡅࡊࡀ ࡋࡀࡕࡀࡓ ࡍࡄࡅࡓ ࡅࡄࡉࡉࡀ ࡆࡀࡊࡏࡉࡍ ࡎࡀ ࡁࡀࡍࡀࡍ ࡆࡉࡅࡀ ࡉࡀࡕࡉࡁࡍࡀ ࡌࡍ ࡁࡉࡕ ࡄࡉࡉࡀ ࡀࡎࡂࡉࡕ ࡋࡊࡀ ࡌࡀࡎࡂࡉࡍࡀ ࡅࡀࡕࡉࡍࡀ ࡀࡋࡌࡀ ࡋࡃࡅࡓ ࡁࡉࡔࡉࡀ ࡔࡅࡁࡀ ࡃࡌࡅࡕࡀ ࡀࡕࡉࡕ ࡅࡀࡔࡊࡉࡕࡉࡍࡅࡍ ࡊࡅࡋࡄࡅࡍ ࡁࡌࡀࡋࡉࡀ ࡉࡀࡕࡁࡉࡀ ࡊࡅࡋࡄࡅࡍ ࡉࡀࡕࡁࡉࡀ ࡁࡌࡀࡋࡉࡀ ࡅࡀࡐࡓࡀ ࡁࡓࡉࡔ ࡓࡅࡄࡀ ࡓࡌࡅࡍ ࡀࡐࡓࡀ ࡓࡌࡅࡍ ࡁࡓࡉࡔ ࡓࡅࡄࡀ ࡅࡑࡁࡅ ࡖࡋࡀࡔࡀࡐࡉࡓ ࡀࡁࡃࡉࡀ ࡌࡉࡔࡕࡀࡉࡉࡍ ࡁࡔࡅࡕࡀ ࡖࡏࡅࡋࡀ ࡀࡌࡓࡉࡀ ࡁࡌࡀࡋࡀࡋࡉࡀ ࡖ ࡔࡉࡄࡀ ࡁࡌࡀࡋࡀࡋࡀ ࡔࡉࡄࡀ ࡀࡕࡅࡀࡉࡀ ࡖࡍࡉࡃࡀࡌࡉࡀ ࡁࡀࡃࡌࡅ ࡊࡀࡃࡁࡀ ࡖࡍࡉࡒࡅࡌ ࡅࡍࡉࡔࡀࡅࡉࡀ ࡓࡉࡔࡀ ࡓࡉࡔࡀ [ࡍࡉࡔࡀࡅࡉࡀ] ࡅࡍࡉࡐࡋࡅࡂ ࡐࡉࡓࡉࡀ ࡁࡀࡋࡌࡀ ࡐࡉࡓࡉࡀ ࡁࡀࡋࡌࡀ ࡍࡉࡐࡋࡅࡂ ࡅࡍࡉࡒࡓࡉࡀ ࡒࡀࡋࡀ ࡁࡀࡈࡋࡀ ࡍࡉࡒࡓࡉࡀ ࡁࡀࡃࡌࡅ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡍࡉࡒࡓࡉࡋࡅࡍ ࡋࡎࡂࡀࡃࡀࡊ ࡅࡍࡀࡔࡌࡉࡍࡅࡍ ࡅࡍࡉࡌࡋࡉࡍࡅࡍ ࡄࡀࡓࡂࡕࡀ ࡅࡍࡉࡕࡉࡁ ࡅࡍࡀࡋࡐࡉࡍࡅࡍ ࡅࡍࡉࡌࡀࡓࡋࡅࡍ ࡖࡀࡋࡌࡀ ࡕࡉࡔࡉࡁࡒࡅࡍ ࡌࡀࡋࡀࡋࡀࡍ ࡀࡋࡌࡀ ࡌࡀࡋࡀࡋࡀࡍ ࡕࡉࡔࡉࡁࡒࡅࡍ ࡅࡀࡋࡌࡀ ࡖࡕࡉࡔࡀࡍࡅࡍ ࡌࡉࡌࡓࡀࡍ ࡍࡉࡕࡉࡁ ࡅࡍࡉࡌࡀࡓࡋࡅࡍ ࡌࡍ ࡒࡅࡃࡀࡌ ࡖࡂࡀࡁࡓࡀ ࡍࡅࡊࡓࡀࡉࡀ ࡍࡀࡎࡂࡉࡀ ࡋࡊࡀ ࡀࡍࡀ ࡄࡆࡉࡕࡉࡍࡅࡍ ࡀࡎࡁࡉࡓࡉࡕ ࡅࡂࡉࡄࡊࡉࡕ ࡋࡊࡅࡋࡄࡅࡍ ࡁࡀࡓࡉࡕ ࡁࡆࡉࡅࡀࡉ ࡖࡍࡐࡉࡔ ࡖࡏࡕࡀࡄࡆࡉࡋࡅࡍ ࡋࡀࡋࡌࡉࡀ ࡀࡋࡌࡀ ࡖࡄࡉࡆࡉࡅࡍ ࡃࡄࡉࡋ ࡅࡏࡔࡕࡀࡓࡄࡉࡆࡀࡕ ࡀࡋࡀࡄࡅࡕࡀ ࡖࡁࡀࡉࡕࡀ ࡓࡅࡄࡀ ࡍࡉࡐࡋࡀࡕ ࡌࡍ ࡊࡅࡓࡎࡉࡇ ࡅࡊࡅࡋࡄࡅࡍ ࡌࡀࡋࡉࡀ ࡏࡕࡁࡀࡃࡀࡓ ࡔࡅࡁࡀ ࡓࡀࡆ ࡋࡁࡅࡔࡀࡉࡄࡅࡍ ࡅࡋࡀ ࡏࡍࡉࡔࡉࡅࡍ ࡌࡀ ࡖࡀࡁࡃࡉࡀ ࡊࡅࡋࡄࡅࡍ ࡊࡀࡁࡔࡉࡀ ࡓࡉࡔࡀࡉࡄࡅࡍ ࡅࡏࡎࡕࡀࡄࡀࡐ ࡏࡋ ࡀࡍࡐࡀࡉࡄࡅࡍ ࡍࡐࡉࡋ ࡏࡎࡕࡀࡄࡀࡐ ࡍࡐࡀࡋ ࡏࡋ ࡀࡍࡐࡀࡉࡄࡅࡍ ࡔࡒࡀࡋ ࡅࡀࡌࡓࡉࡀ ࡌࡀࡓࡀࡍ ࡄࡈࡉࡍ ࡄࡈࡀࡉࡍࡉࡍ ࡄࡀࡈࡀࡉࡀࡍ ࡕࡉࡔࡁࡅࡒࡋࡀࡍ ࡀࡍࡀ ࡌࡀ ࡖࡌࡆࡀࡓࡀࡆࡍࡀ ࡅࡌࡉࡄࡕࡉࡓࡍࡀ ࡏࡋ ࡀࡋࡌࡉࡀ ࡌࡀࡋࡀࡋࡉࡕ ࡅࡏࡌࡀࡓࡋࡅࡍ ࡋࡁࡅࡔࡀ ࡁࡍࡇ ࡖࡃࡀࡅࡓࡀ ࡁࡀࡈࡋࡀ ࡀࡍࡀ ࡗ ࡀࡕࡉࡕ ࡖࡏࡁࡀࡃ ࡋࡄࡀࡊࡀ ࡑࡁࡅ ࡓࡁࡉࡀ ࡔࡉࡄࡋࡅࡍ ࡖࡏࡕࡉࡕ ࡖࡏࡁࡀࡃ ࡈࡀࡁࡅࡕࡀ ࡈࡀࡁࡅࡕࡀ ࡏࡁࡀࡃ ࡅࡔࡀࡓࡉࡀ ࡈࡀࡁࡅ ࡋࡓࡀࡄࡌࡀࡉ ࡏࡉࡀࡐࡓࡉࡔࡉࡍࡅࡍ ࡏࡋ ࡌࡀࡌࡋࡀࡋࡊࡅࡍ ࡖࡏࡅࡋࡀ ࡖࡍࡄࡅࡓࡀ ࡋࡉࡕࡁࡇ ࡏࡉࡀࡐࡓࡉࡔࡉࡍࡅࡍ ࡏࡋ ࡔࡅࡕࡀࡉࡊࡅࡍ ࡏࡃࡉࡋࡌࡀ ࡌࡀࡌࡋࡀࡋࡊࡅࡍ ࡍࡉࡑࡉࡕࡅࡍ ࡌࡀ ࡖࡍࡉࡑࡉࡕࡅࡍ ࡌࡀࡌࡋࡀࡋࡊࡅࡍ ࡅࡌࡀ ࡍࡉࡊࡀࡕࡓࡅࡍ ࡁࡀࡋࡌࡀࡉࡊࡅࡍ ࡁࡄࡉࡓࡀࡉ ࡌࡉࡔࡌࡀ ࡖࡔࡅࡌࡀࡍ ࡊࡅࡋࡄࡅࡍ ࡈࡀࡁࡉࡀ ࡄࡅࡍ ࡊࡅࡋࡄࡅࡍ ࡄࡅࡍ ࡈࡀࡁࡉࡀ ࡅࡀࡆࡁࡀࡓ ࡀࡍࡐࡀࡉࡄࡅࡍ ࡋࡀࡕࡀࡓ ࡍࡄࡅࡓ ࡅࡄࡉࡉࡀ ࡆࡀࡊࡏࡉࡍ ࡎࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡋࡄࡉࡋ ࡁࡐࡉࡓࡉࡀ ࡖࡆࡉࡅࡀ ࡁࡕࡀࡓࡁࡀࡑࡉࡀ ࡖࡍࡄࡅࡓࡀ ࡁࡉࡕ ࡕࡅࡔࡋࡉࡌࡀ ࡁࡂࡀࡅࡉࡊ ࡂࡉࡍࡀࡕ ࡀࡉࡀࡓ ࡁࡉࡍࡕࡀ ࡁࡂࡀࡅࡉࡊ ࡂࡉࡍࡀࡕ ࡀࡃࡀࡌ ࡊࡀࡋࡅࡆࡀ ࡌࡉࡒࡓࡉࡀ ࡖࡄࡉࡉࡀ ࡌࡉࡍࡃࡀࡌ ࡖࡓࡁࡉࡀ ࡀࡌࡓࡉࡀ ࡌࡉࡕࡋࡉࡀ ࡌࡉࡕࡋࡉࡀ ࡁࡏࡒࡀࡓࡀ ࡀࡌࡓࡉࡀ ࡌࡉࡍࡉࡋࡉࡀ ࡁࡏࡒࡀࡓࡀ ࡀࡌࡓࡉࡀ ࡌࡉࡍࡉࡋࡉࡀ ࡖࡊࡀࡋࡅࡆࡀ ࡀࡌࡓࡉࡀ ࡅࡌࡂࡀࡋࡀࡋࡉࡀ ࡓࡀࡆࡉࡀ ࡀࡁࡉࡍࡉࡀ ࡀࡁࡀ ࡋࡁࡓࡀ ࡄࡅࡍ ࡀࡃࡋࡀ ࡍࡉࡄࡅࡉࡀ ࡄࡀࡆࡉࡍ ࡃࡀࡅࡓࡀ ࡀࡃࡋࡀ ࡍࡉࡄࡅࡉࡀ ࡄࡀࡆࡉࡍ ࡄࡅࡀ