Sidra ḏ-Nišmata سیدرا د-نیشماثا

Sidra ḏ-Nišmata

Transliterated by: Majid Fandi Al-Mubaraki, Brian Mubaraki 2000

Source: Sidra d Nišmata, ‘niania and Qabin – English Transliteration.

Unicode by: Ibrāhīm Šafiʿī (University of Tehrān)

 

ࡃࡓࡀࡔࡀ ࡖ ࡉࡀࡄࡉࡀ

 

ࡌࡀࡓࡀࡉ ࡌࡔࡀࡁࡀ

 ࡊࡅࡔࡈࡀ ࡀࡎࡉࡍࡊࡅࡍ ࡄࡀࡆࡉࡍ ࡎࡉࡃࡓࡀ ࡖ ࡍࡉࡔࡌࡀࡕࡀ

 ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡒࡀࡃࡌࡀࡉࡉࡀ ࡍࡅࡊࡓࡀࡉࡉࡀ ࡌࡍ ࡀࡋࡌࡉࡀ ࡖ ࡍࡄࡅࡓࡀ ࡉࡀࡕࡉࡓࡉࡀ ࡖ ࡏࡋࡀࡅࡉࡀ ࡅࡊࡅࡋࡄࡅࡍ ࡏࡅࡁࡀࡃࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡅࡄࡀࡉࡋࡀ ࡅࡔࡓࡀࡓࡀ ࡅࡏࡌࡓࡀ ࡅࡔࡉࡌࡀ ࡅࡄࡀࡃࡅࡀࡕ ࡋࡉࡁࡀ ࡅࡔࡀࡁࡉࡒ ࡄࡀࡈࡀࡉࡉࡀ ࡍࡉࡄࡅࡉࡋࡉࡀ ࡋࡃࡉࡋࡉࡀ ࡁࡄࡀࡉࡋࡇ ࡖ ࡉࡀࡅࡀࡓ ࡆࡉࡅࡀ ࡅࡎࡉࡌࡀࡕ ࡄࡉࡉࡀ ࡎࡀ

1. ࡁࡔࡅࡌࡀ ࡖ ࡄࡉࡉࡀ ࡅࡁࡔࡅࡌࡇ ࡖ ࡌࡀࡍࡃࡀ ࡖ ࡄࡉࡉࡀ ࡅࡁࡔࡅࡌࡇ ࡖ ࡄࡀࡄࡅ ࡂࡀࡁࡓࡀ ࡒࡀࡃࡌࡀࡉࡀ ࡖ ࡒࡀࡔࡉࡔ ࡌࡍ ࡒࡅࡃࡀࡌ ࡌࡉࡀ ࡅࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡂࡀࡁࡓࡀ ࡖ ࡒࡓࡀ ࡁࡒࡀࡋࡇ ࡅࡌࡀࡋࡉࡋ ࡁࡌࡀࡋࡀࡋࡇ ࡌࡍ ࡒࡀࡋࡇ ࡅࡌࡀࡋࡀࡋࡇ ࡐࡓࡅࡍ ࡄࡅࡍ ࡂࡅࡐࡍࡉࡀ ࡅࡏࡕࡒࡀࡉࡀࡌ ࡄࡉࡉࡀ ࡒࡀࡃࡌࡀࡉࡉࡀ ࡁࡔࡊࡉࡍࡀࡕࡅࡍ ࡌࡀࡋࡉࡋ ࡅࡀࡌࡀࡓ ࡒࡀࡔࡉࡔࡉࡀ ࡄࡉࡉࡀ ࡒࡀࡃࡌࡀࡉࡉࡀ ࡌࡍ ࡄࡉࡉࡀ ࡕࡉࡍࡉࡀࡍࡉࡀ ࡔࡉࡕࡀ ࡀࡋࡐࡉࡀ ࡓࡅࡁࡀࡍ ࡔࡍࡉࡀ ࡅࡒࡀࡔࡉࡔࡉࡀ ࡄࡉࡉࡀ ࡕࡉࡍࡉࡀࡍࡉࡀ ࡌࡍ ࡄࡉࡉࡀ ࡕࡋࡉࡕࡀࡉࡉࡀ ࡔࡉࡕࡀ ࡀࡋࡐࡉࡀ ࡓࡅࡁࡀࡍ ࡔࡍࡉࡀ ࡅࡒࡀࡔࡉࡔࡉࡀ ࡄࡉࡉࡀ ࡕࡋࡉࡕࡀࡉࡉࡀ ࡌࡍ ࡄࡃࡀ ࡏࡅࡕࡓࡀ ࡔࡉࡕࡀ ࡀࡋࡐࡉࡀ ࡓࡅࡁࡀࡍ ࡔࡍࡉࡀ ࡅࡒࡀࡔࡉࡔ ࡄࡃࡀ ࡏࡅࡕࡓࡀ ࡌࡍ ࡊࡅࡋࡇ ࡖ ࡕࡉࡁࡉࡋ ࡅࡌࡍ ࡔࡅࡁࡀ ࡌࡀࡓࡇ ࡖ ࡁࡀࡉࡕࡀ ࡔࡀࡁࡉࡌࡀ ࡅࡔࡅࡁࡉࡍ ࡀࡋࡐࡉࡀ ࡓࡅࡁࡀࡍ ࡔࡍࡉࡀ ࡏࡊࡀ ࡖ ࡋࡉࡕࡋࡇ ࡎࡀࡊࡀ ࡅࡄࡀࡉࡆࡀࡊ ࡋࡀࡄࡅࡀࡕ ࡀࡓࡒࡀ ࡖ ࡌࡎࡅࡕࡀ ࡅࡋࡀࡄࡅࡍ ࡃࡀࡉࡀࡓࡉࡀ ࡖ ࡁࡂࡀࡅࡀࡉࡄࡅࡍ ࡌࡉࡀ ࡎࡉࡀࡅࡉࡀ ࡌࡉࡍࡀࡉࡄࡅࡍ ࡅࡌࡍ ࡄࡀࡍࡀࡕࡅࡍ ࡌࡉࡀ ࡎࡉࡀࡅࡉࡀ ࡂࡉࡁࡋࡀࡕ ࡅࡍࡉࡐࡒࡀࡕ ࡁࡉࡔࡅࡕࡀ ࡄࡃࡀ ࡖ ࡄࡅࡍ ࡌࡉࡍࡀ ࡀࡋࡉࡐ ࡀࡋࡉࡐ ࡓࡀࡆࡉࡀ ࡅࡓࡅࡁࡀࡍ ࡓࡅࡁࡀࡍ ࡔࡉࡁࡉࡀࡄࡉࡀ ࡁࡓࡀࡆࡀࡉࡄࡅࡍ ࡖ ࡍࡀࡐࡔࡀࡉࡄࡅࡍ ࡀࡓࡂࡀࡆ ࡔࡅࡁࡀ ࡀࡋࡀࡍࡐࡀࡉ ࡅࡕࡓࡀࡂࡀࡆ ࡅࡀࡌࡓࡉࡀ ࡂࡀࡁࡓࡀ ࡖ ࡀࡎࡂࡉࡀ ࡅࡀࡕࡀ ࡋࡅࡀࡕࡀࡉࡀࡍ ࡊࡋࡉࡋࡀ ࡁࡓࡔࡉࡇ ࡋࡀࡂࡈࡀࡓ ࡅࡄࡀࡉࡆࡀࡊ ࡀࡍࡀ ࡀࡆࡁࡓࡉࡕ ࡀࡍࡐࡀࡉ ࡋࡅࡀࡕ ࡒࡀࡓࡉࡀ ࡖ ࡒࡓࡀࡍ ࡌࡀࡓࡀ ࡖ ࡓࡀࡁࡅࡕࡀ ࡏࡋࡀࡉࡕࡀ ࡅࡀࡌࡀࡓࡍࡀࡋࡇ ࡏࡉࡍ ࡒࡀࡓࡉࡀ ࡖ ࡒࡓࡀࡍ ࡌࡀࡓࡀ ࡖ ࡓࡀࡁࡅࡕࡀ ࡏࡋࡀࡉࡕࡀ ࡏࡆࡋࡉࡕ ࡔࡅࡁࡀ ࡀࡓࡂࡀࡆ ࡀࡋࡀࡍࡐࡀࡉ ࡅࡕࡓࡀࡂࡀࡆ ࡅࡀࡌࡓࡉࡀ ࡂࡀࡁࡓࡀ ࡖ ࡀࡎࡂࡉࡀ ࡅࡀࡕࡀ ࡋࡅࡀࡕࡀࡉࡀࡍ ࡊࡋࡉࡋࡀ ࡁࡓࡉࡔࡉࡇ ࡋࡀࡂࡈࡀࡓ ࡅࡄࡀࡉࡆࡀࡊ ࡄࡀࡄࡅ ࡌࡀࡓࡀ ࡖ ࡓࡀࡁࡅࡕࡀ ࡏࡋࡀࡉࡕࡀ ࡍࡎࡉࡁ ࡊࡋࡉࡋࡀ ࡖ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡅࡁࡓࡉࡔࡀࡉ ࡕࡓࡀࡑࡋࡉࡀ ࡅࡀࡎࡉࡌ ࡏࡋࡀࡉ ࡏࡃࡀ ࡖ ࡊࡅࡔࡈࡀ ࡅࡉࡀࡌࡉࡍࡀ ࡓࡀࡁࡕࡉࡀ ࡖ ࡀࡎࡀࡅࡀࡕࡀ ࡅࡀࡌࡀࡓ ࡕࡉࡔࡓࡉࡀ ࡏࡋࡀࡊ ࡌࡍ ࡃࡌࡅࡕࡇ ࡖ ࡎࡀࡌ ࡂࡅࡐࡀࡍ ࡅࡎࡀࡌ ࡂࡅࡐࡀࡉࡀࡍ ࡅࡎࡀࡌ ࡐࡉࡓࡀ ࡄࡉࡅࡀࡓࡀ ࡖ ࡁࡀࡄࡀࡓ ࡆࡉࡅࡀࡉࡄࡅࡍ ࡅࡌࡀࡍࡄࡀࡓ ࡃࡌࡅࡕࡀࡉࡄࡅࡍ ࡖ ࡄࡉࡍࡅࡍ ࡂࡅࡁࡓࡉࡀ ࡆࡀࡃࡉࡒࡉࡀ ࡅࡌࡄࡀࡉࡌࡍࡉࡀ ࡁࡀࡕࡓࡀ ࡖ ࡍࡄࡅࡓࡀ ࡅࡁࡃࡀࡅࡓࡀ ࡕࡀࡒࡍࡀ ࡀࡐࡓࡉࡔ ࡅࡂࡀࡋࡉࡋ ࡅࡀࡌࡀࡓ ࡌࡀࡍࡃࡀ ࡖ ࡄࡉࡉࡀ ࡏࡅࡕࡓࡀ ࡌࡆࡀࡓࡆࡀ ࡊࡅࡋ ࡂࡀࡁࡓࡀ ࡍࡀࡑࡅࡓࡀࡉࡀ ࡖ ࡊࡔࡉࡈ ࡅࡌࡄࡀࡉࡌࡀࡍ ࡗ ࡒࡀࡉࡉࡌ ࡌࡍ ࡔࡉࡍࡕࡇ ࡍࡉࡎࡀࡁ ࡁࡅࡓࡆࡉࡍࡒࡀ ࡄࡉࡅࡀࡓࡀ ࡁࡀࡃࡌࡅ ࡓࡀࡆࡀ ࡓࡁࡀ ࡖ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡄࡀࡆࡀ ࡁࡅࡕࡀ ࡏࡋࡇ ࡍࡉࡒࡓࡉࡀ ࡅࡍࡉࡊࡓࡅࡊ ࡁࡓࡉࡔࡉࡇ ࡅࡍࡀࡕࡍࡀ ࡁࡅࡕࡇ ࡁࡊࡉࡎࡉࡀ ࡕࡉࡄࡅࡉࡀ ࡅࡕࡅࡔࡁࡉࡄࡕࡇ ࡁࡉࡕ ࡀࡁࡅ ࡓࡁࡀ ࡓࡀࡌࡀ ࡊࡅࡋࡄࡅࡍ ࡀࡋࡌࡉࡀ ࡖ ࡄࡀࡆࡉࡋࡇ ࡌࡍ ࡒࡅࡃࡀࡌࡇ ࡍࡉࡕࡊࡉࡁࡔࡅࡍ ࡌࡓࡀࡃࡐࡀࡍࡇ ࡅࡌࡔࡀࡓࡂࡉࡆࡀࡍࡇ ࡁࡄࡀࡅࡒࡀ ࡅࡃࡀࡄࡀࡋࡕࡀ ࡅࡆࡉࡅࡉࡄࡕࡀ ࡅࡓࡕࡉࡕࡉࡀ ࡅࡍࡒࡉࡔࡉࡀ ࡅࡍࡉࡒࡌࡅࡍ ࡌࡍ ࡒࡅࡃࡀࡌࡀࡉ ࡅࡀࡍࡀ ࡃࡉࡋࡉࡀ ࡆࡀࡊࡀࡉࡀ ࡏࡄࡅࡉࡀ ࡁࡊࡅࡋࡄࡅࡍ ࡌࡀࡋࡀࡋࡀࡉ ࡅࡄࡉࡉࡀ ࡆࡀࡊࡉࡍ ࡎࡀ .. ࡄࡀࡆࡉࡍ ࡁࡅࡕࡀ ࡖ ࡁࡅࡓࡆࡉࡍࡒࡀ ࡄࡏ ࡎࡀ

2. ࡆࡄࡉࡓ ࡅࡌࡆࡀࡄࡀࡓ ࡆࡉࡄࡓࡅࡍ ࡓࡀࡆࡀ ࡓࡁࡀ ࡖ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡖ ࡌࡉࡍࡇ ࡃࡉࡋࡇ ࡐࡓࡀࡔ ࡅࡐࡕࡀ ࡄࡅࡀ ࡌࡀࡍࡃࡀ ࡖ ࡄࡉࡉࡀ ࡖ ࡌࡉࡍࡇ ࡃࡉࡋࡇ ࡄࡅࡍ ࡁࡍࡉࡀ ࡐࡓࡉࡔࡀࡉࡉࡀ ࡖ ࡄࡉࡉࡀ ࡓࡅࡓࡁࡉࡀ ࡍࡅࡊࡓࡀࡉࡉࡀ ࡅࡒࡓࡀ ࡏࡅࡕࡓࡉࡀ ࡋࡉࡀࡌࡉࡍࡇ ࡅࡋࡎࡌࡀࡋࡇ ࡅࡀࡅࡕࡉࡁࡉࡍࡅࡍ ࡁࡔࡊࡉࡍࡀࡕࡅࡍ ࡖ ࡍࡀࡐࡔࡀࡉࡄࡅࡍ ࡅࡍࡄࡀࡓ ࡅࡕࡁࡀࡓ ࡁࡀࡋࡁࡅࡔࡀࡉࡄࡅࡍ ࡖ ࡍࡀࡐࡔࡀࡉࡄࡅࡍ ࡅࡏࡕࡂࡀࡉࡅࡍ ࡁࡌࡀࡃࡉࡄࡕࡀ ࡖ ࡀࡁࡅࡄࡅࡍ ࡍࡑࡀࡁࡋࡅࡍ ࡌࡍ ࡁࡉࡕ ࡄࡉࡉࡀ ࡅࡕࡄࡉࡁ ࡋࡔࡅࡀࡋࡉࡀ ࡅࡀࡅࡒࡅࡓࡉࡀ ࡓࡁࡀ ࡀࡊࡅࡀࡕࡀࡁࡀࡄࡀࡕࡇ ࡅࡒࡀࡌ ࡏࡅࡕࡓࡉࡀ ࡏࡋ ࡊࡀࡓࡎࡀࡅࡀࡕࡀ ࡖ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡅࡔࡒࡀࡋ ࡊࡋࡉࡋࡀ ࡌࡍ ࡓࡉࡔࡀࡉࡄࡅࡍ ࡅࡀࡕࡍࡅࡍࡅࡍ ࡋࡊࡀࡓࡎࡀࡅࡀࡕࡀ ࡖ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡅࡀࡌࡓࡉࡀ ࡖ ࡒࡀࡔࡉࡔ ࡓࡁࡀ ࡌࡍ ࡀࡁࡀࡄࡀࡕࡇ ࡀࡁࡅࡍ ࡒࡅࡌ ࡁࡕࡅࡔࡁࡉࡄࡕࡀ ࡅࡀࡎࡉࡌ ࡏࡋࡀࡉ ࡏࡃࡀࡊ ࡖ ࡊࡅࡔࡈࡀ ࡅࡉࡀࡌࡉࡍࡀࡊ ࡓࡀࡁࡕࡉࡀ ࡖ ࡀࡎࡀࡅࡀࡕࡀ ࡅࡌࡔࡀࡁࡉࡍ ࡄࡉࡉࡀ ࡎࡀ .. ࡄࡀࡆࡉࡍ ࡁࡅࡕࡀ ࡖ ࡔࡓࡉࡕࡀ ࡖ ࡁࡔࡅࡌࡇ ࡖ ࡄࡀࡄࡅ ࡂࡀࡁࡓࡀ ࡒࡀࡃࡌࡀࡉࡀ ࡄࡏ ࡎࡀ

3. ࡁࡔࡅࡌࡀ ࡖ ࡄࡉࡉࡀ ࡄࡉࡉࡀ ࡒࡉࡓࡉࡅࡉࡀ ࡋࡉࡀࡅࡀࡓ ࡆࡉࡅࡀ ࡁࡓ ࡍࡄࡅࡓ ࡄࡉࡉࡀ ࡄࡀࡌࡂࡀࡉ ࡆࡉࡅࡀ ࡁࡓ ࡄࡀࡌࡂࡀࡂࡀࡉ ࡆࡉࡅࡀ ࡆࡄࡉࡓ ࡅࡌࡆࡀࡄࡀࡓ ࡆࡉࡄࡓࡅࡍ ࡓࡀࡆࡀ ࡓࡁࡀ ࡖ ࡆࡉࡅࡀ ࡖ ࡆࡉࡄࡓࡅࡍ ࡊࡋࡉࡋࡀ ࡖ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡖ ࡌࡉࡍࡇ ࡃࡉࡋࡇ ࡏࡕࡉࡍࡂࡉࡃ ࡓࡄࡀࡈࡀ ࡖ ࡌࡉࡀ ࡄࡉࡉࡀ ࡋࡔࡊࡉࡍࡀࡕࡀ ࡖ ࡄࡅ ࡐࡀࡄࡕࡀ ࡖ ࡆࡉࡅࡀ ࡅࡍࡄࡅࡓࡀ ࡅࡌࡄࡀࡅࡉࡀ ࡋࡏࡅࡕࡓࡉࡀ ࡖ ࡔࡉࡄࡉࡀ ࡅࡋࡏࡅࡑࡓࡉࡀ ࡖ ࡏࡕࡀࡐࡓࡀࡔ ࡌࡉࡍࡇ ࡊࡅࡋࡄࡅࡍ ࡀࡋࡌࡉࡀ ࡎࡀࡂࡃࡉࡀ ࡅࡌࡔࡀࡁࡉࡋࡅࡍ ࡋࡄࡉࡉࡀ ࡓࡅࡓࡁࡉࡀ ࡒࡀࡃࡌࡀࡉࡉࡀ ࡁࡔࡊࡉࡍࡀࡕࡅࡍ ࡅࡄࡉࡉࡀ ࡆࡀࡊࡉࡍ ࡎࡀ .. ࡄࡀࡆࡀ ࡁࡅࡕࡀ ࡖ ࡁࡅࡓࡆࡉࡍࡒࡀ ࡄࡏ ࡎࡀ

4. ࡗ ࡒࡀࡉࡌࡉࡀ ࡏࡅࡕࡓࡉࡀ ࡁࡔࡊࡉࡍࡀࡕࡅࡍ ࡎࡀࡂࡃࡉࡀ ࡅࡌࡔࡀࡁࡉࡋࡇ ࡋࡀࡕࡓࡀ ࡎࡀࡂࡉࡀ ࡁࡀࡍࡄࡅࡓࡀ ࡖ ࡎࡀࡊࡀ ࡋࡉࡕࡋࡇ ࡅࡋࡌࡀࡍࡃࡀ ࡖ ࡄࡉࡉࡀ ࡌࡔࡀࡁࡉࡋࡇ ࡅࡀࡌࡓࡉࡋࡇ ࡗ ࡒࡀࡉࡌࡉࡀ ࡏࡅࡕࡓࡉࡀ ࡁࡔࡊࡉࡍࡀࡕࡅࡍ ࡎࡀࡂࡃࡉࡀ ࡅࡌࡔࡀࡁࡉࡋࡇ ࡋࡄࡀࡄࡅ ࡕࡀࡓࡅࡀࡍ ࡍࡄࡅࡓࡀ ࡊࡋࡉࡋࡀ ࡖ ࡁࡓࡉࡔࡀࡉࡄࡅࡍ ࡁࡌࡀࡄࡅ ࡍࡉࡒࡀࡉࡌࡅࡍࡇ ࡅࡁࡌࡀࡄࡅ ࡍࡉࡕࡋࡅࡍࡇ ࡁࡏࡋࡀࡍ ࡆࡉࡅࡀ ࡍࡉࡒࡀࡉࡌࡅࡍࡇ ࡅࡍࡀࡕࡋࡅࡍࡇ ࡅࡌࡔࡀࡁࡉࡍ ࡄࡉࡉࡀ ࡎࡀ .. ࡄࡀࡆࡀ ࡁࡅࡕࡀ ࡒࡀࡉࡀࡌࡕࡀ ࡖ ࡄࡉࡉࡀ ࡒࡉࡓࡉࡅࡉࡀ ࡋࡉࡀࡅࡀࡓ ࡆࡉࡅࡀ ࡄࡏ ࡎࡀ

5. ࡁࡔࡅࡌࡀ ࡖ ࡄࡉࡉࡀ ࡍࡄࡅࡓ ࡍࡄࡅࡓࡀ ࡍࡄࡅࡓ ࡍࡄࡅࡓࡀ ࡍࡄࡅࡓ ࡍࡄࡅࡓࡀ ࡖ ࡄࡉࡉࡀ ࡓࡁࡉࡀ ࡒࡀࡃࡌࡀࡉࡉࡀ ࡍࡉࡄࡓࡀࡕ ࡄࡅࡊࡅࡌࡕࡇ ࡅࡏࡓࡅࡕࡇ ࡅࡎࡉࡁࡓࡅࡕࡇ ࡅࡕࡅࡔࡁࡉࡄࡕࡇ ࡖ ࡌࡀࡍࡀ ࡒࡀࡃࡌࡀࡉࡀ ࡖ ࡌࡍ ࡃࡅࡊࡕࡇ ࡀࡕࡀ ࡂࡀࡃࡋࡇ ࡖ ࡊࡋࡉࡋࡀ ࡉࡅࡐࡉࡍ ࡅࡉࡅࡐࡀࡐࡉࡍ ࡄࡅࡀ ࡌࡀࡕࡉࡀࡍࡇ ࡖ ࡊࡋࡉࡋࡀ ࡏࡉࡕ ࡏࡍࡑࡉࡁࡀࡕ ࡏࡅࡕࡓࡉࡀ ࡄࡅࡀ ࡕࡀࡓࡑࡇ ࡖ ࡊࡋࡉࡋࡀ ࡏࡉࡕ ࡉࡀࡅࡀࡓ ࡁࡓ ࡏࡍࡑࡉࡁࡀࡕ ࡏࡅࡕࡓࡉࡀ ࡄࡅࡀ ࡀࡕࡉࡉࡇ ࡅࡕࡉࡓࡑࡇ ࡁࡓࡉࡔࡉࡇ ࡖ ࡌࡀࡍࡀ ࡍࡑࡉࡁࡀ ࡖ ࡌࡍ ࡌࡀࡍࡉࡀ ࡎࡌࡉࡓࡉࡀ ࡖ ࡏࡕࡉࡍࡑࡉࡁ ࡌࡉࡒࡀࡃ ࡉࡀࡒࡉࡃ ࡊࡋࡉࡋࡀ ࡅࡀࡋࡅࡀࡕࡇ ࡖ ࡊࡋࡉࡋࡀ ࡌࡉࡒࡀࡃ ࡉࡀࡒࡃࡀ ࡌࡍ ࡀࡒࡀࡌࡇ ࡖ ࡌࡀࡍࡀ ࡍࡄࡅࡓࡀ ࡅࡌࡍ ࡏࡄࡅࡓࡇ ࡖ ࡌࡀࡍࡀ ࡏࡒࡀࡓࡀ ࡕࡀࡓࡕࡉࡍ ࡑࡉࡃࡇ ࡖ ࡌࡀࡍࡀ ࡆࡉࡅࡀ ࡅࡆࡉࡅࡉࡄࡕࡀ ࡅࡆࡀࡊࡅࡕࡀ ࡅࡔࡀࡓࡉࡀ ࡁࡀࡓࡁࡉࡀ ࡆࡀࡅࡀࡉࡀࡕࡀ ࡖ ࡁࡀࡉࡕࡀ ࡅࡁࡔࡀࡁࡀ ࡊࡀࡍࡐࡉࡀ ࡖ ࡓࡒࡉࡄࡀ ࡔࡉࡃࡒࡀ ࡅࡍࡉࡀࡄࡀ ࡅࡑࡀࡅࡕࡀ ࡅࡌࡔࡀࡁࡉࡍ ࡄࡉࡉࡀ ࡎࡀ .. ࡄࡀࡆࡉࡍ ࡁࡅࡕࡀ ࡖ ࡁࡅࡓࡆࡉࡍࡒࡀ ࡄࡏ ࡒࡓࡉࡀ ࡅࡕࡓࡅࡑ ࡁࡓࡉࡔࡊ ࡎࡀ

6. ࡏࡕࡉࡀࡓ ࡊࡋࡉࡋ ࡍࡄࡅࡓ ࡀࡉࡀࡓ ࡌࡍ ࡁࡉࡕ ࡄࡉࡉࡀ ࡖ ࡀࡕࡉࡅࡉࡀ ࡏࡅࡕࡓࡉࡀ ࡌࡍ ࡁࡉࡕ ࡄࡉࡉࡀ ࡅࡒࡀࡉࡌࡅࡉࡀ ࡄࡉࡉࡀ ࡓࡅࡓࡁࡉࡀ ࡒࡀࡃࡌࡀࡉࡉࡀ ࡁࡔࡊࡉࡍࡀࡕࡅࡍ ࡕࡀࡓࡑࡇ ࡍࡉࡕࡓࡀࡑ ࡅࡌࡒࡀࡉࡌࡀࡍࡇ ࡍࡉࡕࡒࡀࡉࡀࡌ ࡕࡀࡓࡑࡇ ࡁࡀࡓࡒࡀ ࡖ ࡍࡄࡅࡓࡀ ࡅࡌࡒࡀࡉࡌࡀࡍࡇ ࡁࡃࡀࡅࡓࡀ ࡕࡀࡒࡍࡀ ࡏࡕࡓࡉࡑࡕࡅࡍ ࡅࡏࡕࡒࡀࡉࡀࡌࡕࡅࡍ ࡁࡀࡕࡓࡀ ࡖ ࡈࡀࡁࡉࡀ ࡌࡉࡕࡒࡀࡉࡌࡉࡀ ࡅࡌࡔࡀࡁࡉࡍ ࡄࡉࡉࡀ ࡎࡀ .. ࡄࡀࡆࡀ ࡁࡅࡕࡀ ࡔࡓࡉࡕࡀ ࡖ ࡍࡄࡅࡓ ࡍࡄࡅࡓࡀ ࡄࡏ ࡎࡀ ࡄࡀࡆࡉࡍ ࡕࡋࡀࡕࡀ ࡁࡀࡅࡀࡕࡀ ࡁࡔࡅࡌࡇ ࡖ ࡄࡀࡄࡅ ࡂࡀࡁࡓࡀ ࡒࡀࡃࡌࡀࡉࡀ ࡅࡄࡉࡉࡀ ࡒࡉࡓࡉࡅࡉࡀ ࡋࡉࡀࡅࡀࡓ ࡆࡉࡅࡀ ࡅࡍࡄࡅࡓ ࡍࡄࡅࡓࡀ ࡒࡓࡉࡀ ࡋࡀࡂࡀࡍࡁࡉࡀ ࡕࡀࡂࡀࡊ ࡅࡕࡓࡅࡑ ࡁࡓࡉࡔࡀࡊ ࡅࡒࡓࡉࡀ ࡌࡀࡍࡃࡀ ࡒࡓࡀࡍ ࡋࡊࡋࡉࡋࡀ ࡖ ࡀࡎࡀ ࡅࡕࡓࡅࡑ ࡁࡓࡉࡔࡀࡊ ࡏࡋࡀࡅࡉࡀ ࡕࡀࡂࡀࡊ ࡅࡂࡃࡅࡋ ࡊࡋࡉࡋࡀ ࡖ ࡀࡎࡀ ࡋࡌࡀࡓࡂࡉࡍࡀࡊ ࡅࡋࡂࡅࡈ ࡀࡁࡉࡄࡃࡉࡀ ࡕࡀࡂࡀࡊ ࡅࡗ ࡌࡀࡎࡂࡉࡕ ࡋࡉࡀࡓࡃࡍࡀ ࡒࡓࡉࡀ ࡏࡅࡍࡉࡀࡍ ࡀࡁ ࡏࡅࡍࡉࡀࡍ ࡎࡀ

7. ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡀࡎࡅࡕࡀ ࡕࡉࡄࡅࡉࡋࡉࡀ ࡋࡃࡉࡋࡉࡀ ࡄࡀࡉࡀࡋ ࡊࡁࡀࡓ ࡓࡀࡆࡀ ࡓࡁࡀ ࡖ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡖ ࡔࡓࡉࡀ ࡋࡐࡅࡌࡀࡉࡄࡅࡍ ࡖ ࡄࡉࡉࡀ ࡒࡀࡃࡌࡀࡉࡉࡀ ࡖ ࡌࡉࡍࡇ ࡃࡉࡋࡇ ࡖ ࡄࡅࡀ ࡅࡐࡕࡀ ࡌࡀࡍࡃࡀ ࡖ ࡄࡉࡉࡀ ࡖ ࡄࡅ ࡏࡃࡀ ࡅࡐࡓࡀࡔ ࡁࡏࡅࡑࡓࡀࡉࡄࡅࡍ ࡖ ࡄࡉࡉࡀ ࡒࡀࡃࡌࡀࡉࡉࡀ ࡖ ࡄࡉࡍࡅࡍ ࡐࡓࡉࡔࡀࡉࡉࡀ ࡄࡉࡍࡅࡍ ࡅࡌࡔࡀࡁࡉࡍ ࡄࡉࡉࡀ ࡎ ࡀ .. ࡄࡀࡆࡉࡍ ࡁࡅࡕࡀ ࡒࡓࡉࡀ ࡅࡋࡂࡅࡈ ࡐࡀࡍࡃࡀࡌࡀࡊ ࡋࡌࡀࡑࡁࡅࡕࡀࡊ ࡎࡀ

8. ࡓࡉࡄࡀ ࡖ ࡁࡀࡎࡉࡌ ࡓࡉࡄࡀ ࡖ ࡁࡀࡎࡉࡌ ࡄࡀࡋ ࡄࡉࡉࡀ ࡓࡅࡓࡁࡉࡀ ࡒࡀࡃࡌࡀࡉࡉࡀ ࡍࡅࡊࡓࡀࡉࡉࡀ ࡌࡍ ࡀࡋࡌࡉࡀ ࡖ ࡍࡄࡅࡓࡀ ࡉࡀࡕࡉࡓࡉࡀ ࡖ ࡏࡋࡀࡅࡉࡀ ࡅࡊࡅࡋࡄࡅࡍ ࡏࡅࡁࡀࡃࡉࡀ ࡋࡆࡉࡅࡀ ࡄࡀࡕࡉࡒࡀ ࡅࡏࡋ ࡍࡄࡅࡓࡀ ࡒࡀࡃࡌࡀࡉࡀ ࡅࡋࡄࡉࡉࡀ ࡖ ࡄࡅࡍ ࡌࡍ ࡄࡉࡉࡀ ࡅࡋࡊࡅࡔࡈࡀ ࡖ ࡄࡅࡀ ࡌࡍ ࡒࡅࡃࡀࡌ ࡁࡓࡉࡔࡀ ࡓࡉࡄࡀ ࡖ ࡁࡀࡎࡉࡌ ࡓࡉࡄࡀ ࡖ ࡁࡀࡎࡉࡌ ࡄࡀࡋ ࡉࡅࡊࡀࡁࡀࡓ ࡆࡉࡅࡀ ࡖ ࡊࡁࡀࡓ ࡁࡆࡉࡅࡇ ࡅࡀࡎࡂࡉࡀ ࡁࡀࡍࡄࡅࡓࡇ ࡅࡏࡒࡀࡓࡇ ࡔࡂࡀࡍࡃࡀ ࡖ ࡁࡄࡉࡓࡉࡀ ࡆࡉࡃࡒࡀ ࡒࡀࡃࡌࡀࡉࡉࡀ ࡖ ࡀࡁࡀࡓ ࡀࡋࡌࡉࡀ ࡅࡀࡕࡀ ࡅࡁࡆࡀ ࡓࡒࡉࡄࡀ ࡅࡏࡕࡉࡂࡋࡉࡀ ࡓࡉࡄࡀ ࡖ ࡁࡀࡎࡉࡌ ࡓࡉࡄࡀ ࡖ ࡁࡀࡎࡉࡌ ࡄࡀࡋ ࡉࡅࡆࡀࡈࡀࡒ ࡌࡀࡍࡃࡀ ࡖ ࡄࡉࡉࡀ ࡍࡉࡁࡀ ࡖ ࡄࡉࡉࡀ ࡖ ࡌࡄࡀࡅࡉࡀ ࡔࡉࡃࡒࡀ ࡅࡉࡀࡄࡉࡁ ࡎࡉࡁࡓࡀ ࡅࡀࡄࡉࡃ ࡁࡀࡅࡀࡕࡀ ࡖ ࡓࡅࡄࡉࡀ ࡅࡍࡉࡔࡌࡀࡕࡀ ࡖ ࡀࡍࡀࡔࡉࡀ ࡊࡔࡉࡈࡉࡀ ࡅࡌࡄࡀࡉࡌࡍࡉࡀ ࡈࡀࡁࡉࡀ ࡅࡁࡀࡎࡉࡌࡉࡀ ࡁࡀࡕࡓࡀ ࡖ ࡄࡉࡉࡀ ࡅࡁࡃࡀࡅࡓࡀ ࡕࡀࡒࡍࡀ ࡓࡉࡄࡀ ࡖ ࡁࡀࡎࡉࡌ ࡓࡉࡄࡀ ࡖ ࡁࡀࡎࡉࡌ ࡄࡀࡋ ࡀࡁࡀ ࡖ ࡏࡅࡕࡓࡉࡀ ࡀࡕࡉࡒࡀ ࡓࡀࡌࡀ ࡊࡀࡎࡉࡀ ࡅࡍࡈࡉࡓࡀ ࡂࡀࡁࡓࡀ ࡖ ࡓࡀࡌ ࡅࡉࡀࡕࡉࡁ ࡀࡌࡅࡒ ࡊࡎࡉࡀ ࡄࡀࡆࡉࡀ ࡅࡐࡀࡓࡉࡔ ࡀࡋࡌࡉࡀ ࡅࡃࡀࡓࡉࡀ ࡌࡀࡄࡅ ࡖ ࡀࡁࡃࡉࡀ ࡁࡀࡋࡌࡉࡀ ࡖ ࡄࡔࡅࡊࡀ ࡓࡉࡄࡀ ࡖ ࡁࡀࡎࡉࡌ ࡓࡉࡄࡀ ࡖ ࡁࡀࡎࡉࡌ ࡄࡀࡋ ࡔࡊࡉࡍࡀࡕ ࡄࡉࡉࡀ ࡅࡏࡋ ࡏࡍࡑࡉࡁࡀࡕ ࡏࡅࡕࡓࡉࡀ ࡓࡉࡄࡀ ࡖ ࡁࡀࡎࡉࡌ ࡓࡉࡄࡀ ࡖ ࡁࡀࡎࡉࡌ ࡄࡀࡋ ࡔࡊࡉࡍࡀࡕ ࡀࡓࡁࡀ ࡂࡅࡁࡓࡉࡀ ࡁࡍࡉࡀ ࡔࡋࡀࡌࡀ ࡓࡉࡄࡀ ࡖ ࡁࡀࡎࡉࡌ ࡓࡉࡄࡀ ࡖ ࡁࡀࡎࡉࡌ ࡄࡀࡋ ࡔࡊࡉࡍࡀࡕ ࡀࡁࡀࡕࡅࡓ ࡓࡉࡄࡀ ࡖ ࡁࡀࡎࡉࡌ ࡓࡉࡄࡀ ࡖ ࡁࡀࡎࡉࡌ ࡄࡀࡋ ࡔࡊࡉࡍࡀࡕ ࡄࡉࡁࡉࡋ ࡅࡔࡉࡕࡉࡋ ࡅࡀࡍࡅࡔ ࡁࡍࡉࡀ ࡖ ࡔࡅࡓࡁࡕࡀ ࡄࡀࡉࡕࡀ ࡏࡓࡕࡀ ࡅࡓࡀࡅࡀࡆࡕࡀ ࡅࡕࡀࡒࡅࡍࡕࡀ ࡂࡅࡁࡓࡉࡀ ࡖ ࡁࡄࡉࡓࡁࡀ ࡋࡀࡏࡕࡉࡍࡎࡉࡁ ࡅࡁࡉࡀࡒࡃࡀࡍࡉࡀ ࡖ ࡍࡅࡓࡀ ࡋࡀࡏࡒࡀࡃ ࡅࡁࡈࡅࡐࡀࡍࡉࡀ ࡌࡉࡀ ࡋࡀࡈࡀࡐ ࡅࡀࡓࡒࡉࡀ ࡌࡎࡀࡍࡅࡍ ࡖ ࡁࡋࡉࡂࡓࡀࡉࡄࡅࡍ ࡌࡉࡀ ࡋࡀࡏࡑࡈࡁࡀ ࡁࡅࡍ ࡅࡀࡔࡊࡀ ࡃࡀࡍ ࡅࡆࡊࡅࡍ ࡀࡌࡀࡓ ࡅࡔࡕࡌࡀ ࡌࡀࡋࡉࡀ ࡄࡉࡍࡅࡍ ࡖ ࡋࡀࡄࡅࡍ ࡁࡑࡉࡓࡉࡀ ࡔࡀࡋࡉࡌࡉࡀ ࡄࡉࡍࡅࡍ ࡖ ࡋࡀࡄࡅࡍ ࡄࡀࡎࡉࡓࡉࡀ ࡆࡀࡊࡀࡉࡉࡀ ࡄࡉࡍࡅࡍ ࡖ ࡋࡀࡄࡅࡍ ࡄࡀࡉࡀࡁࡉࡀ ࡌࡍ ࡀࡕࡓࡀ ࡍࡀࡒࡉࡀ ࡏࡕࡅࡍ ࡅࡋࡀࡕࡓࡀ ࡍࡀࡒࡉࡀ ࡀࡆࡋࡉࡍ ࡓࡉࡄࡀ ࡖ ࡁࡀࡎࡉࡌ ࡓࡉࡄࡀ ࡖ ࡁࡀࡎࡉࡌ ࡄࡀࡋ ࡄࡀࡉࡀࡉࡅࡍ ࡂࡅࡁࡓࡉࡀ ࡀࡁࡀࡄࡀࡕࡀࡍ ࡖ ࡀࡍࡀࡔࡉࡀ ࡊࡔࡉࡈࡉࡀ ࡅࡌࡄࡀࡉࡌࡍࡉࡀ ࡖ ࡔࡀࡋࡉࡌ ࡅࡍࡐࡀࡒ ࡌࡍ ࡐࡀࡂࡓࡀࡉࡄࡅࡍ ࡅࡋࡃࡒࡀࡉࡌࡉࡀ ࡁࡐࡀࡂࡓࡀࡉࡄࡅࡍ ࡎࡄࡀࡃ ࡍࡉࡎࡕࡊࡀࡓ ࡌࡉࡍࡀࡉࡄࡅࡍ ࡁࡀࡁࡀ ࡖ ࡄࡀࡈࡀࡉࡉࡀ ࡅࡍࡉࡐࡕࡀࡋࡅࡍ ࡁࡀࡁࡀ ࡖ ࡍࡄࡅࡓࡀ ࡅࡍࡉࡕࡋࡀࡉࡐࡅࡍ ࡁࡋࡀࡅࡐࡀ ࡖ ࡄࡉࡉࡀ ࡖ ࡋࡉࡕࡋࡇ ࡐࡎࡀࡒࡀ ࡀࡍࡀࡕࡅࡍ ࡌࡍ ࡕࡀࡌ ࡁࡅࡍ ࡏࡋࡀࡍ ࡅࡀࡍࡉࡍ ࡌࡍ ࡄࡀࡊࡀ ࡍࡉࡁࡉࡀ ࡏࡋࡀࡅࡀࡉࡊࡅࡍ ࡊࡅࡋࡄࡅࡍ ࡏࡁࡉࡁࡉࡀ ࡎࡀࡉࡐࡉࡀ ࡅࡊࡅࡋࡄࡅࡍ ࡓࡉࡄࡀࡍࡉࡀ ࡁࡀࡈࡋࡉࡀ ࡓࡉࡄࡀ ࡖ ࡄࡉࡉࡀ ࡕࡓࡀࡑ ࡋࡓࡀࡄࡌࡉࡀ ࡔࡅࡌࡇ ࡖ ࡊࡅࡔࡈࡀ ࡋࡃࡀࡓ ࡃࡀࡓࡉࡀ ࡅࡋࡀࡋࡀࡌ ࡀࡋࡌࡉࡀ ࡀࡃࡉࡍࡒࡉࡀ ࡄࡀࡈࡀࡉࡉࡀ ࡅࡄࡀࡅࡁࡉࡀ ࡅࡎࡊࡉࡋࡀࡕࡀ ࡅࡕࡉࡒࡋࡀࡕࡀ ࡅࡔࡀࡁࡀࡔࡀࡕࡀ ࡍࡉࡎࡒࡀ ࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡀࡄࡕࡀ ࡋࡉࡀࡓࡃࡍࡀ ࡅࡌࡉࡑࡈࡉࡁࡀ ࡍࡉࡄࡆࡅࡍࡇ ࡋࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡋࡃࡀࡅࡓࡀ ࡕࡀࡓࡍࡀ ࡅࡌࡔࡀࡁࡉࡍ ࡄࡉࡉࡀ ࡓࡁࡉࡀ ࡁࡀࡍࡄࡅࡓࡀ ࡅࡄࡉࡉࡀ ࡆࡀࡊࡉࡍ ࡎ ࡀ ࡄࡀࡆࡉࡍ ࡐࡅࡂࡃࡀࡌࡀ ࡖ ࡓࡉࡄࡀ ࡖ ࡁࡀࡎࡉࡌ ࡅࡄࡀࡋ ࡄࡉࡉࡀ ࡒࡀࡃࡌࡀࡉࡉࡀ ࡕࡀࡓࡕࡉࡍࡅࡍ ࡒࡓࡉࡍࡅࡍ ࡋࡓࡉࡄࡀ ࡅࡎࡀࡍࡃࡋࡅࡎ ࡅࡀࡕࡍࡀ ࡋࡒࡅࡃࡀࡌࡀࡊ ࡋࡊࡉࡐࡇ ࡖ ࡉࡀࡓࡃࡍࡀ ࡁࡒࡀࡅࡒࡀ ࡄࡀࡃࡕࡀ ࡅࡍࡅࡓࡀ ࡄࡀࡃࡉࡕࡉࡀ ࡅࡋࡁࡉࡕ ࡓࡉࡄࡀ ࡖ ࡍࡄࡀࡔࡀ ࡀࡃࡉࡀࡅࡓࡉࡀ ࡖ ࡊࡅࡋࡄࡉࡍ ࡐࡅࡂࡃࡀࡌࡉࡀ ࡖ ࡌࡉࡕࡉࡁࡃࡉࡍ ࡋࡉࡀࡓࡃࡍࡀ . ࡕࡅࡌ ࡄࡀࡊࡀ ࡒࡓࡉࡀ ࡌࡀࡑࡁࡅࡕࡀ ࡀࡅࡃࡉࡍ ࡅࡕࡅࡔࡁࡉࡄࡀࡍ ࡅࡏࡋࡊࡅࡍ ࡃࡉࡋࡊࡅࡍ ࡅࡁࡉࡕ ࡌࡉࡔࡒࡀࡋ ࡀࡉࡍࡉࡀ ࡅࡌࡉࡔࡒࡀࡋ ࡀࡉࡍࡉࡀ ࡕࡅࡌ ࡒࡓࡉࡀ ࡌࡀࡑࡁࡅࡕࡀ ࡎࡀ

9. ࡌࡉࡔࡒࡀࡋ ࡀࡉࡍࡉࡀ ࡀࡓࡅࡌࡉࡀ ࡂࡉࡋࡉࡀ ࡐࡀࡓࡑࡅࡐࡀࡉ ࡋࡀࡕࡓࡀ ࡖ ࡊࡅࡋࡇ ࡕࡉࡓࡉࡀ ࡖ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡄࡀࡃࡓࡀ ࡅࡔࡅࡐࡓࡀ ࡅࡔࡀࡉࡀ ࡅࡏࡒࡀࡓࡀ ࡅࡋࡃࡀࡅࡓࡀ ࡖ ࡊࡅࡋࡇ ࡐࡀࡎࡉࡌࡊࡉࡀ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡄࡉࡉࡀ ࡓࡅࡓࡁࡉࡀ ࡍࡅࡊࡓࡀࡉࡉࡀ ࡅࡋࡄࡉࡉࡀ ࡕࡉࡍࡉࡀࡍࡉࡀ ࡅࡋࡄࡉࡉࡀ ࡕࡋࡉࡕࡀࡉࡉࡀ ࡅࡋࡉࡅࡐࡉࡍ ࡉࡅࡐࡀࡐࡉࡍ ࡅࡋࡎࡀࡌ ࡌࡀࡍࡀ ࡎࡌࡉࡓࡀ ࡅࡋࡂࡅࡐࡍࡀ ࡖ ࡊࡅࡋࡇ ࡄࡉࡉࡀ ࡅࡏࡋࡀࡍࡀ ࡓࡁࡀ ࡖ ࡊࡅࡋࡇ ࡀࡎࡀࡅࡀࡕࡀ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡀࡕࡓࡀ ࡉࡀࡒࡓࡀ ࡅࡎࡌࡉࡓࡀ ࡅࡋࡌࡀࡍࡉࡀ ࡊࡀࡎࡉࡉࡀ ࡅࡍࡈࡉࡓࡉࡀ ࡅࡋࡌࡀࡓࡀ ࡖ ࡓࡀࡁࡅࡕࡀ ࡌࡍ ࡀࡕࡓࡀ ࡊࡀࡎࡉࡀ ࡅࡌࡍ ࡀࡕࡀࡓ ࡊࡎࡉࡀ ࡐࡉࡄࡕࡀ ࡑࡀࡓࡊࡀ ࡊࡅࡔࡈࡀ ࡅࡄࡀࡉࡌࡀࡍࡅࡕࡀ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡏࡋ ࡎࡀࡌ ࡎࡌࡉࡓ ࡆࡉࡅࡀ ࡓࡁࡀ ࡖ ࡄࡉࡉࡀ ࡒࡀࡃࡌࡀࡉࡉࡀ ࡁࡓ ࡄࡉࡉࡀ ࡓࡁࡉࡀ ࡓࡉࡔࡀࡉࡉࡀ ࡖ ࡄࡀࡔ ࡅࡐࡓࡀࡔ ࡃࡉࡋࡇ ࡁࡀࡉࡉࡀ ࡋࡂࡉࡋࡉࡀ ࡌࡉࡀ ࡅࡔࡀࡓࡉࡀ ࡔࡊࡉࡍࡕࡀ ࡊࡀࡍࡀ ࡖ ࡍࡉࡔࡌࡀࡕࡀ ࡖ ࡌࡉࡍࡇ ࡃࡉࡋࡇ ࡀࡕࡀ ࡋࡉࡅࡌࡀ ࡁࡀࡕࡓࡀࡉࡀ ࡗ ࡍࡀࡐࡒࡀ ࡌࡍ ࡐࡀࡂࡓࡀࡉࡉࡍ ࡁࡃࡉࡋࡇ ࡄࡀࡃࡉࡀ ࡅࡌࡉࡕࡊࡀࡓࡊࡉࡁࡇ ࡅࡎࡀࡋࡒࡉࡀ ࡄࡀࡆࡉࡋࡇ ࡋࡀࡉࡀࡓ ࡁࡀࡓࡀࡉࡀ ࡅࡃࡀࡅࡓࡀ ࡕࡀࡒࡍࡀ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡆࡉࡅࡉࡀ ࡎࡀࡂࡉࡉࡀ ࡅࡋࡍࡄࡅࡓࡉࡀ ࡓࡅࡓࡁࡉࡀ ࡊࡀࡁࡉࡓࡉࡀ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡐࡉࡓࡉࡀࡅࡉࡎ ࡉࡀࡓࡃࡍࡀ ࡓࡁࡀ ࡖ ࡄࡉࡉࡀ ࡒࡀࡃࡌࡀࡉࡉࡀ ࡖ ࡊࡅࡋࡇ ࡀࡎࡀࡅࡀࡕࡀ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡉࡅࡔࡀࡌࡉࡍ ࡃࡀࡊࡉࡀ ࡖ ࡔࡓࡉࡀ ࡋࡏࡅࡑࡓࡉࡀ ࡖ ࡌࡉࡀ ࡅࡏࡋ ࡌࡀࡌࡁࡅࡂࡉࡀ ࡓࡅࡓࡁࡉࡀ ࡏࡋࡀࡉࡉࡀ ࡖ ࡍࡄࡅࡓࡀ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡄࡉࡉࡀ ࡖ ࡄࡅࡍ ࡌࡍ ࡄࡉࡉࡀ ࡅࡋࡊࡅࡔࡈࡀ ࡖ ࡄࡅࡀ ࡌࡍ ࡒࡅࡃࡀࡌ ࡁࡓࡉࡔࡀ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡉࡅࡊࡀࡁࡀࡓ ࡆࡉࡅࡀ ࡔࡂࡀࡍࡃࡀ ࡖ ࡄࡉࡉࡀ ࡅࡌࡀࡋࡀࡋࡀ ࡖ ࡁࡄࡉࡓࡉࡀ ࡆࡉࡃࡒࡀ ࡒࡀࡃࡌࡀࡉࡀ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡀࡁࡀࡕࡅࡓ ࡀࡕࡉࡒࡀ ࡓࡀࡌࡀ ࡊࡀࡎࡉࡀ ࡅࡍࡈࡉࡓࡀ ࡖ ࡓࡀࡌ ࡅࡊࡎࡉࡀ ࡅࡍࡈࡉࡓ ࡖ ࡋࡁࡀࡁࡀ ࡖ ࡁࡉࡕ ࡄࡉࡉࡀ ࡅࡊࡅࡓࡎࡉࡀ ࡓࡌࡉࡋࡇ ࡅࡉࡀࡕࡉࡁ ࡌࡅࡆࡀࡍࡉࡀ ࡕࡓࡉࡑ ࡒࡅࡃࡀࡌࡇ ࡕࡀࡒࡉࡋ ࡏࡅࡁࡀࡃࡉࡀ ࡅࡀࡂࡓࡉࡀ ࡄࡀࡆࡉࡀ ࡅࡐࡀࡓࡉࡔ ࡀࡋࡌࡉࡀ ࡅࡃࡀࡓࡉࡀ ࡌࡀࡄࡅ ࡖ ࡀࡁࡃࡉࡀ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡌࡀࡍࡃࡀ ࡖ ࡄࡉࡉࡀ ࡌࡀࡓࡀࡉࡄࡅࡍ ࡖ ࡀࡎࡀࡅࡀࡕࡀ ࡂࡀࡁࡓࡀ ࡖ ࡒࡉࡓࡉࡅࡉࡀ ࡄࡉࡉࡀ ࡅࡐࡀࡒࡃࡅࡉࡀ ࡋࡀࡎࡅࡉࡉࡀ ࡊࡀࡍࡀ ࡖ ࡍࡉࡔࡌࡀࡕࡀ ࡌࡀࡔࡋࡉࡋࡇ ࡋࡊࡀࡍࡀ ࡖ ࡍࡉࡔࡌࡀࡕࡀ ࡄࡔࡅࡊࡀ ࡅࡌࡀࡋࡁࡉࡔࡋࡉࡍ ࡍࡄࡅࡓࡀ ࡅࡌࡀࡎࡉࡒ ࡌࡀࡄࡅࡉࡋࡉࡍ ࡏࡉࡕ ࡓࡅࡀࡄࡀ ࡓࡁࡀ ࡖ ࡄࡉࡉࡀ ࡃࡅࡊࡕࡀ ࡖ ࡓࡅࡄࡉࡀ ࡅࡍࡉࡔࡌࡀࡕࡀ ࡖ ࡀࡁࡀࡄࡀࡕࡀࡍ ࡒࡀࡃࡌࡀࡉࡉࡀ ࡉࡀࡕࡁࡉࡀ ࡆࡉࡅࡀ ࡋࡁࡉࡔࡉࡀ ࡅࡍࡄࡅࡓࡀ ࡌࡊࡀࡎࡉࡍ ࡄࡀࡅࡉࡀ ࡓࡅࡀࡄࡀ ࡓࡁࡀ ࡖ ࡄࡉࡉࡀ ࡋࡒࡅࡃࡀࡌࡀࡉࡄࡅࡍ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡔࡉࡋࡌࡀࡉ ࡅࡍࡉࡃࡁࡀࡉ ࡏࡅࡕࡓࡉࡀ ࡕࡓࡉࡍ ࡐࡀࡃࡉࡁࡓࡇ ࡖ ࡌࡀࡍࡃࡀ ࡖ ࡄࡉࡉࡀ ࡖ ࡄࡉࡍࡅࡍ ࡌࡔࡀࡋࡈࡉࡀ ࡋࡉࡀࡓࡃࡍࡀ ࡓࡁࡀ ࡖ ࡄࡉࡉࡀ ࡖ ࡄࡉࡍࡅࡍ ࡑࡀࡁࡉࡀ ࡌࡀࡑࡁࡅࡕࡀ ࡓࡀࡁࡕࡉࡀ ࡖ ࡍࡄࡅࡓࡀ ࡅࡄࡉࡉࡀ ࡆࡀࡊࡏࡉࡍ ࡎࡀ

10. ࡁࡉࡅࡌࡀ ࡖ ࡉࡀࡓࡃࡍࡀ ࡏࡄࡀࡁࡋࡇ ࡋࡎࡀࡌ ࡎࡌࡉࡓ ࡆࡉࡅࡀ ࡓࡁࡀ ࡃࡀࡊࡉࡀ ࡖ ࡄࡉࡉࡀ ࡒࡀࡃࡌࡀࡉࡉࡀ ࡖ ࡍࡂࡀࡃ ࡌࡉࡍࡇ ࡁࡉࡄࡓࡀࡌ ࡅࡓࡀࡌ ࡓࡁࡀ ࡖ ࡄࡉࡉࡀ ࡖ ࡀࡎࡂࡅࡍ ࡌࡉࡍࡇ ࡌࡀ ࡀࡓࡁࡉࡌࡀ ࡅࡀࡓࡁࡉࡍ ࡅࡀࡓࡁࡀ ࡀࡋࡐࡉࡀ ࡓࡅࡁࡀࡍ ࡏࡅࡕࡓࡉࡀ ࡁࡍࡉࡀ ࡍࡄࡅࡓࡀ ࡖ ࡍࡄࡉࡕ ࡋࡉࡀࡓࡃࡍࡀ ࡑࡁࡉࡍࡅࡍ ࡅࡎࡋࡉࡒ ࡋࡊࡉࡐࡇ ࡒࡀࡉࡌࡉࡍࡅࡍ ࡅࡏࡄࡀࡁࡋࡅࡍ ࡌࡍ ࡕࡅࡔࡁࡉࡄࡕࡇ ࡅࡌࡍ ࡓࡀࡁࡅࡕࡇ ࡖ ࡌࡉࡍࡇ ࡃࡉࡋࡇ ࡄࡅࡀࡕ ࡅࡄࡉࡉࡀ ࡆࡀࡊࡉࡍ ࡎࡀ

11. ࡎࡉࡂࡃࡉࡕ ࡅࡔࡀࡁࡀࡕࡇ ࡋࡄࡀࡊ ࡉࡀࡅࡀࡓ ࡆࡉࡅࡀ ࡖ ࡔࡀࡓࡉࡀ ࡔࡊࡉࡍࡕࡀ ࡁࡀࡓࡒࡀ ࡖ ࡀࡉࡀࡓ ࡁࡀࡓࡀࡉࡀ ࡅࡁࡃࡀࡅࡓࡀ ࡕࡀࡒࡍࡀ ࡎࡉࡂࡃࡉࡕ ࡅࡔࡀࡁࡉࡕࡉࡍࡅࡍ ࡋࡔࡅࡁࡀ ࡌࡀࡍࡉࡀ ࡉࡀࡒࡓࡉࡀ ࡅࡎࡌࡉࡓࡉࡀ ࡖ ࡌࡉࡍࡇ ࡏࡕࡉࡍࡑࡉࡁ ࡁࡉࡕ ࡁࡅࡕࡀ ࡌࡍ ࡄࡉࡉࡀ ࡒࡀࡃࡌࡀࡉࡉࡀ ࡅࡀࡔࡊࡉࡕ ࡌࡍ ࡒࡅࡃࡀࡌࡀࡉࡄࡅࡍ ࡖ ࡄࡉࡉࡀ ࡓࡅࡓࡁࡉࡀ ࡍࡅࡊࡓࡀࡉࡉࡀ ࡋࡃࡄࡀࡈࡉࡀ ࡁࡃࡉࡋࡉࡀ ࡅࡃࡄࡀࡈࡉࡀ ࡁࡓࡀࡄࡌࡀࡉ ࡅࡁࡓࡀࡄࡌࡉࡀ ࡓࡀࡄࡌࡀࡉ ࡅࡁࡓࡀࡄࡌࡉࡀ ࡔࡅࡓࡁࡀ ࡓࡁࡀ ࡖ ࡄࡉࡉࡀ ࡅࡄࡉࡉࡀ ࡆࡀࡊࡉࡍ ࡎࡀ ࡄࡀࡋࡉࡍ ࡕࡋࡀࡕࡀ ࡁࡀࡅࡀࡕࡀ ࡌࡉࡔࡒࡀࡋ ࡀࡉࡍࡉࡀ ࡅࡁࡉࡅࡌࡀ ࡖ ࡉࡀࡓࡃࡍࡀ ࡏࡄࡀࡁࡋࡇ ࡅࡎࡉࡂࡃࡉࡕ ࡅࡔࡀࡁࡀࡕࡇ ࡋࡄࡀࡊ ࡉࡀࡅࡀࡓ ࡆࡉࡅࡀ ࡁࡉࡍࡅࡍ ࡋࡊࡉࡐࡇ ࡖ ࡉࡀࡓࡃࡍࡀ ࡀࡁࡀࡕࡀࡓ ࡁࡉࡕ ࡌࡉࡔࡓࡀࡋ ࡀࡉࡍࡉࡀ ࡀࡃࡉࡀࡅࡓࡀ ࡖ ࡌࡀࡑࡁࡅࡕࡀ ࡄࡉࡍࡅࡍ ࡎࡀ ࡎࡀ

12. ࡀࡍࡀ ࡄࡅ ࡉࡅࡓ ࡁࡓ ࡁࡀࡓࡉࡕ ࡁࡆࡉࡅࡀ ࡍࡀࡐࡔࡀ ࡄࡀࡌ ࡆࡉࡅࡀ ࡐࡔࡀࡓ ࡕࡀࡍࡀ ࡄࡅࡀࡕ ࡔࡊࡉࡍࡕࡀ ࡄࡅࡀࡕ ࡔࡊࡉࡍࡕࡀ ࡅࡏࡕࡒࡀࡉࡌࡀࡕ ࡁࡉࡕ ࡄࡉࡉࡀ ࡅࡄࡉࡉࡀ ࡆࡀࡊࡉࡍ ࡎࡀ ࡄࡀࡆࡉࡍ ࡁࡅࡕࡀ ࡒࡓࡉࡀ ࡅࡋࡂࡅࡈ ࡊࡀࡍࡆࡀࡋࡀࡊ ࡐࡕࡀࡄࡀ ࡖ ࡉࡀࡓࡃࡍࡀ ࡄࡏ ࡄࡀࡉࡆࡀࡊ ࡒࡓࡉࡀ ࡋࡉࡀࡓࡃࡍࡀ ࡀࡎࡂࡉࡕ ࡎࡀ

13. ࡋࡉࡀࡓࡃࡍࡀ ࡀࡎࡂࡉࡕ ࡋࡀࡅ ࡁࡀࡋࡄࡅࡃࡀࡉ ࡔࡉࡋࡌࡀࡉ ࡅࡍࡉࡃࡁࡀࡉ ࡀࡃࡉࡀࡅࡓࡀࡉ ࡌࡉࡍࡀࡉ ࡍࡄࡉࡕ ࡋࡉࡀࡓࡃࡍࡀ ࡄࡉࡁࡉࡋ ࡅࡔࡉࡕࡉࡋ ࡅࡀࡍࡅࡔ ࡌࡉࡍࡀࡉ ࡀࡎࡂࡅࡍ ࡋࡉࡀࡓࡃࡍࡀ ࡖ ࡄࡉࡍࡅࡍ ࡑࡀࡁࡉࡀ ࡌࡀࡑࡁࡅࡕࡀ ࡓࡀࡁࡕࡉࡀ ࡖ ࡄࡉࡉࡀ ࡐࡉࡓࡉࡀࡅࡉࡎ ࡆࡉࡅࡀ ࡅࡐࡉࡓࡉࡀࡐࡉࡋ ࡌࡀࡋࡀࡊࡀ ࡐࡓࡀࡋࡉࡀ ࡄࡀࡍࡃࡀࡌࡉࡀ ࡒࡅࡌࡀࡕ ࡏࡄࡅࡕ ࡏࡋ ࡒࡅࡃࡀࡌࡀࡉࡉࡍ ࡖ ࡄࡀࡋࡉࡍ ࡍࡉࡔࡌࡀࡕࡀ ࡖ ࡄࡉࡉࡀ ࡖ ࡌࡐࡀࡓࡒࡉࡋࡉࡍ ࡅࡌࡔࡀࡅࡆࡉࡁࡉࡋࡉࡍ ࡅࡌࡍࡀࡈࡓࡉࡋࡉࡍ ࡋࡄࡀࡋࡉࡍ ࡍࡉࡔࡌࡀࡕࡀ ࡌࡍ ࡊࡅࡋ ࡖ ࡁࡉࡔ ࡅࡌࡍ ࡖ ࡋࡀࡉࡀࡄࡁࡉࡀ ࡅࡍࡀࡎࡁࡉࡀ ࡅࡌࡍ ࡖ ࡋࡀࡓࡀࡔࡉࡀ ࡅࡌࡉࡕࡐࡀࡉࡓࡉࡀ ࡅࡌࡍ ࡃࡀࡉࡅࡀ ࡖ ࡓࡄࡉࡈ ࡅࡋࡀࡌࡈࡅࡍ ࡅࡌࡍ ࡋࡉࡋࡉࡀࡕࡀ ࡖ ࡍࡐࡀࡋ ࡅࡋࡀࡒࡀࡌ ࡍࡐࡀࡋ ࡏࡃࡀࡉࡄࡅࡍ ࡋࡁࡅࡓࡊࡀࡉࡄࡅࡍ ࡏࡉࡀࡅࡀࡓ ࡀࡉࡍࡀࡉࡄࡅࡍ ࡌࡍ ࡌࡉࡄࡆࡉࡀ ࡅࡏࡈࡀࡓࡀࡔ ࡏࡅࡃࡍࡀࡉࡄࡅࡍ ࡌࡍ ࡌࡉࡔࡌࡀ ࡁࡔࡅࡌࡀࡉࡊࡅࡍ ࡔࡉࡋࡌࡀࡉ ࡅࡍࡉࡃࡁࡀࡉ ࡅࡁࡄࡀࡉࡋࡀࡉࡄࡅࡍ ࡖ ࡄࡉࡁࡉࡋ ࡅࡔࡉࡕࡉࡋ ࡅࡀࡍࡅࡔ ࡖ ࡏࡅࡎࡓࡅࡍࡉࡍ ࡅࡄࡅࡕࡌࡅࡍࡉࡍ ࡅࡍࡀࡈࡓࡅࡍࡉࡍ ࡋࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡀࡄࡕࡀ ࡋࡉࡀࡓࡃࡍࡀ ࡅࡌࡉࡑࡈࡉࡁࡀ ࡁࡏࡎࡒࡕࡇ ࡖ ࡉࡅࡆࡀࡈࡀࡒ ࡌࡀࡍࡃࡀ ࡖ ࡄࡉࡉࡀ ࡀࡎࡉࡀ ࡖ ࡏࡍࡉࡔ ࡁࡄࡀࡉࡋࡇ ࡋࡀࡌࡑࡉࡀ ࡅࡄࡉࡉࡀ ࡆࡀࡊࡉࡍ ࡎࡀ ࡒࡓࡉࡀ ࡀࡋࡌࡀ ࡖ ࡌࡀࡈࡉࡕ ࡐࡉࡓࡉࡀࡐࡉࡋ ࡌࡀࡋࡀࡊࡀ ࡐࡓࡀࡋࡉࡀ ࡄࡉࡍࡃࡀࡌࡉࡀ ࡅࡍࡄࡅࡕ ࡀࡋࡌࡀ ࡋࡓࡅࡓࡁࡀࡉࡀ ࡖ ࡀࡈࡌࡀࡊ ࡏࡅ ࡄࡃࡀ ࡍࡉࡔࡉࡌࡕࡀ ࡑࡀࡁࡉࡕ ࡀࡌࡅࡓ ࡒࡅࡌࡀࡕ ࡏࡄࡅࡕ ࡋࡒࡅࡃࡀࡌࡇ ࡖ ࡄࡀࡆࡀ ࡍࡉࡔࡉࡌࡕࡀ ࡖ ࡐࡋࡀࡍ ࡏࡅ ࡍࡉࡔࡌࡀࡕࡀ ࡑࡀࡁࡉࡕ ࡒࡓࡉࡀ ࡗ ࡊࡃࡉࡁ ࡅࡃࡅࡊࡕࡀ ࡖ ࡀࡌࡀࡓ ࡖ ࡏࡅࡎࡓࡅࡍࡉࡍ ࡅࡄࡅࡕࡌࡅࡍࡉࡍ ࡅࡍࡀࡈࡓࡅࡍࡉࡍ ࡀࡌࡅࡓ ࡏࡅࡎࡓࡅࡉࡀ ࡅࡄࡅࡕࡌࡅࡉࡀ ࡅࡍࡀࡈࡓࡅࡉࡀ ࡋࡄࡀࡆࡀ ࡍࡉࡔࡉࡌࡕࡀ ࡖ ࡐࡋࡀࡍ ࡅࡒࡀࡉࡌࡀ ࡋࡒࡅࡃࡀࡌࡀࡊ ࡅࡄࡀࡉࡆࡀࡊ ࡒࡓࡉࡀ ࡐࡅࡂࡃࡀࡌࡀ ࡖ ࡂࡀࡅࡀࡆࡀ ࡎࡀ

14. ࡁࡔࡅࡌࡇ ࡖ ࡉࡅࡎࡌࡉࡓ ࡂࡅࡐࡍࡀ ࡒࡀࡃࡌࡀࡉࡀ ࡖ ࡉࡀࡅࡀࡓ ࡍࡎࡉࡁ ࡌࡉࡍࡇ ࡂࡀࡅࡀࡆࡀ ࡖ ࡌࡉࡀ ࡅࡀࡎࡂࡉࡀ ࡋࡊࡉࡐࡇ ࡖ ࡉࡀࡓࡃࡍࡀ ࡗ ࡊࡎࡉࡀ ࡁࡆࡉࡅࡇ ࡅࡌࡋࡀࡁࡀࡔ ࡁࡀࡍࡄࡅࡓࡇ ࡅࡀࡃࡊࡀࡓ ࡏࡋࡇ ࡐࡅࡂࡃࡀࡌࡉࡀ ࡊࡀࡎࡉࡉࡀ ࡅࡔࡅࡌࡄࡀࡕࡀ ࡄࡀࡋࡉࡍ ࡊࡀࡎࡉࡀࡕࡀ ࡁࡔࡅࡌ ࡉࡅࡎࡌࡉࡓ ࡅࡉࡅࡎࡀࡌࡉࡓ ࡅࡎࡀࡌ ࡌࡀࡍࡀ ࡎࡌࡉࡓࡀ ࡁࡔࡅࡌ ࡄࡀࡅࡓࡀࡍ ࡅࡄࡀࡅࡓࡀࡓࡀࡍ ࡖ ࡉࡀࡅࡀࡓ ࡒࡀࡃࡌࡀࡉࡀ ࡒࡀࡉࡀࡌࡁࡇ ࡏࡅࡕࡓࡉࡀ ࡁࡉࡀࡓࡃࡍࡀ ࡂࡅࡐࡍࡉࡀ ࡖ ࡄࡉࡉࡀ ࡓࡀࡅࡆࡉࡀ ࡄࡉࡁࡉࡋ ࡒࡀࡉࡀࡌࡁࡇ ࡍࡉࡔࡌࡀࡕࡀ ࡄࡀࡉࡀࡕࡀ ࡁࡉࡀࡓࡃࡍࡀ ࡖ ࡔࡉࡄࡉࡀ ࡋࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡋࡃࡀࡅࡓࡀ ࡕࡀࡒࡍࡀ ࡁࡇ ࡕࡓࡉࡑ ࡅࡏࡕࡒࡀࡉࡀࡌ ࡁࡉࡕ ࡓࡅࡓࡁࡀࡍࡉࡀ ࡍࡉࡎࡒࡀ ࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡀࡄࡕࡀ ࡋࡉࡀࡓࡃࡍࡀ ࡅࡌࡉࡑࡈࡉࡁࡀ ࡍࡉࡄࡆࡅࡍࡇ ࡋࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡋࡃࡀࡅࡓࡀ ࡕࡀࡒࡍࡀ ࡅࡄࡉࡉࡀ ࡆࡀࡊࡉࡍ ࡎ ࡀ ࡄࡀࡆࡉࡍ ࡐࡅࡂࡃࡀࡌࡀ ࡖ ࡂࡀࡅࡀࡆࡀ ࡒࡓࡉࡀ ࡋࡂࡀࡅࡀࡆࡀ ࡖ ࡆࡀࡉࡕࡀ ࡅࡃࡅࡑࡀ ࡁࡉࡀࡓࡃࡍࡀ ࡅࡄࡀࡉࡆࡀࡊ ࡒࡓࡉࡀ ࡌࡀࡑࡁࡅࡕࡀ ࡎࡀ ࡎࡀ

15. ࡏࡎࡉࡓ ࡉࡀࡌࡀ ࡅࡏࡎࡉࡓࡉࡍ ࡕࡓࡉࡍ ࡊࡉࡐࡇ ࡖ ࡉࡀࡌࡀ ࡏࡎࡉࡓࡉࡍ ࡃࡀࡉࡅࡉࡀ ࡅࡔࡉࡃࡉࡀ ࡅࡐࡉࡒࡃࡉࡀ ࡅࡋࡉࡄࡀࡍࡉࡀ ࡄࡅࡌࡓࡉࡀ ࡆࡀࡃࡀࡍࡉࡀࡕࡀ ࡏࡎࡉࡓࡉࡀ ࡕࡋࡀࡕࡌࡀ ࡅࡔࡉࡕࡉࡍ ࡓࡀࡆࡉࡀ ࡖ ࡁࡂࡅ ࡁࡀࡉࡕࡀ ࡏࡎࡉࡓࡍࡀ ࡅࡄࡕࡉࡌࡍࡀ ࡀࡍࡀ ࡅࡋࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡀࡄࡕࡀ ࡋࡉࡀࡓࡃࡍࡀ ࡅࡌࡉࡑࡈࡉࡁࡀ ࡁࡄࡀࡕࡌࡀ ࡖ ࡄࡉࡉࡀ ࡓࡅࡓࡁࡉࡀ ࡍࡅࡊࡓࡀࡉࡉࡀ ࡁࡌࡀ ࡓࡁࡀ ࡅࡁࡉࡀ ࡓࡁࡀ ࡅࡁࡀࡆ ࡓࡁࡀ ࡅࡁࡀࡆࡉࡆ ࡓࡁࡀ ࡅࡁࡀࡎ ࡓࡁࡀ ࡅࡁࡀࡎࡉࡍ ࡓࡁࡀ ࡅࡁࡀࡎ ࡉࡀࡌࡀ ࡏࡎࡉࡓࡉࡀ ࡊࡅࡌࡓࡉࡀ ࡆࡀࡁࡉࡀ ࡅࡀࡃࡉࡃࡉࡀ ࡅࡔࡀࡕࡀࡌࡉࡀ ࡌࡓࡀࡔࡌࡀࡍࡉࡀ ࡔࡅࡁࡀ ࡓࡀࡆࡉࡀ ࡖ ࡁࡂࡅ ࡉࡀࡌࡀ ࡊࡅࡋ ࡃࡀࡉࡅࡀ ࡁࡔࡅࡌࡇ ࡅࡊࡅࡋ ࡎࡀࡄࡓࡀ ࡁࡊࡉࡍࡉࡀࡍࡇ ࡅࡊࡅࡋ ࡄࡅࡌࡀࡓࡕࡀ ࡐࡀࡕࡉࡊࡓࡀ ࡖ ࡓࡉࡔࡉࡇ ࡍࡉࡔࡒࡅࡋ ࡅࡂࡉࡋࡉࡀ ࡐࡀࡓࡑࡅࡐࡇ ࡍࡉࡃࡀࡋࡉࡀ ࡋࡍࡀࡐࡔࡉࡇ ࡓࡁࡅࡕࡀ ࡀࡋࡀࡍࡐࡉࡀ ࡂࡀࡁࡓࡀ ࡍࡅࡊࡓࡀࡉࡀ ࡕࡉࡎࡁࡇ ࡄࡉࡍ ࡀࡋࡀࡍࡐࡀࡉࡀࡍ ࡖ ࡄࡀࡋࡉࡍ ࡍࡉࡔࡌࡀࡕࡀ ࡖ ࡌࡀࡎࡂࡉࡀ ࡋࡉࡀࡓࡃࡍࡀ ࡋࡁࡉࡔ ࡍࡉࡎࡊࡉࡀ ࡅࡍࡉࡕࡀࡌࡄࡉࡀ ࡅࡍࡉࡔࡒࡅࡐ ࡁࡉࡀࡄࡀ ࡉࡀࡄࡀ ࡅࡁࡆࡄࡀ ࡆࡄࡀ ࡅࡁࡌࡀࡋࡀࡊࡉࡀ ࡖ ࡏࡔࡕࡀࡃࡀࡓ ࡅࡀࡕࡅࡍ ࡏࡋࡀࡅࡀࡉࡄࡅࡍ ࡆࡄࡀ ࡌࡍ ࡒࡅࡃࡀࡌࡀࡉࡄࡅࡍ ࡅࡌࡍ ࡆࡉࡅࡇ ࡊࡁࡀࡓ ࡏࡋࡀࡅࡀࡉࡄࡅࡍ ࡆࡄࡀ ࡅࡏࡕࡀࡆࡄࡀ ࡔࡅࡁࡀ ࡔࡅࡓࡉࡀ ࡖ ࡐࡀࡓࡆࡋࡀ ࡄࡃࡉࡓࡅࡋࡉࡀ ࡋࡃࡉࡋࡉࡀ ࡖ ࡄࡀࡃࡀࡓ ࡄࡀࡉࡀࡔࡅࡌ ࡊࡅࡔࡈࡀ ࡒࡀࡃࡌࡀࡉࡀ ࡋࡍࡀࡐࡔࡉࡇ ࡅࡄࡉࡉࡀ ࡆࡀࡊࡉࡍ ࡎࡀ

16. ࡂࡉࡌࡓࡀ ࡀࡍࡀ ࡂࡌࡉࡓࡀ ࡖ ࡓࡌࡉࡍࡀ ࡁࡌࡉࡑࡀࡕ ࡀࡋࡌࡉࡀ ࡅࡃࡀࡓࡉࡀ ࡀࡍࡀ ࡒࡅࡓࡃࡀࡉࡀ ࡀࡍࡀ ࡖ ࡐࡀࡓࡆࡋࡀ ࡅࡍࡉࡓࡁࡀ ࡓࡁࡀ ࡖ ࡂࡋࡀࡋࡀ ࡊࡅࡋ ࡃࡀࡉࡅࡀ ࡖ ࡈࡓࡉࡁࡉࡀ ࡂࡄࡉࡐ ࡅࡈࡓࡉࡕࡉࡁࡇ ࡂࡄࡀࡐࡕࡇ ࡊࡅࡋ ࡃࡀࡉࡅࡀ ࡖ ࡓࡉࡔࡉࡇ ࡍࡉࡔࡒࡅࡋ ࡅࡊࡅࡋ ࡄࡅࡌࡀࡓࡕࡀ ࡖ ࡌࡃࡀࡋࡉࡀ ࡂࡉࡋࡉࡀ ࡐࡀࡓࡑࡅࡐࡉࡀ ࡀࡋࡀࡍࡐࡉࡀ ࡄࡀࡋࡉࡍ ࡍࡉࡔࡌࡀࡕࡀ ࡋࡁࡉࡔ ࡍࡉࡎࡊࡉࡀ ࡅࡍࡉࡕࡉࡌࡄࡉࡀ ࡅࡍࡉࡔࡒࡅࡐ ࡁࡏࡅࡎࡐࡀࡓ ࡌࡀࡍࡄࡀࡓࡁࡏࡉࡋ ࡏࡎࡕࡀࡒࡋࡅࡎ ࡉࡀࡋࡃࡀ ࡆࡅࡈࡀ ࡖ ࡋࡌࡀࡌࡁࡅࡂࡉࡀ ࡃࡀࡊࡉࡉࡀ ࡖ ࡍࡄࡅࡓࡀ ࡔࡓࡉࡀ ࡅࡍࡉࡕࡀࡌࡄࡉࡀ ࡁࡂࡅࡓࡌࡀࡉࡆࡀ ࡖ ࡌࡉࡀ ࡖ ࡏࡕࡉࡌࡄࡀࡉࡀࡁࡇ ࡍࡅࡓࡀ ࡅࡃࡉࡄࡊࡀࡕ ࡁࡄࡀࡉࡋࡇ ࡖ ࡌࡀࡍ ࡀࡎࡉࡀ ࡅࡁࡄࡀࡉࡋࡀࡉࡄࡅࡍ ࡖ ࡁࡄࡉࡓࡉࡀ ࡆࡉࡃࡒࡀ ࡅࡄࡉࡉࡀ ࡆࡀࡊࡉࡍ ࡎࡀ

17. ࡆࡄࡀ ࡅࡏࡕࡀࡆࡄࡀ ࡊࡅࡋࡄࡉࡍ ࡓࡅࡄࡉࡀ ࡁࡉࡔࡀࡕࡀ ࡀࡒࡀࡕࡀ ࡆࡀࡃࡀࡍࡉࡀࡕࡀ ࡆࡄࡀ ࡀࡈࡀࡓ ࡅࡊࡁࡅࡑ ࡅࡏࡕࡁࡀࡈࡀࡋ ࡌࡍ ࡒࡅࡃࡀࡌ ࡆࡉࡅࡇ ࡅࡍࡄࡅࡓࡇ ࡖ ࡌࡀࡍࡃࡀ ࡖ ࡄࡉࡉࡀ ࡐࡉࡓࡉࡀࡅࡉࡎ ࡆࡉࡅࡀ ࡅࡐࡉࡓࡉࡀࡐࡉࡋ ࡌࡀࡋࡀࡊࡀ ࡐࡓࡀࡋࡉࡀ ࡄࡀࡍࡃࡀࡌࡉࡀ ࡒࡅࡌࡀࡕ ࡏࡄࡅࡕ ࡋࡒࡅࡃࡀࡌࡀࡉࡉࡍ ࡖ ࡄࡀࡋࡉࡍ ࡍࡉࡔࡌࡀࡕࡀ ࡖ ࡄࡉࡉࡀ ࡕࡀࡒࡅࡍࡀࡕࡀ ࡅࡓࡀࡅࡀࡆࡀࡕࡀ ࡔࡉࡋࡌࡀࡉ ࡅࡍࡉࡃࡁࡀࡉ ࡐࡓࡀ ࡒࡓࡅࡁ ࡅࡌࡀࡈࡅࡍ ࡀࡍࡀࡕࡅࡍ ࡄࡅࡋࡉࡀ ࡎࡀࡄࡃࡀ ࡋࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡀࡄࡕࡀ ࡋࡉࡀࡓࡃࡍࡀ ࡅࡌࡉࡑࡈࡉࡁࡀ ࡀࡓࡁࡀ ࡏࡅࡕࡓࡉࡀ ࡁࡍࡉࡀ ࡍࡄࡅࡓࡀ ࡓࡄࡅࡌ ࡄࡀࡉ ࡏࡉࡍ ࡄࡀࡉ ࡔࡅࡌ ࡄࡀࡉ ࡆࡀࡌࡀࡓ ࡄࡀࡉ ࡀࡍࡀࡕࡅࡍ ࡄࡅࡋࡉࡀ ࡎࡀࡄࡃࡀ ࡁࡉࡅࡌࡀ ࡓࡁࡀ ࡖ ࡌࡀࡐࡉࡒࡕࡀ ࡉࡀࡓࡃࡍࡀ ࡓࡁࡀ ࡖ ࡄࡉࡉࡀ ࡌࡀࡔࡁࡉࡍࡀࡋࡀࡊ ࡅࡌࡀࡅࡌࡉࡍࡀࡋࡀࡊ ࡁࡏࡅࡑࡀࡓ ࡍࡄࡅࡓࡀ ࡍࡉࡀࡄࡀ ࡅࡎࡉࡌࡀࡊࡀ ࡓࡁࡀ ࡖ ࡄࡉࡉࡀ ࡖ ࡀࡕࡓࡀ ࡋࡁࡉࡔࡉࡀ ࡋࡀࡕࡀࡕࡍࡀࡋࡅࡍ ࡋࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡀࡄࡕࡀ ࡋࡂࡀࡅࡀࡊ ࡅࡀࡎࡅࡕࡀ

ࡕࡉࡄࡅࡉࡋࡉࡍ ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡍࡅࡊࡓࡀࡉࡉࡀ ࡍࡅࡊࡓࡀࡉࡉࡀ ࡌࡍ ࡀࡋࡌࡉࡀ ࡅࡒࡀࡉࡀࡌࡉࡍ ࡄࡉࡉࡀ ࡁࡔࡊࡉࡍࡀࡕࡅࡍ ࡅࡄࡉࡉࡀ ࡆࡀࡊࡉࡍ ࡎࡀ ࡎࡀ

18. ࡁࡔࡅࡌࡀ ࡖ ࡄࡉࡉࡀ ࡐࡉࡓࡉࡀࡅࡉࡎ ࡉࡀࡓࡃࡍࡀ ࡓࡁࡀ ࡖ ࡄࡉࡉࡀ ࡒࡀࡃࡌࡀࡉࡉࡀ ࡖ ࡊࡅࡋࡇ ࡀࡎࡀࡅࡀࡕࡀ ࡗ ࡆࡉࡅࡇ ࡉࡀࡒࡉࡃ ࡁࡂࡅ ࡕࡀࡍࡀ ࡗ ࡏࡒࡀࡃ ࡄࡉࡉࡀ ࡅࡍࡁࡀࡈ ࡄࡉࡉࡀ ࡁࡆࡉࡅࡀ ࡓࡁࡀ ࡖ ࡉࡀࡒࡉࡃࡁࡅࡍ ࡎࡋࡉࡒ ࡄࡉࡉࡀ ࡅࡔࡊࡀࡍ ࡔࡊࡉࡍࡕࡀ ࡏࡋࡀࡅࡉࡀ ࡕࡀࡍࡀ ࡄࡀࡌ ࡆࡉࡅࡀ ࡐࡔࡀࡓ ࡕࡀࡍࡀ ࡐࡕࡀ ࡄࡅࡍ ࡌࡉࡀ ࡅࡏࡕࡒࡀࡉࡀࡌ ࡄࡉࡉࡀ ࡁࡌࡀ ࡖ ࡍࡀࡐࡔࡀࡉࡄࡅࡍ ࡅࡒࡀࡉࡉࡌ ࡉࡅࡓ ࡁࡉࡅࡓ ࡅࡏࡕࡓࡀࡅࡓࡀࡁ ࡄࡉࡉࡀ ࡁࡆࡉࡅࡀ ࡖ ࡍࡀࡐࡔࡀࡉࡄࡅࡍ ࡅࡁࡆࡉࡅࡀ ࡓࡁࡀ ࡖ ࡉࡀࡒࡉࡃࡁࡅࡍ ࡅࡒࡀࡉࡉࡌ ࡄࡉࡉࡀ ࡋࡄࡉࡉࡀ ࡁࡂࡅ ࡌࡉࡀ ࡏࡋࡀࡅࡉࡀ ࡌࡉࡀ ࡐࡉࡓࡀ ࡐࡓࡀ ࡅࡔࡊࡉࡍࡕࡀ ࡔࡊࡀࡍ ࡉࡀࡓࡃࡍࡀ ࡓࡁࡀ ࡖ ࡄࡉࡉࡀ ࡌࡀࡃࡊࡉࡓࡍࡀࡋࡀࡊ ࡁࡏࡅࡑࡀࡓ ࡍࡄࡅࡓࡀ ࡎࡉࡌࡀࡊࡀ ࡅࡍࡉࡀࡄࡀ ࡓࡁࡀ ࡖ ࡄࡉࡉࡀ ࡁࡉࡅࡔࡀࡌࡉࡍ ࡃࡀࡊࡉࡀ ࡖ ࡔࡓࡉࡀ ࡋࡏࡅࡑࡓࡉࡀ ࡖ ࡌࡉࡀ ࡅࡋࡌࡀࡌࡁࡅࡂࡉࡀ ࡖ ࡍࡄࡅࡓࡀ ࡁࡉࡅࡎࡌࡉࡓ ࡂࡀࡁࡓࡀ ࡖ ࡋࡀࡅࡐࡇ ࡀࡋࡅࡀࡕ ࡌࡉࡀ ࡄࡅࡀ ࡁࡀࡃࡀࡕࡀࡍ ࡅࡉࡀࡃࡀࡕࡀࡍ ࡖ ࡉࡀࡕࡁࡉࡀ ࡋࡁࡀࡁࡀ ࡖ ࡄࡉࡉࡀ ࡅࡁࡀࡉࡉࡍ ࡋࡓࡅࡄࡉࡀ ࡅࡍࡉࡔࡌࡀࡕࡀ ࡁࡀࡕࡓࡀ ࡖ ࡍࡄࡅࡓࡀ ࡔࡉࡋࡌࡀࡉ ࡅࡍࡉࡃࡁࡀࡉ ࡖ ࡎࡀࡄࡃࡅࡕࡀ ࡒࡅࡃࡀࡌ ࡄࡉࡉࡀ ࡓࡁࡉࡀ ࡒࡀࡃࡌࡀࡉࡉࡀ ࡌࡎࡀࡄࡃࡉࡀ ࡄࡆࡅࡍࡉࡍ ࡋࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡀࡐࡒࡀ ࡌࡍ ࡄࡁࡉࡋࡀ ࡋࡁࡉࡍࡉࡀࡍࡀ ࡅࡌࡍ ࡈࡀࡉࡀ ࡋࡔࡓࡀࡓࡀ ࡅࡌࡍ ࡃࡀࡓࡉࡀ ࡃࡀࡄࡀࡋࡕࡀ ࡖ ࡀࡋࡀࡄࡅࡕࡀ ࡖ ࡁࡀࡉࡕࡀ ࡋࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡃࡀࡅࡓࡀ ࡕࡀࡒࡍࡀ ࡄࡉࡍ ࡖ ࡏࡌࡀࡓࡋࡇ ࡅࡍࡉࡔࡌࡀ ࡅࡃࡒࡓࡉࡋࡇ ࡅࡍࡉࡕࡒࡀࡉࡀࡌ ࡅࡍࡉࡕࡋࡉࡐ ࡁࡋࡀࡅࡐࡀ ࡖ ࡄࡉࡉࡀ ࡅࡍࡉࡕࡉࡁࡍࡉࡀ ࡁࡁࡉࡍࡉࡀࡍࡀ ࡓࡁࡀ ࡖ ࡔࡓࡀࡓࡀ ࡀࡄࡉࡃ ࡏࡃࡀ ࡅࡐࡀࡓࡅࡀࡍࡒࡀ ࡅࡌࡃࡀࡁࡓࡀࡍࡀ ࡄࡅࡉࡋࡇ ࡋࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡃࡀࡅࡓࡀ ࡕࡀࡒࡍࡀ ࡄࡉࡍ ࡖ ࡏࡌࡀࡓࡋࡇ ࡅࡋࡀࡍࡉࡔࡌࡀ ࡅࡃࡒࡓࡉࡋࡇ ࡅࡋࡀࡍࡉࡕࡒࡀࡉࡀࡌ ࡄࡅ ࡍࡉࡔࡕࡀࡉࡀࡋ ࡅࡀࡍࡀ ࡋࡀࡏࡔࡕࡀࡉࡀࡋ ࡁࡌࡉࡌࡀࡓ ࡊࡅࡔࡈࡀ ࡅࡒࡀࡉࡅࡌࡉࡀ ࡉࡅࡊࡀࡁࡀࡓ ࡆࡉࡅࡀ ࡅࡒࡀࡉࡀࡌࡉࡍ ࡄࡉࡉࡀ ࡁࡔࡊࡉࡍࡀࡕࡅࡍ ࡅࡄࡉࡉࡀ ࡆࡀࡊࡉࡍ ࡎࡀࡎࡀ ࡅࡄࡀࡉࡆࡀࡊ ࡒࡓࡉࡀ ࡁࡔࡅࡌࡀ ࡖ ࡄࡉࡉࡀ ࡓࡁࡉࡀ ࡊࡅࡋ ࡌࡀࡍ ࡖ ࡏࡕࡁࡇ ࡄࡀࡉࡋࡀ ࡅࡓࡀࡄࡌࡇ ࡍࡀࡐࡔࡀ ࡍࡉࡕࡉࡀ ࡅࡍࡉࡍࡄࡉࡕ ࡋࡉࡀࡓࡃࡍࡀ ࡅࡍࡉࡑࡈࡁࡀ ࡅࡍࡉࡒࡀࡁࡉࡋ ࡃࡀࡊࡉࡀ ࡓࡅࡔࡅࡌࡀ ࡅࡍࡉࡋࡁࡉࡔ ࡏࡅࡑࡈࡋࡉࡀ ࡖ ࡆࡉࡅࡀ ࡅࡍࡉࡕࡓࡀࡑ ࡁࡓࡉࡔࡉࡇ ࡊࡋࡉࡋࡀ ࡓࡀࡅࡆࡉࡀ .. ࡄࡀࡊࡀ ࡑࡁࡉࡍࡅࡍ ࡋࡍࡉࡔࡌࡀࡕࡀ ࡅࡍࡉࡍࡉࡄࡕࡅࡍ ࡌࡍ ࡏࡅࡄࡓࡀࡊ ࡅࡍࡉࡈࡉࡌࡔࡅࡍ ࡕࡋࡀࡕࡀ ࡈࡅࡌࡔࡉࡀࡕࡀ ࡅࡌࡀࡓࡂࡍࡀࡊ ࡋࡎࡌࡀࡋࡀࡊ ࡍࡉࡄࡅࡉࡀ ࡑࡁࡉࡍࡅࡍ ࡁࡉࡀࡌࡉࡍࡀࡊ ࡅࡋࡂࡅࡈࡅࡍࡅࡍ ࡁࡎࡌࡀࡋࡀࡊ ࡅࡀࡅࡕࡉࡁࡉࡍࡅࡍ ࡁࡉࡍࡉࡀ ࡃࡉࡋࡀࡊ ࡋࡌࡀࡓࡂࡍࡀࡊ ࡅࡌࡔࡉࡍࡅࡍ ࡕࡋࡀࡕࡀ ࡈࡅࡌࡔࡉࡀࡕࡀ ࡅࡓࡔࡉࡌࡉࡍࡅࡍ ࡕࡋࡀࡕࡀ ࡓࡅࡔࡅࡌࡉࡀ ࡁࡉࡀࡌࡉࡍࡀࡊ ࡅࡀࡍࡐࡀࡊ ࡋࡁࡀࡁࡀ ࡖ ࡁࡅࡕࡀ ࡍࡉࡄࡅࡉࡀ . ࡅࡗ ࡓࡀࡔࡌࡀࡕࡋࡅࡍ ࡀࡌࡅࡓ ࡐࡋࡀࡍ ࡁࡓ ࡐࡋࡀࡍࡉࡕࡀ ࡓࡔࡉࡌࡉࡕ ࡁࡓࡅࡔࡅࡌࡀ ࡖ ࡄࡉࡉࡀ ࡔࡅࡌࡀ ࡖ ࡄࡉࡉࡀ ࡅࡔࡅࡌࡀ ࡖ ࡌࡀࡍࡃࡀ ࡖ ࡄࡉࡉࡀ ࡌࡀࡃࡊࡀࡓ ࡏࡋࡀࡊ ࡑࡁࡉࡉࡕ ࡁࡌࡀࡑࡁࡅࡕࡀ ࡖ ࡁࡉࡄࡓࡀࡌ ࡓࡁࡀ ࡁࡓ ࡓࡅࡓࡁࡉࡀ ࡌࡀࡑࡁࡅࡕࡀࡊ ࡕࡍࡀࡈࡓࡀࡊ ࡅࡕࡉࡎࡀࡒ ࡋࡓࡉࡔ ࡔࡅࡌࡀ ࡖ ࡄࡉࡉࡀ ࡅࡔࡅࡌࡀ ࡖ ࡌࡀࡍࡃࡀ ࡖ ࡄࡉࡉࡀ ࡌࡀࡃࡊࡀࡓ ࡏࡋࡀࡊ ࡅࡀࡔࡒࡉࡍࡅࡍ ࡕࡋࡀࡕࡀ ࡄࡅࡐࡍࡉࡀ ࡌࡉࡀ ࡅࡀࡌࡀࡓࡋࡅࡍ ࡔࡅࡕ ࡅࡏࡕࡀࡎࡉࡀ ࡅࡏࡕࡒࡀࡉࡀࡌ ࡔࡅࡌࡀ ࡖ ࡄࡉࡉࡀ ࡅࡔࡅࡌࡀ ࡖ ࡌࡀࡍࡃࡀ ࡖ ࡄࡉࡉࡀ ࡌࡀࡃࡊࡀࡓ ࡏࡋࡀࡊ ࡅࡒࡓࡉࡀ ࡌࡀࡍࡃࡀ ࡒࡓࡀࡍ ࡋࡊࡋࡉࡋࡀ ࡖ ࡀࡎࡀ ࡅࡕࡓࡅࡑ ࡁࡓࡉࡔࡀࡉࡀࡍ ࡅࡗ ࡌࡀࡕࡍࡀ ࡏࡃࡀࡊ ࡋࡓࡉࡔࡀࡉࡀࡍ ࡅࡒࡓࡉࡀ ࡋࡄࡀࡋࡉࡍ ࡔࡅࡌࡄࡀࡕࡀ ࡊࡀࡎࡉࡀࡕࡀ . ࡔࡅࡌࡀ ࡖ ࡀࡉࡍࡀ ࡓࡀࡁࡕࡉࡀ ࡊࡀࡎࡉࡕࡀ ࡒࡀࡃࡌࡀࡉࡕࡀ ࡌࡀࡃࡊࡀࡓ ࡏࡋࡀࡊ ࡔࡅࡌࡀ ࡖ ࡎࡉࡍࡃࡉࡓࡊࡀ ࡓࡁࡀ ࡒࡀࡃࡌࡀࡉࡀ ࡌࡀࡃࡊࡀࡓ ࡏࡋࡀࡊ ࡔࡅࡌࡀ ࡖ ࡔࡉࡔࡋࡀࡌ ࡓࡁࡀ ࡌࡀࡃࡊࡀࡓ ࡏࡋࡀࡊ ࡔࡅࡌࡀ ࡖ ࡏࡆࡋࡀࡕ ࡓࡀࡁࡕࡉࡀ ࡌࡀࡃࡊࡀࡓ ࡏࡋࡀࡊ ࡔࡅࡌࡀ ࡖ ࡉࡀࡅࡀࡓ ࡓࡁࡀ ࡌࡀࡃࡊࡀࡓ ࡏࡋࡀࡊ ࡔࡅࡌࡀ ࡖ ࡎࡉࡌࡀࡕ ࡄࡉࡉࡀ ࡌࡀࡃࡊࡀࡓ ࡏࡋࡀࡊ ࡔࡅࡌࡀ ࡖ ࡉࡅࡊࡀࡁࡀࡓ ࡓࡁࡀ ࡌࡀࡃࡊࡀࡓ ࡏࡋࡀࡊ ࡔࡅࡌ ࡌࡀࡍࡀ ࡅࡃࡌࡅࡕࡇ ࡌࡀࡃࡊࡀࡓ ࡏࡋࡀࡊ ࡔࡅࡌࡀ ࡖ ࡓࡀࡆࡀ ࡓࡁࡀ ࡅࡐࡅࡂࡃࡀࡌࡉࡀ ࡊࡀࡎࡉࡀ ࡌࡀࡃࡊࡀࡓ ࡏࡋࡀࡊ ࡔࡅࡌࡀ ࡖ ࡎࡄࡀࡒ ࡆࡉࡅࡀ ࡓࡁࡀ ࡒࡀࡃࡌࡀࡉࡀ ࡌࡀࡃࡊࡀࡓ ࡏࡋࡀࡊ ࡔࡅࡌࡀ ࡖ ࡎࡀࡌ ࡆࡉࡅࡀ ࡃࡀࡊࡉࡀ ࡁࡅࡊࡓࡀ ࡄࡀࡁࡉࡁࡀ ࡓࡁࡀ ࡒࡀࡃࡌࡀࡉࡀ ࡌࡀࡃࡊࡀࡓ ࡏࡋࡀࡊ ࡔࡅࡌࡀ ࡖ ࡄࡉࡉࡀ ࡅࡔࡅࡌࡀ ࡖ ࡌࡀࡍࡃࡀ ࡖ ࡄࡉࡉࡀ ࡌࡀࡃࡊࡀࡓ ࡏࡋࡀࡊ ࡅࡄࡀࡉࡆࡀࡊ ࡐࡔࡅࡈ ࡊࡅࡔࡈࡀ ࡌࡉࡍࡀࡉࡀࡍ ࡅࡍࡀࡎࡒࡀ ࡋࡒࡅࡃࡀࡌࡀࡊ . ࡄࡀࡉࡆࡀࡊ ࡑࡁࡀ ࡒࡀࡍࡉࡍࡀࡊ ࡅࡌࡅࡋࡉࡉࡇ ࡌࡉࡀ ࡅࡀࡄࡁࡀࡋࡇ ࡋࡌࡀࡍ ࡖ ࡒࡀࡉࡉࡌ ࡋࡂࡉࡃࡀ ࡑࡁࡀ ࡍࡉࡀࡓࡀࡊ ࡅࡄࡀࡉࡆࡀࡊ ࡓࡌࡉࡀ ࡏࡍࡉࡀࡍࡀ ࡁࡓࡉࡔ ࡌࡉࡀ ࡍࡉࡐࡒࡉࡕ . ࡅࡁࡓࡉࡊࡉࡕ ࡕࡉࡓࡀ ࡁࡀࡓࡀࡉࡀ ࡅࡒࡓࡉࡀ ࡒࡀࡉࡀࡌࡕࡀ ࡖ ࡉࡀࡓࡃࡍࡀ . ࡅࡗ ࡒࡀࡓࡉࡕ ࡏࡎࡉࡓ ࡉࡀࡌࡀ ࡅࡂࡉࡌࡓࡀ ࡀࡍࡀ ࡂࡌࡉࡓࡀ ࡅࡆࡄࡀ ࡅࡏࡕࡀࡆࡄࡀ ࡅࡐࡉࡓࡉࡀࡅࡉࡎ ࡅࡊࡅࡋ ࡖ ࡊࡃࡉࡁ ࡍࡉࡔࡌࡀࡕࡀ ࡏࡅ ࡕࡀࡓࡕࡉࡍ ࡏࡅ ࡕࡋࡀࡕࡀ ࡏࡅ ࡍࡀࡐࡔࡀ ࡄࡀࡅࡉࡀࡍ ࡍࡉࡔࡌࡀࡕࡀ ࡀࡌࡅࡓ ࡗ ࡖ ࡊࡕࡉࡁ ࡏࡅ ࡍࡉࡔࡉࡌࡕࡀ ࡄࡃࡀ ࡄࡏ ࡀࡌࡅࡓ ࡍࡉࡔࡉࡌࡕࡀ ࡖ ࡐࡋࡀࡍ ࡖ ࡍࡄࡉࡕ ࡋࡉࡀࡓࡃࡍࡀ ࡅࡏࡑࡈࡁࡀ ࡅࡒࡀࡁࡉࡋ ࡃࡀࡊࡉࡀ ࡓࡅࡔࡅࡌࡀ ࡅࡁࡀࡋࡀࡊ ࡋࡌࡀࡑࡁࡅࡕࡀࡊ ࡎࡀ ࡎࡀ

19. ࡌࡀࡍࡃࡀ ࡒࡓࡀࡍ ࡏࡅࡕࡓࡉࡀ ࡒࡀࡉࡌࡅࡍ ࡆࡉࡅࡀ ࡀࡋࡁࡔࡅࡍ ࡅࡍࡄࡅࡓࡀ ࡊࡀࡎࡉࡅࡍ ࡄࡀࡆࡀ ࡆࡁࡀࡍ ࡊࡋࡉࡋࡀ ࡕࡓࡀࡑࡋࡉࡀ ࡁࡓࡉࡔࡀࡉ ࡃࡉࡋࡉࡀ ࡅࡋࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡀࡄࡕࡀ ࡋࡉࡀࡓࡃࡍࡀ ࡅࡌࡉࡑࡈࡉࡁࡀ ࡖ ࡀࡋࡅࡀࡕࡇ ࡍࡀࡄࡓࡀ ࡅࡓࡉࡄࡇ ࡁࡀࡎࡉࡌ ࡖ ࡋࡀࡔࡀࡄࡉࡀ ࡅࡋࡀࡐࡀࡉࡉࡀ ࡅࡀࡈࡉࡓࡐࡀ ࡌࡉࡍࡇ ࡋࡀࡍࡀࡕࡀࡓ ࡅࡌࡔࡀࡁࡉࡍ ࡄࡉࡉࡀ ࡎࡀ ࡄࡀࡆࡉࡍ ࡐࡅࡂࡃࡀࡌࡀ ࡖ ࡊࡋࡉࡋࡀ ࡖ ࡌࡀࡑࡁࡅࡕࡀ ࡄࡅ ࡏࡒࡓࡉࡀ ࡋࡊࡋࡉࡋࡀ ࡖ ࡀࡎࡀ ࡅࡕࡓࡀࡑࡋࡉࡍ ࡁࡓࡉࡔࡀࡉࡉࡍ ࡋࡍࡉࡔࡀࡌࡕࡀ ࡖ ࡑࡀࡁࡉࡕ ࡎࡀ

20. ࡁࡓࡉࡊࡉࡕ ࡕࡉࡓࡀ ࡁࡀࡓࡀࡉࡀ ࡅࡁࡓࡉࡊࡉࡕ ࡃࡀࡅࡓࡀ ࡕࡀࡒࡍࡀ ࡁࡓࡉࡊࡉࡕࡅࡍ ࡆࡉࡅࡉࡀ ࡎࡀࡂࡉࡉࡀ ࡅࡍࡄࡅࡓࡉࡀ ࡓࡅࡓࡁࡉࡀ ࡊࡀࡁࡉࡓࡉࡀ ࡁࡓࡉࡊࡉࡀ ࡅࡌࡔࡀࡁࡉࡀ ࡅࡌࡉࡀࡒࡓࡉࡀ ࡏࡅࡕࡓࡉࡀ ࡖ ࡔࡓࡉࡍ ࡋࡉࡀࡓࡃࡍࡀ ࡀࡍࡀࡕ ࡉࡀࡓࡃࡍࡀ ࡍࡄࡀ ࡋࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡄࡉࡕ ࡋࡂࡀࡅࡀࡊ ࡅࡀࡎࡅࡕࡀ ࡕࡉࡄࡅࡉࡋࡉࡍ ࡁࡌࡉࡌࡀࡓ ࡊࡅࡔࡈࡀ ࡅࡒࡀࡉࡅࡌࡉࡀ ࡉࡅࡊࡀࡁࡀࡓ ࡆࡉࡅࡀ ࡅࡄࡉࡉࡀ ࡆࡀࡊࡉࡍ ࡎ ࡀ ࡒࡀࡉࡀࡌࡕࡀ ࡖ ࡉࡀࡓࡃࡍࡀ ࡄࡏ . ࡗ ࡌࡒࡀࡉࡌࡉࡕ ࡉࡀࡓࡃࡍࡀ ࡏࡅ ࡍࡉࡔࡌࡀࡕࡀ ࡖ ࡑࡀࡁࡉࡕ ࡀࡌࡅࡓ ࡗ ࡖ ࡊࡕࡉࡁ ࡒࡓࡉࡀ ࡏࡅ ࡍࡉࡔࡉࡌࡕࡀ ࡄࡀࡃ ࡄࡏ ࡀࡌࡅࡓ ࡍࡉࡔࡉࡌࡕࡀ ࡖ ࡐࡋࡀࡍ ࡖ ࡍࡄࡉࡕ ࡋࡂࡀࡅࡀࡊ ࡅࡎࡀࡒ ࡋࡂࡉࡃࡀ ࡅࡒࡓࡉࡀ ࡌࡍ ࡉࡀࡓࡃࡍࡀ ࡎࡉࡋࡒࡉࡕ ࡎࡀ ࡎࡀ

21. ࡁࡔࡅࡌࡀ ࡖ ࡄࡉࡉࡀ ࡌࡍ ࡉࡀࡓࡃࡍࡀ ࡎࡉࡋࡒࡉࡕ ࡁࡊࡀࡍࡀ ࡖ ࡍࡉࡔࡌࡀࡕࡀ ࡐࡉࡂࡉࡕ ࡁࡊࡀࡍࡀ ࡐࡉࡂࡉࡕ ࡖ ࡍࡉࡔࡌࡀࡕࡀ ࡖ ࡁࡀࡁࡅࡍ ࡔࡉࡕࡉࡋ ࡌࡉࡕࡊࡀࡓࡊࡉࡀ ࡀࡌࡓࡉࡋࡇ ࡁࡄࡀࡉࡀࡊ ࡀࡁࡅࡍ ࡔࡉࡕࡉࡋ ࡀࡎࡂࡉࡀ ࡌࡉࡍࡀࡉࡀࡍ ࡋࡉࡀࡓࡃࡍࡀ ࡏࡅ ࡌࡀࡎࡂࡉࡍࡀ ࡌࡉࡍࡀࡉࡊࡉࡍ ࡋࡉࡀࡓࡃࡍࡀ ࡌࡀࡍ ࡍࡉࡄࡅࡉࡀ ࡏࡋࡀࡅࡀࡉࡊࡉࡍ ࡎࡀࡄࡃࡀ ࡄࡀࡃࡀ ࡖ ࡃࡍࡉࡀ ࡔࡀࡌࡉࡔ ࡏࡋࡀࡅࡀࡉࡀࡍ ࡍࡉࡄࡅࡉࡀ ࡁࡎࡀࡄࡃࡉࡀ ࡋࡀࡄࡅࡀ ࡖ ࡁࡀࡉࡉࡍࡀ ࡅࡋࡀࡄࡅࡀ ࡖ ࡍࡉࡔࡌࡀࡕ ࡑࡀࡁࡉࡀ ࡔࡀࡌࡉࡔ ࡖ ࡀࡌࡀࡓࡕࡉࡍ ࡏࡋࡇ ࡒࡀࡃࡉࡌ ࡃࡍࡀ ࡄࡀࡔࡉࡊ ࡀࡓࡀࡁ ࡔࡀࡌࡉࡔ ࡖ ࡀࡌࡀࡓࡕࡉࡍ ࡏࡋࡇ ࡔࡀࡌࡉࡔ ࡌࡉࡁࡈࡀࡋ ࡁࡀࡈࡉࡋ ࡌࡉࡁࡈࡀࡋ ࡁࡀࡈࡉࡋ ࡔࡀࡌࡉࡔ ࡅࡎࡂࡀࡃࡇ ࡌࡉࡁࡈࡀࡋ ࡁࡀࡈࡋࡉࡀ ࡌࡍ ࡉࡀࡓࡃࡍࡀ ࡎࡉࡋࡒࡉࡕ ࡁࡊࡀࡍࡀ ࡖ ࡍࡉࡔࡌࡀࡕࡀ ࡐࡉࡂࡉࡕ ࡁࡊࡀࡍࡀ ࡐࡉࡂࡉࡕ ࡖ ࡍࡉࡔࡌࡀࡕࡀ ࡖ ࡁࡀࡁࡅࡍ ࡔࡉࡕࡉࡋ ࡌࡉࡕࡊࡀࡓࡊࡉࡀ ࡀࡌࡓࡉࡋࡇ ࡁࡄࡀࡉࡀࡊ ࡀࡁࡅࡍ ࡔࡉࡕࡉࡋ ࡀࡎࡂࡉࡀ ࡌࡉࡍࡀࡉࡀࡍ ࡋࡉࡀࡓࡃࡍࡀ ࡏࡅ ࡌࡀࡎࡂࡉࡍࡀ ࡌࡉࡍࡀࡉࡊࡉࡍ ࡋࡉࡀࡓࡃࡍࡀ ࡌࡀࡍ ࡍࡉࡄࡅࡉࡀ ࡏࡋࡀࡅࡀࡉࡊࡉࡍ ࡎࡀࡄࡃࡀ ࡄࡀࡃࡀ ࡖ ࡃࡍࡉࡀ ࡎࡉࡓࡀ ࡏࡋࡀࡅࡀࡉࡀࡍ ࡍࡉࡄࡅࡉࡀ ࡁࡎࡀࡄࡃࡉࡀ ࡋࡀࡄࡅࡀ ࡖ ࡁࡀࡉࡉࡍࡀ ࡅࡋࡀࡄࡅࡀ ࡖ ࡍࡉࡔࡌࡀࡕ ࡑࡀࡁࡉࡀ ࡎࡉࡓࡀ ࡖ ࡀࡌࡀࡓࡕࡉࡍ ࡏࡋࡇ ࡄࡀࡔࡉࡊ ࡃࡍࡀ ࡒࡀࡃࡉࡌ ࡀࡓࡀࡁ ࡎࡉࡓࡀ ࡖ ࡀࡌࡀࡓࡕࡉࡍ ࡏࡋࡇ ࡎࡉࡓࡀ ࡌࡉࡁࡈࡀࡋ ࡁࡀࡈࡉࡋ ࡌࡉࡁࡈࡀࡋ ࡁࡀࡈࡉࡋ ࡎࡉࡓࡀ ࡅࡎࡂࡀࡃࡇ ࡌࡉࡁࡈࡀࡋ ࡁࡀࡈࡋࡉࡀ ࡌࡍ ࡉࡀࡓࡃࡍࡀ ࡎࡉࡋࡒࡉࡕ ࡁࡊࡀࡍࡀ ࡖ ࡍࡉࡔࡌࡀࡕࡀ ࡐࡉࡂࡉࡕ ࡁࡊࡀࡍࡀ ࡐࡉࡂࡉࡕ ࡖ ࡍࡉࡔࡌࡀࡕࡀ ࡖ ࡁࡀࡁࡅࡍ ࡔࡉࡕࡉࡋ ࡌࡉࡕࡊࡀࡓࡊࡉࡀ ࡀࡌࡓࡉࡋࡇ ࡁࡄࡀࡉࡀࡊ ࡀࡁࡅࡍ ࡔࡉࡕࡉࡋ ࡀࡎࡂࡉࡀ ࡌࡉࡍࡀࡉࡀࡍ ࡋࡉࡀࡓࡃࡍࡀ ࡏࡅ ࡌࡀࡎࡂࡉࡍࡀ ࡌࡉࡍࡀࡉࡊࡉࡍ ࡋࡉࡀࡓࡃࡍࡀ ࡌࡀࡍ ࡍࡉࡄࡅࡉࡀ ࡏࡋࡀࡅࡀࡉࡊࡉࡍ ࡎࡀࡄࡃࡀ ࡄࡀࡃࡀ ࡖ ࡉࡀࡒࡉࡃ ࡍࡅࡓࡀ ࡏࡋࡀࡅࡀࡉࡀࡍ ࡍࡉࡄࡅࡉࡀ ࡁࡎࡀࡄࡃࡉࡀ ࡋࡀࡄࡅࡀ ࡖ ࡁࡀࡉࡉࡍࡀ ࡅࡋࡀࡄࡅࡀ ࡖ ࡍࡉࡔࡌࡀࡕ ࡑࡀࡁࡉࡀ ࡍࡅࡓࡀ ࡖ ࡀࡌࡀࡓࡕࡉࡍ ࡏࡋࡇ ࡆࡉࡁࡍࡀ ࡁࡉࡅࡌࡀ ࡀࡅࡃࡀ ࡍࡅࡓࡀ ࡖ ࡀࡌࡀࡓࡕࡉࡍ ࡏࡋࡇ ࡍࡅࡓࡀ ࡌࡉࡁࡈࡀࡋ ࡁࡀࡈࡉࡋ ࡌࡉࡁࡈࡀࡋ ࡁࡀࡈࡉࡋ ࡍࡅࡓࡀ ࡅࡎࡂࡀࡃࡇ ࡌࡉࡁࡈࡀࡋ ࡁࡀࡈࡋࡉࡀ ࡌࡍ ࡉࡀࡓࡃࡍࡀ ࡎࡉࡋࡒࡉࡕ ࡁࡊࡀࡍࡀ ࡖ ࡍࡉࡔࡌࡀࡕࡀ ࡐࡉࡂࡉࡕ ࡁࡊࡀࡍࡀ ࡐࡉࡂࡉࡕ ࡖ ࡍࡉࡔࡌࡀࡕࡀ ࡖ ࡁࡀࡁࡅࡍ ࡔࡉࡕࡉࡋ ࡌࡉࡕࡊࡀࡓࡊࡉࡀ ࡀࡌࡓࡉࡋࡇ ࡁࡄࡀࡉࡀࡊ ࡀࡁࡅࡍ ࡔࡉࡕࡉࡋ ࡀࡎࡂࡉࡀ ࡌࡉࡍࡀࡉࡀࡍ ࡋࡉࡀࡓࡃࡍࡀ ࡏࡅ ࡌࡀࡎࡂࡉࡍࡀ ࡌࡉࡍࡀࡉࡊࡉࡍ ࡋࡉࡀࡓࡃࡍࡀ ࡌࡀࡍ ࡍࡉࡄࡅࡉࡀ ࡏࡋࡀࡅࡀࡉࡊࡉࡍ ࡎࡀࡄࡃࡀ ࡉࡀࡓࡃࡍࡀ ࡅࡕࡓࡉࡍ ࡊࡉࡐࡇ ࡏࡋࡀࡅࡀࡉࡀࡍ ࡍࡉࡄࡅࡉࡀ ࡁࡎࡀࡄࡃࡉࡀ ࡐࡉࡄࡕࡀ ࡅࡊࡅࡔࡈࡀ ࡅࡌࡀࡌࡁࡅࡂࡀ ࡏࡋࡀࡅࡀࡉࡀࡍ ࡍࡉࡄࡅࡉࡀ ࡁࡎࡀࡄࡃࡉࡀ ࡄࡀࡁࡔࡀࡁࡀ ࡅࡊࡀࡍࡀ ࡖ ࡆࡉࡃࡒࡀ ࡏࡋࡀࡅࡀࡉࡀࡍ ࡍࡉࡄࡅࡉࡀ ࡁࡎࡀࡄࡃࡉࡀ ࡌࡀࡔࡊࡍࡀ ࡖ ࡎࡀࡂࡃࡉࡍࡀࡁࡇ ࡏࡋࡀࡅࡀࡉࡀࡍ ࡍࡉࡄࡅࡉࡀ ࡁࡎࡀࡄࡃࡉࡀ ࡆࡉࡃࡒࡀ ࡖ ࡁࡊࡀࡍࡐࡀࡉࡀࡍ ࡏࡋࡀࡅࡀࡉࡀࡍ ࡍࡉࡄࡅࡉࡀ ࡁࡎࡀࡄࡃࡉࡀ ࡀࡁࡅࡍ ࡖ ࡁࡓࡉࡔࡀࡉࡀࡍ ࡏࡋࡀࡅࡀࡉࡀࡍ ࡍࡉࡄࡅࡉࡀ ࡁࡎࡀࡄࡃࡉࡀ ࡄࡀࡆࡉࡍ ࡄࡅ ࡖ ࡁࡀࡉࡉࡍࡀ ࡅࡄࡀࡆࡉࡍ ࡍࡉࡔࡌࡀࡕ ࡖ ࡑࡀࡁࡉࡀ ࡗ ࡏࡎࡀࡒ ࡋࡁࡉࡕ ࡄࡉࡉࡀ ࡅࡏࡉࡀࡎࡂࡉࡀ ࡋࡃࡀࡅࡓࡀ ࡕࡀࡒࡍࡀ ࡗ ࡍࡉࡔࡀࡉࡋࡅࡍࡀࡍ ࡄࡉࡉࡀ ࡍࡉࡕࡅࡍ ࡎࡀࡄࡃࡉࡀ ࡅࡍࡉࡎࡉࡄࡃࡅࡍ ࡎࡀࡄࡃࡉࡀ ࡄࡉࡍࡅࡍ ࡖ ࡊࡅࡔࡈࡀ ࡔࡀࡓࡉࡓࡀ ࡊࡅࡋ ࡖ ࡀࡌࡓࡉࡀ ࡅࡄࡉࡉࡀ ࡆࡀࡊࡉࡍ ࡎࡀ ࡄࡀࡆࡉࡍ ࡃࡓࡀࡔࡀ ࡃࡓࡅࡔ ࡀࡁࡀࡕࡀࡓ ࡁࡓࡉࡊࡉࡕ ࡕࡉࡓࡀ ࡁࡀࡓࡀࡉࡀ ࡎࡀ

22. ࡀࡅࡃࡉࡍ ࡁࡇ ࡁࡔࡅࡌࡀ ࡖ ࡄࡉࡉࡀ ࡁࡌࡀࡓࡉࡁࡀ ࡓࡁࡀ ࡅࡏࡋࡀࡉࡀ ࡖ ࡊࡅࡋࡇ ࡎࡀࡊࡀ ࡅࡌࡉࡍࡉࡀࡍࡀ ࡋࡉࡕࡋࡇ ࡁࡉࡀࡋࡅࡆ ࡉࡀࡋࡅࡆ ࡉࡀࡋࡅࡆࡀ ࡁࡑࡁࡀࡁࡅࡕ ࡑࡁࡅࡕࡀ ࡓࡀࡁࡕࡉࡀ ࡖ ࡄࡉࡉࡀ ࡁࡐࡉࡓࡉࡀࡅࡉࡎ ࡊࡀࡍࡀ ࡖ ࡌࡉࡀ ࡄࡉࡉࡀ ࡁࡔࡊࡉࡍࡀࡑࡀࡓ ࡔࡀࡊࡉࡍ ࡃࡌࡅࡕࡀ ࡖ ࡁࡉࡕ ࡄࡉࡉࡀ ࡁࡄࡉࡉࡀ ࡖ ࡀࡉࡍࡀࡉࡄࡅࡍ ࡁࡌࡀࡉ ࡂࡌࡉࡈ ࡎࡋࡉࡒ ࡄࡆࡀ ࡎࡊࡀ ࡒࡉࡍࡀ ࡖ ࡌࡉࡍࡇ ࡄࡅࡀ ࡁࡉࡅࡐࡉࡍ ࡉࡅࡐࡀࡐࡉࡍ ࡁࡍࡁࡀࡈ ࡍࡉࡁࡈࡀ ࡒࡀࡃࡌࡀࡉࡀ ࡑࡅࡓࡉࡊ ࡄࡉࡉࡀ ࡁࡊࡉࡍࡉࡀࡍࡅࡍ ࡁࡕࡉࡍࡉࡀࡍࡅࡍ ࡎࡀࡌ ࡎࡌࡉࡓ ࡁࡕࡋࡉࡕࡀࡉࡀ ࡁࡉࡄࡓࡀࡌ ࡁࡓ ࡓࡅࡓࡁࡉࡀ ࡉࡀࡅࡊࡀࡁࡀࡓ ࡐࡅࡂࡃࡀࡌࡀ ࡖ ࡄࡉࡉࡀ ࡖ ࡀࡕࡀࡋࡅࡍ ࡋࡂࡅࡁࡓࡉࡀ ࡆࡀࡃࡉࡒࡉࡀ ࡅࡌࡄࡀࡉࡌࡍࡉࡀ ࡌࡍ ࡁࡉࡕ ࡄࡉࡉࡀ ࡊࡅࡋࡌࡀࡍ ࡖ ࡍࡀࡃࡉࡀ ࡌࡉࡍࡇ ࡌࡍ ࡄࡀࡆࡉࡍ ࡌࡉࡔࡀ ࡖ ࡀࡍࡀ ࡁࡔࡅࡌࡀ ࡖ ࡄࡉࡉࡀ ࡓࡅࡓࡁࡉࡀ ࡍࡅࡊࡓࡀࡉࡉࡀ ࡀࡃࡊࡉࡓࡉࡕ ࡏࡋࡇ ࡔࡅࡌࡄࡀࡕࡀ ࡄࡀࡋࡉࡍ ࡊࡀࡎࡉࡀࡕࡀ ࡀࡃࡊࡉࡓࡉࡕ ࡏࡋࡇ ࡀࡎࡅࡕࡀ ࡁࡐࡀࡂࡓࡀࡉࡀࡍ ࡕࡉࡄࡅࡉࡋࡉࡍ ࡖ ࡍࡀࡐࡔࡀ ࡓࡁࡀ ࡅࡋࡀࡆࡅࡈࡀ ࡅࡄࡉࡉࡀ ࡆࡀࡊࡏࡉࡍ ࡎࡀ

23. ࡁࡔࡅࡌࡀ ࡖ ࡄࡉࡉࡀ ࡌࡉࡔࡀ ࡀࡍࡀࡕ ࡔࡉࡄࡀ ࡁࡓ ࡔࡅࡔࡌࡀ ࡄࡉࡅࡀࡓࡀ ࡁࡓ ࡊࡉࡐࡇ ࡖ ࡐࡓࡀࡕ ࡁࡓ ࡏࡅࡃࡍࡇ ࡖ ࡉࡀࡓࡃࡍࡀ ࡁࡓ ࡂࡅࡁࡉࡀ ࡌࡉࡀ ࡁࡓ ࡏࡅࡑࡓࡉࡀ ࡖ ࡍࡄࡅࡓࡀ ࡖ ࡄࡉࡉࡀ ࡀࡎࡉࡌ ࡏࡃࡀ ࡏࡋࡀࡊ ࡌࡉࡔࡀ ࡅࡔࡀࡃࡓࡅࡊ ࡋࡀࡋࡌࡀ ࡄࡀࡆࡉࡍ ࡖ ࡊࡅࡋࡇ ࡌࡀࡅࡃࡀࡋࡀ ࡋࡀࡎࡅࡉࡉࡀ ࡅࡋࡃࡀࡋࡅࡉࡉࡀ ࡅࡋࡒࡀࡉࡅࡌࡉࡀ ࡅࡋࡍࡀࡄࡅࡉࡉࡀ ࡊࡅࡋࡄࡅࡍ ࡊࡉࡁࡉࡀ ࡔࡉࡁࡈࡉࡀ ࡓࡉࡃࡉࡀ ࡅࡓࡅࡌࡀࡉࡉࡀ ࡅࡌࡀࡋࡅࡀࡈࡉࡀ ࡔࡅࡁࡀ ࡓࡀࡆࡉࡀ ࡖ ࡔࡓࡉࡍ ࡁࡐࡀࡂࡓࡀ ࡌࡀࡔࡁࡉࡍࡀࡋࡀࡊ ࡌࡉࡔࡀ ࡅࡌࡀࡅࡌࡉࡍࡀࡋࡀࡊ ࡌࡉࡔࡀ ࡁࡄࡉࡉࡀ ࡅࡌࡀࡍࡃࡀ ࡖ ࡄࡉࡉࡀ ࡅࡏࡅࡕࡓࡉࡀ ࡁࡍࡉࡀ ࡔࡋࡀࡌࡀ ࡁࡄࡀࡆࡉࡍ ࡂࡀࡁࡓࡀ ࡍࡅࡊࡓࡀࡉࡀ ࡖ ࡉࡀࡒࡉࡓ ࡔࡀࡍࡀࡉ ࡅࡌࡔࡀࡋࡀࡌ ࡖ ࡒࡓࡀࡋࡅࡍ ࡋࡁࡄࡉࡓࡉࡀ ࡆࡉࡃࡒࡀ ࡁࡍࡉࡀ ࡍࡄࡅࡓࡀ ࡅࡀࡌࡀࡓࡋࡅࡍ ࡀࡄࡁࡅࡋࡉࡀ ࡌࡉࡔࡀ ࡔࡉࡄࡀ ࡁࡓ ࡔࡅࡔࡌࡀ ࡄࡉࡅࡀࡓࡀ ࡁࡓ ࡊࡉࡐࡇ ࡖ ࡐࡓࡀࡕ ࡁࡓ ࡏࡅࡃࡍࡇ ࡖ ࡉࡀࡓࡃࡍࡀ ࡁࡓ ࡂࡅࡁࡉࡀ ࡌࡉࡀ ࡁࡓ ࡏࡅࡑࡓࡉࡀ ࡖ ࡍࡄࡅࡓࡀ ࡌࡔࡀ ࡅࡏࡕࡉࡋࡊࡅࡍ ࡌࡉࡔࡀ ࡌࡔࡀ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡌࡉࡔࡀ ࡖ ࡀࡍࡀ ࡌࡉࡔࡉࡕ ࡅࡉࡀࡄࡁࡉࡕ ࡋࡀࡁࡔࡅࡌ ࡀࡋࡀࡄࡀ ࡅࡋࡀࡁࡔࡅࡌ ࡓࡅࡄࡀ ࡅࡋࡀࡁࡔࡅࡌ ࡌࡔࡉࡄࡀ ࡅࡋࡀࡁࡔࡅࡌ ࡏࡎࡕࡓࡀ ࡖ ࡄࡉࡊࡋࡀ ࡄࡉࡍࡉࡋࡀ ࡌࡉࡔࡀ ࡖ ࡀࡍࡀ ࡌࡉࡔࡉࡕ ࡅࡉࡀࡄࡁࡉࡕ ࡋࡔࡅࡌࡀࡉ ࡅࡋࡓࡅࡔࡅࡌࡀࡉ ࡅࡋࡔࡅࡌࡀ ࡅࡓࡅࡔࡅࡌࡀ ࡖ ࡔࡅࡓࡁࡕࡀ ࡄࡀࡉࡕࡀ ࡏࡓࡕࡀ ࡅࡓࡀࡅࡀࡆࡕࡀ ࡅࡕࡀࡒࡅࡍࡕࡀ ࡊࡅࡋ ࡌࡀࡍ ࡖ ࡍࡀࡃࡉࡀ ࡌࡉࡍࡇ ࡌࡍ ࡄࡀࡆࡉࡍ ࡌࡉࡔࡀ ࡍࡉࡄࡉࡉࡀ ࡅࡍࡉࡕࡀࡎࡉࡀ ࡅࡍࡉࡕࡒࡀࡉࡀࡌ ࡗ ࡆࡀࡍ ࡏࡍࡅࡔ ࡍࡉࡄࡅࡉࡀ ࡋࡐࡀࡂࡓࡇ ࡅࡗ ࡆࡀࡍ ࡏࡍࡅࡔ ࡍࡉࡄࡅࡉࡀ ࡋࡐࡅࡌࡇ ࡅࡗ ࡆࡀࡍ ࡏࡍࡅࡔ ࡍࡉࡄࡅࡉࡀ ࡁࡂࡉࡅࡕࡇ ࡍࡉࡑࡓࡅࡍ ࡅࡍࡉࡐࡒࡅࡍ ࡌࡉࡍࡇ ࡔࡅࡁࡀ ࡏࡅࡑࡓࡉࡀ ࡖ ࡌࡅࡕࡀ ࡅࡕࡌࡀࡍࡉࡀ ࡌࡁࡀࡊࡀࡋࡀࡕࡀ ࡖ ࡄࡔࡅࡊࡀ ࡍࡉࡍࡆࡅࡍ ࡌࡉࡍࡇ ࡎࡀࡄࡓࡉࡀ ࡅࡃࡀࡉࡅࡉࡀ ࡅࡔࡉࡃࡉࡀ ࡅࡐࡉࡒࡃࡉࡀ ࡅࡓࡅࡄࡉࡀ ࡅࡄࡅࡌࡓࡉࡀ ࡅࡋࡉࡋࡉࡀࡕࡀ ࡌࡍ ࡒࡅࡃࡀࡌ ࡖ ࡊࡁࡀࡓ ࡄࡀࡉࡋࡇ ࡅࡆࡉࡅࡇ ࡅࡍࡄࡅࡓࡇ ࡖ ࡌࡀࡍࡃࡀ ࡖ ࡄࡉࡉࡀ ࡅࡌࡔࡀࡁࡉࡍ ࡄࡉࡉࡀ ࡎࡀ

24. ࡁࡔࡅࡌࡀ ࡖ ࡄࡉࡉࡀ ࡏࡕࡒࡀࡉࡀࡌࡕࡅࡍ ࡄࡉࡉࡀ ࡒࡀࡃࡌࡀࡉࡉࡀ ࡖ ࡀࡍࡀࡕࡅࡍ ࡄࡅࡀࡉࡕࡅࡍ ࡌࡍ ࡋࡀࡒࡀࡃࡌࡉࡀ ࡖ ࡏࡍࡉࡔ ࡒࡅࡃࡀࡌࡀࡉࡊࡅࡍ ࡋࡀࡄࡅࡀ ࡖ ࡌࡋࡀ ࡅࡍࡐࡀࡒ ࡁࡄࡀࡉࡋࡇ ࡅࡕࡅࡒࡍࡇ ࡅࡁࡆࡉࡅࡇ ࡅࡁࡄࡀࡉࡋࡇ ࡖ ࡀࡁࡅࡉࡀ ࡔࡓࡀࡁࡇ ࡋࡀࡔࡀࡍࡉࡍ ࡖ ࡐࡀࡒࡉࡃࡕࡉࡍࡀࡍ ࡅࡓࡀࡅࡓࡉࡁࡕࡉࡍࡀࡍ ࡋࡐࡀࡎࡄࡉࡀࡕࡀࡍ ࡅࡕࡓࡀࡑࡕࡉࡍࡀࡍ ࡋࡀࡉࡍࡀࡍ ࡁࡌࡓࡅࡌࡉࡀ ࡅࡍࡄࡉࡕࡕ ࡅࡔࡊࡀࡍࡕࡉࡍࡀࡍ ࡁࡌࡀࡌࡁࡅࡂࡉࡀ ࡖ ࡄࡉࡉࡀ ࡔࡐࡀࡊࡕ ࡅࡌࡋࡀࡉࡕࡉࡍࡀࡍ ࡌࡍ ࡄࡅࡊࡅࡌࡕࡀࡊ ࡅࡌࡍ ࡎࡉࡁࡓࡅࡕࡀࡊ ࡅࡌࡍ ࡈࡀࡁࡅࡕࡀࡊ ࡄࡀࡅࡉࡕࡉࡍࡀࡍ ࡏࡅࡄࡓࡀ ࡖ ࡀࡍࡀࡕ ࡏࡕࡉࡕࡁࡇ ࡌࡍ ࡁࡉࡕ ࡄࡉࡉࡀ ࡀࡍࡉࡍ ࡍࡉࡆࡉࡋࡁࡇ ࡌࡉࡆࡋࡀࡉࡄࡅࡍ ࡖ ࡀࡍࡀࡔࡉࡀ ࡊࡔࡉࡈࡉࡀ ࡅࡌࡄࡀࡉࡌࡍࡉࡀ ࡌࡉࡔࡊࡀࡍ ࡓࡅࡄࡀࡍ ࡅࡍࡉࡔࡌࡀࡕࡀࡍ ࡁࡔࡊࡉࡍࡀࡕ ࡄࡉࡉࡀ ࡃࡅࡊࡕࡀ ࡖ ࡓࡅࡄࡉࡀ ࡅࡈࡀࡁࡀࡄࡀࡕࡀࡍ ࡄࡀࡕࡀࡌ ࡔࡊࡉࡍࡀ ࡆࡉࡅࡀ ࡋࡁࡉࡔࡀ ࡅࡍࡄࡅࡓࡀ ࡌࡊࡀࡎࡉࡀ ࡅࡄࡀࡃࡉࡀ ࡎࡀࡄࡒࡀ ࡃࡀࡉࡑࡀ ࡂࡀࡉࡀ ࡅࡌࡉࡕࡐࡀࡓࡐࡀ

ࡏࡋ ࡏࡒࡀࡓ ࡂࡉࡅࡀ ࡔࡀࡓࡉࡀ ࡏࡒࡀࡓࡀ ࡄࡀࡆࡉࡍ ࡄࡅ ࡌࡉࡔࡀ ࡌࡔࡀ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡖ ࡁࡓࡀࡊ ࡌࡀࡍࡃࡀ ࡖ ࡄࡉࡉࡀ ࡁࡐࡅࡌࡀ ࡃࡀࡊࡉࡀ ࡅࡏࡄࡀࡁࡋࡅࡍ ࡋࡊࡅࡋࡄࡅࡍ ࡓࡀࡄࡌࡉࡀ ࡔࡅࡌࡇ ࡖ ࡊࡅࡔࡈࡀ ࡊࡅࡋ ࡌࡀࡍ ࡖ ࡍࡀࡃࡉࡀ ࡌࡉࡍࡇ ࡌࡍ ࡄࡀࡆࡉࡍ ࡌࡉࡔࡀ ࡍࡉࡔࡕࡀࡒࡋࡅࡍ ࡌࡉࡍࡇ ࡊࡅࡋࡄࡅࡍ ࡊࡉࡁࡉࡀ ࡔࡉࡁࡈࡉࡀ ࡓࡉࡃࡉࡀ ࡅࡓࡅࡌࡀࡉࡉࡀ ࡅࡌࡀࡋࡅࡀࡈࡉࡀ ࡁࡉࡔࡉࡀ ࡖ ࡐࡀࡂࡓࡀ ࡍࡉࡕࡐࡀࡑࡉࡀ ࡌࡍ ࡎࡀࡃࡀ ࡅࡌࡍ ࡏࡎࡅࡓࡀ ࡅࡌࡍ ࡋࡅࡈࡕࡀ ࡁࡉࡔࡕࡀ ࡅࡌࡍ ࡏࡔࡒࡀ ࡁࡉࡔࡀ ࡅࡌࡍ ࡀࡒࡓࡀࡉࡕࡀ ࡖ ࡊࡀࡃࡁࡀ ࡅࡌࡍ ࡏࡃࡀ ࡖ ࡁࡉࡔࡉࡀ ࡅࡌࡍ ࡄࡉࡓࡁࡀ ࡖ ࡁࡉࡋࡃࡁࡀࡁࡉࡀ ࡅࡌࡍ ࡋࡉࡔࡀࡍࡀ ࡕࡋࡉࡕࡀࡉࡀ ࡖ ࡓࡀࡊࡉࡊ ࡌࡍ ࡕࡉࡓࡁࡀ ࡅࡐࡀࡎࡉࡒ ࡌࡍ ࡄࡉࡓࡁࡀ ࡅࡌࡍ ࡍࡀࡋࡉࡀ ࡅࡌࡍ ࡍࡉࡅࡋࡉࡀ ࡅࡌࡍ ࡑࡉࡄࡅࡀ ࡁࡉࡔࡀ ࡅࡌࡍ ࡄࡀࡓࡔࡉࡀ ࡁࡉࡔࡉࡀ ࡅࡌࡍ ࡊࡋࡉࡋࡀ ࡌࡄࡀࡌࡁࡋࡀ ࡅࡌࡍ ࡁࡉࡓࡅࡒ ࡆࡀࡊࡓࡀ ࡅࡍࡉࡒࡅࡐࡕࡀ ࡅࡌࡍ ࡌࡅࡕࡀ ࡕࡉࡍࡉࡀࡍࡀ ࡍࡉࡍࡆࡅࡍ ࡅࡍࡉࡈࡓࡅࡍ ࡁࡔࡅࡌࡀࡊ ࡉࡀࡕࡉࡓࡀ ࡖ ࡊࡅࡋࡇ ࡄࡉࡉࡀ ࡅࡍࡉࡐࡀࡋ ࡋࡌࡉࡕࡀ ࡅࡍࡉࡄࡉࡉࡀ ࡅࡏࡋ ࡊࡑࡉࡓࡀ ࡅࡍࡉࡐࡔࡅࡈ ࡅࡏࡋ ࡏࡔࡉࡒࡀ ࡍࡉࡕࡐࡀࡕࡀ ࡅࡏࡋ ࡄࡀࡓࡔࡉࡀ ࡕࡉࡔࡓࡉࡁࡇ ࡄࡅࡊࡅࡌࡕࡀ ࡅࡎࡉࡁࡓࡅࡕࡀ ࡄࡀࡉࡀࡁࡀ ࡍࡉࡆࡊࡉࡀ ࡁࡃࡉࡍࡇ ࡅࡏࡎࡉࡓࡀ ࡍࡉࡔࡕࡓࡉࡀ ࡌࡍ ࡁࡉࡕ ࡏࡎࡅࡓࡇ ࡕࡉࡕࡉࡀ ࡏࡃࡀ ࡖ ࡊࡅࡔࡈࡀ ࡅࡀࡎࡅࡕࡀ ࡌࡍ ࡁࡉࡕ ࡀࡎࡀࡅࡀࡕࡀ ࡁࡔࡅࡌࡀ ࡖ ࡄࡉࡉࡀ ࡖ ࡌࡍ ࡄࡉࡉࡀ ࡄࡅࡍ ࡅࡁࡔࡅࡌࡇ ࡖ ࡉࡅࡆࡀࡈࡀࡒ ࡌࡀࡍࡃࡀ ࡖ ࡄࡉࡉࡀ ࡊࡅࡋ ࡌࡀࡍ ࡖ ࡍࡀࡃࡉࡀ ࡌࡉࡍࡇ ࡌࡍ ࡄࡀࡆࡉࡍ ࡌࡉࡔࡀ ࡀࡃࡉࡍࡒࡉࡀ ࡄࡀࡈࡀࡉࡉࡀ ࡅࡄࡀࡅࡁࡉࡀ ࡍࡉࡄࡅࡉࡀ ࡁࡀࡕࡓࡀ ࡖ ࡄࡉࡉࡀ ࡅࡄࡉࡉࡀ ࡆࡀࡊࡏࡉࡍ ࡎ ࡀ ࡄࡀࡋࡉࡍ ࡕࡋࡀࡕࡀ ࡁࡀࡅࡀࡕࡀ ࡀࡅࡃࡉࡍ ࡁࡇ ࡅࡁࡔࡅࡌࡀ ࡖ ࡄࡉࡉࡀ ࡌࡉࡔࡀ ࡀࡍࡀࡕ ࡔࡉࡄࡀ ࡅࡏࡕࡒࡀࡉࡀࡌࡕࡅࡍ ࡄࡉࡉࡀ ࡒࡀࡃࡌࡀࡉࡉࡀ ࡒࡓࡉࡀ ࡋࡌࡉࡔࡀ ࡅࡓࡔࡅࡌ ࡍࡉࡔࡌࡀࡕࡀ ࡖ ࡑࡀࡁࡉࡕ ࡗ ࡎࡀࡋࡒࡀ ࡌࡍ ࡉࡀࡓࡃࡍࡀ ࡀࡌࡅࡓ ࡐࡋࡀࡍ ࡁࡓ ࡐࡋࡀࡍࡉࡕࡀ ࡓࡔࡉࡌ ࡁࡓࡅࡔࡅࡌࡀ ࡖ ࡄࡉࡉࡀ ࡔࡅࡌࡀ ࡖ ࡄࡉࡉࡀ ࡅࡔࡅࡌࡀ ࡖ ࡌࡀࡍࡃࡀ ࡖ ࡄࡉࡉࡀ ࡌࡀࡃࡊࡀࡓ ࡏࡋࡀࡊ ࡑࡁࡉࡉࡕ ࡁࡌࡀࡑࡁࡅࡕࡀ ࡖ ࡁࡉࡄࡓࡀࡌ ࡓࡁࡀ ࡁࡓ ࡓࡅࡓࡁࡉࡀ ࡌࡀࡑࡁࡅࡕࡀࡊ ࡕࡉࡍࡀࡈࡓࡀࡊ ࡅࡕࡉࡎࡀࡒ ࡋࡓࡉࡔ ࡔࡅࡌࡀ ࡖ ࡄࡉࡉࡀ ࡅࡔࡅࡌࡀ ࡖ ࡌࡀࡍࡃࡀ ࡖ ࡄࡉࡉࡀ ࡌࡀࡃࡊࡀࡓ ࡏࡋࡀࡊ ࡕࡋࡀࡕࡀ ࡆࡉࡁࡍࡉࡀ ࡓࡔࡅࡌ ࡅࡐࡔࡅࡈ ࡊࡅࡔࡈࡀ ࡌࡉࡍࡀࡉࡀࡍ ࡕࡅࡌ ࡒࡓࡉࡀ ࡅࡀࡃࡉࡀ ࡁࡀࡍࡐࡀࡊ ࡄࡀࡕࡀࡌࡕࡀ ࡖ ࡍࡀࡐࡔࡀࡊ . ࡅࡄࡀࡉࡆࡀࡊ ࡍࡉࡒࡌࡅࡍ ࡋࡒࡅࡃࡀࡌࡀࡊ ࡅࡒࡓࡉࡀ ࡋࡐࡉࡄࡕࡀ ࡅࡌࡀࡌࡁࡅࡄࡀ ࡅࡀࡄࡁࡀࡋࡅࡍ ࡐࡉࡄࡕࡀ ࡖ ࡍࡉࡊࡋࡅࡍ ࡅࡀࡄࡁࡀࡋࡅࡍ ࡌࡀࡌࡁࡅࡄࡀ ࡖ ࡍࡉࡔࡕࡅࡍ ࡅࡐࡔࡅࡈ ࡊࡅࡔࡈࡀ ࡌࡉࡍࡀࡉࡀࡍ ࡅࡀࡅࡕࡉࡁࡉࡍࡅࡍ ࡒࡅࡃࡀࡌࡀࡊ ࡅࡒࡓࡉࡀ ࡄࡀࡕࡀࡌࡀࡕࡀ ࡅࡀࡎࡉࡌ ࡏࡃࡀࡊ ࡏࡋ ࡓࡉࡔࡀࡉࡀࡍ ࡎࡀ

25. ࡁࡔࡅࡌࡀ ࡖ ࡄࡉࡉࡀ ࡗ ࡏࡄࡀࡁࡋࡇ ࡉࡀࡓࡃࡍࡀ ࡖ ࡌࡉࡀ ࡄࡉࡉࡀ ࡋࡎࡀࡌ ࡎࡌࡉࡓ ࡆࡉࡅࡀ ࡓࡁࡀ ࡖ ࡄࡉࡉࡀ ࡐࡕࡀ ࡐࡅࡌࡀࡉࡄࡅࡍ ࡏࡕࡔࡉࡌࡀ ࡅࡕࡔࡉࡍ ࡅࡕࡓࡉࡍ ࡀࡋࡐࡉࡀ ࡓࡅࡁࡀࡍ ࡏࡅࡕࡓࡉࡀ ࡁࡍࡉࡀ ࡍࡄࡅࡓࡀ ࡅࡋࡌࡀࡍࡃࡀ ࡖ ࡄࡉࡉࡀ ࡌࡔࡀࡁࡉࡋࡇ ࡌࡔࡀࡁࡀ ࡌࡀࡍࡃࡀ ࡖ ࡄࡉࡉࡀ ࡌࡔࡀࡁࡀ ࡉࡀࡅࡀࡓ ࡆࡉࡅࡀ ࡌࡔࡀࡁࡉࡍ ࡁࡉࡄࡓࡀࡌ ࡅࡓࡀࡌ ࡌࡔࡀࡁࡀ ࡕࡀࡓࡅࡀࡍ ࡍࡄࡅࡓࡀ ࡌࡔࡀࡁࡀ ࡍࡁࡀࡈ ࡆࡉࡅࡀ ࡓࡁࡀ ࡒࡀࡃࡌࡀࡉࡀ ࡌࡔࡀࡁࡉࡍ ࡍࡑࡀࡁ ࡅࡀࡍࡀࡍ ࡍࡑࡀࡁ ࡌࡔࡀࡁࡉࡍ ࡎࡀࡓ ࡅࡎࡀࡓࡅࡀࡍ ࡌࡔࡀࡁࡀ ࡄࡀࡊ ࡌࡀࡍࡀ ࡓࡁࡀ ࡊࡀࡁࡉࡓࡀ ࡌࡔࡀࡁࡀ ࡄࡀࡊ ࡐࡀࡓࡑࡅࡐࡀ ࡓࡁࡀ ࡖ ࡏࡒࡀࡓࡀ ࡌࡔࡀࡁࡀ ࡄࡀࡊ ࡊࡅࡋࡇ ࡃࡀࡅࡓࡀ ࡖ ࡍࡉࡄࡉࡀ ࡌࡔࡀࡁࡉࡍ ࡊࡅࡋࡄࡅࡍ ࡃࡉࡓࡊࡉࡀ ࡅࡔࡁࡉࡋࡉࡀ ࡖ ࡓࡅࡓࡁࡀࡍࡉࡀ ࡌࡔࡀࡁࡉࡍ ࡊࡅࡋࡄࡅࡍ ࡀࡋࡌࡉࡀ ࡓࡅࡓࡁࡉࡀ ࡏࡋࡀࡉࡉࡀ ࡖ ࡍࡄࡅࡓࡀ ࡌࡔࡀࡁࡉࡍ ࡄࡀࡍࡉࡊ ࡊࡅࡋࡄࡉࡍ ࡔࡊࡉࡍࡀࡕࡀ ࡊࡀࡎࡉࡀࡕࡀ ࡌࡔࡀࡁࡀ ࡄࡀࡊ ࡒࡀࡋࡀ ࡅࡄࡀࡉࡋࡀ ࡅࡌࡉࡌࡓࡀ ࡅࡐࡀࡒࡀࡃࡕࡀ ࡖ ࡀࡕࡉࡀ ࡌࡍ ࡁࡉࡕ ࡀࡁࡀࡕࡅࡓ ࡌࡔࡀࡁࡀ ࡀࡁࡀࡕࡅࡓ ࡓࡀࡌࡀ ࡌࡔࡀࡁࡉࡍ ࡓࡅࡁࡀࡍ ࡏࡅࡕࡓࡉࡀ ࡖ ࡒࡀࡉࡌࡀ ࡒࡅࡃࡀࡌࡇ ࡖ ࡀࡁࡀࡕࡅࡓ ࡌࡔࡀࡁࡉࡍ ࡔࡉࡋࡌࡀࡉ ࡅࡍࡉࡁࡀࡉ ࡏࡅࡕࡓࡉࡀ ࡍࡀࡈࡓࡉࡀ ࡖ ࡉࡀࡓࡃࡍࡀ ࡌࡔࡀࡁࡉࡍ ࡀࡁࡅࡍ ࡄࡉࡁࡉࡋ ࡅࡔࡉࡕࡉࡋ ࡅࡀࡍࡅࡔ ࡓࡉࡔࡀ ࡖ ࡊࡅࡋࡇ ࡔࡅࡓࡁࡕࡀ ࡊࡓࡅࡊ ࡅࡃࡄࡉࡀ ࡌࡉࡍࡀࡉ ࡃࡉࡋࡉࡀ ࡅࡌࡍ ࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡄࡉࡕ ࡋࡉࡀࡓࡃࡍࡀ ࡅࡏࡑࡈࡁࡀ ࡌࡍ ࡄࡀࡅࡒࡀ ࡅࡃࡀࡄࡀࡋࡕࡀ ࡅࡆࡉࡅࡉࡄࡕࡀ ࡖ ࡎࡀࡄࡓࡉࡀ ࡅࡃࡀࡉࡅࡉࡀ ࡅࡔࡉࡃࡉࡀ ࡅࡐࡉࡒࡃࡉࡀ ࡅࡓࡅࡄࡉࡀ ࡅࡄࡅࡌࡓࡉࡀ ࡅࡋࡉࡋࡉࡀࡕࡀ ࡅࡀࡋࡀࡄࡉࡀ ࡅࡌࡀࡋࡀࡊࡉࡀ ࡅࡏࡊࡅࡓࡉࡀ ࡅࡐࡓࡉࡊࡉࡀ ࡅࡐࡀࡕࡉࡊࡓࡉࡀ ࡖ ࡔࡀࡁࡒࡉࡀ ࡔࡅࡁࡀ ࡔࡉࡁࡉࡀࡄࡉࡀ ࡌࡀࡓࡅࡀࡕࡀ ࡖ ࡁࡀࡉࡕࡀ ࡋࡍࡉࡔࡌࡀࡕࡀ ࡁࡀࡋࡌࡀ ࡄࡀࡆࡉࡍ ࡌࡀࡍࡃࡀ ࡖ ࡄࡉࡉࡀ ࡕࡓࡅࡑ ࡀࡉࡍࡀࡊ ࡋࡓࡀࡄࡌࡀࡊ ࡅࡋࡔࡉࡕࡋࡀࡊ ࡅࡋࡕࡀࡓࡌࡉࡃࡀࡊ ࡄࡆࡉࡍࡀࡍ ࡖ ࡒࡀࡉࡌࡉࡍࡀࡍ ࡁࡀࡕࡓࡀ ࡖ ࡄࡀࡆࡉࡍ ࡖ ࡊࡅࡋࡇ ࡁࡉࡔࡉࡀ ࡅࡁࡕࡉࡓࡀ ࡓࡁࡀ ࡖ ࡊࡅࡋࡇ ࡌࡀࡋࡊࡀࡅࡀࡕࡀ ࡒࡀࡉࡌࡉࡍࡀࡍ ࡁࡉࡍࡉࡀ ࡁࡉࡔࡉࡀ ࡅࡔࡓࡉࡍࡀࡍ ࡁࡉࡍࡉࡀ ࡄࡀࡈࡉࡀ ࡅࡐࡀࡓࡒࡉࡍࡀࡍ ࡌࡍ ࡀࡋࡌࡀ ࡖ ࡊࡅࡋࡇ ࡄࡀࡈࡀࡉࡉࡀ ࡅࡌࡍ ࡄࡀࡓࡔࡉࡀ ࡁࡉࡔࡉࡀ ࡖ ࡁࡍࡇ ࡖ ࡀࡃࡀࡌ ࡅࡄࡀࡅࡀ ࡖ ࡀࡁࡀࡃࡍࡉࡍ ࡕࡉࡔࡁࡅࡒࡋࡀࡍ ࡅࡃࡀࡁࡃࡉࡍࡉࡍ ࡕࡉࡔࡁࡅࡒࡋࡀࡍ ࡔࡀࡁࡉࡒ ࡄࡀࡈࡀࡉࡉࡀ ࡅࡄࡀࡅࡁࡉࡀ ࡅࡎࡊࡉࡋࡀࡕࡀࡍ ࡅࡕࡉࡒࡋࡀࡕࡀࡍ ࡅࡔࡀࡁࡀࡔࡀࡕࡀࡍ ࡕࡅࡔࡁࡅࡒࡋࡀࡍ ࡄࡉࡍ ࡄࡀࡈࡀࡉࡀࡍ ࡅࡄࡀࡅࡁࡀࡍ ࡅࡎࡊࡉࡋࡀࡕࡀࡍ ࡅࡕࡉࡒࡋࡀࡕࡀࡍ ࡅࡔࡀࡁࡀࡔࡀࡕࡀࡍ ࡋࡀࡔࡀࡁࡒࡀࡕࡋࡀࡍ ࡏࡍࡉࡔ ࡆࡀࡊࡀࡉࡀ ࡒࡅࡃࡀࡌࡀࡊ ࡌࡀࡍࡃࡀ ࡖ ࡄࡉࡉࡀ ࡋࡀࡉࡉࡕ ࡄࡉࡉࡀ ࡒࡀࡁࡉࡋ ࡁࡅࡕࡊࡅࡍ ࡌࡍ ࡊࡉࡎࡉࡀ ࡅࡕࡓࡀࡑ ࡍࡉࡀࡄࡀ ࡏࡋ ࡍࡄࡅࡓࡀࡉࡊࡅࡍ ࡁࡔࡅࡌࡇ ࡖ ࡔࡀࡓࡄࡀࡁࡏࡉࡋ ࡆࡉࡅࡀ ࡓࡁࡀ ࡒࡀࡃࡌࡀࡉࡀ ࡅࡕࡓࡉࡑࡉࡀ ࡐࡅࡂࡃࡀࡌࡉࡀ ࡖ ࡔࡀࡓࡄࡀࡁࡏࡉࡋ ࡆࡉࡅࡀ ࡓࡁࡀ ࡒࡀࡃࡌࡀࡉࡀ ࡋࡊࡅࡋࡄࡅࡍ ࡓࡀࡄࡌࡉࡀ ࡔࡅࡌࡇ ࡖ ࡊࡅࡔࡈࡀ ࡅࡋࡃࡉࡋࡉࡀࡊࡁࡉࡔ ࡄࡔࡅࡊࡀ ࡅࡕࡓࡀࡑ ࡍࡄࡅࡓࡀ ࡅࡌࡔࡀࡁࡉࡍ ࡄࡉࡉࡀ ࡎࡀ

26. ࡁࡔࡅࡌࡀ ࡖ ࡄࡉࡉࡀ ࡏࡎࡉࡓࡀ ࡅࡄࡕࡉࡌࡀ ࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡄࡉࡕ ࡋࡉࡀࡓࡃࡍࡀ ࡅࡏࡑࡈࡁࡀ ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡑࡁࡉࡉࡀ ࡁࡌࡀࡑࡁࡅࡕࡇ ࡖ ࡁࡉࡄࡓࡀࡌ ࡓࡁࡀ ࡏࡎࡉࡓࡉࡀ ࡍࡀࡐࡔࡀࡉࡄࡅࡍ ࡁࡀࡎࡀࡓࡉࡀ ࡖ ࡆࡉࡃࡒࡀ ࡅࡁࡀࡎࡀࡓࡉࡀ ࡖ ࡊࡅࡔࡈࡀ ࡅࡁࡀࡎࡀࡓࡉࡀ ࡆࡄࡉࡓ ࡍࡄࡅࡓࡀ ࡓࡁࡀ ࡖ ࡄࡉࡉࡀ ࡅࡌࡔࡀࡁࡉࡍ ࡄࡉࡉࡀ ࡎࡀ

27. ࡁࡔࡅࡌࡀ ࡖ ࡄࡉࡉࡀ ࡁࡏࡅࡑࡀࡓ ࡄࡉࡉࡀ ࡕࡓࡉࡑࡉࡍࡉࡍ ࡅࡌࡒࡀࡉࡌࡉࡍࡉࡍ ࡁࡏࡅࡑࡀࡓ ࡄࡀࡉ ࡅࡐࡕࡀ ࡄࡀࡉ ࡌࡍ ࡁࡉࡕ ࡄࡉࡉࡀ ࡋࡀࡅࡐࡀ ࡀࡕࡀࡋࡀࡍ ࡌࡀࡍࡃࡀ ࡖ ࡄࡉࡉࡀ ࡀࡎࡂࡉࡀ ࡏࡋࡀࡍ ࡁࡆࡉࡅࡀ ࡖ ࡍࡐࡉࡔ ࡅࡁࡀࡍࡄࡅࡓࡀ ࡖ ࡊࡀࡁࡉࡓ ࡁࡌࡀࡍࡀࡍ ࡅࡓࡅࡔࡅࡌࡀࡍ ࡅࡃࡉࡓࡊࡀࡍ ࡅࡉࡀࡓࡃࡍࡀࡍ ࡅࡌࡀࡑࡁࡅࡕࡀࡍ ࡁࡄࡀࡅࡓࡀࡍ ࡏࡅࡑࡈࡋࡀࡍ ࡁࡄࡀࡅࡓࡀࡓࡀࡍ ࡊࡎࡅࡉࡀࡍ ࡁࡄࡀࡆࡀ ࡆࡁࡀࡍ ࡊࡋࡉࡋࡀࡍ ࡒࡀࡓࡉࡍࡀࡋࡅࡍ ࡋࡄࡉࡉࡀ ࡓࡅࡓࡁࡉࡀ ࡍࡅࡊࡓࡀࡉࡉࡀ ࡉࡀࡕࡉࡓࡉࡀ ࡖ ࡏࡋࡀࡅࡉࡀ ࡊࡅࡋࡄࡅࡍ ࡏࡅࡁࡀࡃࡉࡀ ࡅࡀࡌࡀࡓࡍࡀࡋࡅࡍ ࡄࡆࡅࡍ ࡄࡆࡅࡍ ࡄࡉࡉࡀ ࡓࡁࡉࡀ ࡖ ࡋࡔࡅࡌࡀࡉࡊࡅࡍ ࡃࡉࡋࡊࡅࡍ ࡄࡉࡉࡀ ࡋࡉࡀࡓࡃࡍࡀ ࡍࡄࡉࡕࡍࡉࡍ ࡅࡋࡔࡅࡌࡀࡉࡊࡅࡍ ࡃࡉࡋࡊࡅࡍ ࡄࡉࡉࡀ ࡔࡅࡌࡀࡍ ࡅࡓࡅࡔࡅࡌࡀࡍ ࡖ ࡍࡎࡉࡁࡍࡉࡍ ࡌࡍ ࡉࡀࡓࡃࡍࡀ ࡓࡁࡀ ࡖ ࡄࡉࡉࡀ ࡅࡌࡍ ࡊࡀࡍࡀ ࡓࡁࡀ ࡖ ࡀࡎࡀࡅࡀࡕࡀ ࡁࡌࡉࡌࡀࡓ ࡊࡅࡔࡈࡀ ࡅࡒࡀࡉࡅࡌࡉࡀ ࡉࡅࡊࡀࡁࡀࡓ ࡆࡉࡅࡀ ࡅࡄࡉࡉࡀ ࡆࡀࡊࡉࡍ ࡎࡀ

28. ࡏࡎࡉࡓࡀ ࡅࡄࡕࡉࡌࡀ ࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡄࡉࡕ ࡋࡉࡀࡓࡃࡍࡀ ࡅࡏࡑࡈࡁࡀ ࡁࡄࡀࡅࡓࡀࡍ ࡄࡀࡅࡓࡀࡓࡀࡍ ࡆࡉࡅࡀ ࡑࡅࡓࡉࡊ ࡄࡉࡉࡀ ࡓࡁࡉࡀ ࡁࡊࡉࡍࡉࡀࡍࡅࡍ ࡁࡉࡅࡐࡉࡍ ࡉࡅࡐࡀࡐࡉࡍ ࡅࡎࡀࡌ ࡌࡀࡍࡀ ࡎࡌࡉࡓࡀ ࡁࡉࡅࡎࡌࡉࡓ ࡊࡀࡍࡀ ࡖ ࡆࡉࡅࡀ ࡒࡀࡃࡌࡀࡉࡀ ࡁࡉࡅࡊࡀࡁࡀࡓ ࡂࡀࡁࡓࡀ ࡏࡅࡕࡓࡀ ࡌࡆࡀࡓࡆࡀ ࡖ ࡏࡎࡅࡓࡅࡍࡉࡍ ࡅࡄࡅࡕࡌࡅࡍࡉࡍ ࡅࡍࡀࡈࡓࡅࡍࡉࡍ ࡋࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡄࡉࡕ ࡋࡉࡀࡓࡃࡍࡀ ࡅࡏࡑࡈࡁࡀ ࡌࡍ ࡊࡅࡋࡀ ࡀࡋࡀࡄࡅࡕࡀ ࡖ ࡁࡀࡉࡕࡀ ࡖ ࡋࡀࡍࡉࡔࡕࡀࡋࡈࡅࡍ ࡏࡋࡀࡅࡀࡉࡄࡅࡍ ࡌࡍ ࡎࡀࡄࡓࡀࡉࡄࡅࡍ ࡅࡌࡍ ࡃࡀࡉࡅࡀࡉࡄࡅࡍ ࡖ ࡋࡀࡍࡉࡒࡓࡉࡁࡋࡅࡍ ࡅࡋࡀࡍࡉࡄࡈࡉࡁࡅࡍ ࡅࡋࡀࡍࡉࡄࡀࡌࡁࡋࡅࡁࡅࡍ ࡍࡉࡔࡕࡀࡒࡋࡅࡍ ࡌࡉࡍࡀࡉࡄࡅࡍ ࡊࡅࡋࡄࡅࡍ ࡊࡉࡁࡉࡀ ࡔࡉࡁࡈࡉࡀ ࡓࡉࡃࡉࡀ ࡅࡓࡅࡌࡀࡉࡉࡀ ࡍࡉࡈࡓࡅࡍ ࡅࡍࡉࡕࡀࡆࡉࡄࡅࡍ ࡌࡉࡍࡀࡉࡄࡅࡍ ࡊࡅࡋࡄࡅࡍ ࡒࡉࡓࡎࡉࡀ ࡎࡀࡉࡍࡉࡀ ࡅࡌࡀࡋࡅࡀࡈࡉࡀ ࡁࡉࡔࡉࡀ ࡖ ࡐࡀࡂࡓࡀ ࡖ ࡉࡀࡕࡁࡉࡀ ࡒࡅࡃࡀࡌࡀࡊ ࡗ ࡄࡀࡉࡀࡁࡉࡀ ࡍࡉࡒࡌࡅࡍ ࡅࡗ ࡆࡀࡊࡀࡉࡉࡀ ࡅࡀࡎࡅࡕࡀ ࡕࡉࡄࡅࡉࡋࡉࡍ ࡋࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡄࡉࡕ ࡋࡉࡀࡓࡃࡍࡀ ࡅࡏࡑࡈࡁࡀ ࡅࡄࡉࡉࡀ ࡆࡀࡊࡉࡍ ࡎ ࡀ ࡄࡀࡋࡉࡍ ࡀࡓࡁࡉࡀ ࡁࡀࡅࡀࡕࡀ ࡄࡀࡕࡀࡌࡕࡀ ࡗ ࡏࡄࡀࡁࡋࡇ ࡅࡏࡎࡉࡓࡀ ࡅࡄࡕࡉࡌࡀ ࡅࡁࡏࡅࡑࡀࡓ ࡄࡉࡉࡀ ࡅࡏࡎࡉࡓࡀ ࡅࡄࡕࡉࡌࡀ ࡓࡀࡁࡕࡉࡀ ࡒࡓࡉࡍࡅࡍ ࡁࡊࡅࡋࡄࡅࡍ ࡒࡀࡋࡀࡊ ࡏࡋ ࡍࡉࡔࡌࡀࡕࡀ ࡖ ࡑࡀࡁࡉࡕ ࡀࡁࡀࡕࡀࡓ ࡖ ࡉࡀࡄࡁࡀࡕࡋࡅࡍ ࡐࡉࡄࡕࡀ ࡅࡌࡀࡌࡁࡅࡂࡀ ࡋࡍࡉࡔࡌࡀࡕࡀ ࡖ ࡑࡀࡁࡉࡕ ࡒࡓࡉࡀ ࡗ ࡖ ࡊࡕࡉࡁ ࡏࡅ ࡍࡉࡔࡉࡌࡕࡀ ࡄࡀࡃ ࡄࡏ ࡀࡌࡅࡓ ࡋࡄࡀࡆࡀ ࡍࡉࡔࡉࡌࡕࡀ ࡖ ࡐࡋࡀࡍ ࡅࡄࡀࡉࡆࡀࡊ ࡍࡉࡒࡌࡀ ࡅࡒࡓࡉࡀ ࡏࡕࡓࡉࡑࡕࡅࡍ ࡅࡏࡕࡒࡀࡉࡀࡌࡕࡅࡍ ࡎࡀ ࡎࡀ

29. ࡁࡔࡅࡌࡀ ࡖ ࡄࡉࡉࡀ ࡏࡕࡓࡉࡑࡕࡅࡍ ࡅࡏࡕࡒࡀࡉࡀࡌࡕࡅࡍ ࡁࡀࡕࡓࡀ ࡖ ࡈࡀࡁࡉࡀ ࡌࡉࡕࡒࡀࡉࡌࡉࡀ ࡁࡉࡍࡉࡀ ࡌࡀࡍࡉࡀ ࡖ ࡍࡄࡅࡓࡀ ࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡄࡉࡕ ࡋࡉࡀࡓࡃࡍࡀ ࡅࡏࡑࡈࡁࡀ ࡅࡃࡀࡁࡀࡄࡀࡕࡀࡍ ࡅࡓࡅࡁࡀࡍࡀࡍ ࡅࡃࡀࡄࡀࡍ ࡅࡃࡀࡄࡅࡀࡕࡀࡍ ࡖ ࡍࡐࡀࡒ ࡌࡍ ࡐࡀࡂࡓࡀࡉࡄࡅࡍ ࡅࡋࡃࡒࡀࡉࡌࡉࡀ ࡁࡐࡀࡂࡓࡀࡉࡄࡅࡍ ࡄࡀࡕࡀࡌ ࡁࡀࡍࡄࡅࡓࡀ ࡕࡉࡕࡒࡀࡉࡌࡅࡍ ࡅࡄࡉࡉࡀ ࡆࡀࡊࡉࡍ ࡎࡀ ࡄࡀࡊࡀ ࡒࡓࡉࡀ ࡌࡀࡄࡅ ࡀࡁࡀࡃࡋࡀࡊ ࡀࡁࡅࡊ ࡍࡉࡔࡌࡀ ࡎࡀ

30. ࡁࡔࡅࡌࡀ ࡖ ࡄࡉࡉࡀ ࡌࡀࡄࡅ ࡀࡁࡀࡃࡋࡀࡊ ࡀࡁࡅࡊ ࡍࡉࡔࡌࡀ ࡉࡅࡌࡀ ࡓࡁࡀ ࡖ ࡏࡕࡒࡀࡉࡀࡌࡕࡁࡇ ࡀࡄࡉࡕ ࡁࡉࡀࡓࡃࡍࡀ ࡔࡉࡕࡋࡀࡍ ࡅࡀࡎࡉࡒ ࡋࡊࡉࡐࡇ ࡒࡀࡉࡌࡀࡍ ࡐࡕࡀ ࡅࡏࡄࡀࡁࡋࡉࡀ ࡐࡉࡄࡕࡀ ࡔࡀࡁࡀ ࡁࡊࡀࡎࡇ ࡅࡀࡔࡒࡉࡀࡍ ࡀࡅࡕࡁࡀࡍ ࡀࡁࡉࡍࡉࡀ ࡁࡅࡓࡊࡇ ࡅࡔࡅࡌ ࡓࡅࡓࡁࡉࡀ ࡀࡃࡊࡀࡓ ࡏࡋࡀࡉ ࡀࡍࡃࡀ ࡁࡈࡅࡓࡀ ࡒࡀࡌࡀࡍ ࡑࡓࡀࡊ ࡁࡒࡀࡋࡇ ࡅࡀࡔࡌࡀࡍ ࡑࡓࡀࡊ ࡅࡀࡔࡌࡀࡍ ࡁࡒࡀࡋࡇ ࡄࡉࡍ ࡏࡕࡁࡀࡊ ࡄࡀࡉࡋࡀ ࡍࡉࡔࡌࡀ ࡀࡕࡀ ࡏࡎࡀࡒ ࡋࡈࡅࡓࡀ ࡏࡐࡉࡋࡏࡕࡊࡀࡌࡀࡓ ࡏࡎࡅࡐ ࡌࡍ ࡀࡋࡌࡀ ࡀࡉࡍࡀࡉ ࡋࡌࡓࡅࡌ ࡔࡉࡒࡋࡉࡕ ࡍࡉࡔࡌࡀࡕ ࡋࡁࡉࡕ ࡄࡉࡉࡀ ࡎࡊࡉࡕ ࡎࡉࡋࡒࡉࡕ ࡋࡈࡅࡓࡀ ࡅࡋࡀࡍࡉࡐࡋࡉࡕ ࡅࡀࡕࡉࡕ ࡄࡉࡉࡀ ࡖ ࡍࡀࡐࡔࡀࡉ ࡀࡔࡊࡉࡕ ࡌࡀࡄࡅ ࡀࡁࡀࡃࡋࡀࡊ ࡀࡁࡅࡊ ࡍࡉࡔࡌࡀ ࡉࡅࡌࡀ ࡓࡁࡀ ࡖ ࡏࡕࡒࡀࡉࡀࡌࡕࡁࡇ ࡀࡄࡉࡕ ࡁࡉࡀࡓࡃࡍࡀ ࡔࡉࡕࡋࡀࡍ ࡅࡀࡎࡉࡒ ࡋࡊࡉࡐࡇ ࡒࡀࡉࡌࡀࡍ ࡐࡕࡀ ࡅࡏࡄࡀࡁࡋࡉࡀ ࡐࡉࡄࡕࡀ ࡔࡀࡁࡀ ࡁࡊࡀࡎࡇ ࡅࡀࡔࡒࡉࡀࡍ ࡀࡅࡕࡁࡀࡍ ࡀࡁࡉࡍࡉࡀ ࡁࡅࡓࡊࡇ ࡅࡔࡅࡌ ࡓࡅࡓࡁࡉࡀ ࡀࡃࡊࡀࡓ ࡏࡋࡀࡉ ࡀࡍࡃࡀ ࡁࡍࡅࡓࡀ ࡒࡀࡌࡀࡍ ࡑࡓࡀࡊ ࡁࡒࡀࡋࡇ ࡅࡀࡔࡌࡀࡍ ࡑࡓࡀࡊ ࡅࡀࡔࡌࡀࡍ ࡁࡒࡀࡋࡇ ࡄࡉࡍ ࡏࡕࡁࡀࡊ ࡄࡀࡉࡋࡀ ࡍࡉࡔࡌࡀ ࡀࡕࡀ ࡏࡆࡉࡋ ࡁࡍࡅࡓࡀ ࡏࡁࡔࡅࡋࡏࡕࡊࡀࡌࡀࡓ ࡏࡎࡅࡐ ࡌࡉࡍࡇ ࡌࡍ ࡀࡋࡌࡀ ࡀࡉࡍࡀࡉ ࡏࡋ ࡌࡓࡅࡌ ࡔࡉࡒࡋࡉࡕ ࡍࡉࡔࡌࡀࡕ ࡋࡁࡉࡕ ࡄࡉࡉࡀ ࡎࡊࡉࡕ ࡏࡆࡋࡉࡕ ࡁࡍࡅࡓࡀ ࡅࡋࡀࡁࡉࡔࡋࡉࡕ ࡅࡀࡕࡉࡕ ࡄࡉࡉࡀ ࡖ ࡍࡀࡐࡔࡀࡉ ࡅࡀࡔࡊࡉࡕ ࡌࡀࡄࡅ ࡀࡁࡀࡃࡋࡀࡊ ࡀࡁࡅࡊ ࡍࡉࡔࡌࡀ ࡉࡅࡌࡀ ࡓࡁࡀ ࡖ ࡏࡕࡒࡀࡉࡀࡌࡕࡁࡇ ࡀࡄࡉࡕ ࡁࡉࡀࡓࡃࡍࡀ ࡔࡉࡕࡋࡀࡍ ࡅࡀࡎࡉࡒ ࡋࡊࡉࡐࡇ ࡒࡀࡉࡌࡀࡍ ࡐࡕࡀ ࡅࡏࡄࡀࡁࡋࡉࡀ ࡐࡉࡄࡕࡀ ࡔࡀࡁࡀ ࡁࡊࡀࡎࡇ ࡅࡀࡔࡒࡉࡀࡍ ࡀࡅࡕࡁࡀࡍ ࡀࡁࡉࡍࡉࡀ ࡁࡅࡓࡊࡇ ࡅࡔࡅࡌ ࡓࡅࡓࡁࡉࡀ ࡀࡃࡊࡀࡓ ࡏࡋࡀࡉ ࡀࡍࡃࡀ ࡁࡉࡀࡌࡀ ࡒࡀࡌࡀࡍ ࡑࡓࡀࡊ ࡁࡒࡀࡋࡇ ࡅࡀࡔࡌࡀࡍ ࡑࡓࡀࡊ ࡅࡀࡔࡌࡀࡍ ࡁࡒࡀࡋࡇ ࡄࡉࡍ ࡏࡕࡁࡀࡊ ࡄࡀࡉࡋࡀ ࡍࡉࡔࡌࡀ ࡀࡕࡀ ࡏࡆࡉࡋ ࡁࡉࡀࡌࡀ ࡈࡁࡀ ࡏࡕࡊࡀࡌࡀࡓ ࡏࡎࡅࡐ ࡌࡍ ࡀࡋࡌࡀ ࡀࡉࡍࡀࡉ ࡋࡏࡌࡓࡅࡌ ࡔࡉࡒࡋࡉࡕ ࡍࡉࡔࡌࡀࡕ ࡋࡁࡉࡕ ࡄࡉࡉࡀ ࡎࡊࡉࡕ ࡅࡏࡆࡋࡉࡕ ࡋࡉࡀࡌࡀ ࡅࡋࡀࡈࡁࡉࡕ ࡅࡀࡕࡉࡕ ࡄࡉࡉࡀ ࡖ ࡍࡀࡐࡔࡀࡉ ࡀࡔࡊࡉࡕ ࡏࡉࡍ ࡄࡉࡉࡀ ࡅࡀࡏࡉࡉࡍ ࡄࡉࡉࡀ ࡅࡄࡉࡉࡀ ࡆࡉࡊࡉࡅࡉࡀ ࡋࡄࡀࡆࡉࡍ ࡀࡋࡌࡀ ࡅࡄࡉࡉࡀ ࡆࡀࡊࡉࡍ ࡎࡀ ࡄࡀࡆࡉࡍ ࡃࡓࡀࡔࡀ ࡖ ࡌࡀࡑࡁࡅࡕࡀ ࡄࡅ ࡕࡓࡅࡑ ࡃࡓࡀࡔࡉࡀ ࡅࡃࡅࡊࡕࡀ ࡖ ࡀࡌࡀࡓ ࡍࡉࡔࡌࡀࡕࡀ ࡒࡓࡉࡀ ࡗ ࡖ ࡊࡃࡉࡁ ࡏࡅ ࡍࡉࡔࡉࡌࡕࡀ ࡄࡀࡃ ࡄࡏ ࡀࡌࡅࡓ ࡁࡉࡍࡉࡀ ࡌࡀࡍࡉࡀ ࡖ ࡍࡄࡅࡓࡀ ࡍࡉࡔࡉࡌࡕࡀ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡖ ࡍࡄࡉࡕ ࡋࡉࡀࡓࡃࡍࡀ ࡅࡏࡑࡈࡁࡀ ࡅࡒࡀࡁࡉࡋ ࡃࡀࡊࡉࡀ ࡓࡅࡔࡅࡌࡀ ࡅࡃࡓࡅࡔ ࡌࡀࡄࡅ ࡀࡁࡀࡃࡋࡀࡊ ࡀࡁࡅࡊ ࡍࡉࡔࡌࡀ . ࡅࡓࡌࡉࡀ ࡏࡍࡉࡀࡍࡀ ࡋࡉࡀࡓࡃࡍࡀ ࡊࡌࡀ ࡔࡀࡐࡉࡓࡉࡀ ࡔࡉࡕࡋࡉࡀ . ࡅࡀࡔࡀࡓ ࡑࡁࡀࡍ ࡑࡀࡁࡅࡉࡉࡀ ࡅࡔࡉࡋࡌࡀࡉࡑࡁࡉࡍࡀࡍ ࡁࡌࡀࡑࡁࡅࡕࡇ ࡅࡉࡀࡓࡃࡍࡀ ࡖ ࡏࡑࡈࡉࡁࡍࡀࡁࡇ ࡅࡀࡍࡀ ࡁࡕࡀࡓࡌࡉࡃࡀࡉ ࡄࡀࡃࡉࡍࡀ . ࡅࡃࡓࡅࡔ ࡃࡓࡀࡔࡉࡀ ࡄࡅࡓࡉࡍࡉࡀ ࡈࡀࡁ ࡏࡋࡊࡅࡍ ࡀࡌࡀࡓࡍࡀ ࡅࡏࡋࡊࡅࡍ ࡒࡀࡓࡉࡍࡀ ࡅࡌࡀࡐࡓࡉࡔࡍࡀ ࡂࡅࡁࡓࡉࡀ ࡖ ࡒࡀࡁࡉࡋ ࡓࡅࡔࡅࡌࡀ ࡅࡕࡀࡓࡌࡉࡃࡀ ࡀࡍࡀ ࡄࡀࡃࡕࡀ ࡖ ࡀࡎࡂࡉࡕ ࡋࡊࡉࡐࡇ ࡖ ࡉࡀࡓࡃࡍࡀ . ࡅࡄࡀࡉࡆࡀࡊ ࡒࡓࡉࡀ ࡁࡓࡉࡊࡉࡀ ࡅࡌࡔࡀࡁࡉࡀ ࡄࡉࡉࡀ ࡖ ࡔࡅࡌ ࡁࡓ ࡍࡅ ࡅࡃࡅࡊࡕࡀ ࡖ ࡀࡌࡀࡓ ࡊࡋࡉࡋࡀ ࡌࡍ ࡓࡅࡀࡆ ࡂࡅࡐࡍࡀ ࡍࡀࡕࡓࡀࡑࡋࡉࡍ ࡁࡓࡉࡔࡀࡉࡉࡍ ࡋࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡄࡉࡕ ࡋࡉࡀࡓࡃࡍࡀ ࡅࡏࡑࡈࡁࡀ ࡖ ࡏࡕࡉࡒࡓࡉࡀ ࡅࡏࡕࡒࡀࡉࡀࡌ ࡅࡏࡕࡉࡓࡔࡉࡌ ࡁࡄࡀࡆࡀ ࡌࡀࡑࡁࡅࡕࡀ ࡅࡃࡀࡁࡀࡄࡀࡕࡀࡍ ࡅࡓࡅࡁࡀࡍࡀࡍ ࡅࡃࡀࡄࡀࡍ ࡅࡃࡀࡄࡅࡀࡕࡀࡍ ࡖ ࡍࡐࡀࡒ ࡌࡍ ࡐࡀࡂࡓࡀࡉࡄࡅࡍ ࡅࡋࡃࡒࡀࡉࡌࡉࡀ ࡁࡐࡀࡂࡓࡀࡉࡄࡅࡍࡏࡅ ࡍࡉࡔࡉࡌࡕࡀ ࡄࡀࡃ ࡄࡏ ࡖ ࡑࡀࡁࡉࡕ ࡀࡌࡅࡓ ࡋࡍࡉࡔࡉࡌࡕࡀ ࡖ ࡐࡋࡀࡍ ࡖ ࡍࡄࡉࡕ ࡋࡉࡀࡓࡃࡍࡀ ࡅࡏࡑࡈࡁࡀ ࡅࡎࡀࡉࡊࡀ ࡅࡒࡓࡉࡀ ࡈࡀࡁ ࡈࡀࡁࡀ ࡋࡈࡀࡁࡇ ࡅࡎࡀࡉࡊࡀ ࡅࡔࡅࡋ ࡔࡅࡋࡕࡀ ࡅࡏࡕࡓࡀࡄࡀࡌ ࡋࡍࡉࡔࡌࡀࡕࡀ ࡖ ࡑࡀࡁࡉࡕ ࡀࡌࡅࡓ ࡋࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡄࡉࡕ ࡋࡉࡀࡓࡃࡍࡀ ࡅࡏࡑࡈࡁࡀ ࡅࡒࡀࡁࡉࡋ ࡃࡀࡊࡉࡀ ࡓࡅࡔࡅࡌࡀ ࡏࡅ ࡍࡉࡔࡉࡌࡕࡀ ࡄࡀࡃ ࡄࡏ ࡀࡌࡅࡓ ࡍࡉࡔࡉࡌࡕࡀ ࡖ ࡐࡋࡀࡍ ࡖ ࡍࡄࡉࡕ ࡋࡉࡀࡓࡃࡍࡀ ࡅࡏࡑࡈࡁࡀ ࡅࡒࡀࡁࡉࡋ ࡃࡀࡊࡉࡀ ࡓࡅࡔࡅࡌࡀ ࡅࡁࡀࡋࡀࡊ ࡌࡍ ࡓࡉࡔࡀ ࡅࡀࡋࡌࡀ ࡋࡄࡀࡊࡀ ࡊࡅࡋࡇ ࡌࡀࡑࡁࡅࡕࡀࡊ ࡊࡅࡋࡀ ࡁࡆࡀࡄࡓࡅࡕࡀ ࡅࡑࡉࡋࡅࡕࡀ ࡅࡉࡀࡃࡉࡕࡀ ࡒࡓࡉࡀ ࡅࡀࡕࡍࡀ ࡐࡔࡅࡈ ࡊࡅࡔࡈࡀ ࡌࡉࡍࡀࡉࡀࡍ . ࡅࡀࡌࡅࡓ ࡊࡅࡔࡈࡀ ࡀࡎࡉࡍࡊࡅࡍ ࡏࡅࡕࡓࡉࡀ ࡀࡄࡀࡉ ࡋࡀࡐ ࡋࡀࡅࡐࡀ ࡖ ࡄࡉࡉࡀ ࡗ ࡖ ࡋࡀࡉࡐࡉࡀ ࡏࡅࡕࡓࡉࡀ ࡁࡔࡊࡉࡍࡀࡕࡅࡍ ࡏࡅࡕࡓࡉࡀ ࡀࡄࡀࡉ ࡁࡀࡎࡉࡌ ࡓࡉࡄࡀࡉࡊࡅࡍ ࡅࡁࡂࡀࡅࡀࡉࡊࡅࡍ ࡊࡅࡋࡇ ࡆࡉࡅࡀ ࡌࡋࡉࡀ ࡄࡉࡍࡅࡍ ࡍࡉࡌࡓࡅࡍ ࡁࡉࡀ ࡅࡀࡔࡊࡀ ࡀࡌࡀࡓ ࡅࡏࡔࡕࡌࡀ ࡅࡍࡀࡔࡒࡉࡍ ࡏࡃࡀࡉࡄࡅࡍ ࡏࡅ ࡍࡅࡒࡁࡀࡕࡀ ࡄࡉࡍࡉࡍ ࡍࡉࡔࡌࡀࡕࡀ ࡖ ࡑࡀࡁࡉࡕ ࡏࡅ ࡍࡉࡔࡉࡌࡕࡀ ࡄࡀࡃ ࡄࡏ ࡐࡔࡅࡈ ࡊࡅࡔࡈࡀ ࡌࡉࡍࡀࡉࡀࡍ ࡅࡀࡌࡀࡓࡋࡉࡍ ࡊࡅࡔࡈࡀ ࡀࡎࡉࡉࡊ ࡅࡒࡀࡉࡌࡉࡊ ࡊࡅࡔࡈࡀࡊ ࡍࡉࡄࡅࡉࡀ ࡎࡀࡄࡃࡉࡊ ࡅࡆࡉࡃࡒࡉࡊ ࡍࡉࡄࡅࡉࡀ ࡐࡀࡓࡅࡀࡍࡒࡉࡊ ࡄࡉࡍ ࡀࡌࡓࡀࡍ ࡁࡉࡀ ࡅࡀࡔࡊࡀ ࡀࡌࡀࡓ ࡅࡔࡕࡌࡀ ࡅࡍࡀࡔࡒࡉࡍ ࡏࡃࡀࡉࡅࡍ ࡅࡄࡀࡉࡆࡀࡊ ࡀࡌࡀࡓࡋࡉࡍ . ࡊࡅࡔࡈࡀࡉࡊࡅࡍ ࡍࡉࡄࡅࡉࡀ ࡎࡀࡄࡃࡀࡉࡊࡅࡍ ࡅࡆࡉࡃࡒࡀࡉࡊࡅࡍ ࡍࡉࡄࡅࡉࡀ ࡐࡀࡓࡅࡀࡍࡒࡀࡉࡊࡅࡍ ࡁࡅࡕࡀࡉࡊࡅࡍ ࡅࡕࡅࡔࡁࡉࡄࡕࡀࡉࡊࡅࡍ ࡕࡉࡒࡅࡌ ࡁࡌࡀࡈࡅࡕ ࡏࡋࡀࡅࡀࡉࡊࡅࡍ ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡀࡁࡀࡃࡍࡉࡍ ࡋࡈࡀࡁࡅࡕ ࡓࡁࡉࡀ ࡅࡎࡀࡃࡀࡓࡍࡇ ࡏࡋ ࡓࡀࡄࡌࡅࡕࡊࡅࡍ ࡌࡍ ࡓࡉࡔ ࡁࡓࡉࡔ ࡅࡒࡓࡀࡉࡍࡇ ࡋࡉࡀࡓࡃࡍࡀ ࡓࡁࡀ ࡖ ࡌࡉࡀ ࡄࡉࡉࡀ ࡅࡕࡋࡀࡕࡌࡀ ࡅࡔࡉࡕࡉࡍ ࡉࡀࡓࡃࡍࡉࡀ ࡖ ࡄࡅ ࡄࡉࡁࡉࡋ ࡆࡉࡅࡀ ࡁࡂࡀࡅࡀࡉࡄࡅࡍ ࡏࡑࡈࡁࡀ ࡅࡀࡌࡀࡓ ࡆࡀࡄࡓࡅࡍࡉࡍ ࡅࡐࡀࡓࡒࡉࡍࡉࡍ ࡅࡔࡅࡆࡁࡉࡍࡉࡍ ࡅࡍࡀࡈࡓࡉࡍࡉࡍ ࡋࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡄࡉࡕ ࡏࡋ ࡉࡀࡓࡃࡍࡀ ࡅࡏࡑࡈࡁࡀ ࡅࡒࡀࡁࡉࡋ ࡃࡀࡊࡉࡀ ࡓࡅࡔࡅࡌࡀ ࡌࡍ ࡂࡀࡅࡓࡀ ࡅࡌࡍ ࡂࡅࡍࡁࡀ ࡅࡌࡍ ࡄࡀࡓࡔࡉࡀ ࡁࡉࡔࡉࡀ ࡅࡌࡍ ࡌࡉࡆࡀࡋ ࡋࡏࡊࡅࡓࡉࡀ ࡅࡌࡍ ࡌࡀࡎࡂࡀࡃ ࡋࡏࡊࡅࡓࡉࡀ ࡅࡌࡍ ࡌࡉࡐࡀࡋ ࡋࡏࡊࡅࡓࡉࡀ ࡅࡃࡂࡀࡈࡉࡋ ࡀࡓࡉࡀ ࡅࡃࡉࡁࡀ ࡃࡂࡉࡎࡀ ࡅࡃࡌࡉࡕࡀ ࡋࡀࡕࡉࡊࡋࡅࡍ ࡄࡉࡍࡉࡋࡀ ࡑࡁࡅࡍ ࡅࡃࡀࡊࡅࡍ ࡍࡀࡐࡔࡀࡉࡊࡅࡍ ࡄࡀࡅࡉࡋࡊࡅࡍ ࡌࡀࡍࡃࡀ ࡖ ࡄࡉࡉࡀ ࡀࡃࡉࡀࡅࡓࡀ ࡅࡎࡀࡋࡒࡀ ࡌࡀࡑࡁࡅࡕࡀࡉࡊࡅࡍ ࡋࡓࡉࡔ . ࡅࡄࡀࡉࡆࡀࡊ ࡁࡉࡀ ࡁࡅࡕࡀ ࡅࡓࡀࡄࡌࡉࡀ ࡋࡍࡀࡐࡔࡀࡊ ࡅࡀࡌࡀࡓ . ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡀࡍࡀ ࡋࡄࡉࡉࡀ ࡒࡀࡃࡌࡀࡉࡉࡀ ࡎࡀࡂࡉࡃࡍࡀ ࡅࡋࡌࡀࡓࡀࡉ ࡌࡀࡍࡃࡀ ࡖ ࡄࡉࡉࡀ ࡌࡔࡀࡁࡀࡍࡀ ࡅࡋࡄࡀࡊ ࡐࡀࡓࡑࡅࡐࡀ ࡓࡁࡀ ࡖ ࡏࡒࡀࡓࡀ ࡖ ࡌࡍ ࡍࡀࡐࡔࡉࡇ ࡐࡓࡀࡔ ࡅࡒࡓࡉࡀ ࡌࡔࡀࡁࡉࡍ ࡄࡉࡉࡀ ࡒࡀࡃࡌࡀࡉࡉࡀ ࡅࡊࡅࡔࡈࡀ ࡀࡎࡉࡍࡊࡅࡍ ࡏࡕࡓࡉࡑࡕࡅࡍ ࡅࡏࡕࡒࡀࡉࡀࡌࡕࡅࡍ ࡅࡄࡃࡀࡓ ࡌࡀࡓࡂࡍࡀࡊ ࡋࡉࡀࡌࡉࡍࡀࡊ ࡅࡎࡀࡉࡊࡀ ࡅࡀࡄࡃࡉࡓࡀ ࡋࡎࡌࡀࡋࡀࡊ ࡅࡒࡓࡉࡀ ࡁࡓࡉࡊࡉࡀ ࡅࡌࡔࡀࡁࡉࡀ ࡄࡉࡉࡀ ࡖ ࡔࡅࡌ ࡁࡓ ࡍࡅ ࡅࡏࡕࡉࡁ ࡅࡒࡓࡉࡀ ࡈࡀࡁ ࡈࡀࡁ ࡋࡈࡀࡁࡇ ࡅࡀࡓࡁࡉࡊ ࡀࡕࡉࡁ ࡅࡔࡃࡉࡀ ࡁࡔࡀࡁࡉࡒ ࡄࡀࡈࡀࡉࡉࡀ ࡀࡁࡀࡄࡀࡕࡀࡍ ࡒࡀࡃࡌࡀࡉࡉࡀ ࡅࡍࡉࡔࡌࡀࡕࡀ ࡖ ࡌࡀࡍࡃࡀࡉࡉࡀ ࡅࡕࡀࡓࡌࡉࡃࡉࡀ ࡅࡂࡀࡍࡆࡉࡁࡓࡉࡀ ࡅࡂࡉࡍࡆࡀࡉࡉࡀ ࡅࡓࡉࡔࡀࡉࡉࡀ ࡅࡓࡉࡔࡀࡌࡉࡀ ࡅࡓࡉࡔ ࡃࡀࡓࡉࡀ ࡅࡔࡃࡉࡀ ࡁࡔࡀࡁࡉࡒ ࡄࡀࡈࡀࡉࡉࡀ ࡅࡄࡀࡉࡆࡀࡊ ࡒࡅࡌ ࡏࡋ ࡋࡉࡂࡓࡀࡊ ࡅࡃࡓࡀ ࡐࡉࡄࡕࡀ ࡅࡌࡀࡌࡁࡅࡄࡀ ࡅࡒࡓࡉࡀ ࡕࡌࡀࡍࡉࡀ ࡁࡀࡅࡀࡕࡀ ࡖ ࡐࡉࡄࡕࡀ ࡋࡐࡉࡄࡕࡀ ࡅࡕࡀࡓࡕࡉࡍ ࡁࡀࡅࡀࡕࡀ ࡖ ࡌࡀࡌࡁࡅࡄࡀ ࡋࡌࡀࡌࡁࡅࡄࡀ ࡅࡑࡉࡁࡀ ࡋࡐࡉࡄࡕࡀࡊ ࡁࡌࡀࡌࡁࡅࡄࡀ ࡅࡒࡓࡉࡀ ࡌࡀࡋࡉࡋ ࡅࡐࡕࡀ ࡄࡉࡉࡀ ࡋࡐࡀࡍࡃࡀࡌࡀࡊ ࡅࡐࡀࡋࡈࡇ ࡏࡊࡅࡋ ࡐࡉࡄࡕࡀࡊ ࡅࡔࡕࡉࡀ ࡌࡀࡌࡁࡅࡄࡀࡊ ࡅࡔࡕࡉࡀ ࡄࡀࡋࡀࡋࡕࡀ ࡅࡃࡓࡀ ࡄࡀࡋࡀࡋࡕࡀ ࡕࡉࡍࡉࡀࡍࡕࡉࡀ ࡅࡒࡓࡉࡀ ࡏࡕࡉࡌࡋࡅࡍ ࡄࡉࡉࡀ ࡅࡔࡊࡉࡍࡉࡀ ࡄࡉࡉࡀ ࡁࡓࡀࡄࡌࡀࡉࡊࡅࡍ ࡅࡔࡃࡉࡀ ࡓࡉࡄࡀࡊ ࡁࡆࡉࡅࡀ ࡋࡀࡕࡓࡇ ࡎࡀࡋࡉࡒ ࡅࡃࡅࡊࡕࡀ ࡖ ࡀࡌࡀࡓ ࡍࡉࡔࡁࡅࡒࡋࡅࡍ ࡋࡓࡀࡄࡌࡉࡀ ࡔࡅࡌࡇ ࡖ ࡊࡅࡔࡈࡀ ࡅࡋࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡄࡉࡕ ࡋࡉࡀࡓࡃࡍࡀ ࡅࡏࡑࡈࡁࡀ ࡅࡒࡀࡁࡉࡋ ࡃࡀࡊࡉࡀ ࡓࡅࡔࡅࡌࡀ ࡍࡅࡓࡀ ࡏࡊࡉࡋࡕࡀࡊ ࡀࡊࡉࡋࡕࡀ ࡅࡎࡀࡉࡊࡀ ࡅࡒࡓࡉࡀ ࡓࡉࡄࡀ ࡁࡀࡎࡉࡌࡀ ࡋࡀࡕࡓࡇ ࡍࡀࡎࡀࡒ ࡅࡃࡅࡊࡕࡀ ࡖ ࡀࡌࡀࡓ ࡓࡀࡄࡌࡉࡀ ࡔࡅࡌࡇ ࡖ ࡊࡅࡔࡈࡀ ࡍࡉࡌࡀࡓ ࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡄࡉࡕ ࡋࡉࡀࡓࡃࡍࡀ ࡅࡏࡑࡈࡁࡀ ࡅࡒࡀࡁࡉࡋ ࡃࡀࡊࡉࡀ ࡓࡅࡔࡅࡌࡀ ࡅࡄࡉࡉࡀ ࡆࡀࡊࡉࡍ ࡅࡄࡀࡉࡆࡀࡊ ࡔࡃࡉࡀ ࡀࡕࡅࡕࡉࡀ ࡌࡀࡓࡂࡍࡀࡊ ࡅࡒࡓࡉࡀ ࡈࡀࡁ ࡈࡀࡁࡀ ࡋࡈࡀࡁࡇ ࡅࡔࡅࡋ ࡔࡅࡋࡕࡀ ࡅࡕࡓࡀࡄࡀࡌ ࡋࡍࡀࡐࡔࡀࡊ ࡅࡐࡔࡅࡈ ࡊࡅࡔࡈࡀ ࡌࡍ ࡔࡂࡀࡍࡃࡀ ࡅࡗ ࡍࡀࡄࡉࡕ ࡒࡓࡉࡀ ࡁࡆࡉࡅ ࡖ ࡍࡐࡉࡔ ࡑࡁࡉࡍࡀ ࡅࡐࡀࡋࡉࡈ ࡐࡀࡍࡃࡀࡌࡀࡊ ࡅࡀࡅࡒࡉࡓ ࡕࡀࡂࡀࡊ ࡎࡀ

31. ࡆࡉࡅࡀ ࡋࡀࡕࡓࡇ ࡎࡀࡋࡉࡒ ࡅࡍࡄࡅࡓࡀ ࡋࡃࡀࡅࡓࡀ ࡕࡀࡒࡍࡀ ࡉࡅࡌࡀ ࡖ ࡍࡄࡅࡓࡀ ࡍࡉࡎࡀࡒ ࡍࡉࡕࡊࡀࡌࡀࡓ ࡄࡔࡅࡊࡀ ࡋࡃࡅࡊࡕࡇ ࡔࡀࡁࡉࡒ ࡄࡀࡈࡀࡉࡉࡀ ࡅࡄࡀࡅࡁࡉࡀ ࡅࡎࡊࡉࡋࡀࡕࡀ ࡅࡕࡉࡒࡋࡀࡕࡀ ࡅࡔࡀࡁࡀࡔࡀࡕࡀ ࡍࡉࡔࡁࡉࡒࡋࡅࡍ ࡋࡓࡀࡄࡌࡉࡀ ࡔࡅࡌࡇ ࡖ ࡊࡅࡔࡈࡀ ࡅࡋࡄࡀࡋࡉࡍ ࡍࡉࡔࡌࡀࡕࡀ ࡖ ࡍࡄࡉࡕ ࡋࡉࡀࡓࡃࡍࡀ ࡅࡏࡑࡈࡁࡀ ࡍࡅࡓࡀ ࡏࡊࡉࡋࡕࡀࡊ ࡀࡊࡀࡋࡕࡀ ࡅࡔࡀࡌࡀࡔࡕࡀࡊ ࡁࡃࡀࡓࡉࡀ ࡕࡉࡄࡅࡉࡀ ࡓࡉࡄࡀ ࡖ ࡄࡉࡉࡀ ࡋࡁࡉࡕ ࡄࡉࡉࡀ ࡍࡉࡎࡀࡒ ࡅࡀࡍࡉࡍ ࡋࡁࡉࡕ ࡄࡉࡉࡀ ࡍࡉࡎࡀࡒ ࡁࡆࡀࡊࡀࡉࡉࡀ ࡍࡉࡄࡅࡉࡀ ࡎࡅࡌࡊࡀࡍࡀࡍ ࡅࡓࡅࡄࡑࡀࡍࡀࡍ ࡋࡄࡉࡉࡀ ࡍࡉࡄࡅࡉࡀ ࡁࡀࡕࡓࡀ ࡖ ࡍࡄࡅࡓࡀ ࡅࡁࡃࡀࡅࡓࡀ ࡕࡀࡒࡍࡀ ࡅࡒࡀࡉࡀࡌࡉࡍ ࡄࡉࡉࡀ ࡕࡓࡉࡑࡉࡍ ࡁࡔࡊࡉࡍࡀࡕࡅࡍ ࡅࡄࡉࡉࡀ ࡆࡀࡊࡉࡍ ࡋࡊࡅࡋࡄࡅࡍ ࡏࡅࡁࡀࡃࡉࡀ ࡎ ࡀ ࡄࡀࡆࡉࡍ ࡔࡓࡉࡕࡀ ࡖ ࡓࡉࡄࡀ ࡖ ࡌࡀࡑࡁࡅࡕࡀ ࡄࡏ ࡎࡀ ࡎࡀ ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡍࡉࡍࡄࡀࡓࡋࡉࡀ ࡏࡅࡑࡓࡀࡉ ࡅࡌࡀࡃࡀࡉ ࡅࡌࡀࡃࡉࡄࡕࡀࡉ ࡃࡉࡋࡉࡀ ࡁࡄࡀࡆࡉࡍ ࡆࡄࡀࡓࡉࡀ ࡖ ࡌࡀࡑࡁࡅࡕࡀ ࡖ ࡊࡕࡉࡁ ࡌࡍ ࡃࡉࡅࡀࡍ ࡖ ࡀࡉࡍࡀ ࡓࡀࡁࡕࡉࡀ . ࡄࡀࡆࡉࡍ ࡄࡏ ࡌࡀࡑࡁࡅࡕࡀ ࡖ ࡑࡉࡁࡇ ࡄࡉࡁࡉࡋ ࡆࡉࡅࡀ ࡋࡀࡃࡀࡌ ࡂࡀࡁࡓࡀ ࡒࡀࡃࡌࡀࡉࡀ ࡗ ࡅࡏࡕࡀࡓࡄࡀࡁࡇ ࡌࡀࡍࡀ ࡃࡀࡊࡉࡀ ࡅࡒࡀࡌ ࡅࡕࡐࡀࡕ ࡅࡄࡉࡀ ࡅࡔࡀࡋ ࡅࡀࡌࡀࡓ ࡀࡃࡀࡌ ࡀࡍࡀ ࡁࡄࡀࡉࡋࡇ ࡖ ࡄࡉࡁࡉࡋ ࡆࡉࡅࡀ ࡎࡉࡋࡒࡉࡕ ࡋࡁࡉࡕ ࡓࡉࡔ . ࡅࡄࡀࡉࡆࡀࡊ ࡒࡀࡌ ࡄࡉࡁࡉࡋ ࡆࡉࡅࡀ ࡅࡋࡁࡀࡔ ࡔࡅࡁࡀ ࡋࡁࡅࡔࡉࡀ ࡅࡀࡎࡂࡉࡀ ࡋࡊࡉࡐࡇ ࡖ ࡉࡀࡓࡃࡍࡀ ࡗ ࡀࡃࡀࡌ ࡒࡀࡅࡒࡀ ࡖ ࡍࡅࡓࡀ ࡒࡅࡃࡀࡌࡇ ࡖ ࡄࡉࡁࡉࡋ ࡆࡉࡅࡀ ࡀࡕࡍࡀ ࡅࡄࡉࡁࡉࡋ ࡆࡉࡅࡀ ࡊࡋࡉࡋࡀ ࡋࡌࡀࡓࡂࡍࡀ ࡂࡃࡀࡋ ࡅࡂࡃࡀࡋ ࡊࡋࡉࡋࡀ ࡋࡀࡃࡀࡌ ࡅࡒࡀࡌ ࡋࡉࡀࡓࡃࡍࡀ ࡅࡓࡌࡀࡋࡇ ࡏࡍࡉࡀࡍࡀ ࡏࡅࡍࡉࡀࡍ ࡀࡁ ࡏࡅࡍࡉࡀࡍ ࡖ ࡀࡍࡀ ࡁࡄࡀࡉࡋࡇ ࡖ ࡀࡁ ࡉࡀࡅࡀࡓ ࡋࡉࡀࡓࡃࡍࡀ ࡀࡎࡂࡉࡕ ࡅࡁࡄࡀࡉࡋࡇ ࡖ ࡌࡀࡍࡃࡀ ࡖ ࡄࡉࡉࡀ ࡊࡋࡉࡋࡀ ࡋࡏࡅࡕࡓࡉࡀ ࡕࡓࡉࡑ ࡅࡄࡀࡉࡆࡀࡊ ࡒࡀࡌ ࡅࡒࡓࡀ ࡁࡔࡅࡌࡇ ࡖ ࡄࡀࡄࡅ ࡂࡀࡁࡓࡀ ࡒࡀࡃࡌࡀࡉࡀ ࡋࡕࡀࡂࡇ ࡅࡕࡓࡀࡑ ࡁࡓࡉࡔࡉࡇ ࡅࡒࡓࡀ ࡄࡉࡉࡀ ࡒࡉࡓࡉࡅࡉࡀ ࡋࡉࡀࡅࡀࡓ ࡆࡉࡅࡀ ࡅࡍࡄࡅࡓ ࡍࡄࡅࡓࡀ ࡅࡌࡀࡍࡃࡀ ࡒࡓࡀࡍ ࡋࡊࡋࡉࡋࡀ ࡖ ࡀࡎࡀ ࡅࡕࡓࡀࡑ ࡀࡂࡀࡍࡁࡉࡀ ࡕࡀࡂࡀࡅࡋࡂࡀࡈ ࡒࡅࡓࡍࡀ ࡖ ࡍࡀࡑࡉࡐࡀ ࡅࡒࡓࡀ ࡄࡀࡉࡀࡋ ࡊࡁࡀࡓ ࡓࡀࡆࡀ ࡓࡁࡀ ࡖ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡅࡀࡊࡓࡉࡊ ࡐࡀࡍࡃࡀࡌࡀ ࡋࡐࡅࡌࡇ ࡅࡒࡓࡀ ࡓࡉࡄࡀ ࡖ ࡁࡀࡎࡉࡌ ࡅࡄࡀࡋ ࡄࡉࡉࡀ ࡒࡀࡃࡌࡀࡉࡉࡀ ࡅࡓࡌࡀ ࡓࡉࡄࡀ ࡋࡍࡅࡓࡀ ࡅࡒࡓࡀ ࡀࡅࡃࡉࡍ ࡅࡕࡅࡔࡁࡉࡄࡀࡍ ࡅࡏࡋࡊࡅࡍ ࡃࡉࡋࡊࡅࡍ ࡅࡁࡉࡕ ࡌࡉࡔࡒࡀࡋ ࡀࡉࡍࡉࡀ ࡅࡌࡉࡔࡒࡀࡋ ࡀࡉࡍࡉࡀ ࡅࡁࡉࡅࡌࡀ ࡖ ࡉࡀࡓࡃࡍࡀ ࡏࡄࡀࡁࡋࡇ ࡅࡎࡉࡂࡃࡉࡕ ࡅࡔࡀࡁࡀࡕࡇ ࡋࡄࡀࡊ ࡉࡀࡅࡀࡓ ࡆࡉࡅࡀ ࡅࡀࡍࡀ ࡄࡅ ࡉࡅࡓ ࡁࡓ ࡁࡀࡓࡉࡕ ࡁࡆࡉࡅࡀ ࡍࡀࡐࡔࡀ ࡅࡋࡂࡀࡈ ࡊࡀࡍࡆࡀࡋࡀ ࡅࡒࡓࡀ ࡋࡉࡀࡓࡃࡍࡀ ࡀࡎࡂࡉࡕ ࡀࡋࡌࡀ ࡋࡃࡅࡊࡕࡀ ࡖ ࡀࡌࡀࡓ ࡐࡓࡀࡋࡉࡀ ࡄࡀࡍࡃࡀࡌࡉࡀ ࡒࡅࡌࡀࡕ ࡏࡄࡅࡕ ࡅࡍࡄࡉࡕ ࡀࡋࡌࡀ ࡋࡓࡅࡁࡀࡉࡀ ࡖ ࡀࡈࡌࡇ ࡁࡉࡀࡓࡃࡍࡀ ࡅࡒࡓࡀ ࡁࡔࡅࡌࡇ ࡖ ࡉࡅࡎࡌࡉࡓ ࡂࡅࡐࡍࡀ ࡒࡀࡃࡌࡀࡉࡀ ࡋࡌࡀࡓࡂࡍࡀ ࡅࡃࡅࡊࡕࡀ ࡖ ࡀࡌࡀࡓ ࡗ ࡊࡎࡉࡀ ࡁࡆࡉࡅࡇ ࡅࡌࡋࡀࡁࡀࡔ ࡁࡀࡍࡄࡅࡓࡇ ࡓࡌࡀࡋࡇ ࡊࡋࡉࡋࡀ ࡖ ࡀࡎࡀ ࡋࡌࡀࡓࡂࡍࡀ ࡅࡀࡋࡁࡉࡔࡉࡇ ࡁࡊࡀࡍࡆࡀࡋࡀ ࡅࡒࡓࡀ ࡏࡎࡉࡓ ࡉࡀࡌࡀ ࡅࡑࡀࡓ ࡕࡋࡀࡕ ࡑࡅࡓࡀࡕࡀ ࡕࡋࡀࡕࡀ ࡆࡉࡁࡍࡉࡀ ࡁࡉࡀࡓࡃࡍࡀ ࡅࡒࡓࡀ ࡂࡉࡌࡓࡀ ࡀࡍࡀ ࡂࡌࡉࡓࡀ ࡅࡆࡄࡀ ࡅࡏࡕࡀࡆࡄࡀ ࡅࡀࡆࡋࡀ ࡌࡉࡀ ࡁࡉࡀࡓࡃࡍࡀ ࡋࡉࡀࡌࡉࡍࡇ ࡅࡋࡎࡌࡀࡋࡇ ࡅࡋࡒࡅࡃࡀࡌࡇ ࡅࡒࡓࡀ ࡐࡉࡓࡉࡀࡅࡉࡎ ࡗ ࡖ ࡊࡕࡉࡁ ࡅࡄࡀࡉࡆࡀࡊ ࡓࡌࡀ ࡏࡍࡉࡀࡍࡀ ࡅࡀࡌࡀࡓࡋࡇ ࡊࡅࡋ ࡌࡀࡍ ࡖ ࡏࡕࡁࡇ ࡄࡀࡉࡋࡀ ࡅࡓࡀࡄࡌࡇ ࡍࡀࡐࡔࡉࡇ ࡍࡉࡕࡉࡀ ࡅࡍࡉࡍࡄࡉࡕ ࡋࡉࡀࡓࡃࡍࡀ ࡅࡍࡉࡑࡈࡁࡀ ࡅࡍࡉࡒࡀࡁࡉࡋ ࡃࡀࡊࡉࡀ ࡓࡅࡔࡅࡌࡀ ࡅࡍࡉࡋࡁࡀࡔࡏࡅࡑࡈࡋࡉࡀ ࡖ ࡆࡉࡅࡀ ࡅࡍࡉࡕࡓࡀࡑ ࡁࡓࡉࡔࡉࡇ ࡊࡋࡉࡋࡀ ࡓࡀࡅࡆࡉࡀ ࡅࡍࡄࡉࡕ ࡀࡃࡀࡌ ࡋࡉࡀࡓࡃࡍࡀ ࡅࡈࡌࡀࡔ ࡕࡋࡀࡕ ࡈࡌࡅࡔࡉࡀࡕࡀ ࡀࡁࡀࡕࡓࡇ ࡅࡋࡉࡂࡈࡇ ࡁࡉࡀࡌࡉࡍࡇ ࡅࡀࡔࡋࡉࡌࡇ ࡋࡎࡌࡀࡋࡇ ࡅࡀࡅࡕࡁࡇ ࡁࡉࡍࡉࡀ ࡃࡉࡋࡇ ࡋࡌࡀࡓࡂࡍࡇ ࡅࡈࡉࡌࡔࡉࡇ ࡕࡋࡀࡕ ࡈࡌࡅࡔࡉࡀࡕࡀ ࡅࡓࡉࡔࡅࡌࡇ ࡕࡋࡀࡕࡀ ࡓࡅࡔࡅࡌࡉࡀ ࡁࡉࡀࡓࡃࡍࡀ ࡅࡀࡔࡒࡇ ࡕࡋࡀࡕࡀ ࡄࡅࡐࡍࡉࡀ ࡌࡉࡀ ࡅࡒࡓࡀ ࡋࡊࡋࡉࡋࡀ ࡖ ࡀࡎࡀ ࡌࡀࡍࡃࡀ ࡒࡓࡀࡍ ࡅࡕࡓࡀࡑࡋࡇ ࡁࡓࡉࡔࡉࡇ ࡅࡀࡃࡊࡀࡓ ࡏࡋࡇ ࡔࡅࡌࡄࡀࡕࡀ ࡊࡀࡎࡉࡀࡕࡀ ࡅࡐࡔࡀࡈ ࡊࡅࡔࡈࡀ ࡌࡉࡍࡇ ࡌࡍ ࡏࡋࡀࡅࡉࡀ ࡌࡀࡓࡂࡍࡀ ࡅࡀࡎࡒࡇ ࡋࡒࡅࡃࡀࡌࡇ ࡅࡍࡎࡀࡁ ࡌࡉࡀ ࡌࡍ ࡉࡀࡓࡃࡍࡀ ࡁࡒࡀࡍࡉࡍࡀ ࡅࡓࡌࡀ ࡏࡍࡉࡀࡍࡀ ࡁࡓࡉࡔ ࡌࡉࡀ ࡍࡉࡐࡒࡉࡕ ࡅࡁࡓࡉࡊࡉࡕ ࡕࡉࡓࡀ ࡁࡀࡓࡀࡉࡀ ࡅࡒࡓࡀ ࡌࡍ ࡉࡀࡓࡃࡍࡀ ࡎࡉࡋࡒࡉࡕ ࡅࡎࡋࡉࡒ ࡌࡍ ࡉࡀࡓࡃࡍࡀ ࡅࡔࡀࡋࡌࡇ ࡅࡃࡓࡀ ࡌࡉࡔࡀ ࡅࡒࡓࡀ ࡀࡅࡃࡉࡍ ࡁࡇ ࡅࡌࡉࡔࡀ ࡀࡍࡀࡕ ࡔࡉࡄࡀ ࡅࡏࡕࡒࡀࡉࡀࡌࡕࡅࡍ ࡄࡉࡉࡀ ࡒࡀࡃࡌࡀࡉࡉࡀ ࡏࡋ ࡌࡉࡔࡀ ࡅࡓࡉࡔࡅࡌࡇ ࡕࡋࡀࡕࡀ ࡓࡅࡔࡅࡌࡉࡀ ࡅࡀࡃࡉࡀ ࡏࡋࡇ ࡕࡋࡀࡕ ࡀࡃࡀࡉࡀࡕࡀ ࡅࡊࡅࡋ ࡓࡅࡔࡅࡌࡀ ࡀࡕࡍࡀ ࡏࡃࡀ ࡋࡓࡉࡔࡉࡇ ࡅࡀࡃࡊࡀࡓ ࡏࡋࡇ ࡄࡀࡍࡉࡊ ࡔࡅࡌࡄࡀࡕࡀ ࡖ ࡀࡃࡊࡀࡓ ࡏࡋࡇ ࡁࡉࡀࡓࡃࡍࡀ ࡅࡐࡔࡀࡈ ࡊࡅࡔࡈࡀ ࡌࡉࡍࡇ ࡅࡍࡎࡀࡁ ࡐࡉࡄࡕࡀ ࡅࡌࡀࡌࡁࡅࡄࡀ ࡅࡒࡓࡀ ࡕࡌࡀࡍࡉࡀ ࡁࡀࡅࡀࡕࡀ ࡖ ࡐࡉࡄࡕࡀ ࡏࡋ ࡐࡉࡄࡕࡀ ࡅࡕࡀࡓࡕࡉࡍ ࡁࡀࡅࡀࡕࡀ ࡖ ࡌࡀࡌࡁࡅࡄࡀ ࡋࡌࡀࡌࡁࡅࡄࡀ ࡅࡏࡄࡀࡁࡋࡇ ࡐࡉࡄࡕࡀ ࡅࡀࡊࡀࡋ ࡅࡏࡄࡀࡁࡋࡇ ࡖ ࡔࡕࡉࡀ ࡌࡀࡌࡁࡅࡄࡀ ࡅࡔࡕࡀ ࡅࡔࡕࡀ ࡄࡀࡋࡀࡋࡕࡀ ࡅࡐࡔࡀࡈ ࡊࡅࡔࡈࡀ ࡌࡉࡍࡇ ࡅࡀࡅࡕࡁࡇ ࡒࡅࡃࡀࡌࡇ ࡅࡒࡓࡀ ࡄࡀࡕࡀࡌࡀࡕࡀ ࡗ ࡏࡄࡀࡁࡋࡇ ࡉࡀࡓࡃࡍࡀ ࡖ ࡌࡉࡀ ࡄࡉࡉࡀ ࡋࡎࡀࡌ ࡎࡌࡉࡓ ࡆࡉࡅࡀ ࡓࡁࡀ ࡖ ࡄࡉࡉࡀ ࡅࡏࡎࡉࡓࡀ ࡅࡄࡕࡉࡌࡀ ࡅࡁࡏࡅࡑࡀࡓ ࡄࡉࡉࡀ ࡅࡏࡎࡉࡓࡀ ࡅࡄࡕࡉࡌࡀ ࡓࡀࡁࡕࡉࡀ ࡅࡀࡎࡉࡌ ࡏࡃࡀ ࡏࡋࡇ ࡅࡒࡀࡌ ࡅࡒࡓࡀࡋࡇࡏࡕࡓࡉࡑࡕࡅࡍ ࡅࡏࡕࡒࡀࡉࡀࡌࡕࡅࡍ ࡅࡒࡓࡀ ࡌࡀࡄࡅ ࡀࡁࡀࡃࡋࡀࡊ ࡀࡁࡅࡊ ࡍࡉࡔࡌࡀ ࡅࡊࡌࡀ ࡔࡀࡐࡉࡓࡉࡀ ࡔࡉࡕࡋࡉࡀ ࡖ ࡔࡕࡀࡋ ࡅࡀࡒࡀࡌ ࡉࡀࡓࡃࡍࡀ . ࡅࡒࡓࡀ ࡀࡔࡀࡓ ࡑࡁࡀࡍ ࡑࡀࡁࡅࡉࡀࡉ . ࡅࡔࡉࡋࡌࡀࡉ ࡑࡁࡉࡍࡀࡍ ࡁࡌࡀࡑࡁࡅࡕࡇ ࡅࡍࡉࡃࡁࡀࡉ . ࡅࡒࡓࡀ ࡉࡀࡓࡃࡍࡀ ࡖ ࡏࡑࡈࡉࡁࡍࡀࡁࡇ ࡏࡋࡀࡅࡀࡉࡀࡍ ࡍࡉࡄࡅࡉࡀ ࡁࡎࡀࡄࡃࡉࡀ . ࡅࡀࡍࡀ ࡁࡕࡀࡓࡌࡉࡃࡀࡉ ࡄࡀࡃࡉࡍࡀ ࡅࡁࡍࡀࡑࡅࡓࡀࡉࡉࡀ ࡖ ࡔࡅࡕࡀࡉ ࡔࡀࡌࡀ . ࡅࡓࡌࡀ ࡏࡍࡉࡀࡍࡀ ࡈࡀࡁ ࡏࡋࡊࡅࡍ ࡀࡌࡀࡓࡍࡀ ࡁࡄࡉࡓࡀࡉ ࡖ ࡌࡉࡍࡀࡉ ࡋࡉࡀࡓࡃࡍࡀ ࡎࡋࡉࡒ ࡅࡏࡋࡊࡅࡍ ࡒࡀࡓࡉࡍࡀ ࡅࡌࡀࡐࡓࡉࡔࡍࡀ ࡅࡕࡀࡓࡌࡀࡃࡀ ࡀࡍࡀ ࡄࡀࡃࡕࡀ ࡖ ࡀࡎࡂࡉࡕ ࡋࡊࡉࡐࡇ ࡖ ࡉࡀࡓࡃࡍࡀ . ࡅࡒࡓࡀ ࡊࡅࡋࡄࡅࡍ ࡏࡍࡉࡀࡍࡉࡀ ࡅࡃࡓࡀࡔࡉࡀ ࡁࡎࡀࡊࡅࡍ ࡅࡒࡓࡀ ࡁࡓࡉࡊࡉࡀ ࡅࡌࡔࡀࡁࡉࡀ ࡄࡉࡉࡀ ࡖ ࡔࡅࡌ ࡁࡓ ࡍࡅ ࡅࡈࡀࡁ ࡈࡀࡁࡀ ࡋࡈࡀࡁࡇ ࡅࡒࡓࡀ ࡁࡆࡉࡅ ࡖ ࡍࡐࡉࡔ ࡑࡁࡉࡍࡀ ࡅࡔࡓࡀ ࡊࡀࡍࡆࡀࡋࡀ ࡅࡀࡅࡒࡀࡓ ࡕࡀࡂࡀ ࡅࡄࡉࡉࡀ ࡆࡀࡊࡏࡉࡍ ࡎ ࡀ ࡅࡄࡀࡉࡆࡀࡊ ࡀࡂࡆࡀࡓ ࡀࡂࡆࡀࡓࡕࡀ ࡄࡉࡁࡉࡋ ࡆࡉࡅࡀ ࡅࡀࡌࡀࡓ ࡀࡁࡂࡀࡍ ࡄࡉࡉࡀ ࡅࡀࡁࡂࡀࡍ ࡌࡀࡍࡃࡀ ࡄࡉࡉࡀ ࡅࡀࡁࡂࡀࡍ ࡌࡉࡌࡓࡀ ࡓࡁࡀ ࡒࡀࡃࡌࡀࡉࡀ ࡍࡉࡄࡅࡉࡀ ࡋࡊࡅࡋ ࡂࡀࡁࡓࡀ ࡕࡀࡓࡌࡉࡃࡀ ࡖ ࡀࡃࡀࡍࡒࡉࡀ ࡐࡀࡍࡃࡀࡌࡀ ࡌࡉࡑࡁࡅࡕࡀ ࡍࡉࡑࡁࡀ ࡍࡉࡋࡉࡈࡇ ࡔࡅࡌࡀ ࡔࡉࡓࡉࡀࡍࡀ ࡖ ࡀࡉࡍࡀ ࡓࡀࡁࡕࡉࡀ ࡅࡍࡉࡋࡉࡈࡇ ࡔࡉࡋࡌࡀࡉ ࡅࡍࡉࡃࡁࡀࡉ ࡏࡅࡕࡓࡉࡀ ࡍࡀࡈࡓࡉࡀ ࡖ ࡉࡀࡓࡃࡍࡀ ࡅࡍࡉࡋࡉࡈࡇ ࡀࡉࡍࡀ ࡅࡎࡉࡍࡃࡉࡓࡊࡀ ࡅࡉࡅࡊࡀࡁࡀࡓ ࡍࡉࡍࡉࡎࡁࡇ ࡋࡕࡀࡂࡇ ࡅࡓࡅࡔࡅࡌࡇ ࡅࡍࡉࡔࡐࡋࡇ ࡋࡊࡉࡍࡉࡀࡍࡇ ࡖ ࡀࡕࡀࡓ ࡄࡔࡅࡊ ࡅࡄࡀࡆࡀࡊ ࡊࡅࡋ ࡂࡀࡁࡓࡀ ࡍࡀࡑࡅࡓࡀࡉࡀ ࡖ ࡐࡀࡍࡃࡀࡌࡀ ࡍࡉࡋࡂࡅࡈ ࡅࡌࡀࡑࡁࡅࡕࡀ ࡍࡉࡑࡁࡀ ࡍࡉࡃࡂࡀࡓ ࡏࡋࡇ ࡔࡉࡓࡉࡀࡍࡀ ࡖ ࡀࡉࡍࡀ ࡓࡀࡁࡕࡉࡀ ࡋࡒࡅࡃࡀࡌࡇ ࡅࡊࡅࡋ ࡖ ࡀࡁࡀࡃ ࡍࡉࡕࡒࡀࡉࡀࡌ ࡅࡊࡅࡋࡄࡅࡍ ࡒࡉࡓࡉࡀࡕࡀ ࡌࡉࡍࡇ ࡍࡉࡕࡓࡀࡄࡒࡀࡍ ࡅࡍࡉࡕࡉࡊࡓࡉࡊ ࡄࡔࡅࡊࡀ ࡌࡉࡍࡇ ࡅࡍࡉࡕࡍࡀࡈࡀࡓ ࡀࡋࡁࡅࡔࡉࡇ ࡀࡋࡅࡀࡕࡀࡉࡀࡍ ࡅࡗ ࡒࡀࡉࡉࡌ ࡁࡐࡀࡂࡓࡇ ࡋࡀࡌࡑࡉࡀ ࡔࡅࡁࡀ ࡋࡌࡉࡔࡁࡀࡒ ࡄࡀࡅࡒࡀ ࡏࡋࡇ ࡅࡍࡉࡔࡕࡀࡃࡀࡓࡋࡇ ࡄࡀࡉࡋࡀ ࡓࡀࡌࡀ . ࡅࡗ ࡍࡀࡐࡉࡒ ࡌࡍ ࡐࡀࡂࡓࡇ ࡕࡉࡕࡉࡀ ࡀࡋࡀࡍࡐࡇ ࡀࡍࡀࡍࡀ ࡖ ࡍࡀࡐࡒࡀ ࡀࡋࡀࡍࡐࡀࡉࡄࡅࡍ ࡖࡏࡅࡕࡓࡉࡀ ࡅࡄࡀࡅࡒࡀ ࡖ ࡌࡀࡈࡀࡓࡀࡉࡉࡀ ࡏࡋࡇ ࡋࡀࡍࡉࡔࡕࡀࡋࡀࡈ ࡅࡋࡀࡍࡉࡁࡀࡓ ࡏࡋࡇ ࡌࡀࡈࡀࡓࡀࡉࡉࡀ ࡋࡀࡍࡀࡃࡉࡀ ࡅࡀࡁࡀࡕࡅࡓ ࡌࡍ ࡆࡉࡅࡇ ࡍࡀࡋࡁࡉࡔࡉࡇ ࡅࡊࡅࡋࡄࡅࡍ ࡏࡅࡕࡓࡉࡀ ࡌࡍ ࡍࡄࡅࡓࡀࡉࡄࡅࡍ ࡍࡉࡔࡓࡅࡍ ࡏࡋࡇ ࡅࡄࡉࡉࡀ ࡆࡀࡊࡉࡍ ࡎࡀ ࡄࡀࡆࡉࡍ ࡌࡉࡑࡓࡀ ࡖ ࡌࡀࡑࡁࡅࡕࡀ ࡖ ࡀࡕࡀࡕ ࡋࡀࡋࡌࡀ ࡄࡀࡆࡉࡍ ࡖ ࡑࡉࡁࡇ ࡄࡉࡁࡉࡋ ࡆࡉࡅࡀ ࡋࡀࡃࡀࡌ ࡂࡀࡁࡓࡀ ࡒࡀࡃࡌࡀࡉࡀ ࡅࡍࡈࡀࡓ ࡁࡃࡀࡓࡀ ࡋࡁࡄࡉࡓࡉࡀ ࡆࡉࡃࡒࡀ ࡖ ࡄࡅࡀࡕ ࡊࡕࡉࡁࡀ ࡄࡀࡆࡉࡍ ࡌࡉࡑࡓࡀ ࡁࡃࡉࡅࡀࡍ ࡖ ࡀࡉࡍࡀ ࡓࡀࡁࡕࡉࡀ ࡖ ࡓࡀࡌࡅࡉࡀ ࡁࡓ ࡏࡒࡀࡉࡌࡀࡕ ࡅࡊࡉࡕࡁࡀ ࡁࡀࡉࡀࡍ ࡄࡀࡁࡉࡋ ࡁࡓ ࡁࡓࡉࡊ ࡉࡀࡅࡀࡓ ࡅࡄࡀࡉࡆࡀࡊ ࡄࡀࡊࡀ ࡆࡓࡀ ࡁࡌࡀ ࡖ ࡍࡀࡑࡅࡓࡀࡉࡉࡀ ࡌࡍ ࡃࡉࡅࡀࡍ ࡖ ࡍࡀࡐࡔࡉࡇ ࡖ ࡀࡍࡎࡀ ࡌࡍ ࡃࡉࡅࡀࡍ ࡖ ࡓࡀࡌࡅࡉࡀ ࡁࡓ ࡏࡒࡀࡉࡌࡀࡕ ࡖ ࡄࡅࡀࡕ ࡊࡕࡉࡁࡀ ࡁࡈࡉࡁ ࡌࡀࡕࡀ ࡖ ࡔࡕࡉࡊࡍࡀࡕ ࡀࡋࡅࡀࡕ ࡄࡀࡉࡅࡍࡀ ࡁࡓࡀࡕࡇ ࡖ ࡉࡀࡄࡉࡀ ࡅࡁࡀࡉࡍࡉࡀ ࡁࡓ ࡆࡀࡊࡉࡀ ࡖ ࡋࡀࡂࡈࡉࡀ ࡅࡌࡀࡔࡓࡉࡀ ࡏࡋࡇ ࡅࡃࡋࡀ ࡀࡔࡀࡓࡏࡋࡇ ࡍࡉࡓࡄࡅࡒ ࡌࡉࡍࡇ ࡅࡋࡀࡍࡉࡒࡓࡅࡁࡋࡇ ࡅࡄࡉࡉࡀ ࡆࡀࡊࡉࡍ ࡎ ࡀ. ࡕࡅࡌ ࡀࡌࡀࡓ ࡉࡀࡄࡉࡀ ࡀࡃࡀࡌ ࡁࡓ ࡎࡀࡌ ࡎࡀࡉࡅࡉࡀ ࡗ ࡍࡉࡐࡋࡀࡕ ࡀࡋࡅࡀࡕࡀࡉ ࡃࡉࡅࡀࡍ ࡖ ࡓࡀࡌࡅࡉࡀ ࡁࡓ ࡏࡒࡀࡉࡌࡀࡕ ࡗ ࡔࡕࡉࡊࡍࡀࡕ ࡀࡋࡅࡀࡕ ࡄࡀࡉࡅࡍࡀ ࡁࡓࡀࡕࡇ ࡖ ࡉࡀࡄࡉࡀ ࡅࡁࡀࡉࡍࡉࡀ ࡁࡓ ࡆࡀࡊࡉࡀ ࡁࡍࡀࡉࡕࡇ ࡅࡎࡀࡃࡀࡓࡕࡇ ࡗ ࡄࡀࡆࡉࡍ ࡖ ࡄࡅࡀࡕ ࡊࡕࡉࡁࡀ ࡊࡕࡀࡁࡕࡇ ࡅࡋࡀࡔࡀࡍࡉࡕ ࡌࡉࡍࡃࡀࡌ ࡁࡂࡀࡅࡇ ࡎࡀ

32. ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡀࡎࡅࡕࡀ ࡕࡉࡄࡅࡉࡋࡉࡀ ࡋࡃࡉࡋࡉࡀ ࡄࡀࡉࡀࡋ ࡊࡁࡀࡓ ࡓࡀࡆࡀ ࡓࡁࡀ ࡖ ࡆࡉࡅࡀ ࡅࡍࡄࡅࡓࡀ ࡅࡏࡓࡀࡓࡀ ࡖ ࡔࡓࡉࡀ ࡋࡐࡅࡌࡀࡉࡄࡅࡍ ࡖ ࡄࡉࡉࡀ ࡒࡀࡃࡌࡀࡉࡉࡀ ࡖ ࡌࡉࡍࡇ ࡃࡉࡋࡇ ࡄࡅࡀ ࡌࡀࡍࡃࡀ ࡖ ࡄࡉࡉࡀ ࡖ ࡄࡅ ࡏࡃࡀ ࡅࡐࡓࡀࡔ ࡁࡏࡅࡑࡓࡀࡉࡄࡅࡍ ࡖ ࡄࡉࡉࡀ ࡒࡀࡃࡌࡀࡉࡉࡀ ࡖ ࡄࡉࡍࡅࡍ ࡐࡓࡉࡔࡀࡉࡉࡀ ࡄࡉࡍࡅࡍ ࡅࡌࡔࡀࡁࡉࡍ ࡄࡉࡉࡀ ࡎ ࡀ.. ࡄࡀࡆࡉࡍ ࡁࡅࡕࡀ ࡒࡓࡉࡀ ࡅࡋࡂࡅࡈ ࡊࡀࡍࡆࡀࡋࡀࡊ ࡋࡌࡀࡎࡉࡒࡕࡀ ࡎࡀ

33. ࡁࡔࡅࡌࡀ ࡖ ࡄࡉࡉࡀ ࡌࡉࡀ ࡀࡍࡀࡕࡅࡍ ࡄࡉࡉࡀ ࡀࡍࡀࡕࡅࡍ ࡌࡍ ࡀࡕࡓࡀ ࡖ ࡍࡐࡉࡔ ࡀࡕࡀࡉࡕࡅࡍ ࡅࡌࡍ ࡁࡉࡕ ࡄࡉࡉࡀ ࡔࡕࡀࡐࡀࡉࡕࡅࡍ ࡌࡉࡕࡉࡀ ࡌࡉࡀ ࡄࡉࡉࡀ ࡌࡍ ࡁࡉࡕ ࡄࡉࡉࡀ ࡍࡉࡕࡅࡍ ࡈࡀࡁࡉࡀ ࡅࡍࡉࡈࡀࡉࡁࡅࡍ ࡅࡁࡉࡔࡉࡀ ࡍࡉࡕࡉࡁࡓࡅࡍ ࡅࡁࡍࡉࡀ ࡀࡋࡌࡀ ࡍࡉࡁࡉࡄࡕࡅࡍ ࡅࡍࡉࡌࡓࡅࡍ ࡖ ࡏࡕࡋࡅࡍ ࡀࡕࡓࡀ ࡁࡀࡕࡓࡀ ࡖ ࡄࡉࡉࡀ ࡖ ࡁࡀࡉࡉࡍ ࡌࡉࡍࡇ ࡌࡀࡔࡊࡉࡀ ࡅࡀࡌࡓࡉࡀ ࡌࡉࡍࡇ ࡅࡌࡉࡔࡕࡀࡉࡌࡉࡀ ࡁࡉࡍ ࡅࡀࡔࡊࡉࡍࡉࡍ ࡅࡀࡌࡀࡓࡍࡉࡍ ࡅࡔࡕࡀࡌࡉࡍࡉࡍ ࡌࡍ ࡒࡅࡃࡀࡌࡀࡊ ࡃࡉࡋࡀࡊ ࡌࡀࡍࡃࡀ ࡖ ࡄࡉࡉࡀ ࡌࡀࡓࡀࡉࡄࡅࡍ ࡖ ࡀࡎࡀࡅࡀࡕࡀ ࡏࡔࡕࡀࡐࡅࡉࡉࡀ ࡌࡉࡀ ࡋࡕࡉࡁࡉࡋ ࡍࡉࡔࡕࡐࡉࡋ ࡁࡉࡔࡀ ࡌࡍ ࡒࡅࡃࡀࡌ ࡈࡀࡁࡀ ࡌࡉࡐࡉࡋ ࡌࡉࡀ ࡋࡀࡓࡒࡀ ࡍࡉࡔࡕࡁࡉࡒࡋࡅࡍ ࡄࡀࡈࡀࡉࡀࡍ ࡅࡄࡀࡅࡁࡀࡍ ࡅࡎࡊࡉࡋࡀࡕࡀࡍ ࡅࡕࡉࡒࡋࡀࡕࡀࡍ ࡅࡔࡀࡁࡀࡔࡀࡕࡀࡍ ࡋࡓࡀࡄࡌࡉࡀ ࡔࡅࡌࡇ ࡖ ࡊࡅࡔࡈࡀ ࡅࡋࡍࡉࡔࡌࡀࡕࡀ ࡖ ࡄࡀࡆࡀ ࡌࡀࡎࡉࡒࡕࡀ ࡅࡋࡀࡁࡀࡄࡀࡕࡀࡍ ࡅࡓࡅࡁࡀࡍࡀࡍ ࡅࡋࡀࡄࡀࡍ ࡅࡋࡀࡄࡅࡀࡕࡀࡍ ࡖ ࡍࡐࡀࡒ ࡌࡍ ࡐࡀࡂࡓࡀࡉࡄࡅࡍ ࡅࡋࡃࡒࡀࡉࡌࡉࡀ ࡁࡐࡀࡂࡓࡀࡉࡄࡅࡍ ࡅࡕࡉࡌࡓࡅࡍ ࡅࡒࡀࡉࡀࡌࡉࡍ ࡄࡉࡉࡀ ࡁࡔࡊࡉࡍࡀࡕࡅࡍ ࡅࡄࡉࡉࡀ ࡆࡀࡊࡉࡍ ࡎࡀ

34. ࡄࡀࡋ ࡄࡉࡉࡀ ࡒࡀࡃࡌࡀࡉࡉࡀ ࡖ ࡏࡍࡉࡔ ࡒࡅࡃࡀࡌࡀࡉࡊࡅࡍ ࡋࡀࡄࡅࡀ ࡍࡅࡊࡓࡀࡉࡉࡀ ࡌࡍ ࡀࡋࡌࡉࡀ ࡖ ࡍࡄࡅࡓࡀ ࡉࡀࡕࡉࡓࡉࡀ ࡖ ࡏࡋࡀࡅࡉࡀ ࡅࡊࡅࡋࡄࡅࡍ ࡏࡅࡁࡀࡃࡉࡀ ࡋࡆࡉࡅࡀ ࡄࡀࡕࡉࡒࡀ ࡅࡋࡍࡄࡅࡓࡀ ࡓࡁࡀ ࡒࡀࡃࡌࡀࡉࡀ ࡅࡋࡄࡉࡉࡀ ࡖ ࡄࡅࡍ ࡌࡍ ࡄࡉࡉࡀ ࡅࡋࡊࡅࡔࡈࡀ ࡖ ࡄࡅࡀ ࡌࡍ ࡒࡅࡃࡀࡌ ࡁࡓࡉࡔࡀ ࡄࡀࡋ ࡀࡁࡀ ࡖ ࡏࡅࡕࡓࡉࡀ ࡀࡕࡉࡒࡀ ࡓࡀࡌࡀ ࡊࡀࡎࡉࡀ ࡅࡍࡈࡉࡓࡀ ࡄࡀࡋ ࡉࡅࡆࡀࡈࡀࡒ ࡌࡀࡍࡃࡀ ࡖ ࡄࡉࡉࡀ ࡍࡉࡁࡀ ࡖ ࡄࡉࡉࡀ ࡖ ࡌࡄࡀࡅࡉࡀ ࡔࡉࡃࡒࡀ ࡅࡉࡀࡄࡉࡁ ࡎࡉࡁࡓࡀ ࡅࡀࡄࡉࡃ ࡁࡀࡅࡀࡕࡀ ࡖ ࡓࡅࡄࡉࡀ ࡅࡍࡉࡔࡌࡀࡕࡀ ࡁࡀࡕࡓࡀ ࡖ ࡄࡉࡉࡀ ࡄࡀࡋ ࡄࡀࡉࡀࡉࡅࡍ ࡖ ࡀࡍࡀࡔࡉࡀ ࡊࡔࡉࡈࡉࡀ ࡅࡌࡄࡀࡉࡌࡍࡉࡀ ࡖ ࡔࡀࡋࡉࡌ ࡅࡍࡐࡀࡒ ࡌࡍ ࡐࡀࡂࡓࡀࡉࡄࡅࡍ ࡅࡋࡃࡒࡀࡉࡌࡉࡀ ࡁࡐࡀࡂࡓࡀࡉࡄࡅࡍ ࡍࡉࡎࡕࡀࡊࡀࡓ ࡌࡉࡍࡀࡉࡄࡅࡍ ࡁࡀࡁࡀ ࡖ ࡄࡀࡈࡀࡉࡉࡀ ࡅࡍࡉࡐࡕࡀࡋࡅࡍ ࡁࡀࡁࡀ ࡖ ࡍࡄࡅࡓࡀ ࡅࡍࡉࡕࡋࡀࡉࡐࡅࡍ ࡁࡋࡀࡅࡐࡀ ࡖ ࡄࡉࡉࡀ ࡖ ࡋࡉࡕࡋࡇ ࡐࡎࡀࡒࡀ ࡀࡍࡀࡕࡅࡍ ࡌࡍ ࡕࡀࡌ ࡁࡅࡍ ࡏࡋࡀࡍ ࡅࡀࡍࡉࡍ ࡌࡍ ࡄࡀࡊࡀ ࡍࡉࡁࡉࡀ ࡏࡋࡀࡅࡀࡉࡊࡅࡍ ࡊࡅࡋࡄࡅࡍ ࡏࡁࡉࡁࡉࡀ ࡎࡀࡉࡐࡉࡀ ࡅࡊࡅࡋࡄࡅࡍ ࡓࡉࡄࡀࡍࡉࡀ ࡁࡀࡈࡋࡉࡀ ࡋࡁࡀࡓ ࡌࡍ ࡓࡉࡄࡇ ࡖ ࡌࡀࡍࡃࡀ ࡖ ࡄࡉࡉࡀ ࡖ ࡋࡀࡎࡀࡉࡉࡐ ࡅࡋࡀࡁࡀࡈࡉࡋ ࡋࡃࡀࡓࡃࡀࡓࡉࡀ ࡅࡋࡀࡋࡀࡌ ࡀࡋࡌࡉࡀ ࡀࡃࡉࡍࡒࡉࡀ ࡄࡀࡈࡀࡉࡉࡀ ࡅࡄࡀࡅࡁࡉࡀ ࡅࡎࡊࡉࡋࡀࡕࡀ ࡅࡕࡉࡒࡋࡀࡕࡀ ࡅࡔࡀࡁࡀࡔࡀࡕࡀ ࡍࡉࡎࡒࡀ ࡄࡀࡋࡉࡍ ࡍࡉࡔࡌࡀࡕࡀ ࡖ ࡄࡀࡆࡀ ࡌࡀࡎࡉࡒࡕࡀ ࡍࡉࡄࡆࡅࡍࡇ ࡋࡀࡕࡓࡀ ࡖ ࡍࡄࡅࡓࡀ ࡅࡋࡃࡀࡅࡓࡀ ࡕࡀࡒࡍࡀ ࡅࡌࡔࡀࡁࡉࡍ ࡄࡉࡉࡀ ࡎࡀࡄࡀࡆࡉࡍ ࡐࡅࡂࡃࡀࡌࡀ ࡒࡓࡉࡀ ࡋࡓࡉࡄࡀ ࡅࡓࡌࡉࡀ ࡋࡍࡅࡓࡀ ࡅࡄࡀࡉࡆࡀࡊ ࡒࡓࡉࡀ ࡁࡀࡅࡀࡕࡀ ࡖ ࡌࡀࡎࡉࡒࡕࡀ ࡎࡀ ࡎࡀ

35. ࡁࡔࡅࡌࡀ ࡖ ࡄࡉࡉࡀ ࡁࡉࡕ ࡌࡉࡔࡒࡀࡋ ࡀࡉࡍࡉࡀ ࡊࡀࡃࡐࡉࡀ ࡅࡃࡓࡀࡉࡉࡀ ࡋࡀࡕࡓࡀ ࡖ ࡊࡅࡋࡇ ࡄࡉࡉࡀ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡀࡕࡓࡀ ࡖ ࡁࡀࡉࡉࡍ ࡌࡉࡍࡇ ࡌࡀࡔࡊࡉࡀ ࡅࡀࡌࡓࡉࡀ ࡌࡉࡍࡇ ࡅࡌࡉࡔࡕࡀࡉࡌࡉࡀ ࡅࡔࡀࡉࡋࡉࡀ ࡌࡉࡍࡇ ࡅࡌࡉࡕࡄࡉࡁࡋࡅࡍ ࡉࡅࡌ ࡁࡉࡅࡌ ࡅࡔࡀࡉࡉࡀ ࡁࡔࡀࡉࡉࡀ ࡔࡉࡕࡀ ࡄࡀࡆࡀ ࡁࡀࡉࡉࡍࡀ ࡌࡉࡍࡀࡊ ࡌࡀࡓࡀࡉ ࡌࡀࡍࡃࡀ ࡖ ࡄࡉࡉࡀ ࡁࡅࡕࡀ ࡍࡀࡐࡔࡀ ࡓࡁࡀ ࡅࡋࡀࡆࡅࡈࡀ ࡋࡂࡉࡅࡉࡀࡕࡀ ࡄࡀࡋࡉࡍ ࡖ ࡀࡓࡁࡉࡊ ࡁࡅࡓࡊࡀࡉࡀࡍ ࡋࡀࡓࡒࡀ ࡅࡏࡃࡀࡉࡄࡅࡍ ࡐࡔࡀࡈ ࡏࡋ ࡌࡉࡑࡉࡀ ࡅࡏࡋࡀࡉࡉࡀ ࡔࡁࡀࡒ ࡑࡉࡋࡌࡉࡀ ࡑࡅࡓࡉࡀ ࡅࡐࡓࡉࡊࡉࡀ ࡖ ࡈࡉࡍࡀ ࡅࡀࡋࡀࡄࡉࡀ ࡅࡒࡅࡓࡒࡎࡀ ࡅࡏࡅࡁࡀࡃࡉࡀ ࡁࡀࡈࡋࡉࡀ ࡁࡔࡅࡌࡀ ࡖ ࡄࡉࡉࡀ ࡓࡁࡉࡀ ࡍࡅࡊࡓࡀࡉࡉࡀ ࡎࡄࡀࡃ ࡍࡉࡎࡕࡊࡀࡓ ࡌࡉࡍࡀࡉࡄࡅࡍ ࡁࡀࡁࡀ ࡖ ࡄࡀࡈࡀࡉࡉࡀ ࡅࡍࡉࡐࡕࡀࡋࡅࡍ ࡁࡀࡁࡀ ࡖ ࡍࡄࡅࡓࡀ ࡕࡉࡎࡀࡒ ࡔࡅࡋࡕࡀࡍ ࡅࡁࡅࡕࡀࡍ ࡅࡃࡍࡅࡕࡀࡍ ࡒࡅࡃࡀࡌ ࡄࡉࡉࡀ ࡉࡀࡕࡉࡓࡉࡀ ࡖ ࡏࡋࡀࡅࡉࡀ ࡊࡅࡋࡄࡅࡍ ࡏࡅࡁࡀࡃࡉࡀ ࡊࡅࡋࡄࡉࡍ ࡏࡃࡉࡀ ࡂࡍࡀࡁ ࡒࡅࡃࡀࡌࡀࡊ ࡅࡊࡅࡋࡄࡉࡍ ࡏࡎࡐࡉࡀ ࡊࡀࡃࡉࡁ ࡌࡉࡀ ࡁࡉࡀࡓࡃࡍࡀ ࡆࡀࡊࡀࡉࡀ ࡒࡅࡃࡀࡌࡀࡊ ࡋࡀࡉࡉࡕ ࡌࡀࡍࡃࡀ ࡖ ࡄࡉࡉࡀ ࡀࡁࡃࡉࡀ ࡀࡍࡉࡍ ࡖ ࡊࡅࡋࡇ ࡄࡀࡈࡀࡉࡉࡀ ࡅࡀࡍࡀࡕ ࡌࡀࡓࡀ ࡖ ࡊࡅࡋࡇ ࡕࡉࡀࡓࡅࡕࡀ ࡖ ࡀࡍࡀࡕ ࡌࡉࡍࡀࡍ ࡌࡀࡍ ࡆࡀࡊࡉࡋࡀࡍ ࡅࡃࡀࡍࡀࡕ ࡌࡆࡀࡊࡉࡀࡕࡋࡀࡍ ࡌࡀࡍ ࡌࡄࡀࡉࡀࡁࡋࡀࡍ ࡁࡃࡉࡍ ࡀࡋࡌࡉࡀ ࡋࡀࡕࡉࡃࡍࡀࡍ ࡅࡁࡎࡊࡉࡋࡀࡕࡀࡍ ࡋࡀࡕࡉࡆࡋࡀࡍ ࡅࡁࡏࡅࡁࡀࡃࡉࡀ ࡖ ࡔࡉࡒࡓࡀ ࡖ ࡀࡁࡓࡉࡍ ࡀࡋࡌࡉࡀ ࡅࡃࡀࡓࡉࡀ ࡋࡀࡕࡉࡔࡀࡕࡐࡉࡍࡉࡍ ࡌࡉࡃࡄࡀ ࡃࡄࡉࡍࡀࡍ ࡀࡋࡌࡉࡀ ࡌࡉࡐࡉࡋ ࡋࡀࡍࡐࡀࡋࡍࡉࡍ ࡋࡀࡂࡀࡍࡁࡉࡀ ࡊࡅࡔࡈࡀ ࡃࡉࡋࡀࡊ ࡄࡅࡀࡋࡀࡍ ࡓࡅࡄࡑࡀࡍࡀ ࡈࡀࡁ ࡕࡓࡅࡑ ࡋࡄࡉࡉࡀ ࡅࡌࡀࡕࡓࡅࡑ ࡋࡁࡍࡉࡀ ࡀࡍࡀࡔࡉࡀ ࡀࡍࡀࡕ ࡀࡌࡀࡓࡕࡋࡀࡍ ࡁࡌࡉࡌࡓࡀࡊ ࡅࡐࡀࡒࡉࡃࡕࡉࡍࡀࡍ ࡁࡐࡅࡂࡃࡀࡌࡀࡊ ࡀࡍࡀࡕࡅࡍ ࡁࡅࡍ ࡌࡍ ࡕࡉࡁࡉࡋ ࡅࡀࡍࡀ ࡏࡕࡉࡋࡊࡅࡍ ࡌࡍ ࡐࡉࡓࡉࡀ ࡅࡏࡋࡀࡉࡉࡀ ࡀࡍࡀࡕࡅࡍ ࡁࡅࡍ ࡌࡍ ࡀࡕࡅࡕࡉࡀ ࡄࡅࡓࡃࡀ ࡏࡅࡔࡀ ࡅࡕࡀࡐࡀࡋࡀ ࡅࡀࡍࡀ ࡏࡕࡉࡋࡊࡅࡍ ࡌࡍ ࡌࡓࡅࡌࡉࡀ ࡅࡏࡋࡀࡉࡉࡀ ࡀࡍࡀࡕࡅࡍ ࡁࡅࡍ ࡁࡉࡀࡌࡉࡍ ࡁࡉࡎࡓࡀ ࡅࡀࡍࡀ ࡏࡕࡉࡋࡊࡅࡍ ࡁࡉࡀࡌࡉࡍ ࡊࡅࡔࡈࡀ ࡖ ࡁࡅࡍ ࡒࡀࡃࡌࡀࡉࡉࡀ ࡅࡀࡔࡊࡅࡍ ࡍࡉࡁࡅࡍ ࡁࡀࡕࡓࡀࡉࡉࡀ ࡅࡍࡀࡔࡊࡅࡍ ࡁࡅࡍ ࡅࡀࡔࡊࡀ ࡋࡍࡀࡐࡔࡀࡉࡊࡅࡍ ࡅࡋࡓࡀࡄࡌࡀࡉࡊࡅࡍ ࡅࡏࡋ ࡓࡀࡄࡌࡉࡀ ࡓࡀࡄࡌࡀࡉࡊࡅࡍ ࡅࡋࡓࡀࡄࡌࡉࡀ ࡔࡅࡓࡁࡀ ࡓࡁࡀ ࡖ ࡄࡉࡉࡀ ࡖ ࡀࡉࡍࡀࡉࡊࡅࡍ ࡓࡉࡒࡀࡍ ࡌࡍ ࡀࡋࡅࡀࡕ ࡋࡀࡍࡉࡕࡊࡀࡌࡓࡀ ࡀࡍࡀࡕ ࡀࡁࡀ ࡖ ࡊࡅࡋࡇ ࡏࡅࡕࡓࡉࡀ ࡅࡏࡑࡈࡅࡍࡀ ࡖ ࡊࡅࡋࡇ ࡍࡄࡅࡓࡀ ࡅࡂࡅࡐࡍࡀ ࡖ ࡊࡅࡋࡇ ࡄࡉࡉࡀ ࡅࡏࡋࡀࡍࡀ ࡓࡁࡀ ࡖ ࡊࡅࡋࡇ ࡌࡉࡍࡃࡉࡀ ࡖ ࡉࡀࡃࡉࡕ ࡁࡋࡉࡋࡁࡉࡀ ࡅࡐࡀࡓࡔࡉࡕ ࡁࡏࡅࡑࡓࡉࡀ ࡅࡌࡀࡉࡔࡉࡕ ࡁࡕࡉࡓࡀࡕࡀ ࡁࡏࡁࡃࡅࡍࡉࡀ ࡕࡉࡕࡀࡉࡉࡀ ࡖ ࡄࡔࡅࡊࡀ ࡗ ࡔࡀࡌࡔࡀ ࡔࡈࡉࡄࡀ ࡋࡒࡅࡃࡀࡌࡀࡊ ࡀࡉࡍࡀࡍ ࡋࡀࡊ ࡃࡉࡋࡀࡊ ࡔࡒࡉࡋ ࡅࡏࡎࡐࡀࡍ ࡋࡀࡊ ࡃࡉࡋࡀࡊ ࡉࡀࡄࡁࡀ ࡕࡅࡔࡁࡉࡄࡕࡀ ࡅࡁࡓࡉࡊࡕࡀ ࡔࡀࡁࡀ ࡔࡀࡉࡉࡀ ࡖ ࡉࡅࡌࡀ ࡅࡕࡋࡀࡕ ࡌࡀࡈࡀࡓࡀࡕࡀ ࡖ ࡋࡉࡋࡉࡀ ࡖ ࡁࡀࡉࡉࡍ ࡌࡉࡍࡇ ࡌࡀࡔࡊࡉࡀ ࡅࡃࡔࡀࡉࡋࡉࡀ ࡌࡉࡍࡇ ࡅࡌࡉࡕࡄࡉࡁࡋࡅࡍ ࡋࡁࡀࡁࡀ ࡖ ࡏࡄࡉࡃࡀ ࡒࡀࡉࡉࡌ ࡅࡁࡀࡁࡀ ࡖ ࡏࡄࡉࡃࡀ ࡕࡉࡐࡕࡀࡋࡅࡍ ࡁࡀࡕࡓࡀ ࡖ ࡍࡄࡅࡓࡀ ࡕࡉࡊࡐࡀࡓ ࡅࡕࡉࡔࡒࡀࡋ ࡌࡉࡍࡀࡉࡀࡍ ࡄࡀࡈࡀࡉࡀࡍ ࡅࡄࡀࡅࡁࡀࡍ ࡅࡎࡊࡉࡋࡀࡕࡀࡍ ࡅࡕࡉࡒࡋࡀࡕࡀࡍ ࡅࡔࡀࡁࡀࡔࡀࡕࡀࡍ ࡕࡉࡓࡌࡉࡀ ࡁࡕࡀࡎࡍࡉࡒࡉࡀ ࡖ ࡀࡓࡒࡀ ࡅࡁࡏࡁࡃࡅࡍࡉࡀ ࡕࡉࡕࡀࡉࡉࡀ ࡖ ࡄࡔࡅࡊࡀ ࡅࡕࡀࡒࡌࡉࡍࡀࡍ ࡁࡆࡀࡊࡀࡉࡉࡀ ࡖ ࡋࡀࡅ ࡁࡄࡀࡉࡀࡁࡉࡀ ࡅࡁࡉࡀࡕࡉࡓࡉࡀ ࡖ ࡋࡀࡅ ࡁࡄࡀࡎࡉࡓࡉࡀ ࡒࡅࡃࡀࡌࡀࡊ ࡌࡀࡍࡃࡀ ࡖ ࡄࡉࡉࡀ ࡍࡉࡄࡆࡅࡍ ࡈࡀࡁࡉࡀ ࡅࡍࡉࡈࡀࡉࡁࡅࡍ ࡅࡁࡉࡔࡉࡀ ࡍࡉࡕࡉࡁࡓࡅࡍ ࡅࡁࡍࡉࡀ ࡀࡋࡌࡀ ࡍࡉࡁࡉࡄࡕࡅࡍ ࡅࡍࡉࡌࡓࡅࡍ ࡖ ࡏࡕࡋࡀࡍ ࡀࡕࡓࡀ ࡁࡀࡕࡓࡀ ࡖ ࡄࡉࡉࡀ ࡖ ࡁࡀࡉࡉࡍ ࡌࡉࡍࡇ ࡌࡀࡔࡊࡉࡀ ࡅࡔࡀࡉࡋࡉࡀ ࡌࡉࡍࡇ ࡅࡌࡉࡕࡄࡉࡁࡋࡅࡍ ࡁࡀࡉࡉࡍࡉࡍ ࡌࡍ ࡆࡉࡅࡀࡊ ࡅࡌࡍ ࡍࡄࡅࡓࡀࡊ ࡅࡌࡍ ࡑࡀࡅࡕࡀࡊ ࡕࡉࡔࡓࡉࡀ ࡏࡋࡀࡍ ࡀࡍࡀࡕ ࡀࡎࡉࡀ ࡖ ࡏࡋࡀࡅࡉࡀ ࡀࡎࡀࡅࡀࡕࡀ ࡅࡌࡃࡀࡋࡉࡀ ࡖ ࡏࡋࡀࡅࡉࡀ ࡌࡃࡀࡋࡀࡅࡀࡕࡀ ࡅࡆࡉࡅࡀ ࡖ ࡏࡋࡀࡅࡉࡀ ࡆࡉࡅࡉࡀ ࡅࡍࡄࡅࡓࡀ ࡖ ࡏࡋࡀࡅࡉࡀ ࡍࡄࡅࡓࡉࡀ ࡖ ࡐࡀࡄࡕࡉࡕ ࡕࡉࡓࡉࡀ ࡊࡅࡔࡈࡀ ࡅࡌࡂࡀࡋࡀࡋࡉࡕ ࡓࡀࡆࡉࡀ ࡄࡅࡊࡅࡌࡕࡀ ࡅࡌࡄࡀࡅࡉࡕ ࡂࡀࡌࡁࡀࡓࡅࡀࡕࡀ ࡁࡏࡅࡓࡀࡔࡋࡀࡌ ࡎࡀࡃࡌࡉࡕ ࡎࡀࡄࡓࡉࡀ ࡅࡃࡀࡉࡅࡉࡀ ࡅࡌࡀࡃࡉࡄࡉࡕ ࡀࡋࡀࡄࡉࡀ ࡌࡍ ࡏࡊࡅࡓࡀࡉࡄࡅࡍ ࡍࡐࡉࡔ ࡔࡅࡌࡀࡊ ࡅࡌࡔࡀࡁࡀ ࡔࡅࡌࡀࡊ ࡃࡌࡅࡕࡀ ࡖ ࡀࡍࡀࡕ ࡄࡉࡉࡀ ࡖ ࡄࡅࡉࡕ ࡌࡍ ࡋࡀࡒࡀࡃࡌࡉࡀ ࡂࡅࡐࡍࡀ ࡀࡍࡀࡕ ࡖ ࡄࡅࡉࡕ ࡁࡀࡉࡀࡓ ࡏࡋࡀ ࡔࡅࡌࡉࡀ ࡅࡏࡋࡀ ࡀࡓࡒࡀ ࡗ ࡀࡋࡌࡉࡀ ࡄࡅࡍ ࡅࡏࡕࡉࡁࡓࡉࡀ ࡁࡁࡉࡓࡉࡀࡕࡀࡋࡂࡀࡈࡕ ࡋࡉࡂࡉࡈࡕࡀ ࡁࡀࡋࡌࡉࡀ ࡅࡃࡀࡓࡉࡀ ࡅࡓࡌࡉࡕ ࡃࡉࡓࡊࡀ ࡋࡀࡍࡀࡔࡉࡀ ࡊࡔࡉࡈࡉࡀ ࡅࡌࡄࡀࡉࡌࡍࡉࡀ ࡋࡀࡕࡓࡀ ࡖ ࡄࡉࡉࡀ ࡉࡀࡕࡁࡉࡀ ࡓࡅࡄࡉࡀ ࡅࡍࡉࡔࡌࡀࡕࡀ ࡗ ࡄࡀࡉࡀࡁࡉࡀ ࡍࡉࡒࡌࡅࡍ ࡅࡗ ࡆࡀࡊࡀࡉࡉࡀ ࡁࡔࡅࡌࡀࡊ ࡉࡅࡆࡀࡈࡀࡒ ࡌࡀࡍࡃࡀ ࡖ ࡄࡉࡉࡀ ࡀࡎࡌࡅࡊࡉࡀ ࡏࡃࡀࡉࡄࡅࡍ ࡖ ࡀࡍࡀࡔࡉࡀ ࡈࡀࡁࡉࡀ ࡕࡉࡄࡅࡉࡀ ࡀࡎࡅࡕࡀ ࡖ ࡄࡉࡉࡀ ࡋࡍࡉࡔࡌࡀࡕࡀ ࡖ ࡄࡀࡆࡀ ࡌࡀࡎࡉࡒࡕࡀ ࡅࡒࡀࡉࡀࡌࡉࡍ ࡄࡉࡉࡀ ࡁࡔࡊࡉࡍࡀࡕࡅࡍ ࡅࡄࡉࡉࡀ ࡆࡀࡊࡉࡍ ࡎ ࡀ ࡄࡀࡆࡉࡍ ࡁࡅࡕࡀ ࡋࡊࡅࡋ ࡈࡀࡁࡅ ࡀࡆࡋࡀ ࡆࡁࡀࡍ ࡋࡓࡀࡄࡌࡉࡀ ࡀࡆࡋࡀ ࡆࡁࡀࡍ ࡋࡌࡀࡎࡉࡒࡕࡀ ࡅࡋࡌࡀࡑࡁࡅࡕࡀ ࡅࡋࡊࡅࡋ ࡀࡎࡅࡕࡀ ࡄࡏ ࡅࡋࡌࡀࡎࡉࡒࡕࡀ ࡀࡁࡀࡕࡀࡓ ࡖ ࡒࡀࡓࡉࡕ ࡋࡐࡀࡍࡃࡀࡌࡀࡊ ࡅࡌࡉࡀ ࡖ ࡁࡅࡕࡀ ࡅࡐࡅࡂࡃࡀࡌࡀ ࡖ ࡓࡉࡄࡀ ࡁࡉࡀ ࡀࡅࡃࡉࡍ ࡅࡕࡅࡔࡁࡉࡄࡀࡍ ࡅࡏࡋࡊࡅࡍ ࡃࡉࡋࡊࡅࡍ ࡅࡌࡉࡔࡒࡀࡋ ࡀࡉࡍࡉࡀ ࡅࡁࡉࡕ ࡌࡉࡔࡒࡀࡋ ࡀࡉࡍࡉࡀ ࡅࡔࡀࡅࡉࡀ ࡐࡉࡄࡕࡀ ࡅࡌࡀࡌࡁࡅࡄࡀ ࡅࡊࡋࡉࡋࡀ ࡀࡕࡍࡀ ࡋࡌࡀࡎࡉࡒࡕࡀ ࡅࡒࡓࡉࡀ ࡐࡅࡂࡃࡀࡌࡀ ࡖ ࡌࡉࡔࡀ ࡁࡌࡉࡍࡃࡀࡌ ࡃࡀࡊࡉࡀ ࡁࡊࡀࡐࡕࡀ ࡖ ࡆࡂࡀࡅࡉࡕࡀ ࡏࡅ ࡀࡍࡐࡀ ࡗ ࡄࡉࡐࡀ ࡅࡌࡃࡀࡊࡉࡀ ࡅࡒࡓࡉࡀ ࡌࡀࡎࡉࡒࡕࡀ ࡎࡀ

36. ࡁࡔࡅࡌࡀ ࡖ ࡄࡉࡉࡀ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡄࡀࡊ ࡌࡀࡍࡀ ࡓࡁࡀ ࡊࡀࡎࡉࡀ ࡒࡀࡃࡌࡀࡉࡀ ࡖ ࡄࡅࡀ ࡕࡔࡉࡌࡀ ࡅࡕࡔࡉࡍ ࡅࡕࡔࡀ ࡀࡋࡐࡉࡀ ࡓࡅࡁࡀࡍ ࡔࡍࡉࡀ ࡁࡔࡊࡉࡍࡕࡇ ࡖ ࡍࡀࡐࡔࡉࡇ ࡁࡀࡋࡄࡅࡃࡇ ࡖ ࡋࡀࡄࡅࡀࡕࡀࡋࡇ ࡑࡀࡅࡕࡀ ࡁࡓ ࡌࡍ ࡄࡀࡊ ࡌࡀࡍࡀ ࡓࡁࡀ ࡊࡀࡎࡉࡀ ࡒࡀࡃࡌࡀࡉࡀ ࡖ ࡄࡅࡀࡁࡇ ࡅࡓࡁࡀࡁࡇ ࡕࡅࡌ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡄࡀࡊ ࡍࡉࡈࡅࡐࡕࡀ ࡓࡀࡁࡕࡉࡀ ࡊࡀࡎࡉࡕࡀ ࡒࡀࡃࡌࡀࡉࡕࡀ ࡖ ࡌࡉࡍࡇ ࡄࡅࡍ ࡖ ࡄࡅࡀࡕ ࡌࡀ ࡀࡓࡁࡉࡌࡀ ࡅࡀࡓࡁࡉࡍ ࡅࡀࡓࡁࡀ ࡀࡋࡐࡉࡀ ࡓࡅࡁࡀࡍ ࡔࡍࡉࡀ ࡁࡔࡊࡉࡍࡕࡀ ࡖ ࡍࡀࡐࡔࡉࡇ ࡁࡀࡋࡄࡅࡃࡀ ࡖ ࡋࡀࡄࡅࡀࡕࡀࡋࡀ ࡑࡀࡅࡕࡀ ࡕࡅࡌ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡄࡀࡊ ࡔࡀࡓ ࡂࡅࡐࡍࡀ ࡓࡁࡀ ࡊࡀࡎࡉࡀ ࡒࡀࡃࡌࡀࡉࡀ ࡖ ࡄࡅࡀ ࡀࡋࡅࡀࡕࡀࡉࡄࡅࡍ ࡕࡅࡌ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡄࡀࡊ ࡐࡉࡓࡅࡍ ࡂࡅࡐࡍࡀ ࡓࡁࡀ ࡊࡀࡎࡉࡀ ࡒࡀࡃࡌࡀࡉࡀ ࡖ ࡄࡅࡍ ࡌࡉࡍࡇ ࡕࡌࡀࡍࡉࡌࡀ ࡅࡕࡌࡀࡍࡀࡍ ࡀࡋࡐࡉࡀ ࡓࡅࡁࡀࡍ ࡏࡅࡕࡓࡉࡀ ࡌࡉࡍࡀࡉࡄࡅࡍ ࡅࡌࡍ ࡄࡀࡍࡀࡕࡅࡍ ࡏࡅࡕࡓࡉࡀ ࡄࡅࡀ ࡏࡅࡕࡓࡀ ࡄࡃࡀ ࡖ ࡄࡅ ࡐࡀࡓࡑࡅࡐࡀ ࡓࡁࡀ ࡖ ࡏࡒࡀࡓࡀ ࡔࡅࡌࡇ ࡆࡅࡈ ࡀࡄࡇ ࡅࡒࡀࡔࡉࡔ ࡀࡁࡀࡄࡀࡕࡇ ࡀࡐࡓࡉࡔ ࡅࡂࡋࡉࡋ ࡅࡀࡌࡀࡓ ࡌࡀࡍࡃࡀ ࡖ ࡄࡉࡉࡀ ࡏࡅࡕࡓࡀ ࡌࡆࡀࡓࡆࡀ ࡊࡅࡋ ࡂࡀࡁࡓࡀ ࡍࡀࡑࡅࡓࡀࡉࡀ ࡗ ࡉࡀࡕࡉࡁ ࡍࡉࡕࡀࡁ ࡅࡍࡉࡌࡀࡓ ࡌࡒࡀࡉࡌࡉࡕࡅࡍ ࡄࡉࡉࡀ ࡒࡀࡃࡌࡀࡉࡉࡀ ࡅࡐࡉࡄࡕࡀ ࡍࡉࡐࡕࡀ ࡀࡂࡆࡀࡓࡕࡀ ࡕࡉࡄࡅࡉࡀ ࡏࡋࡇ ࡌࡍ ࡁࡉࡕ ࡄࡉࡉࡀ ࡅࡀࡍࡀ ࡁࡀࡍࡄࡅࡓࡀ ࡖ ࡄࡉࡉࡀ ࡌࡉࡕࡒࡀࡉࡀࡌࡍࡀ ࡅࡄࡉࡉࡀ ࡆࡀࡊࡉࡍ ࡎࡀ

37. ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡄࡀࡄࡏ ࡀࡍࡀࡍࡀ ࡊࡀࡎࡉࡕࡀ ࡓࡀࡁࡕࡉࡀ ࡒࡀࡃࡌࡀࡉࡕࡀ ࡖ ࡄࡉࡉࡀ ࡖ ࡌࡉࡍࡇ ࡃࡉࡋࡇ ࡐࡕࡀ ࡐࡉࡄࡕࡀ ࡁࡊࡉࡎࡉࡀ ࡅࡏࡄࡀࡁࡋࡅࡍ ࡋࡄࡉࡉࡀ ࡊࡀࡎࡉࡉࡀ ࡅࡋࡄࡉࡉࡀ ࡓࡅࡓࡁࡉࡀ ࡒࡀࡃࡌࡀࡉࡉࡀ ࡁࡊࡉࡎࡉࡀ ࡅࡄࡉࡉࡀ ࡆࡀࡊࡏࡉࡍ ࡎࡀ

38. ࡎࡉࡂࡃࡉࡕ ࡅࡔࡀࡁࡀࡕࡇ ࡋࡉࡀࡅࡀࡓ ࡆࡉࡅࡀ ࡖ ࡒࡀࡌ ࡅࡔࡀࡁࡇ ࡋࡄࡀࡊ ࡌࡀࡍࡀ ࡓࡁࡀ ࡊࡀࡁࡉࡓࡀ ࡖ ࡒࡀࡉࡌࡉࡀ ࡋࡉࡀࡌࡉࡍࡇ ࡅࡋࡎࡌࡀࡋࡇ ࡌࡀ ࡀࡓࡁࡉࡌࡀ ࡅࡀࡓࡁࡉࡍ ࡅࡀࡓࡁࡀ ࡀࡋࡐࡉࡀ ࡓࡅࡁࡀࡍ ࡏࡅࡕࡓࡉࡀ ࡅࡀࡋࡉࡐ ࡓࡅࡁࡀࡍ ࡏࡅࡕࡓࡉࡀ ࡁࡍࡉࡀ ࡍࡄࡅࡓࡀ ࡎࡀࡂࡃࡉࡀ ࡅࡌࡔࡀࡁࡉࡋࡅࡍ ࡏࡋ ࡐࡀࡎࡉࡌࡊࡉࡀ ࡖ ࡆࡉࡅࡀ ࡒࡀࡌ ࡐࡕࡀ ࡐࡉࡄࡕࡀ ࡁࡊࡉࡎࡉࡀ ࡅࡏࡄࡀࡁࡋࡅࡍ ࡋࡁࡍࡉࡀ ࡀࡍࡀࡔࡀ ࡅࡒࡀࡉࡌࡀ ࡋࡔࡊࡉࡍࡕࡀ ࡁࡊࡉࡎࡉࡀ ࡅࡄࡉࡉࡀ ࡆࡀࡊࡉࡍ ࡎࡀ

39. ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡄࡀࡊ ࡔࡅࡕࡀ ࡊࡀࡎࡉࡕࡀ ࡖ ࡒࡓࡀ ࡉࡀࡅࡀࡓ ࡁࡊࡉࡎࡉࡀ ࡁࡀࡍࡀ ࡅࡀࡐࡓࡉࡔࡀ ࡅࡕࡓࡀࡑࡁࡀ ࡖ ࡄࡉࡉࡀ ࡐࡀࡎࡉࡌࡊࡀ ࡅࡀࡕࡀ ࡆࡉࡅࡀ ࡅࡍࡄࡅࡓࡀ ࡅࡔࡓࡀ ࡋࡉࡀࡌࡉࡍࡇ ࡅࡀࡕࡀࡕ ࡑࡀࡅࡕࡀ ࡅࡏࡓࡅࡕࡀ ࡅࡔࡓࡀࡕ ࡋࡎࡌࡀࡋࡇ ࡅࡁࡀࡉࡉࡍ ࡄࡉࡉࡀ ࡏࡅࡕࡓࡉࡀ ࡋࡌࡉࡄࡉࡆࡉࡇ ࡋࡃࡌࡅࡕࡇ ࡖ ࡉࡀࡅࡀࡓ ࡆࡉࡅࡀ ࡁࡆࡉࡅࡀࡉࡄࡅࡍ ࡖ ࡍࡀࡐࡔࡀࡉࡄࡅࡍ ࡀࡐࡓࡉࡔ ࡅࡂࡀࡋࡉࡋ ࡅࡀࡌࡀࡓ ࡉࡀࡅࡀࡓ ࡆࡉࡅࡀ ࡏࡅࡕࡓࡀ ࡌࡆࡀࡓࡆࡀ ࡊࡅࡋ ࡂࡀࡁࡓࡀ ࡍࡀࡑࡅࡓࡀࡉࡀ ࡖ ࡁࡄࡀࡆࡀ ࡔࡅࡕࡀ ࡊࡀࡎࡉࡕࡀ ࡍࡉࡔࡕࡀࡉࡉࡀ ࡔࡉࡕࡉࡍ ࡅࡀࡓࡁࡀ ࡄࡀࡈࡀࡉࡉࡀ ࡁࡉࡅࡌࡀ ࡍࡉࡔࡁࡅࡒࡋࡇ ࡁࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡃࡀࡅࡓࡀ ࡕࡀࡒࡍࡀ ࡅࡌࡔࡀࡁࡉࡍ ࡄࡉࡉࡀ ࡎࡀ

40. ࡎࡉࡂࡃࡉࡕ ࡅࡔࡀࡁࡀࡕࡇ ࡋࡏࡅࡑࡀࡓ ࡖ ࡐࡕࡀ ࡐࡉࡄࡕࡀ ࡏࡅࡕࡓࡉࡀ ࡊࡀࡎࡉࡉࡀ ࡒࡀࡃࡌࡀࡉࡉࡀ ࡖ ࡁࡋࡉࡁࡀࡉࡄࡅࡍ ࡉࡀࡕࡁࡉࡀ ࡒࡀࡌ ࡏࡅࡕࡓࡉࡀ ࡊࡀࡎࡉࡉࡀ ࡁࡔࡊࡉࡍࡀࡕࡅࡍ ࡅࡌࡔࡀࡁࡉࡋࡅࡍ ࡋࡄࡉࡉࡀ ࡓࡅࡓࡁࡉࡀ ࡁࡔࡊࡉࡍࡀࡕࡅࡍ ࡉࡀࡒࡓࡉࡀ ࡁࡆࡉࡅࡀࡉࡄࡅࡍ ࡅࡔࡀࡍࡉࡍ ࡁࡀࡍࡄࡅࡓࡀࡉࡄࡅࡍ ࡎࡉࡂࡃࡉࡕ ࡅࡔࡀࡁࡀࡕࡇ ࡋࡄࡀࡊ ࡂࡅࡐࡍࡀ ࡓࡉࡔࡀࡉࡀ ࡒࡀࡃࡌࡀࡉࡀ ࡖ ࡂࡀࡅࡇ ࡌࡉࡀ ࡀࡅࡐࡇ ࡏࡅࡕࡓࡉࡀ ࡅࡀࡋࡅࡀࡕࡇ ࡐࡀࡎࡉࡌࡊࡉࡀ ࡖ ࡍࡄࡅࡓࡀ ࡁࡈࡅࡋࡇ ࡉࡀࡕࡁࡉࡀ ࡏࡅࡕࡓࡉࡀ ࡅࡁࡀࡍࡀࡍࡀ ࡓࡀࡁࡕࡉࡀ ࡖ ࡍࡄࡅࡓࡀ ࡒࡀࡃࡌࡀࡉࡕࡀ ࡄࡅࡁࡇ ࡁࡏࡅࡑࡀࡓ ࡍࡄࡅࡓࡀ ࡅࡏࡕࡉࡍࡑࡉࡁ ࡌࡀࡍࡀ ࡊࡀࡎࡉࡀ ࡅࡌࡔࡀࡁࡉࡍ ࡄࡉࡉࡀ ࡎࡀ

41. ࡎࡉࡂࡃࡉࡕ ࡅࡔࡀࡁࡀࡕࡇ ࡋࡏࡅࡑࡀࡓ ࡍࡄࡅࡓ ࡉࡀࡅࡀࡓ ࡓࡁࡀ ࡖ ࡄࡉࡉࡀ ࡐࡕࡀ ࡐࡉࡄࡕࡀ ࡁࡊࡉࡎࡉࡀ ࡅࡏࡄࡀࡁࡋࡅࡍ ࡋࡄࡉࡉࡀ ࡓࡅࡓࡁࡉࡀ ࡒࡀࡃࡌࡀࡉࡉࡀ ࡁࡔࡊࡉࡍࡀࡕࡅࡍ ࡔࡀࡁࡉࡕࡉࡍࡅࡍ ࡋࡌࡀࡍࡉࡀ ࡊࡀࡎࡉࡉࡀ ࡉࡀࡒࡓࡉࡀ ࡅࡎࡌࡉࡓࡉࡀ ࡖ ࡄࡅࡍ ࡌࡍ ࡀࡕࡓࡀࡉࡄࡅࡍ ࡅࡏࡕࡉࡍࡑࡉࡁ ࡌࡍ ࡁࡉࡕ ࡂࡉࡍࡆࡀࡉࡄࡅࡍ ࡎࡉࡂࡃࡉࡕ ࡅࡔࡀࡁࡉࡕࡉࡍࡅࡍ ࡋࡄࡉࡉࡀ ࡓࡅࡓࡁࡉࡀ ࡒࡀࡃࡌࡀࡉࡉࡀ ࡖ ࡏࡕࡉࡍࡑࡉࡁ ࡌࡍ ࡀࡕࡓࡀࡉࡄࡅࡍ ࡅࡏࡕࡉࡍࡑࡉࡁ ࡌࡍ ࡁࡉࡕ ࡂࡉࡍࡆࡀࡉࡄࡅࡍ ࡖ ࡍࡀࡐࡔࡀࡉࡄࡅࡍ ࡖ ࡄࡉࡍࡅࡍ ࡄࡅࡁࡀ ࡅࡓࡁࡅࡁࡀ ࡅࡃࡀࡓࡁࡀ ࡅࡏࡕࡒࡀࡉࡀࡌࡁࡀ ࡅࡏࡔࡕࡀࡉࡅࡁࡀ ࡅࡔࡕࡀࡁࡀࡁࡀ ࡅࡌࡔࡀࡁࡉࡀ ࡅࡀࡌࡓࡉࡀ ࡊࡅࡋ ࡂࡀࡁࡓࡀ ࡍࡀࡑࡅࡓࡀࡉࡀ ࡖ ࡁࡄࡀࡋࡉࡍ ࡐࡅࡂࡃࡀࡌࡉࡀ ࡊࡀࡎࡉࡉࡀ ࡍࡉࡔࡕࡀࡉࡉࡀ ࡍࡉࡁࡉࡀ ࡅࡍࡀࡔࡊࡀ ࡅࡍࡉࡌࡀࡓ ࡅࡍࡉࡔࡕࡌࡀ ࡔࡅࡁࡀ ࡆࡉࡁࡍࡉࡀ ࡁࡉࡅࡌࡀ ࡅࡔࡅࡁࡀ ࡄࡀࡈࡀࡉࡉࡀ ࡍࡉࡔࡁࡅࡒࡋࡇ ࡁࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡃࡀࡅࡓࡀ ࡕࡀࡒࡍࡀ ࡅࡌࡔࡀࡁࡉࡍ ࡄࡉࡉࡀ ࡎࡀ

42. ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡄࡀࡊ ࡔࡅࡕࡀ ࡊࡀࡎࡉࡕࡀ ࡒࡀࡃࡌࡀࡉࡕࡀ ࡖ ࡏࡄࡀࡁ ࡉࡀࡅࡀࡓ ࡁࡊࡉࡎࡉࡀ ࡁࡀࡍࡀ ࡅࡀࡐࡓࡉࡔࡀ ࡅࡕࡓࡀࡑࡁࡀ ࡖ ࡄࡉࡉࡀ ࡐࡀࡎࡉࡌࡊࡉࡀ ࡅࡀࡌࡀࡓ ࡉࡀࡅࡀࡓ ࡄࡅࡀࡕ ࡏࡓࡅࡕࡀ ࡅࡕࡅࡔࡁࡉࡄࡕࡀ ࡅࡀࡕࡀ ࡉࡀࡅࡀࡓ ࡔࡓࡀ ࡑࡀࡅࡕࡀ ࡁࡔࡊࡉࡍࡕࡇ ࡖ ࡍࡀࡐࡔࡉࡇ ࡅࡀࡕࡀ ࡆࡉࡅࡀ ࡅࡍࡄࡅࡓࡀ ࡅࡕࡓࡀࡑ ࡒࡅࡃࡀࡌࡇ ࡅࡀࡕࡀࡕ ࡑࡀࡅࡕࡀ ࡅࡏࡓࡅࡕࡀ ࡅࡔࡓࡀࡕ ࡋࡉࡀࡌࡉࡍࡇ ࡅࡁࡀࡉࡉࡍ ࡄࡉࡉࡀ ࡏࡅࡕࡓࡉࡀ ࡌࡉࡄࡉࡆࡉࡇ ࡋࡃࡌࡅࡕࡇ ࡖ ࡉࡀࡅࡀࡓ ࡆࡉࡅࡀ ࡁࡆࡉࡅࡀࡉࡄࡅࡍ ࡏࡋ ࡔࡀࡁࡅࡉࡉࡀ ࡋࡁࡅࡕࡀ ࡅࡕࡅࡔࡁࡉࡄࡕࡀ ࡖ ࡒࡓࡅࡍࡅࡍ ࡋࡔࡉࡋࡌࡀࡉ ࡅࡍࡉࡃࡁࡀࡉ ࡏࡅࡕࡓࡉࡀ ࡕࡓࡉࡍ ࡐࡀࡃࡉࡁࡓࡇ ࡖ ࡌࡀࡍࡃࡀ ࡖ ࡄࡉࡉࡀ ࡅࡀࡌࡀࡓ ࡉࡀࡅࡀࡓ ࡊࡅࡋ ࡂࡀࡁࡓࡀ ࡍࡀࡑࡅࡓࡀࡉࡀ ࡖ ࡁࡄࡀࡆࡀ ࡁࡅࡕࡀ ࡊࡀࡎࡉࡕࡀ ࡍࡉࡔࡕࡀࡉࡉࡀ ࡔࡅࡁࡀ ࡆࡉࡁࡍࡉࡀ ࡁࡉࡅࡌࡀ ࡅࡔࡅࡁࡀ ࡄࡀࡈࡀࡉࡉࡀ ࡍࡉࡔࡁࡅࡒࡋࡇ ࡁࡉࡅࡌࡀ ࡅࡒࡀࡉࡀࡌࡉࡍ ࡄࡉࡉࡀ ࡁࡔࡊࡉࡍࡀࡕࡅࡍ ࡅࡄࡉࡉࡀ ࡆࡀࡊࡉࡍ ࡎࡀ

43. ࡌࡒࡀࡉࡌࡉࡕࡅࡍ ࡄࡉࡉࡀ ࡒࡀࡃࡌࡀࡉࡉࡀ ࡖ ࡏࡍࡉࡔ ࡒࡅࡃࡀࡌࡀࡉࡊࡅࡍ ࡋࡀࡄࡅࡀ ࡍࡅࡊࡓࡀࡉࡉࡀ ࡌࡍ ࡀࡋࡌࡉࡀ ࡖ ࡍࡄࡅࡓࡀ ࡉࡀࡕࡉࡓࡉࡀ ࡖ ࡏࡋࡀࡅࡉࡀ ࡅࡊࡅࡋࡄࡅࡍ ࡏࡅࡁࡀࡃࡉࡀ ࡋࡆࡉࡅࡀ ࡄࡀࡕࡉࡒࡀ ࡅࡋࡍࡄࡅࡓࡀ ࡒࡀࡃࡌࡀࡉࡀ ࡅࡋࡄࡉࡉࡀ ࡖ ࡄࡅࡍ ࡌࡍ ࡄࡉࡉࡀ ࡅࡋࡊࡅࡔࡈࡀ ࡖ ࡄࡅࡀ ࡌࡍ ࡒࡅࡃࡀࡌ ࡁࡓࡉࡔࡀ ࡒࡀࡉࡀࡌࡉࡕ ࡌࡀࡍࡃࡀ ࡖ ࡄࡉࡉࡀ ࡋࡁࡄࡉࡓࡀࡊ ࡅࡄࡀࡆࡉࡍ ࡄࡅ ࡖ ࡏࡕࡉࡂࡋࡉࡕࡋࡀࡍ ࡌࡍ ࡍࡄࡅࡓ ࡎࡉࡃࡓࡀ ࡅࡌࡍ ࡐࡕࡀ ࡏࡅࡑࡓࡀ ࡅࡌࡍ ࡏࡅࡑࡀࡓ ࡒࡀࡃࡌࡀࡉࡀ ࡅࡌࡍ ࡏࡅࡑࡀࡓ ࡍࡄࡅࡓࡀ ࡍࡉࡀࡄࡀ ࡅࡎࡉࡌࡀࡊࡀ ࡓࡁࡀ ࡖ ࡄࡉࡉࡀ ࡖ ࡁࡀࡍࡄࡅࡓࡇ ࡍࡀࡄࡅࡓ ࡅࡌࡀࡍࡄࡀࡓ ࡍࡄࡅࡓࡇ ࡄࡅࡀ ࡅࡐࡕࡀ ࡅࡌࡋࡀ ࡅࡍࡐࡀࡒ ࡁࡎࡀࡂࡉࡉࡇ ࡅࡄࡀࡉࡋࡇ ࡅࡏࡕࡓࡀࡅࡓࡀࡁ ࡁࡓࡀࡁࡅࡕ ࡌࡀࡍࡃࡀ ࡊࡁࡀࡓ ࡁࡆࡉࡅࡇ ࡅࡌࡋࡀ ࡁࡀࡍࡄࡅࡓࡇ ࡖ ࡌࡍ ࡃࡉࡌࡀࡕ ࡄࡉࡉࡀ ࡄࡅࡀ ࡃࡌࡅ ࡔࡀࡍࡀࡉ ࡊࡉࡍ ࡁࡄࡉࡕ ࡀࡋࡌࡉࡀ ࡖ ࡏࡍࡉࡔ ࡋࡃࡌࡅࡕࡇ ࡋࡀࡄࡆࡀ ࡋࡆࡉࡅࡇ ࡅࡏࡒࡀࡓࡇ ࡒࡀࡉࡉࡌ ࡊࡅࡔࡈࡀ ࡋࡓࡀࡄࡌࡇ ࡅࡌࡀࡍࡃࡀ ࡖ ࡄࡉࡉࡀ ࡋࡁࡄࡉࡓࡇ ࡖ ࡁࡄࡀࡓࡕ ࡅࡀࡐࡒࡉࡕࡉࡍࡀࡍ ࡌࡍ ࡀࡋࡌࡀ ࡖ ࡎࡉࡍࡀ ࡒࡉࡍࡀ ࡅࡐࡋࡅࡂࡉࡀ ࡅࡀࡒࡉࡌࡕࡉࡍࡀࡍ ࡁࡃࡉࡓࡊࡉࡀ ࡖ ࡊࡅࡔࡈࡀ ࡅࡄࡀࡉࡌࡀࡍࡅࡕࡀ ࡖ ࡍࡉࡒࡅࡌ ࡅࡍࡉࡔࡀࡁࡀ ࡋࡀࡕࡓࡀ ࡊࡀࡎࡉࡀ ࡅࡍࡈࡉࡓࡀ ࡖ ࡍࡉࡎࡀࡁ ࡌࡉࡍࡇ ࡌࡍ ࡄࡀࡆࡉࡍ ࡐࡉࡄࡕࡀ ࡅࡁࡓࡉࡕࡀ ࡀࡃࡉࡍࡒࡉࡀ ࡄࡀࡈࡀࡉࡉࡀ ࡍࡉࡄࡅࡉࡀ ࡁࡀࡕࡓࡀ ࡖ ࡍࡄࡅࡓࡀ ࡅࡃࡀࡅࡓࡀ ࡕࡀࡓࡍࡀ ࡅࡄࡉࡉࡀ ࡆࡀࡊࡏࡉࡍ ࡎࡀ.. ࡍࡉࡁࡆࡀ ࡖ ࡐࡉࡄࡕࡀ ࡄࡉࡍࡅࡍ ࡎࡀ

44. ࡁࡉࡓࡉࡀࡅࡉࡔ ࡊࡀࡍࡀ ࡖ ࡌࡉࡀ ࡄࡉࡉࡀ ࡁࡍࡁࡀࡈ ࡍࡉࡁࡈࡀ ࡒࡀࡃࡌࡀࡉࡀ ࡑࡅࡓࡉࡊ ࡆࡉࡅࡀ ࡓࡁࡀ ࡖ ࡄࡉࡉࡀ ࡉࡀࡕࡉࡓࡉࡀ ࡄࡉࡉࡀ ࡋࡍࡉࡔࡌࡀࡕࡀ ࡖ ࡄࡀࡆࡀ ࡌࡀࡎࡉࡒࡕࡀ ࡅࡌࡔࡀࡁࡉࡍ ࡄࡉࡉࡀ ࡎࡀࡄࡀࡆࡉࡍ ࡍࡉࡁࡆࡉࡀ ࡖ ࡌࡀࡌࡁࡅࡂࡀ ࡄࡅ ࡏࡅ ࡋࡍࡉࡔࡌࡀࡕࡀ ࡒࡀࡓࡉࡕ ࡗ ࡖ ࡊࡕࡉࡁ ࡒࡓࡉࡀ ࡏࡅ ࡍࡉࡔࡉࡌࡕࡀ ࡄࡀࡃ ࡄࡏ ࡀࡌࡅࡓ ࡋࡍࡉࡔࡉࡌࡕࡀ ࡖ ࡐࡋࡀࡍ ࡎࡀ

45. ࡔࡅࡌࡀࡊ ࡉࡀࡕࡉࡓ ࡄࡉࡉࡀ ࡀࡎࡂࡉࡀ ࡏࡒࡀࡓࡀ ࡍࡐࡉࡔ ࡍࡄࡅࡓࡀ ࡀࡁࡀ ࡈࡀࡁࡀ ࡔࡀࡊࡉࡍ ࡓࡀࡆࡀ ࡒࡀࡃࡌࡀࡉࡀ ࡄࡉࡉࡀ ࡖ ࡄࡅࡍ ࡌࡍ ࡄࡉࡉࡀ ࡅࡊࡅࡔࡈࡀ ࡖ ࡄࡅࡀ ࡌࡍ ࡒࡅࡃࡀࡌ ࡁࡓࡉࡔࡀ ࡄࡀࡆࡉࡍ ࡄࡅ ࡌࡀࡌࡁࡅࡄࡀ ࡖ ࡄࡉࡉࡀ ࡖ ࡍࡁࡀ ࡌࡍ ࡀࡕࡓࡀ ࡖ ࡄࡉࡉࡀ ࡖ ࡍࡉࡔࡕࡉࡀ ࡌࡉࡍࡇ ࡌࡍ ࡄࡀࡆࡉࡍ ࡌࡀࡌࡁࡅࡂࡀ ࡖ ࡄࡉࡉࡀ ࡖ ࡀࡁࡀࡓ ࡄࡉࡉࡀ ࡅࡔࡊࡀࡍ ࡄࡉࡉࡀ ࡅࡏࡕࡒࡀࡉࡀࡌ ࡁࡉࡕ ࡄࡉࡉࡀ ࡖ ࡀࡁࡀࡓ ࡀࡋࡌࡉࡀ ࡅࡀࡕࡀ ࡅࡁࡆࡀ ࡓࡒࡉࡄࡀ ࡅࡏࡕࡉࡂࡋࡉࡀ ࡄࡀࡅࡉࡕࡉࡍࡀࡍ ࡀࡉࡍࡇ ࡖ ࡏࡍࡉࡔ ࡋࡀࡄࡆࡀࡕ ࡅࡀࡔࡌࡉࡕࡉࡍࡀࡍ ࡏࡅࡃࡍࡇ ࡖ ࡁࡓ ࡀࡍࡀࡔࡀ ࡖ ࡋࡀࡔࡉࡌࡀࡕ ࡀࡐࡉࡒࡉࡕࡉࡍࡀࡍ ࡌࡍ ࡌࡅࡕࡀ ࡅࡋࡀࡐࡕࡉࡍࡀࡍ ࡁࡄࡉࡉࡀ ࡀࡐࡉࡒࡕࡉࡍࡀࡍ ࡌࡍ ࡄࡔࡅࡊࡀ ࡅࡋࡀࡐࡕࡉࡍࡀࡍ ࡁࡀࡍࡄࡅࡓࡀ ࡀࡐࡉࡒࡕࡉࡍࡀࡍ ࡌࡍ ࡁࡉࡔࡀ ࡅࡋࡀࡐࡕࡉࡍࡀࡍ ࡁࡈࡀࡁࡀ ࡄࡀࡅࡉࡕࡉࡍࡀࡍ ࡏࡅࡄࡓࡀ ࡖ ࡄࡉࡉࡀ ࡅࡀࡃࡓࡉࡊࡕࡉࡍࡀࡍ ࡃࡉࡓࡊࡉࡀ ࡖ ࡊࡅࡔࡈࡀ ࡅࡄࡀࡉࡌࡀࡍࡅࡕࡀ ࡖ ࡍࡉࡕࡅࡍ ࡄࡉࡉࡀ ࡅࡍࡉࡃࡄࡅࡍࡇ ࡋࡌࡅࡕࡀ ࡅࡍࡉࡕࡉࡀ ࡍࡄࡅࡓࡀ ࡅࡍࡉࡃࡉࡄࡉࡉࡀ ࡋࡄࡔࡅࡊࡀ ࡅࡍࡉࡕࡉࡀ ࡈࡀࡁࡀ ࡅࡍࡉࡃࡉࡄࡉࡉࡇ ࡋࡁࡉࡔࡀ ࡏࡕࡀࡓࡅࡁࡉࡀ ࡄࡀࡌࡓࡀ ࡁࡌࡉࡀ ࡍࡉࡕࡀࡓࡀࡁ ࡊࡅࡔࡈࡀࡊ ࡅࡆࡉࡃࡒࡀࡊ ࡅࡄࡀࡉࡌࡀࡍࡅࡕࡀࡊ ࡁࡊࡅࡋࡄࡅࡍ ࡓࡀࡄࡌࡉࡀ ࡔࡅࡌࡀࡊ ࡖ ࡊࡅࡔࡈࡀ ࡅࡌࡔࡀࡁࡉࡍ ࡄࡉࡉࡀ ࡎ ࡀ ࡄࡀࡆࡉࡍ ࡍࡉࡁࡆࡀ ࡖ ࡌࡀࡌࡁࡅࡂࡀ ࡄࡅ ࡔࡀࡅࡉࡀ ࡐࡉࡄࡕࡀ ࡅࡌࡀࡌࡁࡅࡄࡀ ࡅࡀࡕࡍࡀ ࡋࡌࡀࡎࡉࡒࡕࡀ ࡅࡄࡀࡉࡆࡀࡊ ࡔࡀࡅࡉࡀ ࡊࡋࡉࡋࡀ ࡖ ࡀࡎࡀ ࡎࡀ

46. ࡁࡔࡅࡌࡀ ࡖ ࡄࡉࡉࡀ ࡍࡄࡀࡓ ࡍࡄࡅࡓࡀ ࡍࡄࡀࡓ ࡍࡄࡅࡓࡀ ࡍࡄࡀࡓ ࡍࡄࡅࡓࡀ ࡖ ࡄࡉࡉࡀ ࡒࡀࡃࡌࡀࡉࡉࡀ ࡍࡉࡄࡓࡀࡕ ࡏࡓࡅࡕࡇ ࡅࡕࡅࡔࡁࡉࡄࡕࡇ ࡖ ࡌࡀࡍࡀ ࡖ ࡌࡍ ࡃࡅࡊࡕࡇ ࡀࡕࡀ ࡊࡋࡉࡋ ࡀࡉࡀࡓ ࡁࡆࡀࡊࡀࡅࡀࡕࡇ ࡌࡍ ࡀࡕࡓࡀ ࡖ ࡍࡄࡅࡓࡀ ࡅࡃࡀࡅࡓࡀ ࡕࡀࡒࡍࡀ ࡂࡀࡃࡋࡇ ࡖ ࡊࡋࡉࡋࡀ ࡉࡅࡐࡉࡍ ࡉࡅࡐࡀࡐࡉࡍ ࡄࡅࡀ ࡌࡀࡕࡉࡀࡍࡇ ࡖ ࡊࡋࡉࡋࡀ ࡏࡍࡑࡉࡁࡀࡕ ࡏࡅࡕࡓࡉࡀ ࡄࡅࡀ ࡕࡀࡓࡑࡇ ࡖ ࡊࡋࡉࡋࡀ ࡏࡉࡕ ࡉࡀࡅࡀࡓ ࡆࡉࡅࡀ ࡁࡓ ࡏࡍࡑࡉࡁࡀࡕ ࡏࡅࡕࡓࡉࡀ ࡄࡅࡀ ࡀࡕࡉࡉࡇ ࡅࡕࡉࡓࡑࡇ ࡁࡓࡉࡔࡉࡇ ࡖ ࡌࡀࡍࡀ ࡍࡑࡉࡁࡀ ࡖ ࡏࡕࡉࡍࡑࡉࡁ ࡌࡉࡒࡀࡃ ࡉࡀࡒࡉࡃ ࡊࡋࡉࡋࡀ ࡅࡀࡋࡅࡀࡕࡇ ࡖ ࡊࡋࡉࡋࡀ ࡌࡉࡒࡀࡃ ࡉࡀࡒࡃࡀ ࡌࡍ ࡀࡒࡀࡌࡇ ࡖ ࡌࡀࡍࡀ ࡆࡉࡅࡀ ࡅࡌࡍ ࡏࡄࡅࡓࡇ ࡖ ࡌࡀࡍࡀ ࡖ ࡍࡄࡅࡓࡀ ࡅࡏࡒࡀࡓࡀ ࡕࡀࡓࡕࡉࡍ ࡑࡉࡃࡇ ࡖ ࡌࡀࡍࡀ ࡆࡉࡅࡀ ࡅࡆࡉࡅࡉࡄࡕࡀ ࡅࡆࡀࡊࡅࡕࡀ ࡀࡓࡁࡉࡀ ࡆࡀࡅࡉࡀ ࡔࡅࡌࡇ ࡅࡔࡀࡁࡀ ࡊࡀࡍࡐࡉࡀ ࡖ ࡓࡒࡉࡄࡀ ࡔࡉࡃࡒࡀ ࡅࡍࡉࡀࡄࡀ ࡅࡑࡀࡅࡕࡀ ࡅࡄࡉࡉࡀ ࡆࡀࡊࡉࡍ ࡎࡀ

47. ࡆࡄࡉࡓࡀ ࡅࡌࡆࡀࡄࡓࡀ ࡌࡉࡍࡉࡋࡉࡀ ࡖ ࡍࡄࡅࡓࡀ ࡋࡍࡉࡔࡌࡀࡕࡀ ࡖ ࡄࡀࡆࡀ ࡌࡀࡎࡉࡒࡕࡀ ࡆࡄࡉࡓࡀ ࡅࡌࡆࡀࡄࡓࡀ ࡅࡆࡓࡉࡆࡀ ࡅࡌࡆࡀࡓࡆࡀ ࡅࡌࡂࡀࡉࡀ ࡅࡉࡀࡉࡀ ࡗ ࡊࡋࡉࡋࡀ ࡁࡓࡀࡆࡉࡀ ࡕࡓࡀࡑ ࡁࡓࡉࡔࡀࡉࡀࡍ ࡖ ࡄࡀࡋࡉࡍ ࡍࡉࡔࡌࡀࡕࡀ ࡖ ࡄࡀࡆࡀ ࡌࡀࡎࡉࡒࡕࡀ ࡀࡋࡌࡀ ࡋࡁࡀࡁࡀ ࡓࡁࡀ ࡖ ࡁࡉࡕ ࡀࡁࡀࡕࡅࡓ ࡅࡍࡉࡐࡕࡀࡋࡅࡍ ࡁࡀࡁࡀ ࡓࡁࡀ ࡖ ࡁࡉࡕ ࡀࡁࡀࡕࡅࡓ ࡅࡍࡉࡔࡊࡉࡍࡅࡍࡉࡍ ࡁࡔࡊࡉࡍࡕࡇ ࡖ ࡀࡁࡀࡕࡅࡓ ࡅࡍࡉࡍࡀࡈࡓࡅࡍࡉࡍ ࡁࡌࡀࡍࡉࡀ ࡊࡀࡎࡉࡉࡀ ࡅࡍࡈࡉࡓࡉࡀ ࡅࡌࡔࡀࡁࡉࡍ ࡄࡉࡉࡀ ࡎࡀ ࡄࡀࡋࡉࡍ ࡕࡓࡉࡍ ࡁࡀࡅࡀࡕࡀ ࡐࡅࡂࡃࡀࡌࡉࡀ ࡖ ࡊࡋࡉࡋࡀ ࡖ ࡌࡀࡎࡉࡒࡕࡀ ࡄࡉࡍࡅࡍ ࡎࡀ

48. ࡁࡔࡅࡌࡀ ࡖ ࡄࡉࡉࡀ ࡀࡎࡂࡉࡀ ࡌࡀࡍࡃࡀ ࡖ ࡄࡉࡉࡀ ࡋࡊࡅࡊࡁࡉࡀ ࡄࡉࡆࡅࡀ ࡔࡓࡀ ࡏࡎࡉࡓࡉࡀ ࡋࡀࡐ ࡋࡀࡅࡐࡀ ࡖ ࡋࡀࡐࡎࡀࡒࡀ ࡖ ࡋࡉࡕࡋࡇ ࡎࡀࡊࡀ ࡅࡌࡉࡍࡉࡀࡍࡀ ࡁࡌࡀࡋࡀࡋࡇ ࡖ ࡍࡐࡀࡒ ࡌࡉࡍࡇ ࡌࡍ ࡄࡀࡕࡀࡌ ࡁࡄࡉࡕ ࡊࡅࡋࡄࡅࡍ ࡀࡋࡌࡉࡀ ࡏࡅࡁࡀࡃࡉࡀ ࡖ ࡁࡀࡉࡕࡀ ࡏࡄࡀࡌࡁࡀࡋ ࡔࡓࡀࡓࡀ ࡄࡅࡀ ࡋࡁࡍࡉࡀ ࡔࡅࡓࡁࡀ ࡓࡁࡀ ࡖ ࡄࡉࡉࡀ ࡍࡑࡀࡁ ࡍࡉࡑࡅࡁࡕࡀ ࡅࡍࡄࡉࡕ ࡋࡕࡉࡁࡉࡋ ࡏࡃࡀ ࡖ ࡁࡉࡔࡅࡕࡀ ࡖ ࡌࡀࡓࡇ ࡖ ࡁࡀࡉࡕࡀ ࡊࡉࡁࡓࡀࡕ ࡏࡋࡀࡅࡀࡉࡄࡅࡍ ࡅࡗ ࡊࡉࡁࡓࡀࡕ ࡏࡋࡀࡅࡀࡉࡄࡅࡍ ࡁࡉࡔࡅࡕࡀ ࡀࡃࡉࡒ ࡆࡉࡅࡀ ࡅࡏࡕࡀࡄࡆࡉࡋࡅࡍ ࡌࡍ ࡐࡉࡓࡉࡀ ࡅࡏࡋࡀࡉࡉࡀ ࡄࡀࡉࡋࡇ ࡅࡔࡅࡌࡇ ࡖ ࡉࡀࡕࡉࡓࡀ ࡖ ࡊࡅࡋࡇ ࡄࡉࡉࡀ ࡏࡕࡉࡂࡋࡉࡀ ࡏࡋࡀࡅࡀࡉࡄࡅࡍ ࡅࡌࡍ ࡆࡉࡅࡇ ࡐࡓࡀࡔ ࡏࡋࡀࡅࡀࡉࡄࡅࡍ ࡅࡏࡕࡂࡀࡋࡀࡋࡅࡍ ࡌࡀࡍࡃࡀ ࡖ ࡄࡉࡉࡀ ࡋࡊࡅࡋࡄࡅࡍ ࡓࡀࡄࡌࡉࡀ ࡔࡅࡌࡇ ࡖ ࡊࡅࡔࡈࡀ ࡋࡀࡕࡓࡀ ࡖ ࡊࡅࡋࡇ ࡄࡀࡉࡀࡁࡉࡀ ࡅࡌࡀࡓࡀࡉࡄࡅࡍ ࡖ ࡀࡋࡌࡉࡀ ࡖ ࡄࡉࡆࡉࡅࡉࡀ ࡏࡄࡀࡌࡁࡀࡋ ࡅࡋࡀࡏࡔࡕࡀࡑ ࡏࡔࡓࡀ ࡌࡍ ࡊࡀࡓࡎࡀࡅࡀࡕࡅࡍ ࡏࡋ ࡏࡎࡉࡓࡉࡀ ࡀࡃࡀ ࡏࡎࡉࡓࡉࡀ ࡏࡔࡕࡉࡓࡅࡍ ࡄࡀࡈࡀࡉࡅࡍ ࡅࡄࡀࡅࡁࡅࡍ ࡏࡔࡕࡁࡉࡒࡋࡅࡍ ࡄࡀ ࡏࡔࡕࡓࡉࡋࡅࡍ ࡌࡉࡐࡀࡒ ࡌࡍ ࡐࡀࡂࡓࡀࡉࡄࡅࡍ ࡅࡌࡀࡓࡇ ࡖ ࡁࡀࡉࡕࡀ ࡖ ࡄࡉࡆࡉࡅࡉࡀ ࡏࡄࡀࡌࡁࡀࡋ ࡌࡍ ࡎࡉࡃࡓࡀࡉࡄࡅࡍ ࡅࡋࡀࡏࡕࡉࡕࡋࡅࡍ ࡏࡋ ࡌࡀࡈࡅࡉࡉࡀ ࡄࡅࡀ ࡔࡅࡌࡇ ࡖ ࡀࡁࡀࡕࡅࡓ ࡏࡋࡀࡅࡀࡉࡄࡅࡍ ࡅࡔࡅࡌࡇ ࡖ ࡉࡅࡆࡀࡈࡀࡒ ࡌࡀࡍࡃࡀ ࡖ ࡄࡉࡉࡀ ࡄࡅࡀ ࡅࡏࡕࡉࡌࡋࡉࡀ ࡅࡏࡕࡉࡂࡋࡉࡀ ࡋࡓࡀࡄࡌࡉࡀ ࡔࡅࡌࡇ ࡍࡉࡄࡅࡉࡀ ࡔࡅࡌࡇ ࡅࡋࡍࡉࡔࡌࡀࡕࡀ ࡖ ࡄࡀࡆࡀ ࡌࡀࡎࡉࡒࡕࡀ ࡍࡉࡄࡅࡉࡀ ࡔࡅࡌࡇ ࡅࡄࡉࡉࡀ ࡆࡀࡊࡉࡍ ࡎࡀ ࡐࡅࡂࡃࡀࡌࡀ ࡖ ࡌࡀࡎࡉࡒࡕࡀ ࡄࡅ ࡒࡓࡉࡀ ࡏࡋ ࡌࡉࡔࡀ ࡃࡀࡊࡉࡀ ࡁࡌࡉࡍࡃࡀࡌ ࡅࡀࡕࡍࡀ ࡋࡒࡅࡃࡀࡌࡀࡊ ࡅࡒࡓࡉࡀ ࡌࡀࡎࡉࡒࡕࡀ ࡎࡀ

49. ࡁࡔࡅࡌࡀ ࡖ ࡄࡉࡉࡀ ࡍࡅࡊࡓࡀࡉࡉࡀ ࡄࡀࡆࡉࡍ ࡆࡉࡅࡀ ࡅࡍࡄࡅࡓ ࡄࡉࡉࡀ ࡌࡉࡐࡀࡒ ࡓࡅࡄࡀ ࡅࡍࡉࡔࡉࡌࡕࡀ ࡌࡍ ࡐࡀࡂࡓࡀ ࡅࡏࡕࡋࡀࡁࡅࡔࡉࡀ ࡍࡉࡔࡌࡀࡕ ࡄࡉࡉࡀ ࡁࡀࡋࡁࡅࡔ ࡄࡉࡉࡀ ࡄࡀࡃࡉࡍࡉࡀࡕ ࡄࡉࡉࡀ ࡃࡌࡅࡕ ࡄࡉࡉࡀ ࡖ ࡌࡍ ࡃࡉࡌࡀࡕ ࡄࡉࡉࡀ ࡄࡅࡀࡕ ࡁࡄࡉࡉࡀ ࡁࡀࡓࡀࡉࡉࡀ ࡁࡄࡀࡅࡓࡀࡓࡀࡍ ࡅࡊࡀࡓࡊࡀࡅࡀࡍ ࡆࡉࡅࡀ ࡁࡏࡅࡑࡀࡓ ࡍࡄࡅࡓࡀ ࡍࡉࡀࡄࡀ ࡅࡎࡉࡌࡀࡊࡀ ࡓࡁࡀ ࡖ ࡄࡉࡉࡀ ࡁࡄࡉࡉࡀ ࡖ ࡄࡅࡍ ࡌࡍ ࡄࡉࡉࡀ ࡅࡋࡊࡅࡔࡈࡀ ࡖ ࡄࡅࡀ ࡌࡍ ࡒࡅࡃࡀࡌ ࡁࡓࡉࡔࡀ ࡄࡉࡉࡀ ࡄࡉࡍࡅࡍ ࡁࡔࡊࡉࡍࡀࡕࡅࡍ ࡅࡍࡄࡅࡓࡀ ࡓࡁࡀ ࡖ ࡁࡆࡀࡊࡀࡅࡀࡕࡇ ࡗ ࡏࡍࡉࡔ ࡏࡍࡉࡔ ࡌࡍ ࡐࡀࡂࡓࡇ ࡍࡀࡐࡉࡒ ࡅࡀࡕࡉࡀ ࡀࡋࡀࡍࡐࡇ ࡔࡀࡁࡀ ࡃࡌࡀࡅࡀࡕࡀ ࡖ ࡋࡀࡄࡅࡕࡀ ࡅࡏࡍࡉࡔ ࡏࡍࡉࡔ ࡋࡃࡉࡋࡇ ࡒࡀࡉࡉࡌ ࡅࡀࡕࡉࡀ ࡑࡀࡅࡓࡏࡉࡋ ࡔࡀࡓࡅࡉࡀ ࡖ ࡔࡀࡓࡉࡀ ࡓࡅࡄࡀ ࡅࡍࡉࡔࡉࡌࡕࡀ ࡌࡍ ࡐࡀࡂࡓࡀ ࡏࡋ ࡏࡉࡋ ࡌࡍ ࡏࡅࡁࡀࡃࡉࡀ ࡏࡋࡀࡍ ࡒࡀࡉࡉࡌ ࡁࡀࡋࡁࡅࡔࡉࡇ ࡖ ࡉࡅࡆࡀࡈࡀࡒ ࡌࡀࡍࡃࡀ ࡖ ࡄࡉࡉࡀ ࡖ ࡔࡀࡓࡉࡀ ࡅࡍࡀࡎࡉࡁ ࡌࡉࡍࡇ ࡄࡀࡅࡓࡀࡓࡀࡍ ࡅࡊࡀࡓࡊࡀࡅࡀࡍ ࡆࡉࡅࡀ ࡌࡀ ࡖ ࡁࡇ ࡖ ࡐࡀࡂࡓࡀ ࡅࡏࡕࡋࡀࡁࡀࡔ ࡁࡀࡋࡁࡅࡔࡉࡇ ࡖ ࡉࡅࡆࡀࡈࡀࡒ ࡌࡀࡍࡃࡀ ࡖ ࡄࡉࡉࡀ ࡋࡁࡅࡔ ࡏࡋ ࡋࡁࡅࡔ ࡋࡀࡁࡔࡀ ࡅࡋࡁࡅࡔ ࡋࡋࡁࡅࡔ ࡌࡉࡕࡋࡀࡁࡔࡀ ࡗ ࡋࡁࡅࡔࡉࡇ ࡖ ࡉࡅࡆࡀࡈࡀࡒ ࡌࡀࡍࡃࡀ ࡖ ࡄࡉࡉࡀ ࡋࡀࡁࡔࡀ ࡕࡀࡌ ࡀࡄࡊࡀ ࡄࡀࡃࡉࡀ ࡎࡀࡄࡒࡀ ࡃࡀࡉࡑࡀ ࡂࡀࡉࡀ ࡅࡌࡉࡕࡐࡀࡓࡐࡀ ࡏࡋ ࡏࡒࡀࡓ ࡂࡉࡅࡀ ࡔࡀࡓࡉࡀ ࡏࡒࡀࡓࡀ ࡅࡋࡉࡄࡅࡉࡀ ࡀࡆࡋࡀࡁࡇ ࡁࡀࡋࡁࡅࡔࡉࡇ ࡖ ࡉࡅࡆࡀࡈࡀࡒ ࡌࡀࡍࡃࡀ ࡖ ࡄࡉࡉࡀ ࡔࡉࡁࡉࡀࡄࡉࡀ ࡖ ࡁࡃࡅࡊࡕࡀࡉࡅࡍ ࡖ ࡄࡉࡆࡉࡅࡉࡀ ࡁࡄࡉࡕ ࡅࡌࡋࡅࡍ ࡁࡂࡅࡓࡌࡀࡉࡆࡉࡅࡍ ࡅࡔࡒࡀࡐ ࡋࡕࡀࡓࡁࡀࡑࡉࡀ ࡄࡀࡃࡉࡀࡉࡅࡍ ࡅࡀࡌࡓࡉࡀ ࡏࡅࡀࡉ ࡋࡔࡉࡁࡉࡀࡄࡉࡀ ࡖ ࡄࡉࡍࡅࡍ ࡄࡅࡍ ࡄࡀࡉࡀࡁࡉࡀ ࡅࡏࡅࡁࡀࡃࡉࡀ ࡏࡃࡀࡉࡄࡅࡍ ࡄࡅࡍ ࡁࡆࡀࡊࡀࡉࡉࡀ ࡅࡀࡌࡓࡉࡀ ࡊࡌࡀ ࡉࡀࡉࡉࡀ ࡄࡀࡆࡉࡍ ࡆࡉࡅࡀ ࡅࡊࡌࡀ ࡕࡀࡒࡅࡍ ࡄࡀࡆࡉࡍ ࡍࡄࡅࡓࡀ ࡅࡊࡌࡀ ࡁࡀࡎࡉࡌࡀ ࡄࡀࡆࡉࡍ ࡑࡀࡅࡕࡀ ࡅࡊࡌࡀ ࡔࡀࡍࡀࡉ ࡄࡀࡆࡉࡍ ࡃࡌࡅࡕࡀ ࡅࡀࡌࡓࡉࡀ ࡌࡀࡍ ࡌࡍ ࡄࡀࡆࡉࡍ ࡆࡉࡅࡀ ࡌࡀࡍ ࡍࡀࡋࡁࡉࡔࡉࡍࡀࡍ ࡅࡌࡍ ࡄࡀࡆࡉࡍ ࡍࡄࡅࡓࡀ ࡌࡀࡍ ࡍࡉࡊࡀࡎࡉࡍࡀࡍ ࡅࡌࡍ ࡄࡀࡆࡉࡍ ࡑࡀࡅࡕࡀ ࡌࡀࡍ ࡍࡉࡔࡓࡉࡀ ࡏࡋࡀࡍ ࡅࡌࡍ ࡄࡀࡆࡉࡍ ࡃࡌࡅࡕࡀ ࡌࡀࡍ ࡍࡀࡃࡉࡀ ࡀࡋࡀࡍࡐࡀࡉࡀࡍ ࡅࡌࡍ ࡒࡁࡀࡋ ࡖ ࡉࡀࡉࡉࡀ ࡅࡍࡀࡄࡅࡓ ࡅࡕࡀࡒࡅࡍ ࡅࡋࡀࡉࡉࡕ ࡅࡏࡅࡁࡀࡃࡉࡀ ࡁࡀࡋࡌࡀ ࡄࡀࡆࡉࡍ ࡖ ࡋࡇ ࡃࡉࡋࡇ ࡃࡀࡌࡉࡍ ࡅࡀࡌࡓࡉࡍ ࡊࡌࡀ ࡈࡀࡁ ࡊࡅࡔࡈࡀ ࡋࡈࡀࡁࡉࡀ ࡅࡌࡀࡍࡃࡀ ࡖ ࡄࡉࡉࡀ ࡋࡊࡅࡋࡄࡅࡍ ࡁࡄࡉࡓࡉࡀ ࡖ ࡒࡀࡉࡌࡉࡀ ࡁࡐࡀࡂࡓࡀࡉࡄࡅࡍ ࡅࡌࡉࡕࡀࡐࡓࡉࡔࡉࡀ ࡁࡔࡅࡌࡀ ࡖ ࡄࡉࡉࡀ ࡅࡋࡉࡄࡅࡉࡀ ࡀࡆࡋࡀࡁࡇ ࡁࡀࡋࡁࡅࡔࡉࡇ ࡖ ࡉࡅࡆࡀࡈࡀࡒ ࡌࡀࡍࡃࡀ ࡖ ࡄࡉࡉࡀ ࡀࡃࡀࡍ ࡋࡏࡅࡁࡀࡃࡉࡀ ࡏࡋࡀࡍ ࡋࡏࡃࡀࡉࡄࡅࡍ ࡖ ࡔࡉࡁࡉࡀࡄࡉࡀ ࡊࡅࡋࡄࡅࡍ ࡀࡆࡋࡉࡕ ࡅࡌࡀࡈࡉࡕ ࡌࡀࡈࡀࡓࡕࡀ ࡖ ࡀࡁࡀࡕࡅࡓ ࡀࡕࡉࡒࡀ ࡓࡀࡌࡀ ࡊࡀࡎࡉࡀ ࡅࡍࡈࡉࡓࡀ ࡕࡀࡌ ࡕࡓࡉࡑ ࡌࡅࡆࡀࡍࡉࡀ ࡅࡀࡒࡀࡌࡇ ࡌࡉࡔࡕࡀࡉࡋࡉࡀ ࡓࡅࡄࡉࡀ ࡅࡍࡉࡔࡌࡀࡕࡀ ࡋࡔࡅࡌࡀࡉࡉࡍ ࡅࡋࡓࡅࡔࡅࡌࡀࡉࡉࡍ ࡅࡁࡓࡉࡊࡕࡀࡍ ࡅࡌࡀࡑࡁࡅࡕࡀࡍ ࡅࡌࡉࡍࡃࡀࡌ ࡖ ࡁࡇ ࡀࡋࡀࡕ ࡍࡉࡔࡉࡌࡕࡀ ࡖ ࡐࡋࡀࡍ ࡋࡁࡉࡕ ࡀࡁࡀࡕࡅࡓ ࡖ ࡀࡄࡁࡀࡕ ࡔࡅࡌࡀ ࡅࡓࡅࡔࡅࡌࡀ ࡅࡁࡓࡉࡊࡕࡀ ࡅࡌࡀࡑࡁࡅࡕࡀ ࡅࡌࡉࡍࡃࡀࡌ ࡖ ࡁࡇ ࡍࡉࡔࡌࡀࡕࡀ ࡖ ࡀࡁࡀࡄࡀࡕࡀࡍ ࡓࡔࡉࡌࡉࡀ ࡁࡓࡅࡔࡅࡌࡀ ࡖ ࡄࡉࡉࡀ ࡔࡅࡌࡇ ࡖ ࡄࡉࡉࡀ ࡅࡔࡅࡌࡇ ࡖ ࡌࡀࡍࡃࡀ ࡖ ࡄࡉࡉࡀ ࡌࡀࡃࡊࡀࡓ ࡏࡋࡀࡅࡀࡉࡀࡍ ࡀࡉࡋࡅࡍ ࡁࡌࡅࡆࡀࡍࡉࡀ ࡀࡉࡉࡋ ࡏࡅࡁࡀࡃࡉࡀ ࡅࡀࡂࡓࡉࡀ ࡕࡉࡒࡋࡅࡍ ࡅࡔࡀࡋࡌࡀࡍࡉࡀ ࡀࡋࡅࡍ ࡓࡅࡄࡀ ࡌࡍ ࡍࡉࡔࡉࡌࡕࡀ ࡀࡐࡒࡅࡍࡉࡍ ࡁࡆࡀࡊࡀࡉࡉࡀ ࡍࡐࡀࡒ ࡆࡉࡅࡀ ࡌࡍ ࡆࡉࡅࡇ ࡖ ࡀࡁࡀࡕࡅࡓ ࡀࡋࡁࡉࡔࡅࡍࡉࡍ ࡅࡀࡉࡕࡅࡍ ࡍࡄࡅࡓࡀ ࡊࡀࡎࡅࡍࡉࡍ ࡋࡁࡅࡔ ࡋࡋࡁࡅࡔ ࡋࡀࡁࡔࡀ ࡅࡋࡁࡅࡔ ࡏࡋ ࡋࡁࡅࡔ ࡌࡉࡕࡋࡀࡁࡔࡀ ࡗ ࡀࡋࡁࡅࡔࡉࡀ ࡖ ࡀࡁࡀࡕࡅࡓ ࡋࡀࡁࡔࡀ ࡕࡀࡌ ࡀࡄࡊࡀ ࡄࡀࡃࡉࡀ ࡎࡀࡄࡒࡀ ࡃࡀࡉࡑࡀ ࡂࡀࡉࡀ ࡅࡌࡉࡕࡐࡀࡓࡐࡀ ࡋࡏࡒࡀࡓ ࡂࡉࡅࡀ ࡔࡀࡓࡉࡀ ࡏࡒࡀࡓࡀ ࡅࡋࡉࡄࡅࡉࡀ ࡀࡆࡋࡀࡁࡇ ࡁࡀࡋࡁࡅࡔࡉࡇ ࡖ ࡉࡅࡆࡀࡈࡀࡒ ࡌࡀࡍࡃࡀ ࡖ ࡄࡉࡉࡀ ࡅࡀࡆࡋࡉࡕ ࡅࡌࡀࡈࡉࡕ ࡌࡀࡈࡀࡓࡕࡀ ࡖ ࡀࡓࡁࡀ ࡂࡅࡁࡓࡉࡀ ࡁࡍࡉࡀ ࡔࡋࡀࡌࡀ ࡏࡉࡍ ࡄࡀࡉ ࡔࡅࡌ ࡄࡀࡉ ࡆࡉࡅ ࡄࡀࡉ ࡍࡄࡅࡓ ࡄࡀࡉ ࡏࡍࡉࡔ ࡏࡍࡉࡔ ࡌࡍ ࡆࡉࡅࡇ ࡌࡀࡋࡁࡉࡔࡋࡇ ࡅࡏࡍࡉࡔ ࡏࡍࡉࡔ ࡌࡍ ࡍࡄࡅࡓࡇ ࡌࡊࡀࡎࡉࡋࡇ ࡋࡁࡅࡔ ࡏࡋ ࡋࡁࡅࡔ ࡋࡀࡁࡔࡀ ࡅࡋࡁࡅࡔ ࡋࡋࡁࡅࡔ ࡌࡉࡕࡋࡀࡁࡔࡀ ࡗ ࡋࡁࡅࡔࡀ ࡖ ࡁࡍࡉࡀ ࡔࡋࡀࡌࡀ ࡋࡀࡁࡔࡀ ࡕࡀࡌ ࡀࡄࡊࡀ ࡄࡀࡃࡉࡀ ࡎࡀࡄࡒࡀ ࡃࡀࡉࡑࡀ ࡂࡀࡉࡀ ࡅࡌࡀࡕࡐࡀࡓࡐࡀ ࡋࡏࡒࡀࡓ ࡂࡉࡅࡀ ࡔࡀࡓࡉࡀ ࡏࡒࡀࡓࡀ ࡅࡋࡉࡄࡅࡉࡀ ࡀࡆࡋࡀࡁࡇ ࡁࡀࡋࡁࡅࡔࡉࡇ ࡖ ࡉࡅࡆࡀࡈࡀࡒ ࡌࡀࡍࡃࡀ ࡖ ࡄࡉࡉࡀ ࡅࡀࡆࡋࡉࡕ ࡅࡌࡀࡈࡉࡕ ࡄࡀࡐࡉࡒࡉࡀ ࡌࡉࡀ ࡀࡄࡐࡀ ࡌࡉࡀ ࡀࡁࡀࡓ ࡆࡉࡅࡀ ࡔࡓࡀ ࡔࡅࡌࡇ ࡁࡂࡅ ࡔࡊࡉࡍࡕࡀ ࡖ ࡉࡀࡒࡉࡓ ࡁࡄࡉࡓ ࡅࡒࡓࡀ ࡋࡍࡀࡐࡔࡉࡇ ࡅࡀࡌࡀࡓ ࡄࡉࡉࡀ ࡀࡍࡀ ࡃࡉࡋࡊࡅࡍ ࡖ ࡋࡔࡅࡌࡀࡉࡊࡅࡍ ࡃࡉࡋࡊࡅࡍ ࡀࡕࡉࡕ ࡌࡍ ࡀࡋࡌࡀ ࡖ ࡐࡕࡀࡄࡉࡋ ࡅࡌࡍ ࡁࡉࡍࡀࡕࡀࡉࡀࡍ ࡖ  ࡌࡄࡀࡔࡀࡁࡀࡕࡀ ࡁࡉࡔࡀࡕࡀ ࡅࡌࡍ ࡀࡕࡅࡕࡉࡀ ࡊࡅࡓࡎࡉࡀ ࡖ ࡀࡁࡀࡕࡅࡓ ࡀࡕࡉࡒࡀ ࡖ ࡍࡀࡐࡉࡒ ࡅࡀࡕࡉࡀ ࡀࡋࡀࡍࡐࡇ ࡄࡀࡆࡀ ࡍࡉࡔࡉࡌࡕࡀ ࡖ ࡐࡋࡀࡍ ࡖ ࡄࡀࡆࡀ ࡌࡀࡎࡉࡒࡕࡀ ࡑࡅࡓࡉࡊ ࡄࡅ ࡆࡉࡅࡀ ࡓࡁࡀ ࡖ ࡄࡉࡉࡀ ࡂࡀࡁࡓࡀ ࡖ ࡋࡔࡊࡉࡍࡀࡕࡀ ࡔࡓࡉࡀ ࡅࡋࡔࡊࡉࡍࡀࡕࡀ ࡔࡓࡉࡀ ࡔࡅࡌࡇ ࡋࡀࡂࡉࡈࡋࡇ ࡁࡀࡐࡓࡀࡎ ࡉࡀࡌࡉࡍࡇ ࡅࡌࡀࡔࡋࡉࡌࡋࡇ ࡋࡕࡓࡉࡍ ࡏࡅࡕࡓࡉࡀ ࡁࡍࡉࡀ ࡍࡄࡅࡓࡀ ࡋࡀࡃࡀࡕࡀࡍ ࡅࡉࡀࡃࡀࡕࡀࡍ ࡄࡀࡃ ࡌࡀࡍࡃࡀ ࡅࡄࡀࡃ ࡏࡅࡑࡀࡓ ࡅࡀࡃࡀࡕࡀࡍ ࡅࡉࡀࡃࡀࡕࡀࡍ ࡅࡌࡀࡔࡋࡉࡌࡋࡇ ࡋࡕࡓࡉࡍ ࡏࡅࡕࡓࡉࡀ ࡋࡏࡅࡑࡀࡓ ࡄࡀࡉ ࡅࡐࡕࡀ ࡄࡀࡉ ࡖ ࡐࡀࡄࡕࡉࡀ ࡐࡉࡄࡕࡀ ࡖ ࡄࡉࡉࡀ ࡅࡍࡀࡑࡁࡉࡀ ࡍࡉࡑࡁࡕࡀ ࡖ ࡍࡄࡅࡓࡀ ࡅࡔࡀࡊࡍࡉࡀ ࡃࡌࡅࡕࡀ ࡒࡀࡃࡌࡀࡉࡕࡀ ࡖ ࡁࡉࡕ ࡄࡉࡉࡀ ࡀࡓࡉࡌࡋࡇ ࡊࡍࡀࡐ ࡄࡉࡉࡀ ࡀࡉࡋࡅ ࡁࡀࡃࡌࡅ ࡄࡉࡉࡀ ࡀࡎࡌࡊࡅ ࡃࡅࡊࡕࡀ ࡖ ࡆࡉࡅ ࡗ ࡍࡄࡅࡓ ࡉࡀࡒࡉࡃ ࡅࡀࡆࡋࡀࡕ ࡓࡅࡄࡀ ࡖ ࡐࡋࡀࡍ ࡅࡄࡅࡀࡕ ࡗ ࡆࡀࡍ ࡍࡉࡔࡉࡌࡕࡀ ࡅࡏࡕࡒࡀࡉࡌࡀࡕ ࡁࡉࡕ ࡄࡉࡉࡀ ࡅࡄࡉࡉࡀ ࡆࡀࡊࡉࡍ ࡎࡀ

50. ࡀࡔࡀࡓ ࡑࡁࡀࡍ ࡑࡀࡁࡅࡄࡀ ࡁࡉࡀࡋࡅࡆ ࡉࡀࡋࡅࡆ ࡖ ࡀࡉࡍࡀࡉࡄࡅࡍ ࡄࡀࡌࡀࡌࡅࡋࡀࡉ ࡔࡅࡌ ࡊࡎࡀࡎࡀࡓ ࡄࡀࡌࡀࡌࡅࡋࡀࡉ ࡀࡌࡉࡓ ࡆࡓࡉࡀ ࡅࡍࡈࡉࡓ ࡅࡈࡌࡉࡓ ࡃࡊࡉࡀ ࡏࡃࡀ ࡒࡉࡍࡀ ࡖ ࡌࡉࡍࡀ ࡄࡅࡀ ࡏࡋࡀ ࡔࡅࡌࡇ ࡄࡅࡀ ࡔࡅࡌࡇ ࡅࡏࡋࡀ ࡀࡓࡒࡀ ࡄࡅࡀ ࡏࡒࡀࡓࡇ ࡏࡋ ࡏࡅࡑࡀࡓ ࡁࡏࡅࡑࡀࡓ ࡄࡅࡍ ࡄࡉࡉࡀ ࡓࡁࡉࡀ ࡏࡕࡉࡌࡋࡅࡍ ࡁࡏࡒࡀࡓࡅࡍ ࡋࡏࡅࡑࡈࡀࡋ ࡂࡌࡉࡓ ࡉࡀࡕࡉࡁࡍࡀ ࡅࡋࡊࡀࡍࡀ ࡓࡁࡀ ࡖ ࡉࡅࡊࡀࡁࡀࡓ ࡄࡉࡉࡀ ࡋࡀࡕࡅࡕࡉࡀ ࡂࡅࡐࡍࡀ ࡖ ࡒࡀࡉࡉࡌ ࡏࡋࡀࡅࡉࡀ ࡕࡅࡔࡁࡉࡄࡀࡕ ࡄࡉࡉࡀ ࡒࡀࡉࡌࡀ ࡋࡒࡅࡃࡀࡌࡀࡉ ࡌࡀࡍ ࡋࡉࡄࡅࡉࡀ ࡅࡍࡉࡕࡉࡀ ࡅࡍࡉࡌࡀࡓࡋࡉࡀ ࡀࡍࡀࡄࡅ ࡋࡉࡄࡅࡉࡀ ࡖ ࡓࡀࡁࡍࡀ ࡏࡅ ࡄࡉࡉࡀ ࡖ ࡀࡕࡅࡕࡉࡀ ࡂࡅࡐࡍࡀ ࡖ ࡒࡀࡉࡉࡌ ࡏࡋࡀࡅࡉࡀ ࡕࡅࡔࡁࡉࡄࡀࡕ ࡄࡉࡉࡀ ࡒࡀࡉࡌࡀ ࡋࡒࡅࡃࡀࡌࡀࡉ ࡄࡀࡆࡉࡍ ࡄࡅ ࡔࡅࡌ ࡅࡓࡔࡅࡌ ࡖ ࡍࡉࡎࡁࡉࡕ ࡌࡍ ࡂࡉࡋࡉࡀ ࡌࡉࡀ ࡅࡌࡍ ࡏࡅࡑࡓࡉࡀ ࡖ ࡆࡉࡅࡀ ࡅࡌࡍ ࡌࡀࡓࡉࡁࡀ ࡓࡁࡀ ࡅࡏࡋࡀࡉࡀ ࡅࡄࡉࡉࡀ ࡆࡀࡊࡉࡍ ࡎࡀ

51. ࡁࡔࡅࡌࡀ ࡖ ࡄࡉࡉࡀ ࡑࡁࡉࡍࡀ ࡁࡔࡅࡌࡀ ࡖ ࡄࡉࡉࡀ ࡍࡅࡊࡓࡀࡉࡉࡀ ࡉࡀࡕࡉࡓࡉࡀ ࡖ ࡏࡋࡀࡅࡉࡀ ࡊࡅࡋࡄࡅࡍ ࡏࡅࡁࡀࡃࡉࡀ ࡅࡌࡒࡀࡉࡀࡌࡍࡀ ࡁࡔࡅࡌࡇ ࡖ ࡏࡅࡑࡀࡓ ࡍࡄࡅࡓ ࡉࡀࡅࡀࡓ ࡌࡍ ࡁࡉࡕ ࡄࡉࡉࡀ ࡂࡋࡀ ࡏࡅࡃࡍࡇ ࡔࡀࡊࡉࡍ ࡃࡌࡅ ࡔࡀࡃࡉࡋࡅࡍ ࡋࡄࡉࡉࡀ ࡓࡁࡉࡀ ࡁࡀࡍࡄࡅࡓࡀ ࡄࡉࡉࡀ ࡄࡆࡉࡕ ࡅࡄࡉࡉࡀ ࡄࡆࡅࡍ ࡅࡋࡄࡉࡉࡀ ࡄࡅࡀࡋࡀࡍ ࡓࡅࡄࡑࡀࡍࡀ ࡗ ࡔࡀࡄࡋࡀࡋࡀ ࡄࡀࡆࡀ ࡍࡉࡔࡉࡌࡕࡇ ࡖ ࡐࡋࡀࡍ ࡋࡉࡋࡁࡅࡔ ࡐࡀࡂࡓࡉࡀ ࡋࡀࡁࡔࡀ ࡋࡁࡅࡔࡀ ࡖ ࡄࡉࡉࡀ ࡅࡌࡉࡃࡀࡌࡉࡀ ࡁࡀࡃࡌࡅ ࡄࡉࡉࡀ ࡓࡁࡉࡀ ࡁࡀࡍࡄࡅࡓࡀ ࡀࡋࡌࡉࡀ ࡃࡄࡅࡍࡀࡍ ࡅࡋࡀࡍࡐࡀࡋࡍࡉࡍ ࡋࡀࡂࡀࡍࡁࡉࡀ ࡊࡅࡔࡈࡀ ࡃࡉࡋࡀࡊ ࡄࡅࡀࡋࡀࡍ ࡓࡅࡄࡑࡀࡍࡀ ࡍࡁࡀࡈ ࡍࡉࡁࡈࡀ ࡒࡀࡃࡌࡀࡉࡀ ࡑࡅࡓࡉࡊ ࡆࡉࡅࡀ ࡓࡁࡀ ࡖ ࡄࡉࡉࡀ ࡁࡆࡀࡊࡀࡅࡀࡕࡇ ࡊࡅࡔࡈࡀ ࡅࡊࡀࡍࡀ ࡓࡁࡀ ࡖ ࡏࡒࡀࡓࡀ ࡅࡌࡔࡀࡁࡉࡍ ࡄࡉࡉࡀ ࡎࡀ

52. ࡁࡓࡇ ࡀࡍࡀ ࡖ ࡌࡀࡍ ࡌࡀࡍࡀ ࡎࡌࡉࡓࡀ ࡖ ࡄࡅ ࡉࡅࡎࡌࡉࡓ ࡆࡉࡅࡀ ࡓࡁࡀ ࡒࡀࡃࡌࡀࡉࡉࡀ ࡁࡓ ࡄࡉࡉࡀ ࡓࡁࡉࡀ ࡓࡉࡔࡀࡉࡉࡀ ࡖ ࡄࡀࡔ ࡅࡐࡓࡀࡔ ࡃࡉࡋࡇ ࡁࡀࡉࡉࡀ ࡖ ࡌࡉࡍࡇ ࡃࡉࡋࡇ ࡀࡕࡀ ࡊࡀࡍࡀ ࡖ ࡍࡉࡔࡌࡀࡕࡀ ࡋࡉࡅࡌࡀ ࡁࡀࡕࡓࡀࡉࡀ ࡗ ࡍࡀࡐࡒࡀ ࡌࡍ ࡐࡀࡂࡓࡀࡉࡅࡍ ࡁࡃࡉࡋࡇ ࡄࡀࡃࡉࡀ ࡅࡌࡉࡕࡊࡀࡓࡊࡉࡁࡇ ࡅࡎࡀࡋࡒࡉࡀ ࡄࡀࡆࡉࡋࡇ ࡋࡀࡉࡀࡓ ࡁࡀࡓࡀࡉࡀ ࡅࡋࡃࡀࡅࡓࡀ ࡕࡀࡒࡍࡀ ࡅࡌࡔࡀࡁࡉࡍ ࡄࡉࡉࡀ ࡓࡁࡉࡀ ࡁࡀࡍࡄࡅࡓࡀࡉࡄࡅࡍ ࡅࡄࡉࡉࡀ ࡆࡀࡊࡉࡍ ࡎࡀ

53. ࡏࡍࡂࡉࡓࡕࡀ ࡋࡀࡅࡐࡀ ࡅࡆࡀࡊࡅࡕࡀ ࡀࡕࡀࡋࡀ ࡋࡄࡀࡆࡀ ࡍࡉࡔࡉࡌࡕࡀ ࡖ ࡐࡋࡀࡍ ࡌࡍ ࡁࡉࡕ ࡄࡉࡉࡀ ࡀࡎࡀࡓࡀ ࡌࡉࡀ ࡊࡋࡉࡋࡀ ࡍࡄࡅࡓࡀ ࡆࡀࡉࡍࡀ ࡔࡅࡕࡀ ࡄࡀࡉࡕࡀ ࡄࡀࡕࡌࡀ ࡁࡄࡉࡓࡀ ࡃࡀࡊࡉࡀ ࡊࡅࡋࡌࡀࡍ ࡖ ࡍࡉࡐࡉࡄࡕࡀ ࡅࡍࡉࡒࡓࡉࡁࡀ ࡍࡉࡄࡉࡉࡀ ࡅࡍࡉࡕࡀࡎࡉࡀ ࡅࡍࡉࡕࡒࡀࡉࡉࡌ ࡔࡅࡌࡇ ࡁࡉࡕ ࡄࡉࡉࡀ ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡍࡅࡊࡓࡀࡉࡉࡀ ࡅࡒࡀࡉࡀࡌࡉࡍ ࡄࡉࡉࡀ ࡒࡀࡃࡌࡀࡉࡉࡀ ࡁࡔࡊࡉࡍࡀࡕࡅࡍ ࡅࡌࡔࡀࡁࡉࡍ ࡄࡉࡉࡀ ࡎࡀ.. ࡄࡀࡕࡌࡀ ࡖ ࡌࡀࡎࡉࡒࡕࡀ ࡄࡏ ࡎ ࡀ ࡀࡋࡌࡀ ࡋࡄࡀࡊࡀ ࡒࡓࡉࡀ ࡋࡌࡀࡎࡉࡒࡕࡀ ࡄࡀࡊࡀ ࡎࡀࡁ ࡐࡉࡄࡕࡀ ࡅࡐࡓࡅࡕ ࡏࡅࡌࡑࡀ ࡌࡍ ࡄࡀࡃ ࡐࡀࡈࡉࡓࡀ ࡏࡋࡀࡉࡀ ࡅࡁࡀࡕࡓࡀࡉࡀ ࡃࡅࡓࡇ ࡋࡐࡀࡋࡂࡀ ࡖ ࡁࡇ ࡅࡊࡓࡅࡊ ࡁࡉࡄࡃࡀࡃࡉࡀ ࡅࡀࡓࡉࡁ ࡌࡉࡀ ࡖ ࡁࡅࡕࡀ ࡁࡄࡀࡌࡓࡀ ࡅࡒࡓࡉࡀ ࡏࡋࡀࡅࡀࡉࡅࡍ ࡁࡉࡄࡓࡇ ࡉࡅࡊࡀࡔࡀࡓ ࡋࡁࡓࡀࡉࡀ ࡅࡒࡓࡉࡀ ࡌࡀࡋࡉࡋ ࡅࡐࡕࡀ ࡄࡉࡉࡀ ࡅࡐࡀࡋࡉࡈ ࡐࡀࡍࡃࡀࡌࡀࡊ ࡅࡀࡊࡅࡋ ࡐࡉࡄࡕࡀࡊ ࡅࡔࡕࡉࡀ ࡌࡀࡌࡁࡅࡄࡀࡊ ࡅࡒࡓࡉࡀ ࡏࡕࡉࡀࡓ ࡌࡉࡀ ࡄࡉࡉࡀ ࡋࡔࡊࡉࡍࡀࡕࡅࡍ ࡎࡀ

54. ࡁࡉࡄࡓࡇ ࡉࡅࡊࡀࡔࡀࡓ ࡋࡁࡓࡀࡉࡀ ࡁࡉࡄࡓࡇ ࡅࡒࡉࡓࡉࡉࡇ ࡅࡒࡀࡉࡌࡇ ࡀࡋࡁࡔࡉࡇ ࡆࡉࡅࡀ ࡖ ࡍࡐࡉࡔ ࡅࡀࡉࡕࡉࡀ ࡍࡄࡅࡓࡀ ࡖ ࡊࡀࡁࡉࡓ ࡊࡀࡎࡉࡉࡇ ࡅࡀࡎࡒࡇ ࡋࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡃࡀࡅࡓࡀ ࡕࡀࡒࡍࡀ ࡁࡔࡊࡉࡍࡕࡇ ࡖ ࡍࡀࡐࡔࡉࡇ ࡏࡕࡀࡐࡓࡀࡔ ࡅࡏࡕࡉࡍࡉࡄࡀࡕ ࡍࡀࡐࡔࡉࡇ ࡁࡏࡅࡑࡓࡇ ࡏࡕࡉࡀࡉࡅࡓࡉࡀ ࡌࡉࡀ ࡄࡉࡉࡀ ࡌࡍ ࡁࡉࡕ ࡄࡉࡉࡀ ࡍࡉࡕࡉࡀࡉࡓࡀ ࡄࡀࡋࡉࡍ ࡍࡉࡔࡌࡀࡕࡀ ࡖ ࡏࡕࡉࡒࡓࡉࡀ ࡅࡏࡕࡒࡀࡉࡀࡌ ࡅࡏࡕࡉࡓࡔࡉࡌ ࡁࡄࡀࡆࡀ ࡌࡀࡎࡉࡒࡕࡀ ࡅࡃࡀࡁࡀࡄࡀࡕࡀࡍ ࡅࡓࡅࡁࡀࡍࡀࡍ ࡅࡃࡀࡄࡀࡍ ࡅࡃࡀࡄࡅࡀࡕࡀࡍ ࡖ ࡍࡐࡀࡒ ࡌࡍ ࡐࡀࡂࡓࡀࡉࡄࡅࡍ ࡅࡋࡃࡒࡀࡉࡌࡉࡀ ࡁࡐࡀࡂࡓࡀࡉࡄࡅࡍ ࡁࡏࡅࡄࡓࡀ ࡌࡉࡊࡕࡀ ࡅࡁࡃࡉࡓࡊࡉࡀ ࡖ ࡔࡀࡋࡌࡀࡍࡉࡀ ࡍࡉࡎࡒࡀ ࡍࡉࡄࡆࡅࡍࡇ ࡋࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡋࡃࡀࡅࡓࡀ ࡕࡀࡒࡍࡀ ࡅࡍࡉࡕࡒࡀࡉࡌࡀ ࡁࡐࡕࡀ ࡍࡄࡅࡓࡀ ࡓࡁࡀ ࡒࡀࡃࡌࡀࡉࡀ ࡅࡄࡉࡉࡀ ࡆࡀࡊࡉࡍ ࡎࡀ

55. ࡌࡀࡋࡉࡋ ࡅࡐࡕࡀ ࡄࡉࡉࡀ ࡓࡁࡉࡀ ࡁࡐࡅࡌࡀࡉࡄࡅࡍ ࡁࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡖ ࡍࡀࡐࡔࡀࡉࡄࡅࡍ ࡅࡌࡔࡀࡁࡉࡍ ࡄࡉࡉࡀ ࡎࡀ.. ࡄࡀࡆࡀ ࡁࡅࡕࡀ ࡔࡓࡉࡕࡀ ࡖ ࡐࡀࡍࡃࡀࡌࡀ ࡄࡏ ࡎࡀ ࡄࡀࡆࡉࡍ ࡁࡉࡄࡓࡇ ࡉࡅࡊࡀࡔࡀࡓ ࡋࡁࡓࡀࡉࡀ ࡒࡓࡉࡀ ࡋࡌࡉࡀ ࡖ ࡁࡅࡕࡀ ࡅࡄࡀࡌࡓࡀ ࡗ ࡌࡀࡓࡁࡉࡀ ࡁࡉࡄࡃࡀࡃࡉࡀ ࡏࡅ ࡋࡍࡉࡔࡌࡀࡕࡀ ࡖ ࡒࡀࡓࡉࡕ ࡗ ࡖ ࡊࡕࡉࡁ ࡒࡓࡉࡀ ࡏࡅ ࡍࡉࡔࡉࡌࡕࡀ ࡄࡀࡃ ࡄࡏ ࡀࡌࡅࡓ ࡍࡉࡕࡉࡀࡉࡓࡀ ࡍࡉࡔࡉࡌࡕࡀ ࡖ ࡐࡋࡀࡍ ࡅࡒࡓࡉࡀ ࡌࡀࡋࡉࡋ ࡅࡐࡕࡀ ࡄࡉࡉࡀ ࡓࡁࡉࡀ ࡁࡐࡅࡌࡀࡉࡄࡅࡍ ࡅࡐࡀࡋࡉࡈ ࡐࡀࡍࡃࡀࡌࡀࡊ ࡅࡀࡊࡅࡋ ࡐࡉࡄࡕࡀࡊ ࡅࡔࡕࡉࡀ ࡌࡀࡌࡁࡅࡄࡀࡊ ࡅࡀࡌࡓ ࡏࡕࡉࡀࡓ ࡌࡉࡀ ࡄࡉࡉࡀ ࡋࡔࡊࡉࡍࡀࡕࡅࡍ ࡅࡒࡅࡌ ࡅࡒࡓࡉࡀ ࡄࡀࡃ ࡀࡁࡀࡕࡀࡓ ࡄࡀࡃ ࡀࡋࡌࡀ ࡋࡒࡀࡉࡀࡌࡕࡀ ࡖ ࡁࡉࡄࡓࡇ ࡉࡅࡊࡀࡔࡀࡓ ࡋࡁࡓࡀࡉࡀ ࡎࡀ

56. ࡏࡕࡉࡀࡓ ࡌࡉࡀ ࡄࡉࡉࡀ ࡋࡔࡊࡉࡍࡀࡕࡅࡍ ࡏࡕࡉࡀࡓ ࡋࡁࡅࡔࡉࡀ ࡈࡀࡁࡉࡀ ࡋࡀࡕࡓࡀࡉࡄࡅࡍ ࡏࡕࡉࡀࡓ ࡌࡀࡍࡀ ࡓࡁࡀ ࡋࡏࡒࡀࡓࡀ ࡏࡕࡉࡀࡓ ࡌࡀࡍࡀ ࡓࡁࡀ ࡏࡋ ࡏࡒࡀࡓࡇ ࡍࡉࡕࡉࡀࡉࡓࡀ ࡄࡀࡋࡉࡍ ࡍࡉࡔࡌࡀࡕࡀ ࡄࡀࡉࡀࡕࡀ ࡏࡓࡀࡕࡀ ࡕࡀࡒࡅࡍࡀࡕࡀ ࡅࡓࡀࡅࡆࡀࡕࡀ ࡋࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡋࡃࡀࡅࡓࡀ ࡕࡀࡒࡍࡀ ࡅࡌࡔࡀࡁࡉࡍ ࡄࡉࡉࡀ ࡎࡀ.. ࡒࡀࡉࡀࡌࡕࡀ ࡖ ࡌࡉࡀ ࡖ ࡁࡅࡕࡀ ࡄࡏ ࡎ_ ࡀ

57. ࡓࡉࡄࡀ ࡁࡀࡎࡉࡌࡀ ࡋࡀࡕࡓࡇ ࡍࡉࡎࡀࡒ ࡅࡀࡍࡀࡕࡅࡍ ࡄࡉࡉࡀ ࡁࡆࡀࡊࡀࡉࡉࡀ ࡄࡅࡍ ࡔࡀࡁࡉࡒ ࡄࡀࡈࡀࡉࡉࡀ ࡅࡄࡀࡅࡁࡉࡀ ࡅࡎࡊࡉࡋࡀࡕࡀ ࡅࡕࡉࡒࡋࡀࡕࡀ ࡅࡔࡀࡁࡀࡔࡀࡕࡀ ࡍࡉࡔࡁࡅࡒࡋࡅࡍ ࡋࡊࡅࡋࡄࡅࡍ ࡓࡀࡄࡌࡉࡀ ࡔࡅࡌࡇ ࡖ ࡊࡅࡔࡈࡀ ࡅࡏࡋ ࡍࡉࡔࡉࡌࡕࡀ ࡖ ࡐࡋࡀࡍ ࡅࡄࡉࡉࡀ ࡆࡀࡊࡉࡍ ࡎ ࡀ.. ࡒࡀࡉࡀࡌࡕࡀ ࡖ ࡁࡅࡕࡀ ࡖ ࡓࡉࡄࡀ ࡄࡏ ࡎࡀ

58. ࡁࡔࡅࡌࡀ ࡖ ࡄࡉࡉࡀ ࡌࡔࡀࡁࡉࡍ ࡄࡉࡉࡀ ࡒࡀࡃࡌࡀࡉࡉࡀ ࡅࡌࡔࡀࡁࡀ ࡌࡀࡋࡀࡋࡅࡍ ࡖ ࡄࡉࡉࡀ ࡒࡀࡃࡌࡀࡉࡉࡀ ࡌࡔࡀࡁࡀ ࡄࡀࡊ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡌࡔࡀࡁࡀ ࡄࡀࡊ ࡍࡄࡅࡓࡀ ࡖ ࡋࡀࡄࡅࡀࡋࡇ ࡌࡉࡑࡓࡀ ࡅࡋࡀࡄࡅࡀࡋࡇ ࡎࡀࡊࡀ ࡅࡋࡀࡏࡕࡀࡅࡃࡀ ࡖ ࡏࡌࡀࡕ ࡄࡅࡀ ࡌࡔࡀࡁࡀ ࡌࡀࡓࡀ ࡖ ࡓࡀࡁࡅࡕࡀ ࡌࡔࡀࡁࡉࡍ ࡊࡅࡋࡄࡅࡍ ࡏࡅࡕࡓࡉࡀ ࡖ ࡒࡀࡉࡌࡉࡀ ࡋࡉࡀࡌࡉࡍࡇ ࡅࡏࡋ ࡎࡌࡀࡋࡇ ࡖ ࡌࡀࡓࡀ ࡖ ࡓࡀࡁࡅࡕࡀ ࡅࡋࡌࡀࡓࡀ ࡖ ࡓࡀࡁࡅࡕࡀ ࡌࡔࡀࡁࡉࡋࡇ ࡌࡔࡀࡁࡀ ࡀࡁ ࡉࡀࡅࡀࡓ ࡌࡔࡀࡁࡉࡍ ࡊࡅࡋࡄࡅࡍ ࡏࡅࡕࡓࡉࡀ ࡖ ࡒࡀࡉࡌࡉࡀ ࡅࡌࡔࡀࡁࡉࡋࡇ ࡋࡀࡁ ࡉࡀࡅࡀࡓ ࡌࡔࡀࡁࡀ ࡄࡀࡊ ࡉࡀࡓࡃࡍࡀ ࡓࡁࡀ ࡒࡀࡃࡌࡀࡉࡀ ࡖ ࡄࡉࡉࡀ ࡒࡀࡃࡌࡀࡉࡉࡀ ࡁࡂࡀࡅࡇ ࡏࡑࡈࡁࡀ ࡌࡔࡀࡁࡉࡍ ࡊࡅࡋࡄࡅࡍ ࡉࡀࡓࡃࡍࡉࡀ ࡖ ࡌࡉࡀ ࡄࡉࡉࡀ ࡌࡔࡀࡁࡉࡍ ࡊࡅࡋࡄࡅࡍ ࡐࡉࡓࡉࡀ ࡅࡏࡌࡁࡉࡀ ࡅࡏࡋࡀࡍࡉࡀ ࡖ ࡏࡋࡀࡅࡀࡉࡄࡅࡍ ࡌࡔࡀࡁࡉࡍ ࡊࡅࡋࡄࡅࡍ ࡀࡋࡌࡉࡀ ࡓࡅࡓࡁࡉࡀ ࡏࡋࡀࡉࡉࡀ ࡖ ࡍࡄࡅࡓࡀ ࡌࡔࡀࡁࡉࡍ ࡄࡀࡍࡉࡊ ࡊࡅࡋࡄࡉࡍ ࡔࡊࡉࡍࡀࡕࡀ ࡖ ࡊࡀࡎࡉࡀ ࡖ ࡊࡅࡋ ࡔࡊࡉࡍࡕࡀ ࡔࡊࡉࡍࡕࡀ ࡖ ࡉࡀࡕࡁࡉࡁࡇ ࡀࡋࡉࡐ ࡀࡋࡉࡐ ࡏࡅࡕࡓࡉࡀ ࡖ ࡋࡀࡎࡀࡊࡀ ࡅࡓࡅࡁࡀࡍ ࡓࡅࡁࡀࡍ ࡔࡊࡉࡍࡀࡕࡀ ࡖ ࡋࡀࡌࡉࡍࡉࡀࡍࡀ ࡌࡔࡀࡁࡉࡍ ࡄࡀࡍࡉࡊ ࡀࡋࡉࡐ ࡀࡋࡉࡐ ࡏࡅࡕࡓࡉࡀ ࡖ ࡋࡀࡎࡀࡊࡀ ࡅࡓࡅࡁࡀࡍ ࡓࡅࡁࡀࡍ ࡔࡊࡉࡍࡀࡕࡀ ࡖ ࡋࡀࡌࡉࡍࡉࡀࡍࡀ ࡌࡔࡀࡁࡉࡍ ࡄࡀࡍࡉࡊ ࡊࡅࡋࡄࡅࡍ ࡃࡓࡀࡁࡔࡉࡀ ࡖ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡖ ࡍࡂࡉࡃࡉࡀ ࡋࡒࡅࡃࡀࡌࡀࡉࡄࡅࡍ ࡅࡌࡀࡍࡄࡉࡓࡉࡋࡅࡍ ࡌࡔࡀࡁࡀ ࡁࡀࡁࡀ ࡓࡁࡀ ࡖ ࡁࡉࡕ ࡀࡁࡀࡕࡅࡓ ࡌࡔࡀࡁࡉࡍ ࡊࡅࡋࡄࡅࡍ ࡏࡅࡕࡓࡉࡀ ࡖ ࡒࡀࡉࡌࡉࡀ ࡏࡋࡇ ࡖ ࡀࡁࡀࡕࡅࡓ ࡅࡌࡔࡀࡁࡉࡋࡇ ࡌࡔࡀࡁࡉࡍ ࡕࡋࡀࡕࡌࡀ ࡅࡔࡉࡕࡉࡍ ࡌࡅࡆࡀࡍࡉࡉࡀ ࡖ ࡕࡓࡉࡑࡉࡀ ࡒࡅࡃࡀࡌࡇ ࡖ ࡀࡁࡀࡕࡅࡓ ࡀࡕࡉࡒࡀ ࡌࡔࡀࡁࡀ ࡄࡀࡊ ࡌࡅࡆࡀࡍࡉࡀ ࡓࡁࡀ ࡒࡀࡃࡌࡀࡉࡀ ࡖ ࡕࡓࡉࡑ ࡒࡅࡃࡀࡌࡇ ࡖ ࡀࡁࡀࡕࡅࡓ ࡀࡕࡉࡒࡀ ࡌࡔࡀࡁࡀ ࡄࡀࡊ ࡍࡉࡈࡅࡐࡕࡀ ࡓࡀࡁࡕࡉࡀ ࡊࡀࡎࡉࡕࡀ ࡒࡀࡃࡌࡀࡉࡕࡀ ࡖ ࡄࡅ ࡌࡉࡍࡀ ࡄࡅࡀ ࡌࡔࡀࡁࡉࡍ ࡊࡅࡋࡄࡅࡍ ࡏࡅࡕࡓࡉࡀ ࡖ ࡉࡀࡕࡁࡉࡀ ࡋࡊࡀࡓࡎࡀࡅࡀࡕࡀ ࡖ ࡍࡉࡀࡄࡀ ࡅࡌࡉࡔࡕࡀࡉࡉࡍ ࡁࡎࡉࡃࡓࡉࡀ ࡅࡌࡀࡎࡒࡀࡕࡀ ࡅࡁࡀࡅࡀࡕࡀ ࡊࡀࡎࡉࡀࡕࡀ ࡌࡔࡀࡁࡉࡍ ࡄࡉࡍࡅࡍ ࡎࡉࡃࡓࡉࡀ ࡅࡌࡀࡎࡒࡀࡕࡀ ࡅࡁࡀࡅࡀࡕࡀ ࡊࡀࡎࡉࡀࡕࡀ ࡖ ࡓࡁࡉࡀ ࡁࡂࡀࡅࡀࡉࡄࡅࡍ ࡌࡔࡀࡁࡉࡍ ࡌࡔࡀࡁࡉࡍ ࡄࡀࡍࡉࡊ ࡕࡀࡓࡌࡉࡃࡉࡀ ࡖ ࡋࡅࡀࡕࡀࡉࡄࡅࡍ ࡉࡀࡕࡁࡉࡀ ࡌࡔࡀࡁࡉࡍ ࡊࡅࡋࡄࡅࡍ ࡈࡅࡓࡉࡀ ࡖ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡌࡔࡀࡁࡉࡍ ࡊࡅࡋࡄࡅࡍ ࡃࡉࡓࡊࡉࡀ ࡅࡔࡁࡉࡋࡉࡀ ࡖ ࡍࡄࡅࡓࡀ ࡄࡉࡉࡀ ࡒࡀࡃࡌࡀࡉࡉࡀ ࡕࡓࡅࡑ ࡀࡉࡍࡀࡉࡊࡅࡍ ࡏࡋ ࡄࡀࡋࡉࡍ ࡍࡉࡔࡌࡀࡕࡀ ࡖ ࡏࡕࡉࡒࡓࡉࡀ ࡅࡏࡕࡒࡀࡉࡀࡌ ࡅࡏࡕࡉࡓࡔࡉࡌ ࡁࡄࡀࡆࡀ ࡌࡀࡎࡉࡒࡕࡀ ࡅࡃࡀࡁࡀࡄࡀࡕࡀࡍ ࡅࡓࡅࡁࡀࡍࡀࡍ ࡅࡃࡀࡄࡀࡍ ࡅࡃࡀࡄࡅࡀࡕࡀࡍ ࡖ ࡍࡐࡀࡒ ࡌࡍ ࡐࡀࡂࡓࡀࡉࡄࡅࡍ ࡅࡋࡃࡒࡀࡉࡌࡉࡀ ࡁࡐࡀࡂࡓࡀࡉࡄࡅࡍ ࡐࡀࡓࡒࡅࡍࡉࡍ ࡅࡔࡅࡆࡁࡉࡍࡉࡍ ࡅࡍࡀࡈࡓࡅࡍࡉࡍ ࡌࡍ ࡀࡋࡌࡀ ࡄࡀࡆࡉࡍ ࡖ ࡁࡉࡔࡉࡀ ࡅࡌࡍ ࡌࡀࡈࡀࡓࡀࡕࡀ ࡄࡀࡋࡉࡍ ࡅࡏࡕࡉࡀࡓࡅࡕࡊࡅࡍ ࡃࡉࡋࡊࡅࡍ ࡄࡉࡉࡀ ࡓࡁࡉࡀ ࡒࡀࡃࡌࡀࡉࡉࡀ ࡕࡉࡄࡅࡉࡀ

ࡏࡋࡀࡅࡀࡉࡄࡅࡍ ࡅࡕࡉࡌࡓࡅࡍ ࡅࡒࡀࡉࡀࡌࡉࡍ ࡄࡉࡉࡀ ࡁࡔࡊࡉࡍࡀࡕࡅࡍ ࡅࡄࡉࡉࡀ ࡆࡀࡊࡏࡉࡍ ࡎࡀ ࡒࡀࡉࡀࡌࡕࡀ ࡖ ࡁࡀࡅࡀࡕࡀ ࡄࡏ . ࡒࡀࡉࡀࡌࡕࡀ ࡖ ࡁࡀࡅࡀࡕࡀ ࡖ ࡌࡀࡎࡉࡒࡕࡀ ࡁࡏ ࡀࡅࡃࡉࡍ ࡅࡕࡅࡔࡁࡉࡄࡀࡍ ࡅࡏࡋࡊࡅࡍ ࡃࡉࡋࡊࡅࡍ ࡅࡌࡉࡔࡒࡀࡋ ࡀࡉࡍࡉࡀ ࡅࡁࡉࡕ ࡌࡉࡔࡒࡀࡋ ࡀࡉࡍࡉࡀ ࡋࡍࡉࡔࡌࡀࡕࡀ ࡖ ࡒࡀࡓࡉࡕ ࡗ ࡖ ࡊࡕࡉࡁ ࡒࡓࡉࡀ ࡏࡅ ࡍࡉࡔࡉࡌࡕࡀ ࡄࡀࡃ ࡄࡏ ࡀࡌࡅࡓ ࡕࡓࡅࡑ ࡀࡉࡍࡀࡉࡊࡅࡍ ࡋࡍࡉࡔࡉࡌࡕࡀ ࡖ ࡐࡋࡀࡍ ࡎࡀ

59. ࡏࡕࡉࡌࡋࡅࡍ ࡄࡉࡉࡀ ࡁࡆࡉࡅࡀ ࡖ ࡍࡀࡐࡔࡀࡉࡄࡅࡍ ࡅࡏࡕࡒࡀࡉࡀࡌ ࡍࡄࡅࡓࡀ ࡓࡁࡀ ࡖ ࡁࡆࡀࡊࡀࡅࡀࡕࡇ ࡅࡌࡔࡀࡁࡉࡍ ࡄࡉࡉࡀ ࡎ ࡀ.. ࡒࡀࡉࡀࡌࡕࡀ ࡖ ࡐࡉࡄࡕࡀ ࡄࡏ ࡎࡀ

60. ࡔࡊࡉࡍࡉࡀ ࡄࡉࡉࡀ ࡓࡁࡉࡀ ࡁࡓࡀࡄࡌࡀࡉࡄࡅࡍ ࡅࡓࡀࡄࡌࡀࡉࡄࡅࡍ ࡁࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡃࡀࡅࡓࡀ ࡕࡀࡒࡍࡀ ࡅࡌࡔࡀࡁࡉࡍ ࡄࡉࡉࡀ ࡎࡀ.. ࡒࡀࡉࡀࡌࡕࡀ ࡖ ࡌࡀࡌࡁࡅࡄࡀ ࡄࡏ ࡎࡀ

61. ࡊࡋࡉࡋ ࡀࡋࡌࡉࡀ ࡔࡀࡄࡉࡀ ࡅࡊࡋࡉࡋࡀ ࡖ ࡄࡉࡉࡀ ࡓࡀࡅࡆ ࡊࡋࡉࡋࡀ ࡖ ࡁࡄࡉࡓ ࡆࡉࡃࡒࡀ ࡕࡓࡀࡑ ࡅࡌࡀࡍࡄࡀࡓ ࡁࡓࡉࡔࡀࡉࡉࡍ ࡖ ࡓࡀࡄࡌࡉࡀ ࡔࡅࡌࡇ ࡖ ࡊࡅࡔࡈࡀ ࡊࡋࡉࡋࡀ ࡌࡍ ࡀࡓࡒࡀ ࡖ ࡍࡄࡅࡓࡀ ࡅࡏࡅࡑࡈࡋࡀ ࡌࡍ ࡃࡀࡅࡓࡀ ࡕࡀࡒࡍࡀ ࡊࡋࡉࡋ ࡀࡉࡀࡓ ࡁࡆࡀࡊࡀࡅࡀࡕࡇ ࡕࡓࡉࡑ ࡅࡌࡀࡍࡄࡀࡓ ࡁࡓࡉࡔࡀࡉࡉࡍ ࡋࡍࡉࡔࡌࡀࡕࡀ ࡖ ࡄࡀࡆࡀ ࡌࡀࡎࡉࡒࡕࡀ ࡅࡄࡉࡉࡀ ࡆࡀࡊࡏࡉࡍ ࡎࡀ ࡒࡀࡉࡀࡌࡕࡀ ࡖ ࡊࡋࡉࡋࡀ ࡖ ࡌࡀࡎࡉࡒࡕࡀ ࡄࡏ . ࡏࡅ ࡋࡍࡉࡔࡌࡀࡕࡀ ࡖ ࡒࡀࡓࡉࡕ ࡗ ࡖ ࡊࡕࡉࡁ ࡒࡓࡉࡀ ࡏࡅ ࡋࡍࡉࡔࡉࡌࡕࡀ ࡄࡀࡃ ࡄࡏ ࡖ ࡒࡀࡓࡉࡕ ࡀࡌࡅࡓ ࡁࡓࡉࡔࡀ ࡖ ࡄࡀࡆࡀ ࡍࡉࡔࡉࡌࡕࡀ ࡖ ࡐࡋࡀࡍ ࡎࡀ

62. ࡀࡋࡌࡀ ࡁࡌࡉࡔࡀ ࡔࡉࡄࡉࡀ ࡅࡍࡀࡑࡅࡓࡀࡉࡉࡀ ࡁࡆࡉࡅࡀ ࡖ ࡄࡉࡉࡀ ࡍࡀࡄࡓࡉࡀ ࡅࡄࡉࡉࡀ ࡆࡀࡊࡉࡍ ࡎࡀ

63. ࡁࡆࡉࡅ ࡖ ࡍࡐࡉࡔ ࡑࡁࡉࡍࡀ ࡅࡁࡀࡍࡄࡅࡓ ࡖ ࡕࡀࡒࡅࡍ ࡌࡒࡀࡉࡀࡌࡍࡀ ࡌࡀࡍࡃࡀ ࡑࡅࡁࡀࡍ ࡊࡅࡔࡈࡀ ࡒࡀࡉࡌࡀࡍ ࡏࡍࡂࡉࡓࡕࡀ ࡋࡀࡅࡐࡀ ࡅࡆࡀࡊࡅࡕࡀ ࡀࡕࡀࡋࡀ ࡌࡍ ࡁࡉࡕ ࡄࡉࡉࡀ ࡀࡎࡀࡓࡀ ࡌࡉࡀ ࡊࡋࡉࡋࡀ ࡍࡄࡅࡓࡀ ࡆࡀࡉࡍࡀ ࡔࡅࡕࡀ ࡄࡀࡉࡕࡀ ࡄࡀࡕࡌࡀ ࡁࡄࡉࡓࡀ ࡃࡀࡊࡉࡀ ࡊࡅࡋ ࡌࡀࡍ ࡖ ࡍࡉࡐࡉࡄࡕࡀ ࡅࡍࡉࡒࡓࡉࡁࡀ ࡍࡉࡄࡉࡉࡀ ࡅࡍࡉࡕࡀࡎࡉࡀ ࡅࡍࡉࡕࡒࡀࡉࡀࡌ ࡔࡅࡌࡇ ࡁࡉࡕ ࡄࡉࡉࡀ ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡍࡅࡊࡓࡀࡉࡉࡀ ࡍࡅࡊࡓࡀࡉࡉࡀ ࡌࡍ ࡀࡋࡌࡉࡀ ࡅࡄࡉࡉࡀ ࡆࡀࡊࡉࡍ .. ࡒࡀࡉࡀࡌࡕࡀ ࡖ ࡌࡀࡎࡉࡒࡕࡀ ࡖ ࡌࡉࡔࡀ ࡄࡏ ࡎࡀ

64. ࡔࡊࡉࡍࡉࡀ ࡄࡉࡉࡀ ࡁࡆࡉࡅࡀࡉࡄࡅࡍ ࡅࡍࡄࡅࡓࡀࡉࡄࡅࡍ ࡖ ࡍࡀࡐࡔࡀࡉࡄࡅࡍ ࡅࡌࡔࡀࡁࡉࡍ ࡄࡉࡉࡀ ࡎࡀ ࡒࡀࡉࡀࡌࡕࡀ ࡖ ࡁࡉࡄࡓࡇ ࡉࡅࡊࡀࡔࡀࡓ ࡋࡁࡓࡀࡉࡀ ࡄࡏ ࡄࡀࡊࡀ ࡕࡓࡀࡑ ࡏࡋ ࡏࡕࡓࡉࡑࡕࡅࡍ ࡅࡏࡕࡒࡀࡉࡀࡌࡕࡅࡍ ࡅࡃࡓࡅࡔ ࡃࡓࡀࡔࡉࡀ ࡖ ࡌࡀࡎࡉࡒࡕࡀ ࡎࡀ

65. ࡏࡕࡓࡉࡑࡕࡅࡍ ࡅࡏࡕࡒࡀࡉࡀࡌࡕࡅࡍ ࡁࡀࡕࡓࡀ ࡖ ࡈࡀࡁࡉࡀ ࡌࡉࡕࡒࡀࡉࡌࡉࡀ ࡁࡉࡍࡉࡀ ࡌࡀࡍࡉࡀ ࡖ ࡍࡄࡅࡓࡀ ࡍࡉࡔࡌࡀࡕࡀ ࡖ ࡏࡕࡉࡒࡓࡉࡀ ࡅࡏࡕࡒࡀࡉࡀࡌ ࡅࡏࡕࡉࡓࡔࡉࡌ ࡁࡄࡀࡆࡀ ࡌࡀࡎࡉࡒࡕࡀ ࡅࡃࡀࡁࡀࡄࡀࡕࡀࡍ ࡅࡓࡅࡁࡀࡍࡀࡍ ࡅࡃࡀࡄࡀࡍ ࡅࡃࡀࡄࡅࡀࡕࡀࡍ ࡖ ࡍࡐࡀࡒ ࡌࡍ ࡐࡀࡂࡓࡀࡉࡄࡅࡍ ࡅࡏࡋ ࡖ ࡒࡀࡉࡌࡉࡀ ࡁࡐࡀࡂࡓࡀࡉࡄࡅࡍ ࡌࡀࡍࡊࡅࡍ ࡁࡀࡍࡄࡅࡓࡀ ࡍࡉࡕࡉࡓࡑࡅࡍ ࡌࡀࡍࡊࡅࡍ ࡍࡉࡕࡉࡓࡑࡅࡍ ࡁࡀࡍࡄࡅࡓࡀ ࡅࡀࡍࡀࡕࡅࡍ ࡄࡀࡕࡀࡌ ࡁࡀࡍࡄࡅࡓࡀ ࡕࡉࡕࡒࡀࡉࡌࡅࡍ ࡅࡄࡉࡉࡀ ࡆࡀࡊࡉࡍ ࡎࡀ

66. ࡁࡔࡅࡌࡀ ࡖ ࡄࡉࡉࡀ ࡌࡊࡀࡋࡉࡋࡍࡀ ࡅࡔࡀࡊࡉࡁࡍࡀ ࡁࡏࡅࡑࡈࡋࡀ ࡖ ࡌࡅࡌࡀ ࡋࡉࡕࡁࡇ ࡁࡏࡅࡑࡈࡋࡀ ࡖ ࡋࡉࡕࡁࡇ ࡌࡅࡌࡀ ࡅࡋࡀࡉࡉࡕ ࡁࡂࡀࡅࡇ ࡄࡀࡎࡉࡓ ࡅࡁࡑࡉࡓ ࡄࡉࡉࡀ ࡏࡃࡅࡍ ࡏࡋࡀࡉ ࡀࡃࡀࡌ ࡖ ࡔࡀࡊࡉࡁ ࡏࡕࡀࡓ ࡋࡉࡂࡈࡀࡍ ࡁࡀࡐࡓࡀࡎ ࡉࡀࡌࡉࡍࡇ ࡅࡋࡀࡏࡄࡀࡁࡋࡉࡀ ࡁࡀࡉࡉࡍ ࡁࡉࡀࡃ ࡍࡄࡅࡓࡀ ࡓࡌࡀࡍ ࡁࡄࡔࡅࡊࡀ ࡅࡄࡔࡅࡊࡀ ࡁࡀࡍࡄࡅࡓࡀ ࡏࡕࡉࡌࡋࡉࡀ ࡉࡅࡌࡀ ࡖ ࡍࡄࡅࡓࡀ ࡎࡀࡋࡉࡒ ࡍࡉࡕࡊࡀࡌࡀࡓ ࡄࡔࡅࡊࡀ ࡋࡀࡕࡓࡇ ࡍࡉࡕࡒࡀࡓࡁࡀ ࡍࡉࡔࡌࡀࡕࡀ ࡖ ࡄࡀࡆࡀ ࡌࡀࡎࡉࡒࡕࡀ ࡋࡅࡀࡕ ࡀࡍࡀࡍࡀ ࡖ ࡍࡄࡅࡓࡀ ࡅࡋࡀࡕࡓࡀ ࡖ ࡄࡉࡉࡀ ࡌࡉࡆࡋࡉࡍ ࡅࡌࡔࡀࡁࡉࡍ ࡄࡉࡉࡀ ࡎࡀ.. ࡃࡓࡀࡔࡀ ࡖ ࡌࡀࡎࡉࡒࡕࡀ ࡄࡏ ࡎࡀ

67. ࡌࡉࡍࡇ ࡅࡌࡍ ࡔࡀࡓࡅࡉࡀ ࡍࡉࡎࡒࡀ ࡍࡉࡔࡌࡀࡕࡀ ࡖ ࡄࡀࡆࡀ ࡌࡀࡎࡉࡒࡕࡀ ࡍࡉࡄࡆࡅࡍࡇ ࡋࡀࡕࡓࡀ ࡖ ࡍࡄࡅࡓࡀ ࡅࡃࡀࡅࡓࡀ ࡕࡀࡒࡍࡀ ࡔࡅࡁࡀ ࡁࡏࡅࡄࡓࡀ ࡋࡀࡍࡉࡊࡀࡕࡓࡅࡍࡇ ࡅࡃࡀࡉࡀࡍࡉࡀ ࡖ ࡔࡉࡒࡓࡀ ࡋࡀࡍࡉࡔࡀࡋࡅࡍࡉࡍ ࡄࡉࡉࡀ ࡍࡉࡄࡉࡔࡁࡅࡍࡉࡊࡅࡍ ࡁࡄࡅࡔࡁࡀࡍࡅࡍ ࡅࡈࡀࡁࡉࡀ ࡍࡉࡒࡀࡉࡌࡅࡍࡊࡉࡍ ࡁࡉࡍࡀࡕࡅࡍ ࡃࡅࡊࡕࡀ ࡖ ࡀࡆࡋࡉࡍ ࡈࡀࡁࡉࡀ ࡍࡉࡃࡁࡓࡉࡍࡊࡉࡍ ࡅࡁࡀࡕࡓࡀ ࡖ ࡒࡀࡉࡌࡉࡀ ࡍࡉࡒࡀࡉࡌࡉࡍࡊࡉࡍ ࡅࡔࡓࡀࡂࡉࡀ ࡖ ࡆࡉࡅࡀ ࡌࡍ ࡒࡅࡃࡀࡌࡀࡉࡊࡉࡍ ࡅࡐࡀࡎࡉࡌࡊࡉࡀ ࡖ ࡍࡄࡅࡓࡀ ࡌࡍ ࡀࡁࡀࡕࡓࡀࡉࡊࡉࡍ ࡊࡅࡔࡈࡀ ࡍࡉࡕࡉࡀ ࡌࡍ ࡉࡀࡌࡉࡍࡀࡉࡊࡉࡍ ࡅࡆࡉࡃࡒࡀ ࡍࡉࡌࡀࡊࡉࡊ ࡏࡅࡄࡓࡀࡕࡊࡉࡍ ࡍࡉࡄࡅࡉࡋࡊࡉࡍ ࡔࡉࡓࡉࡀࡕࡀ ࡌࡍ ࡄࡀࡊࡀ ࡋࡃࡀࡅࡓࡀ ࡕࡀࡒࡍࡀ ࡖ ࡌࡀࡌࡁࡀࡓࡕࡀ ࡖ ࡌࡀࡁࡓࡀ ࡁࡄࡉࡓࡉࡀ ࡕࡉࡐࡅࡒ ࡀࡋࡀࡍࡐࡀࡉࡊࡉࡍ ࡅࡕࡀࡁࡓࡉࡍࡊࡉࡍ ࡌࡍ ࡀࡁࡀࡕࡅࡓ ࡖ ࡌࡅࡆࡀࡍࡉࡀ ࡖ ࡍࡀࡐࡉࡒ ࡀࡋࡀࡍࡐࡀࡉࡊࡉࡍ ࡐࡀࡓࡅࡀࡍࡒࡀ ࡐࡀࡓࡅࡀࡍࡒࡀ ࡖ ࡀࡕࡉࡀ ࡀࡋࡀࡍࡐࡀࡉࡊࡉࡍ ࡊࡅࡋࡇ ࡆࡉࡅࡀ ࡅࡍࡄࡅࡓࡀ ࡌࡍ ࡓࡉࡔ ࡁࡓࡉࡔ ࡗ ࡊࡋࡉࡋࡀ ࡁࡉࡀࡌࡉࡍࡇ ࡅࡋࡕࡓࡉࡍ ࡃࡓࡀࡉࡉࡀ ࡏࡅࡑࡈࡋࡀ ࡐࡀࡑ ࡏࡅࡑࡈࡋࡀࡉࡊࡉࡍ ࡋࡁࡅࡔ ࡅࡕࡓࡅࡑ ࡊࡋࡉࡋࡀࡉࡊࡉࡍ ࡓࡀࡅࡆࡀ ࡏࡎࡓࡅࡉࡀ ࡋࡄࡉࡌࡉࡀࡍࡀࡉࡊࡉࡍ ࡖ ࡄࡀࡓࡂࡀ ࡅࡌࡅࡌࡀ ࡋࡉࡕࡁࡇ ࡏࡋࡀࡅࡉࡀ ࡓࡉࡔࡀࡉࡊࡉࡍ ࡐࡉࡓࡀ ࡍࡉࡄࡅࡉࡀ ࡄࡀࡕࡀࡌ ࡁࡆࡉࡁࡍࡀࡉࡊࡉࡍ ࡅࡏࡃࡀࡍࡊࡉࡍ ࡌࡀࡍࡀࡉࡊࡉࡍ ࡁࡀࡍࡄࡅࡓࡀ ࡍࡉࡕࡒࡀࡉࡌࡅࡍ ࡌࡀࡍࡀࡉࡊࡉࡍ ࡍࡉࡕࡒࡀࡉࡌࡅࡍ ࡁࡀࡍࡄࡅࡓࡀ ࡅࡎࡀࡒ ࡄࡉࡆࡉࡅࡉࡀ ࡋࡀࡕࡀࡓ ࡍࡄࡅࡓ ࡅࡄࡉࡉࡀ ࡆࡀࡊࡉࡍ ࡎࡀ

68. ࡁࡉࡍࡉࡀ ࡊࡉࡎࡉࡀ ࡋࡆࡉࡅࡀ ࡅࡁࡉࡍࡉࡀ ࡍࡄࡅࡓࡀ ࡋࡏࡅࡕࡓࡉࡀ ࡁࡉࡍࡉࡀ ࡊࡉࡎࡉࡀ ࡋࡆࡉࡅࡀ ࡖ ࡒࡀࡉࡌࡉࡀ ࡋࡍࡉࡔࡌࡀ ࡅࡌࡔࡀࡉࡋࡉࡀ ࡅࡀࡌࡓࡉࡋࡇ ࡀࡌࡀࡓ ࡀࡌࡀࡓ ࡍࡉࡔࡌࡀ ࡖ ࡁࡀࡍࡀࡊ ࡌࡀࡍ ࡌࡍ ࡁࡍࡀࡊ ࡅࡌࡍ ࡁࡀࡍࡀࡊ ࡅࡌࡍ ࡄࡅࡀ ࡂࡀࡁࡓࡀ ࡍࡀࡑࡁࡀࡊ ࡌࡀࡋࡉࡋ ࡅࡀࡌࡀࡓ ࡍࡉࡔࡌࡀ ࡍࡉࡔࡌࡀ ࡁࡍࡉࡍࡀ ࡅࡌࡁࡀࡍࡀࡍࡀ ࡌࡀࡋࡉࡋ ࡖ ࡍࡉࡌࡀࡓࡋࡇ ࡋࡂࡀࡁࡓࡀ ࡖ ࡔࡀࡉࡋࡇ ࡀࡌࡀࡓࡋࡇ ࡀࡁ ࡄࡀࡃ ࡁࡀࡍ ࡄࡀࡃ ࡁࡀࡍࡀࡍ ࡄࡀࡃ ࡄࡅࡀ ࡂࡀࡁࡓࡀ ࡍࡀࡑࡁࡀࡉ ࡄࡀࡃ ࡌࡍ ࡁࡍࡉࡀ ࡔࡋࡀࡌࡀ ࡌࡍࡀࡕࡀ ࡁࡈࡀࡁࡅࡕࡀ ࡋࡂࡀࡈ ࡊࡀࡍࡀࡍ ࡁࡊࡍࡀࡍ ࡆࡉࡅࡀ ࡅࡍࡎࡉࡁ ࡋࡀࡃࡀࡌ ࡀࡔࡋࡌࡀࡍ ࡀࡃࡀࡌ ࡁࡕࡌࡉࡌࡅࡕࡇ ࡁࡉࡕ ࡋࡀࡏࡃࡀ ࡅࡁࡉࡕ ࡖ ࡋࡀࡐࡓࡀࡔ ࡀࡃࡀࡌ ࡁࡕࡌࡉࡌࡅࡕࡇ ࡍࡎࡉࡁ ࡁࡏࡑࡈࡅࡍ ࡐࡀࡂࡓࡉࡀ ࡓࡌࡀࡍ ࡍࡎࡉࡁ ࡓࡌࡀࡍ ࡁࡏࡑࡈࡅࡍ ࡐࡀࡂࡓࡉࡀ ࡖ ࡂࡉࡃࡉࡀ ࡅࡌࡓࡀࡓࡉࡀ ࡅࡏࡋࡒࡉࡀ ࡉࡀࡕࡉࡁ ࡍࡉࡔࡌࡀ ࡅࡍࡀࡈࡀࡓ ࡔࡐࡉࡍࡆࡀ ࡖ ࡐࡀࡂࡓࡉࡀ ࡖ ࡐࡀࡒࡀࡃࡋࡇ ࡉࡀࡕࡉࡁ ࡅࡍࡀࡈࡀࡓࡋࡇ ࡀࡋࡌࡀ ࡖ ࡊࡉࡋࡇ ࡅࡌࡉࡍࡉࡀࡍࡇ ࡔࡋࡉࡌ ࡗ ࡔࡋࡉࡌ ࡊࡉࡋࡇ ࡅࡌࡉࡍࡉࡀࡍࡇ ࡀࡎࡂࡉࡀ ࡔࡀࡓࡅࡉࡀ ࡏࡋࡇ ࡀࡎࡂࡉࡀ ࡏࡋࡇ ࡔࡀࡓࡅࡉࡀ ࡖ

ࡔࡉࡓࡉࡉࡇ ࡅࡃࡉࡁࡓࡇ ࡌࡀࡍ ࡖ ࡏࡎࡓࡇ ࡖ ࡔࡉࡓࡉࡉࡇ ࡋࡍࡉࡔࡌࡀ ࡀࡆࡉࡋ ࡀࡒࡀࡌࡇ ࡅࡃࡏࡎࡓࡇ ࡀࡕࡉࡀ ࡌࡍ ࡀࡁࡀࡕࡓࡇ ࡓࡄࡉࡈ ࡍࡉࡔࡌࡀ ࡋࡔࡀࡓࡅࡉࡀ ࡌࡉࡈࡉࡉࡇ ࡓࡄࡉࡈ ࡖ ࡏࡎࡓࡇ ࡏࡋ ࡃࡀࡅࡓࡀ ࡍࡉࡔࡌࡀ ࡅࡔࡀࡓࡅࡉࡀ ࡋࡀࡕࡓࡀ ࡖ ࡄࡉࡉࡀ ࡌࡉࡆࡋࡇ ࡋࡀࡕࡓࡀ ࡖ ࡋࡀࡓࡁࡀ ࡔࡀࡌࡔࡉࡇ ࡅࡔࡓࡀࡂࡉࡀ ࡖ ࡍࡄࡅࡓࡀ ࡋࡀࡄࡀࡔࡊࡉࡀ ࡏࡋࡇ ࡅࡋࡄࡀࡍࡀࡕࡇ ࡀࡕࡓࡀ ࡖ ࡒࡓࡉࡀ ࡅࡌࡆࡀࡌࡍࡀ ࡍࡉࡔࡌࡀࡕࡀ ࡖ ࡏࡕࡉࡒࡓࡉࡀ ࡁࡄࡀࡆࡀ ࡌࡀࡎࡉࡒࡕࡀ ࡅࡏࡕࡉࡓࡔࡉࡌ ࡁࡄࡀࡆࡀ ࡓࡅࡔࡅࡌࡀ ࡍࡉࡄࡆࡅࡍࡇ ࡋࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡃࡀࡅࡓࡀ ࡕࡀࡒࡍࡀ ࡅࡌࡔࡀࡁࡉࡍ ࡄࡉࡉࡀ ࡎࡀ

69. ࡍࡉࡀࡄࡀ ࡅࡔࡀࡋࡌࡀ ࡍࡉࡄࡅࡉࡀ ࡁࡏࡅࡄࡓࡀ ࡖ ࡀࡃࡀࡌ ࡊࡉࡔࡓࡀ ࡍࡉࡀࡄࡀ ࡅࡔࡀࡋࡌࡀ ࡍࡉࡄࡅࡉࡀ ࡁࡏࡅࡄࡓࡀ ࡖ ࡍࡉࡔࡉࡌࡕࡀ ࡀࡆࡋࡀ ࡔࡓࡀࡕࡇ ࡍࡉࡔࡉࡌࡕࡀ ࡋࡔࡅࡔࡉࡋࡕࡀ ࡅࡕࡀࡁࡉࡓࡕࡉࡍࡅࡍ ࡏࡋ ࡑࡅࡑࡈࡌࡉࡀ ࡔࡋࡀࡕࡇ ࡋࡊࡉࡕࡅࡍ ࡐࡀࡂࡓࡉࡀ ࡏࡄࡉࡃࡓࡀࡕ ࡄࡆࡀࡕࡇ ࡅࡏࡎࡕࡀࡍࡃࡓࡀࡕ ࡋࡀࡈࡕࡇ ࡋࡅࡈࡕࡀ ࡁࡉࡔࡕࡀ ࡋࡂࡀࡁࡓࡀ ࡖ ࡐࡀࡂࡓࡉࡀ ࡀࡋࡁࡔࡀ ࡔࡀࡓࡂࡉࡆࡕࡇ ࡋࡂࡀࡁࡉࡋ ࡐࡀࡂࡓࡉࡀ ࡖ ࡌࡍ ࡃࡅࡊࡕࡀ ࡖ ࡔࡀࡊࡉࡁ ࡀࡕࡀࡓࡕࡇ ࡀࡌࡓࡀࡋࡇ ࡒࡅࡌ ࡄࡆࡉࡀ ࡂࡀࡁࡉࡋ ࡐࡀࡂࡓࡉࡀ ࡖ ࡄࡅࡐࡍࡀࡊ ࡌࡉࡀ ࡏࡕࡉࡌࡋࡅࡍ ࡒࡀࡋࡀ ࡖ ࡂࡀࡁࡉࡋ ࡐࡀࡂࡓࡉࡀ ࡖ ࡌࡄࡀࡅࡋࡉࡋ ࡅࡁࡀࡊࡉࡀ ࡏࡋ ࡍࡀࡐࡔࡉࡇ ࡅࡀࡌࡀࡓ ࡅࡀࡉ ࡏࡋࡀࡉ ࡖ ࡄࡅࡐࡍࡀࡉ ࡌࡉࡀ ࡏࡕࡉࡌࡋࡅࡍ ࡀࡌࡀࡓࡋࡇ ࡏࡆࡀࡋ ࡁࡔࡋࡀࡌ ࡐࡕ ࡄࡀࡓࡉࡀ ࡖ ࡁࡃࡅࡓ ࡁࡉࡔࡉࡀ ࡀࡌࡕࡀ ࡒࡓࡅࡊ ࡏࡆࡀࡋ ࡁࡔࡋࡀࡌ ࡌࡀࡓࡂࡀࡍࡉࡕࡀ ࡃࡀࡊࡉࡕࡀ ࡖ ࡌࡍ ࡂࡉࡍࡆࡀࡉࡄࡅࡍ ࡖ ࡄࡉࡉࡀ ࡏࡕࡍࡉࡑࡁࡀࡕ ࡏࡆࡀࡋ ࡁࡔࡋࡀࡌ ࡌࡁࡀࡎࡌࡀࡍࡉࡕࡀ ࡖ ࡁࡀࡎࡉࡌࡕࡇ ࡋࡐࡀࡂࡓࡀ ࡆࡀࡐࡓࡀ ࡏࡆࡉࡋ ࡁࡔࡋࡀࡌ ࡌࡀࡍࡄࡀࡓࡀࡍࡉࡕࡀ ࡖ ࡀࡍࡄࡀࡓࡕࡇ ࡋࡁࡀࡉࡕࡀ ࡄࡀࡔࡊࡀ ࡏࡆࡀࡋ ࡁࡔࡋࡀࡌ ࡁࡄࡉࡓࡀ ࡃࡀࡊࡉࡀ ࡆࡀࡊࡀࡉࡀ ࡖ ࡌࡅࡌࡀ ࡋࡉࡕࡁࡇ ࡐࡀࡄࡓࡀ ࡅࡀࡆࡉࡋ ࡍࡉࡔࡌࡀ ࡀࡋࡌࡀ ࡋࡁࡉࡕ ࡄࡉࡉࡀ ࡌࡈࡀ ࡌࡀࡈࡅࡉࡉࡇ ࡁࡉࡕ ࡄࡉࡉࡀ ࡏࡅࡕࡓࡉࡀ ࡀࡋࡀࡍࡐࡇ ࡍࡀࡐࡒࡉࡀ ࡀࡌࡓࡉࡋࡇ ࡎࡀࡁ ࡋࡁࡅࡔ ࡏࡅࡑࡈࡋࡀࡊ ࡖ ࡆࡉࡅࡀ ࡅࡕࡓࡅࡑ ࡊࡋࡉࡋࡀࡊ ࡓࡀࡅࡆࡀ ࡎࡀࡒ ࡃࡀࡓ ࡁࡔࡊࡉࡍࡀࡕࡀ ࡃࡅࡊࡕࡀ ࡖ ࡏࡅࡕࡓࡉࡀ ࡉࡀࡕࡁࡉࡀ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡌࡀࡍࡃࡀ ࡖ ࡄࡉࡉࡀ ࡅࡓࡀࡄࡌࡉࡀ ࡔࡅࡌࡇ ࡅࡌࡔࡀࡁࡉࡍ ࡄࡉࡉࡀ ࡎࡀ

70. ࡁࡓࡉࡊࡉࡀ ࡅࡌࡔࡀࡁࡉࡀ ࡄࡉࡉࡀ ࡖ ࡋࡄࡀࡋࡉࡍ ࡍࡉࡔࡌࡀࡕࡀ ࡁࡓࡀࡄࡌࡉࡀ ࡏࡕࡉࡌࡋࡅࡍ ࡌࡔࡀࡁࡉࡕ ࡌࡀࡓࡀࡉ ࡌࡀࡍࡃࡀ ࡖ ࡄࡉࡉࡀ ࡖ ࡀࡍࡀࡕ ࡀࡎࡒࡉࡍࡉࡍ ࡋࡄࡀࡋࡉࡍ ࡍࡉࡔࡌࡀࡕࡀ ࡅࡋࡀࡕࡀࡂࡆࡀࡓ ࡏࡋࡀࡅࡀࡉࡄࡅࡍ ࡌࡔࡀࡁࡉࡕ ࡉࡅࡔࡀࡌࡉࡍ ࡃࡀࡊࡉࡀ ࡖ ࡀࡍࡀࡕ ࡕࡉࡄࡅࡉࡋࡀࡍ ࡁࡀࡄࡉࡃ ࡏࡃࡀ ࡌࡔࡀࡁࡉࡕࡅࡍ ࡔࡉࡋࡌࡀࡉ ࡅࡍࡉࡃࡁࡀࡉ ࡖ ࡎࡀࡄࡃࡅࡕࡀ ࡖ ࡊࡅࡔࡈࡀ ࡕࡉࡎࡉࡄࡃࡅࡍ ࡏࡋࡀࡅࡀࡉࡄࡅࡍ ࡌࡔࡀࡁࡉࡕࡅࡍ ࡄࡉࡁࡉࡋ ࡅࡔࡉࡕࡉࡋ ࡅࡀࡍࡅࡔ ࡖ ࡀࡍࡀࡕࡅࡍ ࡕࡉࡄࡋࡉࡐࡅࡍࡉࡍ ࡌࡍ ࡁࡉࡕ ࡌࡀࡊࡎࡉࡀ ࡅࡌࡍ ࡀࡁࡀࡕࡅࡓ ࡖ ࡌࡅࡆࡀࡍࡉࡀ ࡖ ࡍࡀࡐࡉࡒ ࡀࡋࡀࡍࡐࡀࡉࡊࡉࡍ ࡐࡀࡓࡅࡀࡍࡒࡀ ࡐࡀࡓࡅࡀࡍࡒࡀ ࡖ ࡀࡕࡉࡀ ࡀࡋࡀࡍࡐࡀࡉࡊࡉࡍ ࡊࡅࡋࡇ ࡆࡉࡅࡀ ࡅࡍࡄࡅࡓࡀ ࡌࡍ ࡓࡉࡔ ࡁࡓࡉࡔ ࡗ ࡊࡋࡉࡋࡀ ࡁࡉࡀࡌࡉࡍࡇ ࡅࡋࡕࡓࡉࡍ ࡃࡓࡀࡉࡉࡀ ࡏࡅࡑࡈࡋࡀ ࡐࡀࡑ

ࡏࡅࡑࡈࡋࡀࡉࡊࡉࡍ ࡋࡁࡅࡔ ࡅࡕࡓࡅࡑ ࡊࡋࡀࡋࡀࡉࡊࡉࡍ ࡓࡀࡅࡆࡀ ࡏࡎࡓࡅࡉࡀ ࡋࡄࡉࡌࡉࡀࡍࡀࡉࡊࡉࡍ ࡖ ࡄࡀࡓࡂࡀ ࡅࡌࡅࡌࡀ ࡋࡉࡕࡁࡇ ࡏࡋࡀࡅࡉࡀ ࡓࡉࡔࡀࡉࡊࡉࡍ ࡐࡉࡓࡀ ࡍࡉࡄࡅࡉࡀ ࡁࡀࡉࡍࡉࡀ ࡔࡓࡀࡂࡉࡀ ࡖ ࡍࡄࡅࡓࡀ ࡍࡉࡃࡀࡋࡅࡍ ࡔࡓࡀࡂࡀࡉࡊࡉࡍ ࡅࡍࡉࡍࡉࡄࡓࡅࡍ ࡓࡀࡁ ࡌࡀࡊࡎࡉࡀ ࡋࡀࡍࡉࡒࡅࡌ ࡒࡅࡃࡀࡌࡀࡉࡊࡉࡍ ࡅࡃࡀࡉࡀࡍࡉࡀ ࡖ ࡔࡉࡒࡓࡀ ࡋࡀࡍࡉࡔࡀࡉࡋࡅࡍࡊࡉࡍ ࡍࡉࡕࡍࡀࡋࡊࡉࡍ ࡔࡉࡓࡉࡀࡕࡀ ࡌࡍ ࡄࡀࡊࡀ ࡋࡃࡀࡅࡓࡀ ࡕࡀࡒࡍࡀ ࡁࡉࡍࡕࡀ ࡖ ࡁࡀࡉࡍࡀࡋࡊࡉࡍ ࡁࡉࡕ ࡄࡉࡉࡀ ࡋࡃࡀࡓ ࡃࡀࡓࡉࡀ ࡋࡀࡁࡀࡈࡋࡀ ࡌࡍ ࡆࡉࡅࡇ ࡅࡌࡍ ࡍࡄࡅࡓࡇ ࡖ ࡌࡀࡍࡃࡀ ࡖ ࡄࡉࡉࡀ ࡅࡌࡍ ࡓࡅࡀࡄࡅࡍ ࡖ ࡄࡉࡉࡀ ࡍࡉࡔࡓࡉࡀ ࡏࡋࡀࡍ ࡁࡓࡉࡊ ࡒࡀࡋࡀ ࡖ ࡄࡉࡉࡀ ࡅࡌࡔࡀࡁࡀ ࡐࡀࡎࡉࡌࡊࡀ ࡓࡁࡀ ࡖ ࡊࡅࡋࡇ ࡍࡄࡅࡓ ࡅࡌࡔࡀࡁࡉࡍ ࡄࡉࡉࡀ ࡎࡀ ࡀࡁࡀࡕࡀࡓ ࡖ ࡒࡀࡓࡉࡕ ࡔࡊࡉࡍࡉࡀ ࡄࡉࡉࡀ ࡁࡆࡉࡅࡀࡉࡄࡅࡍ ࡅࡍࡄࡅࡓࡀࡉࡄࡅࡍ ࡖ ࡍࡀࡐࡔࡀࡉࡄࡅࡍ ࡅࡕࡓࡅࡑ ࡏࡕࡓࡉࡑࡕࡅࡍ ࡅࡏࡕࡒࡀࡉࡀࡌࡕࡅࡍ ࡅࡌࡊࡀࡋࡀࡋࡍࡀ ࡅࡔࡀࡊࡉࡁࡍࡀ ࡅࡌࡉࡍࡇ ࡅࡌࡍ ࡔࡀࡓࡅࡉࡀ ࡅࡁࡉࡍࡉࡀ ࡊࡉࡎࡉࡀ ࡋࡆࡉࡅࡀ ࡅࡍࡉࡀࡄࡀ ࡅࡔࡀࡋࡌࡀ ࡅࡏࡓࡅࡕࡀࡉ ࡅࡕࡅࡔࡁࡉࡄࡕࡀࡉ ࡅࡏࡆࡀࡋ ࡁࡔࡋࡀࡌ ࡁࡄࡉࡓࡀ ࡃࡀࡊࡉࡀ ࡅࡈࡅࡁࡀࡊ ࡈࡅࡁࡀࡊ ࡍࡉࡔࡌࡀ ࡅࡃࡓࡀࡔࡉࡀ ࡄࡅࡓࡉࡍࡉࡀ ࡊࡌࡀ ࡖ ࡌࡑࡀࡉࡕ ࡅࡄࡀࡉࡆࡀࡊ ࡒࡓࡉࡀ ࡁࡓࡉࡊࡉࡀ ࡅࡌࡔࡀࡁࡉࡀ ࡄࡉࡉࡀ ࡖ ࡔࡅࡌ ࡁࡓ ࡍࡅ ࡋࡍࡉࡔࡌࡀࡕࡀ ࡖ ࡒࡀࡓࡉࡕ ࡗ ࡖ ࡊࡕࡉࡁ ࡒࡓࡉࡀ ࡏࡅ ࡍࡉࡔࡉࡌࡕࡀ ࡄࡀࡃ ࡄࡏ ࡀࡌࡅࡓ ࡋࡍࡉࡔࡉࡌࡕࡀ ࡖ ࡐࡋࡀࡍ ࡅࡁࡀࡋࡀࡊ ࡁࡆࡀࡄࡓࡀࡉࡉࡕ ࡅࡑࡉࡋࡀࡉࡉࡕ ࡅࡌࡀࡋࡐࡀࡍࡀࡉࡉࡕ ࡅࡒࡓࡉࡀ ࡈࡀࡁ ࡈࡀࡁࡀ ࡋࡈࡀࡁࡇ ࡅࡐࡔࡅࡈ ࡊࡅࡔࡈࡀ ࡌࡍ ࡄࡃࡀࡃࡉࡀ ࡅࡒࡓࡉࡀ ࡁࡆࡉࡅ ࡖ ࡍࡐࡉࡔ ࡑࡁࡉࡍࡀ ࡅࡁࡅࡍ ࡁࡅࡕࡀ ࡋࡍࡀࡐࡔࡀࡉࡊࡅࡍ ࡅࡔࡀࡅࡅࡍ ࡐࡉࡄࡕࡀ ࡅࡌࡀࡌࡁࡅࡄࡀ ࡋࡍࡀࡐࡔࡀࡉࡊࡅࡍ ࡅࡀࡊࡅࡋ ࡐࡉࡄࡕࡀࡉࡊࡅࡍ ࡅࡔࡕࡅࡍ ࡌࡀࡌࡁࡅࡄࡀࡉࡊࡅࡍ ࡅࡒࡀࡉࡉࡌ ࡁࡈࡀࡁ ࡈࡀࡁࡀ ࡋࡈࡀࡁࡇ ࡅࡐࡔࡅࡈ ࡊࡅࡔࡈࡀ ࡌࡍ ࡄࡃࡀࡃࡉࡀ ࡏࡋ ࡍࡀࡐࡔࡀࡉࡊࡅࡍ ࡅࡀࡅࡒࡉࡓ ࡕࡀࡂࡀࡉࡊࡅࡍ ࡅࡄࡉࡉࡀ ࡆࡀࡊࡉࡍ ࡎࡀ

71. ࡁࡔࡅࡌࡀ ࡖ ࡄࡉࡉࡀ ࡁࡓࡉࡊࡉࡀ ࡅࡌࡔࡀࡁࡉࡀ ࡄࡉࡉࡀ ࡁࡓࡉࡊ ࡅࡌࡔࡀࡁࡀ ࡔࡅࡌࡀࡉࡄࡅࡍ ࡖ ࡄࡉࡉࡀ ࡁࡀࡕࡀࡓ ࡍࡄࡅࡓ ࡌࡔࡀࡁࡉࡕ ࡌࡀࡓࡀࡉ ࡌࡀࡍࡃࡀ ࡖ ࡄࡉࡉࡀ ࡖ ࡀࡍࡀࡕ ࡄࡀࡉࡋࡀࡊ ࡅࡆࡉࡅࡀࡊ ࡅࡍࡄࡅࡓࡀࡊ ࡅࡏࡒࡀࡓࡀࡊ ࡅࡃࡉࡀࡓࡅࡕࡀࡊ ࡌࡔࡀࡁࡉࡕ ࡀࡁ ࡉࡅࡔࡀࡌࡉࡍ ࡃࡀࡊࡉࡀ ࡁࡓ ࡍࡉࡑࡉࡁࡕࡅࡍ ࡖ ࡄࡉࡉࡀ ࡓࡅࡓࡁࡉࡀ ࡌࡔࡀࡁࡉࡕࡅࡍ ࡄࡉࡉࡀ ࡕࡉࡍࡉࡀࡍࡉࡀ ࡖ ࡄࡉࡉࡀ ࡌࡍ ࡄࡉࡉࡀ ࡄࡅࡍ ࡌࡔࡀࡁࡉࡕࡅࡍ ࡔࡉࡋࡌࡀࡉ ࡅࡍࡉࡃࡁࡀࡉ ࡏࡅࡕࡓࡉࡀ ࡍࡀࡈࡓࡉࡀ ࡖ ࡉࡀࡓࡃࡍࡀ ࡌࡔࡀࡁࡉࡕࡅࡍ ࡍࡑࡀࡁ ࡅࡀࡍࡀࡍ ࡍࡑࡀࡁ ࡌࡔࡀࡁࡉࡕࡅࡍ ࡀࡁࡅࡍ ࡄࡉࡁࡉࡋ ࡅࡔࡉࡕࡉࡋ ࡅࡀࡍࡅࡔ ࡔࡅࡌࡀ ࡅࡓࡉࡔࡀ ࡖ ࡊࡅࡋࡇ ࡔࡅࡓࡁࡕࡀ ࡌࡔࡀࡁࡉࡕ ࡀࡁࡀࡕࡅࡓ ࡓࡀࡌࡀ ࡁࡓࡉࡊࡀ ࡅࡌࡒࡀࡉࡌࡀ ࡔࡊࡉࡍࡕࡀ ࡓࡀࡁࡕࡉࡀ ࡖ ࡉࡀࡕࡁࡀࡕࡁࡇ ࡌࡔࡀࡁࡉࡕࡅࡍ ࡀࡓࡁࡀ ࡂࡅࡁࡓࡉࡀ ࡁࡍࡉࡀ ࡔࡋࡀࡌࡀ ࡖ ࡀࡋࡀࡍࡐࡀࡉࡄࡅࡍ ࡖ ࡈࡀࡁࡉࡀ ࡍࡀࡐࡒࡉࡀ ࡀࡋࡀࡍࡐࡀࡉࡄࡅࡍ ࡍࡀࡐࡒࡉࡀ ࡈࡀࡁࡉࡀ ࡅࡌࡀࡋࡁࡉࡔࡉࡋࡅࡍ ࡋࡈࡀࡁࡉࡀ ࡏࡅࡑࡈࡋࡉࡀ ࡌࡔࡀࡁࡉࡕ ࡀࡓࡒࡀ ࡖ ࡍࡄࡅࡓࡀ ࡁࡓࡉࡊࡉࡀ ࡅࡌࡔࡀࡁࡉࡀ ࡃࡀࡉࡀࡓࡉࡀ ࡖ ࡁࡉࡊ ࡌࡔࡀࡁࡉࡕ ࡏࡅࡄࡓࡀ ࡖ ࡓࡁࡉࡀ ࡅࡃࡉࡓࡊࡀ ࡖ ࡔࡀࡋࡌࡀࡍࡉࡀ ࡅࡔࡁࡉࡋࡀ ࡖ ࡎࡀࡋࡉࡒ ࡋࡀࡕࡀࡓ ࡍࡄࡅࡓ ࡌࡔࡀࡁࡉࡕ ࡍࡀࡑࡉࡓࡅࡕࡀ ࡖ ࡌࡉࡍࡉࡊ ࡁࡄࡉࡓࡉࡀ ࡎࡀࡁࡓࡉࡀ ࡌࡉࡍࡉࡊ ࡎࡀࡁࡓࡉࡀ ࡁࡄࡉࡓࡉࡀ ࡁࡀࡂࡓࡀ ࡅࡆࡃࡒࡀ ࡌࡉࡕࡀࡍࡂࡓࡉࡀ ࡌࡉࡕࡀࡍࡂࡓࡉࡀ ࡁࡀࡂࡓࡀ ࡅࡆࡉࡃࡒࡀ ࡅࡎࡀࡋࡒࡉࡀ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡌࡔࡀࡁࡉࡕ ࡉࡀࡓࡃࡍࡀ ࡖ ࡌࡉࡀ ࡄࡉࡉࡀ ࡖ ࡌࡉࡍࡀࡊ ࡆࡀࡊࡅࡕࡀ ࡍࡎࡀࡁࡍࡉࡍ ࡌࡉࡍࡀࡊ ࡍࡎࡀࡁࡍࡉࡍ ࡆࡀࡊࡅࡕࡀ ࡅࡒࡀࡁࡉࡋࡍࡉࡍ ࡃࡀࡊࡉࡀ ࡓࡅࡔࡅࡌࡀ ࡀࡁࡀࡄࡀࡕࡀࡉ ࡄࡆࡅࡍ ࡋࡄࡉࡉࡀ ࡅࡌࡀࡎࡁࡉࡓࡀࡍࡀࡉ ࡋࡀࡕࡀࡓ ࡍࡄࡅࡓ ࡏࡅࡕࡓࡉࡀ ࡖ ࡍࡄࡅࡓࡀ ࡆࡀࡊࡉࡍ ࡅࡆࡀࡊࡉࡀ ࡀࡁࡀࡕࡅࡓ ࡅࡁࡍࡉࡀ ࡔࡋࡀࡌࡀ ࡖ ࡒࡀࡉࡌࡉࡀ ࡋࡄࡉࡉࡀ ࡅࡌࡔࡀࡁࡉࡀ ࡍࡉࡄࡅࡉࡋࡅࡍ ࡓࡅࡀࡄࡀ ࡖ ࡄࡉࡉࡀ ࡋࡎࡀࡁࡓࡉࡀ ࡖ ࡌࡍ ࡁࡉࡍࡀࡍ ࡐࡓࡀࡔ ࡎࡀࡁࡓࡉࡀ ࡀࡍࡉࡉࡀ ࡅࡃࡀࡍࡉࡀ ࡅࡕࡀࡓࡌࡉࡃࡉࡀ ࡄࡅ ࡌࡀࡓࡀࡉ ࡌࡀࡍࡃࡀ ࡖ ࡄࡉࡉࡀ

ࡍࡉࡄࡅࡉࡋࡅࡍ ࡁࡀࡄࡉࡃ ࡏࡃࡀ ࡕࡉࡕࡒࡀࡁࡀࡋ ࡈࡀࡁࡅࡕ ࡄࡉࡉࡀ ࡅࡈࡀࡁࡅࡕࡀ ࡖ ࡄࡉࡉࡀ ࡅࡌࡀࡍࡃࡀ ࡖ ࡄࡉࡉࡀ ࡐࡉࡄࡋࡀ ࡖ ࡋࡔࡅࡌ ࡄࡉࡉࡀ ࡐࡋࡀ ࡊࡅࡋ ࡌࡀࡍ ࡖ ࡆࡉࡃࡒࡀ ࡉࡀࡄࡉࡁ ࡆࡉࡃࡒࡀ ࡍࡉࡄࡅࡉࡋࡇ ࡁࡀࡄࡉࡃ ࡏࡃࡀ ࡁࡄࡉࡓࡉࡀ ࡅࡔࡀࡋࡌࡀࡍࡉࡀ ࡖ ࡉࡀࡄࡁࡉࡀ ࡆࡉࡃࡒࡀ ࡁࡃࡉࡓࡊࡉࡀ ࡖ ࡊࡅࡔࡈࡀ ࡍࡉࡎࡒࡅࡍ ࡏࡄࡀࡁࡋࡅࡍ ࡌࡍ ࡊࡋࡉࡋ ࡀࡉࡀࡓ ࡊࡋࡉࡋࡀ ࡊࡋࡉࡋ ࡏࡌࡓࡀ ࡅࡔࡉࡌࡀ ࡅࡄࡀࡃࡅࡕࡀ ࡅࡆࡀࡊࡅࡕࡀ ࡅࡈࡀࡁࡅࡕࡀ ࡅࡓࡀࡁࡅࡕࡀ ࡊࡋࡉࡋࡀ ࡌࡍ ࡓࡅࡀࡆ ࡂࡅࡐࡍࡀ ࡍࡉࡕࡓࡀࡑࡋࡉࡍ ࡁࡓࡉࡔࡀࡉࡉࡍ ࡋࡄࡀࡋࡉࡍ ࡍࡉࡔࡌࡀࡕࡀ ࡖ ࡏࡕࡉࡒࡓࡉࡀ ࡅࡏࡕࡒࡀࡉࡀࡌ ࡅࡏࡕࡉࡓࡔࡉࡌ ࡁࡄࡀࡆࡀ ࡌࡀࡎࡉࡒࡕࡀ ࡅࡃࡀࡁࡀࡄࡀࡕࡀࡍ ࡅࡓࡅࡁࡀࡍࡀࡍ ࡅࡃࡀࡄࡀࡍ ࡅࡃࡀࡄࡅࡀࡕࡀࡍ ࡖ ࡍࡐࡀࡒ ࡌࡍ ࡐࡀࡂࡓࡀࡉࡄࡅࡍ ࡅࡋࡃࡒࡀࡉࡌࡉࡀ ࡁࡐࡀࡂࡓࡀࡉࡄࡅࡍ ࡌࡍ ࡖ ࡓࡁࡉࡀ ࡁࡓࡉࡔࡀࡉࡄࡅࡍ ࡕࡀࡓࡑࡉࡀ ࡌࡍ ࡖ ࡓࡁࡉࡀ ࡏࡄࡀࡁࡋࡅࡍ ࡋࡏࡅࡕࡓࡉࡀ ࡅࡏࡅࡕࡓࡉࡀ ࡋࡕࡀࡓࡌࡉࡃࡀࡉࡄࡅࡍ ࡏࡄࡀࡁ ࡀࡎࡉࡀ ࡖ ࡎࡀࡌࡇ ࡌࡉࡀ ࡀࡕࡀ ࡋࡓࡀࡄࡌࡀࡊ ࡄࡅࡉࡋࡅࡍ ࡀࡎࡉࡀ ࡀࡎࡉࡀ ࡋࡓࡀࡄࡌࡀࡊ ࡄࡅࡉࡋࡅࡍ ࡅࡃࡉࡀࡄࡁࡇ ࡋࡆࡉࡃࡒࡀ ࡄࡀࡅࡉࡋࡇ ࡁࡀࡄࡉࡃ ࡏࡃࡀ ࡖ ࡀࡎࡀࡕࡇ ࡌࡀࡓࡀࡉ ࡔࡓࡀࡓࡀ

ࡏࡄࡀࡁࡋࡇ ࡖ ࡒࡀࡉࡉࡌ ࡒࡅࡃࡀࡌࡀࡊ ࡄࡅࡆࡉࡇ ࡅࡋࡀࡕࡀࡂࡆࡀࡓ ࡏࡋࡇ ࡌࡀࡓࡀࡉ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡂࡀࡋࡀࡉࡀ ࡖ ࡀࡉࡍࡇ ࡂࡀࡋࡉࡀࡍ ࡁࡀࡉࡉࡀ ࡃࡉࡍࡀ ࡅࡀࡁࡉࡃ ࡃࡉࡍࡀ ࡋࡓࡀࡄࡌࡇ ࡀࡁࡀࡃࡋࡀࡍ ࡃࡉࡍࡀ ࡌࡍ ࡓࡀࡃࡐࡀࡍ ࡅࡌࡍ ࡓࡀࡃࡐࡉࡀ ࡖ ࡓࡀࡃࡐࡉࡋࡀࡍ ࡅࡌࡍ ࡁࡉࡔࡉࡀ ࡌࡔࡀࡓࡂࡉࡆࡀࡍࡉࡀ ࡖ ࡋࡁࡉࡔ ࡌࡉࡕࡄࡀࡔࡁࡉࡀ ࡏࡋࡀࡍ ࡏࡅ ࡄࡉࡍࡉࡀࡋࡀࡊ ࡌࡀࡓࡀࡉ ࡌࡀࡋࡊࡀ ࡓࡀࡌࡀ ࡖ ࡍࡄࡅࡓࡀ ࡄࡆࡉࡍࡀࡍ ࡅࡋࡀࡕࡀࡂࡆࡀࡓ ࡏࡋࡀࡍ ࡄࡆࡉࡍࡀࡍ ࡋࡄࡀࡋࡉࡍ ࡍࡉࡔࡌࡀࡕࡀ ࡖ ࡏࡕࡄࡀࡉࡌࡀࡍࡁࡀࡊ ࡖ ࡋࡔࡅࡌࡀࡊ ࡃࡉࡋࡀࡊ ࡁࡕࡉࡁࡉࡋ ࡒࡀࡉࡌࡀ ࡅࡌࡉࡕࡓࡀࡃࡐࡀ ࡄࡀࡅࡉࡍࡀࡍ ࡀࡉࡀࡓ ࡃࡀࡊࡉࡀ ࡖ ࡓࡉࡃࡐࡀ ࡖ ࡕࡉࡕࡉࡋ ࡍࡉࡍࡉࡔࡉࡇ ࡍࡉࡍࡉࡔࡉࡇ ࡋࡓࡉࡃࡐࡀ ࡖ ࡕࡉࡁࡉࡋ ࡅࡀࡉࡈࡀ ࡖ ࡁࡉࡔࡉࡀ ࡅࡊࡀࡃࡀࡁࡉࡀ ࡂࡁࡀࡓ ࡏࡋࡀࡍ ࡁࡉࡍࡕࡀࡍ ࡅࡒࡀࡋࡀࡍ ࡅࡏࡓࡅࡕࡀࡍ ࡅࡕࡅࡔࡁࡉࡄࡕࡀࡍ ࡁࡂࡀࡅࡇ ࡋࡀࡐࡅࡊ ࡅࡕࡉࡓࡑࡅࡊ ࡄࡉࡉࡀ ࡓࡁࡉࡀ ࡌࡍ ࡓࡉࡔ ࡁࡓࡉࡔ ࡌࡍ ࡆࡉࡅࡇ ࡅࡌࡍ ࡍࡄࡅࡓࡇ ࡖ ࡌࡀࡓࡀࡉ ࡌࡀࡍࡃࡀ ࡖ ࡄࡉࡉࡀ ࡅࡌࡍ ࡓࡅࡀࡄࡅࡍ ࡖ ࡄࡉࡉࡀ ࡍࡉࡔࡓࡉࡀ ࡏࡋࡀࡍ ࡁࡄࡉࡓࡀࡉ ࡏࡕࡉࡌࡓࡅࡍ ࡁࡓࡉࡊ ࡒࡀࡋࡀ ࡖ ࡄࡉࡉࡀ ࡅࡌࡔࡀࡁࡀ ࡐࡀࡎࡉࡌࡊࡀ ࡓࡁࡀ ࡖ ࡊࡅࡋࡇ ࡍࡄࡅࡓ ࡅࡌࡔࡀࡁࡉࡍ ࡄࡉࡉࡀ ࡎࡀ ࡄࡀࡊࡀ ࡁࡓࡉࡊࡉࡀ ࡅࡌࡔࡀࡁࡉࡀ ࡄࡉࡉࡀ ࡖ ࡔࡅࡌ ࡁࡓ ࡍࡅ ࡅࡒࡓࡉࡀ ࡀࡁࡀࡕࡀࡓ ࡄࡀࡊࡀ ࡒࡓࡉࡀ ࡁࡓࡉࡊࡉࡀ ࡅࡌࡔࡀࡁࡉࡀ ࡄࡉࡉࡀ ࡖ ࡍࡉࡔࡌࡀࡕࡀ ࡅࡄࡀࡉࡆࡀࡊ ࡒࡓࡉࡀ ࡈࡀࡁ ࡈࡀࡁࡀ ࡋࡈࡀࡁࡇ ࡎࡀ

72. ࡈࡀࡁ ࡈࡀࡁࡀ ࡋࡈࡀࡁࡇ ࡅࡕࡓࡉࡑ ࡊࡉࡍࡉࡀࡍࡀ ࡏࡋ ࡓࡀࡄࡌࡉࡀ ࡔࡅࡌࡇ ࡍࡉࡁࡉࡀ ࡅࡍࡀࡔࡊࡀ ࡅࡍࡉࡌࡀࡓ ࡅࡍࡉࡔࡕࡌࡀ ࡁࡉࡍ ࡅࡀࡔࡊࡉࡍࡉࡍ ࡅࡀࡌࡀࡓࡍࡉࡍ ࡅࡏࡔࡕࡀࡌࡉࡍࡉࡍ ࡌࡍ ࡒࡅࡃࡀࡌࡀࡊ ࡃࡉࡋࡀࡊ ࡌࡀࡓࡀࡉ ࡌࡀࡍࡃࡀ ࡖ ࡄࡉࡉࡀ ࡌࡀࡓࡀࡉࡄࡅࡍ ࡖ ࡀࡎࡀࡅࡀࡕࡀ ࡔࡁࡅࡒࡋࡇ ࡄࡀࡈࡀࡉࡉࡇ ࡅࡄࡀࡅࡁࡇ ࡅࡎࡊࡉࡋࡀࡕࡇ ࡅࡕࡉࡒࡋࡀࡕࡇ ࡅࡔࡀࡁࡀࡔࡀࡕࡇ ࡅࡋࡌࡀࡍ ࡖ ࡄࡀࡆࡉࡍ ࡋࡄࡀࡌࡀ ࡅࡌࡀࡎࡉࡒࡕࡀ ࡅࡈࡀࡁࡅࡕࡀ ࡀࡁࡀࡃ ࡄࡀࡈࡀࡉࡉࡇ ࡅࡄࡀࡅࡁࡇ ࡅࡎࡊࡉࡋࡀࡕࡇ ࡅࡕࡉࡒࡋࡀࡕࡇ ࡅࡔࡀࡁࡀࡔࡀࡕࡇ ࡍࡉࡔࡁࡅࡒࡋࡇ ࡌࡀࡓࡀࡉ ࡌࡀࡍࡃࡀ ࡖ ࡄࡉࡉࡀ ࡅࡄࡉࡉࡀ ࡓࡁࡉࡀ ࡒࡀࡃࡌࡀࡉࡉࡀ ࡋࡌࡀࡓࡇ ࡖ ࡀࡂࡓࡀ ࡅࡆࡉࡃࡒࡀ ࡋࡃࡉࡋࡉࡅࡍ ࡅࡋࡆࡀࡅࡀࡉࡅࡍ ࡅࡋࡔࡉࡕࡋࡀࡉࡅࡍ ࡅࡋࡕࡀࡓࡌࡉࡃࡀࡉࡄࡅࡍ ࡅࡋࡌࡀࡍ ࡖ ࡄࡀࡆࡉࡍ ࡋࡄࡀࡌࡀ ࡅࡈࡀࡁࡅࡕࡀ ࡓࡌࡅࡍ ࡋࡃࡉࡋࡊࡅࡍ ࡀࡁࡀࡄࡀࡕࡀࡉ ࡅࡓࡅࡁࡀࡍࡀࡉ ࡅࡌࡀࡋࡐࡀࡍࡀࡉ ࡅࡌࡀࡎࡁࡉࡓࡀࡍࡀࡉ ࡗ ࡎࡌࡉࡊࡉࡕࡅࡍ ࡌࡍ ࡎࡌࡀࡋ ࡋࡉࡀࡌࡉࡍ ࡔࡀࡁࡉࡒ ࡄࡀࡈࡀࡉࡉࡀ ࡍࡉࡄࡅࡉࡋࡊࡅࡍ ࡅࡕࡉࡌࡓࡅࡍ ࡅࡒࡀࡉࡀࡌࡉࡍ ࡄࡉࡉࡀ ࡁࡔࡊࡉࡍࡀࡕࡅࡍ ࡅࡌࡔࡀࡁࡉࡍ ࡄࡉࡉࡀ ࡅࡄࡉࡉࡀ ࡆࡀࡊࡉࡍ ࡏࡋ ࡊࡅࡋࡄࡅࡍ ࡏࡅࡁࡀࡃࡉࡀ ࡎ ࡀ ࡄࡀࡆࡉࡍ ࡈࡀࡁ ࡈࡀࡁࡀ ࡋࡈࡀࡁࡇ ࡗ ࡒࡀࡓࡉࡕ ࡌࡀࡎࡉࡒࡕࡀ ࡒࡀࡉࡌࡀ ࡗ ࡑࡀࡁࡉࡕ ࡌࡀࡑࡁࡅࡕࡀ ࡒࡀࡉࡌࡀ ࡅࡗ ࡌࡀࡍࡉࡕ ࡌࡉࡔࡀ ࡒࡀࡉࡌࡀ ࡅࡗ ࡁࡀࡉࡉࡕ ࡓࡀࡄࡌࡉࡀ ࡒࡀࡉࡌࡀ ࡀࡁࡀࡕࡀࡓ ࡓࡀࡄࡌࡀࡊ ࡅࡀࡁࡀࡕࡀࡓ ࡐࡉࡄࡕࡀࡊ ࡅࡌࡀࡌࡁࡅࡄࡀࡊ ࡅࡗ ࡌࡉࡈࡀࡉࡁࡉࡕ ࡐࡀࡕࡅࡓࡀ ࡒࡀࡉࡌࡀ ࡅࡄࡉࡉࡀ ࡆࡀࡊࡉࡍ ࡏࡋ ࡊࡅࡋࡄࡅࡍ ࡏࡅࡁࡀࡃࡉࡀ ࡎࡀ

73. ࡁࡔࡅࡌࡀ ࡖ ࡄࡉࡉࡀ ࡏࡍࡂࡉࡓࡕࡀ ࡌࡄࡀࡕࡀࡌࡕࡀ ࡖ ࡍࡀࡐࡒࡀ ࡌࡉࡍࡇ ࡅࡌࡍ ࡀࡋࡌࡀ ࡏࡍࡂࡉࡓࡕࡀ ࡁࡊࡅࡔࡈࡀ ࡊࡃࡉࡁࡀ ࡅࡄࡕࡉࡌࡀ ࡁࡏࡎࡉࡒࡀࡕ ࡓࡅࡓࡁࡉࡀ ࡊࡉࡃࡁࡅ ࡔࡀࡋࡌࡀࡍࡉࡀ ࡅࡆࡀࡓࡆࡅࡉࡀ ࡂࡅࡁࡓࡉࡀ ࡌࡄࡀࡉࡌࡍࡉࡀ ࡕࡉࡋࡉࡅ ࡁࡑࡀࡅࡀࡓ ࡍࡉࡔࡌࡀ ࡅࡋࡁࡀࡁࡀ ࡖ ࡄࡉࡉࡀ ࡔࡀࡃࡓࡅࡉࡀ ࡍࡉࡔࡌࡀ ࡁࡄࡀࡊࡉࡌࡅࡕࡇ ࡈࡅࡐࡓࡇ ࡋࡏࡍࡂࡉࡓࡕࡀ ࡀࡋࡀࡑ ࡈࡅࡐࡓࡇ ࡀࡋࡀࡑ ࡋࡏࡍࡂࡉࡓࡕࡀ ࡀࡕࡍࡀ ࡁࡆࡉࡅࡇ ࡊࡀࡎࡉࡀ ࡅࡀࡅࡈࡉࡐ ࡁࡀࡍࡄࡅࡓࡇ ࡊࡀࡋࡀࡋࡀ ࡌࡍࡀ ࡄࡆࡀࡕࡇ ࡃࡀࡉࡅࡌ ࡋࡍࡉࡔࡌࡀ ࡖ ࡏࡍࡂࡉࡓࡕࡀ ࡃࡓࡉࡀ ࡌࡍࡀ ࡄࡆࡀࡕࡇ ࡃࡀࡉࡅࡌ ࡗ ࡊࡍࡀࡐࡉࡋࡇ ࡔࡅࡁࡀ ࡁࡍࡀ ࡅࡀࡌࡓࡀ ࡌࡍ ࡊࡉࡃࡁࡀ ࡋࡏࡍࡂࡉࡓࡕࡀ ࡖ ࡏࡍࡉࡔ ࡁࡓࡀࡆࡀ ࡋࡀࡏࡃࡀ ࡌࡀࡍ ࡊࡉࡃࡁࡀ ࡋࡏࡍࡂࡉࡓࡕࡀ ࡖ ࡁࡄࡀࡋࡉࡍ ࡌࡉࡑࡓࡉࡀ ࡌࡄࡀࡕࡌࡀ ࡅࡏࡍࡂࡉࡓࡕࡀ ࡁࡊࡅࡔࡈࡀ ࡊࡃࡉࡁࡀ ࡅࡄࡕࡉࡌࡀ ࡁࡏࡎࡒࡀࡕ ࡓࡅࡓࡁࡉࡀ ࡊࡉࡃࡁࡅ ࡔࡀࡋࡌࡀࡍࡉࡀ ࡅࡆࡀࡓࡆࡅ ࡂࡅࡁࡓࡉࡀ ࡌࡄࡀࡉࡌࡍࡉࡀ ࡕࡉࡋࡉࡅ ࡁࡑࡀࡅࡀࡓ ࡍࡉࡔࡌࡀ ࡅࡋࡁࡀࡁࡀ ࡖ ࡄࡉࡉࡀ ࡔࡀࡃࡓࡅࡉࡀ ࡐࡀࡄࡓࡀ ࡅࡀࡆࡉࡋ ࡍࡉࡔࡌࡀ ࡀࡋࡌࡀ ࡋࡌࡀࡈࡓࡀ ࡖ ࡔࡅࡁࡀ ࡌࡈࡀ ࡓࡀࡁ ࡌࡀࡊࡎࡉࡀ ࡖ ࡄࡉࡆࡉࡅࡉࡀ ࡔࡀࡄࡀࡓࡃࡀࡋ ࡖ ࡄࡉࡆࡉࡅࡉࡀ ࡌࡃࡀࡍࡃࡌࡉࡀ ࡅࡀࡌࡓࡉࡀ ࡌࡀࡍ ࡊࡉࡃࡁࡀ ࡋࡏࡍࡂࡉࡓࡕࡀ ࡖ ࡏࡍࡉࡔ ࡁࡓࡀࡆࡀ ࡋࡀࡏࡃࡀ ࡌࡀࡍ ࡊࡉࡃࡁࡀ ࡋࡏࡍࡂࡉࡓࡕࡀ ࡖ ࡁࡄࡀࡋࡉࡍ ࡌࡉࡑࡓࡉࡀ ࡌࡄࡀࡕࡌࡀ ࡏࡍࡂࡉࡓࡕࡀ ࡁࡊࡅࡔࡈࡀ ࡊࡃࡉࡁࡀ ࡅࡄࡕࡉࡌࡀ ࡁࡏࡎࡒࡀࡕ ࡓࡅࡓࡁࡉࡀ ࡊࡉࡃࡁࡅ ࡔࡀࡋࡌࡀࡍࡉࡀ ࡅࡆࡀࡓࡆࡅ ࡂࡅࡁࡓࡉࡀ ࡌࡄࡀࡉࡌࡍࡉࡀ ࡕࡉࡋࡉࡅ ࡁࡑࡀࡅࡀࡓ ࡍࡉࡔࡌࡀ ࡅࡋࡁࡀࡁࡀ ࡖ ࡄࡉࡉࡀ ࡔࡀࡃࡓࡅࡉࡀ ࡐࡀࡄࡓࡀ ࡅࡀࡆࡉࡋ ࡍࡉࡔࡌࡀ ࡀࡋࡌࡀ ࡋࡌࡀࡈࡀࡓࡀࡉࡉࡀ ࡌࡈࡀ ࡌࡀࡈࡀࡓࡀࡉࡉࡀ ࡊࡁࡉࡔ ࡓࡉࡔࡀࡉࡄࡅࡍ ࡅࡍࡉࡔࡌࡀ ࡋࡌࡀࡈࡀࡓࡀࡉࡉࡀ ࡀࡃࡀ ࡐࡀࡄࡓࡀ ࡅࡀࡆࡉࡋ ࡍࡉࡔࡌࡀ ࡀࡋࡌࡀ ࡋࡄࡀࡐࡉࡒࡉࡀ ࡌࡉࡀ ࡌࡈࡀ ࡌࡀࡈࡅࡉࡉࡇ ࡄࡀࡐࡉࡒࡉࡀ ࡌࡉࡀ ࡄࡅ ࡑࡅࡓࡉࡊ ࡆࡉࡅࡀ ࡓࡁࡀ ࡖ ࡄࡉࡉࡀ ࡀࡋࡀࡍࡐࡇ ࡍࡐࡀࡒ ࡋࡉࡂࡈࡇ ࡁࡀࡐࡓࡀࡎ ࡉࡀࡌࡉࡍࡇ ࡅࡄࡀࡐࡉࡒࡉࡀ ࡌࡉࡀ ࡀࡁࡓࡇ ࡐࡀࡄࡓࡀ ࡅࡀࡆࡉࡋ ࡍࡉࡔࡌࡀ ࡀࡋࡌࡀ ࡋࡁࡉࡕ ࡄࡉࡉࡀ ࡌࡈࡀ ࡌࡀࡈࡅࡉࡉࡇ ࡁࡉࡕ ࡄࡉࡉࡀ ࡒࡀࡋࡀ ࡋࡁࡉࡕ ࡄࡉࡉࡀ ࡓࡌࡀ ࡄࡉࡉࡀ ࡖ ࡔࡉࡌࡅࡉࡀ ࡋࡒࡀࡋࡇ ࡔࡀࡃࡀࡓ ࡀࡋࡀࡍࡐࡇ ࡐࡀࡓࡅࡀࡍࡒࡀ ࡋࡉࡂࡈࡇ ࡁࡀࡐࡓࡀࡎ ࡉࡀࡌࡉࡍࡇ ࡅࡀࡃࡁࡀࡓ ࡁࡀࡃࡌࡅ ࡄࡉࡉࡀ ࡀࡎࡌࡊࡅࡉࡀ ࡃࡅࡊࡕࡀ ࡖ ࡆࡉࡅࡉࡀ ࡅࡍࡄࡅࡓࡉࡀ ࡅࡐࡀࡎࡉࡌࡊࡉࡀ ࡋࡀࡐࡅࡉࡀ ࡁࡉࡍࡉࡀ ࡏࡅࡕࡓࡉࡀ ࡅࡒࡀࡉࡌࡅࡉࡀ ࡁࡉࡍࡉࡀ ࡐࡀࡎࡉࡌࡊࡉࡀ ࡊࡋࡉࡋ ࡀࡉࡀࡓ ࡕࡓࡀࡑࡋࡇ ࡁࡓࡉࡔࡉࡇ ࡅࡓࡀࡁࡅࡕ ࡀࡐࡒࡅࡉࡀ ࡌࡍ ࡀࡋࡌࡀ ࡄࡉࡉࡀ ࡎࡌࡀࡊ ࡋࡄࡉࡉࡀ ࡅࡄࡉࡉࡀ ࡃࡉࡋࡅࡍ ࡔࡊࡀ ࡄࡉࡉࡀ ࡔࡊࡀ ࡃࡉࡋࡅࡍ ࡅࡀࡔࡊࡀࡕ ࡍࡉࡔࡌࡀࡕ ࡖ ࡌࡎࡀࡊࡉࡀ ࡅࡄࡉࡉࡀ ࡆࡀࡊࡉࡍ ࡎ ࡀ ࡀࡋࡌࡀ ࡋࡄࡀࡊࡀ ࡒࡓࡉࡀ ࡋࡔࡉࡔࡀ ࡖ ࡌࡉࡔࡀ ࡗ ࡌࡀࡕࡍࡀ ࡁࡈࡉࡍࡀ ࡀࡋࡌࡀ ࡋࡐࡅࡌࡀ ࡖ ࡔࡉࡔࡀ ࡅࡈࡉࡍࡀ ࡃࡀࡊࡉࡀ ࡍࡉࡄࡅࡉࡀ ࡌࡍ ࡉࡀࡓࡃࡍࡀ ࡎࡀ

  74. ࡏࡎࡉࡓࡀ ࡅࡄࡕࡉࡌࡀ ࡓࡅࡄࡇ ࡅࡍࡉࡔࡉࡌࡕࡇ ࡖ ࡐࡋࡀࡍ ࡁࡄࡀࡕࡌࡀ ࡖ ࡊࡅࡔࡈࡀ ࡅࡍࡀࡈࡓࡀ ࡓࡁࡀ ࡖ ࡔࡓࡀࡓࡀ ࡁࡌࡉࡌࡀࡓ ࡊࡅࡔࡈࡀ ࡅࡒࡀࡉࡅࡌࡉࡀ ࡉࡅࡊࡀࡁࡀࡓ ࡆࡉࡅࡀ ࡅࡄࡉࡉࡀ ࡆࡀࡊࡉࡍ ࡎ ࡀ ࡄࡀࡆࡉࡍ ࡃࡉࡍࡁࡀ ࡖ ࡏࡍࡂࡉࡓࡕࡀ ࡄࡅ ࡀࡕࡍࡀ ࡏࡎࡉࡒࡕࡀࡊ ࡅࡈࡅࡐࡓࡀࡊ ࡅࡄࡉࡑࡓࡀࡊ ࡖ ࡉࡀࡌࡉࡍࡀࡊ ࡁࡈࡉࡍࡀ ࡅࡄࡕࡅࡌ ࡅࡒࡓࡉࡀ ࡄࡀࡆࡉࡍ ࡃࡉࡍࡁࡀ ࡏࡋࡇ ࡅࡄࡉࡉࡀ ࡆࡀࡊࡉࡍ ࡎ ࡀ ࡗ ࡁࡀࡉࡉࡕ ࡌࡉࡌࡍࡉࡀ ࡌࡉࡔࡀ ࡁࡓࡉࡔࡀ ࡏࡅ ࡋࡁࡀࡕࡓࡀࡉࡀ ࡐࡀࡒࡃࡉࡍࡅࡍ ࡅࡀࡌࡀࡓࡋࡅࡍ ࡖ ࡓࡀࡌࡉࡍ ࡌࡉࡀ ࡋࡍࡀࡐࡀࡒࡀ ࡏࡅ ࡌࡀࡍࡃࡀࡉࡀ ࡍࡉࡄࡅࡉࡀ ࡍࡉࡌࡔࡅࡋࡇ ࡏࡃࡇ ࡋࡍࡀࡐࡀࡒࡀ ࡅࡍࡉࡔࡃࡉࡋࡇ ࡌࡉࡔࡀ ࡅࡓࡉࡔࡌࡇ ࡕࡋࡀࡕࡀ ࡓࡅࡔࡅࡌࡉࡀ ࡅࡍࡉࡋࡉࡐ ࡌࡉࡍࡇ ࡅࡍࡀࡕࡍࡀ ࡏࡃࡇ ࡋࡐࡅࡌࡇ ࡅࡍࡀࡕࡍࡀࡋࡇ ࡋࡍࡀࡐࡀࡒࡀ ࡏࡃࡇ ࡋࡐࡅࡌࡇ ࡖ ࡍࡀࡐࡔࡉࡇ ࡏࡅ ࡏࡕࡋࡇ ࡏࡊࡀ ࡋࡌࡉࡐࡀࡒ ࡃࡅࡊࡕࡀ ࡖ ࡌࡀࡕࡍࡀࡋࡇ ࡋࡌࡉࡔࡀ ࡍࡉࡆࡉࡄࡋࡅࡍ ࡌࡉࡀ ࡅࡍࡉࡃࡀࡊࡅࡍࡇ ࡅࡍࡉࡕࡍࡀࡋࡇ ࡌࡀࡕࡋࡀࡉࡉࡀ ࡎࡀ. ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡀࡎࡅࡕࡀ ࡕࡉࡄࡅࡉࡋࡉࡀ ࡋࡃࡉࡋࡉࡀࡗ ࡁࡀࡉࡉࡕ ࡌࡉࡌࡍࡉࡀ ࡌࡉࡔࡀ ࡋࡌࡀࡍ ࡖ ࡍࡀࡐࡉࡒ ࡌࡍ ࡐࡀࡂࡓࡇ ࡀࡌࡅࡓ ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡋࡀࡅࡐࡀ ࡅࡓࡅࡀࡄࡀ ࡖ ࡄࡉࡉࡀ ࡅࡔࡀࡁࡉࡒ ࡄࡀࡈࡀࡉࡉࡀ ࡍࡉࡄࡅࡉࡋࡇ ࡋࡄࡀࡆࡀ ࡍࡉࡔࡉࡌࡕࡀ ࡖ ࡐࡋࡀࡍ ࡁࡓ ࡐࡋࡀࡍࡉࡕࡀ ࡖ ࡄࡀࡆࡀ ࡏࡍࡂࡉࡓࡕࡀ ࡅࡌࡀࡎࡉࡒࡕࡀ ࡅࡀࡉࡕࡉࡀ ࡔࡀࡔࡀ ࡄࡀࡃࡕࡀ ࡃࡀࡊࡉࡀ ࡖ ࡋࡀࡌࡔࡀࡓࡀࡉ ࡅࡀࡑࡅࡓ ࡌࡉࡔࡀ ࡃࡀࡊࡉࡀ ࡅࡓࡌࡉࡁࡇ ࡗ ࡔࡀࡐࡉࡓ ࡅࡂࡃࡅࡋࡇ ࡊࡋࡉࡋࡀ ࡖ ࡀࡎࡀ ࡋࡔࡀࡔࡀ ࡅࡀࡕࡍࡀ ࡋࡒࡅࡃࡀࡌࡀࡊ ࡅࡒࡓࡉࡀ ࡋࡕࡀࡂࡀࡊ ࡁࡔࡅࡌࡇ ࡖ ࡄࡀࡄࡅ ࡂࡀࡁࡓࡀ ࡒࡀࡃࡌࡀࡉࡀ ࡅࡕࡓࡅࡑ ࡕࡀࡂࡀࡊ ࡁࡓࡉࡔࡀࡊ ࡅࡒࡓࡉࡀ ࡋࡀࡂࡀࡍࡁࡉࡀ ࡕࡀࡂࡀࡊ ࡄࡉࡉࡀ ࡒࡉࡓࡉࡅࡉࡀ ࡅࡍࡄࡅࡓ ࡍࡄࡅࡓࡀ ࡅࡌࡀࡍࡃࡀ ࡒࡓࡀࡍ ࡋࡀࡂࡀࡍࡁࡉࡀ ࡕࡀࡂࡀࡊ ࡅࡒࡓࡉࡀ ࡄࡀࡉࡀࡋ ࡊࡁࡀࡓ ࡓࡀࡆࡀ ࡓࡁࡀ ࡖ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡅࡀࡊࡓࡅࡊ ࡐࡀࡍࡃࡀࡌࡀ ࡋࡐࡅࡌࡀࡊ ࡅࡍࡉࡎࡁࡀ ࡋࡔࡉࡔࡀ ࡁࡏࡃࡀࡊ ࡅࡒࡓࡉࡀ ࡌࡉࡀ ࡀࡍࡀࡕࡅࡍ ࡄࡉࡉࡀ ࡋࡔࡉࡔࡀ ࡅࡒࡓࡉࡀ ࡏࡋࡇ ࡄࡀࡋ ࡄࡉࡉࡀ ࡒࡀࡃࡌࡀࡉࡉࡀ ࡋࡓࡉࡄࡀ ࡅࡓࡌࡉࡀ ࡓࡉࡄࡀ ࡋࡍࡅࡓࡀ ࡅࡒࡓࡉࡀ ࡀࡅࡃࡉࡍ ࡅࡕࡅࡔࡁࡉࡄࡀࡍ ࡅࡏࡋࡊࡅࡍ ࡃࡉࡋࡊࡅࡍ ࡅࡌࡉࡔࡒࡀࡋ ࡀࡉࡍࡉࡀ ࡅࡔࡉࡔࡀ ࡁࡏࡃࡀࡊ ࡍࡉࡄࡅࡉࡀ ࡅࡁࡅࡉࡀ ࡋࡁࡉࡕ ࡌࡉࡔࡒࡀࡋ ࡀࡉࡍࡉࡀ ࡅࡃࡅࡊࡕࡀ ࡖ ࡀࡌࡀࡓ ࡕࡉࡊࡐࡀࡓ ࡅࡕࡉࡔࡒࡀࡋ ࡌࡍ ࡐࡋࡀࡍ ࡄࡀࡈࡀࡉࡉࡇ ࡅࡄࡀࡅࡁࡇ ࡅࡎࡊࡉࡋࡀࡕࡇ ࡅࡕࡉࡒࡋࡀࡕࡇ ࡅࡔࡀࡁࡀࡔࡀࡕࡇ ࡕࡉࡓࡌࡉࡀ ࡁࡕࡀࡎࡍࡉࡒࡉࡀ ࡖ ࡀࡓࡒࡀ ࡅࡁࡏࡁࡃࡅࡍࡉࡀ ࡕࡉࡕࡀࡉࡉࡀ ࡖ ࡄࡔࡅࡊࡀ ࡅࡕࡀࡒࡌࡇ ࡁࡆࡀࡊࡀࡉࡉࡀ ࡖ ࡋࡀࡅ ࡁࡄࡀࡉࡀࡁࡉࡀ ࡅࡁࡉࡀࡕࡉࡓࡉࡀ ࡖ ࡋࡀࡅ ࡁࡄࡀࡎࡉࡓࡉࡀ ࡒࡅࡃࡀࡌࡀࡊ ࡌࡀࡍࡃࡀ ࡖ ࡄࡉࡉࡀ ࡌࡍ ࡆࡉࡅࡀࡊ ࡕࡉࡀࡋࡁࡔࡉࡇ ࡅࡌࡍ ࡍࡄࡅࡓࡉࡊ ࡕࡉࡊࡀࡎࡉࡉࡇ ࡅࡌࡍ ࡊࡋࡉࡋࡉࡊ ࡓࡀࡅࡆࡀ ࡕࡉࡕࡓࡀࡑࡋࡇ ࡁࡓࡉࡔࡉࡇ ࡖ ࡄࡀࡆࡀ ࡍࡉࡔࡉࡌࡕࡀ ࡖ ࡐࡋࡀࡍ ࡅࡁࡀࡋࡀࡊ ࡀࡋࡌࡀ ࡅࡃࡉࡍࡁࡀ ࡁࡆࡀࡄࡓࡅࡕࡀ ࡒࡓࡉࡀ . ࡅࡒࡓࡉࡀ ࡕࡌࡀࡍࡉࡀ ࡁࡀࡅࡀࡕࡀ ࡖ ࡐࡉࡄࡕࡀ ࡋࡔࡉࡔࡀ ࡅࡕࡀࡓࡕࡉࡍ ࡁࡀࡅࡀࡕࡀ ࡖ ࡌࡀࡌࡁࡅࡄࡀ ࡋࡔࡉࡔࡀ ࡅࡒࡓࡉࡀ ࡋࡊࡋࡉࡋࡀ ࡖ ࡀࡎࡀ ࡍࡄࡀࡓ ࡍࡄࡅࡓࡀ ࡅࡆࡄࡉࡓࡀ ࡅࡌࡆࡀࡄࡓࡀ ࡅࡕࡓࡅࡑࡋࡇ ࡋࡔࡉࡔࡀ ࡁࡓࡉࡔࡉࡇ ࡅࡒࡓࡉࡀ ࡀࡎࡂࡉࡀ ࡌࡀࡍࡃࡀ ࡖ ࡄࡉࡉࡀ ࡋࡊࡅࡊࡁࡉࡀ ࡄࡉࡆࡅࡀ ࡔࡓࡀ ࡋࡔࡉࡔࡀ ࡅࡃࡓࡀ ࡌࡉࡔࡀ ࡁࡑࡁࡉࡕࡀࡊ ࡓࡉࡔࡀࡉࡕࡀ ࡌࡍ ࡐࡅࡌࡀ ࡖ ࡔࡉࡔࡀ ࡅࡒࡓࡉࡀ ࡍࡅࡊࡓࡀࡉࡉࡀ ࡄࡀࡆࡉࡍ ࡆࡉࡅࡀ ࡅࡍࡄࡅࡓ ࡄࡉࡉࡀ ࡅࡃࡅࡊࡕࡀ ࡖ ࡀࡌࡀࡓ ࡌࡉࡐࡀࡒ ࡓࡅࡄࡀ ࡅࡍࡉࡔࡉࡌࡕࡀ ࡀࡌࡅࡓ ࡖ ࡐࡋࡀࡍ ࡅࡃࡅࡊࡕࡀ ࡖ ࡀࡌࡀࡓ ࡅࡀࡕࡉࡀ ࡑࡀࡅࡓࡏࡉࡋ ࡔࡀࡓࡅࡉࡀ ࡖ ࡔࡀࡓࡉࡀ ࡓࡅࡄࡀ ࡅࡍࡉࡔࡉࡌࡕࡀ ࡀࡌࡅࡓ ࡖ ࡐࡋࡀࡍ ࡅࡁࡌࡀ ࡖ ࡁࡇ ࡓࡔࡅࡌ ࡋࡐࡅࡌࡀ ࡖ ࡔࡉࡔࡀ ࡅࡃࡅࡊࡕࡀ ࡖ ࡀࡌࡀࡓ ࡁࡉࡕ ࡀࡁࡀࡕࡅࡓ ࡓࡔࡅࡌ ࡋࡐࡅࡌࡀ ࡖ ࡔࡉࡔࡀ ࡅࡃࡅࡊࡕࡀ ࡖ ࡀࡌࡀࡓ ࡀࡆࡋࡀࡕ ࡓࡅࡄࡀ ࡖ ࡐࡋࡀࡍ ࡅࡄࡅࡀࡕ ࡗ ࡆࡀࡍ ࡍࡉࡔࡉࡌࡕࡀ ࡅࡕࡒࡀࡉࡌࡀࡕ ࡁࡉࡕ ࡄࡉࡉࡀ ࡅࡄࡉࡉࡀ ࡆࡀࡊࡉࡍ ࡅࡓࡔࡅࡌ ࡋࡐࡅࡌࡀ ࡖ ࡔࡉࡔࡀ ࡅࡒࡓࡉࡀ ࡀࡔࡀࡓ ࡑࡁࡀࡍ ࡑࡀࡁࡅࡄࡀ ࡅࡁࡔࡅࡌࡀ ࡖ ࡄࡉࡉࡀ ࡑࡁࡉࡍࡀ ࡅࡁࡓࡇ ࡀࡍࡀ ࡖ ࡌࡀࡍ ࡌࡀࡍࡀ ࡎࡌࡉࡓࡀ ࡅࡀࡋࡁࡉࡔࡉࡇ ࡈࡉࡍࡀ ࡁࡔࡉࡔࡀ ࡅࡍࡎࡅࡁ ࡏࡎࡒࡕࡀࡊ ࡁࡕࡋࡀࡕ ࡑࡁࡀࡕࡀࡊ ࡅࡏࡋࡉࡀࡍࡀࡊ ࡑࡁࡉࡕࡀࡊ ࡀࡁࡉࡄࡃࡉࡀ ࡏࡋࡉࡀࡍࡀࡊ ࡅࡄࡉࡑࡓࡀࡊ ࡒࡓࡉࡀ ࡏࡍࡂࡉࡓࡕࡀ ࡌࡄࡀࡕࡀࡌࡕࡀ ࡖ ࡍࡀࡐࡒࡀ ࡌࡉࡍࡇ ࡌࡍ ࡀࡋࡌࡀ ࡊࡅࡋ ࡃࡅࡊࡕࡀ ࡖ ࡀࡌࡀࡓ ࡏࡍࡂࡉࡓࡕࡀ ࡁࡊࡅࡔࡈࡀ ࡊࡃࡉࡁࡀ ࡅࡄࡕࡉࡌࡀ ࡁࡏࡎࡒࡀࡕ ࡓࡅࡓࡁࡉࡀ ࡅࡄࡕࡅࡌ ࡁࡏࡎࡉࡒࡕࡀࡊ ࡅࡈࡅࡐࡓࡀࡊ ࡅࡄࡉࡑࡓࡀࡊ ࡅࡀࡋࡌࡀ ࡋࡃࡉࡍࡁࡀ ࡀࡕࡍࡀ ࡏࡎࡉࡒࡕࡀࡊ ࡅࡈࡅࡐࡓࡀࡊ ࡅࡄࡉࡑࡓࡀࡊ ࡁࡈࡉࡍࡀ ࡅࡒࡓࡉࡀ ࡏࡎࡉࡓࡀ ࡅࡄࡕࡉࡌࡀ ࡓࡅࡄࡇ ࡅࡍࡉࡔࡉࡌࡕࡇ ࡖ ࡐࡋࡀࡍ ࡁࡄࡀࡕࡌࡀ ࡖ ࡊࡅࡔࡈࡀ ࡅࡍࡀࡈࡓࡀ ࡓࡁࡀ ࡖ ࡔࡓࡀࡓࡀ ࡁࡌࡉࡌࡀࡓ ࡊࡅࡔࡈࡀ ࡅࡒࡀࡉࡅࡌࡉࡀ ࡉࡅࡊࡀࡁࡀࡓ ࡆࡉࡅࡀ ࡅࡃࡀࡋ ࡏࡎࡉࡒࡕࡀࡊ ࡅࡈࡅࡐࡓࡀࡊ ࡅࡄࡉࡑࡓࡀࡊ ࡌࡉࡍࡇ ࡅࡀࡕࡍࡀ ࡋࡒࡅࡃࡀࡌࡀࡊ ࡅࡒࡓࡉࡀ ࡌࡔࡀࡁࡉࡍ ࡄࡉࡉࡀ ࡒࡀࡃࡌࡀࡉࡉࡀ ࡅࡃࡅࡊࡕࡀ ࡖ ࡀࡌࡀࡓ ࡕࡓࡅࡑ ࡀࡉࡍࡀࡊ ࡀࡌࡅࡓ ࡋࡐࡋࡀࡍ ࡅࡐࡀࡍࡃࡀࡌࡀࡊ ࡋࡐࡅࡌࡀࡊ ࡍࡉࡄࡅࡉࡀ ࡅࡒࡓࡉࡀ ࡏࡕࡓࡉࡑࡕࡅࡍ ࡅࡏࡕࡒࡀࡉࡀࡌࡕࡅࡍ ࡁࡀࡕࡓࡀ ࡖ ࡈࡀࡁࡉࡀ ࡌࡉࡕࡌࡀࡉࡌࡉࡀ ࡁࡉࡍࡉࡀ ࡌࡀࡍࡉࡀ ࡖ ࡍࡄࡅࡓࡀ ࡍࡉࡔࡉࡌࡕࡀ ࡖ ࡐࡋࡀࡍ ࡄࡀࡕࡀࡌ ࡁࡀࡍࡄࡅࡓࡀ ࡕࡉࡕࡒࡀࡉࡀࡌ ࡅࡌࡊࡀࡋࡀࡍࡀ ࡅࡔࡀࡊࡉࡁࡍࡀ ࡅࡌࡉࡍࡇ ࡅࡌࡍ ࡅࡔࡀࡓࡅࡉࡀ ࡅࡁࡉࡍࡉࡀ ࡊࡉࡎࡉࡀ ࡋࡆࡉࡅࡀ ࡅࡍࡉࡀࡄࡀ ࡅࡔࡀࡋࡌࡀ ࡍࡉࡄࡅࡉࡀ ࡁࡏࡅࡄࡓࡀ ࡖ ࡀࡃࡀࡌ ࡊࡉࡔࡓࡀ ࡅࡏࡓࡅࡕࡀࡉ ࡅࡕࡅࡔࡁࡉࡄࡕࡀࡉ ࡅࡏࡆࡉࡋ ࡁࡔࡋࡀࡌ ࡁࡄࡉࡓࡀ ࡃࡀࡊࡉࡀ ࡆࡀࡊࡀࡉࡀ ࡖ ࡌࡅࡌࡀ ࡋࡉࡕࡁࡇ ࡅࡌࡀࡍࡀ ࡁࡂࡉࡍࡆࡉࡇ ࡄࡀࡃࡉࡀ ࡅࡈࡅࡁࡀࡊ ࡈࡅࡁࡀࡊ ࡍࡉࡔࡌࡀ ࡖ ࡍࡐࡀࡒࡕ ࡌࡉࡍࡇ ࡌࡍ ࡀࡋࡌࡀ ࡄࡀࡁࡔࡀࡁࡀ ࡅࡊࡅࡔࡈࡀ ࡅࡆࡉࡃࡒࡀ ࡅࡆࡉࡃࡀࡍࡀ ࡅࡌࡆࡀࡅࡃࡀࡍࡀ ࡅࡎࡋࡉࡒ ࡅࡀࡎࡒࡀࡍ ࡌࡉࡍࡇ ࡅࡉࡅࡌࡀ ࡖ ࡍࡀࡐࡉࡒ ࡍࡉࡔࡌࡀ ࡅࡏࡕࡓࡉࡑࡕࡅࡍ ࡅࡏࡕࡒࡀࡉࡀࡌࡕࡅࡍ ࡁࡄࡉࡓࡀࡉ ࡅࡒࡓࡉࡀ ࡁࡓࡉࡊࡉࡀ ࡅࡌࡔࡀࡁࡉࡀ ࡄࡉࡉࡀ ࡋࡍࡉࡔࡌࡀࡕࡀ ࡅࡄࡀࡊࡀ ࡒࡓࡉࡀ ࡁࡓࡉࡊࡉࡀ ࡅࡌࡔࡀࡁࡉࡀ ࡄࡉࡉࡀ ࡖ ࡔࡅࡌ ࡁࡓ ࡍࡅ ࡅࡃࡅࡊࡕࡀ ࡖ ࡀࡌࡀࡓ ࡏࡄࡀࡁࡋࡊࡅࡍ ࡌࡍ ࡊࡋࡉࡋ ࡀࡉࡀࡓ ࡀࡌࡅࡓ ࡖ ࡐࡋࡀࡍ ࡒࡓࡉࡀ ࡈࡀࡁ ࡈࡀࡁࡀ ࡋࡈࡀࡁࡇ ࡅࡏࡕࡓࡀࡄࡀࡌ ࡏࡋࡇ ࡅࡔࡁࡅࡒࡋࡇ ࡄࡀࡈࡀࡉࡉࡇ ࡅࡄࡀࡅࡁࡇ ࡅࡄࡁࡀࡋࡇ ࡋࡌࡀࡍ ࡖ ࡉࡀࡄࡁࡀࡕࡋࡇ ࡅࡐࡔࡅࡈ ࡊࡅࡔࡈࡀ ࡌࡉࡍࡇ ࡀࡁࡉࡄࡃࡉࡀ ࡖ ࡐࡀࡔࡉࡈ ࡀࡁࡉࡄࡃࡉࡀ ࡍࡀࡐࡀࡒࡀ ࡅࡀࡌࡀࡓࡋࡇ ࡄࡀࡆࡉࡍ ࡊࡅࡔࡈࡀ ࡀࡎࡐࡀࡓࡋࡀࡊ ࡅࡀࡍࡀࡕ ࡀࡎࡐࡀࡓࡋࡇ ࡋࡀࡁࡀࡕࡅࡓ ࡏࡅ ࡌࡉࡎࡀࡓࡄࡉࡁ ࡋࡌࡃࡉࡓࡇ ࡐࡀࡑ ࡗ ࡒࡀࡓࡉࡕ ࡏࡍࡂࡉࡓࡕࡀ ࡌࡄࡀࡕࡀࡌࡕࡀ ࡖ ࡍࡀࡐࡒࡀ ࡌࡉࡍࡇ ࡌࡍ ࡀࡋࡌࡀ ࡅࡏࡎࡉࡓࡀ ࡅࡄࡕࡉࡌࡀ ࡓࡅࡄࡇ ࡅࡍࡉࡔࡉࡌࡕࡇ ࡖ ࡐࡋࡀࡍ ࡅࡀࡄࡁࡉࡋࡇ ࡋࡌࡀࡍ ࡖ ࡉࡀࡄࡁࡀࡕࡋࡇ ࡅࡐࡔࡅࡈ ࡊࡅࡔࡈࡀ ࡌࡉࡍࡇ ࡖ ࡐࡀࡔࡉࡈ ࡀࡁࡉࡄࡃࡉࡀ ࡍࡀࡐࡀࡒࡀ ࡅࡀࡌࡀࡓࡋࡇ ࡄࡀࡆࡉࡍ ࡊࡅࡔࡈࡀ ࡀࡎࡐࡀࡓࡋࡀࡊ ࡅࡀࡍࡀࡕ ࡀࡎࡐࡀࡓࡋࡇ ࡋࡀࡁࡀࡕࡅࡓ ࡅࡄࡀࡉࡆࡀࡊ ࡀࡍࡀࡕ ࡐࡀࡍࡃࡀࡌࡀࡊ ࡋࡐࡅࡌࡀࡊ ࡍࡉࡄࡅࡉࡀ ࡅࡒࡓࡉࡀ ࡌࡔࡀࡁࡉࡍ ࡄࡉࡉࡀ ࡒࡀࡃࡌࡀࡉࡉࡀ ࡅࡏࡕࡓࡉࡑࡕࡅࡍ ࡅࡏࡕࡒࡀࡉࡀࡌࡕࡅࡍ ࡅࡀࡋࡌࡀ ࡋࡈࡀࡁ ࡈࡀࡁࡀ ࡋࡈࡀࡁࡇ ࡄࡀ ࡊࡅࡀࡕ ࡖ ࡏࡌࡀࡓࡋࡀࡊ ࡅࡏࡕࡓࡀࡄࡀࡌ ࡏࡋࡇ ࡁࡁࡀࡅࡀࡕࡀ ࡅࡃࡓࡀࡔࡉࡀ ࡅࡒࡉࡀࡌࡕࡀ ࡖ ࡌࡀࡎࡉࡒࡕࡀ ࡌࡍ ࡓࡉࡔ ࡅࡀࡋࡌࡀ ࡋࡃࡉࡍࡁࡀ ࡅࡁࡀࡋࡀࡊ ࡋࡔࡅࡌࡇ ࡖ ࡄࡀࡍࡀࡕࡇ ࡖ ࡌࡀࡍࡉࡀࡕࡋࡇ ࡌࡉࡔࡀ ࡋࡀࡕࡉࡁࡑࡀࡓ ࡅࡁࡑࡉࡋࡀࡉࡉࡕ ࡅࡆࡀࡄࡓࡅࡕࡀ ࡒࡓࡉࡀ ࡅࡄࡉࡉࡀ ࡆࡀࡊࡉࡍ ࡎ ࡀ. ࡅࡄࡀࡉࡆࡀࡊ ࡀࡍࡀࡕ ࡁࡏ ࡁࡅࡕࡀ ࡋࡍࡀࡐࡔࡀࡊ ࡅࡄࡀࡌ ࡗ ࡐࡀࡍࡃࡀࡌࡀࡊ ࡋࡂࡉࡈࡉࡕ ࡅࡔࡀࡅࡉࡀ ࡐࡉࡄࡕࡀ ࡅࡌࡀࡌࡁࡅࡄࡀ ࡋࡍࡀࡐࡔࡀࡊ ࡅࡒࡓࡉࡀ ࡌࡀࡋࡉࡋ ࡅࡐࡕࡀ ࡄࡉࡉࡀ ࡓࡁࡉࡀ ࡁࡐࡅࡌࡀࡉࡄࡅࡍ ࡅࡀࡊࡅࡋ ࡐࡉࡄࡕࡀ ࡅࡔࡕࡉࡀ ࡌࡀࡌࡁࡅࡄࡀ ࡅࡒࡓࡉࡀ ࡏࡕࡉࡌࡋࡅࡍ ࡅࡔࡊࡉࡍࡉࡀ ࡄࡉࡉࡀ ࡋࡍࡀࡐࡔࡀࡊ ࡅࡒࡓࡉࡀ ࡈࡀࡁ ࡈࡀࡁࡀ ࡋࡈࡀࡁࡇ ࡅࡐࡔࡅࡈ ࡊࡅࡔࡈࡀ ࡋࡍࡀࡐࡔࡀࡊ ࡅࡀࡅࡒࡉࡓ ࡕࡀࡂࡀࡊ ࡅࡏࡆࡃࡀࡄࡀࡓ ࡏࡆࡃࡀࡄࡀࡓ ࡏࡆࡃࡀࡄࡀࡓ ࡖ ࡔࡀࡓࡉࡕ ࡌࡉࡍࡃࡀࡌ ࡌࡍ ࡔࡉࡓࡉࡀࡕࡀ ࡋࡁࡀࡓ ࡌࡍ ࡐࡀࡍࡃࡀࡌࡀࡊ ࡋࡄࡅࡃࡇ ࡀࡁࡀࡕࡀࡓ ࡖ ࡁࡉࡉࡕ ࡁࡅࡕࡀ ࡋࡍࡀࡐࡔࡀࡊ  ࡅࡄࡉࡉࡀ ࡆࡀࡊࡏࡉࡍ ࡎࡀ ࡄࡀࡆࡉࡍ ࡁࡓࡀࡊࡀ ࡖ ࡌࡉࡔࡀ ࡖ ࡁࡓࡀࡊࡋࡇ ࡁࡉࡄࡓࡀࡌ ࡓࡁࡀ ࡁࡓࡇ ࡖ ࡀࡃࡀࡌ ࡋࡄࡀࡅࡀ ࡏࡌࡇ ࡆࡀࡅࡀ ࡖ ࡀࡃࡀࡌ ࡗ ࡍࡉࡐࡒࡀࡕ ࡌࡍ ࡐࡀࡂࡓࡀ ࡗ ࡄࡉࡁࡉࡋ ࡆࡉࡅࡀ ࡒࡅࡃࡀࡌࡀࡉࡄࡅࡍ ࡄࡅࡀ ࡉࡀࡕࡉࡁ ࡄࡅࡀ ࡄࡀࡆࡉࡍ ࡁࡓࡀࡊࡀ ࡖ ࡌࡉࡔࡀ ࡁࡃࡉࡅࡀࡍ ࡖ ࡓࡀࡌࡅࡉࡀ ࡁࡓ ࡏࡒࡀࡉࡌࡀࡕ ࡌࡍ ࡈࡉࡁ ࡌࡀࡕࡀ ࡖ ࡊࡃࡉࡁ ࡌࡍ ࡆࡀࡆࡀࡉ ࡖ ࡂࡀࡅࡀࡆࡕࡀ ࡁࡓ ࡄࡀࡅࡀ ࡅࡊࡉࡕࡁࡀ ࡁࡀࡉࡀࡍ ࡄࡉࡁࡉࡋ ࡁࡓ ࡁࡓࡉࡊ ࡉࡀࡅࡀࡓ ࡄࡀࡊࡀ ࡆࡓࡉࡀ ࡁࡄࡀࡋࡉࡍ ࡎࡉࡃࡓࡉࡀ ࡁࡌࡀ ࡖ ࡍࡀࡑࡅࡓࡀࡉࡉࡀ ࡌࡍ ࡃࡉࡅࡀࡍ ࡖ ࡍࡀࡐࡔࡉࡇ ࡀࡍࡎࡀ ࡌࡍ ࡃࡉࡅࡀࡍ ࡖ ࡓࡀࡌࡅࡉࡀ ࡁࡓ ࡏࡒࡀࡉࡌࡀࡕ ࡖ ࡏࡔࡕࡉࡄࡊࡀࡕ ࡋࡅࡀࡕ ࡄࡀࡉࡅࡍࡀ ࡐࡕ ࡉࡀࡄࡉࡀ ࡅࡁࡀࡉࡍࡀࡉ ࡁࡓ ࡆࡀࡊࡉࡀ ࡅࡀࡌࡀࡓ ࡁࡀࡉࡀࡍ ࡄࡉࡁࡉࡋ ࡁࡓ ࡁࡓࡉࡊ ࡉࡀࡅࡀࡓ ࡗ ࡄࡅࡀ ࡊࡃࡉࡁࡀ ࡊࡕࡀࡁࡕࡀ ࡅࡊࡅࡋࡄࡅࡍࡓࡀࡆࡉࡀ ࡖ ࡌࡉࡔࡀ ࡁࡂࡀࡅࡇ ࡄࡅࡍ ࡀࡋࡌࡀ ࡋࡏࡅࡓࡀࡔࡋࡀࡌ ࡌࡃࡉࡍࡕࡀ ࡖ ࡉࡀࡄࡅࡈࡀࡉࡉࡀ ࡗ ࡄࡀࡆࡉࡍ ࡓࡀࡆࡀࡉࡄࡅࡍ ࡅࡄࡉࡉࡀ ࡆࡀࡊࡉࡍ ࡎࡀ. ࡌࡀࡍ ࡖ ࡌࡀࡍࡉࡀࡕࡋࡇ ࡌࡉࡔࡀ ࡐࡀࡒࡃࡉࡍࡅࡍ ࡖ ࡍࡉࡆࡃࡀࡄࡓࡅࡍ ࡏࡅ ࡋࡀࡍࡀࡐࡉࡒ ࡌࡍ ࡐࡀࡂࡓࡇ ࡍࡀࡕࡉࡅࡍࡇ ࡋࡅࡀࡕࡀࡊ ࡅࡒࡓࡉࡀ ࡏࡋࡇ ࡁࡆࡉࡅ ࡖ ࡍࡐࡉࡔ ࡑࡁࡉࡍࡀ ࡐࡀࡋࡈࡇ ࡋࡄࡀࡕࡌࡀ ࡅࡀࡃࡉࡉࡇ ࡅࡔࡃࡉࡉࡇ ࡁࡉࡀࡓࡃࡍࡀ . ࡗ ࡌࡀࡍࡉࡕ ࡌࡉࡔࡀ ࡄࡆࡉࡀ ࡔࡀࡂࡉࡕ ࡏࡅ ࡔࡀࡂࡉࡕ ࡁࡀࡉࡉࡀ ࡌࡀࡎࡉࡒࡕࡀ ࡖ ࡔࡉࡕࡉࡍ ࡋࡌࡀࡍ ࡖ ࡍࡀࡐࡉࡋࡇ ࡌࡉࡔࡀ ࡔࡀࡐࡉࡓ ࡏࡅ ࡋࡀࡌࡂࡀࡉࡉࡃ ࡌࡉࡃࡉࡓࡇ ࡒࡓࡉࡀ ࡔࡉࡕࡉࡍ ࡌࡀࡎࡉࡒࡕࡀ ࡅࡔࡀࡁࡀ ࡀࡓࡀࡁࡀࡕࡀ ࡁࡌࡀ ࡖ ࡁࡇ ࡓࡅࡔࡅࡌࡇ ࡅࡁࡉࡕ ࡀࡁࡀࡕࡅࡓ ࡓࡅࡔࡅࡌࡇ . ࡍࡉࡔࡌࡀ ࡈࡀࡁࡀ ࡅࡌࡄࡀࡉࡌࡍࡀ ࡄࡅ ࡖ ࡏࡕࡋࡇ ࡀࡍࡀࡔࡉࡀ ࡀࡁࡃࡉࡀ ࡈࡀࡁࡅࡕࡀ ࡀࡁࡀࡕࡓࡇ ࡀࡉࡕࡉࡀ ࡕࡀࡓࡌࡉࡃࡉࡀ ࡅࡒࡀࡓࡉࡍ ࡏࡋࡇ ࡔࡉࡕࡅࡍ ࡌࡀࡎࡒࡀࡕࡀ ࡁࡎࡀࡊࡀ ࡁࡊࡅࡋ ࡌࡉࡍࡃࡀࡌ ࡁࡌࡀࡎࡉࡒࡕࡀ ࡖ ࡔࡉࡕࡉࡍ ࡁࡌࡀ ࡖ ࡁࡇ ࡓࡅࡔࡅࡌࡇ ࡋࡄࡅࡃࡇ ࡅࡁࡉࡕ ࡀࡁࡀࡕࡅࡓ ࡓࡅࡔࡅࡌࡇ ࡋࡄࡅࡃࡇ ࡅࡁࡔࡀࡁࡀ ࡀࡓࡀࡁࡀࡕࡀ ࡁࡌࡀ ࡖ ࡁࡇ ࡓࡅࡔࡅࡌ ࡋࡄࡅࡃࡇ ࡅࡁࡌࡀࡎࡉࡒࡕࡀ ࡁࡀࡕࡓࡀࡉࡕࡀ ࡁࡉࡕ ࡀࡁࡀࡕࡅࡓ ࡓࡅࡔࡅࡌ ࡋࡄࡅࡃࡇ ࡓࡅࡔࡅࡌࡇ ࡅࡓࡔࡅࡌ ࡍࡉࡔࡌࡀࡕࡀ ࡖ ࡀࡁࡀࡄࡀࡕࡀࡍ . ࡅࡃࡁࡀࡉࡉࡕ ࡋࡌࡎࡉࡒࡕࡀ ࡌࡀࡎࡉࡒࡕࡀ ࡖ ࡁࡉࡎࡓࡀ ࡅࡌࡉࡀ ࡖ ࡁࡅࡕࡀ ࡅࡓࡉࡄࡀ ࡅࡐࡉࡄࡕࡀ ࡅࡄࡀࡌࡓࡀ ࡅࡊࡋࡉࡋࡀ ࡅࡌࡉࡔࡀ . ࡅࡔࡀࡁࡀ ࡀࡓࡀࡁࡀࡕࡀ ࡊࡅࡋ ࡖ ࡁࡀࡉࡉࡕ ࡌࡍ ࡓࡀࡄࡁࡀࡕࡀ ࡀࡕࡍࡀ ࡀࡁࡉࡄࡃࡉࡀ ࡄࡀࡋࡉࡍ ࡓࡀࡆࡉࡀ ࡅࡗ ࡌࡒࡀࡉࡌࡉࡕ ࡌࡀࡎࡉࡒࡕࡀ ࡃࡓࡅࡔ ࡃࡓࡀࡔࡉࡀ ࡖ ࡍࡉࡔࡉࡌࡕࡀ ࡁࡍࡐࡉࡔ ࡄࡅࡉࡀ ࡅࡕࡓࡀࡄࡀࡌ . ࡍࡉࡔࡉࡌࡕࡀ ࡖ ࡍࡀࡐࡉࡋ ࡌࡉࡔࡀ ࡔࡀࡐࡉࡓ ࡒࡓࡉࡀ ࡏࡋࡇ ࡅࡔࡀࡁࡀ ࡖ ࡀࡁࡀࡄࡀࡕࡀ ࡅࡍࡀࡑࡅࡓࡀࡉࡉࡀ ࡅࡌࡀࡍࡃࡀࡉࡉࡀ ࡅࡌࡄࡀࡉࡌࡍࡉࡀ ࡅࡁࡏ ࡌࡀࡎࡉࡒࡕࡀ ࡀࡅࡃࡉࡍ ࡅࡕࡅࡔࡁࡉࡄࡀࡍ ࡅࡏࡋࡊࡅࡍ ࡃࡉࡋࡊࡅࡍ ࡅࡌࡉࡔࡒࡀࡋ ࡀࡉࡍࡉࡀ ࡅࡁࡉࡕ ࡌࡉࡔࡒࡀࡋ ࡀࡉࡍࡉࡀ ࡅࡍࡉࡁࡆࡉࡀ ࡊࡋࡄࡅࡍ ࡖ ࡐࡉࡄࡕࡀ ࡅࡍࡉࡁࡆࡉࡀ ࡖ ࡌࡀࡌࡁࡅࡄࡀ ࡊࡅࡋࡄࡅࡍ ࡀࡎࡀࡓࡉࡀ ࡅࡔࡉࡓࡉࡀࡕࡀ ࡖ ࡌࡀࡎࡉࡒࡕࡀ ࡌࡍ ࡓࡉࡔࡀ ࡅࡀࡋࡌࡀ ࡋࡃࡉࡍࡁࡀ ࡅࡁࡀࡋࡀࡊ ࡅࡄࡀࡒࡀࡓ ࡅࡄࡋࡉࡀ ࡍࡀࡐࡔࡀࡊ ࡁࡃࡓࡀࡔࡉࡀ ࡏࡕࡓࡀࡄࡀࡌ ࡏࡋࡇ ࡅࡔࡁࡅࡒࡋࡇ ࡄࡀࡈࡀࡉࡉࡇ ࡅࡄࡉࡉࡀ ࡆࡀࡊࡉࡍ ࡎ ࡀ ࡅࡄࡀࡉࡆࡀࡊ ࡀࡐࡓࡉࡔ ࡅࡀࡌࡀࡓ ࡄࡉࡁࡉࡋ ࡆࡉࡅࡀ ࡊࡅࡋ ࡌࡀࡍ ࡌࡍ ࡍࡀࡑࡅࡓࡀࡉࡉࡀ ࡖ ࡌࡀࡎࡉࡒࡕࡀ ࡍࡉࡒࡓࡉࡀ ࡅࡍࡉࡐࡀࡋࡉࡈ ࡐࡀࡍࡃࡀࡌࡀ ࡅࡌࡉࡀ ࡖ ࡁࡅࡕࡀ ࡍࡉࡕࡁࡀࡓ ࡍࡉࡄࡅࡉࡀ ࡏࡋࡇ ࡂࡉࡅࡈࡀ ࡓࡁࡀ ࡅࡋࡀࡍࡉࡄࡉࡆࡉࡇ ࡋࡍࡀࡑࡁࡇ ࡅࡍࡉࡕࡉࡌࡄࡉࡀ ࡁࡌࡄࡉࡕࡀ ࡖ ࡏࡕࡉࡌࡄࡉࡁࡇ ࡁࡅࡊࡓࡀ ࡒࡀࡃࡌࡀࡉࡀ ࡀࡌࡉࡍࡈࡅࡋ ࡖ ࡄࡈࡀ ࡅࡀࡊࡉࡋ ࡒࡅࡃࡀࡌ ࡀࡁࡀࡄࡀࡕࡇ ࡅࡀࡍࡀ ࡄࡉࡁࡉࡋ ࡆࡉࡅࡀ ࡋࡀࡏࡄࡉࡔࡁࡇ ࡁࡄࡅࡔࡁࡀࡍࡀࡉ ࡅࡁࡌࡉࡍࡉࡀࡍࡀࡉ ࡋࡀࡏࡌࡉࡍࡉࡉࡇ ࡅࡀࡌࡀࡓ ࡄࡉࡁࡉࡋ ࡆࡉࡅࡀ ࡊࡅࡋ ࡌࡀࡍ ࡌࡍ ࡍࡀࡑࡅࡓࡀࡉࡉࡀ ࡖ ࡐࡀࡍࡃࡀࡌࡀ ࡍࡉࡋࡂࡀࡈ ࡅࡌࡉࡀ ࡖ ࡁࡅࡕࡀ ࡋࡀࡍࡉࡕࡁࡀࡓ ࡖ ࡒࡀࡉࡌࡉࡀ ࡁࡐࡀࡂࡓࡀࡉࡄࡅࡍ ࡍࡉࡄࡅࡉࡋࡇ ࡏࡌࡓࡀ ࡅࡎࡉࡂࡉࡀ ࡅࡔࡉࡌࡀ ࡖ ࡋࡀࡔࡀࡍࡀ ࡅࡋࡀࡔࡀࡍࡉࡀ ࡊࡅࡋ ࡌࡉࡍࡃࡀࡌ ࡖ ࡀࡁࡀࡄࡀࡕࡇ ࡐࡀࡒࡃࡅࡉࡀ ࡅࡋࡀࡁࡀࡃ ࡏࡁࡉࡃࡀࡕࡀ ࡖ ࡉࡅࡔࡀࡌࡉࡍ ࡀࡁࡀࡃ ࡅࡋࡀࡏࡄࡀࡁࡋࡇ ࡌࡍࡀࡕࡀ ࡖ ࡎࡅࡌࡒࡀࡒ ࡀࡉࡍࡀ ࡅࡁࡄࡀࡅࡌࡀ ࡖ ࡎࡅࡌࡒࡀࡒ ࡀࡉࡍࡀ ࡋࡀࡒࡀࡌ ࡊࡅࡋ ࡌࡀࡍ ࡖ ࡄࡀࡋࡉࡍ ࡓࡀࡆࡉࡀ ࡀࡁࡀࡃ ࡅࡐࡀࡍࡃࡀࡌࡀ ࡍࡉࡋࡂࡀࡈ ࡅࡊࡅ ࡋࡀࡂࡉࡈ ࡐࡀࡍࡃࡀࡌࡀ ࡊࡅࡋࡄࡉࡍ ࡒࡉࡓࡉࡀࡕࡀ ࡖ ࡄࡔࡅࡊࡀ ࡍࡉࡕࡉࡊࡓࡉࡊ ࡌࡍ ࡒࡅࡃࡀࡌࡇ ࡅࡕࡉࡍࡄࡀࡓ ࡃࡌࡅࡕࡇ ࡋࡅࡀࡕࡀࡉࡀࡍ ࡅࡊࡅࡋ ࡌࡉࡍࡃࡀࡌ ࡖ ࡀࡁࡀࡃ ࡍࡉࡕࡒࡀࡉࡌࡀ ࡅࡄࡉࡉࡀ ࡆࡀࡊࡉࡍ ࡎ ࡀ ࡄࡀࡆࡉࡍ ࡎࡉࡃࡓࡀ ࡖ ࡂࡀࡃࡉࡍࡀ ࡄࡏ ࡖ ࡏࡄࡉࡁ ࡌࡀࡍࡃࡀ ࡖ ࡄࡉࡉࡀ ࡋࡁࡄࡉࡓࡉࡀ ࡆࡉࡃࡒࡀ ࡖ ࡀࡍࡎࡉࡕ ࡋࡍࡀࡐࡔࡀࡉ ࡀࡍࡀ ࡀࡍࡉࡀ ࡅࡃࡀࡍࡉࡀ ࡅࡌࡉࡀࡍࡒࡀ ࡌࡓࡀࡃࡐࡀ ࡖ ࡓࡉࡃࡐࡅࡍ ࡔࡅࡁࡀ ࡅࡕࡓࡉࡎࡀࡓ ࡋࡄࡀࡃ ࡔࡀࡓࡔࡀ ࡖ ࡄࡉࡉࡀ ࡒࡀࡃࡌࡀࡉࡉࡀ ࡆࡅࡈࡀ ࡖ ࡀࡄࡀࡉ ࡕࡀࡓࡌࡉࡃࡉࡀ ࡅࡂࡀࡍࡆࡉࡁࡓࡉࡀ ࡅࡀࡓࡒࡀ ࡁࡉࡂࡀࡓ ࡖ ࡍࡀࡑࡅࡓࡀࡉࡉࡀ ࡅࡀࡒࡀࡐࡓࡀ ࡖ ࡀࡕࡅࡕࡉࡀ ࡋࡉࡂࡓࡀࡉࡄࡅࡍ ࡖ ࡍࡀࡎࡀࡊࡉࡀ ࡀࡁࡃࡀ ࡀࡍࡀ ࡖ ࡊࡅࡋࡇ ࡄࡀࡈࡀࡉࡉࡀ ࡖ ࡀࡍࡎࡉࡕ ࡋࡍࡀࡐࡔࡀࡉ ࡄࡀࡆࡉࡍ ࡎࡉࡃࡓࡀ ࡖ ࡂࡀࡃࡀࡍࡀ ࡖ ࡄࡀࡅࡉࡋࡀࡉ ࡃࡀࡊࡀࡓ ࡔࡅࡌࡉࡀ ࡁࡕࡉࡁࡉࡋ ࡅࡄࡀࡕࡀࡌ ࡁࡀࡋࡌࡉࡀ ࡓࡅࡓࡁࡉࡀ ࡏࡋࡀࡉࡉࡀ ࡖ ࡍࡄࡅࡓࡀ ࡖ ࡋࡉࡁࡀࡉ ࡓࡄࡉࡌ ࡄࡉࡉࡀ ࡅࡀࡉࡍࡀࡉ ࡌࡎࡀࡊࡉࡀ ࡋࡌࡀࡍࡃࡀ ࡖ ࡄࡉࡉࡀ ࡍࡉࡄࡅࡉࡋࡀࡉ ࡎࡉࡌࡀࡊࡀ ࡅࡌࡐࡀࡓࡒࡀࡍࡀ ࡅࡌࡔࡅࡆࡁࡀࡍࡀ ࡌࡍ ࡁࡍࡉࡀ ࡖ ࡁࡍࡉࡀ ࡖ ࡀࡊࡓࡅࡍ ࡅࡎࡄࡉࡃࡍࡀ ࡁࡄࡉࡉࡀ ࡅࡌࡀࡓࡀࡉ ࡅࡌࡀࡍࡃࡀ ࡖ ࡄࡉࡉࡀ ࡁࡋࡉࡁࡀ ࡊࡔࡉࡈࡀ ࡅࡌࡄࡀࡉࡌࡍࡀ ࡀࡍࡀ ࡓࡁࡀࡉ ࡀࡃࡀࡌ ࡉࡅࡄࡀࡍࡀ ࡁࡓ ࡎࡀࡌ ࡁࡓ ࡁࡉࡄࡓࡀࡌ ࡁࡓ ࡎࡀ(ࡀyࡉࡍ)ࡃࡀࡍ ࡁࡓ ࡌࡎࡀ(ࡀyࡉࡍ)ࡀࡃ ࡋࡀࡒࡀࡁ ࡊࡀࡌࡉࡎࡉࡀ ࡅࡊࡉࡍࡉࡀࡍࡇ ࡓࡉࡔ ࡃࡓࡀࡆ ࡖ ࡀࡍࡎࡉࡕ ࡋࡍࡀࡐࡔࡀࡉ ࡌࡍ ࡎࡉࡃࡓࡀ ࡖ ࡄࡀࡃ ࡔࡀࡋࡌࡀࡍࡕࡉࡀ ࡅࡕࡓࡉࡑࡕࡉࡀ ࡅࡌࡄࡀࡉࡌࡍࡀ ࡖ ࡏࡅࡑࡓࡀ ࡌࡃࡀࡊࡀࡉ ࡖ ࡂࡀࡅࡓࡀ ࡅࡐࡉࡓࡑࡀ ࡅࡆࡀࡍࡉࡅࡕࡀ ࡋࡉࡕࡁࡀ ࡕࡊࡀࡃࡔࡀࡕ ࡅࡓࡀࡄࡌࡅࡕ ࡊࡅࡔࡈࡀ ࡅࡀࡍࡎࡀࡕ ࡄࡀࡆࡉࡍ ࡎࡉࡃࡓࡀ ࡖ ࡂࡀࡃࡀࡍࡀ ࡖ ࡄࡀࡅࡉࡋࡀ ࡃࡅࡊࡓࡀࡍࡀ ࡁࡕࡉࡁࡉࡋ ࡅࡄࡀࡕࡀࡌ ࡁࡀࡋࡌࡉࡀ ࡓࡅࡓࡁࡉࡀ ࡏࡋࡀࡉࡉࡀࡖ ࡍࡄࡅࡓࡀ ࡖ ࡄࡏ ࡏࡌࡀ ࡖ ࡀࡁ ࡃࡉࡋࡀࡉ ࡔࡅࡌࡀ ࡖ ࡌࡀࡑࡁࡅࡕࡀ ࡀࡍࡄࡀࡓ ࡐࡕ ࡔࡀࡓࡀࡕ ࡓࡅࡀࡄࡀ ࡖ ࡄࡉࡉࡀ ࡍࡉࡄࡅࡉࡋࡀ ࡅࡔࡅࡌࡀ ࡖ ࡒࡓࡉࡕࡀ (ࡀyࡉࡍ)ࡃࡉࡉࡇ ࡁࡓࡀࡕࡇ ࡖ ࡀࡃࡀࡌ ࡁࡓ ࡎࡀ(ࡀyࡉࡍ)ࡀࡃ ࡊࡉࡍࡉࡀࡍࡇ (ࡔ)ࡅࡉࡓࡉࡀ ࡖ ࡀࡍࡎࡀࡋࡀ ࡓࡁࡀ ࡅࡓࡉࡌࡀ ࡅࡉࡀࡒࡉࡓࡀ ࡓࡁࡀࡉ ࡓࡀࡌ ࡉࡅࡄࡀࡍࡀ ࡁࡓ ࡓࡁࡀࡉ ࡉࡀࡄࡉࡀ ࡆࡉࡄࡓࡅࡍ ࡁࡓ ࡓࡁࡀࡉ ࡆࡉࡄࡓࡅࡍ ࡁࡓ ࡓࡁࡀࡉ ࡀࡃࡀࡌ ࡁࡓ ࡓࡁࡀࡉ ࡉࡀࡄࡉࡀ ࡀࡃࡀࡌ ࡁࡓ ࡓࡁࡀࡉ ࡔࡉࡕࡉࡋ ࡁࡓ ࡓࡁࡀࡉ ࡓࡀࡌ ࡁࡓ ࡓࡁࡀࡉ ࡆࡀࡊࡉࡀ ࡁࡓ ࡓࡁࡀࡉ ࡉࡀࡄࡉࡀ ࡁࡓ ࡓࡁࡀࡉ ࡆࡀࡊࡉࡀ ࡁࡓ ࡀࡁࡅࡄࡅࡍ ࡖ ࡂࡀࡍࡆࡉࡁࡓࡉࡀ ࡓࡀࡁࡀࡉ ࡌࡄࡀࡕࡀࡌ ࡁࡓ ࡓࡁࡀࡉ ࡎࡀࡌ ࡋࡀࡒࡀࡁ ࡌࡉࡍࡃࡅࡉࡀ ࡅࡊࡉࡍࡉࡀࡍࡇ ࡏࡊࡅࡌࡀ ࡖ ࡀࡍࡎࡀࡋࡀ ࡌࡍ ࡎࡉࡃࡓࡀ ࡖ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡓࡁࡀࡉ ࡉࡀࡄࡉࡀ ࡆࡉࡄࡓࡅࡍ ࡁࡓ ࡓࡁࡀࡉ ࡉࡀࡄࡉࡀ ࡁࡉࡄࡓࡀࡌ ࡁࡓ ࡓࡁࡀࡉ ࡀࡃࡀࡌ ࡁࡓ ࡓࡁࡀࡉ ࡉࡀࡄࡉࡀ ࡀࡃࡀࡌ ࡋࡀࡒࡀࡁ ࡌࡀࡍࡃࡅࡉࡀ ࡅࡊࡉࡍࡉࡀࡍࡇ ࡏࡊࡅࡌࡀ ࡖ ࡀࡍࡎࡀ ࡋࡄࡀࡃ ࡔࡀࡋࡌࡀࡍࡀ ࡖ ࡄࡅ ࡏࡎࡕࡀࡃ ࡄࡀࡃࡀࡉࡀࡕ ࡁࡓ ࡏࡎࡕࡀࡃ ࡒࡀࡎࡅࡌ ࡁࡓ ࡁࡉࡄࡓࡀࡌ ࡁࡓ ࡆࡀࡊࡓࡉࡀ ࡌࡍ ࡁࡍࡉࡀ ࡃࡄࡃࡀࡓࡉࡀ ࡅࡊࡉࡍࡉࡀࡍࡇ ࡎࡀࡁࡅࡓ ࡌࡍ ࡎࡉࡃࡓࡀ ࡖ ࡓࡁࡀࡉ ࡆࡉࡄࡓࡅࡍ ࡁࡓ ࡀࡑࡈࡀ ࡐࡀࡓࡅࡊ ࡀࡑࡈࡀ ࡍࡅࡓࡅࡆ ࡄࡅࡀ ࡔࡅࡌࡀ ࡖ ࡌࡀࡑࡁࡅࡕࡇ ࡁࡉࡄࡓࡀࡌ ࡁࡓ ࡀࡃࡀࡌ ࡉࡅࡄࡀࡍࡀ ࡁࡓ ࡉࡀࡄࡉࡀ ࡁࡓ ࡆࡉࡄࡓࡅࡍ ࡁࡓ ࡉࡀࡄࡉࡀ ࡀࡍࡅࡔ ࡁࡓ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡓࡁࡀࡉ ࡌࡄࡀࡕࡀࡌ ࡁࡓ ࡉࡀࡄࡉࡀ ࡁࡀࡉࡀࡍ ࡁࡓ ࡉࡅࡄࡀࡍࡀ ࡔࡀࡃࡀࡍ ࡌࡍ ࡁࡍࡉࡀ ࡃࡉࡄࡃࡀࡓࡉࡀ ࡅࡊࡉࡍࡉࡀࡍࡇ ࡎࡀࡁࡅࡓ ࡖ ࡀࡍࡎࡀࡋࡀ ࡌࡍ ࡎࡉࡃࡓࡀ ࡖ ࡔࡀࡄࡀ ࡅࡔࡅࡌࡀ ࡖ ࡌࡀࡑࡁࡅࡕࡀ ࡄࡀࡅࡀ ࡌࡀࡌࡀࡍࡉࡀ ࡁࡓࡀࡕࡇ ࡖ (ࡀyࡉࡍ)ࡀࡆࡉࡆ ࡊࡉࡍࡉࡀࡍࡇ ࡅࡀࡔࡉࡀ ࡖ ࡀࡍࡎࡀࡋࡇ ࡌࡍ ࡎࡉࡃࡓࡀ ࡖ ࡁࡉࡄࡓࡀࡌ ࡁࡓ ࡄࡉࡉࡀ ࡁࡓ ࡀࡃࡀࡌ ࡆࡀࡊࡉࡀ ࡁࡓ ࡄࡉࡉࡀ ࡁࡓ ࡁࡀࡊࡕࡉࡀࡓ ࡁࡓ ࡀࡃࡀࡌ ࡁࡉࡄࡓࡀࡌ ࡊࡉࡍࡉࡀࡍࡇ ࡊࡅࡄࡉࡋࡉࡀ ࡖ ࡀࡍࡎࡀࡋࡇ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡀࡓࡃࡉࡊࡋࡀ ࡖ ࡉࡀࡃࡉࡕࡀ ࡅࡌࡀࡃࡉࡄࡕࡀ ࡓࡉࡔࡀࡉࡀ ࡅࡐࡓࡉࡔࡀࡉࡀ ࡂࡀࡍࡆࡉࡁࡓࡀ ࡁࡄࡉࡓࡀ ࡅࡔࡀࡋࡌࡀࡍࡀ ࡖ ࡏࡕࡄࡀࡉࡌࡀࡍ ࡁࡄࡉࡉࡀ ࡒࡀࡃࡌࡀࡉࡉࡀ ࡁࡓ ࡔࡉࡓࡔࡀ ࡕࡀࡒࡍࡀ ࡁࡓ  ࡒࡉࡍࡀ ࡌࡃࡀࡋࡀࡉࡕࡀ ࡓࡁࡀࡉࡀࡍ ࡓࡁࡀࡉ ࡉࡀࡄࡉࡀ ࡁࡉࡄࡓࡀࡌ ࡁࡓ ࡀࡁࡅࡄࡅࡍ ࡖ ࡂࡀࡍࡆࡉࡁࡓࡉࡀ ࡓࡁࡀࡉ ࡎࡀࡌ ࡁࡀࡄࡓࡀࡍ ࡁࡓ ࡉࡀࡄࡉࡀ ࡁࡓ ࡆࡀࡊࡉࡀ ࡁࡓ ࡉࡅࡄࡀࡍࡀ ࡋࡀࡒࡀࡁ ࡁࡄࡀࡉࡉࡓ ࡊࡉࡍࡉࡀࡍࡇ ࡆࡀࡊࡉࡀ ࡔࡁࡅࡒࡋࡇ ࡌࡀࡍࡃࡀ ࡖ ࡄࡉࡉࡀ ࡄࡀࡈࡀࡉࡉࡇ ࡀࡌࡉࡍࡈࡅࡋ ࡖ ࡄࡋࡀ ࡅࡏࡕࡉࡍࡂࡀࡓ ࡅࡊࡃࡀࡁ ࡄࡀࡆࡉࡍ ࡎࡉࡃࡓࡀ ࡖ ࡍࡉࡄࡅࡉࡋࡇ ࡃࡅࡊࡓࡀࡍࡀ ࡁࡕࡉࡁࡉࡋ ࡅࡄࡀࡕࡀࡌ ࡁࡀࡋࡌࡉࡀ ࡖ ࡍࡄࡅࡓࡀ ࡖ ࡀࡍࡎࡀࡋࡇ ࡌࡍ ࡆࡄࡀࡓࡉࡀ ࡖ ࡀࡍࡎࡀ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡂࡀࡍࡆࡉࡁࡓࡀ ࡕࡀࡒࡍࡀ ࡓࡁࡀࡉ ࡌࡄࡀࡕࡀࡌ ࡆࡉࡄࡓࡅࡍ ࡁࡓ ࡁࡓ ࡄࡉࡉࡀ ࡁࡓ ࡁࡀࡊࡕࡉࡀࡓ ࡁࡓ ࡀࡃࡀࡌ ࡁࡉࡄࡓࡀࡌ ࡊࡉࡍࡉࡀࡍࡇ ࡊࡅࡄࡉࡋࡉࡀ ࡔࡁࡉࡒࡋࡇ ࡌࡀࡍࡃࡀ ࡖ ࡄࡉࡉࡀ ࡄࡀࡈࡀࡉࡉࡇ ࡖ ࡀࡍࡎࡀࡋࡇ ࡋࡎࡀࡌ ࡉࡅࡄࡀࡍࡀ ࡁࡓ ࡌࡄࡀࡕࡀࡌ ࡁࡅࡋࡁࡅࡋ ࡁࡓ ࡎࡀࡌ ࡊࡉࡍࡉࡀࡍࡇ (ࡀyࡉࡍ)ࡀࡎࡉࡊࡉࡓ ࡌࡍ ࡎࡉࡃࡓࡀ ࡖ ࡓࡁࡀࡉ ࡀࡃࡀࡌ ࡁࡀࡊࡕࡉࡀࡓ ࡁࡓ ࡉࡀࡄࡉࡀ ࡆࡀࡊࡉࡀ ࡆࡉࡄࡓࡅࡍ ࡁࡓ ࡉࡅࡄࡀࡍࡀ ࡔࡉࡕࡋࡀࡍ ࡊࡉࡍࡉࡀࡍࡇ ࡓࡉࡔ ࡃࡓࡀࡆ ࡖ ࡀࡍࡎࡀࡋࡇ (ࡀyࡉࡍ)ࡀࡌࡅࡉࡉࡇ ࡓࡁࡀࡉ ࡉࡀࡄࡉࡀ ࡀࡃࡀࡌ ࡁࡓ ࡉࡅࡄࡀࡍࡀ ࡔࡉࡕࡋࡀࡍ ࡊࡉࡍࡉࡀࡍࡇ ࡓࡉࡔ ࡃࡓࡀࡆ ࡌࡍ ࡎࡉࡃࡓࡀ ࡖ ࡀࡍࡎࡀ ࡋࡍࡀࡐࡔࡉࡇ ࡓࡁࡀࡉ ࡉࡀࡄࡉࡀ ࡀࡃࡀࡌ ࡁࡓ ࡉࡅࡄࡀࡍࡀ ࡔࡉࡕࡋࡀࡍ ࡊࡉࡍࡉࡀࡍࡇ ࡓࡉࡔ ࡃࡓࡀࡆ ࡖ ࡀࡍࡎࡀ ࡌࡍ ࡎࡉࡃࡓࡀ ࡖ ࡌࡀࡓࡅࡀࡓࡉࡀ ࡁࡓࡀࡕࡇ ࡖ ࡀࡃࡀࡌ ࡁࡓ ࡉࡀࡄࡉࡀ ࡔࡀࡐࡅ ࡖ ࡀࡍࡎࡀࡋࡇ ࡓࡁࡀࡉ ࡉࡀࡄࡉࡀ ࡀࡃࡀࡌ ࡁࡓ ࡉࡅࡄࡀࡍࡀ ࡔࡉࡕࡋࡀࡍ ࡊࡉࡍࡉࡀࡍࡇ ࡓࡉࡔ ࡃࡓࡀࡆ ࡌࡍ ࡎࡉࡃࡓࡀ ࡖ ࡓࡁࡀࡉ ࡆࡉࡄࡓࡅࡍ ࡁࡓ ࡁࡉࡄࡃࡀࡃ ࡔࡀࡊࡅࡀࡍࡉࡀ ࡖ ࡀࡍࡎࡀࡋࡇ ࡓࡁࡀࡉ ࡉࡀࡄࡉࡀ ࡀࡃࡀࡌ ࡁࡓ ࡉࡅࡄࡀࡍࡀ ࡔࡉࡕࡋࡀࡍ ࡊࡉࡍࡉࡀࡍࡇ ࡓࡉࡔ ࡃࡓࡀࡆ ࡌࡍ ࡎࡉࡃࡓࡀ ࡖ ࡀࡄࡅࡉࡀ ࡖ ࡀࡁ ࡖ ࡀࡁࡅࡉࡀ ࡓࡁࡀࡉ ࡆࡉࡄࡓࡅࡍ ࡁࡓ ࡁࡉࡄࡃࡀࡃ ࡓࡉࡔ ࡃࡓࡀࡆ ࡖ ࡀࡍࡎࡀࡋࡇ ࡓࡁࡇ ࡓࡁࡀࡉ ࡉࡀࡄࡉࡀ ࡉࡅࡄࡀࡍࡀ ࡁࡓ ࡁࡉࡄࡃࡀࡃ ࡁࡓ ࡀࡍࡅࡔ ࡌ(ࡀyࡉࡍ)ࡀࡉࡋࡉࡀ ࡌࡍ ࡎࡉࡃࡓࡀ ࡄࡀࡕࡉࡒࡀ ࡖ ࡔࡕࡊࡉࡍ ࡋࡅࡀࡕࡇ ࡖ ࡉࡀࡄࡉࡀ ࡉࡅࡄࡀࡍࡀ ࡁࡉࡄࡃࡀࡃ ࡁࡓ ࡀࡍࡅࡔ ࡌ(ࡀyࡉࡍ)ࡀࡉࡋࡉࡀ ࡎࡅࡋࡉࡀ ࡖ ࡀࡍࡎࡀ ࡖ ࡀࡄࡅࡉࡀ ࡖ ࡀࡁ ࡀࡁࡅࡉࡀ ࡎࡀࡓࡅࡀࡍ ࡁࡓ ࡀࡃࡀࡌ ࡔࡀࡁࡅࡓ ࡅࡎࡀࡒࡌࡀ ࡄࡅ ࡉࡀࡄࡉࡀ ࡉࡅࡄࡀࡍࡀ ࡁࡉࡄࡃࡀࡃ ࡁࡓ ࡀࡍࡅࡔ ࡌ(ࡀyࡉࡍ)ࡀࡉࡋࡉࡀ ࡑࡀࡄࡉࡍࡅࡍ ࡋࡆࡄࡀࡓࡀ ࡅࡁࡀࡅࡀࡕࡀ ࡌࡍ ࡎࡉࡃࡓࡀ ࡖ ࡊࡃࡉࡁ ࡖ ࡏࡃࡀ ࡖ ࡀࡁࡅࡉࡀ ࡀࡍࡅࡔ ࡌ(ࡀyࡉࡍ)ࡀࡉࡋࡉࡀ ࡁࡓ ࡀࡍࡅࡔ ࡁࡉࡄࡃࡀࡃ ࡅࡕࡅࡌ ࡌࡍ ࡎࡉࡃࡓࡀ ࡄࡀࡕࡉࡒࡀ ࡖ ࡄࡅࡀ ࡋࡅࡀࡕࡇ ࡌࡍ ࡊࡃࡀࡁࡀ ࡏࡃࡀ ࡖ ࡉࡀࡄࡉࡀ ࡀࡃࡀࡌ ࡁࡓ ࡎࡀࡌ ࡎࡀࡉࡅࡉࡀ ࡌࡍ ࡎࡉࡃࡓࡀ ࡖ ࡔࡕࡊࡉࡍࡀࡕ ࡋࡅࡀࡕ ࡁࡀࡊࡕࡉࡀࡓ ࡁࡓ ࡆࡀࡊࡉࡀ ࡓࡉࡔࡀࡉࡉࡃ ࡌࡍ ࡎࡉࡃࡓࡀ ࡖ ࡄࡉࡁࡉࡋ ࡁࡓ ࡔࡉࡕࡋࡅࡉࡀ ࡖ ࡀࡍࡎࡀࡋࡅࡍ ࡎࡀࡌ ࡆࡉࡅࡀ ࡏࡒࡀࡉࡀࡌ ࡁࡓ ࡄࡉࡁࡉࡋ ࡅࡔࡀࡃ ࡆࡉࡄࡓࡅࡍ ࡋࡀࡄࡉࡀ ࡀࡃࡀࡌ ࡅࡎࡊࡀ ࡉࡀࡅࡀࡓ ࡁࡍࡉࡀ ࡉࡀࡄࡉࡀ ࡀࡔࡅࡀࡋࡀࡍࡄ ࡀࡍࡎࡀࡋࡅࡍ ࡌࡍ ࡎࡉࡃࡓࡀ ࡖ ࡄࡉࡁࡉࡋ ࡁࡓ ࡆࡀࡊࡉࡀ ࡄࡉࡁࡉࡋ ࡀࡍࡎࡀࡋࡇ ࡔࡀࡉࡀࡓ ࡁࡓ ࡆࡉࡄࡓࡅࡍ ࡌࡍ ࡎࡉࡃࡓࡀ ࡖ ࡔࡀࡉࡀࡓ ࡁࡓ ࡉࡅࡄࡀࡍࡀ ࡅࡔࡀࡉࡀࡓ ࡀࡍࡎࡀࡋࡇ ࡔࡀࡉࡀࡓ ࡁࡓ ࡆࡉࡄࡓࡅࡍ ࡌࡍ ࡎࡉࡃࡓࡀ ࡖ ࡉࡅࡄࡀࡍࡀ ࡁࡓ ࡆࡉࡍࡃࡀࡍࡀ ࡅࡉࡅࡄࡀࡍࡀ ࡀࡍࡎࡀࡋࡇࡓࡀࡁࡅࡉࡀ ࡓࡀࡌ ࡆࡉࡅࡀ ࡁࡉࡄࡓࡀࡌ ࡁࡓ ࡁࡀࡉࡀࡍ ࡄࡉࡁࡉࡋ ࡌࡍ ࡎࡉࡃࡓࡀ ࡖ ࡍࡀࡐࡔࡉࡇ ࡀࡍࡎࡀ ࡌࡍ ࡎࡉࡃࡓࡀ ࡖ ࡀࡁࡅࡉࡀ ࡁࡀࡉࡀࡍ ࡄࡉࡁࡉࡋ ࡌࡍ ࡎࡉࡃࡓࡀ ࡖ ࡁࡓ ࡁࡓࡉࡊ ࡉࡀࡅࡀࡓ ࡅࡀࡁࡅࡉࡀ ࡖ ࡏࡌࡇ ࡏࡒࡀࡉࡀࡌ ࡁࡓ ࡆࡉࡍࡃࡀࡍࡀ ࡅࡁࡀࡉࡀࡍ ࡄࡉࡁࡉࡋ ࡅࡏࡒࡀࡉࡀࡌ ࡁࡓ ࡆࡉࡍࡃࡀࡍࡀ ࡖ ࡀࡍࡎࡀ ࡌࡍ ࡔࡀࡐࡕࡀ ࡖ ࡁࡀࡉࡀࡍ ࡁࡓ ࡂࡀࡃࡀࡍࡀ ࡖ ࡄࡅࡀࡕ ࡁࡂࡉࡍࡆࡀ ࡖ ࡔࡀࡃ ࡌࡀࡍࡃࡀ ࡁࡓ ࡆࡊࡀ ࡉࡀࡅࡀࡓ ࡅࡄࡉࡁࡉࡋ ࡀࡍࡎࡀ ࡌࡍ ࡔࡀࡐࡕࡀ ࡖ ࡓࡁࡇ ࡖ ࡀࡁࡅࡉࡀ ࡁࡓ ࡓࡀࡁࡅࡉࡀ ࡖ ࡀࡄࡀࡉ ࡀࡍࡎࡀ ࡌࡍ ࡔࡀࡐࡕࡀ ࡖ ࡁࡓࡉࡊ ࡌࡀࡍࡃࡀ ࡁࡓ ࡆࡊࡀ ࡌࡀࡍࡃࡀ ࡅࡁࡓࡉࡊ ࡌࡀࡍࡃࡀ ࡀࡍࡎࡀ ࡌࡍ ࡔࡀࡐࡕࡀ ࡖ ࡔࡀࡃࡉࡀ ࡀࡄࡀ ࡏࡁࡇ ࡁࡓ ࡄࡀࡓࡌࡅࡆ ࡃࡅࡊࡕ ࡅࡁࡀࡎࡐࡅࡄࡓࡀ ࡀࡍࡎࡀ ࡌࡍ ࡓࡁࡇ ࡍࡅࡊࡓࡀࡉࡀ ࡁࡓ ࡔࡉࡅࡉࡋ ࡅࡍࡅࡊࡓࡀࡉࡀ ࡀࡍࡎࡀ ࡌࡍ ࡔࡅࡁࡀ ࡈࡅࡊࡎࡉࡀ ࡄࡀࡃ ࡖ ࡐࡀࡐࡀ ࡀࡍࡅࡔ ࡅࡄࡀࡃ ࡖ ࡍࡀࡄࡓࡉࡁࡍࡀ ࡅࡄࡃࡀ ࡖ ࡐࡀࡐࡀ ࡌࡍ ࡀࡁࡅࡉࡀ ࡆࡅࡓࡁࡀࡆ ࡅࡄࡀࡃ ࡌࡍ ࡔࡀࡐࡕࡀ ࡄࡀࡕࡉࡒࡕࡉࡀ ࡖ ࡔࡅࡌࡀ ࡋࡌࡀࡓࡇ ࡋࡀࡄࡅࡀ ࡊࡕࡉࡁࡀ ࡖ ࡀࡔࡊࡉࡕ ࡁࡂࡉࡍࡆࡀ ࡖ ࡒࡀࡉࡅࡌࡀ ࡁࡓ ࡍࡉࡍࡉࡀ ࡌࡍ ࡑࡉࡄࡋࡀ ࡄࡀࡃ ࡖ ࡄࡅࡀࡕ ࡋࡅࡀࡕ ࡌࡍ ࡌࡀࡄࡅࡆࡀ ࡖ ࡁࡉࡕ ࡓࡅࡌࡀࡉࡉࡀ ࡅࡄࡃࡀ ࡖ ࡐࡀࡓࡅࡊ ࡁࡓ ࡌࡀࡓࡎࡐࡉࡍࡃࡅ ࡀࡁࡅࡆࡃࡀࡒࡀࡃ ࡅࡐࡀࡓࡅࡊ ࡀࡍࡎࡀ ࡌࡍ ࡔࡅࡔࡅࡌࡀࡒ ࡍࡀࡄࡉࡓࡁࡍࡀ ࡅࡀࡎࡅࡕࡀ ࡍࡀࡐࡔࡀ ࡅࡄࡃࡀ ࡌࡍ ࡂࡉࡍࡆࡀ ࡖ ࡁࡉࡕ ࡀࡍࡀࡔࡉࡀ ࡖ ࡊࡕࡉࡁࡀ ࡖ ࡀࡁࡀ ࡖ ࡀࡁࡀ ࡖ ࡀࡁࡅࡉࡀ ࡖ ࡉࡀࡄࡉࡀ ࡉࡅࡄࡀࡍࡀ ࡁࡉࡄࡃࡀࡃ ࡁࡓ ࡀࡍࡅࡔ ࡌ(ࡀyࡉࡍ)ࡀࡉࡋࡉࡀ ࡅࡔࡀࡁࡅࡓ ࡁࡓ ࡃࡅࡊࡕ ࡌࡍ ࡌࡀࡔࡉࡅࡍ ࡖ ࡄࡅࡀࡕ ࡁࡀࡓࡒࡀ ࡖ ࡁࡅࡓࡊࡀ ࡅࡀࡁࡀ ࡖ ࡀࡁࡀ ࡖ ࡀࡁࡀ ࡖ ࡀࡁࡅࡉࡀ ࡅࡔࡁࡅࡓ ࡀࡍࡎࡀ ࡌࡍ ࡁࡓࡉࡊ ࡌࡀࡍࡃࡀ ࡅࡁࡓࡉࡊ ࡌࡀࡍࡃࡀ ࡀࡍࡎࡀ ࡌࡍ ࡀࡃࡀࡌ ࡔࡀࡁࡅࡓ ࡁࡓ ࡍࡉࡍࡉࡀ ࡅࡀࡃࡀࡌ ࡔࡀࡁࡅࡓ ࡀࡍࡎࡀ ࡁࡓ ࡆࡉࡒࡀ ࡁࡓ ࡍࡉࡍࡉࡀ ࡅࡀࡌࡀࡓ ࡀࡃࡀࡌ ࡔࡀࡁࡅࡓ ࡖ ࡀࡆࡋࡉࡕ ࡋࡁࡉࡕ ࡄࡅࡓࡃࡔࡀࡉࡉࡀ ࡅࡄࡉࡃࡓࡉࡕ ࡍࡀࡐࡔࡀ ࡅࡋࡀࡔࡊࡉࡕ ࡌࡀࡎࡉࡒࡕࡀ ࡌࡕࡀࡒࡀࡍࡕࡀ ࡗ ࡄࡀࡆࡉࡍ ࡌࡀࡎࡉࡒࡕࡀ ࡗ ࡖ ࡄࡆࡉࡕ ࡌࡕࡀࡒࡀࡍࡕࡀ ࡄࡀࡆࡀ ࡌࡀࡎࡉࡒࡕࡀ ࡌࡍ ࡌࡀࡎࡉࡒࡕࡀ ࡖ ࡄࡅࡀ ࡄࡆࡉࡋࡉࡀ ࡊࡕࡀࡁࡕࡀ ࡊࡅࡋ ࡕࡀࡓࡌࡉࡃࡀ ࡅࡌࡀࡍࡃࡀࡉࡀ ࡖ ࡁࡀࡉࡉࡀ ࡌࡉࡋࡂࡀࡈ ࡍࡉࡋࡂࡀࡈ ࡄࡀࡆࡀ ࡌࡀࡎࡉࡒࡕࡀ ࡄࡀࡔࡕࡀ ࡀࡍࡀࡕࡅࡍ ࡕࡀࡓࡌࡉࡃࡉࡀ ࡖ ࡋࡂࡀࡈ ࡅࡀࡔࡀࡓ ࡏࡋࡇ ࡖ ࡄࡀࡆࡀ ࡌࡀࡎࡉࡒࡕࡀ ࡖ ࡔࡀࡁࡉࡒ ࡄࡀࡈࡀࡉࡉࡀ ࡄࡀࡅࡉࡋࡊࡅࡍ ࡅࡄࡉࡉࡀ ࡅࡌࡀࡍࡃࡀ ࡖ ࡄࡉࡉࡀ ࡅࡊࡅࡋࡄࡅࡍ ࡏࡅࡕࡓࡉࡀ ࡁࡍࡉࡀ ࡍࡄࡅࡓࡀ ࡍࡉࡄࡅࡉࡋࡊࡅࡍ ࡀࡃࡉࡀࡅࡓࡀ ࡅࡊࡅࡋ ࡖ ࡋࡀࡌࡀࡔࡀࡓ ࡏࡋࡇ ࡍࡉࡓࡄࡅࡒ ࡌࡀࡍࡇ ࡅࡋࡀࡍࡉࡒࡓࡅࡁࡋࡇ ࡅࡄࡉࡉࡀ ࡆࡀࡊࡉࡍ ࡎࡀ. ࡕࡅࡌ ࡄࡀࡋࡉࡍ ࡁࡀࡅࡀࡕࡀ ࡌࡀࡍࡃࡉࡆࡉࡀ ࡌࡍ ࡕࡀࡐࡎࡉࡓ ࡖ ࡁࡀࡅࡀࡕࡀ ࡖ ࡌࡀࡑࡁࡅࡕࡀ ࡅࡌࡀࡎࡉࡒࡕࡀ ࡖ ࡌࡀࡍࡎࡀ ࡌࡍ ࡃࡉࡅࡀࡍ ࡖ ࡓࡀࡌࡅࡉࡀ ࡁࡓ ࡏࡒࡀࡉࡌࡀࡕ ࡊࡕࡀࡁ ࡀࡁࡅࡍ ࡁࡀࡉࡀࡍ ࡄࡉࡁࡉࡋ ࡁࡓ ࡁࡓࡉࡊ ࡉࡀࡅࡀࡓ ࡅࡓࡁࡀࡉࡀࡍ ࡁࡀࡉࡀࡍ ࡁࡓ ࡆࡀࡊࡉࡀ ࡖ ࡄࡅࡀࡕ ࡁࡂࡉࡍࡆࡀ ࡖ ࡄࡀࡆࡉࡍ ࡆࡄࡀࡓࡉࡀ ࡊࡕࡀࡁࡉࡍࡅࡍ ࡁࡀࡉࡀࡍ ࡁࡓ ࡁࡓࡉࡊ ࡉࡀࡅࡀࡓ ࡄࡀࡊࡀ ࡆࡓࡉࡍࡅࡍ ࡁࡄࡀࡋࡉࡍ ࡎࡉࡃࡓࡉࡀ ࡁࡌࡀ ࡖ ࡍࡀࡑࡅࡓࡀࡉࡉࡀ ࡌࡍ ࡃࡉࡅࡀࡍ ࡖ ࡍࡀࡐࡔࡉࡇ ࡖ ࡀࡍࡎࡀ ࡌࡍ ࡃࡉࡅࡀࡍ ࡖ ࡓࡀࡌࡅࡉࡀ ࡁࡓ ࡏࡒࡀࡉࡌࡀࡕ ࡖ ࡏࡔࡕࡉࡊࡍࡀࡕ ࡋࡅࡀࡕ ࡄࡀࡉࡅࡍࡀ ࡐࡕ ࡉࡀࡄࡉࡀ ࡅࡁࡀࡉࡀࡍ ࡁࡓ ࡆࡀࡊࡉࡀ ࡖ ࡄࡅࡀ ࡊࡕࡉࡁࡀ ࡁࡈࡉࡁ ࡌࡀࡕࡀ ࡅࡆࡀࡊࡉࡀ ࡀࡍࡎࡀ ࡌࡍ ࡃࡉࡅࡀࡍ ࡖ ࡓࡀࡌࡅࡉࡀ ࡁࡓ ࡏࡒࡀࡉࡌࡀࡕ ࡅࡉࡀࡄࡉࡀ ࡀࡍࡎࡀ ࡌࡍ ࡃࡉࡅࡀࡍ ࡖ ࡎࡀࡌ ࡁࡓ ࡀࡍࡅࡔ ࡉࡀࡄࡉࡀ ࡅࡎࡀࡌ ࡀࡍࡎࡀ ࡌࡍ ࡃࡉࡅࡀࡍ ࡖ ࡁࡉࡄࡓࡀࡌ ࡁࡓ ࡁࡓࡉࡊ ࡀࡋࡀࡄࡀ ࡅࡀࡍࡅࡔ ࡀࡋࡀࡄࡀ ࡀࡍࡎࡀ ࡌࡍ ࡃࡉࡅࡀࡍ ࡖ ࡏࡒࡀࡉࡉࡌ ࡁࡓ ࡔࡀࡓࡀࡕ ࡅࡏࡒࡀࡉࡀࡌ ࡀࡍࡎࡀ ࡌࡍ ࡒࡀࡉࡅࡌࡀ ࡁࡓ ࡁࡓࡉࡊ ࡀࡋࡀࡄࡀ ࡅࡒࡀࡉࡌࡀ ࡀࡍࡎࡀ ࡌࡍ ࡔࡂࡀࡍࡃࡀ ࡁࡓ ࡉࡀࡎࡌࡉࡍ ࡅࡔࡂࡀࡍࡃࡀ ࡁࡓ ࡉࡀࡎࡌࡉࡍ ࡀࡍࡎࡀ ࡌࡍ ࡃࡉࡅࡀࡍ ࡖ ࡆࡀࡆࡀࡉ ࡖ ࡂࡀࡅࡀࡆࡕࡀ ࡁࡓ ࡄࡀࡅࡀ ࡅࡆࡀࡆࡀࡉ ࡖ ࡂࡀࡅࡀࡆࡕࡀ ࡁࡓ ࡄࡀࡅࡀ ࡀࡍࡎࡀ ࡌࡍ ࡃࡉࡅࡀࡍ ࡖ ࡄࡉࡉࡀ ࡒࡀࡃࡌࡀࡉࡉࡀ ࡅࡀࡌࡀࡓ ࡓࡀࡌࡅࡉࡀ ࡁࡓ ࡏࡒࡀࡉࡌࡀࡕ ࡌࡍ ࡉࡅࡌࡀ ࡖ ࡍࡉࡐࡋࡀࡕ ࡌࡍ ࡆࡀࡆࡀࡉ ࡖ ࡂࡀࡅࡀࡆࡕࡀ ࡁࡓ ࡄࡀࡅࡀ ࡅࡋࡄࡀࡔࡕࡀ ࡔࡍࡉࡀ ࡖ ࡊࡕࡀࡁࡕࡀ ࡀࡍࡀ ࡕࡋࡀࡕࡌࡀ ࡅࡔࡉࡕࡉࡍ ࡅࡕࡌࡀࡍࡉࡀ ࡔࡍࡉࡀ ࡀࡊࡋࡀࡕ ࡁࡃࡉࡓࡉࡀ ࡅࡀࡌࡀࡓ ࡓࡀࡌࡅࡉࡀ ࡁࡓ ࡏࡒࡀࡉࡌࡀࡕ ࡊࡕࡀࡁࡕࡀ ࡋࡄࡀࡆࡉࡍ ࡃࡉࡅࡀࡍ ࡁࡈࡉࡁ ࡌࡀࡕࡀ ࡁࡔࡍࡉࡀ ࡖ ࡍࡐࡀࡒ ࡀࡍࡅࡔ ࡁࡓ ࡃࡀࡍࡒࡀ ࡁࡓࡉࡔ ࡀࡌࡀࡍ ࡁࡔࡍࡉࡀ ࡖ ࡒࡀࡁࡉࡋࡉࡅࡍ ࡀࡓࡁࡀࡉࡉࡀ ࡕࡅࡌ ࡊࡕࡉࡁ ࡁࡀࡉࡀࡍ ࡄࡉࡁࡉࡋ ࡁࡓ ࡁࡓࡉࡊ ࡉࡅࡀࡓ ࡖ ࡍࡀࡐࡔࡉࡇ ࡄࡋࡉࡕࡀ ࡄࡅࡀࡋࡉࡀ ࡋࡄࡀࡋࡉࡍ ࡓࡀࡆࡉࡀ ࡅࡍࡀࡐࡔࡀ ࡄࡉࡃࡓࡀࡕ ࡅࡀࡎࡂࡉࡕ ࡁࡋࡉࡂࡓࡀࡉ ࡀࡋࡌࡀ ࡋࡍࡀࡑࡅࡓࡀࡉࡉࡀ ࡅࡒࡀࡓࡁࡉࡕ ࡃࡉࡅࡀࡍࡀࡍ ࡍࡀࡐࡔࡀࡕࡀ ࡌࡍ ࡃࡅࡊ ࡃࡅࡊ ࡅࡋࡀࡔࡊࡉࡕ ࡓࡀࡆࡉࡀ ࡌࡕࡀࡒࡍࡉࡀ ࡗ ࡄࡀࡋࡉࡍ ࡓࡀࡆࡉࡀ ࡖ ࡌࡀࡑࡁࡅࡕࡀ ࡅࡌࡀࡎࡉࡒࡕࡀ ࡅࡌࡉࡔࡀ ࡊࡕࡀࡁࡉࡍࡅࡍ ࡅࡄࡀࡊࡀ ࡆࡓࡉࡍࡅࡍ ࡁࡌࡀ ࡖ ࡍࡀࡑࡅࡓࡀࡉࡉࡀ ࡖ ࡋࡀࡂࡈࡉࡀ ࡅࡌࡀࡔࡓࡉࡀ ࡏࡋࡀࡅࡀࡉࡄࡅࡍ ࡄࡀࡔࡕࡀ ࡀࡍࡀࡕࡅࡍ ࡕࡀࡓࡌࡉࡃࡉࡀ ࡋࡂࡅࡈ ࡅࡀࡔࡀࡓ ࡋࡄࡀࡆࡉࡍ ࡎࡀࡊࡀ ࡄࡀࡊࡅࡀࡕ ࡏࡅࡕࡓࡉࡀ ࡖ ࡀࡓࡒࡀ ࡖ ࡍࡄࡅࡓࡀ ࡖ ࡁࡄࡀࡋࡉࡍ  ࡓࡀࡆࡉࡀ ࡒࡀࡌ ࡊࡅࡋࡄࡅࡍ ࡖ ࡋࡀࡂࡉࡈ ࡅࡌࡀࡔࡀࡓ ࡏࡋࡇ ࡁࡋࡀࡅࡐࡇ ࡖ ࡉࡀࡅࡀࡓ ࡌࡉࡕࡋࡉࡐࡅࡊࡅࡋ ࡖ ࡋࡀࡌࡀࡔࡀࡓ ࡋࡄࡀࡆࡉࡍ ࡎࡀࡊࡀ ࡍࡉࡓࡄࡅࡒ ࡌࡉࡍࡇ ࡅࡋࡀࡍࡉࡒࡓࡅࡁࡋࡇ ࡅࡍࡉࡆࡀࡋ ࡁࡀࡋࡁࡅࡔࡉࡇ ࡅࡍࡉࡕࡊࡀࡓࡀࡊ ࡁࡆࡅࡄࡌࡉࡕࡀ ࡖ ࡎࡅࡌࡒࡀࡒ ࡀࡉࡍࡀ ࡕࡉࡄࡅࡉࡀ ࡌࡃࡅࡓࡕࡇ . ࡕࡅࡌ ࡊࡕࡀࡁࡀ ࡓࡀࡌ ࡆࡉࡅࡀ ࡁࡉࡄࡓࡀࡌ ࡁࡓ ࡁࡀࡉࡀࡍ ࡖ ࡄࡆࡉࡕ ࡁࡃࡉࡅࡀࡍ ࡖ ࡀࡉࡍࡀ ࡓࡀࡁࡕࡉࡀ ࡖ ࡓࡀࡌࡅࡉࡀ ࡁࡓ ࡏࡒࡀࡉࡌࡀࡕ ࡖ ࡊࡅࡋࡌࡀࡍ ࡖ ࡎࡉࡃࡓࡀ ࡖ ࡂࡀࡃࡀࡍࡀ ࡍࡉࡊࡕࡀࡁ ࡅࡍࡉࡔࡀࡍࡉࡀ ࡁࡆࡄࡀࡓࡉࡀ ࡖ ࡄࡀࡕࡌࡉࡀ ࡖ ࡊࡕࡉࡁࡉࡀ ࡁࡂࡀࡅࡇ ࡁࡓࡐࡉࡋࡉࡀ ࡖ ࡄࡔࡅࡊࡀ ࡕࡀࡕࡍࡅࡍࡇ ࡊࡅࡋ ࡌࡀࡍ ࡖ ࡎࡉࡃࡓࡀ ࡖ ࡎࡅࡋࡉࡀ ࡍࡉࡊࡕࡀࡁ ࡅࡍࡉࡔࡀࡍࡉࡀ ࡁࡆࡄࡀࡓࡉࡀ ࡖ ࡕࡁࡉࡓࡉࡀ ࡖ ࡏࡕࡄࡉࡁࡋࡇ ࡊࡃࡉࡁࡉࡀ ࡁࡂࡀࡅࡇ ࡁࡋࡅࡈࡕࡀ ࡓࡀࡁࡕࡉࡀ ࡍࡉࡋࡉࡈࡅࡍࡇ . ࡀࡌࡉࡍࡈࡅࡋ ࡖ ࡄࡀࡆࡉࡍ ࡋࡅࡈࡕࡀ ࡋࡀࡈࡅࡉࡀ ࡅࡀࡌࡀࡓࡉࡅࡍ ࡄࡉࡉࡀ ࡒࡀࡃࡌࡀࡉࡉࡀ ࡊࡅࡋࡌࡀࡍ ࡖ ࡄࡀࡌࡁࡀࡂࡀ ࡋࡍࡄࡅࡓࡀ ࡍࡉࡄࡅࡀࡋࡇ ࡌࡅࡕࡀ ࡕࡉࡍࡉࡀࡍࡀ ࡍࡉࡌࡅࡕ ࡖ ࡄࡀࡌࡁࡀࡂࡀ ࡋࡄࡔࡅࡊࡀ ࡍࡉࡄࡅࡉࡋࡇ ࡍࡀࡐࡉࡋ ࡅࡌࡉࡒࡌࡀ ࡋࡉࡕࡋࡇ ࡅࡓࡄࡑࡀࡍࡀ ࡋࡄࡉࡉࡀ ࡖ ࡋࡀࡔࡀࡍࡉࡍ ࡌࡉࡍࡃࡀࡌ ࡌࡍ ࡌࡀࡄࡅ ࡊࡕࡀࡁࡉࡅࡍ ࡅࡀࡐࡓࡉࡔ ࡏࡋࡇ ࡅࡏࡍࡉࡔ ࡏࡍࡉࡔ ࡄࡅ ࡅࡓࡉࡅࡉࡀࡍࡇ ࡅࡐࡓࡉࡒࡍࡉࡍ ࡌࡍ ࡄࡀࡈࡀࡉࡀࡍ . ࡕࡅࡌ ࡊࡅࡋࡌࡀࡍ ࡖ ࡍࡉࡐࡎࡀࡒ ࡀࡎࡀࡕࡀ ࡅࡍࡉࡕࡒࡀࡓ ࡔࡅࡌࡀ ࡖ ࡌࡀࡓࡇ ࡍࡉࡐࡎࡀࡒ ࡋࡌࡀࡈࡀࡓࡀࡕࡀ ࡖ ࡔࡉࡁࡉࡀࡄࡉࡀ ࡅࡁࡃࡉࡍࡀ ࡓࡁࡀ ࡍࡉࡒࡅࡌ ࡅࡀࡁࡀࡕࡅࡓ ࡊࡅࡔࡈࡀ ࡌࡉࡍࡇ ࡋࡀࡍࡉࡐࡔࡉࡈ ࡅࡄࡉࡉࡀ ࡆࡀࡊࡉࡍ ࡋࡊࡅࡋࡄࡅࡍ ࡏࡅࡁࡀࡃࡉࡀ ࡅࡆࡀࡊࡉࡀ ࡉࡀࡅࡀࡓ ࡆࡉࡅࡀ ࡅࡃࡉࡀࡅࡓࡇ ࡅࡀࡌࡇ ࡅࡕࡀࡓࡌࡉࡃࡇ ࡅࡋࡉࡂࡉࡈࡕࡇ ࡅࡄࡉࡉࡀ ࡆࡀࡊࡉࡍ ࡋࡊࡅࡄࡅࡍ ࡏࡅࡁࡀࡃࡉࡀ ࡎࡀ

75. ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡅࡄࡀࡉࡋࡀ ࡅࡔࡓࡀࡓࡀ ࡅࡏࡌࡓࡀ ࡅࡔࡉࡌࡀ ࡍࡉࡄࡅࡉࡋࡉࡀ ࡋࡃࡉࡋࡉࡀ ࡌࡍ ࡄࡉࡉࡀ ࡀࡅࡃࡉࡍ ࡅࡕࡅࡔࡁࡉࡄࡀࡍ ࡋࡄࡉࡉࡀ ࡓࡅࡓࡁࡉࡀ ࡍࡅࡊࡓࡀࡉࡉࡀ ࡒࡀࡃࡌࡀࡉࡉࡀ ࡉࡀࡕࡉࡓࡉࡀ ࡖ ࡏࡋࡀࡅࡉࡀ ࡅࡊࡅࡋࡄࡅࡍ ࡏࡅࡁࡀࡃࡉࡀ ࡌࡉࡕࡉࡍ ࡓࡉࡔ ࡅࡐࡅࡌ ࡋࡄࡉࡉࡀ ࡅࡌࡀࡋࡀࡋࡀ ࡍࡑࡉࡁࡀ ࡋࡏࡅࡑࡀࡓ ࡍࡄࡅࡓࡀ ࡍࡉࡀࡄࡀ ࡅࡎࡉࡌࡀࡊࡀ ࡓࡁࡀ ࡖ ࡄࡉࡉࡀ ࡋࡔࡀࡁࡅࡄࡀࡊ ࡋࡉࡀࡒࡅࡓࡀࡊ ࡋࡓࡀࡓࡅࡁࡀࡊ ࡅࡋࡁࡀࡓࡅࡊࡀࡊ ࡅࡋࡒࡀࡉࡅࡌࡀࡊ ࡌࡀࡍ ࡋࡄࡉࡉࡀ ࡍࡉࡔࡀࡁࡀࡊ ࡅࡌࡀࡍ ࡋࡄࡉࡉࡀ ࡍࡉࡓࡀࡅࡓࡀࡁ ࡋࡓࡀࡁࡅࡕ ࡆࡀࡊࡀࡅࡀࡕࡀࡊ ࡀࡍࡀࡕ ࡌࡔࡀࡁࡉࡕ ࡅࡀࡍࡀࡕ ࡌࡓࡀࡅࡓࡁࡉࡕ ࡅࡀࡍࡀࡕ ࡌࡉࡀࡒࡓࡉࡕ ࡅࡀࡍࡀࡕ ࡌࡒࡀࡉࡌࡉࡕ ࡅࡀࡍࡀࡕ ࡏࡕࡉࡕ ࡅࡀࡍࡀࡕ ࡀࡕࡉࡕ ࡋࡁࡀࡓ ࡌࡀࡍ ࡃࡉࡋࡀࡊ ࡏࡍࡉࡔ ࡋࡀࡕࡀ ࡁࡆࡉࡅࡀࡊ ࡎࡀࡓࡀࡓࡊࡅࡁࡉࡀ ࡅࡁࡀࡍࡄࡅࡓࡀࡊ ࡏࡔࡕࡀࡂࡀࡔ ࡕࡉࡓࡉࡀ ࡅࡌࡀࡋࡊࡀࡅࡀࡕࡀ ࡉࡀࡓࡃࡍࡀ ࡖ ࡄࡉࡆࡉࡀࡊ ࡀࡐࡀࡊ ࡅࡂࡉࡋࡉࡀ ࡉࡀࡌࡀ ࡏࡕࡀࡐࡀࡊ ࡍࡂࡀࡅࡉࡀ ࡉࡀࡌࡀ

ࡏࡔࡕࡀࡂࡀࡔ ࡅࡌࡀࡓࡊࡀࡁࡀࡕࡀ ࡏࡎࡕࡀࡄࡀࡐ ࡅࡍࡐࡀࡋ ࡀࡋࡀࡍࡐࡀࡉࡄࡅࡍ ࡀࡓࡆࡉࡀ ࡁࡋࡉࡋࡁࡀࡍ ࡏࡕࡀࡁࡀࡓ ࡈࡅࡓࡉࡀ ࡌࡍࡀࡍࡃࡉࡀ ࡅࡓࡀࡒࡃࡉࡀ ࡗ ࡀࡉࡋࡉࡀ ࡐࡕࡀ ࡅࡏࡄࡀࡁ ࡕࡅࡔࡁࡉࡄࡕࡀ ࡅࡀࡉࡋࡀࡕࡀ ࡁࡃࡁࡀࡓ ࡌࡔࡀࡄࡈࡀ ࡏࡅࡋࡀࡉࡄࡉࡍ ࡅࡀࡓࡀࡌࡀࡕࡀ ࡒࡀࡉࡌࡀ ࡅࡌࡀࡌࡋࡉࡋࡀ ࡁࡏࡒࡀࡓࡀ ࡀࡓࡒࡀ ࡆࡀࡄࡀࡕ ࡅࡏࡕࡀࡆࡉࡄࡀࡕ ࡉࡀࡓࡃࡍࡀ ࡋࡌࡀࡍ ࡄࡆࡉࡕ ࡅࡀࡐࡀࡊࡕ ࡅࡂࡉࡋࡉࡀ ࡉࡀࡌࡀ ࡋࡌࡀࡄࡅ ࡏࡕࡀࡐࡀࡊࡕࡅࡍ ࡍࡂࡀࡅࡉࡀ ࡉࡀࡌࡀ ࡋࡌࡀࡄࡅ

ࡏࡔࡕࡀࡂࡀࡔࡕࡅࡍ ࡅࡌࡀࡓࡊࡀࡁࡀࡕࡀ ࡋࡌࡀࡄࡅ ࡏࡎࡕࡀࡄࡀࡐࡕࡉࡍ ࡅࡍࡐࡀࡋࡕࡉࡍ ࡀࡋࡀࡍࡐࡀࡉࡊࡉࡍ ࡀࡓࡆࡉࡀ ࡁࡋࡉࡋࡁࡀࡍ ࡋࡌࡀࡄࡅ ࡏࡕࡀࡁࡀࡓࡕࡉࡍ ࡈࡅࡓࡉࡀ ࡋࡌࡀࡄࡅ ࡏࡍࡀࡍࡃࡉࡕࡉࡍ ࡅࡓࡀࡒࡃࡉࡕࡉࡍ ࡗ ࡀࡉࡋࡉࡀ ࡐࡀࡄࡕࡉࡕࡉࡍ ࡕࡅࡔࡁࡉࡄࡕࡀ ࡅࡀࡉࡋࡀࡕࡀ ࡁࡃࡁࡀࡓ ࡋࡌࡀࡍ ࡌࡔࡀࡄࡈࡉࡕࡉࡍ

ࡏࡅࡋࡀࡉࡊࡉࡍ ࡅࡀࡓࡀࡌࡀࡕࡀ ࡋࡌࡀࡍ ࡄࡅ ࡒࡀࡉࡌࡉࡕࡉࡍ ࡅࡌࡀࡌࡋࡉࡋࡉࡕࡉࡍ ࡁࡏࡒࡀࡓࡀ ࡀࡓࡒࡀ ࡋࡌࡀࡍ ࡄࡆࡀࡕ ࡅࡏࡕࡀࡆࡉࡄࡀࡕ ࡋࡆࡉࡅࡀ ࡖ ࡏࡋࡀࡅࡉࡀ ࡆࡉࡅࡉࡀ ࡅࡋࡍࡄࡅࡓࡀ ࡖ ࡏࡋࡀࡅࡉࡀ ࡍࡄࡅࡓࡉࡀ ࡅࡋࡂࡀࡁࡓࡀ ࡈࡀࡁࡀ ࡖ ࡀࡁࡀࡓ ࡀࡋࡌࡉࡀ ࡅࡀࡕࡀ ࡅࡁࡆࡀ ࡓࡒࡉࡄࡀ ࡅࡏࡕࡉࡂࡋࡉࡀ ࡗ ࡀࡃࡉࡒ ࡄࡉࡉࡀ ࡎࡉࡊࡉࡅࡉࡀ ࡋࡕࡉࡁࡉࡋ ࡅࡍࡐࡀࡋ ࡆࡉࡅࡀࡉࡄࡅࡍ ࡋࡈࡋࡀࡋࡉࡀ ࡁࡉࡍࡉࡀࡍࡀ ࡉࡀࡕࡁࡉࡀ ࡋࡊࡀࡓࡎࡀࡅࡀࡕࡀ ࡖ ࡌࡉࡓࡃࡀ ࡅࡏࡕࡉࡓࡊࡉࡍ ࡌࡍ ࡊࡀࡓࡎࡀࡅࡀࡕࡅࡍ ࡅࡍࡐࡀࡋ ࡀࡋࡀࡍࡐࡀࡉࡄࡅࡍ ࡀࡄࡐࡀ ࡍࡉࡎࡁࡇ ࡋࡆࡉࡅࡀࡉࡄࡅࡍ ࡖ ࡀࡋࡌࡉࡀ ࡅࡃࡀࡓࡉࡀ ࡅࡃࡀࡄࡉࡊ ࡍࡅࡓࡉࡀ ࡔࡓࡀࡂࡀࡉࡄࡅࡍ ࡀࡅࡕࡉࡁ ࡀࡉࡍࡀࡉࡄࡅࡍ ࡖ ࡔࡉࡁࡉࡀࡄࡉࡀ ࡁࡏࡅࡌࡒࡉࡀ ࡖ ࡀࡓࡒࡀ ࡅࡁࡓࡐࡉࡋࡉࡀ ࡕࡉࡕࡀࡉࡕࡀ ࡖ ࡄࡔࡅࡊࡀ ࡅࡀࡓࡉࡌࡀࡕ ࡓࡅࡄࡀ ࡁࡒࡀࡋࡀ ࡑࡉࡍࡐࡀࡕ ࡅࡀࡌࡓࡀ ࡀࡁ ࡀࡁ ࡋࡌࡀࡄࡅ ࡒࡓࡀࡉࡕࡀࡍ ࡏࡉࡉࡋ ࡏࡉࡉࡋ ࡀࡋࡀࡄࡀ ࡋࡌࡀࡄࡅ ࡓࡀࡄࡉࡒࡕࡀࡍ ࡅࡐࡎࡀࡒࡕࡀࡍ ࡅࡔࡁࡀࡒࡕࡀࡍ ࡁࡏࡅࡌࡒࡉࡀ ࡖ ࡀࡓࡒࡀ ࡅࡁࡓࡐࡉࡋࡉࡀ ࡕࡉࡕࡀࡉࡕࡀ ࡖ ࡄࡔࡅࡊࡀ ࡅࡋࡉࡕࡋࡉࡀ ࡄࡀࡉࡋࡀ ࡋࡌࡉࡎࡀࡒ ࡋࡕࡀࡌ ࡒࡀࡌ ࡊࡅࡋࡄࡅࡍ ࡁࡅࡍ ࡅࡔࡀࡁࡀ ࡁࡓࡀࡁࡅࡕ ࡓࡅࡓࡁࡉࡀ ࡅࡆࡀࡌࡀࡓ ࡒࡀࡋࡀࡉࡄࡅࡍ ࡋࡏࡒࡀࡓࡀ ࡖ ࡍࡐࡉࡔ ࡅࡌࡔࡀࡁࡉࡋࡇ ࡋࡆࡉࡅࡀ ࡖ ࡏࡋࡀࡅࡉࡀ ࡆࡉࡅࡉࡀ ࡅࡋࡍࡄࡅࡓࡀ ࡖ ࡏࡋࡀࡅࡉࡀ ࡍࡄࡅࡓࡉࡀ ࡅࡋࡂࡀࡁࡓࡀ ࡈࡀࡁࡀ ࡖ ࡀࡁࡀࡓ ࡀࡋࡌࡉࡀ ࡅࡀࡕࡀ ࡅࡁࡆࡀ ࡓࡒࡉࡄࡀ ࡅࡏࡕࡉࡂࡋࡉࡀ ࡀࡐࡓࡉࡔ ࡍࡄࡅࡓࡀ ࡌࡍ ࡄࡔࡅࡊࡀ ࡅࡀࡐࡓࡉࡔ ࡈࡀࡁࡀ ࡌࡍ ࡁࡉࡔࡀ ࡅࡀࡐࡓࡉࡔ ࡄࡉࡉࡀ ࡌࡍ ࡌࡅࡕࡀ ࡅࡀࡐࡓࡉࡔࡉࡍࡅࡍ ࡋࡓࡀࡄࡌࡉࡀ ࡔࡅࡌࡇ ࡖ ࡊࡅࡔࡈࡀ ࡌࡍ ࡄࡔࡅࡊࡀ ࡏࡋ ࡍࡄࡅࡓࡀ ࡅࡌࡍ ࡁࡉࡔࡀ ࡋࡈࡀࡁࡀ ࡅࡌࡍ ࡌࡅࡕࡀ ࡋࡄࡉࡉࡀ ࡅࡀࡒࡉࡌࡕࡉࡍࡅࡍ ࡁࡃࡉࡓࡊࡉࡀ ࡖ ࡊࡅࡔࡈࡀ ࡅࡄࡀࡉࡌࡀࡍࡅࡕࡀ ࡀࡍࡀࡕ ࡀࡌࡀࡓࡕࡋࡀࡍ ࡁࡌࡉࡌࡓࡀࡊ ࡅࡐࡀࡒࡉࡃࡕࡉࡍࡀࡍ ࡁࡐࡅࡂࡃࡀࡌࡀࡊ ࡀࡍࡀࡕࡅࡍ ࡄࡅࡍ ࡆࡉࡅ ࡅࡀࡍࡀ ࡏࡄࡅࡉࡀ ࡆࡉࡅࡀࡉࡊࡅࡍ ࡀࡍࡀࡕࡅࡍ ࡄࡅࡍ ࡍࡄࡅࡓ ࡅࡀࡍࡀ ࡏࡄࡅࡉࡀ ࡍࡄࡅࡓࡀࡉࡊࡅࡍ ࡅࡔࡅࡌࡀࡉ ࡍࡉࡄࡅࡉࡀ ࡁࡐࡅࡌࡀࡉࡊࡅࡍ ࡅࡀࡍࡀ ࡋࡅࡀࡕࡀࡉࡊࡅࡍ ࡀࡍࡀࡕ ࡄࡅ ࡖ ࡌࡒࡀࡓࡒࡋࡉࡕ ࡀࡋࡀࡄࡉࡀ ࡁࡏࡊࡅࡓࡀࡉࡄࡅࡍ ࡅࡉࡀࡄࡁࡉࡕ ࡀࡊࡀࡎࡕࡀ ࡋࡀࡋࡀࡄࡅࡕࡀ ࡀࡋࡀࡄࡉࡀ ࡏࡕࡉࡓࡎࡉࡍ ࡁࡁࡀࡄࡕࡅࡕࡀ ࡋࡏࡅࡄࡓࡀࡉࡄࡅࡍ ࡅࡏࡋ

ࡏࡊࡅࡓࡀࡉࡄࡅࡍ ࡍࡐࡉࡔ ࡒࡋࡀࡋࡅࡍ ࡀࡃࡀ ࡏࡋࡀࡅࡀࡉࡄࡅࡍ ࡅࡓࡉࡂࡋࡀ ࡋࡕࡅࡒࡐࡀࡉࡄࡅࡍ ࡍࡀࡐࡔࡀ ࡄࡏ ࡂࡉࡅࡕࡀ ࡖ ࡏࡕࡋࡀࡁࡀࡔࡁࡇ ࡄࡅ ࡌࡀࡍࡃࡀ ࡖ ࡄࡉࡉࡀ ࡁࡓࡉࡊ ࡄࡀࡊ ࡉࡅࡌࡀ ࡖ ࡍࡄࡅࡓࡀ ࡅࡌࡔࡀࡁࡀ ࡍࡉࡄࡂࡀ ࡖ ࡀࡎࡂࡉࡕ ࡅࡀࡕࡉࡕ ࡌࡍ ࡀࡋࡌࡉࡀ ࡖ ࡍࡄࡅࡓࡀ ࡖ ࡁࡌࡉࡍࡉࡀࡍ ࡉࡅࡌࡉࡀ ࡋࡀࡏࡕࡉࡌࡍࡉࡀ ࡅࡁࡄࡅࡔࡁࡀࡍ ࡉࡀࡄࡓࡉࡀ ࡋࡀࡏࡄࡔࡉࡁ ࡋࡁࡀࡓ ࡌࡍ ࡄࡀࡄࡅ ࡉࡅࡌࡀ ࡖ ࡏࡕࡂࡋࡉࡕࡁࡇ ࡌࡍ ࡀࡋࡌࡉࡀ ࡖ ࡍࡄࡅࡓࡀ ࡍࡉࡕࡂࡀࡋࡀࡋࡅࡍ ࡉࡅࡌࡀ ࡖ ࡏࡕࡉࡂࡋࡉࡕࡁࡇ ࡋࡊࡅࡋࡄࡅࡍ ࡓࡀࡄࡌࡉࡀ ࡔࡅࡌࡀࡊ ࡖ ࡊࡅࡔࡈࡀ ࡍࡉࡎࡀࡒ ࡃࡅࡊࡓࡀࡍࡀࡍ ࡅࡔࡅࡋࡕࡀࡍ ࡅࡁࡅࡕࡀࡍ ࡅࡃࡍࡅࡕࡀࡍ ࡅࡈࡀࡁࡅࡕࡀࡍ ࡅࡎࡉࡁࡓࡅࡕࡀࡍ ࡒࡅࡃࡀࡌࡀࡊ ࡏࡅࡑࡀࡓ ࡍࡄࡅࡓࡀ ࡍࡉࡀࡄࡀ ࡅࡎࡉࡌࡀࡊࡀ ࡓࡁࡀ ࡖ ࡄࡉࡉࡀ ࡄࡉࡍ ࡔࡅࡁࡀ ࡆࡉࡁࡍࡉࡀ ࡁࡉࡅࡌࡀ ࡕࡅࡌ ࡍࡉࡒࡅࡌ ࡅࡍࡉࡔࡀࡁࡀࡊ ࡋࡔࡅࡌࡀࡊ ࡅࡋࡊࡉࡍࡉࡀࡍࡀࡊ ࡅࡋࡈࡀࡁࡅࡕࡀࡊ ࡌࡀࡓࡀࡉ ࡌࡀࡍ ࡋࡄࡉࡉࡀ ࡍࡉࡔࡀࡁࡀࡊ ࡅࡌࡀࡍ ࡋࡄࡉࡉࡀ ࡍࡉࡓࡀࡅࡓࡀࡁ ࡋࡓࡀࡁࡅࡕ ࡆࡀࡊࡀࡅࡀࡕࡀࡊ ࡐࡀࡂࡓࡀ ࡎࡀࡓࡉࡀ ࡍࡉࡔࡀࡁࡀࡊ ࡏࡅ ࡋࡉࡔࡀࡍࡀ ࡁࡀࡈࡋࡀ ࡄࡉࡍ ࡐࡅࡌࡀࡍ ࡍࡉࡄࡅࡉࡀ ࡗ ࡉࡀࡌࡀ ࡅࡏࡎࡐࡀࡍ ࡗ ࡀࡂࡋࡀࡅࡀࡕࡀ ࡅࡋࡉࡔࡀࡍࡀࡍ ࡗ ࡈࡅࡓࡉࡀ ࡂࡆࡉࡓࡉࡀ ࡍࡉࡔࡀࡁࡀࡊ ࡅࡍࡉࡓࡀࡅࡓࡁࡀࡊ ࡅࡍࡉࡀࡒࡓࡀࡊ ࡅࡍࡉࡁࡉࡓࡊࡀࡊ ࡀࡍࡀࡕ ࡄࡅ ࡖ ࡉࡀࡃࡀࡕࡋࡇ ࡌࡀࡍ ࡄࡅ ࡖ ࡌࡍ ࡋࡉࡁࡇ ࡃࡀࡄࡉࡋࡀࡊ ࡅࡌࡀࡍ ࡄࡅ ࡖ ࡁࡏࡎࡐࡇ ࡌࡀࡅࡃࡀࡁࡀࡊ ࡁࡐࡅࡌࡀ ࡃࡀࡊࡉࡀ ࡏࡕࡉࡁࡓࡉࡊࡕ ࡅࡁࡋࡉࡔࡀࡍࡀ ࡖ ࡕࡅࡔࡁࡉࡄࡕࡀ

ࡏࡔࡕࡉࡁࡉࡕ ࡍࡉࡔࡀࡁࡅࡍࡀࡊ ࡎࡉࡌࡀࡊࡉࡀ ࡖ ࡋࡀࡍࡀࡉࡃࡉࡀ ࡅࡏࡅࡐࡀࡍࡉࡀ ࡊࡅࡔࡈࡀ ࡖ ࡋࡀࡌࡉࡔࡕࡀࡍࡉࡀ ࡍࡉࡔࡀࡁࡅࡍࡀࡊ ࡁࡍࡉࡀ ࡔࡋࡀࡌࡀ ࡖ ࡋࡅࡀࡕࡀࡊ ࡄࡉࡍࡅࡍ ࡖ ࡎࡀࡊࡀ ࡅࡌࡉࡍࡉࡀࡍࡀ ࡅࡁࡅࡈࡋࡀࡍࡀ ࡋࡉࡕࡋࡅࡍ ࡁࡆࡉࡅࡀ ࡖ ࡄࡃࡀࡃࡉࡀ ࡍࡀࡄࡓࡉࡀ ࡊࡅࡋࡄࡅࡍ ࡎࡉࡍࡀ ࡒࡉࡍࡀ ࡅࡐࡋࡅࡂࡉࡀ ࡁࡉࡍࡀࡕࡀࡉࡄࡅࡍ ࡋࡀࡉࡉࡕ ࡍࡉࡔࡀࡁࡀࡊ ࡀࡕࡓࡀ ࡖ ࡊࡅࡋࡇ ࡕࡉࡓࡉࡀ ࡖ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡅࡍࡀࡔࡀࡁࡀࡊ ࡀࡁࡀࡕࡅࡓ ࡀࡕࡉࡒࡀ ࡓࡀࡌࡀ ࡊࡀࡎࡉࡀ

ࡅࡍࡈࡉࡓࡀ ࡖ ࡉࡀࡕࡉࡁ ࡁࡎࡉࡃࡓࡇ ࡁࡀࡃࡌࡅ ࡄࡉࡉࡀ ࡅࡍࡉࡔࡀࡁࡀࡊ ࡐࡕࡀࡄࡉࡋ ࡏࡅࡕࡓࡀ ࡅࡍࡉࡌࡀࡓࡋࡀࡊ ࡁࡓࡉࡊࡉࡕ ࡌࡀࡓࡀࡉ ࡌࡀࡍࡃࡀ ࡖ ࡄࡉࡉࡀ ࡅࡌࡔࡀࡁࡉࡕ ࡅࡁࡓࡉࡊ ࡀࡕࡓࡀ ࡖ ࡏࡕࡉࡕ ࡌࡉࡍࡀ ࡅࡌࡔࡀࡁࡀ ࡅࡌࡓࡀࡅࡓࡀࡁ ࡅࡌࡉࡀࡒࡀࡓ ࡀࡕࡓࡀ ࡓࡁࡀ ࡖ ࡀࡆࡋࡀࡕࡋࡇ ࡍࡉࡔࡀࡁࡅࡍࡀࡊ ࡁࡄࡉࡓࡉࡀ ࡆࡉࡃࡒࡀ ࡖ ࡌࡍ ࡔࡊࡉࡍࡀࡕࡀ ࡕࡉࡕࡀࡉࡀࡕࡀ ࡄࡉࡍࡅࡍ ࡍࡉࡔࡀࡁࡀࡊ ࡌࡀࡃࡀࡊ ࡅࡄࡅࡊࡅࡌࡕࡀࡊ ࡅࡎࡉࡁࡓࡅࡕࡀࡊ ࡅࡈࡀࡁࡅࡕࡀࡊ ࡀࡍࡀࡕ ࡏࡕࡉࡕ ࡅࡀࡍࡀࡕ ࡀࡕࡉࡕ ࡕࡅࡌ ࡏࡕࡉࡕࡋࡀࡊ ࡋࡏࡕࡉࡂࡋࡅࡉࡉࡀ ࡀࡍࡀࡕ ࡄࡅ ࡖ ࡎࡀࡊࡀ ࡅࡌࡉࡍࡉࡀࡍࡀ ࡅࡁࡅࡈࡋࡀࡍࡀ ࡋࡉࡕࡋࡀࡊ ࡀࡍࡀࡕ ࡀࡁࡀ ࡀࡍࡀࡕ ࡀࡄࡀ ࡀࡍࡀࡕ ࡁࡓࡀ ࡀࡍࡀࡕ ࡄࡅ ࡍࡉࡁࡀ ࡀࡍࡀࡕ ࡄࡅ ࡔࡉࡓࡔࡀ ࡓࡁࡀ ࡖ ࡄࡉࡉࡀ ࡀࡍࡀࡕ ࡒࡀࡃࡌࡀࡉࡀ ࡀࡍࡀࡕ ࡁࡀࡕࡓࡀࡉࡀ ࡀࡍࡀࡕ ࡄࡅ ࡏࡕࡉࡕࡀ ࡖ ࡏࡕࡉࡕࡋࡀࡊ ࡋࡌࡉࡕࡉࡀ ࡅࡓࡀࡄࡉࡒࡕ ࡋࡏࡕࡉࡂࡋࡅࡉࡉࡀ ࡓࡀࡄࡉࡒ ࡌࡉࡍࡀࡉࡀࡍ ࡓࡅࡂࡆࡀࡊ ࡅࡒࡀࡓࡉࡁ ࡏࡕࡉࡀࡓࡅࡕࡀࡊ ࡊࡓࡅࡊ ࡅࡃࡄࡉࡀ ࡅࡓࡀࡄࡉࡒ ࡅࡁࡀࡈࡉࡋ ࡌࡀࡋࡀࡊࡉࡀ ࡖ ࡓࡅࡂࡆࡀ ࡅࡁࡀࡓࡃࡀ ࡅࡂࡋࡀࡋࡀ ࡌࡍ ࡀࡓࡒࡀࡉ ࡅࡁࡀࡉࡕࡀࡉ ࡃࡉࡋࡉࡀ ࡋࡌࡉࡓࡐࡀࡎ ࡀࡉࡍࡉࡀ ࡅࡋࡕࡀࡐࡅࡊࡉࡀ ࡂࡀࡓࡂࡋࡉࡀ ࡎࡀࡋࡒࡀ ࡔࡅࡋࡕࡀࡍ ࡅࡁࡅࡕࡀࡍ ࡅࡃࡍࡅࡕࡀࡍ ࡋࡒࡅࡃࡀࡌࡀࡊ ࡃࡉࡋࡀࡊ ࡌࡀࡍࡃࡀ ࡖ ࡄࡉࡉࡀ ࡖ ࡀࡁࡀࡃࡍࡉࡍ ࡔࡁࡅࡒࡋࡀࡍ ࡅࡃࡀࡁࡃࡍࡉࡍ ࡕࡉࡔࡁࡅࡒࡋࡀࡍ ࡔࡀࡁࡉࡒ ࡄࡀࡈࡀࡉࡉࡀ ࡅࡄࡀࡅࡁࡉࡀ ࡅࡎࡊࡉࡋࡀࡕࡀ ࡅࡕࡉࡒࡋࡀࡕࡀ ࡅࡔࡀࡁࡀࡔࡀࡕࡀ ࡀࡍࡀࡕ ࡄࡅ ࡌࡀࡍࡃࡀ ࡖ ࡄࡉࡉࡀ ࡄࡉࡍ ࡀࡍࡀࡕ ࡌࡀࡍࡃࡀ ࡖ ࡄࡉࡉࡀ ࡄࡀࡈࡀࡉࡀࡍ ࡅࡄࡀࡅࡁࡀࡍ ࡅࡎࡊࡉࡋࡀࡕࡀࡍ ࡅࡕࡉࡒࡋࡀࡕࡀࡍ ࡅࡔࡀࡁࡀࡔࡀࡕࡀࡍ ࡋࡀࡔࡀࡁࡒࡀࡕࡋࡀࡍ ࡄࡉࡍࡏࡋࡀ ࡌࡍ ࡆࡀࡊࡀࡉࡀ ࡒࡅࡃࡀࡌࡀࡊ ࡃࡉࡋࡀࡊ ࡌࡀࡍࡃࡀ ࡖ ࡄࡉࡉࡀ ࡀࡁࡃࡉࡀ ࡖ ࡊࡅࡋࡇ ࡄࡀࡈࡀࡉࡉࡀ ࡀࡍࡉࡍ ࡅࡀࡍࡀࡕ ࡌࡀࡓࡀ ࡖ ࡊࡅࡋࡇ ࡕࡉࡀࡓࡅࡕࡀ ࡊࡅࡋ ࡏࡃࡉࡀ ࡂࡍࡀࡁ ࡒࡅࡃࡀࡌࡀࡊ ࡅࡊࡅࡋ ࡏࡎࡐࡉࡀ ࡊࡀࡃࡉࡁ ࡌࡉࡀ ࡁࡉࡀࡓࡃࡍࡀ ࡆࡀࡊࡀࡉࡀ ࡒࡅࡃࡀࡌࡀࡊ ࡋࡀࡉࡉࡕ ࡌࡀࡍࡃࡀ ࡖ ࡄࡉࡉࡀ ࡀࡋࡌࡉࡀ ࡔࡅࡌࡀࡊ ࡋࡀࡉࡀࡃࡉࡀ ࡅࡋࡍࡄࡅࡓࡀࡊ ࡋࡀࡄࡀࡊࡉࡌࡉࡀ ࡉࡀ ࡖ ࡀࡊࡋࡉࡀ ࡅࡔࡀࡕࡉࡀ ࡉࡀ ࡖ ࡍࡀࡑࡁࡉࡀ ࡅࡌࡓࡀࡃࡐࡉࡀ ࡉࡀ ࡖ ࡆࡀࡅࡍࡉࡀ ࡅࡌࡆࡀࡅࡍࡉࡀ ࡉࡀ ࡖ ࡎࡀࡂࡃࡉࡀ ࡋࡀࡆࡂࡀ ࡅࡋࡉࡁࡍࡀ ࡊࡅࡋ ࡉࡅࡌ ࡉࡅࡌ ࡉࡀࡕࡁࡉࡀ ࡋࡊࡀࡓࡎࡀࡅࡀࡕࡀ ࡖ ࡌࡉࡓࡃࡀ ࡅࡋࡔࡅࡌࡀ ࡖ ࡄࡉࡉࡀ ࡌࡓࡀࡃࡐࡉࡀ ࡅࡋࡔࡅࡌࡀ ࡖ ࡄࡉࡉࡀ ࡋࡀࡏࡃࡀ ࡅࡃࡄࡉࡉࡀ ࡋࡁࡀࡋࡅࡍ ࡋࡀࡍࡎࡉࡁ ࡀࡍࡉࡍ ࡁࡄࡉࡉࡀ ࡎࡄࡉࡃࡍࡉࡍࡅࡋࡄࡉࡉࡀ ࡄࡅࡀࡋࡀࡍ ࡓࡅࡄࡑࡀࡍࡀ ࡅࡌࡀࡍࡃࡀ ࡖ ࡄࡉࡉࡀ ࡒࡀࡌࡋࡀࡍ ࡁࡏࡋࡅࡀࡕࡀࡍ ࡅࡁࡃࡉࡀࡓࡅࡕࡀࡍ ࡄࡀࡎࡃࡅࡍࡀࡍ ࡅࡓࡉࡃࡐࡀࡍࡀࡍ ࡀࡋࡌࡉࡀ ࡁࡆࡉࡁࡉࡀ ࡖ ࡀࡋࡌࡉࡀ ࡋࡀࡕࡉࡆࡁࡉࡍࡀࡍ ࡅࡁࡃࡉࡍ ࡀࡋࡌࡉࡀ ࡋࡀࡕࡉࡃࡍࡉࡍࡀࡍ ࡅࡁࡄࡀࡉࡀࡁࡉࡀ ࡖ ࡀࡋࡌࡉࡀ ࡋࡀࡕࡉࡒࡌࡉࡍࡀࡍ ࡅࡌࡍ ࡄࡉࡉࡀ ࡋࡀࡕࡉࡐࡎࡉࡒࡉࡍࡀࡍ ࡌࡀࡋࡉࡋࡍࡉࡍ ࡁࡎࡉࡃࡓࡉࡀ ࡖ ࡄࡉࡉࡀ ࡅࡂࡀࡋࡉࡋࡍࡉࡍ ࡓࡀࡆࡉࡀ ࡖ ࡌࡎࡀࡕࡓࡉࡀ ࡄࡀࡎࡃࡅࡍࡀࡍ ࡅࡓࡉࡃࡐࡅࡍࡀࡍ ࡀࡋࡌࡉࡀ ࡄࡉࡉࡀ ࡒࡀࡁࡉࡋ ࡁࡅࡕࡊࡅࡍ ࡌࡍ ࡊࡉࡎࡉࡀ ࡅࡍࡉࡕࡓࡉࡑ ࡍࡉࡀࡄࡀ ࡏࡋ ࡍࡄࡅࡓࡀࡉࡊࡅࡍ ࡀࡍࡀࡕ ࡄࡅ ࡆࡉࡅࡀࡍ ࡅࡕࡅࡒࡍࡀࡍ ࡅࡄࡀࡉࡋࡅࡕࡀࡍ ࡅࡀࡃࡉࡀࡓࡅࡕࡀࡍ ࡅࡏࡓࡅࡕࡀࡍ ࡖ ࡏࡕࡉࡂࡋࡉࡕࡋࡀࡍ ࡋࡓࡀࡄࡌࡉࡀ ࡔࡅࡌࡀࡊ ࡒࡀࡃࡌࡀࡉࡉࡀ ࡁࡔࡀࡌࡁࡉࡁࡉࡀ ࡖ ࡆࡉࡅࡀ ࡀࡅࡃࡉࡍ ࡁࡊࡅࡔࡈࡀࡊ ࡅࡍࡉࡐࡓࡀࡎ ࡍࡄࡅࡓࡀࡊ ࡏࡋࡀࡍ ࡁࡆࡀࡊࡀࡅࡀࡕࡀࡊ ࡍࡉࡄࡅࡉࡀ ࡅࡕࡓࡉࡑࡅࡍࡉࡍ ࡁࡊࡅࡔࡈࡀࡊ ࡅࡍࡉࡄࡆࡉࡍࡀࡍ ࡀࡋࡀࡄࡉࡀ ࡁࡏࡅࡌࡓࡅࡌࡀ ࡅࡍࡉࡕࡄࡀࡉࡁࡅࡍ ࡅࡍࡉࡕࡁࡉࡄࡕࡅࡍ ࡕࡀࡋࡁࡉࡔࡉࡍࡀࡍ ࡌࡍ ࡆࡉࡅࡀࡊ ࡅࡕࡉࡊࡀࡎࡉࡍࡀࡍ ࡌࡍ ࡍࡄࡅࡓࡀࡊ ࡅࡕࡉࡄࡀࡅࡉࡍࡀࡍ ࡏࡅࡄࡓࡀ ࡖ ࡀࡍࡀࡕ ࡏࡕࡉࡕࡁࡇ ࡌࡍ ࡁࡉࡕ ࡄࡉࡉࡀ ࡀࡍࡉࡍ ࡍࡉࡆࡉࡋࡁࡇ ࡌࡉࡆࡋࡀࡉࡄࡅࡍ ࡖ ࡀࡍࡀࡔࡉࡀ ࡊࡔࡉࡈࡉࡀ ࡅࡌࡄࡀࡉࡌࡍࡉࡀ ࡌࡉࡔࡊࡀࡍ ࡓࡅࡄࡀࡍ ࡅࡍࡉࡔࡌࡀࡕࡀࡍ ࡁࡔࡊࡉࡍࡀࡕ ࡄࡉࡉࡀ ࡅࡁࡑࡅࡁࡉࡀࡍ ࡄࡉࡉࡀ ࡅࡁࡑࡅࡁࡉࡀࡍ ࡏࡅࡕࡓࡉࡀ ࡕࡋࡀࡕࡀ ࡅࡁࡑࡅࡁࡉࡀࡍ ࡌࡀࡍࡃࡀ ࡖ ࡄࡉࡉࡀ ࡉࡀࡕࡉࡓ ࡀࡋࡌࡉࡀ ࡅࡁࡑࡅࡁࡉࡀࡍ ࡀࡓࡁࡀ ࡂࡅࡁࡓࡅࡉࡀ ࡁࡍࡉࡀ ࡔࡋࡀࡌࡀ ࡓࡅࡀࡄࡀ ࡍࡉࡄࡅࡉࡀ ࡌࡍ ࡒࡅࡃࡀࡌࡀࡊ ࡋࡓࡅࡄࡀࡍ ࡅࡋࡍࡉࡔࡌࡀࡕࡀࡍ ࡕࡀࡋࡁࡉࡔࡉࡍࡀࡍ ࡌࡍ ࡆࡉࡅࡀࡊ ࡅࡕࡉࡊࡀࡎࡉࡍࡉࡍ ࡌࡍ ࡍࡄࡅࡓࡀࡊ ࡅࡕࡀࡒࡌࡉࡍࡀࡍ ࡁࡆࡀࡊࡀࡉࡉࡀ ࡖ ࡋࡀࡅ ࡁࡄࡀࡉࡀࡁࡉࡀ ࡅࡁࡉࡀࡕࡉࡓࡉࡀ ࡖ ࡋࡀࡅ ࡁࡄࡀࡎࡉࡓࡉࡀ ࡒࡅࡃࡀࡌࡀࡊ ࡌࡀࡍࡃࡀ ࡖ ࡄࡉࡉࡀ ࡔࡅࡌࡀࡊ ࡊࡅࡔࡈࡀ ࡔࡅࡌࡀࡊ ࡅࡆࡀࡊࡉࡀ ࡔࡅࡌࡀࡊ ࡅࡌࡓࡀࡅࡓࡀࡁ ࡔࡅࡌࡀࡊ ࡅࡌࡉࡀࡒࡀࡓ ࡔࡅࡌࡀࡊ ࡁࡓࡉࡊ ࡔࡅࡌࡀࡊ ࡅࡌࡒࡀࡉࡀࡌ ࡔࡅࡌࡀࡊ ࡅࡆࡀࡊࡉࡕ ࡅࡆࡀࡊࡉࡀ ࡔࡅࡌࡀࡊ ࡅࡆࡀࡊࡉࡍ ࡐࡅࡂࡃࡀࡌࡉࡀ ࡖ ࡊࡅࡔࡈࡀ ࡖ ࡍࡀࡐࡒࡉࡀ ࡌࡍ ࡐࡅࡌࡀࡊ ࡋࡊࡅࡋࡄࡅࡍ

ࡏࡅࡁࡀࡃࡉࡀ ࡆࡀࡊࡉࡀ ࡅࡒࡀࡉࡌࡀ ࡋࡄࡀࡆࡀ ࡍࡉࡔࡉࡌࡕࡀࡉ ࡃࡉࡋࡉࡀ ࡅࡄࡉࡉࡀ ࡆࡀࡊࡉࡍ ࡋࡊࡅࡋࡄࡅࡍ ࡏࡅࡁࡀࡃࡉࡀ ࡎࡀ

76. ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡕࡅࡔࡁࡉࡄࡀࡍ ࡋࡄࡉࡉࡀ ࡁࡀࡓࡀࡉࡉࡀ ࡖ ࡋࡁࡀࡓ ࡌࡍ ࡃࡀࡅࡓࡀ ࡖ ࡁࡎࡀࡊࡀ ࡔࡓࡀࡉࡕࡅࡍ ࡖ ࡀࡉࡍࡀࡉࡊࡅࡍ ࡂࡀࡋࡉࡀ ࡋࡃࡉࡋࡊࡅࡍ ࡏࡅࡃࡍࡀࡉࡊࡅࡍ ࡔࡀࡌࡀ ࡋࡀࡕࡓࡀࡉࡊࡅࡍ ࡕࡅࡔࡁࡉࡄࡀࡍ ࡋࡄࡀࡄࡅ ࡄࡀࡃ ࡔࡅࡌࡀ ࡓࡁࡀ ࡖ ࡄࡉࡉࡀ ࡖ ࡏࡋࡀࡅࡉࡀ ࡊࡅࡋࡄࡅࡍ ࡔࡅࡌࡄࡀࡕࡀ ࡔࡓࡉࡀ ࡔࡅࡌࡇ ࡋࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡋࡃࡀࡅࡓࡀ ࡕࡀࡒࡍࡀ ࡅࡋࡌࡃࡉࡍࡀࡕ ࡏࡅࡕࡓࡉࡀ ࡅࡋࡐࡀࡎࡉࡌࡊࡀ ࡖ ࡓࡀࡁ ࡐࡀࡎࡉࡌࡊࡉࡀ ࡖ ࡊࡅࡋࡄࡅࡍ ࡐࡀࡎࡉࡌࡊࡉࡀ ࡌࡉࡍࡇ ࡍࡄࡀࡓ ࡅࡊࡅࡋࡄࡉࡍ ࡍࡉࡔࡌࡀࡕࡀ ࡖ ࡌࡉࡍࡇ ࡏࡆࡃࡀࡊࡉࡀ ࡖ ࡒࡀࡉࡉࡌࡋࡀࡍ ࡋࡄࡀࡉࡋࡀࡍ ࡋࡀࡂࡆࡉࡆࡀࡍ ࡋࡁࡉࡕ ࡓࡅࡄࡑࡀࡍࡀࡍ ࡅࡌࡀࡔࡕࡀࡊࡉࡋࡀࡍ ࡋࡍࡉࡔࡌࡀࡕࡀࡍ ࡋࡁࡉࡕ ࡆࡉࡁࡍࡀ ࡋࡉࡅࡌࡀ ࡖ ࡃࡉࡍࡀ ࡅࡌࡉࡔࡕࡀࡊࡉࡋࡀࡍ ࡋࡍࡉࡔࡌࡀࡕࡀࡍ ࡋࡉࡅࡌࡀ ࡓࡁࡀ ࡖ ࡄࡀࡃࡅࡕࡀ ࡕࡅࡔࡁࡉࡄࡀࡍ ࡋࡄࡀࡃ ࡖ ࡊࡅࡋࡇ ࡏࡅࡕࡓࡉࡀ ࡅࡋࡄࡀࡃ ࡖ ࡊࡅࡋࡇ ࡁࡀࡅࡀࡕࡀ ࡅࡋࡏࡕࡉࡀ ࡖ ࡀࡕࡀ ࡅࡔࡓࡀ ࡋࡃࡅࡊࡓࡀࡍࡀࡍ ࡖ ࡒࡅࡃࡀࡌ ࡄࡉࡉࡀ ࡁࡀࡓࡀࡉࡉࡀ ࡕࡓࡀࡑ ࡖ ࡄࡉࡉࡀ ࡔࡓࡅࡋࡇ ࡁࡐࡅࡌࡇ ࡖ ࡌࡍ ࡋࡁࡀࡓ ࡕࡓࡉࡑࡀ ࡕࡅࡔࡁࡉࡄࡕࡇ ࡕࡅࡔࡁࡉࡄࡀࡍ ࡋࡒࡃࡉࡌࡀ ࡒࡀࡃࡌࡀࡉࡉࡀ ࡋࡁࡀࡓ ࡄࡉࡉࡀ ࡓࡁࡉࡀ ࡓࡉࡔࡀࡉࡉࡀ ࡖ ࡄࡉࡉࡀ ࡒࡉࡓࡉࡅࡉࡀ ࡅࡏࡕࡉࡕࡋࡇ ࡅࡆࡀࡓࡆࡅࡉࡀ ࡅࡔࡀࡃࡓࡅࡉࡀ ࡋࡃࡀࡓࡉࡀ ࡀࡍࡀࡕ ࡏࡕࡉࡕ ࡅࡐࡕࡉࡕ ࡁࡀࡁࡀ ࡅࡌࡀࡊࡕ ࡏࡅࡄࡓࡀ ࡅࡃࡓࡀࡊࡕ ࡃࡉࡓࡊࡀ ࡅࡕࡓࡀࡑࡕ ࡊࡅࡃࡊࡀ ࡅࡋࡀࡐࡕ ࡋࡀࡅࡐࡀ ࡀࡄࡉࡃ ࡏࡃࡀ ࡅࡐࡀࡓࡅࡀࡍࡒࡀ ࡅࡌࡃࡀࡁࡓࡀࡍࡀ ࡄࡅࡉࡕࡋࡇ ࡋࡀࡁࡀ ࡔࡅࡓࡁࡀ ࡓࡁࡀ ࡖ ࡄࡉࡉࡀ ࡅࡋࡀࡐࡕࡇ ࡁࡋࡀࡅࡐࡀ ࡖ ࡄࡉࡉࡀ ࡅࡁࡍࡀࡉࡕࡇ ࡁࡁࡉࡍࡉࡀࡍࡀ ࡓࡁࡀ ࡖ ࡔࡓࡀࡓࡀ ࡅࡀࡐࡉࡒࡕࡇ ࡋࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡋࡃࡀࡅࡓࡀ ࡕࡀࡒࡍࡀ ࡉࡀ ࡒࡀࡓࡅࡉࡀ ࡖ ࡒࡓࡉࡕ ࡉࡀ ࡆࡀࡅࡀࡍࡉࡀ ࡖ ࡆࡀࡅࡍࡉࡕ ࡉࡀ ࡁࡀࡍࡅࡍࡉࡀ ࡖ ࡁࡀࡍࡉࡍࡉࡕ ࡅࡀࡐࡒࡉࡕ ࡌࡍ ࡀࡁࡉࡍࡉࡀ ࡀࡌࡀࡌࡉࡀ ࡅࡕࡀࡅࡌࡉࡀ ࡅࡋࡉࡔࡀࡍࡉࡀ ࡄࡆࡅࡍ ࡖ ࡄࡀࡊࡀ ࡒࡀࡉࡉࡌࡍࡀ ࡄࡆࡅࡍ ࡖ ࡄࡀࡊࡀ ࡔࡓࡉࡍࡀ ࡀࡋࡌࡉࡀ ࡖ ࡍࡀࡐࡔࡀࡉ ࡌࡉࡍࡀࡉࡊࡉࡍ ࡏࡍࡈࡉࡓࡍࡀ ࡄࡉࡍ ࡌࡉࡍࡉࡋࡀࡉࡊࡉࡍ ࡌࡍ ࡀࡍࡐࡀࡉ ࡋࡀࡓࡀࡄࡉࡒࡀ ࡄࡉࡍ ࡈࡅࡓࡉࡀ ࡕࡉࡎࡁࡅࡍ ࡁࡆࡅࡀࡃࡀࡉࡊࡉࡍ ࡋࡌࡉࡊࡋࡀࡉࡊࡉࡍ ࡋࡀࡔࡋࡉࡌࡉࡋࡊࡉࡍ ࡄࡉࡍ ࡉࡀࡌࡀࡌࡉࡀ ࡋࡌࡉࡔࡕࡉࡀࡉࡊࡉࡍ ࡋࡀࡂࡌࡉࡓࡉࡋࡊࡉࡍ ࡄࡉࡍ ࡁࡕࡀࡔࡋࡅࡌࡉࡀ ࡕࡀࡒࡌࡉࡋࡉࡀ ࡒࡅࡃࡀࡌ ࡄࡉࡉࡀ ࡁࡀࡓࡀࡉࡉࡀ ࡅࡋࡒࡅࡃࡀࡌ ࡃࡀࡅࡓࡀ ࡕࡀࡒࡍࡀ ࡌࡉࡍࡉࡀࡍࡊࡉࡍ ࡏࡌࡍࡉࡀ ࡅࡄࡅࡔࡁࡀࡍࡊࡉࡍ ࡄࡔࡉࡁ ࡏࡒࡃࡅࡌ ࡏࡕࡉࡀ ࡅࡐࡓࡀ ࡅࡏࡌࡈࡉࡀ ࡋࡁࡍࡉࡀ ࡔࡅࡌ ࡅࡋࡁࡍࡉࡀ ࡓࡅࡔࡅࡌ ࡅࡋࡁࡍࡉࡀ ࡔࡅࡓࡁࡀ ࡓࡁࡀ ࡖ ࡄࡉࡉࡀ

ࡏࡋࡉࡐࡉࡍࡊࡉࡍ ࡁࡋࡀࡅࡐࡀ ࡖ ࡄࡉࡉࡀ ࡅࡁࡍࡉࡍࡊࡉࡍ ࡁࡁࡉࡍࡉࡀࡍࡀ ࡓࡁࡀ ࡖ ࡔࡓࡀࡓࡀ ࡅࡏࡉࡀࡐࡒࡉࡍࡊࡉࡍ ࡋࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡋࡃࡀࡅࡓࡀ ࡕࡀࡒࡍࡀ ࡄࡉࡍ ࡎࡉࡍࡀ ࡒࡉࡍࡀ ࡅࡐࡋࡀࡂࡉࡀ ࡋࡀࡍࡉࡄࡅࡉࡀ ࡁࡉࡍࡀࡕࡀࡉࡊࡉࡍ ࡅࡏࡃࡀ ࡖ ࡌࡁࡀࡓࡈࡀࡁࡋࡉࡀ ࡁࡉࡍࡉࡀ ࡌࡀࡍࡀࡉࡊࡉࡍ ࡋࡀࡕࡉࡁࡄࡅࡔ ࡅࡋࡕࡀࡕࡅࡓࡀࡒࡀ ࡋࡀࡕࡉࡃࡅࡍ ࡁࡁࡉࡓࡉࡀ ࡏࡋࡉࡑࡀ ࡋࡀࡕࡀࡎࡂࡅࡍ ࡋࡒࡅࡃࡀࡌ ࡃࡀࡉࡀࡍࡀ ࡋࡀࡕࡀࡒࡌࡅࡍ ࡅࡀࡍࡐࡉࡀ ࡁࡉࡋ ࡃࡉࡍࡀ ࡋࡀࡕࡉࡄࡆࡅࡍ ࡅࡐࡀࡓࡑࡅࡐࡀ ࡏࡐࡉࡊࡀ ࡋࡀࡕࡉࡄࡆࡅࡍ ࡓࡀࡁ ࡌࡀࡊࡎࡉࡀ ࡋࡀࡍࡉࡔࡀࡉࡋࡅࡍࡊࡉࡍ ࡕࡉࡐࡒࡅࡍ ࡕࡉࡄࡆࡅࡍࡇ ࡋࡌࡔࡀࡋࡀࡌ ࡍࡉࡔࡌࡀࡕࡀ ࡅࡌࡀࡒࡉࡌ ࡏࡋ

ࡃࡉࡓࡊࡉࡀ ࡖ ࡔࡓࡀࡓࡀ ࡋࡓࡀࡄࡌࡇ ࡖ ࡔࡀࡋࡌࡀࡍࡉࡀ ࡔࡅࡕࡀࡐࡀ ࡓࡁࡀ ࡖ ࡌࡄࡀࡉࡌࡍࡉࡀ ࡋࡁࡀࡓ ࡂࡉࡃࡀ ࡓࡁࡀ ࡖ ࡍࡀࡔࡌࡀࡕࡀ ࡖ ࡍࡀࡐࡉࡒ ࡀࡋࡀࡍࡐࡀࡉࡊࡉࡍ ࡅࡌࡀࡋࡁࡉࡔࡉࡋࡉࡍ ࡋࡍࡉࡔࡌࡀࡕࡊࡉࡍ ࡏࡅࡑࡈࡋࡉࡀ ࡖ ࡆࡉࡅࡀ ࡅࡈࡀࡓࡈࡀࡁࡅࡍࡉࡀ ࡈࡀࡁࡉࡀ ࡃࡀࡊࡉࡉࡀ ࡖ ࡍࡄࡅࡓࡀ ࡖ ࡀࡕࡉࡋࡊࡉࡍ ࡌࡍ ࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡃࡀࡅࡓࡀ ࡕࡀࡒࡍࡀ ࡅࡌࡀࡐࡉࡒ ࡀࡋࡀࡍࡐࡀࡉࡊࡉࡍ ࡊࡋࡉࡋࡉࡀ ࡖ ࡊࡋࡉࡋ ࡆࡀࡊࡀࡅࡀࡕࡀ ࡖ ࡀࡋࡉࡐ ࡅࡕࡌࡀࡍࡀࡍ ࡌࡉࡕࡒࡀࡋࡉࡀ ࡄࡀࡅࡉࡍ ࡄࡀࡃ ࡄࡀࡃ ࡀࡈࡉࡓࡐࡀ ࡖ ࡊࡋࡉࡋࡀࡉࡊࡉࡍ ࡍࡐࡉࡔ ࡆࡉࡅࡇ ࡌࡍ ࡆࡉࡅࡀ ࡖ ࡔࡀࡌࡉࡔ ࡅࡕࡀࡒࡅࡍ ࡕࡅࡒࡍࡇ ࡌࡍ ࡕࡅࡒࡍࡀ ࡖ ࡎࡉࡓࡀ ࡕࡉࡒࡀࡁࡋࡅࡍ ࡏࡅࡑࡈࡋࡀࡉࡊࡉࡍ ࡅࡕࡉࡒࡀࡁࡋࡅࡍ ࡊࡋࡉࡋࡀࡉࡊࡉࡍ ࡒࡅࡃࡀࡌ ࡓࡁࡉࡀ ࡓࡁࡉࡀ ࡕࡉࡄࡅࡍ ࡅࡁࡉࡍࡉࡀ ࡏࡅࡕࡓࡉࡀ ࡏࡅࡕࡓࡉࡀ ࡕࡉࡕࡉࡒࡓࡅࡍ ࡅࡕࡉࡐࡉࡄࡕࡅࡍ ࡀࡉࡍࡀࡉࡊࡅࡍ ࡕࡉࡄࡆࡅࡍࡇ ࡋࡃࡀࡉࡀࡍࡊࡉࡍ ࡍࡉࡒࡃࡅࡌ ࡅࡍࡉࡃࡍࡀࡋࡊࡉࡍ ࡉࡅࡌࡀ ࡁࡔࡓࡀࡓࡀ ࡕࡉࡎࡒࡅࡍ ࡕࡉࡄࡆࡅࡍࡇ ࡋࡀࡉࡀࡓ ࡁࡀࡓࡀࡉࡀ ࡅࡋࡐࡀࡎࡉࡌࡊࡀ ࡓࡁࡀ ࡖ ࡊࡅࡋࡇ ࡍࡄࡅࡓ ࡖ ࡋࡒࡅࡃࡀࡌ ࡄࡉࡉࡀ ࡁࡀࡓࡀࡉࡉࡀ ࡕࡓࡉࡑ ࡖ ࡄࡉࡉࡀ ࡒࡉࡓࡉࡅࡉࡀ ࡅࡏࡕࡉࡕࡋࡇ ࡅࡆࡀࡓࡆࡅࡉࡀ ࡅࡔࡀࡃࡓࡅࡉࡀ ࡋࡃࡀࡓࡉࡀ ࡅࡋࡀࡋࡌࡉࡀ ࡋࡊࡅࡋࡌࡀࡍ ࡖ ࡉࡀࡄࡁࡇ ࡋࡆࡉࡃࡒࡀ ࡅࡋࡀࡅࡐࡀ ࡁࡋࡀࡅࡐࡀ ࡌࡍ ࡓࡉࡔ ࡁࡓࡉࡔ ࡗ ࡌࡀࡍࡉࡀ ࡌࡔࡀࡋࡌࡉࡋࡇ ࡅࡗ ࡐࡀࡎࡉࡌࡊࡉࡀ ࡌࡀࡍࡄࡉࡓࡉࡋࡇ ࡋࡉࡅࡌ ࡐࡅࡓࡒࡀࡍ ࡅࡋࡉࡅࡌ ࡐࡅࡓࡒࡀࡍࡀ ࡅࡋࡉࡅࡌࡀ ࡓࡁࡀ ࡖ ࡄࡀࡃࡅࡕࡀ ࡖ ࡍࡀࡂࡉࡃ ࡆࡉࡃࡒࡀ ࡅࡍࡀࡐࡉࡒ ࡀࡋࡀࡍࡐࡀࡉࡊࡉࡍ ࡅࡌࡀࡎࡉࡒ ࡌࡀࡄࡅࡉࡋࡊࡉࡍ ࡀࡉࡀࡓ ࡁࡀࡓࡀࡉࡀ ࡅࡃࡀࡅࡓࡀ ࡕࡀࡒࡍࡀ ࡃࡅࡊࡕࡀ ࡖ ࡒࡃࡉࡌࡀ ࡒࡀࡃࡌࡀࡉࡉࡀ ࡅࡁࡍࡉࡀ ࡔࡅࡓࡁࡀ ࡓࡁࡀ ࡖ ࡄࡉࡉࡀ ࡀࡊࡋࡉࡍ ࡖ ࡋࡀࡄࡅࡀ ࡎࡀࡉࡈࡀ ࡅࡔࡀࡕࡉࡍ ࡖ ࡋࡀࡄࡅࡀ ࡄࡀࡌࡓࡀ ࡈࡀࡁ ࡀࡊࡋࡉࡀ ࡅࡓࡅࡀࡄࡀ ࡔࡀࡉࡋࡉࡀ ࡅࡀࡕࡉࡀ ࡏࡅࡕࡓࡀ ࡖ ࡄࡉࡉࡀ ࡅࡔࡀࡓࡉࡀ

ࡏࡋࡀࡅࡀࡉࡄࡅࡍ ࡉࡅࡌ ࡁࡉࡅࡌ ࡅࡔࡀࡉࡉࡀ ࡁࡔࡀࡉࡉࡀ ࡕࡅࡔࡁࡉࡄࡀࡍ ࡋࡔࡅࡄࡁࡀ ࡆࡀࡃࡉࡒࡉࡀ ࡅࡋࡏࡕࡉࡀ ࡖ ࡁࡄࡉࡓࡉࡀ ࡆࡉࡃࡒࡀ ࡅࡋࡂࡀࡁࡓࡀ ࡍࡅࡊࡓࡀࡉࡀ ࡖ ࡌࡍ ࡋࡁࡀࡓ ࡒࡀࡉࡉࡌ ࡅࡀࡉࡍࡇ ࡂࡀࡋࡉࡀ ࡅࡕࡓࡉࡑࡀ ࡋࡊࡅࡋࡄࡅࡍ ࡓࡀࡄࡌࡉࡀ ࡔࡅࡌࡇ ࡖ ࡊࡅࡔࡈࡀ ࡀࡍࡀࡕ ࡄࡅ ࡌࡀࡍࡃࡀ ࡖ ࡄࡉࡉࡀ ࡖ ࡉࡀࡃࡀࡕࡋࡇ ࡋࡔࡀࡋࡌࡀࡍࡀ ࡁࡌࡀࡄࡅ ࡖ ࡌࡔࡀࡋࡀࡌ ࡅࡉࡀࡕࡉࡓࡀ ࡁࡌࡀࡄࡅ ࡖ ࡏࡕࡋࡇ ࡅࡔࡀࡒࡀࡓࡀ ࡋࡌࡀࡄࡅ ࡒࡀࡉࡉࡌ ࡄࡉࡍࡉࡋࡀ ࡌࡉࡍࡉࡋࡕࡀ ࡕࡉࡐࡅࡒ ࡌࡍ ࡐࡅࡌࡇ ࡖ ࡂࡀࡁࡓࡀ ࡖ ࡔࡀࡋࡌࡀࡍࡀ ࡖ ࡀࡍࡀࡕ ࡉࡀࡃࡉࡕ ࡅࡎࡀࡁࡓࡉࡕ ࡅࡌࡀࡎࡁࡉࡓࡉࡕ ࡁࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡃࡀࡅࡓࡀ ࡕࡀࡒࡍࡀ ࡋࡀࡍࡉࡔࡕࡀࡁࡀ ࡈࡅࡓࡀ ࡁࡄࡀࡉࡋࡇ ࡅࡋࡀࡂࡀࡁࡀࡓࡀ ࡁࡂࡀࡁࡀࡓࡅࡕࡇ ࡅࡋࡀࡐࡀࡓࡀࡔࡀ ࡁࡒࡀࡔࡕࡇ ࡅࡋࡀࡀࡎࡉࡀ ࡁࡎࡀࡌࡀࡍࡇ ࡅࡋࡀࡂࡀࡁࡓࡀ ࡆࡀࡃࡉࡒࡀ ࡄࡀࡊࡉࡌࡀ ࡁࡌࡉࡌࡓࡀ ࡖ ࡐࡅࡌࡇ ࡄࡉࡍࡉࡋࡀ ࡏࡅࡕࡓࡀ ࡖ ࡄࡉࡉࡀ ࡖ ࡀࡕࡉࡀ ࡅࡔࡀࡓࡉࡀ ࡋࡓࡀࡄࡌࡀࡊ ࡖ ࡁࡀࡉࡉࡍ ࡌࡉࡍࡇ ࡌࡀࡔࡊࡉࡀ ࡅࡔࡀࡉࡋࡉࡀ ࡌࡉࡍࡇ ࡅࡌࡉࡕࡄࡉࡁࡋࡅࡍ ࡉࡅࡌ ࡁࡉࡅࡌ ࡅࡔࡀࡉࡉࡀ ࡁࡔࡀࡉࡉࡀ ࡄࡆࡉࡍࡀࡍ ࡖ ࡒࡀࡉࡌࡉࡍࡀࡍ ࡁࡔࡅࡌࡀࡊ ࡅࡕࡓࡉࡑࡉࡍࡉࡍ ࡁࡊࡉࡍࡉࡀࡍࡀࡊ ࡅࡋࡂࡈࡍࡇ ࡋࡁࡀࡓ ࡂࡅࡃࡀࡊ ࡓࡁࡀ ࡖ ࡔࡓࡀࡓࡀ ࡅࡀࡔࡀࡓࡍࡉࡍ ࡁࡆࡀࡊࡀࡅࡀࡕࡀࡊ ࡔࡀࡐࡋࡅࡕ ࡋࡀࡕࡉࡔࡀࡅࡉࡍࡀࡍ ࡁࡉࡀࡃ ࡌࡀࡄࡉࡒࡀࡍࡉࡀ ࡅࡊࡀࡃࡀࡁࡉࡀ ࡅࡄࡅࡍࡐࡀࡍࡉࡀ ࡅࡌࡀࡂࡆࡉࡓࡀࡍࡉࡀ ࡋࡀࡕࡉࡔࡃࡉࡍࡀࡍ ࡅࡌࡀࡄࡉࡒࡀࡍࡉࡀ ࡋࡀࡍࡉࡄࡒࡅࡍࡀࡍ ࡅࡌࡀࡂࡆࡉࡓࡀࡍࡉࡀ ࡋࡀࡍࡀࡂࡆࡓࡅࡍ ࡋࡍࡉࡔࡌࡀࡕࡀࡍ ࡅࡍࡉࡄࡆࡅࡍ ࡈࡀࡁࡉࡀ ࡅࡍࡉࡈࡀࡉࡁࡅࡍ ࡅࡁࡉࡔࡉࡀ ࡍࡉࡕࡉࡁࡓࡅࡍ ࡅࡁࡍࡉࡀ ࡀࡋࡌࡀ ࡅࡍࡉࡄࡆࡅࡍ ࡔࡀࡋࡌࡀࡍࡉࡀ ࡖ ࡏࡉࡕ ࡄࡉࡉࡀ ࡅࡍࡉࡕࡉࡓࡑࡅࡍ ࡀࡉࡍࡀࡉࡄࡅࡍ ࡋࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡋࡃࡀࡅࡓࡀ ࡕࡀࡒࡍࡀ ࡀࡍࡀࡕ ࡒࡀࡓࡉࡕ ࡒࡀࡓࡅࡉࡉࡀ ࡖ ࡌࡀࡍࡃࡀ ࡖ ࡄࡉࡉࡀ ࡅࡌࡆࡀࡅࡍࡉࡕ ࡆࡀࡅࡀࡍࡉࡀ ࡅࡌࡁࡀࡍࡉࡍࡉࡕ ࡁࡀࡍࡅࡍࡉࡀ ࡅࡌࡂࡀࡃࡋࡉࡕ ࡒࡀࡓࡍࡉࡀ ࡅࡌࡓࡀࡅࡓࡁࡉࡕ ࡐࡉࡎࡉࡄࡉࡀࡕࡀ ࡅࡕࡀࡓࡑࡉࡕ ࡃࡉࡓࡊࡀ ࡅࡋࡀࡉࡐࡉࡕ ࡋࡀࡅࡐࡀ ࡀࡍࡀࡕ ࡄࡅ ࡖ ࡌࡁࡀࡍࡉࡍࡉࡕ ࡅࡌࡀࡐࡒࡉࡕ ࡌࡍ ࡀࡁࡉࡍࡉࡀ ࡀࡌࡀࡌࡉࡀ ࡅࡕࡀࡅࡌࡉࡀ ࡅࡋࡉࡔࡀࡍࡉࡀ ࡊࡅࡋ ࡌࡀࡍ ࡖ ࡒࡓࡉࡀ ࡅࡔࡉࡄ ࡅࡌࡆࡀࡌࡀࡍ ࡊࡅࡋࡌࡀࡍ ࡖ ࡊࡉࡋࡇ ࡔࡀࡋࡉࡌࡋࡇ ࡀࡍࡀࡕ ࡄࡀࡅࡉࡀࡕࡋࡇ ࡀࡄࡉࡃ ࡏࡃࡀ ࡅࡐࡀࡓࡅࡀࡍࡒࡀ ࡅࡌࡃࡀࡁࡓࡀࡍࡀ ࡋࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡋࡃࡀࡅࡓࡀ ࡕࡀࡒࡍࡀ ࡖ ࡊࡉࡋࡇ

ࡏࡕࡋࡇ ࡅࡐࡀࡂࡓࡇ ࡒࡀࡉࡉࡌ ࡋࡌࡉࡐࡕࡀ ࡐࡅࡌࡇ ࡅࡋࡀࡓࡅࡌࡉࡀ ࡒࡀࡋࡇ ࡅࡋࡌࡉࡁࡉࡀ ࡁࡅࡕࡇ ࡅࡋࡒࡀࡉࡅࡌࡉࡀ ࡕࡅࡔࡁࡉࡄࡕࡇ ࡅࡋࡁࡉࡕ ࡎࡀࡂࡉࡀ ࡖ ࡋࡉࡂࡓࡇ ࡍࡉࡕࡉࡀ ࡏࡅࡕࡓࡀࡊ ࡅࡍࡉࡔࡓࡉࡀ ࡋࡓࡀࡄࡌࡀࡊ ࡐࡓࡅࡎ ࡍࡄࡅࡓࡀࡊ ࡋࡊࡅࡋࡄࡅࡍ ࡓࡀࡄࡌࡉࡀ ࡔࡅࡌࡀࡊ ࡖ ࡊࡅࡔࡈࡀ ࡀࡍࡀࡕ ࡀࡌࡀࡓࡕ ࡁࡌࡉࡌࡓࡀࡊ ࡅࡐࡀࡒࡉࡃࡕࡉࡍࡀࡍ ࡁࡐࡅࡂࡃࡀࡌࡀࡊ ࡏࡋ ࡌࡉࡍࡉࡋࡀࡉࡊࡉࡍ ࡌࡉࡍࡉࡋࡀࡉ ࡒࡃࡉࡌࡀ ࡅࡋࡌࡉࡕࡓࡉࡑ ࡉࡀࡌࡉࡍࡀࡉࡊࡉࡍ ࡉࡀࡌࡉࡍࡀࡉ ࡋࡅࡀࡕࡀࡉࡊࡅࡍ ࡕࡓࡀࡑ ࡕࡉࡒࡓࡅࡍ ࡋࡉࡂࡀࡋ ࡏࡍࡉࡍࡊࡉࡍ ࡕࡉࡁࡅࡍ ࡁࡉࡀࡃ ࡅࡋࡀࡊࡋࡉࡀ ࡁࡏࡃࡀࡉࡊࡉࡍ ࡁࡀࡉࡉࡍࡉࡍ ࡌࡉࡍࡀࡊ ࡁࡅࡕࡀ ࡖ ࡏࡅࡕࡓࡉࡀ ࡅࡔࡀࡋࡍࡉࡍ ࡌࡉࡍࡀࡊ ࡔࡅࡋࡕࡀ ࡖ ࡓࡁࡉࡀ ࡋࡍࡀࡐࡔࡀࡍ ࡅࡋࡓࡀࡄࡌࡀࡍ ࡅࡋࡓࡀࡄࡌࡉࡀ ࡓࡀࡄࡌࡀࡍ ࡅࡋࡓࡀࡄࡌࡉࡀ ࡔࡅࡓࡁࡀ ࡓࡁࡀ ࡖ ࡄࡉࡉࡀ ࡅࡏࡋ ࡊࡅࡋࡇ ࡍࡀࡑࡉࡓࡅࡕࡀ ࡖ ࡄࡉࡉࡀ ࡖ ࡌࡋࡉࡀ ࡅࡆࡓࡉࡀ ࡁࡕࡉࡁࡉࡋ ࡌࡍ ࡆࡉࡅࡀࡊ ࡕࡀࡉࡕࡉࡋࡀࡍ ࡅࡌࡍ ࡍࡄࡅࡓࡀࡊ ࡕࡀࡅࡆࡉࡐ ࡏࡋࡀࡍ ࡍࡉࡅࡋ ࡁࡆࡉࡅࡀࡊ ࡅࡍࡉࡐࡅࡒ ࡁࡀࡍࡄࡅࡓࡀࡊ ࡅࡍࡉࡒࡅࡌ ࡁࡔࡅࡌࡀࡊ ࡅࡍࡉࡕࡓࡀࡑ ࡁࡊࡉࡍࡉࡀࡍࡀࡊ ࡊࡅࡔࡈࡀ ࡔࡅࡌࡀࡊ ࡌࡀࡍࡃࡀ ࡖ ࡄࡉࡉࡀ ࡔࡅࡌࡀࡊ ࡉࡀࡒࡉࡓ ࡔࡅࡌࡀࡊ ࡅࡌࡓࡀࡅࡓࡀࡁ ࡔࡅࡌࡀࡊ ࡁࡓࡉࡊ ࡔࡅࡌࡀࡊ ࡅࡌࡁࡀࡓࡀࡊ ࡔࡅࡌࡀࡊ ࡅࡆࡀࡊࡉࡀ ࡔࡅࡌࡀࡊ ࡅࡆࡀࡊࡉࡍ ࡐࡅࡂࡃࡀࡌࡉࡀ ࡖ ࡊࡅࡔࡈࡀ ࡖ ࡍࡀࡐࡒࡉࡀ ࡌࡍ ࡐࡅࡌࡀࡊ ࡅࡆࡀࡊࡉࡍ ࡊࡅࡋࡄࡅࡍ ࡏࡅࡁࡀࡃࡀࡊ ࡅࡄࡉࡉࡀ ࡆࡀࡊࡉࡍ ࡎࡀ

77. ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡏࡋࡊࡅࡍ ࡃࡉࡋࡊࡅࡍ ࡄࡉࡉࡀ ࡋࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡋࡄࡉࡉࡀ ࡒࡀࡃࡌࡀࡉࡉࡀ ࡅࡋࡄࡉࡉࡀ ࡕࡉࡍࡉࡀࡍࡉࡀ ࡅࡋࡄࡉࡉࡀ ࡕࡋࡉࡕࡀࡉࡉࡀ ࡅࡋࡉࡅࡐࡉࡍ ࡉࡅࡐࡀࡐࡉࡍ ࡅࡋࡎࡀࡌ ࡌࡀࡍࡀ ࡎࡌࡉࡓࡀ ࡅࡋࡂࡅࡐࡍࡀ ࡖ ࡊࡅࡋࡇ ࡄࡉࡉࡀ ࡅࡏࡋࡀࡍࡀ ࡓࡁࡀ ࡖ ࡊࡅࡋࡇ ࡀࡎࡀࡅࡀࡕࡀ ࡏࡋ ࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡏࡋ ࡏࡅࡑࡀࡓ ࡄࡀࡉ ࡅࡐࡕࡀ ࡄࡀࡉ ࡐࡀࡄࡕࡉࡀ ࡐࡉࡄࡕࡀ ࡖ ࡄࡉࡉࡀ ࡅࡍࡀࡑࡁࡉࡀ ࡍࡉࡑࡅࡁࡕࡀ ࡖ ࡍࡄࡅࡓࡀ ࡅࡔࡀࡊࡍࡉࡀ ࡃࡌࡅࡕࡀ ࡒࡀࡃࡌࡀࡉࡕࡀ ࡁࡉࡕ ࡄࡉࡉࡀ ࡋࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡋࡍࡁࡀࡈ ࡍࡉࡁࡈࡀ ࡒࡀࡃࡌࡀࡉࡀ ࡑࡅࡓࡉࡊ ࡄࡉࡉࡀ ࡁࡊࡉࡍࡉࡀࡍࡅࡍ ࡋࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡋࡌࡀࡓࡉࡀ ࡐࡉࡓࡀ ࡓࡁࡀ ࡅࡏࡋࡀࡉࡀ ࡖ ࡄࡅ ࡐࡓࡀ ࡅࡐࡀࡓࡉࡀ ࡅࡔࡀࡅࡉࡀ ࡐࡉࡓࡀ ࡓࡁࡀ ࡋࡍࡀࡐࡔࡉࡇ ࡋࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡋࡉࡅࡊࡀࡁࡀࡓ ࡆࡉࡅࡀ ࡖ ࡊࡁࡀࡓ ࡁࡆࡉࡅࡇ ࡅࡀࡎࡂࡉࡀ ࡁࡀࡍࡄࡅࡓࡇ ࡋࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡋࡉࡅࡆࡀࡈࡀࡒ ࡌࡀࡍࡃࡀ ࡖ ࡄࡉࡉࡀ ࡄࡉࡉࡀ ࡖ ࡄࡅࡍ ࡌࡍ ࡄࡉࡉࡀ ࡅࡊࡅࡔࡈࡀ ࡖ ࡄࡅࡀ ࡌࡍ ࡒࡅࡃࡀࡌ ࡁࡓࡉࡔࡀ ࡖ ࡊࡁࡀࡓ ࡁࡆࡉࡅࡇ ࡌࡍ ࡀࡋࡌࡉࡀ ࡖ ࡍࡄࡅࡓࡀ ࡋࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡋࡄࡀࡔ ࡊࡀࡍࡀ ࡖ ࡄࡀࡃࡓࡀ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡖ ࡀࡋࡉࡐ ࡀࡋࡉࡐ ࡄࡀࡅࡉࡍ ࡍࡉࡂࡁࡇ ࡅࡓࡅࡁࡀࡍ ࡓࡅࡁࡀࡍ ࡄࡀࡅࡉࡍ ࡋࡅࡀࡕࡇ ࡈࡅࡁࡇ ࡖ ࡄࡉࡆࡉࡇ ࡋࡏࡋࡀࡍࡀ ࡄࡀࡍࡀࡕࡇ ࡁࡉࡄࡓࡀࡌ ࡖ ࡄࡉࡆࡉࡇ ࡄࡉࡀ ࡅࡍࡄࡀࡓ ࡅࡏࡕࡀࡎࡉࡀ ࡅࡏࡕࡒࡀࡉࡀࡌ ࡅࡋࡀࡌࡉࡕ ࡔࡅࡌࡇ ࡋࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡋࡑࡀࡍࡀࡑࡏࡉࡉࡋ ࡖ ࡒࡀࡉࡉࡌ ࡋࡁࡀࡁࡀ ࡖ ࡄࡉࡉࡀ ࡅࡁࡀࡉࡉࡀ ࡋࡓࡅࡄࡉࡀ ࡅࡍࡉࡔࡌࡀࡕࡀ ࡌࡄࡀࡅࡉࡀ ࡔࡉࡃࡒࡀ ࡅࡉࡀࡄࡉࡁ ࡎࡉࡁࡓࡀ ࡅࡀࡄࡉࡃ ࡁࡀࡅࡀࡕࡀ ࡖ ࡓࡅࡄࡉࡀ ࡅࡍࡉࡔࡌࡀࡕࡀ ࡖ ࡀࡍࡀࡔࡉࡀ ࡊࡔࡉࡈࡉࡀ ࡅࡌࡄࡀࡉࡌࡍࡉࡀ ࡁࡀࡕࡓࡀ ࡖ ࡍࡄࡅࡓࡀ ࡋࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡋࡄࡀࡉࡀࡔࡅࡌ ࡊࡅࡔࡈࡀ ࡔࡂࡀࡍࡃࡀ ࡖ ࡄࡉࡉࡀ ࡅࡌࡀࡋࡀࡋࡀ ࡖ ࡁࡄࡉࡓࡉࡀ ࡆࡉࡃࡒࡀ ࡒࡀࡃࡌࡀࡉࡀ ࡖ ࡀࡁࡀࡓ

ࡀࡋࡌࡉࡀ ࡅࡀࡕࡀ ࡅࡁࡆࡀ ࡓࡒࡉࡄࡀ ࡅࡏࡕࡉࡂࡋࡉࡀ ࡋࡔࡀࡁࡅࡄࡉࡀ ࡋࡉࡀࡒࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡋࡁࡄࡀࡒ ࡆࡉࡅࡀ ࡖ ࡄࡅ ࡌࡉࡕࡉࡒࡓࡉࡀ ࡖ ࡀࡁࡀࡃ ࡅࡊࡔࡀࡓ ࡁࡔࡊࡉࡍࡕࡇ ࡋࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡋࡉࡅࡊࡀࡔࡀࡓ ࡊࡀࡍࡀ ࡖ ࡆࡉࡅࡀ ࡖ ࡆࡉࡅࡇ ࡉࡀࡄࡉࡁ ࡅࡍࡄࡅࡓࡇ ࡌࡄࡀࡅࡉࡀ ࡋࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡋࡁࡉࡓࡉࡀࡅࡉࡔ ࡊࡀࡍࡀ ࡄࡋࡉࡑࡀ ࡄࡀࡔ ࡊࡀࡍࡀ ࡖ ࡊࡁࡀࡓ ࡁࡆࡉࡅࡇ ࡋࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡋࡀࡉࡀࡓ ࡂࡅࡐࡍࡀ ࡃࡀࡊࡉࡀ ࡖ ࡔࡓࡉࡀ ࡁࡏࡅࡑࡀࡓ ࡍࡄࡅࡓࡀ ࡓࡁࡀ ࡅࡏࡋࡀࡉࡀ ࡋࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡋࡉࡅࡔࡀࡌࡉࡍ ࡃࡀࡊࡉࡀ ࡖ ࡔࡓࡉࡀ ࡋࡏࡅࡑࡓࡉࡀ ࡖ ࡌࡉࡀ ࡅࡋࡌࡀࡌࡁࡅࡂࡉࡀ ࡓࡅࡓࡁࡉࡀ ࡖ ࡍࡄࡅࡓࡀ ࡋࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡋࡕࡀࡅࡓࡏࡉࡉࡋ ࡏࡅࡕࡓࡀ ࡂࡀࡁࡓࡀ ࡖ ࡔࡓࡉࡀ ࡋࡊࡉࡎࡉࡀ ࡖ ࡌࡉࡀ ࡖ ࡌࡍ ࡄࡉࡑࡓࡀ ࡖ ࡉࡀࡌࡉࡍࡇ ࡂࡈࡀ ࡍࡐࡀࡋ ࡕࡉࡄࡅࡀ ࡁࡕࡉࡁࡉࡋ ࡄࡅࡀ ࡀࡊࡋࡀ ࡁࡀࡋࡌࡀ ࡖ ࡔࡉࡒࡓࡀ ࡋࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡋࡀࡃࡀࡕࡀࡍ ࡅࡉࡀࡃࡀࡕࡀࡍ ࡖ ࡒࡀࡉࡌࡉࡀ ࡋࡁࡀࡁࡀ ࡖ ࡄࡉࡉࡀ ࡅࡋࡄࡉࡉࡀ ࡌࡔࡀࡁࡉࡀ ࡅࡌࡉࡀࡕࡓࡉࡀ ࡅࡁࡀࡉࡉࡍ ࡋࡓࡅࡄࡉࡀ ࡅࡍࡉࡔࡌࡀࡕࡀ ࡖ ࡀࡍࡀࡔࡉࡀ ࡊࡔࡉࡈࡉࡀ ࡅࡌࡄࡀࡉࡌࡍࡉࡀ ࡁࡀࡕࡓࡀ ࡖ ࡄࡉࡉࡀ ࡋࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡋࡔࡉࡋࡌࡀࡉ ࡅࡍࡉࡃࡁࡀࡉ ࡏࡅࡕࡓࡉࡀ ࡕࡓࡉࡍ ࡐࡀࡃࡉࡁࡓࡇ ࡖ ࡌࡀࡍࡃࡀ ࡖ ࡄࡉࡉࡀ ࡖ ࡀࡁࡃࡉࡀ ࡅࡌࡀࡁࡃࡉࡀ ࡄࡉࡉࡀ ࡁࡊࡅࡔࡈࡀ ࡅࡁࡎࡀࡄࡃࡅࡕࡀ ࡖ ࡄࡉࡉࡀ ࡑࡀࡁࡉࡍ ࡍࡉࡔࡌࡀࡕࡀ ࡄࡀࡉࡀࡕࡀ ࡏࡓࡀࡕࡀ ࡕࡀࡒࡅࡍࡀࡕࡀ ࡅࡓࡀࡅࡀࡆࡀࡕࡀ ࡖ ࡁࡊࡅࡔࡈࡀ ࡌࡀࡎࡂࡉࡍ ࡋࡉࡀࡓࡃࡍࡀ ࡋࡀࡅ ࡁࡔࡅࡌ ࡀࡋࡀࡄࡅࡕࡀ ࡅࡌࡔࡉࡄࡀ ࡋࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡋࡔࡅࡌ ࡄࡀࡉ ࡓࡄࡅࡌ ࡄࡀࡉ ࡏࡉࡍ ࡄࡀࡉ ࡅࡆࡀࡌࡀࡓ ࡄࡀࡉࡀࡓࡁࡀ ࡂࡅࡁࡓࡉࡀ ࡁࡍࡉࡀ ࡔࡋࡀࡌࡀ ࡖ ࡀࡕࡉࡍ ࡀࡋࡀࡍࡐࡀࡉࡄࡅࡍ ࡖ ࡀࡍࡀࡔࡉࡀ ࡊࡔࡉࡈࡉࡀ ࡅࡌࡄࡀࡉࡌࡍࡉࡀ ࡌࡀࡐࡒࡉࡋࡅࡍ ࡌࡍ ࡀࡕࡅࡕࡉࡀ ࡀࡎࡀࡓࡉࡀ ࡏࡃࡀࡉࡄࡅࡍ ࡖ ࡁࡉࡔࡉࡀ ࡅࡌࡍ ࡀࡕࡅࡕࡉࡀ ࡈࡅࡐࡓࡀࡉࡄࡅࡍ ࡖ ࡂࡅࡁࡓࡉࡀ ࡌࡄࡀࡔࡁࡀࡍࡉࡀ ࡅࡌࡀࡎࡉࡒࡋࡅࡍ ࡋࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡋࡃࡀࡅࡓࡀ ࡕࡀࡒࡍࡀ ࡋࡀࡉࡐࡉࡋࡅࡍ ࡁࡋࡀࡅࡐࡀ ࡖ ࡄࡉࡉࡀ ࡅࡁࡀࡍࡉࡋࡅࡍ ࡁࡁࡉࡍࡉࡀࡍࡀ ࡓࡁࡀ ࡖ ࡔࡓࡀࡓࡀ ࡋࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡋࡄࡉࡁࡉࡋ ࡅࡔࡉࡕࡉࡋ ࡅࡀࡍࡅࡔ ࡁࡍࡉࡀ ࡖ ࡔࡅࡓࡁࡕࡀ ࡄࡀࡉࡕࡀ

ࡏࡓࡕࡀ ࡅࡓࡀࡅࡀࡆࡕࡀ ࡅࡕࡀࡒࡅࡍࡕࡀ ࡂࡅࡁࡓࡉࡀ ࡖ ࡁࡄࡉࡓࡁࡀ ࡋࡀࡏࡕࡉࡍࡎࡉࡁ ࡅࡁࡉࡀࡒࡃࡀࡍࡉࡀ ࡖ ࡍࡅࡓࡀ ࡋࡀࡏࡒࡀࡃ ࡅࡁࡈࡅࡐࡀࡍࡉࡀ ࡖ ࡌࡉࡀ ࡋࡀࡈࡀࡐ ࡅࡀࡓࡒࡉࡀ ࡌࡎࡀࡍࡅࡍ ࡖ ࡁࡋࡉࡂࡓࡀࡉࡄࡅࡍ ࡌࡉࡀ ࡋࡀࡏࡑࡈࡁࡀ ࡃࡀࡍ ࡅࡆࡊࡅࡍ ࡁࡅࡍ ࡅࡀࡔࡊࡀ ࡓࡄࡉࡈ ࡅࡌࡀࡈࡅࡍ ࡋࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡋࡃࡀࡅࡓࡀ ࡕࡀࡒࡍࡀ ࡋࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡋࡑࡉࡄࡉࡅࡍ ࡅࡐࡀࡓࡃࡅࡍ ࡅࡊࡀࡍࡐࡅࡍ ࡏࡅࡕࡓࡉࡀ ࡖ ࡄࡀࡃ ࡄࡀࡃ ࡄࡀࡅࡉࡀ ࡔࡅࡌࡀࡉࡄࡅࡍ ࡁࡉࡕ ࡄࡉࡉࡀ ࡀࡃࡀࡌ ࡊࡀࡎࡉࡀ ࡁࡉࡄࡓࡀࡌ ࡅࡓࡀࡌ ࡏࡅࡕࡓࡉࡀ ࡖ ࡄࡀࡃ ࡄࡀࡃ ࡄࡀࡅࡉࡀ ࡔࡅࡌࡀࡉࡄࡅࡍ ࡁࡉࡕ ࡄࡉࡉࡀ ࡕࡓࡉࡍ ࡕࡓࡉࡍ ࡄࡀࡅࡉࡀ ࡊࡉࡍࡉࡀࡍࡅࡍ ࡅࡏࡕࡒࡀࡉࡀࡌ ࡔࡅࡌࡀࡉࡄࡅࡍ ࡁࡉࡕ ࡄࡉࡉࡀ ࡖ ࡀࡍࡀࡔࡉࡀ ࡊࡔࡉࡈࡉࡀ ࡅࡌࡄࡀࡉࡌࡍࡉࡀ ࡁࡀࡕࡓࡀ ࡖ ࡍࡄࡅࡓࡀ ࡍࡀࡄࡅࡓ ࡔࡅࡌࡀࡊ ࡅࡕࡀࡒࡅࡍ ࡔࡅࡌࡀࡊ ࡅࡁࡀࡎࡉࡌ ࡔࡅࡌࡀࡊ ࡅࡌࡒࡀࡉࡀࡌ ࡔࡅࡌࡀࡊ ࡅࡆࡀࡊࡉࡀ ࡔࡅࡌࡀࡊ ࡅࡆࡀࡊࡉࡍ ࡐࡅࡂࡃࡀࡌࡉࡀ ࡖ ࡊࡅࡔࡈࡀ ࡖ ࡍࡀࡐࡒࡉࡀ ࡌࡍ ࡐࡅࡌࡀࡊ ࡋࡊࡅࡋࡄࡅࡍ ࡏࡅࡁࡀࡃࡉࡀ ࡆࡀࡊࡉࡀ ࡅࡒࡀࡉࡌࡀ ࡋࡄࡀࡆࡀ ࡍࡉࡔࡉࡌࡕࡀࡉ ࡃࡉࡋࡉࡀ ࡅࡄࡉࡉࡀ ࡆࡀࡊࡉࡍ ࡏࡋ ࡊࡅࡋࡄࡅࡍ ࡏࡅࡁࡀࡃࡉࡀ ࡎ ࡀ ࡄࡀࡋࡉࡍ ࡕࡋࡀࡕ ࡁࡀࡅࡀࡕࡀ ࡀࡅࡃࡉࡍ ࡅࡕࡅࡔࡁࡉࡄࡀࡍ ࡅࡏࡋࡊࡅࡍ ࡃࡉࡋࡊࡅࡍ ࡖ ࡀࡍࡎࡉࡕ ࡋࡍࡀࡐࡔࡀࡉ ࡖ ࡄࡀࡅࡉࡋࡀࡉ ࡃࡅࡊࡓࡀࡍࡀ ࡁࡕࡉࡁࡉࡋ ࡅࡄࡀࡕࡀࡌ ࡁࡀࡋࡌࡉࡀ ࡓࡅࡓࡁࡉࡀ ࡏࡋࡀࡉࡉࡀ ࡖ ࡍࡄࡅࡓࡀ ࡖ ࡋࡉࡁࡀࡉ ࡎࡄࡉࡃ ࡁࡄࡉࡉࡀ ࡒࡀࡃࡌࡀࡉࡉࡀ ࡅࡎࡀࡁࡉࡋࡍࡀ ࡋࡓࡉࡃࡐࡀ ࡖ ࡀࡋࡌࡀ ࡌࡍ ࡁࡍࡉࡀ ࡖ ࡔࡉࡁࡉࡀࡄࡉࡀ ࡁࡋࡉࡁࡀ ࡊࡔࡉࡈࡀ ࡅࡌࡄࡀࡉࡌࡍࡀ ࡋࡄࡀࡃ ࡔࡅࡌࡀ ࡖ ࡉࡀࡅࡀࡓ ࡌࡊࡀࡃࡉࡔࡍࡀ ࡋࡓࡀࡄࡌࡅࡕ ࡊࡅࡔࡈࡀ ࡉࡀࡒࡓࡀ ࡋࡉࡁࡀࡉ ࡋࡄࡉࡉࡀ ࡅࡀࡉࡍࡀࡉ ࡌࡎࡀࡊࡉࡀࡋࡇ ࡋࡌࡀࡍࡃࡀ ࡖ ࡄࡉࡉࡀ ࡖ ࡄࡉࡍࡅࡍ ࡍࡉࡄࡅࡉࡋࡉࡀ ࡎࡉࡌࡀࡊࡀ ࡅࡌࡐࡀࡓࡒࡀࡍࡀ ࡅࡌࡔࡅࡆࡁࡀࡍࡀ ࡌࡍ ࡀࡕࡓࡀ ࡖ ࡄࡔࡅࡊࡀ ࡋࡀࡕࡓࡀ ࡖ ࡍࡄࡅࡓࡀ ࡖ ࡀࡍࡎࡉࡕ ࡋࡍࡀࡐࡔࡀࡉ ࡀࡍࡀ ࡀࡍࡉࡀ ࡅࡃࡀࡍࡉࡀ ࡀࡁࡃࡀ ࡖ ࡊࡅࡋࡇ ࡄࡀࡈࡀࡉࡉࡀ ࡅࡀࡓࡒࡀ ࡁࡉࡂࡀࡓ ࡖ ࡍࡀࡑࡅࡓࡀࡉࡉࡀ ࡅࡀࡒࡀࡐࡓࡀ ࡖ ࡀࡕࡅࡕࡉࡀ ࡋࡉࡂࡓࡀࡉࡄࡅࡍ ࡖ ࡍࡀࡎࡀࡊࡉࡀ ࡆࡅࡈࡀ ࡖ ࡀࡄࡀࡉ ࡕࡀࡓࡌࡉࡃࡉࡀ ࡅࡌࡍࡀࡔࡉࡒࡍࡀ ࡌࡎࡀࡍࡉࡀ ࡋࡉࡂࡓࡀࡉࡄࡅࡍ ࡖ ࡂࡀࡍࡆࡉࡁࡓࡉࡀ ࡀࡍࡀ ࡓࡁࡀࡉ ࡀࡃࡀࡌ ࡉࡅࡄࡀࡍࡀ ࡁࡓ ࡎࡀࡌ ࡁࡓ ࡁࡉࡄࡓࡀࡌ ࡁࡓ ࡎࡀ(ࡀyࡉࡍ)ࡃࡀࡍ ࡁࡓ ࡌࡎࡀ(ࡀyࡉࡍ)ࡀࡃ ࡋࡀࡒࡀࡁ ࡊࡀࡌࡉࡎࡉࡀ ࡅࡊࡉࡍࡉࡀࡍࡇ ࡓࡉࡔ ࡃࡓࡀࡆ ࡖ ࡀࡍࡎࡉࡕ ࡋࡍࡀࡐࡔࡀࡉ ࡖ ࡏࡁࡀࡃ ࡅࡊࡔࡀࡓ ࡁࡂࡉࡅࡇ ࡌࡍ ࡎࡉࡃࡓࡀ ࡖ ࡀࡍࡀࡍࡀ ࡃࡀࡊࡉࡕࡀ ࡖ ࡏࡅࡑࡓࡀ ࡌࡃࡀࡊࡀࡉ ࡖ ࡐࡉࡓࡑࡀ ࡅࡂࡀࡅࡓࡀ ࡅࡆࡀࡍࡉࡅࡕࡀ ࡋࡉࡕࡁࡇ ࡖ ࡄࡏ ࡏࡌࡀ ࡖ ࡀࡁ ࡃࡉࡋࡀࡉ ࡔࡅࡌࡀ ࡖ ࡌࡀࡑࡁࡅࡕࡀ ࡀࡍࡄࡀࡓ ࡐࡕ ࡔࡀࡓࡀࡕ ࡅࡔࡅࡌࡀ ࡖ ࡒࡓࡀࡉࡕࡀ (ࡀyࡉࡍ)ࡃࡉࡉࡀ ࡁࡓࡀࡕࡇ ࡖ ࡀࡃࡀࡌ ࡁࡓ ࡎࡀ(ࡀyࡉࡍ)ࡀࡃ ࡊࡉࡍࡉࡀࡍࡇ ࡔࡅࡉࡓࡉࡀ ࡖ ࡀࡍࡎࡀࡋࡀ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡓࡁࡀࡉ ࡓࡀࡌ ࡉࡅࡄࡀࡍࡀ ࡁࡓ ࡓࡁࡀࡉ ࡉࡀࡄࡉࡀ ࡆࡉࡄࡓࡅࡍ ࡁࡓ ࡓࡁࡀࡉ ࡆࡉࡄࡓࡅࡍ ࡁࡓ ࡓࡁࡀࡉ ࡀࡃࡀࡌ ࡁࡓ ࡓࡁࡀࡉ ࡉࡀࡄࡉࡀ ࡀࡃࡀࡌ ࡁࡓ ࡓࡁࡀࡉ ࡔࡉࡕࡉࡋ ࡋࡀࡒࡀࡁ ࡌࡀࡍࡃࡅࡉࡀ ࡅࡊࡉࡍࡉࡀࡍࡇ ࡏࡅࡊࡅࡌࡀ ࡖ ࡀࡍࡎࡀࡋࡀ ࡌࡍ ࡎࡉࡃࡓࡀ ࡖ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡓࡁࡀࡉ ࡉࡀࡄࡉࡀ ࡆࡉࡄࡓࡅࡍ ࡁࡓ ࡓࡁࡀࡉ ࡉࡀࡄࡉࡀ ࡁࡉࡄࡓࡀࡌ ࡁࡓ ࡓࡁࡀࡉ ࡀࡃࡀࡌ ࡁࡓ ࡓࡁࡀࡉ ࡉࡀࡄࡉࡀ ࡀࡃࡀࡌ ࡁࡓ ࡓࡁࡀࡉ ࡔࡉࡕࡉࡋ ࡁࡓ ࡓࡁࡀࡉ ࡓࡀࡌ ࡋࡀࡒࡀࡁ ࡌࡀࡍࡃࡅࡉࡀ ࡅࡊࡉࡍࡉࡀࡍࡇ ࡏࡊࡅࡌࡀ ࡖ ࡀࡍࡎࡀ ࡋࡄࡀࡃ ࡔࡀࡋࡌࡀࡍࡀ ࡏࡎࡕࡀࡃ ࡄࡀࡃࡀࡉࡀࡕ ࡁࡓ ࡒࡀࡎࡅࡌ ࡁࡓ ࡄࡀࡃࡀࡕ ࡁࡓ ࡁࡉࡄࡓࡀࡌ ࡁࡓ ࡆࡉࡄࡓࡅࡍ ࡌࡍ ࡁࡍࡉࡀ ࡃࡉࡄࡃࡀࡓࡉࡀ ࡅࡊࡉࡍࡉࡀࡍࡇ ࡎࡀࡁࡅࡓ ࡖ ࡀࡍࡎࡀࡋࡇ ࡌࡍ ࡎࡉࡃࡓࡀ ࡖ ࡌࡅࡃࡀࡋࡀࡋ ࡁࡓࡀࡕࡇ ࡖ ࡃࡉࡄࡃࡀࡓ ࡎࡀࡋࡉࡌ ࡁࡓ ࡃࡉࡄࡃࡀࡓ ࡂࡀࡍࡉࡌ ࡊࡉࡍࡉࡀࡍࡇ ࡒࡅࡈࡀࡍࡀ ࡖ ࡀࡍࡎࡀࡋࡀ ࡌࡍ ࡎࡉࡃࡓࡀ ࡖ ࡀࡑࡈࡀ (ࡀyࡉࡍ)ࡀࡆࡉࡆ ࡁࡓ ࡀࡑࡈࡀ ࡐࡀࡓࡅࡊ ࡁࡓ ࡀࡃࡀࡌ ࡉࡅࡄࡀࡍࡀ ࡁࡓ ࡉࡀࡄࡉࡀ ࡌࡍ ࡁࡍࡉࡀ ࡃࡉࡄࡃࡀࡓࡉࡀ ࡊࡉࡍࡉࡀࡍࡇ ࡎࡀࡁࡅࡓ ࡖ ࡀࡍࡎࡀࡋࡇ ࡌࡍ ࡎࡉࡃࡓࡀ ࡖ ࡔࡀࡄࡀ ࡁࡓࡀࡕࡇ ࡖ (ࡀyࡉࡍ)ࡀࡆࡀࡆ ࡎࡀࡊࡀࡓࡀ ࡅࡊࡉࡍࡉࡀࡍࡇ ࡅࡀ(ࡔ)ࡉࡀ ࡖ ࡀࡍࡎࡀࡋࡇ ࡌࡍ ࡎࡉࡃࡓࡀ ࡖ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡂࡀࡍࡆࡉࡁࡓࡀ ࡁࡄࡉࡓࡀ ࡅࡔࡀࡋࡌࡀࡍࡀ ࡓࡉࡔࡀࡉࡀ ࡅࡐࡓࡉࡔࡀࡉࡀ ࡁࡓ ࡔࡉࡓࡔࡀ ࡕࡀࡒࡍࡀ ࡁࡓ ࡌࡀࡋࡊࡉࡀ ࡖ ࡏࡒࡀࡓࡀ ࡁࡓ ࡒࡉࡍࡀ ࡌࡃࡀࡋࡀࡉࡕࡀ ࡓࡁࡀࡉ ࡎࡀࡓࡅࡀࡍ ࡁࡀࡄࡓࡀࡍ ࡁࡓ ࡀࡃࡀࡌ ࡁࡀࡊࡕࡉࡀࡓ ࡁࡓ ࡎࡀࡌ ࡁࡀࡄࡓࡀࡍ ࡊࡉࡍࡉࡀࡍࡇ ࡆࡀࡊࡉࡀ ࡁࡓࡇ ࡖ ࡉࡅࡄࡀࡍࡀ ࡅࡋࡀࡒࡀࡁ ࡁࡄࡀࡉࡉࡓ ࡆࡀࡓࡆࡉࡇ ࡅࡍࡀࡈࡓࡇ ࡍࡄࡅࡓࡀ ࡉࡀࡒࡓࡀ ࡖ ࡀࡍࡎࡀ ࡌࡍ ࡎࡉࡃࡓࡀ ࡖ ࡀࡍࡎࡀ ࡋࡍࡀࡐࡔࡉࡇ ࡁࡉࡄࡓࡀࡌ ࡁࡓ ࡄࡉࡉࡀ ࡁࡓ ࡆࡀࡊࡉࡀ ࡁࡓ ࡄࡉࡉࡀ ࡁࡓ ࡁࡀࡊࡕࡉࡀࡓ ࡁࡓ ࡀࡃࡀࡌ ࡁࡉࡄࡓࡀࡌ ࡊࡉࡍࡉࡀࡍࡇ ࡊࡅࡄࡀࡉࡋࡉࡀ ࡖ ࡀࡍࡎࡀ ࡌࡍ ࡎࡉࡃࡓࡀ ࡖ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡂࡀࡍࡆࡉࡁࡓࡀ ࡀࡓࡃࡉࡊࡋࡀ ࡓࡁࡀࡉ ࡀࡃࡀࡌ ࡆࡀࡊࡉࡀ ࡁࡓ ࡉࡀࡄࡉࡀ ࡉࡅࡄࡀࡍࡀ ࡁࡓ ࡁࡀࡊࡕࡉࡀࡓ ࡁࡓ ࡄࡉࡉࡀ ࡁࡓ ࡀࡃࡀࡌ ࡁࡓ ࡎࡀࡌ ࡁࡓ ࡀࡁࡅࡋࡐࡀࡓࡀࡔ ࡁࡓ ࡓࡅࡆࡁࡇ ࡁࡓ ࡀࡃࡀࡌ ࡁࡓ ࡎࡀࡌ ࡊࡉࡍࡉࡀࡍࡇ ࡎࡅࡌࡀࡒࡀ ࡅࡒࡉࡍࡇ

ࡏࡊࡅࡌࡀ ࡖ ࡀࡍࡎࡀࡋࡇ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡓࡁࡀࡉ ࡓࡀࡌ ࡆࡉࡄࡓࡅࡍ ࡁࡓ ࡎࡀࡌ ࡆࡉࡄࡓࡅࡍ ࡁࡓ ࡎࡀࡓࡅࡀࡍ ࡊࡉࡍࡉࡀࡍࡇ ࡎࡀࡌࡅࡉࡀ ࡔࡁࡅࡒࡋࡇ ࡌࡀࡍࡃࡀ ࡖ ࡄࡉࡉࡀ ࡄࡀࡈࡀࡉࡉࡇ ࡖ ࡀࡍࡎࡀࡋࡇ ࡌࡍ ࡎࡉࡃࡓࡀ ࡖ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡊࡀࡉࡀࡋࡀ ࡖ ࡍࡀࡑࡉࡓࡅࡕࡀ ࡓࡁࡀࡉ ࡁࡉࡄࡓࡀࡌ ࡁࡓ ࡁࡀࡊࡕࡉࡀࡓ ࡌࡀࡋࡅࡄࡀ ࡖ ࡀࡍࡎࡀ ࡌࡍ ࡎࡉࡃࡓࡀ ࡖ ࡀࡍࡎࡀ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡁࡓ ࡔࡉࡓࡔࡀ ࡕࡀࡒࡍࡀ ࡓࡁࡀࡉ ࡀࡁࡅࡋࡐࡀࡓࡀࡔ ࡒࡅࡈࡀࡍࡀ ࡖ ࡀࡍࡎࡀࡋࡇ ࡌࡍ ࡎࡉࡃࡓࡀ ࡖ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡓࡁࡀࡉ ࡀࡃࡀࡌ ࡁࡓ ࡎࡀࡌ ࡁࡀࡉࡀࡍ ࡊࡉࡍࡉࡀࡍࡇ

ࡒࡅࡈࡀࡍࡀ ࡖ ࡀࡍࡎࡀ ࡌࡍ ࡎࡉࡃࡓࡀ ࡖ ࡓࡁࡀࡉ ࡉࡀࡄࡉࡀ ࡁࡉࡄࡓࡀࡌ ࡁࡓ ࡓࡁࡀࡉ ࡀࡃࡀࡌ ࡊࡉࡍࡉࡀࡍࡇ ࡆࡀࡓࡆࡅࡉࡀ ࡌࡍ ࡎࡉࡃࡓࡀ ࡖ ࡀࡍࡀࡍࡀ ࡃࡀࡊࡉࡕࡀ ࡖ ࡏࡌࡀ ࡔࡀࡓࡀࡕ ࡉࡀࡎࡌࡉࡍ ࡁࡓࡀࡕࡇ ࡖ ࡆࡀࡊࡉࡀ ࡃࡉࡒࡍࡀࡍࡀ ࡖ ࡀࡍࡎࡀ ࡄࡀࡌ ࡓࡁࡀࡉ ࡁࡉࡄࡓࡀࡌ ࡁࡓ ࡓࡁࡀࡉ ࡀࡃࡀࡌ ࡆࡀࡓࡆࡅࡉࡀ ࡌࡍ ࡎࡉࡃࡓࡀ ࡖ ࡄࡀࡅࡀ ࡌࡀࡄࡍࡅࡔ ࡁࡓࡀࡕࡇ ࡉࡀࡄࡉࡀ ࡀࡍࡎࡀ ࡓࡁࡀࡉࡄࡅࡍ ࡖ ࡂࡀࡍࡆࡉࡁࡓࡉࡀ ࡓࡁࡀࡉ ࡎࡀࡓࡅࡀࡍ ࡁࡅࡋࡁࡅࡋ ࡁࡓ ࡀࡃࡀࡌ ࡁࡀࡉࡀࡍ ࡆࡀࡓࡆࡅࡉࡀ ࡌࡍ ࡎࡉࡃࡓࡀ ࡖ ࡓࡁࡀࡉ ࡔࡀࡃࡀࡍ ࡁࡓ ࡎࡀࡌ ࡐࡀࡉࡉࡔ ࡖ ࡀࡍࡎࡀࡋࡇ ࡓࡁࡀࡉ ࡁࡉࡄࡓࡀࡌ ࡆࡀࡊࡉࡀ ࡁࡓ ࡁࡀࡉࡀࡍ ࡔࡅࡐࡓࡕࡀࡉࡉࡀ ࡖ ࡀࡍࡎࡀࡋࡇ ࡄࡀࡌ ࡓࡁࡀࡉ ࡁࡉࡄࡓࡀࡌ ࡆࡀࡊࡉࡀ ࡁࡓ ࡁࡀࡉࡀࡍ ࡔࡅࡐࡓࡕࡀࡉࡉࡀ ࡌࡍ ࡎࡉࡃࡓࡀ ࡖ ࡁࡀࡊࡕࡉࡀࡓ ࡁࡓ ࡉࡅࡄࡀࡍࡀ ࡖ ࡀࡍࡎࡀࡋࡇ ࡄࡀࡌ ࡓࡁࡀࡉ ࡁࡉࡄࡓࡀࡌ ࡆࡀࡊࡉࡀ ࡁࡓ ࡁࡀࡉࡀࡍ ࡔࡅࡐࡓࡕࡀࡉࡉࡀ ࡌࡍ ࡎࡉࡃࡓࡀ ࡖ ࡁࡀࡊࡕࡉࡀࡓ ࡁࡓ ࡉࡅࡄࡀࡍࡀ ࡖ ࡀࡍࡎࡀࡋࡇ ࡄࡀࡌ ࡁࡄࡉࡓࡀࡌ ࡆࡀࡊࡉࡀ ࡁࡓ ࡁࡀࡉࡀࡍ ࡔࡅࡐࡀࡕࡀࡉࡉࡀ ࡌࡍ ࡄࡀࡊ ࡎࡉࡃࡓࡀ ࡄࡀࡕࡉࡒࡀ ࡖ ࡀࡐࡓࡉࡔ ࡏࡋࡇ ࡀࡍࡅࡔ ࡌ(ࡀyࡉࡍ)ࡀࡋࡉࡀ ࡁࡓ ࡀࡍࡅࡔ ࡁࡉࡄࡃࡀࡃ ࡊࡃࡀࡁ ࡏࡃࡀ ࡖ ࡉࡀࡄࡉࡀ ࡀࡃࡀࡌ ࡁࡓ ࡎࡀࡌ ࡎࡀࡉࡅࡉࡀ ࡖ ࡀࡍࡎࡀࡋࡇ ࡁࡓ ࡀࡄࡀࡕࡀ ࡖ ࡏࡌࡇ ࡎࡀࡌ ࡁࡓ ࡉࡀࡄࡉࡀ ࡌࡍ ࡎࡉࡃࡓࡀ ࡖ ࡉࡀࡄࡉࡀ ࡁࡓ ࡀࡃࡀࡌ ࡅࡉࡀࡄࡉࡀ ࡀࡍࡎࡀ ࡌࡍ ࡎࡉࡃࡓࡀ ࡖ ࡓࡀࡌ ࡆࡉࡅࡀ ࡁࡉࡄࡃࡀࡃ ࡁࡓ ࡁࡀࡉࡀࡍ ࡄࡉࡁࡉࡋ ࡌࡍ ࡎࡉࡃࡓࡀ ࡖ ࡀࡔࡅࡀࡋࡀࡉࡉࡇ ࡆࡉࡄࡓࡅࡍ ࡁࡓ ࡎࡊࡅࡄࡉࡉࡀ ࡖ ࡄࡅ ࡁࡓࡀ ࡖ ࡎࡅࡋࡉࡀ ࡖ ࡀࡍࡎࡀࡋࡇ ࡌࡍ ࡀࡍࡀࡔࡉࡀ ࡖ ࡌࡁࡀࡔࡒࡉࡓࡉࡋࡇ ࡌࡍ ࡌࡀࡕࡀ ࡖ ࡔࡉࡋࡅࡓࡉࡐࡕࡀ ࡅࡆࡉࡄࡓࡅࡍ ࡀࡍࡎࡀࡋࡇ ࡓࡁࡇ ࡓࡀࡌ ࡆࡉࡅࡀ ࡁࡉࡄࡓࡀࡌ ࡁࡓ ࡁࡀࡉࡀࡍ ࡄࡉࡁࡉࡋ ࡌࡍ ࡎࡉࡃࡓࡀ ࡖ ࡍࡀࡐࡔࡉࡇ ࡖ ࡀࡍࡎࡀ ࡌࡍ ࡎࡉࡃࡓࡀ ࡖ ࡀࡁࡅࡉࡀ ࡁࡀࡉࡀࡍ ࡄࡉࡁࡉࡋ ࡁࡓ ࡁࡓࡉࡊ ࡉࡀࡅࡀࡓ ࡅࡁࡀࡉࡀࡍ ࡄࡉࡁࡉࡋ ࡀࡍࡎࡀ ࡌࡍ ࡔࡀࡐࡕࡀ ࡖ ࡏࡒࡀࡉࡀࡌ ࡁࡓ ࡆࡉࡍࡃࡀࡍࡀ ࡅࡏࡒࡀࡉࡀࡌ ࡀࡍࡎࡀ ࡌࡍ ࡔࡀࡐࡕࡀ ࡖ ࡁࡀࡉࡀࡍ ࡄࡉࡁࡉࡋ ࡁࡓ ࡁࡓࡉࡊ ࡉࡀࡅࡀࡓ ࡅࡁࡀࡉࡀࡍ ࡄࡉࡁࡉࡋ ࡀࡍࡎࡀ ࡌࡍ ࡔࡀࡐࡕࡀ ࡖ ࡄࡉࡁࡉࡋ ࡁࡓ ࡂࡀࡃࡀࡍࡀ ࡖ ࡄࡅࡀ ࡔࡊࡉࡍࡀ ࡁࡂࡉࡍࡆࡀ ࡖ ࡔࡀࡃ ࡌࡀࡍࡃࡀ ࡁࡓ ࡎࡊࡅ ࡉࡀࡅࡀࡓ ࡅࡄࡉࡁࡉࡋ ࡀࡍࡎࡀ ࡌࡍ ࡔࡀࡐࡕࡀ ࡖ ࡀࡁࡅࡉࡀ ࡂࡀࡃࡀࡍࡀ ࡍࡅࡊࡓࡀࡉࡀ . ࡕࡅࡌ ࡄࡀࡋࡉࡍ ࡁࡀࡅࡀࡕࡀ ࡌࡀࡍࡃࡉࡆࡀࡍ ࡌࡍ ࡃࡉࡅࡀࡍ ࡖ ࡁࡀࡉࡀࡍ ࡄࡉࡁࡉࡋ ࡁࡓ ࡁࡓࡉࡊ ࡉࡀࡅࡀࡓ ࡅࡃࡁࡀࡉࡍࡉࡀ ࡁࡓ ࡆࡀࡊࡉࡀ ࡅࡉࡀࡄࡉࡀ ࡀࡃࡀࡌ ࡁࡓ ࡎࡀࡌ ࡎࡀࡉࡅࡉࡀ ࡀࡍࡎࡅࡍ ࡌࡍ ࡃࡉࡅࡀࡍ ࡖ ࡓࡀࡌࡅࡉࡀ ࡁࡓ

ࡏࡒࡀࡉࡌࡀࡕ ࡖ ࡏࡔࡕࡉࡊࡍࡀࡕ ࡋࡅࡀࡕ ࡄࡀࡉࡅࡍࡀ ࡐࡕ ࡉࡀࡄࡉࡀ ࡎࡀ

78. ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡍࡉࡍࡄࡀࡓࡋࡀࡉ ࡏࡅࡑࡓࡀࡉ ࡅࡌࡀࡃࡀࡉ ࡅࡌࡀࡃࡉࡄࡕࡀࡉ ࡃࡉࡋࡉࡀ ࡁࡄࡀࡋࡉࡍ ࡏࡍࡉࡀࡍࡉࡀ ࡅࡃࡓࡀࡔࡉࡀ ࡖ ࡌࡀࡑࡁࡅࡕࡀ ࡅࡌࡀࡎࡉࡒࡕࡀ ࡎࡀ

79. ࡁࡔࡅࡌࡀ ࡖ ࡄࡉࡉࡀ ࡓࡁࡉࡀ ࡗ ࡀࡎࡀ ࡀࡎࡀ ࡁࡂࡍࡉࡍࡉࡀ ࡖ ࡄࡉࡁࡉࡋ ࡓࡀࡅࡆ ࡗ ࡌࡀࡓࡌࡀࡄࡅࡆ ࡁࡀࡅࡀࡍࡉࡀ ࡌࡀࡍࡃࡀ ࡄࡅࡀ ࡖ ࡏࡄࡀࡁࡋࡉࡀ ࡕࡓࡉࡍ ࡀࡂࡉࡀ ࡖ ࡀࡎࡀ ࡖ ࡌࡉࡍࡇ ࡂࡃࡀࡋࡀࡋࡇ ࡊࡋࡉࡋࡀ ࡏࡋ ࡉࡀࡓࡃࡍࡀ ࡖ ࡄࡅ ࡔࡀࡍࡉࡀ ࡅࡓࡉࡄࡇ ࡁࡀࡎࡉࡌ ࡎࡀ ࡄࡀࡆࡉࡍ ࡏࡍࡉࡀࡍࡀ ࡒࡓࡉࡀ ࡅࡂࡃࡅࡋ ࡊࡋࡉࡋࡀ ࡖ ࡀࡎࡀ ࡋࡌࡀࡓࡂࡍࡀࡊ ࡅࡄࡀࡉࡆࡀࡊ ࡒࡓࡉࡀ ࡏࡍࡉࡀࡍࡀ ࡋࡉࡀࡓࡃࡍࡀ ࡏࡅࡍࡉࡀࡍ ࡀࡁ ࡏࡅࡍࡉࡀࡍ ࡎࡀ

80. ࡁࡔࡅࡌࡀ ࡖ ࡄࡉࡉࡀ ࡓࡁࡉࡀ ࡏࡅࡍࡉࡀࡍ ࡀࡁ ࡏࡅࡍࡉࡀࡍ ࡅࡃࡀࡋࡉࡀࡍ ࡓࡁࡀ ࡁࡓ ࡓࡅࡓࡁࡉࡀ ࡀࡁࡅࡍ ࡁࡓ ࡄࡉࡉࡀ ࡔࡉࡋࡌࡀࡉ ࡅࡍࡉࡃࡁࡀࡉ ࡌࡀࡓࡇ ࡖ ࡉࡀࡓࡃࡍࡀ ࡏࡅࡍࡉࡅࡍ ࡉࡀࡓࡃࡍࡀ ࡅࡕࡓࡉࡍ ࡊࡉࡐࡇ ࡏࡅࡍࡉࡀࡍ ࡏࡅࡍࡉࡀࡍ ࡄࡉࡁࡉࡋ ࡆࡉࡅࡀ ࡖ ࡄࡀࡉࡋࡇ ࡋࡏࡅࡕࡓࡉࡀ ࡀࡄࡇ ࡔࡓࡉࡍ ࡏࡅࡍࡉࡀࡍ ࡉࡀࡅࡀࡓ ࡆࡉࡅࡀ ࡖ ࡒࡉࡓࡉࡀࡕࡀࡊ ࡋࡉࡀࡓࡃࡍࡀ ࡔࡓࡉࡀࡍ ࡏࡅࡍࡉࡅࡍ ࡌࡀࡍࡀ ࡓࡁࡀ ࡊࡀࡁࡉࡓࡀ ࡅࡒࡀࡉࡌࡀ ࡏࡋ ࡍࡉࡑࡁࡅࡕࡀࡉࡊࡅࡍ ࡏࡅࡍࡉࡅࡍ ࡏࡅࡍࡉࡅࡍ ࡄࡀࡁࡔࡀࡁࡀ ࡅࡊࡀࡍࡀ ࡖ ࡆࡉࡃࡒࡀ ࡏࡅࡍࡉࡅࡍ ࡏࡍࡉࡀࡍ ࡀࡁࡀࡕࡅࡓ ࡓࡀࡌࡀ ࡖ ࡄࡀࡉࡋࡇ ࡋࡌࡅࡆࡀࡍࡉࡀ ࡔࡓࡉࡍ ࡏࡅࡍࡉࡅࡍ ࡁࡉࡄࡓࡀࡌ ࡓࡁࡀ ࡅࡃࡀࡋࡉࡀࡍ ࡉࡅࡆࡀࡈࡀࡒ ࡌࡀࡍࡃࡀ ࡖ ࡄࡉࡉࡀ ࡏࡅࡍࡉࡅࡍ ࡔࡅࡁࡀ ࡓࡀࡆࡉࡀ ࡖ ࡁࡂࡅ ࡀࡉࡍࡀ ࡓࡀࡁࡕࡉࡀ ࡔࡓࡉࡀࡍ ࡏࡅࡍࡉࡅࡍ ࡕࡋࡀࡕ ࡀࡉࡍࡀࡍࡉࡀࡕࡀ ࡖ ࡆࡉࡅࡀ ࡅࡍࡄࡅࡓࡀ ࡅࡕࡅࡒࡍࡀ ࡌࡀࡐࡒࡀࡍ ࡏࡅࡍࡉࡅࡍ ࡕࡋࡀࡕࡀ ࡌࡀࡍࡉࡀ ࡖ ࡁࡂࡉࡍࡆࡀࡉࡊࡅࡍ ࡋࡉࡀࡓࡃࡍࡀ ࡔࡓࡏࡉࡀࡍ ࡏࡅࡍࡉࡀࡍ ࡀࡍࡅࡔ ࡏࡅࡕࡓࡀ ࡖ ࡄࡀࡉࡋࡇ ࡏࡋࡀࡅࡀࡉࡀࡍ ࡔࡓࡉࡀ ࡎࡀ

81. ࡁࡔࡅࡌࡀ ࡖ ࡄࡉࡉࡀ ࡓࡁࡉࡀ ࡏࡅࡍࡉࡀࡍ ࡀࡁ ࡏࡅࡍࡉࡀࡍ ࡅࡃࡀࡋࡉࡀࡍ ࡓࡁࡀ ࡁࡓ ࡓࡅࡓࡁࡉࡀ ࡀࡁࡅࡍ ࡁࡓ ࡄࡉࡉࡀ ࡔࡉࡋࡌࡀࡉ ࡅࡍࡉࡃࡁࡀࡉ ࡌࡀࡓࡇ ࡖ ࡉࡀࡓࡃࡍࡀ ࡏࡅࡍࡉࡅࡍ ࡉࡀࡓࡃࡍࡀ ࡅࡕࡓࡉࡍ ࡊࡉࡐࡇ ࡏࡅࡍࡉࡅࡍ ࡄࡀࡁࡔࡀࡁࡀ ࡅࡊࡀࡍࡀ ࡖ ࡆࡉࡃࡒࡀ ࡏࡅࡍࡉࡅࡍ ࡄࡉࡉࡀ ࡓࡁࡉࡀ ࡌࡍ ࡌࡓࡅࡌࡀ

ࡏࡅࡍࡉࡅࡍ ࡎ ࡀ ࡄࡀࡋࡉࡍ ࡕࡓࡉࡍ ࡏࡍࡉࡀࡍࡉࡀ ࡒࡓࡉࡀ ࡋࡊࡉࡐࡇ ࡖ ࡉࡀࡓࡃࡍࡀ ࡅࡄࡀࡉࡆࡀࡊ ࡒࡓࡉࡀ ࡁࡔࡅࡌࡇ ࡖ ࡄࡀࡄࡅ ࡂࡀࡁࡓࡀ ࡒࡀࡃࡌࡀࡉࡀ ࡎࡀ

82. ࡁࡔࡅࡌࡀ ࡖ ࡄࡉࡉࡀ ࡓࡁࡉࡀ ࡁࡓࡉࡔ ࡌࡉࡀ ࡍࡉࡐࡒࡉࡕ ࡁࡓࡉࡔ ࡌࡀࡌࡁࡅࡄࡉࡀ ࡖ ࡄࡉࡉࡀ ࡀࡎࡂࡉࡕ ࡋࡊࡀ ࡔࡉࡊࡍࡉࡕ ࡕࡋࡀࡕ ࡔࡊࡉࡍࡀࡕࡀ ࡅࡔࡀࡋࡈࡉࡕ

ࡏࡋࡀࡅࡀࡉࡄࡅࡍ ࡍࡀࡈࡓࡉࡀ ࡍࡀࡈࡓࡉࡀ ࡖ ࡔࡀࡋࡈࡉࡕ ࡏࡋࡀࡅࡀࡉࡄࡅࡍ ࡖ ࡔࡀࡍࡉࡍ ࡅࡁࡓࡉࡊࡉࡀ ࡅࡌࡒࡀࡉࡌࡉࡀ ࡌࡍ ࡓࡉࡔ ࡁࡓࡉࡔ ࡎࡀ ࡄࡀࡆࡉࡍ

ࡏࡍࡉࡀࡍࡀ ࡓࡌࡉࡀ ࡗ ࡑࡀࡁࡉࡕ ࡌࡀࡑࡁࡅࡕࡀ ࡅࡍࡀࡎࡁࡉࡕ ࡌࡀࡌࡁࡅࡄࡀ ࡁࡒࡀࡍࡉࡍࡀ ࡌࡍ ࡉࡀࡓࡃࡍࡀ ࡅࡓࡌࡉࡀ ࡏࡍࡉࡀࡍࡀ ࡁࡓࡉࡔ ࡌࡉࡀ ࡍࡉࡐࡒࡉࡕ ࡅࡄࡀࡉࡆࡀࡊ ࡒࡓࡉࡀ ࡁࡓࡉࡊࡉࡕ ࡕࡉࡓࡀ ࡁࡀࡓࡀࡉࡀ ࡎࡀ

83. ࡁࡔࡅࡌࡀ ࡖ ࡄࡉࡉࡀ ࡓࡁࡉࡀ ࡊࡌࡀ ࡔࡀࡐࡉࡓࡉࡀ ࡔࡉࡕࡋࡉࡀ ࡖ ࡔࡕࡀࡋ ࡅࡀࡒࡀࡌ ࡉࡀࡓࡃࡍࡀ ࡈࡀࡍ ࡈࡅࡍࡀ ࡃࡀࡊࡉࡀ ࡅࡕࡓࡉࡑ ࡁࡓࡉࡔࡀࡉࡄࡅࡍ ࡊࡋࡉࡋࡉࡀ ࡓࡀࡅࡆࡉࡀ ࡄࡀࡃࡉࡁࡅࡍ ࡉࡀࡅࡀࡓ ࡆࡉࡅࡀ ࡁࡔࡉࡕࡋࡉࡀ ࡈࡀࡁࡉࡀ ࡖ ࡔࡕࡀࡋ ࡅࡀࡒࡀࡌ ࡉࡀࡓࡃࡍࡀ ࡄࡀࡃࡉࡍ ࡅࡓࡀࡅࡆࡉࡍ ࡔࡉࡕࡋࡉࡀ ࡖ ࡁࡓࡉࡄࡇ ࡖ ࡌࡀࡍࡃࡀ ࡖ ࡄࡉࡉࡀ ࡖ ࡏࡋࡀࡅࡀࡉࡄࡅࡍ ࡔࡓࡉࡀ ࡎࡀ

84. ࡀࡔࡀࡓ ࡑࡁࡀࡍ ࡑࡀࡁࡅࡉࡀࡉ ࡅࡀࡔࡀࡓ ࡌࡀࡑࡁࡀࡍࡀࡉ ࡑࡁࡀࡍ ࡀࡔࡀࡓ ࡑࡁࡀࡍ ࡑࡀࡁࡅࡉࡉࡀ ࡅࡕࡉࡎࡀࡒ ࡌࡀࡑࡁࡅࡕࡀࡉࡊࡅࡍ ࡋࡓࡉࡔ ࡎࡀ

85. ࡔࡉࡋࡌࡀࡉ ࡑࡁࡉࡍࡀࡍ ࡁࡌࡀࡑࡁࡅࡕࡇ ࡅࡍࡉࡃࡁࡀࡉ ࡓࡔࡉࡌࡉࡍࡀࡍ ࡁࡃࡀࡊࡉࡀ ࡓࡅࡔࡅࡌࡇ ࡀࡍࡅࡔ ࡏࡅࡕࡓࡀ ࡎࡀࡂࡉࡀ ࡎࡀࡌࡋࡀࡍ ࡁࡓࡉࡔࡀࡉࡀࡍ ࡊࡋࡉࡋࡉࡀ ࡓࡀࡅࡆࡉࡀ ࡎࡀ

86. ࡉࡀࡓࡃࡍࡀ ࡖ ࡏࡑࡈࡉࡁࡍࡀࡁࡇ ࡏࡋࡀࡅࡀࡉࡀࡍ ࡍࡉࡄࡅࡉࡀ ࡁࡎࡀࡄࡃࡉࡀ ࡖ ࡋࡀࡐࡀࡊࡍࡉࡍ ࡌࡍ ࡓࡅࡔࡅࡌࡀࡍ ࡅࡋࡀࡔࡀࡍࡉࡍࡇ ࡋࡃࡀࡊࡉࡀ ࡌࡉࡌࡓࡀࡍ ࡎࡀ

87. ࡀࡍࡀ ࡁࡕࡀࡓࡌࡉࡃࡀࡉ ࡄࡀࡃࡉࡍࡀ ࡅࡁࡍࡀࡑࡅࡓࡀࡉࡉࡀ ࡖ ࡔࡅࡕࡀࡉ ࡔࡀࡌࡀ ࡄࡀࡃࡉࡍࡀࡁࡊࡅࡍ ࡕࡀࡓࡌࡉࡃࡀࡉ ࡖ ࡋࡀࡔࡀࡍࡉࡕࡅࡉࡀ ࡋࡃࡀࡊࡉࡀ ࡌࡉࡌࡓࡀࡉ ࡎࡀ

88. ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡈࡀࡁ ࡏࡋࡊࡅࡍ ࡀࡌࡀࡓࡍࡀ ࡁࡄࡉࡓࡀࡉ ࡖ ࡌࡉࡍࡀࡉ ࡋࡉࡀࡓࡃࡍࡀ ࡎࡋࡉࡒ ࡋࡀࡕࡉࡐࡊࡅࡍ ࡅࡋࡀࡕࡉࡔࡀࡍࡅࡍ ࡅࡋࡀࡕࡉࡔࡀࡍࡅࡋࡉࡀ ࡁࡉࡀࡃ ࡋࡀࡕࡉࡐࡊࡅࡍ ࡅࡋࡀࡕࡉࡔࡀࡍࡅࡍ ࡂࡅࡁࡓࡉࡀ ࡖ ࡒࡀࡋࡀ ࡖ ࡄࡉࡉࡀ ࡔࡅࡌࡀ ࡖ ࡔࡀࡌࡀ ࡒࡀࡋࡀ ࡖ ࡄࡉࡉࡀ ࡌࡉࡕࡁࡀࡍࡅࡍࡉࡀ ࡌࡉࡕࡁࡀࡍࡀࡍ ࡌࡉࡕࡁࡀࡍࡀࡍ ࡅࡌࡉࡆࡃࡀࡓࡀࡆ ࡄࡀࡉࡋࡀ ࡄࡀࡅࡉࡀ ࡋࡄࡀࡃ ࡕࡓࡉࡍ ࡕࡅࡌ ࡖ ࡔࡅࡕࡀ ࡖ ࡄࡉࡉࡀ ࡔࡀࡌࡀ ࡌࡉࡕࡉࡀࡕࡅࡓࡉࡀ ࡌࡉࡕࡉࡀࡕࡀࡓ ࡌࡉࡕࡉࡀࡕࡀࡓ ࡅࡋࡀࡄࡀࡎࡀࡓ ࡁࡋࡀࡅࡐࡀ ࡖ ࡓࡁࡀ ࡌࡉࡕࡋࡉࡐ ࡌࡉࡕࡋࡉࡐ ࡁࡋࡀࡅࡐࡀ ࡖ ࡓࡁࡀ ࡖ ࡋࡉࡐ ࡅࡎࡀࡋࡉࡒ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖ ࡀࡎࡂࡉࡀ ࡋࡊࡀ ࡎࡀ

89. ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡏࡋࡊࡅࡍ ࡒࡀࡓࡉࡍࡀ ࡅࡌࡀࡐࡓࡉࡔࡍࡀ ࡂࡅࡁࡓࡉࡀ ࡖ ࡒࡀࡁࡉࡋ ࡓࡅࡔࡅࡌࡀ ࡋࡀࡕࡉࡔࡀࡌࡅࡍࡇ ࡋࡔࡅࡕࡀࡉࡄࡅࡍ ࡖ ࡀࡌࡀࡌࡉࡀ ࡅࡃࡀࡓࡉࡀ ࡊࡅࡋࡄࡅࡍ ࡌࡍ ࡕࡉࡒࡋࡀࡕࡅࡍ ࡋࡀࡕࡉࡕࡉࡒࡋࡅࡍ ࡋࡀࡕࡉࡕࡉࡒࡋࡅࡍ ࡌࡍ ࡕࡉࡒࡋࡀࡕࡅࡍ ࡅࡁࡃࡉࡍࡀࡉࡄࡅࡍ ࡋࡀࡕࡉࡔࡕࡀࡉࡋࡅࡍ ࡋࡀࡕࡉࡔࡕࡀࡉࡋࡅࡍ ࡁࡃࡉࡍࡀࡉࡄࡅࡍ ࡅࡀࡐ ࡀࡍࡀࡕࡅࡍ ࡔࡓࡀࡓࡀ ࡕࡉࡋࡉࡂࡈࡅࡍ ࡀࡍࡀࡕࡅࡍ ࡕࡉࡋࡉࡂࡈࡅࡍ ࡔࡓࡀࡓࡀ ࡖ ࡀࡍࡀ ࡁࡂࡀࡅࡇ ࡀࡐࡓࡉࡔࡉࡋࡊࡅࡍ ࡀࡍࡀ ࡋࡁࡄࡉࡓࡀࡉ ࡒࡀࡓࡉࡍࡀ ࡖ ࡏࡅࡑࡓࡀࡉࡊࡅࡍ ࡌࡉࡍࡀࡉ ࡋࡀࡕࡉࡐࡊࡅࡍ ࡀࡌࡉࡍࡈࡅࡋ ࡖ ࡊࡅࡋ ࡖ ࡋࡀࡌࡀࡔࡀࡓ ࡅࡋࡀࡒࡀࡉࡉࡌ ࡏࡅࡑࡓࡇ ࡌࡉࡍࡀࡉ ࡌࡉࡕࡐࡉࡊ ࡏࡅࡑࡓࡇ ࡌࡉࡕࡐࡉࡊ ࡌࡉࡍࡀࡉ ࡓࡁࡀ ࡌࡄࡉࡕࡀ ࡅࡋࡀࡆࡅࡈࡀ ࡏࡅ ࡌࡑࡉࡕࡅࡍ ࡁࡄࡀࡉࡋࡀࡉ ࡀࡍࡀࡕࡅࡍ ࡋࡃࡉࡋࡉࡀ ࡃࡓࡀ ࡄࡉࡍ ࡃࡀࡓࡉࡕࡅࡋࡉࡀ ࡀࡔࡀࡓ ࡒࡅࡌࡁࡉࡀ ࡌࡍ ࡓࡉࡔ ࡁࡓࡉࡔ ࡏࡅ ࡋࡀࡌࡑࡉࡕࡅࡍ ࡁࡄࡀࡉࡋࡀࡉ ࡓࡄࡅࡒ ࡌࡉࡍࡀࡉ ࡅࡋࡀࡕࡉࡒࡉࡓࡁࡅࡍ ࡀࡌࡉࡍࡈࡅࡋ ࡖ ࡀࡉࡉࡋࡁࡉࡀ ࡅࡃࡀࡓࡉࡋࡉࡀ ࡌࡉࡕࡓࡉࡑ ࡋࡁࡅࡔࡉࡇ ࡁࡉࡕ ࡕࡅࡔࡋࡉࡌࡀ ࡖ ࡃࡀࡓࡉࡋࡉࡀ ࡅࡋࡀࡌࡔࡀࡋࡉࡌࡋࡉࡀ ࡄࡅ ࡌࡀࡉࡉࡕ ࡅࡓࡅࡄࡇ ࡃࡀࡉࡊࡀ ࡄࡅ ࡌࡀࡉࡉࡕ ࡅࡃࡀࡉࡊࡀ ࡓࡅࡄࡇ ࡅࡄࡀࡅࡉࡀ ࡌࡍࡀࡕࡇ ࡖ ࡀࡋࡌࡀ ࡆࡊࡉࡕ ࡌࡀࡍࡃࡀ ࡖ ࡄࡉࡉࡀ ࡈࡀࡁࡀ ࡖ ࡌࡒࡀࡉࡀࡌ ࡓࡀࡄࡌࡇ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖ ࡀࡎࡂࡉࡀ ࡋࡊࡀ ࡎࡀ

90. ࡁࡔࡅࡌࡀࡉࡄࡅࡍ ࡖ ࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡕࡀࡓࡌࡉࡃࡀ ࡀࡍࡀ ࡄࡀࡃࡕࡀ ࡖ ࡀࡎࡂࡉࡕ ࡋࡊࡉࡐࡇ ࡖ ࡉࡀࡓࡃࡍࡀ ࡔࡅࡌࡀࡉ ࡋࡓࡉࡔࡀࡉ ࡍࡉࡎࡁࡉࡕ ࡅࡁࡋࡉࡁࡀࡉ ࡍࡉࡎࡁࡉࡕ ࡓࡅࡔࡅࡌࡀ ࡓࡅࡔࡅࡌࡀࡉ ࡋࡀࡄࡅࡀ ࡍࡅࡓࡀ ࡅࡋࡀࡄࡅࡀ ࡖ ࡌࡔࡉࡄࡀ ࡌࡔࡀ ࡓࡅࡔࡅࡌࡀࡉ ࡁࡉࡀࡃࡓࡍࡀ ࡓࡁࡀ ࡖ ࡌࡉࡀ ࡄࡉࡉࡀ ࡖ ࡏࡍࡉࡔ ࡁࡄࡀࡉࡋࡇ ࡋࡀࡌࡑࡉࡀ ࡁࡀࡄࡀࡓ ࡄࡀࡃ ࡌࡍ ࡀࡋࡐࡀ ࡅࡌࡍ ࡕࡓࡉࡍ ࡀࡋࡐࡉࡀ ࡁࡀࡄࡀࡓ ࡕࡓࡉࡍ ࡌࡔࡀࡅࡉࡋࡅࡍ ࡕࡀࡍࡂࡀࡓࡉࡀ ࡖ ࡁࡂࡀࡅࡇ ࡖ ࡕࡉࡁࡉࡋ ࡀࡁࡃࡉࡀ ࡌࡉࡕࡀࡍࡂࡓࡉࡀ ࡁࡀࡂࡓࡀ ࡅࡆࡉࡃࡒࡀ ࡌࡍ ࡔࡀࡌࡉࡔ ࡅࡎࡉࡓࡀ ࡍࡀࡄࡓࡉࡀ ࡀࡍࡀ ࡋࡊࡀࡍࡀ ࡖ ࡍࡉࡔࡌࡀࡕࡀ ࡀࡕࡉࡕ ࡖ ࡄࡉࡉࡀ ࡔࡉࡄࡋࡅࡍ ࡅࡔࡀࡃࡓࡅࡍ ࡏࡊࡀ ࡖ ࡆࡉࡁࡍࡇ ࡋࡆࡉࡁࡍࡀࡉ ࡅࡏࡊࡀ ࡖ ࡏࡕࡊࡀࡋࡀࡋ ࡅࡔࡊࡉࡁ ࡏࡊࡀ ࡖ ࡆࡉࡁࡍࡇ ࡋࡆࡉࡁࡍࡀࡉ ࡀࡉࡍࡇ ࡁࡀࡍࡄࡅࡓࡀ

ࡏࡕࡉࡌࡋࡉࡀ ࡀࡉࡍࡇ ࡏࡕࡉࡌࡋࡉࡀ ࡁࡀࡍࡄࡅࡓࡀ ࡅࡄࡀࡆࡉࡋࡇ ࡋࡓࡁࡀ ࡁࡉࡕ ࡕࡅࡔࡋࡉࡌࡀ ࡏࡊࡀ ࡖ ࡆࡉࡁࡍࡀࡉ ࡋࡀࡆࡉࡁࡍࡇ ࡀࡆࡀࡋ ࡅࡏࡕࡊࡀࡋࡀࡋ ࡅࡔࡊࡉࡁ ࡅࡏࡕࡀࡔࡀࡒ ࡅࡋࡀࡄࡆࡅࡍ ࡅࡏࡈࡀࡓࡀࡔ ࡏࡅࡃࡍࡀࡉࡄࡅࡍ ࡅࡋࡀࡔࡀࡌࡀ ࡅࡋࡀࡌࡀࡉࡀࡓࡋࡅࡍ ࡋࡉࡁࡀࡉࡄࡅࡍ ࡋࡌࡉࡄࡉࡆࡉࡇ ࡋࡓࡁࡀ ࡁࡉࡕ ࡕࡅࡔࡋࡉࡌࡀ ࡖ ࡒࡓࡅࡋࡅࡍ ࡅࡋࡀࡍࡅࡍ ࡗ ࡒࡀࡓࡉࡍ ࡌࡀࡍ ࡖ ࡀࡍࡉࡋࡅࡍ ࡖ ࡉࡀࡄࡉࡁࡋࡅࡍ ࡅࡋࡀࡍࡎࡉࡁ ࡗ ࡁࡀࡉࡉࡍ ࡌࡀࡍ ࡖ ࡉࡀࡄࡉࡁࡋࡅࡍ ࡎࡉࡍࡉࡅࡉࡀ ࡋࡏࡅࡄࡓࡀ ࡖ ࡄࡉࡉࡀ ࡅࡋࡃࡀࡅࡓࡀ ࡖ ࡃࡅࡓ ࡁࡉࡔࡉࡀ ࡓࡄࡉࡌ ࡃࡀࡅࡓࡀ ࡓࡄࡉࡌ ࡃࡅࡓ ࡁࡉࡔࡉࡀ ࡄࡀ ࡁࡃࡅࡓ ࡁࡉࡔࡉࡀ ࡍࡉࡕࡉࡀࡁࡈࡅࡍ ࡀࡓࡂࡀࡁࡀࡉࡅࡍ ࡅࡌࡉࡍࡅࡍ ࡁࡊࡍࡀࡐ ࡋࡁࡅࡔࡀࡉࡄࡅࡍ ࡑࡀࡓࡋࡅࡍ ࡗ ࡁࡀࡉࡉࡍ ࡖ ࡍࡉࡃࡀࡋࡅࡍ ࡓࡉࡔࡀࡉࡄࡅࡍ ࡌࡎࡀࡓࡉࡋࡅࡍ ࡋࡕࡉࡓࡉࡀ ࡄࡔࡅࡊ ࡀࡍࡀ ࡋࡁࡄࡉࡓࡀࡉ ࡒࡀࡓࡀࡍࡀ

ࡋࡔࡉࡕࡋࡀࡉ ࡖ ࡒࡀࡉࡌࡅࡍ ࡋࡉࡀࡓࡃࡍࡀ ࡀࡌࡀࡓࡍࡀࡋࡅࡍ ࡁࡍࡀࡉ ࡁࡏࡅࡄࡓࡀࡉ ࡁࡍࡀࡉ ࡁࡏࡅࡄࡓࡀࡉ ࡋࡀࡕࡉࡑࡋࡅࡍ ࡌࡉࡍࡇ ࡅࡌࡍ ࡌࡉࡑࡓࡀ ࡖ ࡌࡍ ࡌࡉࡑࡓࡀ ࡑࡀࡋࡉࡀ ࡎࡀࡌࡉࡊ ࡏࡋࡇ ࡋࡊࡅࡃࡊࡀ ࡖ ࡌࡍ ࡕࡀࡓࡕࡉࡍࡅࡍ ࡑࡀࡋࡉࡀ ࡍࡀࡐࡉࡋ ࡁࡎࡀࡅࡐࡇ ࡖ ࡀࡋࡌࡀ ࡆࡊࡉࡕ ࡌࡀࡍࡃࡀ ࡖ ࡄࡉࡉࡀ ࡈࡀࡁࡀ ࡖ ࡌࡒࡀࡉࡉࡌ ࡓࡀࡄࡌࡇ ࡀࡍࡉࡍ ࡖ ࡌࡔࡀࡁࡉࡍࡉࡍ ࡌࡀࡓࡀࡍ ࡄࡀࡈࡀࡉࡀࡍ ࡅࡄࡀࡅࡁࡀࡍ ࡕࡉࡔࡁࡅࡒࡋࡀࡍ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖ ࡀࡎࡂࡉࡀ ࡏࡋࡊࡀ ࡎ ࡀ ࡀࡋࡌࡀ ࡋࡄࡀࡊࡀ ࡏࡍࡉࡀࡍࡉࡀ ࡅࡃࡓࡀࡔࡉࡀ ࡖ ࡌࡀࡑࡁࡅࡕࡀ ࡄࡉࡍࡅࡍ ࡌࡍ ࡄࡀࡊࡀ ࡋࡕࡉࡕ ࡏࡍࡉࡀࡍࡉࡀ ࡅࡃࡓࡀࡔࡉࡀ ࡖ ࡌࡀࡎࡉࡒࡕࡀ ࡄࡉࡍࡅࡍ ࡎࡀ

91. ࡏࡓࡅࡕࡀࡉ ࡅࡕࡅࡔࡁࡉࡄࡕࡀࡉ ࡌࡀࡁࡀࡓࡀࡉࡀࡉ ࡌࡀࡁࡀࡓ ࡄࡉࡋࡐࡀ ࡀࡁࡀࡓࡋࡉࡀ ࡀࡍࡀࡍࡀ ࡖ ࡍࡄࡅࡓࡀ ࡅࡕࡉࡎࡀࡒ ࡁࡆࡀࡊࡅ ࡋࡀࡕࡀࡓ ࡍࡄࡅࡓ ࡎࡀ

92. ࡁࡔࡅࡌࡀ ࡖ ࡄࡉࡉࡀ ࡏࡆࡉࡋ ࡁࡔࡋࡀࡌ ࡁࡄࡉࡓࡀ ࡃࡀࡊࡉࡀ ࡆࡀࡊࡀࡉࡀ ࡖ ࡌࡅࡌࡀ ࡋࡉࡕࡁࡇ ࡀࡍࡀࡕ ࡍࡀࡐࡔࡀࡊ ࡁࡄࡀࡓࡕ ࡌࡍ ࡕࡉࡁࡉࡋ ࡄࡉࡋࡒࡀࡊ ࡌࡍ ࡃࡀࡓࡉࡀ ࡔࡅࡀࡓ ࡄࡉࡋࡒࡀࡊ ࡔࡅࡀࡓ ࡌࡍ ࡃࡀࡓࡉࡀ ࡏࡋࡀࡅࡇ ࡖ ࡊࡅࡋࡇ ࡀࡋࡌࡀ ࡀࡍࡀࡕ ࡀࡌࡀࡓࡕ ࡁࡄࡉࡓࡀ ࡃࡀࡊࡉࡀ ࡖ ࡄࡀࡆࡀࡉࡀ ࡅࡐࡀࡓࡅࡔࡀ ࡀࡍࡀ ࡄࡀࡆࡀࡉࡀ ࡀࡍࡀ ࡐࡀࡓࡅࡔࡀ ࡀࡋࡌࡉࡀ ࡋࡃࡉࡍࡀ ࡊࡀࡍࡐࡉࡀ ࡀࡋࡌࡉࡀ ࡊࡀࡍࡐࡉࡀ ࡋࡃࡉࡍࡀ ࡅࡃࡉࡍࡀ ࡌࡉࡍࡀࡉࡄࡅࡍ ࡌࡉࡕࡌࡀࡓ ࡃࡉࡍࡀ ࡌࡉࡕࡌࡀࡓ ࡌࡉࡍࡀࡉࡄࡅࡍ ࡖ ࡋࡀࡁࡀࡃ ࡏࡅࡁࡀࡃࡉࡀ ࡖ ࡂࡁࡀࡓ ࡊࡔࡉࡈ ࡀࡍࡀࡕ ࡁࡀࡋࡄࡅࡃࡀࡊ ࡁࡄࡉࡓࡀ ࡃࡀࡊࡉࡀ ࡌࡀࡍࡀ ࡎࡒࡉࡋࡀ ࡖ ࡎࡒࡉࡋ ࡖ ࡋࡀࡆࡋࡉࡕ ࡋࡁࡉࡕ ࡃࡉࡍࡀ ࡅࡃࡉࡍࡀ ࡌࡉࡍࡀࡊ ࡋࡀࡌࡉࡕࡌࡀࡓ ࡋࡀࡌࡉࡕࡌࡀࡓ ࡃࡉࡍࡀ ࡌࡉࡍࡀࡊ ࡖ ࡀࡁࡀࡃࡕ ࡏࡅࡁࡀࡃࡉࡀ ࡖ ࡂࡁࡀࡓ ࡊࡔࡉࡈ ࡄࡀࡆࡀ ࡖ ࡎࡀࡁࡋࡉࡀ ࡅࡃࡀࡓࡉࡀ ࡀࡍࡀࡕ ࡁࡄࡉࡓࡀ ࡒࡀࡌࡀࡊ ࡋࡀࡕࡀࡔࡊࡀ ࡐࡅࡒ ࡌࡍ ࡀࡕࡅࡕࡉࡀ ࡏࡃࡀࡉࡄࡅࡍ ࡖ ࡔࡉࡁࡉࡀࡄࡉࡀ ࡅࡂࡀࡁࡀࡓࡉࡀ ࡖ ࡄࡀࡆࡉࡍ ࡀࡋࡌࡀ ࡎࡀࡁ ࡋࡁࡅࡔ ࡏࡅࡑࡈࡋࡀࡊ ࡖ ࡆࡉࡅࡀ ࡅࡕࡓࡅࡑ ࡊࡋࡉࡋࡀࡊ ࡓࡀࡅࡆࡀ ࡊࡁࡅࡔ ࡒࡅࡌࡕࡀࡊ ࡅࡎࡂࡅࡃ ࡅࡌࡕࡀ ࡅࡔࡀࡁࡀ ࡋࡄࡉࡉࡀ ࡓࡁࡉࡀ ࡅࡔࡀࡁࡀ ࡋࡀࡕࡓࡀ ࡖ ࡄࡉࡉࡀ ࡖ ࡀࡁࡀࡄࡀࡕࡀࡊ ࡋࡂࡀࡅࡇ ࡀࡆࡋࡉࡀ ࡀࡍࡀࡕ ࡁࡄࡉࡓࡀ ࡖ ࡋࡀࡄࡅࡉࡕ ࡌࡍ ࡄࡀࡊࡀ ࡅࡋࡀࡅ ࡌࡍ ࡄࡀࡊࡀ ࡍࡑࡉࡁࡀ ࡍࡉࡑࡅࡁࡕࡀࡊ ࡀࡕࡓࡀࡊ ࡀࡕࡓࡀ ࡖ ࡄࡉࡉࡀ ࡅࡃࡀࡅࡓࡀࡊ ࡃࡀࡅࡓࡀ ࡕࡀࡓࡍࡀ ࡕࡓࡀࡑࡋࡀࡊ ࡊࡅࡓࡎࡉࡀ ࡖ ࡍࡉࡀࡄࡀ ࡖ ࡄࡀࡅࡌࡀ ࡅࡓࡅࡂࡆࡀ ࡋࡉࡕࡁࡇ ࡌࡍࡀࡈࡀࡓࡋࡀࡊ ࡄࡉࡌࡉࡀࡍࡇ ࡖ ࡀࡎࡂࡀ ࡅࡌࡅࡌࡀ ࡋࡉࡕࡁࡇ ࡈࡀࡁࡀ ࡎࡀࡒ ࡋࡁࡉࡕ ࡄࡉࡉࡀ ࡅࡀࡎࡂࡉࡀ ࡋࡃࡀࡅࡓࡀ ࡕࡀࡒࡍࡀ ࡁࡉࡍࡉࡀ ࡔࡓࡀࡂࡉࡀ ࡖ ࡍࡄࡅࡓࡀ ࡍࡉࡃࡀࡋࡅࡍ ࡔࡓࡀࡂࡀࡊ ࡅࡍࡉࡍࡉࡄࡓࡅࡍ ࡁࡆࡉࡁࡍࡀࡊ ࡅࡏࡃࡀࡍࡀࡊ ࡎࡀࡒ ࡄࡅࡆࡉࡇ ࡋࡀࡕࡀࡓ ࡍࡄࡅࡓ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖ ࡀࡎࡂࡉࡀ ࡋࡊࡀ ࡎࡀ

93. ࡌࡀࡍࡀ ࡁࡂࡉࡍࡆࡉࡇ ࡄࡀࡃࡉࡀ ࡅࡁࡏࡓࡅࡕࡀ ࡖ ࡄࡉࡉࡀ ࡖ ࡔࡀࡓࡉࡀ ࡏࡋࡇ ࡀࡅࡃࡉࡁࡀࡊ ࡁࡄࡉࡓ ࡆࡉࡃࡒࡀ ࡖ ࡐࡀࡓࡉࡒࡕࡇ ࡋࡍࡉࡔࡌࡀࡕ ࡌࡍ ࡀࡅࡃࡉࡀ ࡎࡀ

94. ࡈࡅࡁࡀࡊ ࡈࡅࡁࡀࡊ ࡍࡉࡔࡌࡀ ࡖ ࡍࡐࡀࡒࡕ ࡌࡉࡍࡇ ࡌࡍ ࡀࡋࡌࡀ ࡍࡐࡀࡒࡕࡇ ࡋࡒࡉࡋࡅࡌࡀ ࡅࡋࡐࡀࡂࡓࡀ ࡎࡀࡓࡉࡀ ࡖ ࡄࡅࡉࡕࡁࡇ ࡋࡃࡀࡅࡓࡀ ࡖ ࡃࡅࡓ ࡁࡉࡔࡉࡀ ࡅࡋࡀࡕࡓࡀ ࡖ ࡊࡅࡋࡇ ࡄࡀࡈࡉࡀ ࡋࡀࡋࡌࡀ ࡖ ࡄࡔࡅࡊࡀ ࡖ ࡎࡉࡍࡀ ࡒࡉࡍࡀ ࡅࡐࡋࡅࡂࡉࡀ ࡋࡃࡀࡅࡓࡀ ࡖ ࡃࡀࡉࡓࡉࡁࡇ ࡖ ࡔࡉࡁࡉࡀࡄࡉࡀ ࡖ ࡊࡉࡁࡉࡀ ࡅࡌࡅࡌࡉࡀ ࡌࡀࡎࡁࡉࡀ ࡊࡉࡁࡉࡀ ࡌࡀࡎࡁࡉࡀ ࡅࡌࡅࡌࡉࡀ ࡊࡅࡋ ࡉࡅࡌ ࡓࡌࡉࡋࡅࡍ ࡌࡀࡓࡅࡋࡀ ࡒࡅࡌࡋࡀࡊ ࡒࡅࡌࡋࡀࡊ ࡍࡉࡔࡌࡀ ࡋࡀࡓࡒࡀࡊ ࡒࡀࡃࡌࡀࡉࡕࡀ ࡎࡀࡒ ࡎࡀࡒ ࡋࡀࡓࡒࡀࡊ ࡒࡀࡃࡌࡀࡉࡕࡀ ࡋࡀࡕࡓࡀ ࡖ ࡌࡉࡍࡇ ࡏࡕࡉࡍࡑࡉࡁࡕ ࡋࡀࡕࡓࡀ ࡖ ࡏࡕࡉࡍࡑࡉࡁࡕ ࡌࡉࡍࡇ ࡋࡃࡀࡅࡓࡀࡊ ࡖ ࡈࡀࡁࡀ ࡖ ࡏࡅࡕࡓࡉࡀ ࡐࡀࡑ ࡋࡁࡅࡔ ࡏࡅࡑࡈࡋࡀࡊ ࡖ ࡆࡉࡅࡀ ࡅࡕࡓࡅࡑ ࡊࡋࡉࡋࡀࡊ ࡓࡀࡅࡆࡀ ࡕࡉࡁ ࡏࡋ ࡊࡅࡓࡎࡉࡀࡊ ࡖ ࡆࡉࡅࡀ ࡖ ࡄࡉࡉࡀ ࡕࡉࡓࡑࡅࡉࡀ ࡁࡀࡕࡀࡓ ࡍࡄࡅࡓ ࡎࡀࡒ ࡃࡀࡓ ࡁࡔࡊࡉࡍࡀࡕࡀ ࡁࡉࡍࡉࡀ ࡏࡅࡕࡓࡉࡀ ࡀࡄࡀࡊ ࡗ ࡖ ࡌࡀࡋࡐࡉࡕ ࡁࡅࡓࡊࡇ ࡋࡁࡉࡕ ࡀࡍࡀࡔࡀࡊ ࡒࡀࡃࡌࡀࡉࡀ ࡅࡋࡅࡈࡇ ࡋࡄࡀࡆࡉࡍ ࡀࡕࡓࡀ ࡖ ࡁࡉࡕ ࡌࡅࡍࡒࡀࡊ ࡖ ࡔࡍࡉࡀ ࡖ ࡄࡅࡉࡕ ࡁࡂࡀࡅࡇ ࡊࡅࡋ ࡉࡅࡌ ࡔࡅࡁࡀ ࡄࡀࡌࡁࡀࡂࡀࡊ ࡄࡅࡍ ࡔࡅࡁࡀ ࡄࡅࡍ ࡄࡀࡌࡁࡀࡂࡀࡊ ࡅࡕࡓࡉࡎࡀࡓ ࡄࡅࡋࡀࡊ ࡓࡉࡃࡐࡀ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖ ࡀࡎࡂࡉࡀ ࡋࡊࡀ ࡎࡀ

95. ࡄࡀࡁࡔࡀࡁࡀ ࡅࡊࡅࡔࡈࡀ ࡅࡆࡉࡃࡒࡀ ࡋࡍࡉࡔࡌࡀ ࡄࡅࡋࡇ ࡎࡀࡄࡃࡀ ࡅࡀࡍࡀࡕࡅࡍ ࡁࡎࡀࡄࡃࡉࡀ ࡄࡅࡋࡇ ࡅࡀࡄࡋࡉࡐࡅࡉࡀ ࡌࡍ ࡁࡉࡕ ࡌࡀࡊࡎࡉࡀ ࡎࡀ

96. ࡆࡉࡃࡀࡍࡀ ࡅࡌࡆࡀࡅࡃࡀࡍࡀ ࡏࡅࡕࡓࡉࡀ ࡖ ࡍࡄࡅࡓࡀ ࡆࡀࡅࡃࡅࡍ ࡆࡉࡃࡀࡍࡀ ࡖ ࡆࡀࡅࡃࡅࡍ ࡄࡉࡉࡀ ࡅࡌࡆࡀࡅࡃࡀࡍࡀ ࡖ ࡏࡅࡕࡓࡉࡀ ࡖ ࡍࡄࡅࡓࡀ ࡆࡀࡅࡃࡅࡍ ࡆࡀࡅࡃࡅࡍ ࡁࡆࡀࡅࡀࡃࡉࡀ ࡊࡅࡔࡈࡀ ࡅࡆࡀࡓࡆࡅࡍ ࡁࡊࡅࡋࡀ ࡄࡅࡊࡅࡌࡕࡅࡍ ࡋࡌࡀࡄࡅ ࡄࡅࡀ ࡐࡕࡀࡄࡉࡋ ࡅࡋࡌࡀࡄࡅ ࡒࡉࡓࡉࡉࡇ ࡋࡀࡋࡌࡀ ࡋࡌࡀࡄࡅ ࡄࡅࡀࡕ ࡄࡀࡔࡀࡁࡕࡀ ࡅࡋࡃࡉࡋࡉࡀ ࡌࡍ ࡀࡕࡓࡀࡉ ࡀࡕࡉࡅࡍ ࡔࡉࡄࡋࡅࡍ ࡋࡀࡋࡌࡀ ࡖ ࡕࡉࡒࡋࡀࡕࡀ ࡖ ࡊࡅࡋࡇ ࡂࡉࡈࡓࡉࡀ ࡄࡀࡕࡌࡉࡀ ࡌࡋࡉࡀ ࡊࡅࡋࡇ ࡌࡋࡉࡀ ࡍࡅࡓࡀ ࡅࡆࡓࡉࡀ ࡁࡊࡅࡁࡀ ࡅࡀࡈࡀࡈࡀ ࡊࡅࡋࡇ ࡌࡋࡉࡀ ࡁࡉࡄࡓࡀࡓࡀ ࡊࡅࡋࡇ ࡆࡉࡐࡀ ࡅࡊࡀࡃࡁࡀ ࡌࡋࡉࡀ ࡔࡉࡁࡉࡀࡄࡉࡀ ࡖ ࡃࡀࡉࡓࡉࡁࡇ ࡊࡅࡋ ࡉࡅࡌ ࡏࡋࡀࡉ ࡋࡁࡉࡔ ࡌࡉࡕࡄࡀࡔࡁࡉࡀ ࡌࡉࡕࡄࡀࡔࡁࡉࡀ ࡏࡋࡀࡉ ࡁࡁࡉࡔࡅࡕࡀ ࡅࡀࡌࡓࡉࡀ ࡖ ࡍࡉࡐࡉࡋࡂࡇ ࡋࡏࡅࡑࡓࡇ ࡋࡉࡁࡀࡉ ࡖ ࡌࡋࡉࡀ ࡊࡅࡔࡈࡀ ࡅࡀࡌࡓࡉࡀ ࡖ ࡌࡍ ࡃࡉࡋࡀࡍ ࡍࡀࡊࡔࡋࡇ ࡀࡉࡍࡀࡉ ࡖ ࡎࡀࡊࡉࡀ ࡋࡍࡄࡅࡓࡇ ࡀࡌࡓࡉࡀ ࡖ ࡓࡉࡌࡆࡀ ࡍࡉࡓࡉࡌࡆࡀࡍ ࡐࡅࡌࡀࡉ ࡖ ࡁࡀࡓࡉࡊ

ࡋࡄࡉࡉࡀ ࡀࡌࡓࡉࡀ ࡖ ࡊࡀࡃࡁࡀ ࡍࡉࡌࡀࡓ ࡏࡃࡀࡉ ࡖ ࡉࡀࡄࡁࡀ ࡆࡉࡃࡒࡀ ࡅࡐࡀࡔࡈࡀ ࡊࡅࡔࡈࡀ ࡀࡌࡓࡉࡀ ࡖ ࡂࡀࡈࡋࡀ ࡍࡉࡂࡀࡈࡋࡀ ࡁࡅࡓࡊࡀࡉ ࡖ ࡌࡀࡓࡁࡉࡊࡀ ࡅࡎࡀࡂࡃࡉࡀ ࡋࡄࡉࡉࡀ ࡀࡌࡓࡉࡀ ࡋࡔࡅࡁࡀ ࡍࡀࡓࡁࡊࡀ ࡋࡉࡂࡓࡀࡉ ࡖ ࡌࡀࡃࡓࡉࡊࡀ ࡃࡉࡓࡊࡉࡀ ࡖ ࡊࡅࡔࡈࡀ ࡅࡄࡀࡉࡌࡀࡍࡅࡕࡀ ࡀࡌࡓࡉࡀ ࡁࡄࡉࡐࡉࡀ ࡍࡀࡎࡂࡉࡀ ࡀࡍࡀ ࡀࡉࡍࡀࡉ ࡋࡌࡓࡅࡌ ࡔࡉࡒࡋࡉࡕ ࡍࡉࡔࡌࡀࡕ ࡋࡁࡉࡕ ࡄࡉࡉࡀ ࡎࡊࡉࡕ ࡄࡉࡉࡀ ࡖ ࡔࡉࡌࡅࡉࡀ ࡋࡒࡀࡋࡀࡉ ࡔࡀࡃࡀࡓ ࡀࡋࡀࡍࡐࡀࡉ ࡐࡀࡓࡅࡀࡍࡒࡀ ࡐࡀࡓࡅࡀࡍࡒࡀ ࡖ ࡀࡕࡉࡀ ࡀࡋࡀࡍࡐࡀࡉ ࡀࡉࡕࡉࡋࡉࡀ ࡖ ࡉࡀࡉࡉࡀ ࡏࡅࡑࡈࡋࡀ ࡐࡕࡀ ࡅࡄࡀࡅࡉࡀࡍ ࡆࡉࡅࡇ ࡅࡔࡋࡀࡕࡇ ࡋࡐࡀࡂࡓࡀ ࡆࡀࡐࡓࡀ ࡋࡉࡂࡈࡀࡍ ࡁࡀࡐࡓࡀࡎ ࡉࡀࡌࡉࡍࡇ ࡅࡄࡀࡐࡉࡒࡉࡀ ࡌࡉࡀ ࡀࡁࡓࡀࡍ ࡀࡁࡓࡀࡍ ࡄࡀࡐࡉࡒࡉࡀ ࡌࡉࡀ ࡅࡀࡃࡁࡀࡓ ࡁࡀࡃࡌࡅ ࡄࡉࡉࡀ ࡎࡌࡊࡀࡍ ࡄࡉࡉࡀ ࡎࡌࡀࡊ ࡋࡄࡉࡉࡀ ࡅࡄࡉࡉࡀ ࡃࡉࡋࡅࡍ ࡀࡔࡊࡀ ࡄࡉࡉࡀ ࡀࡔࡊࡀ ࡃࡉࡋࡅࡍ ࡅࡀࡔࡊࡀࡕ ࡍࡉࡔࡌࡀࡕ ࡖ ࡌࡎࡀࡊࡉࡀ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖ ࡀࡎࡂࡉࡀ ࡏࡋࡊࡀ ࡎࡀ

97. ࡎࡋࡉࡒ ࡅࡀࡎࡒࡀࡍ ࡌࡉࡍࡇ ࡅࡋࡀࡔࡉࡁࡒࡀࡍ ࡁࡃࡀࡅࡓࡀ ࡁࡀࡈࡋࡀ ࡎࡀ

98. ࡉࡅࡌࡀ ࡖ ࡍࡀࡐࡉࡒ ࡍࡉࡔࡌࡀ ࡉࡅࡌࡀ ࡖ ࡎࡀࡋࡉࡒ ࡕࡅࡔࡋࡉࡌࡀ ࡉࡅࡌࡀ ࡖ ࡍࡀࡐࡉࡒ ࡍࡉࡔࡌࡀ ࡌࡍ ࡀࡕࡅࡕࡉࡀ ࡂࡀࡓࡂࡋࡉࡀ ࡖ ࡌࡅࡕࡀ ࡖ ࡊࡉࡔࡂࡉࡔ ࡕࡉࡂࡓࡀ ࡓࡌࡉࡁࡇ ࡁࡂࡀࡅࡇ ࡖ ࡕࡉࡁࡉࡋ ࡀࡁࡃࡉࡀ ࡓࡅࡄࡀ ࡉࡀࡕࡁࡀ ࡁࡌࡀࡋࡉࡀ ࡅࡔࡅࡁࡀ ࡁࡕࡉࡄࡌࡀ ࡉࡀࡕࡁࡉࡀ ࡊࡉࡕࡅࡍ ࡊࡅࡊࡁࡉࡀ ࡎࡃࡉࡒࡉࡀ ࡅࡀࡒࡀࡐࡓࡀ ࡁࡓࡉࡔ ࡓࡅࡄࡀ ࡓࡌࡉࡍ ࡁࡀࡊࡉࡍ ࡆࡀࡍࡂࡀࡉࡉࡀ ࡅࡌࡀࡈࡀࡓࡀࡉࡉࡀ ࡌࡉࡔࡕࡀࡓࡄࡉࡆࡉࡀ ࡂࡀࡁࡓࡀ ࡖ ࡀࡕࡉࡀࡍ ࡋࡄࡀࡊࡀ ࡖ ࡀࡉࡕࡉࡋࡉࡀ ࡖ ࡉࡀࡉࡉࡀ ࡏࡅࡑࡈࡋࡀ ࡀࡋࡁࡔࡀࡍ ࡏࡅࡑࡈࡋࡀ ࡖ ࡆࡉࡅࡀ ࡅࡈࡀࡓࡈࡀࡁࡅࡍࡀ ࡖ ࡍࡄࡅࡓࡀ ࡊࡀࡎࡉࡀࡍ ࡕࡓࡀࡑࡋࡉࡀ ࡌࡍ ࡊࡋࡉࡋ ࡀࡉࡀࡓ ࡅࡌࡍ ࡖ ࡓࡁࡉࡀ ࡏࡄࡀࡁࡋࡅࡍ ࡋࡏࡅࡕࡓࡉࡀ ࡕࡉࡓࡑࡀࡍ ࡁࡉࡍࡉࡀ ࡏࡅࡕࡓࡉࡀ ࡅࡒࡀࡉࡌࡀࡍ ࡁࡉࡍࡉࡀ ࡕࡅࡔࡋࡉࡌࡉࡀ ࡊࡋࡉࡋ ࡀࡉࡀࡓ ࡕࡓࡀࡑࡋࡇ ࡁࡓࡉࡔࡉࡇ ࡅࡓࡀࡁࡅࡕ ࡀࡐࡒࡀࡍ ࡌࡍ ࡀࡋࡌࡀ ࡄࡉࡉࡀ ࡎࡌࡀࡊ ࡋࡄࡉࡉࡀ ࡅࡄࡉࡉࡀ ࡃࡉࡋࡅࡍ ࡀࡔࡊࡀ ࡄࡉࡉࡀ ࡀࡔࡊࡀ ࡃࡉࡋࡅࡍ ࡅࡀࡔࡊࡀࡕ ࡍࡉࡔࡌࡀࡕ ࡖ ࡌࡎࡀࡊࡉࡀ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖ ࡀࡎࡂࡉࡀ ࡋࡊࡀ ࡎࡀ

99. ࡏࡕࡓࡉࡑࡕࡅࡍ ࡅࡏࡕࡒࡀࡉࡀࡌࡕࡅࡍ ࡁࡄࡉࡓࡀࡉ ࡁࡌࡀࡌࡋࡀ ࡅࡔࡓࡀࡓࡀ ࡖ ࡀࡕࡀࡋࡊࡅࡍ ࡌࡀࡌࡋࡀ ࡅࡔࡓࡀࡓࡀ ࡖ ࡀࡕࡀ ࡋࡈࡀࡁࡉࡀ ࡌࡀࡋࡀࡋࡀ ࡊࡔࡉࡈࡀ ࡋࡌࡄࡀࡉࡌࡍࡉࡀ ࡁࡄࡉࡓࡀࡉ ࡁࡀࡉࡉࡕࡅࡍ ࡅࡀࡔࡊࡉࡕࡅࡍ ࡕࡅࡌ ࡕࡉࡁࡅࡍ ࡅࡕࡀࡔࡊࡅࡍ ࡁࡀࡉࡉࡕࡅࡍ ࡅࡀࡔࡊࡉࡕࡅࡍ ࡁࡄࡉࡓࡀࡉ ࡀࡊࡅࡀࡕ ࡒࡀࡃࡌࡀࡉࡉࡀ ࡖ ࡁࡅࡍ ࡆࡊࡉࡕ ࡌࡀࡍࡃࡀ ࡖ ࡄࡉࡉࡀ ࡅࡆࡀࡊࡉࡕ ࡊࡅࡋࡄࡅࡍ ࡓࡀࡄࡌࡀࡊ ࡅࡄࡉࡉࡀ ࡆࡀࡊࡉࡍ ࡎࡀ ࡄࡀࡊࡀ ࡒࡓࡉࡀ ࡁࡓࡉࡊࡉࡀ ࡅࡌࡔࡀࡁࡉࡀ ࡄࡉࡉࡀ ࡖ ࡍࡉࡔࡌࡀࡕࡀ ࡎࡀ

100. ࡁࡉࡍࡕࡀ ࡖ ࡁࡀࡉࡍࡉࡀ ࡄࡉࡉࡀ ࡏࡋࡀࡍࡉࡀ ࡈࡀࡁࡉࡀ ࡖ ࡁࡂࡀࡅࡇ ࡓࡀࡅࡆࡉࡀ ࡁࡎࡅࡌ ࡓࡉࡄࡀࡉࡅࡍ ࡖ ࡏࡋࡀࡍࡉࡀ ࡖ ࡁࡓࡉࡄࡇ ࡖ ࡌࡀࡍࡃࡀ ࡖ ࡄࡉࡉࡀ

ࡏࡋࡀࡅࡀࡉࡄࡅࡍ ࡔࡓࡉࡀ ࡎࡀ ࡄࡀࡊࡀ ࡒࡓࡉࡀ ࡁࡓࡉࡊࡉࡀ ࡅࡌࡔࡀࡁࡉࡀ ࡄࡉࡉࡀ ࡖ ࡔࡅࡌ ࡁࡓ ࡍࡅ ࡅࡈࡀࡁ ࡈࡀࡁࡀ ࡋࡈࡀࡁࡇ ࡎࡀ

101. ࡔࡊࡀࡍ ࡄࡉࡉࡀ ࡔࡊࡉࡍࡕࡀ ࡅࡃࡍࡀࡁࡀ ࡆࡉࡅࡀ ࡁࡀࡉࡀࡓ ࡔࡀࡍࡉࡀ ࡀࡍࡀ ࡅࡏࡅࡕࡓࡉࡀ ࡀࡄࡀࡉ ࡎࡀࡃࡀࡓࡍࡀ ࡋࡊࡅࡋࡇ ࡈࡀࡁࡕࡀ ࡎࡀࡃࡀࡓࡍࡀ ࡋࡌࡍࡀࡕ ࡓࡁࡉࡀ ࡅࡀࡎࡉࡒࡍࡀ ࡁࡆࡀࡊࡅ ࡋࡀࡕࡀࡓ ࡍࡄࡅࡓ ࡎࡀ

102. ࡁࡉࡍࡕࡀ ࡖ ࡁࡀࡉࡍࡉࡀ ࡄࡉࡉࡀ ࡋࡃࡀࡓࡃࡀࡓࡉࡀ ࡋࡀࡁࡀࡈࡋࡀ ࡎࡀ ࡄࡀࡆࡉࡍ ࡏࡍࡉࡀࡍࡀ ࡓࡀࡌࡉࡕ ࡀࡁࡀࡕࡀࡓ ࡖ ࡋࡀࡉࡐࡉࡕ ࡋࡀࡅࡐࡀ ࡅࡄࡀࡉࡆࡀࡊ ࡊࡁࡉࡔ ࡄࡔࡅࡊࡀ ࡁࡏࡅࡌࡇ ࡅࡕࡓࡀࡑ ࡍࡄࡅࡓࡀ ࡁࡃࡅࡊࡕࡇ ࡎࡀ

103. ࡊࡁࡉࡔ ࡄࡔࡅࡊࡀ ࡁࡏࡅࡌࡇ ࡅࡕࡓࡀࡑ ࡍࡄࡅࡓࡀ ࡁࡃࡅࡊࡕࡇ ࡄࡉࡉࡀ ࡒࡀࡁࡉࡋ ࡁࡅࡕࡊࡅࡍ ࡏࡅࡕࡓࡉࡀ ࡒࡀࡁࡉࡋ ࡕࡅࡔࡁࡉࡄࡕࡀࡉࡊࡅࡍ ࡔࡓࡉࡀ ࡆࡉࡃࡒࡀ ࡋࡌࡀࡓࡇ ࡔࡓࡏࡉࡀ ࡈࡀࡁࡅࡕࡀ ࡋࡉࡀࡄࡁࡀ ࡔࡓࡉࡀ ࡄࡀࡆࡀ ࡍࡉࡔࡉࡌࡕࡀ ࡖ ࡐࡋࡀࡍ ࡅࡍࡉࡔࡌࡀࡕࡀ ࡖ ࡄࡀࡆࡀ ࡌࡀࡎࡉࡒࡕࡀ ࡋࡀࡕࡓࡀ ࡓࡁࡀ ࡖ ࡍࡄࡅࡓࡀ ࡅࡋࡃࡀࡅࡓࡀ ࡕࡀࡒࡍࡀ ࡅࡄࡉࡉࡀ ࡆࡀࡊࡉࡍ ࡎ ࡀ ࡄࡀࡊࡀ ࡒࡓࡉࡀ ࡁࡆࡉࡅ ࡖ ࡍࡐࡉࡔ ࡑࡁࡉࡍࡀ ࡅࡀࡎࡉࡒ ࡏࡃࡀࡊ ࡋࡌࡀࡎࡉࡒࡕࡀ ࡅࡁࡏ ࡁࡅࡕࡀ ࡋࡍࡀࡐࡔࡀࡊ ࡅࡄࡉࡉࡀ ࡆࡀࡊࡉࡍ ࡎ ࡀ. ࡄࡀࡋࡉࡍ ࡏࡍࡉࡀࡍࡉࡀ ࡅࡃࡓࡀࡔࡉࡀ ࡖ ࡌࡀࡑࡁࡅࡕࡀ ࡅࡌࡀࡎࡉࡒࡕࡀ ࡖ ࡀࡍࡎࡉࡕ ࡋࡍࡀࡐࡔࡀࡉ ࡄࡀࡅࡉࡋࡀࡉ ࡃࡅࡊࡓࡀࡍࡀ ࡁࡕࡉࡁࡉࡋ ࡅࡄࡀࡕࡀࡌ ࡁࡀࡋࡌࡉࡀ ࡓࡅࡓࡁࡉࡀ ࡏࡋࡀࡉࡉࡀ ࡖ ࡍࡄࡅࡓࡀ ࡋࡔࡅࡌ ࡄࡉࡉࡀ ࡅࡋࡓࡅࡔࡌ ࡌࡀࡍࡃࡀ ࡖ ࡄࡉࡉࡀ ࡅࡋࡔࡅࡌࡀࡉࡄࡅࡍ ࡖ ࡄࡉࡁࡉࡋ ࡅࡔࡉࡕࡉࡋ ࡅࡀࡍࡅࡔ ࡅࡋࡔࡅࡌࡀ ࡅࡓࡄࡑࡀࡍࡀ ࡖ ࡌࡀࡋࡊࡀ ࡓࡌࡀ ࡓࡁࡀ ࡖ ࡍࡄࡅࡓࡀ ࡖ ࡄࡉࡍࡅࡍ ࡍࡉࡄࡅࡉࡋࡀࡉ ࡎࡉࡌࡀࡊࡀ ࡅࡌࡐࡀࡓࡒࡀࡍࡀ ࡅࡌࡔࡅࡆࡁࡀࡍࡀ ࡌࡍ ࡀࡕࡓࡀ ࡖ ࡄࡔࡅࡊࡀ ࡋࡀࡕࡓࡀ ࡖ ࡍࡄࡅࡓࡀ ࡅࡌࡒࡀࡁࡋࡉࡀ ࡋࡓࡅࡄࡀࡉ ࡅࡍࡉࡔࡉࡌࡕࡀࡉ ࡏࡋࡀࡅ ࡖ ࡏࡅࡄࡓࡀ ࡅࡔࡀࡓࡔࡀ ࡖ ࡄࡉࡉࡀ ࡅࡌࡀࡍࡃࡀ ࡖ ࡄࡉࡉࡀ ࡅࡋࡉࡁࡀࡉ ࡎࡄࡉࡃ ࡂࡀࡅ ࡄࡉࡉࡀ ࡅࡌࡀࡓࡀࡉ ࡅࡌࡀࡍࡃࡀ ࡖ ࡄࡉࡉࡀ ࡎࡀࡁࡉࡋࡍࡀ ࡋࡓࡉࡃࡐࡀ ࡖ ࡀࡋࡌࡀ ࡁࡋࡉࡁࡀ ࡊࡔࡉࡈࡀ ࡅࡌࡄࡀࡉࡌࡍࡀ ࡀࡍࡀ ࡀࡍࡉࡀ ࡅࡃࡀࡍࡉࡀ ࡀࡁࡃࡀ ࡖ ࡊࡅࡋࡇ ࡄࡀࡈࡀࡉࡉࡀ ࡅࡀࡓࡒࡀ ࡁࡉࡂࡀࡓ ࡖ ࡍࡀࡑࡅࡓࡀࡉࡉࡀ ࡆࡅࡈࡀ ࡖ ࡀࡄࡀࡉ ࡕࡀࡓࡌࡉࡃࡉࡀ ࡅࡂࡀࡍࡆࡉࡁࡓࡉࡀ ࡅࡀࡒࡀࡐࡓࡀ ࡖ ࡀࡕࡅࡕࡉࡀ ࡋࡉࡂࡓࡀࡉࡄࡅࡍ ࡖ ࡍࡀࡎࡀࡊࡉࡀ ࡀࡍࡀ ࡓࡁࡀࡉ ࡀࡃࡀࡌ ࡉࡅࡄࡀࡍࡀ ࡁࡓ ࡎࡀࡌ ࡁࡓ

ࡁࡉࡄࡓࡀࡌ ࡁࡓ ࡎࡀ(ࡀyࡉࡍ)ࡃࡀࡍ ࡁࡓ ࡌࡎࡀ(ࡀyࡉࡍ)ࡀࡃ ࡋࡀࡒࡀࡁ ࡊࡀࡌࡉࡎࡉࡀ ࡅࡊࡉࡍࡉࡀࡍࡇ ࡓࡉࡔ ࡃࡓࡀࡆ ࡖ ࡀࡍࡎࡉࡕ ࡋࡍࡀࡐࡔࡀࡉ ࡌࡍ ࡎࡉࡃࡓࡀ ࡖ ࡀࡍࡀࡍࡀ ࡃࡀࡊࡉࡕࡀ ࡖ ࡔࡀࡋࡌࡀࡍࡕࡉࡀ ࡅࡌࡄࡀࡉࡌࡍࡀ ࡖ ࡏࡅࡑࡓࡀ ࡌࡃࡀࡊࡀࡉ ࡖ ࡐࡉࡓࡑࡀ ࡅࡂࡀࡅࡓࡀ ࡅࡆࡀࡍࡉࡅࡕࡀ ࡋࡉࡕࡁࡇ ࡖ ࡄࡏ ࡏࡌࡀ ࡖ ࡀࡁ ࡃࡉࡋࡀࡉ ࡓࡅࡀࡄࡀ ࡖ ࡄࡉࡉࡀ ࡍࡉࡄࡅࡀࡋࡀ ࡖ ࡄࡏ ࡆࡀࡄࡓࡀࡕ ࡔࡉࡐࡅࡋࡀ ࡅࡓࡀࡁࡀࡕ ࡉࡀࡍࡒࡀ ࡖ ࡄࡏ ࡔࡅࡌࡀ ࡖ ࡌࡀࡑࡁࡅࡕࡀ ࡀࡍࡄࡀࡓ ࡐࡕ ࡔࡀࡓࡀࡕ ࡅࡔࡅࡌࡀ ࡖ ࡒࡓࡀࡉࡕࡀ (ࡀyࡉࡍ)ࡃࡉࡉࡇ ࡁࡓࡀࡕࡀ ࡖ ࡀࡃࡀࡌ ࡁࡓ ࡎࡀ(ࡀyࡉࡍ)ࡀࡃ ࡊࡉࡍࡉࡀࡍࡇ ࡊࡀࡅࡉࡓࡉࡀ ࡖ ࡀࡍࡎࡀࡋࡀ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡓࡁࡀࡉ ࡓࡀࡌ ࡉࡅࡄࡀࡍࡀ ࡁࡓ ࡓࡁࡀࡉ ࡉࡀࡄࡉࡀ ࡆࡉࡄࡓࡅࡍ ࡁࡓ ࡓࡁࡀࡉ ࡆࡉࡄࡓࡅࡍ ࡁࡓ ࡓࡁࡀࡉ ࡀࡃࡀࡌ ࡁࡓ ࡓࡁࡀࡉ ࡉࡀࡄࡉࡀ ࡀࡃࡀࡌ ࡁࡓ ࡓࡁࡀࡉ ࡔࡉࡕࡉࡋ ࡋࡀࡒࡀࡁ ࡌࡀࡍࡃࡅࡉࡀ ࡅࡊࡉࡍࡉࡀࡍࡇ ࡏࡊࡅࡌࡀ ࡖ ࡀࡍࡎࡀࡋࡇ ࡌࡍ ࡎࡉࡃࡓࡀ ࡖ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡓࡁࡀࡉ ࡉࡀࡄࡉࡀ ࡆࡉࡄࡓࡅࡍ ࡁࡓ ࡓࡁࡀࡉ ࡉࡀࡄࡉࡀ ࡁࡉࡄࡓࡀࡌ ࡁࡓ ࡓࡁࡀࡉ ࡀࡃࡀࡌ ࡁࡓ ࡓࡁࡀࡉ ࡉࡀࡄࡉࡀ ࡀࡃࡀࡌ ࡁࡓ ࡓࡁࡀࡉ ࡔࡉࡕࡉࡋ ࡊࡉࡍࡉࡀࡍࡇ ࡏࡊࡅࡌࡀ ࡖ ࡀࡍࡎࡀ ࡋࡄࡀࡃ ࡔࡀࡋࡌࡀࡍࡀ ࡏࡅࡎࡕࡀࡃ ࡄࡀࡃࡀࡉࡀࡕ ࡁࡓ ࡏࡎࡕࡀࡃ ࡒࡀࡎࡅࡌ ࡁࡓ ࡄࡀࡃࡀࡉࡀࡕ ࡁࡓ ࡁࡉࡄࡓࡀࡌ ࡁࡓ ࡆࡉࡄࡓࡅࡍ ࡁࡓ ࡆࡀࡊࡓࡉࡀ ࡌࡍ ࡁࡍࡉࡀ ࡃࡉࡄࡃࡀࡓࡉࡀ ࡅࡊࡉࡍࡉࡀࡍࡇ ࡎࡀࡁࡅࡓ ࡌࡍ ࡎࡉࡃࡓࡀ ࡖ ࡊࡉࡓࡉࡉࡇ ࡁࡓࡀࡕࡇ ࡖ ࡎࡀࡋࡉࡌ ࡁࡓ ࡂࡀࡍࡉࡌ ࡊࡉࡍࡉࡀࡍࡇ ࡒࡅࡈࡀࡍࡀ ࡖ ࡀࡍࡎࡀࡋࡀ ࡌࡍ ࡎࡉࡃࡓࡀ ࡖ ࡁࡉࡄࡓࡀࡌ ࡁࡓ ࡀࡃࡀࡌ ࡉࡅࡄࡀࡍࡀ ࡁࡓ ࡉࡀࡄࡉࡀ ࡆࡉࡄࡓࡅࡍ ࡁࡓ ࡉࡀࡄࡉࡀ ࡀࡍࡅࡔ ࡁࡓ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡓࡁࡀࡉ ࡌࡄࡀࡕࡀࡌ ࡌࡍ ࡁࡍࡉࡀ ࡃࡉࡄࡃࡀࡓࡉࡀ ࡅࡊࡉࡍࡉࡀࡍࡇ ࡎࡀࡁࡅࡓ ࡖ ࡀࡍࡎࡀ ࡌࡍ ࡎࡉࡃࡓࡀ ࡖ ࡀࡍࡀࡍࡀ ࡃࡀࡊࡉࡕࡀ ࡁࡓࡀࡕࡇ ࡖ ࡃࡉࡄࡃࡀࡓ (ࡀyࡉࡍ)ࡀࡆࡉࡆ ࡎࡀࡊࡀࡓࡀ ࡖ ࡀࡍࡎࡀࡋࡀ ࡌࡍ ࡎࡉࡃࡓࡀ ࡖ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡓࡉࡔࡀࡉࡀ ࡂࡀࡍࡆࡉࡁࡓࡀ ࡁࡄࡉࡓࡀ ࡅࡔࡀࡋࡌࡀࡍࡀ ࡖ ࡏࡕࡄࡀࡉࡌࡀࡍ ࡁࡄࡉࡉࡀ ࡒࡀࡃࡌࡀࡉࡉࡀ ࡁࡓ ࡔࡀࡓࡔࡀ ࡕࡀࡒࡍࡀ ࡓࡁࡀࡉ ࡉࡀࡄࡉࡀ ࡁࡉࡄࡓࡀࡌ ࡁࡓ ࡀࡁࡅࡄࡅࡍ ࡖ ࡂࡀࡍࡆࡉࡁࡓࡉࡀ ࡓࡁࡀࡉ ࡎࡀࡌ ࡉࡅࡄࡀࡍࡀ ࡁࡓ ࡎࡀࡓࡅࡀࡍ ࡁࡀࡄࡓࡀࡍࡀ ࡁࡓ ࡀࡃࡀࡌ ࡁࡀࡊࡕࡉࡀࡓ ࡁࡓ ࡎࡀࡌ ࡁࡀࡄࡓࡀࡍ ࡁࡓ ࡉࡀࡄࡉࡀ ࡁࡓ ࡆࡀࡊࡉࡀ ࡁࡓࡇ ࡖ ࡉࡅࡄࡀࡍࡀ ࡋࡀࡒࡀࡁ ࡁࡄࡀࡉࡉࡓ ࡔࡁࡉࡒࡋࡇ ࡌࡀࡍࡃࡀ ࡖ ࡄࡉࡉࡀ ࡄࡀࡈࡀࡉࡉࡇ ࡀࡌࡉࡍࡈࡅࡋ ࡖ ࡄࡋࡀ ࡅࡏࡕࡀࡍࡂࡀࡓ ࡊࡕࡉࡁ ࡄࡀࡆࡉࡍ ࡎࡉࡃࡓࡀ ࡍࡉࡄࡅࡉࡋࡇ ࡃࡅࡊࡓࡀࡍࡀ ࡁࡕࡉࡁࡉࡋ ࡅࡋࡄࡉࡋ ࡁࡀࡋࡌࡉࡀ ࡖ ࡍࡄࡅࡓࡀ ࡖ ࡀࡍࡎࡀࡋࡇ ࡌࡍ ࡎࡉࡃࡓࡀ ࡖ ࡀࡍࡎࡀ ࡋࡍࡀࡐࡔࡉࡇ ࡓࡁࡀࡉ ࡁࡉࡄࡓࡀࡌ ࡁࡓ ࡄࡉࡉࡀ ࡁࡓ ࡀࡃࡀࡌ ࡆࡀࡊࡉࡀ ࡁࡓ ࡁࡓࡄࡉࡉࡀ ࡁࡓ ࡁࡀࡊࡕࡉࡀࡓ ࡁࡓ ࡀࡃࡀࡌ ࡊࡉࡍࡉࡀࡍࡇ ࡊࡅࡄࡉࡋࡉࡀ ࡖ ࡀࡍࡎࡀ ࡌࡍ ࡎࡉࡃࡓࡀ ࡖ ࡀࡍࡎࡀ ࡋࡍࡀࡐࡔࡉࡇ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡀࡓࡃࡉࡊࡋࡀ ࡖ ࡍࡀࡑࡉࡓࡅࡕࡀ ࡓࡁࡀࡉ ࡀࡃࡀࡌ ࡆࡀࡊࡉࡀ ࡁࡓ ࡉࡀࡄࡉࡀ ࡉࡅࡄࡀࡍࡀ ࡁࡓ ࡁࡀࡊࡕࡉࡀࡓ ࡁࡓ ࡁࡓ ࡄࡉࡉࡀ ࡁࡓ ࡄࡉࡉࡀ ࡁࡓ ࡎࡀࡌ ࡁࡓ ࡔࡀࡉࡀࡓ ࡁࡓ ࡓࡅࡆࡁࡇ ࡁࡓ ࡀࡃࡀࡌ ࡁࡓ ࡎࡀࡌ ࡊࡉࡍࡉࡀࡍࡇ ࡎࡅࡌࡀࡒࡀ ࡖ ࡀࡍࡎࡀ ࡋࡍࡀࡐࡔࡉࡇ ࡌࡍ ࡎࡉࡃࡓࡀ ࡖ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡖ ࡓࡉࡔࡀࡉࡀ ࡅࡐࡓࡉࡔࡀࡉࡀ ࡁࡓ ࡌࡀࡋࡊࡉࡀ ࡖ ࡏࡒࡀࡓࡀ ࡓࡁࡀࡉ ࡓࡀࡌ ࡆࡉࡄࡓࡅࡍ ࡁࡓ ࡎࡀࡌ ࡆࡉࡄࡓࡅࡍ ࡁࡓ ࡎࡀࡓࡅࡀࡍ ࡊࡉࡍࡉࡀࡍࡇ ࡎࡀࡌࡅࡉࡀ ࡔࡁࡉࡒࡋࡇ ࡌࡀࡍࡃࡀ ࡖ ࡄࡉࡉࡀ ࡄࡀࡈࡀࡉࡉࡇ ࡖ ࡀࡍࡎࡀ ࡌࡍ ࡎࡉࡃࡓࡀ ࡖ ࡁࡉࡄࡓࡀࡌ ࡁࡓ ࡁࡀࡊࡕࡀࡓ ࡁࡓ ࡉࡀࡄࡉࡀ ࡁࡓ ࡎࡀࡌ ࡁࡓ ࡆࡀࡊࡉࡀ ࡊࡉࡍࡉࡀࡍࡇ ࡌࡀࡋࡅࡄࡀ ࡋࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡎࡀࡌࡉࡊ ࡏࡅࡑࡓࡉࡀ ࡑࡀࡋࡉࡉࡀ ࡅࡌࡕࡀࡒࡀࡍ ࡋࡉࡋࡁࡉࡀ ࡄࡀࡔࡊࡉࡀ ࡖ ࡉࡀࡄࡉࡁ ࡄࡀࡉࡋࡀ ࡋࡔࡀࡋࡌࡀࡍࡉࡀ ࡌࡀࡓࡉࡀ ࡏࡅࡑࡓࡉࡀ ࡕࡀࡒࡍࡉࡀ ࡓࡁࡀࡉ ࡀࡁࡅࡋࡐࡀࡓࡀࡔ ࡁࡀࡉࡀࡍ ࡁࡓ ࡎࡀࡌ ࡆࡀࡊࡉࡀ ࡁࡓ ࡉࡀࡄࡉࡀ ࡎࡀࡓࡅࡀࡍ ࡁࡓ ࡀࡁࡅࡋࡐࡀࡓࡀࡔ ࡒࡅࡈࡀࡍࡀ ࡊࡉࡍࡉࡀࡍࡇ ࡃࡀࡁࡀࡒࡀࡉࡉࡀ ࡌࡍ ࡎࡉࡃࡓࡀ ࡖ ࡔࡀࡋࡌࡀࡍࡀ ࡅࡌࡄࡀࡉࡌࡍࡀ ࡉࡀࡄࡉࡀ ࡆࡉࡄࡓࡅࡍ ࡁࡓ ࡁࡉࡄࡃࡀࡃ ࡁࡓ ࡉࡀࡄࡉࡀ ࡁࡓ ࡀࡃࡀࡌ ࡒࡅࡈࡀࡍࡀ ࡖ ࡍࡎࡀࡋࡇ ࡓࡁࡀࡉ ࡀࡃࡀࡌ ࡁࡓ ࡎࡀࡌ ࡁࡀࡉࡀࡍ ࡁࡓ ࡉࡀࡄࡉࡀ ࡒࡅࡈࡀࡍࡀ ࡀࡍࡎࡀ ࡌࡍ ࡎࡉࡃࡓࡀ ࡖ ࡓࡁࡀࡉ ࡉࡀࡄࡉࡀ ࡁࡓ ࡁࡉࡄࡓࡀࡌ ࡁࡓ ࡓࡁࡀࡉ ࡄࡉࡁࡉࡋ ࡕࡉࡋࡉࡓࡉࡀ ࡀࡍࡎࡀ ࡓࡁࡀࡉࡀࡍ ࡓࡁࡀࡉ ࡁࡉࡄࡓࡀࡌ ࡁࡓ ࡀࡃࡀࡌ ࡁࡓ ࡉࡀࡄࡉࡀ ࡆࡀࡓࡆࡅࡉࡀ ࡀࡍࡎࡀ ࡋࡏࡌࡀ ࡖ ࡏࡌࡇ ࡔࡀࡓࡀࡕ ࡉࡀࡎࡌࡉࡍ ࡁࡓࡀࡕࡇ ࡖ ࡆࡀࡊࡉࡀ ࡃࡉࡒࡍࡀࡍࡀ ࡖ ࡀࡍࡎࡀࡋࡇ ࡄࡀࡌ ࡓࡁࡀࡉ ࡁࡉࡄࡓࡀࡌ ࡁࡓ ࡀࡃࡀࡌ ࡁࡓ ࡉࡀࡄࡉࡀ ࡆࡀࡓࡆࡅࡉࡀ ࡌࡍ ࡎࡉࡃࡓࡀ ࡖ ࡄࡀࡅࡀ ࡌࡀࡄࡍࡅࡔ ࡁࡓࡀࡕࡇ ࡖ ࡉࡀࡄࡉࡀ ࡖ ࡀࡍࡎࡀࡋࡀ ࡓࡁࡀࡉ ࡎࡀࡓࡅࡀࡍ ࡁࡅࡋࡁࡅࡋ ࡁࡓ ࡀࡃࡀࡌ ࡁࡀࡉࡀࡍ ࡆࡀࡓࡆࡅࡉࡀ ࡌࡍ ࡎࡉࡃࡓࡀ ࡖ ࡓࡁࡀࡉ ࡔࡀࡃࡀࡍ ࡁࡓ ࡐࡀࡉࡉࡔ ࡆࡀࡓࡆࡅࡉࡀ ࡖ ࡀࡍࡎࡀࡋࡇ ࡌࡍ ࡎࡉࡃࡓࡀ ࡖ ࡓࡁࡀࡉ ࡀࡃࡀࡌ ࡁࡀࡊࡕࡉࡀࡓ ࡁࡓ ࡉࡀࡄࡉࡀ ࡀࡍࡎࡀࡋࡇ ࡁࡉࡄࡓࡀࡌ ࡆࡀࡊࡉࡀ ࡁࡓ ࡁࡀࡉࡀࡍ ࡔࡅࡐࡓࡕࡀࡉࡉࡀ ࡀࡍࡎࡀࡋࡇ ࡌࡍ ࡎࡉࡃࡓࡀ ࡖ ࡓࡁࡀࡉ ࡀࡃࡀࡌ ࡁࡀࡊࡕࡉࡀࡓ ࡁࡓ ࡉࡀࡄࡉࡀ ࡖ ࡀࡍࡎࡀࡋࡇ ࡁࡉࡄࡓࡀࡌ ࡆࡀࡊࡉࡀ ࡁࡓ ࡁࡓ ࡁࡀࡉࡀࡍ ࡔࡅࡐࡓࡕࡀࡉࡉࡀ ࡌࡍ ࡄࡀࡊ ࡎࡉࡃࡓࡀ ࡄࡕࡉࡒࡀ ࡌࡍ ࡊࡃࡀࡁ ࡏࡃࡀ ࡖ ࡉࡀࡄࡉࡀ ࡀࡃࡀࡌ ࡁࡓ ࡎࡀࡌ ࡎࡀࡉࡅࡉࡀ ࡋࡁࡀࡓ ࡀࡄࡀࡕࡇ ࡖ ࡏࡌࡇ ࡎࡀࡌ ࡁࡓ ࡉࡀࡉࡀ ࡀࡁࡅࡉࡀ ࡌࡄࡀࡕࡀࡌ ࡄࡀࡉࡀࡔࡅࡌ ࡁࡓ ࡉࡀࡄࡉࡀ ࡖ ࡀࡍࡎࡀࡋࡇ ࡓࡀࡌ ࡆࡉࡅࡀ ࡁࡉࡄࡓࡀࡌ ࡁࡓ ࡁࡀࡉࡀࡍ ࡄࡉࡁࡉࡋ ࡅࡁࡀࡉࡀࡍ ࡄࡉࡁࡉࡋ ࡀࡍࡎࡀ ࡌࡍ ࡎࡉࡃࡓࡀ ࡖ ࡔࡅࡀࡋࡉࡉࡇ ࡖ ࡉࡀࡄࡉࡀ ࡁࡓ ࡉࡅࡄࡀࡍࡀ ࡁࡉࡄࡓࡀࡌ ࡅࡉࡀࡄࡉࡀ ࡀࡍࡎࡀࡋࡇ ࡓࡀࡌ ࡆࡉࡅࡀ ࡌࡍ ࡔࡀࡐࡕࡀ ࡖ ࡍࡀࡐࡔࡉࡇ ࡖ ࡀࡍࡎࡀ ࡌࡍ ࡔࡀࡐࡕࡀ ࡖ ࡀࡁࡅ ࡖ ࡏࡌࡇ ࡏࡒࡀࡉࡀࡌ ࡁࡓ ࡆࡉࡍࡃࡀࡍࡀ ࡅࡀࡎࡅࡕࡀ ࡖ ࡀࡅࡌࡀ ࡋࡄࡀࡊࡀ ࡄࡅࡀࡕ ࡎ ࡀ. ࡕࡅࡌ ࡔࡀࡁࡉࡒ ࡄࡀࡈࡀࡉࡉࡀ ࡅࡄࡀࡅࡁࡉࡀ ࡅࡎࡊࡉࡋࡀࡕࡀ ࡅࡕࡉࡒࡋࡀࡕࡀ ࡅࡔࡀࡁࡀࡔࡀࡕࡀ ࡍࡉࡄࡅࡉࡋࡅࡍ ࡋࡀࡁࡀࡄࡀࡕࡀࡍ ࡅࡓࡅࡀࡍࡀࡍ ࡅࡋࡀࡄࡀࡍ ࡅࡋࡀࡄࡅࡀࡕࡀࡍ ࡖ ࡍࡐࡀࡒ ࡌࡍ ࡐࡀࡂࡓࡀࡉࡄࡅࡍ ࡅࡋࡃࡒࡀࡉࡌࡉࡀ ࡁࡐࡀࡂࡓࡀࡉࡄࡅࡍ ࡅࡋࡌࡀࡓࡇ ࡖ ࡄࡀࡆࡉࡍ ࡎࡉࡃࡓࡀ ࡖ ࡄࡅ ࡀࡍࡀ ࡀࡃࡀࡌ ࡉࡅࡄࡉࡍࡀ ࡁࡓ ࡌࡀࡄࡍࡅࡔ ࡋࡄࡅࡊࡅࡌࡕࡀ ࡖ ࡉࡀࡅࡀࡓ ࡆࡉࡅࡀ ࡁࡄࡀࡋࡉࡍ ࡆࡄࡀࡓࡉࡀ ࡈࡉࡁࡉࡀ ࡅࡉࡀࡒࡉࡓࡉࡀ ࡖ ࡆࡀࡄࡉࡓ ࡅࡐࡀࡒࡉࡃ ࡅࡀࡌࡀࡓ ࡌࡀࡍࡃࡀ ࡖ ࡄࡉࡉࡀ ࡖ

ࡏࡄࡀࡁࡋࡅࡍ ࡋࡁࡍࡇ ࡅࡔࡅࡀࡋࡀࡍࡇ ࡅࡕࡀࡓࡌࡉࡃࡉࡀ ࡖ ࡄࡀࡊࡀ ࡔࡉࡕࡋࡇ ࡌࡉࡕࡒࡀࡓࡉࡉࡍ ࡅࡋࡄࡉࡋ ࡍࡉࡂࡁࡉࡀ ࡌࡉࡕࡉࡒࡓࡉࡉࡍ ࡖ ࡄࡉࡉࡀ ࡄࡀࡃࡉࡁࡅࡍ ࡀࡌࡉࡍࡈࡅࡋ ࡖ ࡁࡍࡉࡀ ࡁࡍࡀࡉࡅࡍ ࡖ ࡄࡉࡉࡀ ࡄࡉࡍࡅࡍ ࡖ ࡁࡀࡉࡀࡍ ࡖ ࡍࡉࡐࡀࡓࡒࡉࡍࡅࡍ ࡌࡍ ࡄࡔࡅࡊࡀ ࡋࡍࡄࡅࡓࡀ ࡀࡐࡓࡉࡔ ࡅࡂࡀࡋࡉࡋ ࡅࡀࡌࡀࡓ ࡌࡀࡍࡃࡀ ࡖ ࡄࡉࡉࡀ ࡊࡅࡋ ࡂࡀࡁࡓࡀ ࡖ ࡄࡉࡉࡀ ࡓࡀࡄࡉࡌ ࡅࡁࡌࡀࡍࡃࡀ ࡖ ࡄࡉࡉࡀ ࡎࡀࡄࡉࡃ ࡍࡉࡄࡅࡉࡋࡇ ࡈࡀࡌࡀ ࡅࡈࡀࡊࡎࡀ ࡅࡃࡉࡓࡊࡀ ࡖ ࡔࡀࡋࡌࡀࡍࡉࡀ ࡅࡃࡅࡊࡉࡀ ࡅࡍࡉࡄࡅࡕࡀ ࡅࡔࡉࡓࡔࡀ ࡕࡀࡒࡍࡀ ࡖ ࡍࡄࡅࡓࡀ ࡅࡆࡄࡀࡓࡀ ࡅࡊࡅࡔࡈࡀ ࡁࡀࡎࡉࡌࡀ ࡖ ࡍࡀࡐࡔࡉࡇ ࡍࡉࡄࡅࡉࡀ ࡊࡅࡋ ࡖ

ࡏࡌࡀࡕ ࡖ ࡁࡀࡉࡉࡀ ࡌࡉࡁࡉࡀ ࡓࡀࡄࡌࡉࡀ ࡍࡀࡎࡉࡀ ࡌࡉࡀ ࡅࡍࡉࡃࡀࡊࡉࡀ ࡍࡀࡐࡔࡉࡇ ࡏࡅ ࡍࡉࡌࡔࡉࡀ ࡕࡉࡕ ࡅࡍࡉࡌࡔࡉࡀ ࡏࡃࡇ ࡀࡋࡌࡀ ࡋࡉࡀࡅࡍࡉࡋࡇ

ࡏࡃࡇ ࡍࡀࡔࡀࡓ ࡋࡓࡉࡔࡉࡀ ࡕࡋࡀࡕࡀ ࡆࡉࡁࡍࡉࡀ ࡅࡍࡉࡌࡔࡉࡀ ࡕࡉࡕ ࡅࡍࡉࡌࡔࡉࡀ ࡋࡉࡂࡓࡇ ࡀࡋࡌࡀ ࡋࡁࡅࡓࡊࡇ ࡅࡍࡉࡆࡀࡋ ࡌࡉࡀ ࡋࡍࡀࡐࡔࡉࡇ ࡅࡍࡉࡁࡉࡀ ࡓࡀࡄࡌࡉࡀ ࡄࡀࡌࡔࡀ ࡆࡉࡁࡍࡉࡀ ࡕࡋࡀࡕࡀ ࡆࡉࡁࡍࡉࡀ ࡖ ࡏࡅࡌࡀࡌࡀ ࡅࡕࡓࡉࡍ ࡆࡉࡁࡍࡉࡀ ࡖ ࡋࡉࡋࡉࡀ ࡓࡀࡄࡌࡉࡀ ࡖ ࡑࡉࡐࡓࡀ ࡗ ࡆࡀࡓࡅࡒ ࡉࡅࡌࡀ ࡍࡉࡁࡉࡀ ࡅࡁࡔࡀࡁࡀ ࡔࡀࡉࡉࡀ ࡍࡉࡁࡉࡀ ࡓࡀࡄࡌࡉࡀ ࡋࡐࡀࡉࡍࡀ ࡖ ࡒࡀࡉࡌࡉࡀ ࡃࡓࡀࡁࡀࡔࡉࡀ ࡌࡍ ࡒࡅࡃࡀࡌ ࡖ ࡊࡀࡎࡉࡍ ࡃࡓࡀࡁࡔࡉࡀ ࡗ ࡁࡀࡉࡉࡕࡅࡍ ࡌࡉࡔࡊࡀࡁ ࡁࡀࡓࡎࡀࡉࡊࡅࡍ ࡖ ࡋࡉࡋࡉࡀ ࡓࡀࡄࡌࡉࡀ ࡁࡅࡍ ࡌࡍ ࡔࡀࡁࡀ ࡔࡀࡉࡉࡀ ࡖ ࡋࡉࡋࡉࡀ ࡋࡀࡋࡌࡀ ࡋࡐࡉࡓࡔࡀ ࡓࡀࡄࡌࡉࡀ ࡖ ࡋࡉࡋࡉࡀ ࡄࡅࡍࡅࡍ ࡅࡊࡅࡋ ࡖ ࡏࡌࡀࡕ ࡗ ࡃࡀࡓࡀ ࡌࡀࡎࡉࡒࡕࡀ ࡁࡁࡉࡍࡕࡀࡊ ࡋࡀࡕࡉࡊࡎࡉࡀ ࡅࡆࡀࡅࡀࡊ ࡅࡔࡉࡕࡋࡀࡊ ࡅࡔࡅࡀࡋࡀࡍࡀࡊ ࡃࡅࡊࡉࡀ ࡋࡃࡉࡓࡊࡀ ࡅࡈࡀࡊࡎࡀ ࡔࡀࡅࡉࡍࡅࡍ ࡆࡄࡀࡓࡉࡀ ࡋࡂࡀࡈࡉࡍࡅࡍ ࡅࡀࡎࡉࡅࡕࡀ ࡅࡎࡉࡍࡉࡅࡕࡀ ࡅࡏࡐࡉࡊࡅࡕࡀ ࡅࡄࡀࡓࡂࡕࡀ ࡅࡔࡉࡄࡀ ࡅࡁࡉࡔࡅࡕࡀ ࡅࡔࡉࡁࡉࡀ ࡁࡉࡔࡀ ࡅࡃࡀࡂࡋࡅࡕࡀ ࡅࡓࡀࡄࡌࡅࡕ ࡖ ࡊࡀࡃࡁࡀ ࡋࡀࡍࡉࡄࡅࡉࡁࡀࡊ ࡋࡅࡀࡕ ࡀࡄࡀࡊ ࡅࡓࡀࡄࡌࡀࡊ ࡁࡀࡍࡐࡉࡀ ࡋࡀࡕࡉࡔࡐࡅࡓ ࡁࡉࡕ ࡎࡉࡌࡕࡀࡊ ࡅࡁࡉࡕ ࡍࡀࡑࡉࡓࡅࡕࡀࡊ ࡅࡁࡉࡕ

ࡓࡀࡄࡌࡀࡊ ࡁࡃࡅࡊࡉࡀ ࡋࡅࡂࡈࡇ ࡅࡋࡀࡕࡉࡊࡅࡋ ࡗ ࡖ ࡋࡀࡌࡃࡀࡊࡉࡕ ࡋࡀࡕࡀࡉࡅࡋ ࡅࡗ ࡋࡀࡌࡃࡀࡊࡉࡕ ࡅࡗ ࡔࡀࡊࡁࡉࡕ ࡋࡅࡀࡕ ࡆࡀࡅࡀࡊ ࡅࡄࡀࡃࡉࡕ ࡀࡍࡀࡕ ࡅࡆࡀࡅࡀࡊ ࡅࡄࡀࡆࡉࡕ ࡄࡆࡀࡕࡀ ࡁࡍࡀࡐࡔࡀࡊ ࡏࡎࡉࡀ ࡌࡉࡀ ࡅࡃࡀࡊࡉࡀ ࡍࡀࡐࡔࡀࡊ ࡀࡍࡀࡕ ࡅࡆࡀࡅࡀࡊ ࡀࡌࡉࡍࡈࡅࡋ ࡖ ࡏࡕࡊࡀࡉࡓࡕ ࡀࡍࡀࡕ ࡅࡆࡀࡅࡀࡊ ࡅࡏࡊࡉࡋࡕࡀ ࡖ ࡁࡀࡁࡉࡀ ࡕࡓࡉࡎࡀࡓ ࡋࡀࡕࡉࡊࡅࡋ ࡋࡉࡂࡀࡋ ࡋࡉࡂࡀࡋ ࡀࡉࡍࡀࡊ ࡌࡍ ࡍࡀࡑࡉࡓࡅࡕࡀ ࡅࡌࡍ ࡌࡀࡋࡐࡍࡅࡕࡀ ࡅࡌࡍ ࡉࡀࡃࡉࡕࡀ ࡋࡀࡕࡉࡎࡁࡉࡀ ࡅࡃࡒࡀࡓࡉࡕ ࡄࡀࡓࡉࡒ ࡏࡋࡇ ࡅࡐࡓࡅࡔ ࡅࡍࡉࡄࡉࡕ ࡒࡓࡉࡀ ࡅࡊࡋ ࡖ ࡋࡀࡉࡀࡃࡀࡕࡋࡇ ࡀࡌࡅࡓ ࡅࡔࡀࡉࡉࡋ ࡖ ࡍࡉࡌࡓࡅࡋࡀࡊ ࡅࡓࡁࡅࡕࡀ ࡋࡀࡕࡉࡎࡀࡁ ࡅࡋࡀࡕࡉࡎࡁࡇ ࡌࡅࡌࡀ ࡋࡏࡅࡑࡓࡀࡊ ࡅࡓࡀࡆࡀ ࡊࡀࡎࡉࡀ ࡒࡅࡃࡀࡌ ࡆࡀࡅࡀࡊ ࡅࡁࡍࡀࡊ ࡅࡀࡍࡀࡔࡉࡀ ࡖ ࡋࡀࡎࡁࡉࡓࡉࡀ ࡄࡅࡊࡅࡌࡕࡀ ࡋࡀࡕࡉࡂࡀࡋࡉࡋ ࡄࡉࡍ ࡀࡌࡓࡉࡕ ࡒࡅࡃࡀࡌ ࡃࡀࡓࡉࡀ ࡅࡀࡋࡌࡉࡀ ࡓࡀࡌࡉࡋࡀࡊ ࡕࡉࡒࡋࡀࡕࡀ ࡀࡌࡉࡍࡈࡅࡋ ࡖ ࡓࡀࡆࡉࡀ ࡓࡂࡉࡆࡉࡀ ࡔࡃࡉࡁࡅࡍ ࡅࡌࡀࡓࡂࡉࡆࡉࡁࡅࡍ ࡅࡊࡅࡋ ࡄࡀࡁࡔࡀࡁࡀ ࡍࡐࡉࡔ ࡁࡓࡀࡄࡌࡀࡊ ࡅࡀࡃࡊࡀࡓ ࡌࡉࡀ ࡋࡍࡀࡐࡔࡀࡊ ࡅࡓࡌࡉࡀ ࡏࡋࡀࡊ ࡅࡋࡍࡉࡔࡌࡀࡕࡀࡊ ࡅࡀࡆࡋࡀ ࡁࡁࡉࡍࡕࡀࡊ ࡋࡀࡕࡉࡔࡕࡀࡋࡀࡈ ࡏࡃࡀ ࡖ ࡔࡉࡁࡉࡀࡄࡉࡀ ࡏࡋࡀࡊ ࡅࡏࡋ ࡏࡊࡅࡓࡉࡀ ࡅࡁࡉࡋࡃࡁࡀࡁࡉࡀ ࡏࡋࡀࡊ ࡋࡀࡍࡀࡔࡕࡀࡋࡈࡅࡍ ࡅࡁࡀࡍࡐࡉࡀ ࡉࡅࡌࡀ ࡋࡅࡀࡕ ࡆࡀࡅࡀࡊ ࡋࡀࡕࡉࡔࡊࡅࡁ ࡅࡁࡄࡀࡁࡔࡀࡁࡀ ࡋࡂࡀࡓࡌࡀࡁࡇ ࡋࡀࡕࡉࡉࡅࡋ ࡅࡓࡉࡔࡀࡊ ࡋࡀࡕࡉࡄࡅࡊ ࡅࡆࡌࡀ ࡋࡀࡕࡉࡎࡀࡁ ࡅࡊࡅࡋࡄࡉࡍ ࡏࡁࡉࡃࡀࡕࡀ ࡌࡊࡀࡉࡓࡀࡕࡀ ࡋࡀࡕࡉࡁࡀࡃ ࡅࡄࡀࡁࡔࡀࡁࡀ ࡀࡅࡒࡉࡓࡅࡉࡀ ࡄࡀࡈࡀࡉࡉࡇ ࡅࡄࡀࡅࡁࡇ ࡔࡁࡅࡒࡋࡇ ࡗ ࡔࡀࡊࡁࡉࡕ ࡀࡋࡅࡀࡕ ࡆࡀࡅࡀࡊ ࡅࡌࡊࡀࡉࡓࡉࡕ ࡀࡍࡀࡕ ࡅࡆࡀࡅࡀࡊ ࡋࡀࡕࡉࡔࡊࡅࡁ ࡁࡀࡓࡎࡀࡊ ࡀࡋࡌࡀ ࡖ ࡌࡃࡀࡊࡉࡕ ࡀࡍࡀࡕ ࡅࡆࡀࡅࡀࡊ ࡅࡄࡀࡉࡆࡀࡊ ࡃࡀࡊࡉࡀ ࡍࡀࡐࡔࡀࡊ ࡋࡂࡉࡃࡀ ࡖ ࡉࡀࡓࡃࡍࡀ ࡅࡄࡀࡉࡆࡀࡊ ࡐࡉࡋ ࡁࡉࡀࡓࡃࡍࡀ ࡅࡓࡅࡒࡀ ࡅࡕࡉࡁࡕࡀ ࡅࡌࡊࡀࡉࡓࡅࡕࡀ ࡅࡃࡀࡔࡕࡀࡍࡀ ࡁࡉࡀࡓࡃࡍࡀ ࡋࡀࡕࡉࡔࡃࡉࡀ ࡖ ࡋࡀࡉࡈࡋࡀࡊ ࡍࡀࡈࡓࡉࡀ ࡖ ࡉࡀࡓࡃࡍࡀ ࡒࡅࡃࡀࡌ ࡀࡁࡀࡄࡀࡕࡀࡊ ࡔࡀࡉࡀࡋࡕࡀ ࡄࡀࡅࡉࡀࡋࡀࡊ ࡅࡗ ࡉࡀࡕࡁࡉࡕ ࡅࡒࡀࡌࡉࡕ ࡕࡉࡁࡕࡀ ࡏࡅࡄࡓࡀࡊ ࡋࡁࡀࡁࡀ ࡖ ࡁࡅࡕࡀ ࡋࡀࡕࡉࡄࡃࡀࡓ ࡏࡅ ࡏࡕࡋࡀࡊ ࡌࡉࡍࡃࡀࡌ ࡋࡅࡀࡕ ࡏࡍࡉࡔ ࡋࡀࡕࡉࡁࡉࡀ ࡌࡉࡍࡇ ࡁࡓࡅࡂࡆࡀ ࡄࡉࡍࡉࡋࡀ ࡁࡍࡉࡄࡅࡕࡀ ࡅࡌࡊࡉࡊࡅࡕࡀ ࡌࡉࡍࡉࡋࡉࡀ ࡄࡀࡊࡉࡌࡀࡕࡀ ࡄࡉࡍࡉࡋࡀ ࡃࡀࡓࡀࡕࡋࡇ ࡁࡁࡉࡔࡅࡕࡀ ࡌࡀࡎࡊࡉࡋࡉࡁࡀࡊ ࡅࡊࡅࡋ ࡈࡀࡌࡀ ࡅࡈࡀࡊࡎࡀ ࡅࡃࡉࡓࡊࡉࡀ ࡅࡋࡏࡅࡄࡓࡀ ࡖ ࡄࡉࡉࡀ ࡎࡀࡂࡉࡀ ࡅࡕࡀࡓࡌࡉࡃࡉࡀ ࡓࡀࡄࡉࡌ ࡅࡀࡁࡀࡄࡀࡕࡇ ࡌࡀࡅࡒࡉࡓ ࡓࡉࡔࡀࡌࡀ ࡀࡁࡀࡉࡉࡀ ࡔࡀࡁࡉࡒ ࡄࡀࡈࡀࡉࡉࡀ ࡍࡉࡄࡅࡉࡋࡇ ࡏࡒࡀࡓࡇ ࡍࡀࡐࡅࡔ ࡅࡊࡅࡋ ࡌࡀࡍ ࡖ ࡓࡉࡃࡐࡀ ࡅࡏࡅࡋࡑࡀࡍࡀ ࡅࡁࡉࡔࡅࡕࡀ ࡊࡀࡁࡓࡀ ࡏࡋࡇ ࡅࡍࡀࡔࡀࡓ ࡅࡋࡀࡍࡉࡐࡉࡎࡒࡇ ࡅࡓࡅࡄࡑࡀࡍࡀ ࡖ ࡄࡉࡉࡀ ࡓࡁࡉࡀ ࡀࡉࡍࡇ ࡅࡋࡉࡁࡇ ࡋࡄࡉࡉࡀ ࡅࡌࡀࡍࡃࡀ ࡖ ࡄࡉࡉࡀ ࡍࡉࡕࡓࡀࡑ ࡄࡉࡉࡀ ࡅࡌࡀࡍࡃࡀ ࡖ ࡄࡉࡉࡀ ࡄࡀࡉࡋࡀ ࡏࡄࡀࡁࡋࡇ ࡁࡀࡍࡄࡅࡓࡀ ࡆࡀࡊࡅࡕࡀ ࡌࡀࡔࡊࡀ ࡅࡊࡋ ࡌࡀࡍ ࡖ ࡋࡄࡀࡋࡉࡍ ࡌࡀࡋࡀࡋࡉࡀ ࡅࡐࡅࡂࡃࡀࡌࡉࡀ ࡍࡀࡔࡀࡓ ࡅࡍࡉࡋࡂࡀࡈ ࡅࡍࡉࡕࡋࡉࡐ ࡍࡀࡐࡔࡉࡇ ࡅࡍࡀࡐࡓࡉࡔ ࡅࡍࡉࡓࡄࡀࡌ ࡅࡍࡉࡁࡉࡀ ࡓࡄࡀࡌࡕࡀ ࡁࡕࡉࡁࡉࡋ ࡄࡀࡅࡉࡋࡇ ࡒࡀࡋࡀ ࡅࡄࡀࡉࡋࡀ ࡅࡊࡀࡋࡅࡆࡀ ࡖ ࡄࡉࡉࡀ ࡓࡀࡄࡉࡌ ࡉࡀࡓࡃࡍࡀ ࡅࡁࡀࡅࡀࡕࡀ ࡅࡔࡊࡉࡍࡀࡕࡀ ࡅࡌࡀࡎࡉࡒࡕࡀ ࡍࡉࡓࡄࡅࡌ ࡅࡍࡉࡍࡄࡀࡓ ࡀࡌࡀ ࡁࡉࡍࡕࡀ ࡖ ࡄࡉࡉࡀ ࡁࡀࡉࡉࡀ ࡏࡒࡀࡓࡀ ࡓࡁࡀ ࡄࡀࡅࡉࡋࡇ ࡁࡕࡉࡁࡉࡋ ࡅࡁࡀࡍࡄࡅࡓࡀ ࡆࡀࡊࡀࡉࡀ ࡌࡉࡕࡉࡒࡓࡉࡀ ࡏࡅࡕࡓࡉࡀ ࡖ ࡍࡄࡅࡓࡀ ࡀࡃࡉࡀࡅࡓࡇ ࡄࡀࡅࡉࡋࡇ ࡅࡍࡀࡈࡓࡉࡀ ࡖ ࡍࡄࡅࡓࡀ ࡌࡍ ࡋࡅࡀࡕࡇ ࡋࡀࡌࡉࡕࡐࡉࡎࡒࡉࡀ ࡅࡓࡀࡄࡉࡌࡋࡇ ࡌࡀࡍࡃࡀ ࡖ ࡄࡉࡉࡀ ࡅࡄࡀࡃࡉࡁࡇ ࡏࡅࡕࡓࡉࡀ ࡖ ࡍࡄࡅࡓࡀ ࡌࡉࡕࡀࡅࡆࡉࡐࡉࡀ ࡏࡋࡇ ࡅࡔࡉࡁࡉࡀࡄࡉࡀ ࡅࡏࡊࡅࡓࡉࡀ ࡋࡀࡌࡑࡉࡉࡍ ࡌࡉࡄࡈࡉࡁࡇ ࡅࡁࡍࡉࡀ ࡀࡍࡀࡔࡉࡀ ࡌࡍ ࡒࡅࡃࡀࡌࡇ ࡌࡉࡕࡊࡀࡁࡔࡉࡀ ࡗ ࡖ ࡍࡀࡐࡉࡒ ࡌࡍ ࡐࡀࡂࡓࡇ ࡓࡅࡀࡄࡀ ࡌࡀࡔࡊࡀ ࡅࡌࡉࡔࡕࡊࡍࡀࡋࡇ ࡔࡊࡉࡍࡕࡀ ࡅࡍࡉࡄࡅࡉࡋࡇ ࡏࡒࡀࡓࡀ ࡁࡀࡉࡍࡉࡀ ࡏࡅࡕࡓࡉࡀ ࡆࡀࡊࡅࡕࡀ ࡍࡀࡐࡔࡀ ࡄࡀࡅࡉࡋࡇ ࡅࡌࡔࡀࡁࡉࡍ ࡄࡉࡉࡀ ࡅࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡌࡀࡍࡃࡀ ࡖ ࡄࡉࡉࡀ ࡅࡓࡀࡄࡌࡉࡀ ࡔࡅࡌࡇ ࡅࡆࡀࡊࡉࡀ ࡂࡀࡁࡓࡀ ࡖ ࡀࡎࡂࡉࡀ ࡋࡊࡀ ࡎ_ ࡀ ࡕࡅࡌ ࡏࡎࡕࡀࡃࡓࡀࡕ ࡅࡎࡉࡋࡒࡀࡕ ࡋࡓࡉࡔ ࡄࡀࡆࡉࡍ ࡎࡉࡃࡓࡀ ࡖ ࡂࡀࡃࡀࡍࡀ ࡋࡔࡅࡌ ࡄࡉࡉࡀ ࡅࡋࡓࡅࡔࡅࡌ ࡌࡀࡍࡃࡀ ࡖ ࡄࡉࡉࡀ ࡅࡋࡔࡅࡌࡀࡉࡄࡅࡍ ࡖ ࡄࡉࡁࡉࡋ ࡅࡔࡉࡕࡉࡋ ࡅࡀࡍࡅࡔ ࡌࡔࡀࡁࡀ ࡔࡅࡌࡀࡉࡄࡅࡍ ࡁࡀࡕࡓࡀ ࡎࡀࡂࡉࡀ ࡁࡉࡕ ࡕࡅࡔࡋࡉࡌࡀ ࡄࡕࡀࡌࡕࡀ ࡁࡉࡅࡌࡀ ࡖ ࡀࡓࡁࡀ ࡄࡀࡁࡔࡀࡁࡀ ࡅࡄࡀࡌࡔࡀ ࡁࡉࡀࡄࡓࡀ ࡖ ࡕࡀࡉࡌࡅࡆ ࡑࡀࡓࡈࡀࡍࡀ ࡖ ࡄࡅ ࡀࡊࡉࡓ ࡁࡉࡄࡀࡓࡀ ࡁࡔࡉࡕࡀ ࡖ ࡀࡓࡁࡀ ࡄࡀࡁࡔࡀࡁࡀ ࡋࡔࡍࡀࡕ ࡏࡌࡀࡕࡉࡍ ࡅࡔࡉࡕࡀࡎࡀࡓ ࡔࡍࡉࡀ ࡀࡁࡀࡕࡀࡓ ࡀࡋࡐࡀ ࡖ ࡒࡀࡁࡀࡋࡉࡅࡍ ࡀࡓࡁࡀࡉࡉࡀ ࡀࡓࡀࡁ ࡀࡋࡌࡀ

ࡏࡋࡀࡅࡀࡉࡄࡅࡍ ࡅࡁࡀࡈࡋࡀ ࡌࡀࡍࡃࡀ ࡖ ࡄࡉࡉࡀ ࡋࡓࡅࡂࡆࡀࡉࡄࡅࡍ ࡌࡍ ࡊࡀࡍࡀ ࡓࡁࡀ ࡖ ࡍࡉࡔࡌࡀࡕࡀ ࡁࡌࡃࡉࡍࡕࡀ ࡖ ࡄࡅࡀࡉࡆࡀ ࡁࡌࡉࡀ ࡖ ࡊࡀࡓࡊࡀ ࡁ(ࡔ)ࡉࡓࡅࡐ ࡖ ࡎࡀࡃࡀ ࡁࡄࡊࡅࡌ ࡖ ࡎࡀࡉࡉࡃ ࡌࡄࡀࡌࡀࡃ ࡁࡓ ࡎࡀࡉࡉࡃ ࡔࡅࡃ ࡀࡋࡀࡄ ࡁࡓ ࡎࡀࡉࡉࡃ (ࡀyࡉࡍ)ࡀࡋࡉࡀ ࡁࡓ ࡎࡀࡉࡉࡃ (ࡀyࡉࡍ)ࡀࡁࡃࡀࡋࡀࡄ ࡁࡓ ࡎࡀࡉࡉࡃ (ࡀyࡉࡍ)ࡀࡋࡉࡀ ࡁࡓ ࡎࡀࡉࡉࡃ ࡊࡀࡋࡀࡐ ࡁࡓ ࡎࡀࡉࡉࡃ (ࡄ)ࡀࡉࡉࡃࡀࡓ ࡁࡓ ࡎࡀࡉࡉࡃ ࡌࡅࡄࡎࡉࡍ ࡁࡓ ࡎࡀࡉࡉࡃ ࡌࡉࡈࡋࡀࡁ ࡁࡓ ࡎࡀࡉࡉࡃ ࡌࡁࡀࡓࡀࡊ ࡁࡓ ࡎࡀࡉࡉࡃ ࡌࡅࡄࡎࡉࡍ ࡁࡓ ࡎࡀࡉࡉࡃ ࡐࡀࡋࡀࡄ ࡁࡓ ࡀࡁࡃࡀࡋࡀࡄ ࡋࡌࡀࡄࡃࡉࡀ ࡑࡀࡄࡉࡁ ࡋࡆࡀࡌࡀࡍ ࡅࡔࡉࡄࡉࡀࡍࡀ ࡓࡁࡀ ࡎࡀ ࡎࡀ. ࡄࡀࡆࡉࡍ ࡒࡅࡋࡀࡎࡕࡀ ࡌࡀࡍࡃࡀࡆ ࡌࡍ ࡊࡕࡀࡁࡉࡀ ࡍࡀࡐࡔࡀ ࡁࡂࡅ ࡏࡃࡀࡍ . ࡄࡀࡆࡉࡍ ࡄࡅ ࡐࡀࡋࡂࡀ ࡓࡉࡔࡀࡉࡀ ࡌࡉࡍࡇ ࡖ ࡒࡓࡉࡍࡀࡋࡇ ࡊࡕࡀࡁࡀ ࡒࡀࡃࡌࡀࡉࡀ ࡖ ࡄࡅ ࡎࡉࡃࡓࡀ ࡖ ࡍࡉࡔࡌࡀࡕࡀ ࡔࡅࡌࡇ ࡖ ࡁࡂࡀࡅࡇ ࡄࡀࡋࡉࡍ ࡏࡍࡉࡀࡍࡉࡀ ࡅࡃࡓࡀࡔࡉࡀ ࡌࡀࡍࡃࡉࡆࡉࡀ ࡖ ࡌࡀࡑࡁࡅࡕࡀ ࡅࡌࡀࡎࡉࡒࡕࡀ . ࡅࡀࡍࡀࡔࡀࡕࡀ ࡖ ࡀࡌࡀࡓ ࡅࡓࡍࡉࡀ ࡅࡌࡄࡀࡔࡉࡁ ࡅࡌࡀࡐࡉࡒ ࡋࡄࡀࡆࡉࡍ ࡓࡍࡉࡕࡀ ࡄࡉࡍࡅࡍ ࡌࡀ(ࡔ)ࡉࡃ ࡁࡓ ࡐࡀࡍࡃࡉࡀ ࡁࡓ ࡐࡉ(ࡀyࡉࡍ)ࡉࡋ ࡁࡓ ࡆࡀ(ࡔ)ࡉࡀ ࡁࡓ ࡁࡀ(ࡂ)ࡉࡀ ࡁࡓ ࡔࡀࡌࡊࡉࡀ ࡁࡓ (ࡀyࡉࡍ)ࡀࡁࡉࡃ (ࡀyࡉࡍ)ࡀࡋࡉࡀ ࡁࡓ ࡌࡅࡁࡀࡓࡀࡊ ࡋࡀࡒࡀࡁ ࡌࡀࡍࡃࡅࡉࡀ ࡅࡊࡉࡍࡉࡀࡍࡇ ࡏࡊࡅࡌࡀ ࡅࡔࡅࡌࡀ ࡖ ࡌࡀࡑࡁࡅࡕࡀ ࡀࡃࡀࡌ ࡁࡓ ࡄࡀࡅࡀ ࡅࡆࡀࡅࡇ ࡔࡅࡌࡀ ࡖ ࡌࡀࡑࡁࡅࡕࡀ ࡄࡀࡅࡀ ࡌࡀࡌࡀࡍࡉࡀ ࡐࡕ ࡄࡀࡅࡀ ࡅࡔࡅࡌࡀ ࡖ ࡌࡒࡀࡓࡉࡋࡀ ࡍࡅࡓࡀ ࡁࡓࡀࡕࡀ ࡖ ࡌࡀ(ࡃ)ࡊࡅࡓ ࡁࡓ (ࡄ)ࡀࡐࡉ(ࡈ) ࡁࡓ ࡎࡀࡄࡀࡓ ࡁࡓ ࡌࡉ(ࡄ)ࡎࡉࡍ ࡁࡓ (ࡀyࡉࡍ)ࡀࡁࡃ ࡀࡋࡀࡄ ࡁࡓ (ࡀyࡉࡍ)ࡀࡎࡊࡀࡓ ࡋࡀࡒࡀࡁ ࡊࡀࡌࡉࡎࡉࡀ ࡅࡊࡉࡍࡉࡀࡍࡀ ࡓࡉࡔ ࡃࡓࡀࡆ ࡎࡀ. .

 ࡕࡅࡌ ࡏࡎࡕࡀࡃࡓࡀࡕ ࡄࡀࡆࡉࡍ ࡎࡉࡃࡓࡀ ࡖ ࡍࡉࡔࡌࡀࡕࡀ ࡄࡀࡃࡕࡀ ࡁࡊࡀࡌࡐࡉࡅࡕࡀࡓ ࡁࡄࡀࡆࡉࡍ ࡑࡅࡓࡕࡀ ࡆࡉࡁࡍࡀ ࡒࡀࡃࡌࡀࡉࡀ ࡁࡀࡋࡌࡀ ࡄࡀࡆࡉࡍ ࡌࡍ ࡒࡃࡉࡌ ࡅࡏࡋ ࡄࡀࡔࡕࡀ . ࡀࡌࡉࡍࡈࡅࡋ ࡖ ࡊࡅࡋ ࡏࡍࡉࡔ ࡗ ࡖ ࡁࡉࡀ ࡎࡉࡃࡓࡀ ࡖ ࡍࡉࡔࡌࡀࡕࡀ ࡀࡔࡊࡀࡋࡇ . ࡅࡀࡌࡉࡍࡈࡅࡋ ࡖ ࡎࡉࡃࡓࡉࡀ ࡍࡀࡐࡔࡉࡀ ࡖ ࡋࡀࡌࡀࡍࡃࡉࡆࡉࡀ ࡅࡋࡀࡌࡀࡋࡉࡉࡀ ࡌࡍ ࡓࡉࡔ ࡁࡓࡉࡔ ࡎࡀ.

ࡅࡂࡀࡁࡓࡀ ࡖ ࡀࡁࡀࡃ ࡄࡅࡂࡉࡀࡍࡉࡀ ࡌࡀࡍࡃࡀࡉࡀ ࡁࡊࡀࡌࡐࡉࡅࡕࡀࡓ ࡅࡈࡁࡀ(ࡀyࡉࡍ) ࡅࡊࡕࡀࡁ ࡁࡅࡍ ࡄࡅ ࡄࡀࡃ ࡌࡀࡍࡃࡀࡉࡀ ࡌࡄࡀࡉࡌࡍࡀ ࡔࡅࡌࡀ ࡖ ࡌࡀࡑࡁࡅࡕࡀ ࡁࡉࡄࡓࡀࡌ ࡁࡓ ࡄࡀࡅࡀ ࡌࡀࡌࡀࡍࡉࡀ ࡅࡔࡅࡌࡀ ࡖ ࡌࡒࡀࡓࡉࡋࡉࡀ ࡁࡀࡔࡀࡓ ࡁࡓ ࡌࡀ(ࡔ)ࡉࡃ ࡁࡓ ࡐࡀࡍࡃࡉࡀ ࡁࡓ

ࡐࡉ(ࡀyࡉࡍ)ࡉࡋ ࡁࡓ ࡆࡀ(ࡔ)ࡉࡀ ࡁࡓ ࡁࡀ(ࡂ)ࡉࡀ ࡁࡓ ࡔࡀࡌ(ࡐ)ࡉࡀ ࡁࡓ (ࡀyࡉࡍ)ࡀࡁࡉࡃ (ࡀyࡉࡍ)ࡀࡋࡉࡀ ࡁࡓ ࡌࡅࡁࡀࡓࡀࡊ ࡋࡀࡒࡀࡁ ࡌࡀࡍࡃࡅࡉࡀ ࡅࡊࡉࡍࡉࡀࡍࡇ ࡏࡊࡅࡌࡀ ࡎࡀ.

ࡒࡀࡃࡌࡀࡉࡀ ࡖ ࡄࡅ ࡋࡂࡀࡈࡍࡀࡋࡇ ࡌࡍ ࡊࡅࡓࡀࡎࡀ ࡖ ࡁࡉࡕ ࡎࡉࡃࡓࡉࡀ ࡖ ࡏࡍࡕࡀ ࡖ ࡄࡏ ࡉ . ࡎ . ࡃࡓࡅࡉࡓ (E.ࡑ. ࡃࡓoweࡓ) ࡁ(ࡄ)ࡅࡂࡓࡀ ࡀࡋࡊࡉࡃࡀࡁࡀࡍࡉࡀ ࡖ ࡁࡅࡃࡋࡉࡍ ࡁࡏࡅࡊࡎࡐࡅࡓࡃ ࡅࡁࡄࡅࡂࡉࡀࡍࡉࡀ ࡅࡌࡉࡍࡉࡀࡍࡉࡀ ࡖ . ࡎ . ࡄࡀࡌࡔࡉࡍ ࡅࡕࡋࡀࡕࡀ . ࡃ. C. 53 . ࡖ ࡄࡅ ࡔࡀࡐࡉࡓ ࡅࡍࡀࡐࡅࡔ ࡅࡌࡕࡀࡌࡀࡌ ࡖ ࡀࡍࡎࡉࡍࡀࡋࡉࡀ ࡌࡍ ࡓࡉࡔ ࡅࡀࡋࡌࡀ ࡋࡃࡉࡍࡁࡀ ࡌࡍ ࡊࡃࡀࡁࡀ ࡖ ࡏࡃࡀ ࡖ ࡓࡁࡀࡉ ࡀࡃࡀࡌ ࡉࡅࡄࡀࡍࡀ ࡁࡓ ࡎࡀࡌ ࡁࡓ ࡁࡉࡄࡓࡀࡌ ࡁࡓ ࡎࡀ(ࡀyࡉࡍ)ࡃࡀࡍ ࡁࡓ ࡌࡎࡀ(ࡀyࡉࡍ)ࡀࡃ ࡋࡀࡒࡀࡁ ࡊࡀࡌࡉࡎࡉࡀ ࡅࡊࡉࡍࡉࡀࡍࡇ ࡓࡉࡔ ࡃࡓࡀࡆ ࡖ ࡀࡍࡎࡀ ࡋࡍࡀࡐࡔࡉࡇ . .. ࡄࡆࡉࡀ ࡎࡀࡉࡀࡊࡕࡀ ࡖ ࡆࡄࡀࡓࡉࡀ ࡖ ࡀࡍࡎࡉࡍࡀࡋࡉࡀ ࡆࡉࡁࡍࡉࡀ ࡍࡀࡐࡔࡀ ࡁࡄࡀࡆࡉࡍ ࡎࡉࡃࡓࡀ ࡅࡊࡅࡓࡀࡎࡀ ࡄࡀࡃࡕࡀ ࡎࡀ. ࡕࡉࡍࡉࡀࡍࡀ ࡖ ࡄࡅ ࡄࡀࡌࡊࡉࡀ ࡖ ࡊࡕࡀࡁࡀ ࡒࡀࡃࡌࡀࡉࡀ ࡅࡌࡉࡍࡉࡀࡍࡇ ࡕࡋࡀࡕࡀ .ࡃ.C. 3 . ࡎࡀ

ࡕࡋࡉࡕࡀࡉࡀ ࡖ ࡄࡅ ࡀࡁࡀࡃ ࡕࡀࡓࡂࡅࡌࡉࡀ ࡏࡋࡇ ࡕࡀࡓࡂࡅࡌࡀࡍ ࡂࡀࡁࡓࡀ ࡅࡔࡅࡌࡇ ࡖ ࡌࡒࡀࡓࡉࡋࡇ ࡌࡀࡓࡒ ࡋࡉࡃࡆࡁࡀࡓࡎࡒࡉࡀ (ࡌ ࡋࡉࡃࡆࡁࡀࡓࡎࡊࡉ) ࡌࡍ ࡊࡅࡓࡀࡎࡉࡀ ࡖ ࡁࡁࡀࡉࡕࡉࡀ ࡎࡉࡃࡓࡉࡀ ࡖ ࡐࡀࡓࡉࡎ ࡅࡋࡅࡍࡃࡅࡍ . . . ࡅࡔࡅࡌࡇ ࡖ ࡊࡕࡀࡁࡇ ࡏࡄࡋࡉࡀ ࡌࡀ(ࡀyࡉࡍ)ࡓࡅࡐ ࡁࡄࡅࡂࡉࡀࡍࡉࡀ ࡌ . ࡋ . (ࡌࡀࡍࡃࡀࡉࡎcࡄe ࡋࡉࡕࡅࡓࡂࡉeࡍ) ࡎ ࡀ. ࡀࡓࡁࡉࡀࡉࡀ ࡖ ࡄࡅ ࡌࡍ ࡊࡃࡀࡁࡀ ࡖ ࡏࡃࡀ ࡖ ࡓࡁࡀࡉ ࡉࡀࡄࡉࡀ ࡉࡅࡄࡀࡍࡀ ࡁࡓ ࡓࡁࡀࡉ ࡎࡀࡌ ࡁࡓ ࡆࡉࡄࡓࡅࡍ ࡁࡓ ࡁࡉࡄࡓࡀࡌ ࡁࡓ ࡉࡅࡄࡀࡍࡀ ࡁࡓ ࡎࡀࡌ ࡁࡓ ࡁࡉࡄࡓࡀࡌ ࡁࡓ ࡎࡀ(ࡀyࡉࡍ)ࡃࡀࡍ ࡋࡀࡒࡀࡁ ࡊࡀࡌࡉࡎࡉࡀ ࡅࡊࡉࡍࡉࡀࡍࡇ ࡓࡉࡔ ࡃࡓࡀࡆ ࡅࡎࡀࡊࡀ ࡌࡍ ࡊࡃࡀࡁࡀ ࡖ ࡀࡈࡁࡀ(ࡀyࡉࡍ)ࡋࡇ (ࡔ) . ࡃࡉ . ࡌࡅࡓࡂࡀࡍ (J. ࡃe ࡌoࡓࡂࡀࡍ) ࡅࡔࡅࡌࡇ ࡖ ࡊࡅࡓࡀࡎࡇ ࡏࡄࡋࡉࡀ ࡌࡀ(ࡀyࡉࡍ)ࡓࡅࡐ ࡁࡄࡅࡂࡉࡀࡍࡉࡀ ࡖ . ࡌ (ࡈexࡕeࡎ ࡌࡀࡍࡃࡀࡉࡕeࡎ) ࡎࡀ.

 ࡄࡀࡌࡔࡉࡀࡉࡀ ࡌࡍ ࡂࡀࡅ ࡁࡉࡕ ࡂࡉࡍࡆࡀࡉ ࡖ ࡄࡅ ࡎࡉࡃࡓࡀ ࡖ ࡍࡉࡔࡌࡀࡕࡀ ࡌࡍ ࡊࡃࡀࡁࡀ ࡖ ࡏࡃࡀ ࡖ ࡀࡃࡀࡌ ࡁࡓ ࡓࡁࡀࡉ ࡆࡀࡊࡉࡀ ࡆࡉࡄࡓࡅࡍ ࡁࡓ ࡂࡀࡍࡆࡉࡁࡓࡀ ࡕࡀࡒࡍࡀ ࡅࡓࡉࡔࡀ ࡃࡀࡓࡀ ࡄࡅ ࡓࡁࡀࡉ ࡅࡕࡀࡂࡀ ࡎࡀࡌࡋࡉࡀ ࡁࡓࡉࡔࡉࡀ ࡄࡅ ࡀࡁ ࡀࡁ ࡃࡉࡋࡇ ࡓࡉࡔ ࡀࡌࡀ ࡄࡅ ࡓࡁࡀࡉ ࡓࡀࡌ ࡆࡉࡄࡓࡅࡍ ࡁࡓ ࡓࡁࡀࡉ ࡎࡀࡌ ࡁࡉࡄࡓࡀࡌ ࡁࡓ ࡓࡁࡀࡉ ࡉࡀࡄࡉࡀ ࡆࡉࡄࡓࡅࡍ ࡁࡓ ࡓࡁࡀࡉ ࡁࡉࡄࡓࡀࡌ ࡔࡉࡕࡉࡋ ࡁࡓ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡅࡂࡀࡍࡆࡉࡁࡓࡀ ࡕࡀࡒࡍࡀ ࡁࡄࡉࡓࡉࡀ ࡓࡁࡀࡉ ࡉࡀࡄࡉࡀ ࡁࡓ ࡓࡁࡀࡉ ࡆࡉࡄࡓࡅࡍ ࡁࡓ ࡓࡁࡀࡉ ࡉࡀࡄࡉࡀ ࡌࡄࡀࡕࡀࡌ ࡁࡓ ࡀࡃࡀࡌ ࡁࡓ ࡀࡃࡀࡌ ࡉࡅࡄࡀࡍࡀ ࡁࡓ ࡁࡉࡄࡓࡀࡌ ࡁࡓ ࡔࡀࡌࡎ ࡁࡓ ࡂࡀࡍࡉࡌ ࡁࡓ ࡓࡁࡀࡉ ࡀࡃࡀࡌ ࡁࡓ ࡀࡁࡅࡄࡅࡍ ࡖ ࡂࡀࡍࡆࡉࡁࡓࡉࡀ ࡓࡁࡀࡉ ࡉࡀࡄࡉࡀ ࡁࡓ ࡊࡉࡍࡉࡀࡍࡉࡀ (ࡀyࡉࡍ)ࡀࡆࡉࡆ ࡋࡀࡒࡀࡁ ࡊࡐࡀ(ࡔ)ࡉࡀ ࡅࡃࡀࡓࡀࡔࡉࡀ ࡖ ࡀࡍࡎࡀ ࡋࡄࡀࡃ ࡔࡀࡋࡌࡀࡍࡕࡉࡀ ࡖ ࡄࡏ ࡏࡌࡀ ࡃࡉࡋࡇ ࡔࡅࡌࡀ ࡖ ࡌࡀࡑࡁࡅࡕࡀ ࡄࡀࡅࡀ ࡎࡉࡌࡀࡕ ࡐࡕ ࡌࡅࡃࡀࡋࡀࡋ ࡅࡔࡅࡌࡀ ࡖ ࡒࡀࡓࡀࡋࡀ (ࡀyࡉࡍ)ࡋࡀࡉࡀ ࡅࡀࡄ ࡁࡉࡍࡕ (ࡔ)ࡐࡋࡀ ࡏࡁࡉࡍ (ࡔ)ࡀࡁࡅࡓ ࡏࡁࡉࡍ ࡔࡁࡀࡉࡁ ࡏࡁࡉࡍ (ࡄ)ࡀࡁࡀࡉࡁ

ࡏࡁࡉࡍ ࡁࡋࡀࡔ ࡏࡁࡉࡍ (ࡀyࡉࡍ)ࡀࡁࡃ ࡏࡁࡉࡍ ࡁࡃࡀࡓ ࡏࡁࡉࡍ ࡌࡄࡀࡍࡅ ࡅࡎࡀࡉࡊࡀ ࡀࡋࡌࡀ ࡋࡃࡉࡍࡁࡀ ࡖ ࡔࡅࡌࡀ ࡖ ࡄࡅ ࡌࡍ ࡊࡉࡍࡉࡀࡍࡀ ࡊࡀࡌࡉࡎ ࡋࡀࡒࡀࡁ ࡓࡉࡔ ࡃࡓࡀࡆ ࡖ ࡀࡍࡎࡀࡋࡀ ࡌࡍ ࡎࡉࡃࡓࡀ ࡖ ࡀࡍࡄࡀࡓ ࡁࡓࡀࡕ ࡂࡀࡍࡆࡉࡁࡓࡀ ࡓࡀࡌࡀ ࡆࡉࡄࡓࡅࡍ ࡄࡅ ࡀࡁ ࡀࡁ ࡃࡉࡋࡇ ࡓࡀࡌ ࡆࡉࡄࡓࡅࡍ ࡄࡅ ࡀࡍࡎࡀࡋࡀ ࡌࡍ ࡎࡉࡃࡓࡀ ࡖ ࡉࡀࡄࡉࡀ ࡉࡅࡄࡀࡍࡀ ࡁࡓ ࡁࡓࡀࡊࡕࡀࡓ ࡊࡉࡍࡉࡀࡍࡀ ࡊࡅ(ࡄ)ࡀࡉࡋࡉࡀ ࡅࡎࡀࡉࡊࡀ ࡋࡃࡉࡍࡁࡀ . ࡅࡄࡀࡆࡉࡍ ࡎࡉࡃࡓࡀ ࡏࡎࡕࡀࡃࡓࡀࡕ ࡅࡎࡉࡋࡒࡀࡕ ࡋࡓࡉࡔ ࡁࡉࡅࡌࡀ ࡖ ࡄࡀࡁࡔࡀࡁࡀ ࡎࡓࡉࡍ ࡁࡉࡀࡄࡓࡀ ࡌࡉࡑࡀࡉ ࡎࡉࡕࡅࡀ ࡋࡔࡍࡀࡕ ࡀࡕࡔࡀࡌࡀ ࡅࡓࡁࡀ ࡅࡕࡌࡀࡍࡀࡍ ࡔࡍࡉࡀ ࡀࡁࡀࡕࡀࡓ ࡀࡋࡐࡀ ࡄࡅ ࡉࡀࡄࡉࡀ ࡉࡅࡄࡀࡍࡀ 1984 . ࡄࡅ (ࡀyࡉࡍ)ࡉࡎࡀ 1933 . 1352 ࡒࡀࡁࡉࡋࡉࡅࡍ ࡀࡓࡁࡀࡉࡀ . ࡁ(ࡄ)ࡀࡊࡌ ࡐࡀࡉࡑࡀࡋ ࡏࡁࡉࡍ (ࡄ)ࡎࡀࡉࡍ ࡌࡋࡀࡊ (ࡀyࡉࡍ)ࡀࡓࡁࡀ ࡁࡌࡀࡕࡀ (ࡔ)ࡋ(ࡀyࡉࡍ)ࡄ ࡄࡅ ࡎࡀ.. ࡔࡉࡕࡀࡉࡀ ࡄࡀࡌࡊࡀ ࡖ ࡊࡃࡀࡁࡀ ࡄࡀࡌࡔࡉࡀࡉࡀ ࡖ ࡄࡅ ࡌࡍ ࡊࡃࡀࡁࡀ ࡖ ࡏࡃࡀ ࡖ ࡓࡀࡌ ࡆࡉࡄࡓࡅࡍ ࡁࡓ ࡓࡁࡀࡉ ࡉࡀࡄࡉࡀ ࡆࡉࡄࡓࡅࡍ ࡁࡓ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡅࡓࡉࡔ ࡃࡀࡓࡀ ࡖ ࡄࡅ ࡀࡁ ࡀࡁ ࡃࡉࡋࡇ ࡄࡅ ࡓࡁࡀࡉ ࡓࡀࡌ ࡆࡉࡄࡓࡅࡍ ࡁࡓ ࡓࡁࡀࡉ ࡁࡉࡄࡓࡀࡌ ࡔࡉࡕࡉࡋ ࡁࡓ ࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡅࡂࡀࡍࡆࡉࡁࡓࡀ ࡕࡀࡒࡍࡀ ࡁࡄࡉࡓࡀ ࡓࡁࡀࡉ ࡉࡀࡄࡉࡀ ࡁࡓ ࡓࡁࡀࡉ ࡆࡉࡄࡓࡅࡍ ࡁࡓ ࡓࡁࡀࡉ ࡉࡀࡄࡉࡀ ࡌࡄࡀࡕࡀࡌ ࡁࡓ ࡀࡃࡀࡌ ࡁࡓ ࡀࡃࡀࡌ ࡉࡅࡄࡀࡍࡀ ࡁࡓ ࡁࡉࡄࡓࡀࡌ ࡁࡓ ࡔࡀࡌࡎ ࡁࡓ ࡂࡀࡍࡀࡌ ࡁࡓ ࡓࡁࡀࡉ ࡀࡃࡀࡌ ࡁࡓ ࡀࡁࡅࡄࡅࡍ ࡖ ࡂࡀࡍࡆࡉࡁࡓࡉࡀ ࡓࡁࡀࡉ ࡉࡀࡄࡉࡀ ࡁࡓ ࡓࡁࡀࡉ ࡀࡍࡅࡔ ࡊࡉࡍࡉࡀࡍࡀ (ࡀyࡉࡍ)ࡀࡆࡉࡆ ࡋࡀࡒࡀࡁ ࡊࡅࡐࡀ(ࡔ)ࡉࡀ ࡅࡃࡅࡓࡀࡔࡉࡀ ࡖ ࡀࡍࡎࡀ ࡋࡄࡀࡃ ࡔࡀࡋࡌࡀࡍࡀ ࡅࡌࡄࡀࡉࡌࡍࡀ ࡖ ࡄࡅ ࡀࡃࡀࡌ ࡉࡅࡄࡀࡍࡀ ࡁࡓ ࡌࡅࡃࡀࡋࡀࡋ ࡅࡔࡅࡌࡀ ࡖ ࡒࡀࡓࡉࡋࡀ (ࡔ)ࡀࡃࡀࡄ ࡏࡁࡉࡍ (ࡀyࡉࡍ)ࡀࡃࡀࡄ ࡏࡁࡉࡍ (ࡀyࡉࡍ)ࡀࡅࡀࡈ ࡏࡁࡉࡍ ࡍࡀࡀࡓࡀࡆ ࡏࡁࡉࡍ (ࡀyࡉࡍ)ࡀࡁࡃ ࡀࡋࡀࡄ ࡌࡍ ࡊࡉࡍࡉࡀࡍࡀ ࡎࡀࡁࡅࡓ ࡖ ࡀࡍࡎࡀࡋࡀ ࡌࡍ ࡎࡉࡃࡓࡀ ࡖ ࡊࡃࡀࡁࡀ ࡖ ࡀࡁ ࡀࡁ ࡃࡉࡋࡇ ࡖ ࡄࡅ ࡓࡁࡀࡉ ࡓࡀࡌ ࡆࡉࡄࡓࡅࡍ ࡅࡎࡀࡉࡊࡀ . ࡅࡄࡀࡆࡉࡍ ࡎࡉࡃࡓࡀ ࡏࡎࡕࡀࡃࡓࡀࡕ ࡅࡎࡉࡋࡒࡀࡕ ࡋࡓࡉࡔ ࡁࡉࡅࡌࡀ ࡖ ࡀࡓࡁࡀ ࡄࡀࡁࡔࡀࡁࡀ ࡔࡉࡕࡀࡎࡀࡓ ࡁࡉࡀࡄࡓࡀ ࡖ ࡀࡉࡀࡓ ࡕࡀࡅࡓࡀ ࡁࡔࡉࡃࡕࡀ ࡕࡋࡀࡕࡀ ࡁࡄࡀࡁࡔࡀࡁࡀ ࡋࡔࡍࡀࡕ ࡕࡋࡀࡕࡌࡀ ࡅࡕࡋࡀࡕࡀ ࡅࡄࡀࡌࡔࡉࡍ ࡀࡁࡀࡕࡀࡓ ࡀࡋࡐࡀ ࡋࡔࡍࡀࡕ ࡕࡔࡉࡌࡀ ࡅࡔࡅࡁࡀ ࡅࡕࡌࡀࡍࡉࡍࡉࡀ ࡀࡔࡍࡉࡉࡀ ࡀࡁࡀࡕࡀࡓ ࡀࡋࡐࡉࡀ ࡉࡀࡄࡉࡀ ࡉࡅࡄࡀࡍࡀ ࡋࡔࡍࡀࡕ ࡀࡕࡅࡔࡌࡀ ࡅࡕࡋࡀࡕࡉࡍ ࡅࡀࡓࡁࡀ ࡀࡔࡍࡉࡉࡀ ࡀࡁࡀࡕࡀࡓ ࡀࡋࡐࡀ ࡄࡅ ࡌࡀ(ࡄ)ࡔࡉࡀ . 1987 ࡉࡀࡄࡉࡀ ࡉࡅࡄࡀࡍࡀ. 1934 (ࡀyࡉࡍ)ࡉࡎࡀ . 1353 ࡀࡓࡁࡀࡉ . ࡎࡀ. .

ࡕࡅࡌ ࡏࡎࡕࡀࡃࡓࡀࡕ ࡅࡎࡉࡋࡒࡀࡕ ࡋࡓࡉࡔ ࡄࡀࡆࡉࡍ ࡎࡉࡃࡓࡀ ࡖ ࡂࡀࡃࡀࡍࡀ ࡋࡔࡅࡌ ࡄࡉࡉࡀ ࡅࡋࡓࡔࡅࡌ ࡌࡀࡍࡃࡀ ࡖ ࡄࡉࡉࡀ ࡅࡋࡔࡅࡌࡀࡉࡄࡅࡍ ࡖ ࡄࡉࡁࡉࡋ ࡅࡔࡉࡕࡉࡋ ࡅࡀࡍࡅࡔ ࡌࡔࡀࡁࡀ ࡔࡅࡌࡀࡉࡄࡅࡍ ࡁࡀࡕࡓࡀ ࡎࡀࡂࡉࡀ ࡁࡉࡕ ࡕࡅࡔࡋࡉࡌࡀ ࡄࡕࡀࡌࡕࡀ ࡁࡉࡅࡌࡀ ࡖ ࡓࡄࡀࡈࡉࡀ ࡅࡏࡎࡓࡉࡍ ࡁࡉࡀࡄࡓࡀ ࡖ ࡊࡀࡍࡅࡍ ࡄࡉࡈࡉࡀ ࡖ ࡄࡅ ࡌࡉࡑࡀࡉ ࡐࡀࡉࡉࡆ ࡁࡔࡉࡕࡀ ࡖ ࡀࡓࡁࡀ ࡄࡀࡁࡔࡀࡁࡀ ࡋࡔࡍࡀࡕ ࡀࡓࡁࡉࡌࡀ ࡅࡕࡔࡀࡎࡀࡓ ࡔࡍࡉࡀ ࡀࡁࡀࡕࡀࡓ ࡀࡋࡐࡀ ࡔࡉࡃࡕࡀ ࡖ ࡒࡀࡁࡉࡋࡉࡅࡍ ࡀࡓࡁࡀࡉࡉࡀ . ࡅࡕࡓࡉࡎࡀࡓ ࡁࡉࡀࡄࡓࡀ ࡖ ࡕࡀࡌࡅࡆ ࡖ ࡄࡅ . (ࡔ)ࡅࡍ . ࡋࡔࡍࡀࡕ ࡕࡔࡉࡌࡀ ࡅࡕࡔࡉࡍ ࡅࡕࡌࡀࡍࡉࡀ ࡔࡍࡉࡀ ࡀࡁࡀࡕࡀࡓ ࡀࡋࡐࡀ ࡔࡉࡃࡕࡀ ࡖ ࡓࡅࡌࡀࡉࡉࡀ ࡁࡁࡀࡉࡕࡀࡉࡀࡍ ࡖ ࡍࡀࡐࡔࡀࡉࡀ ࡁࡀࡕࡓࡀ ࡖ ࡀࡅࡎࡕࡓࡀࡋࡉࡀ ࡅࡁࡌࡀࡕࡀ ࡖ ࡎࡉࡃࡍࡉࡀ ࡅࡁࡌࡉࡀ ࡖ ࡌࡀࡍࡋࡉࡀ . ࡄࡉࡉࡀ

ࡄࡃࡅࡍ ࡋࡀࡋࡀࡌ ࡀࡋࡌࡉࡀ ࡅࡆࡀࡊࡉࡀ ࡌࡀࡍࡃࡀ ࡖ ࡄࡉࡉࡀ ࡅࡀࡃࡉࡀࡅࡓࡀ ࡄࡉࡁࡉࡋ ࡅࡔࡉࡕࡉࡋ ࡅࡀࡍࡅࡔ ࡄࡉࡉࡀ ࡆࡀࡊࡉࡍ ࡋࡊࡅࡋࡄࡅࡍ ࡏࡅࡁࡀࡃࡉࡀ ࡅࡄࡉࡉࡀ ࡆࡀࡊࡉࡍ ࡎࡀ ࡎࡀ .